#Local_News
Published_ 17 January 2023

ချင်းပြည်နယ်၊ ဟားခါးမြို့တွင် ညအပူချိန်သည် ရေခဲအမှတ်အောက်(-၆) ဒီဂရီစင်တီဂရိတ်အထိ ရောက်ရှိခဲ့ပြီး အခုရက်ပိုင်းအတွင်းစစ်ကိုင်းတိုင်း၊ ကချင်ပြည်နယ်နှင့် ရှမ်းပြည်နယ်(မြောက်ပိုင်း)တို့တွင်ညအပူချိန်လျော့နည်းလာနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရသည်၊၊

ချင်းပြည်နယ်သည် ယခုနှစ်တွင် ဇန်နဝါရီလ ပုံမှန်ပျှမ်းမျှအပူချိန်အောက် (၆)ဒီဂရီစင်တီဂရိတ်လျော့နည်းခဲ့ခြင်း ဖြစ်သည်၊၊

ဇန်နဝါရီလ (၁၇) ရက် မွန်းလွဲပိုင်းထုတ်ပြန်ချက်အရ ထူးခြားသည့် ညအပူချိန်များမှာ ဟားခါးမြို့တွင် (-၆)ဒီဂရီစင်တီဂရိတ်၊ နမ့်စန်မြို့နှင့် မိုင်းယန်းမြို့တို့တွင် (၁)ဒီဂရီစင်တီဂရိတ်စီ၊ တီးတိန်မြို့တွင် (၂)ဒီဂရီစင်တီဂရိတ်၊ ကျောက်မဲမြို့၊ ဟဲဟိုးမြို့နှင့် ပြင်ဦးလွင်မြို့တို့တွင် (၃)ဒီဂရီစင်တီဂရိတ်စီတို့ရှိခဲ့သည်ဟု ဆိုသည်၊၊

နောက်(၂)ရက်အတွက် ခန့်မှန်းချက်အနေဖြင့် စစ်ကိုင်းတိုင်း၊ ကချင်ပြည်နယ်နှင့် ရှမ်းပြည်နယ် (မြောက်ပိုင်း)တို့တွင် ညအပူချိန်များအနည်းငယ်လျော့နည်းနိုင်ကြောင်း အသိပေးဖော်ပြထားသည်၊၊

ညအပူချိန်များ အနေဖြင့် ချင်းပြည်နယ်တွင် ဇန်နဝါရီလ၏ ပျမ်းမျှအပူချိန်အောက် (၆)ဒီဂရီစင်တီဂရိတ်၊ ရန်ကုန်တိုင်းဒေသကြီးနှင့်ရှမ်းပြည်နယ် (အရှေ့ပိုင်း)တို့တွင် ဇန်နဝါရီလ၏ ပျမ်းမျှအပူချိန်တို့အောက် (၃)ဒီဂရီစင်တီဂရိတ်နှင့် တနင်္သာရီတိုင်းဒေသကြီး၊ ရှမ်းပြည်နယ်(မြောက်ပိုင်း) နှင့် ရခိုင်ပြည်နယ်တို့တွင် ဇန်နဝါရီလ၏ ပျမ်းမျှအပူချိန်တို့အောက် (၂)ဒီဂရီစင်တီဂရိတ်လျော့နည်းခဲ့ပြီး၊ နေပြည်တော်တွင် ဇန်နဝါရီလ၏ ပျမ်းမျှအပူချိန်ထက် (၂)ဒီဂရီစင်တီဂရိတ်ပိုခဲ့ကာ၊ ကျန်တိုင်းဒေသကြီးနှင့် ပြည်နယ်တို့တွင် ဇန်နဝါရီလ၏ ပျမ်းမျှအပူချိန်ခန့်သာရှိခဲ့ကြောင်း သိရသည်၊၊

#ymg/tthl
#Yangon_Media_Group

#Local_News
Published_17 January 2023

ရန်ကုန်တိုင်းဒေသကြီး၊ ကျောက်တံတားတွင်မြို့နယ်၊ ဆိပ်ကမ်းသာလမ်း၊ အောက်ဘလောက် အမှတ်၁၃၁၊ မြေညီထပ်ရှိ KBZဘဏ် တွင် ယနေ့ ဇန်နဝါရီလ ၁၇ ရက် နံနက် ၁၁ နာရီကျော် အချိန်ခန့်က ဓားပြတိုက်မှုဖြစ်ပွားခဲ့ကြောင်း သိရသည်။

အဆိုပါ ဖြစ်စဉ်တွင် ကျူးလွန်သူ အသက် ၃၀ ကျော် အမျိုးသားတစ်ဦးအား ဘဏ်လုံခြုံရေးတာဝန်ရှိသူများ၊ ရပ်ကွက်နေသူများနှင့် ရတခလရ(၉၁)ရင်းမှူးဦးစီးအဖွဲ့တို့က ပိတ်ဆို့ဖမ်းဆီးမိခြင်းဖြစ်ကြောင်း သိရသည်။

