#World_Health
Published_ 2 May 2023

ပါးစပ်ဖြင့် လိင်ဆက်ဆံခြင်းဟာ ယူကေနဲ့ အမေရိကန်တို့မှာ လည်ချောင်းကင်ဆာဖြစ်စေနိုင်တဲ့ အဓိကအကြောင်းအရင်းဖြစ်လာပါတယ်။

ထိုနှစ်နိုင်ငံမှာ အရင်က သားအိမ်ခေါင်းကင်ဆာက အဖြစ်အများဆုံးကင်ဆာဖြစ်ခဲ့ပေမယ့် ပြီးခဲ့တဲ့ဆယ်စုနှစ် ၂ ခုအတွင်း လည်ချောင်းကင်ဆာ အဖြစ်များလာကြောင်း ပညာရှင်များက ပြောကြားလိုက်ပါတယ်။

ဒါဟာ သားအိမ်ခေါင်းကင်ဆာ အဓိကဖြစ်ပွားရခြင်း အကြောင်းအရင်းဖြစ်တဲ့ HPV ဗိုင်းရပ်စ်ကြောင့်လို့ ဘာမင်ဂမ်တက္ကသိုလ်မှ ဒေါက်တာ'ဟီရှမ်မဲဟန်နာ'က ဖော်ပြခဲ့ပါတယ်။

ဒီဗိုင်းရပ်စ်က ရောဂါပိုးရှိသူအမျိုးသမီးနဲ့ ယောနိ၊ စအို၊ ပါးစပ်မှတဆင့် လိင်ဆက်ဆံခြင်းတို့ကနေ ကူးစက်လေ့ရှိပါတယ်။

ပါးစပ်ဖြင့် လိင်ဆက်ဆံခြင်းကြောင့် အဖြစ်များလာတဲ့ လည်ချောင်းကင်ဆာဟာ အာသီးနဲ့ လည်ချောင်း အနောက်ဘက်တို့မှာ ကင်ဆာဖြစ်ပွားတာဖြစ်ပါတယ်။

ပြီးခဲ့တဲ့ဆယ်စုနှစ် ၂ ခုအတွင်း အနောက်နိုင်ငံတွေမှာ လည်ချောင်းကင်ဆာအဖြစ်များလာပြီး ကပ်ရောဂါလို့တောင် သတ်မှတ်လာကြပါတယ်။

ဒီရောဂါဖြစ်ပွားရခြင်းမှာ HPV ကူးစက်မှုက အဓိကအန္တရာယ်ဖြစ်နေတယ်လို့ အရင်လေ့လာမှုတွေမှာလည်း တွေ့ရှိရပါတယ်။

"HPV က လိင်ကြောင့်ကူးစက်တဲ့ရောဂါဖြစ်ပြီး လည်ချောင်းကင်ဆာအတွက် အဓိကဖြစ်ပွားရတဲ့အကြောင်းအရင်းကတော့ ပါးစပ်ဖြင့်လိင်ဆက်ဆံတဲ့ လက်တွဲဖော်အရေအတွက်ကြောင့်ဖြစ်တယ်" လို့ ဖော်ပြခဲ့ပါတယ်။

ပါးစပ်ဖြင့် မဆက်ဆံတဲ့လူတွေထက်စာရင် လက်တွဲဖော် ၆ ယောက်နဲ့အထက်ကို ပါးစပ်ဖြင့်လိင်ဆက်ဆံတဲ့လူတွေဟာ လည်ချောင်းကင်ဆာဖြစ်နိုင်ချေ ၈.၅ ဆပိုများကြောင်းလည်း ဖော်ပြထားပါတယ်။

ဒီကူးစက်မှုတွေက များသောအားဖြင့် အလိုလိုပျောက်ကင်းသွားတတ်ပေမယ့် တစ်ခါတစ်ရံရောဂါပိုးကျန်ရှိပြီး ကင်ဆာဖြစ်စေပါတယ်။

HPV ကာကွယ်ဆေးက ၈၀ ရာခိုင်နှုန်းထိရောက်မှုရှိပြီး ဖွံ့ဖြိုးပြီးနိုင်ငံအများအပြားမှာ ရရှိနိုင်ပါတယ်။
Source: India Today
#World_Health #ပါးစပ်ဖြင့်လိင်ဆက်ဆံခြင်း #ယူကေနှင့်အမေရိကန် #လည်ချောင်းကင်ဆာ #အဓိကအကြောင်းအရင်း
#YMG #Yangon_Media_Group

