#Local_News
Published _5 October 2022

မွန်ပြည်နယ်၊ သထုံမြို့၊ အ.ထ.က(၂)ကျောင်းဝင်းအတွင်း ကျောင်းဆောင်အသစ် ဆောက်လုပ်ရန် မြေကျင်းတူးရာမှ အုတ်ခွက်ဘုရားများကို အောက်တိုဘာလ ၁ ရက်တွင် တွေ့ရှိရကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ မော်လမြိုင်ဌာနခွဲက သိရသည်။

သထုံမြို့၊ အ.ထ.က(၂)ကျောင်းဝင်းအတွင်းရှိ (၁၉၈၃)ခုနှစ်တွင် တည်ဆောက်ခဲ့သော ကျောင်းဆောင်ကိုဖျက်ပြီး RC နှစ်ထပ်ကျောင်းဆောင် အဖြစ် ပြန်လည်တည်ဆောက်ရန် Foundation ကျင်းများတူး ရာမှ အနက် (၇) ခန့်၌ အုတ်ခွက်ဘုရား (၂၈၀)ဆူ ကို တွေ့ရှိခဲ့ခြင်းဖြစ်ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန က ထုတ်ပြန်ထားသည်။

လွန်ခဲ့သည့် ၁၉၇၀ ပြည့်နှစ်ခန့် ကာလကလည်း အဆိုပါ အ.ထ.က(၂)ကျောင်း၏ တစ်ဘက်ရှိ ခရစ်ယာန်ဘုရားကျောင်းဝင်းအတွင်း၌ အုတ်ခွက် (၂၀၀၀) ကျော်ခန့် တွေ့ရှိခဲ့ဖူးကြောင်း ယင်းထုတ်ပြန်ချက်တွင် ပါရှိသည်။

အုတ်ခွက်ဘုရားများကို ရှေးဟောင်းသုတေသနနှင့်အမျိုးသားပြတိုက်ဦးစီးဌာနက စစ်ဆေးရာ ရှေးဟောင်းအုတ်ခွက်ဘုရားများ ဖြစ်ပြီး အချို့ရှေးဟောင်းအုတ်ခွက်ဘုရားများမှာ ပုဂံဒေသတွင် တွေ့ရှိရသော အုတ်ခွက်ဘုရားများတွင် သရုပ်ဖော်ထားသော ဇာတ်ကွက်များနှင့်မတူသည့် အုတ်ခွက်ပုံစံအသစ်များ ပါဝင်နေကြောင်း၊ ၎င်းတို့မှာ ပုဂံထက် အနည်းငယ်စောသော သထုံမြို့ဟောင်း၊ မွန်တို့၏ကိုးကွယ်ယုံကြည်မှုကို ဖော်ပြနေသဖြင့် သမိုင်းကြောင်းအတွက် အထောက်အကူပြုနိုင်သော ရှေးဟောင်းအုတ်ခွက်ဘုရားများဖြစ်သည်ကိုတွေ့ရကြောင်း၊ ထို့ကြောင့် ရှေးဟောင်းသုတေသနနှင့် အမျိုးသားပြတိုက် ဦးစီးဌာနသို့ လွှဲပြောင်းပေးပါက မွန်ယဉ်ကျေးမှု အမွေအနှစ်များအဖြစ် အများပြည်သူ ကြည့်ရှုလေ့လာသုတေသနပြုနိုင်ရန် မော်လမြိုင်မြို့ရှိ ယဉ်ကျေးမှုပြတိုက်၌ ခင်းကျင်းပြသထားရှိမည်ဖြစ်ပါကြောင်း သိရသည်။

#ymg/mt
#Yangon_Media_Group

#Local_News
Published_5 October 2022

ပြည်ပသို့ ရေထွက်ကုန်ပစ္စည်းတင်ပို့မှုတွင် ယခင်နှစ်ထက် ကန်ဒေါ်လာ တစ်သန်းကျော် လျော့နည်းခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စာရင်းများအရ သိရသည်။

၂၀၂၂-၂၀၂၃ ခုနှစ်ဘဏ္ဍာနှစ်၏ ငါးလကျော်အတွင်း ပြည်ပသို့ ရေထွက်ကုန်ပစ္စည်းတင်ပို့ရာတွင် ကန်ဒေါ်လာ ၃၂၆ ဒသမ ၀၈ သန်းတင်ပို့ခဲ့ပြီး ယခင်နှစ်ကာလတူ၌ ကန်ဒေါ်လာ ၃၂၇ ဒသမ ၂၂ သန်း တင်ပို့နိုင်ခဲ့ခြင်းကြောင်း သိရသည်။

မြန်မာနိုင်ငံက ရေထွက်ကုန်ပစ္စည်းများကို ပုံမှန်ကုန်သွယ်ရေး Normal Trade နှင့် နယ်စပ်ကုန်သွယ်ရေး Border Trade လမ်းကြောင်းများက တစ်ဆင့် ပြည်ပနိုင်ငံများသို့ တင်ပို့လျက်ရှိပြီး၊ မြန်မာ့ရေထွက်ကုန်များကို ပုံမှန်ကုန်သွယ်ရေးအဖြစ် ဂျပန်နှင့်ဥရောပနိုင်ငံများ အပါအဝင် တရုတ်၊ ထိုင်းနှင့် အိမ်နီးချင်းနိုင်ငံများသို့ မူဆယ်၊ မြဝတီ၊ ကော့သောင်း၊ စစ်တွေ၊ မြိတ်၊ မောင်တောနယ်စပ်ကုန်သွယ်ရေးစခန်းများက တစ်ဆင့်လည်း ငါး၊ ပုစွန်၊ ဂဏန်းစသည့် ရေထွက်ကုန်များ ပုံမှန်တင်ပို့လျက်ရှိကြောင်း သိရသည်။

မြန်မာ့ရေထွက်ကုန်များကို ပြည်ပသို့တင်ပို့ရာတွင် မွေးမြူရေးလုပ်ငန်းများနှင့် ကမ်းနီး၊ ကမ်းဝေး ငါးဖမ်းလုပ်ငန်းများမှရရှိသော ရေထွက် ကုန်များကို ကုန်ကြမ်းများအဖြစ် တိုက်ရိုက်တင်ပို့နေ၍ အအေးခန်း စက်ရုံများတွင် စနစ်တကျ ပြုပြင်ထုပ်ပိုးပြီးမှ တင်ပို့မှုများလည်းရှိကြောင်း သိရသည်။

