ရန်ကုန်-မန္တလေး အမြန်လမ်းမကြီး မိုင်တိုင်အမှတ် ၃၅၈/၁ မှာ တည်ဆောက်နေတဲ့ ဒုဋ္ဌဝတီတံတားအသစ်ကို မြန်မာနိုင်ငံမှာ ပထမဆုံးအဖြစ် ငလျင်ဒဏ်ခံ EradiQuake Bearing တွေ တပ်ဆင်ပြီး ၂၀၂၆ ခုနှစ် နှစ်ကုန်မတိုင်မီ အပြီးတည်ဆောက်သွားမယ်လို့ ဆောက်လုပ်ရေးဝန်ကြီးဌာနက သိရပါတယ်။

#Local_News
Published 10 August 2026
#ဒုဋ္ဌဝတီတံတား #ငလျင်
#YMG/SW #Yangon_Times

စစ်ကိုင်းမြို့နယ်အတွင်း မူးမြစ်ရေဝင်ရောက်မှုကြောင့် ကျေးရွာများရှိ နေအိမ်များနဲ့ ဝါစိုက်ခင်းတွေရေနစ်မြုပ်နေတယ်လို့သိရပါတယ်။

#Local_News
Published 10 August 2026
#စစ်ကိုင်းမြို့နယ် #ဝါစိုက်ခင်း
#YMG/NN #Yangon_Times

မြန်မာနိုင်ငံအတွင်းရှိ မြစ်ကြီးအချို့မှာ စိုးရိမ်ရေမှတ်အထက် ရောက်ရှိနေပြီး လာမယ့်တစ်ရက်အတွင်း မြစ်ရေတွေ ဆက်လက်မြင့်တက်နိုင်တာကြောင့် မြစ်ကမ်းအနီးနဲ့ မြေနိမ့်ပိုင်းနေထိုင်သူတွေအနေနဲ့ ရေဘေးအန္တရာယ် ကြိုတင်သတိပြုကြဖို့ မိုးလေဝသနှင့် ဇလဗေဒဦးစီးဌာနက ယနေ့ ဩဂုတ်လ ၁၀ ရက် နံနက် ၈ နာရီ မှာထုတ်ပြန်အသိပေးထားပါတယ်။

#Local_News
Published 10 August 2026
#မြစ်ကြီး
#YMG/SW #Yangon_Times

#Daily_News
Published 10 August 2026

၁။‌ ရထားလမ်းရေကျော်နေ၍ ပုသိမ် - ကြံခင်းရထားခရီးစဉ်များယာယီရပ်နား

၂။ ‌‌မြစ်ကြီးအချို့စိုးရိမ်ရေမှတ်အထက်ရောက်ရှိနေပြီး လာမယ့်တစ်ရက်အတွင်းဆက်လက်မြင့်တက်နိုင်

၃။‌‌‎ စစ်ကိုင်းမြို့နယ်၊ ကျေးရွာများရှိနေအိမ်များနှင့်ဝါစိုက်ခင်းများရေမြုပ်

၄။‎ ကုလသမဂ္ဂအတွင်းရေးမှူးချုပ်နေရာအတွက်ကိုယ်စားလှယ်လောင်းများအပေါ် ကုလလုံခြုံရေးကောင်စီတံခါးပိတ်မဲပေးပွဲကျင်းပ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ဧရာဝတီတိုင်းဒေသကြီး၊ ကျုံပျော်မြို့နယ်အတွင်း၌ရထားလမ်းရေကျော်နေ၍ ပုသိမ် - ကြံခင်းရထားခရီးစဉ်များယာယီရပ်နားလိုက်တယ်လို့ သိရပါတယ်။

#Local_News
Published 10 August 2026
#ရထား
#YMG/NN #Yangon_Times

#World_News
ဘန်ကောက်၊ ဩဂုတ် ၁၀ —

■ ထိုင်းနိုင်ငံ ဘန်ကောက်မြို့ ဆင်ခြေဖုံးရှိ ဒေသန္တရအစိုးရရုံးတစ်ခု၌ ဩဂုတ် ၁၀ ရက် တနင်္လာနေ့က သေနတ်ပစ်ခတ်မှုဖြစ်ပွားခဲ့ပြီး အဆင့်မြင့် ပြည်နယ်အရာရှိတစ်ဦးနှင့် ၎င်း၏ယာဉ်မောင်း ဒဏ်ရာရရှိခဲ့ကြောင်း တာဝန်ရှိသူများကပြောကြားခဲ့သည်။

■ ပစ်ခတ်မှုကျူးလွန်သည်ဟု သံသယရှိသူ လွှတ်တော်အမတ်ဟောင်းတစ်ဦးကို ရဲတပ်ဖွဲ့က ဖမ်းဆီးထားသည်။

