#Local_News
Published 06 August 2026

■ ဂျပန်နိုင်ငံတွင် ဆရာဝန်လိုင်စင်မရှိဘဲ အလှအပခွဲစိတ်မှုများ ပြုလုပ်ခဲ့သည်ဟု သံသယဖြင့် စစ်ဆေးခံခဲ့ရသည့် ဒေါက်တာ ကြည်ချမ်းကို (Dr. Kyi Chan Ko) အား ဂျပန်ရဲတပ်ဖွဲ့နှင့် သက်ဆိုင်ရာ အာဏာပိုင်များက ဖမ်းဆီးချုပ်နှောင်ခြင်း မရှိခဲ့သလို အမှုဖြင့်အပြစ်ရှိကြောင်း သတ်မှတ်ထားခြင်းလည်း မရှိကြောင်းသိရသည်။

■ ဂျပန်သတင်းမီဒီယာများ၏ ဖော်ပြချက်များအရ ၂၀၂၆ ခုနှစ် မတ်လ ၅ ရက်တွင် ဒေါက်တာ ကြည်ချမ်းကိုနှင့် မြန်မာနိုင်ငံသားတစ်ဦးကို ဆရာဝန်လိုင်စင်မရှိဘဲ အလှအပခွဲစိတ်မှုများ ပြုလုပ်ခဲ့သည်ဟု သံသယဖြင့် ဂျပန်ရဲတပ်ဖွဲ့က စုံစမ်းစစ်ဆေးရန် ရဲစခန်းသို့ ခေါ်ယူမေးမြန်းခဲ့ခြင်းဖြစ်‌ကြောင်း သိရသည်။

■ အဆိုပါအမှုမှာ ၂၀၂၅ ခုနှစ် ဇွန်လအတွင်း မျက်ရစ်ဖော်ခွဲစိတ်မှုပြုလုပ်ခဲ့သည့် အသက် ၃၀ အရွယ် မြန်မာအမျိုးသမီးတစ်ဦးက ခွဲစိတ်ပြီးနောက် မျက်လုံးဖွင့်ရခက်ခဲသည်ဟု တိုင်ကြားခဲ့ခြင်းမှ စတင်ပေါ်ပေါက်လာခဲ့ကြောင်း သိရသည်။

■ ဂျပန်နိုင်ငံ၏ ဥပဒေအရ ဆရာဝန်လိုင်စင်မရှိဘဲ ဆေးကုသမှု ပြုလုပ်ပါက ထောင်ဒဏ် ၃ နှစ်အထိနှင့် ယန်း ၁ သန်းအထိ ငွေဒဏ် ချမှတ်နိုင်ပြီး နိုင်ငံခြားသားဖြစ်ပါက ပြည်နှင်ဒဏ်လည်း ချမှတ်ခံရနိုင်ကြောင်း သိရသည်။

■ ထို့ပြင် အလှအပခွဲစိတ်မှုများကြောင့် ထိခိုက်နစ်နာမှု အထောက်အထားများ ခိုင်လုံစွာရှိပါက လူနာများအား လျော်ကြေးပေးဆောင်ရနိုင်ကြောင်းလည်း ဂျပန်ဥပဒေဘွဲ့ရရှိထားသူတစ်ဦးက ပြောကြားထားသည်။

■ ဒေါက်တာ ကြည်ချမ်းကိုက လူနာအား မိမိကိုယ်တိုင် ခွဲစိတ်ပေးခဲ့သည်ကို ဝန်ခံခဲ့သော်လည်း လူနာများတွင် မျက်စိဖွင့်ပိတ်ရခက်ခဲခြင်း သို့မဟုတ် ထင်ရှားသည့် အမာရွတ်များ ကျန်ရှိခဲ့သည်ဆိုသည့် အချက်များမှာ မမှန်ကန်ကြောင်းပြောကြားခဲ့သည်။

■ ထို့အပြင် တိုင်ကြားသူများဘက်မှ မျက်စိဖွင့်ပိတ်ရခက်ခဲခြင်း သို့မဟုတ် အမာရွတ်များ ကျန်ရှိခဲ့ကြောင်းကို သက်သေပြနိုင်သည့် ဆေးမှတ်တမ်း (Medical Certificate) မတင်ပြနိုင်ခဲ့ကြောင်း၊ ယင်းကြောင့် လျော်ကြေးပေးဆောင်ခဲ့ရခြင်းလည်း မရှိကြောင်းသိရသည်။

■ သက်ဆိုင်ရာဆေးပညာရှင်များ၏ စစ်ဆေးချက်များအရလည်း လူနာများတွင် မျက်စိဖွင့်ပိတ်ရခက်ခဲခြင်းနှင့်ထင်ရှားသည့်အမာရွတ်များမတွေ့ရှိခဲ့ကြောင်း သိရသည်။

■ ဒေါက်တာ ကြည်ချမ်းကိုသည် မန္တလေးဆေးတက္ကသိုလ်မှ ဘွဲ့ရရှိထားသူဖြစ်ပြီး ဂျပန်နိုင်ငံ တိုကျိုမြို့ရှိ Juntendo University ၏ Plastic and Reconstructive Surgery ဌာနမှ ပါရဂူဘွဲ့ရရှိထားသူဖြစ်ကြောင်း ၎င်း၏လုပ်ဖော်ကိုင်ဖက် ဆရာဝန်တစ်ဦးက ပြောကြားထားသည်။

■ ထို့ပြင် ဒေါက်တာကြည်ချမ်းကိုသည် ၂၀၂၆ ခုနှစ် ဇူလိုင် ၂၉ ရက်တွင် ဂျပန်နိုင်ငံမှ မြန်မာနိုင်ငံသို့ ပြန်လည်ရောက်ရှိလာခဲ့ကြောင်းလည်း သိရသည်။

#YMG/SW #Yangon_Times