#DailyNews
Published _ 25 November 2022

၁။ စပါးတင်း ၁၀၀ လျှင် ၆သိန်း ၃ သောင်းကျပ် သတ်မှတ်ချက်ဟာ တောင်သူများအတွက် အရင်းတောင်မရှိသည့်ဈေးဖြစ်နေ

၂။ သတ္တုတွင်းထွက်ပစ္စည်း တင်ပို့မှုမှ အမေရိကန်ဒေါ်လာ သန်း ၂၀၀ နီးပါးရရှိထား

၃။ ပြင်ပတွင်အပိုဆေးဖိုးဝါးခကုန်ကျခဲ့သည့်ဝန်ထမ်းများအတွက် ဆေးကုသစရိတ်ထောက်ပံ့ကြေး စတင်ပေးမည်

၄။ သာမန်ရုပ်ရှင်များနှင့်မတူကွဲပြားနေသည့် Return to Seoul ရုပ်ရှင် ဘူဆန်ပွဲတော်တွင်ပြသ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Military
Published 25 November 2022

တစ်ချိန်တုန်းက အာရှမှာ အကြီးမားဆုံးဖြစ်ခဲ့တဲ့ စစ်အခြေစိုက်စခန်းကို အမေရိကန်တို့စွန့်လွှတ်ခဲ့ပြီးနောက် နှစ် ၃၀ အကြာမှာတော့ တရုတ်တို့ ရေကြောင်းပိုင်နက်နေရာချထားမှုများကို စိုးရိမ်လာသဖြင့် အမေရိကန်စစ်တပ်ဟာ ဆူဘစ်ပင်လယ်အော်ကို ပြန်လည်ရောက်ရှိလာဖွယ်ရှိကြောင်း ကင်းလွတ်ဆိပ်ကမ်းဇုန် ကြီးကြပ်ရေးဌာနမှ ထိပ်တန်းအရာရှိတစ်ဦးက ပြောကြားလိုက်ပါတယ်။

အရင်က အမေရိကန်ရေတပ်အခြေစိုက်စခန်းတည်ရှိခဲ့တဲ့ ဆူဘစ်ပင်လယ်အော်ဟာ တောင်တရုတ်ပင်လယ်ကို မျက်နှာမူထားကာ စည်ကားတဲ့နေရာတစ်ခုဖြစ်ပြီးတော့ ဆူဘစ်ပင်လယ်အော်မက်ထရိုပိုလီတန်အာဏာပိုင်များ(SBMA)မှ ဒေသခံလူတစ်သိန်းခွဲခန့်ကို အလုပ်နေရာချထားပေးပါတယ်။

ကာကွယ်ရေးပူးပေါင်းမြှင့်တင်ရေးသဘောတူညီချက်(EDCA)အရ ဖိလစ်ပိုင်နိုင်ငံထဲရှိ နောက်ထပ်နေရာ ၅ ခုမှာလည်း အမေရိကန်စစ်ဘက်ဆိုင်ရာအဆောက်အအုံများနဲ့ လက်နက်များနေရာချထားရန် အမေရိကန်နဲ့ ဖိလစ်ပိုင်တို့ ညှိနှိုင်းဆွေးနွေးနေကြပါပြီ။

အဆိုပါဆိပ်ကမ်းမှာ ကြာသပတေးနေ့တုန်းက SBMA တည်ထောင်ခြင်း နှစ် ၃၀ ပြည့်အထိမ်းအမှတ်အဖြစ် ပွဲများပြုလုပ်ခဲ့ပြီး အရပ်ဘက်လေယာဉ်များနဲ့ ဖိလစ်ပိုင်ရေတပ်ရဟတ်ယာဉ်များ ပြသခြင်းတို့ ပြုလုပ်ခဲ့ပါတယ်။

အဆိုပါယာဉ်တွေကို အခုဆိုရင် ထောက်လှမ်းရေးနဲ့ လေကြောင်းလေ့ကျင့်ရေးတို့မှာ ပြန်လည်အသုံးချဖို့ ရည်ရွယ်ထားပါတယ်။