#ymg/sth
#Yangon_Media_Group

Published 5 Oct 2022

အိန္ဒိယနိုင်ငံဟာ ပြည်တွင်းထုတ် တိုက်ခိုက်ရေးရဟတ်ယာဉ် ပထမတစ်သုတ်ကို တနင်္လာနေ့က ထုတ်ဖော်ပြသလိုက်ပါတယ်။ အဆိုပါ တိုက်ခိုက်ရေး ရဟတ်ယာဉ်ဟာ ဟိမဝန္တာလိုနေရာမျိုးမှာ  အသုံးပြုနိုင်မယ့် အမြင့်ပျံရဟတ်ယာဉ်အမျိုးအစားအဖြစ် အခြေခံ ဒီဇိုင်းထုတ်ထားတာဖြစ်ပါတယ်။

အပေါ့စား တိုက်ခိုက်ရေး ရဟတ်ယာဉ်တွေဟာ ရုရှားကနေမှီခိုနေရတာကို လျှော့ချတဲ့ အိန္ဒိယရဲ့ ကြိုးပမ်းအားထုတ်မှု ဖြစ်ပါတယ်။

ယခုတိုက်ခိုက်ရေးရဟတ်ယာဉ်တွေကို ဟင်ဒူစတန်အဲရိုနော့တစ်လိမိတက် (အိတ်ချ်အေအယ်လ်)က ထုတ်လုပ်တာဖြစ်ပြီး  အိန္ဒိယလေတပ်ရဲ့ တိုက်ပွဲစွမ်းရည်တွေကို ကြီးမားစွာမြှင့်တင်ပေးမှုတစ်ရပ်ပဲဖြစ်တယ် လို့ ကာကွယ်ရေးဝန်ကြီး ရာချ်နက် ဆင်းက  အိန္ဒိယအနောက်ပိုင်း ဂျိုပါး လေတပ်အခြေစိုက်စခန်းမှာ သတင်းထောက်တွေကိုပြောပါတယ်။

“ အလွန်အရေးပါတဲ့အခမ်းအနားဖြစ်တယ်။ အထူးဂုဏ်ယူစရာ  ပြီးတော့ ဆယ်စုနှစ်နှစ်စုမှာ လုံ့လဝီရိယရှိရှိ သုတေသနှင့်ဖွံ့ဖြိုးတိုးတက်ရေးလုပ်ခဲ့တဲ့ အကျိုးရလာဒ်တစ်ခုဖြစ်တယ်” လို့ ဆင်းကပြောပါတယ်။

ရဟတ်ယာဉ်ကို ပင်လယ်ရေမျက်နှာပြင်အထက် အမြင့်ပေ တစ်သောင်းခြောက်ထောင် အထိ စမ်းသပ်ပျံသန်းပေးပြီးပြီလို့ အရာရှိတွေကပြောပါတယ်။

အိန္ဒိယဟာ ပြည်တွင်းကာကွယ်ရေးဆိုင်ရာစက်မှုလုပ်ငန်းကို တည်ဆောက်နေတာဖြစ်ပါတယ်။ ပြီးခဲ့တဲ့လကလည်း ပြည်တွင်းထုတ် လေယာဉ်တစ်စီးကို ထုတ်ဖော်ပြသခဲ့ပါသေးတယ်။

Source AFP

#Hindustan_Aeronautics_Limited

#India_made_Light_Combat_Helicopters

#India_Defence_Industry

#World_Military
Published 5 October 2022

မြောက်ကိုရီးယားက ပဲ့ထိန်းဒုံးကျည်တစ်စင်းကို ဂျပန်နိုင်ငံအပေါ်ကနေ ဖြတ်သန်းပြီး စမ်းသပ်ပစ်လွှတ်ခဲ့ပြီးနောက် တောင်ကိုရီးယားနဲ့ အမေရိကန်စစ်တပ်တို့က တုံ့ပြန်တဲ့အနေနှင့် ဒုံးကျည်များဖြင့် စစ်ရေးလေ့ကျင့်မှုများ ပြုလုပ်ခဲ့ပါတယ်။

မြောက်ကိုရီးယားရဲ့ အဝေးဆုံးဒုံးကျည်ပစ်ခတ်စမ်းသပ်မှုနဲ့ ပတ်သက်ပြီး ကုလသမဂ္ဂလုံခြုံရေးကောင်စီက တွေ့ဆုံဆွေးနွေးဖို့ စီစဉ်နေပါတယ်။

အင်္ဂါနေ့တုန်းက နျူကလီးယားလက်နက်ပိုင် မြောက်ကိုရီးယားနိုင်ငံက တာလတ်ပစ်ပဲ့ထိန်းဒုံးကျည်(IRBM)ကို ယခင်ကထက် ပိုမိုဝေးကွာအောင် စမ်းသပ်ပစ်ခတ်ခဲ့ကာ ဂျပန်နိုင်ငံအပေါ်ကနေ ၅ နှစ်အတွင်း ပထမဆုံးအကြိမ်အဖြစ် ဖြတ်သန်းသွားခဲ့တဲ့အတွက် ပြည်သူများ အကာအကွယ်ယူနေထိုင်ဖို့ သတိပေးခဲ့ရတဲ့အထိ ဖြစ်ခဲ့ပါတယ်။

တောင်ကိုရီးယားနဲ့ အမေရိကန်တပ်များက ပင်လယ်ထဲသို့ ဒုံးကျည်များအတွဲလိုက် ပစ်ခတ်ခဲ့ကြောင်း တောင်ကိုရီးယားပူးတွဲစစ်ဦးစီးချုပ်က ဗုဒ္ဓဟူးနေ့မှာ ပြောကြားလိုက်ပြီး အစောပိုင်းကလည်း တိုက်လေယာဉ်များဖြင့် ပင်လယ်ဝါထဲသို့ ဗုံးကျဲလေ့ကျင့်ရေးများ ပြုလုပ်ခဲ့ပါတယ်။

တောင်ကိုရီးယားရဲ့ Hyunmoo-2 ဒုံးကျည်ဟာ ပစ်လွှတ်ပြီးမကြာခင်မှာပဲ ပျက်ကျသွားပေမယ့် ထိခိုက်သူမရှိခဲ့ဘူးလို့ စစ်တပ်က အတည်ပြုလိုက်ပါတယ်။

ထိုဒုံးကျည်မှာ ထိပ်ဖူးတပ်ထားပေမယ့် မပေါက်ကွဲခဲ့ဘဲ ပြည်သူတွေအထိတ်တလန့် ဖြစ်ရခြင်းအပေါ် တောင်းပန်ခဲ့ကြောင်း စစ်တပ်က ပြောကြားလိုက်ပါတယ်။

