#Local_News
Published 21 June 2025

▪️ ဒေသတွင်း ငါးစားသုံးမှုဖူလုံရေးအတွက် (၁)ဧကလျှင် ငါးသားပေါက်ကောင်ရေ (၁၀၀၀)နှုန်း ထောက်ပံ့ပေးသွားမည်ဖြစ်ကြောင်း ရာဂီမုန်တိုင်းကြောင့် ရှမ်းပြည်နယ် အတွင်း ပျက်စီးဆုံးရှုံးသွားသည့် ငါးမွေးကန်များအတွက် အမျိုးသားသဘာဝဘေး အန္တရာယ်ဆိုင်ရာ စီမံခန့်ခွဲမှုကော်မတီမှ ညောင်ရွှေမြို့နယ်နှင့် တောင်ကြီးမြို့နယ်ရှိ ငါးမွေးတောင်သူများထံသို့ ငါးသားပေါက်များ ထောက်ပံ့ပေးအပ်ပွဲအခမ်းအနားမှ သိရသည်။

▪️ အခမ်းအနားတွင် ရှမ်းပြည်နယ်ဝန်ကြီးချုပ် ဦးအောင်အောင်က ငါးမွေးတောင်သူများကို ငါးသားပေါက်များ ထောက်ပံ့ပေးအပ်ခြင်းဖြင့် တောင်သူများအနေဖြင့် ငါးမွေးမြူခြင်းလုပ်ငန်းများကို အရှိန်မပျက် ဆက်လက်ဆောင်ရွက်နိုင်ပြီး ဒေသတွင်းငါးစားသုံးမှုနှင့် ငါးထုတ်လုပ်မှုများကို ဆက်လက်ထိန်းသိမ်းပေးကြရန်၊ ရှမ်းပြည်နယ်ရာသီဥတုသည် အေးမြခြောက်သွေ့သောရာသီဥတုဖြစ်ပြီး ငါးမွေးကန်နည်းပါးသည့်အတွက် ဒေသအတွင်း ငါးဖူလုံမှုမှာ (၁၄) ရာခိုင်နှုန်းခန့်သာရှိပါကြောင်း၊ ငါးစားသုံးမှုဖူလုံရေးအတွက် ငါးမွေးမြူရေးလုပ်ငန်းကိုအားစိုက်၍ စနစ်တကျမွေးမြူ ဆောင်ရွက်သွားရန် ပြောကြားခဲ့သည်။

▪️ ရာဂီမုန်တိုင်းနောက်ဆက်တွဲ ရေကြီးမှုကြောင့် ရှမ်းပြည်နယ်တွင် ငါးမွေးကန် စုစုပေါင်း (၁၈၃၄.၆၈)ဧက ရှိသည့်အနက် ငါးမွေးကန် (၁၀၆၁.၀၇)ဧကသည် ရေကြီး နစ်မြုပ်ခဲ့ပြီးရေကြီးနစ်မြုပ်ခဲ့သော ငါးကန်များအတွက် အမျိုးသားသဘာဝဘေး အန္တရာယ် ဆိုင်ရာ စီမံခန့်ခွဲမှုကော်မတီမှ (၁)ဧကလျှင် ငါးသားပေါက်ကောင်ရေ (၁၀၀၀)နှုန်းဖြင့် ငါးသားပေါက်များအား ဒေသစျေးနှုန်းဖြင့် ဝယ်ယူထောက်ပံ့ ပေးသွားမည်ဖြစ်ကြောင်း၊ ငါးမွေးမြူရေးလုပ်ငန်း အမြန်ဆုံးပြန်လည် လည်ပတ်နိုင်ရေးအတွက် ရည်ရွယ်၍ ထောက်ပံ့ပေးအပ်ခြင်းဖြစ်ကြောင်း၊ ကလောခရိုင်၊ ညောင်ရွှေမြို့နယ်တွင် ငါးမွေးတောင်သူ (၆၅)ဦး၊ (၅၈၆.၀၈)ဧကအတွက် ငါးသားပေါက်ကောင်ရေ (၅၈၆၀၈၀)နှင့် တောင်ကြီးခရိုင်၊ တောင်ကြီးမြို့နယ်၊ ရွှေညောင်မြို့ရှိ ငါးမွေးတောင်သူ (၈)ဦး (၂၀.၃၆) ဧကအတွက် ငါးသားပေါက်ကောင်ရေ (၂၀၂၆၀)အား ပေးအပ်သွားမည်ဖြစ်ကြောင်း သိရသည်။

