#World_Agricultur
Published 29 March 2023

ကော်စတာရီကာတောတွေထဲကထွက်တဲ့ ပန်းရောင်နာနတ်သီးဟာ မျိုးဗီဇပြုပြင်ကာ စိုက်ပျိုးထားတာဖြစ်ပြီး ပိုမိုအရည်ရွှမ်းအရသာရှိပါတယ်။

#World_Agriculture #ပန်းရောင်နာနတ်သီး #ကော့စတာရီကာစိုက်ခင်း#YMG#Yangon_Media_Group

#DailyNews
Published_ 29 March 2023

၁။ရန်ကုန်၊ မန္တလေးအတာအိုးလက်ကားဈေးကွက် အရောင်းသွက်နေ

၂။မြဝတီမြို့အရေးပေါ် လူနာတင်ယာဉ်များ ၅ နာရီကြာသည့် ထိုကော်ကိုးလမ်းကို အသုံးပြုပြီးသွားလာနေရတဲ့အတွက် အခက်အခဲဖြစ်နေ

၃။ စားသုံးဆီ ရည်ညွှန်းသတ်မှတ်ဈေး ၄၄၃၀ ကျပ်သတ်မှတ်ထားပြီး အရင်အပတ်ထက်ဈေးကျ

၄။အဖိုးတန်လှသည့် ပန်းရောင်နာနတ်သီးများ ကော့စတာရီကာစိုက်ခင်းများတွင် ထွက်ရှိနေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#LocalNews
Published_ 29 March 2023

မြန်မာနိုင်ငံရှိတရုတ်လုပ်ငန်းရှင်များအပါအဝင်မြန်မာလုပ်ငန်းရှင်များကို တရုတ်နိုင်ငံ၊လင်ချန်းမြို့တွင်လာရောက်ရင်းနှီးမြှုပ်နှံရန်လင်ချန်းမြို့၊မြို့တော်ဝန်မှဖိတ်ခေါ်ခဲ့ကြောင်း မြန်မာနိုင်ငံတရုတ်သံရုံး၏ထုတ်ပြန်ချက်အရသိရသည်၊၊

ယူနန်ပြည်နယ် လင်ချန်းမြို့၊ မြို့တော်ဝန် Mr. Du Jianhui ဦးဆောင်သော ကိုယ်စားလှယ်အဖွဲ့သည် မြန်မာနိုင်ငံသို့ လာရောက်ခဲ့ပြီး လင်ချန်းမြို့ ရင်းနှီးမြှုပ်နှံမှုမြှင့်တင်ရေး မိတ်ဆက်ပွဲကို ရန်ကုန်မြို့၌ ကျင်းပခဲ့သည်။

လင်ချန်းမြို့၊ မြို့တော်ဝန်Mr. Du Jianhui က လင်ချန်းသည် ကိုယ်ပိုင်အားသာချက်များကို အသုံးချ၍ မြန်မာနိုင်ငံနှင့် တံခါးဖွင့်လှစ် ပူးပေါင်းဆောင်ရွက်မှုကို အင်အားစုစည်း၍ မြှင့်တင်လျက်ရှိကြောင်း၊ အနာဂတ် ဖွံ့ဖြိုးတိုးတက်မှုအလားအလာသည် ကြီးမားကြောင်း၊ တက်ရောက်လာကြသော လုပ်ငန်းရှင်များ လင်ချန်းသို့ လာရောက်လေ့လာရန်၊ ရင်းနှီးမြှုပ်နှံရန် ဖိတ်ခေါ်ကြောင်း ပြောကြားခဲ့သည်။

