#Local_News
Published_4 October 2022

ယခုဘဏ္ဍာနှစ်၏ ငါးလတာကာလအတွင်း မြန်မာ-ထိုင်းနယ်စပ်ကုန်သွယ်မှုတွင် ၂ ဒသမ ၄၉ ဘီလျံခန့် ကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ အမေရိကန်ဒေါ်လာ ၁၇၃ ဒသမ ၉၆ သန်းတိုးလာကြောင်း စီးပွားရေးနှင့်ကူးသန်းရောင်းဝယ်ရေးကြီးဌာန၏ ထုတ်ပြန်ထားသည့် စာရင်းများအရ သိရသည်။

အဆိုပါ မြန်မာ-ထိုင်းနယ်စပ်ကုန်သွယ်ရေးစခန်းများအနက် တာချီလိတ်ဂိတ်မှ အမေရိကန်ဒေါ်လာ ၇၈ ဒသမ ၀၉ သန်း ကုန်သွယ်မှုပြုလုပ်ခဲ့ပြီး ယခင်နှစ်ထက်ကန်ဒေါ်လာ ၃၃ ဒသမ ၈၆ သန်းတိုးလာကြောင်း၊ မြဝတီဂိတ်မှ အမေရိကန်ဒေါ်လာ ၁ ဒသမ ၁ ဘီလျံကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ ၇၃ ဒသမ ၃၂ လျော့ကျခဲ့ကြောင်းသိရသည်။

ယင်းအပြင် ကော့သောင်းဂိတ်မှ အမေရိကန်ဒေါ်လာ ၉၂ ဒသမ ၇၈ သန်းကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ ၃ ဒသမ ၅၈ သန်းလျော့ကျခဲ့ကြောင်း၊ မြိတ်ဂိတ်မှအမေရိကန်ဒေါ်လာ ၅၁.၆၄ သန်း၊ ယခင်နှစ်ထက် ကန်ဒေါ်လာ သုည ဒသမ ၈၄ သန်းလျော့ကျခဲ့ကြောင်းလည်း သိရသည်။

ထီးခီးဂိတ်မှ အမေရိကန်ဒေါ်လာ ၁ ဒသမ ၁၅ ဘီလျံ၊ ယခင်နှစ်ထက် ကန်ဒေါ်လာ ၂၃၉ ဒသမ ၁၃ သန်းတိုးလာပြီး မောတောင်ဂိတ်မှ အမေရိကန်ဒေါ်လာ ၄ ဒသမ ၁၈သန်း၊ ယခင်နှစ်ထက် ကန်ဒေါ်လာ ၁.၇၁ သန်း လျော့ကျခဲ့ခြင်းဖြစ်သည်။

ထိုင်း-မြန်မာ နယ်စပ်ကုန်သွယ်ရေးတွင် မြန်မာ့လယ်ယာထွက်ကုန်များ ဖြစ်သော ပြောင်း၊ ရော်ဘာ၊ ငရုတ်၊ ပဲ၊ အားလူး၊ ကြက်သွန်နှင့် ရေထွက်ကုန် ဖြစ်သော ငါး၊ ပုဇွန်၊ ဂဏန်းများကို ထိုင်းနိုင်ငံသို့ အဓိကတင်ပို့ပြီး ထိုင်းနိုင်ငံဘက်မှ လူသုံးကုန်ပစ္စည်းများ၊ အိမ်သုံးဂတ်စ်၊ ဆောက်လုပ်ရေးလုပ်ငန်းသုံး အိမ်ဆောက်ပစ္စည်းများ၊ အထည်ချုပ် (CMP) လုပ်ငန်းသုံးပစ္စည်းများနှင့် စားသောက်ကုန်များ တင်သွင်းလျက်ရှိသည်။

#ymg/sth
#Yangon_Media_Group

#Local_News
Published_ 4 October 2022

မြန်မာနိုင်ငံမှ တရုတ်နိုင်ငံသို့ စားသောက်ကုန်ပစ္စည်းများ တင်ပို့ရန် GACC တွင် စက်တင်ဘာ ၃၀ ရက်အထိ ကုမ္ပဏီ/စက်ရုံ ၁၀၂၂ ခုမှ စောင်ရေစုစုပေါင်း ၁၈၅၀ စောင်အား မှတ်ပုံတင်ရန် လျှောက်ထားပြီးဖြစ်ကြောင်း သိရပါတယ်။

လျှောက်ထားမှုများမှာ စိုက်ပျိုးရေးဦးစီးဌာနမှ ကုမ္ပဏီ ၈၈၃ ခု၊ စောင်ရေ ၁၇၁၁ စောင်၊ ငါးလုပ်ငန်းဦးစီးဌာနမှ ကုမ္ပဏီ/ စက်ရုံ ၁၁၈ ခု၊ စောင်ရေ ၁၁၈ စောင်၊ မွေးမြူရေးနှင့် ကုသရေးဦးစီးဌာနမှ ကုမ္ပဏီ ၁၂ ခု၊ စောင်ရေ ၁၂ စောင်နှင့် အစားအသောက်နှင့် ဆေးဝါးကွပ်ကဲရေးဦးစီးဌာနမှ ကုမ္ပဏီ ၉ ခု၊ စောင်ရေ ၉ စောင် တို့ဖြစ်ကြပါတယ်။

တရုတ်နိုင်ငံ၊ အကောက်ခွန် အထွေထွေအုပ်ချုပ်မှုအာဏာပိုင်အဖွဲ့၏ ကြေညာချက် အမှတ် (၂၄၈) နှင့် (၂၄၉) တို့အရ ၂၀၂၂ ခုနှစ် ဇန်နဝါရီ ၁ ရက်မှစ၍ မြန်မာနိုင်ငံမှ တရုတ်နိုင်ငံသို့ စားသောက်ကုန် တင်ပို့မည့်/တင်ပို့လျက်ရှိတဲ့ လုပ်ငန်းရှင်များ အနေဖြင့် GACC တွင် မှတ်ပုံတင်ပြီးမှသာလျှင် တင်ပို့ခွင့်ရရှိမှာဖြစ်ကြောင်း သိရပါတယ်။

မြန်မာနိုင်ငံမှ တရုတ်နိုင်ငံသို့ တင်ပို့မည့် ကုန်စည်အမျိုး အစားလေးခုဖြစ်သည့် အသားနှင့် အသားထုတ်ကုန်များ၊ ရေထွက် ကုန်များ၊ နို့ထွက်ပစ္စည်းများ၊ ငှက်သိုက်နှင့် ဆက်စပ်ထုတ်ကုန်များနှင့် ကုန်စည်အမျိုးအစား ၁၄ ခုဖြစ်သည့် အစာသွတ်ရန် အသုံးပြုသည့် အပေါ်ခွံ အစွပ်၊ ပျားရည်နှင့် ပျားထွက်ပစ္စည်း၊ ဥနှင့် ဥထုတ်ကုန်များ၊ စားသုံးဆီ၊ အပြင်အသားအား ဂျုံသားဖြင့် ပြုလုပ်ထားပြီး စားသုံးနိုင်သည့် သို့မဟုတ် အေးခဲထားသည့်ထုတ်ကုန် များ၊ စားသုံးနိုင်သောအစေ့အဆန်များ၊ ကြိတ်ခွဲသီးနှံထွက်ကုန်များနှင့် မုယောစပါး၊ လတ်ဆတ်သော ဟင်းသီးဟင်းရွက်များ၊ ရေဓာတ်ထုတ်ထားသော ဟင်းသီးဟင်းရွက်များနှင့် ပဲခြောက်များ၊ အနံ့အရသာအတွက် အသုံးပြုသော ဟင်းခတ်အမွှေးအကြိုင်များ၊ အခွံမာသီးနှင့် အစေ့အဆန်များ၊ သစ်သီးခြောက်များ၊ မလှော်ထားသော ကော်ဖီနှင့် ကိုကိုးစေ့များ၊ အထူးအာဟာရ အစား အသောက်များ၊ ကျန်းမာရေးဖြည့်စွက်စာများ စုစုပေါင်း ကုန်စည် အမျိုးအစား ၁၈ အုပ်စုကို တရုတ်နိုင်ငံ၊ GACC တွင် မှတ်ပုံတင်ရမှာ ဖြစ်ပါတယ်။

ကုန်စည်အုပ်စု အလိုက် GACC တွင် မှတ်ပုံတင်နိုင်ရေးအတွက် သက်ဆိုင်ရာ အာဏာပိုင်အဖွဲ့များမှာ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ ငါးလုပ်ငန်းဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီးဌာနတို့ ဖြစ်ကြပါတယ်။

အဆိုပါ ကုန်စည်အမျိုးအစား ၁၈ အုပ်စု၌ ပါဝင်ခြင်းမရှိသည့် ကုန်စည်များကို ထုတ်လုပ်/ တင်ပို့မည့်လုပ်ငန်းများ အနေဖြင့် https://cifer.singlewindow.cn သို့ ဝင်ရောက်၍ ကိုယ်တိုင် Account ဖွင့်လှစ်ကာ တိုက်ရိုက်လျှောက်ထားရမှာ ဖြစ်ပါတယ်။

#ygm_mnn
#Yangon_Media_Group

#Local_News
Published_ 4 October 2022

ရန်ကုန်ပြည်သူ့ဆေးရုံကြီးတွင် ကင်ဆာဝေဒနာရှင်များအတွက် အိန္ဒိယမှလှူဒါန်းသည့် ဓာတ်ရောင်ခြည်စက်အသစ်ထပ်မံ တပ်ဆင်နေကြောင်း ကျန်းမာရေး ဝန်ကြီးဌာနမှ သိရသည်၊၊

ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းနှင့်အဖွဲ့သည် ရန်ကုန်ပြည်သူ့ဆေးရုံကြီး၊ ဓာတ်ရောင်ခြည်ဆေးကုဌာနတွင် အိန္ဒိယသမ္မတနိုင်ငံအစိုးရမှ လှူဒါန်းထားရှိသော Bhabhatron II Cobalt စက်တပ်ဆင်နေမှုကို အောက်တိုဘာလ(၁)ရက်က သွားရောက်ကြည့်ရှုစစ်ဆေးခဲ့သည်၊၊

