#DailyNews
Published - 23 August 2022
၁။ အိမ်၊ ခြံ၊ မြေ ဈေးကွက်တွင်ရင်းနှီးမြုပ်နှံသူများရှိလာ၍ ယခင်ကထက်တန်ဖိုး(၃၀)ရာခိုင်နှုန်းတက်
၂။ ဆန်ဈေး ထိန်းညှိနိုင်ရန် အရန်ဆန်စီမံကိန်းဖြင့် ဆောင်ရွက်နေ
၃။ ရှားပါးမျိုးစိတ်စာရင်းဝင် မြန်မာ့ကြယ်လိပ်ပေါက်ပွားနှုန်းများသော်လည်း ရှင်သန်နိုင်နှုန်း ကျဆင်း
၄။ တိုကျိုပြပွဲတွင် ပလတ်စတစ်အစားအစာရုပ်ထုများအား ခင်းကျင်းပြသ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#World_Business
Published 23 August 2022
တောင်ကိုရီးယား၌ လက်ရှိနှစ်များအတွင်း ငွေကြေးဖောင်းပွမှုအမြင့်ဆုံးဖြစ်နေပြီး ကြက်သားဈေးတက်နေပေမယ့် ဆိုင်တစ်ဆိုင်ကတော့ ဈေးချပြီးရောင်းပေးနေပါတယ်။
နိုင်ငံရဲ့ဒုတိယအကြီးမားဆုံးလက်လီရောင်းချရေးလုပ်ငန်း Homeplus က ကုန်ဈေးနှုန်းကြောင့် စားသုံးသူများစိတ်ညစ်နေရတဲ့အချိန်မှာ ကြက်ကြော်ရောင်းချတဲ့ ဈေးနှုန်းကို ၃ ပုံ ၂ ပုံလောက်အထိ လျှော့ချခဲ့ပါတယ်။
တောင်ကိုရီးယားပြည်သူတွေဟာ အစားအစာချွေတာဖို့ နည်းလမ်းမရှိတော့ဘဲ လျှော့ဈေးနဲ့ရောင်းနေတဲ့ ကြက်သားဝယ်ယူနိုင်ရန် အချိန်နာရီနဲ့ကြာအောင် တန်းစီစောင့်ဆိုင်းကြရပါတယ်။
Homeplus ဆိုင်တစ်ဆိုင်ရှေ့က တန်းစီနေတဲ့လူတွေထဲမှာ အရှေ့ကလူတွေကတော့ စောင့်ရကျိုးနပ်ပေမယ့် အနောက်ကလူတွေအတွက်တော့ အချိန်ကုန်ရုံပဲရှိပါတယ်။
ကုန်ဈေးနှုန်းမြင့်တက်နေတဲ့ အခြေအနေကနေ Homeplus က အကျိုးအမြတ်များရရှိအောင် အကောင်အထည်ဖော်လိုက်တာပဲဖြစ်ပါတယ်။
အောင်မြင်ခဲ့ရင်တော့ ဆိုင်ခွဲပေါင်း ၁၄၀ လောက်ရှိတဲ့ Homeplus ဟာ တိုင်းပြည်ဈေးကွက်မှာ ရှယ်ယာတန်ဖိုးမြင့်တက်လာနိုင်မှာဖြစ်ပြီး ငွေကြေးဖောင်းပွမှုကို တိုက်ဖျက်နေတဲ့ ကိုရီးယားဗဟိုဘဏ်အစိုးရအတွက် မမျှော်လင့်ဘဲ စီးပွားရေးမိတ်ဖက်ဖြစ်လာနိုင်ဖွယ်ရှိနေပါတယ်။
"Homeplus က ကြက်ကြော်တွေကို အတော်လေးဈေးလျှော့ပြီး ရောင်းချနေတာကြောင့် အခြားလုပ်ငန်းရှင်တွေအနေနဲ့ ဈေးမလျှော့နိုင်ရင်တောင် အနည်းဆုံးဈေးမတက်အောင်ထိန်းသိမ်းဖို့ ဖိအားတွေသက်ရောက်လာမယ် ထင်ပါတယ်" လို့ အောက်စ်ဖို့ဒ်စီးပွားရေးတက္ကသိုလ်မှ ပညာရှင်'လွိုက်ချန်း'က ပြောပြခဲ့ပါတယ်။