အမေရိကန်စစ်တပ်နဲ့ မဟာမိတ်များက စစ်အင်အားကို အရှိန်မြှင့်ပြသနေသော်လည်း အိမ်ဖြူတော်အမျိုးသားလုံခြုံရေးကောင်စီကတော့ အခုနောက်ဆုံးစမ်းသပ်မှုကို အန္တရာယ်များတဲ့ မဆင်မခြင်လုပ်ရပ်လို့ သတ်မှတ်လိုက်ပါတယ်။

အမေရိကန်သမ္မတ'ဂျိုးဘိုင်ဒန်'နဲ့ ဂျပန်ဝန်ကြီးချုပ်'ဖူမီယိုကီရှီဒါ'တို့က မြောက်ကိုရီးယားစမ်းသပ်မှုကို အပြင်းထန်ဆုံးရှုတ်ချလိုက်ကာ ဥရောပသမဂ္ဂကလည်း ဒါဟာ မဆင်မခြင်လုပ်ရပ်နဲ့ တမင်တကာရန်စခြင်းလို့ ဆိုလိုက်ပြီး ကုလထွေချုပ်'အန်တိုနီယိုဂူတာရက်စ်'ကလည်း မြောက်ကိုရီးယားဒုံးကျည်စမ်းသပ်ချက်ဟာ လုံခြုံရေးကောင်စီရဲ့ စည်းမျဉ်းများကို ချိုးဖောက်ရာကျကြောင်း ပြောကြားလိုက်ပါတယ်။

အမေရိကန်ရဲ့တောင်းဆိုမှုဖြင့် ကုလလုံခြုံရေးကောင်စီဟာ ဗုဒ္ဓဟူးနေ့မှာ‌ မြောက်ကိုရီးယားအကြောင်း ဆွေးနွေးသွားမှာဖြစ်ပေမယ့် တရုတ်နဲ့ရုရှားတို့က အဖွဲ့ဝင် ၁၅ နိုင်ငံတွေ့ဆုံမယ့် အစည်းအဝေးပွဲပြုလုပ်ဖို့ကို ဆန့်ကျင်လိုက်ပါတယ်။

ကောင်စီအနေနဲ့ ကိုရီးယားကျွန်းဆွယ်က အခြေအနေကို ဖြေလျှော့ရန်သာ အထောက်အကူဖြစ်စေဖို့အတွက် ကြိုးပမ်းသင့်ကြောင်း ထောက်ပြလိုက်ပါတယ်။

မြောက်ကိုရီးယားက စမ်းသပ်ပစ်လွှတ်ခဲ့တဲ့ ဒုံးကျည်ဟာ Hwasong-12 အမျိုးအစားကွဲတစ်ခုဖြစ်နိုင်ပြီး ၂၀၁၇ ခုနှစ်က ဂူအမ်ဒေသရှိ အမေရိကန်စစ်အခြေစိုက်စခန်းကို ပစ်ခတ်ရန် အစီအစဉ်ဖြစ်တယ်လို့ မြောက်ကိုရီးယားက ပြောကြားခဲ့ဖူးပါတယ်။

မြောက်ကိုရီးယား အစိုးရကရော နိုင်ငံပိုင်မီဒီယာတွေကပါ အဆိုပါစမ်းသပ်မှုအကြောင်းနဲ့ ဒုံးကျည်အမျိုးအစားအကြောင်းကို ထုတ်ဖော်ပြောကြားခြင်း မရှိသေးပါဘူး။

တောင်ကိုရီးယားသမ္မတ'ယွန်ဆော့ယောလ်'က မြောက်ကိုရီးယားစမ်းသပ်မှုကို မဆင်မခြင်လုပ်ရပ်လို့ ဆိုလိုက်ကာ သူ့တိုင်းပြည်၊ မဟာမိတ်များနဲ့ နိုင်ငံတကာအသိုင်းအဝိုင်းထံမှ ပြတ်သားတဲ့တုံ့ပြန့်မှု ဆောင်ရွက်ရလိမ့်မယ်လို့ ဆိုခဲ့ပါတယ်။

ဒီစမ်းသပ်ပစ်ခတ်ခြင်းက မဆင်မခြင်ရာကျပြီး တမင်တကာရန်စတဲ့အပြုအမူဖြစ်ကာ ကုလလုံခြုံရေးကောင်စီရဲ့ စည်းမျဉ်းများကို ချိုးဖောက်ရာကျကြောင်း ဥရောပသမဂ္ဂမှ ပြောရေးဆိုခွင့်ရှိသူတစ်ဦးက ပြောကြားခဲ့ပါတယ်။

Source: Reuters
#Yangon_Media_Group

#Local_News
Published_ 5 October 2022

လူ့အခွင့်အရေးကောင်စီ၏ (၅၁) ကြိမ်မြောက် ပုံမှန်အစည်းအဝေးသို့ တင်သွင်းခဲ့ သော မြန်မာနိုင်ငံနှင့်စပ်လျဉ်းသည့် ချို့ယွင်းချက်များဖြင့် အစီရင်ခံစာများ၊ တင်ပြချက်များနှင့် နိုင်ငံအချို့၏ စွက်ဖက်ပြောကြားချက်များကိုရှုတ်ချပြီး ပြတ်သားစွာ ကန့်ကွက် ပယ်ချကြောင်း နစက နိုင်ငံခြားရေးဝန်ကြီးဌာနက အောက်တိုဘာလ ၄ ရက်မှာ ထုတ်ပြန် ထားပါတယ်။

ကုလသမဂ္ဂ လူ့အခွင့်အရေးကောင်စီ၏ (၅၁) ကြိမ်မြောက် ပုံမှန်အစည်းအဝေးကို စက်တင်ဘာ ၁၂ ရက် မှစ၍ ကျင်းပလျက်ရှိရာ မြန်မာနိုင်ငံကို ဆက်လက်ရွေးချယ် ပစ်မှတ်ထားရန် ဥရောပသမဂ္ဂနှင့် အစ္စလာမ်မစ်ပူးပေါင်းဆောင်ရွက်ရေး အဖွဲ့ဝင်နိုင်ငံများ က အပြန်အလှန် ဆွေးနွေးပွဲ အများအပြားကို ဖန်တီးခဲ့တယ်လို့ ဆိုပါတယ်။