ပြည်ထောင်စုဝန်ကြီးက "ကင်ဆာရောဂါလူနာများ အနေဖြင့် ဓာတ်ရောင်ခြည်ဖြင့် ကုသမှုခံယူရန် စောင့်ဆိုင်းရသည့် အချိန်လျှော့ချပေးနိုင်ရေးအတွက် Bhabhatron စက် အမြန်ဆုံးတပ်ဆင်ပြီးစီးရေး ကြီးကြပ်ဆောင်ရွက် ပေးကြရန်၊ လက်ရှိဆောင်ရွက်လျက်ရှိသည့် Linear Accelerator စက်နှစ်လုံး၏ လုပ်ငန်းဆောင်ရွက်မှုများ နှောင့်နှေးခြင်း မရှိစေရေး စက်ပစ္စည်းကြံ့ခိုင်မှုအတွက် အလေးထားဆောင်ရွက်ပေးကြရန်၊ ဆေးကုသရေးလုပ်ငန်းများ ပိုမိုတိုးတက်ရေး ဆောင်ရွက်ကြရန်နှင့် လူနာများ အားကိုးအားထားရသည့် ပြည်သူ့ဆေးရုံကြီးအဖြစ် ဆက်လက်ကြိုးပမ်း ဆောင်ရွက်ကြရန် "မှာကြားခဲ့ပြီး လိုအပ်သည်များ ဖြည့်ဆည်းဆောင်ရွက်ပေးခဲ့ကြောင်းသိရသည်။

ရန်ကုန်ပြည်သူ့ ဆေးရုံကြီးတွင် ကင်ဆာရောဂါလူနာများအတွက် ဓာတ်ရောင်ခြည်ဖြင့် ကုသမှု အပတ်စဉ် လူနာ (၁၀၀၀)ခန့် ဆောင်ရွက်ပေးလျက်ရှိကြောင်းနှင့် အသစ်တည်ဆောက်နေသည့် ရန်ကုန်ပြည်သူ့ဆေးရုံကြီးတိုးချဲ့ ခုနှစ်ထပ်ဆောင်တွင် ဓာတ်မှန်ဌာန၊ ဓာတ်ခွဲဌာန၊ ဆေးကုသမှုလူနာဆောင်များနှင့် စာသင်ခန်းများ ပါဝင်မည်ဖြစ်၍ ဆေးကုသရေးလုပ်ငန်းများ ပိုမိုဆောင်ရွက်နိုင်မည်ဖြစ်ကြောင်း သိရသည်၊၊

ရန်ကုန်ပြည်သူ့ဆေးရုံကြီးရှိ တိုးချဲ့ ခုနှစ်ထပ်ဆောင်ကို စီမံကိန်းတန်ဖိုး ငွေကျပ်( ၂၁၈၉၇ )ဒသမ (၉၈၂) သန်းဖြင့် ဆောင်ရွက်လျက်ရှိပြီးလာမည့်ဘဏ္ဍာ ရေးနှစ်တွင် ပြီးစီးနိုင်ရေးဆောင်ရွက်လျက်ရှိကြောင်းသိရသည်၊၊

#ymg/tthl
#Yangon_Media_Group

#Health_Tips
Published 4 October 2022

အသက်အရွယ်ကြီးရင့်လာခြင်း၊ ဆေးလိပ်သောက်ခြင်း၊ မိခင်နို့တိုက်ကျွေးခြင်း စတဲ့အကြောင်းအရာများကြောင့် ရင်သားလျော့ရဲလာသလို ခံစားရတတ်ပါတယ်။

အသက်ကြီးလာတာနဲ့အမျှ ရင်သားတင်းရင်းမှု လျော့နည်းလာတာ သဘာဝဖြစ်ပြီး ခန္ဓာကိုယ်နဲ့ပတ်သက်ပြီး ယုံကြည်မှုလျော့နည်းလာတတ်ပါတယ်။

ယခုအခါ သင့်နို့ရည်ဂလင်းများက ဘာကြောင့်လျော့ကျသွားသလဲဆိုတာနဲ့ အလွန်အကျွံလျော့ရဲခြင်းကို ဘယ်လိုရှောင်ရှားရမလဲဆိုတာကို ဆရာဝန်တစ်ဦးမှ ထုတ်ဖော်ပြောကြားခဲ့ပါတယ်။

Clinic Center မှ ဒေါက်တာ'ဟာကန်ဂန်ဒိုဂန်'က ဂရုစိုက်ရမယ့် ၇ မျိုးကို ဖော်ပြခဲ့ပါတယ်။

(၁) ဆေးလိပ်သောက်ခြင်း

ဆေးရွက်ကြီးက ကော်လာဂျင်ကို ပြိုကွဲစေကာ ရင်သားတင်းရင်းခြင်းကို လျော့ရဲစေပါတယ်။

(၂) အတွင်းခံအမျိုးအစား

ရင်သားကိုထောက်ပံ့ပေးနိုင်တဲ့ အတွင်းခံဝတ်ခြင်းဖြင့် ပုံကျစေပါတယ်။
အထူးသဖြင့် လှုပ်ရှားလေ့ကျင့်ခန်းပြုလုပ်တဲ့အခါ ရင်သားလှုပ်ရှားမှုနည်းစေမယ့် အတွင်းခံမျိုးရွေးဝတ်သင့်ပါတယ်။

(၃) ဟော်မုန်းပြောင်းလဲခြင်း

သွေးဆုံးချိန်တွင် အမျိုးသမီးဟော်မုန်း အီစထရိုဂျင်နည်းပါးသွားကာ ရင်သားတစ်ရှူးတွေမှာ ကော်လာဂျင်လျော့နည်းသွားပါတယ်။

သက်ဆိုင်ရာအားဆေးများ အသုံးပြုခြင်းဖြင့် ရင်သားပုံစံ ပုံမှန်ဖြစ်စေပါတယ်။

(၄) ကိုယ်အလေးချိန်

ကိုယ်အလေးချိန်ကျသွားတဲ့အခါ ရင်သားမှာရှိတဲ့အဆီဆဲလ်များ ရှုံ့သွားကြပါတယ်။

ရင်သားရဲ့ အရေပြား၊ အရွတ်များနဲ့ အခြားအစိတ်အပိုင်းများက ရင်သားကိုအချိန်အတော်ကြာထောက်ပံ့ပေးထားကာ ပိန်သွားတဲ့အချိန်မှာ ဆက်လက်ထောက်ပံ့နိုင်ဖို့ ကျုံ့ပေးဆန့်ပေးနိုင်ပါတယ်။

(၅) နို့ချိုတိုက်ကျွေးခြင်း

ကလေးငယ်က နို့စို့တဲ့အခါ ရင်သားအရွယ်အစားပြောင်းလဲလာတာကို သတိပြုမိမှာပါ။

နို့တိုက်ကာလကျော်ပြီး နို့ရည်ထုတ်လုပ်တဲ့ လုပ်ဆောင်ချက်များပုံမှန်ပြန်ဖြစ်တဲ့အခါ ရင်သားအရွယ်အစားပုံမှန်ပြန်ဖြစ်လာပါတယ်။

(၆) ကိုယ်ဟန်အနေအထား

အမြဲတမ်း ပျင်းတိပျင်းရွဲနေလျှင် ကမ္ဘာမြေဆွဲအားကြောင့် ရင်သားလျော့ကျစေပါတယ်။

(၇) ခွဲစိတ်ခြင်း

ရင်သားကြီးမားတောင့်တင်းလာအောင် ထည့်သွင်းခွဲစိတ်မှုများ ပြုလုပ်နိုင်ပါတယ်။

ကလေးမွေးပြီးတဲ့အချိန်၊ ရင်သားဖယ်ရှားခြင်း၊ ကိုယ်အလေးချိန်ကျခြင်း၊ ပုံသဏ္ဍာန်ညီခြင်း တို့အတွက် ခွဲစိတ်ကြလေ့ရှိပါတယ်။

ခွဲစိတ်ပြီး ရောင်ရမ်းခြင်းနဲ့ အမာရွတ်ပျောက်သွားပြီး ၆ လ ၁ နှစ်ကြာတဲ့အချိန်မှ ခွဲစိတ်မှုအကျိုးရလာဒ်က သိသာလာပါတယ်။

Source: The Sun
#Yangon_Media_Group

#World_News
Published 4 October 2022

နျူကလီးယားလက်နက်ပိုင် မြောက်ကိုရီးယားနိုင်ငံက ပဲ့ထိန်းဒုံးကျည်တစ်စင်းကို ၅ နှစ်အတွင်း ပထမဆုံးအကြိမ်အဖြစ် ဂျပန်နိုင်ငံအပေါ်ကနေကျော်ပြီး အင်္ဂါနေ့က ပစ်လွှတ်ခဲ့ပါတယ်။

အဆိုပါ ဒုံးကျည်ပစ်လွှတ်မှုကြောင့် ဂျပန်မြောက်ပိုင်းမှ ပြည်သူများကို အကာအကွယ်ယူဖို့ သတိပေးခဲ့ရပြီး ရထားပြေးဆွဲမှုများ ယာယီရပ်ဆိုင်းခဲ့ရပါတယ်။

ဒုံးကျည်က ဂျပန်နိုင်ငံအပေါ်ကနေ ဖြတ်သန်းကာ ပစိဖိတ်သမုဒ္ဒရာထဲ ကျသွားဟန်ရှိပြီး ဂျပန်အစိုးရက ပြည်သူများကို အကာအကွယ်ယူထားဖို့ သတိပေးခဲ့ပါတယ်။

ထိုဒုံးကျည်ကို ကာကွယ်ရေးစနစ်တွေနဲ့ ဖျက်ဆီးခဲ့ခြင်းမရှိဘဲ ဒါဟာ ၂၀၁၇ နောက်ပိုင်း မြောက်ကိုရီးယားက ဂျပန်နိုင်ငံအပေါ်ကနေဖြတ်ပြီး ပထမဆုံးအကြိမ် ဒုံးကျည်စမ်းသပ်ပစ်လွှတ်ခဲ့တာဖြစ်ပါတယ်။

