၂၀၂၆-၂၀၂၇ ဘဏ္ဍာနှစ် ဩဂုတ်လတစ်လတာအတွင်း ဆန်နဲ့ဆန်ကွဲ တန်ချိန်တစ်သိန်း‌လေးသောင်းကျော်တင်ပို့ထားပြီး ပြီးခဲ့တဲ့ ဇူလိုင်လနဲ့နှိုင်းယှဉ်ပါက တန်ချိန်သုံးသောင်းကျော်အထိ လျော့နည်းတင်ပို့ထားတယ်လို့ မြန်မာနိုင်ငံဆန်စပါးအသင်းချုပ်က သိရပါတယ်။

#Local_News
Published 08 September 2026
#ဆန် #ဆန်ကွဲ
#YMG/NN #Yangon_Times

#Daily_News
Published 08 September 2026

၁။‌ မြန်မာ့ပထမဆုံး Startup World Cup ပြိုင်ပွဲမှ Winner ဆုရရှိသူ ကမ္ဘာ့အဆင့်ပြိုင်ပွဲသို့ ဝင်ရောက်ယှဉ်ပြိုင်နိုင်မည်

၂။ ‌စားအုန်းဆီဝယ်ယူခွင့်စာအုပ်များကို One Stop Service ဖြင့်ဆောင်ရွက်ပေး

၃။‌‌‎ ဩဂုတ်လအတွင်း ဆန်နှင့်ဆန်ကွဲတန်ချိန် တစ်သိန်း‌လေးသောင်းကျော်တင်ပိုထား

၄။‎ တရုတ်ပြည်၏အိမ်မွေးတိရိစ္ဆာန်ကဏ္ဍတိုးတက်ပြောင်းလဲလာပုံကိုဖော်ညွှန်းနေသည့် Pet Fair Asia 2026ပြပွဲ ရှန်ဟိုင်း၌ကျင်းပ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 08 September 2026

■ လေးမျက်နှာမြို့နယ် ငဝန်တာနိမ့်ကျမှုအပေါ် ရေဝင်လမ်းကြောင်း ပိတ်ဆို့မှုလုပ်ငန်းများကို ဆောင်ရွက်လျက်ရှိရာ ယနေ့တွင်ရေဝင်လမ်းကြောင်းကို ထိန်းချုပ်ဆောင်ရွက်နိုင်ခဲ့ပြီ ဖြစ်ကြောင်း တိုင်းဒေသကြီးအစိုးရအဖွဲ့မှသိရသည်။

■ ယခုနှစ် ဇူလိုင်လနှောင်းပိုင်းကာလအတွင်း ဧရာဝတီတိုင်းဒေသကြီးတွင် မိုးသည်းထန်စွာ ရွာသွန်းမှုနှင့် ငဝန်မြစ်ရေ မြင့်တက်လာမှုတို့ကြောင့် ဟင်္သာတခရိုင်၊ လေးမျက်နှာမြို့နယ် ငဝန်တာ၏ အောက်ခံမြစ်ကျိုးအင်း သဲကြောမှ ထူးပေါက်၍ ရေဖြတ်သန်းစီးဆင်းမှုကြောင့် တာတမံ နိမ့်ကျပြီး ရေကျော်စီးဝင်မှုသည် ဇူလိုင်လ ၃၀ ရက် ည ၁၀ နာရီ ၄၂ မိနစ်တွင် စတင်ဖြစ်ပေါ်ခဲ့သဖြင့် တာတမံ အရေးပေါ်ကာကွယ်ရေးလုပ်ငန်းနှင့် ရေဝင်လမ်းကြောင်း ပိတ်ဆို့ရေးလုပ်ငန်းများကို ဩဂုတ်လ(၄) ရက်နေ့မှစတင်ဆောင်ရွက်ခဲ့ရာ Steel Sheet Pile များရိုက်သွင်း၍ ကာရံခြင်းလုပ်ငန်းများ အပြီးသတ်ရိုက်သွင်းပြီး၍ ယနေ့တွင် ရေဝင်လမ်းကြောင်းကို ထိန်းချုပ်နိုင်ခဲ့ပြီးဖြစ်သည်။

■ ဆက်လက်၍ ကာရံ ပိတ်ဆို့ပြီးသော Steel Sheet Pile များအား အတွင်းအပြင်ရေမျက်နှာပြင်ကွာခြားလာမှုကြောင့် ပြင်ပ ရေတွန်းအားဖြစ်ပေါ်လာမှုအား ခံနိုင်ရည်ရှိရန်အတွက် Jumbo Bags(သဲအိတ်)များ ဆက်လက်ချခြင်း၊ သဲအိတ်များကာရံခြင်းနှင့် သောင်တူးရေယာဉ်ဖြင့် ရေနက်အိုးအတွင်းသို့ သဲမှုတ်ထည့်ခြင်း၊ Sheet Pile များအားခိုင်မာမှုရှိစေရန် Concrete Sinker အတုံးများချခြင်း၊ သံမဏိဒေါက်တိုင်များ ထပ်မံကျားကန် ထောက်ပေးခြင်းလုပ်ငန်းများ ဆက်လက်ဆောင်ရွက်မည်ဖြစ်ပါသည်။

■ ငဝန်ရေကာတာသည် လေးမျက်နှာမြို့နယ်အတွင်း တာမိုင် ၁၉/၁ မှ ၃၉/၀ အထိ မိုင် ၂၀ ခန့်ရှည်လျားပြီး မြို့ပေါ်ရပ်ကွက် (၅) ခုနှင့် ကျေးရွာအုပ်စု (၂၁) အုပ်စုတို့ကို ကာကွယ်ထားရာ အဆိုပါနေရာတွင် ရေကျော်စီးဝင်မှု စတင်ခဲ့ခြင်းဖြစ်သည်။

■ ဖြစ်စဉ်စတင်သည်နှင့် ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးအေးကျော် ဦးဆောင်ကာ အရေးပေါ် ကယ်ဆယ်ရေးနှင့်တုံ့ပြန်ရေးအဖွဲ့များ စတင်စုဖွဲ့ခဲ့ပြီး အနောက်တောင်တိုင်းစစ်ဌာနချုပ်မှ တပ်မတော်သားများ၊ မီးသတ်တပ်ဖွဲ့ဝင်များ၊ မြန်မာနိုင်ငံရဲတပ်ဖွဲ့ဝင်များနှင့် အနယ်နယ်အရပ်ရပ်မှ လူမှုကူညီရေးအသင်းအဖွဲ့များ စသည့်အဖွဲ့များပူးပေါင်း၍ အရေပေါ်ကူညီကယ်ဆယ်ရေးလုပ်ငန်းများကို ဆောင်ရွက်ခဲ့ပြီး ပြည်သူများအား ယာယီရေရှောင်စခန်းများကို အချိန်မီ ပို့ဆောင်ပေးနိုင်ခဲ့သဖြင့် လူနှင့်တိရစ္ဆာန် ထိခိုက်မှုမရှိခဲ့ခြင်းဖြစ်သည်။

