#LocalNews
Published_2 October2022

မန္တလေးတိုင်းဒေသကြီး မြစ်သားမြို့နယ် သံရွာအနီးရှိ တောင်တော်ကွင်း ဧက ၂၀၀ အနက် ဧက ၈၀ ပေါ်တွင် Green Power Energy Co.,Ltd က အမေရိကန်ဒေါ်လာ ၁၇ ဒသမ ၄၃ သန်းခန့် ရင်းနှီးမြှုပ်နှံ၍ ၂၀၂၂ ခုနှစ် ဧပြီလမှစတင်ပြီး ဆောင်ရွက်ခဲ့သည့် တောင်တော်ကွင်း နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ စီမံကိန်း ၈၄ ရာခိုင်နှုန်း ပြီးစီးနေပြီဖြစ်ကြောင်း သိရသည်။

Green Power Energy Co.,Ltd အနေဖြင့် မန္တလေးတိုင်းဒေသကြီးအတွင်း ၃၀ မဂ္ဂါဝပ် ထုတ်လုပ်နိုင်သော သာစည်မြို့နယ် သပြေဝ နေရောင်ခြည်စွမ်းအင်သုံး လျှပ်စစ်ဓာတ်အားထုတ်လုပ်မှုစီမံကိန်းနှင့် ယခု ၂၀ မဂ္ဂါဝပ် ထုတ်လုပ်နိုင်မည့် တောင်တော်ကွင်း နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ်မှုစီမံကိန်းတို့အပြင် နောက်ထပ် တိုးချဲ့ဆောင်ရွက်ရန်လည်း ရှိနေကြောင်း လျှစ်စစ်စွမ်းအားဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

မန္တလေးတိုင်းဒေသကြီးအတွင်း စက်မှုလုပ်ငန်းများ ဖွံ့ဖြိုးတိုးတက်စေရန် မန္တလေးစက်မှုဇုန်မှ လုပ်ငန်းရှင်များအနေဖြင့် နေရောင်ခြည်စွမ်းအင်သုံး လျှပ်စစ်ဓာတ်အားထုတ်လုပ်မှု နည်းလမ်းများကိုသိရှိပြီး အသုံးပြုနိုင်ရန် အဆိုပါနေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ စီမံကိန်းများကို သွားရောက်လေ့လာမှုများ ပြုလုပ်နေကြောင်းလည်း သိရသည်။

ပြည်တွင်းဓာတ်အားလိုအပ်ချက်ကို ဖြည့်ဆည်းနိုင်ရန် ရေအားလျှပ်စစ်စီမံကိန်းများနှင့် နေရောင်ခြည်စွမ်းအင်သုံး ဓာတ်အားပေးစက်ရုံများကိုဆောင်ရွက်နေသည့်အပြင် နယ်စပ်ဖြတ်ကျော်ဓာတ်အားလိုင်းများနှင့် လျှပ်စစ်ဓာတ်အားဝယ်ယူနိုင်ရန် ဆောင်ရွက်လျက်ရှိကြောင်းလည်း လျှပ်စစ်စွမ်းအားဝန်ကြီးဌာနက ပြီးခဲ့သည့် သြဂုတ်လအတွင်းက ထုတ်ပြန်ခဲ့သေးသည်။

ymg/mt
#Yangon_Media_Group

Published 2 Oct 2022

ကျန်းမာရေးစောင့်ရှောက်မှုနှင့်ပတ်သက်ပါက တပ်မတော်အနေဖြင့် လက်လှမ်းမမီသည့်ဒေသ၊လက်လှမ်းမမီသည့် ကုသမှု အမျိုးအစား မရှိသလောက် ဆောင်ရွက်နိုင်ပြီလို့ ဗိုလ်ချူပ်မှူးကြီးမင်းအောင်လှိုင်က ပြောကြားလိုက်ပါတယ်။

(၇၅)နှစ်မြောက် စိန်ရတုဆေးတပ်ဖွဲ့နေ့ အခမ်းအနားကို အောက်တိုဘာ(၁)ရက်က ရန်ကုန်မြို့ရှိ တပ်မတော်သူနာပြုနှင့် ဆေးဘက်ပညာတက္ကသိုလ်၊ ဘွဲ့နှင်းသဘင်ခန်းမ၌ ကျင်းပပြုလုပ်ခဲ့ရာမှာ  နစကဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်အမှာစကားပြောကြားရာမှာ ထည့်သွင်းပြောကြားခဲ့တာဖြစ်ပါတယ်။