#YMG/SW #Yangon_Times

ပြီးခဲ့တဲ့ တစ်ပတ်က တက်ရိပ်ပြလာတဲ့ ရန်ကုန်အထိုင်စက်သုံးဆီရည်ညွှန်း ဈေးနှုန်းတွေ အခုတစ်ပတ်မှာလည်း တစ်လီတာကို ၉၀ကျပ်ကနေ ၁၁၅ကျပ်အတွင်း ဆက်လက်မြင့်တက်လာတယ်လို့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေး ကော်မတီကနေ  သိရပါတယ်။
#Local_News
Published 21 June 2025
#စက်သုံးဆီဈေးတက် #စက်သုံးဆီတင်သွင်း
#YMG/NN #Yangon_Times

မြန်မာနိုင်ငံဆိုင်ရာအိန္ဒိယသံရုံးမှ ကြီးမှူးကျင်းပတဲ့ အပြည်ပြည်ဆိုင်ရာ ယောဂနေ့ အထိမ်းအမှတ်အခမ်းအနားများကို ရန်ကုန်နဲ့နေပြည်တော်တို့မှာ ယနေ့ (ဇွန် ၂၁)က ပြုလုပ်ခဲ့ပါတယ်။
#Local_News
Published 21 June 2025
#အပြည်ပြည်ဆိုင်ရာယောဂနေ့ #မြန်မာနိုင်ငံဆိုင်ရာအိန္ဒိယသံရုံး
#YMG/SW #Yangon_Times

တောင်ငူမြို့ရှိ ခပေါင်းချောင်းရေမြင့်တက်မှုကြောင့် ဒေသခံ ၇၀၀ကျော်ရွေ့ပြောင်းနေရပြီး  ထမင်းထုပ်လှူဒါန်းတာနဲ့ ကူညီကယ်ဆယ်ရေးတွေ ပြုလုပ်ပေးနေတယ်လို့ တောင်ငူမြို့အခြေစိုက်ပရဟိတအသင်းတစ်ခုဖြစ်တဲ့  Save The Trees Rescue Team ကသိရပါတယ်။
#Local_News
Published 21 June 2025
#တောင်ငူမြို့ #‎ခပေါင်းချောင်းရေမြင့်တက်
#YMG/NN #Yangon_Times

လက်ရှိမှာ စက်သုံးဆီဈေးနှုန်း‌တွေမြင့်တက်နေပေမယ့် ပြည်တွင်းအတွက် စက်သုံးဆီဖူလုံမှုရှိပြီး အရန်ဆီများလည်း နှစ်ပတ်စာခန့်ရှိနေတယ်လို့ သိရပါတယ်။
#Local_News
Published 21 June 2025
#ပြည်တွင်းစက်သုံးဆီဖူလုံမှုရှိ #စက်သုံးဆီဈေးနှုန်း‌တွေမြင့်တက်
#YMG/SW #Yangon_Times

#Local_News
Published 21 June 2025

▪️ ရန်ကုန်ပြည်သူ့ဆေးရုံကြီး၌ ပြတ်တောက်သွားသော လက်ဖဝါးအား ပြန်ဆက်ပေး သည့်ခွဲစိတ်ကုသမှု အောင်မြင်စွာ ဆောင်ရွက်နိုင်ခဲ့ကြောင်း ယနေ့ထုတ် နိုင်ငံပိုင်သတင်းစာများ၌ ဖော်ပြထားသည်။

▪️ မေ ၂၄ ရက် နံနက် ၁၁ နာရီခန့်တွင် ဓားဖြင့်ခုတ်ခံရခြင်းကြောင့် ဘယ်ဘက်လက် ဖဝါး ပြတ်တောက်သွားသည့် ဘားအံမြို့နေ အသက်(၂၇)နှစ်အရွယ် အမျိုးသားတစ်ဦးကို ပြည်သူ့ဆေးရုံကြီး-ဘားအံမြို့၌ အရေးပေါ် ကုသမှုပေးကာ ရန်ကုန်ပြည်သူ့ဆေးရုံကြီးသို့ စနစ်တကျလွှဲပြောင်းပေးခဲ့ကြောင်း၊ အဆိုပါလူနာအား ရန်ကုန်ပြည်သူ့ဆေးရုံကြီး အရေးပေါ်လူနာဌာန၌ လိုအပ်သော စမ်းသပ်စစ်ဆေးမှုများပြုလုပ်၍ ပြတ်တောက်သွားသော လက်ဖဝါးအား ပြန်ဆက်သည့်ခွဲစိတ်ကုသမှု(Replantation Surgery)ကို ည ၁၀ နာရီခွဲမှစတင်၍ ဆောင်ရွက်ခဲ့ရာ မေ ၂၅ ရက် နံနက် ၅ နာရီခွဲတွင် အောင်မြင်စွာဆောင်ရွက် ပြီးစီးခဲ့ကြောင်း သိရသည်။