တောင်ကိုရီးယားဟင်းလျာတွေထဲမှာ ကြက်သားက အဓိကအခန်းကဏ္ဍမှပါဝင်နေပြီး အစားအသောက်မှာယူရာမှာလည်း ကြက်သားပါဝင်တဲ့အစားအစာတွေဟာ ပီဇာ၊ ဟမ်ဘာဂါ၊ တရုတ်အစားအစာများကိုကျော်လွန်ပြီး နံပါတ် ၁ ရွေးချယ်မှု အများဆုံးဖြစ်ပါတယ်။
နိုင်ငံအနှံမှာ ကြက်သားရောင်းချတဲ့ ဆိုင်ပေါင်းများစွာနဲ့ ကြက်ကြော်၊ ဘီယာရောင်းချတဲ့နေရာများစွာ ရှိနေပါတယ်။
ဒါပေမဲ့ လက်တလောကာလအတွင်း ဈေးနှုန်းအဆမတန်မြင့်တက်လာခဲ့ကာ အခြားအစားအစာများထက် ကြက်သားက ပိုပြီးဈေးတက်လာတာဖြစ်ပါတယ်။
တောင်ကိုရီးယားနာမည်အကြီးဆုံး လုပ်ငန်းတွေထဲက တစ်ခုဖြစ်တဲ့ BBQ Chicken မှထုတ်လုပ်တဲ့ နာမည်ကြီးသံလွင်ကြက်ကြော်ဟာ လွန်ခဲ့တဲ့ ၅ နှစ်က ဝမ် ၁၆,၀၀၀ သာရှိခဲ့ပြီး အခုဆိုရင် ဝမ် ၂၄,၀၀၀ ဖြစ်နေပါပြီ။
Lotte က သူတို့ရဲ့အဓိကကြက်ဈေးကို အချိန်အကန့်အသတ်ဖြင့် တဝက်နီးပါးအထိလျှော့ချခဲ့ပြီး တောင်ကိုရီးယားအကြီးဆုံးလက်လီလုပ်ငန်း Emart ကလည်း ကြက်သားတစ်ဗူးကို ၅,၉၈၀ ဝမ်ဖြင့် ရောင်းချနေပါတယ်။
အရင်က KFC ကိုရီးယားရဲ့ အကြီးအကဲဖြစ်ခဲ့ပြီး လက်ရှိ Homeplus ကိုဖွင့်လှစ်ထားတဲ့ 'ဂျေဟွန်လီ'က လျှော့ဈေးနဲ့ကြက်သားရောင်းချနေခြင်းကို အချိန်အကန့်အသတ်မရှိ ရောင်းချသွားမယ်လို့ ကြေညာထားပါတယ်။
ဝယ်လိုအားအမီ ရောင်းချနိုင်ဖို့ကတော့ ခက်ခဲနေကာ ဆိုင်တစ်ဆိုင်မှာ တစ်နေ့ကို ကြက်ကြော်ဒါဇင်ခန့်သာ ထုတ်လုပ်နိုင်ပါတယ်။
လွန်ခဲ့တဲ့ ၂၃ နှစ်ကျော်အတွင်း ငွေကြေးဖောင်းပွမှုနှုန်းအမြန်ဆုံးဖြစ်လာခဲ့ပြီး ၆.၃ ရာခိုင်နှုန်းမြင့်တက်လာကာ ကိုရီးယားဗဟိုဘဏ်က အတိုးနှုန်းများကို အကြိမ်ကြိမ်တိုးမြှင့်ခဲ့ပါတယ်။
မြင့်တက်လာတဲ့ဈေးနှုန်းနဲ့အညီ နောက်နှစ်အတွက် အခြေခံလစာနှုန်းထားကိုလည်း ၅ ရာခိုင်နှုန်းမြှင့်တင်ပေးထားပါတယ်။
Source: The Straits Times
#Yangon_Media_Group
#World_Health
Published 23 August 2022
လူကောင်းသူကောင်းဖြစ်အောင် ကျင့်ကြံနေထိုင်ခြင်းဖြင့် စိတ်နှင့်ခန္ဓာကိုယ်ကို ကျန်းမာစေကြောင်း လေ့လာချက်အသစ်မှာ ဖော်ပြထားပါတယ်။
အကျင့်စိတ်ထားကောင်းသူတွေက စိတ်ဓာတ်ကျဝေဒနာခံစားရနိုင်ချေ ၅၀ ရာခိုင်နှုန်း ပိုနည်းပါးကြကြောင်း ဟားဗတ်ဒ်တက္ကသိုလ်မှသုတေသီများက တွေ့ရှိခဲ့ကြပါတယ်။