စက်တင်ဘာ ၁၂ ရက်တွင် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးယန္တရား(IIMM) နှင့် လည်းကောင်း၊ စက်တင်ဘာ ၂၁ နှင့် ၂၂ ရက်တို့တွင် မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာ တင်သွင်းသူနှင့်လည်းကောင်း၊ စက်တင်ဘာ ၂၂ ရက်မှာပင် ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံးနှင့်လည်းကောင်း၊ စက်တင်ဘာ ၂၆ ရက်တွင် ခေတ္တလူ့အခွင့်အရေးဆိုင်ရာ မဟာမင်းကြီးနှင့် လည်းကောင်း အပြန်အလှန် ဆွေးနွေးပွဲများ ပြုလုပ်ခဲ့ပါတယ်။

တရားစွဲဆိုရေး အဖွဲ့မဟုတ်သည့် လူ့အခွင့်အရေးကောင်စီသည် IIMM ကဲ့သို့ ယန္တရားထူထောင်ရန် လုပ်ပိုင်ခွင့်မရှိဘဲ IIMM ကို ဖွဲ့စည်းခဲ့ခြင်းဖြစ်သည်။ ပူးတွဲ အဆိုတင်သွင်းသူများ လိုချင်သည့် ကောက်ချက်ချမှုများ ရရှိရန် IIMM ကို ယင်းသို့မသဲမကွဲစီမံထားခြင်းကြောင့် IIMM ယန္တရားကို စတင်ထူထောင်စဉ်ကပင် မြန်မာနိုင်ငံက အသိအမှတ်ပြုခြင်း မရှိခဲ့ပါ။

အထူးအစီရင်ခံစာ တင်သွင်းသူသည် ၎င်းကိုယ်တိုင်ကိုယ်ကျသိရှိခြင်းမရှိဘဲ ခိုင်လုံမှုမရှိသည့် ဆန့်ကျင်ဖက်အရင်းအမြစ်များကိုသာ အလွယ်တကူ ရည်ညွှန်းပြီး လုပ်ပိုင်ခွင့်ကို တလွဲသုံးလျက် မြန်မာအစိုးရသည် နိုင်ငံတကာပြစ်မှုများ ကျူးလွန်ကြောင်းကိုသာ အကြိမ်ကြိမ်စွပ်စွဲမှုများ ပြုလုပ်လျက်ရှိတယ်လို့ ဖော်ပြပါရှိပါတယ်။

၎င်းသည် ကုလသမဂ္ဂ၏ အခွင့်အာဏာကို ကျော်လွန်လျက် NUG အကြမ်းဖက် အဖွဲ့ကို အသိအမှတ်ပြုရေး လူသိရှင်ကြားဆော်ဩနေသည့်အပြင် ကလေးသူငယ် ၈၈ ဦး အပါအဝင် လက်နက်မဲ့ပြည်သူ ၃၈၀၀ ကို ရက်စက်စွာသတ်ဖြတ်ခဲ့သည့် NUG နှင့် PDFs အကြမ်းဖက်များ၏ အကြမ်းဖက်မှုများကို ဖုံးကွယ်ခြင်းဖြင့် နိုင်ငံတကာကို လိမ်လည် လှည့်ဖျားလျက်ရှိတယ်လို့ ဆိုပါတယ်။

ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံး၏ အစီရင်ခံစာသည် မြန်မာနိုင်ငံ၏ ပြည်တွင်းရေးကို ဘက်ပေါင်းစုံမှ ဝင်ရောက်စွက်ဖက်ရန်အတွက် အချို့သော အနောက်နိုင်ငံများထံမှ ပံ့ပိုးမှုအမျိုးမျိုးရရှိထားသော အဖွဲ့အစည်းများနှင့် မီဒီယာများ၏ စာရွက်စာတမ်းများ နည်းတူလှုံ့ဆော်သည့်အစီရင်ခံစာဖြစ်ကြောင်း တွေ့ရှိရပါတယ်။

ထို့အပြင် မဟာမင်းကြီးရုံးသည် မြန်မာနိုင်ငံသားတို့၏ ဖွံ့ဖြိုးတိုးတက်ပိုင်ခွင့်ကို တားဆီးပိတ်ပင်ရန် ရည်ရွယ်၍ နိုင်ငံပိုင်လုပ်ငန်းများအပေါ် စီးပွားရေးအရ ပိတ်ဆို့မှုများဆောင်ရွက်ရန် တောင်းဆိုထားပြီး ယင်းမှာ စင်စစ်တွင် ပြည်သူလူထု၏ လူနေမှုဘဝအပေါ် သက်ရောက်စေမည်ဖြစ်သည်။ အလားတူ လူ့အခွင့်အရေးဆိုင်ရာ ခေတ္တမဟာမင်းကြီးသည်လည်း မြန်မာအစိုးရအပေါ် တစ်ဖက်သတ်စွပ်စွဲချက်များဖြင့် ချဲ့ကားပြောကြားခဲ့သော်လည်း အပြန်အလှန် ဆွေးနွေးပွဲများတွင် သက်ဆိုင်ရာမြန်မာ နိုင်ငံ၏ ပါဝင်တက်ရောက်ခွင့်၊ ခုခံချေပခွင့်ကို ရည်ရွယ်ချက်ရှိရှိဖြင့် ချန်လှပ်ခဲ့ပါတယ်။

ခေတ္တမဟာမင်းကြီးက နိုင်ငံအတွင်း အချို့သောထိတွေ့မှု ဖြစ်စဉ်များကို ပြောကြားခဲ့ရာတွင် တိုင်းရင်းသားဒေသအချို့ရှိ လက်နက်ကိုင်အဖွဲ့များ၏ အကူအညီဖြင့် NUG နှင့် PDFs အကြမ်းဖက်အဖွဲ့များက အပြစ်မဲ့ပြည်သူများအပေါ် ဆိုးရွားစွာ ကျူးလွန်မှုများကို ထုတ်ဖော်ပြောကြားရန် ပျက်ကွက်ခဲ့ကြောင်း တွေ့ရှိရပါတယ်။

ရခိုင်ပြည်နယ်တွင် ကုလသမဂ္ဂအဖွဲ့အစည်း(၁၅)ခုနှင့် အစိုးရမဟုတ်သော နိုင်ငံ တကာအဖွဲ့ အစည်း(၂၆) ခု ရုံးလည်ပတ်လျက်ရှိရာ လူသားချင်းစာနာမှု အကူအညီများ ပေးအပ်ခွင့် ငြင်းပယ်ခံရကြောင်း စွပ်စွဲချက်မှာ ယုတ္တိမရှိကြောင်း တွေ့ရှိရပါတယ်။ မြန်မာနိုင်ငံအနေဖြင့် အတည်ပြုပြီးသော နေရပ်စွန့်ခွာသူများကို ပြန်လည်လက်ခံရန် အသင့်ရှိသော်လည်း “ရိုဟင်ဂျာ” အသုံးအနှုန်းကို မြန်မာနိုင်ငံက မည်သည့်အခါကမျှ အသိအမှတ်မပြု ကြောင်းဖော်ပြထားပါတယ်။