၂၀၁၄ ခုနှစ်က လက်မှတ်ရေးထိုးခဲ့ပုံအရဆိုရင် EDCA သဘောတူညီချက်က သတ်မှတ်ခဲ့တဲ့ ၁၀ နှစ်ကာလကို ကျော်လွန်ပြီး ဆက်လက်လုပ်ဆောင်သွားဖွယ်ရှိနေကာ အမေရိကန်တို့က ဖိလစ်ပိုင်မှာ အခြေစိုက်စခန်းအသစ်များတည်ဆောက်ရန်နဲ့ ရှိပြီးသား EDCA နေရာများမှာ အဆင့်မြှင့်တင်ရန် ရင်းနှီးမှုများပြုလုပ်ဖို့ စိတ်ဝင်စားတဲ့ပုံပေါ်နေပါတယ်။

ထိုင်ဝမ်ရေလက်ကြား တင်းမာလာမှုများနဲ့ အမေရိကန် တရုတ်တို့ကြား ရန်လိုမှုများကြီးထွားလာခြင်းတို့က အခုလို စိုးရိမ်မှုတွေဖြစ်လာစေတာဖြစ်ကြောင်း SBMA ဥက္ကဌ'ရိုလန်ပေါ်လီနို'က ပြောကြားခဲ့ပါတယ်။

အနီးနားရှိ အိုလွန်ဂါပိုမြို့ရဲ့ မြို့တော်ဝန်ဟောင်းဖြစ်သူ'ပေါ်လီနို'က သူ့အစိုးရအဖွဲ့ဟာ အမေရိကန်နဲ့ ကာကွယ်ရေးမဟာမိတ်များအဖြစ် ဆက်လက်တည်ရှိလိုကြောင်း၊ အိုလွန်ဂါပိုမြို့ကလူတွေဟာ အမေရိကန်စစ်မှုထမ်းတွေနဲ့ ကာလကြာမြင့်တဲ့အထိ အတူနေထိုင်လာကြတာကြောင့် အမေရိကန်လိုလားသူများဖြစ်ကြောင်း ပြောကြားလိုက်ပါတယ်။

ဖိလစ်ပိုင်နိုင်ငံဆိုင်ရာ အမေရိကန်သံအမတ်'မယ်ရီကေကာလ်ဆန်'က နိုဝင်ဘာ ၉ ရက်နေ့မှာ ဆူဘစ်ပင်လယ်အော်နဲ့ အမေရိကန်ကုမ္ပဏီပိုင်ဆိုင်တဲ့ သင်္ဘောကျင်းသို့ သွားရောက်ခဲ့ပါသေးတယ်။

ဖိလစ်ပိုင်ရေတပ်ဟာ ယင်းတို့ရေတပ်အခြေစိုက်စခန်းသစ်အဖြစ် ထိုသင်္ဘောကျင်းရဲ့နေရာအချို့မှာ အခြေချထားပါတယ်။

'ကာလ်ဆန်'လာရောက်လည်ပတ်ခြင်းက ဆူဘစ်ပင်လယ်အော်ဟာ အမေရိကန်အတွက် ဘယ်လောက်အရေးပါလဲဆိုတာကို ပြသရာရောက်ပါတယ်။

တရုတ်ကုမ္ပဏီနှစ်ခုက ထိုသင်္ဘောကျင်းကို လိုချင်နေခဲ့ပေမယ့် အမေရိကန်တို့ဝင်ရောက်လာခဲ့တာဖြစ်ကြောင်း ဖိလစ်ပိုင်ထိပ်သီးအရာရှိတစ်ဦးက ဆိုပါတယ်။

ဖိလစ်ပိုင်သိမ်းယူထားတဲ့ ကျွန်းတစ်ကျွန်းအနီးမှာ ဖိလစ်ပိုင်ရေတပ်နဲ့ တရုတ်ကမ်းရိုးတန်းစောင့်တပ်တို့ကြား နိုဝင်ဘာ ၂၀ ရက်နေ့က တွေ့ဆုံမှုကို ရှင်းလင်းပြောကြားဖို့ ဖိလစ်ပိုင်သမ္မတ'ဖာဒီနန်မားကို့စ်ဂျူနီယာ'က အမိန့်ပေးသဖြင့် ဖိလစ်ပိုင်က တရုတ်ထံ စာရေးသားပေးပို့ခဲ့ပါတယ်။

အောက်တိုဘာလက ပစ်ခတ်ခဲ့တဲ့ တရုတ်ဒုံးကျည်မှ အပိုင်းအစများကို တရုတ်ကမ်းရိုးတန်းစောင့်တပ်ဖွဲ့က အတင်းအဓမ္မရယူနေတာဖြစ်ကြောင်း ဖိလစ်ပိုင်အာဏာပိုင်များက ဆိုပါတယ်။