■ ဘန်ကောက်နှင့် နယ်နိမိတ်ချင်းထိစပ်နေသည့် နွန်ထဘူရီပြည်နယ် ရဲတပ်ဖွဲ့မှူး ဗိုလ်ချုပ် ဒက်ဂျာပီ ကောင်ဒီ (Dejrapee Kongdee) က သံသယရှိသူသည် အဆင့်မြင့် ပြည်နယ်အရာရှိနှင့် ၎င်း၏ယာဉ်မောင်းကို ပစ်ခတ်ခဲ့ခြင်းဖြစ်ပြီး ဒဏ်ရာရသူနှစ်ဦးကို ဆေးရုံသို့ ပို့ဆောင်ကုသထားကြောင်း Reuters သို့ ပြောကြားခဲ့သည်။

■ အဆိုပါပစ်ခတ်မှုသည် နွန်ထဘူရီပြည်နယ်ရှိ ကျောင်းတစ်ကျောင်း၌ အသက် ၁၄ နှစ်အရွယ် ယောက်ျားလေးတစ်ဦး၏ အစုလိုက်အပြုံလိုက် သေနတ်ပစ်ခတ်မှုဖြစ်ပွားပြီး ရက်အနည်းငယ်အကြာတွင် ထပ်မံဖြစ်ပွားခြင်းဖြစ်သည်။

■ သောကြာနေ့က ဖြစ်ပွားခဲ့သည့် အဆိုပါပစ်ခတ်မှုတွင် ဆယ်ကျော်သက်က ပထမဦးစွာ ၎င်း၏နေအိမ်၌ ပစ်ခတ်ခဲ့ပြီးနောက် Debsirin Nonthaburi ကျောင်းတွင် ဆက်လက်ပစ်ခတ်ခဲ့ရာ သေနတ်သမားအပါအဝင် လူကိုးဦးသေဆုံးပြီး လူ ၂၀ ကျော် ဒဏ်ရာရရှိခဲ့သည်။

■ ယင်းသည် ထိုင်းနိုင်ငံတွင် လေးနှစ်နီးပါးအတွင်း လူသေဆုံးမှုအများဆုံး အစုလိုက်အပြုံလိုက် သေနတ်ပစ်ခတ်မှုဖြစ်သည်။

■ ပစ်ခတ်မှုများကြောင့် ထိုင်းနိုင်ငံတွင် သေနတ်ထိန်းချုပ်ရေးဆိုင်ရာ ဆွေးနွေးမှုများ ပြန်လည်မြင့်တက်လာပြီး ဝန်ကြီးချုပ် အနူတင် ချန်ဝီရာကူလ် က သေနတ်ပိုင်ဆိုင်ခြင်း၊ ကိုင်ဆောင်ခြင်းနှင့် အသုံးပြုခြင်းဆိုင်ရာ စည်းမျဉ်းများကိုပိုမိုတင်းကျပ်သွားမည်ဟု ထပ်မံပြောကြားခဲ့သည်။

■ တနင်္လာနေ့တွင် ကျောင်းသား၊ ကျောင်းသူများ စာသင်ခန်းများသို့ ပြန်လည်တက်ရောက်ချိန်၌ အချို့ကျောင်းများတွင် သတ္တုရှာဖွေရေးစက်များဖြင့် စစ်ဆေးခြင်းနှင့် လုံခြုံရေးအစီအမံများ တိုးမြှင့်ဆောင်ရွက်ခဲ့သည်။

■ သောကြာနေ့က ပစ်ခတ်မှုဖြစ်ပွားခဲ့သည့်ကျောင်းနှင့် ဆက်နွှယ်သော ဘန်ကောက်ရှိ Debsirin School တွင်လည်း သတ္တုရှာဖွေရေးစက်များ တပ်ဆင်ပြီး ကျောင်းဝင်ပေါက်လုံခြုံရေးကို တိုးမြှင့်ထားသည်။

■ ကျောင်းအုပ်ကြီး ဝီသန် ပရုမ်စင်တူဆက် (Withan Promsintusak) က မိဘများ စိတ်ချစေရန်နှင့် ကျောင်းသားများ၏ လုံခြုံရေးအတွက် လက်နက်စစ်ဆေးရေးစနစ်ကို ချက်ချင်းစတင်အသုံးပြုခဲ့ကြောင်း ပြောကြားခဲ့သည်။

■ “အလုံခြုံဆုံးနေရာဖြစ်သင့်တဲ့ ကျောင်းမှာ ဒီလိုအဖြစ်မျိုး ဖြစ်လာမယ်လို့ ဘယ်တုန်းကမှ မတွေးခဲ့ဖူးပါဘူး” ဟု ၎င်းက ဆိုသည်။