သုတေသီတို့က လူတွေရဲ့စိတ်ထားအကျင့်စာရိတ္တအပေါ်အခြေခံပြီး နှလုံးရောဂါဖြစ်နိုင်ချေများလာကြောင်း တွေ့ရှိခဲ့တဲ့အပြင် ရသမျှနဲ့ ရောင့်ရဲကျေနပ်နိုင်တဲ့လူတွေက သိပ်ပြီးစိုးရိမ်ပူပန်စိတ်မခံစားရကြောင်း တွေ့ရှိထားပါတယ်။
ဒါကြောင့် ဒီလိုမျိုးရရှိလာနိုင်တဲ့ ကျန်းမာရေးအကျိုးကျေးဇူးတွေကြောင့် လူတွေကို လူကောင်းသူကောင်းဖြစ်လာစေရန် တွန်းအားပေးနိုင်မယ်လို့ မျှော်လင့်နေကြပါတယ်။
ဟားဗတ်ဒ်မှ သုတေသနသိပ္ပံပညာရှင် ဒေါက်တာ'ဒိုရာတာဝဇိယက်ခ်ဘီယဲလိုဝိုစကာ'က ဖော်ပြရာမှာ စိတ်ထားမြင့်မြတ်တဲ့သူတွေက စိတ်ဓာတ်ကျဝေဒနာဖြစ်နိုင်ချေ အတော်နည်းပါးတယ်လို့ သိရပါတယ်။
သုတေသနပြုလုပ်ရာမှာ လူပေါင်း ၁,၂၀၉ ဦးဖြင့် ကျန်းမာရေးစမ်းသပ်မှုများပြုလုပ်ပြီး စစ်တမ်းကောက်ယူခဲ့ကြပါတယ်။
သူတို့ရဲ့ ကိုယ်ရည်ကိုယ်သွေး၊ အကြင်နာတရား ဘယ်လောက်ရှိလဲဆိုတာကို တိုင်းတာကြပြီး ဘယ်လောက်အထိ ကျေနပ်ရောင့်ရဲနိုင်လဲဆိုတာကို ဆန်းစစ်ခဲ့ကြပါတယ်။
အဲဒီနောက် ကိုယ်ကျင့်တရားကောင်းမွန်ကြောင်း စမ်းသပ်ရရှိခဲ့တဲ့လူတွေဟာ စိတ်ဓာတ်ကျဝေဒနာခံစားရနိုင်ချေ ၅၀ ရာခိုင်နှုန်း ပိုနည်းပါးကြောင်း တွေ့ရှိခဲ့ပါတယ်။
ဒါ့အပြင် စိုးရိမ်ပူပန်စိတ်နဲ့ နောင်အခါပိုမိုသာလွန်တဲ့အရာရရှိရန် လက်ရှိကျေနပ်မှုကို ဘယ်လောက်အထိစွန့်စားရဲလဲဆိုတဲ့အကြား ဆက်စပ်မှုကိုလည်း တွေ့ရှိခဲ့ပါတယ်။
ကိုယ်ကျင့်တရားကောင်းသူတွေက နှလုံးရောဂါဖြစ်နိုင်ချေလည်း နည်းပါးနေပါတယ်။
"စိတ်ထားကောင်းသူတွေရဲ့ အကျင့်စာရိတ္တကောင်းမွန်တဲ့အချက်က ကျန်းမာရေးပိုမိုကောင်းမွန်အောင် ပြုလုပ်ပေးနိုင်ပါတယ်" လို့ ဒေါက်တာ'ဒိုရာတာ'က ပြောပြပါတယ်။
ဒါဟာ သုတေသနအစောပိုင်းသာ ရှိသေးပေမယ့် စိတ်ထားကောင်းတဲ့ အကျိုးဆက်တွေကို လူတွေနားလည်လိမ့်မယ်လို့ မျှော်လင့်နေပါတယ်။
အကျင့်စိတ်ထားကောင်းမွန်တဲ့သူတွေဟာ ကျန်းမာရေးကောင်းမွန်စေတဲ့အပြင် လူအများကြားမှာလည်း ကောင်းမွန်တဲ့လူတွေအဖြစ် သတ်မှတ်ကြမှာ ဖြစ်ပါတယ်။
Source: Daily Mail
#Yangon_Media_Group
#World_Health
Published 23 August 2022
ကိုဗစ်ရောဂါကူးစက်ခံရပြီး ၂ နှစ်ကြာတဲ့အထိ ဦးနှောက်ထိုင်းမှိုင်းခြင်းနဲ့ မှတ်ဉာဏ်ချို့ယွင်းခြင်းများ ဖြစ်ပေါ်နိုင်ဖွယ်ရှိကြောင်း လေ့လာချက်တစ်ခုမှာ ဖော်ပြထားပါတယ်။
ထိုအကြောင်းအရာနဲ့ပတ်သက်ပြီး လူပေါင်း ၁.၂၅ သန်းကို စစ်တမ်းကောက်ယူခဲ့ကာ The Lancet Psychiatry ဂျာနယ်မှာ ဖော်ပြခဲ့ပါတယ်။
