#Local_News
Published 03 October 2025

▪️ ကုန်သွယ်ရေးလိုငွေပြမှု မဖြစ်ပေါ်စေရေးအတွက် ပို့ကုန်များ ပိုမိုတိုးမြှင့်တင်ပို့နိုင်ရေး အထူးအလေးထား ကြိုးပမ်းဆောင်ရွက်သွားကြရန် ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီ ဥက္ကဋ္ဌ ၊စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးချစ်ဆွေက တိုက်တွန်းပြောကြားခဲ့သည်။

▪️ ယမန်နေ့က ကျင်းပသည့်ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီ (၃/၂၀၂၅)ကြိမ်မြောက် လုပ်ငန်းညှိနှိုင်းအစည်းအဝေးတွင် ယခုကဲ့သို့ပြောကြားခဲ့ခြင်းဖြစ်သည်။

▪️ ပြည်ထောင်စုဝန်ကြီးက မြန်မာကုန်သွယ်မှုမြှင့်တင်ရေးအဖွဲ့နှင့် ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ ညီနောင်အသင်းအဖွဲ့များပူးပေါင်း၍ ပြည်ပဈေးကွက်ကို ပိုမိုရရှိအောင် ဆောင်ရွက်ကြစေလိုကြောင်း၊ ပြည်တွင်း/ပြည်ပ ကုန်သွယ်မှုလုပ်ငန်းများ ဆောင်ရွက်ရာတွင် ပြည်သူလူထုအကျိုးစီးပွား ပိုမိုဖွံ့ဖြိုးရေးကို ရှေးရှူဆောင်ရွက်ရမည်ဖြစ်ကြောင်းပြောကြားခဲ့သည်။

▪️ ထို့ပြင် ပို့ကုန်တင်ပို့ပြီး ပို့ကုန်ရငွေများ အချိန်မီ ပြန်လည်ဝင်ရောက်ရေးကိစ္စရပ်များ၊ စက်သုံးဆီ/စားသုံးဆီ ဖြန့်ဖြူးမှုကိစ္စရပ်များ အဆင်ပြေချောမွေ့စေရေးနှင့် CMP လုပ်ငန်းများ ပိုမိုတင်ပို့နိုင်ရေး ကြိုပမ်းဆောင်ရွက်ကြရန် တိုက်တွန်းခဲ့သည်။

#YMG/SW #Yangon_Times

#World_News
Published 03 October 2025

▪️ WASHINGTON, အောက်တိုဘာ ၂ ရက် (ဆင်ဟွာ) -- ကမ္ဘာ့ဘောလုံးအဖွဲ့ချုပ် ဖီဖာ (FIFA) က ကြာသပတေးနေ့တွင် ၂၀၂၆ ကမ္ဘာ့ဖလားပြိုင်ပွဲ၏ တရားဝင်ဘောလုံးဖြစ်သော ထရိုင်ရွန်ဒါ“TRIONDA” ကို မိတ်ဆက်ခဲ့သည်။ ၎င်းသည် ကနေဒါ၊ မက္ကဆီကိုနှင့် အမေရိကန်ပြည်ထောင်စုတို့ ပူးတွဲအိမ်ရှင်အဖြစ် ပထမဆုံးအကြိမ် လက်ခံကျင်းပမည့် လမ်းကြောင်းပေါ်ရှိ နောက်ထပ် မှတ်တိုင်တစ်ခုလည်း ဖြစ်သည်။

▪️ ဘောလုံးနာမည်ကို စပိန်ဘာသာစကားမှ ဆင်းသက်လာပြီး ယေဘုယျအားဖြင့် “လှိုင်းသုံးခု” ဟု အဓိပ္ပာယ်ရကာ အိမ်ရှင်နိုင်ငံသုံးနိုင်ငံ၏ စည်းလုံးညီညွတ်မှုကို ရည်ညွှန်းသည်။ ဒီဇိုင်းတွင် အနီ၊ အစိမ်းနှင့် အပြာအရောင်များ ပါဝင်ပြီး နိုင်ငံတစ်ခုစီ၏ သင်္ကေတများဖြစ်သည့် - ကနေဒါ၏ မေပယ်ရွက်၊ မက္ကဆီကို၏ လင်းယုန်နှင့် နှင့် အမေရိကန်ပြည်ထောင်စု၏ ကြယ် တို့ကို ထည့်သွင်းထားသည်။

