Published 10 Dec 2022

အသက် ၄၉ နှစ်အရွယ် နာမည်ကြီး အမေရိကန် ဘောလုံးသတင်းထောက် ဂရန့်ဝါးဟာ ကာတာကမ္ဘာ့ဖလားပွဲ သတင်းရယူနေရင်း သောကြာနေ့ညက ရုတ်တရက်လဲကျခဲ့ပြီးနောက် သေဆုံးခဲ့ပါတယ်။

အများလေးစားခံရတဲ့ မီဒီယာသမားဂရန့်ဝါးဟာ အာဂျင်တီးနားနှင့် နယ်သာလန်တို့ရဲ့ ပွဲ အချိန်ပိုကစားနေတာကြည့်ရှုရင်း လူဆာလီဘောလုံးကွင်းထဲ လဲကျသွားခဲ့တာဖြစ်ပါတယ်။

သူလဲကျသွားတဲ့ သတင်းရယူတဲ့နေရာကို ဆေးအဖွဲ့ရောက်လာပြီး  သူ့ကို မိနစ်၂၀ခန့် CPR လုပ်ပေးပါတယ်။ ဘောလုံးပွဲပြီးတဲ့အခါ သူ့ကို ဘောလုံးကွင်းထဲကနေ ထုတ်ခဲ့ပါတယ်။ သူ့ကို  လူဆာလီဘောလုံးကွင်းထဲကနေ လူနာတင်ယာဉ်နှင့် ဟာမက်အထွေထွေဆေးရုံကို ရွှေ့ပြောင်းကုသမှုပေးခဲ့ရင်း ကွယ်လွန်ခဲ့ရတာပါ။

“ ဂရန့်ဝါးကို ဆုံးရှုံးရပြီလို့သိရတဲ့အတွက် အမေရိကန်ဘောလုံးမိသားစုတစ်ခုလုံး ကြေကွဲဝမ်းနည်းကြရပါတယ်” လို့ အမေရိကန်ဘောလုံးအဖွဲ့ က သတင်းထုတ်ပြန်ပါတယ်။

“ ကျွန်မခင်ပွန်းကို ဝိုင်းကူညီစောင့်ရှောက်ကြသူတွေအားလုံးကို ကျေးဇူးတင်ပါတယ်။ ကျွန်မ တကယ့်ကိုတုန်လှုပ် သွားရပါတယ်” လို့ ဇနီးဖြစ်သူ ဒေါက်တာ စီလင်း ဂေါင်ဒါက တွစ်တာမှာရေးပါတယ်။

သူဟာ ဒီလစောစောပိုင်းတုန်းက အမေရိကန်နှင့်ဝေးလ်ပွဲမှာ ရိန်းဘိုးတီရှပ်ဝတ်ဆင်ခဲ့လို့ သတင်းခေါင်းကြီးတွေဖြစ်ခဲ့ ပါသေးတယ်။ သူ့ကိုစောစောပိုင်းမှာ လုံခြုံရေးက ကွင်းထဲပေးမဝင်ပေမယ့် နောက်ပိုင်းတော့ ဒီတီရှပ်နှင့်ပဲ ဝင်ခွင့်ရခဲ့ ပါတယ်။

သူက သိပ်နေမကောင်းဘူးလို့ တနင်္လာနေ့က ရေးသားခဲ့ပါတယ်။ “သုံးပတ်လောက် အိပ်ရေးပျက်ခဲ့တယ်။ ဖိအားနှင့် အလုပ်တွေက တအားများတယ် လို့ သူက သူ့ကိုယ်ပိုင်ဝက်ဘ်ဆိုက်မှာ ရေးခဲ့ပါတယ်။

