#Local_News
Published 30 October 2026

■ နျူကလီးယားဓာတ်အားပေးစက်ရုံဆိုင်ရာ ကျွမ်းကျင်လုပ်သားနှင့် အင်ဂျင်နီယာများ လေ့ကျင့်ရေး၊ ၅၀၀ ကေဗွီ ဓာတ်အားလိုင်းစနစ်ဆိုင်ရာ နည်းပညာပူးပေါင်းဆောင်ရွက်ရေးနှင့် လျှပ်စစ်၊ သဘာဝဓာတ်ငွေ့ ပို့လွှတ်ဖြန့်ဖြူးရာတွင် ဆုံးရှုံးလေလွင့်မှု လျှော့ချရေးတို့ကို မြန်မာနှင့် ဘယ်လာရုစ် စွမ်းအင်ဝန်ကြီးများ အောက်တိုဘာ ၂၈ ရက်တွင် မင့်စ်မြို့၌ တွေ့ဆုံဆွေးနွေးခဲ့ကြသည်။

■ ဘယ်လာရုစ်နိုင်ငံ၌ ကျင်းပသည့် နှစ် ၃၀ ပြည့် စွမ်းအင်နှင့် ဂေဟဗေဒစနစ်ဆိုင်ရာဖိုရမ်သို့ တက်ရောက်နေသော လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင် ဦးဆောင်သည့် ကိုယ်စားလှယ်အဖွဲ့သည် နှစ်နိုင်ငံရေးထိုးထားသည့် လမ်းပြမြေပုံ (Roadmap) ကို လက်တွေ့အကောင်အထည်ဖော်နိုင်ရေးအတွက် ဘယ်လာရုစ်စွမ်းအင်ဝန်ကြီးနှင့် တွေ့ဆုံခဲ့ခြင်းဖြစ်သည်။

■ ပြည်ထောင်စုဝန်ကြီးက နျူကလီးယားဓာတ်အားပေးစက်ရုံ လည်ပတ်နိုင်ရေးအတွက် ကျွမ်းကျင်လုပ်သားများနှင့် အင်ဂျင်နီယာများ လေ့ကျင့်ပေးရန် အရေးကြီးသဖြင့် ဘယ်လာရုစ်ရှိ ဓာတ်အားပေးစက်ရုံများသို့ လုပ်ငန်းခွင်လက်တွေ့သင်တန်းများစေလွှတ်လိုကြောင်းပြောကြားသည်။

■ မြန်မာနိုင်ငံ၌ မကြာမီ စတင်အသုံးပြုမည့် ၅၀၀ ကေဗွီ ဓာတ်အားလိုင်းစနစ်၏ ပို့လွှတ်ရေး၊ စောင့်ကြည့်ထိန်းသိမ်းရေးလုပ်ငန်းများအတွက်လည်း ကျွမ်းကျင်အင်ဂျင်နီယာများ စေလွှတ်သင်ကြားပေးစေလိုကြောင်း ဆွေးနွေးခဲ့သည်။

■ ထို့ပြင် မဟာဓာတ်အားလိုင်းများ၊ ဓာတ်အားခွဲဝင်းများနှင့် ထရန်စဖော်မာများတွင် နည်းပညာဆိုင်ရာ ဓာတ်အားဆုံးရှုံးမှု လျှော့ချရေး၊ သက်တမ်းကြာမြင့်နေသည့် ဗို့အားမြင့်ကေဘယ်ကြိုးများကို လျှပ်ကူးမှုနှင့် ကြံ့ခိုင်မှုပိုမိုကောင်းမွန်သည့် ဘယ်လာရုစ်ထုတ် Composite ကေဘယ်များဖြင့် အစားထိုးအသုံးပြုရေးတို့ကို စိတ်ဝင်စားကြောင်းပြောကြားသည်။

