#Local_News
Published_ 26 April 2023

ရန်ကုန်တိုင်း၊ သာကေတမြို့နယ် ရှုခင်းသာလမ်းမကြီးနဲ့ ဝေဇယန္တာလမ်းထောင့်မှာ ယမန်နေ့ ဧပြီ ၂၅ ရက်နေ့ ည ၉ နာရီ ၂၀မိနစ်အချိန်ခန့်က စက်ဘီးနဲ့ကားတိုက်မှုဖြစ်ပွားခဲ့တယ်လို့ သာကေတမြို့နယ် ပရဟိတအဖွဲထံက သိရသည်။

ဖြစ်စဉ်မှာ စက်ဘီးမောင်းနှင်လာသူမှာ လမ်းမကြီးမှ ရပ်ကွက်လမ်းသွယ်ထဲသို့ ဝင်စဉ် အရှိန်ဖြင့်မောင်းနှင်လာသောကားဖြင့်ဝင်တိုက်မိခြင်းဖြစ်သည်။

"စက်ဘီးက လမ်းလယ်တုံးကြားကနေ ဖြတ်ဝက်တာ၊ ဖြစ်ချင်တော့အဲ့နားက လမ်းမီးကလဲ ပျက်နေတော့မှောင်နေတယ်၊ ကားကလဲ အရှိန်နဲ့လာတာ၊ ဝင်တိုက်မိပြီး လူကပေ ၇၀ လောက်အထိကို လွင့်သွားတာ"ဟု သာကေတမြိုနယ်ပရဟိတအဖွဲ့တာဝန်ရှိသူတစ်ဦးက ပြောသည်။

ကားနဲ့တိုက်မိမှုကြောင့် ပေါင်အဆစ်လွဲဒဏ်ရာ၊ တင်ပဆုံအဆစ်လွှဲဒဏ်ရာ၊ ပေါင်ရိုးကျိုးဒဏ်ရာ၊ဒူးဆစ်လွှဲဒဏ်ရာ၊ ခြေသလုံးကျိုးဒဏ်ရာနဲ့ ဦးခေါင်းဒဏ်ရာတွေရရှိခဲ့တယ်လို့ ဆိုသည်။

လူမှုကူညီရေးအသင်းရောက်ရှိချိန်မှာ မသေသေးပဲ ပရိဟိတအသင်းမှ မြေပြင်ကုသမှုများ လုပ်ပေးခဲ့ပေမဲ့ သွေးထွက်လွန်ကာ သေဆုံးသွားတယ်လို့ သိရသည်။

သေဆုံးသူမှာ အသက် ၂၀ ကျော်အရွယ်အမျိုးသားဖြစ်ပြီး အခင်းဖြစ်နေရာအနီးအနားမှာနေထိုင်ကာ အောင်နိုင်သူပရဟိတကားဖြင့် ရန်ကုန်ဆေးရုံကြီးကို ပို့ဆောင်ပေးခဲ့တယ်လို့ သိရသည်။

#ymg/ppk #Local_News #သာကေတ #ကားနဲ့စက်ဘီးတိုက်မိ
#Yangon-Media-Group

#Local_News
Published_ 26 April 2023

မြန်မာနိုင်ငံမှလယ်ယာထွက်ကုန်များအပြင် အေးခဲအမဲသား၊ အေးခဲဆိတ်သားနှင့်အေးခဲဘဲသားများကိုတရုတ်နိုင်ငံသို့တရားဝင်တင်ပို့နိုင်ရန်ဆွေးနွေးခဲ့ကြောင်းသိရသည်၊၊

တရုတ်နိုင်ငံ၊ စိုက်ပျိုးရေးနှင့်ကျေးလက်ရေးရာ ဝန်ကြီးဌာန၊ ဝန်ကြီး Mr.Tang Renjian၏ ဖိတ်ကြားချက်အရတရုတ်နိုင်ငံပေကျင်းမြို့၌ ရောက်ရှိနေသော စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဦးမင်းနောင်နှင့် စီမံကိန်းဦးစီးဌာနညွှန်ကြားရေးမှူးချုပ် ဦးကျော်ဆွေလင်းတို့ တရုတ်နိုင်ငံစိုက်ပျိုးရေးနှင့် ကျေးလက်ရေးရာဝန်ကြီးဌာန၊ ဒုတိယဝန်ကြီး H.E. Mr. Ma Youxiang ဦးဆောင်သော တာဝန်ရှိသူများနှင့်တွေ့ဆုံစဥ်ထည့်သွင်းဆွေးနွေးခဲ့ခြင်းဖြစ်သည်၊၊

မြန်မာနိုင်ငံမှပြည်ထောင်စုဝန်ကြီးနှင့်တာဝန်ရှိသူများသည် အာဆီယံ−တရုတ်စိုက်ပျိုးရေးဆိုင်ရာ ဖွံ့ဖြိုးတိုးတက်ရေးနှင့် စားရေရိက္ခာဖူလုံမှုရှိစေရေး အထိမ်းအမှတ်နှစ်ဖွင့်ပွဲအခမ်းအနား၊ အာဆီယံ-တရုတ် ဒစ်ဂျစ်တယ်နည်းပညာအသုံးပြု စိုက်ပျိုးရေးဆိုင်ရာ ဖိုရမ်နှင့် (၂၄)ကြိမ်မြောက် သိပ္ပံနည်းကျစိုက်ပျိုးထားသည့် ဟင်းသီးဟင်းရွက်ပြပွဲများသို့ တက်ရောက်ရန် တရုတ်နိုင်ငံပေကျင်းမြို့ကိုရောက်နေကြခြင်းဖြစ်သည်၊၊

ဆွေးနွေးပွဲတွင် မြန်မာနှင့်တရုတ်နိုင်ငံကြား လယ်ယာထွက်ကုန်များဖြစ်သည့် သီးနှံထွက်ကုန်များသာမက ပြုပြင်ထားသောအေးခဲ အမဲသား၊ အေးခဲဆိတ်သားနှင့် အေးခဲဘဲသားစသည်တို့ကို တရုတ် နိုင်ငံသို့တရားဝင်တင်ပို့နိုင်ရေး၊ တရုတ်-မြန်မာစီးပွားရေးစင်္ကြံ ပူးတွဲကော်မတီအောက်တွင် လယ်ယာကဏ္ဍ ပူးပေါင်းဆောင်ရွက်မှုလုပ်ငန်းကော်မတီ အစည်းအဝေးဆက်လက်ကျင်းပနိုင်ရေး၊ မြန်မာနှင့်တရုတ်စိုက်ပျိုးရေးနှင့်ကျေးလက်ရေးရာဝန်ကြီးဌာန ပုဂ္ဂလိကကဏ္ဍမှ ကုမ္ပဏီများပူးပေါင်းပြီးစပ်မျိုး နေကြာနှင့်အာလူးမျိုးအပါအဝင် အခြားအရေးကြီးသီးနှံများ၏ မျိုးမွေးမြူထုတ်လုပ်ခြင်းလုပ်ငန်းများနှင့် နယ်စပ်ဖြတ်ကျော် တိရစ္ဆာန်ကူးစက် ရောဂါ ထိန်းချုပ်မှုလုပ်ငန်းများပူးပေါင်းဆောင်ရွက်နိုင်ရေး၊ တရုတ်-မြန်မာ နယ်စပ်အနီးရှိ ကွတ်ခိုင်မြို့နယ်၌ တိရစ္ဆာန်ရောဂါစောင့်ကြည့်ရေးစခန်းကို တရုတ်နိုင်ငံမှ ပညာရှင်များလာရောက်စစ်ဆေး၍ အတည်ပြုနိုင်ရေး၊ မြန်မာ့မွေးမြူ ရေး တောင်သူများ၏ သိုး၊ ဆိတ်မွေးမြူရေးလုပ်ငန်းများ အောင်မြင်စွာတိုးချဲ့ဆောင်ရွက်နိုင်ရေးအတွက် တရုတ်နိုင်ငံမှနည်းပညာနှင့် မျိုးကောင်းမျိုးသန့်များ ကူညီထောက်ပံ့ပေးနိုင်ရေး၊ မဲခေါင်-လန်ချန်း ပူးပေါင်း ဆောင်ရွက်မှု အထူးရန်ပုံငွေကူညီထောက်ပံ့မှုများ ဆက်လက်ပံ့ပိုးဆောင်ရွက်ပေးနိုင်ရေးဆိုင်ရာများကို ညှိနှိုင်းဆွေးနွေးခဲ့ကြကြောင်း သိရသည်၊၊