အဲသလို ဆောင်ရွက်နိုင်ခြင်းသည် ဆေးဝန်ထမ်းတပ်ဖွဲ့ဝင်များ၏ ကြိုးပမ်းအားထုတ်မှု၊ လက်ဆင့် ကမ်း ပညာအမွေများ ပေးခဲ့ကြသည့် ဆေးပညာရှင်ကြီးများ၏ ကျေးဇူးများကြောင့်ဖြစ်လို့ ဂုဏ်ယူဝမ်းမြောက် ကျေးဇူးတင်ရှိပါကြောင်း၊ ဆေးဝန်ထမ်း တပ်ဖွဲ့အနေဖြင့် ထိုကဲ့သို့ကျန်းမာရေး စောင့်ရှောက်မှုပေးနိုင်ရေးအတွက် လိုအပ်သည့် ဆရာဝန်၊ သူနာပြုများကို မွေးထုတ်နိုင်ရေးကိုလည်း လွတ်လပ်ရေး ရပြီးစကာလကပင်ကြိုးပမ်းခဲ့သည်ကိုတွေ့ရပါကြောင်း၊ အထင်ရှားဆုံးမှာ တပ်မတော် တစ်ရပ်လုံး၌ရှိသည့် ဆေးဝန်ထမ်း   တပ်ဖွဲ့ဝင် များ၏ လေ့ကျင့်သင်ကြားမှုများကို ဆောင်ရွက်နိုင်ရေးအတွက် ၁၉၅၂ ခုနှစ်တွင် ဆေးဘက်ဌာနချုပ်နှင့် လေ့ကျင့်ရေးတပ် ကို ဖွင့်လှစ်   ပေးနိုင်ခဲ့ပါကြောင်း၊ ထိုတပ်သည် နောင်အခါတွင် ဗဟိုဆေးတပ်အမည်ဖြင့် တပ်မတော် ဆေးဝန်ထမ်းတပ်ဖွဲ့ဝင် များ၏ လေ့ကျင့်ရေးကို နှစ်ပေါင်းများစွာ ဆောင်ရွက်ပေးခဲ့ပြီး ၂၀၁၅ ခုနှစ်၌ တပ်မတော် ဆေးဘက်ဆိုင်ရာပညာသင်ကျောင်းအနေဖြင့် ပြောင်းလဲ     ဖွဲ့စည်းပေးခဲ့ပြီး ဖြစ်ကြောင်း ဗိုလ်ချူပ်မှူးကြီးက ဆက်လက်ပြောဆိုခဲ့တယ်လို့ နစကရဲ့ သတင်းထုတ်ပြန်ချက်မှာ ဖော်ပြထားပါတယ်။

တပ်မတော်၏ စစ်ဆင်ရေးများဖြစ်သည့် အင်းစိန်တိုက်ပွဲ၊ တရုတ်ဖြူ ကျူးကျော်မှု မှစ၍ စစ်ဆင်ရေးများအထိ တိုက်ပွဲပေါင်း၊ စစ်ဆင်ရေးပေါင်းများစွာ၌လည်း ဆေးဝန်ထမ်း တပ်ဖွဲ့ဝင်များသည် စွမ်းစွမ်းတမံကျေပွန်စွာ တာဝန်ထမ်းဆောင်ခဲ့ကြရာမှာ  ဗိုလ်ကြီး သူရမွန်ထော်သက်ညွန့် ကဲ့သို့ တိုင်းပြည်အတွက် စွန့်လွှတ်စွန့်စား ဆောင်ရွက်ခဲ့ကြသည့် ထူးချွန်သူပေါင်းများ ကိုလည်း ဆေးတပ်ဖွဲ့သမိုင်းတစ်လျှောက်တွင် များစွာတွေ့မြင်ခဲ့ရတယ်လို့ ဗိုလ်ချူပ်မှူးကြီးက ပြောပါတယ်။

တပ်မတော်ဆေးရုံတွေကို အဆင့်မြှင့်တင်ခဲ့ရာတွင် ယခုအချိန်၌ ကျောက်ကပ် အစားထိုး ကုသနိုင်သော ဆေးရုံ ၄ ရုံ၊ အသည်းအစားထိုးကုသပေးနိုင်သော ဆေးရုံ ၁ ရုံ၊ နှလုံးသွေးကြော ရောဂါရှာဖွေခြင်းနှင့် သွေးကြောချဲ့ကုသနိုင်သော ဆေးရုံ ၄ ရုံ၊ နှလုံး ခွဲစိတ်ကုသနိုင်သော ဆေးရုံ ၂ ရုံနှင့် ဓာတ်ရောင်ခြည်ဖြင့် ကင်ဆာရောဂါကုသနိုင်သော ဆေးရုံ ၃ ရုံတို့ ရှိနေပြီလို့ သတင်းထုတ်ပြန်ချက်အရသိရပါတယ်။မကြာသေးမီကလည်းမြန်မာ့တပ်မတော်ဆေးဝန်ထမ်းတပ်ဖွဲ့၏ သမိုင်း မှတ်တိုင်တစ်ခုအနေဖြင့် ပထမဆုံးအကြိမ် အသည်းအစားထိုးကုသမှုကို အောင်မြင်စွာ ဆောင်ရွက်နိုင်ခဲ့ကြောင်းလည်းသိရှိရပါတယ်။

တပ်မတော် ဆေးရုံ/ ဆေးတပ် ၆၇ ခုနှင့် ကိုဗစ်ကုသမှု စင်တာ ၅၄ ခုတို့ကို ဖွင့်လှစ် ပြီး ပြည်သူလူထုကိုပါ ကုသမှုများပေးနိုင်ခဲ့ရာ  ၂၀၂၂ ခုနှစ်၊ စက်တင်ဘာလ ၁၅ ရက်နေ့အထိ ကိုဗစ် အတည်ပြုလူနာ သံဃာတော် ၁,၅၀၅ ဦး၊ သီလရှင် ၁၀၈ ဦး၊ အရပ်သား ၁၆,၀၅၄ ဦး နှင့် နိုင်ငံခြားသား ၁၃၅ ဦး၊ စုစုပေါင်း ၁၇,၈၀၂ ဦးကို ပြုစုစောင့်ရှောက်မှုပေခဲ့ကြောင်းလည်း သတင်းထုတ်ပြန်ချက်မှာ ဖော်ပြထားပါတယ်။ ကျန်းမာရေးဝန်ကြီးဌာနနှင့် အခြားဝန်ကြီးဌာနများ၏ လိုအပ်ချက်အရ ဆေးဝန်ထမ်း တပ်ဖွဲ့ဝင်များကို လွှဲပြောင်းတာဝန်ပေးနိုင်ခဲ့တယ် လို့လည်း သိရှိရပါတယ်။