#World_Health
Published_ 2 May 2023

မှောင်မည်းနေတဲ့ မိုးတိမ်တွေက ဆေးယဉ်ပါးဘက်တီးရီးယားတွေကို အကွာအဝေးတော်တော်များများအထိ သယ်ဆောင်လာနိုင်တယ်လို့ ကနေဒါနဲ့ ပြင်သစ်သုတေသီအဖွဲ့က တွေ့ရှိထားပါတယ်။

ဒီဘက်တီးရီးယားတွေက မြေကြီး အရွက် စတဲ့မျက်နှာပြင်တွေမှာ နေတတ်ကြပြီး လေတိုက်ရာကနေ လေထုထဲသို့သယ်ဆောင်သွားကာ မိုးတိမ်အမြင့်လောက်ကနေ ကမ္ဘာတဝှမ်း အဝေးကြီးအထိ ရောက်ရှိသွားနိုင်ကြောင်း ဦးဆောင်စာတမ်းပြုစုသူ 'ဖလော်ရန့်ရော့စီ'က AFP နဲ့အင်တာဗျူးမှာ ပြောကြားခဲ့ပါတယ်။
အဆိုပါတွေ့ရှိမှုကို ပြီးခဲ့တဲ့လက Science of The Total Environment ဂျာနယ်မှာ ဖော်ပြခဲ့ပါတယ်။

တိမ်ကောင်းကင်နမူနာမှာတွေ့ရတဲ့ ဘက်တီးရီးယားတွေကနေ ပဋိဇီဝယဉ်ပါးမျိုးဗီဇတွေကို ပြင်သစ်အလယ်ပိုင်း လေဗယ်တက္ကသိုလ်မှသုတေသီများက ရှာဖွေခဲ့ကြပါတယ်။

ပင်လယ်ရေမျက်မှာပြင်အထက် ၁.၄၆၅ မီတာရှိ လေထုသုတေသီစခန်းကနေ နမူနာများရယူခဲ့ပါတယ်။

မိုးတိမ်ရေ ၁ မီလီမီတာမှာ ဘက်တီးရီးယားပေါင်း ၃၃၀ ကနေ ၃ သောင်းကျော်ပါဝင်ကာ ပျမ်းမျှအားဖြင့် ဘက်တီးရီးယား ၈ ထောင်ဝန်းကျင် ဖြစ်ပါတယ်။

ဘက်တီးရီးယားတွေက ပဋိဇီဝဆေးတွေကို ထိတွေ့မိပြီး မျိုးဆက်ပြောင်းလဲကာ ဆေးတွေကို ခံနိုင်ရည်ရှိလာတာပဲဖြစ်ပါတယ်။

ဒီပြဿနာက ကမ္ဘာတဝှမ်းမှာ အဓိကပြဿနာကြီးဖြစ်လာကြောင်း ကျန်းမာရေးအာဏာပိုင်များက အကြိမ်ကြိမ်သတိပေးထားပြီး အချို့ဖြစ်ရပ်တွေမှာ ကျန်းမာရေးနဲ့ စိုက်ပျိုးရေးကဏ္ဍတို့မှာ ပဋိဇီဝဆေးအသုံးပြုခြင်းရှိနေသေးတာကြောင့် ကုသလို့မဖြစ်နိုင်တော့ပါဘူး။

လေထုအတွင်း ပဋိဇီဝယဉ်ပါးဆေးဘက်တီးရီးယားများရဲ့ ပျံ့နှံ့မှုနဲ့ပတ်သက်ပြီး ကျန်းမာရေးအကျိုးကျေးဇူးသက်ရောက်မှုများအပေါ် ကောက်ချက်မချနိုင်သေးပါဘူး။

ရောဂါပိုးမွှားတွေရဲ့ ၅ ရာခိုင်နှုန်းမှ ၅၀ ရာခိုင်နှုန်းကသာ အသက်ရှင်လှုပ်ရှားနေနိုင်တာကြောင့် ဖြစ်ပါတယ်။