မြောက်ကိုရီးယားက ပဲ့ထိန်းဒုံးကျည်များ အကြိမ်ကြိမ်ပစ်လွှတ်ခဲ့ခြင်းနဲ့ သူတို့ရဲ့လုပ်ရပ်တွေက ဂျပန်နိုင်ငံဒေသတွင်းနဲ့ နိုင်ငံတကာအသိုင်းအဝိုင်းရဲ့ လုံခြုံရေးနဲ့ တည်ငြိမ်အေးချမ်းရေး ပျက်ပြားစေကာ ကြီးမားသောစိန်ခေါ်မှုကြီးအသွင်ဆောင်နေကြောင်း ဂျပန်ထိပ်သီးအစိုးရပိုင်းမှ ပြောရေးဆိုခွင့်ရှိသူ'ဟီရိုကာဇူမက်ဆူနို'က သတင်းစာရှင်းလင်းပွဲမှာ ပြောကြားခဲ့ပါတယ်။

ယခုဒုံးကျည်က အကွာအဝေး ၄,၆၀၀ ကီလိုမီတာအထိ သွားခဲ့ပြီး အမြင့်ပေ ၁,၀၀၀ ကီလိုအထိ တက်သွားခဲ့ကြောင်း ပြောပြခဲ့ပါတယ်။

ဒီဒုံးကျည်ဟာ မြောက်ကိုရီးယားပြည်နယ်ဂျာဂန်းမှ စမ်းသပ်ပစ်လွှတ်လိုက်တဲ့ တာလတ်ပစ်ပဲ့ထိန်းဒုံးကျည်(IRBM)ဖြစ်နိုင်ကြောင်း တောင်ကိုရီးယားစစ်ဦးစီးချုပ်က ပြောကြားခဲ့ပါတယ်။

မြောက်ကိုရီးယားဟာ အသံထက်မြန်တဲ့ဒုံးကျည်များအပါအဝင် လတ်တလောစမ်းသပ်မှုအများအပြားကို ထိုပြည်နယ်မှ ပစ်လွှတ်ခဲ့တာဖြစ်ပါတယ်။

ထိုစမ်းသပ်ပစ်လွှတ်ခြင်းကြောင့် ဂျပန်မြောက်ပိုင်းရှိ အရှေ့ဂျပန်ရထားလိုင်းမှ ရထားပြေးဆွဲမှုများ ရပ်ဆိုင်းထားရကြောင်း ဂျပန်ရုပ်သံ NHK မှ ထုတ်လွှင့်ခဲ့ပါတယ်။

ဒုံးကျည်ပစ်ခတ်မှုကြောင့် လေယာဉ် သင်္ဘောတွေ ထိခိုက်ခြင်းမရှိဘူးလို့ သိရပါတယ်။

၂၀၁၇ ခုနှစ်ကလည်း မြောက်ကိုရီးယားဟာ ဟွာဆောင-၁၂ အမည်ရှိ ပဲ့ထိန်းဒုံးကျည်ကို ဂျပန်နိုင်ငံပေါ်ကနေဖြတ်သန်းကာ စမ်းသပ်ပစ်လွှတ်ခဲ့ပါတယ်။

မြောက်ကိုရီးယားရဲ့ နျူကလီးယားနဲ့ ဒုံးကျည်ထုတ်လုပ်ရေးအစီအစဉ်များကို ကုလသမဂ္ဂလုံခြုံရေးကောင်စီက တားမြစ်လိုက်ကာ ဒဏ်ခတ်ပိတ်ဆို့မှုများ ပြုလုပ်ခဲ့ပါတယ်။

မြောက်ကိုရီးယားရဲ့ ယခုနောက်ဆုံးပစ်လွှတ်မှုက ၁၀ ရက်အတွင်း ၅ ကြိမ်မြောက်ပစ်လွှတ်ခဲ့တာဖြစ်ပါတယ်။

အမေရိကန်၊ တောင်ကိုရီးယားနဲ့ ဂျပန်တို့က ၃ နိုင်ငံပူးပေါင်းပြီး ရေငုပ်သင်္ဘောတိုက်ခိုက်ရေးစစ်ရေးလေ့ကျင့်မှုများ ပြုလုပ်ခဲ့ပါတယ်။

ဂျပန်ဝန်ကြီးချုပ်'ဖူမီယိုကီရှီဒါ'က မြောက်ကိုရီးယားရဲ့လုပ်ရပ်က ရိုင်းစိုင်းတဲ့လုပ်ရပ်ဖြစ်ကြောင်း၊ သတင်းအချက်အလက်များ စုဆောင်းပြီး ခွဲခြမ်းစိတ်ဖြာသွားမှာဖြစ်ကြောင်း တိုကျိုမှာ သတင်းထောက်များကို ပြောကြားခဲ့ပါတယ်။

"မြောက်ကိုရီးယားနဲ့ သံတမန်ရေးလမ်းကြောင်းဖွင့်ထားပေမယ့် နှစ်နိုင်ငံစလုံးအတွက် တာဝန်ရှိပါတယ်၊ ဒီကြီးမားလာတဲ့ ခြိမ်းခြောက်မှုကြီးကို ပြတ်ပြတ်သားသားတုံ့ပြန်သွားမှာပါ" လို့ အရှေ့အာရှဆိုင်ရာ အမေရိကန်ထိပ်သီးသံတမန်'ဒန်နီယယ်ခရစ်တန်ဘရင့်ခ်'က ပြောကြားခဲ့ပါတယ်။

Source: Reuters
#Yangon_Media_Group

Published 4 Oct 2022

အမေရိကန်သမ္မတဟောင်း ဒေါ်နယ်ထရမ့်က CNN စီအင်န်အင်န် ရုပ်သံဌာနကို အသရေဖျက်မှုနှင့် တနင်္လာနေ့က တရားစွဲဆိုလိုက်ပါတယ်။ စီအင်န်အင်န်ဟာ သူ့ကို သွားပုပ်လေလွင့်ပြောဆိုသိက္ခာချစည်းရုံးလှုံဆော်မှုတွေကြောင့် ဆုံးရှုုံးနစ်နာမှုတွေအတွက် နစ်နာကြေး ဒေါ်လာ ၄၇၅သန်းကိုပါ တောင်းဆိုလိုက်ပါတယ်။

အမေရိကန် ဖလော်ရီဒါပြည်နယ်က ဖို့တ် လောဒါဒါလီခရိုင်တရားရုံးမှာ  တရားစွဲဆိုလိုက်တာဖြစ်ပြီး စီအင်န်အင်န်ဟာ သူ့ရဲ့ ဦးဆောင် သတင်းအဖွဲ့အစည်းတစ်ခုရဲ့ သိသာတဲ့ အရှိန်ဩဇာကို အသုံးချပြီး သူ့ကို နိုင်ငံရေးအရ အနိုင်ရဖို့ လုပ်ဆောင်နေတယ်လို့ ထရမ့်က ပြောပါတယ်။

စီအင်န်အင်န်က ဒီကိစ္စနှင့်ပတ်သက်လို့ မှတ်ချက်ပေးဖို့ ငြင်းဆန်ပါတယ်။

စီအင်န်အင်န်ကိုစွဲဆိုတဲ့အမှုမှာ စာမျက်နှာပေါင်း ၂၉ မျက်နှာပါရှိပြီး   စီအင်န်အင်န်ဟာ သူ့ကို တိုက်ခိုက်ဝေဖန်ခဲ့တဲ့ ကာလရှည် မှတ်တမ်းတွေရှိခဲ့တယ်။ အခုနောက်ပိုင်း မကြာသေးခင်လတွေမှာ သူတို့ဟာ တိုက်ခိုက်မှုကို အရှိန်မြှင့်ခဲ့တယ်။  ဘာဖြစ်လို့လဲဆိုတော့ ၂၀၂၄ မှာ သူ သမ္မတပြန်အရွေးခံမှာကို စီအင်န်အင်န်က ကြောက်ရွံ့လို့ဖြစ်တယ်လို့ ရီပတ်ဘလီကင်ဖြစ်တဲ့ ဒေါ်နယ်ထရမ့်ကပြောပါတယ်။

“နိုင်ငံရေးမျှခြေရှိတာကို တိမ်းစောင်းသွားစေဖို့ ပူးပေါင်းလုပ်ဆောင်တဲ့ အစိတ်အပိုင်းတစ်ခုအဖြစ် စီအင်န်အင်န်ဟာ မတော်တရော်တွေ အမှားတွေနှင့် အသရေဖျက်မှုတွေဖြစ်စေတဲ့ “ လူမျိုးခွဲခြားရေးဝါဒီ” “ ရုရှား လက်ပါးစေ” “ ဆူပူအုံကြွရေးသမား”နှင့် အဆိုးဆုံးက “ဟစ်တလာ” ဆိုပြီး ဆက်တိုက် တံဆိပ်ကပ်တာတွေ  ဆောင်ရွက်ခဲ့တာဖြစ်တယ်လို့ အမှုဖွင့်ရာမှာ ထည့်သွင်းထားပါတယ်။

အခြားသော အဓိက မီဒီယာကုမ္ပဏီကြီးတွေကိုလည်း သူဟာ လာမယ့်အပတ်တွေနှင့်လတွေမှာ ဆက်ပြီးတရားစွဲဆို ဦးမယ်လို့ သမ္မတဟောင်းထရမ့် က သတင်းထုတ်ပြန်ပါတယ်။ ၂၀၂၁ ဇန်နဝါရီ ၆ ရက်ကိစ္စ ကိုင်တွယ်တဲ့ ကွန်ဂရက် ကော်မတီကိုပင် သူ တရားးစွဲနိုင်တယ်လို့ သူကပြောပါတယ်။