ဒီလေ့လာချက်မှာ ကိုဗစ်-၁၉ ရောဂါနဲ့ပတ်သက်ပြီး ရေရှည်ရော ရေတိုမှာပါ အာရုံကြောဆိုင်ရာနဲ့ စိတ်ပိုင်းဆိုင်ရာသက်ရောက်မှုများကို လေ့လာခဲ့တာဖြစ်ပါတယ်။
ဦးနှောက်ထိုင်းမှိုင်းခြင်းဆိုတာက ဆေးပညာပိုင်းအရ ရောဂါအချက်အလက်ဆိုတာထက် စိတ်ခံစားချက်တစ်ခုသာဖြစ်ပါတယ်။
ဟားဗတ်ဒ်တက္ကသိုလ်မှ မှတ်ချက်ပြုထားတာကတော့ ဦးနှောက်ထိုင်းမှိုင်းခြင်းဆိုတာဟာ လူတစ်ယောက်ရဲ့စဉ်းစားဆုံးဖြတ်ချက်က လေးလံနှေးကွေးပြီး ထက်မြက်မှုမရှိတဲ့ အခြေအနေဖြစ်ပါတယ်။
ဒီလိုဖြစ်ရတဲ့အကြောင်းအရင်းတွေထဲမှာ အလွန်အမင်းပင်ပန်းနွမ်းနယ်ခြင်း၊ ဆေးဝါးသုံးစွဲနေရခြင်း၊ အခြားနောက်ထပ်ရောဂါပါ ဖြစ်ပွားခြင်း စတာတွေ ပါဝင်ပါတယ်။
ဒီလိုအချက်တွေ တဖြည်းဖြည်းလျော့ပါးသွားတဲ့အခါ ဦးနှောက်ထိုင်းမှိုင်းနေတာလည်း သက်သာလာတတ်ပါတယ်။
ကိုဗစ်ရောဂါကြောင့် ဦးနှောက်ကို ထိခိုက်မှုများစွာဖြစ်ပွားစေပေမယ့် ဦးနှောက်ထိုင်းမှိုင်းခြင်းကတော့ အသိသာဆုံးလက္ခဏာပါ။
လေ့လာချက်များအရ ကိုဗစ်ရောဂါကူးစက်ခံရတဲ့လူနာ ၈ ဦးမှာ ၁ ဦးနှုန်းက ကိုဗစ်နောက်ဆက်တွဲလက္ခဏာများ ဖြစ်ပေါ်တတ်ပါတယ်။
အနံ့အရသာပျောက်ခြင်း၊ အသက်ရှူခက်ခဲခြင်း၊ နာကျင်ကိုက်ခဲခြင်း၊ နွမ်းနယ်ခြင်းတို့ဖြစ်တတ်ပြီး ဦးနှောက်ထိုင်းမှိုင်ခြင်းက အလွယ်တကူမပျောက်သွားတတ်ပါဘူး။
ကိုဗစ်ကူးစက်ခံရပြီး ၂ နှစ်လောက်ကြာတဲ့အထိ ဦးနှောက်ထိုင်းမှိုင်းခြင်းအပြင် မှတ်ဉာဏ်ချို့ယွင်းခြင်း၊ ဝက်ရူးပြန်ထခြင်း၊ တက်ခြင်းနဲ့ စိတ်ပိုင်းဆိုင်ရာ မူမမှန်ခြင်းများပါ ဖြစ်ပေါ်တတ်ပါတယ်။
ဒယ်လ်တာနဲ့ အိုမီခရွန်မျိုးဗီဇကွဲတွေဟာ အခြားမျိုးဗီဇကွဲတွေထက် အာရုံကြောဆိုင်ရာနဲ့ စိတ်ပိုင်းဆိုင်ရာချို့ယွင်းခြင်းများ ပိုမိုဖြစ်ပေါ်နိုင်တယ်လို့ တွေ့ရှိထားပါတယ်။
ကလေးတွေဟာ လူကြီးတွေလောက် နောက်ဆက်တွဲလက္ခဏာမဖြစ်ကြသလို အသက် ၆၅ နှစ်အထက်လူကြီးတွေမှာတော့ လူလတ်ပိုင်းတွေထက် ဖြစ်နိုင်ချေပိုများနေပါတယ်။
ကပ်ရောဂါမပြီးသေးတဲ့အချိန်ဖြစ်နေတာကြောင့် ဒီလိုနောက်ဆက်တွဲလက္ခဏာတွေက ဘယ်လောက်အထိ ကြာကြာဖြစ်တတ်လဲဆိုတာ သေချာမသိရသေးပါဘူး။
ဒီလိုလက္ခဏာတွေကို ပျောက်ကင်းစေနိုင်မယ့် ဆေးစွမ်းကောင်းမရှိပေမယ့် အပြုအမူနေထိုင်မှုပုံစံများဖြင့် လက္ခဏာသက်သာအောင် ကျင့်ကြံနိုင်ပါတယ်။
