#Local_News
Published_ 13 January 2023

မြန်မာနိုင်ငံနှင့်ပတ်သက်၍ အင်ဒိုနီးရှားနိုင်ငံခြားရေးဝန်ကြီး၏ စကားအပေါ် နိုင်ငံခြားရေးဝန်ကြီးဌာန(MOFA)က ထပ်မံသတိပေးတိုက်တွန်းချက် ထုတ်ပြန်လိုက်သည်။

ယင်းထုတ်ပြန်ချက်တွင် မြန်မာနိုင်ငံအနေဖြင့် အာဆီယံ၏ တူညီဆန္ဒ(၅)ချက် အကောင်အထည်ဖော်ခြင်းကို နိုင်ငံ၏ အမျိုးသားရေးအကျိုးစီးပွား၊ အချုပ်အခြာအာဏာပိုင်ဆိုင်မှုနှင့် တစ်နိုင်ငံ၏ပြည်တွင်းရေးကို အဖွဲ့ဝင်တစ်နိုင်ငံမှမစွက်ဖက်ရေး စသည့်အခြေခံမူများနှင့်အညီ စွဲမြဲစွာ ဆောင်ရွက်လျက်ရှိကြောင်း၊ ပါတီစုံဒီမိုကရေစီပြန်လည်ဖော်ဆောင်ရေးအတွက် ၂၀၀၈ ခုနှစ် ဖွဲစည်းပုံ အခြေခံဥပဒေနှင့်အညီ ရှေ့လုပ်ငန်းစဉ်(၅)ရပ်အား လွတ်လပ်သည့်အချုပ်အခြာအာဏာပိုင်နိုင်ငံ တစ်နိုင်ငံအဖြစ် ဆက်လက်ကြိုးပမ်းဆောင်ရွက်သွားမည်ဖြစ်ကြောင်းဖော်ပြထားသည်။

ယင်းအပြင် အာဆီယံအနေဖြင့် စည်းမျဉ်းကိုအခြေခံသည့် အဖွဲ့အစည်းဖြစ်သည်နှင့်အညီ အာဆီယံ ပဋိညာဉ်စာတမ်းပါ ပြဌာန်းချက်များနှင့် အာဆီယံအခြေခံမူများနှင့်အညီ တိတိကျကျ လေးစားလိုက်နာရန်လိုအပ်ပြီး မြန်မာအစိုးရမှကြေညာထားသည့် မည်သည့် အကြမ်းဖက်အဖွဲ့များ၊ မတရားအသင်းများနှင့်မျှ ထိတွေ့ဆက်ဆံခြင်းမပြုရန်လိုအပ်ကြောင်းကို ထပ်လောင်းသတိပေးတိုက်တွန်းကြောင်း ထုတ်ပြန်ထားခြင်း ဖြစ်သည်။

အာဆီယံ အလှည့်ကျ ဥက္ကဋ္ဌ အင်ဒိုနီးရှားနိုင်ငံ နိုင်ငံခြားရေးဝန်ကြီး Retno Marsudi က မြန်မာ့အရေးကြောင့် အာဆီယံ အသိုက်အဝန်းဖွံ့ဖြိုးတိုးတက်မှုပေါ်အထိခိုက်ခံမည်မဟုတ်ကြောင်း၊ ပြဿနာကို ဖြေရှင်းရန် အာဆီယံအထူးသံတမန်ရုံး ဖွင့်လှစ်၍သူကိုယ်တိုင်ဦးစီးကာ မြန်မာ့အရေး သက်ဆိုင်သူအားလုံးနှင့် စေ့စပ်ဆွေးနွေးသွားမည်ဖြစ်ကြောင်း ဇန်နဝါရီလ ၁၁ ရက်တွင် အင်ဒိုနီးရှားနိုင်ငံ ၊ ဂျာကာတာ၌ ပြုလုပ်ခဲ့သော နှစ်ပတ်လည် မိန့်ခွန်းအတွင်း ထည့်သွင်း ပြောကြားခဲ့ခြင်း ဖြစ်သည်။

