#Daily_News
Published 02 November 2026

၁။‌ နိုဝင်ဘာလအတွင်း ကုန်သေတ္တာတင်သင်္ဘော (၅၈)စီးပြေးဆွဲမည်

၂။ ‌EV ကားများဖြင့် ရန်ကုန်-ပုသိမ်ခရီးစဉ်ပြေးဆွဲမည်

၃။‌‌‎ PJ နိုင်ငံကူးလက်မှတ်ကိုင်ဆောင်သူများ OWIC ကတ်နှင့်ငွေလွှဲအထောက်အထားတင်ပြရန်လို

၄။‎ အယ်လ်နီညိုပြင်းထန်မှုကြောင့် ချီလီ၏သတ္တုတူးဖော်ရေးနှင့်စိုက်ပျိုးရေးကဏ္ဍများထိခိုက်နိုင်... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 02 November 2026

■ ထိုင်းတက္ကသိုလ်ပေါင်းစုံ ပညာရေးပြပွဲကြီး ကို ရန်ကုန်မြို့တွင်နိုဝင်ဘာလ ၈ ရက် နံနက် ၉ နာရီမှ ညနေ ၅ နာရီထိ ရန်ကုန်မြို့၊ ကမ္ဘာအေးဘုရားလမ်းရှိ Melia Hotel ဟိုတယ် 𝐆𝐫𝐚𝐧𝐝 𝐁𝐚𝐥𝐥𝐫𝐨𝐨𝐦 တွင်ကျင်းပသွားမည်ဖြစ်ကြောင်း သိရသည်။

■ ယင်းမှ(၁၂) ကြိမ်မြောက် ထိုင်းတက္ကသိုလ်ပေါင်းစုံ ပညာရေးပြပွဲ🇹🇭 𝐓𝐡𝐞 𝟏𝟐𝐭𝐡 𝐓𝐡𝐚𝐢𝐥𝐚𝐧𝐝 𝐄𝐝𝐮𝐜𝐚𝐭𝐢𝐨𝐧 𝐅𝐚𝐢𝐫 (𝐌𝐲𝐚𝐧𝐦𝐚𝐫) ၂၀၂၆ ဖြစ်ပြီး နာမည်ကျော် ထိုင်းတက္ကသိုလ်ပေါင်း ၂၉ ခု က ပြသကြမည်ဖြစ်ကြောင်း သိရသည်။

■ အဆိုပါ ကျောင်းများမှ ပြည်တွင်း ကျောင်းသား ကျောင်းသူများ၏ ပညာရေးအခွင့်အလမ်းများအတွက် ပြသသွားမည်ဖြစ်ပြီး မိမိစိတ်ဝင်စားသည့် Major & Programs များဖြစ်သော Admission Requirements ၊ Tuition Fees & Living Costs ၊ Scholarship Opportunities ၊ International Programs ၊Credit Transfer & Study Pathways ၊Application Procedures ၊ဘွဲ့ရပြီးနောက် Career Opportunities အသက်မွေးဝမ်းကျောင်း အခွင့်အလမ်းများစသည့် အချက်အလက်များကို သက်ဆိုင်ရာ University Representatives များထံ တိုက်ရိုက်မေးမြန်း နိုင်မည်ဖြစ်ကြောင်းသိရသည်။

■ အလားတူ တက္ကသိုလ်တစ်ခုချင်းစီအလိုက် ၁၀၀ ရာခိုင်နှုန်း Fully Funded နှင့် Partial Scholarships အပါအဝင် ပညာသင်သင်ဆု အခွင့်အလမ်းများကို စုံစမ်းနိုင်မည့်အပြင် Grade 11 & Grade 12 Students: University ကို ဆက်လက်တက်ရောက်ရန် ကြိုတင်စီစဉ်နေသူများ၊ High School Graduates: Bachelor’s Degree အတွက် University နှင့် Program ရွေးချယ်နေသူများ၊ GED / IGCSE Students & Graduates: မိမိ Academic Background နဲ့ သင့်တော်သည့် Study Pathway ကို ရှာဖွေနေသူများ၊ University Students: Credit Transfer, Top-up, Exchange သို့မဟုတ် Postgraduate Opportunitiesများအား စိတ်ဝင်စားသူများ၊ Parents & Teachers: သားသမီးများအတွက် International Education Opportunities များကို လေ့လာနေသူများအနေဖြင့် အခမဲ့ဝင်ရောက်လေ့လာစုံစမ်းနိုင်မည်ဖြစ်ကြောင်း သိရသည်။