အဆိုပါမိတ်ဆက်ပွဲသို့ မြန်မာနိုင်ငံဆိုင်ရာတရုတ်သံရုံးမှ စီးပွားရေးသံမှူး Mr. Tan Shufu တက်​ရောက်ခဲ့ပြီး ၄င်းကလင်ချန်းမြို့သည် မြန်မာနိုင်ငံသို့ တံခါးဖွင့်လှစ် ပူးပေါင်းဆောင်ရွက်မှုကို များစွာအလေးထားကြောင်း၊ နိုင်ငံလုံးဆိုင်ရာ လွှတ်တော်အစည်းအဝေးနှစ်ရပ် အောင်မြင်စွာ ကျင်းပပြီးစီး၍ မကြာမီတွင် မြန်မာနိုင်ငံသို့ လာရောက်၍ ရင်းနှီးမြှုပ်နှံမှုမြှင့်တင်ရေး မိတ်ဆက်ပွဲ ကျင်းပခြင်းဖြစ်ကြောင်း၊ လင်ချန်းနှင့် မြန်မာနိုင်ငံသည် တောတောင်ရေမြေချင်း ဆက်စပ်လျက်ရှိပြီး နယ်စပ်ဂိတ်၊ ကုန်သွယ်ရေးလမ်းကြောင်းများနှင့် နယ်စပ်ဈေးများ ပိုင်ဆိုင်ထားကြောင်း၊ မြန်မာနိုင်ငံသို့ တံခါးဖွင့်ရန်အတွက် ထူးခြားသော တည်နေရာအားသာချက်နှင့် ခိုင်မာသော ပူးပေါင်းဆောင်ရွက်မှုအခြေခံ ရှိကြောင်း၊ လင်ချန်းမှ ၎င်း၏ ကိုယ်ပိုင်အားသာချက်များကို အပြည့်အဝဖော်ထုတ်ရန်၊ အခြေအနေအလိုက် ဆောင်ရွက်ပြီး မြန်မာနိုင်ငံနှင့် ကဏ္ဍစုံ လက်တွေ့ပူးပေါင်းဆောင်ရွက်မှုများ အဆက်မပြတ်နက်ရှိုင်းစွာ ဆောင်ရွက်နိုင်ရန် သံရုံးမှ ကူညီပေးလိုကြောင်း ပြောကြားသည်။

ယင်းမိတ်ဆက်ပွဲကိုမြန်မာနိုင်ငံ တရုတ်ကုန်သည်များအသင်းချုပ် ဥက္ကဌ ဦးအိုင်ထွန်း၊ မြန်မာနိုင်ငံ တရုတ်လုပ်ငန်းရှင်များအသင်း အမှုဆောင်ဒုဥက္ကဌ Mr. Yao Fenggang နှင့် မြန်မာနိုင်ငံရှိ တရုတ်လုပ်ငန်းရှင်များ၊ တရုတ်နွယ်ဖွားလုပ်ငန်းရှင်များ စသဖြင့် လူဦးရေ ၆၀ ခန့် တက်ရောက်ခဲ့သည်။

မိတ်ဆက်ပွဲတွင် လင်ချန်းမြို့၏ သက်ဆိုင်ရာတာဝန် ရှိသူများက ရင်းနှီးမြှုပ်နှံမှု မြှင့်တင်ရေး မိတ်ဆက်မှုများ ပြုလုပ်ခဲ့ကြပြီး လုပ်ငန်းရှင်ကိုယ်စားလှယ်များနှင့်အတူ မြန်မာနိုင်ငံသို့ လင်ချန်းမြို့၏ တံခါးဖွင့်လှစ်ရေး၊ ပူးပေါင်းဆောင်ရွက်ရေး တို့နှင့်စပ်လျဉ်း၍ ကူးလူးဖလှယ်ဆွေးနွေးခဲ့ကြကြောင်း သိရသည်၊၊
ymg/tthl
Yangon_Media_Group

#World_Technology
Published 29 March 2023

ကမ္ဘာတဝှမ်းမှာ လူလုပ်အသိဉာဏ်တု(AI)စနစ် ထွန်းကားလာတာကြောင့် လူသားတွေရဲ့ အလုပ်အကိုင်နေရာတွေမှာ အစားထိုးလာမလားဆိုတဲ့မေးခွန်းဟာ အကြိမ်ကြိမ်ပေါ်ထွက်နေပါတယ်။

ဂိုးလ်မန်းဆက်ချ်ရင်းနှီးမြှုပ်နှံရေးဘဏ်ရဲ့ တင်ပြချက်အရ AI တွေဟာ လူသားအလုပ်အကိုင်နေရာပေါင်း သန်း ၃၀ ဝန်းကျင်ခန့်အထိ အစားထိုးသွားနိုင်တယ်လို့ သိရပါတယ်။