နစက အနေဖြင့် ယခုအချိန်ထိ အာဆီယံ၏ ဘုံသဘောတူညီချက် ၅ ချက်ကို အပြည့်အဝလိုက်နာ အကောင်အထည်ဖော်ခြင်း မရှိသေးကြောင်း၊ မြန်မာ့အရေးကို ဆောင်ရွက်ရာတွင် တရားဥပဒေစိုးမိုးရေး၊ ကောင်းမွန်သောအုပ်ချုပ်မှု၊ ဒီမိုကရေစီမူများအပါအဝင် အာဆီယံ ပဋိညာဉ်စာတမ်း၏ အခြေခံမူများ၊ စံတန်ဖိုးများနှင့်အတူ ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်နှင့် ပူးပေါင်းဆောင်ရွက်သွားမည်ဖြစ်ကြောင်းလည်း ယင်းက ပြောကြားခဲ့ခြင်း ဖြစ်သည်။

#ymg/mt
#Yangon_Media_Group

#Local_News
Published_ 13 January 2023

ပြည်တွင်းစက်သုံးဆီဈေးနှုန်း ဆက်တိုက်မြင့်တက်လာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

၂၀၂၃ ခုနှစ် နှစ်ဆန်းပိုင်းမှစတင်ကာ ပြည်တွင်းစက်သုံးဆီဈေးနှုန်းမှာကျဆင်းလာပြီး ဇန်နဝါရီ ၁၂ ရက်တွင် ပြန်လည်မြင့်တက်လာခြင်းဖြစ်သည်။

ယနေ့(ဇန်နဝါရီလ ၁၃ ရက်)တွင် ပြည်တွင်းစက်သုံးဆီဈေးနှုန်းမှာ ၉၂ တစ်လီတာ ၂၀၉၅ ကျပ်၊ ၉၅ တစ်လီတာ ၂၁၆၀ ကျပ်၊ ဒီဇယ်တစ်လီတာ ၂၃၆၅ ကျပ်၊ ပရီမီယံဒီဇယ်တစ်လီတာ ၂၄၄၅ ကျပ်ထိမြင့်တက်လာပြီး ယမန်နေ့တွင် ၉၂ တစ်လီတာ ၂၀၃၅ ကျပ်၊ ၉၅ တစ်လီတာ ၂၀၉၀ ကျပ်၊ ဒီဇယ်တစ်လီတာ ၂၃၁၀ ကျပ်၊ ပရီမီယံဒီဇယ်တစ်လီတာ ၂၃၉၀ ကျပ်ဖြစ်ကြောင်း သိရသည်။

စက်သုံးဆီဈေးနှုန်းအတက်အကျ မမှန်ခြင်းကြောင့် ယာဉ်မောင်းများအနေဖြင့် အခက်အခဲများရှိလာပြီး၊ တချို့ယာဉ်မောင်းများသည် အုံနာခမတတ်နိုင်သည့်အတွက် ပြေးဆွဲမှုရပ်နားထားရကြောင်း သိရသည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီအနေဖြင့် ရန်ကုန်၊ မန္တလေးနှင့် အခြားတိုင်းနှင့်ပြည်နယ် အသီးသီးတွင် ရောင်းချရမည့် စက်သုံးဆီအခြေခံရည်ညွှန်းဈေးနှုန်းများကို နေ့စဉ်ထုတ်ပြန်ပေးလျက်ရှိကြောင်း သိရသည်။

ပြည်တွင်းရှိ စက်သုံးဆီ ရောင်းချသူများအနေဖြင့် စက်သုံးဆီ ဈေးနှုန်းများကို ဈေးကစားခြင်း၊ သိုလှောင်ထားရှိခြင်းများ၊ ဈေးတင်ရောင်းချခြင်းများ မပြုလုပ်ရန်နှင့် ယင်းသို့ပြုလုပ်ပါက အရေးကြီးကုန်စည် ဥပဒေဖြင့် အရေးယူဆောင်ရွက်မည် ဖြစ်ကြောင်းလည်းစက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက အသိပေး ကြေညာထားသည်။