▪️ ဘောလုံးသည် နက်သောချုပ်ရိုးများနှင့်မျက်နှာပြင်များပေါ်တွင် အပြောင်အပြိန်းများပါဝင်သည့် အပြား လေးချပ်ဖြင့် တည်ဆောက်ထားသည်။ ဤပြောင်းလဲမှုများသည် ဘောလုံး၏ တည်ငြိမ်မှု၊ ဆုပ်ကိုင် နိုင်မှုနှင့် ထိန်းချုပ်မှု တို့ကို ပိုမိုကောင်းမွန်စေရန် ရည်ရွယ်သည်ဟု ဖီဖာကဆိုသည်။

▪️ ဘောလုံးထိလိုက်သည်များကို အချိန်နှင့်တပြေးညီ ခြေရာခံရန်အတွက် အတွင်းဘက်တွင် လှုပ်ရှားမှုအာရုံခံကိရိယာ (motion sensor) တစ်ခုပါဝင်သော ဘောလုံးချိတ်ဆက်နည်းပညာ connected ball technology ကို ထည့်သွင်းထားသည်။ ယင်းဒေတာများကို ဗီဒီယိုအကူဒိုင် (VAR) စနစ် သို့ ပေးပို့မည်ဖြစ်ပြီး လူကျွံဘော (offside) စည်းမျဉ်း ဆုံးဖြတ်ချက်များအပါအဝင် ဆုံးဖြတ်ချက်များ ချမှတ်ရာတွင် အထောက်အကူပြုမည် ဖြစ်သည်။

▪️ ဖီဖာဥက္ကဋ္ဌ Gianni Infantino က မိတ်ဆက်ပွဲတွင် “ဒီဘောလုံးက တကယ်လှပပါတယ်။ သမိုင်းမှာ အကြီးကျယ်ဆုံး ကမ္ဘာ့ဖလားမှာ ဒီဘောလုံးနဲ့ ဂိုးတွေ ဘယ်လို သွင်းယူကြမလဲဆိုတာကို ကြည့်ချင်လှပါပြီ” ဟု ပြောကြားခဲ့သည်။

▪️ ၂၀၂၆ ကမ္ဘာ့ဖလားသည် အသင်း ၄၈ သင်းအထိ တိုးချဲ့ကျင်းပမည့် ပထမဆုံးပွဲ ဖြစ်လာမည်ဖြစ်သည်။ ပြိုင်ပွဲကို ဇွန်လ ၁၁ ရက်မှ ဇူလိုင်လ ၁၉ ရက် အထိ မြောက်အမေရိကရှိ မြို့ကြီး ၁၆ မြို့တွင် ကျင်းပရန်စီစဉ်ထားသည်။

#World_News
Published 3 October 2025

▪️ အိန္ဒိယကို ရုရှားနဲ့ စွမ်းအင်ရောင်းဝယ်ရေး လျှော့ချဖို့ ဖိအားပေးနေတဲ့ ဒေါ်နယ်ထရမ့်အစိုးရအဖွဲ့ကို ရုရှားသမ္မတ ဗလာဒီမာပူတင်က ပြစ်တင်ဝေဖန်လိုက်ပြီး အမေရိကန်အပေါ်ပဲ ပြန်လည်သက်‌‌ရောက်လာနိုင်တယ်လို့ သတိပေးလိုက်ပါတယ်။

▪️ ရုရှားကုန်သွယ်ရေးမိတ်ဖက်တွေကို လိုက်ပြီးအခွန်တိုးမြှင့်စည်းကြပ်နေပါက ကမ္ဘာလုံးဆိုင်ရာ စွမ်းအင်ဈေးနှုန်းမြင့်တက်လာနိုင်ကာ အမေရိကန်ဗဟိုဘဏ်အနေနဲ့ အတိုးနှုန်းမြှင့်လာရနိုင်တယ်လို့ ဆိုလိုက်ပြီး အမေရိကန်စီးပွားရေး နှောင့်နှေးစေမယ်လို့ သတိပေးလိုက်ပါတယ်။