■ တာတမံအရေးပေါ်ကာကွယ်ရေးလုပ်ငန်းနှင့် ရေဝင်လမ်းကြောင်း ပိတ်ဆို့ရေးလုပ်ငန်းများ ကိုလည်း နိုင်ငံတော်အကြီးအကဲများ၊ ပို့ဆောင်ရေးဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ဆောက်လုပ်ရေးဝန်ကြီးဌာနတို့မှ ပြည်ထောင်စုဝန်ကြီးများ၏ လမ်းညွှန်ကြီးကြပ်မှုနှင့်အတူ ဒုတိယဝန်ကြီးများနှင့် ညွှန်ကြားရေးမှူးချုပ်များက အနီးကပ်ကြီးကြပ်ကာ ပညာရှင်များနှင့် ကျွမ်းကျင်လုပ်သားများက နေ့ရောညပါ အရှိန်အဟုန်မြှင့်တင်ဆောင်ရွက်ခဲ့သည်။

■ ယင်းသို့ဆောင်ရွက်ရာတွင် ရေဝင်လမ်းကြောင်းအတွင်း Geo-bags အိတ်ကြီးများချခြင်း၊ ပန်းတာ၏ လက်ဝဲဘက်ခြမ်းနှင့် လက်ယာဘက်ခြမ်းတို့တွင် ရေတိုက်စားမှုမှကာကွယ်ရန် သဲအိတ် ၁၀၀ ပါ နိုင်လွန်ပိုက်ကြိုးဖြင့်ထုပ်ပိုးထားသည့် သဲအိတ်တွဲများချခြင်း၊ ဧရာမောင်သောင်တူးစက်ကြီး ရေယာဉ် တွဲဖြင့် သဲတူးဖော်ပြီး ပန်းတာရေဝင်လမ်းအနီးသို့ သဲမှုတ်သွင်းခြင်း၊ ပန်းတာရေဝင်လမ်း ပိတ်ဆို့ ကာကွယ်ရန်အတွက် ဒဂုန်စာမရီ ရေယာဉ်နှင့် မြဟန်တိုး ရေယာဉ်တို့ဖြင့် Geo-bags အိတ်များချခြင်း၊ ရွှေစင်ကြယ်နှင့် ရွှေနန်းတော် ဆောက်လုပ်ရေးရေယာဉ်များက Steel Sheet Pile များကို ကရိန်းနှင့် Silent Pile Driver, Electric Vibratoury Pile Hammer များ အသုံးပြု၍ ရိုက်သွင်းခြင်း၊ Steel Sheet Pile ပိုမိုတည်ငြိမ်ခိုင်ခံ့စေရန် အနောက်ဘက်မှ ထောက်ကန်ပေးနိုင်ရေး အတွက် သဲအိတ်များချခြင်း၊ Split Barge ရေယာဉ်ဖြင့် ရေယာဉ်အလယ်ပိုင်းမှ ဝမ်းဖွင့်ချသည့် စနစ်ကို အသုံးပြု၍ Geo-Bag သဲအိတ်ကြီးများချခြင်း၊ ရေဝင်လမ်း ပိတ်ဆို့ကာကွယ်ရန် CB တွဲခွံ ၈၀ ပေ × ၁၈ ပေ × ၉ ပေ အတွင်း သဲ၊ ကျောက် ထည့်သွင်း နစ်မြုပ်ဆောင်ရွက်ခဲ့ပြီး လိုအပ်သော စက်ယန္တရားများအကူအညီဖြင့် နေ့ရောညပါ အရှိန်အဟုန်မြှင့်တင်ဆောင်ရွက်ခဲ့ရာ ယနေ့တွင် ရေဝင်လမ်းကြောင်းကို ထိန်းချုပ်နိုင်ခဲ့ခြင်းဖြစ် ကြောင်း သိရသည်။

#YMG/NN #Yangon_Times

#Local_News
Published 08 September 2026
 
■ သုဝဏ္ဏသျှံတောင် ကြိုးပြင်ကာကွယ်တော သတ်မှတ်လိုက်ကြောင်းသယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ သိရသည်။

■ ပြည်ထောင်စုသမ္မတမြန်မာနိုင်ငံတော်အစိုးရ၊ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနသည် ၂၀၁၈ ခုနှစ်၊ သစ်တောဥပဒေပုဒ်မ ၆၊ ပုဒ်မခွဲ (င) အရ အပ်နှင်းထားသော လုပ်ပိုင်ခွင့်များကိုကျင့်သုံးလျက် ရှမ်းပြည်နယ် ကျိုင်းတုံခရိုင် မိုင်းပျဉ်းမြို့နယ်အတွင်း ကျရောက်နေသည့် ဧရိယာအကျယ်အဝန်း ၆၁၀၀၈ ဧကရှိသောနယ်မြေကို “သုဝဏ္ဏသျှံတောင် ကြိုးပြင်ကာကွယ်တော” အဖြစ် ၁၃၈၈ ခုနှစ်၊ ဝါခေါင်လပြည့်ကျော် (၄) ရက် (၂၀၂၆ ခုနှစ်၊ စက်တင်ဘာလ ၁ ရက်) မှစ၍ သတ်မှတ်လိုက်ခြင်းဖြစ်သည်။
 
■ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနသည် သဘာဝထိန်းသိမ်းရေး နယ်မြေများဖွဲ့စည်းခြင်းဖြင့် ဒေသအတွင်းရှိ သစ်ပင်သစ်တောဖုံးလွှမ်းလျက်ရှိနေသောနေရာများကို ဥပဒေတစ်ရပ်ပြဋ္ဌာန်း၍ ကာကွယ်ပြုစုထိန်းသိမ်းခြင်းလုပ်ငန်းများ ပိုမိုဆောင်ရွက်လာနိုင်ခြင်းကြောင့် ဒေသအတွင်း ဂေဟစနစ်များပိုမိုကောင်းမွန်လာခြင်း၊ ရေထွက်ဒေသများအား ရေရှည်တည်တံ့စေရန် ထိန်းသိမ်းပေးခြင်းနှင့် ရာသီဥတုပြောင်းလဲမှုများကို ထိန်းသိမ်းထားနိုင်ပြီး ဒေသခံပြည်သူများ၏ လယ်ယာစိုက်ပျိုးရေးလုပ်ငန်းများအတွက် များစွာအထောက်အကူပြုပြီး အကျိုးကျေးဇူးများစွာကို ဖြစ်ထွန်းစေရန်ရည်ရွယ်၍ ကြိုးပြင်ကာကွယ်တောကို သတ်မှတ်ခြင်းဖြစ်သည်။
 