#ymg/sth
#Yangon_Media_Group

#Local_News
Published_ 13 January 2023

ကချင်ပြည်နယ်၊ ဗန်းမော်မြို့ ဟန်တဲရပ်ကွက်၊ ရာဘာတောအနီးတွင် ဇန်နဝါရီလ ၁၂ ရက်ညနေ ၂ နာရီခန့်တွင် ယာဉ်တိမ်းမှောက်မှုဖြစ်ပွားခဲ့သောကြောင့် ယာဉ်ပေါ်ပါ အမျိုးသား၅ဦး ၊ အမျိုးသမီး ၃ဦးအနက် အမျိုးသမီး ၂ ဦးသေဆုံးခဲ့ကြောင်း မြန်မာနိုင်ငံ မီးသတ်တပ်ဖွဲ့က သိရသည်။

ယင်းအပြင် စိုးရိမ်ရသည့်ထိခိုက်ဒဏ်ရာရရှိသူ အမျိုးသား၂ဦးနှင့် မစိုးရိမ်ရ ထိခိုက်ဒဏ်ရာရရှိသူ အမျိုးသား ၁ ဦးနှင့် အမျိုးသမီး ၁ ဦးရှိကြောင်း၊ ကျန်၂ ဦးမှာ ထိခိုက်ဒဏ်ရာမရခဲ့ကြကြောင်းလည်း မြန်မာနိုင်ငံ မီးသတ်တပ်ဖွဲ့က ထုတ်ပြန်ထားသည်။

ယာဉ်တိမ်းမှောက်သည့်နေရာသို့ ဗန်းမော်မြို့နယ် မီးသတ်စခန်းမှ ရှာဖွေ ကယ်ဆယ်ရေးယာဉ် ၁ စီးဖြင့် တပ်ဖွဲ့ဝင် ၉ဦးတို့ ရှာဖွေကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြကြောင်း၊သေဆုံးသူနှင့် ထိခိုက်ဒဏ်ရာရရှိသူများအား သုညသုခလူမှုကူညီရေးအသင်းယာဉ်ဖြင့် ဗန်းမော်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်းလည်း သိရသည်။

Photo-MFSD
#ymg/mt
#yangon_Media_Group

#World_Health
Published 13 January 2023

ဆိုဒါပါတဲ့ အချိုရည်တွေသောက်ခြင်းဖြင့် ထိပ်ပြောင်နိုင်ချေများကြောင်း လေ့လာချက်တစ်ခုမှာ ဖော်ပြထားပါတယ်။

တစ်နေ့ကို ဆိုဒါတစ်ဗူးမျှ သောက်လေ့ရှိသူအမျိုးသားတွေဟာ အချိုရည်မသောက်တဲ့သူတွေထက် ဆံပင်ကျွတ်နိုင်ချေ ၅၇ ရာခိုင်နှုန်းပိုများကြောင်း ပေကျင်းရှိ ဆင်ဟွာတက္ကသိုလ်မှ သုတေသီများက တွေ့ရှိခဲ့ကြပါတယ်။

ထိုထဲမှာ အားဖြည့်အချိုရည်၊ ကော်ဖီနဲ့ လက်ဖက်ရည်တို့လည်း ပါဝင်နေပါတယ်။

တွေ့ရှိချက်များအရ အမျိုးသားတဝက်လောက်ဟာ အသက် ၅၀ မှာ ဆံပင်ကျဲပါးလာကြပြီး ဆံပင်ကျွတ်ထိပ်ပြောင်သူ ၂၅ ရာခိုင်နှုန်းခန့်က အသက် ၂၁ အရွယ်ကစပြီး ဆံပင်ကျွတ်ခြင်းလက္ခဏာတွေ စတင်ကြုံတွေ့ခဲ့ရပါတယ်။

သိပ္ပံပညာရှင်တွေက ဆံပင်ကျွတ်ခြင်းအတွက် ကုသတဲ့နည်းလမ်းတွေ ရှာတွေ့ခဲ့ကြသလို စမ်းသပ်ခန်းထဲမှာ ဆံပင်မွေးညင်းပေါက်များပင် ထုတ်လုပ်နိုင်ခဲ့ပါတယ်။