လေထုက ဘက်တီးရီးယားတွေအတွက် အလွန်ဖိအားများပြီး တွေ့ရတဲ့ဘက်တီးရီးယားအများစုက လူသားတွေကို ဘေးအန္တရာယ်သိပ်မပြုနိုင်ပေမယ့် မိုးရေထဲလျှောက်သွားတာမျိုး မလုပ်သင့်ဘူးလို့ ရှင်းပြထားပါတယ်။

လေထုစောင့်ကြည့်ခြင်းနည်းလမ်းဖြင့် ဆေးယဉ်ပါးဘက်တီးရီးယားပေါ်ပေါက်ရာ အရင်းအမြစ်ကို ထောက်ပြနိုင်မှာဖြစ်ပါတယ်။
Source: India Today
#World_Health #ဆေးယဉ်ပါးဘက်တီးရီးယား #ဝေးလံသောနေရာများအထိသယ်ဆောင်
#YMG #Yangon_Media_Group

#World_Politics
Published_ 1 May 2023

နာမကျန်းဖြစ်သဖြင့် အများပြည်သူရှေ့ ၂ ရက်ကြာမထွက်ခဲ့ရတဲ့ တူရကီသမ္မတ'ရီဆပ်တာယစ်အာဒိုဂန်'ဟာ ကြာသပတေးနေ့က ပြန်လည်ရောက်ရှိလာပြီး ရုရှားနိုင်ငံဆောက် နျူကလီးယားဓာတ်အားပေးစက်ရုံအကြောင်း ဖော်ပြတဲ့အွန်လိုင်းအခမ်းအနားမှာ ရုရှားသမ္မတ'ဗလာဒီမာပူတင်'နဲ့ စကားပြောဆိုခဲ့ပါတယ်။

#World_Politics #နာမကျန်းဖြစ်နေသည့်တူရကီသမ္မတ #ဗီဒီယိုရုပ်သံ
#YMG #Yangon_Media_Group

#Daily_News
Published_ 1 May 2023

၁။ ဒေသတည်ငြိမ်မှု မရှိသော်လည်း ရွှေဘိုဆန်ဈေး ပြန်ကျလာမည်ဟု ဆန်ကုန်သည်အသင်းပြေ

၂။ စက်သုံးဆီဈေးနှုန်း အကျဘက် ဆက်လက်တည်ရှိနေ

၃။ အပူချိန်မြင့်၍ ပုသိမ်ဆေးရုံရှိ အောက်ဆီဂျင်ဖြန့်ဝေပေးသည့်Station မီးလောင်ကျွမ်းခဲ့ ၊ ထိခိုက်ဒဏ်ရာရသူ မရှိဟုဆို

၄။ နာမကျန်းဖြစ်နေသည့် တူရကီသမ္မတ ပူတင်နှင့်ဗီဒီယိုရုပ်သံတွင် ပြောဆိုကာလူရှေ့ ပြန်လည်ပေါ်ထွက်လာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#World_Health
Published_ 1 May 2023

ယခုနှစ်အစောပိုင်းကတည်းက ကိုဗစ်-၁၉ရောဂါကြောင့် သေဆုံးမှုများ ၉၅ ရာခိုင်နှုန်းကျဆင်းသွားကြောင်း ကမ္ဘာ့ကျန်းမာရေးအဖွဲ့အစည်း WHO က ဗုဒ္ဓဟူးနေ့မှာ ပြောကြားလိုက်ပါတယ်။

ဒီလိုသေဆုံးမှုနှုန်းကျဆင်းသွားတဲ့အတွက် အလွန်အားတက်မိပါတယ်လို့ WHO အကြီးအကဲ'တက်ဒရိုစ်အက်ဒါနွမ်ဂေဘရီယဲဆပ်စ်'က သတင်းစာရှင်းလင်းပွဲမှာ ပြောကြားခဲ့ပါတယ်။

ဒါပေမဲ့ ဗိုင်းရပ်စ်ကရှိနေဆဲဖြစ်ပြီး လူတွေနဲ့အတူရှိနေမှာဖြစ်ကာ နိုင်ငံတွေအနေနဲ့ ကိုဗစ်-၁၉ နောက်ဆက်တွဲဆိုးကျိုးများ စီမံဖို့လိုအပ်ကြောင်း သတိပေးလိုက်ပါတယ်။

