#World_Health
Published 3 April 2023

ကလေးမိဘတွေအနေနဲ့ အသက် ၆ နှစ်အောက်ကလေးတွေကို ဖုန်း၊ ကွန်ပျူတာများ ပေးမသုံးသင့်ကြောင်း စိတ်ရောဂါပညာရှင်တစ်ဦးက ဆိုလိုက်ပါတယ်။

စမတ်ဖုန်းတွေ၊ တက်ဘလက်တွေ၊ ကွန်ပျူတာတွေ ကြည့်လေ့ရှိတဲ့ကလေးတွေဟာ မကြည့်တဲ့ကလေးတွေထက် စိတ်အလိုမကျ၊ အထိမခံနိုင်ခြင်း၊ အာရုံစူးစိုက်မှုနဲ့ မှတ်ဉာဏ်စွမ်းရည်လျော့နည်းခြင်းတို့ ဖြစ်ပေါ်စေနိုင်ကြောင်း အာရုံကြောစိတ်ရောဂါပညာရှင် ဒေါက်တာ'အယ်ဗာရိုဘီလ်ဘာအို'က ပြောကြားလိုက်ပါတယ်။

ခေတ်မီနည်းပညာကိရိယာတွေက သူတို့ရဲ့ဘဝမှာ တစ်စိတ်တစ်ပိုင်းပါဝင်လာပေမယ့် သူတို့လက်ထဲ တဖြည်းဖြည်းချင်းထည့်ပေးတာက ပိုပြီးသင့်တော်တယ်လို့ ဖော်ပြခဲ့ပါတယ်။

သူတို့ရဲ့ဦးနှောက် အနည်းငယ်ပိုဖွံ့ဖြိုးချိန်၊ စိတ်ခံစားချက်အရ စကားပြောနိုင်ချိန်၊ သူတို့ကိုယ်သူတို့ ထိန်းသိမ်းနိုင်စွမ်းရှိလာတဲ့ အချိန်ကျ တစ်နည်းအားဖြင့် အသက် ၆ နှစ်အရွယ်လောက်မှ ပေးသုံးသင့်ပါတယ်။

လေ့လာချက်များအရ ဖုန်း၊ ကွန်ပျူတာရှေ့မှာ အချိန်ဖြုန်းတဲ့သူတွေဟာ အပြုအမူပြဿနာများနဲ့ ကလေးဘဝစိတ်ဓာတ်ကျခြင်းတို့ ပိုမိုဖြစ်စေနိုင်ပါတယ်။

ဒါတွေဟာ သူတို့ဘဝဖွံ့ဖြိုးတိုးတက်မှုအတွက် အရေးပါတဲ့ အခြားလှုပ်ရှားမှုတွေမှာ စိတ်ဝင်စားမှုနည်းပါးသွားပြီး ဒီစက်ပစ္စည်းတွေအပေါ်မှာပဲ ကျန်းမာရေးနဲ့မညီညွတ်စွာ စိတ်ရောက်နေမှာဖြစ်ပါတယ်။

ကျွန်တော့်ရဲ့ မိုဘိုင်းဖုန်းတွေ တက်ဘလက်တွေထဲမှာ ကလေးတွေစိတ်ဝင်စားမယ့် App တွေ မထည့်ထားပါဘူးလို့ ဒေါက်တာ'ဘီလ်ဘာအို'က ဆိုပါတယ်။

သူ့ကလေးတွေက မိသားစုဓာတ်ပုံတွေ ပျော်ရွှင်စရာပုံတွေကို ကြည့်ချင်မှသာ ဖုန်းကိုအသုံးပြုကြပါတယ်လို့ ဆိုပါတယ်။

တစ်ခါတလေမှာ ကလေးတွေနဲ့အတူ သီချင်းတွေ ကကွက်တွေကိုကြည့်ရှုတတ်ပေမယ့် ဂိမ်းတော့ မဆော့ကြသလို တီဗီကိုလည်း အချိန်အကန့်အသတ်ဖြင့်သာ ကြည့်ရှုစေပါတယ်။