နောက်ဆုံးစမ်းသပ်ချက်မှာ အချိုရည်သောက်သုံးခြင်းနဲ့ ဆံပင်ကျွတ်ခြင်းတို့ကြား ဆက်စပ်မှုတွေကို လေ့လာခဲ့ကြပါတယ်။

မေးမြန်းမှုတွေထဲမှာ သူတို့ရဲ့စားသောက်ပုံများနဲ့ စိတ်ခံစားမှုအခြေအနေတွေကိုပါ လေ့လာခဲ့ကြပါတယ်။

လူငယ်လူရွယ်တွေကြား အချိုရည်အသောက်များကြတာဟာ ဆိုးကျိုးတွေကို မသိကြတာကြောင့်လို့ တွေ့ရှိခဲ့ကြပါတယ်။

နောက်ထပ်လေ့လာချက်များအရ တစ်ပတ်ကို အချိုပါတဲ့အရည်တွေ ၁ ကြိမ်မှ ၃ ကြိမ်ခန့်သောက်သုံးခြင်းဖြင့် ဆံပင်ကျွတ်နိုင်ချေ ၂၁ ရာခိုင်နှုန်းပိုများစေပြီး ၄ ကြိမ်ကနေ ၇ ကြိမ်ခန့်သောက်သုံးခြင်းဖြင့် ဆံပင်ကျွတ်ခြင်းဖြစ်နိုင်ချေ ၂၆ ရာခိုင်နှုန်းပိုများနိုင်တယ်လို့ ဖော်ပြထားပါတယ်။

ဆံပင်ကျွတ်နိုင်တဲ့အပြင် ဆံပင်ကျွတ်ခြင်းကြောင့် စိတ်ဓာတ်ကျခြင်းနဲ့ စိုးရိမ်ပူပန်ခြင်းစတဲ့ စိတ်ကျန်းမာရေးအခြေအနေတွေပါ ဖြစ်လာနိုင်ပါတယ်။

ဒါ့အပြင် တစ်နေ့ကို ဆိုဒါ ၃ ဗူးသောက်သုံးလေ့ရှိသူတွေမှာ စိတ်ဓာတ်ကျခြင်းခံစားရနိုင်ချေ ၂၅ ရာခိုင်နှုန်းပိုများနေပါတယ်။

ထိုကဲ့သို့အချိုရည်တွေထဲက သကြားပါဝင်မှုက အသက် ၄၅ နှစ်အရွယ်စမ်းသပ်ခံသူတွေမှာ စိုးရိမ်ပူပန်စိတ်ကို မြင့်တက်စေနိုင်ပါတယ်။
အစားအသောက်နဲ့ ထိပ်ပြောင်ခြင်းအကြောင်း လေ့လာကြတာဟာ ဒါပထမဆုံးမဟုတ်တော့ပါဘူး။

အချို့သုတေသီတွေက ဗိုက်တာမင်၊ အားဆေးတွေစားပေးဖို့ အကြံပြုကြပေမယ့် တကယ်ထိရောက်လားဆိုတာ မသေချာပါဘူး။

Source: NY Post
#Yangon_Media_Group

#World_Health
Published 13 January 2023

ညဘက်သောက်စားပြီး နောက်နေ့မှာ အရက်နာကျပြီး စိတ်မအီမသာဖြစ်နေတာမျိုး ကြုံဖူးကြမှာပါ။

စိုးရိမ်ပူပန်မှုလည်း ဖုံးလွှမ်းနေပြီး စိတ်ပိုင်းဆိုင်ရာသာမက နှလုံးခုန်မမှန်ခြင်း၊ အစာအိမ်မအီမသာဖြစ်ခြင်းတို့ ခံစားရတတ်ပါတယ်။

အရက်က ဦးနှောက်ရှိအာရုံကြောများကို သက်ရောက်နေပါတယ်။
လူမှုပေါင်းသင်းရေးအတွက် အရက်အနည်းငယ်သောက်ခြင်းဖြင့် အဆင်ပြေချောမွေ့စေနိုင်ပြီး စိတ်လက်ပြေပျောက်စေတဲ့ ဟော်မုန်းများထွက်ရှိစေပါတယ်။