၂၀၂၂-၂၀၂၃ ခုနှစ်များတွင်တရုတ်နိုင်ငံနှင့် မြန်မာ နိုင်ငံတို့အကြား ကုန်သွယ်မှုတန်ဖိုးသည် အမေရိကန်ဒေါ်လာ (၂) ဘီလီယံကျော်ရှိကြောင်းလည်းစိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဦးမင်းနောင်က ထည့်သွင်းပြောကြားခဲ့သည်၊၊

#ymg/tthl #Local_News #အေးခဲဆိတ်သား #အေးခဲဘဲသား #တရုတ်နိုင်ငံ #တရားဝင်တင်ပို့
#YMG #Yangon_Media_Group

#Local_News
Published _26 April 2023

တောင်ကိုရီးယားတွင် ယနေ့ ဧပြီလ ၂၆ ရက် နံနက်ပိုင်းက မြန်မာအလုပ်သမားတစ်ဦး လုပ်ငန်းခွင်အတွင်း နှလုံးရပ်၍ ရုတ်တစ်ရက် သေဆုံးခဲ့ကြောင်း သိရသည်။

တောင်ကိုရီးယားနိုင်ငံ ချောင်နန်မြို့ရှိ စက်ရုံတွင်သေဆုံးခဲ့ခြင်းဖြစ်ကြောင်း၊ သေဆုံးသူမှာ
အသက်(၃၉)နှစ်အရွယ် ကိုမျိုးနိုင်အေးဆိုသူဖြစ်ကြောင်း သိရသည်။

"စက်ရုံမှာ ပစ္စည်းတွေကို ကွန်တိန်နာပေါ်က ချနေရင်းနဲ့ နှလုံးအောင့်ပြီး မောပြီးတော့ မူမူးလဲသွားတ၊ ချွန်နမ်ပြည်နယ် ချောင်နန်မြို့ ဒန်ဂု့တက္ကသိုလ် ဆေးရုံကြီးကိုပို့တယ်၊ ဆေးကုနေရင်းဆုံးသွားတာ"ဟု ကိုရီးယားနေ မြန်မာ တစ်ဦးကဆိုသည်။

ကိုမျိုးနိုင်အေးမှာ  မြင်းခြံမြို့ကဖြစ်ပြီး တောင်ကိုရီးယားသို့ ဒုတိယအကြိမ်ရောက်ရှိ အလုပ်လုပ်ကိုင်နေသူဖြစ်ဖြစ်ကြောင်း၊ ကွယ်လွန်ချိန်တွင် ဇနီးနှင့် (၅)နှစ်အရွယ်ကလေးတစ်ဦး၊ (၈)လသား အရွယ် ကလေးတစ်ဦးကျန်ခဲ့ကြောင်း သိရသည်။

#ymg/pl #Local_News #တောင်ကိုရီးယား #မြန်မာအလုပ်သမား
#YMG #Yangon _Media _Group

#World_Politics
Published 26 April 2023

အမေရိကန်သမ္မတ'ဂျိုးဘိုင်ဒင်'က ၂၀၂၄ ပြန်လည်ရွေးကောက်ပွဲမှာ ပါဝင်ဦးမယ်လို့ ဧပြီ ၂၅ ရက်နေ့က ကြေညာလိုက်ကာ စံချိန်တင်အသက် ၈၀ နှစ်အရွယ်မှာ 'ဒေါ်နယ်ထရမ့်'နဲ့ မကျေပွဲပြန်လည်ယှဉ်ပြိုင်နိုင်ရန် ပြိုင်ဆိုင်မှုပြင်းထန်တဲ့ မဲဆွယ်စည်းရုံးရေးတွေ လုပ်ဆောင်သွားဦးမှာဖြစ်ပါတယ်။

၂၀၂၀ မှာ ထရမ့်နဲ့စတင်ယှဉ်ပြိုင်ခဲ့တဲ့နေ့ကစလို့ ၄ နှစ်မြောက်တဲ့နေ့မှာ ဘိုင်ဒင်မိန့်ခွန်းပြောကြားရာမှာ ရီပတ်ဘလစ်ကန်အစွန်းရောက်တွေလက်ထဲကနေ အမေရိကန်ရဲ့ဒီမိုကရေစီကို ကယ်ဆယ်ရန် တိုက်ပွဲဝင်နေဆဲဖြစ်ကြောင်း ပြောကြားခဲ့ပါတယ်။

ပထမဆုံးအကြိမ်ရွေးကောက်ခံခဲ့ရပြီးနောက် ဒီမိုကရေစီအတွက် တိုက်ခိုက်နေခဲ့ကာ အဆုံးသတ်သွားမယ်လို့ ဆိုခဲ့ပါတယ်။

ပြည်တွင်းဥပဒေပြုရေးရာမှာ ကြီးကြီးမားမားအနိုင်ရခြင်း၊ အရေးကြီးသောနိုင်ငံခြားရေးမူဝါဒရုန်းကန်မှုများ၊ ရုရှားကျူးကျော်မှုကို တွန်းလှန်နေတဲ့ယူကရိန်းအတွက် အနောက်ညွန့်ပေါင်းအဖွဲ့ကို ဦးဆောင်ခြင်း စတာတွေပြုလုပ်ထားပြီးနောက် ဒီမိုကရက်တစ်ပါတီထဲမှာ ဘိုင်ဒင်ကိုယှဉ်မယ့်သူမရှိပါဘူး။

နောက်ထပ်အားထားရာတစ်ချက်က ကိုဗစ်ကပ်ရောဂါအပြီး အမေရိကန်စီးပွားရေးပြန်လည်ထူထောင်ရေး လုပ်ဆောင်ချက်များဖြစ်ပြီး အခြေခံအဆောက်အအုံများ သက်တမ်းတိုးခြင်း၊ နည်းပညာမြင့်လျှပ်စစ်ကားများ၊ တစ်ပိုင်းလျှပ်ကူးပစ္စည်းများ ရင်းနှီးမြှုပ်နှံမှုအားပေးခြင်းတို့မှာ ထောက်ပံ့ပေးခဲ့ပါတယ်။

ဘီလီယံနာတွေအတွက် အနည်းဆုံးအခွန်နှုန်းသတ်မှတ်ချက်ထားရှိသင့်ကြောင်း၊ ဆောက်လုပ်ရေးလုပ်သားတွေ ကျောင်းဆရာတွေ မီးသတ်သမားတွေ ရဲတွေ သူနာပြုတွေက ဘီလီယံနာတွေထက် အခွန်နှုန်းပိုမများသင့်ကြောင်း ပြောကြားခဲ့ရာ လက်ခုပ်သံများဆူညံသွားခဲ့ပြီး နောက်ထပ် ၄ နှစ်ဆိုပြီး အော်ဟစ်နေခဲ့ကြပါတယ်။