Source Reuters

#Trump

#CNN

#defamation

#Local_News
Published _4 October 2022

ခရီးသည်တင်လေယာဉ်ကို တိုက်ခိုက်ခြင်းမှာ အပြည်ပြည်ဆိုင်ရာဥပဒေများကို ချိုးဖောက်ခြင်းဖြစ်၍ အရေးယူနိုင်ရေး ဆောင်ရွက်မည်ဟု နစက က သတင်း ထုတ်ပြန်လိုက်သည်။

ပြီးခဲ့သည့် စက်တင်ဘာလ ၃၀ ရက်က ခရီးသည် ၆၃ ဦးပါ အမျိုးသားလေကြောင်းလိုင်း (MNA) မှ လေယာဉ်အမှတ် XY-AML၊ လေယာဉ်အမျိုးအစား ATR-72(600) ကို လွိုင်ကော်လေဆိပ်တွင် ပစ်ခတ်ခဲ့ခြင်း ဖြစ်သောကြောင့် လေယာဉ်ပေါ်၌စီးနင်းလိုက်ပါလာသည့် ခရီးသည်တစ်ဦး၏ ညာဘက်ပါးတွင် ကျည်ထိမှန်ဖောက်ဝင် ဒဏ်ရာရရှိခဲ့ခြင်းဖြစ်သည်။

ယခုကဲ့သို့ အရပ်ဘက်ဆိုင်ရာ လေယာဉ်၊ ပစ္စည်းများနှင့် အရပ်သားများကို ထိခိုက်အောင် တိုက်ခိုက်ခြင်းမှာ ဂျီနီဗာကွန်ဗင်းရှင်း ၄ ရပ်ကို အခြေခံသော လက်နက်ကိုင်ပဋိပက္ခဆိုင်ရာဥပဒေ (Law Of Armed Conflict) သို့မဟုတ် အပြည်ပြည်ဆိုင်ရာ လူသားချင်းစာနာထောက်ထားမှုဆိုင်ရာ ဥပဒေ (International Humanitarian Law) အရလည်းကောင်း ကြီးလေးသောပြစ်မှုများကို ချိုးဖောက်ကျူးလွန်ခဲ့ခြင်းဖြစ်ပြီး အဆိုပါကျူးလွန်ခဲ့သူများကို နိုင်ငံတော်၏တည်ဆဲဥပဒေများအရ ထိရောက်ပြင်းထန်စွာ အရေးယူနိုင်ရေး လိုအပ်သလိုဆောင်ရွက်သွားမည်ဖြစ်ကြောင်း သတင်းထုတ်ပြန်ထားသည်။

လွန်ခဲ့သော၂၀၂၁ ခုနှစ်၊ ဒီဇင်ဘာလ ၃ ရက်ကတည်းကလည်း အဖွဲ့အချို့အနေဖြင့် ပြည်တွင်းလေကြောင်းလိုင်းပြေးဆွဲမှုများအပေါ် တိုက်ရိုက်ခြိမ်းခြောက်သည့် ထုတ်ပြန်ချက်များလည်း ရှိခဲ့ကြောင်း နစက သတင်းထုတ်ပြန်ရေးအဖွဲ့က ဆိုသည်။

အကြမ်းဖက်မှုတိုက်ဖျက်ရေး ဥပဒေပုဒ်မ ၉ တွင် မည်သူမဆို လေယာဉ် ဝန်ဆောင်မှုပေးချိန်တွင် လေယာဉ်ပေါ်တွင် လေယာဉ်ဘေးကင်းလုံခြုံမှုကို အန္တရာယ်ဖြစ်စေရန် လေယာဉ်ပေါ်ရှိသူ တစ်ဦးဦးကို အတင်းအဓမ္မပြုလုပ်မှု၊ လေယာဉ်ကိုပျက်စီးစေရန် သော်လည်းကောင်း၊ လေယာဉ်ကို ပျံသန်းခြင်းမပြုနိုင်စေရန်သော်လည်းကောင်း၊ လေယာဉ်ပျံသန်းစဉ် ဘေးအန္တရာယ်ဖြစ်စေရန်သော်လည်းကောင်း၊ ဝန်ဆောင်မှုပေးနေသည့် လေယာဉ်ကိုပျက်စီးမှု၊ ထိခိုက်ပျက်စီးစေမှု သို့မဟုတ် လေယာဉ်ပျက်စီးစေနိုင်သည့် ပစ္စည်းကိရိယာ သို့မဟုတ် အရာဝတ္ထုတစ်ခုခုကို လေယာဉ်ပေါ်၌ချထားမှု သို့မဟုတ် ထားရှိစေမှု၊ လေယာဉ်ပျံသန်းစဉ် ဘေးအန္တရာယ်ဖြစ်စေရန် လေကြောင်းလမ်းညွှန်ဆိုင်ရာ အဆောက်အအုံစနစ်များနှင့် ဆက်သွယ်ရေးအသုံး အဆောင်ပစ္စည်းများကို ပျက်စီးမှု၊ ထိခိုက်ပျက်စီးစေမှု သို့မဟုတ် လေကြောင်းလမ်းညွှန် ဆောင်ရွက်မှုကို ဝင်ရောက်နှောင့်ယှက်မှု၊ လေယာဉ်ပျံသန်းမှုအား ဘေးအန္တရာယ်ဖြစ်စေရန် မမှန်ကန်သော သတင်းအချက်အလက်များကို သိလျက်နှင့် ဆက်သွယ်ပေးပို့မှုတို့ကို ကျူးလွန်လျှင် မြို့ပြလေကြောင်းပျံသန်းရေးကို ဘေးအန္တရာယ် ဖြစ်စေသည့် ပြစ်မှုမြောက်ကြောင်း ဖော်ပြပါရှိ ကြောင်း သိရသည်။

အကြမ်းဖက်မှု တိုက်ဖျက်ရေးဥပဒေပုဒ်မ ၄၉ အရ အထက်ဖော်ပြပါ ဥပဒေပုဒ်မ ၉ ပါ မြို့ပြ လေကြောင်းပျံသန်းရေးအား ဘေးအန္တရာယ်ဖြစ်စေနိုင်သည့် ပြစ်မှုတစ်စုံတစ်ခုကို ကျူးလွန်ပြုလုပ်မိပါက အနည်းဆုံး ထောင်ဒဏ် (၁၀)နှစ်မှ အများဆုံး ထောင်ဒဏ်တစ်သက်အထိဖြစ်စေ၊ သေဒဏ်အထိဖြစ်စေ ချမှတ်နိုင်ကြောင်း ဖော်ပြပါရှိသည်။ ပုဒ်မ ၄၉ တွင် အကြမ်းဖက်မှုတစ်ခုခုကို ကျူးလွန်ရာ၌ သူတစ်ဦးဦးကိုဖြစ်စေ၊ အများကိုဖြစ်စေ သေစေလျှင် သို့မဟုတ် အပြင်းအထန်နာကျင်စေလျှင် ကျူးလွန်သူကို အနည်းဆုံး ထောင်ဒဏ် (၁၀)နှစ်မှ အများဆုံး ထောင်ဒဏ်တစ်သက်အထိဖြစ်စေ၊ သေဒဏ်အထိဖြစ်စေ ချမှတ်ရမည်ဟု ဖော်ပြပါရှိသည်။ ထို့အပြင် နိုင်ငံတော်၏ တည်ဆဲဥပဒေ တစ်ရပ်ဖြစ်သော ရာဇသတ်ကြီးဥပဒေတွင်လည်း လူကိုသေစေခြင်း သို့မဟုတ် နာကျင်စေခြင်း၊ ပစ္စည်းကိုထိခိုက်နစ်နာစေခြင်း၊ ပျက်စီးစေခြင်း၊ ပျက်စီးခြင်းတို့အား ပြုလုပ်ပါက ကျူးလွန်မှုအပေါ် မူတည်၍ ထိရောက်ပြင်းထန်သော ပြစ်ဒဏ် သတ်မှတ်ချက်များ ပြဋ္ဌာန်းထားသည်။

ယင်းကြောင့် KNPP နှင့် PDF အမည်ခံ အကြမ်းဖက်သမားများအနေဖြင့် လေယာဉ်ဝန်ဆောင်မှုပေးနေချိန်တွင် ၎င်းတို့၏ အကြမ်းဖက်ပစ်ခတ် တိုက်ခိုက်မှုကြောင့် လေယာဉ်ပေါ်တွင် လိုက်ပါလာသော ခရီးသည်၏ မျက်နှာကိုထိမှန်ဒဏ်ရာ ရရှိစေခြင်းသည် အကြမ်းဖက်မှုတိုက်ဖျက်ရေး ဥပဒေ ပုဒ်မ ၉ နှင့် ပုဒ်မ ၄၉ ကို ကျူးလွန်ခြင်းသာမက ပုဒ်မ ၅၄ ကိုလည်း ကျူးလွန်ရာရောက်ကြောင်း၊ စစ်ရေးပစ်မှတ် မသက်ဆိုင်သည့် အရပ်ဘက်ပစ်မှတ်များနှင့် အရပ်သားပြည်သူများအား ထိုကဲ့သို့ အကြမ်းဖက်ပစ်ခတ်တိုက်ခိုင်ခြင်းသည် ဂျီနီဗာကွန်ဗင်းရှင်းများနှင့် အပြည်ပြည်ဆိုင်ရာ ဥပဒေတို့အရလည်း စစ်ရာဇဝတ်မှု (War Crime) ကို ကျူးလွန်ခြင်းဖြစ်ကြောင်း၊ ဂျီနီဗာကွန်ဗင်းရှင်း (၄) ရပ် (Four Geneva Convention) ကို အခြေခံသော လက်နက်ကိုင် ပဋိပက္ခဆိုင်ရာဥပဒေ (Law Of Aumed Conflict) သို့မဟုတ် အပြည်ပြည်ဆိုင်ရာ လူသားချင်းစာနာထောက်ထားမှုဆိုင်ရာဥပဒေ (International Humanitarian Law) တွင် မည်သည့်လက်နက်ကိုင်ပဋိပက္ခမျိုး (နိုင်ငံတကာလက်နက်ကိုင်ပဋိပက္ခ/ နိုင်ငံတကာအရေးအခင်းမဟုတ်သော လက်နက်ကိုင်ပဋိပက္ခ) တွင် အရပ်သားများနှင့် အရပ်ဘက် ပစ္စည်းများကို စစ်ရေးပစ်မှတ်အဖြစ် တိုက်ခိုက်ခြင်းမပြုရန် ပြဋ္ဌာန်းထားရှိကြောင်း သိရသည်။