အချို့နိုင်ငံတွေမှာ သေဆုံးမှုမြင့်နေဆဲဖြစ်ပြီး ပြီးခဲ့တဲ့ ၄ ပတ်အတွင်း ဒီရောဂါကြောင့်လူပေါင်း ၁၄,၀၀၀ ခန့်သေဆုံးထားပါတယ်။

XBB.1.16 မျိုးဗီဇကွဲအသစ်ထွက်ပေါ်လာကာ ဗိုင်းရပ်စ်က ကူးစက်နေဆဲဖြစ်ပြီး ကူးစက်သေဆုံးမှုလှိုင်းအသစ်များ ဖြစ်ပေါ်လာစေပါတယ်။

WHO နည်းပညာပိုင်းဦးဆောင်သူ 'မာရီယာဗန်ကာခို့ဗ်'က အခုဆိုရင် XBB မျိုးကွဲများဟာ ကမ္ဘာတဝှမ်းမှာလွှမ်းမိုးနေတယ်လို့ ဆိုပါတယ်။

မျိုးဗီဇကွဲက ကူးစက်နိုင်စွမ်းမြင့်မားလာကာ ခုခံအားမတိုးတဲ့အနေအထားမြင်နေရပြီး ကာကွယ်ဆေးထိုးထားသူများ ယခင်ကကူးစက်ဖူးတဲ့သူများလည်း ပြန်လည်ကူးစက်နိုင်ပါသေးတယ်။

ဒီလိုဆင့်ကဲပြောင်းလဲမှုတစ်ခုချင်းစီအကြောင်း သိရှိဖို့နဲ့ ဗိုင်းရပ်စ်အကြောင်းစောင့်ကြည့်နိုင်အောင် နောက်ထပ်စမ်းသပ်မှုများပြုလုပ်ဖို့ လိုအပ်ကြောင်း ဆိုပါတယ်။

ထိုကနေမှ ကာကွယ်ဆေးဖန်တီးခြင်းနဲ့ ဗိုင်းရပ်စ်ထိန်းချုပ်ရန်ဆုံးဖြတ်ချက်ချနိုင်မှာဖြစ်ပါတယ်။

ကိုဗစ်-၁၉ရောဂါကို အပြည်ပြည်ဆိုင်ရာ ပြည်သူ့ကျန်းမာရေးအရေးပေါ်အဖြစ် အဆုံးသတ်ပြီဖြစ်ကြောင်း မကြာမီကြေညာနိုင်ဖို့ WHO က မျှော်လင့်နေပါတယ်။

ကူးစက်သူ ၁၀ ယောက်မှာ ၁ ယောက်နှုန်းဖြင့် ကိုဗစ်နောက်ဆက်တွဲလက္ခဏာပေါ်ပေါက်နိုင်တာကြောင့် လူသန်းပေါင်းများစွာဟာ နာတာရှည်စောင့်ရှောက်မှုလိုအပ်လာနိုင်ပါတယ်။
Source: WION
#World_Health ##ကိုဗစ်ရောဂါ #သေဆုံးမှုနှုန်း(၉၅)ရာခိုင်နှုန်းလျော့ကျ #ဗိုင်းရပ်စ်ဆက်လက်တည်ရှိ #WHO
#YMG #Yangon_Media_Group

#World_News
Published_ 1 May 2023

တက္ကဆပ်ပြည်နယ် ကလိဗ်လန်းမှာ အိမ်နီးချင်း ၅ ယောက်ကို သေနတ်ဖြင့်ပစ်သတ်ခဲ့တယ်လို့ စွပ်စွဲခံထားရတဲ့လူတစ်ယောက်ကို တက္ကဆပ်ရှိ ရဲတပ်ဖွဲ့ဝင် ၂၀၀ ကျော်က တနင်္ဂနွေနေ့မှာ ရှာဖွေခဲ့ကြပါတယ်။

အိမ်နီးချင်းတွေက AR-15-style ရိုင်ဖယ်သေနတ်ဖြင့် ပစ်ခတ်နေတဲ့ အသက် ၃၈ နှစ်အရွယ် 'ဖရန်ဆစ္စကိုအော်ရိုပီဆာ'ကို မပစ်ခတ်ရန်တောင်းဆိုခဲ့ပြီးနောက် သူက အိမ်နီးချင်းတွေကို ပစ်ခတ်ခဲ့ကြောင်း စွပ်စွဲခံထားရပါတယ်။