■ ပညာရေးပြပွဲနေ့တွင် ထိုင်းနိုင်ငံရှိ တက္ကသိုလ်များမှ ဘွဲ့ရရှိထားသော AMAUT Alumni များ၏ အတွေ့အကြုံနှင့် အကြံပြုချက်များ ကိုလည်း နားဆင်နိုင်မည့် Alumni Sharing ၊ Panel Discussion အစီအစဉ်များလည်း ပါဝင်မည်ဖြစ်ပြီး AMAUT အသင်း၏ ကျွမ်းကျင်သည့် အဖွဲ့ဝင်များမှ ကျောင်းရွေးချယ်ခြင်းကစ၍ လျှောက်လွှာတင်ခြင်း၊ Admission ရရှိသည်အထိ လိုအပ်သည့်အဆင့်တိုင်းကို One-Stop Service ဖြင့် လမ်းညွှန်ကူညီပေးသွားမည်ဖြစ်ကြောင်း သိရသည်။

#YMG/SW #Yangon_Times

#Local_News
Published 02 November 2026

■ အယ်လ်နီညိုဖြစ်စဉ် အားအလွန်ကောင်းသည့်အခြေအနေတွင် ဆက်လက်တည်ရှိနေပြီး ၂၀၂၆ ခုနှစ် နိုဝင်ဘာနှင့် ဒီဇင်ဘာလများတွင် အမြင့်ဆုံးအခြေအနေသို့ရောက်ရှိနိုင်သဖြင့် လာမည့်ဆောင်းရာသီနှင့် နွေရာသီကာလများအတွင်း အပူချိန်မြင့်တက်ခြင်းနှင့် ရေရှားပါးမှုများ ဖြစ်ပေါ်လာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးအကြံပြုထားသည်။

■ ကမ္ဘာ့မိုးလေဝသအဖွဲ့ချုပ်နှင့် နိုင်ငံတကာရာသီဥတုဗဟိုဌာနများ၏ ထုတ်ပြန်ချက်များအရ အီကွေတာအနီး အပူပိုင်းပစိဖိတ်သမုဒ္ဒရာ၏ ပင်လယ်ရေမျက်နှာပြင်အပူချိန်သည် ပုံမှန်ထက် ၂ ဒသမ ၅ ဒီဂရီမှ ၂ ဒသမ ၈ ဒီဂရီဆဲလ်စီးယပ်အထိ မြင့်တက်နေပြီး အားအလွန်ကောင်းသော အယ်လ်နီညိုအခြေအနေ ဆက်လက်ဖြစ်ပေါ်နေခြင်းဖြစ်သည်။

■ အယ်လ်နီညိုဖြစ်စဉ်ကြောင့် မိုးရွာသွန်းမှုပုံစံ မူမမှန်ခြင်း၊ မုန်တိုင်းဖြစ်ပေါ်မှုများ ပြောင်းလဲခြင်း၊ အပူချိန်မြင့်တက်ခြင်းနှင့် မိုးခေါင်ရေရှားခြင်းစသည့် အစွန်းရောက်မိုးလေဝသဖြစ်စဉ်များ ဖြစ်ပေါ်လာနိုင်သည်။

■ ထို့ပြင် မြစ်ချောင်း၊ အင်းအိုင်၊ ရေတွင်းနှင့် ရေကန်များတွင် ရေနည်းပါးခြင်း၊ သောက်သုံးရေနှင့် စိုက်ပျိုးရေ ပြတ်လပ်ခြင်းတို့အပြင် အပူရှပ်ခြင်း၊ ရေဓာတ်ခန်းခြောက်ခြင်းနှင့် ဝမ်းပျက်ဝမ်းလျှောရောဂါများ ဖြစ်ပွားနိုင်ကြောင်းလည်း သတိပေးထားသည်။