■ သုဝဏ္ဏသျှံတောင်ကြိုးပြင်ကာကွယ်တောသတ်မှတ်ခြင်းအားဖြင့် ပေါက်ရောက်လျက်ရှိသောကျွန်း၊ ထင်းရှူး၊ အင်ကြင်း၊ သစ်အယ်၊ သစ်ချ၊ သစ်ယား (လောက်ယား)၊ တောင်တမာ စသည်တို့အား ထိန်းသိမ်းနိုင်မည်ဖြစ်ခြင်း၊ သစ်တောသစ်ပင်များနှင့်အတူ မျောက်၊ တောဝက်၊ ဂျီ၊ ဆတ်၊ ယုန်၊ တောကြက်၊ ခါ၊ ငုံး စသည့် တောရိုင်းတိရစ္ဆာန်များကိုလည်း ထိန်းသိမ်းကာကွယ်နိုင်မည်ဖြစ်ခြင်း၊ ဂေဟစနစ်ပိုမိုကောင်းမွန်လာစေခြင်း၊ ဒေသခံပြည်သူများ၏ လူမှုစီးပွားဖွံ့ဖြိုးတိုးတက်မှု အထောက်အကူပြုနိုင်ခြင်း၊ ရာသီဥတုကောင်းမွန်လာခြင်းဖြင့် လယ်၊ ယာ စိုက်ပျိုးရေးလုပ်ငန်းများ၊ ဥယျာဉ်ခြံမြေလုပ်ငန်းများ ပိုမိုဖွံ့ဖြိုးတိုးတက်လာစေခြင်း၊ ကျေးရွာသုံးရေထွက်စိမ့်စမ်းများကောင်းမွန်လာပြီး ရေရှည်တည်တံ့နိုင်မည်ဖြစ်ခြင်း စသည့်အကျိုးကျေးဇူးများ ရရှိနိုင်မည်ဖြစ်ကြောင်းသိရသည်။
 
#YMG/NN #Yangon_Times

#World_News
Published 08 September 2026

■ မြောက်ကိုရီးယားနဲ့ ရုရှားတို့ဟာ ပထမဆုံး ကုန်းလမ်းတံတားကို တနင်္လာနေ့က ဖွင့်လှစ်ခဲ့ပြီး တူမန်မြစ်ကို ဖြတ်သန်းတည်ဆောက်ထားကာ နှစ်ဖက်စလုံးက မဟာဗျူဟာမြောက် မိတ်ဖက်ဆက်ဆံရေးအတွက် အရေးပါတဲ့ မှတ်ကျောက်တစ်ခုအဖြစ် ဖော်ပြထားပါတယ်။

■ ဖွင့်ပွဲအခမ်းအနားမှာ ရုရှားဝန်ကြီးချုပ် မီခေးလ်မီရှုစတင်နဲ့ မြောက်ကိုရီးယားဝန်ကြီးချုပ် ပက်ထယ်ဆောင်တို့ ဗီဒီယိုစနစ်ဖြင့် ဖွင့်လှစ်ခဲ့ပါတယ်။

■ ၁ ကီလိုမီတာခန့် ရှည်လျားပြီး လမ်း ၂ လိုင်းပါတဲ့ တံတားဟာ ရုရှားအဝေးရှေ့ဖျားဒေသရှိ ခါဆန်မြို့နဲ့ မြောက်ကိုရီးယားရှိ ရာဆွန်မြို့တို့ကို တိုက်ရိုက်ဆက်သွယ်ပေးထားပါတယ်။

■ နယ်စပ်ဖြတ်ကျော်လမ်းကြောင်းဟာ တစ်နေ့ကို ယာဉ်စီးရေ ၃၀၀ နဲ့ ခရီးသွား ၂ ကျော်ကို လက်ခံသွားလာနိုင်ရန် တည်ဆောက်ထားတာ ဖြစ်ပါတယ်။

■ တည်ဆောက်ရေးလုပ်ငန်းများကို ၂၀၂၄ ခုနှစ်မှာ ဗလာဒီမာပူတင်နဲ့ ကင်ဂျုံးအန်တို့ လက်မှတ်ရေးထိုးခဲ့တဲ့ နှစ်နိုင်ငံသဘောတူညီချက်အရ ၂၀၂၅ ဧပြီလမှာ စတင်ခဲ့ပါတယ်။

■ အဆိုပါ တံတားကို ၁၉၄၆ ခုနှစ်က ကင်အီဆန်ကို ဗုံးပေါက်ကွဲမှုကနေ ကယ်တင်ခဲ့တယ်လို့ အသိအမှတ်ပြုခံရတဲ့ ဆိုဗီယက်အရာရှိ ယာကော့ဗ်နိုဗီချန်းကို အစွဲပြုကာ အမည်ပေးထားတာ ဖြစ်ပါတယ်။

■ နယ်စပ်ဖြတ်ကျော် ကုန်သွယ်ရေး၊ သယ်ယူပို့ဆောင်ရေးနဲ့ ခရီးသွားလုပ်ငန်းများကို မြှင့်တင်ရန်အတွက် အဓိကအထောက်အကူပြုမယ့် အခြေခံအဆောက်အအုံအဖြစ် နှစ်နိုင်ငံစလုံး ရှုမြင်ကြပါတယ်။

■ အနောက်နိုင်ငံများနဲ့ ဒေသတွင်း လေ့လာသူများကတော့ အဆိုပါ လမ်းကြောင်းသစ်ဟာ ယူကရိန်းစစ်ပွဲကြား နက်ရှိုင်းလာတဲ့ မဟာဗျူဟာနဲ့ စစ်ရေးပူးပေါင်းဆောင်ရွက်မှုကို ခိုင်မာစေကြောင်း ထောက်ပြကြပါတယ်။

Source: Reuters

#World_Science
Published 08 September 2026

■ သိပ္ပံပညာရှင်တွေဟာ ဉာဏ်ရည်တုစနစ်(AI)ကို အသုံးပြုပြီး ကမ္ဘာပေါ်မှာ မရှိသေးတဲ့ ဗိုင်းရပ်စ်တွေကို ပထမဆုံးအနေဖြင့် ပြုလုပ်ခဲ့ကြပါတယ်။

■ ရည်ရွယ်ချက်က ဆေးပညာပိုင်း ဖန်တီးအောင်မြင်မှုရဖို့ မျှော်လင့်ကြတာဖြစ်ပေမယ့် ဘေးအန္တရာယ်ရှိ ရောဂါပိုးတွေ ဖြစ်လာမှာကိုလည်း စိုးရိမ်စရာ ဖြစ်နေပါတယ်။

■ AI မှ ဖန်တီးလိုက်တဲ့ ဗိုင်းရပ်စ်တွေဟာ ဘက်တီးရီးယားများကိုသာ သီးသန့်ပစ်မှတ်ထားကူးစက်တဲ့ Bacteriopages များဖြစ်ပြီး လူနဲ့တိရိစ္ဆာန်ဆဲလ်များကို ကူးစက်ခြင်းမရှိပါဘူး။