အခုဆိုရင် အမေရိကန်နဲ့ ဥရောပရှိ အလုပ်အကိုင် ၃ ပုံ ၂ ပုံခန့်ဟာ ထိုကဲ့သို့အလားအလာရှိနေပါတယ်။

ကုန်ထုတ်လုပ်မှုနဲ့ ဝန်ဆောင်မှုတန်ဖိုးတွေမှာတော့ ၁၀ နှစ်တာကာလအတွင်း ၇ ရာခိုင်နှုန်းတိုးတက်လာနိုင်ပါတယ်။

နောက်ထပ်တင်ပြချက်အရ လက်ရှိဝန်ထမ်း ၆၀ ရာခိုင်နှုန်းခန့်ဟာ ၁၉၄၀ ခုနှစ်လောက်က မရှိခဲ့တဲ့အလုပ်တွေမှာ လုပ်ကိုင်နေကြရပါတယ်။

နောက်ထပ်သုတေသနအရ နည်းပညာဆိုင်ရာတိုးတက်မှုတွေကြောင့် ၁၉၈၀ နောက်ပိုင်း အလုပ်အကိုင်အခွင့်အလမ်းပေါ်ပေါက်လာတာထက် အလုပ်ဆုံးရှုံးသူတွေ ပိုများနေပါတယ်။

AI စနစ်တိုးတက်လာတာနဲ့အမျှ ဒီထက်ပိုပြီး အလုပ်အကိုင်ဆုံးရှုံးလာရဖွယ်ရှိနေပါတယ်။

AI တွေက ဓာတ်ပုံများ၊ ဗီဒီယိုများ၊ အသံများ၊ စာသားများ၊ 3D ပုံစံများဖန်တီးရာမှာ လူသားတွေဖန်တီးတာနဲ့ ကွာခြားမှုမရှိလောက်တဲ့အထိ တိုးတက်လာတာကြောင့် အလုပ်အကိုင်တွေ ဆုံးရှုံးလာရဖွယ်ရှိတယ်လို့ ဂိုးလ်မန်းဆက်ချ်က ဆိုပါတယ်။

စီမံအုပ်ချုပ်ရေးကဏ္ဍတွေမှာ ၄၆ ရာခိုင်နှုန်းနဲ့ ဥပဒေရေးရာကဏ္ဍတွေမှာ ၄၄ ရာခိုင်နှုန်းတို့က AI အစားထိုးခံရမယ့် အခြေအနေရှိနေပါတယ်။

ရုပ်ပိုင်းဆိုင်ရာ ပြင်းပြင်းထန်ထန်လုပ်ရတဲ့ ဆောက်လုပ်ရေးလိုအလုပ်အကိုင်တွေကတော့ ဆုံးရှုံးနိုင်ချေအနည်းဆုံးဖြစ်နေကာ အလုပ်အကိုင်အားလုံးနီးပါးက အတိုင်းအတာတစ်ခုအထိ အစားထိုးခံရဖွယ်ရှိပါတယ်။
Source: WION
#Yangon_Media_Group

#World_Health
Published 29 March 2023

ကော်ဖီသောက်တဲ့လူအများစုက ကြိုက်လို့သောက်ရုံတင်မဟုတ်ဘဲ နေ့စဉ်လုပ်ငန်းဆောင်တာများ လုပ်ဆောင်ရာမှာ ကော်ဖီသောက်ခြင်းက အကျင့်ဖြစ်နေကြပါပြီ။

ကော်ဖီသောက်ရတဲ့ အဓိကအကြောင်းအရင်းက ပိုမိုတက်ကြွလန်းဆန်းနေစေဖို့ဆိုပေမယ့် တကယ်ကော အလုပ်ဖြစ်ရဲ့လားဆိုတာ စိတ်ဝင်စားစရာပါ။

အဓိကပါဝင်ပစ္စည်းဖြစ်တဲ့ ကဖင်းဓာတ်က ဦးနှောက်မှာ ဘယ်လိုတွေသက်ရောက်လဲဆိုတာကို သိရှိရန်လိုအပ်ပါတယ်။

အိပ်စက်ခြင်းနဲ့ နိုးကြားခြင်းစက်ဝန်းတွေမှာ ပါဝင်ထိန်းညှိပေးတဲ့ အက်ဒီနိုဆင်ဓာတုဒြပ်ပေါင်းအကြောင်း လေ့လာခဲ့ကြပါတယ်။