(၇၅)နှစ်မြောက် စိန်ရတုဆေး တပ်ဖွဲ့နေ့အထိမ်းအမှတ်အဖြစ် အမှတ်(၁)တပ်မတော်ဆေးရုံကြီး(ခုတင်-၁၀၀၀)၊ အဆင့်မြင့် (၈)ထပ် ဆေးရုံအဆောက်အဦသစ်၊ အထူးကုသမှုစင်တာကိုလည်း ယမန်နေ့က ဖွင့်လှစ်ပေးခဲ့ကြောင်း သတင်းထုတ်ပြန်ချက်မှာ ဖော်ပြ ထားပါတယ်။

Source SAC’s info

#SG_Min_Aung_Hlaing

#Myanmar

#Myanmar_Military

#Local_News
Published_ 2 October 2022

ရန်ကုန်တိုင်းဒေသကြီးနှင့် ကရင်ပြည်နယ်တို့တွင် ငွေကျပ်သိန်း ၆၅၀၀ ကျော် တန်ဖိုးရှိ စိတ်ကြွရူးသွပ်ဆေးပြား ၄ ဒသမ ၃ သိန်းကျော် ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သောပူးပေါင်းအဖွဲ့သည် စက်တင်ဘာ ၂၈ ရက် ည ၉ နာရီခွဲအချိန် ရန်ကုန်တိုင်းဒေသကြီး၊ မရမ်းကုန်းမြို့နယ်၊ (၂) ရပ်ကွက်၊ ဦးရေခဲလမ်းပေါ်တွင် မောင်မောင်ရွှေ (ခ)မောင်ရွှေ မောင်းနှင်လာသော TOYOTA Hilux Surf မော်တော်ယာဉ်ကို သတင်းအရရှာဖွေခဲ့ကြပါတယ်။

ထိုသို့ရှာဖွေရာ ယာဉ်ပေါ်မှ စိတ်ကြွရူးသွပ်ဆေးပြား ၇၀၀၀၀ ပြား သိမ်းဆည်းရမိခဲ့ ပြီး ၎င်းငှားရမ်းအသုံးပြုသည့် မရမ်းကုန်းမြို့နယ်၊ (၁) ရပ်ကွက်၊ (၈) လမ်းနှင့် မရမ်းကုန်း မြို့နယ်၊ (၂) ရပ်ကွက်၊ အောင်မေတ္တာလမ်းရှိ တိုက်ခန်း ၂ ခန်းအတွင်းမှ စိတ်ကြွရူးသွပ် ဆေးပြား ၁ ဒသမ ၄ သိန်းနှင့် မြန်မာငွေကျပ် သိန်း ၂၀ ထပ်မံတွေ့ရှိသဖြင့် စုစုပေါင်း ဒေသကာလတန်ဖိုးငွေကျပ် သိန်း ၂၁၀၀ တန်ဖိုးရှိ စိတ်ကြွရူးသွပ်ဆေးပြား ၂ ဒသမ ၁ သိန်း သိမ်းဆည်းရမိခဲ့ပါတယ်။

အလားတူ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် စက်တင်ဘာလ ၂၉ ရက်နေ့ မွန်းလွဲ ၁၂ နာရီခွဲအချိန် မြဝတီမြို့၊ အမှတ် (၄) ရပ်ကွက်၊ အနန္တသုခလမ်းမပေါ်တွင် အောင်ကျော်ဇင်သက် မောင်းနှင်လာသည့် မော်တော်ဆိုင်ကယ်အား သတင်းအရရှာဖွေခဲ့ပါတယ်။

ထိုသို့ရှာဖွေရာ စိတ်ကြွရူးသွပ်ဆေးပြား ၅၈၅၀ ပြားနှင့် ပွိုင့် ၃၂ ပစ္စတိုသေနတ် ၁ လက် သိမ်းဆည်းရမိခဲ့ပြီး ၎င်းနေထိုင်သည့် မြဝတီမြို့၊ အမှတ်(၄)ရပ်ကွက်၊ အောင်ဒီပါလမ်းရှိ နေအိမ်မှ စိတ်ကြွရူးသွပ်ဆေးပြား ၂ ဒသမ ၁၄၅ သိန်းနှင့် TOYOTA LANDCRUISER PRADO မော်တော်ယာဉ် ၁ စီး ထပ်မံတွေ့ရှိသဖြင့် စုစုပေါင်းတန်ဖိုးငွေ ကျပ်သိန်း ၄၄၀၀ ကျော်တန်ဖိုးရှိ စိတ်ကြွရူးသွပ်ဆေးပြား ၂ ဒသမ ၂ သိန်းကျော် သိမ်းဆည်းရမိခဲ့သဖြင့် ၎င်းတို့အား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန် သူများအား ဆက်လက်စစ်ဆေးဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

ygm_mnn
#Yangon_Media_Group

#World_Health
Published 2 October 2022

အထီးကျန်ဆန်သူများက ဆီးချိုဒုတိယအမျိုးအစား ဖြစ်နိုင်ချေများကြောင်း စက်တင်ဘာ ၂၈ ရက်နေ့က ဖော်ပြလိုက်ပါတယ်။