▪️ ပူတင်က ဒီဇင်ဘာအစောပိုင်းမှာ အိန္ဒိယထံ သွားရောက်လည်ပတ်ဖို့ မျှော်လင့်နေကြောင်းလည်း ပြောပါတယ်။

▪️ အိန္ဒိယမှ ရေနံစိမ်းတင်ပို့မှု များပြားလာတဲ့အပေါ် ကုန်သွယ်ရေးမညီမျှမှု ဖြေလျှော့‌ရန် အတိုင်းအတာတွေလည်း ညွှန်ကြားထားပါတယ်။

▪️ အိန္ဒိယနဲ့ ဘယ်သောအခါမှ တင်းမာမှုမျိုးတွေ ပြဿနာတွေ မရှိခဲ့ဘူးလို့ ပြောပါတယ်။

▪️ အိန္ဒိယအနေနဲ့ ပြင်ပဖိအားပေးမှုဒဏ်ကို ခံစားနေစရာမလိုဘူးလို့ ပူတင်ကဆိုပါတယ်။

▪️ အိန္ဒိယအနေနဲ့ ရုရှားရေနံ မဝယ်ယူတော့ဘူးဆိုရင် ဒေါ်လာ ၉ ဘီလီယံမှ ၁၀ ဘီလီယံကြား ဆုံးရှုံးရနိုငါပါတယ်။

▪️ အိန္ဒိယပြည်သူတွေကလည်း စောင့်ကြည့်နေကြပြီး တိုင်းတစ်ပါးရှေ့မှောက် သိက္ခာကျခံစရာ မလိုကြောင်း ပြောပါတယ်။

▪️ အိန္ဒိယဝန်ကြီးချုပ် နရန်ဒရာမိုဒီဟာ ဒီလိုအဖြစ်ခံမှာ မဟုတ်ဘူးလို့ ပူတင်က ပြောသွားပါတယ်။

Source: India Today.

#Local_News
Published 03 October 2025

▪️ ပြီးခဲ့သည့်အပတ်က တက်ရိပ်ပြလာသည့် စက်သုံးဆီ အမျိုးအစားအားလုံး ဈေးနှုန်းများကျဆင်းလာပြီး တစ်လီတာလျှင် ၃၅ကျပ်မှ ၉၀ကျပ် အတွင်းကျဆင်းလာကြောင်း စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ ယခုတစ်ပတ်အတွက်ထုတ်ပြန်ချက်အရ သိရသည်။

▪️ ထိုသို့ကျဆင်းရာတွင် 92 ဓာတ်ဆီ‌ ဈေးနှုန်းတစ်လီတာလျှင် ၉၀ကျပ် ၊95 ဓာတ်ဆီ‌ ဈေးနှုန်းတစ်လီတာလျှင် ၈၅ကျပ် အထိကျဆင်းလာကြောင်းသိရသည်။

▪️ ဒီဇယ်ဈေးနှုန်းတစ်လီတာလျှင် ၃၅ကျပ်နှင့်ပရီမီယမ်ဒီဇယ်ဈေးနှုန်းတစ်လီတာလျှင် ၆၀ကျပ်အထိ အသီးသီးကျဆင်းလာကြောင်း သိရသည်။

▪️ ယခုတစ်ပတ်အတွက်စက်သုံးဆီ ရည်ညွှန်းဈေးများမှာ 92တစ်လီတာလျှင် ၂ ,၈၃၀ ကျပ်၊95 တစ်လီတာလျှင် ၂,၈၉၅ကျပ် ၊ဒီဇယ်ဆီ တစ်လီတာလျှင် ၂,၅၄၅ ကျပ် ၊ပရီမီယံဒီဇယ်ဆီ တစ်လီတာလျှင် ၃,၁၁၅ ကျပ်အထိ ဈေးနှုန်းအသီးသီးရှိ‌နေ‌ကြောင်းသိရသည်။