▪️ ထိုလူနာသည် ကျန်းမာရေးကောင်းမွန်ပြီး ခွဲစိတ်ကုသထားသည့် လက်၏သွေး လည်ပတ်မှုကောင်းမွန်သဖြင့် ဇွန် ၁၁ ရက်တွင် ဆေးရုံဆင်းခွင့်ရရှိပြီး ဇွန် ၁၆ ရက် ရက်ချိန်းပြန်လည်ပြသရာ၌လည်း လက်အခြေအနေကောင်းမွန်လျက်ရှိကြောင်း ၊အဆိုပါ ခွဲစိတ်ကုသမှုကို လက်ပိုင်းဆိုင်ရာခွဲစိတ်ကုသမှုပါရဂူဘွဲ့ (ဒုတိယနှစ်) သင်တန်းသား အထူးကုဆရာဝန်များဖြစ်သော ဒေါက်တာရဲနိုင်ဦးနှင့် ဒေါက်တာ အောင်လှိုင်ဖုန်း၊ လက်ပိုင်းဆိုင်ရာ ခွဲစိတ်ကုသမှု ပါရဂူဘွဲ့(တတိယနှစ်) သင်တန်းသူ ဒေါက်တာခိုင်မေဦး၊ လက်ထောက် ဆရာဝန်(အရိုး) ဒေါက်တာရာဇာအောင် စောဝင်း၊ ဆေးပညာမဟာ သိပ္ပံ(ဒုတိယနှစ်) ဘွဲ့လွန်သင်တန်းသား ဒေါက်တာ စိုင်းသီဟတို့ပါဝင်သော လက်ပိုင်းဆို င်ရာ ခွဲစိတ်မှုဆရာဝန်များအဖွဲ့၊ လက်ထောက်ဆရာဝန် (မေ့ဆေး) ဒေါက်တာ ဒေလီယာစိုးဝင်းနှင့် မေ့ဆေးဆရာဝန်များ အဖွဲ့၊ သူနာပြုဆရာမကြီး ဒေါ်မို့မို့အောင် ဦးဆောင်သည့် သူနာပြုများအဖွဲ့နှင့် ဆက်စပ်ဌာနများဖြစ်သည့် ဓာတ်ခွဲ၊ ဓာတ်မှန် ကျွမ်းကျင်ဝန်ထမ်းများ ပူးပေါင်း၍ ဆောင်ရွက်ခဲ့ခြင်းဖြစ်ကြောင်း သိရသည်။

▪️ ထိုသို့ လက်ပြတ်တောက်သွားသည့် လူနာကဲ့သို့ ပြတ်တောက်သွား သောလက်ကို ခွဲစိတ်ကုသမှုဆောင်ရွက်ရန်အတွက် ပြည်သူ့ဆေးရုံကြီးများသို့ လွှဲပြောင်းပေးပို့မည် ဆိုပါက ပြတ်တောက်သွားသောလက်ကို ရေသန့်သန့် သို့မဟုတ် အကြောဆေးရည် (Normal Saline or Ringer Lactate) ဖြင့်ဆေးပြီး အကြောဆေးရည်ဖြင့် စိုစွတ်အောင်စိမ်ထားသော ခွဲစိတ်ခန်းသုံး အဝတ်စ (Gauze)ဖြင့်ပတ်၍ သန့်ရှင်းသော ပလတ်စတစ်အိတ် သို့မဟုတ် ဘူးထဲသို့ထည့်၍လည်းကောင်း၊ အကြောဆေးရည် ထည့်ထားသော သန့်ရှင်းသည့် ပလတ်စတစ်အိတ် သို့မဟုတ် ဘူးထဲသို့ထည့်၍လည်းကောင်း လုံခြုံစွာပိတ်ပြီး ရေခဲထည့်ထားသော ရေခဲပုံးအတွင်းထည့်၍ အမြန်ဆုံးလွှဲပြောင်းပေးပို့နိုင်ကြောင်း သိရသည်။