အသက် ၅ နှစ်အောက်ကလေးတွေအတွက် တစ်နေ့တာတီဗီကြည့်ရှုချိန် တစ်နာရီထက်ပိုမပေးသင့်သလို အသက် ၂ နှစ်အောက်အတွက်တော့ လုံးဝမကြည့်ရှုစေသင့်ပါဘူး။

Source: Daily Mail
#အသက်(၆)နှစ်အောက်ကလေးငယ်များ #စမတ်ဖုန်း၊ကွန်ပျူတာများ #စိတ်ရောဂါဆရာဝန်များသတိပေး
#YMG#Yangon_Media_Group

#World_Health
Published 3 April 2023

မွေးကင်းစကလေးအရွယ်ကတည်းက အိမ်မွေးတိရိစ္ဆာန်များနဲ့ ထိတွေ့စေခြင်းဟာ အစားအစာဓာတ်မတည့်ခြင်းမျိုး ဖြစ်နိုင်ချေနည်းပါးစေကြောင်း ဂျပန်သုတေသနတစ်ခုမှာ တွေ့ရှိထားပါတယ်။

ဖူကူရှီမာဆေးဘက်ဆိုင်ရာတက္ကသိုလ်မှ သုတေသီများက အသက် ၃ နှစ်အောက်ကလေး ၆၆,၀၀၀ ကျော်ရဲ့ အစားအစာဓာတ်မတည့်ခြင်းနဲ့ အိမ်မွေးတိရိစ္ဆာန်တွေ ထိတွေ့ခြင်းတို့ကို လေ့လာခဲ့ကြပါတယ်။

ခွေးတွေရှိတဲ့အိမ်မှာ ကြီးပြင်းလာတဲ့ကလေးတွေဟာ ခွေးမရှိတဲ့အိမ်ကကလေးတွေထက် ကြက်ဥ၊ နို့၊ မြေပဲစတဲ့ အစားအစာများနဲ့ဓာတ်မတည့်ခြင်းမျိုး ဖြစ်နိုင်ချေသိသိသာသာ ပိုနည်းခဲ့ပါတယ်။

ကြောင်တွေနဲ့ထိတွေ့ရတဲ့ ကလေးတွေဟာလည်း ကြက်ဥ၊ ဂျုံ၊ ပဲပိစပ်နဲ့ဓာတ်မတည့်တာမျိုး ဖြစ်နိုင်ချေနည်းသွားပါတယ်။

အိမ်မွေးတိရိစ္ဆာန်တွေနဲ့ ထိတွေ့ခြင်းဖြင့် ဓာတ်မတည့်ခြင်းဝေဒနာကို ထိရောက်စွာကာကွယ်နိုင်တယ်လို့ သုံးသပ်ရပေမယ့် အခြားတိရိစ္ဆာန်တွေနဲ့ ထိတွေ့ခြင်းမှာတော့ မသိရှိရသေးပါဘူး။

ဟမ်းစတားကြွက်တွေနဲ့ ထိတွေ့တဲ့ကလေးတွေကတော့ မြေပဲဓာတ်မတည့်ခြင်းအခြေအနေ ဖြစ်နိုင်ချေပိုများနေပါတယ်။

အိမ်မွေးတိရိစ္ဆာန်ထိတွေ့ခြင်းနဲ့ အစားအစာဓာတ်မတည့်ခြင်းတို့က တိရိစ္ဆာန်မျိုးနွယ်၊ အစားအစာတို့ပေါ် မူတည်နေပါတယ်။