■ ပစ်ခတ်မှုအပြီးတွင် ထိုင်းပညာရေးဝန်ကြီးဌာနက လာမည့် သုံးလအတွင်း ကျောင်းလုံခြုံရေးဆိုင်ရာ လုပ်ထုံးလုပ်နည်းသစ်များ ရေးဆွဲမည်ဖြစ်ကြောင်း ထုတ်ပြန်ခဲ့သည်။ ယင်းတွင် စိတ်ကျန်းမာရေး စစ်ဆေးမှုများ၊ အရေးပေါ်တုံ့ပြန်ရေး လေ့ကျင့်မှုများ၊ ကျောင်းသားအချင်းချင်း အနိုင်ကျင့်မှု တားဆီးရေးနှင့် လက်နက်အပါအဝင် တားမြစ်ပစ္စည်းများကို ပိုမိုထိရောက်စွာ ရှာဖွေစစ်ဆေးနိုင်ရေး အစီအမံများ ပါဝင်မည်ဖြစ်သည်။

■ ဝန်ကြီးချုပ် အနူတင်က အများပြည်သူနေရာများတွင် သေနတ်ကိုင်ဆောင်သူများအပေါ် ပိုမိုတင်းကျပ်စွာ အရေးယူရန်လည်း အမိန့်ပေးခဲ့ပြီး ရဲတပ်ဖွဲ့က စစ်ဆေးရေးဂိတ်များ တည်ထောင်ကာ သေနတ်ပိုင်ဆိုင်ခြင်း၊ ကိုင်ဆောင်ခြင်းနှင့် အသုံးပြုခြင်းတို့ကို ထိန်းချုပ်ရေး အရှိန်မြှင့်ဆောင်ရွက်သွားမည်ဖြစ်သည်။

■ “အထူးသဖြင့် အများပြည်သူနေရာမှာ ဘယ်သူ့မှာမှ သေနတ်ကိုင်ဆောင်ခွင့် မရှိပါဘူး” ဟု အနူတင်က သတင်းထောက်များအား ပြောကြားခဲ့ပြီး မိမိကိုယ်ကိုကာကွယ်ရန် သေနတ်ကိုင်ဆောင်ထားခြင်းဖြစ်သည်ဟူသော အကြောင်းပြချက်ကိုလည်း လက်ခံနိုင်ဖွယ်မရှိကြောင်းဆိုသည်။

■ Small Arms Survey ၏ ၂၀၁၇ ခုနှစ် ခန့်မှန်းချက်အရ ထိုင်းနိုင်ငံရှိ အရပ်သားများလက်ဝယ်တွင် သေနတ် ၁၀.၃ သန်းခန့်ရှိပြီး လူဦးရေ ၁၀၀ လျှင် သေနတ် ၁၅ လက်ခန့်ရှိသည်။ ယင်းသည် အရှေ့တောင်အာရှတွင် အမြင့်ဆုံးနှုန်းဖြစ်သည်။

■ ကျွမ်းကျင်သူများအဆိုအရ ထိုင်းနိုင်ငံ၏ လက်ရှိသေနတ်လိုင်စင်စနစ်တွင် သေနတ်ပိုင်ဆိုင်ခွင့် လျှောက်ထားသူများအတွက် စိတ်ကျန်းမာရေးစစ်ဆေးမှု မပါဝင်သေးဘဲ အသက် ၂၀ နှစ်မှစ၍ သေနတ်ပိုင်ဆိုင်ခွင့်ရှိသည်။

■ ထို့ပြင် လိုင်စင်ရရှိထားသူများကို အချိန်ကာလအလိုက် ပြန်လည်စစ်ဆေးသုံးသပ်ရန်လည်း မလိုအပ်ကြောင်း သိရသည်။

#World_News
Published 10 August 2026

■ အီရန်ဟာ ဟော်မုဇ်ရေလက်ကြားမှတဆင့် သင်္ဘောလမ်းကြောင်းသစ်များ သတ်မှတ်ရန် အိုမန်နိုင်ငံနဲ့ နောက်ဆုံးအဆင့် သဘောတူညီချက်ရရှိရန် နီးကပ်နေပြီလို့ ဆိုပါတယ်။

■ ဒါပေမဲ့ ရေလက်ကြား ပြန်လည်မဖွင့်မီ အမေရိကန်အနေဖြင့် လျော်ကြေးပေးအပ်ရန်၊ စီးပွားရေးပိတ်ဆို့မှုများနဲ့ စစ်ရေးခြိမ်းခြောက်မှုများ ရပ်တန့်ရန် အပါအဝင် အခြားသော အခြေအနေများကို လိုက်လျောဖြည့်ဆည်းပေးရမယ်လို့ ထပ်လောင်းပြောခဲ့ပါတယ်။