ဆီးချိုဖြစ်ပွားသူများပြားလျက်ရှိပြီး ကမ္ဘာပေါ်မှာ သေဆုံးမှုအများဆုံးအကြောင်းအရင်းတွေထဲက တစ်ခုဖြစ်ပါတယ်။

နော်ဝေတက္ကသိုလ်တစ်ခုမှ လေ့လာရာမှာ ဆီးချိုရောဂါနဲ့ အထီးကျန်မှုတို့ကြားဆက်စပ်မှုကို လေ့လာခဲ့ကြပြီး စိတ်ဓာတ်ကျခြင်းနဲ့ အိပ်မပျော်ခြင်းတို့ပါ ထည့်တွက်ခဲ့ကြပါတယ်။

ဆီးချိုရောဂါဖြစ်လာနိုင်ချေနဲ့ စိတ်ပိုင်းဆိုင်ရာဖိစီးမှုတို့ကြား ဆက်စပ်ခဲ့ကြရာ အထီးကျန်ဆန်မှုက စိတ်ဖိစီးမှုဖြစ်လာအောင် လှုံ့ဆော်ပေးပါတယ်။

ဦးနှောက်ကနေ စားသောက်မှုပုံစံနဲ့ စားသောက်ချင်စိတ်ကို ထိန်းညှိပေးပါတယ်။

အဲဒီကနေ ပိုမိုစားသောက်ဖြစ်လာပြီးတော့ သွေးတွင်းသကြားဓာတ်မြင့်တက်လာပါတယ်။

အထီးကျန်တဲ့အခါ ကျန်းမာရေးနဲ့မညီညွတ်တဲ့ အစားအစာတွေ ပိုစားချင်လာတတ်ပါတယ်။

မကျန်းမာတဲ့အစားအစာတွေ စားမိတာကြောင့် အထီးကျန်ဆန်မှုနဲ့ ဆီးချိုဖြစ်လာနိုင်ချေတို့ကြား တိုက်ရိုက်ပတ်သက်နေနိုင်ပါတယ်။

လေ့လာမှုပြုလုပ်လိုက်တဲ့အခါ အထီးကျန်မှုများများခံစားရသူတွေက ဆီးချိုရောဂါဖြစ်နိုင်ချေများနေတာကို သိသိသာသာတွေ့ရှိရပါတယ်။

အထီးကျန်အဆန်ဆုံးသောလူတွေက အထီးမကျန်တဲ့သူတွေထက် ဆီးချိုဖြစ်နိုင်ချေ ၂ ဆများကြောင်း တွေ့ရှိခဲ့ကြပါတယ်။

အကြောင်းအရင်းအတိအကျကိုတော့ မသိရှိရသေးဘဲ နောက်ထပ်လေ့လာမှုများပြုလုပ်ဖို့ အကြံပြုထားပါတယ်။

အစားအသောက်ပုံစံ၊ အဝလွန်ခြင်း၊ ရုပ်ပိုင်းဆိုင်ရာလှုပ်ရှားမှုများ စတဲ့အချက်အလက်တွေကိုလည်း စုံစမ်းသင့်ပါတယ်။

ဒီပုံစံတွေက ဆီးချိုဖြစ်လာစေတဲ့ အဓိကအကြောင်းအရင်းများဖြစ်ပြီး အထီးကျန်ခြင်းနဲ့ ပတ်သက်နေပါတယ်။

ဒီကြားထဲက အကြောင်းအရင်းကို သိချင်ရင်တော့ အထီးကျန်ခြင်းနဲ့ ဆီးချိုရောဂါတို့ကြား တိုက်ရိုက်ပတ်သက်မှုကို ပိုမိုလေ့လာရန်လိုအပ်ပါတယ်။

ဆီးချိုရောဂါနဲ့ပတ်သက်တဲ့ အကြံပေးချက်တွေမှာ အထီးကျန်မှုကိုလည်း ထည့်သွင်းစဉ်းစားသင့်ပါတယ်။

Source: The Jerusalem Post
#Yangon_Media_Group

#LocalNews
Published_2 October2022

နှစ်လယ်မြန်မာ့ကျောက်မျက်ရတနာပြပွဲအတွင်း ပုလဲ၊ ကျောက်မျက်နှင့် ကျောက်စိမ်းအတွဲများ ရောင်းချသွားမည်ဖြစ်ကြောင်း သယံဇာတနှင့် သဘာဝပတ်ဝန်ကျင်ထိန်းသိမ်းရေးဝန်ကြီးဌာန မြန်မာ့ကျောက်မျက်ရတနာပြပွဲဗဟိုကော်မတီက သိရသည်။