■ သုတေသီတွေက အပင်၊ လူ၊ တိရိစ္ဆာန်များကို ကူးစက်နိုင်တဲ့ ဗိုင်းရပ်စ်များရဲ့ မျိုးရိုးဗီဇဆိုင်ရာ သင်္ကေတများကို လေ့ကျင့်ရေးအချက်အလက်များမှ ဖယ်ထုတ်ခဲ့ကြပါတယ်။

■ AI ဖြင့် ဒီဇိုင်းထုတ်ထားတဲ့ မျိုးရိုးဗီဇရာပေါင်းများစွာအနက် ဓာတ်ခွဲခန်းထဲမှာ ထုတ်လုပ်လိုက်တဲ့အခါ Bacteriophages ၁၆ မျိုး အောင်မြင်စွာ သက်ဝင်လှုပ်ရှားလာခဲ့ပါတယ်။

■ အသစ်ဖန်တီးလိုက်တဲ့ ဉာဏ်ရည်တုပိုးများကို ပေါင်းစပ်အသုံးပြုလိုက်တဲ့အခါ ပဋိဇီဝဆေးယဉ်ပါးတဲ့ E.coli ဘက်တီးရီးယားပိုးမွှားများကို ထိရောက်စွာ သုတ်သင်နိုင်ခဲ့ပါတယ်။

■ ဒီနည်းပညာဟာ Phage ကုသနည်းကို ပြောင်းလဲပေးနိုင်ပြီး ဇီဝနည်းပညာ ကိရိယာများကို တိုးချဲ့ပေးကာ ဆေးယဉ်ပါး စူပါဘက်တီးရီးယားများကို အနိုင်ယူနိုင်လိမ့်မယ်လို့ သုတေသီများ မျှော်လင့်ထားကြပါတယ်။

■ အင်တာနက်အသုံးပြုသူတွေနဲ့ ဝေဖန်ရေးများကတော့ ဓာတ်ခွဲခန်းမှ ယိုစိမ့်မှုများ၊ ဇီဝလက်နက်အဖြစ် အသုံးပြုခြင်း၊ ကပ်ဘေးသင့်ရောဂါ ကူးစက်ပြန့်ပွားမှုများ ဖြစ်လာမှာကို စိုးရိမ်ပူပန်ကြောင်း အွန်လိုင်းမှာ ဖော်ပြခဲ့ကြပါတယ်။

Source: WION

#World_Health
Published 08 September 2026

■ လူငယ်တွေမှာ ဆံပင်စောစီးစွာ ဖြူခြင်းဟာ မျိုးရိုးဗီဇ၊ အာဟာရ မပြည့်ဝခြင်းနဲ့ သိုင်းရွိုက်ပြဿနာစတဲ့ အချက်တွေကြောင့် ဖြစ်ပွားရခြင်း ဖြစ်ပါတယ်။

■ ခန္ဓာကိုယ် အသက်အရွယ် ရလာတာနဲ့အမျှ melanocytes ဆဲလ်များ ဆုံးရှုံးပြီး မယ်လနင်ရောင်ခြယ်ထုတ်လုပ်မှု လျော့နည်းသွားတာကြောင့် ဆံပင်ဖြူလာရတာ ဖြစ်ပါတယ်။

■ အသက်အရွယ်ရလို့ သဘာဝအတိုင်း ဆံပင်ဖြူတာကိုတော့ မူလအနက်ရောင်ပြောင်းအောင် ပြန်လုပ်လို့ မရပါဘူး။

■ အသက်အရွယ်ကြောင့် မဟုတ်ဘဲ ကုသပျောက်ကင်းနိုင်တဲ့ အကြောင်းအရင်းတွေကြောင့် ဆံပင်ဖြူမှသာ ပြန်လည်မည်းနက်လာဖို့ ဖြစ်နိုင်ခြေ ရှိပါတယ်။

■ ဗိုက်တာမင်-ဘီ၁၂၊ သံဓာတ်၊ ဖောလစ်အက်ဆစ်၊ ဗိုက်တာမင်-ဒီနဲ့ ကြေးနီဓာတ်ချို့တဲ့မှုတွေကို ဖြည့်စွက်ပြုပြင်ခြင်းဖြင့် ဆံပင်ရောင်ခြယ်ဓာတ် ပြန်လည်ရရှိစေဖို့ ကူညီပေးနိုင်ပါတယ်။

■ သိုင်းရွိုက်ဝေဒနာများ ဒါမှမဟုတ် စိတ်ဖိစီးမှုလိုမျိုး နောက်ခံကျန်းမာရေးပြဿနာများကို ကုသထိန်းချုပ်ခြင်းကလည်း ဆံပင်ပုံမှန်ပြန်မည်းလာစေနိုင်ပါတယ်။

■ ဆီးဖြူသီး ဒါမှမဟုတ် ပျဉ်းတော်သိမ်ရွက်တို့လို သဘာဝကုထုံးတွေက ဆံကေသာထိန်းသိမ်းမှုကို အထောက်အကူပြုပေမယ့် ဆံပင်ဖြူတာကို ပြန်မည်းမလာစေနိုင်ပါဘူး။

■ အရေပြားဆရာဝန်နဲ့ တိုင်ပင်ဆွေးနွေးပါက ကုသလို့ရနိုင်တဲ့ ဆံပင်ဖြူခြင်းနဲ့ အသက်အရွယ်ကြောင့် အမြဲတမ်းဆံပင်ဖြူခြင်းတို့ကို ခွဲခြားသိရှိစေနိုင်မှာ ဖြစ်ပါတယ်။

Source: NDTV

မကြာသေးမီက ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်၏ ဗီယက်နမ် ဆိုရှယ်လစ်သမ္မတနိုင်ငံသို့ သွားရောက်ခဲ့သည့် တရားဝင်ခရီးစဉ်သည် မြန်မာ-ဗီယက်နမ် နှစ်နိုင်ငံ ဆက်ဆံရေးတွင် စာမျက်နှာသစ်တစ်ရပ် ဖွင့်လှစ်နိုင်ခြင်း၏ ပြယုဂ်ဖြစ်သည်။ ဤခရီးစဉ်သည် သမိုင်း အစဉ်အလာကြီးမားသည့် ချစ်ကြည်ရင်းနှီးမှုကို အခြေခံကာ အနာဂတ်ကာလအတွက် ခိုင်မာသော နိုင်ငံရေးယုံကြည်မှုအပြင် စီးပွားရေးနှင့် နည်းပညာစင်္ကြံများကို ပိုမိုကျယ်ပြန့်လာစေရန် မဟာဗျူဟာ မြောက် လမ်းစဖော်ပေးလိုက်ခြင်းဖြစ်ကြောင်း သုံးသပ်ရမည်ဖြစ်သည်။ 