▪️ ရန်ကုန်ပြည်သူ့ဆေးရုံကြီး၌ ၂၀၂၂ ခုနှစ်တွင် လက်ဖျံပြန်ဆက်သည့် ခွဲစိတ်ကုသမှု ဆောင်ရွက်ပေးနိုင်ခဲ့သူ တစ်ဦး၊ ၂၀၂၃ ခုနှစ်တွင် လက်မောင်းပြန်ဆက်သည့် ခွဲစိတ်ကုသမှုဆောင်ရွက်ပေးနိုင်ခဲ့သူ တစ်ဦး၊ ၂၀၂၄ ခုနှစ်တွင် လက်မပြန်ဆက်သည့် ခွဲစိတ်ကုသမှုဆောင်ရွက်ပေးနိုင်ခဲ့သူတစ်ဦး၊ ၂၀၂၅ ခုနှစ် ယခုအချိန်အထိ လက်ဖဝါးပြန်ဆက်သည့် ခွဲစိတ်ကုသမှုဆောင်ရွက်ပေးနိုင်ခဲ့သူတစ်ဦးတို့ကို အောင်မြင်စွာ ဆောင်ရွက်ပေးနိုင်ခဲ့ကြောင်း သိရသည်။

#YMG/SW #Yangon_Times

#Local_News
Published 21 June  2025

▪️ မြို့ကြီး အချို့တွင် ဧရာ၀တီ၊ ချင်းတွင်း၊ စစ်တောင်း အပါအဝင်မြစ်ရေများဆက်လက်တိုးနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ယနေ့နေ့လယ်အချိန်ထုတ်ပြန်ချက်အရ သိရသည်။

▪️ ဧရာ၀တီမြစ်ရေသည် မြစ်ကြီးနားမြို့၊ ဗန်းမော်မြို့၊ ရွှေကူမြို့၊ ကသာမြို့၊ သပိတ်ကျင်းမြို့၊  မန္တလေးမြို့၊ စစ်ကိုင်းမြို့နှင့် မြင်းမူမြို့တို့တွင် ၇ ပေမှ ၁၀ ပေခန့်နှင့် ပခုက္ကူမြို့၊ ညောင်ဦးမြို့၊ ချောက်မြို့၊ မင်းဘူးမြို့၊ မကွေးမြို့၊ အောင်လံမြို့နှင့် ပြည်မြို့တို့တွင် ၄ ပေမှ ၇ ပေခန့် လက်ရှိရေမှတ်များအထက် မြင့်တက်လာနိုင်ကြောင်း သိရသည်။

▪️ သို့သော်  ဆိပ်သာမြို့၊ ဟင်္သာတမြို့နှင့် ဇလွန်မြို့တို့တွင် ၄ ပေမှ ၆ ပေခန့် လက်ရှိရေမှတ်များအောက် ကျဆင်းလာနိုင်ကြောင်း သိရသည်။

▪️ ထို့အပြင် ချင်းတွင်းမြစ်ရေသည် ခန္တီးမြို့၊ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေး၀မြို့၊ မင်းကင်းမြို့၊ ကနီမြို့နှင့် မုံရွာမြို့တို့တွင် ၈ ပေမှ ၁၂ ပေခန့်လက်ရှိရေမှတ်များအထက် မြင့်တက်လာနိုင်မည် ဖြစ်သည်။

▪️ စစ်တောင်းမြစ်ရေသည် တောင်ငူမြို့နှင့် မဒေါက်မြို့တို့တွင် ၂ ပေမှ ၃ ပေခန့်၊ ရွှေကျင်မြစ်ရေသည် ရွှေကျင်မြို့တွင် ၁ ပေခွဲခန့်၊ ပဲခူးမြစ်ရေသည် ဇောင်းတူမြို့နှင့် ပဲခူးမြို့တို့တွင် ၂ ပေမှ ၄ ပေခန့်၊ သံလွင်မြစ်ရေသည် ဘားအံမြို့တွင် ၃ ပေခန့်၊ သောင်ရင်း မြစ်ရေသည် မြဝတီမြို့တွင် ၂ ပေခန့်၊ ငဝန်မြစ်ရေသည် ပုသိမ်မြို့တွင် ၁ ပေခန့်၊ တိုးမြစ်ရေသည် မအူပင်မြို့တွင် ၁ ပေခွဲခန့်နှင့် ဘီးလင်းမြစ်ရေသည် ဘီးလင်းမြို့တွင် ၃ ပေခန့် လက်ရှိရေမှတ်များ အထက် မြင့်တက်လာနိုင်ကြောင်း သိရသည်။