အိပ်ရေးဝအောင်အိပ်စက်ခြင်း၊ အောက်ဆီဒင့်ဆန့်ကျင်ပစ္စည်းများပါဝင်တဲ့ အစားအစာများနဲ့ အိုမီဂါ-၃ ဖက်တီးအက်ဆစ်ပါဝင်တဲ့ အစားအစာများစားသုံးခြင်း၊ နေ့စဉ် မိနစ် ၃၀ ခန့်လေ့ကျင့်ခန်းပြုလုပ်ခြင်း၊ အလွန်အမင်းနွမ်းနယ်ခြင်းမဖြစ်စေရန် စိတ်နဲ့ခန္ဓာကိုယ်ကို အနားပေးခြင်း၊ ရေဓာတ်ပြည့်ဝစေရန် ရေများများသောက်ပေးခြင်း၊ ကဖင်းဓာတ်နဲ့ အယ်လ်ကိုဟောဓာတ် အလွန်အကျွံသောက်သုံးခြင်းကို ရှောင်ကြဉ်ခြင်းတို့ လုပ်ဆောင်နိုင်ပါတယ်။
ဒီလိုမျိုးကျင့်ကြံနေထိုင်ပါက ကိုဗစ်ရောဂါကူးစက်ခံနေရချိန်မှာတောင် ကွဲပြားစွာခံစားရစေမှာ ဖြစ်ပါတယ်။
Source: The Jerusalem Post
#Yangon_Media_Group
Published: 22 Aug 2022
လျှပ်စစ်ဓာတ်အားချွေတာဖို့အတွက် ဘင်္ဂလားဒေ့ရှ်နိုင်ငံဟာ တစ်ပတ်ကို ကျောင်းပိတ်ရက်တစ်ရက်ထပ်တိုးပြီး ရုံးတွေရဲ့ အလုပ်ချိန်တွေကို ဖြတ်တောက်မယ်လို့ အစိုးရက တနင်္လာနေ့က ကြေညာလိုက်ပါတယ်။ ဘင်္ဂလားဒေ့ရှ်နိုင်ငံမှာ ဒီဇယ်နှင့် မောင်းတဲ့ ဓာတ်အားပေးစက်ရုံတွေအားလုံးကို ရပ်လိုက်ရတဲ့အတွက် လျှပ်စစ်ဓာတ်အား မလုံလောက်မှုကြောင့် ယခုလို ကြေညာလိုက်ရတာဖြစ်ပါတယ်။
ရုရှား-ယူကရိန်းကိစ္စကြောင့် လောင်စာဆီတင်သွင်းရာမှာ ဈေးတွေမြင့်တက်သွားတဲ့အတွက် ဘင်္ဂလားဒေ့ရှ်ဟာ ပြီးခဲ့တဲ့လက နိုင်ငံရဲ့ ဒီဇယ်သုံးဓာတ်အားပေးစက်ရုံ ၁၀ရုံစလုံးကို ရပ်လိုက်ရပါတယ်။ ဘင်္ဂလားဒေ့ရှ်ဟာ ပြီးခဲ့တဲ့လက တစ်ရက်ကို (၂)နာရီ လျှပ်စစ်မီးဖြတ်တောက်မှုစခဲ့ပေမယ့် နိုင်ငံရဲ့နေရတော်တော်များများမှာတော့ ဒီထက်ရှည်ကြာပြီး မီးတွေပြတ်တောက်နေရပါတယ်၊
ဒီဇယ်စက်ရုံတွေကထုတ်လုပ်တဲ့ လျှပ်စစ်ဓာတ်အားဟာ ဘင်္ဂလားဒေ့ရှ်ရဲ့ စုစုပေါင်း လျှပ်စစ်ဓာတ်အားထုတ်လုပ်မှု ၂၃,၀၀၀ မဂ္ဂါဝပ်ရဲ့ ၆ ရာခိုင်နှုန်းရှိပါတယ်။ စုစုပေါင်းထုတ်လုပ်မှုရဲ့ သုံးပုံတစ်ပုံကို ပြည်တွင်းနှင့်ပြည်ပက တင်သွင်းတဲ့ သဘာဝဓာတ်ငွေ့တွေနှင့်မောင်းနှင်နေတဲ့ ဓာတ်ငွေ့သုံးဓာတ်အားပေးစက်တွေက ထုတ်လုပ်ပေးနေတာပါ။
ကျောင်းတွေဟာ ပုံမှန်အာဖြင့် တစ်ပတ်ကို (၆)ရက်တက်ရပြီး သောကြာနေ့ပိတ်ပါတယ်။ ယခုစနေပါထပ်ပိတ်ပြီး တစ်ပတ်ကို နှစ်ရက်ပိတ်ပေးမယ်လို့ ပညာရေးဝန်ကြီးဌာနက ကြေညာပါတယ်။