#YMG/NN #Yangon_Times

#Local_News
Published 03 October 2025

▪️ ပြင်ဦးလွင်-ဂုတ်ထိပ်-နောင်ပိန် ရထားလမ်းပိုင်း၌ ပြည်တွင်း/ပြည်ပခရီးသွားများအား ဆွဲဆောင်နိုင် သည့် ကျောက်မီးသွေးသုံးမီးရထားစက်ခေါင်းများ အသုံးပြု၍ ပြေးဆွဲနိုင်ရေးဆောင်ရွက်ရန် နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က လမ်းညွှန်ခဲ့ကြောင်းသိရသည်။

▪️ ယနေ့ အောက်တိုဘာလ ၂ ရက် ညနေပိုင်းတွင် ပြည်ထောင်စုသမ္မတမြန်မာ နိုင်ငံတော် ယာယီသမ္မတ နိုင်ငံတော် လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် က ပြင်ဦးလွင်ဘူတာကြီး သို့ သွားရောက်ကြည့်ရှုစစ်ဆေးစဉ် အထက်ပါအတိုင်းလမ်းညွှန်ခဲ့ခြင်းလည်း ဖြစ်သည်။

▪️ အလားတူ အကြမ်းဖက်သောင်းကျန်းသူများ၏ မိုင်းခွဲဖျက်ဆီးမှုကြောင့် ထိခိုက်ပျက်စီးခဲ့ရသည့် ဂုတ်ထိပ်တံတားပြုပြင်ခြင်း လုပ်ငန်းများနှင့် တံတား လုံခြုံရေးအတွက် လိုအပ်သည်များကိုလည်း စနစ်တကျဖြင့် ဆောင်ရွက်သွားရန် ၊ အလားတူ ရထားလမ်းပိုင်းများအလိုက် ပြန်လည်ပြုပြင်ဆောင်ရွက်ခြင်းများ ဆောင်ရွက်ရာတွင်မီးရထားများ လုံခြုံချောမွေ့စွာဖြင့် ပြေးဆွဲနိုင်ရေး စနစ်တကျတွက်ချက်ဆောင်ရွက်ရန်၊ ရထားလမ်းအတွက်လိုအပ်သည့် ကျောက်များကိုသတ်မှတ်ချက်နှင့်အညီ ထည့်သွင်းဆောင်ရွက်ရန်၊ ရထားလမ်းပိုင်း တစ်လျှောက်ရှိ တံတားများ၏ ကြံ့ခိုင်ရေးကိုလည်း ပြန်လည်စစ်ဆေးပြီး လိုအပ်သည့် ပြုပြင်ထိန်းသိမ်းခြင်းများကို ဆောင်ရွက်သွားရန်၊ ရထားလမ်းပိုင်းပြန်လည် ဖွင့်လှစ်ချိန်တွင် ရထားများ အဆင်ပြေချောမွေ့စွာဖြင့် ပြေးဆွဲဆောင်ရွက်နိုင်ရေး ကြိုတင်ပြင်ဆင်ခြင်းလုပ်ငန်းများကို ဆောင်ရွက်သွားရန်၊ ပြင်ဦးလွင်-ဂုတ်ထိပ်-နောင်ပိန် ရထားလမ်းပိုင်း၌ ပြည်တွင်း/ပြည်ပခရီးသွားများကို ဆွဲဆောင်နိုင်သည့် ကျောက်မီးသွေးသုံးမီးရထားစက်ခေါင်းများ အသုံးပြု၍ ပြေးဆွဲနိုင်ရေး ဆောင်ရွက်သွားရန်၊ယခုကျရောက်မည့် သီတင်းကျွတ်ကာလ အများပြည်သူရုံးပိတ်ရက်များတွင် ရန်ကုန်-နေပြည်တော်-မန္တလေး လူစီးရထားများ ထပ်မံတိုးချဲ့ပြေးဆွဲသွားရန်တို့ကိုလည်း ယာယီသမ္မတက လမ်းညွှန်ခဲ့ကြောင်း သိရသည်။