ဒါပေမဲ့ အရက်အရှိန်ကုန်သွားရင်တော့ မူလအခြေအနေပြန်ရောက်သွားပြီး ဓာတုပစ္စည်းများရှုပ်ထွေးကုန်ကြပါတယ်။

သောက်ပြီးနောက်တစ်နေ့မှာ ဦးနှောက်က ဂလူတမိတ်ဓာတ်ကို ပြန်လည်ထိန်းညှိနေရာကနေ စိုးရိမ်ပူပန်ခြင်းနဲ့ စိတ်ဆတ်ခြင်းတို့ ခံစားရတာ ဖြစ်ပါတယ်။

အရက်သေစာက စိတ်ငြိမ်ပြေလျော့စေတဲ့ အာနိသင်ရှိပြီး သောက်နေတဲ့အချိန်မှာ စိတ်ခံစားရသက်သာစေပေမယ့် ရပ်လိုက်တဲ့အခါ ဦးနှောက်က ထိန်းညှိလုပ်ဆောင်နေရကာ စိတ်မငြိမ်မသက်မခံသာဖြစ်ကြောင်း ယေးလ်တက္ကသိုလ်မှ စိတ်ပညာပရော်ဖက်ဆာ'အေရီယယ်ဘက်စ်ကင်ဆမ်းမား'က ပြောပြခဲ့ပါတယ်။

ဒါ့အပြင် အရက်သောက်တဲ့အခါ အန်ဒေါ်ဖင်ဟော်မုန်းများထွက်စေကာ ပျော်ရွှင်စိတ်၊ အကောင်းမြင်စိတ်တို့ ဖြစ်ပေါ်စေပါတယ်။

ဒါပေမဲ့ အန်ဒေါ်ဖင်ဟော်မုန်းများ ပြန်ကျတဲ့အချိန်မှာတော့ စိတ်ပိုင်းဆိုင်ရာဆိုးကျိုးတွေ ဖြစ်ပေါ်စေတယ်လို့ သတိပေးထားပါတယ်။

အရက်နာကျတဲ့အခါ သိသာတဲ့လက္ခဏာတွေက ခေါင်းကိုက်မူးဝေခြင်း၊ အလင်းရောင်တောက်တောက်နဲ့ ဆူညံသံတွေကို မခံသာခြင်းတို့အပြင် နဂိုကတည်းက ပူပန်တတ်သူတွေမှာ သောက်ပြီးနောက် ပိုမိုခံစားရတတ်ပါတယ်။

နှလုံးခုန်မြန်ခြင်း၊ ချွေးပြန်ခြင်း၊ ပူပန်စိုးရိမ်ခြင်း၊ စိတ်ဓာတ်ကျခြင်းတို့အပြင် အိပ်ချိန်မမှန်ဖြစ်ကာ ဆုံးဖြတ်ချက်ချခြင်း၊ သာမန်လုပ်ငန်းဆောင်တာများ ဆောင်ရွက်ခြင်း၊ အာရုံစူးစိုက်ခြင်းတို့မှာပါ အခက်အခဲတွေရှိလာပါတယ်။

အလွန်အကျွံသောက်လေ့ရှိသူတွေဟာ ညကဖြစ်ခဲ့တာတွေကို မမှတ်မိတော့တာလည်း ဖြစ်လေ့ရှိပါတယ်။

အရက်နာကျခြင်းက ဘယ်လောက်အထိ ကြာကြာခံစားရသလဲဆိုတာ အသက်၊ ကိုယ်အလေးချိန်၊ သောက်နိုင်တဲ့ပမာဏ၊ ရေဓာတ်တို့အပေါ် မူတည်နေပါတယ်။

များသောအားဖြင့် တစ်ရက်လောက်ကြာတတ်ပေမယ့် ၂ ရက် ၃ ရက်လောက်ကြာရင်တော့ ခန္ဓာကိုယ်က တစ်ခုခုမှားယွင်းနေတဲ့သဘော ဖြစ်ပါတယ်။

အရက်နာကျခြင်းအတွက် အကောင်းဆုံးဖြေရှင်းခြင်းနည်းလမ်းက တိုင်းတာလျှော့သောက်ရန်ဖြစ်ပါတယ်။