Source: Kyodo News
#Yangon_Media_Group

#World_Health
Published 25 November 2022

ကလေးဘဝကနေ အရွယ်ရောက်သည်အထိ စာသင်ခန်းစာတွေပဲ လေ့လာခဲ့တဲ့သူအများစုမှာ အဝေးမှုန်အခြေအနေကြောင့် မျက်မှန်တပ်ကြရတယ်လို့ လေ့လာတွေ့ရှိရပါတယ်။

စာဖတ်လေ့လာမှုများအပြင် GJD2, RBFOX1, LAMA2, KCNQ5 နဲ့ LRRC4C မျိုးဗီဇမျိုးကွဲများက အဝေးမှုန်ဖြစ်လာရတဲ့ အကြောင်းအရင်းဖြစ်နေနိုင်ကြောင်း ဝေးလ်စ်နိုင်ငံ ကာဒစ်ဖ်တက္ကသိုလ်မှ ဒေါက်တာ'ဂျရမီဂက်ဂျင်ဟိမ်း'ဦးဆောင်တဲ့ သုတေသီအဖွဲ့က ဖော်ပြခဲ့ပါတယ်။

ကျောင်းစာသင်တာ ကြာလာတာနဲ့အမျှ အဝေးမှုန်ဖြစ်လာချေများလာတဲ့ မျိုးဗီဇမျိုးကွဲ ၅ မျိုးကို သုတေသီများတွေ့ရှိခဲ့ကြတာဖြစ်ပါတယ်။

အဝေးမှုန်ခြင်းက မျက်လုံးပြဿနာတစ်မျိုးဖြစ်ပြီး အသက်ကြီးသူတွေမှာ ပြန်မကောင်းနိုင်တော့တဲ့ အခြေအနေဖြစ်ပါတယ်။

ကလေးတွေမှာလည်း အဝေးမှုန်ခြင်းဖြစ်နိုင်ပြီး အပြင်ထွက်ချိန်နည်းပါးခြင်း၊ ပညာသင်ကာလကြာမြင့်ခြင်းတို့အပြင် မျိုးရိုးဗီဇရောစပ်ခြင်းတို့ကြောင့် ဖြစ်တတ်ပါတယ်။

အဝေးမှုန်ဖြစ်နိုင်တဲ့ မျိုးဗီဇမျိုးကွဲပေါင်း ၄၅၀ ကျော်ကို တွေ့ရှိခဲ့ပေမယ့် နေထိုင်မှုပုံစံကြောင့် အဝေးမှုန်ခြင်းခံစားရနိုင်တဲ့ အချို့လူတွေမှာတော့ မျိုးဗီဇမျိုးကွဲအနည်းငယ်နဲ့ သက်ဆိုင်နေပါတယ်။

ပါဝင်စမ်းသပ်သူ ၃၄၀,၀၀၀ ကျော်ထံမှ မျိုးဗီဇနဲ့ ကျန်းမာရေးဆိုင်ရာ အချက်အလက်များအသုံးပြုရာမှာ အဝေးမှုန်ခံစားရသူတွေမှာ အန္တရာယ်များတဲ့ လူမှုနေထိုင်မှုပုံစံလည်းရှိကြကာ မျိုးဗီဇမျိုးကွဲအနည်းငယ်ကိုလည်း တွေ့ရှိရပါတယ်။

အဝေးမှုန်ခြင်းဖြစ်စေနိုင်တဲ့ မျိုးဗီဇမျိုးကွဲ ၅ မျိုးမှာမှ ၃ မျိုးကို အရင်က မသိခဲ့ဘဲ ကလေး ၈၀ ရာခိုင်နှုန်းခန့် အဝေးမှုန်ခြင်းခံစားရတဲ့ အရှေ့အာရှနေရာတွေမှာတော့ ၂ မျိုးသာ တွေ့ရှိခဲ့ကြပါတယ်။