မွေးကာစအရွယ်မှာ ခွေးတွေကြောင်တွေနဲ့ ထိတွေ့ခြင်းဖြင့် အစားအစာဓာတ်မတည့်ခြင်းမျိုး ဖြစ်နိုင်ချေနည်းပါးကြောင်း၊ ဒီလေ့လာချက်က နောက်ထပ်လေ့လာမှုတွေမှာ အကူအညီဖြစ်စေမှာဖြစ်ကြောင်း သုတေသီများဖော်ပြခဲ့ကြပါတယ်။
Source: India Today
#မွေးကင်းစကလေးငယ်များ #အိမ်မွေးတိရိစ္ဆာန်များ #အစားအစာဓာတ်မတည့်ခြင်း #လေ့လာတွေ့ရှိ #YMG#Yangon_Media_Group

Published 2 April 2023

တရုတ်နိုင်ငံတော်ဘဏ် The Bank of China (BOC) ဟာ ငွေလဲလှယ်နှုန်းအန္တရာယ်လျော့ပါးစေဖို့နှင့် ကမ္ဘာလုံးဆိုင်ရာ နယ်စပ်ဖြတ်ကျော်ကုန်သွယ်ရေးနှင့်ရင်းနှီးမြှပ်နှံမှုတွေတည်ငြိမ်မှုရှိစေရန်အထောက်အကူဖြစ်စေဖို့ တရုတ်ယွမ်ငွေကို နိုင်ငံတကာငွေကြေးတစ်ခုအဖြစ် တိုးမြှင့်ဆောင်ရွက်နေတယ်လို့  ဘဏ်ဥက္ကဋ္ဌ လျိုကျင်းကပြောပါတယ်။

ယွမ်ငွေကိုနိုင်ငံတကာသုံးငွေကြေးလုပ်တဲ့အတွက် ငွေကြေးလဲလှယ်နှုန်းအန္တရာယ်တွေကိုလည်း လျော့ပါးစေပါတယ်လို့ သူကပြောပါတယ်။

Source CCTV Plus

#တရုတ်နိုင်ငံတော်ဘဏ်ဥက္ကဋ္ဌ

#ယွမ်ငွေကိုနိုင်ငံတကာငွေကြေးအဖြစ်မြှင့်တင်

#Bank_of_China_President

#YangonMediaGroup

Published 2 April 2023

ဂျပန်နိုင်ငံမှာ အစိုးရဝန်ထမ်းတစ်ဦးဟာ ပြီးခဲ့တဲ့ ၁၄နှစ်အတွင်း အလုပ်ချိန်မှာ အကြိမ်ပေါင်း ၄၅၀၀ ကျော် ဆေးလိပ် သောက်ခဲ့တဲ့အတွက် အပြစ်ရှိတယ်လို့သတ်မှတ်ပြီး သူ့ရဲ့လစာထဲကနေ ဒဏ်ကြေး ယန်းငွေ ၁.၄၄သန်း(ဒေါ်လာ၁၁.၀၀၀) ပြန်ပေးဆောင်ခိုင်းခဲ့ရတယ်လို့ သတင်းများကဆိုပါတယ်။

ဂျပန်နိုင်ငံမှာ အိုဆာကာလိုမြို့ကြီးတွေမှာ အလုပ်ထဲဆေးလိပ်သောက်တာမိရင် မှတ်လောက်တဲ့ ဒဏ်ကြေးငွေကို လစာထဲက ဖြတ်တောက်ခြင်းခံကြရတဲ့ အန္တရာယ်ရှိနေကြပါတယ်။

အဲဒီလူဟာ ညွှန်ကြားရေးမှူးအဆင့်ရှိတဲ့ အစိုးရဝန်ထမ်းဖြစ်ပြီး သူဟာ လုပ်သက် ၁၄နှစ်အတွင်း စီးကရက်ကို ထောင်ပေါင်းများစွာ သောက်ခဲ့တဲ့အတွက် ဒဏ်ကြေး ဒေါ်လာတစ်သောင်းတစ်ထောင်ခန့်ပေးခဲ့ရတာဖြစ်ပါတယ်။  သူဟာ အသက် ၆၃နှစ်ရှိပြီး ပြီးခဲ့တဲ့ ၁၄နှစ်ခွဲအတွင်း အလုပ်ထဲမှာ စီးကရက်သောက်တာ ၄၅၁၂ကြိမ်ရှိခဲ့ပါတယ်။ သူဟာ  အလုပ်ချိန်အတွင်း သူ့အလုပ်သူမလုပ်ဘဲ ဆေး လိပ်သောက်ချိန်ပေါင်း ၃၃၅နာရီနှင့် ၁၉မိနစ်တိတိရှိခဲ့တယ်လို့ သတင်းတွေက ရေးပါတယ်။

