#Local_News
Published_9 June 2023

ငွေကျပ် ၁ ဒသမ ၃၃ ဘီလီယံကျော်တန်ဖိုးရှိ စိတ်ကြွရူးသွပ်ဆေးပြား ၈ သိန်းကျော်ကို မန္တလေးတိုင်းဒေသကြီး၊ သာစည်မြို့နယ်တွင် ဖမ်းမိထားကြောင်း မြန်မာနိုင်ငံရဲတပ်ဖွဲ့က သိရသည်။

ဇွန် ၄ ရက် ည ၁၀ နာရီတွင် မန္တလေးတိုင်းဒေသကြီး၊ သာစည်မြို့နယ်၊ ကျွဲတပ်ဆုံရှာဖွေစစ်ဆေးရေးစခန်းတွင် တောင်ကြီးမှ သာစည်ဘက်သို့ မောင်းနှင်လာသည့် Express ခရီးသည်တင် မော်တော်ယာဉ်ကို သတင်းအရရှာဖွေရာ ယာဉ်ပေါ်ပါခရီးသည် မနန်းမိုးဇာနှင့် ခွန်မြမောင်တို့ ၂ ဦး သယ်ဆောင်လာသည့် ကျောမှီမွေ့ရာများအတွင်း သိုဝှက်သယ်ဆောင်လာသော အဆိုပါ စိတ်ကြွရူးသွပ်ဆေးပြား ၈၈၇၂၅၀ ကို သိမ်းဆည်းရမိခဲ့ကြောင်း သိရသည်။

စစ်ဆေးဖော်ထုတ်ချက်အရ အဆိုပါသိမ်းဆည်းရမိ စိတ်ကြွရူးသွပ်ဆေးပြားများကို ရှမ်းပြည်နယ်(တောင်ပိုင်း)၊ တောင်ကြီးမြို့မှ ကရင်ပြည်နယ်၊ မြဝတီမြို့သို့ သယ်ဆောင်ခြင်းဖြစ်ကြောင်း သိရသဖြင့် ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေး ဖော်ထုတ်လျက်ရှိကြောင်း သိရသည်။

#ymg/BM #Local_News #၁ဒသမ၃၃ဘီလီယံကျော်တန်ဖိုးရှိစိတ်ကြွရူးသွပ်ဆေးပြား #YMG #Yangon_Media_Group

#Local_News
Published_9 June 2023

နောက်(၂၄)နာရီအတွင်း လေဖိအားနည်းဆဲလ်ပိုမိုအားကောင်းလာနိုင်ပြီး အားကောင်းသော လေဖိအားနည်းရပ်ဝန်းဖြစ်လာမည်ဖြစ်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရသည်။

အားကောင်းသည့်လေဖိအားနည်းရပ်ဝန်းရှိသည့်အပြင် မုတ်သုန်အားကောင်းသဖြင့်မြန်မာ့ပင်လယ်ပြင် နှင့် ကမ်းရိုးတန်းတစ်လျှောက်တွင် မိုးသက်လေပြင်းတိုက်ခတ်ခြင်း၊ လှိုင်းကြီးခြင်းများ ဖြစ်ပေါ်မည်။

နေပြည်တော်၊ မကွေးနှင့် ကယားပြည်နယ်တို့တွင် နေရာကျဲကျဲ၊ စစ်ကိုင်းတိုင်းအောက်ပိုင်း၊ မန္တလေးတိုင်း၊ ပဲခူးတိုင်း၊ ရန်ကုန်တိုင်းနှင့်ဧရာဝတီတိုင်းတို့တွင် နေရာစိပ်စိပ်နှင့် ကျန်တိုင်းဒေသကြီးနှင့် ပြည်နယ်တို့တွင်နေရာအနှံ့အပြားမိုးထစ်ချုန်းရွာပြီး၊ တနင်္သာရီတိုင်းဒေသကြီးတွင် ဒေသအလိုက်နှင့် စစ်ကိုင်းတိုင်းဒေသကြီးအထက်ပိုင်း၊ ကချင်ပြည်နယ်၊ ရှမ်းပြည်နယ်(မြောက်ပိုင်း)နှင့် မွန်ပြည်နယ်တို့တွင် နေရာကွက်၍ မိုးကြီးနိုင်သည်ဟုဆိုသည်။

နောက်(၂)ရက်အတွက်ခန့်မှန်းချက်အနေဖြင့် အနောက်တောင်မုတ်သုံလေသည် မြန်မာနိုင်ငံမြောက်ပိုင်းဒေသများသို့ ဝင်ရောက်နိုင်ကြောင်း သိရသည်။