သမိုင်းအစဉ်အလာနှင့် ခိုင်မာသည့် နိုင်ငံရေးယုံကြည်မှု

မြန်မာနှင့် ဗီယက်နမ်နိုင်ငံတို့သည် လွတ်လပ်ရေးကြိုးပမ်းမှု သမိုင်းကြောင်းများ တူညီကြပြီး အခက်အခဲများစွာကို အတူတကွ ဖြတ်သန်းခဲ့ကြသည့် နိုင်ငံများဖြစ်သည်။ 

၁၉၅၄ ခုနှစ်တွင် မြန်မာနိုင်ငံ ဝန်ကြီးချုပ် ဦးနုသည် ဗီယက်နမ်သို့ လာရောက်ခဲ့သည်။  ၁၉၅၈ ခုနှစ် ဖေဖော်ဝါရီလတွင် ဗီယက်နမ်ဥက္ကဋ္ဌ ဟိုချီမင်းသည် မြန်မာနိုင်ငံသို့ လာရောက်ခဲ့ပြီး ရန်ကုန်တက္ကသိုလ်က ၎င်းကို ဥပဒေဆိုင်ရာ ဂုဏ်ထူးဆောင်ပါရဂူဘွဲ့ ချီးမြှင့်နိုင်ခဲ့သည်အထိ နှစ်နိုင်ငံချစ်ကြည်ရေး အခြေခံ  အုတ်မြစ် ခိုင်မာခဲ့သည်။ 

လက်ရှိတွင် နှစ်နိုင်ငံ သံတမန်ဆက်ဆံမှုသည် နှစ် (၅၀) ပြည့် ရွှေရတုတိုင်ခဲ့ပြီဖြစ်ကာ ၂၀၁၇ ခုနှစ်က တည်ထောင်ခဲ့သည့် ဘက်စုံပူးပေါင်းဆောင်ရွက်မှု မိတ်ဖက်ဆက်ဆံရေး (Comprehensive Cooperative Partnership) သည်လည်း ၂၀၂၇ ခုနှစ်တွင် (၁၀) နှစ် ပြည့်မြောက်တော့မည်ဖြစ်သည်။ 

ယခုခရီးစဉ်အတွင်း ခေါင်းဆောင်များ၏ ပြောကြားချက်များသည် နှစ်နိုင်ငံအကြား နိုင်ငံရေးယုံကြည်မှုကို ပိုမိုပီပြင်ခိုင်မာစေခဲ့သည်။ ဗီယက်နမ်သမ္မတ မစ္စတာ တိုလန်းက "အဆွေတော်သမ္မတကြီး၏ ယခုခရီးစဉ်သည် နှစ်နိုင်ငံချစ်ကြည်ရင်းနှီးမှု၊ ဘက်စုံပူးပေါင်းဆောင်ရွက်မှုနှင့် မိတ်ဖက်ဆက်ဆံရေးကို ပိုမိုခိုင်မာစေမည့် ခရီးစဉ်တစ်ခုဖြစ်ပြီး ရှေ့လာမည့်ကာလများအတွင်း ဗီယက်နမ်-မြန်မာ ဆက်ဆံရေးကို ပိုမိုနက်ရှိုင်းခိုင်မာပြီး ထိထိရောက်ရောက် ဖွံ့ဖြိုးတိုးတက်စေရန် လက်တွေ့ကျသော အကျိုး ရလာဒ်များစွာကို ဖော်ဆောင်ပေးနိုင်မည်ဖြစ်ပါကြောင်း" ဟု ပြောကြားခဲ့သည်။ 

ဗီယက်နမ်ဝန်ကြီးချုပ် မစ္စတာ လေမင်ဟုန်ကလည်း "အဆွေတော် သမ္မတကြီး၏ ယခုခရီးစဉ်သည် နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ပိုမိုတိုးမြှင့်ခိုင်မာစေမည်ဟု ယုံကြည်ပါကြောင်း" ထည့်သွင်းပြောကြားခဲ့သည်။ 

မြန်မာနိုင်ငံတော်သမ္မတကလည်း "ဗီယက်နမ်နိုင်ငံအနေဖြင့် စစ်ပွဲဒဏ်နှင့် အရေးယူပိတ်ဆို့ ကန့်သတ် မှုများကို ဆယ်စုနှစ်ပေါင်းများစွာ ကြုံတွေ့ခဲ့ရသည့်ကြားမှ ယခုကဲ့သို့ ဘက်ပေါင်းစုံ ဖွံ့ဖြိုးတိုးတက်  လာသည့် နိုင်ငံတော်တစ်ခုကို တည်ဆောက်နိုင်ခဲ့မှုအပေါ် ဗီယက်နမ်နိုင်ငံ၏ နိုင်ငံ့ခေါင်းဆောင် အဆက်ဆက်ကို လေးစားဂုဏ်ယူပါကြောင်း" ပြန်လည်ပြောကြားခဲ့သည်။ ဤပြောကြားချက်များသည် တစ်နိုင်ငံ၏ ခက်ခဲသော ဖြတ်သန်းမှုနှင့် ကြိုးပမ်းအောင်မြင်မှုများကို အခြားတစ်နိုင်ငံက အပြန်အလှန် အသိအမှတ်ပြုသည့် ခိုင်မာသော နိုင်ငံရေးယုံကြည်မှုကို ပြသနေခြင်းဖြစ်သည်။ 

ပိုမိုကျယ်ပြန့်လာမည့် နည်းပညာစင်္ကြံနှင့် စက်မှုပူးပေါင်းဆောင်ရွက်မှု

ခိုင်မာသည့် နိုင်ငံရေးယုံကြည်မှုအပေါ် အခြေခံ၍ နှစ်နိုင်ငံစီးပွားရေးနှင့် နည်းပညာပူးပေါင်းဆောင် ရွက်မှုများသည် ပိုမိုကျယ်ပြန့်လာခဲ့သည်။ ထို့ပြင် မြန်မာနိုင်ငံအနေဖြင့် ဗီယက်နမ်နိုင်ငံမှ နှစ်ပေါင်း ၄၀ ခန့် အကောင်အထည်ဖော်ခဲ့သည့် "ဒွိုင်မွိုင်း" (Doi Moi) စီးပွားရေးပြုပြင်ပြောင်းလဲမှု အတွေ့အကြုံ  များကို မျှဝေပေးရန်လည်း တောင်းဆိုထားရာ ဤသည်မှာ မြန်မာ့စီးပွားရေး ပြုပြင်ပြောင်းလဲမှုအတွက် မဟာဗျူဟာမြောက် ခြေလှမ်းတစ်ရပ်ဖြစ်သည်။ 