ယင်းတွင် ပြစ်မှုကျူးလွန်သူအား သက်သေခံပစ္စည်း သိန်း ၁၉၀ ၊ ၎င်းကိုယ်ပိုင်ပိုက်ဆံ ၅ သိန်း ၄ သောင်း ၈ ထောင်တို့ကို သိမ်းဆည်းရမိခဲ့ကြောင်း၊ လက်ရှိတွင် ကျောက်တံတား ရဲစခန်းသို့ လွှဲပြောင်းပေးထားခဲ့ကြောင်း ရန်ကုန်တိုင်းဒေသကြီး ရဲတပ်ဖွဲ့နှင့် နီးစပ်သူထံမှ သိရသည်။

#ymg/mt
#Yangon_Media_Group

#Local_News
Published_ 17 January 2023

နာဂဒေသအတွင်းပွဲကြည့်စင်နှင့် ပြေးလမ်းပါ အားကစားကွင်းတစ်ခုတည်ဆောက်မည်ဖြစ်ကြောင်း နစက သတင်းထုတ်ပြန်ရေးအဖွဲ့က သိရသည်။

နစက ဥက္ကဌက ဇန်နဝါရီလ ၁၅ ရက်တွင် နာဂကိုယ်ပိုင်အုပ်ချုပ်ခွင့်ရဒေသ ဖွံ့ဖြိုးတိုးတက်ရေးအထူးအစည်းအဝေးသို့ တက်ရောက် ဆွေးနွေးစဉ် အထက်ပါအတိုင်း ပြောကြားခဲ့ကြောင်း အဆိုပါ အဖွဲ့က ထုတ်ပြန်ထားသည်။

ယင်းပွဲကြည့်စင်နှင့်ပြေးလမ်းပါ အားကစားကွင်းတစ်ခုဆောင်ရွက်ပြီးစီးပါကဒေသခံများ အနေဖြင့်လည်း စနစ်တကျထိန်းသိမ်းရန်၊ ပွဲတော်များမှာ အမြဲတမ်းပြုလုပ်ခြင်းမဟုတ်သည့်အတွက် သီးခြားမြေနေရာသတ်မှတ်ဆောင်ရွက်ခြင်းထက် ပွဲပြုလုပ်သည့် စင်မြင့်များကို အလွယ်တကူ ဖြုတ်တပ်ဆောင်ရွက်သည့်စနစ်ဖြင့် ဆောင်ရွက်သင့်ကြောင်း၊ ယင်းအပြင် ၂၀၂၅ ခုနှစ် နာဂရိုးရာနှစ်သစ်ကူးပွဲတော်အမီ ချင်းတွင်းမြစ်ကူး ထမံသီတံတားပြီးစီးရေးနှင့် ထမံသီအထိ ကတ္တရာလမ်း ခင်းကျင်းပေးနိုင်ရေးတို့ကိုလည်း ဆောင်ရွက်ရန်လိုကြောင်း နစက ဥက္ကဌက ပြောကြားခဲ့ခြင်းဖြစ်သည်။

ထို့အပြင် စာရာမေရိတောင်ခြေရှိ လေရှီး-လဟယ်ဆက်သွယ်ထားသည့် မြေသားလမ်းကို အဆင့်မြှင့်တင်ဆောင်ရွက်ပေးသွားမည်ဖြစ်ပြီး နာဂဒေသအတွင်း စိုက်ပျိုးရေး၊ မွေးမြူရေးနှင့် စက်မှုအတတ်ပညာများပါဝင်သည့် အခြေခံပညာအထက်တန်းကျောင်းတစ်ခု တည်ဆောက်ပေးမည်ဖြစ်ပြီး ယင်းမှတစ်ဆင့် သိပ္ပံအဆင့်အထိ အဆင့်ဆင့်တက်လှမ်းနိုင်ရေး လုပ်ဆောင်သွားမည်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_17 January 2023

ငွေကြေးဈေးကွက်အတွင်း ဈေးကမောက်ကမဖြစ်အောင် လှုံ့ဆော်သူတွေကို သိရှိပါက ငွေလွှဲကောင်တာတွေအနေဖြင့် အချက်အလက်ပေးပ့ိုပြီး အကြောင်းကြားရန် ဗဟိုဘဏ်ဥက္ကဋ္ဌ ဒေါ်သန်းသန်းဆွေက ပြောသည်။

မြန်မာနိုင်ငံတော်ဗဟိုဘဏ်၊ ဥက္ကဋ္ဌ မှ On-site တွေ့ရှိချက်များ၊ AML/CFT ဆိုင်ရာ လိုက်နာဆောင်ရွက်ရမည့် အချက်များနှင့်စပ်လျဉ်း၍ Money Changer လိုင်စင်ရဘဏ်မဟုတ်သော ကုမ္ပဏီအဖွဲ့အစည်းများနှင့် တွေ့ဆုံဆွေးနွေးပွဲတွင် ပြောကြားခဲ့ခြင်းဖြစ်သည်။