■ သဘာဝဓာတ်ငွေ့ဆုံးရှုံးလေလွင့်မှု လျှော့ချရေး၊ ဓာတ်မြေသြဇာစက်ရုံများ၏ စွမ်းဆောင်ရည်မြှင့်တင်ရေးနှင့် တိုးချဲ့တည်ဆောက်ရေးတို့တွင်လည်း ပူးပေါင်းဆောင်ရွက်လိုကြောင်း ထည့်သွင်းဆွေးနွေးခဲ့သည်။

■ ဘယ်လာရုစ်စွမ်းအင်ဝန်ကြီးက မိမိတို့နိုင်ငံသည် နျူကလီးယားနှင့် သဘာဝဓာတ်ငွေ့တို့မှ လျှပ်စစ်ဓာတ်အား အဓိကထုတ်လုပ်ပြီး နျူကလီးယားဓာတ်အားပေးစက်ရုံဆိုင်ရာ အတွေ့အကြုံများရှိကြောင်းပြောကြားသည်။

■ သဘာဝဓာတ်ငွေ့ကို ရုရှားထံမှ ဝယ်ယူသုံးစွဲသဖြင့် ရှာဖွေထုတ်လုပ်ရေးအတွေ့အကြုံ မရှိသော်လည်း ဓာတ်ငွေ့နှင့် လျှပ်စစ်ဓာတ်အား ပို့လွှတ်ဖြန့်ဖြူးရေးတွင် ဆုံးရှုံးမှုနည်းပါးစေသည့် နည်းပညာများရှိပြီး ပူးပေါင်းဆောင်ရွက်ရန် အသင့်ရှိကြောင်းပြောကြားခဲ့သည်။

■ မြန်မာကိုယ်စားလှယ်အဖွဲ့သည် အောက်တိုဘာ ၂၈ ရက်နှင့် ၂၉ ရက်တို့တွင် မင့်စ်မြို့ရှိ ထရန်စဖော်မာနှင့် လျှပ်စစ်ကေဘယ်ကြိုး ထုတ်လုပ်ရေးလုပ်ငန်းများ၊ ဓာတ်ငွေ့နှင့် ဓာတ်အားဖြန့်ဖြူးရေးကွန်ရက် ဒီဇိုင်းရေးဆွဲသည့်ဌာန၊ ပို့လွှတ်ဖြန့်ဖြူးရေး ထိန်းချုပ်ရေးစင်တာများနှင့် ရေနံဓာတုဗေဒလုပ်ငန်းတို့ကို သွားရောက်လေ့လာခဲ့ကြောင်း သိရသည်။

#YMG #Yangon_Times #Yangon_Media_Group

#Local_News
Published 30 October 2026

■ နေပြည်တော်ကောင်စီနယ်မြေအပါအဝင် ရန်ကုန်နှင့် မန္တလေးမြို့တို့တွင် 5G ဆက်သွယ်ရေးနည်းပညာဝန်ဆောင်မှုများကို စမ်းသပ်အသုံးပြုနိုင်ပြီဖြစ်ကြောင်း ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာနက ထုတ်ပြန်ထားသည်။

■ 5G ကွန်ရက်အကောင်အထည်ဖော်မှုနှင့် ဆက်သွယ်ရေးစခန်းများ၏ လုပ်ငန်းဆောင်ရွက်မှုအခြေအနေများကို ဒုတိယဝန်ကြီး ဦးသက်ဝင်းအောင်က အောက်တိုဘာ ၂၉ ရက်တွင် နေပြည်တော် ဥတ္တရသီရိနှင့် ဇမ္ဗူသီရိမြို့နယ်တို့ရှိ ဆက်သွယ်ရေးစခန်းများသို့ သွားရောက်ကြည့်ရှုခဲ့ကြောင်း သိရသည်။