ဒီအတွက် ဘိုင်ဒင်ဟာထောက်ခံမှုတွေရခဲ့ပေမယ့် သူ့အသက်အရွယ်နဲ့မမျှတဲ့ စစ်ဆေးမှုတွေနဲ့ ရင်ဆိုင်ရနိုင်ပါတယ်။

ဒုတိယအကြိမ်သမ္မတရာထူးသက်တမ်းကုန်ဆုံးချိန်မှာ အသက် ၈၆ နှစ်ရှိနေမှာဖြစ်တဲ့ ဘိုင်ဒင်အတွက် ဆေးစစ်အဖွဲ့ကစစ်ဆေးခဲ့ရာမှာ သမ္မတရာထူးထမ်းဆောင်ရန် ကျန်းမာကြံ့ခိုင်တယ်လို့ တွေ့ရှိခဲ့ပေမယ့် သူ့ကိုထောက်ခံသူအများစုကပင် ဘိုင်ဒင်ဟာအိုမင်းလွန်းနေပြီလို့ ယူဆနေကြပါတယ်။

ထရမ့်ကတော့ ရာဇဝတ်မှုဖြင့် စွဲချက်တင်ခံထားရတဲ့ ပထမဆုံးသမ္မတဟောင်းဖြစ်နေတဲ့အပြင် ၂၀၂၀ ရွေးကောက်ပွဲမှာ ဘိုင်ဒင်ကိုရှုံးနိမ့်ခဲ့ခြင်းအား ပြောင်းလဲရန်ကြိုးပမ်းမှုနဲ့ပတ်သက်ပြီး စုံစမ်းစစ်ဆေးခံနေရပေမယ့်လည်း ရီပတ်ဘလစ်ကန်ထဲမှာတော့ ရှေ့ဆုံးကဦးဆောင်နေသူဖြစ်ပါတယ်။

ထရမ့်က ဘိုင်ဒင်ကို ဆိုးရွားပြီးမအောင်မြင်တဲ့ သမ္မတလို့ သမုတ်ခဲ့ပါတယ်။
ဘိုင်ဒင်ဟာ ထရမ့်နဲ့ယှဉ်ရင် ပျော့ညံ့နေပုံပေါက်ပေမယ့် အစွန်းရောက်ဘက်ကိုဦးတည်နေတဲ့ခေတ်ကြီးမှာ သူ့ရဲ့အလယ်အလတ်လမ်းစဉ်ဟောင်းကြီးကို လျှို့ဝှက်လက်နက်အဖြစ် အသုံးပြုလာနိုင်ပါတယ်။

သူ့နေရာကိုယှဉ်ပြိုင်မယ့်သူတွေနဲ့ နှိုင်းယှဉ်လိုက်ရင် ဘိုင်ဒင်က အားသာနေပြီး လူတွေကသူ့ကိုပဲ မဲဆန္ဒပေးလိမ့်မယ်ဆိုတာ စစ်တမ်းကောက်ခံချက်များအရ သိနိုင်ပါတယ်လို့ ဒီမိုကရက်တစ်လွှတ်တော်အမတ်'ခရစ္စကွန်းစ်'က CNN ကို ပြောကြားခဲ့ပါတယ်။

Source: CNA #World_Politics #ဂျိုးဘိုင်ဒင် #သမ္မတရွေးကောက်ပွဲ
#YMG #Yangon_Media_Group

#Local_News
Published_ 26 April 2023

ရန်ကုန် အင်းစိန် ခုံးတံတားအောက် အမျိုးသား ၁ ဦး ပြင်ပဒဏ်ရာမရှိဘဲ သေဆုံးမှု ဖြစ်ပွါးခဲ့တယ်လို့ တွဲလက်လူမှုကူညီရေးအဖွဲ့မှ သိရသည်။

အင်းစိန် ခုံးတံတားအောက်တွင် အိမ်ခြေရာမဲ့ သေဆုံးနေသော ပိုင်ရှင်မဲ့ အမျိုးသားရုပ်အလောင်း တစ်လောင်း တွေ့ရှိကြောင်း ဧပြီ ၂၅ ရက်နေ့ ညပိုင်းက တာဝန်သိပြည်သူများမှ ဆက်သွယ် အကြောင်းကြားလာလို သွားရောက်ကူညီခဲ့ကြောင်း သိရသည်။

သေဆုံးနေသည့် အမျိုးသားမှာ ခန့်မှန်းအသက်-၄၀ ဝန်းကျင်ခန့်ဖြစ်ပြီး ပြင်ပဒဏ်ရာ မရှိသေဆုံးသူ အမျိုးသားရုပ်အလောင်း အား PR-013 နံပါတ် ဖြင့် အင်းစိန် ရင်ခွဲ ရုံ သို စနစ် တကျ ထုတ်ပိုးပို့ဆောင်ခဲ့ကြောင်း သိရသည်။

#ymg/ppk #Local_News #ရန်ကုန် #အင်းစိန်ခုံးတံတားအောက် #သေဆုံး
#YMG #Yangon-Media-Group

#World_Health
Published 26 April 2023

ပြီးခဲ့တဲ့နှစ်များအတွင်း အဆီကျဆေးများအကြောင်း ပြောဆိုနေကြပြီး အစားအစာဖြင့် ကိုယ်အလေးချိန်ထိန်းချင်သူတွေဟာလည်း ပိုမိုလွယ်ကူတဲ့နည်းလမ်းကို လိုက်ချင်ကြပါတယ်။

လတ်တလောလေ့လာချက်အရ ဒီဆေးတွေမှာ အံ့အားသင့်ဖွယ်ကောင်းတဲ့ ဘေးထွက်ဆိုးကျိုးတွေရှိနေပါတယ်။

ထိုဆေးတွေကို ၁ နှစ်ကနေ ၃ နှစ်အတွင်းအသုံးပြုသူတွေဟာ သိုင်းရွိုက်ကင်ဆာဖြစ်နိုင်ချေ ၅၈ ရာခိုင်နှုန်းပိုများကြောင်း မှတ်ချက်ပြုခဲ့ကြပါတယ်။

သိုင်းရွိုက်ကင်ဆာက လက္ခဏာပျော့ပျောင်းပြီး ဖြည်းဖြည်းချင်းအဆင့်တက်လာကာ လည်ပင်းစစ်ဆေးမှုပြုလုပ်ခါမှ တွေ့ရှိတတ်ပါတယ်။

အဖြစ်များတဲ့လက္ခဏာတွေကတော့ ရုတ်တရက်အသံဝင်ခြင်း၊ မျိုချရ အသက်ရှူရခက်ခဲခြင်းတို့ဖြစ်ပါတယ်။

လက်ရှိမှာ အဝလွန်ခြင်းအတွက် ဈေးကွက်မှာရောင်းနေတဲ့ဆေးတွေဟာ ဆီးချိုကုသဖို့ နှစ်ပေါင်းများစွာအသုံးပြုနေတာဖြစ်ပါတယ်။

ဗာမောင့်ရှိ မောင့်ပယ်လီယာတက္ကသိုလ်မှ သုတေသီများက ၂၀၀၆ မှ ၂၀၁၈ အတွင်း အဆိုပါဆေးများဖြင့် ကုသနေတဲ့ ဆီးချိုရောဂါသည်တွေကို လေ့လာခဲ့ကြပါတယ်။

ထိုအခါမှာ သိုင်းရွိုက်ကင်ဆာဖြစ်နိုင်ချေ အမှန်တကယ်များနေကြောင်း တွေ့ရှိခဲ့ကြပါတယ်။

ဘယ်လိုပဲဖြစ်ဖြစ် ထိုဆေးတွေဟာ ဘေးထွက်ဆိုးကျိုးထက် အကျိုးအာနိသင်ပိုများတယ်ဆိုမှ အသုံးပြုသင့်ပြီး ဆရာဝန်နဲ့လည်း ပုံမှန်ပြသသင့်ပါတယ်။