ငွေလဲကောင်တာတွေအနေဖြင့် ဗဟိုဘဏ်က ထုတ်ပြန်ထားသည့် ညွှန်ကြားချက်များ၊ ဥပဒေနှင့် စည်းကမ်းတွေကို လိုက်နာရန် ဗဟိုဘဏ်မှ အသစ်ထုတ်ပြန်လိုက်သည့် မူဝါဒတွေကို သိရှိရန် လိုအပ်ကြောင်း ၎င်းကပြောကြားခဲ့သည်။

ယင်းအပြင် ငွေလဲလုပ်ငန်းတွေသည် နိုင်ငံခြားငွေကြေးဈေးကွက်အတွင်း ပါဝင်ဆောင်ရွက်နေသူတွေဖြစ်သည့်အတွက် ငွေကြေးဈေးကွက်ကို ကမောက်ကမဖြစ်အောင်၊ မတည်မငြိမ်ဖြစ်အောင် လှုံ့ဆော်မှုတွေကို သတင်းအချက်အလက်ပေးပို့တိုင်ကြားရန် ပြောကြားခဲ့ခြင်းဖြစ်သည်။

#ymg/sth
#Yangon_Media_Group

#Local_News
Published_ 17 January 2023

ရန်ကုန်မြို့ကန်တော်ကြီးရေပြင်အတွင်း ယနေ့ဇန်နဝါရီလ ၁၇ ရက် နံနက်က လူသေအလောင်းတစ်လောင်းတွေ့ရှိခဲ့ကြောင်း ပရဟိတ လုပ်ငန်းလုပ်ကိုင်နေသူများထံမှ သိရသည်။

"ဆံပင်အတုမျောပါလာတယ်ထင်လို့ကြည့်တာ လူသေအလောင်း ဖြစ်နေတယ်"ဟု ယင်းကို မြင်တွေ့ခဲ့သူတစ်ဦးက ပြောသည်။

သေဆုံးနေသူမှာ အမျိုးသားတစ်ဦးဖြစ်ကြောင်းနှင့် လက်ရှိတွင် မည်သူမည်ဝါဆိုသည်ကို မသိရသေးကြောင်း၊ သက်ဆိုင်ရာက စစ်ဆေးမှုများ ပြုလုပ်နေကြောင်းလည်း သိရသည်။

#ymg/mt
#Yangon_Media_Group

#World_Crime
Published 17 January 2023

ထိုင်းနိုင်ငံရှိ နိုင်ငံကူးလက်မှတ်ပတ်စ်ပို့အတု ပြုလုပ်ရာနေရာကို ဝင်စီးခဲ့ရာမှာ သံသယရှိသူ တရုတ်လူမျိုး ၂ ဦး အသာအယာလွတ်မြောက်သွားတဲ့အတွက် အရာရှိ ၁၅ ဦးကို အကျင့်ပျက်ခြစားမှုဖြင့် တရားစွဲဆိုထားကြောင်း ရဲတပ်ဖွဲ့က တနင်္လာနေ့မှာ ပြောကြားခဲ့ပါတယ်။

ထိုင်းနိုင်ငံအတွင်း တရုတ်လူမျိုးတွေ ကြီးစိုးနေတဲ့ တရားမဝင်လုပ်ငန်းများ ကြီးထွားလာတာကြောင့် ယခုအချိန်မှာ စိုးရိမ်နေကြရပါတယ်။

ပြီးခဲ့တဲ့လကလည်း ဘန်ကောက်ရှိ ပစိဖိတ်ကျွန်းနော်ရူ ကောင်စစ်ဝန်ရုံးဟောင်းမှာ တရုတ်နိုင်ငံသားတွေ ကျူးကျော်ဝင်ရောက်နေကြောင်း စွပ်စွဲမှုများရှိသဖြင့် ဝင်ရောက်စီးနင်းခဲ့ပါသေးတယ်။

တရုတ်နိုင်ငံသားတွေအတွက် ပတ်စ်ပို့အတုများပြုလုပ်ပေးနေတဲ့ တရုတ်လူမျိုး ၂ ယောက်ကို တရုတ်ဘက်ကလည်း အလိုရှိနေပြီး ထိုင်းအရာရှိများကလည်း တွေ့ရှိထားတာဖြစ်ကြောင်း နိုင်ငံတော်ရဲတပ်ဖွဲ့လက်ထောက်အကြီးအကဲ 'ဆူရာချက်ဟက်ပယ်'က ပြောပြခဲ့ပါတယ်။