▪️ မြစ်သာမြစ်ရေသည် ကလေးမြို့တွင် ၄ ပေခန့်၊ ဒုဋ္ဌဝတီမြစ်ရေသည် သီပေါမြို့တွင် ၂ ပေခန့်၊  ရွှေစာရံနှင့် မြစ်ငယ်မြို့တို့တွင် ၄ ပေမှ ၆ ပေခန့် မြင့်တက်လာနိုင်ကြောင်း သိရသည်။

▪️ ငဝန်မြစ်ရေသည် ငါးသိုင်းချောင်းမြို့နှင့် သာပေါင်းမြို့တို့တွင် ၂ ပေမှ ၄ ပေခန့် လက်ရှိရေမှတ်များအောက် ကျဆင်းလာနိုင်ကြောင်း သိရသည်။

#YMG/NN #Yangon_Times

#Local_News
Published 21 June 2025

▪️ ဇွန် ၂၁ ရက်နေ့၊ မနက် ၁၂နာရီ ၅၀ မိနစ်အချိန်ခန့်က၊ ရှမ်းပြည်နယ်၊ လွိုင်လင်မြို့နယ်၊ ပင်လုံမြို့၊ ရွှေပြည်သာအမှတ်(၂)ရပ်ကွက်၊ သာယာအေးလမ်းတွင် မီးလောင်မှုဖြစ်ပွားခဲ့ကြောင်း သိရသည်။

▪️ အဆိုပါသတင်းရရှိသဖြင့် လွိုင်လင်ခရိုင်မီးသတ်စခန်းမှ မီးငြှိမ်းသတ်ယာဉ်(၁)စီး၊ လွိုင်လင်မြို့နယ်မီးသတ်စခန်းမှ မီးသတ်ရေသယ်ယာဉ်(၂)စီး၊ ပင်လုံနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ သက်ဆိုင်ရာအဖွဲ့အစည်းများဖြင့် ပူးပေါင်း၍ သွားရောက်ငြှိမ်းသတ်ခဲ့ရာ မနက်၁ နာရီ၁၃ မိနစ်အချိန် တွင်မီးငြိမ်းနိုင်ခဲ့ကြောင်း သိရသည်။

#YMG/NN #Yangon_Times

#World_News
Published 21 June 2025

▪️ Voide of America (VOA)ရဲ့ မိခင်ကုမ္ပဏီ ရဲ့ ဝန်ထမ်း ၆၃၉ ဦးကျော်ကို အလုပ်ထုတ်ပယ်ကြောင်း အသိပေးစာထုတ်ပြန်ခဲ့တယ်လို့ သောကြာနေ့က ပြောပါတယ်။

▪️ မတ်လနောက်ပိုင်း ဝန်ထမ်းလျှော့ချလာတာ ၈၅ ရာခိုင်နှုန်းရှိပြီဖြစ်တဲ့ သတင်းရုပ်သံလွှင့်ဌာန အဆုံးသတ်ဖို့ ဖြစ်လာပါတယ်။

▪️ အစိုးရဝန်ထမ်းတွေကို အနည်းဆုံးသာထားရှိချင်တဲ့ အမေရိကန်သမ္မတ ဒေါ်နယ်ထရမ့်ရဲ့လမ်းစဉ် အစိတ်အပိုင်းအဖြစ် အလုပ်နေရာပေါင်း ၁,၄၀၀ ကို လျှော့ချလိုက်တာဖြစ်တယ်လို့ ကမ္ဘာလုံးဆိုင်ရာမီဒီယာ အမေရိကန်အေဂျင်စီ(USAGM) အကြီးတန်းအကြံပေးပုဂ္ဂိုလ် ကယ်ရီလိတ်က ပြောသွားပါတယ်။