အစိုးရရုံးတွေဟာ မနက်၉နာရီကနေ ညနေ ၅နာရီအစား မနက်၈နာရီကနေ ညနေ ၃နာရီ အလုပ်ချိန်ပြောင်းလဲမှာ ဖြစ်ပြီး ဘဏ်တွေက မနက်၁၀နာရီမှညနေ ၆နာရီဖွင့်လှစ်ရာကနေ မနက် ၉နာရီမှ ညနေ ၄ နာရီအထိပြောင်းလဲမှာဖြစ်ပါတယ်။ ပုဂ္ဂလိကရုံးတွေကတော့ သူတို့လုပ်ငန်းလိုအပ်ချက်နှင့်အညီပြောင်းလဲနိုင်တယ်လို့ကြေညာပါတယ်။ အဲဒီပြောင်းလဲမှုကို ဗုဒ္ဓဟူးနေ့ကနေ စတင်မှာဖြစ်ပါတယ်။
Source: Reuters
#Bangladesh_Power_shortage
#Electricity_crisis
#Bangladesh
Published 22 Aug 2022
အင်ဒိုနီးရှားနိုင်ငံ ကျွန်းတစ်ကျွန်းပေါ်မှာ မိသားစုတစ်စုဟာ ဘယ်တော့မှပြုံးမပြနိုင်တော့တဲ့ သူတို့ရဲ့ သက်ကြီးရွယ်အို ဆွေမျိုးတစ်ဦးနှင့် အတူ ဓာတ်ပုံအရိုက်ခံနေပါတယ်။ အဲဒီအချိန်မှာပဲ နောက်ဆွေမျိုးအုပ်စုတစ်စုက သူတို့ရဲ့ ဘိုးဘွားတွေကို ကာကစ်နှင့် ရှပ်အင်္ကျီတွေ ဝတ်ဆင်ပေးနေကြပြန်ပါတယ်။
ဒါပေမယ့် အဲဒီဘိုးဘွားတွေက ဘိုးဘွားရိပ်သာထဲမှာပိတ်မိနေကြတာမဟုတ်သလို သူတို့ရဲ့ သားသမီးမြေးမြစ်တွေကိုလည်း မကျေမနပ် ဆောင့်ကြီးအောင့်ကြီးလည်း လုပ်ပြမနေနိုင်ကြတော့ပါဘူး။ ဘာဖြစ်လို့လဲဆိုတော့ အဲဒီဘိုးဘွားတွေဟာ လူသေတွေဖြစ်နေလို့ပါ။
အင်ဒိုနီးရှားနိုင်ငံ ဆူလာဝေဆီကျွန်းက မြို့ငယ်ကလေးနှစ်မြို့မှာ ဒေသခံတွေဟာ မာနီနီလို့ ခေါ်တဲ့ တစ်ရက်တာ အခမ်းအနားတစ်ခုကို ကျင်းပနေကြတာပဲဖြစ်ပါတယ်။
တိုရီယာ ရွာသင်္ချိုင်းက မြှပ်ထားတဲ့ အခေါင်းတွေရာပေါင်းများစွာကို ပြန်ဖော်ကြပြီး သူတို့ဟာ သေဆုံးသူတွေရဲ့ ဝိညာဉ်တွေကို ပူဇော်ကန်တော့ကြပြီး လက်ဆောင်တွေပေးကမ်းကြပါတယ်။
“ ကျွန်တော်တို့ မာနီနီပွဲလုပ်တဲ့အခါ ပထမဆုံး ဂူတွေကိုဖွင့်ရတယ်။ပြီးတော့ မြေပုံတွေ ဂူတွေနှင့် အနီးတစ်ဝိုက်ကို သန့်ရှင်းရေးတွေလုပ်ရတယ်” လို့ မိသားစုဝင်တစ်ဦးဖြစ်တဲ့ ဆူလီ တိုဆေးက အေအက်ဖ်ပီကိုပြောပါတယ်။
“ အဲဒီနောက် အလောင်းတွေကို အဝတ်အစားတွေ လဲမပေးခင် ခြောက်သွေံသွားအောင် နေလှန်းပေးရပါတယ်” လို့ သူက ဆက်ပြောပါတယ်။
တောင်နံရံတွေကို ထွင်းပြီး မြှပ်နှံထားတဲ့ ဂူအတွင်းထဲက ကြာရှည်ခံအောင်လုပ်ထားတဲ့ အလောင်းတွေထည့်ထားတဲ့ ခေါင်းတလားတွေကို ဆွဲထုတ်ယူကြပါတယ်။