နည်းပညာနှင့် စက်မှုကဏ္ဍတွင်လည်း အလားအလာကောင်းများကို တွေ့မြင်ရသည်။

🔳၂၀၁၈ ခုနှစ်တွင် စတင်ခဲ့သည့် Mytel ဆက်သွယ်ရေးလုပ်ငန်းသည် နှစ်နိုင်ငံ ရင်းနှီးမြှုပ်နှံမှုနှင့် နည်းပညာပူးပေါင်းဆောင်ရွက်မှု၏ စံနမူနာကောင်းဖြစ်ပြီး ယင်းအမည်ကို နိုင်ငံတော်သမ္မတကိုယ်တိုင် ရွေးချယ်ပေးအပ်ခဲ့ခြင်းဖြစ်သည်။ 

🔳မြန်မာနိုင်ငံအနေဖြင့် ရတနာပုံဆိုက်ဘာစီးတီးအပါအဝင် နည်းပညာအထူးဇုန်များတွင် Viettel မှ လာရောက်ရင်းနှီးမြှုပ်နှံပြီး ဒီဂျစ်တယ်နှင့် နည်းပညာဆိုင်ရာပစ္စည်းများ ထုတ်လုပ်ရန် ဖိတ်ခေါ်ထား သည်။ 

🔳ထို့အပြင် ဧရိယာစတုရန်းမီတာ ၅၀၀,၀၀၀ ကျော်ကျယ်ဝန်းပြီး ၂၁ လအတွင်း အပြီးတည်ဆောက်  နိုင်ခဲ့သည့် Vinfast လျှပ်စစ်မော်တော်ယာဉ်ထုတ်လုပ်ရေးစက်ရုံသို့ သွားရောက်လေ့လာခဲ့ခြင်းက အနာဂတ်မော်တော်ယာဉ်နှင့် အဆင့်မြင့်စက်မှုထုတ်လုပ်ရေးကဏ္ဍတွင် ပူးပေါင်းဆောင်ရွက်မှုများ ကျယ်ပြန့်လာနိုင်ကြောင်း ညွှန်ပြနေသည်။ 

မဟာဗျူဟာမြောက် စီးပွားရေးစင်္ကြံလမ်းများ ချိတ်ဆက်ခြင်း

ကုန်သွယ်မှုနှင့် အခြေခံအဆောက်အအုံ ချိတ်ဆက်မှုတွင် မြန်မာနှင့် ဗီယက်နမ်တို့သည် ဒေသတွင်း စီးပွားရေးစင်္ကြံလမ်းများကို အသုံးချရန် အလေးထားလာကြသည်။

🔳မြန်မာနိုင်ငံရှိ သီလဝါစီးပွားရေးဇုန်သည် မြန်မာ (မြဝတီ) - ထိုင်း - လာအို - ဗီယက်နမ် (ဒါနန်း) ချိတ်ဆက်မည့် အရှေ့-အနောက် စီးပွားရေးစင်္ကြံ (East-West Economic Corridor) နှင့် ချိတ်ဆက်သွားမည်ဖြစ်သည်။ 

🔳ထားဝယ်ရေနက်ဆိပ်ကမ်းသည်လည်း တောင်ပိုင်းစီးပွားရေးစင်္ကြံ (Southern Economic Corridor) ဖြစ်သည့် မြန်မာ (ထားဝယ်) - ဗန်ကောက် - လွန်ပရာဘမ် - ဗီယက်နမ် (ဒါနန်း) လမ်းကြောင်းနှင့် ချိတ်ဆက်နိုင်မည်ဖြစ်သည်။ 

🔳ထို့အပြင် မြန်မာ-အိန္ဒိယ-ထိုင်း သုံးနိုင်ငံ အဝေးပြေးလမ်းမကြီးစီမံကိန်းကို အကောင်အထည်  ဖော်လျက်ရှိပြီး ယင်းလမ်းနှင့်ချိတ်ဆက်ကာ ဗီယက်နမ်မှသည် တောင်အာရှဈေးကွက်သို့လည်းကောင်း၊ မြန်မာမှသည် လာအို၊ ဗီယက်နမ်တို့မှတစ်ဆင့် အရှေ့အာရှဈေးကွက်သို့လည်းကောင်း အပြန်အလှန် ဝင်ရောက်နိုင်မည်ဖြစ်သည်။ 

နိဂုံး

အချုပ်အားဖြင့် သုံးသပ်ရလျှင် မြန်မာ-ဗီယက်နမ် ဆက်ဆံရေးသည် သမိုင်းဝင် ချစ်ကြည်ရင်းနှီးမှုမှသည် လက်တွေ့ကျသော မဟာဗျူဟာမြောက် မိတ်ဖက်ဆက်ဆံရေးအဆင့်သို့ ကူးပြောင်းရောက်ရှိ လာပြီဖြစ် သည်။ နိုင်ငံတော်သမ္မတက “တစ်ဦးတည်းဆိုပါက လျင်မြန်စွာသွားနိုင်သော်လည်း အတူတကွပူးပေါင်းမှ  သာလျှင် ဝေးဝေးသို့ ရောက်နိုင်သည်” ဟု စီးပွားရေးဖိုရမ်တွင် ပြောကြားခဲ့သည့်အတိုင်း ကမ္ဘာလုံး ဆိုင်ရာ စီးပွားရေးမရေရာမှုများကို ရင်ဆိုင်ရာတွင် နှစ်နိုင်ငံပူးပေါင်းဆောင်ရွက်မှုသည် အရေးပါလှသည်။ ခိုင်မာသော နိုင်ငံရေးယုံကြည်မှုကို အုတ်မြစ်ချလျက် ဒစ်ဂျစ်တယ်နှင့် နည်းပညာစင်္ကြံများ၊ အရှေ့-အနောက်နှင့် တောင်ပိုင်း စီးပွားရေးစင်္ကြံလမ်းများကို ပေါင်းကူးချိတ်ဆက်ခြင်းဖြင့် မြန်မာ-ဗီယက်နမ် နှစ်နိုင်ငံ၏ အနာဂတ်သည် ပိုမိုကျယ်ပြန့်တောက်ပလာမည်ဖြစ်ကြောင်းသုံးသပ်ရေးသားရပါသည်။

#Local_News
Published 07 September 2026

■ ငမိုးရိပ်ဆည် ရေပိုလွှဲမှရေကျော်နေသော်လည်း ၎င်းရေကျော်ကျသည့် ပမာဏမှာတဖြည်းဖြည်း နည်းပါးကျဆင်းလာမည် ဖြစ်ကြောင်းသိရသည်။

■ ယနေ့ မနက်(၆)နာရီအချိန်တိုင်းထွာချက်များအရ ငမိုးရိပ်တမံရေပိုလွှဲမှ​ ရေ ၂ ဒဿမ ၂၅ ပေ ကျော်​နေသော်လည်း ယမန်နေ့ကတာတမံများတွင် ​မိုးရွာသွန်းမှု နည်းခဲ့ရာတမံအောက်ဖက်​ချောင်း​ရေများလည်း​​ လျော့လာကြောင်းစိုက်ပျိုးရေး၊ မွေးမြူ‌ရေးနှင့်ဆည်မြောင်းဦးစီးဌာနမှ
သိရသည်။