Source Metro

#Football_journalist_Grant_Wahl_Dies

#Grant_Wahl

#World_Cup_2022

#World_Military
Published 10 December 2022

ယူကရိန်းနဲ့ရုရှားစစ်ပွဲဟာ ထိန်းမနိုင်သိမ်းမရဖြစ်ပြီး နေတိုး(NATO)နဲ့ ရုရှားကြားမှာပါ စစ်ပွဲဖြစ်ပွားလာမှာ စိုးရိမ်ရကြောင်း နေတိုးအထွေထွေအတွင်းရေးမှူးချုပ် 'ယန်းစ်စတိုလ်တန်ဘာ့ဂ်'က သောကြာနေ့ကအင်တာဗျူးတစ်ခုမှာ ပြောကြားလိုက်ပါတယ်။

"ယူကရိန်းမှာ စစ်ပွဲက ဆိုးရွားနေပြီး နေတိုးနဲ့ရုရှားစစ်ဖြစ်တဲ့ အခြေအနေအထိပါ ဖြစ်လာနိုင်ပါတယ်၊ ဒီလိုမျိုးမဖြစ်လာအောင် ကျွန်တော်တို့ နေ့စဉ်ကြိုးပမ်းနေကြပါတယ်၊ တကယ့်စစ်ပွဲကြီးဖြစ်လာပြီဆိုရင် ဥရောပကနိုင်ငံတွေပါ ပါဝင်လာမှာပါ" လို့ ပြောကြားခဲ့ပါတယ်။

နေတိုးမဟာမိတ်တွေက ယူကရိန်းကို လက်နက်ထောက်ပံ့ပေးခြင်း၊ စစ်ရေးလေ့ကျင့်ပေးခြင်း၊ စစ်ရေးသတင်းထောက်လှမ်းရေးများ ပံ့ပိုးပေးခြင်းတို့ပြုလုပ်ကာ ပဋိပက္ခပိုဆိုးလာအောင် ပြုလုပ်နေတယ်လို့ ရုရှားက အကြိမ်ကြိမ်စွပ်စွဲထားပါတယ်။

အမေရိကန်ကျင့်စဉ်ဖြစ်တဲ့ ရန်သူကိုအားနည်းအောင် ပြုလုပ်ခြင်းဖြင့် ကြိုတင်ကာကွယ်မှုယူခြင်းနည်းလမ်းကို အသုံးချရန်စဉ်းစားနေကြောင်း ရုရှားသမ္မတ'ဗလာဒီမာပူတင်'က ဆိုပါတယ်။

ဟိုအရင်ကတည်းက အမေရိကန်တို့ဟာ ကမ္ဘာပေါ်က မည်သည့်ပစ်မှတ်မဆို တစ်နာရီအတွင်း ထိအောင်ပစ်ခတ်နိုင်တဲ့ လက်နက်မျိုးတီထွင်နေကြတာကို ရုရှားတို့က စိုးရိမ်နေကြပါတယ်။

ဒီလိုတိုက်ခိုက်မှုက ဗဟိုထိန်းချုပ်ရေးစင်တာကို ဖြတ်တောက်နိုင်စွမ်းရှိတယ်လို့ 'ပူတင်'က ဆိုပါတယ်။

အခုအချိန်မှာတော့ ရုရှားရဲ့တိကျနှုန်းမြင့်ပဲ့ထိန်းဒုံးကျည်တွေဟာ အမေရိကန်လက်နက်တွေထက် ပိုသာနေပြီး အမေရိကန်ကမသုံးဖူးတဲ့ အသံထက် ၅ ဆမြန်ဒုံးကျည်တွေလည်း ရှိနေပါပြီ။

သောကြာနေ့အထိ ယူကရိန်းအရှေ့ပိုင်းနဲ့တောင်ပိုင်း ရုရှားတို့တရားမဝင်သိမ်းပိုက်ထားတဲ့ ဒေသအများစုမှာ ပြင်းပြင်းထန်ထန်တိုက်ပွဲဖြစ်နေပါတယ်။

Source: AP News
#Yangon_Media_Group

#World_Health
Published 10 December 2022

အာလူးက လူအများထင်နေသလိုမျိုး ဆီးချိုရောဂါဖြစ်နိုင်ချေရှိတာ မဟုတ်သလို ကျန်းမာရေးနဲ့မညီညွတ်တာမျိုးလည်း မဟုတ်ပါဘူး။