အဲဒီအရာကြီးနှင့် လုပ်ဖော်ကိုင်ဖက် အခြားနှစ်ဦးတို့ဟာ အိုဆာကစီရင်စုအစိုးရရုံးမှာ အလုပ်လုပ်နေကြပြီး ပြီးခဲ့တဲ့ ၂၀၂၂ ခုနှစ်စက်တင်ဘာလကစပြီး အလုပ်ချိန်ဆေးလိပ်သောက်မှုနှင့်ပတ်သက်လို့ စုံစမ်းစစ်ဆေးခြင်းခံခဲ့ကြရပါတယ်။ သူတို့နှင့် ပတ်သက်လို့ HR  ဌာနဟာတိုင်တန်းမှုတွေအများကြီးရခဲ့ပြီးနောက် သူတို့ကို စုံစမ်းစစ်ဆေးမှုတွေပြုလုပ်ခဲ့တာဖြစ် ပါတယ်။ ဒါပေမယ့် သူတို့ဟာ သူတို့ကိုကြီးကြပ်သူတွေရဲ့ သတိပေးစကားတွေကို သတိမမူကြတဲ့အပြင် အင်တာဗျူးမှာ လည်း ဆေးလိပ်သောက်တာနှင့်ပတ်သက်လို့ လိမ်ညာဖြေကြားခဲ့ကြပါတယ်။

ဒေသဆိုင်ရာ အများပြည်သူဝန်ဆောင်မှုဥပဒေအရ အဆိုပါအစိုးရဝန်ထမ်းဟာ အလုပ်အပေါ်အလေးထားမှုပျက်ကွက် ချိုးဖောက်ခဲ့ကြောင်းတွေ့ရှိကြတယ်လို့ ဂျပန်သတင်းစာ မာအင်နီချီက ရေးသားပါတယ်။

အဲဒါကြောင့် သူတို့ကို လစာထဲကနေ ဒဏ်ငွေ ၁.၄၄သန်းယန်းငွေပြန်ပေးဖို့ အမိန့်ချခဲ့တဲ့အပြင်  အပြစ်ပေးတဲ့အနေနှင့် ခြောက်လတာ ကာလအတွက် လစာကို ၁၀ရာခိုင်နှုန်းလျှော့ချခဲ့ပါတယ်။

အိုဆာကာဟာ ဆေးလိပ်ဥပဒေတွေနှင့်ပတ်သက်ရင် ကမ္ဘာပေါ်မှာ အတင်းကြပ်ဆုံးနေရာတွေထဲက တစ်ခုဖြစ်ပါတယ်။  လွန်ခဲ့တဲ့ ဆယ်စုနှစ်နှစ်စုကတည်းက ရုံးတွေနှင့် ပြည်သူပိုင်ကျောင်းတွေလိုမျိုး အစိုးရပရဝဏ်ထဲမှာ ဆေးလိပ်သောက် ခြင်းကို တားမြစ်ခဲ့ပါတယ်။ ၂၀၁၉နှစ်ကစကာ အစိုးရဝန်ထမ်းတွေကို အလုပ်ချိန်အတွင်း ဆေးလိပ်သောက်ခွင့်တားမြစ် ထားပါတယ်။