■ ရေလှောင်တမံများသို့ ရေဝင်ရောက်မှု လျော့နည်းပါက ရေအားလျှပ်စစ်ထုတ်လုပ်နိုင်မှု ကျဆင်းပြီး လျှပ်စစ်ဓာတ်အားလိုအပ်ချက် မြင့်တက်လာနိုင်သဖြင့် သက်ဆိုင်ရာကဏ္ဍများအလိုက် ကြိုတင်ပြင်ဆင်ဆောင်ရွက်ကြရန် အကြံပြုထားသည်။

#YMG/SW #Yangon_Times

#Local_News
Published 02 November 2026

■ မရမ်းကုန်းမြို့နယ် ကမ္ဘာအေးကုန်းမြေရှိ ဆဋ္ဌသင်္ဂါယနာတင် မဟာပါသာဏ လိုဏ်ဂူတော်ကြီးတွင် ပြသထားသည့်ဆဋ္ဌသင်္ဂါယနာတင်အောင်ပွဲ နှစ် (၇၀) ပြည့်အထိမ်းအမှတ်အဖြစ် ဗုဒ္ဓသာသနာတော် ဆိုင်ရာသမိုင်းဝင်အမွေအနှစ်များကို ပြသထားသည့် ပြကွက်နှင့်ပြခန်းများကို အပတ်စဉ် စနေ၊တနင်္ဂနွေနေ့များတွင်အများပြည်သူများကြည်ညိုနိုင်ရန် ပြသသွားမည် ဖြစ်ကြောင်းသိရသည်။

■ အဆိုပါ ဆဋ္ဌသင်္ဂါယနာတင်အောင်ပွဲ နှစ် (၇၀) ပြည့်အထိမ်းအမှတ်အဖြစ် ဗုဒ္ဓသာသနာတော် ဆိုင်ရာသမိုင်းဝင်အမွေအနှစ်များကို ပြသထားသည့် ပြကွက်နှင့် ပြခန်းများကို ယမန်နေ့နံနက်ပိုင်းက မရန်းကုန်းမြို့နယ် အမှတ် (၅) အခြေခံပညာအထက်တန်း‌ကျောင်းမှ ကျောင်းသား၊ ကျောင်းသူ (၃၀၀) ဦးနှင့် ရဟန်းရှင်လူမိဘပြည်သူ (၇၀၀) ကျော် စုစုပေါင်း လေ့လာဖူး‌မြှော်သူ (၁၀၀၀) ကျော် လာရောက်လေ့လာဖူးမြော်ကြကြောင်း သိရသည် ။

#YMG/NN #Yangon_Times

#Local_News
Published 30 October 2026

■ နျူကလီးယားဓာတ်အားပေးစက်ရုံဆိုင်ရာ ကျွမ်းကျင်လုပ်သားနှင့် အင်ဂျင်နီယာများ လေ့ကျင့်ရေး၊ ၅၀၀ ကေဗွီ ဓာတ်အားလိုင်းစနစ်ဆိုင်ရာ နည်းပညာပူးပေါင်းဆောင်ရွက်ရေးနှင့် လျှပ်စစ်၊ သဘာဝဓာတ်ငွေ့ ပို့လွှတ်ဖြန့်ဖြူးရာတွင် ဆုံးရှုံးလေလွင့်မှု လျှော့ချရေးတို့ကို မြန်မာနှင့် ဘယ်လာရုစ် စွမ်းအင်ဝန်ကြီးများ အောက်တိုဘာ ၂၈ ရက်တွင် မင့်စ်မြို့၌ တွေ့ဆုံဆွေးနွေးခဲ့ကြသည်။

■ ဘယ်လာရုစ်နိုင်ငံ၌ ကျင်းပသည့် နှစ် ၃၀ ပြည့် စွမ်းအင်နှင့် ဂေဟဗေဒစနစ်ဆိုင်ရာဖိုရမ်သို့ တက်ရောက်နေသော လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင် ဦးဆောင်သည့် ကိုယ်စားလှယ်အဖွဲ့သည် နှစ်နိုင်ငံရေးထိုးထားသည့် လမ်းပြမြေပုံ (Roadmap) ကို လက်တွေ့အကောင်အထည်ဖော်နိုင်ရေးအတွက် ဘယ်လာရုစ်စွမ်းအင်ဝန်ကြီးနှင့် တွေ့ဆုံခဲ့ခြင်းဖြစ်သည်။