ကျန်းမာရေးနဲ့မညီညွတ်တဲ့ အခြားသော အစားအစာများကြောင့်သာ ဖြစ်တယ်လို့ လေ့လာတွေ့ရှိထားပါတယ်။

အာလူးက ကမ္ဘာပေါ်မှာ အများဆုံးစားသောက်ဖြစ်တဲ့ အစားအစာတစ်ခုဖြစ်ပြီး စိုက်ပျိုးစားသုံးမှုအရကြည့်ရင် ပြောင်း၊ ဂျုံ၊ စပါးပြီးနောက် စတုတ္ထအများဆုံးကောက်ပဲသီးနှံဖြစ်ပါတယ်။

အာလူးကို ပုံစံအမျိုးမျိုးဖြင့် ချက်ပြုတ်ကြော်လှော်ကာ စားသောက်ကြပါတယ်။

ဒါပေမဲ့ အာလူးကို ကျန်းမာရေးနဲ့ မညီညွတ်ဘူးလို့ ထင်နေရတဲ့ အကြောင်းအရင်းကတော့ ကစီဓာတ်အမျိုးအစားဖြစ်ပြီး ကာဗိုဟိုက်ဒရိတ်ကြွယ်ဝတာကြောင့် ဖြစ်ပါတယ်။

ဒေါက်တာ'နီကိုလတ်စ်ဘွန်ဒွန်နို'ဦးဆောင်ပြီး အသီးအနှံများ၊ အာလူးနဲ့ ဆီးချိုပေါ်ပေါက်လာပုံတို့ပတ်သက်မှုကို လေ့လာခဲ့ကြပါတယ်။

ဟင်းသီးဟင်းရွက်အများစုက အာလူးထက်ပိုမိုကျန်းမာစေပြီး ဆီးချိုလျှော့ချနိုင်တဲ့ အစွမ်းသတ္တိရှိတယ်လို့ တွေ့ရပေမယ့် အာလူးစားပုံစားနည်းအရ ကွဲပြားသွားတာဖြစ်တယ်လို့ ဆိုပါတယ်။

အာလူးကြော်ဟာဆိုရင် ဆီးချိုဖြစ်နိုင်ချေများပေမယ့် အာလူးပြုတ်ဆိုရင်တော့ ဒီလိုမဖြစ်နိုင်ပါဘူး။

အာလူးကို ဆိုဒါ၊ အသားငါးတွေနဲ့ တွဲစားခြင်းက ဆီးချိုဖြစ်နိုင်ချေကို များစေပါတယ်။

အာလူးမှာ ကာဗိုဟိုက်ဒရိတ်တွေ ပါဝင်သလို ကာဗိုဟိုက်ဒရိတ်အားလုံးဟာလည်း ဆိုးကျိုးဖြစ်စေတာမဟုတ်ပါဘူး။

အာလူးကတော့ ကာဗိုဟိုက်ဒရိတ်အပြင် သတ္တုဓာတ်များ၊ ဗိုက်တာမင်များ၊ အမျှင်ဓာတ်၊ ပရိုတိန်းတို့ ပါဝင်ပါတယ်။

ဒါကြောင့် အာလူးနဲ့ပတ်သက်ပြီး ကျန်းမာရေးသက်ရောက်မှု အထင်လွဲမှားခြင်းတွေကို သိရှိထားဖို့ အရေးကြီးပါတယ်။

Source: The Jerusalem Post
#Yangon_Media_Group

#World_Health
Published 10 December 2022

ကလေးတွေညအိပ်တဲ့အခါ ပါးစပ်ကနေ အသက်မရှူအောင် နှုတ်ခမ်းမှာကပ်တဲ့တိပ်တွေနဲ့ ကလေးငယ်ရဲ့ဦးခေါင်းကို လိုချင်တဲ့ပုံစံအတိုင်းရရှိအောင် ပုံသွင်းတဲ့ခေါင်းဆောင်းတို့ကို ဆိုရှယ်မီဒီယာတွေကနေ ကြော်ငြာရောင်းချလျက်ရှိပါတယ်။

