#Daily_News
Published 05 November 2026

၁။‌ ထိန်ပင်နှင့်ထားဝယ်ချောင်အမှိုက်ပုံများ၌ အမှိုက်မှ စွမ်းအင်ထုတ်လုပ်ရန် ပြည်တွင်း၊ပြည်ပကုမ္ပဏီများကိုတင်ဒါခေါ်ယူ

၂။ ‌ဆောင်းသီးနှံနဲ့နွေစပါးစိုက်ချိန်မီ ယူရီးယားမြေဩဇာဖြန့်ဖြူးနိုင်ရေးပြင်ဆင်

၃။‌‌‎ ဒေါ်လာ(၁)သန်းကျော်နှင့်ကျပ်သန်းပေါင်း ၃,၆၀၀ကျော်တန်ဖိုးရှိ ရင်းနှီးမြှုပ်နှံမှုလုပ်ငန်းသစ် (၃) ခုပဲခူးတိုင်းသို့ဝင်ရောက်

၄။‎ ရုရှား - ယူကရိန်း ယာယီအပစ်အခတ်ရပ်စဲရန်သဘောတူ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ရန်ကုန်မြို့ရှိ ထိန်ပင်နဲ့ထားဝယ်ချောင်အမှိုက်ပုံများ၌ အမှိုက်မှ စွမ်းအင်ထုတ်လုပ်ရန် ပြည်တွင်း၊ပြည်ပကုမ္ပဏီများကို ရန်ကုန်မြို့တော်စည်ပင်သာယာရေးကော်မတီ (YCDC)ကတင်ဒါခေါ်ယူနေတယ်လို့ သိရပါတယ်။

#Local_News
Published 05 November 2026
#ထိန်ပင် #ထားဝယ်ချောင်
#YMG/NN #Yangon_Times

#Local_News
Published 05 November 2026

■ နေပြည်တော်တန်ဆောင်တိုင်ပွဲတော် အထိမ်းအမှတ် ဓာတ်ပုံပြိုင်ပွဲကို“မာရဝိဇယဗုဒ္ဓရုပ်ပွားတော်မြတ်ကြီးနှင့် တန်ဆောင်တိုင်ပွဲတော်”နှင့် “နေပြည်တော်တန်ဆောင်တိုင်ပွဲတော်နှင့် မြန်မာ့အလှ” ဟူသည့် ခေါင်းစဉ်နှစ်ခုဖြင့်ကျင်းပသွားမည်ဖြစ်ကြောင်း နေပြည်တော်ကောင်စီက အသိပေးထုတ်ပြန်ထားသည်။

■ အဆိုပါ ပြိုင်ပွဲတွင် ပညာရှင်အဆင့် (Professional/Open)၊ ဝါသနာရှင်အဆင့် (Camera/Phone Photography) နှင့် လူငယ်နှင့်ကျောင်းသားအဆင့် (Youth Photography) ဟူ၍ အဆင့်သုံးမျိုးသတ်မှတ်ထားပြီး စိတ်ပါဝင်စားသူများ ပါဝင်ယှဉ်ပြိုင်နိုင်ကြောင်း သိရသည်။

■ ပညာရှင်အဆင့် ဆုရရှိသူများကို ပညာရှင်အဆင့်တွင် ပထမဆု ကျပ်သိန်း ၅၀၊ ဒုတိယဆု ကျပ်သိန်း ၄၀၊ တတိယဆု ကျပ်သိန်း ၃၀၊ စတုတ္ထဆု ကျပ်သိန်း ၂၀၊ ပဉ္စမဆု ကျပ် ၁၀ သိန်းနှင့် နှစ်သိမ့်ဆုများ ချီးမြှင့်မည်ဖြစ်သည်။

■ ထို့အပြင် ဝါသနာရှင်အဆင့် ဆုရရှိသူများကို ပညာရှင်အဆင့်တွင် ပထမဆု ကျပ်သိန်း ၃၀၊ ဒုတိယဆု ကျပ်သိန်း ၂၀၊ တတိယဆု ကျပ်သိန်း ၁၀၊ နှစ်သိမ့်ဆုငါးဆုကို ကျပ်လေးသိန်းစီဖြင့် ဆုများချီးမြှင့်မည်ဖြစ်သည်။

■ လူငယ်ကျောင်းသားအဆင့်တွင်လည်း ပထမဆု ကျပ်သိန်း ၂၀၊ ဒုတိယဆု ကျပ်သိန်း ၁၅၊ တတိယဆု ကျပ်သိန်း ၁၀၊ နှစ်သိမ့်ဆုငါးဆုကို ကျပ်သုံးသိန်းစီဖြင့် ဆုကြေးငွေများ ချီးမြှင့်သွားမည်ဖြစ်သည်။