သိုင်းရွိုက်ကင်ဆာအပြင် အခြားဘေးထွက်ဆိုးကျိုးများပါရှိနေတာကိုလည်း သတိပြုသင့်ပါတယ်။

အဖြစ်အများဆုံးကတော့ မူးဝေခြင်း၊ ဝမ်းဗိုက်နာခြင်း၊ ဝမ်းလျှောခြင်း၊ ဝမ်းချုပ်ခြင်းတို့ဖြစ်ပါတယ်။

ဒါတွေကလည်း လက္ခဏာအပျော့စားသာဖြစ်ပြီး အချိန်ကြာတာနဲ့အမျှ သက်သာသွားတတ်ပါတယ်။

နောက်ထပ်ရှားပါးဘေးထွက်ဆိုးကျိုးကတော့ ပန်ကရိယရောင်ရမ်းခြင်း၊ သည်းခြေအိတ်ရောင်ရမ်းခြင်းတို့ ဖြစ်တတ်ပါတယ်။

အစ္စရေးလ်မှာ အဆီကျဆေး ၂ မျိုးအသုံးပြုနေကြပြီး Liraglutide နဲ့ Semaglutide တို့ဖြစ်ပါတယ်။

ထိုဆေးတွေက အစာစားပြီးတဲ့အခါ အစာချေစနစ်မှဟော်မုန်းထုတ်လုပ်ပေးကာ အစာချေစနစ်နဲ့ဦးနှောက်ရှိ ဟော်မုန်းလက်ခံနေရာများနဲ့ ဆက်စပ်နေပြီး ဘေးထွက်ဆိုးကျိုးများစွာရှိပါတယ်။

ဦးနှောက်ထဲမှာ အစာစားချင်စိတ်ကို လျှော့ချပေးကာ အစာချေစနစ်မှာတော့ အစာရှင်းလင်းရေးနှောင့်နှေးအောင်ပြုလုပ်ပြီး အစာကိုပိုမိုကြာရှည်တည်ရှိစေပါတယ်။

ဒါ့အပြင် ပန်ကရိယကိုလည်းသက်ရောက်မှုရှိကာ အင်ဆူလင်ထုတ်လုပ်ပေးပြီး သွေးတွင်းသကြားဓာတ်ကို ထိန်းညှိပေးပါတယ်။

ကိုယ်အလေးချိန်နှင့်အရပ်အမြင့်ညွှန်းကိန်း (BMI) ၃၀ နဲ့အထက်လူတွေမှာ ထိုဆေးတွေကို ညွှန်းပေးတတ်ကြပါတယ်။

ဒါပေမဲ့ ထိုဆေးတွေရဲ့သက်ရောက်မှုနဲ့ပတ်သက်ပြီး ကိုယ်အလေးချိန်အပေါ် ယုံကြည်စိတ်ချရတဲ့ အချက်အလက်မျိုးမတွေ့ရပါဘူး။

အခြားဆေးတွေလိုပဲ လူနာအနေနဲ့ မလိုအပ်ဘူးဆိုရင် ဘာအာနိသင်မှမရဘဲ ဘေးထွက်ဆိုးကျိုးတွေသာ ရလာပါလိမ့်မယ်။

#Source: The Jerusalem Post #World_Health #အဆီကျဆေးဝါး #ဘေးကင်းစိတ်ချ
#YMG#Yangon_Media_Group

#Local_News
Published_ 26 April 2023

အလုပ်ခေါ်စာအသစ် တင်ခွင့်အတွက် ပိတ်သိမ်းထားခြင်း ခံထားရသော ပြည်ပအလုပ်အကိုင်ရှာဖွေရေးတရားဝင်(ထိုင်း)လိုင်စင်ရအေဂျင်စီ ၁၃၃ ခုကို ပြန်လည်ဖြေလျော့ပေးလိုက်ကြောင်း သိရသည်။

မြဝတီမြို့တွင် MoU အလုပ်သမားအတွက် နိုင်ငံကူးလက်မှတ်လျှောက်ထားမှုပြုလုပ်ခဲ့သည့် အတွက် ပြည်ထဲရေးဝန်ကြီးဌာန ညွှန်ကြားချက်ဖြင့် စစ်ဆေးခဲ့ကာ ပြီးခဲ့သည့် ဇန်နဝါရီ လ အတွင်းက Black List စာရင်းသွင်းခဲ့ခြင်းဖြစ်ကြောင်း သိရသည်။

ယင်းသို့ဖြေလျော့ပေးခဲ့ခြင်းကြောင့် စစ်ဆေးခံခဲ့ရသည့် အေဂျင်စီ ၁၃၃ ခုထဲတွင် အေဂျင်စီ ၁၆ ခု အနေဖြင့် လာမည့် မေလ ၂ ရက်မှ စတင်ကာ နဂိုအတိုင်း အလုပ်ခေါ်စာ အသစ်များလက်ခံ၍ စာချုပ်အသစ်များချုပ်ဆိုနိုင်တော့မည်ဖြစ်ကြောင်း၊ ကျန်အေဂျင်စီ ၁၁၇ ခု အနေဖြင့် အလုပ်ခေါ်စာ အသစ်တစ်ခု စာချုပ်ချုပ်ဆိုရာ၌ ကန့်သတ်အနေဖြင့် အလုပ်သမား ၁၀၀ ဦးသာချုပ်ဆိုခွင့်ပြုကြောင်း ပြည်ပအလုပ်အကိုင်ဝန်ဆောင်မှုလုပ်ကိုင်နေသူများထံမှ သိရသည်။

#ymg/pl #Local_News # အေဂျင်စီ
#YMG #Yangon_Media_Group

#Local_News
Published-25 April 2023

နစကလက်ထက်တွင် ပညာရေး ကဏ္ဍအတွက် ဘတ်ဂျက်များတိုးမြှင့်ခွင့်ပြုပေးထားကြောင်း ဧပြီလ ၂၅ ရက်က နေပြည်တော်၌ ပြုလုပ်သော မြန်မာနိုင်ငံလုံးဆိုင်ရာ ပညာရေးညီလာခံ(၂၀၂၃) အတွင်း နိုင်ငံတော်စီမံ အုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်း က ပြောသည်။

မြန်မာနိုင်ငံလုံး ဆိုင်ရာ ပညာရေးညီလာခံ(၂၀၂၃)ကို နိုင်ငံတော်စီမံအုပ်ချုပ် ရေးကောင်စီလက်ထက်တွင် မေလဆန်းပိုင်း၌ ပထမဆုံးအကြိမ် ကျင်းပရန် လုပ်ဆောင်နေခြင်း ဖြစ်ကြောင်း၊ဖွင့်ပွဲအခမ်းအနားတွင် နိုင်ငံတကာညီလာခံများနည်းတူ Keynote Address များ၊ Panel Discussion များအပြင် Parallel Session နှင့်အတူ Themes, Sub-themes iPresentation ၊ အမေးအဖြေ နှင့် အကြံပြုချက် ကဏ္ဍများပါဝင်မည်ဖြစ်ကြောင်း သိရသည်။

