#Daily_News
Published_ 22 January 2024

၁။ ရန်ကုန်ရွှေဈေးကွက်အတွင်း ရွှေပြား၊ ရွှေခဲကတ်ပြားများ စတင်ရောင်းချလာ

၂။ မြန်မာ့ပြောင်းထိုင်းတင်ပို့သည့်ရာသီ နီးကပ်လာချိန်၌  အကျဈေးဖြင့်ဝယ်ယူနေ

၃။ တိရိစ္ဆာန်အစာ ဈေးကြီးမြင့်လာသော်လည်းလွှတ်ကြောင်းစနစ်ဖြင့် အများဆုံးမွေးမြူသည့်အတွက် ဆိတ်မွေးမြူရေးဈေးကွက် ထိခိုက်မှုမရှိဘူးဟုဆို

၄။ နယ်စပ်ဖြတ်ကျော် ယွမ်ငွေအသုံးပြုမှုကြောင့် တရုတ်ကုန်သွယ်ရေးပိုမိုတိုးတက်လာဟု တရုတ်နိုင်ငံပြောကြား... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_Politics
Published 22 January 2024

အမေရိကန်ပြည်ထောင်စု နယူးဟမ့်ရှိုင်းယား အကြိုရွေးကောက်ပွဲမတိုင်မီ ၂ ရက်အလိုမှာပဲ ဖလော်ရီဒါ အုပ်ချုပ်ရေးမှူး ရွန်ဒီဆန်းတစ်က သမ္မတရွေးကောက်ပွဲ စည်းရုံးရေးလုပ်ငန်းစဥ်များ အဆုံးသတ်ခဲ့ကာ ဒေါ်နယ်ထရမ့်ကို ထောက်ခံကြောင်း ဖော်ပြလိုက်ပါတယ်။

ဒါဟာ ရီပတ်ဘလစ်ကန် ကိုယ်စားလှယ်နေရာအတွက် ထရမ့်ကို အခိုင်အမာစိန်ခေါ်လာခဲ့တဲ့ ကုလသမဂ္ဂ သံအမတ်ဟောင်း နစ်ကီဟာလေကို ကျော်လွန်ပြီး ထရမ့်ကို ထောက်ခံလိုက်တာ ဖြစ်ပါတယ်။

နိုဝင်ဘာလ အထွေထွေ ရွေးကောက်ပွဲမတိုင်မီ ရီပတ်ဘလစ်ကန်ဘက်မှာ ထရမ့်နေရာ အစားထိုးနိုင်မယ်လို့ ထင်ကြေးပေးခံရဆုံး ဒီဆန်းတစ်ဟာ အိုင်ယိုဝါမှာ ရင်းနှီးမြှုပ်နှံမှု ကြီးကြီးမားမား ပြုလုပ်ခဲ့ပေမယ့် ထရမ့်ကိုရှုံးနိမ့်ခဲ့ပြီးနောက် အခုလိုမျိုး ထောက်ခံလိုက်တာ ဖြစ်ပါတယ်။

ဒါကြောင့် ဟာလေဟာ ထရမ့်နဲ့ တစ်ယောက်ချင်း ယှဥ်ပြိုင်ရတော့မှာ ဖြစ်ပါတယ်။

သမ္မတဟောင်း ထရမ့်က တရားစွဲဆိုချက် ၄ ခုဖြင့် ရင်ဆိုင်နေရပေမယ့် ရီပတ်ဘလစ်ကန်ဘက်မှာ အခိုင်အမာ ဦးဆောင်နေဆဲ ဖြစ်ပါတယ်။

ဒီဆန်းတစ်ထောက်ခံသူတွေက အလယ်အလတ်လမ်းစဥ် ပိုကျတဲ့ ဟာလေထက်စာရင် ထရမ့်ဘက်ကိုပြောင်းပြီး ထောက်ခံချင်နေပါတယ်။

နယူးဟမ့်ရှိုင်းယားမှာ ဒီဆန်းတစ်ထောက်ခံသူ ၃ ပုံ ၂ ပုံခန့်က ထရမ့်ကို ဒုတိယဦးစားပေးအဖြစ် ရွေးချယ်ထားကြတယ်လို့ နယူးဟမ့်ရှိုင်းယား စစ်တမ်းဌာနတက္ကသိုလ်မှ ညွှန်ကြားရေးမှူး အန်ဒရူးစမစ်က ပြောပြသွားပါတယ်။