■ ထို့အပြင် စက်တင်ဘာ ၆ ရက်မှ ၁၂ ရက်အတွင်း ဆည်ရေဝေဒေသများဖြစ်သည့် လှည်းကူး၊ တိုက်ကြီးတို့တွင် ၇ ရက် စုစုပေါင်း ခန့်မှန်းမိုးရေချိန် 33mm မှ 66mm (၁.၃ လက်မ မှ ၂.၆ လက်မခန့်)သာ ရရှိတော့မည်ဖြစ်ကြောင်း ပြင်ပမိုးလေဝသပညာရှင်ဦးဝင်းနိုင်က ‌သုံးသပ်ထားသည်။

■ ဒေသတွင်း မိုးရွာသွန်းမှုလျော့နည်းသွားမည်ဖြစ်ရာ ငမိုးရိပ်ဆည်အတွင်းသို့ ရေအသစ်စီးဝင်မှု လျော့ကျသွားမည်ဖြစ်ပြီး ရေပိုလွှဲမှရေကျော်ကျသည့် ပမာဏမှာတဖြည်းဖြည်းနည်းပါးကျဆင်းလာမည်ဖြစ်ကြောင်း သိရသည်။

■ ထို့အပြင် မြောက်ဥက္ကလာပ၊ ဒဂုံမြို့သစ် (အရှေ့/မြောက်) နှင့် ငမိုးရိပ်ချောင်းရိုးတစ်လျှောက်ရှိ မြေနိမ့်ပိုင်းများတွင် ဒီရေတက်ချိန်နှင့် ဆည်ရေကျော်ကျမှု ပေါင်းစပ်ပါက စိုးရိမ်ရသည့်ရေအမြင့်တွင် ခေတ္တ တည်ရှိနေနိုင်သေးသဖြင့် သတိထားစောင့်ကြည့်ရန်လိုအပ်ကြောင်း ၎င်းကဆိုထားသည်။

■ ရန်ကုန်တိုင်း တောင်ပိုင်း/ကမ်းရိုးတန်း ခရိုင်များ (ကျောက်တန်း၊ သံလျင်၊ ကွမ်းခြံကုန်း) - ကမ်းရိုးတန်းအနီး တည်ရှိမှုကြောင့် ၇ ရက်အတွင်း စုစုပေါင်း မိုးရေချိန် 42mm မှ 82mm ခန့် (၁.၆၅ လက်မ မှ ၃.၂၃ လက်မ ခန့်) ရရှိနိုင်ပြီး ပင်လယ်ဒီရေမြင့်တက်ချိန်များတွင် ရေချို/ရေငန် ရောနှော၍ ကမ်းစပ်မြေနိမ့်ပိုင်းများ၌ ရေခေတ္တဝင်နိုင်သော်လည်း ဒေသအလိုက် မိုးရွာသွန်းမှု ပါးသွားမည်ဖြစ်၍ ကြီးမားသော ရေကြီးရေလွှမ်းမိုးမှု အန္တရာယ် ဖြစ်ပေါ်နိုင်ခြေ မရှိနိုင်ကြောင်း ၊မြို့ပြဗဟို မြို့နယ်များဖြစ်သည့်အနောက်ပိုင်းခရိုင်တွင် နေ့စဉ်မိုးရွာသွန်းမှု ပမာဏ 2mm မှ 10mm ခန့် (၀.၀၈ လက်မ မှ ၀.၃၉ လက်မခန့်)သာ ရှိမည်ဖြစ်ရာ မိုးခတ္တခဏမျှသာ ရွာသွန်းနိုင်မည် ဖြစ်ပြီး လျှပ်တပြက်မြို့ပြရေလျှံမှု အခြေအနေများ မရှိတော့ဘဲ မြို့ပြရေစီးရေလာ ပုံမှန်အခြေအနေသို့ ပြန်လည်ရောက်ရှိ သက်သာလာမည်ဖြစ်ကြောင်းသိရသည်။

#YMG/NN #Yangon_Times

#Local_News
Published 07 September 2026

■ မြန်မာ့မီးရထားအနေဖြင့် ရထားစီးခရီးသွားပြည်သူများ ပိုမိုအဆင်ပြေစိတ်ချစွာ သွားလာနိုင်ရေးအတွက် ခေတ်မီလေအေးပေးစက်ပါ DEMU တွဲဆိုင်းသစ်များဖြင့် လူစီးအမြန်ရထားများ ပြေးဆွဲပေးလျက်ရှိရာ DEMU အမြန်ရထားအား ခဲဖြင့်ပစ်ပေါက်ခဲ့သူတစ်ဦးကို ဖမ်းဆီးအရေးယူထားကြောင်း သိရသည်။

■ စက်တင်ဘာ ၅ ရက် ညနေ ၅ နာရီ ၄၁ မိနစ်တွင် အမှတ် (၈) အစုန် နေပြည်တော်-ရန်ကုန် DEMU လူစီးအမြန်ရထားသည် ရန်ကုန်ဘူတာကြီးသို့ ရောက်ရှိခဲ့ပြီး ညနေ ၅ နာရီ ၅၅ မိနစ်တွင် ရထားတွဲဆိုင်းသိမ်းယူရန် မြို့ပတ်ဒီဇယ်စက်ခေါင်းရုံ (အင်းစိန်) သို့ ထွက်ခွာခဲ့သည်။

■ ထိုသို့ ထွက်ခွာလာစဉ် ညနေ ၆ နာရီ ၁၀ မိနစ်ခန့်တွင် ကြည့်မြင်တိုင်ဘူတာအဝင် မိုင်တိုင် ၃/၁၀ နှင့် ၃/၁၁ အကြား ဘုန်းကြီးကျောင်းလမ်းကူးအနီး ရထားဖြတ်သန်းချိန်၌ အမည်မသိအမျိုးသားတစ်ဦးက ရထားအား ခဲဖြင့်ပစ်ပေါက်ခဲ့သဖြင့် အထက်တန်းတွဲ DEMU (U) 5020 ရှိ ခုံအမှတ် 3A နှင့် 3B အကြား ပြတင်းတံခါးဘေး လေကာမှန်မှာ နှစ်လက်မခန့် ပေါက်ထွက်ကြေမွကွဲအက်ခဲ့ကြောင်း သိရသည်။