ပညာရေးနှင့်ပတ်သက်၍ နိုင်ငံတော်စီမံအုပ်ချုပ်ရေးကောင်စီလက်ထက်တွင် ပညာရေး ကဏ္ဍအတွက် ဘတ်ဂျက်များတိုးမြှင့်ခွင့်ပြုပေးထားသည့်အပြင် ဆရာ၊ ဆရာမများ ဒေသခံများအတွက်လည်း ထောက်ပံ့ပေးခဲ့ကြောင်း၊ ကျန်းမာရေးကဏ္ဍအတွက်လည်း အလားတူ ထောက်ပံ့ ပေးခဲ့ကြောင်း၊ ပညာရေးကဏ္ဍအတွက် ခွင့်ပြုပေးခဲ့သည့် အသုံးစရိတ်များကို ပြန်ကြည့် မည်ဆိုပါက ၂၀၂၁ - ၂၀၂၂ခုနှစ် (၆)လဘတ်ဂျက် BE တွင် ငွေကျပ်သန်းပေါင်း ၁၁သိန်းကျော်ခန့် နှင့် RE တွင် ငွေကျပ်သန်းပေါင်း ၁၁ သိန်း ကျော်ခန့်ခွင့် ပြုပေးထားခဲ့ကြောင်း၊ BE ၏ GDP ကိုကြည့်မည်ဆိုပါက ၁ ဒသမ ၅၅ ရာခိုင်နှုန်းနှင့် RE ၏ GDP အချိုးကိုကြည့်မည်ဆိုပါက ၁ ဒသမ ၅၅ရာခိုင်နှုန်း ခွင့်ပြုပေးခဲ့ကြောင်း၊ ၂၀၂၂ - ၂၀၂၃ခုနှစ် ကို ပြန်ကြည့်မည်ဆိုပါက BEတွင် ခွင့်ပြုငွေကျပ် သန်းပေါင်း ၂၁ သိန်းကျော်နှင့် RE တွင်ငွေကျပ်သန်းပေါင်း ၂၂သိန်းကျော် တိုးမြှင့်ပေးခဲ့ကြောင်း၊ GDP ရာခိုင်နှုန်းကို ပြန်ကြည့်မည်ဆိုပါက ၁ ဒသမ ၇၃ရာ ခိုင်နှုန်း နှင့် RE တွင် ၁ ဒသမ ၈၀ ရာခိုင်နှုန်းအထိ ရှိပြီး၂၀၂၃ - ၂၀၂၄ ခုနှစ် BE ၏ ခွင့်ပြု ငွေကို ကြည့်မည်ဆိုပါက ငွေကျပ်သန်းပေါင်း ၂၁ ဒသမ ၈သိန်းကျော် ခွင့်ပြုပေးထားပြီးဖြစ်ကြောင်းလည်း သိရသည်။

Naypyitaw State Academy ကို ၂၀၂၂ ခုနှစ် နိုဝင်ဘာလ ၉ ရက်တွင် ဖွင့်လှစ်ပေးခဲ့သည့်အပြင် ဆရာ၊ ဆရာမများ နှင့်ပတ်သက်၍ ၂၀၂၁ အောက်တိုဘာလမှစတင်၍ ပါရဂူဘွဲ့အတွက် ငွေကျပ်သုံးသောင်း၊ မဟာဘွဲ့အတွက် ငွေကျပ် ၂သောင်းခွဲ၊ ဘွဲ့လွန်ဒီပလိုမာအတွက် ငွေကျပ်တစ်သောင်း ထောက်ပံ့ ခဲ့ပြီး ကျောင်းအလိုက် အုပ်ချုပ်မှုစရိတ်များကိုလည်း ထောက်ပံ့ခဲ့ကြောင်း နစက သတင်းထုတ်ပြန်ရေးက သိရသည်။

ညီလာခံအတွင်း ကာလတို၊ ကာလလတ်စီမံကိန်းများတွင် နောင် အနာဂတ် မျိုးဆက်သစ်များအတွက် ကောင်းမွန်သည့် ပညာရေးရလဒ်များ နှင့် ကောင်း မွန်သည့် ပညာရေး အခြေအနေများ ရရှိစေရန် ဝိုင်းဝန်းဆွေးနွေးသွား ကြမည် ဖြစ်ကြောင်း သိရသည်။

#ymg/pl #Local_News #နစက #ပညာရေးကဏ္ဍ #ဘတ်ဂျက် #နစကဒုဥက္ကဌ
#YMG #Yangon_Media_Group

#World_Health
Published 26 April 2023

ခံတွင်းအထဲကနေရာဟာ မှောင်မည်း၊ ပူနွေးတာကြောင့် ဘက်တီးရီးယားများ ပေါက်ဖွားရန်အကောင်းဆုံးနေရာဖြစ်ပြီး စားလိုက်တဲ့ စားစရာသောက်စရာတွေက သူတို့အတွက် အာဟာရဖြည့်တင်းပေးသလို ဖြစ်နေပါတယ်။

သွားနဲ့သွားဖုံးတွေမှာ အန္တရာယ်ပြုဘက်တီးရီးယားများ စုပြုံလာတဲ့အခါ သွားအနားတဝိုက်ရှိ သွားဖုံးနဲ့အရိုးတွေမှာ ရောဂါပိုးကူးစက်လာနိုင်ပြီး ရောဂါဖြစ်ပွားနိုင်ပါတယ်။

ပါးစပ်ထဲမှာ ဒီလိုမျိုးရောဂါပိုးဝင်ရောက်ခြင်းကနေ ခန္ဓာကိုယ်အခြားအစိတ်အပိုင်းတွေကိုပါ သက်ရောက်လာနိုင်ကြောင်း မစ်ဆူရီကန်းဆက်စ်မြို့တက္ကသိုလ်မှ ခံတွင်းကျန်းမာရေးပရော်ဖက်ဆာ'ကင်ဘာလီဘရေး'က ပြောပြပါတယ်။

သွားဖုံးရောင်ရောဂါကနေ ဆီးချို၊ နှလုံးရောဂါ၊ အသက်ရှူလမ်းကြောင်းရောဂါ၊ ဒီမန်ရှာတို့နဲ့ပါ ဆက်စပ်နေကြောင်း တွေ့ရှိထားပါတယ်။

အမေရိကန်မှာ အသက် ၃၀ နှင့်အထက် လူဦးရေ ၄၇ ရာခိုင်နှုန်းဟာ သွားဖုံးရောင်ရောဂါခံစားနေရကြောင်း ရောဂါထိန်းချုပ်ကာကွယ်ရေးစင်တာက ပြောကြားလိုက်ပါတယ်။

အစောပိုင်းမှာ သွားဖုံးတွေ ရောင်ရမ်းနီရဲတတ်ကာ အလွယ်တကူသွေးထွက်တတ်တဲ့ သွားဖုံးရောင်ရောဂါဖြစ်နိုင်ပါတယ်။

မကုသဘဲထားလိုက်ရင် သွားဖုံးတွေ လျော့ရဲလာပြီး အရိုးဆုံးရှုံးကာ သွားတွေကျွတ်ထွက်လာတဲ့ ရေစီးကမ်းပြိုရောဂါအထိ ဖြစ်လာနိုင်ပါတယ်။

ထိုအခါမှာ သွားဖုံးနဲ့သွားများရှိ ဘက်တီးရီးယားများနဲ့ အဆိပ်အတောက်ပစ္စည်းတွေက သွေးထဲသို့ရောက်ကာ အင်္ဂါအနှံ့အပြားသို့ ပျံ့နှံ့သွားကြောင်း နယူးယော့ခ်ခံတွင်းကောလိပ်တက္ကသိုလ်မှ ပရော်ဖက်ဆာ'အာနန်ဒါဒါဆန်ယာကီ'က ပြောပြခဲ့ပါတယ်။

- ဆီးချို

ခံတွင်းကျန်းမာရေးနဲ့ ရောဂါဘယကြား အထင်ရှားဆုံးတစ်ခုကတော့ ဆီးချိုရောဂါပါပဲ။

သွားဖုံးရောင်ခြင်းအခြေအနေကနေ အင်ဆူလင်တုန့်ပြန်နိုင်စွမ်းကိုဆိုးရွားစေပြီး ဆီးချိုတက်စေတာဖြစ်ပါတယ်။