■ အီရန်နိုင်ငံခြားရေးဝန်ကြီး အဘက်စ်အာရတ်ချီက အမေရိကန်အနေဖြင့် တောင်းဆိုချက်များစွာကို လိုက်လျောခြင်းမရှိသရွေ့ ရေလက်ကြား ဆက်လက်ပိတ်ထားမယ်လို့ ပြောခဲ့ပါတယ်။

■ အီရန်က စစ်ပွဲကြောင့် ပျက်စီးဆုံးရှုံးမှုများအတွက် လျော်ကြေးပေးရန်၊ စစ်ရေးခြိမ်းခြောက်မှုများ ရပ်တန့်ရန်၊ အမေရိကန်ရေကြောင်းပိတ်ဆို့မှု ဖယ်ရှားပေးရန် တောင်းဆိုနေပါတယ်။

■ အမေရိကန်က ဇွန်လက ရရှိခဲ့တဲ့ ယာယီအပစ်အခတ် ရပ်စဲရေး သဘောတူညီချက်ကို ချိုးဖောက်ခဲ့တယ်လို့ စွပ်စွဲကာ အမေရိကန်နဲ့ တိုက်ရိုက်ဆွေးနွေးပွဲများ ပြုလုပ်ရန် အီရန်က ငြင်းဆိုထားပါတယ်။

■ ကုန်သွယ်ရေးသင်္ဘောများ ဘေးကင်းစွာ ပြန်လည်သွားလာနိုင်ပါက ရေကြောင်းပိတ်ဆို့မှု ဖယ်ရှားပေးမယ်လို့ အမေရိကန်တာဝန်ရှိသူများ အရိပ်အမြွက်ပြောခဲ့ပြီး သမ္မတထရမ့်ကတော့ အမေရိကန်အနေဖြင့် ဆွေးနွေးမှုအချို့ ပြုလုပ်နေတယ်လို့ မှတ်ချက်ပြုခဲ့ပါတယ်။

■ ဒေသတွင်း တိုက်ခိုက်မှုများ ဆက်လက်ရှိနေပြီး အရေးပါတဲ့ ရေလက်ကြားမှတဆင့် ကမ္ဘာ့စွမ်းအင် သယ်ယူပို့ဆောင်ရေးလုပ်ငန်းများ အနှောင့်အယှက် ဖြစ်ပေါ်နေတာကြောင့် တင်းမာမှုများ မြင့်မားနေပါတယ်။

Source: Reuters

#Local_News
Published 10 August 2026

■ ရန်ကုန်မြို့၊ သိမ်ဖြူလက်ဝှေ့အားကစားရုံမှာ ဩဂုတ်လ ၉ ရက်က ကျင်းပသည့် (၁၁) ကြိမ်မြောက် မြန်မာ့ရိုးရာလက်ဝှေ့ ကမ္ဘာ့ချန်ပီယံပြိုင်ပွဲကြီး (MLWC)၌ ၇၅ကီလို/ ၅ ချီ ပြိုင်ပွဲ ၊၅၃ ကီလို /၄ ချီ ပြိုင်ပွဲ ၊၆၅ကီလို/၄ ချီပြိုင်ပွဲ ၊၅၆ ကီလို/၅ချီ ပြိုင်ပွဲ ၊၆၀ ကီလို /၅ချီ ပြိုင်ပွဲများ၌ပူးတွဲသရေများရရှိခဲ့ကြောင်းသိရသည်။

■ ခေါင်တွဲဆိုင်းဖြစ်သည့် ထွန်းမင်းအောင် နှင့် ရာမန် တို့၏ ၇၅ကီလို/ ၅ ချီ ပြိုင်ပွဲ၌ အနိုင် အရှုံး အဖြေမပေါ်ဘဲ ပူးတွဲသရေဖြင့်ပြီးဆုံးခဲ့ကြောင်း သိရသည် ။

■ ထို့အပြင် ဒုတိယခေါင်တွဲဆိုင်းဖြစ်သည့် နိုင်ဝင်းထွန်း နှင့် ကမ္ဘာရှား တို့၏ ၆၇ ကီလို/၅ ချီ ပြိုင်ပွဲမှာ နိုင်ဝင်းထွန်းက ၄ ချီ ၂ မိနစ်နှင့်စက္ကန့် ၃၀ တွင် ဒိုင်ပွဲရပ်ဖြင့် အနိုင်ရရှိခဲ့ကြောင်းသိရသည်။