ဆေးလိပ်သောက်လို့ ပြစ်ဒဏ်ပေးခံရတာနှင့်ပတ်သက်လို့ ပြည်သူတွေက ယေဘုယျအားဖြင့် စာနာသနားကြပါတယ်။  ရုံးပြင်ထွက်ပြီးဆေးလိပ်သောက်ရင် ပိုပြီးတောင် အချိန်ဖြုန်းသလိုဖြစ်ဦးမယ်လို့လည်း အချို့က စောဒကတက်ကြ ပါတယ်။အချို့ကလည်း အလုပ်ချိန်အတွင်း လက်ဖက်ရည်သောက်တာ၊သွားရေစာစားတာ၊စကားစမြည်ပြောကြတာတွေ လည်း အချိန်ဖြုန်းတာပဲလို့ ဆိုကြပါတယ်။ ဒါပေမယ့် အဲဒါတွေက ဒဏ်ပေးမခံရတဲ့အတွက် ဆေးလိပ်သောက်တာလည်း ဒဏ်ပေးခံရဖို့မသင့်ဘူးလို့ဆိုကြပါတယ်။

၂၀၁၉ခုနှစ်တုန်းကလည်း အလားတူအဖြစ်မျိုးကြုံခဲ့ပါတယ်။ အလုပ်ချိန်အတွင်း ဆေးလိပ်ကို အကြိမ်ပေါင်း ၃၄၀၀ခန့် သောက်ခဲ့လို့ အဲဒီတုန်းက ကျောင်းဆရာတစ်ဦးကို ဒဏ်ငွေ ယန်းတစ်သန်းရိုက်ခဲ့ပါတယ်။

Source: Agencies

#YangonMediaGroup

#ဂျပန်#အိုဆာကာ#ဆေးလိပ်ဥပဒေတင်းကြပါ

#အလုပ်ချိန်အတွင်းဆေးလိပ်၄၅၁၂ကြိမ်သောက်ခဲ့၍ဒဏ်ငွေယန်းတစ်သန်းကျော်ရိုက်

Published 2 April 2023

နယ်သာလန်နိုင်ငံက ကမ်းခြေတစ်ခုမှာ လမ်းလျှောက်လာတဲ့ အဏ္ဏဝါဇီဝဗေဒပညာရှင်တစ်ဦးဟာ ရှားပါးပြီး ဝေ့လည် တွေ့ရခဲတဲ့ သတ္တဝါတစ်ကောင်ကိုတွေ့ရှိခဲ့ပါတယ်။အဲဒီသတ္တဝါကို ပင်လယ်ငါးလင်ပန်းလို့ ခေါ်ကြပါတယ်။

သွေးစုပ်တတ်တဲ့ အဲဒီငါးရဲ့ သဘာဝကိုအစွဲပြုပြီး သွေးစုပ်ဖုတ်ကောင်ငါးလို့ အမည်ပေးထားကြတာဖြစ်ပါတယ်။ အဲဒီသွေးစုပ်ဖုတ်ကောင်ငါးကို ဒတ်ချ်ကျွန်းတစ်ကျွန်းဖြစ်တဲ့ တက်ဆဲလ်ကျွန်းပေါ်မှာ တွေ့ခဲ့တာလို့ ယူကေအခြေစိုက် မက်ထရိုသတင်းစာက  ရေးသားပါတယ်။

“ ကမ်းခြေမှာ ကားမောင်းသွားရင်း  အခြားစိတ်ဝင်စားစရာတွေကို ကျွန်တော်အမြဲရှာတတ်တယ်။ အဲဒါကြောင့် ငါးရှဉ့်လို မျိုး ရှည်မျောမျောငါးတစ်ကောင် ရေအစပ်မှာ တင်နေတာကိုကျွန်တော်တွေ့လိုက်တာ” လို့ သူကပြောပါတယ်။

“ဒီငါးဟာ ပင်လယ်ငါးလင်ပန်းဆိုတာ ကျွန်တော်ချက်ခြင်းပဲသိလိုက်တယ်။ အင်မတန်ထူးဆန်းတဲ့ငါး။ ငါးရှဉ့်နှင့် သိပ်တူတယ်။ ပါးစပ်ကြီးက ချပ်ပြားဝိုင်းသဏ္ဍာန်ရှိပြီး မေးရိုးမပါဘူး။ပါးစပ်ထဲ သွားတွေအပြည့်ပဲ” လို့ သူက ဆက်ပြော ပါတယ်။