- အဆုတ်ရောင်ရောဂါ

ပါးစပ်မှ ဘက်တီးရီးယားအမြောက်အများက အဆုတ်ထဲရှူသွင်းမိပြီး ဝင်ရောက်လာတဲ့အခါ အဆုတ်ရောင်ရောဂါဖြစ်တတ်ပါတယ်။

သွားသန့်ရှင်းရေးပြုလုပ်ခြင်း၊ ပိုးသတ်ဆေးဖြင့်ကုသခြင်းတို့ဖြင့် ထိုကဲ့သို့အဆုတ်ရောင်ဖြစ်ပွားနိုင်ချေကို လျှော့ချပေးနိုင်ပါတယ်။

- နှလုံးသွေးကြောရောဂါများ

ရေစီးကမ်းပြိုရောဂါနဲ့ နှလုံးဖောက်ခြင်း၊ လေဖြတ်ခြင်း၊ သွေးကြောပိတ်ဆို့ခြင်းတို့ကြား ဆက်စပ်နေပုံကို ၂၀၂၀ က ဖော်ပြထားပါတယ်။

ပါးစပ်မှာရောဂါဖြစ်စေတဲ့ဘက်တီးရီးယားတွေက နှလုံးရောဂါသည်တွေမှာ သွေးကြောတွေထံရောက်ရှိစေပြီး နှလုံးသွေးကြောဆိုင်ရာရောဂါတွေ ဖြစ်ပွားစေတာဖြစ်ပါတယ်။

- ကိုယ်ဝန်ဆောင်ပြဿနာများ

ကိုယ်ဝန်ဆောင်စဉ် သွားဖုံးရောင်ရောဂါပြင်းထန်ပါက လမစေ့ဘဲမွေးခြင်း၊ ကလေးကိုယ်အလေးချိန်နည်းပါးခြင်း၊ ကလေးအသေမွေးခြင်းတို့ ဖြစ်စေနိုင်ကြောင်း လေ့လာတွေ့ရှိထားပါတယ်။

ခံတွင်းမှ ဘက်တီးရီးယားတွေက ခုခံအားဆဲလ်တွေကို လှုံ့ဆော်စေကာ သားအိမ်အတွင်း ရောင်ရမ်းခြင်းကို ဖြစ်စေပြီး အချင်းနဲ့ သန္ဓေသားတစ်ရှူးတို့ကို ဖိနှိပ်စေပါတယ်။

- ဒီမန်ရှာ

ရေစီးကမ်းပြိုရောဂါကနေ ဗဟိုအာရုံကြောစနစ်ဖြင့် ဦးနှောက်သို့တိုက်ရိုက်ကူးစက်ခြင်း ဒါမှမဟုတ် နာတာရှည်ရောင်ရမ်းခြင်းကနေ သွယ်ဝိုက်ပြီးကူးစက်တာမျိုးဖြစ်နိုင်ပါတယ်။

ခံတွင်းဘက်တီးရီးယားသက်သက်ကြောင့်တော့ အယ်လ်ဇိုင်းမားဖြစ်စေတာမဟုတ်ဘဲ ထိုကဲ့သို့အခြေအနေရှိသူတွေမှာ အဖြစ်များနိုင်တဲ့သဘောသာဖြစ်ပါတယ်။

ခံတွင်းကျန်းမာရေးထိန်းသိမ်းရန် အကောင်းဆုံးနည်းလမ်းကတော့ ခံတွင်းထိန်းသိမ်းစောင့်ရှောက်ရေးနည်းလမ်းအတိုင်း လိုက်နာခြင်း၊ တစ်နေ့ ၂ ခါသွားတိုက်ခြင်းတို့ပဲဖြစ်ပါတယ်။

Source: CNA #World_Health #ကျန်းမာရေး # ခံတွင်းနှင့်သွားဖုံးသန့်ရှင်းရေး
#YMG#Yangon_Media_Group

#Local_News
Published_ 26 April 2023

ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်ရှိ မာရဝိဇယ ဗုဒ္ဓ ဥယျာဉ်တော်အတွင်းတည်ထားကိုးကွယ်ရန် ဆောင်ရွက်လျက်ရှိသည့် မာရဝိဇယဗုဒ္ဓ ရုပ်ပွားတော်မြတ်ကြီး တည်ဆောက်ပြီးစီးမှု ၉၅ ရာခိုင်နှုန်း ရှိပြီ ဖြစ်ကြောင်း သိရသည်။

ဧပြီလ ၂၅ ရက်တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် က မာရဝိဇယ ဗုဒ္ဓရုပ်ပွားတော်မြတ်ကြီး ထုဆစ်ပြီးစီးမှု၊ တံခွန်တိုင် တည်ဆောက်နေမှု၊ ဂန္ဓကုဋိတိုက်များ တည်ဆောက်ပြီးစီးမှု၊ သုဓမ္မာဇရပ်များတည် ဆောက်ပြီးစီးမှု၊ ရေပန်းရင်ပြင် တည်ဆောက်ပြီးစီးမှု၊ အဝင်မုဒ်ဦးများ တည်ဆောက် ပြီးစီးမှု၊ ကျောက်စာရုံစေတီတော်များတည်ဆောက်ပြီးစီးမှု၊ မုစလိန္ဒအိုင် တည်ဆောက် ပြီးစီးမှုအခြေအနေများကိုသွားရောက်ကြည့်ရှုခဲ့ကြောင်းလည်း သိရသည်။

မာရဝိဇယဗုဒ္ဓ ရုပ်ပွားတော်မြတ်ကြီးအား မြန်မာနိုင်ငံတွင် ထေရဝါဒဗုဒ္ဓ သာသနာတော်ကြီး ခိုင်မာစွာ ထွန်းလင်းတောက်ပလျက်ရှိသည်ကို ကမ္ဘာသို့ ပြသရန်၊ မြန်မာနိုင်ငံသည်ထေရဝါဒ ဗုဒ္ဓဘာသာကိုးကွယ်မှု၏ ဗဟိုချက်ဖြစ်စေရန်၊ တိုင်းပြည် အေးချမ်း သာယာမှုရှိစေရန်၊ ကမ္ဘာကြီးငြိမ်းချမ်းသာယာမှုဖြစ်စေရန် စသည့် ရည်ရွယ် ချက် ၄ ရပ်ဖြင့် တည်ထားကိုးကွယ်ရန် လုပ်ဆောင်နေခြင်း ဖြစ်ကြောင်း သိရသည်။

ဗုဒ္ဓရုပ်ပွားတော်မြတ်ကြီး၏ ဆင်းတုတော်အပိုင်း (၁၊၂၊၃)တို့ကိုတွဲဆက်ထား သည့် ဆင်းတုတော်အစိတ်အပိုင်းကြီးအား ပြီးခဲ့သည့် ဇန်နဝါရီလ ၂၆ ရက် ကရတနာ ပလ္လင်တော်ထက်သို့ စတင်ပင့်ဆောင်ခဲ့ကာ ဇန်နဝါရီလ ၃၁ ရက်တွင် ပလ္လင်တော်ထက် သို့ အောင်မြင်စွာပင့်ဆောင်ပူဇော်နိုင်ခဲ့ကြောင်း၊ဗုဒ္ဓရုပ်ပွားတော်မြတ်ကြီး၏ ရတနာ ပလ္လင်တော်ထက် အလယ်ဗဟိုဌာနများတွင် ဦးဆောင်ဘုရားဒါယကာနစက ဥက္ကဋ္ဌ အမှူးပြုသည့် မြန်မာနိုင်ငံတော်တစ်ဝန်းလုံးမှ (၇)ရက် သား၊ သမီး၊ ဒါယကာ၊ ဒါယိကာမများ၊ ဘုရား စေတနာရှင်၊ အလှူရှင်များက ကုသိုလ်ပြုလှူဒါန်းထားသော အဖိုးတန်ကျောက်မျက် ရတနာဌာပနာတော် ကုသိုလ်ပစ္စည်းများ ဌာပနာသွင်းလှူပူဇော်ခြင်း ကို ဇန်နဝါရီလ ၂၇ နှင့် ဖေဖော်ဝါရီလ ၁၀ ရက် တို့တွင် ပြုလုပ်ခဲ့ကြောင်းလည်း သိရသည်။