ဒါပေမဲ့ ဒီနည်းလမ်းတွေဟာ ဘေးအန္တရာယ်ဖြစ်စေနိုင်တယ်လို့လည်း ကျွမ်းကျင်သူများက သတိပေးလာကြပါတယ်။

ကလေးတွေအိပ်တဲ့အခါ နှုတ်ခမ်းဝမှာ တိပ်ကပ်ခြင်းဖြင့် သွားမညီညာခြင်း မဖြစ်စေတဲ့အပြင် မေးရိုးဖွံ့ဖြိုးမှုကို အထောက်အကူဖြစ်စေတယ်လို့ ကလေးမိဘများယုံကြည်အောင် ကြော်ငြာနေကြပါတယ်။

လွန်ခဲ့တဲ့ ၂ နှစ်အတွင်း အဆိုပါပစ္စည်းများအသုံးပြုခြင်းကနေ အဆင်မပြေမှုတစ်စုံတစ်ရာ မကြားရကြောင်း စင်္ကာပူကျန်းမာရေးသိပ္ပံအာဏာပိုင်အဖွဲ့(HSA)က ဆိုပါတယ်။

HSA ရဲ့ပြောကြားချက်အရ ပါးစပ်တိပ်တွေနဲ့ ဦးခေါင်းပုံသွင်းခေါင်းဆောင်းတွေဟာ ဘေးအန္တရာယ်နည်းပါးတဲ့ ဆေးဘက်ဆိုင်ရာပစ္စည်းများ (Class A)အဖြစ် သတ်မှတ်ထားသလို ကုန်ပစ္စည်းမှတ်ပုံတင်ခြင်းမှ ကင်းလွတ်ခွင့်ရထားပါတယ်။

ဒီပစ္စည်းတွေကို တင်သွင်းသူတွေနဲ့ လက္ကားရောင်းချသူတွေက သက်ဆိုင်ရာလုပ်ငန်းလိုင်စင်ရှိဖို့နဲ့ HSA ကို အသိပေးဖို့သာ လိုအပ်ပါတယ်။

ရောင်းချသူတွေ၊ ပစ္စည်းတွေရဲ့ စိတ်ချရမှုနဲ့ အရည်အသွေးတို့ စစ်မှန်ကြောင်းပြသဖို့ ခက်ခဲပြီး အင်တာနက်ရဲ့ကျယ်ပြန့်မှုတွေကြောင့် ဝယ်ယူသူများအနေနဲ့ ဆေးဆိုင်များဆေးခန်းများသာ ထိုပစ္စည်းများကိုဝယ်ယူသင့်ကြောင်း အကြုံပြုလိုတယ်လို့ HSA မှ ပြောရေးဆိုခွင့်ရှိသူက ဆိုပါတယ်။

အွန်လိုင်းမှရောင်းချနေတဲ့ ဆေးပစ္စည်းများကို HSA က စစ်ဆေးသွားမှာဖြစ်ပြီး စည်းကမ်းချိုးဖောက်ထားတာမျိုး တွေ့ရှိပါက အရေးယူသွားမယ်လို့ဆိုပါတယ်။

"နှုတ်ခမ်းကပ်တဲ့တိပ်ဆိုရင် အန္တရာယ်ဖြစ်နိုင်ပါတယ်၊ အချို့ကလေးတွေက နှာခေါင်းအသက်ရှူလမ်းကြောင်းပိတ်လို့ ပါးစပ်နဲ့အသက်ရှူရတာမျိုးရှိပါတယ်၊ ဒါကြောင့် ပါးစပ်ကနေအသက်ရှူရဖို့ အလွန်အရေးကြီးပါတယ်" လို့ ဒေါက်တာ'လူးဝစ္စတန်'က ပြောကြားလိုက်ပါတယ်။