ဒါပေမဲ့ အထူးစုံစမ်းရေးဌာနမှ အရာရှိ ၅ ယောက်၊ ရဲအရာရှိ ၉ ယောက်နဲ့ စစ်တပ်ကြပ် ၁ ယောက်တို့နဲ့ ပူးပေါင်းကြံစည်ပြီးနောက် ထိုတရုတ်လူမျိုး ၂ ယောက် လွတ်မြောက်သွားခဲ့ကြောင်း သတင်းထောက်တွေကို ပြောကြားခဲ့ပါတယ်။

စကားပြန်တစ်ယောက် အပါအဝင် အရာရှိတွေဟာ တရားခံတွေထံမှ လာဘ်ထိုးငွေ ဘတ် ၁၀ သန်း တောင်းဆိုခဲ့တယ်လို့သိရပါတယ်။

စကားပြန်က မလေးရှားကို ထွက်ပြေးဖို့ကြိုးစားစဉ် ဖမ်းမိခဲ့ပြီးနောက် ဝန်ခံခဲ့ပြီး မူလအထောက်အထားတွေပါဝင်တဲ့ hard disk ကို ရှာတွေ့ခဲ့ရာမှာ သူတို့ရဲ့အကြံအစည်တွေကို သိရှိခဲ့ကြတာဖြစ်ပါတယ်။

ဝင်ရောက်စီးနင်းမှုအတွင်း ဘတ်ငွေ ၂ သန်းခွဲတွေ့ရှိခဲ့တဲ့အပြင် hard disk မှာပါဝင်တဲ့ဗီဒီယိုနဲ့ စကားပြန်ရဲ့ပူးပေါင်းဝန်ခံချက်ကြောင့် ဘတ်ငွေ ၈ သန်းခန့် တွေ့ရှိခဲ့ပါတယ်။

"အရာရှိတွေက ဒီလောက်နဲ့ မလုံလောက်ဘဲ နောက်ထပ် ဘတ်ငွေ ၄ သန်း တရုတ်တွေထံကနေ တောင်းခဲ့ပါတယ်" လို့ 'ဆူရာချက်'က ရှင်းပြခဲ့ပါတယ်။

အဆိုပါ ၁၆ ဦးစလုံးကို အကျင့်ပျက်ခြစားမှုဖြင့် တရားစွဲထားကာ စကားပြန်မပါဘဲ ကျန်တဲ့ ၁၅ ဦးကို အာဏာအလွဲသုံးစားမှုဖြင့်လည်း စွဲဆိုထားပါတယ်။

စစ်တပ်ကြပ်ကိုတော့ အထောက်အထားဖျက်ဆီးရန် ကြိုးပမ်းမှုဖြင့်လည်း တရားစွဲထားပါတယ်။

အရာရှိတွေကတော့ တရားစွဲဆိုချက်အားလုံးကို ငြင်းဆိုခဲ့ကြပါတယ်။
"လာဘ်ထိုးဖို့တောင်းဆိုခြင်းက ပြင်းထန်တဲ့အပြစ်ဒဏ် ကျနိုင်ပြီး အမြင့်ဆုံးအနေဖြင့် သေဒဏ်အထိ ဖြစ်နိုင်ပါတယ်" လို့ ဆိုပါတယ်။

ဒီဝင်ရောက်စီးနင်းမှုမှာ အထက်လူကြီးတွေ ပါဝင်အသိအမှတ်ပြုထားလားဆိုတာကိုလည်း နောက်ထပ်စုံစမ်းမှုတွေ ပြုလုပ်ဦးမှာဖြစ်ပါတယ်။

Source: South China Morning Post
#Yangon_Media_Group

#World_Health
Published 17 January 2023

ဖိုင်ဇာကိုဗစ်ကာကွယ်ဆေးအသစ်က အသက် ၆၅ နှစ်အထက်လူကြီးတွေမှာ လေဖြတ်နိုင်ချေရှိတယ်ဆိုတဲ့အကြောင်းနဲ့ ပတ်သက်ပြီး ကျန်းမာရေးတာဝန်ရှိသူများက စစ်ဆေးနေကြပါတယ်။

ရောဂါထိန်းချုပ်ကာကွယ်ရေးစင်တာ(CDC)နဲ့ အစားအစာနှင့်ဆေးဝါးကွပ်ကဲရေး(FDA)တို့ရဲ့ စောင့်ကြည့်ရေးစနစ်အရ ဖိုင်ဇာကိုဗစ်ကာကွယ်ဆေးအသစ်နဲ့ ကာကွယ်ဆေးထိုးပြီး ၃/၄ ပတ်အကြာ လေဖြတ်ခြင်းအန္တရာယ်ဖြစ်ခြင်းတို့ကြား ဆက်စပ်မှုကို တွေ့ရှိခဲ့ကြောင်း ပြောကြားခဲ့ပါတယ်။

အချက်အလက်များအရ အန္တရာယ်ရှိနိုင်တယ်လို့ သေချာပေါက်မယူဆနိုင်ပေမယ့် ပြည်သူတွေသိရှိဖို့ မျှဝေရပါမယ်လို့ CDC နဲ့ FDA တို့က ထုတ်ပြန်လိုက်ပါတယ်။