▪️ ယင်းအပြင် ပြင်ဦးလွင်မြို့၊ သုမင်္ဂလာဈေး(ညံတောဈေး) ၆ ထပ် အဆင့်မြင့် ဈေးသစ်တည်ဆောက်ရေးစီမံကိန်း သို့ သွားရောက်ကြည့်ရှုစစ်ဆေးရာ ယခုအဆင့်မြင့်ဈေးသစ်တည်ဆောက်စေခြင်းသည် ပြင်ဦးလွင်မြို့၏ လူနေမှု ထူထပ်လာမှုများ၊ ခရီးသွားလာမှု များပြားလာမှုများနှင့် ကိုက်ညီသည့် အဆင့်မီဈေးတစ်ခုဖြစ်ပေါ်လာစေရန်နှင့် ဒေသထွက်နှင့် အခြေခံသုံးကုန် ပစ္စည်းများကို တစ်နေရာတည်းတွင် တစ်စုတစ်စည်းတည်းရရှိနိုင်စေရန် ရည်ရွယ်ဆောင်ရွက်စေခဲ့ခြင်းဖြစ်ကြောင်း၊ မြို့ပြဖွံ့ဖြိုးတိုးတက်မှုနှင့်ကိုက်ညီသည့် အဆင့်မြင့်ဈေးဖြစ်ပေါ်လာစေရေး ကြပ်မတ်ဆောင်ရွက်သွားရမည်ဖြစ်ကြောင်း၊ တည်ဆောက်ရေးလုပ်ငန်း များအားလုံးပြီးစီးပါက ဈေးဆိုင် ခန်း များ စနစ်တကျဖြစ်စေရေးအတွက်လည်း ကြပ်မတ်ဆောင်ရွက်သွားရန်လိုပြီး သန့်ရှင်းမှုရှိစေရေးကို အလေးထားဆောင်ရွက်သွားရန်နှင့် ရေ/မီးစနစ်များ စနစ်တကျရှိစေရေး ဆောင်ရွက်ရမည်ဖြစ်ကြောင်းနှင့် အခြားလိုအပ်သည် များကိုလမ်းညွှန်ခဲ့ကြောင်း သိရသည်။

#YMG/PP #Yangon_Times

#World_Health
Published 03 October 2025

▪️ အိန္ဒိယမှ ဒေါက်တာ မာနန်ဗိုရာက နေအိမ်မှာ မထားသင့်တဲ့ နေ့စဉ်သုံးပစ္စည်းတွေအကြောင်း သတိပေးထားပါတယ်။

▪️ KIMSHEALTH မှ ဒေါက်တာ ဂါနက်ရှ်ဗစ်ဝါနာထန်ကလည်း ဒီပစ္စည်းတွေရဲ့ ကျန်းမာရေးအန္တရာယ်တွေအကြောင်း ဖော်ပြထားပါတယ်။

▪️ (၁) သကြားဓာတ်များသောဘီစကစ် သကြားနဲ့ သန့်စင်ဂျုံများ မြင့်မားတာကြောင့် ဂလူးကို့စ်မြင့်တက်စေပြီး အဝလွန်ခြင်း၊ ဆီးချို၊ သွားပိုးစားခြင်းများ ဖြစ်စေနိုင်ပါတယ်။

▪️ (၂) သပွတ်ပင် စိုစွတ်ပြီး ဘက်တီးရီးယားတွေ ပေါက်ဖွားနိုင်ကာ ရောဂါကူးစက်မှုများ ဖြစ်နိုင်ပါတယ်။

▪️ (၃) ဆေးကြောဖော့ ဘက်တီးရီးယားတွေ ရှင်သန်နိုင်ပြီး ပိုးသန့်စင်ဖို့ အလွန်ခက်ခဲနိုင်ပါတယ်။

▪️ (၄) အနံ့ပါသောပိုးသန့်စင်အဖတ်များ အနံ့တွေနဲ့ ဓာတုပစ္စည်းတွေက ယားယံခြင်း၊ အရေပြားရောင်ခြင်းတို့ ဖြစ်စေကာ ကျန်းမာရေးထိခိုက်နိုင်ပါတယ်။

▪️ (၅) ခြင်ဆေးခွေ အန္တရာယ်ရှိတဲ့ အငွေ့ထုတ်လွှတ်ကာ အဆုတ်ထိခိုက်စေပြီး အိမ်တွင်းလေထုညစ်ညမ်းစေပါတယ်။