■ ခရီးစဉ်အတွင်း မိုဘိုင်းဆက်သွယ်ရေးအော်ပရေတာများက 5G ကွန်ရက်တည်ဆောက်မှု၊ ဆက်သွယ်ရေးစခန်းများ၏ လုပ်ငန်းဆောင်ရွက်မှု၊ ကွန်ရက်လွှမ်းခြုံမှု တိုးချဲ့မည့်အစီအစဉ်များနှင့် နည်းပညာဆိုင်ရာလိုအပ်ချက်များကို ရှင်းလင်းတင်ပြခဲ့ကြသည်။

■ 5G နည်းပညာသည် မြန်နှုန်းမြင့်ဒေတာဆက်သွယ်မှုနှင့် အချိန်နှင့်တစ်ပြေးညီ သတင်းအချက်အလက်ဖလှယ်မှုများအပြင် ဒီဂျစ်တယ်နည်းပညာအခြေပြု ဝန်ဆောင်မှုများ ဖွံ့ဖြိုးတိုးတက်ရေးအတွက် အရေးပါကြောင်း ဒုတိယဝန်ကြီးက ပြောကြားခဲ့သည်။

■ ထို့ပြင် 5G ကွန်ရက်များ တည်ဆောက်ရာတွင် သတ်မှတ်နည်းပညာစံချိန်စံညွှန်းများနှင့်အညီ ဆောင်ရွက်ရန်၊ ကွန်ရက်တည်ငြိမ်မှုနှင့် ဝန်ဆောင်မှုအရည်အသွေး ပြည့်မီစေရန်၊ ဆက်သွယ်ရေးစက်ပစ္စည်းများကို စနစ်တကျ ထိန်းသိမ်းပြုပြင်ရန် လိုအပ်ကြောင်း မှာကြားခဲ့သည်။

■ 5G နည်းပညာ ဖွံ့ဖြိုးလာခြင်းသည် ဒီဂျစ်တယ်စီးပွားရေး၊ စမတ်မြို့ပြဖွံ့ဖြိုးရေးနှင့် အင်တာနက်အခြေပြုဝန်ဆောင်မှုလုပ်ငန်းများ တိုးတက်လာစေရန် အထောက်အကူပြုမည်ဖြစ်သဖြင့် ဆက်သွယ်ရေးကွန်ရက်အရည်အသွေး မြှင့်တင်ရေးအတွက် သက်ဆိုင်ရာဌာနများနှင့် မိုဘိုင်းဆက်သွယ်ရေးအော်ပရေတာများ ပူးပေါင်းဆောင်ရွက်လျက်ရှိကြောင်း သိရသည်။

#YMG/SW #Yangon_Times

#Daily_News
Published 29 October 2026

၁။‌ သီတင်းကျွတ်ကာလ ပုဂံဒေသသို့ဘုရားဖူးခရီးသွားများအများအပြားဝင်ရောက်

၂။ ‌YPS ကတ်ဖြတ်မရအောင်လုပ်ဆောင်သည့် YBS ယာဉ်မောင်းများကို တစ်လတာရပ်နားစေမည်ယူ

၃။‌‌‎ ဒေသတွင်းကော်ဖီကဏ္ဍဖွံ့ဖြိုးတိုးတက်ရေးအတွက် အင်ဒိုနီးရှားအခြေစိုက် ICCRIနှင့်နားလည်မှုစာချွန်လွှာ(MoU)ရေးထိုး

၄။‎ တရုတ်နိုင်ငံ၏ သမိုင်းဝင် “Long March” အောင်မြင်မှုနှစ်(၉၀)ပြည့်အခမ်းအနားတွင်ကျဆုံးခဲ့သည့် တော်လှန်ရေးသူရဲကောင်းများကို ရှီကျင့်ဖျင်ဂုဏ်ပြုအလေးပြု... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

လာမယ့်ဆောင်းရာသီမှာ မြန်မာနိုင်ငံဒေသအများစု အပူချိန်ပုံမှန်ထက် ပိုမိုမြင့်တက်နိုင်သလို ပင်လယ်ပြင်တွေမှာလည်း မုန်တိုင်းငယ်(၄)ကြိမ်ခန့် ဖြစ်ပေါ်နိုင်တယ်လို့ မိုးလေဝသခန့်မှန်းချက်အရ သိရပါတယ်။