သယံဇာတနှင့် သဘာဝပတ်ဝန်ကျင်ထိန်းသိမ်းရေးဝန်ကြီးဌာန၏ ကြီးကြပ်မှုဖြင့် မြန်မာ့ကျောက်မျက်ရတနာပြပွဲဗဟိုကော်မတီက ပြုလုပ်မည့် ၂၀၂၂ ခုနှစ်၊ နှစ်လယ်မြန်မာ့ကျောက်မျက်ရတနာပြပွဲကို အောက်တိုဘာလ (၁၉) ရက်မှ (၂၅)ရက်အထိ နေပြည်တော်၊ မဏိရတနာကျောက်စိမ်းခန်းမတွင် ကျင်းပပြုလုပ်မည်ဖြစ်ကြောင်း သိရသည်။

အဆိုပါ ရတနာပြပွဲသို့ မြန်မာ့ကျောက်မျက်ရတနာဥပဒေနှင့်အညီ ခွင့်ပြုမိန့်ရယူ၍ ကျောက်မျက်ရတနာများ တူးဖော်ထုတ်လုပ်ခြင်းလုပ်ငန်းဆောင်ရွက်လျက်ရှိသည့် နိုင်ငံသားကျောက်မျက်ရတနာလုပ်ငန်းရှင်များ၊ လိုင်စင်ရယူ၍ ကျောက်မျက်ရတနာရောင်းဝယ်ခြင်းလုပ်ငန်းများ ဆောင်ရွက်လျက်ရှိသည့် နိုင်ငံသားကျောက်မျက်ရတနာလုပ်ငန်းရှင်များအား သတ်မှတ်ချက်များနှင့်အညီ တက်ရောက်ဝယ်ယူခွင့်ပြုမည်ဖြစ်ကြောင်း ကော်မတီက ထုတ်ပြန်ထားသည်။

မြန်မာနိုင်ငံတွင် ကျောက်မျက်ရတနာများ ရောင်းချခြင်းကို ၁၉၆၄ ခုနှစ်က စတင်ခဲ့ခြင်းဖြစ်ပြီး ပထမဆုံးအကြိမ် မြန်မာ့ကျောက်မျက်ရတနာပြပွဲကို တော်လှန်ရေးကောင်စီ အစိုးရလက်ထက် ၁၉၆၄ ခုနှစ်တွင် ရန်ကုန်မြို့ အင်ယားလိတ်ဟိုတယ်၌ စတင်ကျင်းပခဲ့ခြင်း ဖြစ်သည်။

ပထမဆုံးအကြိမ်မှစ၍ ၁၉၉၃ ခုနှစ် ဖေဖော်ဝါရီလ အကြိမ် (၃၀) မြောက်ပြပွဲအထိ ပြပွဲပေါင်း ၃၁ ပွဲကို ရန်ကုန်မြို့ အင်းယားလိတ်ဟိုတယ်၌ပင် ကျင်းပခဲ့ပြီးနောက် ၁၉၉၃ ခုနှစ် နှစ်လယ်ပြပွဲမှ ၂၀၀၆ ခုနှစ် မတ်လ (၄၃) ကြိမ်မြောက်ပြပွဲအထိ ပြပွဲပေါင်း ၃၅ ပွဲကို ရန်ကုန်မြို့ ကမ္ဘာအေးဘုရားလမ်းရှိ မြန်မာ့ကျောက်မျက် ရတနာပြပွဲခန်းမ၌ ကျင်းပခဲ့ပြီး ၂၀၀၆ ခုနှစ် ဇွန်၊ ဇူလိုင် အထူးပြပွဲမှ ၂၀၁၀ ပြည့်နှစ် ဇွန်၊ ဇူလိုင်အထူးပြပွဲအထိ ပြပွဲပေါင်း ၁၃ ပွဲကို ရန်ကုန်မြို့ မင်းဓမ္မလမ်းရှိ မြန်မာကွန်ဗင်းရှင်းစင်တာ၌ ကျင်းပခဲ့ခြင်း ဖြစ်သည်။

ယင်းနောက် ၂၀၁၀ ပြည့်နှစ် နိုဝင်ဘာလ နှစ်လယ်ပြပွဲမှစတင်၍ ၂၀၂၁ ခုနှစ် ပုလဲအတွဲများနှင့် ကျောက်စိမ်းအတွဲများ ပြပွဲအထိ ပြပွဲ ၁၇ ပွဲကို နေပြည်တော်ရှိ မဏိရတနာကျောက်စိမ်းခန်းမ၌ ပြုလုပ်နိုင်ခဲ့ကြောင်း ၊ ယခု(၅၇) ကြိမ်မြောက် မြန်မာ့ကျောက်မျက်ရတနာပြပွဲကို ၂၀၂၂ ခုနှစ် ဧပြီလ ၂၂ ရက်မှ ၂၈ ရက်အထိ နေပြည်တော်မဏိရတနာကျောက်စိမ်းခန်းမ၌ ကျင်းပခဲ့ရာ ပုလဲအတွဲများ၊ ကျောက်မျက်အတွဲများနှင့် ကျောက်စိမ်းအတွဲများကို ပြည်တွင်းပြည်ပရတနာကုန်သည်များသို့ အိတ်ဖွင့်တင်ဒါစနစ် အသုံးပြု၍ နိုင်ငံခြားငွေဖြင့် ရောင်းချပေးခဲ့ကြောင်း သိရသည်။

ymg/mt
#Yangon_Media_Group

#World_Wildlife
Published 2 Oct 2022

ကမ္ဘာပေါ်ရှိ ငှက်မျိုးစိတ်အားလုံးရဲ့ တဝက်နီးပါးခန့်ဟာ အကောင်ရေကျဆင်းလျက်ရှိပြီး မျိုးစိတ် ၈ မျိုးမှာ ၁ မျိုးလောက်က မျိုးသုဉ်းပျောက်ကွယ်မယ့်အန္တရာယ်ရင်ဆိုင်နေရကြောင်း သတင်းဖော်ပြထားပါတယ်။