ဦးနှောက်လေဖြတ်ခြင်းဆိုတာက ဦးနှောက်ဆီကိုသွားတဲ့ သွေးကြောတွေပိတ်ဆို့နေတာပါ။

စုံစမ်းစစ်ဆေးရန် လိုအပ်တဲ့အချက်အလက်တွေ ပြည့်မီနေတယ်လို့ တာဝန်ရှိသူများက ဆိုပါတယ်။

ကာကွယ်ဆေးအသစ်က ကိုဗစ်ဆိုးရွားခြင်းကို ကာကွယ်နိုင်ကြောင်း စမ်းသပ်တွေ့ရှိထားတာကြောင့် အသက်ကြီးသူတွေမှာ အရင်ထိုးပေးဖို့ စီစဉ်ခဲ့ကြတာဖြစ်ပါတယ်။

ဒီလိုထွက်ပေါ်လာရတဲ့ ဆက်စပ်မှုမှာ အခြားအကြောင်းအရာတွေလည်း ပါဝင်နေနိုင်တယ်လို့ FDA နဲ့ CDC တို့က ကြေညာခဲ့ပါတယ်။

ဒီဆက်စပ်မှုက ဖိုင်ဇာရဲ့အားမြှင့်ကာကွယ်ဆေးမှာသာ တွေ့ရပြီး အခြားကာကွယ်ဆေးတွေနဲ့ အခြားအသက်အရွယ်တွေမှာ မတွေ့ရပါဘူး။

ဖိုင်ဇာဘိုင်အိုအင်န်တက်ခ် ဘိုင်ဗေးလန့်ကာကွယ်ဆေးနဲ့ မိုဒါနာ ဘိုင်ဗေးလန့်ကာကွယ်ဆေးတို့ဟာ မူလကိုရိုနာဗိုင်းရပ်စ်နဲ့ အိုမီခရွန်မျိုးကွဲများကို ပစ်မှတ်ထားကာကွယ်ပေးပြီး အသက် ၆ လနဲ့အထက် ကလေးတွေမှာလည်း အသုံးပြုခွင့်ပေးထားပါတယ်။

ဘိုင်ဗေးလန့်ကာကွယ်ဆေးတွေဟာ ရောဂါကူးစက်မှုကာကွယ်ခြင်းကို အားဖြည့်ပေးပြီး အိုမီခရွန်မျိုးကွဲများပျံ့နှံ့ခြင်းကို နှောင့်နှေးစေပါတယ်။
အမေရိကန်မှာ လူဦးရေ ၁၅ ရာခိုင်နှုန်းခန့်က အားမြှင့်ကာကွယ်ဆေးအသစ်ထိုးနှံထားပြီးဖြစ်ကာ ထိုးပြီးသားလူအများစုက လေဖြတ်ခြင်းအန္တရာယ်ရှိနေတာဖြစ်ပါတယ်။

လေဖြတ်သူတွေမှာ ၂၀ ရာခိုင်နှုန်းက အသက်အန္တရာယ်ရှိပြီး ကျန်တဲ့သူတွေမှာတော့ ဦးနှောက်အပြီးတိုင်ထိခိုက်ခြင်း၊ စကားမပြောနိုင်ခြင်း၊ အမြင်အာရုံနဲ့ လှုပ်ရှားနိုင်စွမ်းကင်းမဲ့ခြင်းတို့ ဖြစ်နိုင်ပါတယ်။

Source: Daily Mail
#Yangon_Media_Group

#Local_News
Published_17 January 2023

တောင်ကိုရီးယားနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာလုပ်သား ၁၃၀ ကျော်ကို ယနေ့ထပ်မံစေလွှတ်ခဲ့ကြောင်း ဆိုးလ်မြို့၊ မြန်မာသံရုံးမှ အသိပေးထုတ်ပြန်ထားသည်။

ယနေ့(ဇန်နဝါရီလ ၁၇ ရက်) တွင် ကုန်ထုတ်လုပ်သားသစ် (၈၃) ဦး၊ CBT ကုန်ထုတ်လုပ်သား (၅) ဦး၊ Re-entry ကုန်ထုတ်လုပ်သား (၄၅) ဦး၊ Re-entry စိုက်ပျိုး၊ မွေးမြူရေးလုပ်သား (၃) ဦး၊ စုစုပေါင်း (၁၃၆) ဦးကို စေလွှတ်ခဲ့ခြင်းဖြစ်သည်။

အစိုးရပြည်ပအလုပ်အကိုင်အေဂျင်စီ EPS စနစ်ဖြင့် Re-entry ကုန်ထုတ်လုပ်သား ၄၅ ဦး၊ Re-entry စိုက်ပျိုး၊ မွေးမြူရေးလုပ်သား ၃ ဦးကို ၂၀၂၃ ခုနှစ်အတွက် ပထမဦးဆုံးစေလွှတ်ထားပြီး လက်ရှိတွင် မြန်မာလုပ်သား ၅၀,၀၀၀ နီးပါးတောင်ကိုရီးယားနိုင်ငံတွင်လုပ်ကိုင်နေကြောင်းလည်း သိရသည်။