“ ဒီငါးကို ကမ်းခြေမှာ တစ်ခါမျှမတွေ့ဖူးဘူး။သူတို့ဟာ သိပ်ဆန်းကြတယ်တယ်။ မြင်ဖူးနေကျပုံစံမဟုတ်တဲ့ ငါး။ ပြီးတော့ အံ့ဘွယ်လည်းဖြစ်တယ်” လို့သူကဆိုပါတယ်။

သားကောင်ရဲ့သွေးကိုစုပ်ပြီးသောက်တဲ့ ငါးလို့ သိထားကြတဲ့ ပင်လယ်ငါးလင်ပန်းဟာ အင်မတန်ရှားပါးပြီး ဒီကျွန်းမှာ ၂၀၁၇ ခုနှစ်တုန်းက နောက်ဆုံးတွေ့ရှိခဲ့တာပါ။

သုံးပေနီးပါးရှည်လျားတဲ့ အဲဒီသွေးစုပ်ဖုပ်ကောင်ငါးဟာ အတော့်ကိုအိုမင်းနေပြီလို့ ပညာရှင်တွေကပြောပါတယ်။ သူတို့ဟာ သက်တမ်းအရင့်ဆုံး ကျောရိုးရှိသတ္တဝါအုပ်စုတွေထဲကတစ်စုဖြစ်တဲ့ အက်နက်သာအုပ်စု ထဲပါဝင်နေပါတယ်။ အဲဒီအုပ်စုဟာ မေးရိုးရှိငါးတွေမပေါ်ခင် လွန်ခဲ့တဲ့ နှစ်သန်း၄၀၀ကျော်ကတည်းကတည်ရှိခဲ့ကြတာပါ။

အဲဒီသွေးစုပ်ဖုတ်ကောင်ငါးကို “ အီကိုမဲယား” သဘာဝသမိုင်းပြတိုက်ကို ပေးအပ်လိုက်တယ်လို့သိရပါတယ်။

“ဒီငါးတွေကို  ပင်လယ်ထဲကနေ ရေချိုတဲ့အရပ်ကို ငါးဦပေါက်ဖို့အတွက် ရွှေ့ပြောင်းလာလေ့ရှိတဲ့ နွေဦးကာလမှာ တွေ့ရ တတ်ပါတယ်” လို့ ပြတိုက်အရာရှိတွေကပြောပါတယ်။

ပင်လယ်ငါးလင်ပန်းတွေဟာ မေးရိုးမပါပေမယ့် စုပ်ယူလို့ရတဲ့ ပုံသဏ္ဍန်ရှိတဲ့ ပါးစပ်နှင့်  ငါးတွေကိုတိုက်ခိုက်ဖို့နှင့်သွေးတွေ ဖောက်သောက်နိုင်ဖို့ သွားတွေအပြည့်ပါတယ်လို့လည်း သိရပါတယ်။

Source:  WION

#သွေးစုပ်ဖုတ်ကောင်ငါး

#ပင်လယ်ငါးလင်ပန်း

#YangonMediaGroup

Published 2 April 2023

အိန္ဒိယနိုင်ငံ ကူးသန်းရောင်းဝယ်ရေးနှင့် စက်မှုဝန်ကြီးဌာနက ၂၀၂၃ခုနှစ်အတွက် နိုင်ငံခြားကုန်သွယ်ရေးမူဝါဒအသစ်ကို ထုတ်ပြန်ခဲ့ရာ ရူပီးအခြေခံကုန်သွယ်ရေးကို နိုင်ငံတကာအသွင်ပြုလုပ်ရေးကို အဆိုပါမူဝါဒအသစ်မှာ အသားပေးထားခဲ့ ပါတယ်။ အိန္ဒိယရဲ့ ကုန်သွယ်ရေးမူဝါဒအသစ်၂၀၂၃ အသစ်ရဲ့ အဓိကအချက်အလက်တွေကို ကောက်နှုတ်ဖော်ပြအပ် ပါတယ်။