အပြည်ပြည်ဆိုင်ရာ လူသားချင်းစာနာ ထောက်ထားမှု ဓလေ့ထုံးတမ်းဥပဒေ စည်းမျဉ်းများတွင်လည်း (နိုင်ငံတကာပဋိပက္ခ/ နိုင်ငံတကာမဟုတ်သော ပဋိပက္ခ) အရပ်သားများနှင့် တိုက်ပွဲဝင် စစ်သည်များအကြား ခွဲခြားခြင်းနှင့်ပတ်သက်၍ စည်းမျဉ်း ၁ အဖြစ် ပဋိပက္ခတွင် ပါဝင်သည့်အဖွဲ့များသည် အရပ်သားများနှင့် တိုက်ပွဲဝင်စစ်သည်များအကြား အမြဲတစေခွဲခြားရမည်။ တိုက်ပွဲဝင်စစ်သည်များကိုသာ ဦးတည်တိုက်ခိုက်ရမည်။ အရပ်သားများကို ဦးတည်တိုက်ခိုက်ခြင်း မပြုရဟူ၍လည်းကောင်း၊ စည်းမျဉ်း ၂ တွင် အရပ်သားလူထုအကြား အထိတ်တလန့်ဖြစ်စေရန် အဓိကရည်ရွယ်လုပ်ဆောင်သည့် အကြမ်းဖက်လုပ်ရပ်များနှင့် ခြိမ်းခြောက်မှုများအား တားမြစ်ကြောင်းဟူ၍လည်းကောင်း ဖော်ပြပါရှိသည်။ အရပ်ဘက်အဆောက်အအုံများနှင့် စစ်ရေးဆိုင်ရာရည်မှန်းချက်များအကြား ခွဲခြားခြင်းနှင့်ပတ်သက်၍ စည်းမျဉ်း ၇ အဖြစ် ပဋိပက္ခတွင်ပါဝင်သော အဖွဲ့များသည် အရပ်ဘက်အဆောက်အအုံများနှင့် စစ်ရေးဆိုင်ရာ ရည်မှန်းချက်များအကြား အမြဲတစေခွဲခြားရမည်၊ စစ်ရေးဆိုင်ရာရည်မှန်းချက် ကိုသာလျှင် ဦးတည်တိုက်ခိုက်ရမည်၊ အရပ်ဘက် အဆောက်အအုံများကို ဦးတည်တိုက်ခိုက်ခြင်း မပြုရဟု ဖော်ပြထားပြီး စည်းမျဉ်း ၁၁ တွင်လည်း တိကျသော စစ်ရေးဆိုင်ရာ ရည်မှန်းချက်ကို ဦးတည် တိုက်ခိုက်ခြင်းမရှိ ခွဲခြားခြင်းမရှိဘဲ သိမ်းကျုံးတိုက်ခိုက်ခြင်း (Indiscriminate attacks)အား တားမြစ်ထားကြောင်း ဖော်ပြပါရှိကြောင်း နစက သတင်းထုတ်ပြန်ချက်တွင် ရေးသားထားသည်။

#ymg/mt
#Yangon_Media_Group

#World_Health
Published 4 October 2022

လူအများစုဟာ အသက် ၅၀ မှစပြီး အမြင်အာရုံပြောင်းလဲလာကြပြီး မှုန်ဝါးခြင်း၊ ဝေဝါးခြင်းများ ဖြစ်လာကြပါပြီ။

ဒီပျက်စီးမှုက အသက် ၅၀ မှာတင်ရပ်တန့်သွားတာမဟုတ်ဘဲ အသက်ကြီးလာတာနဲ့အမျှ အမြင်အာရုံယိုယွင်းလာခြင်း(AMD)၊ အတွင်းတိမ်၊ ရေတိမ်များ ဖြစ်စေနိုင်ကာ မျက်စိကွယ်စေနိုင်တဲ့ ရောဂါများ ဖြစ်နိုင်ပါတယ်။

အသက် ၅၀ နဲ့အထက်လူကြီးတွေဟာ ၂ နှစ်တစ်ခါ မျက်စိအထူးကုနှင့်ပြသသင့်ပြီး အသက် ၆၅ နှစ်နဲ့အထက် လူကြီးတွေကတော့ တစ်နှစ်တစ်ကြိမ် ပြသသင့်ပါတယ်။

ဆေးလိပ်သောက်သူတွေနဲ့ မျိုးရိုးလိုက် မျက်လုံးပြဿနာရှိသူများကဲ့သို့ လူတွေလည်း ငယ်ရွယ်တဲ့အချိန်ကတည်းက စမ်းသပ်သင့်ပါတယ်။

စမ်းသပ်သင့်တဲ့အကြောင်းအရင်းတစ်ခုက AMD ကို ရှာဖွေမိရန်ဖြစ်ပြီး အစ္စရေးလ်ရှိ သက်ကြီးရွယ်အိုတွေကြား အဓိကအကြောင်းအရင်းဖြစ်ပါတယ်။

အသက် ၇၅ နှစ်အရွယ်လူကြီး ၃ ပုံ ၁ ပုံလောက်မှာ ဒီရောဂါလက္ခဏာတွေ တွေ့ရတတ်ပါတယ်။

ရောဂါအစပိုင်းမှာ မြင်လွှာအလယ်အောက်မှာ အမှုန်ငယ်များ စုပုံလာပါတယ်။

ပုံမှန်အခြေအနေမှာ အလွှာက စွန့်ပစ်အမှုန်တွေကို သန့်ရှင်းပေးရမှာဖြစ်ပေမယ့် အသက်အရွယ်ကြီးလာတဲ့အခါ အားနည်းလာပါတယ်။

မျိုးရိုးနောက်ခံကလည်း ထည်တွက်ရမယ့်အခြေအနေဖြစ်ပြီး ၂ ဆ မှ ၄ ဆအထိ ဖြစ်နိုင်ချေပိုများပါတယ်။

ယနေ့အထိ AMD အတွက် ကုသဆေးမရှိသေးဘဲ အစောပိုင်းအဆင့်မှာ သိရှိခဲ့ရင် အားဆေးများသောက်သုံးပြီး နောက်တစ်ဆင့်ဖြစ်နိုင်ချေနည်းပါးအောင် ကာကွယ်နိုင်ပါတယ်။

၅ နှစ်အတွင်း လေ့လာခဲ့ကြရာမှာ AMD အစပိုင်းအဆင့်ဖြစ်ပွားခဲ့သူတွေထဲက ၃၀ ရာခိုင်နှုန်းဟာ နောက်တစ်ဆင့်ပိုဆိုးလာခဲ့ပါတယ်။

ဒီရောဂါက လုံးဝအမြင်ကွယ်သွားတာမဟုတ်ပေမယ့် မျက်လုံးအစွန်အဖျားတွေကနေသာ မြင်နိုင်တာကြောင့် အမြင်အာရုံကို သိသိသာသာထိခိုက်စေပါတယ်။

အရင်က လေဆာကုသနည်း အသုံးပြုခဲ့ကြပေမယ့် မြင်လွှာဘေးကိုပါ ထိခိုက်စေပါတယ်။

လတ်တလောမှာတော့ ဆေးတွေကို မျက်လုံးအိမ်ထဲ ထိုးသွင်းခြင်းဖြင့် ယိုယွင်းလာမှုကို နှောင့်နှေးစေပါတယ်။

ဆေးထိုးလိုက်ခြင်းဖြင့် ပုံမှန်မဟုတ်တဲ့ သွေးကြောများ၊ အရည်များဖြစ်မလာစေတော့ဘဲ ယိုယွင်းမှုဖြစ်စဉ်ကို သက်သာစေပါတယ်။

Source: The Jerusalem Post
#Yangon_Media_Group

#Local_News
Published _4 October 2022

ကျောက်ဆည်ခရိုင် စဉ့်ကိုင်မြို့နယ် မီးသွေးဘုတ်ကျေးရွာရှိ မြန်မာ-မန္တလေး ဖူရှင်းသံမဏိစက်ရုံမှ ဆောက်လုပ်ရေးလုပ်ငန်းသုံး သံချောင်းများကို စက်စွမ်းအားပြည့်လည်ပတ်ပါက တစ်ရက်လျှင် တန်တစ်ထောင်ထိ ထုတ်လုပ်နိုင်မည်ဖြစ်ကြောင်း မန္တလေးတိုင်းဒေသကြီး အစိုးရအဖွဲ့က သိရသည်။

အဆိုပါ စက်ရုံမှ သံချောင်းအမျိုးအစားခြောက်မျိုး ထုတ်လုပ်လျက်ရှိပြီး လက်ရှိစမ်းသပ်ကာလအတွင်း တစ်ရက်လျှင် တန်ချိန် ၃၀၀ ထုတ်လုပ်ပေးနေခြင်း ဖြစ်သည်။

ဖူရှင်းသံမဏိစက်ရုံကို ၂၀၁၉ ခုနှစ် ဇွန်လ ၃၀ ရက်တွင် စတင်ခဲ့ပြီး စက်ရုံအကျယ်အဝန်း ၅၂ ဒသမ ၈၆ ဧက၊ ရင်းနှီးမြှုပ်နှံမှုပမာဏ အမေရိကန်ဒေါ်လာ ၂၇ ဒသမ ၄၀၈ သန်းရှိကြောင်း သိရသည်။

အောက်တိုဘာလ ၃ ရက်တွင် အဆိုပါ စက်ရုံသို့သွားရောက်ကြည့်ရှုခဲ့သည့် မန္တလေးတိုင်းဒေသကြီးဝန်ကြီးချုပ်က ပြည်ပမှ မှာယူတင်သွင်းသည့် သံအမျိုးအစား လျှော့ချနိုင်ရေး ပြည်တွင်း၌ သံမဏိ ထုတ်လုပ်ရန်စက်ရုံလုပ်ငန်းရှင်များအား တိုက်တွန်းခဲ့သေးသည်။