▪️ ဝန်ထမ်းဖောင်းပွနေပြီး တာဝန်ယူမှုမရှိတဲ့ သတင်းဌာနကို ဖြိုခွဲဖို့ကြိုးစားနေရာမှာ USAGM နဲ့ VOA တို့မှ ဝန်ထမ်း ၆၃၉ ဦးထံ အလုပ်ထုတ်ပယ်ကြောင်း အသိပေးစာများ ပေးပို့ခဲ့တယ်လို့ လိတ်က ဖော်ပြထားပါတယ်။

▪️ ဒီအေဂျင်စီဟာ ဘက်လိုက်ပြီး အသုံးမဝင်ဘူးလို့ ပြောထားပါတယ်။
အခုဆိုရင် USAGM ဟာ ဝန်ထမ်းအင်အား ၈၁ ယောက် အနည်းဆုံးအနေအထားဖြင့် လည်ပတ်နေပြီး USAGM ၊ VOA ၊ ကျူးဘားရုပ်သံလွှင့်ရုံးတို့မှာ ဝန်ထမ်း ၂၅၀ ခန့် ကျန်ရှိမှာဖြစ်တယ်လို့ ဆိုပါတယ်။

▪️ VOA ဟာ ၁၉၄၂ ခုနှစ်က နာဇီဝါဒဖြန့်ခြင်းကို တန်ပြန်ရန်အတွက် တည်ထောင်ခဲ့တာဖြစ်ပြီး ဘာသာစကား ၅၀ နီးပါးဖြင့် လုပ်ကိုင်နေကာ တစ်ပတ်ကို လူပေါင်းသန်း ၃၆၀ ဆီ ရောက်ရှိစေပါတယ်။

▪️ VOA နဲ့ အခြားမီဒီယာလက်ခွဲတွေဟာ ကွန်ဆာဗေးတစ်တွေအပေါ် ဘက်လိုက်ဖော်ပြမှုတွေ ရှိတယ်ဆိုပြီး ရီပတ်ဘလစ်ကန်အချို့ စွပ်စွဲထားပါတယ်။

▪️ USAGM ရဲ့ RFA မှာလည်း ဌာနအသီးသီးမှာ အလုပ်နားခွင့်များပေးထားတယ်လို့ သိရပါတယ်။

▪️ USAGM ဝန်ထမ်းလျှော့ချခြင်းနဲ့ ပတ်သက်ပြီး တရားရုံးအမှုတွဲများ ရှိနေပါတယ်။

#Source: Reuters

#World_Science
Published 21 June 2025

▪️ ၂၀၂၃ ခုနှစ်က ၉ ရက်ဆက်တိုက် ငလျင်လှုပ်ခတ်နေခဲ့တဲ့ ဖြစ်စဉ်ကို သိပ္ပံပညာရှင်များ ပထမဆုံး စောင့်ကြည့်လေ့လာခဲ့ကြပါတယ်။

▪️ အကြောင်းအရင်းက အရှေ့ဂရင်းလန်းဖော့ဂျ်တဝိုက်မှာ ရိုက်ခတ်ခဲ့တဲ့ ဆူနာမီကြီး ၂ ခုကြောင့် ဖြစ်တယ်လို့ အတည်ပြုခဲ့ကြပါတယ်။

▪️ ဧရာမလှိုင်းကြီးတွေက မီတာ ၂၀၀ လောက်မြင့်မားပြီး ၂၀၂၃ စက်တင်ဘာလမှာ ၉ ရက်ဆက်တိုက် လှုပ်ရှားနေခဲ့ပါတယ်။

▪️ အစကတော့ သိပ္ပံပညာရှင်တွေအတွက် အထူးအဆန်းဖြစ်နေခဲ့ပေမယ့် မြေပြင်နဲ့ ဂြိုဟ်တုပုံရိပ်များအရ ဖော့ဂျ်မှာ မြေပြိုတာတွေကြောင့် ဖြစ်နေပါတယ်။

▪️ ရာသီဥတုဖောက်ပြန်မှုက ဒီလိုမျိုး အစွန်းရောက်ဖြစ်စဉ်တွေ ဖြစ်လာရတယ်လို့ ဦးဆောင်သုတေသနပြုစုသူ သောမတ်စ်မိုနာဟန်က ပြောပါတယ်။