#Local_News
Published 29 October 2026
#ဆောင်းရာသီ #အပူချိန်မြင့်တက်
#YMG/SW #Yangon_Times

အင်ဒိုနီးရှားနိုင်ငံ၊ Indonesia Convention Exhibition (ICE BSD) ၌ ကျင်းပပြုလုပ်ခဲ့တဲ့(၄၁)ကြိမ်မြောက်အင်ဒိုနီးရှားကုန်စည်ပြပွဲကြီးရဲ့ Pavilion Coffee တွင် မြန်မာနိုင်ငံကော်ဖီအသင်း (MCA) နဲ့ အင်ဒိုနီးရှား ကော်ဖီနှင့်ကိုကိုးသုတေသန အင်စတီကျု (ICCRI) သက်ဆိုင်ရာ မိတ်ဖက်အဖွဲအစည်းတိုအကြား ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (MoU) ကို အောက်တိုဘာလ တတိယအပတ်ကအောင်မြင်စွာ လက်မှတ်ရေးထိုးခဲ့ကြတယ်လို့ မြန်မာနိုင်ငံကော်ဖီအသင်းကနေသိရပါတယ်။

#Local_News
Published 29 October 2026
#အင်ဒိုနီးရှားနိုင်ငံ #ကော်ဖီ
#YMG/NN #Yangon_Times

#Local_News
Published 29 October 2026

■ မြန်မာ့ရိုးရာယဉ်ကျေးမှုအနုပညာအမွေအနှစ်များကို မျိုးဆက်သစ်များထံ လက်ဆင့်ကမ်းထိန်းသိမ်းပြီး ရိုးရာအနှစ်သာရမပျောက်ပျက်စေရေးနှင့် ခေတ်မီဒီဂျစ်တယ်နည်းပညာများ အသုံးချကာ ရေရှည်ရှင်သန်ဖွံ့ဖြိုးရေး ကြိုးပမ်းကြရန် နိုင်ငံတော်သမ္မတ ဦးမင်းအောင်လှိုင်က တိုက်တွန်းပြောကြားသည်။

■ ယနေ့အောက်တိုဘာ ၂၉ ရက် နံနက်ပိုင်းက နေပြည်တော်တွင် ကျင်းပသည့် (၂၇) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဆုချီးမြှင့်ပွဲအခမ်းအနားတွင် ၎င်းက အထက်ပါအတိုင်း ပြောကြားခဲ့ခြင်းဖြစ်သည်။

■ မြန်မာ့ရိုးရာယဉ်ကျေးမှုတွင် မဟာဂီတ၊ ခေတ်ဟောင်းကာလပေါ်တေးသီချင်း၊ မြန်မာ့မူဟန်အက၊ ရိုးရာတူရိယာ၊ ဇာတ်သဘင်နှင့် ရုပ်စုံသဘင်တို့သည် ခေတ်အဆက်ဆက် လက်ဆင့်ကမ်းလာသည့် အနုပညာအမွေအနှစ်များဖြစ်ကြောင်း၊ ယင်းအမွေအနှစ်များကို ထိန်းသိမ်းမြှင့်တင်ရန်နှင့် ဝါရင့်အနုပညာရှင်များ၏ အတတ်ပညာ၊ အတွေ့အကြုံများကို မျိုးဆက်သစ်များထံ လက်ဆင့်ကမ်းပေးရန်လိုအပ်ကြောင်း ၎င်းကပြောကြားသည်။