မန္တလေးတိုင်းဒေသကြီးအတွင်းတွင် သံမဏိစက်ရုံနှင့် သက်ဆိုင်သည့် သင်တန်းများအပါအဝင် အခြားအသက်မွေးဝမ်းကျောင်း သင်တန်းများကိုလည်း ဖွင့်လှစ်သင်ကြားပေးလျက်ရှိကြောင်းလည်း သိရသည်။

#ymg/mt
#Yangon_Media_Group

#Local_News
Published_ 3 October 2022

ရှမ်းပြည်နယ်(မြောက်ပိုင်း) ကျောက်မဲမြို့နယ်၌ ပြည်နှင်ဆောင်ရွက်မည့် တရုတ်နိုင်ငံသား ၇ ဦးအား လက်နက်ကိုင်သောင်းကျန်းသူအဖွဲ့(စိစစ်ဆဲ) က ဖမ်းဆီးခေါ်ဆောင်သွားခဲ့ကြောင်း နစကမှ သတင်းထုတ်ပြန်ထားပါတယ်။

အောက်တိုဘာလ ၂ ရက်နေ့ နံနက် ၄ နာရီခွဲအချိန်တွင် မန္တလေးတိုင်းဒေသကြီး၊ သပိတ်ကျင်းမြို့နယ်မှ လူဝင်မှုကြီးကြပ်ရေးဦးစီးမှူး ဦးထွန်းအောင်လှိုင်၊ လက်ထောက် လူဝင်မှုကြီးကြပ်ရေးမှူး ဦးနိုင်မိုးဇော်၊ စဉ့်ကူးမြို့နယ်မှ ဒုတိယလူဝင်မှုကြီးကြပ်ရေးမှူးများဖြစ်သည့် ဦးကျော်စိုးခိုင်နှင့် ဦးခိုင်ဇော်မျိုးတို့သည် တရုတ်နိုင်ငံသို့ ပြည်နှင်ဆောင်ရွက်မည့် တရုတ်နိုင်ငံသားများဖြစ်ကြသည့် Pan Han Bing (၂၅) နှစ် (ဘ) Pan Jin Lang ၊ Lin Zhen Fen (၂၅) နှစ် (ဘ)Lin Jin Wen ၊ Yang Jun Feng (၃၂)နှစ် (ဘ) Yang Gao Jun ၊ Liu Fei Feng (၂၅) နှစ် (ဘ) Liu Jin Xlang ၊ Sheng Bao (၂၄) နှစ် (ဘ) Chen Sul Chen ၊ Yan Bin (၂၂) နှစ် (ဘ) Yan Yuan Fheng ၊ Zhouli (၂၃)နှစ် (ဘ) Zho Welving တို့ ၇ ဦးအား မန္တလေးတိုင်းဒေသကြီး လူဝင်မှုကြီးကြပ်ရေးဦးစီးရုံးမှ လားရှိုးမြို့ရှိ ဒုတိယ ပြည်နယ်လူဝင်မှုကြီးကြပ်ရေးဦးစီးရုံးသို့ ပို့ဆောင်ရန် ယာဉ်မောင်း ဦးဝင်းရွှေ မောင်းနှင်သည့် “ချမ်းသာအောင်” ခရီးသည်တင်ယာဉ်လိုင်းမှ 6K/2052 SUPER CUSTOM ယာဉ်ဖြင့် ထွက်ခွာလာခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ထိုသို့ထွက်ခွာလာစဉ် နံနက် ၁၀ နာရီခန့်တွင် ရှမ်းပြည်နယ် (မြောက်ပိုင်း)၊ ကျောက်မဲမြို့နယ်၊ လွယ်ခေါ်ကျေးရွာအနီး ပြည်ထောင်စုလမ်းမကြီး မိုင်တိုင်အမှတ် ၁၁၄ မိုင် ၆ ဖာလုံအရောက်၌ လက်ပစ်ဗုံးကိုင်ဆောင်ထားသည့် လက်နက်ကိုင်သောင်းကျန်းသူ ၂ ဦး(စိစစ်ဆဲ)က လားရာတူ နောက်မှ ဆိုင်ကယ်တစ်စီးဖြင့် မောင်းနှင်ရောက်ရှိလာပြီး ၎င်းတို့စီးနင်းလာသည့် မော်တော်ယာဉ်အား ရပ်တန့်ခိုင်းခဲ့ကြောင်း၊ ထပ်မံ၍ လက်နက်ကိုင်သောင်းကျန်းသူ ၁ ဦး (စိစစ်ဆဲ) က ဆိုင်ကယ်တစ်စီးဖြင့် ရောက်ရှိလာကာ ၎င်းတို့အား မော်တော်ယာဉ်နှင့်အတူ တောအတွင်းသို့ မောင်းနှင်ဖမ်းဆီးခေါ်ဆောင်သွားခဲ့ပြီး တောလမ်းတစ်နေရာအရောက်တွင် ဦးထွန်းအောင်လှိုင်၊ ဦးနိုင်မိုးဇော်၊ ဦးကျော်စိုးခိုင်နှင့် ဦးခိုင်ဇော်မျိုးတို့ ၄ ဦးအား ပြန်လည်စေလွှတ်ပေးခဲ့သဖြင့် ဦးခိုင်ဇော်မျိုးနှင့် ဦးနိုင်မိုးဇော်တို့ ၂ ဦးမှာ နောင်ချိုမြို့နယ် လူဝင်မှု ကြီးကြပ်ရေးရုံးသို့လည်းကောင်း၊ ဦးထွန်းအောင်လှိုင်နှင့် ဦးကျော်စိုးခိုင်တို့ ၂ ဦး မှာ ကျောက်မဲမြို့နယ် လူဝင်မှုကြီးကြပ်ရေးရုံးသို့လည်းကောင်း ကားကြုံဖြင့် အသီးသီးပြန်လည်ရောက်ရှိခဲ့ကြတယ်လို့ ဖော်ပြထားပါတယ်။

အဆိုပါ ဖြစ်စဉ်တွင် ပြည်နှင်ဆောင်ရွက်မည့် တရုတ်နိုင်ငံသားများအား ဖမ်းဆီးခေါ်ဆောင်သွားခဲ့သည့် လက်နက်ကိုင်သောင်းကျန်းသူများအား ဖမ်းဆီးအရေးယူနိုင်ရေးနှင့် ဖမ်းဆီးခေါ်ဆောင်ခံရသူ တရုတ်နိုင်ငံသားများအား ရှာဖွေကယ်ဆယ်နိုင်ရေး နယ်မြေခံလုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိတယ်လို့ နစကရဲ့ ထုတ်ပြန်ချက်မှာ ဖော်ပြထားပါတယ်။

ygm_mnn
#Yangon_Media_Group

Published 3 Oct 2022

နိုင်ငံတော်မှာ ပြည်တွင်းလည်ပတ်သုံးစွဲငွေများ ရှိပြီးဖြစ်တဲ့အတွက် စီးပွားရေးလုပ်ငန်းတွေအတွက် လိုအပ်တဲ့ ချေးငွေတွေကို အတတ်နိုင်ဆုံးထုတ်ပေးသွားမယ်လို့ နစက ဥက္ကဋ္ဌက လုပ်ငန်းရှင်တွေကို ပြောကြားလိုက်ပါတယ်။

အောက်တိုဘာ ၃ရက်မနက်က နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် က ပြည်ထောင်စု     သမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI)နှင့် ရန်ကုန်တိုင်း ဒေသကြီးအတွင်းရှိ အသေး စား၊ အငယ်စားနှင့် အလတ်စား စီးပွားရေး (MSME) လုပ်ငန်းရှင် များအား ရန်ကုန်မြို့ရှိ ဇေယျာသီရိဗိမာန် ဧည့်ခန်းမဆောင်၌ တွေ့ဆုံ ၍ စီးပွားရေး လုပ်ငန်းများ ဖွံ့ဖြိုးတိုးတက်ရေးအတွက် ဆွေးနွေးပြောကြားရာမှာ ထည့်သွင်းပြောကြားခဲ့တာဖြစ်ပါတယ်။

• ကိုဗစ်ကာလ ချေးငွေများ နိုင်ငံတော်သို့ ပြန်လည် ပေးဆပ်ရန် အခက်အခဲများ ဖြစ်ပေါ်နေမှုအတွက် ကာလ တစ်ခု သတ်မှတ်ဆောင်ရွက်ပေးမည်ဖြစ်ပြီး ရင်းနှီးမြှုပ်နှံငွေများရရှိရေးအတွက်လည်း ဆောင်ရွက်ပေးသွားမည်ဖြစ်
• ရင်းနှီးမြှုပ်နှံနိုင်ရန် ငွေကြေးများ ထုတ်ချေးပေးထားခြင်းဖြစ်သဖြင့် အမှန်တကယ်အောင်မြင်အောင် ဆောင်ရွက် ကြစေလိုပြီး ပြန်လည်ပေးဆပ်ရမည့် ကာလအတွင်း ပြည့်မီအောင် ပြန်လည်ပေးသွင်းနိုင်ရေး ဆောင်ရွက်ကြရန်လို
• နိုင်ငံတော်သို့ ပေးသွင်းရမည့် အခွန်အခများကိုလည်း အပြည့်အဝ ပေးသွင်းရန်လိုကြောင်း၊
• လာမည့်ဘတ်ဂျက်ကာလများတွင် နိုင်ငံစီးပွား ဖွံ့ဖြိုးတိုးတက်ရေးရံပုံငွေ အတွက် ထည့်သွင်းလျာထား ဆောင်ရွက်သွားမည်ဖြစ်
• နိုင်ငံတော်မှရရှိရန် ကျန်ရှိသည့် ချေးငွေများ ပြန်လည်ရရှိမည်ဆိုပါက ချေးငွေများကို ပိုမိုပြည့်ဝစွာထပ်မံ ထုတ်ချေးပေးနိုင်မည်ဖြစ်
• နိုင်ငံတော်အနေဖြင့် ပြည်တွင်းလည်ပတ် သုံးစွဲငွေ များရှိပြီးဖြစ်ပြီး စီးပွားရေးလုပ်ငန်းများအတွက် လိုအပ်သည့် ချေးငွေများ ကိုလည်းအတတ်နိုင်ဆုံးထုတ်ပေးသွားမည်ဖြစ်ကြောင်း” ဖြင့်ဗိုလ်ချူပ်မှူးကြီးက ပြောကြားခဲ့တယ်လို့ နစကရဲ့ သတင်းထုတ်ပြန်ချက်မှာဖော်ပြထားပါတယ်။

ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်း ရှင်များ အသင်းချုပ် (UMFCCI) ဥက္ကဋ္ဌ ဦးဇော်မင်းဝင်း၊ မြန်မာနိုင်ငံ ဆန်စပါး လုပ်ငန်း ရှင်များအသင်း ဥက္ကဋ္ဌ ဦးရဲမင်းအောင်၊ မြန်မာနိုင်ငံ ဆီကုန်သည်နှင့် ဆီလုပ်ငန်းရှင် များအသင်း ဥက္ကဋ္ဌ ဦးဆန်းလင်း၊ အသေးစား၊ အငယ်စားနှင့် အလတ်စား စီးပွားရေး လုပ်ငန်းရှင်များကိုယ်စား ဒေါ်သီသီဝင်း၊ ဦးဝင်းမြင့်အောင်၊ ဒေါ်ယဉ်ယဉ်မိုး နှင့် တက်ရောက်လာကြသူတွေက

• ရန်ကုန်တိုင်းဒေသကြီးအတွင်း MSME လုပ်ငန်းများ ဆောင်ရွက်လျက်ရှိမှု၊
• Quick Win ဖြစ်စေမည့် စိုက်ပျိုးမွေးမြူရေးထုတ်ကုန်များ ထုတ်လုပ်သည့်လုပ်ငန်းများနှင့် အခြားဆက်စပ်လုပ်ငန်းများ ကို အောင်မြင်စွာဆောင် ရွက်နိုင်ရေးအတွက် အတိုးနှုန်းနည်းပါးသည့် ရင်းနှီးငွေများလိုအပ်မှု
• နည်းပညာများ ရရှိရေးနှင့် အခြားပံ့ပိုးပေးမှုများလိုအပ်မှု၊ ကုန်ကြမ်းပစ္စည်းများနှင့် စက်ပစ္စည်းများ တင်သွင်းခွင့်ရရှိရန်လိုအပ်မှု
• ပြည်တွင်းထုတ်ကုန်တိုးတက်ရေးအတွက် တရားမဝင် ကုန်စည်တင်သွင်းမှုများကို ထိရောက်စွာ အရေးယူဆောင်ရွက်ရန်လိုအပ်မှု
• ဆန်စပါးစိုက်ပျိုးထုတ်လုပ်မှုနှင့် ပတ်သက်၍ ယခုနှစ် မိုးဦး ကာလတွင် မိုးနည်းသည့်အတွက် ဆန်းစပါးအထွက်နှုန်း ကျဆင်းမှုရှိနိုင်သဖြင့် နွေ စပါး အထွက်နှုန်း တိုးတက်ရေး ဆောင်ရွက်ပေးရန်လိုအပ်မှု
• နိုင်ငံတော်မှ နွေစပါး စိုက်ပျိုးရေးအတွက် ရင်းနှီးမြှုပ်နှံငွေများ ထုတ်ပေးသည့်အတွက် နွေစပါးအထွက်နှုန်း တိုးတက်ရေးအတွက် အထောက်အကူဖြစ်မှု
• ဆန်၊ စပါး ပြည်ပ ပို့ကုန်မြှင့်တင်ရေးအတွက် နိုင်ငံတော်မှ ကူညီဆောင်ရွက်ပေးလျက်ရှိသည့်အတွက် ကုန်ထုတ်လုပ်မှု လုပ်ငန်း များ ပိုမိုတိုးတက်လာနိုင်မှု
• စိုက်ပျိုးရေးလုပ်ငန်းများအတွက် စိုက်ပျိုးရေး စရိတ် ချေးငွေများကို နိုင်ငံတော်အစိုးရသာမက ပုဂ္ဂလိက လုပ်ငန်းများမှလည်း ထုတ်ချေးပေးမည်ဆိုပါက ဆန်၊ စပါး ထုတ်လုပ်မှုများ ပိုမိုတိုးတက်လာမည့် အခြေ အနေများ
• ပြည်တွင်းကုန်ဈေးနှုန်း တည်ငြိမ်ရေးအတွက် ကုန်စည်ဒိုင်များ အဆင့်မြှင့် တင်ဆောင်ရွက်ရန် လိုအပ်မှု
• ဆီထုတ်လုပ်မှုနှင့် ပတ်သက်၍ ကျန်းမာရေးနှင့် ညီညွတ်သည့် စားသုံးဆီများ ပြည်တွင်း၌ ဖူလုံစွာ ရရှိရေး
• ကျန်းမာရေးနှင့်ညီညွတ်သည့် ဆီထွက် သီးနှံစိုက်ပျိုးထုတ်လုပ်မှုအတွက် တိကျသည့် မူဝါဒတစ်ခုကို သုသေသနပြု ချမှတ် ပေးရန်လိုအပ်မှု
• ပြည်တွင်း စားသုံးဆီထုတ်လုပ်မှု လျော့နည်းသည့် အတွက် လိုအပ်ချက်အရ စားသုံးဆီများ တင်သွင်းနေရမှုကြောင့် ဆီထွက်သီးနှံများ ပိုမိုစိုက်ပျိုးထုတ်လုပ်ရန် ဆောင်ရွက်လျက်ရှိမှု
• အသေးစား၊ အငယ်စားနှင့် အလတ်စား စီးပွားရေး လုပ်ငန်းများတွင် ဒေသထွက် ကုန်ကြမ်းပစ္စည်းများကို အသုံးပြု၍ စားသောက်ကုန်နှင့် လူသုံးကုန်ပစ္စည်းများ ထုတ်လုပ်လျက်ရှိမှုနှင့် အချို့သော အခက်အခဲများနှင့် ရင်ဆိုင်နေရလျက်ရှိမှု
• ကိုဗစ် ကာလအတွင်း ချေးငွေရယူထားသည့် MSME လုပ်ငန်းရှင်များအနေဖြင့် အခက်အခဲ များ ဖြစ်ပေါ်လျက်ရှိသဖြင့် နိုင်ငံတော်သို့ ပြန်လည်ပေးဆပ်ရမည်ကာလအား တိုးမြှင့် သတ် မှတ်ပေးစေလိုမှုနှင့် ရင်းနှီးမြှုပ်နှံငွေများ ဆက်လက်ဆောင်ရွက်ပေးစေလိုမှု
• ရန်ကုန်တိုင်းဒေသကြီးအတွင်း ဆောင်ရွက်လျက်ရှိသည့် MSME လုပ်ငန်းများမှ ထွက် ရှိသည့် ကုန်ပစ္စည်းများသည် အမှန်တကယ် ဈေးကွက်လိုအပ်ချက်ရှိသည်ဖြစ်သည့် အတွက် ဈေးကွက်မပြတ်လုပ်ငန်းလည်ပတ်နိုင်စေရေး ရင်းနှီးမြှုပ်နှံငွေများ ဆောင်ရွက်ပေး စေလိုမှု
• လုပ်ငန်းများအတွက် အဓိကလိုအပ်ချက်ဖြစ်သည့် လျှပ်စစ် စွမ်းအင် လိုအပ်ချက်ကို ဖြည့်ဆည်းဆောင်ရွက်ပေးစေလိုမှု
• စက်မှုလုပ်ငန်းများ တိုးချဲ့ ဆောင်ရွက်ရာတွင် မြေနေရာ လိုအပ်ချက်များ
• ကျွမ်းကျင်လုပ်သားများအတွက် Training Centerများ လိုအပ်လျက်ရှိမှု
• ခရီးသွားလုပ်ငန်းဖွံ့ဖြိုးတိုးတက်ရေး၊ ကုန်စည် စီးဆင်းမှုများ လွယ်ကူမြန်ဆန်စေရေးအတွက် လိုအပ်ချက်များနှင့် အောင်မြင်စွာ ဆောင်ရွက်နိုင်မည့် အခြေအနေများ
• တိုင်းရင်းဆေးဝါး ထုတ်လုပ်မှုနှင့် အထည်ချုပ် လုပ်ငန်း ဖွံ့ဖြိုးတိုးတက်ရေးအတွက် ဆောင်ရွက်နိုင်မည့် အခြေအနေများ
• မွေးမြူရေး ထုတ်ကုန်များထုတ်လုပ်လျက်ရှိမှုနှင့် မွေးမြူရေးအစာများပြည်တွင်း၌လုံလောက်စွာ ထုတ်လုပ်နိုင်ရန် လိုအပ်မှု
• ရာဘာထုတ်လုပ်မှုကဏ္ဍ တိုးတက်ရေးအတွက် ထိရောက် သည့် ပံ့ပိုးကူညီမှုများ ဆောင်ရွက်ပေးရန် လိုအပ်မှု
• စိုက်ပျိုးရေးလုပ်ငန်းအတွက် သွင်းအားစုများပြည့်ဝစွာရရှိရေး ဖြည့်ဆည်းပေးစေလိုမှု စတာတွေကို တင်ပြဆွေးနွေးခဲ့ကြတယ်လို့ သတင်းထုတ်ပြန်ချက်အရသိရပါတယ်။

လုပ်ငန်းရှင်တွေရဲ့တင်ပြချက်တွေအပေါ် ပြည်ထောင်စုဝန်ကြီးများဖြစ်ကြသည့် ဦးဝင်းရှိန်၊ ဒေါက်တာ ကံဇော်၊ ဦးတင်ထွဋ်ဦး၊ ဦးလှမိုး၊ ဒေါက်တာ ချာလီသန်း နှင့် ဦးအောင်နိုင်ဦး၊ ရန်ကုန်တိုင်းဒေသကြီးဝန်ကြီးချုပ်တို့က သက်ဆိုင်ရာ ကဏ္ဍများအလိုက်အသီးသီး ပြန်လည် ဆွေးနွေးပြောကြားခဲ့ကြပါတယ်။

ဗိုလ်ချူပ်မှူးကြီးက လုပ်ငန်းရှင်များ၏ တင်ပြချက်များနှင့် ပတ်သက်၍ ဖြည့်စွက်ပြောကြားရာတွင်.

