#World_News
Published 14 October 2023

အစ္စရေးလ်တို့က ဂါဇာမြို့ကို မြေပြင်တိုက်ခိုက်မှုများ ပြုလုပ်လာရန်ရှိတဲ့အတွက် အရပ်သား ၁ သန်းခန့်ကို ဂါဇာမြို့တောင်ပိုင်းသို့ ထွက်ပြေးတိမ်းရှောင်ရန် အစ္စရေးလ်စစ်တပ်က မှာကြားလိုက်သဖြင့် ပါလက်စ်တိုင်းအရပ်သားတွေဟာ သောကြာနေ့က ဂါဇာမြောက်ပိုင်းကနေ လူအလုံးအရင်းဖြင့် ထွက်ပြေးလာကြပါတယ်။

ထွက်ပြေးတိမ်းရှောင်လာတဲ့ ဂါဇာလူဦးရေ တဝက်ခန့်ဟာ စစ်ဘေးဒဏ်ကြုံတွေ့ရနိုင်ကြောင်း ကုလသမဂ္ဂက သတိပေးလိုက်ပြီး တိုက်ခိုက်မှုပြုလုပ်မယ့် အစီအစဥ်ကို ပြောင်းလဲပေးရန် အစ္စရေးလ်ကို တိုက်တွန်းလိုက်ပါတယ်။

ဂါဇာမြို့ကို တစ်နေ့လုံး လေကြောင်းတိုက်ခိုက်မှုများ ပြုလုပ်နေသဖြင့် မိသားစုတွေက ကားတွေ၊ ထရပ်ကားတွေ၊ မြည်းလှည်းတွေနဲ့ ပိုင်ဆိုင်မှုတွေကို ထုပ်ပိုးသယ်ဆောင်ပြီး မြို့အထွက်လမ်းမကြီးအတိုင်း ထွက်ပြေးနေကြပါတယ်။

စစ်လေယာဥ်တွေက တောင်ပိုင်းသို့ ထွက်ပြေးနေတဲ့ ကားတွေကို ပစ်ခတ်ခဲ့ရာ လူ ၇၀ ကျော်သေဆုံးခဲ့တယ်လို့ ဟားမတ်စ်မီဒီယာရုံးမှ ဆိုလိုက်ပါတယ်။

အစ္စရေးလ်တပ်တွေကတော့ စစ်သွေးကြွတွေကို တိုက်ခိုက်ဖို့ မြို့ထဲသို့ ကျူးကျော်ဝင်ရောက်ခဲ့ပြီး ဟားမတ်စ်တို့ ပြန်ပေးဆွဲသွားတဲ့ ဓားစာခံ ၁၅၀ ခန့်ကို ရှာဖွေဖို့ ကြိုးပမ်းနေကြတယ်လို့ ဆိုပါတယ်။

အစ္စရေးလ်တပ်များက ဂါဇာမြို့နားတဝိုက်ရှိ ဟားမတ်စ်တို့ရဲ့ မြေအောက်ပုန်းခိုရာနေရာတွေကို ပစ်မှတ်ထားတိုက်ခိုက်ရန် စီစဥ်နေတာ ဖြစ်ပါတယ်။

ဟားမတ်စ်တွေက အစ္စရေးလ်တို့ ထွက်ပြေးခိုင်းတာကို အရေးမထားဖို့ ပါလက်စ်တိုင်းပြည်သူတွေကို ပြောကြားလိုက်ပေမယ့် ဂါဇာမှလူတွေက အရေးမနိုင်နိုင်တော့တာကို မြင်တွေ့နေရပြီး ရွေးချယ်စရာ မရှိတော့ပါဘူး။

အစ္စရေးလ်ဘက်က ပိတ်ဆို့ထားမှုကြောင့် ဂါဇာမှာ အစားအစာ၊ ရေ၊ ဆေးဝါးများ မရရှိတော့သလို လျှပ်စစ်ဓာတ်အား လုံးဝပြတ်တောက်နေကာ အစိုးရိမ်ရဆုံးက သေမလား ရှင်မလားဆိုတာပဲဖြစ်နေပါတယ်။

ဂါဇာသို့ အစ္စရေးလ်တပ်များ ကျူးကျော်ပြီးနောက် ပြန်လည်ဆုတ်ခွာလာခဲ့ပါတယ်။

ထွက်ပြေးရန် အမိန့်ပေးလိုက်တာဟာ အစ္စရေးလ်တို့ မြေပြင်တိုက်ခိုက်မှုများ ပြုလုပ်မယ့် အလားအလာ ရှိနေပြီး ဂါဇာနယ်စပ်တလျှောက် တပ်အင်အား တိုးချဲ့နေပါတယ်။

ဟားမတ်စ်တွေကို ဖျက်ဆီးသွားမှာဖြစ်ပြီး ဒါဟာ အစပဲရှိသေးကြောင်း အစ္စရေးလ်ဝန်ကြီးချုပ် ဘင်ဂျမင်နေတန်ညာဟူက သောကြာနေ့မိန့်ခွန်းမှာ အခိုင်အမာ ပြောကြားလိုက်ပါတယ်။