■ ပြည်ထောင်စုဝန်ကြီးက နျူကလီးယားဓာတ်အားပေးစက်ရုံ လည်ပတ်နိုင်ရေးအတွက် ကျွမ်းကျင်လုပ်သားများနှင့် အင်ဂျင်နီယာများ လေ့ကျင့်ပေးရန် အရေးကြီးသဖြင့် ဘယ်လာရုစ်ရှိ ဓာတ်အားပေးစက်ရုံများသို့ လုပ်ငန်းခွင်လက်တွေ့သင်တန်းများစေလွှတ်လိုကြောင်းပြောကြားသည်။

■ မြန်မာနိုင်ငံ၌ မကြာမီ စတင်အသုံးပြုမည့် ၅၀၀ ကေဗွီ ဓာတ်အားလိုင်းစနစ်၏ ပို့လွှတ်ရေး၊ စောင့်ကြည့်ထိန်းသိမ်းရေးလုပ်ငန်းများအတွက်လည်း ကျွမ်းကျင်အင်ဂျင်နီယာများ စေလွှတ်သင်ကြားပေးစေလိုကြောင်း ဆွေးနွေးခဲ့သည်။

■ ထို့ပြင် မဟာဓာတ်အားလိုင်းများ၊ ဓာတ်အားခွဲဝင်းများနှင့် ထရန်စဖော်မာများတွင် နည်းပညာဆိုင်ရာ ဓာတ်အားဆုံးရှုံးမှု လျှော့ချရေး၊ သက်တမ်းကြာမြင့်နေသည့် ဗို့အားမြင့်ကေဘယ်ကြိုးများကို လျှပ်ကူးမှုနှင့် ကြံ့ခိုင်မှုပိုမိုကောင်းမွန်သည့် ဘယ်လာရုစ်ထုတ် Composite ကေဘယ်များဖြင့် အစားထိုးအသုံးပြုရေးတို့ကို စိတ်ဝင်စားကြောင်းပြောကြားသည်။

■ သဘာဝဓာတ်ငွေ့ဆုံးရှုံးလေလွင့်မှု လျှော့ချရေး၊ ဓာတ်မြေသြဇာစက်ရုံများ၏ စွမ်းဆောင်ရည်မြှင့်တင်ရေးနှင့် တိုးချဲ့တည်ဆောက်ရေးတို့တွင်လည်း ပူးပေါင်းဆောင်ရွက်လိုကြောင်း ထည့်သွင်းဆွေးနွေးခဲ့သည်။

■ ဘယ်လာရုစ်စွမ်းအင်ဝန်ကြီးက မိမိတို့နိုင်ငံသည် နျူကလီးယားနှင့် သဘာဝဓာတ်ငွေ့တို့မှ လျှပ်စစ်ဓာတ်အား အဓိကထုတ်လုပ်ပြီး နျူကလီးယားဓာတ်အားပေးစက်ရုံဆိုင်ရာ အတွေ့အကြုံများရှိကြောင်းပြောကြားသည်။

■ သဘာဝဓာတ်ငွေ့ကို ရုရှားထံမှ ဝယ်ယူသုံးစွဲသဖြင့် ရှာဖွေထုတ်လုပ်ရေးအတွေ့အကြုံ မရှိသော်လည်း ဓာတ်ငွေ့နှင့် လျှပ်စစ်ဓာတ်အား ပို့လွှတ်ဖြန့်ဖြူးရေးတွင် ဆုံးရှုံးမှုနည်းပါးစေသည့် နည်းပညာများရှိပြီး ပူးပေါင်းဆောင်ရွက်ရန် အသင့်ရှိကြောင်းပြောကြားခဲ့သည်။

■ မြန်မာကိုယ်စားလှယ်အဖွဲ့သည် အောက်တိုဘာ ၂၈ ရက်နှင့် ၂၉ ရက်တို့တွင် မင့်စ်မြို့ရှိ ထရန်စဖော်မာနှင့် လျှပ်စစ်ကေဘယ်ကြိုး ထုတ်လုပ်ရေးလုပ်ငန်းများ၊ ဓာတ်ငွေ့နှင့် ဓာတ်အားဖြန့်ဖြူးရေးကွန်ရက် ဒီဇိုင်းရေးဆွဲသည့်ဌာန၊ ပို့လွှတ်ဖြန့်ဖြူးရေး ထိန်းချုပ်ရေးစင်တာများနှင့် ရေနံဓာတုဗေဒလုပ်ငန်းတို့ကို သွားရောက်လေ့လာခဲ့ကြောင်း သိရသည်။