• ဆီထွက်ကုန်များတွင်မြေပဲတစ်ခုသာ အထွက်နှုန်းကောင်းမွန်ပြီး ကျန်ဆီထွက်သီးနှံများ ပန်းတိုင်အထွက်နှုန်း မပြည့်မီသဖြင့်ပြည့်မီအောင်ဆောင်ရွက်မှ ပြည်တွင်းဆီထုတ်လုပ်မှုတိုးတက်မည်
• ဆီအုန်းစိုက်ပျိုးမှုကို ပြည့်ဝစွာ စိုက်ပျိုးမှု မရှိသည့်အတွက် ဆီထုတ်လုပ်မှု နည်းပါးနေခြင်းဖြစ်ကြောင်း၊ ပြည်တွင်း ဆီလိုအပ် ချက် ပြည့်မီဖူလုံစေရေးအတွက် လိုအပ်သည်များကို နိုင်ငံတော်မှ ဖြည့်ဆည်းပေးသွားမည်
• ဆီထွက်သီးနှံစိုက်ပျိုးသည့် လုပ်ငန်းရှင်များနှင့် ဆီ ထုတ်လုပ် သူများ အနေဖြင့်လည်း အမှန်တကယ် အလုပ်လုပ်ကြရန် လိုအပ်
• စားသုံးဆီကို ပြည်ပမှ တင်သွင်းနေရသူ (Importer) အဖြစ်မှ ပြည်တွင်း၌ ပိုလျှံသည်အထိ ထုတ်လုပ်၍ ပြည်ပသို့ ပြန်လည်တင်သွင်းသူ(Exporter) အဖြစ်ထိ ရောက်ရှိအောင် ကြိုးပမ်းဆောင်ရွက်သွားကြရမည်
• MSME လုပ်ငန်းများအတွက် လျှပ်စစ်ဓာတ်အား လုံလောက်စွာရရှိရေးအတွက် ပုဂ္ဂလိကအနေဖြင့်လည်း လျှပ်စစ် ဓာတ်အားရရှိအောင် ဆောင်ရွက်ကြရန်လို
• နေရောင်ခြည်စွမ်းအင်နှင့် လေအား တို့ကို အသုံးပြု၍ လျှပ်စစ်ဓာတ်အားများ ထုတ်လုပ်နိုင်ရန်လို
• လျှပ်စစ်ဓာတ်အားထုတ်လုပ်မှုအတွက်လိုအပ်သည့် ဒီဇယ်ဆီများကို ဈေးနှုန်းသက်သာစွာဖြင့် ဝယ်ယူနိုင်ရေး စီမံဆောင်ရွက်လျက်ရှိ
• MSME လုပ်ငန်းများအတွက် မြေနေရာလိုအပ်မှုကို နိုင်ငံ တော်မှ မြေနေရာများ ချမှတ်ဆောင်ရွက်ပေးလျက်ရှိ
• စိုက်ပျိုးမြေများပေါ်တွင် စက်မှုလုပ်ငန်းများ ဆောင်ရွက်မည်ဆိုပါက သီးနှံထွက်နှုန်းနည်းပါးသွားမည်ဖြစ်
• စိုက်ပျိုးမြေများပေါ်တွင် စက်မှုလုပ်ငန်းများ ဆောင်ရွက်မည်ဆိုပါက သီးနှံထွက်နှုန်းနည်းပါးသွားမည်ဖြစ်
• စားရေးအတွက် အဓိကလိုအပ်ချက်ဖြစ်သည့် မြေနေရာများကိုမူ ခွင့်ပြုပေး၍ ရနိုင်မည်မဟုတ်ဘဲ မြေလွတ်မြေရိုင်းများ ပေါ်တွင် စက်မှုလုပ်ငန်းဆောင်ရွက်နိုင်ရေး နိုင်ငံတော်မှ ခွင့်ပြုပေးနေ
• မွေးမြူရေးကုန်ကြမ်းများအားလုံး ပြည်တွင်း၌ လုံလောက် စွာ ရှိပြီးဖြစ်သော်လည်း အရည်အသွေးပြည့်မီရန်လိုနေ
• မွေးမြူရေးကို မိရိုးဖလာ မွေးမြူရေးထက် စနစ်ကျနသည့် မွေးမြူရေးဖြစ်ရန်လိုကြောင်
• စိုက်ပျိုးရေးလုပ်ငန်းများအတွက် သွင်းအားစုဖြစ်သည့် မျိုးကောင်းမျိုးသန့်များ ရရှိရေး ဆောင်ရွက်လျက်ရှိ
• ပြည်တွင်း၌ လိုအပ်လျက်ရှိသည့် ဓာတ်မြေဩဇာများ ရရှိရေး နိုင်ငံတော်မှ ကြိုးပမ်းဆောင်ရွက်လျက်ရှိ
• ရာဘာ အထွက် နှုန်းများ ကောင်းမွန်ရေးနှင့် အရည်အသွေးပြည့်မီသည့် ရာဘာကုန်ကြမ်းများ ရရှိ အောင် နည်းပညာများ အသုံးပြု၍ ဆောင်ရွက်ရန်လို
• ပြည်ပမှ ရာဘာ တရားမဝင် တင်သွင်းမှုများကို ထိရောက်စွာ ထိန်းချုပ်သွားမည်
• စက်မှုနှင့် စိုက်ပျိုးရေးသင်တန်းကျောင်းများကို အခြေခံပညာကျောင်းများတွင် တွဲဖက်၍ ဖွင့်လှစ်သင်ကြားပေးသွားမည်
• ဘဏ်စနစ် ပြိုလဲအောင် နည်းလမ်းမျိုးစုံဖြင့် ထိုးနှက်လုပ်ဆောင်ခဲ့သော် လည်း ပြိုလဲမှုမရှိစေရေး ဦးစားပေးအနေဖြင့် ဆောင်ရွက်ခဲ့
• ငွေကစားသူများရှိခြင်းကြောင့် ငွေကြေးတန်ဖိုးများကျဆင်းမှုများဖြစ်ပေါ်ခဲ့၍ ငွေကြေးကြီးကြပ်ရေးကော်မတီကိုဖွဲ့စည်း  ကာ ထိန်းသိမ်း ဆောင်ရွက်ခဲ့
• ရေအားလျှပ်စစ်ဓာတ်အားများ ထုတ်လုပ်နိုင်ရေး နိုင်ငံတော်အစိုးရ အနေဖြင့် ကြိုးပမ်းဆောင်ရွက်လျက်ရှိ
• နေရောင်ခြည်စွမ်းအင်သုံး လျှပ်စစ် ဓာတ်အားများ ထုတ်ယူနိုင်ရေးအတွက်လည်း တည်ဆောက်ရေးလုပ်ငန်းများဆောင် ရွက်လျက်ရှိ
• နျူကလီးယား စွမ်းအင်သုံး လျှပ်စစ်ဓာတ်အား ထုတ်လုပ် ရေးလုပ်ငန်းများ ဆောင်ရွက်နိုင်ရေးအတွက်လည်း ကြိုးပမ်းဆောင်ရွက်လျက်ရှိပြီး စိုက်ပျိုးရေး၊ကျန်းမာရေး၊ ပညာရေးလုပ်ငန်းများတွင်လည်း နျူကလီးယား စွမ်းအင် အသုံးပြုနိုင်ရေး ညှိနှိုင်း ဆောင်ရွက်လျက်ရှိ
• အခွန်ကောက်ခံမှုနှင့်ပတ်သက်၍ နိုင်ငံတကာနှင့် အာဆီယံထက် မိမိတို့နိုင်ငံသည် နှုန်းထားအသက်သာဆုံးဖြစ်
• နိုင်ငံတကာထက် အခွန်နှုန်း များ များပြားနေသည်များရှိပါက သတင်းပို့ဆောင်ရွက်ကြစေလို
• အခွန်တိမ်းရှောင်သူများ မရှိစေရန်လည်း ကြပ်မတ်ဆောင်ရွက်လျက်ရှိပြီး အခွန်များကို လည်း မှန်မှန်ကန်ကန် ပေး ဆောင်စေလိုကြောင်းများဆွေးနွေးပြောကြားခဲ့တယ်လို့ သတင်းထုတ်ပြန်ချက်အရသိရပါတယ်။

တွေ့ဆုံပွဲအပြီးမှာ နစက ဥက္ကဋ္ဌနှင့်အဖွဲ့ဝင်တွေဟာ တက်ရောက်လာခဲ့တဲ့ လုပ်ငန်းရှင်တွေနှင့် ရင်းရင်းနှီးနှီးနှုတ်ဆက်ပြီး ခင်းကျင်းပြသထားတဲ့ MSME တွေရဲ့လုပ်ငန်းနှင့်ထုတ်ကုန်ပြခန်းတွေကို ကြည့်ရှုခဲ့ကြတယ်လို့ နစကရဲ့ သတင်း ထုတ်ပြန်ချက်မှာဖော်ပြထားပါတယ်။

Source SAC’s Info

#SG_Min_Aung_Hlaing

#Yangon_region_MSME

#Myanmar_Economy

#Local_News
Published_ 3 October 2022

ဝါလကင်းလွတ်သီတင်းကျွတ်ချိန်နီးပြီဖြစ်တဲ့အတွက် မင်္ဂလာမောင်နှံတွေအနေနဲ့ မင်္ဂလာဆောင်ဝတ်စုံတွေ ချုပ်လုပ်တာ၊ ငှားရမ်းတာတွေဆောင်ရွက်နေကြတယ်လို့ သိရပါတယ်၊၊

#Yangon_Media_Group