#ygm_mnn
#Yangon_Media_Group

#Local_News
Published _5 October 2022

ကိုရီးယားရောက် မြန်မာအလုပ်သမားများ မရရှိခဲ့သည့် လုပ်အားခ ဝမ်သိန်းတစ်ထောင်ကျော် ပြန်လည်ရရှိခဲ့ကြောင်း ကိုရီးယားနိုင်ငံ မြန်မာအလုပ်သမားလူမှုဖူလုံရေးစင်တာက ထုတ်ပြန်လိုက်သည်။

ပြီးခဲ့သည့် စက်တင်ဘာလအတွင်းက မြန်မာအလုပ်သမား ၂၂ ဦး မရရှိခဲ့သည့် လုပ်အားခပေါင်း ဝမ်သိန်း ၁၀၃၉၇၈၆၇၁ ကို ဥပဒေဘောင်အတွင်းမှရယူပေးနိုင်ခဲ့ကြောင်း ယင်းစင်တာက ထုတ်ပြန်ထားခြင်း ဖြစ်သည်။

အဆိုပါ ၂၂ ဦးထဲတွင် ဗီဇာရှိသူ ၁၄ ဦး နှင့် ဗီဇာမရှိသူ ၈ ဦးလည်း ပါဝင်ကြောင်း၊ စက်တင်ဘာလက စင်တာသို့ ဆက်သွယ်အကူညီတောင်းသူ ၂၄၂ ဦးထိ ရှိခဲ့ကြောင်းလည်း အဆိုပါ မြန်မာအလုပ်သမားလူမှု ဖူလုံရေးစင်တာ၏ စာရင်းများအရ သိရသည်။

#ymg/mt
#Yangon_Media_Group

#Health_Development
Published 5 October 2022

ကင်ဆာပျံ့ပွားပုံကို နားလည်သဘောပေါက်လာခြင်းဖြင့် ပိုမိုကောင်းမွန်တဲ့ ကုသမှုများရရှိလာနိုင်တယ်လို့ ကျွမ်းကျင်သူများက ဆိုပါတယ်။

ကင်ဆာဆဲလ်များက ခန္ဓာကိုယ်မှာပျံ့နှံ့စေရန် ကျန်းမာတဲ့ဆဲလ်တွေရဲ့ လုပ်ငန်းစဉ်ကို အပိုင်စီးနင်းလိုက်ကာ ကင်ဆာနဲ့ပတ်သက်တဲ့ လက်ရှိအယူအဆတွေကို လုံးဝပြောင်းလဲစေပါတယ်။

ကင်ဆာလူနာတွေထဲမှာ သေဆုံးရတဲ့အဓိကအကြောင်းအရင်းတစ်ခုဖြစ်တဲ့ အကျိတ်ပျံ့ပွားခြင်းက ပျံ့နှံ့ပြီဆိုရင် တားဆီးရအလွန်ခက်ခဲနေပါတယ်။

ဒါဟာ သုတေသီတွေက ဒီဖြစ်စဉ်ရဲ့ အဓိကသော့ချက်တွေကို ရှာတွေ့ဖို့ ခက်ခဲနေတာကြောင့် ဖြစ်ပါတယ်။

အခုတော့ NALCN ဆိုတဲ့ပရိုတိန်းတစ်မျိုးက အဓိကပါဝင်ပတ်သက်နေတယ်လို့ တွေ့ရှိထားပါတယ်။

ကြွက်တွေနဲ့စမ်းသပ်ရာမှာ NALCN ပရိုတိန်း ပိတ်ဆို့ခြင်းက ကင်ဆာအကျိတ်များ ဖြစ်လာစေကြောင်း တွေ့ရှိခဲ့ပါတယ်။

ကင်ဆာမရှိတဲ့ ကြွက်တွေထံမှ ထိုပရိုတိန်းကိုဖယ်ရှားလိုက်တဲ့အခါ ကျန်းမာတဲ့ဆဲလ်တွေက မူလတစ်ရှူးများမှ ထွက်ခွာသွားကာ အခြားခန္ဓာကိုယ်အစိတ်အပိုင်းများ ရှိရာကို သွားလာကြပါတယ်။

ဒီလိုနည်းအားဖြင့် ကင်ဆာဆဲလ်တွေက ကျန်းမာတဲ့ဆဲလ်တွေ ပျံ့နှံ့တဲ့အတိုင်း ကင်ဆာပျံ့နှံ့စေတာဖြစ်ပါတယ်။

ဒီတွေ့ရှိချက်တွေက ဆယ်စုနှစ် ၃ ခုအတွင်း အရေးပါဆုံးတွေ့ရှိမှုတွေဖြစ်ကြောင်း ယူကေကင်ဆာသုတေသနညွှန်ကြားရေးမှူး ပရော်ဖက်ဆာ'ရစ်ချက်ဂီလ်ဘတ်ဆန်'က ပြောကြားလိုက်ပါတယ်။

နောက်ထပ်လေ့လာမှုတွေပြုလုပ်နိုင်ရင် ကင်ဆာပျံ့ပွားခြင်းမှ ကာကွယ်ရန်နဲ့ ပျက်စီးသွားတဲ့အစိတ်အပိုင်းများ ပြုပြင်ရန်နည်းလမ်းများပါ ရှာဖွေနိုင်မှာဖြစ်ကြောင်း ဆိုပါတယ်။

ပရိုတိန်းတစ်ခုတည်းက ကင်ဆာပျံ့ပွားပုံနဲ့ အကျိတ်ကြီးထွားခြင်းကို ထိန်းချုပ်ရုံမက သာမန်တစ်ရှူးဆဲလ်ပျက်စီးခြင်းနဲ့ ပြုပြင်ခြင်းတို့ကိုပါ ထိန်းချုပ်နိုင်ကြောင်းကို အံ့အားသင့်ဖွယ်တွေ့ရှိရပါတယ်။

အခုဆိုရင် ကင်ဆာဆဲလ်တွေ ဘယ်လိုပျံ့ပွားလဲဆိုတာကို ပိုပြီးနားလည်လာပါပြီ။

ကင်ဆာပျံ့ပွားခြင်းကို ဖြစ်စေတဲ့အခြေအနေကို လက်ရှိဘယ်လိုဆေးတွေနဲ့ ဟန့်တားနိုင်မလဲဆိုတာ စဉ်းစားရမှာပါလို့ ပြောကြားခဲ့ပါတယ်။