“ ပေးကမ်းလှုဒါန်းတယ်ဆိုတာကလည်း ကွယ်လွန်သူတွေအပေါ် ကျန်ရစ်တဲ့ သားသမီးမြေးမြစ်တွေက ကျေးဇူးဆပ်တဲ့ သဘောပါပဲ” လို့ တိုရီယာကျေးရွာသူကြီး ရာမန်ဘာဒတ်စ်က အေအက်ဖ်ပီကိုပြောပါတယ်။
“ သူတို့က သေသူတွေရဲ့ ဝိညာဉ်တွေကို လေးစားဂုဏ်ပြုကြတယ်။ ဘေးကင်းစွာ နှင့် အေးချမ်းပျော်ရွင်စွာ အမြဲနေထိုင်နိုင်ဖို့ လုပ်ပေးကြတာဖြစ်တယ်” လို့ သူကပြောပါတယ်။
မိသားစုတစ်စုက ပြန်ဖော်ပြီးကာစ သူတို့ရဲ့ဆွေမျိုးသားချင်းတစ်ဦးရဲ့ ရုပ်အလောင်းကို ဆေးလိပ်တိုက်နေပါတယ်။ အခြားသူတစ်ဦးကတော့ နောက်ရုပ်အလောင်းတစ်ခုကို စတိုင်ကျကျ မျက်မှန်တစ်လက် တပ်ပေးနေပါတယ်။
အချို့ရုပ်အလောင်းတွေကတော့ ကျပ်စည်းထားတာ မပျက်မယွင်းရှိနေပြီး အချို့ကတော့ အရိုးစုပဲကြွင်းကျန်ရစ်တော့တာ တွေ့ရပါတယ်။
ဆူလာဝေဆီကျွန်းမှာ တိုရာဂျန်ဆိုတဲ့ လူမျိုးစုတွေက တစ်သန်းလောက်ကျန်ရှိနေပါသေးတယ်။
အလောင်းတွေနှင့်စကားပြောရတာ ၊အဝတ်အစားဝတ်ဆင်ပေးရတာ၊ဆံပင်ဖီးပေးရတာနှင့် ကျပ်စည်းထားတဲ့ဆွေမျိုးတွေနှင့် အတူဓာတ်ပုံရိုက်ကြရတာ သူတို့ စိတ်စနိုးစနောင့် သိပ်မဖြစ်ကြပါဘူး။
ရွာတွေအလိုက် အဲဒီပွဲကျင်းပတာ ဖြစ်ပြီး မာနီနီရွာကတော့ နှစ်အနည်းငယ်ကြာတိုင်း ဇူလိုင် ဒါမှမဟုတ် ဩဂုတ်လမှာ ကျင်းပလေ့ရှိပါတယ်။
သေဆုံးသူတွေရဲ့ ဝိညာဉ်ဟာ သူတို့အသုဘအခမ်းအနားမကျင်းပမီအထိ လောကကြီးထဲမှာ တဝဲဝဲလည်နေတတ်ပြီး သူတို့ ဝိညာဉ်တွေ ထာဝရရှင်သန်ပြီးတဲ့နောက် သူတို့ဟာ ဝိညာဉ်မြေခရီးကိုစတင်တော့တာလို့ တိုရာဂျန်တွေက ယုံကြည်ထားကြ ပါတယ်။
မိသားစုတွေဟာ အသုဘအခမ်းအနားကျင်းပဖို့ ပိုက်ဆံလုံလောက်တဲ့အချိန်အထိ အလောင်းကို ကြာရှည်ခံအောင်လုပ်ထားတတ်ကြပါတယ်။
သူတို့ဟာ ရှာလကာရည်နှင့် လက်ဖက်ရွက်တွေလို သဘာဝဆေးတွေအဖြစ်အသုံးပြုကြပြီး အလောင်းကို မပုပ်မသိုးအောင် ကျပ်စည်းစီရင်ကြပါတယ်။
ဒါပေမယ့် အခုနောက်ပိုင်းမှာတော့ မိသားစုတော်တော်များများက အလောင်းထဲ ဖော်မလင်ဆေးထိုးလာကြပါတယ်။
ဒီမြင်ကွင်းတွေဟာ အနောက်နိုင်ငံက ခရီးသွားတွေအတွက် ကတော့ ထိတ်လန့်စက်ဆုပ်ဖွယ်ကောင်းနေပေမယ့် ဆွေမျိုးတွေကတော့ အလောင်းတွေကိုသန့်ရှင်းပေးရတာ ၊တွဲပြီး ဓာတ်ပုံရိုက်ရတာနှင့် သူတို့ဝိညာဉ်တွေကို ဆုတောင်းပေးရတာတွေအတွက် ပျော်ရွှင်နေကြပါတယ်။
ဒါပေမယ့် အချို့ဒေသခံတွေက လိုတာထက်အရမ်းပိုလုပ်နေကြတယ် လို့ သူကြီးကပြောပါတယ်။