Source: South China Morning Post
#Yangon_Media_Group

Published 13 Jan 2023

အဲလ်ဗစ်ပရက်စ်လေရဲ့ သမီးနှင့် အဆိုတော် သီချင်းရေးဆရာမ လီဆာ မာရီ ပရက်စလေဟာ ကာလီဖိုနီးယားပြည်နယ် ကာလာဘာဆာက နေအိမ်မှာ နှလုံးရပ်ပြီး သေဆုံးသွားပါတယ်။ အိမ်သန့်ရှင်းရေးအလုပ်သမားက လှုပ်ရှားမှုမရှိတော့တဲ့ သူမကိုတွေ့ရတဲ့အတွက် ဆေးရုံကိုအမြန်တင်ပို့ခဲ့ရတာဖြစ်ပါတယ်။  ယခုအခါသူမနှင့်တစ်ခါတစ်ခါ အတူလာနေတတ်တဲ့ သူမရဲ့ ခင်ပွန်းဟောင်း ဒန်နီကော့တ်က ဆေးအကူအဖွဲ့ရောက်မလာခင်သူမကို CPR လုပ်ပေးခဲ့ပါသေးတယ်။

လီဆာဟာ ရော့ခ်အင်န်ရိုးဘုရင်ကြီး အဲလ်ဗစ်ပရက်စလေနှင့် ဇနီး ပရက်စီလာပရက်စလေတို့ကနေ မွေးဖွားခဲ့တဲ့ သမီးဖြစ်ပါတယ်။ ပရက်စီလာက သူမရဲ့သမီးကွယ်လွန်ခဲ့တာကိုကို ကြေညာချက်ထုတ်ပြန်ပြီး အတည်ပြုပေးခဲ့ပါတယ်။

သူမကွယ်လွန်ချိန်မှာ အသက် ၅၄နှစ်ရှိပါပြီ။

“ ကျွန်မရဲ့ ချောမောလှပတဲ့ သမီး လစ်ဇာမာရီယာ ကျွန်မတို့ကို ထားခဲ့ပြီဆိုတဲ့ ကြေကွဲဖွယ်သတင်းကို ကျွန်မ နှလုံးကြေကွဲစာနှင့် မျှဝေပါတယ်” လို့ သူမကပြောပါတယ်။

“ ကျွန်မသိသူတွေအထဲမှာ သမီးဟာ ချစ်စိတ်ပြင်းပြပြီး ချစ်မက်စရာအကောင်းဆုံး အမျိုးသမီးဖြစ်တယ်။ ဒီလိုဆုံးရှုံးမှုနှင့် ကြိုးစားရင်ဆိုင်နေရတြ့အချိန်မှာ ကျွန်မတို့ကို သီးသန့်နေခွင့်ပေးပါလို့တောင်းဆိုပါတယ်။ ချစ်မေတ္တာတွေနှင့် ဆုတောင်း တွေအတွက်ကျေးဇူးတင်ပါတယ်။ ဒီအချိန်မှာ ကျွန်မအနေနှင့် နောက်ထပ်ပြောစရာမရှိပါ” လို့ မိခင်ပရက်စီလာကရေးသား ခဲ့ပါတယ်။

လီဆာဟာ  ကလေးသုံးဦးမိခင်ဖြစ်ပါတယ်။ သူ့သားသမီးတွေက ရုပ်ရှင်မင်းသမီး ရီလီကော့တ် Riley Keough နှင့် အမြွှာ ဟာပါနှင့် ဖင်လေတို့ပါ။ သူမမှာ ဘင်ဂျမင်ဆိုတဲ့သားတစ်ဦးရှိခဲ့ပြီးသူကတော့ ၂၀၂၀ ခုနှစ်မှာ ကိုယ့်ကိုကိုယ်သေနတ်ပစ် ခံရပြီးသေဆုံးခဲ့ရတာဖြစ်ပါတယ်။