■ ၎င်းအပြင် ဒေါင်းမိုက်သွေး နှင့် စောရူဘီ တို့၏ ၅၃ ကီလို /၄ ချီ ပြိုင်ပွဲ၌ ပူးတွဲသရေ ဖြင့် ပြီးဆုံးသွားပြီး အောင်ကိုလတ် နှင့် စောထိန်လင်း တို့၏ ၆၅ကီလို/၄ ချီပြိုင်ပွဲမှာလည်း ပူးတွဲသရေ သာ ရရှိကြောင်း ၊ ဆလိုင်းထန်ခွီးရှိန် နှင့် ဟိန်းထွန်းအောင်တို့၏ ၅၆ ကီလို/၅ချီ ပြိုင်ပွဲ၌ ပူးတွဲသရေ ရရှိသွားပြီး အဲမွီ နှင့် သန့်ဇင်တို့၏ ၆၀ ကီလို /၅ချီ ပြိုင်ပွဲ၌လည်း ပူးတွဲသရေများရရှိခဲ့ကြောင်းသိရသည်။

#YMG/NN #Yangon_Times

#Local_News
Published 10 August 2026

■ ရန်ကုန်တိုင်းဒေသကြီး၊ ပန်းပဲတန်းမြို့နယ်၊ ရွှေဘုံသာလမ်းရှိ Diamond Shine စိန်ရွှေရတနာဆိုင်ပိုင်ရှင်အား  ဩဂုတ်လ ၆ ရက်တွင် ပြန်ပေးဆွဲခံရမှုကို ၁၂ နာရီအချိန်အကြာ ဩဂုတ်လ ၇ ရက်နေ့၌ တရားခံများကိုဖော်ထုတ်ဖမ်းဆီးရမိခဲ့ကြောင်းသိရပါတယ်။

■ လုံခြုံရေးတပ်ဖွဲ့ဝင်များက တရားခံများကို အမြန်ဆုံးဖော်ထုတ်ဖမ်းဆီးရမိရေး လိုအပ်သည့်စိစစ်မှုများဆောင်ရွက်ခဲ့ပြီး ဩဂုတ်လ ၇ရက်နေ့ နံနက် ၄နာရီခွဲချိန်ခန့်တွင် ပြန်ပေးဆွဲမှုဖြစ်စဉ်တွင်ပါဝင်သူ တရားခံများ ဖြစ်ကြသည့် မူဒူးဂါး(ခ) ဝင်းကိုအောင်(ဘ)ဦးလှမြင့်(ခ)ဦးဘာစန်း(ဟိန္ဒူ၊ဗုဒ္ဓ)နှင့် ဂင်ဒို(ခ) လင်းလင်း (ဘ)ဦးမောင်မောင် (ဟိန္ဒူ၊ ဗုဒ္ဓ) တို့ နှစ်ဦးအား  တာမွေမြို့နယ်၊ စက်စန်းဟိုတယ် အနီးတွင်ဖမ်းဆီးရမိခဲ့ပြီး ဆက်စပ်တရားခံများအား ဖမ်းဆီးရမိရေး ဆက်လက် ဆောင်ရွက်ခဲ့ရာ အဆိုပါနေ့ နံနက် ၅ နာရီခန့်တွင် မျိုးမင်းဦး(ခ) မျိုးကြီး (ဘ) ဦးအုန်းမြနှင့် အောင်သူ(ခ) အောင်သူဦး (ဘ)ဦးဝင်းလှိုင် တို့နှစ်ဦးအား သာကေတမြို့နယ်၊ ကျောက်တိုင်မှတ်တိုင်အနီးတွင်အသွား၆လက်မခန့်ရှိ ဓားတစ်ချောင်း၊ လှံစွပ်တစ်ချောင်း၊ လက်ထိပ်တစ်ခုတို့နှင့်အတူ ထပ်မံဖမ်းဆီးရမိခဲ့ပြီး အဆိုပါနေရာ တစ်ဝိုက်အား လိုအပ်သည့်ရှာဖွေမှုများ ဆောင်ရွက်ခဲ့ရာ ပြန်ပေးဆွဲခံရသူ ဦးအောင်မြင့် (ခ) ဆူပရာမန်းနီး အား ၎င်းအနီးရှိ အိမ်ပျက်အတွင်းမှ အသက်ရှင်လျက်ပြန်လည် ရှာဖွေတွေ့ရှိကယ်တင်နိုင်ခဲ့ပါတယ်။

■ ဖမ်းဆီးရမိခဲ့သည့် တရားခံ စုစုပေါင်း ၉ ဦးတို့အား တည်ဆဲဥပဒေများနှင့် အညီထိရောက် ပြင်းထန်စွာအရေးယူနိုင်ရေး ဆက်လက်ဆောင်ရွက်သွားမှာဖြစ်တယ်လို့ သိရှိရပါတယ်။