▪️ ဆူနာမီလှိုင်းတွေရဲ့ လှုပ်ရှားမှုကို တိုင်းတာရာမှာ ရေဒါတုန်နှုန်းတွေဖြင့် သမုဒ္ဒရာမျက်နှာပြင်မှ လှိုင်းအမြင့်ကို တိုင်းတာပါတယ်။

▪️ ယခုလေ့လာချက်တွေက မျိုးဆက်သစ်ဂြိုဟ်တု အချက်အလက်တွေက ယခင်က မသိခဲ့တဲ့ဖြစ်စဉ်တွေကို ဖြေရှင်းစေနိုင်မယ့်ဥပမာမျိုးဖြစ်တယ်လို့ အောက်စ်ဖို့ဒ်တက္ကသိုလ်မှ ပရော်ဖက်ဆာ သောမတ်စ်အက်ကော့ခ်က ပြောသွားပါတယ်။

▪️ ဆူနာမီ၊ မုန်တိုင်း၊ လှိုင်းလုံးကြီးတွေလိုမျိုး သမုဒ္ဒရာဖြစ်စဉ်များအကြောင်း နောက်ထပ်အရာများ သိရှိနိုင်စေမှာဖြစ်ပေမယ့် ဆန်းသစ်နည်းပညာတွေ အသုံးပြုဖို့တော့ လိုအပ်ကြောင်း ပြောသွားပါတယ်။

#Source: LiveScience

#Local_News
Published_ 21 June 2025

▪️ မန္တလေးတိုင်းဒေသကြီး၊ မတ္တရာမြို့နယ်အတွင်း PDF များက လက်နက်ကြီးများဖြင့် ကျေးရွာအတွင်း ပစ်ခတ်ခဲ့၍ ကလေးငယ် ၁ ဦးအပါအဝင် အရပ်သား ၆ ဦး ဒဏ်ရာရခဲ့ကြောင်း သိရသည်။

▪️ ဇွန်လ ၁၉ ရက် နံနက်ပိုင်းက မတ္တရာမြို့နယ်၊ ဝသုန္ဒရကျေးရွာအတွင်းသို့ PDF အမည်ခံအကြမ်းဖက်သမား များက အများပြည်သူ ထိခိုက်စေရန် ရည်ရွယ်၍ လက်နက်ကြီးဖြင့် အကြောင်းမဲ့ပစ်ခတ်တိုက်ခိုက်ခဲ့ရာ လက် နက်ကြီး ဗုံးသီးများမှာ ကျေးရွာအတွင်းသို့ ကျရောက်ပေါက်ကွဲခဲ့ပြီး ပေါက်ကွဲမှုကြောင့် ကျေးရွာနေသူများ ဖြစ်ကြသည့် ဦးခင်မင်းဇော် (၅၈)နှစ်၊ ဦးစောထွန်း(၅၅)နှစ်၊ ဦးစိုးဇော်ဦး (၃၈)နှစ်၊ ဦးမြင့်ကို (၅၉)နှစ်နှင့် မဇူးရတနာကို(၃)နှစ်တို့ ၅ ဦးတွင် ထိခိုက်ဒဏ်ရာများ အသီးသီးရရှိခဲ့ကြောင်း သိရသည်။

▪️ အလားတူ နံနက် ၈ နာရီတွင် မတ္တရာမြို့နယ်၊ လက္ကောင်းလေးကျေးရွာနေ ဦးသောင်းဌေး (၅၃)နှစ်သည် ကျေးရွာ၏အရှေ့ဘက်ရှိ ချောင်း၌ ငါးဖမ်းရန်သွားစဉ် ကျေးရွာနှင့် ၃ ဖာလုံခန့်အကွာ အရောက် PDF အမည်ခံအကြမ်းဖက်သမားများ ထောင်ထားသည့် နင်းမိုင်းတစ်လုံးအား နင်းမိပေါက်ကွဲခဲ့သဖြင့် ဦးသောင်းဌေးတွင် ယာခြေသလုံးအောက်မှ ပြတ်ထွက်ဒဏ်ရာတစ်ချက် ရရှိခဲ့ကြောင်း သိရသည်။