ယင်းနောက် ဖေဖော်ဝါရီလ ၁၁ ရက်တွင် ဆင်းတုတော်အပိုင်း ၄ ကိုရတနာ ပလ္လင်တော် ထက်သို့ ပင့်ဆောင်ပူဇော်ခဲ့ရာ ယခုအခါ မာရဝိဇယဗုဒ္ဓရုပ်ပွားတော်မြတ်ကြီး ထုဆစ်မှုမှာ ၉၅ ရာခိုင် နှုန်း ပြီးစီးပြီဖြစ်သည့်အပြင် ဗုဒ္ဓဥယျာဉ်တော်ကြီး အတွင်း သာသနိက အဆောက်အဦများစွာကိုလည်း ထည့်သွင်း တည်ဆောက် လျက်ရှိကြောင်း သိရသည်။

ထို့ပြင် ဆဋ္ဌသင်္ဂါယနာမူ ပိဋကတ်ကျမ်းစာများကို ကမ္ဘာကသိရှိနိုင်ရေးအတွက် စကျင် ကျောက်ချပ်များပေါ်၌ ခေတ်မီစက်ကိရိယာများ အသုံးပြုပြီး ပါဠိအက္ခရာ၊ Romanize Language တို့ဖြင့် ကျောက်စာတော်များ တည်ထား ဆောင်ရွက်လျက်ရှိကြောင်း၊ ထုဆစ်ပြီးစီးသည့် ဗုဒ္ဓမြတ်စွာဘုရား၏နှုတ်ကပါဌ်တော်လာ ပိဋကတ်သုံးပုံ အဋ္ဌကထာ ဋီကာကျမ်းစာများကို မာရဝိဇယဗုဒ္ဓရုပ်ပွားတော်မြတ်ကြီး၏ မျက်နှာတော်မူရာ ရှေ့မျက်နှာစာ၌ စိုက်ထူပူဇော်ထားရှိပြီး ဘုရားဖူးလာ မိဘပြည်သူများအနေဖြင့် ဗုဒ္ဓ ရုပ်ပွားတော်မြတ်ကြီးအား လာရောက်ဖူးမြော်ချိန်တွင် ကျောက်စာတိုက်အတွင်းရှိ ပိဋကတ်သုံးပုံတော်လာ အဋ္ဌကထာဋီကာကျမ်းစာများကို တစ်ပါတည်း လေ့လာနာယူ ကြည်ညိုနိုင်ရေး စီစဉ်ဆောင်ရွက်နေကြောင်းလည်း သိရသည်။

အလားတူ ကမ္ဘာပေါ်ရှိ ဘုန်းတော် ကြီးကျောင်းများသို့ ဖြန့်ဝေရန်အတွက်လည်း ပိဋကတ်ကျမ်းစာအုပ်များကို ပါဠိအက္ခရာနှင့် Romanize Language တို့ဖြင့် ရိုက်နှိပ်ရန် စီမံဆောင်ရွက်လျက်ရှိ ကြောင်း၊ယခုအခါ သာသနိကအဆောက်အအုံများနှင့် ဗုဒ္ဓဥယျာဉ်တည်ဆောက်မှုမှာ ၈၂ ရာခိုင်နှုန်းခန့် ပြီးစီးပြီဖြစ်ကြောင်းလည်း သိရသည်။

ymg/pl
#Local_News #မာရဝိဇယဗုဒ္ဓရုပ်ပွားတော်မြတ်ကြီး #၉၅ရာခိုင်နှုန်းပြီး
#YMG #Yangon_Media_Group

Published_ 25 April 2023

 ကျန်းမာရေးဝန်ကြီးဌာနက ကိုဗစ်-၁၉ ရောဂါ ဓာတ်ခွဲအတည်ပြုလူနာသစ်တွေ့ရှိမှု ကိုထုတ်ပြန်ပေးလျက်ရှိရာ လူနာသစ်တွေ့ရှိမှု ၃ ရက်ဆက်တိုက် မြင့်တက်လာကြောင်း တွေ့ရှိရပါတယ်။

  ဧပြီ (၂၃) ရက်နေ့ထုတ်ပြန်မှုတွင် ဓာတ်ခွဲအတည်ပြုလူနာသစ် (၄၅) ဦး၊ (၂၄) ရက် နေ့တွင် (၅၁) ဦး၊ (၂၅) ရက်နေ့တွင် လူနာသစ် (၇၁) ဦးတွေ့ရှိရသဖြင့် ၃ ရက်ဆက်တိုက် ပြန်လည်မြင့်တက်လာတာ ဖြစ်ပါတယ်။

ကမ္ဘာ့ကျန်းမာရေးအဖွဲ့ရဲ့ ထုတ်ပြန်ချက်အရ ကမ္ဘာ့နိုင်ငံ(၃၁)နိုင်ငံနှင့် မြန်မာနိုင်ငံ ၏ အိမ်နီးချင်းနိုင်ငံများဖြစ်သော အိန္ဒိယနိုင်ငံ၊ ထိုင်းနိုင်ငံ၊ ဘင်္ဂလားဒေ့ရှ်နိုင်ငံအပါအဝင် ဒေသတွင်းနိုင်ငံအချို့တွင် ဇန်နဝါရီလမှစတင်၍ ကိုဗစ်-၁၉ ရောဂါ ကူးစက်မှုများ မြင့်တက်လာပြီး ကိုဗစ်-၁၉ ရောဂါ မျိုးရိုးဗီဇပြောင်းရောဂါပိုး XBB. 1.16 (Arcturus) ကူးစက်ဖြစ် ပွားမှုများလည်းပါဝင်ကာ မြန်မာနိုင်ငံ၌လည်း ဧပြီလဆန်းမှစ၍ ကိုဗစ်-၁၉ ရောဂါ ပြည်တွင်းကူးစက် ဖြစ်ပွားမှု အနည်းငယ်မြင့်တက်လာတယ်လို့ ဆိုပါတယ်။

မျိုးရိုးဗီဇပြောင်းရောဂါပိုး XBB. 1.16 သည်ကူးစက်ဖြစ်ပွားမှုအားဖြင့် ယခင်တွေ့ရှိခဲ့ တဲ့ မျိုးရိုးဗီဇပြောင်း ရောဂါပိုးများထက် (၁.၂၇) ဆအထိ ပိုမိုမြန်ဆန်သော်လည်း ရောဂါ ပြင်းထန်မှု၊ ဆေးရုံတက်ရောက် ကုသခံယူရမှုနှင့် သေဆုံးမှုပိုမိုမြင့်မားခြင်းမရှိဘူးလို့ ဆိုပါတယ်။

ရောဂါကာကွယ်ရေးအတွက်လည်း မြန်မာနိုင်ငံတွင် လက်ရှိအသုံးပြုလျက်ရှိသည့် ကိုဗစ်-၁၉ ရောဂါ ကာကွယ်ဆေးများသည် ထိရောက်မှုရှိပြီး ထပ်ဆောင်းကာကွယ်ဆေး ထိုးနှံခြင်းဖြင့် ရောဂါကူးစက်ဖြစ်ပွားမှု၊ ရောဂါပြင်းထန်မှု၊ ရောဂါ ကြောင့်သေဆုံးမှုကို လျှော့ချနိုင်ကြောင်း တွေ့ရှိရတယ်လို့ ကျန်းမာရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