Source: Daily Mail
#Yangon_Media_Group

#Local_News
Published _4 October 2022

မန္တလေးတွင် အငှားယာဉ်မောင်းကိုသတ်၍ ကားလုယူသွားသူများအား တောင်ကြီး၌ဖမ်းမိခဲ့ကြောင်း နစက က သတင်းထုတ်ပြန်လိုက်သည်။

အောက်တိုဘာလ ၃ ရက် ည ၈ နာရီခွဲခန့်တွင် လုံခြုံရေး ပူးပေါင်းအဖွဲ့များမှ သတင်းအရ ရှမ်းပြည်နယ်တောင်ပိုင်း၊ တောင်ကြီးမြို့အတွင်း စုံစမ်းစစ်ဆေးရှာဖွေမှုများပြုလုပ်စဉ် ပြည်ကြီးတံခွန်မြို့နယ်၌ အငှားကားမောင်းနှင်သူအားသတ်ဖြတ်၍ ကားလုယူထွက်ပြေးခဲ့သူများကို ဖော်ထုတ်ဖမ်းဆီးရမိခဲ့ကြောင်း အဆိုပါ ထုတ်ပြန်ချက်တွင် ဖော်ပြထားသည်။

အောက်တိုဘာလ၂ရက် ည၈နာရီခန့်က ပြည်ကြီးတံခွန်မြို့နယ်၊၁၂၈လမ်းနှင့်စက်မှုပန်းခြံလမ်းထောင့်၊ မြို့နယ်လျှပ်စစ်ရုံးအနောက်ဘက်တွင် ပိုင်ရှင်မဲ့ အမျိုးသားအလောင်းတစ်လောင်းတွေ့ရှိရကြောင်း သတင်းရရှိသဖြင့် တာဝန်ရှိသူများက သွားရောက်စစ်ဆေးခဲ့ရာ ဘယ်ဘက်ရင်အုံအောက်ဘက်နှင့် ညာဘက်ခြေသလုံးတို့တွင် ထိုးသွင်းဒဏ်ရာများဖြင့် သေဆုံးနေသည့် အသက်က ၃၀ အရွယ် ကိုပြည့် ဆိုသူကို တွေ့ရှိခဲ့ရခြင်း ဖြစ်သည်။

ယင်းမှာမက်တူးအဖြူရောင်ယာဉ်ဖြင့် မြို့တွင်းဘုရားဖူးလိုက်သွားရာမှ အသတ်ခံရခြင်း ဖြစ်ကြောင်း၊ ဘုရားဖူးကားငှားမည်ဟု ပြစ်မှုကျူးလွန်ခဲ့သူများက လိမ်လည်ခေါ်ဆောင်ခဲ့သောကြောင့် ကိုပြည့် MDY CC/4268 Toyota mark2 အဖြူရောင်မော်တော်ယာဉ်ဖြင့် အောက်တိုဘာလ၂ရက် နံနက် ၇ နာရီခန့်က နေအိမ်မှ ထွက်ခွာသွားပြီးနောက် နေအိမ်သို့ ပြန်ရောက်လာခဲ့ခြင်း မရှိသည့်အတွက် လူပျောက်လိုက်ရှာရာမှ သေဆုံးနေသည်ကို တွေ့ရခြင်း ဖြစ်သည်။

လူသတ်ပြီးကားကိုလုယူသူများမှာ ၂၆လမ်း နှင့် ၅၄လမ်းထောင့်အနီးရှိဟိုတယ်တွင်တည်းခိုနေသူများဖြစ်ပြီး လုယူလာသည့် ကားဖြင့်ဟိုတယ်ကို ပြန်ရောက်လာကာ အဝတ်ထုပ်နှင့် အခြားပစ္စည်းများကို သယ်ယူသွားကြောင်း CCTV မှတ်တမ်းများကို ကိုးကား၍ သက်ဆိုင်ရာ လုံခြုံရေးတာဝန်ရှိသူကပြောကြားထားသည်။

မန္တလေးမြို့၊ ပြည်ကြီးတံခွန်မြို့နယ်၊ ၁၃၈လမ်းနှင့် ၁၃၉ကြား ၊ ၇၇လမ်းနှင့်၇၈လမ်းကြား လမ်းဘေးတွင် ဇူလိုင်လ ၂၆ရက် က အသက်၃၀အရွယ် အမျိုးသားတစ်ဦး၏ ကားကိုလုယူကာလူကိုသတ်၍ အလောင်းကို လမ်းဘေး၌ စွန့်ပစ်သည့် အမှုတစ်ခု ဖြစ်ပွားခဲ့သေးကြောင်းလည်း သိရသည်။

#ymg/mt
#Yangon_Media_Group

#World_Health
Published 5 October 2022

အသက်အရွယ်အိုမင်းရခြင်းရဲ့ သဘောတရားများကို နားလည်ရန် သိပ္ပံပညာရှင်များ ခြေတစ်လှမ်းပိုမိုနီးစပ်လာပြီဖြစ်ကြောင်း ကြာသပတေးနေ့က ထုတ်ပြန်ခဲ့တဲ့ လေ့လာချက်တစ်ခုအရ သိရှိရပါတယ်။

သက်ရှိတွေရဲ့ နေထိုင်မှုသက်တမ်းဟာ အရာများစွာပေါ်မူတည်နေပေမယ့် အိုမင်းရင့်ရော်မှုဖြစ်ရတဲ့ အကြောင်းအရင်းတွေကိုတော့ နားမလည်ကြသေးပါဘူး။

လူသားတွေက အသက်ဘယ်လောက်ရှိလဲဆိုတာကို နှစ်တွေလတွေနဲ့ တွက်ချက်ကြပေမယ့် လူသားဆဲလ်တွေကတော့ ထိုအချိန်ကာလတွေကို နားမလည်ပါဘူး။

ဒါကြောင့် သိပ္ပံပညာရှင်တွေက လူသားတွေရဲ့ အချိန်ကာလအသက်နဲ့ ကွဲပြားနေတဲ့ လူသားဆဲလ်တွေရဲ့ ဇီဝဖြစ်စဉ်သက်တမ်းကို တိုင်းတာနိုင်ဖို့ နည်းလမ်းများ ရှာဖွေတီထွင်ခဲ့ကြပါတယ်။

ဆေးဝါးများဖြင့် အိုမင်းခြင်းကို ကုသနိုင်အောင် ဖန်တီးလာနိုင်ဖွယ်ရှိနေပြီး ထိုကဲ့သို့ရှာဖွေတွေ့ရှိမှုက ဆေးဝါးသုံးစွဲပုံစံအပေါ် ပြောင်းလဲလာနိုင်ဖွယ်ရှိပါတယ်။