▪️ အထက်ပါဖြစ်စဉ်များမှ PDF အမည်ခံအကြမ်းဖက်သမားများ ပစ်ခတ်လိုက်သည့် လက်နက်ကြီး ဗုံးသီးကျ ရောက်ပေါက်ကွဲမှုနှင့် နင်းမိုင်းပေါက်ကွဲမှုတို့ကြောင့် ထိခိုက်ဒဏ်ရာရရှိသူများအား မန္တလေး ပြည်သူ့ဆေးရုံကြီး၌ ဆေးဝါးကုသမှုများဆောင်ရွက်ပေးလျက်ရှိပြီး လုံခြုံရေးတပ်ဖွဲ့ဝင်များက သွားရောက်စစ်ဆေးကာ လိုအပ်ချက်များအပေါ် ကူညီဆောင်ရွက်ပေးခဲ့ကြောင်း သိရသည်။

▪️ လက်ရှိတွင် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထု နှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သိရသည်။

#Yangon_Times/PP

#World_Health
Published 21 June 2025

▪️ နှလုံးအားနည်းရောဂါဖြစ်နိုင်ခြေ ခန့်မှန်းတဲ့နေရာမှာ ခါးနဲ့အရပ်အချိုးအစားက ခန္ဓာကိုယ်ထုထည်ညွှန်းကိန်း (BMI)ထက်ပိုပြီး တိကျနိုင်တယ်လို့ သုတေသနအသစ်မှာ ဖော်ပြခဲ့ပါတယ်။

▪️ ဆွီဒင်ရှိ လန်းတက္ကသိုလ်နဲ့ မယ်လ်မိုတက္ကသိုလ်ဆေးရုံတို့မှ သုတေသီတွေက ၁၂ နှစ်ခွဲကာလအတွင်း လူပေါင်း ၁,၇၉၂ ဦးကို စောင့်ကြည့်လေ့လာခဲ့ကြပါတယ်။

▪️ ခါးနဲ့အရပ်အချိုးအစားမြင့်မားသူတွေက နှလုံးအားနည်းရောဂါဖြစ်နိုင်ခြေ ပိုများတာ တွေ့ခဲ့ကြပါတယ်။

▪️ BMI ဆိုတာက အဝလွန်ခြင်းပမာဏကို တိုင်းတာတာဖြစ်ပေမယ့် ခန္ဓာကိုယ်မှာ အဆီဘယ်လောက်ပျံ့နှံ့နေလဲဆိုတာ မသိနိုင်ပါဘူး။

▪️ ဒါ့အပြင် ကျား/မ၊ လူမျိုးတို့နဲ့လည်း သက်ဆိုင်နေပါတယ်။

▪️ ခါးနဲ့တင်ပါးအချိုးအစားကတော့ အတွင်းအင်္ဂါနားတဝိုက်မှ အန္တရာယ်ရှိနိုင်တဲ့အဆီများကို တိုင်းတာတာဖြစ်တယ်လို့ ဒေါက်တာ အမ်ရာဂျူဂျစ်က ပြောပါတယ်။

▪️ စောင့်ကြည့်ခဲ့တဲ့ကာလအတွင်း နှလုံးအားနည်းရောဂါဖြစ်ပွားသူ ၁၃၂ ဦးရှိခဲ့ပါတယ်။

▪️ ပုံမှန်စံနှုန်းကနေ ခါးနဲ့တင်ပါးအချိုးအစား မြင့်တက်လာတာနဲ့အမျှ နှလုံးအားနည်းနိုင်ခြေ ၃၄ ရာခိုင်နှုန်း ပိုများလာတာ တွေ့ရပါတယ်။

▪️ ဒီအချိုးအစားအများဆုံးသူတွေဟာဆိုရင် သာမန်လူတွေထက် နှလုံးအားနည်းဖြစ်နိုင်ခြေ ၃ ဆနီးပါးပိုများတာ တွေ့ရပါတယ်။

▪️ ခါးနဲ့အရပ်အချိုးအစား အတိုင်းအတာဖြင့် ဆီးချို၊ သွေးတိုးလိုမျိုး ကျန်းမာရေးပြဿနာတွေကိုလည်း ခန့်မှန်းနိုင်ဖို့ နောက်ထပ်လုပ်ဆောင်သွားမယ်လို့ ဒေါက်တာ ဂျွန်မိုဗင်က ပြောပါတယ်။

▪️ ဒီလိုဆိုရင် ဆရာဝန်တွေအနေနဲ့ နှလုံးအားနည်းဖြစ်နိုင်ခြေရှိသူတွေကို ရှာဖွေကုသစေနိုင်မှာ ဖြစ်ပါတယ်။

#Source: India Today