အရပ်သားများ ထိခိုက်ခြင်းမရှိစေရန် စစ်တပ်က အထူးကြိုးပမ်းဆောင်ရွက်နေကြောင်း၊ စစ်ပွဲပြီးဆုံးပါက ပြန်လာခွင့်ရှိကြောင်း အစ္စရေးလ်ဘက်မှ ပြောရေးဆိုခွင့်ရှိသူ ဂျိုနသန်ကွန်ရီကပ်စ်က ပြောပြသွားပါတယ်။

ဟားမတ်စ်တို့ဟာ ပါလက်စ်တိုင်းပြည်သူတွေကို လူသားဒိုင်းများအဖြစ် အသုံးချနေတယ်လို့ အစ္စရေးလ်တို့က စွပ်စွဲနေတာ ကြာခဲ့ပြီဖြစ်ပြီး ဟားမတ်စ်စစ်သွေးကြွတွေနဲ့ အရပ်သားတွေကို အစ္စရေးလ်က ခွဲခြားချင်နေတာဖြစ်ကြောင်း၊ ဒါကြောင့် အသက်ရှင်ချင်သူတွေအနေနဲ့ တောင်ပိုင်းသို့ သွားရောက်သင့်ကြောင်း ကာကွယ်ရေးဝန်ကြီး ယိုအက်ဗ်ဂဲလန့်က ပြောကြားခဲ့ပါတယ်။

#World_News #ပါလက်စ်တိုင်း #ဂါဇာမြောက်ပိုင်း #Source: AP News

#Local_News
Published_ 14 October 2023

အထည်ချုပ်ကဏ္ဍမှ ၂၀၂၃ ခုနှစ် ဇန်နဝါရီလမှ စက်တင်ဘာလအထိ အမေရိကန် ဒေါ်လာ ၄ ဘီလီယံကျော် (၄၃၁၆ ဒသမ ၈၉ သန်း)ရရှိထားပြီးယခင်နှစ် ပို့ကုန်တန်ဖိုးထက် ပိုမိုတိုးတက်လာကြောင်း သိရပါတယ်။

အလုပ်သမားဝန်ကြီး ဦးမြင့်နောင်သည် အောက်တိုဘာ ၁၃ ရက်တွင် ရန်ကုန်မြို့ရှိ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) ၌ မြန်မာနိုင်ငံအထည်ချုပ်လုပ်ငန်းရှင်များအသင်းမှ တာဝန်ရှိသူများနှင့် တွေ့ဆုံခဲ့ပါတယ်။

၂၀၀၅ ခုနှစ်မှ ၂၀၁၀ ပြည့်နှစ်အကြားတွင် အထည်ချုပ်စက်ရုံ ၁၃၀ ကျော်ကို ဈေးကွက်သစ်ရှာဖွေခဲ့ကြောင်း၊ ဂျပန်နှင့် ကိုရီးယားသည် မြန်မာအထည်ချုပ်ကို ဝယ်ယူသည့် အဓိကနိုင်ငံများဖြစ်လာကြောင်း၊ ၂၀၁၁ ခုနှစ်တွင် ဂျပန်မှ အမှာစာ ၃၇ ဒသမ ၅ ရာခိုင်နှုန်း၊ ကိုရီးယားမှ ၂၅ ဒသမ ၃ ရာခိုင်နှုန်း လက်ခံရရှိခဲ့ကြောင်း၊ ၂၀၁၁ ခုနှစ် နောက်ပိုင်းတွင် စီးပွားရေးနှင့် နိုင်ငံရေးအခြေအနေများ တစ်ရှိန်ထိုးတိုးတက်မှုကြောင့် အထည်ချုပ်လုပ်ငန်း ဖွံ့ဖြိုးခဲ့ပြီး၊ လက်ရှိ CMP စက်ရုံနှင့် CMP တစ်ဆင့်ခံစက်ရုံ ၇၈၈ ရုံ ရှိတယ်လို့ ဝန်ကြီးကဆိုပါတယ်။

နေပြည်တော်၊ ရန်ကုန်နှင့် ပဲခူးတိုင်းဒေသကြီးတို့ရှိ အထည်ချုပ်စက်ရုံပေါင်း ၅၃ ရုံအား NSSA အသိအမှတ်ပြုကျွမ်းကျင်မှု စစ်ဆေးအကဲဖြတ်ရေးဌာနအဖြစ် ဆောင်ရွက်လျက်ရှိပြီး စက်ရုံ၊ အလုပ်ရုံများအနေဖြင့် ကျွမ်းကျင်မှုအသိအမှတ်ပြုရေးနှင့် ကျွမ်းကျင်မှုဖွံ့ဖြိုးတိုးတက်ရေး လုပ်ငန်းစဉ်များတွင် ပူးပေါင်းပါဝင်ဆောင်ရွက်မှုကို အသိအမှတ်ပြုတယ်လို့ ဝန်ကြီးက ပြောပါတယ်။

ထို့နောက် အထည်ချုပ်လုပ်ငန်းရှင်များအသင်း အထွေထွေအတွင်းရေးမှူး ဒေါ်ခိုင်ခိုင်နွယ်၊ စက်မှုကုန်ထုတ်လုပ်သူများအသင်း အထွေထွေအတွင်းရေးမှူး (၁) ဦးထွန်းထွန်းနှင့် အထည်ချုပ်လုပ်ငန်းရှင်များအသင်းမှ တာဝန်ရှိသူများက လုပ်ငန်းများ ဆောင်ရွက်နေမှု၊ လုပ်ငန်းဆိုင်ရာအားသာချက်၊ အားနည်းချက်များကို ဆွေးနွေးတင်ပြခဲ့ကြောင်း သတင်းရရှိပါတယ်။