အသက်အရွယ်ကြီးရင့်ခြင်းအကြောင်းအရင်းကို သိပ္ပံပညာရှင်များ မသိကြသေးသလို ဆဲလ်ဇီဝဖြစ်စဉ်သက်တမ်းကို မတိုင်းတာနိုင်သေးဘဲ တိတိကျကျ မစမ်းသပ်နိုင်သေးပါဘူး။

လူတစ်ဦးရဲ့ ဘဝသက်တမ်းတလျှောက်လုံး စောင့်ကြည့်ရမှာဖြစ်ပေမယ့် ဒါဟာ လက်တွေ့မဆန်တဲ့လုပ်ရပ်ဖြစ်နေပါတယ်။

အိုမင်းခြင်းကို နားလည်စေဖို့အတွက် ဒေါက်တာ'နီကိုလတ်စ်စထရူစထရပ်'ဦးဆောင်တဲ့အဖွဲ့က C. elegans ချေးပိုးကောင်တွေကို ဓာတ်ခွဲခန်းမှာစမ်းသပ်ခဲ့ကြပါတယ်။

ဒီချေးပိုးကောင်တွေက သက်တမ်း ၂ ပတ်မျှသာ ရှင်သန်နိုင်တာကြောင့် အချက်အလက်များရယူစုဆောင်းဖို့ များစွာလွယ်ကူပါတယ်။

ဒီစမ်းသပ်မှုအတွက် ဘဝသက်တမ်းတွက်ချက်စက်ကို သုတေသီများအသုံးပြုခဲ့ကြပါတယ်။

ဒီစက်က ချေးပိုးကောင် ထောင်သောင်းများစွာရဲ့ အသက်ရှင်သန်ခြင်းဖြစ်စဉ်နဲ့ သေဆုံးခြင်းဖြစ်စဉ်ကို တပြိုင်တည်းလေ့လာနိုင်မှာဖြစ်ပါတယ်။

ချေးပိုးကောင်တွေကို စမ်းသပ်ခွက်လေးတွေထဲမှာထားကာ သူတို့ရဲ့ဘဝသက်တမ်းတလျှောက်လုံး စကင်နာနဲ့ စောင့်ကြည့်ခဲ့ပါတယ်။

ထိုစက်က ချေးပိုးကောင်များကို တစ်နာရီတစ်ခါ ပုံရိပ်များရယူခဲ့ကြပါတယ်။

ချေးပိုးကောင်တွေမှာ အသက်အရွယ်ကြီးရင့်ခြင်းဖြစ်စဉ်နဲ့ သေဆုံးခြင်းဖြစ်စဉ်တို့က တပြိုင်တည်းဖြစ်ပွားခဲ့ပါတယ်။

အိုမင်းခြင်းဖြစ်စဉ်နှေးတဲ့ချေးပိုးကောင်တွေက သေဆုံးခြင်းဖြစ်စဉ်လည်း နှေးကွေးသွားပါတယ်။

လူသားတွေက ချေးပိုးကောင်များထက် ဇီဝဆဲလ်ဖြစ်စဉ်များ အလွန်များပြားတာကြောင့် ထပ်မံလေ့လာရဦးမှာဖြစ်ပါတယ်။

ရှာဖွေတွေ့ရှိမှုပြောင်းလဲမှုများမှ ရလာဒ်များကို ရိုးရိုးရှင်းရှင်းခန့်မှန်းနိုင်မယ်လို့ ယူဆတာထက် လုပ်ဆောင်ချက်ဆိုင်ရာရလာဒ်များအပေါ် ကြားဝင်ဆောင်ရွက်မှုတွေရဲ့ အကျိုးသက်ရောက်မှုကို တိုင်းတာခြင်းအပေါ် အာရုံစိုက်သင့်ပါတယ်လို့ 'စထရုစထရပ်'က သုံးသပ်ထားပါတယ်။

Source: The Jerusalem Post
#Yangon_Media_Group

Published 4 Oct 2022

ပြည်ပမှ အဓိကတင်သွင်းနေရတဲ့ စက်သုံးစီတွေကို ဈေးနှုန်းသက်သာစွာဖြင့် ဝယ်ယူရေးဆောင်ရွက်နေရာ မကြာမီ အချိန်အတွင်း ဈေးနှုန်းသက်သာစွာဝယ်ယူနိုင်မယ့် အလားအလာရှိနေတယ်လို့ နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်ကပြောပါတယ်။

ပဲခူးတိုင်းဒေသကြီး၊ ပြည်ခရိုင်အတွင်းရှိ အသေးစား၊ အငယ်စားနှင့် အလတ်စား စီးပွားရေး (MSME) လုပ်ငန်းရှင်များအား ပြည်မြိုရှိ၊ သီရိခေတ္တရာရတနာပုံမြို့တော်ခန်းမ၌ ယနေ့ အောက်တိုဘာ ၄ရက် ကတွေ့ဆုံပြီး စီးပွားရေးလုပ်ငန်းများ ဖွံ့ဖြိုးတိုး  တက်ရေးအတွက် ဆွေးနွေးပြောကြားရာမှာ ဗိုလ်ချူပ်မှူးကြီးက ထည့်သွင်းပြောကြားခဲ့တာဖြစ်ပါတယ်။

“ စက်သုံးဆီတွေကို အဓိကအားဖြင့် ပြည်ပမှတင်သွင်းနေရပြီး ဈေးနှုန်းသက်သာ စွာဖြင့် ဝယ်ယူရရှိနိုင်ဖို့ နိုင်ငံတော်မှ ကြိုးပမ်း  ဆောင်ရွက်လျက်ရှိပါတယ်။ မကြာမီ အချိန်အတွင်း ဈေးနှုန်းသက်သာစွာဖြင့် ဝယ်ယူနိုင်မည့် အလားအလာများရှိနေပါတယ်။ စက်မှုလုပ်ငန်းတွေအတွက် လိုအပ်တဲ့ လျှပ်စစ်ဓာတ်အားတွေရရှိဖို့ ကြိုးပမ်းဆောင်ရွက်လျက်ရှိရာမှာ  သဘာဝဓာတ်ငွေ့ထုတ်ယူ ရရှိနိုင်သည့် နေရာလည်းတွေ့ရှိထားပြီဖြစ်ပါတယ်။ နောင်လာမည့် သုံးနှစ်ခန့်အတွင်း ထုတ်ယူနိုင်မှာဖြစ်ပါတယ်” လို့ နစက ဥက္ကဋ္ဌက ပြောကြားခဲ့ကြောင်း သတင်းထုတ်ပြန်ချက်မှာဖော်ပြထားပါတယ်။  