■ အခင်းဖြစ်ပွားရာနေရာကို စစ်ဆေးပြီး တရားခံဖမ်းဆီးရမိရေးအတွက် CCTV မှတ်တမ်းများအရ လှည့်ကင်း၊ ဝပ်ကင်းများဖြင့် ရထားသံလမ်းတစ်လျှောက် ဝိုင်းပတ်ပိတ်ဆို့ရှာဖွေခဲ့ရာ ယနေ့နံနက် ၃ နာရီတွင် စမ်းချောင်းမြို့နယ်၊ သီရိခေမာရပ်ကွက်၊ ခတ္တာလမ်းရှိ ရထားလမ်းဘေးတွင် အိပ်နေသူ အသက် ၄၁ နှစ်အရွယ် တင်ထွန်း (ခ) ဂနေးစားကို ဖမ်းဆီးရမိခဲ့ကြောင်း သိရသည်။

■ CCTV မှတ်တမ်းများဖြင့် တိုက်ဆိုင်စစ်ဆေးရာ ကိုက်ညီမှုရှိသဖြင့် ဖမ်းဆီးခေါ်ဆောင်၍ စမ်းချောင်းမြို့မရဲစခန်းတွင် (ပ)၃၆၁/၂၀၂၆၊ ရထားပို့ဆောင်ရေးလုပ်ငန်းဥပဒေ ပုဒ်မ ၈၄ ဖြင့် အမှုဖွင့်အရေးယူထားကြောင်း သိရသည်။

■ ထပ်မံစစ်ဆေးရာ စက်တင်ဘာ ၄ ရက်ကလည်း အမှတ် (၈) အစုန် DEMU ရထား၏ ပထမတန်းတွဲအား ခဲဖြင့်ပစ်ပေါက်ခဲ့သည့် အလားတူဖြစ်စဉ်တွင်ပါဝင်ခဲ့ကြောင်း ထပ်မံပေါ်ပေါက်ခဲ့သည်။

■ ရထားကို တစ်စုံတစ်ရာဖြင့် ပစ်ပေါက်ခြင်း သို့မဟုတ် ရထား၏ လုံခြုံမှုကို ထိခိုက်စေသည့် ပြုလုပ်မှုများအတွက် ရထားပို့ဆောင်ရေးလုပ်ငန်းဥပဒေအရ ထောင်ဒဏ် ၅ နှစ်မှ အနှစ် ၂၀ အထိ ချမှတ်နိုင်သည့်အပြင် ငွေဒဏ်လည်းချမှတ်နိုင်ကြောင်း သိရသည်။

■ မြန်မာ့မီးရထားအနေဖြင့် ရထားခရီးစဉ်များ ပိုမိုလုံခြုံကောင်းမွန်စေရေး ဆောင်ရွက်လျက်ရှိသည့်အပြင် ရထားများအား ပစ်ပေါက်ခြင်းကဲ့သို့ အများပြည်သူ၏ အသက်အန္တရာယ်နှင့် ရထားပိုင်ပစ္စည်းများ ထိခိုက်ပျက်စီးစေနိုင်သည့် လုပ်ရပ်များ မဖြစ်ပွားစေရေး ပြည်သူများအနေဖြင့်လည်း ဝိုင်းဝန်းပူးပေါင်းထိန်းသိမ်းပေးရန် လိုအပ်ကြောင်း သိရသည်။

#YMG/SW #Yangon_Times

#World_News
Published 07 September 2026

■ Amazon Prime Air ကုန်တင်လေယာဉ်တစ်စီးဟာ စက်တင်ဘာ ၆ ရက်နေ့ တနင်္ဂနွေနေ့က မိုင်ယာမီ နိုင်ငံတကာလေဆိပ်သို့ ဆင်းသက်စဉ် လေယာဉ်ပြေးလမ်းကျော်လွန်ကာ ပျက်ကျခဲ့တာကြောင့် အနည်းဆုံးလူ ၅ ဦး သေဆုံးခဲ့ကြောင်း ဒေသဆိုင်ရာ တာဝန်ရှိသူများ ပြောကြားခဲ့ပါတယ်။

■ 21 Air လေကြောင်းလိုင်းရဲ့ ခရီးစဉ်အမှတ် 7598 ဖြစ်ပြီး ပွာတိုရီကို ဆန်ဟွာရှိ လူးဝစ်မူနော့ဇ်မာရင် အပြည်ပြည်ဆိုင်ရာလေဆိပ်မှ ထွက်ခွာလာခြင်း ဖြစ်ပါတယ်။

■ အရှေ့ပိုင်းစံတော်ချိန် မွန်းလွဲ ၂ နာရီခန့် ဆင်းသက်စဉ် လေယာဉ်မှာ သတ်မှတ်ထားတဲ့ လေဆိပ်နယ်နိမိတ်အတွင်း မရပ်တန့်နိုင်ခဲ့ပါဘူး။

■ လေယာဉ်ဟာ လေဆိပ်စည်းရိုးကို ထိုးဖောက်ကာ အနီးအနားလမ်းပေါ်သို့ ရောက်ရှိသွားပြီး မော်တော်ယာဉ်များနဲ့ ဝင်တိုက်ခဲ့ပါတယ်။

■ ထိုကနေ မီးလောင်ကျွမ်းမှု ဖြစ်ပွားခဲ့ပြီး ကောင်းကင်သို့ မီးခိုးလုံးကြီးများ လွင့်ပျံသွားခဲ့ပါတယ်။

■ မီးငြှိမ်းသတ်ရန်နဲ့ ရှာဖွေကယ်ဆယ်ရေးလုပ်ငန်းများ ဆောင်ရွက်ရန်အတွက် Miami-Dade မီးသတ်နဲ့ ကယ်ဆယ်ရေးတပ်ဖွဲ့ဝင် ၆၀ ကျော် လာရောက်ခဲ့ကြပါတယ်။

■ အခင်းဖြစ်ပွားရာနေရာမှာ ထိခိုက်ဒဏ်ရာရရှိသူများနဲ့ သေဆုံးသူများရှိကြောင်း ဒေသဆိုင်ရာ တာဝန်ရှိသူများ အတည်ပြုခဲ့ပြီး ထိခိုက်ဒဏ်ရာရသူ အများအပြားကို အနီးရှိဆေးရုံများသို့ ပို့ဆောင်ပေးခဲ့ပါတယ်။

■ အမေရိကန် ဖက်ဒရယ်လေကြောင်း စီမံခန့်ခွဲရေးဦးစီးဌာနနဲ့ အမျိုးသားပို့ဆောင်ဆက်သွယ်ရေး လုံခြုံရေးဘုတ်အဖွဲ့တို့က မတော်တဆဖြစ်ပွားရတဲ့ အကြောင်းအရင်းကို ချက်ချင်းစုံစမ်းစစ်ဆေးနေပြီး ဒီဖြစ်စဉ်ကြောင့် မိုင်ယာမီလေဆိပ် လေယာဉ်ခရီးစဉ်များ ခေတ္တရပ်ဆိုင်းသွားခဲ့ပါတယ်။

Source: Reuters