ထိခိုက်သေဆုံးသူထဲမှာ အသက် ၈ နှစ်အရွယ်ယောက်ျားလေးတစ်ဦးလည်း ပါဝင်ပါတယ်။

အခုလောလောဆယ်တော့ ခြေရာခံလို့မရသေးဘူးလို့ FBI ဟူစတန်အထူးအေးဂျင့်တာဝန်ရှိသူ 'ဂျိမ်းစ်စမစ်'က တနင်္ဂနွေနေ့မှာ သတင်းထောက်တွေကို ပြောကြားခဲ့ပါတယ်။

ရဲအရာရှိ ၂၀၀ ကျော်က တစ်အိမ်တက်တစ်အိမ်ဆင်းဖြင့် သံသယရှိသူကို လိုက်လံရှာဖွေနေကြောင်း ဆန်ယာစင်တိုကောင်တီရဲအရာရှိ ဂရက်ကိတ်ပါစ်က ပြောကြားခဲ့ပါတယ်။

အာဏာပိုင်များက သံသယရှိသူကို သတင်းပေးနိုင်ရင် ဆုငွေ ဒေါ်လာ ၈ သောင်း ပေးဆောင်မယ်လို့ ကြေညာထားပါတယ်။

FBI က နောက်ထပ်အသေးစိတ်များကိုတော့ မဖော်ပြသေးပါဘူး။

အရာရှိများက သောကြာနေ့ ည ၁၁ နာရီ ၃၁ မိနစ်မှာ ဟူစတန်မြောက်ပိုင်း ၄၅ မိုင်ခန့်ရှိ ကလိဗ်လန်းနေအိမ်တစ်အိမ်မှ ဖုန်းလက်ခံရရှိခဲ့ပါတယ်။

သံသယရှိသူက သောကြာနေ့ညမှာ သူ့အိမ်မှထွက်ခွာလာပြီး ခြံဝင်းအတွင်း ပစ်ခတ်ခဲ့ကြောင်း၊ ထိခိုက်ခဲ့သူအချို့က သူ့ကိုရပ်တန့်ဖို့တောင်းဆိုစဉ် စတင်ပစ်ခတ်ခဲ့တာဖြစ်ကြောင်း သိရပါတယ်။

အဲဒီလူက ခြံစည်းရိုးဆီသွားတော့ အိမ်နီးချင်းတွေက အထဲမှာကလေးအိပ်ပျော်နေတဲ့အတွက် တိတ်ဆိတ်နေရန် တောင်းဆိုခဲ့တယ်လို့ ကိတ်ပါစ်က ဆိုပါတယ်။

နှစ်ဖက်စလုံးမှ အိမ်တွေထဲပြန်ဝင်သွားပြီးတော့ ထိုလူက ကျည်တောင့်ကိုဖြည့်လိုက်ကာ ကားလမ်းအတိုင်းလျှောက်လာပြီး အိမ်တွေကိုပစ်ခတ်ခဲ့တယ်လို့ သိရပါတယ်။

သေဆုံးသူအများစုဟာ ဦးခေါင်းကိုထိမှန်ခဲ့ကာ အားလုံးက ဟွန်ဒူးရပ်စ်မှလူတွေ ဖြစ်နေပါတယ်။

ထိုခြံထဲမှာ သေနတ်သံတွေဆူညံနေတယ်လို့ ရဲတွေထံ တိုင်ကြားမှုများ အရင်ကလည်း ရှိနေခဲ့ပါတယ်။

သေဆုံးသူအားလုံးက သူတို့အိမ်ထဲမှာ ရှိနေခဲ့တာဖြစ်ပြီး တစ်ဦးနဲ့တစ်ဦး ဆွေမျိုးမပတ်သက်ပါဘူး။

အမေရိကန်မှာ လူအစုလိုက်အပြုံလိုက်ပစ်သတ်မှု ဖြစ်ပွားလျက်ရှိရာ ၂၀၂၃ အတွင်း အနည်းဆုံး ၁၇၆ မှုရှိနေနိုင်ပါတယ်။
Source: Reuters
#World_News
#YMG#Yangon_Media_Group