မိုးတိမ်တောင်ဖြစ်ပေါ်မှုအခြေအနေကတော့ စစ်ကိုင်းတိုင်း၊ မန္တလေးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ရှမ်းပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် မိုးတိမ်တောင်များဖြစ်ထွန်းမှုအားကောင်းနေပြီး၊ အဆိုပါ မိုးတိမ်တောင်များရွေ့လျားရာနေရာတစ်လျှောက်တွင် မိုးရွာသွန်းခြင်းနှင့်အတူလေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်ပါသဖြင့် ကြိုတင်သတိပြုနိုင်ပါရန် အကြံပြုထားကြောင်း ထုတ်ပြန်ထားသည်။

#ymg/tthl #Local_News #ဒေသအချို့မိုးကြီးမည် #လေဖိအားနည်းရပ်ဝန်းဖြစ်မည် #YMG #Yangon_Media_Group

#Local_News
Puvlished-9 June2023

မြန်မာရွှေ့ပြောင်းလုပ်သားတစ်ဦး ထိုင်းထီ အမြင့်ဆုံးဆု ဘတ်ငွေသိန်း ၁၂၀ ဆု ဆွတ်ခူးခဲ့ကြောင်း မြန်မာလုပ်သားများကို အကူအညီပေးနေသည့်  ရွေ့ပြောင်းလုပ်သားများ အကူအညီပေးရေး မဟာမိတ်အဖွဲ့ (AAC) မှ ကိုခိုင်ကြီးက ပြောကြားထားသည်။

ထိုင်းနိုင်ငံ တောင်ပိုင် သကွန်ပါနယ်မြေမှ မြန်မာလုပ်သားလူငယ်တစ်ဦးဇွန်လ၁ရက်က ထိုင်းထီပေါက်စဥ် (125 272) ခြောက်လုံးတူနှစ်ဆောင်တွဲဖြင့်ထိုင်းဘတ်သိန်းတစ်ရာ့နှစ်ဆယ် (၁၂၀)ကံထူးခဲ့ခြင်းဖြစ်ပြီး လိုင်းပေါ်မှ ထီထုတ်ပေးသည့်အဖွဲ့အစည်းများကို ဆက်သွယ်အကူအညီတောင်းရာ ၅ရက်ခန့်အကြာတွင် AAC မှ ဒါရိုက်တာ ဦးခိုင်ကြီးနှင့် တိုက်ရိုက်အဆက်အသွယ်ရခဲ့ကြောင်း သိရသည်။

"မြန်မာလုပ်သားလူငယ်လေးက ကျွန်တော်တစ်ယောက်တည်း ခြံထဲမှာအလုပ်လုပ်တာပါ။ အသိမရှိဘူးဗျာ။ သူဌေးကိုလဲ အကူအညီမတောင်းရဲဘူး။ သူဌေးက လစာလေးတောင်ပုံမှန်မပေးနိုင်ဘူးဗျာ။ သူဌေးက ခြံသူဌေးတောသူတွေဆိုတော့ အရမ်းမလည်ဘူးဗျ။ ဆုငွေထုတ်တဲ့အခါ အခက်အခဲမရှိအောင် ကူညီပေးဖို့တောင်းဆိုလာတဲ့အတွက်ဆုငွေတွေကို နေ့ချင်းပြီး အခက်အခဲမရှိ ထုတ်ပေးလိုက်ပါပြီ"ဟုကိုခိုင်ကြီးက ပြောကြားထားသည်။

ထီဆုကြီးကံထူးသည့် မြန်မာရွေ့ပြောင်းလုပ်သားဖြစ်သူက  ကိုခိုင်ကြီးထံ ဗီဒီယိုဖုန်းကော ဖြင့်ဆက်သွယ်အကူအညီတောင်းခံလာ၍ ရွေ့ပြောင်းလုပ်သားများ အကူအညီပေးရေး မဟာမိတ်အဖွဲ့ (AAC) မှ ကံထူးရှင်ရှိရာသို့သွားရောက်ကာ နေ့ချင်းပြီး ထီဆုငွေကို ထုတ်ယူကာ လက်ဝယ်ပေးအပ်ခဲ့ကြောင်းဆိုသည်။

#ymg/BM #Local_News #ထိုင်းထီဆုဘတ်ငွေသိန်း၁၂၀ဆုကံထူး
#YMG #Yangon_Media_Group

#Local_News
Published_9 June 2023

တက္ကသိုလ်ဝင်စာမေးပွဲအောင်စာရင်းအတုများ ထွက်ပေါ်နေ၍ စာစစ်ဦးစီးဌာန၏ wesite ၌ သာဝင်ကြည့်ရန် မြန်မာနိုင်ငံစာစစ်ဦးစီးဌာနက သတိပေးအကြံပြုချက်ထုတ်ပြန်လိုက်သည်။