#Local_News #အထည်ချုပ်ကဏ္ဍ #အမေရိကန်ဒေါ်လာ၄ဘီလီယံ #ymg_mnn #Yangon_Media_Group

#Local_News
Published_ 14 October 2023

ပုဂ္ဂလိကဆေးရုံများ လိုင်စင်စည်းကမ်းလိုက်နာမှု ပျက်ကွက်ခြင်းရှိပါက စီမံခန့်ခွဲရေး နည်းလမ်းများဖြင့် ထိရောက်စွာအရေးယူလျက်ရှိတယ်လို့ ပုဂ္ဂလိက ကျန်းမာရေးလုပ်ငန်းဆိုင်ရာဗဟိုအဖွဲ့အစည်းအဝေး (၃/၂၀၂၃) ၌ ကျန်းမာရေးဝန်ကြီး ဒေါက်တာသက်ခိုင်ဝင်းက ပြောကြားခဲ့ပါတယ်။

အဆိုပါအစည်းအဝေးကို အောက်တိုဘာ ၁၃ ရက်က နေပြည်တော်ရှိ ကျန်းမာရေး ဝန်ကြီးဌာန၌ ကျင်းပခဲ့ရာပုဂ္ဂလိကကျန်းမာရေး လုပ်ငန်းဆိုင်ရာဗဟိုအဖွဲ့ဥက္ကဋ္ဌ ကျန်းမာရေးဝန်ကြီး ဒေါက်တာသက်ခိုင်ဝင်း ၊ ဗဟိုအဖွဲ့အဖွဲ့ဝင်များ၊ ကိုယ်စားလှယ်များ၊ အထူးဖိတ်ကြားထားသူများနှင့် တာဝန်ရှိသူများ တက်ရောက်ခဲ့ပါတယ်။

အစည်းအဝေးတွင် ဝန်ကြီးက ပုဂ္ဂလိက ကျန်းမာရေးကဏ္ဍ ဖွံ့ဖြိုးတိုးတက်မှုကို ဥပဒေနှင့်အညီ အားပေးနေသကဲ့သို့ လိုင်စင်ခွင့်ပြုပြီးလုပ်ငန်းများအနေဖြင့်လည်း တည်ဆဲဥပဒေ၊ နည်းဥပဒေများကို တိတိကျကျလိုက်နာဆောင်ရွက်ရန် အထူးကြပ်မတ် ဆောင်ရွက်နေတယ်လို့ ဆိုပါတယ်။

ပုဂ္ဂလိကဆေးရုံလုပ်ငန်းရှင်များ အနေဖြင့် သဘာဝဘေး အန္တရာယ်များဖြစ်တဲ့ မီးဘေးအန္တရာယ်၊ ရေဘေး၊ ငလျင်ဘေး အန္တရာယ်များ ကြုံတွေ့လာပါက လူနာများနှင့် ကျန်းမာရေးစောင့်ရှောက်မှုပေးသူများ ဘေးကင်းလုံခြုံရန်နှင့် အဆောက် အဦပိုင်းဆိုင်ရာ သတ်မှတ်အရည်အသွေးများ ပြည့်ဝရန်နှီးနွှယ်ဌာနများ၏ လမ်းညွှန်ချက်များနှင့်အညီ ဆောင်ရွက်ဖို့၊ ကျန်းမာရေး လူ့စွမ်းအားအရင်းအမြစ်များ ခန့်အပ်တဲ့အခါ တည်ဆဲဥပဒေ၊ အမိန့်၊ ညွှန်ကြားချက်များနဲ့အညီ ခန့်အပ်သွားဖို့ ပြောကြားခဲ့ပါတယ်။

ထို့ပြင် လိုင်စင်အသစ် လျှောက်ထားခြင်းနှင့် သက်တမ်းတိုးခြင်းများတွင် လိုအပ်တဲ့ အထောက်အထားများကို ပြည့်စုံစွာတင်ပြရန်၊ အလေးထားလိုက်နာရန် လိုအပ်ကြောင်း၊ နိုင်ငံတော်ရဲ့ ကျန်းမာရေးမူဝါဒနဲ့အညီ ပုဂ္ဂလိကကျန်းမာရေးလုပ်ငန်းများ တိုးတက်ဖြစ်ထွန်းစေဖို့ ပုဂ္ဂလိကကျန်းမာရေးလုပ်ငန်းဆိုင်ရာဗဟိုအဖွဲဝင်များအနေဖြင့် ကျယ်ကျယ်ပြန့်ပြန့်ဆွေးနွေးပြီး ကောင်းမွန်သော အကြံပြုချက် များပေးရန် တိုက်တွန်းပါတယ်။