▪️ (၆) အဖုံးပွင့်နေသောအမှိုက်ပုံး ဒီလိုအမှိုက်ပုံးတွေက ပိုးမွှားအကောင်တွေကို ဆွဲဆောင်စေပြီး အနံ့အသက်ဆိုးစေကာ ခြင်တွေရောက်ရှိစေနိုင်ပါတယ်။

▪️ နေ့စဉ်သုံးပစ္စည်းတွေထဲက အဆိပ်အတောက်တွေ ရေရှည်ထိတွေ့ခြင်းရဲ့ အန္တရာယ်တွေအကြောင်း သိရှိထားကြဖို့ ဟိုက်ဒရာဘတ်မှ ဒေါက်တာ မာနင်ဒရာက ပြောသွားပါတယ်။

Source: Indian Express.

#World_Science
Published 03 October 2025

▪️ လူတွေ အစားစားသုံးခြင်းအပေါ် သက်ရောက်ပုံရှိနေတဲ့ ဦးနှောက်အစိတ်အပိုင်းတစ်ခုဟာ အနာဂတ်မှာ ကိုယ်အလေးချိန်ချခြင်း၊ တင်ခြင်းတို့ကို ထောက်ပံ့ပေးနိုင်ဖွယ် ရှိပါတယ်။

▪️ Bed nucleus of the stria terminalis (BNST) လို့ခေါ်တဲ့ အစိတ်အပိုင်းထဲက နျူရွန်တွေဟာ ဦးနှောက်အလယ်ပိုင်းမှာရှိပြီး လူတွေမှာ နေကြာစေ့အရွယ်လောက်သာရှိကာ သူ့ကိုလှုံ့ဆော်ပေးခြင်းဖြင့် ကြွက်တွေမှာ အစားပိုစားစေပါတယ်။

▪️ နယူးယော့ခ် ကိုလံဘီယာတက္ကသိုလ်မှ ချားလ်စ်ဇူကာနဲ့ အဖွဲ့က အရသာငါးမျိုးထဲက တစ်မျိုးပါဝင်တဲ့ရေကို ကြွက်တွေသောက်ခိုင်းပြီး ဦးနှောက်တွေကို ဓာတ်မှန်ရိုက်ခဲ့ပါတယ်။

▪️ ထိုအခါမှာ အချိုအရသာရှိတဲ့ရေကြောင့် နျူရွန်တွေကို လှုံ့ဆော်စေတာကို တွေ့ခဲ့ကြပါတယ်။

▪️ ထိုနျူရွန်တွေက BNST ထဲက အခြားအရာတွေကို လှုံ့ဆော်စေပါတယ်။
ဒီအစိတ်အပိုင်းက အရသာတွေကို လက်ခံတုံ့ပြန်စေတာ ပထမဆုံးတွေ့ရှိတာ ဖြစ်ကြောင်း အရီဇိုးနားတက္ကသိုလ်မှ ဟိုင်ကျန်ကိုင်က ပြောပါတယ်။

▪️ BNST နျူရွန်တွေကို လှုံ့ဆော်ပေးခြင်းက အရသာဘယ်လိုပဲဖြစ်ဖြစ် ရေပိုမိုသောက်စေပြီး ဆာလောင်မှု၊ အာဟာရချို့တဲ့ခြင်း၊ အရသာတို့ကို ညွှန်ပြနေပါတယ်။

▪️ လူသားတွေနဲ့ ကြွက်တွေမှာ BNST ဆင်တူတာကြောင့် ကင်ဆာလူနာတွေလို စားချင်စိတ်ကျဆင်းသူတွေမှာ အစားပိုစားစေဖို့ ဆေးဝါးတွေ တီထွင်ဖို့ အလားအလာရှိနေတာကို မြင်တွေ့ရပါတယ်။