အိပ်နေရင်း အောက်ဆီဂျင်ပြတ်လတ်တဲ့အခါ ဦးနှောက်ဖွံ့ဖြိုးမှုထိခိုက်စေပြီး အိုင်ကျူနဲ့ အထွေထွေကျန်းမာရေးတွေကိုပါ ထိခိုက်စေတယ်လို့ စင်္ကာပူကလေးဆေးခန်းမှ ဒေါက်တာ'ဝေါင်ချင်ခွန်'က ပြောပြသွားပါတယ်။

နောက်တစ်မျိုးကတော့ ကလေးငယ်များဦးခေါင်းပြားပုံပျက်ခြင်းကို တည့်မတ်ပေးတဲ့ ခေါင်းဆောင်းတွေပါ။

ကလေးငယ်များအနေနဲ့ ဒီခေါင်းဆောင်းကို တစ်နေ့ ၂၃ နာရီဖြင့် ၄ လအထိ ဝတ်ဆင်ပါက ဦးခေါင်းလုံးလုံးလေးဖြစ်စေမယ်လို့ တရုတ်မှပစ္စည်းရောင်းသူတွေက ဆိုပါတယ်။

တကယ်တော့ ဒီပစ္စည်းတွေက မွေးရာပါဦးခေါင်းပြားပုံပျက်တဲ့ကလေးတွေမှာတောင် အဆိုးဆုံးအခြေအနေကျမှ ဦးခေါင်းချုပ်ရိုးမပိတ်ခင်အချိန်အထိ အသုံးပြုတာဖြစ်တယ်လို့ ဒေါက်တာ'ဝေါင်'က ဆိုပါတယ်။

ဒီအတွက်လည်း ကလေးရဲ့ဦးခေါင်းပုံသဏ္ဍာန် အရွယ်အစားအလိုက် ခေါင်းဆောင်းကို ပြုလုပ်ရတာဖြစ်ပါတယ်။

ဆိုရှယ်မီဒီယာတွေက အကြံကောင်းပေးသလို ကြော်ငြာကြပေမယ့် တစ်ခါတရံမှာ ကြည့်ရှုသူပိုများအောင်ကြံရွယ်တာဖြစ်တာကြောင့် ကလေးအထူးကုများနဲ့ ဆရာဝန်များကိုသာ ယုံကြည်သင့်ပါတယ်။

Source: CNA
#Yangon_Media_Group

Published 9 December 2022

အင်ဒိုနီးရှားနိုင်ငံ အနောက်ဆူမတ်တြာရှိ ဆာဝါလန်တိုမြို့မှာ သောကြာနေ့က ကျောက်မီးသွေးတွင်း ပေါက်ကွဲမှုဖြစ်ပွားခဲ့ရာ လူ ၁၄ ဦးခန့် မြေကြီးများဖြင့် ဖုံးအုပ်သွားပြီး အလောင်း(၉)လောင်းကိုတော့ ကယ်ဆယ်ရေးသမားတွေတွေ့ရှိရပါတယ်။

လူ(၄)ဦးကို အသက်ရှင်လျက်တွေ့ရှိရတယ်လို့လည်း ကယ်ဆယ်ရေးသမားတွေကပြောပါတယ်။

Source AFP

#Indonesia's_coal_mine _explosion

#Indonesia_Mine_Accident

#Sawah_Lunto

#World_Politics
Published 9 December 2022

အိန္ဒိယနိုင်ငံဟာ လွတ်လပ်ရေးရပြီး နှစ် ၇၀ ကျော်အတွင်း ကမ္ဘာ့လူဦးရေအများဆုံးနိုင်ငံဖြစ်လာပြီး သူတို့ကို ကိုလိုနီပြုခဲ့သူတွေကိုကျော်လွန်ကာ စီးပွားရေးမှာ ပဉ္မမမြောက်အင်အားအကြီးဆုံးနိုင်ငံ ဖြစ်လာပါတယ်။

#Yangon_Media_Group