#Yangon_Media_Group
#YMG/MNN #Yangon_Times

#Local_News
Published 10 August 2026

■ မိုင်းဆတ်၊ ဩဂုတ် ၉ — (၁၆) ကြိမ်မြောက် အာခါရိုးရာစုပေါင်း “ရဲခူအာဖွေ” ဒန်းစီးပွဲတော်နှင့် အူးဖူဒေ့ကျေးရွာတည်ထောင်ခြင်း နှစ် ၃၀ ပြည့်အခမ်းအနားကို ရှမ်းပြည်နယ် (အရှေ့ပိုင်း) မိုင်းဆတ်မြို့နယ်၊ မိုင်းတွမ်းတောင်ပေါ်အုပ်စု အူးဖူဒေ့ကျေးရွာ၌ ဩဂုတ် ၉ ရက်က ကျင်းပခဲ့ပြီး တိုင်းရင်းသားရိုးရာယဉ်ကျေးမှု ထိန်းသိမ်းဖော်ထုတ်ရေး၊ ဒေသတွင်းစည်းလုံးညီညွတ်မှုနှင့် ပွဲတော်အခြေပြု ခရီးသွားလုပ်ငန်းဖွံ့ဖြိုးရေးတို့ကို မြှင့်တင်ရန်ရည်ရွယ်ကြောင်းသိရသည်။

■ အခမ်းအနားသို့ ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်၊ ရှမ်းပြည်နယ်ဝန်ကြီးချုပ် ဦးစိုင်းထိန်စိုး၊ တြိဂံဒေသတိုင်းစစ်ဌာနချုပ် တိုင်းမှူး၊ ပြည်နယ်လွှတ်တော်ဥက္ကဋ္ဌ၊ တိုင်းရင်းသားလူမျိုးများရေးရာဝန်ကြီးဌာန ဒုတိယဝန်ကြီး၊ ပြည်နယ်ဝန်ကြီးများ၊ အာခါတိုင်းရင်းသားခေါင်းဆောင်များနှင့် ဒေသခံပြည်သူများ တက်ရောက်ခဲ့ကြသည်။

■ ပွဲတော်နှင့်အတူ အူးဖူဒေ့ကျေးရွာတည်ထောင်ခြင်း နှစ် ၃၀ ပြည့် အထိမ်းအမှတ် ကွန်ကရစ်ရင်ပြင်နှင့် လမ်းတို့ကို ဖွင့်လှစ်ခဲ့ပြီး အာခါရိုးရာဓလေ့ထုံးတမ်းနှင့်အညီ ဒန်းတော် မင်္ဂလာပြုစီးနင်းခြင်း၊ နှစ် ၃၀ ပြည့် မင်္ဂလာကျောက်စာတိုင် ဖွင့်လှစ်ခြင်းတို့ကို ဆောင်ရွက်ခဲ့ကြသည်။

■ ပြည်ထောင်စုဝန်ကြီးက တိုင်းရင်းသားတို့၏ ထူးခြားသည့် ရိုးရာပွဲတော်များကို ဖော်ထုတ်မြှင့်တင်ခြင်းသည် နိုင်ငံတကာခရီးသွားများအနေဖြင့် ဒေသခံတိုင်းရင်းသားများနှင့် တိုက်ရိုက်ထိတွေ့၍ ယဉ်ကျေးမှုဆိုင်ရာ ဗဟုသုတများ လေ့လာနိုင်စေသည့်အပြင် ဒေသခံလူထုအတွက် ခရီးသွားလုပ်ငန်းဆိုင်ရာ အလုပ်အကိုင်နှင့် ဝင်ငွေအခွင့်အလမ်းများ တိုးတက်စေနိုင်ကြောင်း ပြောကြားခဲ့သည်။

■ ယင်းမှတစ်ဆင့် လူနေမှုအဆင့်အတန်း မြင့်မားရေးနှင့် ဆင်းရဲနွမ်းပါးမှု လျော့ပါးရေးကိုလည်း အထောက်အကူပြုနိုင်မည်ဟုဆိုသည်။

■ “ရဲခူအာဖွေ” ဒန်းစီးပွဲတော်သည် အာခါတိုင်းရင်းသားတို့၏ ထင်ရှားသည့် ရိုးရာဓလေ့ပွဲတော်တစ်ခုဖြစ်ပြီး မိုင်းဆတ်မြို့နယ်အတွင်းရှိ အာခါမျိုးနွယ်စုများနှင့် အခြားဒေသခံတိုင်းရင်းသားများ ပူးပေါင်းပါဝင်ဆင်နွှဲလေ့ရှိသဖြင့် ရိုးရာယဉ်ကျေးမှု အမွေအနှစ်များ ထိန်းသိမ်းရေးနှင့် ဒေသတွင်း လူမှုအသိုက်အဝန်း ချိတ်ဆက်မှုကို အားပေးနိုင်သည့် ပွဲတော်တစ်ခုဖြစ်ကြောင်း သိရသည်။