အနောက်တိုင်းတွေမှာတော့ ကလေး ၃၀ ရာခိုင်နှုန်းလောက်က အဝေးမှုန်ခံစားကြရပါတယ်။

ဒီလေ့လာမှုကြောင့် အဝေးမှုန်ခြင်းဖြစ်စေတဲ့ မျိုးဗီဇနဲ့ လူနေမှုပုံစံတို့ အပြန်အလှန်သက်ရောက်ကြပုံကို ဇီဝလမ်းကြောင်းတွေကနေ သိမြင်နိုင်စေပါတယ်လို့ ကောက်ချက်ချထားပါတယ်။

အဝေးမှုန်ဖြစ်စေတဲ့ အကြောင်းအရင်းတွေ သိရှိနိုင်မှာဖြစ်ပေမယ့် လူနေမှုပုံစံနဲ့ ဆက်စပ်ပုံတွေကိုတော့ သိရှိဖို့ နောက်ထပ်လေ့လာရဦးမှာဖြစ်ကြောင်း ပြောကြားလိုက်ပါတယ်။

Source: The Jerusalem Post
#Yangon_Media_Group

#World_Science
Published 25 November 2022

Bustard (Otis tarda) လို့ခေါ်တဲ့ ငှက်တွေဟာ ပျံသန်းနိုင်တဲ့ငှက်တွေထဲမှာ အလေးလံဆုံးဖြစ်ပြီး နေမကောင်းတဲ့အခါ သူတို့ဘာသာ အပင်တွေရှာဖွေကာ ကုသနိုင်ပါတယ်။

မော်ရိုကိုမြောက်ပိုင်း၊ ဥရောပတောင်ပိုင်းနဲ့ အလယ်ပိုင်းကစလို့ သမပိုင်းအာရှအလယ်ပိုင်းနဲ့ အရှေ့ပိုင်းတို့ရှိ မြက်ခင်းလွင်ပြင်တွေမှာ တွေ့ရပြီး မြေပြင်မှာအသိုက်ဆောက်တတ်တဲ့ ငှက်တွေဖြစ်ပါတယ်။

၁၉၉၆ ခုနှစ်နောက်ပိုင်း သဘာဝပတ်ဝန်းကျင်ထိန်းသိမ်းကာကွယ်ရေးအဖွဲ့က ထိုငှက်များကို မျိုးသုဉ်းပျောက်ကွယ်မည့်အန္တရာယ်ရှိစာရင်းထဲ ထည့်သွင်းထားကာ တစ်ကမ္ဘာလုံးရှိအကောင်ရေရဲ့ ၆၀ ရာခိုင်နှုန်းလောက်က ပေါ်တူဂီနဲ့စပိန်တို့မှာ ရှိနေပါတယ်။

သူတို့စားသုံးတဲ့အပင်တွေရဲ့ ဇီဝလှုပ်ရှားမှုများအရ bustard ငှက်တွေဟာ ရောဂါပိုးသေစေနိုင်တဲ့ဒြပ်ပေါင်းပါဝင်တဲ့ အပင် ၂ မျိုးကိုရှာဖွေကြကြောင်း ယူဆနေကြပါတယ်။

သူတို့စားသုံးကြတဲ့ corn poppies (Papaver rhoeas)မှာ ဖက်တီးအက်ဆစ်များစွာပါဝင်ပြီး purple viper’s bugloss (Echium plantagineum) မှာတော့ စားသုံးလို့ရတဲ့အဆီဓာတ်များ ပါဝင်ပါတယ်။

သူတို့က လူတွေဆေးဖော်စပ်ရာမှာ အသုံးပြုတဲ့ဆေးပင်တွေကို အသုံးပြုကြကြောင်း၊ အပင်နှစ်မျိုးစလုံးဟာ ပရိုတိုဇိုအာနဲ့ ပိုးသေစေနိုင်တဲ့ အစွမ်းရှိကြကြောင်း ဒေါက်တာ'အာဇူဆီနာဂွန်ဇာလက်ကိုလိုမာ'က ပြောကြားလိုက်ပါတယ်။

ငှက်ထီးတွေက လာရောက်တဲ့ငှက်မတွေ မြင်သာကြားသာအောင် သတ်မှတ်ထားတဲ့နေရာတွေမှာ စုဝေးကြပြီး ငှက်ထီးတွေရဲ့ ပုံပန်းသဏ္ဍာန် စွမ်းရည်တွေကိုကြည့်ပြီး ငှက်မတွေက မိတ်ဖက်ရွေးချယ်တာဖြစ်ပါတယ်။