ထိန်းသိမ်းစောင့်ရှောက်ရေးအဖွဲ့ BirdLife ရဲ့တင်ပြချက်ထဲမှာ သုတေသီများ၊ ထိန်းသိမ်းစောင့်ရှောက်သူများ၊ ဒေသခံသိပ္ပံပညာရှင်များထံမှ အချက်အလက်များစုဆောင်းခဲ့ကြရာ သဘာဝတရားကြီးအတွက် အစိုးရိမ်ရဆုံးအခြေအနေကို မြင်တွေ့ခဲ့ကြပါတယ်။

ကမ္ဘာပေါ်ရှိ ငှက်မျိုးစိတ်တွေရဲ့ ၄၉ ရာခိုင်နှုန်းက အခုဆိုရင် အကောင်ရေကျဆင်းလာပြီး ၂၀၁၈ နောက်ဆုံးတင်ပြချက်ပြီးကတည်းက ၆ ရာခိုင်နှုန်းသောမျိုးစိတ်တွေကသာ အကောင်ရေတိုးပွားခဲ့ပါတယ်။

ငှက်မျိုးစိတ် ၈ မျိုးမှာ ၁ မျိုးနှုန်း ဒါမှမဟုတ် မျိုးစိတ် ၁,၄၀၉ မျိုးက မျိုးသုဉ်းအန္တရာယ်ကြုံတွေ့နေရကာ ၁၉၇၀ နောက်ပိုင်း မြောက်အမေရိကတစ်တိုက်တည်းမှာပင် ငှက်ပေါင်း ၃ ဘီလီယံနီးပါး ပျောက်ကွယ်ခဲ့ပါတယ်။

"ပြီးခဲ့တဲ့ နှစ်ပေါင်း ၅၀၀ အတွင်း ငှက်မျိုးစိတ် ၁၆၀ ပျောက်ကွယ်ခဲ့ပြီး မျိုးသုဉ်းနှုန်းက မြင့်လာပါတယ်" လို့ BirdLife မှ သိပ္ပံနည်းဆိုင်ရာအရာရှိ'လူစီဟတ်စ်ကဲလ်'က ဆိုပါတယ်။

သမိုင်းအရ မျိုးသုဉ်းမှုအများစုက ကျွန်းတွေမှာဖြစ်ပေမယ့် တိုက်ကြီးတွေမှာပါ နေထိုင်ကျက်စားရာနေရာများ ပျောက်ကွယ်ခြင်းကြောင့် မျိုးသုဉ်းမှုအရှိန် မြင့်တက်လာပါတယ်။

ငှက်အများစုရင်ဆိုင်နေရတဲ့ပြဿနာက လူတွေကြောင့် ဖြစ်ပါတယ်။

အဓိကပြဿနာတွေက စိုက်ပျိုးရေး၊ သစ်ခုတ်လုပ်ငန်း၊ ကျူးကျော်မျိုးစိတ်များ၊ နယ်ချဲ့ရှာဖွေမှုများနဲ့ ရာသီဥတုဖောက်ပြန်ခြင်းတို့ကြောင့် ဖြစ်ပါတယ်။

စိုက်ပျိုးရေးကဏ္ဍတွေမှာ ဓာတုပစ္စည်းတွေ၊ စက်တွေအသုံးပြုလာခြင်းက ငှက်တွေနေထိုင်ကျက်စားရာနေရာများကိုပါ ချဲ့ထွင်လာခဲ့ပါတယ်။

သစ်ခုတ်လုပ်ငန်းများကြောင့် နှစ်စဉ် သစ်တော်နယ်မြေ ဟက်တာ ၇ သန်းခန့်ဆုံးရှုံးနေရပြီး ဒါဟာ အိုင်ယာလန်နိုင်ငံအကျယ်အဝန်းမျှ ရှိနေပါတယ်။

ရာသီဥတုဖောက်ပြန်ကာ မုန်တိုင်းများ၊ တောမီးများ၊ မိုးခေါင်ရေရှားခြင်းများက ငှက်တွေနေထိုင်ရာများအထိ သက်ရောက်နေပါတယ်။

၂၁၀၀ ခုနှစ်အရောက် အပူချိန် ၃ ဒီဂရီဆဲလ်စီးယပ်စ်ပိုမြင့်လာတဲ့အချိန်မှာ ရာသီဥတုနဲ့ပတ်သက်တဲ့ အန္တရာယ် ၂ ခု ၃ ခုကြောင့် အမေရိကန်ရှိငှက်များအားလုံးရဲ့ ၉၇ ရာခိုင်နှုန်းကို သက်ရောက်နိုင်တယ်လို့ ခန့်မှန်းထားပါတယ်။

"လူသားတွေရဲ့လုပ်ရပ်က ဂေဟစနစ်လုပ်ဆောင်ချက်များကို ယိုယွင်းစေကာ သတ္တဝါမျိုးစိတ်များ လျင်မြန်စွာမျိုးသုဉ်းလာစေပါတယ်လို့ တင်ပြထားပါတယ်။