#YMG #Yangon_Times #Yangon_Media_Group

#Local_News
Published 30 October 2026

■ နေပြည်တော်ကောင်စီနယ်မြေအပါအဝင် ရန်ကုန်နှင့် မန္တလေးမြို့တို့တွင် 5G ဆက်သွယ်ရေးနည်းပညာဝန်ဆောင်မှုများကို စမ်းသပ်အသုံးပြုနိုင်ပြီဖြစ်ကြောင်း ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာနက ထုတ်ပြန်ထားသည်။

■ 5G ကွန်ရက်အကောင်အထည်ဖော်မှုနှင့် ဆက်သွယ်ရေးစခန်းများ၏ လုပ်ငန်းဆောင်ရွက်မှုအခြေအနေများကို ဒုတိယဝန်ကြီး ဦးသက်ဝင်းအောင်က အောက်တိုဘာ ၂၉ ရက်တွင် နေပြည်တော် ဥတ္တရသီရိနှင့် ဇမ္ဗူသီရိမြို့နယ်တို့ရှိ ဆက်သွယ်ရေးစခန်းများသို့ သွားရောက်ကြည့်ရှုခဲ့ကြောင်း သိရသည်။

■ ခရီးစဉ်အတွင်း မိုဘိုင်းဆက်သွယ်ရေးအော်ပရေတာများက 5G ကွန်ရက်တည်ဆောက်မှု၊ ဆက်သွယ်ရေးစခန်းများ၏ လုပ်ငန်းဆောင်ရွက်မှု၊ ကွန်ရက်လွှမ်းခြုံမှု တိုးချဲ့မည့်အစီအစဉ်များနှင့် နည်းပညာဆိုင်ရာလိုအပ်ချက်များကို ရှင်းလင်းတင်ပြခဲ့ကြသည်။

■ 5G နည်းပညာသည် မြန်နှုန်းမြင့်ဒေတာဆက်သွယ်မှုနှင့် အချိန်နှင့်တစ်ပြေးညီ သတင်းအချက်အလက်ဖလှယ်မှုများအပြင် ဒီဂျစ်တယ်နည်းပညာအခြေပြု ဝန်ဆောင်မှုများ ဖွံ့ဖြိုးတိုးတက်ရေးအတွက် အရေးပါကြောင်း ဒုတိယဝန်ကြီးက ပြောကြားခဲ့သည်။

■ ထို့ပြင် 5G ကွန်ရက်များ တည်ဆောက်ရာတွင် သတ်မှတ်နည်းပညာစံချိန်စံညွှန်းများနှင့်အညီ ဆောင်ရွက်ရန်၊ ကွန်ရက်တည်ငြိမ်မှုနှင့် ဝန်ဆောင်မှုအရည်အသွေး ပြည့်မီစေရန်၊ ဆက်သွယ်ရေးစက်ပစ္စည်းများကို စနစ်တကျ ထိန်းသိမ်းပြုပြင်ရန် လိုအပ်ကြောင်း မှာကြားခဲ့သည်။

■ 5G နည်းပညာ ဖွံ့ဖြိုးလာခြင်းသည် ဒီဂျစ်တယ်စီးပွားရေး၊ စမတ်မြို့ပြဖွံ့ဖြိုးရေးနှင့် အင်တာနက်အခြေပြုဝန်ဆောင်မှုလုပ်ငန်းများ တိုးတက်လာစေရန် အထောက်အကူပြုမည်ဖြစ်သဖြင့် ဆက်သွယ်ရေးကွန်ရက်အရည်အသွေး မြှင့်တင်ရေးအတွက် သက်ဆိုင်ရာဌာနများနှင့် မိုဘိုင်းဆက်သွယ်ရေးအော်ပရေတာများ ပူးပေါင်းဆောင်ရွက်လျက်ရှိကြောင်း သိရသည်။

#YMG/SW #Yangon_Times