အပင်တွေက ငှက်ထီးရောအမအတွက်ပါ အကျိုးရှိပြီး အထူးသဖြင့် မိတ်လိုက်ရာသီမှာ ကူးစက်ရောဂါများမှ ကုသနိုင်သလို ပိုမိုကျန်းမာကာ ဆွဲဆောင်မှုရှိစေကြောင်း 'ဂွန်ဇာလက်ကိုလိုမာ'က ဆိုပါတယ်။

"မိတ်လိုက်ရာသီမှာ ငှက်ထီးတွေက ပိုမိုအားအင်ကုန်ခမ်းတာကြောင့် ဒီဆေးပင် ၂ မျိုးကို ရွေးချယ်စားသုံးကြပါတယ်" လို့ 'ဘော်တစ္စတာဆိုပဲလာနာ'က ပြောကြားလိုက်ပါတယ်။

corn poppies က ရိုးရာတိုင်းရင်းဆေးတွေမှာ အနာသက်သာခြင်း၊ အိပ်ပျော်စေခြင်း၊ ကိုယ်ခံအားမြှင့်တင်ခြင်းတို့အတွက် အသုံးပြုကြပါတယ်။

purple viper’s bugloss ကတော့ လူတွေနဲ့ ကျွဲနွားတွေမှာ အများအပြားစားမိရင် အဆိပ်သင့်စေပါတယ်။

bustard ငှက်တွေ သူတို့ဘာသာ ဆေးကုသတယ်ဆိုတဲ့အကြောင်း ထပ်မံလေ့လာဖို့တော့ လိုအပ်ပါသေးတယ်။

Source: The Jerusalem Post
#Yangon_Media_Group

#World_Culture
Published 24 November 2022

အာဂျင်တီးနားမှ မြင်းစီးသမားတွေဟာ ကျွမ်းကျင်ညက်ညောစွာ စီးနင်းနိုင်ကြပြီး ဒဏ္ဍာရီနဲ့လက်တွေ့ကာလကြား တည်ရှိနေကြပါတယ်။

#Yangon_Media_Group

Published 24 Nov 2022

အင်ဒိုနီးရှားငလျင်ကြောင့် အပျက်အစီးပုံတွေအကြား အစားအစာနှင့်ရေမရဘဲ (၂)ရက်ကြာ ပိတ်မိနေခဲ့တဲ့ ခြောက်နှစ်သား ကလေးငယ်တစ်ဦးကို ဗုဒ္ဓဟူးနေ့က ကယ်ထုတ်နိုင်ခဲ့ကြပါတယ်။

ဆန်းကြယ်လှတဲ့ ယခုလိုကယ်တင်နိုင်မှုကို ရိုက်ကူးထားတဲ့ ဗွီဒီယိုထဲမှာ အဲဒီကလေးငယ် အက်ဇ်ကာကို ငလျင်ဒဏ် အဆိုးရွားဆုံးခံခဲ့ရတဲ့ ကူဂန်နန်းဒေသက ဆီယမ်ဂျာအရပ်က ပျက်စီးနေတဲ့အိမ်တစ်လုံးရဲ့ အပျက်အစီးပုံတွေကြားထဲက ကယ်ဆယ်ရေးလုပ်သားတွေက ဆွဲထုတ်ကယ်တင်နိုင်ခဲ့တာတွေ့ရပါတယ်။

“ အက်ဇ်ကာ အသက်ရှင်နေတုန်းပဲလို့သိကြရတာနှင့် ကျွန်တော်အပါအဝင် လူတိုင်းမျက်ရည်ကျကြရတယ်” လို့ အသက် ၂၈နှစ်အရွယ် ကယ်ဆယ်ရေးစေတနာ့ဝန်ထမ်းတစ်ဦးဖြစ်တဲ့ ဂျက်ဆန်ကိုလီဘူက အေအက်ဖ်ပီကိုပြောပါတယ်။

“သိပ်ကိုဆန်းကြယ်တဲ့အဖြစ်ပဲ” လို့လည်းသူကပြောပါတယ်။ အဲဒီငလျင်ကြီးကြောင့် သေဆုံးခဲ့သူ ၂၇၁ ဦးအထိရှိခဲ့ပြီလည်းဖြစ်ပါတယ်။

Source AFP

#Indonesia_Earthquakes

#Six_years_old_Rescued_from_quake _rubble

#Cianjur_West_Java