တောင်ကိုရီးယားအစိုးရမှ ကိုဗစ်ကာလအလွန်တွင် မြန်မာအလုပ်သမားများကို တရားဝင်ပြန်လည်လက်ခံနေပြီး သြဂုတ်လတွင် ၁၂၉၃ ဦး၊ စက်တင်ဘာလတွင် ၉၇၈ ဦး၊ အောက်တိုဘာလတွင် ၁၁၆၉ ဦး၊ နိုဝင်ဘာလတွင် ၇၂၈ ဦး၊ ဒီဇင်ဘာလတွင် ၅၉၉ ဦးစေလွှတ်ခဲ့ပြီးဖြစ်ကြောင်း သိရသည်။

ယင်းအပြင် တောင်ကိုရီးယားနိုင်ငံတွင် သွားရောက်လုပ်ကိုင်ရန်အတွက် EPS စာမေးပွဲဖြေဆိုသူ တစ်သောင်းကျော်တွင် ၆၀၀၀ ကျော်အောင်မြင်ထားကြောင်း အစိုးရပြည်ပအလုပ်အကိုင်အေဂျင်စီမှ အသိပေးထုတ်ပြန်ထားသည်။

#ymg/sth
#Yangon_Media_Group

#Local_News
Published_ 17 January 2023

နာဂဒေသ လဟယ်မြို့ထေရဝါဒဗုဒ္ဓသာသနာပြု(ဗဟို)ကျောင်းနှင့် ထေရဝါဒဗုဒ္ဓ သာသနာပြု သီလရှင်ကျောင်းတို့တွင် လှူဖွယ်ပစ္စည်းများကို နစက ဥက္ကဌက ဇန်နဝါရီလ ၁၆ ရက်က လှူဒါန်းခဲ့ကြောင်း သိရသည်။

ထေရဝါဒဗုဒ္ဓသာသနာပြု(ဗဟို)ကျောင်းသို့ ရောက်ရှိကြပြီး ကျောင်းတိုက်ဆရာတော် သဒ္ဒမ္မဇောတိကဓက ဘဒ္ဒန္တသုမန အမှူးပြုသည့် သံဃာ တော်များအား ဖူးမြော်ကြည်ညိုကာ သာသနာတော် ထွန်းကား ပြန့်ပွား ရေးဆိုင်ရာများ၊ ကလေးငယ်များပညာသင်ကြားရေး ဆိုင်ရာများနှင့် ပတ်သက်၍ လိုအပ်သည်များကို မေးမြန်းလျှောက်ထားပြီး နဝကမ္မအလှူတော်ငွေများ၊ ဆွမ်းဆန် တော်၊ ဆီနှင့် စားသောက်ဖွယ်ရာပစ္စည်းများနှင့် လဟယ်မြို့၊ ထေရဝါဒဗုဒ္ဓ သာသနာ ပြု(ဗဟို) ဘုန်းတော်ကြီးသင်ပညာရေးကျောင်း တွင် တာဝန်ထမ်းဆောင်လျက်ရှိသည့် ဆရာ၊ ဆရာမ များအတွက် ထောက်ပံ့ငွေ ကျပ်သိန်း ၅၀ တို့ကို ဆက်ကပ်လှူဒါန်းခဲ့ခြင်း ဖြစ်ကြောင်း သိရသည်။

ယင်းနောက် ထေရဝါဒဗုဒ္ဓသာသနာပြုသီလရှင်ကျောင်းသို့ ရောက်ရှိကြပြီး သာသနာနွယ်ဝင် သီလရှင်ဆရာကြီး ဒေါ်ပညာသိင်္ဂီနှင့် သီလရှင်ဆရာကြီး၊ ဆရာလေးများကို ဖူးမြော်ကြည်ညိုကာ သာသနာရေးဆိုင်ရာများ၊ ပညာသင်ကြားရေးဆိုင်ရာများနှင့် သီလရှင်ကျောင်းအတွက် လိုအပ်ချက်များကို မေးမြန်းလျှောက်ထားကာ နဝကမ္မအလှူတော်ငွေများ၊ ဆွမ်းဆန်တော်၊ ဆီနှင့် စားသောက်ဖွယ်ရာ ပစ္စည်းများ၊ သီလရှင်ဝတ်စုံများကို ဆက်ကပ်လှူဒါန်းခဲ့ခြင်း ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_ 17 January 2023

အရက်သေစာသောက်စားခြင်းများကို တတ်နိုင်သမျှအသိတရားဖြင့် ထိန်းသိမ်းကြရန်နှင့် ကျန်းမာရေးကို ထိခိုက်စေနိုင်သည့် ဆေးလိပ်နှင့်ကွမ်းသုံးစွဲမှုများကိုလည်း ရှောင်ကြဉ်ကြရန် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောသည်။