ထိုhနောက် ဗဟိုအဖွဲ့အတွင်းရေးမှူး ဒေါက်တာ မြတ်ဝဏ္ဏစိုးက ပုဂ္ဂလိက ကျန်းမာရေးလုပ်ငန်းများ တိုးတက်ဖြစ်ထွန်းမှုအခြေအနေနှင့် အထူးကိစ္စရပ်များ၊ ဗဟိုအဖွဲ့ တွဲဖက်အတွင်းရေးမှူး ဒေါက်တာမိုးခိုင်က ဗဟိုအဖွဲ့အစည်းအဝေး ၂/၂၀၂၃ ဆွေးနွေးချက်များအပေါ် ဆောင်ရွက်ထားရှိမှု၊ အတည်ပြုမှတ်တမ်းတင်ကိစ္စရပ်များနှင့် ပုဂ္ဂလိက ကျန်းမာရေးလုပ်ငန်း လိုင်စင်(အသစ်) လျှောက်ထားလာတဲ့ ကိစ္စရပ်များကို တင်ပြကြရာ ဗဟိုအဖွဲ့အဖွဲ့ဝင်များက ဝိုင်းဝန်းဆွေးနွေးခဲ့ကြောင်း သတင်းရရှိပါတယ်။

#Local_News #ပုဂ္ဂလိကဆေးရုံများ #စီမံခန့်ခွဲရေးနည်းလမ်းများ #ymg_mnn #Yangon_Media_Group

#Local_News
Published_ 14 October 2023

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီကို ပြင်ဆင်ဖွဲ့စည်းလိုက်ကြောင်း ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီက အောက်တိုဘာ ၁၃ ရက် ရက်စွဲဖြင့် အမိန့်ကြော်ငြာစာ ထုတ်ပြန်ထားပါတယ်။

အသစ်ပြင်ဆင်ဖွဲ့စည်းလိုက်တဲ့ ကော်မတီမှာ စွမ်းအင်ဝန်ကြီးဌာန ဒုတိယဝန်ကြီးက ဥက္ကဋ္ဌအဖြစ် ပါဝင်ပြီး အတွင်းရေးမှူး၊ တွဲဖက်အတွင်းရေမှူးနဲ့ ကော်မတီအဖွဲ့ဝင် ၅ ဦး ပါဝင်ပါတယ်။

အဆိုပါကော်မတီရဲ့ လုပ်ငန်းတာဝန်တွေကတော့ စက်သုံးဆီဈေးနှုန်းတွေ စနစ်တကျရှိစေရေး ကြီးကြပ်ဆောင်ရွက်ဖို့၊ သတ်မှတ်ထားတဲ့ စံချိန်စံညွှန်းပြည့်မီတဲ့ စက်သုံးဆီတွေကိုသာ တင်သွင်းလာစေရေးကြပ်မတ်ဖို့၊ ပြည်ပကစက်သုံးဆီသင်္ဘောတွေ ဆိပ်ကမ်းဝင်ရောက်ရာမှာ ကြန့်ကြာမှုမရှိစေရေး ကြီးကြပ်ဆောင်ရွက်ဖို့စတဲ့အချက်တွေ အပါအဝင် လုပ်ငန်းတာဝန် ၁၀ ချက်ကို ဆောင်ရွက်ရမှာဖြစ်တယ်လို့ ဖော်ပြပါတယ်။

ထို့ပြင် ၂၀၂၂ ခုနှစ်၊ ဧပြီ ၂၁ ရက် ရက်စွဲနဲ့ ထုတ်ပြန်ခဲ့တဲ့ ကော်မတီအဟောင်းကို ယခုအမိန့်ကြော်ငြာစာနဲ့ ပယ်ဖျက်လိုက်တယ်လိုလည်း ဖော်ပြထားပါတယ်။

#ymg_mnn #Local_News #စက်သုံးဆီတင်သွင်း #ဖြန့်ဖြူးခြင်းလုပ်ငန်း #Yangon_Media_Group

#Local_News
Published_ 14 October 2023

မြန်မာနိုင်ငံ၌ ရေနံချက်စက်ရုံတည်ဆောက်ခြင်းနှင့် ရေနံချက်လုပ်ခြင်း နည်းပညာ များကို သင်တန်းများဖွင့်လှစ်ပို့ချပေးဖို့ ရုရှားနိုင်ငံ မော်စကိုမြို့၌ ရောက်ရှိနေတဲ့ စွမ်းအင်ဝန်ကြီး ဦးကိုကိုလွင်က Gazprom ကုမ္ပဏီ၏ Moscow Oil Refinery သို့သွား ရောက်လေ့လာစဉ် ပြောကြားခဲ့ပါတယ်။

Moscow Oil Refinery စက်ရုံ၌ Gazprom ကုမ္ပဏီတာဝန်ရှိ သူများက စက်ရုံ သမိုင်းကြောင်း၊ စက်ရုံလည်ပတ်ပြီး စက်သုံးဆီအမျိုးမျိုး ထုတ်လုပ်နေမှုအခြေအနေကို ရှင်းလင်းရာ ဝန်ကြီးက မြန်မာနိုင်ငံတွင် ရေနံချက်စက်ရုံအသစ်တည်ဆောက်ရန်နှင့် လက်ရှိ စက်ရုံများကို အဆင့်မြှင့်တင် ပြုပြင်မွမ်းမံဖို့ လုပ်ဆောင်နေတယ်လို့ ဆိုပါတယ်။

ရေနံချက်စက်ရုံအသစ် တည်ဆောက်ရာတွင် Petrochemical Complex အဆင့် အထိတည်ဆောက်၍ ရေနံထွက်ပစ္စည်းအမျိုးမျိုး ထုတ်လုပ်နိုင်ဖို့ဆောင်ရွက်နေကြောင်း၊ ရေနံချက်စက်ရုံများနှင့် ပတ်သက်သည့် နည်းပညာအကူအညီများ ပံ့ပိုးပေးစေလိုကြောင်း ပြောကြားပါတယ်။