-အိန္ဒိယနိုင်ငံ ကူးသန်းရောင်းဝယ်ရေးနှင့်စက်မှုဝန်ကြီး ပီယတ်ဂိုယယ်က က မတ်၃၁ရက်နေ့မှာ ၂၀၂၃-၂၀၂၈ ငါးနှစ်တာ နိုင်ငံခြားကုန်သွယ်ရေးမူဝါဒအသစ်ကို ကြေညာခဲ့ပါတယ်။

- ယခုနိုင်ငံခြားကုန်သွယ်ရေးမူဝါဒအသစ်မှာ ရူပီးဖြင့်ကုန်သွယ်မှုကို နိုင်ငံတကာသုံးပြုလုပ်ရေးကို အဓိက အသားပေးထား ပါတယ်။

-အိန္ဒိယရဲ့ ကုန်ပစ္ဏည်းတွေနှင့် ဝန်ဆောင်မှုတွေကို ပြည်ပပို့ကုန်တိုးမြှင့်ဆောင်ရွက်ဖို့ မူဝါဒကရည်ရွယ်ထားပြီး ၂၀၂၃ခုနှစ် ဧပြီလ(၁)ရက်ကစပြီး မူဝါဒအသစ်ဟာ အကျုံးဝင်ပါတယ်။ ၂၀၃၀ အရောက်မှာ အိန္ဒိယရဲ့ကုန်စည်နှင့်ဝန်ဆောင်မှုတန်ဖိုး ဟာ အမေရိကန်ဒေါ်လာ ၂ ထရီလီယံရှိလာမယ်လို့မျှော်မှန်းထားပါတယ်။

-မူဝါဒအသစ်အရ အိန္ဒိယရဲ့ အီလက်ထရွန်းနစ်ကူးသန်းရောင်းဝယ်ရေး e-commerce တွေတိုးတက်လာဖို့ရှိပြီး ၂၀၂၃ခုနှစ်  မှာ အမေရိကန်ဒေါ်လာ ၂၀၀ဘီလျံမှ ၃၀၀ဘီလျံအထိရှိနေမယ်လို့ ခန့်မှန်းတွက်ချက်ထားပါတယ်။

-နိုင်ငံခြားကုန်သွယ်မှုမဟာဗျူဟာအသစ်အောက်မှာ နို့ထွက်ပစ္စည်းတွေကို ပျှမ်းမျှပို့ကုန်လိုက်နာရန်အချက်များကနေ ကင်းလွတ်ခွင့်ပြုထားပြီး အထည်ချုပ်လုပ်ငန်းတွေအတွက် အထူးခွင့်ပြုချက်အစီအစဉ်ကို တိုးပေးထားပါတယ်။

-ဖာရီဒါဘက်၊မိုရာဒါဘက်၊မီယာဇာပါနှင့် ဗာရာဏသီတို့ကို ပို့ကုန်ဒေသအသစ်တွေအဖြစ် သတ်မှတ်လိုက်ပါတယ်။

-အဲဒီအပြင် ကုန်သွယ်မှုခွင့်ပြုချက်တွေအတွက် အလိုအလျောက်စနစ်တွေနှင့်ခွင့်ပြုဖို့ပါဝင်နေပြီး အသေးစားနှင့် အလတ်စား လုပ်ငန်းတွေ အစိုးရရဲ့ အထောက်အပံ့ အသေအချာရရှိစေဖို့ အစီအမံတွေလည်းပါဝင်ပါတယ်။

Source:India_Today

#YangonMediaGroup

#အိန္ဒိယနိုင်ငံခြားကုန်သွယ်မှုမူဝါဒ၂၀၂၃

#ရူပီးကုန်သွယ်မှုနိုင်ငံတကာပြုလုပ်ရေး

#အိန္ဒိယစီးပွားကုန်သွယ်ရေး