■ အခမ်းအနားတွင် အာခါအမျိုးသားစာပေနှင့် ယဉ်ကျေးမှုအဖွဲ့က ရိုးရာအကနှင့် တေးသံသာများဖြင့် ဖျော်ဖြေတင်ဆက်ခဲ့ပြီး ပွဲတော်အထိမ်းအမှတ် လက်ဆောင်များပေးအပ်ခြင်းနှင့် သစ်ပင်စိုက်ပျိုးခြင်းတို့ကိုလည်း ဆောင်ရွက်ခဲ့ကြသည်။

■ ရှမ်းပြည်နယ် (အရှေ့ပိုင်း) သည် တရုတ်၊ လာအိုနှင့် ထိုင်းနိုင်ငံတို့နှင့် နယ်နိမိတ်ထိစပ်နေသည့် ဒေသဖြစ်ပြီး အိမ်နီးချင်းနိုင်ငံများမှ ခရီးသွားများ ဝင်ရောက်လည်ပတ်နိုင်သည့် အလားအလာရှိသဖြင့် ယခုကဲ့သို့ တိုင်းရင်းသားရိုးရာယဉ်ကျေးမှုပွဲတော်များ ကျင်းပခြင်းသည် ဒေသ၏ ယဉ်ကျေးမှုဆိုင်ရာ ခရီးသွားထုတ်ကုန်များ ဖော်ထုတ်ရေးနှင့် နိုင်ငံ၏ ခရီးသွားလုပ်ငန်း ဖွံ့ဖြိုးရေးအတွက် အထောက်အကူဖြစ်စေမည်ဖြစ်ကြောင်း သိရသည်။

#World_Health
Published 10 August 2026

■ မျက်နှာအရေပြားနဲ့ ပတ်သက်လာရင် နေကာ၊ ရေဓာတ်၊ စိုစွတ်မှု၊ ခြောက်သွေ့မှု၊ နေရောင်၊ လေအေးစနစ်တို့ကိုသာ ပြောနေကြပေမယ့် အရေးကြီးဆုံးတွေထဲကတစ်ခုက ဗိုက်တာမင်-အီးလည်း ပါဝင်ပါတယ်။

■ ဗိုက်တာမင်-အီးဟာ ပတ်ဝန်းကျင်ကြောင့် ဖြစ်ပေါ်လာတဲ့ အောက်ဆီဂျင်ဓာတ်တိုး ပျက်စီးခြင်းများမှ အရေပြားဆဲလ်အမြှေးပါးများကို ကာကွယ်ပေးတဲ့ အဆီပျော်ဝင်သော ဓာတ်တိုးဆန့်ကျင်ပစ္စည်းတစ်မျိုး ဖြစ်ပါတယ်။

■ နေရောင်ကာခရင်နေရာမှာ အလုံးစုံ အစားထိုးနိုင်တာ မဟုတ်ပေမယ့် ခရမ်းလွန်ရောင်ခြည်နဲ့ လေထုညစ်ညမ်းမှုများကို ခုခံဖို့ အရေပြား သဘာဝကာကွယ်ရေးစနစ်ကို အထောက်အကူ ပြုပါတယ်။

■ သူ့မှာပါဝင်တဲ့ အယ်လ်ဖာ-တိုကိုဖရောလ်က လူကြီးတွေဆိုရင် တစ်နေ့ကို ၁၅ မီလီဂရမ်လိုအပ်ပြီး ဖြည့်စွက်အားဆေးများထက် အစားအစာမှ ရရှိခြင်းက အကောင်းဆုံး ဖြစ်ပါတယ်။

■ အခွံနွှာပြီးသား နေကြာစေ့၊ ဗာဒံစေ့ ၂၀ ဂရမ်စားသုံးရုံဖြင့် နေ့စဉ်လိုအပ်ချက်ရဲ့ ၃ ပုံ ၁ ပုံလောက် ရရှိနိုင်ပါတယ်။

■ ဗိုက်တာမင်-အီး အကြွယ်ဝဆုံး ရင်းမြစ်က ဂျုံပင်ပေါက်ဆီဖြစ်ပြီး တစ်ဇွန်းကို ၂၀ မီလီဂရမ်ထက်မကပါဝင်ကာ အာဟာရဓာတ်များ မဆုံးရှုံးစေဖို့ အပူမပေးဘဲသုံးဆောင်သင့်ပါတယ်။