ပြည်ခရိုင်အတွင်းက MSME လုပ်ငန်းတွေက ဓာတ်မြေဩဇာတွေ ဈေးနှုန်းသက်သာစွာရရှိရေး၊ စပါးစိုက်ပျိုးရေး ရင်းနှီးမတည် ငွေတွေကို သက်သာတဲ့အတိုးနှုန်းဖြင့် ထုတ်ချေပေးဖို့၊ ခရီးသွားလုပ်ငန်းတိုးတက်ဖွံ့ဖြိုးရေး နိုင်ငံတော်မှကူညီပံ့ပိုးမှုနှင့် ဖြေလျော့ မှုတွေပြုလုပ်ပေးဖို့၊ကိုဗစ်ချေးငွေပြန်လည်ပေးဆပ်ရမည့်ကာလ တိုးမြှင့်ပေးဖို့၊စက်သုံးဆီတွေ ဈေးနှုန်းသက်သာစွာရောင်းချပေးဖို့၊ သံထုတ်လုပ်ရေးအတွက် သတ္တုကုန်ကြမ်းနှင့်ဆက်စပ်ပစ္စည်းတွေ ဈေးနှုန်းသက်သာစွာရရှိဖို့နှင့်နည်းပညာတွေမျှဝေပေးဖို့၊ပန်းပု လုပ်ငန်းအတွက် ကုန်ကြမ်းအခက်အခဲဖြစ်ပေါ်နေမှုတွေကို တင်ပြခဲ့ကြတယ်လို့ သတင်းထုတ်ပြန်ချက်အရ သိရပါတယ်။

နစက ဥက္ကဋ္ဌက ပြန်လည်ဖြည့်စွက်ရှင်းလင်းဆွေးနွေးခဲ့ရာမှာ

• ရထားခရီးဖြင့် အဆင်ပြေစွာ သွားလာနိုင်ရေးအတွက် ရထားလမ်းအဆင့်မြှင့်တင်ခြင်းများ ဆောင်ရွက်လျက်ရှိ
• ရုရှားနိုင်ငံမှ ခရီးသွားများမြန်မာနိုင်ငံသို့ လာရောက် လည်ပတ်ရေး ဒေသအလိုက် ရုရှား-မြန်မာ ချစ်ကြည်ရေး အသင်းများဖွဲ့စည်းဆောင်ရွက်ပေးမည်
• ကိုဗစ်ကာလ ရင်းနှီးမြှုပ်နှံမှုချေးငွေများ ပြန်လည်ပေးဆပ်ရန်အတွက် အချိန်ကာလထပ်မံတိုးမြှင့်ပေးသွားမည် ဖြစ်ပြီး ရင်းနှီးမတည်ငွေများလည်း ထပ်မံထုတ်ချေးပေးသွားမည်
• စားသုံးဆီများအရည် အသွေး ပြည့်မီစွာ ထုတ်လုပ်ရန်အတွက် ခေတ်မီစက်ကိရိယာများလိုအပ်ကြောင်း၊ ဆီထုတ် လုပ်ရေးလုပ်ငန်းများအတွက် ကူညီပံ့ပို့ပေးမှုများ ဆောင်ရွက်ပေး လျက်ရှိကြောင်း စတာတွေကို

ပြောကြားခဲ့တယ်လို့ သတင်းထုတ်ပြန်ပါတယ်။

တွေ့ဆုံပွဲအပြီးမှာ ခင်းကျင်းပြသထားတဲ့ MSME ထုတ်ကုန်ပြခန်းတွေကို ဗိုလ်ချူပ်မှူးကြီးနှင့်အဖွဲ့ကလှည့်လည် ကြည့်ရှုခဲ့ကြပါ တယ်။

နစက ဥက္ကဋ္ဌဟာ အသေးစား၊ အငယ်စားနှင့် အလတ်စား စီးပွားရေး (MSME)လုပ်ငန်းရှင်တွေကို ဒေသအလိုက် သွားရောက်တွေ့ဆုံ ဆွေးနွေးလျက်ရှိရာမှာ မန္တလေးတိုင်းဒေသကြီး၊ရန်ကုန်တိုင်းဒေသကြီးတို့မှ လုပ်ငန်းရှင်တွေနှင့် ယခင်ရက်များက တွေ့ဆုံခဲ့ပြီး ယခု ပဲခူးတိုင်းဒေသကြီး ပြည်ခရိုင်မှ လုပ်ငန်းရှင်တွေနှင့်ဆက်လက်တွေ့ဆုံတာဖြစ်ကြောင်းသိရှိရပါတယ်။

ဗိုလ်ချူပ်မှူးကြီးနှင့် ဇနီးတို့ဟာ ပြည်မြို့သို့ ရောက်ရှိနေခိုက် အောက်တိုဘာ ၄ရက် ညနေပိုင်းမှာ  ပြည်မြို့ ကျက်သရေ ဆောင် လေးဆူဓာတ်ပျော်ရွှေဆံတော် စေတီတော်မြတ်ကြီးအား သွားရောက်ဖူးမြော်ကြည်ညိုခဲ့ကြတယ်လို့ သတင်းထုတ်ပြန်ထားပါတယ်။

Source: SAC’s Info

#SG_Min_Aung_Hlaing

#MSME_Myanmar

#Myanmar_Economy

#Local_News
Published _4 October 2022

ကမ္ဘာကျော် ငပလီကမ်းခြေမှာ လာမည့်နိုဝင်ဘာလအတွင်း ဆောင်းဦးပွဲတော်ပြုလုပ်ဖို့ ရှိနေပါတယ်။

#Yangon_Media_Group

#World_Archaeology
Published 4 October 2022

လွန်ခဲ့တဲ့နှစ်တစ်ထောင်ခန့်က ဘာသာရေးထုံးတမ်းဓလေ့အရ ယစ်ပူဇော်ခံခဲ့ရတဲ့ ကလေး ၇၆ ဦးရဲ့ အုတ်ဂူများကို ပီရူးနိုင်ငံမြောက်ဘက်ကမ်းရိုးတန်းရှိ စပိန်ခေတ်မတိုင်မီဘုရားကျောင်းတစ်ခုအတွင်း ရှေးဟောင်းသုတေသနပညာရှင်များ တူးဖော်တွေ့ရှိခဲ့ကြကြောင်း သုတေသီတစ်ဦးဖြစ်တဲ့ 'လူးဝစ်ဖလိုရီစ်'က AFP သတင်းဌာနကို ပြောကြားခဲ့ပါတယ်။

#Yangon_Media_Group