■ ပြိုင်ပွဲဝင်ဓာတ်ပုံများကို ၂၀၂၆ ခုနှစ် နိုဝင်ဘာ ၂၅ ရက်မှ ၃၀ ရက်အထိ ပေးပို့နိုင်ပြီး အသေးစိတ်စည်းကမ်းချက်များကို Nay Pyi Taw Council Facebook Page၊ NPTDC Facebook Page နှင့် NPTDC Web Portal တို့တွင် ကြည့်ရှုနိုင်ပြီး ပြိုင်ပွဲနှင့်ပတ်သက်၍ အသေးစိတ်သိရှိလိုသူများအနေဖြင့် နေပြည်တော်ကောင်စီရုံးသို့ ရုံးချိန်အတွင်း ဆက်သွယ်စုံစမ်းနိုင်ကြောင်း သိရသည်။

#YMG/NN #Yangon_Times

#Local_News
Published 05 November 2026

■ ဝဒေသ၏ ပညာရေး၊ ကျန်းမာရေး၊ လမ်းပန်းဆက်သွယ်ရေး ကိစ္စရပ်များကို ညှိနှိုင်းပူး‌ပေါင်းပြီး ဖြည့်ဆည်းဆောင်ရွက်ပေးမည်ဖြစ်ကြောင်း အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီနှင့် “ဝ” ပြည် သွေးစည်းညီညွတ်ရေးပါတီ(UWSP) တို့ ငြိမ်းချမ်းရေး တွေ့ဆုံဆွေးနွေးစဉ် ကာကွယ်ရေးဝန်ကြီးဌာန ပြည်ထောင်စုဝန်ကြီး အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီဥက္ကဋ္ဌ ဒုတိယဗိုလ်ချုပ်ကြီး ရာပြည့်က အထက်ပါအတိုင်းထည့်သွင်းပြောကြားခဲ့ခြင်းဖြစ်သည်။

■ ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးဆောင်သည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုကော်မတီသည် နိုင်ငံတော်ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးကို ဦးတည်၍ ငြိမ်းချမ်းရေးလုပ်ငန်းစဉ်များအား အကောင်အထည်ဖော် ဆောင်ရွက်နိုင်ရန်အတွက် ကြိုတင်ကန့်သတ်ချက်များမထားသည့် ဆွေးနွေးပွဲများကျင်းပဆောင်ရွက်နိုင်ရန် ၂၀၂၆ ခုနှစ် ဧပြီ ၂၁ ရက် တွင် ကြေညာချက်အမှတ်(၁/၂၀၂၆)ဖြင့် တိုင်းရင်းသားလက်နက်ကိုင် အဖွဲ့အစည်းများနှင့်ငြိမ်းချမ်းရေး တွေ့ဆုံဆွေးနွေးနိုင်ရန် ဖိတ်ခေါ်ခဲ့မှုအရ ကာကွယ်ရေးဝန်ကြီးဌာန ပြည်ထောင်စုဝန်ကြီး အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီဥက္ကဋ္ဌ ဒုတိယဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့သည် နိုဝင်ဘာ ၃ ရက်တွင် ငြိမ်းချမ်းရေး တွေ့ဆုံဆွေးနွေးရန် ရှမ်းပြည်နယ် ပန်ဆန်းမြို့သို့ သွားရောက်ခဲ့ရာ “ဝ” ပြည် သွေးစည်းညီညွတ်ရေးပါတီ (UWSP) ဒုတိယဥက္ကဋ္ဌ ဦးကျောက်ကော်အန်းနှင့် အဆင့်မြင့် ခေါင်းဆောင်များပါဝင်သည့် ကိုယ်စားလှယ်အဖွဲ့က ကြိုဆိုနှုတ်ဆက်သည်။

■ အဆိုပါ တွေ့ဆုံဆွေးနွေးပွဲတွင် ညှိနှိုင်းရေးကော်မတီဥက္ကဋ္ဌ ဒုတိယ ဗိုလ်ချုပ်ကြီး ရာပြည့်က အစိုးရသစ်လက်ထက်တွင် ပန်ဆန်းသို့ ဒုတိယအကြိမ်မြောက် လာရောက်ဆွေးနွေးခြင်းဖြစ်ကြောင်း၊ “ဝ” ဒေသရှိ ပြည်သူများသည် မိမိတို့ တိုင်းရင်းသားလူမျိုးများဖြစ်ပြီး ပြည်ထောင်စုမှ ခွဲမထွက်ဘဲ (၂၀၀၈ ခုနှစ်) ဖွဲ့စည်းပုံအခြေခံဥပ‌ဒေကို လိုက်နာဆောင်ရွက်မည်ကို သိရှိရသည့်အတွက် ဝမ်းသာပါကြောင်း၊ ပညာရေး၊ ကျန်းမာရေး၊ လမ်းပန်းဆက်သွယ်ရေး ကိစ္စရပ်များကို ညှိနှိုင်းပူး‌ပေါင်းပြီး ဖြည့်ဆည်း ဆောင်ရွက်ပေးမည်ဖြစ်ကြောင်း၊ အွန်လိုင်းလိမ်လည်မှုကိစ္စများကို လက်မခံဘဲ နိုင်ငံတော်အစိုးရနှင့် ပူးပေါင်းဆောင်ရွက်ကာ ထိန်းသိမ်းကြပ်မတ် ဆောင်ရွက်လျက်ရှိသည့်အတွက် ဝမ်းသာပါကြောင်း၊ ဆက်လက်၍လည်း ပူးပေါင်းဆောင်ရွက်သွားစေလိုကြောင်း၊ နိုင်ငံတော်အစိုးရနှင့် နှစ်ပေါင်း ၃၀ ကျော် ငြိမ်းချမ်းရေး တည်ဆောက်ထားရှိပြီးဖြစ်သည့်အတွက် ယုံကြည်မှုပိုမိုတိုးမြှင့်ခိုင်မာစေရေး ဆက်လက် ဆောင်ရွက်သွားမည်ဖြစ်ကြောင်း ပြောကြားသည်။