▪️ BNST နျူရွန်တွေနဲ့အတူ အစားစားချင်စိတ်နဲ့ ဆက်စပ်နေတဲ့ ဦးနှောက်အခြားလမ်းကြောင်းတွေ ပစ်မှတ်ထားခြင်းက semaglutide လို GLP-1 ဆေးဝါးလိုမျိုး ကိုယ်အလေးချိန်ကျစေမယ့် နည်းလမ်းတွေ တိုးတက်စေနိုင်ပါတယ်။

▪️ BNST လုပ်ဆောင်ပုံကို ပိုမိုနားလည်စေခြင်းဖြင့် ကိုယ်အလေးချိန်ကျဆေးဝါးတွေရဲ့ ထိရောက်မှုတိုးတက်စေပြီး လုပ်ငန်းစဉ်တွေကို ပိုမိုသိရှိစေနိုင်မှာ ဖြစ်ပါတယ်။

Source: News Scientist

တရုတ်တောင်ပိုင်း ကွမ်ရှီရွှမ်ကိုယ်ပိုင်အုပ်ချုပ်ခွင့်ရဒေသ ဖျင်ရှန်မြို့ရှိ တရုတ်-ဗီယက်နမ် ယူယီကွမ်ဆိပ်ကမ်း(ခေါ်) ချစ်ကြည်ရင်းနှီးရေးဖြတ်သန်းခွင့် စမတ်ဆိပ်ကမ်းစီမံကိန်းမှ တရုတ်ဘက်ကအပိုင်းဟာ ဆောက်လုပ်မှုပြီးစီးခဲ့ပြီး စမ်းသပ်မှုအဆင့်ရောက်နေပြီဖြစ်ကာ ၂၀၂၅ နှစ်ကုန်လောက်မှာ စမ်းသပ်လည်ပတ်မှုစတင်ရန် ရည်ရွယ်ထားပါတယ်။

#Asia_Business
#တရုတ်_ဗီယက်နမ် #ကွမ်ရှီရွှမ်
Published 02 October 2025
#YMG #Yangon_Times #Yangon_Media_Group

၁၀၅ နှစ်မြောက် မြန်မာ့ရုပ်ရှင်နေ့နဲ့ ၄၈ ကြိမ်မြောက် ရုပ်ရှင်သက်ကြီးပူဇော်ပွဲအခမ်းအနားကို ယခုလ၁၃ရက်မှာကျင်းပသွားမယ်လို့ မြန်မာနိုင်ငံရုပ်ရှင်အစည်းအရုံးမှ သိရပါတယ်။

#Local_News
Published 02 October 2025
#မြန်မာ့ရုပ်ရှင်နေ့ #ရုပ်ရှင်သက်ကြီးပူဇော်ပွဲ
#YMG/SW #Yangon_Times

၂၀၂၅ ခုနှစ် စက်တင်ဘာလအတွက် စေလွှတ်လချုပ်ပေးပိုရန် ကျန်ရှိတဲ့ အေဂျင်စီပေါင်း နှစ်ရာခန့်ရှိတယ်လို့ အလုပ်သမားဝန်ကြီးဌာန Safe Migration Channel က ထုတ်ပြန်ပါတယ်။

#Local_News
Published 02 October 2025
#စေလွှတ်လချုပ် #Safe_Migration_Channel
#YMG/SW #Yangon_Times

လာမယ့် ၂၀၂၆ခုနှစ် မိုးရာသီအတွင်း ဒီရေတောအပင် ၄ သန်းခန့် တိုးချဲ့တည်ထောင်စိုက်ပျိုးသွားမယ်လို့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနက သိရပါတယ်။

#Local_News
Published 02 October 2025
#ဒီရေတောအပင် #မိုးရာသီအတွင်း
#YMG/NN #Yangon_Times

ဧည့်မထ/ ငစိန်ထက် ဈေးကွက်လိုအပ်ချက်ရှိတဲ့ စပါးမျိုးတွေကို ရွေးချယ်စိုက်ပျိုးကြဖို့ မြန်မာနိုင်ငံဆန်စပါးအသင်းချုပ်(MRF)က ဒီကနေ့မှာ တိုက်တွန်းလိုက်ပါတယ်။

#Local_News
Published 02 October 2025
#ဧည့်မထ #ငစိန် #MRF
#YMG/NN #Yangon_Times