Gazprom ကုမ္ပဏီအနေဖြင့်လည်း မြန်မာနိုင်ငံတွင် ရေနံချက်စက်ရုံ တည်ဆောက် ပြုပြင်ခြင်းလုပ်ငန်းများတွင် ဝင်ရောက်ရင်းနှီးမြှုပ်နှံရန် အခွင့်အလမ်းများရှိတယ်လို့ ဆိုပါတယ်။

ရုရှားနိုင်ငံ မော်စကိုမြိုရှိ Moscow Oil Refinery ကို ၁၉၃၈ ခုနှစ်က စတင် လည်ပတ်ခဲ့ပြီး စက်ရုံအဆင့်မြှင့်တင်ခြင်းလုပ်ငန်းများကို နှစ်အလိုက် အဆင့်ဆင့် ဆောင်ရွက်ခဲ့ရာ ယခုအခါတစ်နှစ်လျှင် ရေနံစိမ်း ၁၂ ဒသမ ၅ မက်ထရစ်တန်သန်းခန့် ချက်လုပ်နိုင်တဲ့ နိုင်ငံတကာအဆင့်မီ ရေနံချက်စက်ရုံတစ်ရုံအဖြစ် အဆင့်မြင့် ဓာတ်ဆီ၊ ဒီဇယ်အပါအဝင် ရေနံထွက်ပစ္စည်းအမျိုးအမယ်ပေါင်း ၃၀ ကျော် ထုတ်လုပ်ဖြန့်ဖြူး ပေးလျက်ရှိပါတယ်။

အဆိုပါစက်ရုံသည် ကုန်ကြမ်းပမာဏ၏ ၉၉ ဒသမ ၅ ရာခိုင်နှုန်းအထိ ကုန်ချော ထုတ်လုပ်နိုင်ပြီး ရေနံချက်လုပ်ခြင်းများကြောင့် ဖြစ်ပေါ်လာနိုင်သည့် သဘာဝပတ်ဝန်းကျင်ထိခိုက်မှုများကိုလျှော့ချ၍ ကုန်ထုတ်လုပ်မှုလုပ်ငန်းများ ဆောင်ရွက်လျက်ရှိကြောင်း သိရပါတယ်။

#ygm_mnn #Local_News #ရေနံချက်စက်ရုံ #Gazprom ကုမ္ပဏီ #Yangon_Media_Group

#World_Science
Published 14 October 2023
ယခုနှစ်အတွင်း အန္တာတိကအထက်ရှိ အိုဇုန်းလွှားအပေါက်ကြီးဟာ မြင်ဖူးသမျှထဲမှာ အကြီးဆုံးဖြစ်လာကြောင်း ဂြိုဟ်တုအချက်အလက်များအရ သိရပါတယ်။

ဒါဟာ ၂၀၂၂ အစောပိုင်းက တွန်ဂါရေအောက်မီးတောင် ပေါက်ကွဲခဲ့ခြင်းကြောင့် ဒီလိုအပေါက်ကြီး ဖြစ်လာနိုင်တယ်လို့ ပညာရှင်များ ယူဆနေကြပါတယ်။

ပြီးခဲ့တဲ့နှစ် ဇန်နဝါရီလက ရေအောက်မီးတောင်ကြီးကြောင့် တွန်ဂါလှုပ်ခတ်သွားပြီး မီးတောင်ပေါက်ကွဲမှုကြောင့် ဆူနာမီ သတိပေးချက်များ ထွက်ပေါ်ခဲ့ပါတယ်။

အဆိုပါမီးတောင်ကြီး ပေါက်ကွဲမှုကြီးကို ဂြိုဟ်တုပုံရိပ်တွေကနေ မြင်တွေ့ခဲ့ရကာ လေထဲသို့ မီးခိုးများ ပြာမှုန်များ လွင့်တက်နေခဲ့ပါတယ်။

၂၀၂၃ စက်တင်ဘာ ၁၆ ရက်နေ့မှာ အိုဇုန်းလွှာအပေါက်က စတုရန်းကီလိုမီတာ ၂၆ သန်း အရွယ်အစားနီးပါး ရှိလာကြောင်း ESA ရဲ့ Copernicus Sentinel-5P ဂြိုဟ်တုဖြင့် တွေ့ရှိခဲ့ပါတယ်။

ဒါဟာ တွေ့ဖူးသမျှထဲမှာ အကြီးမားဆုံး အိုဇုန်းလွှာအပေါက်ကြီး ဖြစ်နေပြီး ယခင်အကြီးဆုံးက ၂၀၀၀ ခုနှစ်မှာ စတုရန်းကီလိုမီတာ ၂၈.၄ သန်းဖြစ်ခဲ့ဖူးပါတယ်။

ယခု အိုဇုန်းမရှိတဲ့ အပေါက်ကြီးရဲ့ အရွယ်အစားဟာ ဘရာဇီးလ်နိင်ငံ အရွယ်အစားရဲ့ ၃ ဆလောက်ရှိနေတယ်လို့ သိပ္ပံပညာရှင်များ ဆိုကြပါတယ်။

ဝင်ရိုးစွန်းလေပွေက စတင်အားနည်းလာပြီး ကမ္ဘာ့တောင်ဘက်ခြမ်း အပူချိန်က စတင်မြင့်မားနေပါတယ်။