သဘာဝပတ်ဝန်းကျင်ရဲ့ အခြေအနေကို ငှက်များကနေ သိရှိနိုင်ကြောင်း BirdLife မှ အမှုဆောင်အရာရှိချုပ်'ပက်ထရစ်ရှာဇူရီတာ'က ပြောပြသွားပါတယ်။

ကိုဗစ်ကပ်ရောဂါနဲ့ နေထိုင်မှုကြပ်တည်းလာတဲ့ အခြေအနေများကြောင့် သဘာဝပတ်ဝန်းကျင်ထိန်းသိမ်းရေးဘက်ကို အာရုံမရောက်တော့ပါဘူး။

ထိန်းသိမ်းစောင့်ရှောက်ရေး ကြိုးပမ်းအားထုတ်မှုများက အရာရောက်ခဲ့ပြီး BirdLife ရဲ့ ပူးပေါင်းဆောင်ရွက်မှုများကြောင့် ငှက်မျိုးစိတ် ၇၂၆ မျိုးအတွက် အကျိုးဖြစ်ထွန်းခဲ့ပါတယ်။

Source: Daily Mail
#Yangon_Media_Group

Published 2 Oct 2022

အင်ဒိုနီးရှားနိုင်ငံ အရှေ့ဂျာဗားပြည်နယ်ရှိ ဘောလုံးပွဲတစ်ပွဲတွင် ရုန်းရင်းဆန်ခတ်မှုဖြစ်ပွားခဲ့ပြီး လူအုပ်လိုက်ပြုံတိုးသဖြင့် အနည်းဆုံးလူ ၁၂၀ကျော် သေဆုံးခဲ့ရပြီးနောက်  ဘောလုံးပြိုင်ပွဲများရဲ့ အန္တရာယ်ကင်းရှင်းရေးကို အာဏာပိုင်တွေက ပြန်လည် ချင့်တွက်သွားမယ်လို့ အင်ဒိုနီးရှား  အားကစားဝန်ကြီး ဇိန်နူဒင် အာမာလီက ပြောကြားလိုက်ပါတယ်။

တနင်္ဂနွေမနက်ရရှိတဲ့နောက်ဆုံးသတင်းတွေအရ သေဆုံးသူအရေအတွက်ဟာ ၁၂၉ အထိရှိသွားပြီလို့ ရဲတပ်ဖွဲ့ပြောရေးဆိုခွင့်ရသူက ပြောပါတယ်။

အရှေ့ဂျာဗားပြည်နယ်ရဲချုပ် နီကို အဖင်တာက ကနဦးမှာ ၁၂၇ ဦးသေဆုံးပြီး ၁၈၀ ဦးဒဏ်ရာရတယ်လို့ ပြောခဲ့ပါတယ်။

ရှုံးသွားတဲ့အသင်းဖက်က အားပေးသူတွေဟာ ဘောလုံးကွင်းထဲကျူးကျော်ဝင်ရောက်ခဲ့ပြီးနောက် ရဲတွေက မျက်ရည်ယိုဓာတ်ငွေ့တွေနှင့် ပစ်ခတ်ခဲ့ရာမှာ လူတွေ အစုလိုက်အပြုံလိုက်ကြောက်ရွံ့ပြေးလွှားခဲ့ကြပါတယ်။ အဲဒီနောက် မွန်းကြပ်ပြီး သေဆုံးခဲ့ကြတယ်လို့ ရဲချုပ်ကဆက်ပြောပါတယ်။

ကနဦးသေဆုံးသူ ၁၂၇ ဦးထဲမှာ နှစ်ဦးဟာ ရဲအရာရှိတွေဖြစ်တယ်လို့လည်း သူကဖြည့်စွက်ပြောပါတယ်။

“ ဘောလုံးကွင်းထဲမှာ ၃၄ ဦးသေဆုံးပြီး ကျန်သူတွေကတော့‌ ဆေးရုံ မှာသေဆုံးကြတာပါ” လို့သူကပြောပါတယ်။

စနေနေ့က မာလန်ရီဂန်ဆီမှာရှိတဲ့ ကာနီဓျူရူဟန်ကစားကွင်းမှာကျင်းပတဲ့ အာရီမာအက်ဖ်ဆီအသင်းနှင့် ပါဆီဘာရာ ဆူရာဘာရာအသင်းတို့ရဲ့ ဘောလုံးပြိုင်ပွဲမှာ ရုန်းရင်းဆန်ခတ်ဖြစ်မှုအပြီး အင်ဒိုနီးရှားရဲ့ထပ်တန်း လိဒ်ဘောလုံးပွဲ BRI Liga 1 ကို တစ်ပတ်ကြာရပ်နားလိုက်ပါတယ်။

သေဆုံးထိခိုက်ဒဏ်ရာရမှုတွေနှင့် ဘောလုံးကွင်ပတ်ပတ်လည် ပျက်စီးဆုံးရှုံးမှုတွေရှိခဲ့တယ်လို့ လိဒ်ရဲ့ သတင်းထုတ်ပြန် ချက်မှာ ဖော်ပြထားပါတယ်။