ဦးနှောက်နဲ့ ခန္ဓာကိုယ်အစိတ်အပိုင်းတွေက ပြင်းထန်စွာအလုပ်လုပ်တဲ့အခါ စွမ်းအင်ထုတ်လုပ်ခြင်းဖြစ်စဉ်အနေနဲ့ အက်ဒီနိုဆင်ပမာဏ မြင့်တက်လာပါတယ်။

ဒီဖြစ်စဉ်က ဘယ်အချိန်အနားယူရမလဲဆိုတာ နားလည်အောင်ပြုလုပ်ပေးတဲ့ အရေးကြီးဖြစ်စဉ်ဖြစ်ပါတယ်။

ပြင်းပြင်းထန်ထန်လှုပ်ရှားပြီး ခန္ဓာကိုယ်အလိုအတိုင်း အနားယူလိုက်တဲ့အခါ အက်ဒီနိုဆင်ပမာဏကျဆင်းသွားပြီး ပိုမိုနိုးကြားလာပါတယ်။

တက်သွားတဲ့အရာမှန်သမျှ ပြန်ပြီးကျဆင်းလာရတယ်ဆိုတဲ့အတိုင်း ကဖင်းဓာတ်က အားအင်ကိုအမှန်တကယ်တက်စေတာ မဟုတ်ဘဲ လူသားတွေမသိဘဲနဲ့ ချေးငှားလိုက်တဲ့သဘောဖြစ်ပါတယ်။

ကဖင်းဓာတ်ပြိုကွဲသွားပြီး အက်ဒီနိုဆင်တွေ စုပြုံလာကာ ပိုမိုပင်ပန်းနွမ်းနယ်စေပါတယ်။

ဒါတွေဟာ ကိုကိန်းလိုမျိုး တရားမဝင်ဆေးဝါးတွေ သုံးစွဲတဲ့အခါ ဖြစ်ပျက်လာတဲ့သဘောတရားနဲ့ ဆင်တူပြီး ဒီပြဿနာကိုဖြေရှင်းဖို့အတွက် နည်းလမ်း ၂မျိုးသာရှိပါတယ်။

ဆေးတွေကို ထပ်မံသုံးစွဲမလား ဒါမှမဟုတ် ခန္ဓာကိုယ်ခံစားနေရတဲ့အတိုင်း အနားယူမလား ဆိုတာပါပဲ။

ဒီသတင်းရဲ့ရည်ရွယ်ချက်က ကော်ဖီရှောင်ရှားဖို့မဟုတ်ဘဲ ဒီအတိုင်းသိရှိထားဖို့ပါပဲ။

ကော်ဖီကိုသင့်တင့်မျှတစွာ သောက်သုံးရင် ကျန်းမာရေးအကျိုးကျေးဇူး အမျိုးမျိုးရရှိနိုင်ပြီး အသက်ရှည်နိုင်ပါတယ်။

လေ့လာချက်တစ်ခုအရ မနက်မိုးလင်းကော်ဖီသောက်တာထက် နေ့ပိုင်းမှာသောက်သုံးပါက အကျိုးကျေးဇူးရရှိနိုင်ပါတယ်။

မနက်နိုးတဲ့အချိန်မှာ ခန္ဓာကိုယ်က စွမ်းအင်ထုတ်လုပ်ပေးပြီးသားဖြစ်တာကြောင့် စွမ်းအင်ကျဆင်းတဲ့အချိန်ကျမှ သောက်သုံးတာက ပိုမိုအကျိုးရှိစေနိုင်ပါတယ်။

ညဘက်အိပ်စက်ရန် ခက်ခဲတာမျိုး မဖြစ်စေဖို့ ညနေပိုင်းမသောက်သင့်ပါဘူး။

ကဖင်းဓာတ်ကြာရှည်စွဲမြဲစေရန် အစာစားပြီးမှ သောက်သုံးသင့်ပါတယ်။
Source: The Jerusalem Post.
#Yangon_Media_Group

#World_Health
Published 29 March 2023

ကိုဗစ်နောက်ဆက်တွဲလက္ခဏာတွေထဲမှာ လူတွေရဲ့မျက်နှာကိုကောင်းစွာမမှတ်မိတဲ့ လက္ခဏာတစ်ခုလည်းပါဝင်ကြောင်း လေ့လာတွေ့ရှိထားပါတယ်။