ဒီဇင်ဘာလကုန်လောက်မှာ အိုဇုန်းလွှာအခြေအနေ ပုံမှန်ပြန်ဖြစ်လာမယ်လို့ ESA က ခန့်မှန်းလိုက်ပါတယ်။

အိုဇုန်းလွှာဟာ အခြေခံအားဖြင့် ကမ္ဘာမြေရဲ့ လေထုအပေါ်လွှာဖြစ်ပြီး နေရဲ့ ခရမ်းလွန်ရောင်ခြည် အများစုကို စုပ်ယူပေးပါတယ်။

ကမ္ဘာ့လေထုကို တိုင်းတာစောင့်ကြည့်ရန် ရည်ရွယ်တဲ့ Copernicus Sentinel-5P ဂြိုဟ်တုကို အသုံးပြုခြင်းဖြင့် မြေပြင်အချက်အလက် တိုင်းတာမှုများနဲ့ ယှဥ်ရင် ပိုမိုတိကျကာ အိုဇုန်းလွှာကို အနီးကပ် စောင့်ကြည့်နိုင်မှာ ဖြစ်ပါတယ်။

#World_Science #ဘရာဇီးလ်နိုင်ငံ #အိုဇုန်းလွှာ #Source: WION

#World_Health
Published 14 October 2023

ခန္ဓာကိုယ်အတွက် အရေးကြီးတဲ့ အဏုဇီဝ အာဟာရဓာတ် ဇင့်နဲ့ အူထဲရှိ အာရုံခံပရိုတိန်းတစ်မျိုးတို့ကြား ဆက်စပ်မှုကို လေ့လာချက်တစ်ခုမှာ တွေ့ရှိခဲ့ပါတယ်။

ဒီဆက်စပ်မှုကနေ အစာအိမ်ရောဂါ အမျိုးမျိုး ထိန်းချုပ်ကာကွယ်စေနိုင်မှာ ဖြစ်ပါတယ်။

ပရော်ဖက်ဆာ ခရစ္စတာဟော့စထရန်း ဦးဆောင်တဲ့ နိုင်ငံတကာ သုတေသနအဖွဲ့က လူသားနဲ့ ကြွက်တို့မှ ပင်မစတမ်ဆဲလ်များဖြင့် အစာအိမ်အူလမ်းကြောင်း အသေးစား ဖန်တီးခဲ့ကြပါတယ်။

ထိုလေ့လာချက်မှာ အစာအိမ်ထဲရှိ အာဟာရဓာတ်များ၊ ဆေးဝါးများ၊ အဆိပ်အတောက်များကို တုန့်ပြန်စေတဲ့ AHR အာရုံခံပရိုတိန်းနဲ့ ဇင့်တို့ရဲ့ အခန်းကဏ္ဍများကို လေ့လာတာဖြစ်ပါတယ်။

ဇင့်ကြွယ်ဝသော အစားအစာများ စားရတဲ့ ကြွက်တွေမှာ AHR လှုံ့ဆော်မှု များပြားပြီး အစာအိမ်ရောင်ရမ်းခြင်း လက္ခဏာတွေ သက်သာစေခဲ့ကာ ဇင့်ချို့တဲ့တဲ့ ကြွက်တွေကတော့ AHR လှုံ့ဆော်မှုအပိုင်းမှာ အကျိုးကျေးဇူး မရရှိခဲ့ပါဘူး။

AHR ကိုလှုံ့ဆော်ပေးတဲ့ ဇီဝသတ္တိကြွ ဒြပ်ပေါင်းတွေနဲ့ ဇင့်ဖြည့်စွက်စာများဟာ ထိုကဲ့သို့ရောဂါမျိုးကို ထိန်းချုပ်နိုင်စွမ်းရှိနေပါတယ်။

အူအစာအိမ်ရဲ့ အဓိကလုပ်ဆောင်ချက်တစ်ခုက ရောဂါပိုးမွှားများထံမှ တားဆီးပေးတဲ့ အကာအကွယ်တစ်ခု ဖြစ်ပါတယ်။

အူလမ်းကြောင်းမှာ ပြဿနာတစ်ခုခု ဖြစ်ပွားတဲ့အခါ ထိုရောဂါပိုးမွှားများကို မကာကွယ်နိုင်တော့ဘဲ ရောင်ရမ်းခြင်း၊ အတွင်းအင်္ဂါထိခိုက်ခြင်း၊ ရောဂါအမျိုးမျိုး ဖြစ်ပွားခြင်းတို့ ဖြစ်လာစေပါတယ်။

အစာအိမ်အူလမ်းကြောင်း ပြဿနာဖြစ်တဲ့အခါ စားသုံးသင့်တဲ့ ဇင့်ပါဝင်တဲ့ အစားအစာတွေကို ဖော်ပြလိုက်ပါတယ်။

 
-        ကြက်ဥ

ကြက်ဥမှာ ဇင့်ပမာဏ သင့်တင့်စွာပါဝင်ပြီး ကြက်ဥကြီးတစ်လုံးမှာ နေ့စဥ်လိုအပ်ချက်ရဲ့ ၅ ရာခိုင်နှုန်းခန့် ပါဝင်နေပါတယ်။