ထုတ်ပြန်ချက်တွင် ယခင်နှစ်က အောင်စာရင်းအဟောင်းများကို ပြုပြင်ထားသော အောင်စာရင်း အတုများ ထွက်ပေါ်နေသည်ကို တွေ့ရှိရကြောင်း၊ အောင်စာရင်းအတုများတွင် ယခုနှစ် ဖြေဆိုထားသူများ၏ အမည်များ ပါဝင်မည် မဟုတ်ကြောင်း၊ တရားဝင် ထုတ်ပြန်ကြညာသည့် နေရာများမှ အောင်စာရင်းထွက်မှသာ အောင်စာရင်း အစစ်ကို မိမိကိုယ်တိုင်ကြည့်ရှု၍ မိမိဖြေဆိုထားသော စာမေးပွဲရလဒ်ဆုံးဖြတ်ချက်ကို ယုံကြည်ကြရန် အကြံပြုသည် ဟုဖော်ပြပါရှိသည်။

၂၀၂၃ ခုနှစ်၊ တက္ကသိုလ်ဝင်စာမေးပွဲ အောင်စာရင်းများကို www.myanmarexam.org တစ်ခုတည်းတွင်သာ တရားဝင် လွှင့်တင်ထုတ်ပြန်ထားပြီး အခြား မည်သည့် App, Platform မှ ထုတ်ထားခြင်းမရှိကြောင်း အဆိုပါ Website တွင် ၉-၆-၂၀၂၃ ရက်နေ့ နံနက် ၄း၀၀ နာရီမှ စတင်၍ အောင်စာရင်းများ ကြည့်ရှုနိုင်ကြောင်းနှင့််စာစစ်ဌာနကျောင်းများတွင် နံနက် (၆) နာရီကစ၍ အောင်စာရင်းကပ်ကာကြေညာထားကြောင်း သိရသည်။

ymg/tthl #Local_News #တက္ကသိုလ်ဝင်စာမေးပွဲအောင်စာရင်းအတုထွက်ပေါ်နေ
#YMG #Yangon_Media_Group

#Local_News
Published_ 9 June 2023

ဇူလိုင်လအတွင်း မကာအိုမြို့၌ ကျင်းပပြုလုပ်မည့်(၁၅)ကြိမ်မြောက် မကာအိုနှင့် ကွမ်တုံဒေသ ကုန်အမှတ်တံဆိပ်ထုတ်ကုန်ပြပွဲတွင် မြန်မာနိုင်ငံမှစီးပွားရေးလုပ်ငန်းရှင်များ ပါဝင်ပြသရန် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှဖိတ်ခေါ်ထားသည်။

မကာအို အထူးအုပ်ချုပ်ရေးဒေသ၊ မကာအို ကုန်သွယ်ရေးနှင့် ရင်းနှီးမြှုပ်နှံမှု မြှင့်တင် ရေးအဖွဲ့ (Macao Trade and Investment Promotion Institutes – IPIM) နှင့် တရုတ်ပြည်သူ့သမ္မတနိုင်ငံ၊ ကွမ်တုံပြည်နယ်၊ ကူးသန်းရောင်းဝယ်ရေးဌာနတို့မှ ကြီးမှူး၍ပြပွဲကိုကျင်းပခြင်းဖြစ်သည်။

၁၅ ကြိမ်မြောက် မကာအိုနှင့် ကွမ်တုံဒေသကုန်အမှတ်တံဆိပ်ထုတ်ကုန်ပြပွဲကို ၂၀၂၃ ခုနှစ် ဇူလိုင်လ ၂၇ ရက်နေ့မှ ၃၀ ရက်နေ့ထိ မကာအိုမြို့၊ Galaxy International Convention Center Exhibition Hall တွင် ကျင်းပပြုလုပ်မည် ဖြစ်ပြီး မြန်မာနိုင်ငံဆိုင်ရာ ပြခန်းပေါင်း ၂၀ ရရှိမည်ဖြစ်ပြီး ပါဝင်ပြသသူတစ်ဦးလျှင် ပြခန်း ၁ ခန်း ရရှိမည် ဖြစ်သည်။

ပြခန်းငှားရမ်းခြင်းအတွက် ကျသင့်ငွေနှင့် ပါဝင်ပြသမည့် ကုန်စည်များတင်ပို့ခြင်း အတွက် ထောက်ပံ့မည့်ပမာဏတို့မှာ -