ဇန်နဝါရီလ ၁၆ ရက်က အနောက်မြောက်တိုင်းစစ်ဌာနချုပ်၊ လဟယ်မြို့ရှိ နယ်မြေခံတပ်နှင့် ဟုမ္မလင်းတပ်နယ်တို့မှ အရာရှိ၊ စစ်သည် မိသားစုများအား သီးခြားစီတွေ့ဆုံအမှာစကားပြောကြားရာတွင် အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။

တပ်မတော်၏ မူလတာဝန်မှာ နိုင်ငံတော်ကာကွယ်ရေးတာဝန်ကို ထမ်းဆောင်ခြင်းပင်ဖြစ်ကြောင်း၊ နိုင်ငံတော်ကို ကာကွယ်စောင့်ရှောက်ရန်အတွက် စွမ်းရည်သုံးရပ်ဖြစ်သည့် စစ်ရေးစွမ်းရည်၊ စည်းရုံးရေးစွမ်းရည်နှင့် အုပ်ချုပ်ရေး စွမ်းရည်များပြည့်ဝနေရန်လိုကြောင်း၊ စွမ်းရည်များတိုးတက်စေရေးအတွက်အမြဲ လေ့ကျင့်နေရမည်ဖြစ်ပြီး စွမ်းအားများတိုးတက်စေရေးအတွက်လည်း တပ်မတော်ကို အဆင့်မြင့်တင်ခြင်းများ အမြဲမပြတ်ဆောင်ရွက်လျက်ရှိကြောင်း၊ တစ်ဦးချင်းစွမ်းရည်များတိုးတက်စေရန်အတွက် ဝတ်စားဆင်ယင်မှု၊ နေထိုင်မှု၊ သွားလာမှုများကို စနစ် တကျဖြင့် ဆောင်ရွက်မည်ဆိုပါက စွမ်းရည်ရှိသည့် တပ်ဖြစ်လာမည်ဖြစ်ကြောင်းလည်း ၎င်းကပြောသည်။

ယင်းအပြင် တပ်တွင်းစည်းလုံးညီညွတ်ရေးအတွက်လည်း အထက်အောက် ညီညွတ်မျှတသည့် အုပ်ချုပ်မှုပုံစံနှင့် စစ်သည်များ၏ ရပိုင်ခွင့်နှင့် အခွင့်အရေးများကို ပြည့်ဝစွာရရှိစေရေး ဆောင်ရွက်ပေးရမည်ဖြစ်ကြောင်းလည်း ထည့်သွင်းပြောကြားခဲ့ခြင်း ဖြစ်သည်။

#ymg/mt
#Yangon_Media_Group

#Health_Tips
Published 17 January 2023

ဆောင်းရာသီအကူးအပြောင်းမှာ နှာရည်ယိုခြင်း၊ ချောင်းဆိုးခြင်း၊ လည်ချောင်းနာခြင်း၊ ဖျားနာခြင်းတို့ ဖြစ်တတ်ကြပါတယ်။

ဒါကြောင့်မို့လို့ နေမကောင်းမဖြစ်ဘဲ အမြဲတမ်းကျန်းမာနေတဲ့လူတွေရဲ့ အလေ့အထ ၁၀ မျိုးကို ဖော်ပြပေးလိုက်ပါတယ်။

(၁) ရေများများသောက်ခြင်း

ရေလုံလောက်စွာသောက်သုံးတဲ့အခါ ခန္ဓာကိုယ်ထဲကနေ နာမကျန်းဖြစ်ခြင်းကို တိုက်ထုတ်ပေးဖို့လိုအပ်တဲ့ စွမ်းအင်ကို ပေးနိုင်ပါတယ်။

(၂) တုပ်ကွေးကာကွယ်ဆေးထိုးထားခြင်း

တုပ်ကွေးရောဂါပိုးတွေက နှစ်စဉ်ဆင့်ကဲပြောင်းလဲနေတာကြောင့် ကာကွယ်ဆေးကိုလည်း ရာသီလိုက်ထိုးနှံဖို့လိုအပ်ပါတယ်။

(၃) လုံလောက်စွာအိပ်စက်ခြင်း

အိပ်ရေးမဝတဲ့အခါ ကိုယ်အလေးချိန်၊ စိတ်အခြေအနေတို့ကို ထိခိုက်စေကာ နာတာရှည်ရောဂါဖြစ်ပေါ်စေတာကြောင့် တစ်နေ့ကို ၈ နာရီအိပ်စက်ဖို့ အကြံပြုပါတယ်။