 
-        အခွံမာသီးများနှင့် အစေ့များ

ဗာဒံသီးနဲ့ သီဟိုဠ်စေ့တို့မှာ ဇင့်ပမာဏ အများအပြားပါဝင်ပါတယ်။

လျှော်စေ့ ၃ ဇွန်းမှာ ဇင့် ၃ မီလီဂရမ်ပါဝင်ပြီး ဖရုံစေ့ ၁ အောင်စမှာ ဇင့် ၂.၂ မီလီဂရမ်ပါဝင်ပါတယ်။

နှမ်းစေ့၊ မြေပဲတို့ဟာလည်း ဇင့်ကြွယ်ဝတဲ့ အစားအစာတွေ ဖြစ်ပါတယ်။

 
-        ပဲအမျိုးမျိုး

ပဲတွေမှာ အမျှင်ဓာတ်နဲ့ ပရိုတိန်းသာမက ဇင့်လည်း ပါဝင်ပါတယ်။

ထိုပဲတွေထဲမှာ ပဲနီလေး၊ ကုလားပဲ၊ ပဲစေ့တို့ ပါဝင်ပါတယ်။
 
-        ကြက်သား

ကြက်သားမှာ အခြားအာဟာရဓာတ်များအပြင် ဇင့်လည်း ပါဝင်ပါတယ်။

 
ဇင့်ပါဝင်တဲ့ အခြားစားစရာတွေထဲမှာ ဒိန်ချဥ်၊ ကမာကောင်၊ ချောကလက်နက်တို့ ပါဝင်ပါတယ်။

#World_Health #ဇင့်ချို့တဲ့ခြင်း #အစာအိမ်အူလမ်းကြောင်းပြဿနာ #ဇင့်ကြွယ်ဝသည့်စားစရာများ
#Source: India Today

ရှန်ဟိုင်း၊ တရုတ်ယူနန်အနောက်တောင်ဘက် မြို့တော်ကူမင်း၊ လာအိုမြို့တော် ဗီယန်ကျင်းတို့ကို ဆက်သွယ်ထားတဲ့ ကုန်တင်ရထားဝန်ဆောင်မှု လမ်းကြောင်းဟာ တနင်္ဂနွေနေ့မှာ စတင်ပြေးဆွဲလိုက်ပြီ ဖြစ်ပါတယ်။

Published_ 13 October 2023
#Asia_Transport
#တရုတ်နှင့်လာအို #ကုန်တင်ရထားလမ်းသစ်ဖွင့်လှစ်

#Daily_News
Published_ 13 October 2023

၁။ မိုးမပြတ်သေး၍ ဧရာဝတီ၊ ဒုဌဝတီ၊ ချင်းတွင်း၊ စစ်တောင်းမြစ်ရေများ တိုးမည်ဖြစ်သော်လည်း စိုးရိမ်စရာမရှိဟုဆို

၂။ လှည်ကူးမြို့နယ်အတွင်း ငါးရက်ကြာသည်အထိ ရေပြန်မကျသေးတာကြောင့်ရေဘေးသင့် ပြည်သူများ ကယ်ဆယ်ရေးစခန်းများတွင်သာနေထိုင်ရ

၃။ မြန်မာ MOU လုပ်သားများကို နယ်စပ်လမ်းကြောင်းအပြင် လေကြောင်းမှလည်း စေလွှတ်နိုင်ရေးဆွေးနွေးနေ

၄။ တရုတ်နှင့်လာအိုချိတ်ဆက်ထားသည့် ကုန်တင်ရထားလမ်းသစ်စတင်ဖွင့်လှစ်ပြေးဆွဲ.... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

#Local_News
Published_ 13 October 2023

မြန်မာနိုင်ငံရုပ်ရှင်အစည်းအရုံးမှ ကြီးမှူးကျင်းပသည့်'မြန်မာရုပ်ရှင်နေ့' နှင့်(၄၆)ကြိမ်မြောက် ရုပ်ရှင်သက်ကြီးပူဇော်ပွဲကို အောက်တိုဘာလ(၁၃)ရက်တွင်စည်ကားသိုက်မြိုက်စွာကျင်းပခဲ့ကြောင်း သိရသည်။

အောက်တိုဘာလ(၁၃)ရက်နေ့သည်  (၁၀၃)နှစ်ပြည့် ‘မြန်မာရုပ်ရှင်နေ့’ဖြစ်သလို အဆိုပါနေ့တွင် အစဉ်အလာမပျက် ရုပ်ရှင်သက်ကြီး ပူဇော်ပွဲအခမ်းအနားကျင်းပခဲ့ခြင်းဖြစ်သည်။

အဆိုပါ အခမ်းအနားတွင် ရုပ်ရှင်သက်ကြီးပညာရှင် (၃၀)ဦးခန့်ကိုပူဇော်ကန်တော့ခဲ့ကြောင်းနှင့်  သက်ကြီးပညာရှင်စုစုပေါင်း(၁၄၀)ကျော်ကို ပူဇော်ကန်တော့သွားမည်ဖြစ်သည် ဟုဆိုသည်။

(၄၆)ကြိမ်မြောက်ရုပ်ရှင်သက်ကြီး ပူဇော်ပွဲအတွက် သရုပ်ဆောင်၊ ဇာတ်ညွှန်း၊တည်းဖြတ် အစရှိသည့် ရုပ်ရှင်လောကသားများ၊ ရုပ်ရှင်ထုတ်လုပ်ရေးများ၊ရုပ်ရှင်ရုံမိသားစုများ၊ဗီဒီယိုအခြေခံအဖွဲများ၊ အနုပညာရှင်များ၊ဒီဇိုင်းနာများနှင့် အလှူရှင်များမှပါဝင်လှူဒါန်းခဲ့ကြ‌ကြောင်း သိရသည်။