■ ယင်းနောက် “ဝ” ပြည်သွေးစည်းညီညွတ်ရေးပါတီ ဒုတိယ ဥက္ကဋ္ဌ ဦးကျောက်ကော်အန်းက ပြီးခဲ့သည့် ဆွေးနွေးပွဲတွင် မိမိတို့၏ နိုင်ငံရေးဆန္ဒအား ဆွေးနွေးခဲ့ကြောင်း၊ မိမိတို့အနေဖြင့် (၂၀၀၈ ခုနှစ်) ဖွဲ့စည်းပုံအခြေခံဥပ‌ဒေကို လေးစားလိုက်နာကာ ပြည်ထောင်စုမှ ခွဲထွက်မည်မဟုတ်ဘဲ ဆွေးနွေးညှိနှိုင်းမှု မူဘောင်အတွင်းမှဆောင်ရွက်သွားမည်ဖြစ်ကြောင်း ပြောကြားသည်။

■ ညှိနှိုင်းရေးကော်မတီ အတွင်းရေးမှူး ဒုတိယဗိုလ်ချုပ်ကြီး မင်းနိုင်က နိုင်ငံတော်သမ္မတနှင့် တွေ့ဆုံဆွေးနွေးပွဲမှ ပညာရေး၊ ကျန်းမာရေးနှင့် ဒေသဖွံ့ဖြိုးရေးဆိုင်ရာ လမ်းညွှန်ချက်များနှင့် ပတ်သက်ပြီး ဆောင်ရွက်ပေးနိုင်မှု အခြေအနေများကိုပြန်လည်ရှင်းလင်းတင်ပြသည်။

■ ယင်းနောက် တက်ရောက်လာကြသူများက အွန်လိုင်းလောင်းကစားနှင့် မူးယစ်ဆေးဝါးတိုက်ဖျက်ရေးဆိုင်ရာ ကိစ္စရပ်များ၊ ပညာရေး၊ ကျန်းမာရေးနှင့် လမ်းပန်းဆက်သွယ်ရေးဆိုင်ရာ ကိစ္စရပ်များကို ညှိနှိုင်းပူး‌ပေါင်းဆောင်ရွက်နိုင်မည့် အခြေအနေများ၊ ဒေသတွင်းတည်ငြိမ်အေးချမ်းရေးနှင့် ကုန်စည်စီးဆင်းမှု မြန်ဆန်နိုင်စေရေးကိစ္စရပ်တို့အား နှစ်ဖက်ရင်းနှီးပွင့်လင်းစွာ ဆွေးနွေးခဲ့ကြပြီး လက်ဆောင်ပစ္စည်းများ အပြန်အလှန် လဲလှယ်ပေးအပ်ကာ စုပေါင်း မှတ်တမ်းတင်ဓာတ်ပုံရိုက်ခဲ့ကြောင်း သိရသည်။

■ အဆိုပါ တွေ့ဆုံဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီဥက္ကဋ္ဌ ဒုတိယဗိုလ်ချုပ်ကြီး ရာပြည့်၊ အတွင်းရေးမှူး ဒုတိယဗိုလ်ချုပ်ကြီး မင်းနိုင်နှင့် ညှိနှိုင်းရေးကော်မတီဝင်များ၊ အကြံပေးအဖွဲ့ဝင်များ၊ သက်ဆိုင်ရာ တိုင်းစစ်ဌာနချုပ်မှ အရာရှိကြီးများ၊ ဌာနဆိုင်ရာတာဝန်ရှိသူများနှင့် “ဝ” ပြည်သွေးစည်းညီညွတ်ရေးပါတီ (UWSP)မှ ဒုတိယဥက္ကဋ္ဌ ဦးကျောက်ကော်အန်း၊ ဒုတိယအထွေထွေအတွင်းရေးမှူးချုပ် ဦးပေါက်အိုက်ခမ်းနှင့် တာဝန်ရှိသူများ တက်ရောက်ကြကြောင်းသိရသည်။

#YMG/NN #Yangon_Times