မကြာသေးခင်ကပဲ လီဆာနှင့် ပရက်စီလာတို့ဟာ ရွှေကမ္ဘာလုံးဆုပေးပွဲ ၂၀၂၃ အခမ်းအနားကို တက်ရောက်ပြီး အဲလ်ဗစ် ဆိုတဲ့ အဲလ်ဗစ်ပရက်စလေရဲ့ အတ္တုပတ္တိဇာတ်ကားမှာ သရုပ်ဆောင်တဲ့ ဩစတင်ဘတ်တလာကို အားပေးဖို့ တက်ရောက် ခဲ့ကြပါတယ်။

Source WION

#Lisa_Marie_Presley

#Lisa_Marie_Presley_died

#Elvis_Presley's_daughter

#LocalNews
Published_ 12 January 2023

လက်လုပ်မိုင်းပေါက်ကွဲမှုကြောင့် အသက် ၁၁ နှစ်အရွယ် ကလေးတစ်ဦးသေဆုံးမှု မန္တလေးတိုင်းဒေသကြီး၊ နွားထိုးကြီးမြို့နယ်၊ မြင်းနီကျေးရွာအနီးတွင် ဇန်နဝါရီလ ၁၁ ရက် က ဖြစ်ပွားခဲ့သည်။

နွားထိုးကြီးမြို့ နယ်၊ မြင်းနီကျေးရွာနေ ဦးဆန်းဝေ နှင့် အသက် ၁၁ နှစ်အရွယ် မောင်ကံကောင်းတို့ ၂ ဦး မှာ အဆိုပါကျေးရွာ၏ အနောက်ဘက်၌ နွားကျောင်းနေစဉ်လက်နက်ကိုင်တစ်ဖွဲ့ထောင်ထားသည့် လက်လုပ်မိုင်း ၁ လုံး ပေါက်ကွဲ၍ အထက်ပါအတိုင်းသေဆုံးခဲ့ကာ ဦးဆန်းဝေတွင်လည်း မိုင်းစထိမှန်ဒဏ်ရာများရရှိခဲ့ကြောင်း နစက ၏ သတင်းထုတ်ပြန်ချက်တွင် ဖော်ပြထားသည်။

ယင်းကြောင့် အဆိုပါနေရာသို့ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ပြီး ဦးဆန်းဝေနှင့် မောင်ကံကောင်းတို့အား နွားထိုးကြီးမြို့၊ ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။

ymg/mt
#Yangon_Media_Group

#Local_News
Published_ 12 January 2023

ရွှေဈေးကစားသူတွေကို စုံစမ်းပြီးတော့ လိုင်စင်ပိတ်တဲ့ထိ အရေးယူဖို့ သက်ဆိုင်ရာက လုပ်နေတယ်လို့ ရန်ကုန်တိုင်းဒေသကြီး ရွှေလုပ်ငန်းရှင်များအသင်းက သိရပါတယ်။

#Yangon_Media_Group

#World_Politics
Published 12 January 2023

အီရန်နိုင်ငံက ယင်းတို့ရဲ့အကျိုးစီးပွားထိခိုက်ခြင်းမရှိဘဲ သက်ဆိုင်ရာအဖွဲ့အစည်းအားလုံးနဲ့ နျူကလီးယားသဘောတူညီချက်ကိစ္စအပြီးသတ်ရန် အဆင်သင့်ဖြစ်နေပြီး အမေရိကန်ကိုတော့ စေ့စပ်ညှိနှိုင်းခြင်းအတွက် အကန့်အသတ်မရှိဖွင့်ထားမှာမဟုတ်ကြောင်း အီရန်နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ 'နက်ဆာကာနာနီ'က တနင်္လာနေ့က ပြောကြားခဲ့ပါတယ်။

#Yangon_Media_Group

#Local_News
Published_ 12 January 2023

ငွေစာရင်းဖွင့်လှစ်ထားခြင်းမရှိသော စက်ရုံများ ငွေကြေးလည်ပတ်သုံးစွဲရာတွင် ဘဏ်စနစ် အသုံးပြုရမည်ဖြစ်ပြီး နိုင်ငံခြားငွေဝင်ရောက်ခြင်းမရှိသော စက်ရုံများသည် ပြည်ပမှအသုံးစရိတ်များ လွှဲပြောင်းသုံးစွဲရာတွင် မြန်မာနိုင်ငံတော် ဗဟိုဘဏ်၏ စည်းမျဉ်း စည်းကမ်းများနှင့်အညီ ဆောင်ရွက်ရမှာဖြစ်ကြောင်း သိရပါတယ်။