#Local_News #'မြန်မာရုပ်ရှင်နေ့' #ရုပ်ရှင်သက်ကြီးပူဇော်ပွဲ
#tthl #Yangon_Times

#Local_News
Published_13 Oct 2023

ယခုနှစ်အတွင်း အော်ဒါမှာယူမှုများပြား‌နေသည့် ရိုးရာမီးပုံးနှင့်ကလေးလက်တွန်း လှည်းများ ကုန်ကြမ်းဈေးနှင့်အနည်းငယ်မြင့်တက်လာကြောင်း မီးပုံးလုပ်ငန်းလုပ်ကိုင်သူများဆီက သိရသည်။

ရိုးရာမီးပုံးနှင့် လက်တွန်းလှည်းများပြုလုပ်ရာတွင်အသုံးပြုရသည့် စက္ကူ ဆီစိမ်စက္ကူ၊ဆေးနှင့်ဝါးများကို အသုံးပြုရလေ့ရှိပြီးယခုနှစ်အတွင်းဈေးနှုန်းများ ဆေး‌ဈေးနှုန်းအနည်းငယ်နှင့်ဝါးဈေးနှုန်းမှာ ထက်ဝက်ခန့်အထိမြင့်တက်လာသောကြောင့် ရိုးရာမီးပုံးနှင့် လက်တွန်းလှည်းများမှာလည်းတစ်ခုလျှင်ကျပ်၁၀၀မှ ၅၀၀ ကျပ်အတွင်းမြင့်တက်လာကြောင်း သိရသည်။

"ဒီနှစ်ကမနှစ်ကထက်သွက်နေတယ်။ အမှာများတဲ့အတွက်လည်းမနှစ်ကထက်ပိုလုပ်ရတယ်။ အမြတ်တော့နည်းတယ်ကုန်ကြမ်းဈေးတက်တော့ လက်လီ‌ရောင်းသူလဲအဆင်ပြေအောင်အမြတ်လဲ သိပ်မတင်ဘူး။ မှာကြပါတယ်တော်တော်များများလဲမှာတယ်"ဟု ရန်ကုန်မြို့မှ ရိုးရာမီးပုံးလုပ်ကိုင်သူ ဒေါ်အုန်းမြင့်ကပြောသည်။

အဆိုပါ သီတင်းကျွတ်မီးထွန်းပွဲ‌တော်အတွက် အသုံးပြုကြသည့်မီးပုံးလုပ်ငန်းများအားဇူလိုင်လကုန်ခန့်မှစတင်၍ လုပ်ကိုင်လေ့ရှိကြပြီးယခုနှစ်အတွင်း အော်ဒါမှာယူမှုပိုမိုများပြားကြောင်း သိရသည်။

ထိုသို့အော်ဒါမှာယူရာတွင်မန္တလေးတိုင်းဒေသကြီး၊ စစ်ကိုင်း တိုင်းဒေသကြီးရှိမြို့နယ်အချို့နှင့်ရှမ်းပြည်နယ်တို့မှ အဓိကမှာယူနေကြောင်း သိရသည်။

သီတင်းကျွတ်မီးထွန်းပွဲတော်အတွင်း၌ မြန်မာ့ရိုးရာလက်မှုမီးပုံးများအပြင် တရုတ်မီးပုံးများလည်း ပြည်တွင်းသို့ဝင်ရောက်လေ့ရှိပေသော်လည်း ယခုနှစ်အတွင်းရိုးရာမီးပုံးများအား ပိုမိုအာရုံစိုက်လာကြကြောင်းသိရသည်။

လက်လီဈေးကွက်၌ မီးပုံးအမျိုးအသားအလိုက် တစ်လုံးလျှင်ကျပ် ၁၀၀၀ မှ ၅၀၀၀ ကျပ်ဝန်းကျင်နှင့် ကလေးလက်တွန်းလှည်းတစ်စီးလျှင် ယုန်လက်တွန်းလှည်း
တစ်စီးလျှင် ကျပ် ၃၀၀၀ အထိဈေးနှုန်းအသီးသီးရှိနေကြောင်း သိရသည်။

#Local_News #ရိုးရာမီးပုံးများ #ကုန်ကြမ်းဈေးမြင့်တက် #YMG/NN

‘၂၀၂၃ ခုနှစ်အတွက် မြန်မာ့ရုပ်ရှင်ထူးချွန်ဆုချီးမြှင့်ပွဲကို ၂၀၂၄ခုနှစ်ဖေဖော်ဝါရီလထဲမှာ ကျင်းပဖို့ရှိပြီး နေပြည်တော်မှာကျင်းပသွားဖို့ရှိတယ်’
မြန်မာနိုင်ငံ ရုပ်ရှင်အစည်းအရုံးနာယက ဒါရိုက်တာပန်းချီစိုးမိုး

Published_ 13 October 2023
#Local_News
#အကယ်ဒမီဆုပေးပွဲ #မြန်မာ့ရုပ်ရှင်ထူးချွန်ဆုချီးမြှင့်ပွဲ
#tthl #Yangon_Times