မြန်မာနိုင်ငံ၌ ဧပြီ (၂၅) ရက်အထိ ဓာတ်ခွဲနမူနာစုစုပေါင်း (၁၀,၃၁၆,၄၈၆) ခုအား စစ်ဆေးခဲ့ပြီး ဓာတ်ခွဲအတည်ပြုလူနာ စုစုပေါင်း (၆၃၄,၄၇၁) ဦး ရှိပြီပါတယ်။

ygm_mnn

#Yangon_Media_Group

#Covid-19_Myanmar

Published_ 25 April 2023

ရန်ကုန်တိုင်းဒေသကြီး၊ခရမ်းမြို့နယ်အတွင်း PDF အဖွဲ့ဝင် ၇ ဦး ကို လက်နက်မျိုးစုံ ၁၈ လက်၊ ကျည်အိမ်မျိုးစုံ ၃၀ ခု၊ ကျည်မျိုးစုံ ၁၆၀၇ တောင့်၊ ၄၀ မမ ဗုံးသီး ၂၄ လုံး၊ လက်လုပ် လက်ပစ်ဗုံး ၆ လုံးတို့ဖြင့် ဖော်ထုတ်ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ဧပြီလ ၁၉ ရက် နေ့လယ်ပိုင်းက သန်လျင်မြို့နယ်၊ ပေါက်တောကျေးရွာအနီး ပိတ်ဆို့ရှာဖွေရှင်းလင်း ခဲ့ရာ ခရမ်း PDF အဖွဲ့ဝင် ရီထွေးအား AK-47 ၁ လက်၊ Type-056 ၁ လက်၊ Glock-19 ၁ လက်၊ ကျည်အိမ်မျိုးစုံ ၅ ခု၊ ၇.၆၂ ကျည် ၆၈ တောင့်၊ ၉ မမ ကျည် ၃၆၉ တောင့်၊ ပွိုင့်-၃၈၀ ကျည် ၁၅ တောင့်တို့နှင့်အတူ ဖမ်းဆီးရမိခဲ့ပြီးနောက် ဧပြီလ ၂၂ ရက် နေ့လယ်ပိုင်းတွင် မရမ်းကုန်းမြို့နယ်၊ အမှတ်(၂) ရပ်ကွက်၊ အထက်ဗဟိုလမ်း၊ မုဒိတာအိမ်ရာ၊ တိုက်အမှတ်(C)၊ (၄)လွှာ၊ အခန်း (၄၀၉)မှထက်ရဲလင်း(ခ)အေးမောင်၊ စိုးထက်အောင်(ခ) သာလိကာ၊ ကျော်မင်းထက်(ခ)စာကလေးတို့ ၃ ဦးကိုလည်းကောင်း၊ယင်းနေ့ ညနေပိုင်းတွင် ဒေါပုံမြို့နယ်၊ ဗိုလ်ထွန်းဇံရပ်ကွက်၊ ဗိုလ်အောင်ကျော်လမ်း၊တိုက်အမှတ်(၃၆)၊ (၄)လွှာ၊ အခန်း(A)၌ အကြမ်းဖက်အဖွဲ့ဝင်များဖြစ်သည့် မိုးပြည့်စုံကျော် (ခ)ဒေဝ(ခ)မှတ်ကြီး၊ အောင်မျိုးလွင်(ခ)DK(ခ)ဇော်ကြီးသားနှင့် သန့်ဇင်ဦး(ခ)ဗိုက်ကလေး တို့ ၃ ဦးကိုလည်းကောင်း အသီးသီး ဖမ်းဆီးရမိခဲ့ကြောင်း အဆိုပါ ထုတ်ပြန်ချက်တွင် ဖော်ပြထားသည်။

ဖမ်းဆီးရမိသူ ထက်ရဲလင်း(ခ)အေးမောင်၏ ထွက်ဆိုချက်အရ ဧပြီလ ၂၃ ရက် နံနက်ပိုင်းတွင် ခရမ်းမြို့နယ်၊ မကျည်းကုန်းကျေးရွာနှင့် သုံးခွမြို့နယ်၊ ဆည်ကြီးကုန်းကျေးရွာအကြားရှိ လယ်ကွင်းအတွင်း သိုဝှက်မြှုပ်နှံထားသော BA-63၂ ၂ လက်၊ ကျည်အိမ် ၂ ခု၊ ၇.၆၂ ကျည် ၂၅ တောင့်ကိုလည်းကောင်း၊ ခရမ်းမြို့နယ်၊ ညောင်ပင် ကျေးရွာနှင့် အလယ်ကျေးရွာအကြားရှိ လယ်ကွင်းအတွင်း သိုဝှက်မြှုပ်နှံ ထားသော ပွိုင့်- ၃၈၀ ပစ္စတို ၁ လက်၊ Beretta ပစ္စတို ၁ လက်၊ M-4 ကာဘိုင် ၂ လက်၊ M-22 ၁ လက်၊ ပွိုင့်- ၃၀ ကာဘိုင် ၁ လက်၊ ၄၀ မမ ဗုံးပစ်လောင်ချာ ၁ လက်၊ ပွိုင့်-၂၂ လက်လုပ်သေနတ် ၁ လက်၊ ပွိုင့်-၃၈၀ ကျည် ၇ တောင့်၊ ၉ မမ ကျည် ၈ တောင့်၊ ပွိုင့်-၃၀ ကျည် ၂၅ တောင့်၊ ၅.၅၆ ကျည် ၁၂၀ တောင့်၊ ၇.၆၂ ကျည် ၂၀၀ တောင့်၊ ၄၀ မမ ဗုံးသီး ၅ လုံး၊ ပစ္စတို ကျည်အိမ် ၂ ခု၊ ပွိုင့်-၃၀ ကာဘိုင်ကျည်အိမ်(အရှည်/အတို) ၂ ခု၊ M-4 ကာဘိုင်ကျည်အိမ် ၅ ခု၊ M-22 ကျည်အိမ် ၅ ခု၊ လက်လုပ်လက်ပစ်ဗုံး ၆ လုံး တို့ကိုလည်းကောင်း၊ ဧပြီလ ၂၄ ရက် ညပိုင်းတွင် ခရမ်းမြို့နယ်၊ ကန်သာကျေးရွာ၏ အနောက်ဘက်ရှိ ကောက်ရိုးပုံအတွင်းမှ M-16 ၂ လက်၊ M4A1 ၁ လက်၊ ၁၂ ဗို့ ၁ လက်၊ ၄၀ မမ လက်လုပ်ဗုံးပစ်လောင်ချာ ၁ လက်၊ ပွိုင့်-၃၈၀ ကျည် ၂၆ တောင့်၊ ၉ မမ ကျည် ၆၈ တောင့်၊ ၅.၅၆ ကျည် ၄၈၀ တောင့်၊ ၇.၆၂ ကျည် ၁၉၆ တောင့်၊ ၁၂ ဗို့ကျည် ၄၀ တောင့်၊ ၄၀ မမ ဗုံးသီး ၁၉ လုံး၊ စနိုက်ပါကျည်အိမ် ၁ ခု၊ M-22 ကျည်အိမ် ၁ ခု၊ M-16 ကျည်အိမ် ၃ ခု၊ ၁၂ ဗို့ကျည်အိမ် ၂ ခု၊ M4A1 ကျည်အိမ် ၂ ခုတို့ကို လည်းကောင်း ဖော်ထုတ်သိမ်းဆည်းရမိခဲ့ကြောင်း သိရသည်။

ymg/pl

#YangonMediaGroup

#ခရမ်းPDF

#မြန်မာ့နိုင်ငံရေး