(၄) လက်ကိုင်ပဝါများ မကြာမကြာလဲပေးခြင်း

အသုံးပြုတာကြာလာတဲ့ မီးဖိုချောင်သုံးလက်နှီးများအပြင် လက်ကိုင်ပဝါတွေမှာ ရောဂါပိုးမွှားတွေ ပါဝင်နိုင်တာကြောင့် အရေပြားကူးစက်မှု၊ အစာအိမ်လမ်းကြောင်းထိခိုက်မှုတို့ ဖြစ်တတ်ပါတယ်။

(၅) လေ့ကျင့်ခန်းပြုလုပ်ခြင်း

အသက်အရွယ်ကြီးလာတဲ့အခါ ကိုယ်ခံအားစနစ်မှာပါဝင်တဲ့ ဆဲလ်တွေလျော့နည်းလာပေမယ့် လေ့ကျင့်ခန်းပြုလုပ်ခြင်းဖြင့် ကိုယ်ခံအားစနစ်ကို မြှင့်တင်ပေးနိုင်ပါတယ်။

(၆) အပြင်ထွက်လေ့ရှိခြင်း

အရေပြားအတွက်အရေးကြီးတဲ့ ဗိုက်တာမင်-ဒီကို နေရောင်ကနေရရှိကာ တစ်နေ့ကို ၁၀ မိနစ်ခန့် နေရောင်နဲ့ထိတွေ့သင့်ပါတယ်။

(၇) အပေါင်းအဖော်များနှင့်လျှောက်လည်ခြင်း

မိတ်ဆွေအပေါင်းအသင်းတွေရှိခြင်းဟာ မိသားစုဝင်တွေထက် ကျန်းမာရေးအတွက် ပိုမိုအရေးကြီးကြောင်းတွေ့ရှိထားကာ ဘဝတလျှောက်လုံး အခင်မင်ဆုံးမိတ်ဆွေတွေနဲ့ ရယ်မောနေထိုင်သင့်ပါတယ်။

(၈) ပူပူနွေးနွေးစားသောက်ခြင်း

ပူနွေးတဲ့ စားစရာသောက်စရာများစားခြင်းဖြင့် ခန္ဓာကိုယ်ကိုနွေးထွေးစေရုံမက သွေးလည်ပတ်မှုကိုလည်း လှုံ့ဆော်ပေးပါတယ်။

(၉) ကျန်းမာရေးနှင့်ညီညွတ်စွာ စားသောက်ခြင်း

အသီးအနှံ၊ ဟင်းသီးဟင်းရွက်၊ အစေ့အဆန်၊ ပဲ၊ အခွံမာသီးတို့က ဗိုက်တာမင်၊ သတ္တုဓာတ်၊ ဓာတ်တိုးဆန့်ကျင်ပစ္စည်းများ ကြွယ်ဝစွာပါဝင်ပြီး ဒိန်ချဉ်နဲ့ လိမ္မော်သီးတို့က ရောဂါကာကွယ်ရာမှာ ကူညီပေးပါတယ်။

(၁၀) အကောင်းမြင်အကောင်းတွေးတတ်ခြင်း

ဘဝမှာ ပြည့်စုံတယ်လို့မရှိပေမယ့် ကောင်းတာကိုပဲ တွေးတောကာ မကောင်းမြင်စိတ်လျှော့ချရင် အသက်ရှည်ကျန်းမာနိုင်ပါတယ်။

Source: The Jerusalem Post
#Yangon_Media_Group

Published 16 Jan 2023

ဟောလီဝုဒ်ရဲ့ရွှေခေတ်က နာမည်ကျော်ကြားခဲ့တဲ့ အသက် ၉၅နှစ်ရှိပြီဖြစ်တဲ့ ရုပ်ရှင်မင်းသမီးကြီး ဂျီနာလိုလိုဘရစ်ဂျစ်ဒါ Gina Lollobrigida ဟာ  ဇန်နဝါရီ ၁၆ ရက် တနင်္လာနေ့မှာ ကွယ်လွန်သွားပါတယ်။

သူမဟာ ငယ်စဉ်က လိင်ဆွဲဆောင်မှုပြင်းတဲ့ အစ်ကိုကာလသားကြိုက်မင်းသမီးဖြစ်ခဲ့ပြီး သူမဟာ အဲဒီအချိန်တုန်းက ထိပ်တန်းမင်းသားကြီးတွေဖြစ်တဲ့ အာရိုဖလင်း၊ ဘတ်လန်ကစ္စတာနှင့် ဟမ်ဖရေးဘိုဂတ်တို့နှင့် တွဲဖက်သရုပ်ဆောင်ခဲ့ပါတယ်။

သူမဟာ ၁၉၂၇ခုနှစ် ဇူလိုင်(၄)ရက်နေ့မှာ အီတလီနိုင်ငံ ရောမမြို့က မိုင်(၃၀)အကွာမှာရှိတဲ့ တောင်ပေါ်မြို့ကလေး ဆူဗီယာကိုမှာ မွေးဖွားခဲ့ပါတယ်။

Source: AFP

#Gina_Lollobrigida

#one_of the_last_icons_Golden_Age_of_Hollywood