၁။ ပြခန်းတစ်ခန်းအတွက် ပေးသွင်းရမည့်ပမာဏ - မကာအိုဒေါ်လာ ၁,၄၀၀ (အမေရိကန် ဒေါ်လာ ၁၇၄.၄၅)

၂။ ပြသမည့်ကုန်စည်များတင်ပို့ခြင်းအတွက် - မကာအို ဒေါ်လာ ၃,၀၀၀ တို့ဖြစ်ပြီးထောက်ပံ့မည့်ပမာဏ (အပြန်သယ်ယူပို့ ဆောင်စရိတ်မပါ)

ထောက်ပံ့ငွေများကို ပြပွဲစီစဉ်သူများထံ ကုန်တင်ပို့မှုပြေစာများ ပြသ၍ ပြန်လည် ထုတ်ယူနိုင်မည် ဖြစ်သည်။

ပြပွဲသို့ လာရောက်ပြသမည့်သူများအတွက် ၅ ညတာ တည်းခိုနေထိုင်ရန် ဟိုတယ်နှင့် ဟိုတယ်မှပြပွဲသို့ သွားလာနိုင်ရန် မော်တော်ယာဉ်များ စီစဉ်ပေးထားမည် ဖြစ်ကြောင်း ထုတ်ပြန်ချက်ဖော်ပြထားသည်။

၁၅ ကြိမ်မြောက် မကာအိုနှင့် ကွမ်တုံဒေသကုန်အမှတ်တံဆိပ် ထုတ်ကုန်ပြပွဲသို့ ပါဝင်ပြသရန် စိတ်ပါဝင်စားသည့် လုပ်ငန်းရှင်များအနေဖြင့် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနဖုန်း ၀၁ ၆၅၈၁၃၂ သို့ ဆက်သွယ်နိုင်ကြောင်း သိရသည်။

#ymg/tthl #Local_News #မကာအို #မြန်မာစီးပွားရေးလုပ်ငန်းရှင်
#YMG #Yangon_Media_Group

#Local_News
Published_ 9 June 2023

KBZ pay သုံးစွဲသူများအနေနဲ့ ငွေလွှဲတဲ့နေရာမှာ အကြောင်းအရာထည့်သွင်းရမှာဖြစ်ပြီး မထည့်သွင်းမိပါက ငွေလက်ခံအကောင့်ကိုပိတ်သိမ်းမှာဖြစ်တယ်လို့ လူမှုကွန်ယက်ပေါ်မှာ ပျံ့နှံ့နေသည်။ အဆိုပါ ကိစ္စနဲ့ပတ်သပ်ပြီး YMG က ဆက်သွယ်စုံစမ်းတဲ့အခါ ငွေလွှဲတဲ့အခါ အကြောင်းအရာထည့်ခိုင်းရခြင်းမှာ အခက်အခဲတစ်ခုခုဖြစ်ပါက အလွယ်တကူဖြေရှင်းနိုင်ဖို့သာဖြစ်တယ်လို့ KBZ Pay Call Center ကပြောသည်။

သုံးစွဲသူတွေကတော့ အကြောင်းအရာ မထည့်ပဲငွေလွှဲမိပါက အကောင့်အပိတ်ခံရမှာကို စိုးရိမ်နေပြီး KBZ pay call center ကိုမေးမြန်းမှုတွေ ရှိနေသည်။

အကြောင်းအရာမထည့်ပဲငွေလွှဲမိပါက အကောင့်ပိတ်သိမ်းမှာ မဟုတ်ဘူးလို့ သုံးစွဲတချို့က YMG ကိုပြောသည်။

လူမှုကွန်ယက်မှာတော့ ကောလဟာလများပြန့်နှံ့နေပြီး သုံးစွဲသူတချို့အကောင့်ပိတ်ခံရတယ်လို့ ပြောဆိုတာတွေရှိနေပါတယ်။ ဒါပေမယ့် အကြောင်းအရာထည့်ရေးခြင်း မရေးမိခြင်းနဲ့ ပတ်သက်ပြီး အကောင့်အပိတ်ခံရတာနဲ့ မသက်ဆိုင်ပြန်လည်ပြောဆိုနေကြသူတွေလည်း ရှိပါတယ်။ KBZ Pay ရဲ့ တရား၀င်လူမှုကွန်ယက်စာမျက်နှာမှာတော့ အထက်ပါအကြောင်းအရာနဲ့ ပတ်သက်ပြီး တရား၀င်ပြောဆိုထားတာတော့ မရှိသေးပါဘူး။

#ymg/ynzw #Local_News #KBZ pay
#YMG #Yangon_Media_Group