“ အလောင်းတွေကို မာနီနီ အယူအရ လေးလေးစားးစား အရှိဆုံးနှင့် ဆက်ဆံဖို့လိုတယ်” လို့ သူကပြောပါတယ်။
“ ဆွေမျိုးတွေဟာ သူတို့ရဲ့မိဘတွေနှင့် ဘိုးဘွားဘီဘင်တွေကို ဂါရဝပြုကြတယ်။ ပြီးတော့ အကျိုးဆက်ကိုတော့ ဂရုမစိုက်ကြဘူး” လို့ သူကဆက်ပြောလိုက်ပါတယ်။
Source AFP
#Manene_Ceremony
#Indoenesia_Culture
#Sulawesi_island
Published 22 Aug 2022
အတိတ်တုန်းက လေ့လာသုတေသနပြုချက်တွေအရ ပျင်းရိခြင်းဟာ ဉာဏ်ရည်မြင့်မားခြင်းနှင့် ဆက်နွယ်နေတယ်လို့ ဆိုပါတယ်။ အဲဒါကြောင့်လည်း ကိုလံဘီယာက အဲဒီအချက်ကို အသည်းအသန်ကို လေးစားလိုက်နာနေတာဖြစ်ပါတယ်။ ဒါဟာ ကျီစယ်ပြောနေတာမဟုတ်ပါဘူး။ ကိုလံဘီယာဟာ “ အပျင်းထူနေ့” ပွဲတော်ကို နှစ်စဉ်ကျင်းပနေပါတယ်။ အဲဒီရက်ကို နိုင်ငံက တရားဝင်ရုံးပိတ်ရက်အဖြစ်တောင် သတ်မှတ်ပေးထားတာဖြစ်ပါတယ်။
ကမ္ဘာ့အပျင်းထူနေ့ ကို အပျင်းထူသောနေ့လို့လည်း သိထားကြပါတယ်။ကိုလံဘီယာ၊အီတာဂွီးမြို့ရဲ့ စက်မှု၊ကုန်သွယ်ရေးနှင့် ယဉ်ကျေးမှုပွဲတော်ရဲ့ ပိတ်ပွဲနေ့မှာ ကမ္ဘာ့အပျင်းထူနေ့ကိုကျင်းပလေ့ရှိကြပါတယ်။ ရည်ရွယ်ချက်ကတော့ အချိန်တွေကို ကျန်းမာပျော်ရွှင်အကောင်းမြင်စွာဖြင့် အသုံးချမှုမြှင့်တင်တာလို့ဆိုပါတယ်။ အဲဒီပွဲမှာ ကိုလံဘီယာပြည်သူတွေဟာ ပဂျားမား pyjamas အိပ်ရာဝင်ဝတ်စုံတွေဝတ်ပြီး သူတို့ရဲ့အိပ်ရာတွေကိုပါ လမ်းပေါ်ဆွဲထုတ်ကြကာ ပွဲတော်ကိုဆင်နွှဲပျော်ကြပါတယ်။
ကမ္ဘာ့အပျင်းထူနေ့ကို ၁၉၈၄ခုနှစ်မှာ စတင်သတ်မှတ်ခဲ့ကြပါတယ်။ အဲဒီနေ့ကလေးရဲ့ သီးခြားသဘောလက္ခဏာကတော့ ခေတ်သစ်ကမ္ဘာကြီးမှာ သက်သောင့်သက်သာ နေပြီး အနုပညာ၊ယဉ်ကျေးမှုနှင့် အနားယူကြဖို့လိုအပ်နေတာကို ထင်ဟပ်ပြသတာဖြစ်တယ်လို့သိရပါတယ်။
ယခုနှစ်မှာလည်း ဩဂုတ်လ(၂၁)ရက်နေ့မှာ “ကမ္ဘာ့အပျင်းထူနေ့”ပွဲတော်ကို ကိုလံဘီယာနိုင်ငံ အီတာဂွီးမြို့မှာ ထုံးစံအတိုင်း ကျင်းပခဲ့ကြပါတယ်။ပွဲတော်ဆင်နွှဲနေသူဟာ သူတို့သယ်လာတဲ့ အိပ်ရာတွေပေါ်မှာ ပျင်းရိငြီးငွေ့စွာ လဲလျောင်းအပန်းဖြေရင်း ဆူညံလှတဲ့တေးဂီတအသံတွေနှင့်အတူ လိုက်ပါလှည့်လည်ခဲ့ကြပါတယ်။ ကမ္ဘာ့အပျင်းထူနေ့ကို ၂၀၁၂ ခုနှစ်ကစပြီး နိုင်ငံတကာက အသိအမှတ်ပြုခဲ့တယ်လို့လည်းသိရှိရပါတယ်။
Source AFP
#World_Day_of_Laziness
#Colombia
#Itagüí
ရုပ်သံကြည့်ရန်
Page 566 of 768