■ ယခုနှစ်ပြိုင်ပွဲတွင် ယခင်နှစ် မန္တလေးငလျင်ကြီးကြောင့် မကျင်းပနိုင်ခဲ့သည့် ပြိုင်ပွဲအမျိုးအစားအချို့အပါအဝင် ဝါသနာရှင်အဆင့်၊ ဇာတ်တော်ကြီးနှင့် ရုပ်စုံသဘင်အဖွဲ့လိုက်ပြိုင်ပွဲများကို ပြန်လည်ထည့်သွင်းကျင်းပနိုင်ခဲ့ကြောင်း၊ မျိုးဆက်သစ်လူငယ်များ၏ ပါဝင်ယှဉ်ပြိုင်မှုနှင့် ဆုရရှိမှု တိုးလာခြင်းသည် မြန်မာ့ရိုးရာအနုပညာအပေါ် စိတ်ဝင်စားမြတ်နိုးမှု တိုးတက်လာခြင်းဖြစ်ကြောင်းလည်း ပြောကြားခဲ့သည်။

■ ထို့ပြင် အဆို၊ အက၊ အရေး၊ အတီးပြိုင်ပွဲများသည် အနုပညာယှဉ်ပြိုင်မှုသက်သက်မဟုတ်ဘဲ တိုင်းရင်းသားတို့၏ ရိုးရာယဉ်ကျေးမှုများကို ဖော်ထုတ်ထိန်းသိမ်းပြီး မျိုးဆက်သစ်အနုပညာရှင်များအကြား ပေါင်းကူးဆက်သွယ်ပေးသည့် အခမ်းအနားများဖြစ်ကြောင်း၊ မိမိတို့၏ ယဉ်ကျေးမှုကို တန်ဖိုးထားသကဲ့သို့ အခြားတိုင်းရင်းသားများ၏ ယဉ်ကျေးမှုကိုလည်း အပြန်အလှန်လေးစားကာ ပြည်ထောင်စုစည်းလုံးညီညွတ်ရေးကို ပိုမိုခိုင်မာအောင်ဆောင်ရွက်ကြရန် တိုက်တွန်းခဲ့သည်။

■ နိုင်ငံဖွံ့ဖြိုးတိုးတက်ရေးတွင် သဘာဝသယံဇာတ၊ ခေတ်မီနည်းပညာနှင့် လူ့စွမ်းအားအရင်းအမြစ်များအပြင် အမျိုးသားယဉ်ကျေးမှုအခြေခံများ ခိုင်မာရေးသည်လည်း အရေးကြီးကြောင်း၊ လူငယ်များအနေဖြင့် မြန်မာ့သမိုင်းအစဉ်အလာ၊ ရိုးရာယဉ်ကျေးမှုနှင့် လူမှုကျင့်ဝတ်တန်ဖိုးများကို သိရှိနားလည်ပြီး အမျိုးသားအကျိုးစီးပွားကို ကာကွယ်စောင့်ရှောက်လိုသည့် စိတ်ဓာတ်များ ရှင်သန်ခိုင်မာလာစေရန် လိုအပ်ကြောင်း ၎င်းကဆက်လက်ပြောကြားသည်။

■ ဆုရရှိသည့် အနုပညာရှင်များအနေဖြင့် အနုပညာအရည်အသွေး ပိုမိုတိုးတက်လာစေရန် ဆက်လက်လေ့လာလေ့ကျင့်ကြရန်နှင့် ဆုမရရှိသေးသူများအနေဖြင့်လည်း ဇွဲလုံ့လမလျှော့ဘဲ ဆက်လက်ကြိုးပမ်းကြရန် သမ္မတက အားပေးတိုက်တွန်းခဲ့ပြီး ရိုးရာယဉ်ကျေးမှုအမွေအနှစ်များ ရေရှည်ရှင်သန်ဖွံ့ဖြိုးရေးအတွက် အနုပညာရှင်များနှင့်တာဝန်ရှိသူများအားလုံး ပူးပေါင်းဆောင်ရွက်ကြရန် ပြောကြားခဲ့သည်။

#YMG/SW #Yangon_Times