ကိုဗစ်နောက်ဆက်တွဲလက္ခဏာ ခံစားရတဲ့လူအချို့ဆိုရင် မိသားစုဝင်တွေ၊ ဆွေမျိုးတွေကိုပါ မှတ်မိဖို့ခက်ခဲနေတာလည်း ရှိနေပါတယ်။

အချို့လူတွေက မြင်ဖူးသလိုရှိပေမယ့် မှတ်မိဖို့ခက်ခဲနေတတ်သလို အချို့ကတော့ မသိတဲ့လူတွေရဲ့မျက်နှာတွေကို မခွဲခြားနိုင်ကြပါဘူး။

အခုလေ့လာချက်က ၂၀၂၀ မှာ ကိုဗစ်ကူးစက်ခံရခဲ့တဲ့ အသက် ၂၈နှစ်အရွယ် 'အန်နီ'ဆိုတဲ့အမျိုးသမီးကို လေ့လာထားတာဖြစ်ပါတယ်။

ကိုဗစ်မဖြစ်ခင်က အန်နီဟာ လူမျက်နှာတွေကို သိရှိမှတ်မိဖို့ အခက်အခဲမရှိခဲ့ပါဘူး။

ကိုဗစ်ကူးစက်ပြီး ၂ လအကြာမှာတော့ အနီးစပ်ဆုံးဆွေမျိုးတွေကိုတောင် မှတ်မိဖို့ခက်ခဲလာကြောင်း ပြောပြခဲ့ပါတယ်။

အဖေဖြစ်သူက စားသောက်ဆိုင်တစ်ခုမှာ သူ့နားကဖြတ်သွားတာတောင် မမှတ်မိခဲ့ဘဲ အသံကြားတော့မှ သိခဲ့ရပါတယ်။

အန်နီဟာ လူတွေရဲ့အသံကိုသာ အာရုံစိုက်ပြီး ခွဲခြားမှတ်သားနေရကြောင်း ဒါ့တ်မောက်ကောလိပ်မှ သုတေသီများရေးသားထားပါတယ်။

အရင်ကဆိုရင် ပုံကြည့်ဆွဲတဲ့အခါ ၁၅ မိနစ် - ၃၀ မိနစ်ကြားတစ်ခါသာ ကြည့်ပြီးဆွဲနိုင်ပေမယ့် အခုဆိုရင် ဓာတ်ပုံတွေကိုပဲ ကြည့်ပြီးမှီခိုနေရကာ မျက်နှာတွေက ဦးနှောက်ထဲမှာ ရေတွေလိုပဲဖြစ်တယ်လို့ ရှင်းပြသွားပါတယ်။

ဒါ့အပြင် နောက်ထပ် လူ ၅၄ ဦးထံမှ စစ်တမ်းကောက်ယူပြီး အမြင်အာရုံမှတ်မိမှုနဲ့ နေရာခွဲခြားသိရှိနိုင်စွမ်းယုတ်လျော့လာခြင်းတို့ကို မေးမြန်းခဲ့ပါတယ်။

အန်နီက ကိုဗစ်ကူးစက်ပြီးနောက် စတိုးဆိုင်သွားတဲ့လမ်း၊ ကားပါကင်နေရာ၊ ရောက်ဖူးပြီးသားနေရာတွေကို မှတ်မိဖို့ခက်ခဲလာကြောင်းလည်း ပြောပြခဲ့ပါတယ်။

အန်နီကိုလေ့လာတဲ့ ရလဒ်များအရ ကိုဗစ်-၁၉ က ဦးနှောက်ထိခိုက်ပြီးနောက် အာရုံကြောဆိုင်ရာချို့ယွင်းချက်များ ဖြစ်ပေါ်စေနိုင်ပြီး ကိုဗစ်နောက်ဆက်တွဲလက္ခဏာ ခံစားရသူတွေမှာ အမြင်အာရုံချို့ယွင်းတာတွေက အဆန်းမဟုတ်တော့ဘူးလို့ သုတေသီများ သုံးသပ်ထားပါတယ်။
Source: India Today
#Yangon_Media_Group