■ ဗိုက်တာမင်-အီးဟာ အဆီမှာပျော်ဝင်တာကြောင့် ကျန်းမာရေးနဲ့ ညီညွတ်တဲ့ အဆီများနဲ့ တွဲဖက်စားသုံးပါက ခန္ဓာကိုယ်ကနေ ပိုမိုထိရောက်စွာစုပ်ယူနိုင်ပါတယ်။

■ ဟင်းနုနွယ်၊ ကိုက်လံ၊ ပန်းဂေါ်ဖီစိမ်းတို့လို အစိမ်းရောင်ဟင်းရွက်များကို အကျိုးပြုအဆီများ၊ အစေ့အဆန်များနဲ့ တွဲဖက်စားသုံးခြင်းဖြင့် ဗိုက်တာမင်-အီးစုပ်ယူမှု ပိုမိုအားကောင်းစေပါတယ်။

Source: The Jerusalem Post

#World_Health
Published 10 August 2026

■ ယနေ့ခေတ် လူငယ်တွေ ဆေးခန်းလာပြတဲ့အခါ ဦးနှောက်ဝေဝါးခြင်း၊ ခေါင်းကိုက်ခြင်း၊ မှတ်ဉာဏ်ချို့ယွင်းခြင်း၊ အာရုံစိုက်ရခက်ခဲခြင်းတို့ အဖြစ်များလာကြပြီး ဒါဟာ စမတ်ဖုန်း၊ ကွန်ပျူတာဖန်သားပြင်များ အလွန်အကျွံ သုံးစွဲခြင်းကြောင့်ဖြစ်ကြောင်း အာရုံကြောအထူးကုတွေ သတိပေးလာပါတယ်။

■ အက်ပလီကေးရှင်းများ တစ်ခုပြီးတစ်ခု သုံးစွဲခြင်း၊ Notification များ ဝင်လာခြင်းတို့ကြောင့် ဦးနှောက်မှာ အမြဲမပြတ် လှုံ့ဆော်ခံနေရကာ နည်းပညာကြောင့် ပင်ပန်းနွမ်းနယ်မှု ဖြစ်စေပြီး အာရုံစိုက်နိုင်စွမ်းကြာချိန် တိုတောင်းသွားစေပါတယ်။

■ စမတ်ဖုန်းသုံးစွဲခြင်းကနေ ထွက်လာတဲ့ အလင်းပြာက မယ်လတိုနင် ဟော်မုန်းထုတ်လုပ်မှုကို ပိတ်ပင်တာကြောင့် အိပ်စက်ရာမှာ အနှောင့်အယှက်ဖြစ်စေပြီး ခေါင်းကိုက်ခြင်း၊ စိုးရိမ်ပူပန်မှုများ ဖြစ်ပေါ်စေပါတယ်။

■ ခေါင်းငုံ့ပြီး ဖုန်းကြည့်တဲ့အချိန် ကြာလာတဲ့အခါ ခန္ဓာကိုယ်အပေါ် လည်ပင်းကြွက်သားနာကျင်မှုဒဏ် ဖြစ်စေကာ ကြွက်သားများ တောင့်တင်းလာပြီး ခေါင်းတစ်ခြမ်းကိုက်ခြင်း ပိုမိုဆိုးရွားစေပါတယ်။

■ ဆယ်ကျော်သက်များနဲ့ လူငယ်လူရွယ်များဟာ ဦးနှောက်ဖွံ့ဖြိုးဆဲကာလဖြစ်ပြီး လုံလောက်တဲ့ အနားယူမှုနဲ့ လှုံ့ဆော်မှုများ လိုအပ်တာကြောင့် ဒီဆိုးကျိုးတွေ ပိုမိုခံစားရလွယ်ပါတယ်။

■ ဖုန်းကြည့်ခြင်းမှ အနားယူခြင်း၊ ညအိပ်ခါနီး ဖုန်းအသုံးမပြုခြင်း၊ ၂၀-၂၀-၂၀ စည်းမျဉ်း လိုက်နာကျင့်သုံးခြင်း စတဲ့ ပိုမိုကောင်းမွန်တဲ့ အလေ့အထများ လေ့ကျင့်ဖို့အတွက် ဆရာဝန်များ အကြံပြုထားပါတယ်။

■ စမတ်ဖုန်းတွေက သူတို့ဘာသာဆိုရင် အန္တရာယ်မရှိပေမယ့် ရေရှည်ဦးနှောက်ကျန်းမာရေးအတွက် နေ့စဉ် ဖန်သားပြင် ကြည့်ရှုသုံးစွဲတဲ့ အလေ့အထများကို စနစ်တကျ ထိန်းချုပ်ရန် လိုအပ်ကြောင်း အလေးပေးပြောထားပါတယ်။

Source: India Today