CMP လုပ်ငန်းများကြီးကြပ်ရေးကော်မတီမှ လုပ်ငန်းများငွေကြေးဆိုင်ရာအဆင်ပြေ ချောမွေ့စွာ လည်ပတ်နိုင်ရန်အတွက် လုပ်ငန်းညှိနှိုင်း အစည်းအဝေးမှာ အလုပ်သမား ဝန်ကြီး ဒေါက်တာပွင့်ဆန်းက ပြောကြားခဲ့တာဖြစ်ပါတယ်။
အဆိုပါအစည်းအဝေးမှာ မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါ်သန်းသန်းဆွေ၊ CMP လုပ်ငန်းများ ကြီးကြပ်ရေးကော်မတီဝင် ဒုတိယဝန်ကြီးများ၊ အမြဲတမ်း အတွင်းဝန် များ၊ ညွှန်ကြားရေးမှူးချုပ်များ၊ ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီ အတွင်းရေးမှူး၊ အသင်းအဖွဲ့များမှ တာဝန်ရှိသူများ၊ CMP အထည် ချုပ်လုပ်ငန်းရှင်များ၊ CMP Other လုပ်ငန်းရှင်များ၊ ကော်မတီဝင်များ တက်ရောက်ကြပါတယ်။

မြန်မာနိုင်ငံတွင် CMP စက်ရုံ၊ အလုပ်ရုံပေါင်း ၇၃၈ ရုံ ရှိသည့်အနက် နိုင်ငံခြားငွေ ဝင်ရောက်မှုများကို မြန်မာနိုင်ငံတော်ဗဟိုဘဏ်နှင့် တိုက်ဆိုင်စစ်ဆေးမှုများ ပြုလုပ်ခဲ့ရာ ၂၀၂၂ ခုနှစ် စက်တင်ဘာ ၂၂ ရက်မှ နိုဝင်ဘာ ၁၄ ရက်အထိ ငွေစာရင်းဖွင့်လှစ် ထားရှိသည့် စက်ရုံများတွင် နိုင်ငံခြားငွေဝင်ရောက်သည့် စက်ရုံ ၃၆၂ ရုံရှိကာ နိုင်ငံခြားငွေ ဝင်ရောက် ခြင်းမရှိသည့် စက်ရုံ ၂၈၄ ရုံ တွေ့ရှိခဲ့ရပြီး ငွေစာရင်း ဖွင့်လှစ်ထားခြင်းမရှိသည့် စက်ရုံ ၉၂ ရုံ တွေ့ရှိခဲ့တယ်လို့ ဆိုပါတယ်။

ဘဏ္ဍာရေးလုပ်ငန်းစဉ်များတွင် နိုင်ငံခြားဝင်ငွေစီးဆင်းမှုသည်လည်း နိုင်ငံတော် စီးပွား ဖွံ့ဖြိုးတိုးတက်မှုအတွက် အရေးကြီးသောကဏ္ဍမှ ပါဝင်ပါတယ်။

ygm_mnn
#Yangon_Media_Group.

#Local_News
Published_12 January 2023

ဂျပန်အပါအဝင် ပြည်ပ ၆ နိုင်ငံကို မြန်မာ့ပျားရည်တင်ပို့နေတယ်လို့ မွေးမြူရေးနှင့် ကုသရေးဦးစီးဌာန၊ ပျားမွေးမြူမှုဖွံ့ဖြိုးရေးဌာနခွဲက သိရပါတယ်။

#Yangon_Media_Group

#Local_News
Published_ 12 January 2023

တရုတ်ရိုးရာခြင်္သေ့နဲ့နဂါးအကအဖွဲ့အချို့ ရေရှည်ရပ်တည်ဖို့ခက်ခဲနေသလို အဖွဲ့ဝင်အသင်းသားတွေလည်း တဖြည်းဖြည်းလျော့နည်းလာတယ်လို ပုလဲနက်ခြင်္သေ့အဖွဲ့ထံမှ သိရပါတယ်၊၊

#Yangon_Media_Group