ဘောလုံးပွဲအပြီးမှာ ဘယ်လိုဖြစ်ခဲ့တယ်ဆိုတာကို စုံစမ်းစစ်ဆေးမှုတွေစတင်မယ်လို့ အင်ဒိုနီးရှားဘောလုံးအဖွဲ့ချုပ်က ပြောပါတယ်။  ဘောလုံးအဖွဲ့ချုပ်နှင့် BRI Liga 1 နှစ်ဖွဲ့လုံးက သေဆုံးသူအရေအတွက်ကို အတည်ပြုပြောကြားခြင်းမရှိပါဘူး။

ပွဲမှာ ပါဆီဘာရာက သုံးဂိုးနှစ်ဂိုးနှင့်အနိုင်ရရှိခဲ့တာဖြစ်ပါတယ်။

ရုပ်သံကြည့်ရန်...https://t.me/yangonmediagroup/12492

Source Agencies

#Indonesia

#Football_Match_riot_ BRI-Liga-1

#Soccer_stampede

#LocalNews
Published_2 October 2022

စက်သုံးဆီတင်သွင်းသည့် ကုမ္ပဏီများကို အမေရိကန်ဒေါ်လာအပြင် ယွမ်ငွေဖြင့်ပါ ပေးချေခွင့်ပြုထားကြောင်း ဗဟိုဘဏ်မှ ထုတ်ပြန်ထားသည်။

အဆိုပါထုတ်ပြန်ချက်တွင် စက်သုံးဆီတင်သွင်းသည့်ကုမ္ပဏီများမှ Trade Financing ရယူထားသည့် နိုင်ငံခြားငွေအတွက် နိုင်ငံခြားသုံးငွေကြီးကြပ်မှုကော်မတီဆုံးဖြတ်ချက်အရ Swap Facility ပမာဏအချို့အားယွမ်ဖြင့် ပေးချေခွင့်ပြုခြင်းနှင့် နောင်စက်သုံးဆီဖိုးပေးချေမှုများအတွက် ယွမ်ဖြင့်ပေးချေခွင့်ပြုကြောင်း ပါရှိသည်။

ယင်းအပြင် အမေရိကန်ဒေါ်လာဖြင့် Swap ရယူထားသည့် ကိစ္စရပ်များအတွက် နိုင်ငံခြားသုံးငွေများရောင်းဝယ်ဖောက်ကားသည့် လုပ်ငန်းလိုင်စင်ရဘဏ်များအနေဖြင့် ကင်းလွတ်ခွင့်ပြုသည့် ကုမ္ပဏီအဖွဲ့အစည်း ၊ လူပုဂ္ဂိုလ်များမှ ပြည်ပမှနိုင်ငံခြားသုံးငွေဖြင့်ရရှိငွေ၊ Worker Remittance ဝင်ရောက်ငွေနှင့်ပို့ကုန်ရငွေ၏ ၃၅ ရာခိုင်နှုန်းတို့မှ ဝယ်ယူထားသည့်အမေရိကန်ဒေါ်လာများအား အလီလီရောင်းချခြင်းတို့ကိုဆောင်ရွက်ပေးပြီး Swap ပြန်လည်ပေးဆပ်စေရန်နှင့် ပေးဆပ်မှုပမာဏများအပေါ်မူတည်၍ Trade Financing ရယူရေးတို့ကို စီစဥ်ဆောင်ရွက်ပေးရန်လည်း ဖော်ပြပါရှိသည်။

#ymg/sth
#Yangon_Media_Group

#Local_News
Published_ 1 October 2022

အလုပ်ကြောင့် စိတ်ဖိစီးမှုများနေသူတွေ စိတ်ဓာတ်ကျနေသူတွေကိုမြန်မာနိုင်ငံစိတ်ပညာအသင်းအနေနဲ့ စိတ်ပိုင်းဆိုင်ရာ နှစ်သိမ့်ဆွေးနွေးပေးခြင်းတွေ ဆောင်ရွက်ပေးနေတယ်လို့ သိရပါတယ်၊၊

#Yangon_Media_Group

#Local_News
Published_1 October 2022

ပြည်တွင်းမှာ နိုင်ငံခြားဆေးတွေဈေးမြင့်တက်တဲ့ အခြေအနေကို ထိန်းချုပ်ဖို့အတွက် ဆေးဝါးတင်သွင်းတဲ့အခါ ကုန်သွယ်ရေးဦးစီးဌာနကို တိုက်ရိုက်လျှောက်ထားခွင့်ပြုထားခဲ့ပါတယ်။

#Yangon_Media_Group

#World_Culture
Published 1 Oct 2022

ဗုဒ္ဓဟူးနေ့က မက္ကဆီကိုမှာကျင်းပတဲ့ နိုင်ငံတကာယဉ်ကျေးမှုဝန်ကြီးများတွေ့ဆုံပွဲ၌ နည်းပညာအသစ်များ တန်းတူညီတူမရရှိခြင်း၊ တရားမဝင်ရောင်းချခြင်းနဲ့ တိုင်းပြည်ယဉ်ကျေးမှုကိုခြိမ်းခြောက်လာခြင်းကိစ္စရပ်များအား ဆွေးနွေးခဲ့ကြပါတယ်။

#Yangon_Media_Group

#Health_Matters
Published - 1 Oct 2022

- ကြိုတင်ကာကွယ်နိုင်မယ့် နည်းလမ်းတွေရှိပါသလား??

#Yangon_Media_Group