ယမန်နှစ်က ဒီဆန်းတစ်ကို တစ်ချိန်လုံး တိုက်ခိုက်နေခဲ့တဲ့ ထရမ့်က ရိုချက်စတာမှာ တနင်္ဂနွေနေ့ညနေခင်းမိန့်ခွန်း ပြောကြားရာမှာ အုပ်ချုပ်ရေးမှူးဟောင်း ဒီဆန်းတစ်ကို ချီးကျူးသွားပြီး သမ္မတဂျိုးဘိုင်ဒင်ကို အနိုင်ရရန် အတူတကွ လုပ်ဆောင်သွားဖို့ မျှော်လင့်နေကြောင်း ဆိုလိုက်ပါတယ်။

ထရမ့်က နယူးဟမ့်ရှိုင်းယားမှာ ဟာလေကို အသာရနေသလို ကယ်ရိုလိုင်းနား တောင်ပိုင်းမှာလည်း ဦးဆောင်ထားပါတယ်။

ဒီဆန်းတစ် ပြိုင်ပွဲမှ ဆုတ်ခွာသွားခြင်းက ရီပတ်ဘလစ်ကန် ယှဥ်ပြိုင်မှုမှာ ကြီးကြီးမားမား ပြောင်းလဲသွားဖွယ် မရှိဘူးလို့ အချို့က သုံးသပ်ထားကြပါတယ်။

ဘယ်လိုပဲဖြစ်ဖြစ် ဒီဆန်းတစ် မယှဥ်ပြိုင်တော့တာဟာ ထရမ့်အတွက် အကျိုးရှိသွားတာ အသေအချာပါပဲ။

#World_Politics #ရွန်ဒီဆန်းတစ်နှုတ်ထွက် #ထရမ့်ကိုထောက်ခံချက်ပေး #Source: Reuters

#World_Health
Published 22 January 2024

ဘရာဇီးလ်ကလေးငယ်တစ်ဦးဟာ ၂၀၂၂ မှာ ကျောက်ကပ် ၄ ခုဖြင့် မွေးဖွားလာကာ အလွန်ရှားပါးတဲ့ မွေးရာပါ ချို့ယွင်းမှုတစ်မျိုး ဖြစ်နေပါတယ်။

သားအိမ်ထဲမှာ ရှိနေစဥ်က ကျောက်ကပ်ပြဿနာ ရှိခဲ့ပေမယ့် ဘာလဲဆိုတာ အတိအကျ မသိခဲ့ပါဘူး။

၅ လသားအရွယ်မှာ ခွဲစိတ်မှုလုပ်တဲ့အခါမှ ကျောက်ကပ်အပို ၂ ခုရှိနေတာကို ဆရာဝန်များ သိရှိခဲ့ကြပါတယ်။

လူအများစုက ကျောက်ကပ် ၂ ခုဖြင့်မွေးဖွားလာကြပြီး အယောက် ၁၀၀၀ မှာ ၁ ယောက်နှုန်းက ကျောက်ကပ် ၁ ခုဖြင့် မွေးဖွားတတ်ပါတယ်။

ကျောက်ကပ်အပိုပါလာတဲ့ ကလေးတွေလည်းရှိပြီး ကိုယ်ဝန်ဆောင်စဥ်မှာ ကျောက်ကပ်တိုင်က ပုံမှန်မဟုတ်ဘဲ ကွဲသွားခြင်းကြောင့် ဖြစ်တယ်လို့ ယူဆထားပါတယ်။

ထိုကလေးကို ဗိုက်ခွဲမွေးပြီးနောက် ဆေးရုံမှာ ဖန်ပြွန်အိမ်ထဲ ထည့်ထားခဲ့ပါတယ်။

ပိုတဲ့ကျောက်ကပ်က ပိတ်ဆို့နေပြီး ဆီးတွေစုပြုံလာပြီးနောက် ညာဘက်အပေါ်ကျောက်ကပ်ကို ဖယ်ရှားခဲ့ပါတယ်။

ဒီအတွက် ကျောက်ကပ်က ကြီးလာပြီး အစာအိမ်နဲ့ အူတွေကို ဖိထားလိုက်ပါတယ်။

ဖယ်ရှားလိုက်တဲ့ ကျောက်ကပ်က သွေးကြောတွေ ပုံမှန်မဟုတ်တာကြောင့် လှူဒါန်းလို့ မရပေမယ့် ဓာတ်ခွဲခန်းစစ်ဆေးဖို့ ပို့ဆောင်လိုက်ပါတယ်။

ကျန်တဲ့ကျောက်ကပ် ၃ ခုကတော့ ပုံမှန်အတိုင်း လုပ်ဆောင်နေပါတယ်။

အရွယ်ရောက်တဲ့အချိန်အထိ နှစ်ပေါင်းများစွာ စစ်ဆေးမှုတွေ ခံယူသွားရမှာ ဖြစ်ပါတယ်။

အခုဆို ၁၃ လရှိပြီဖြစ်တဲ့ ကလေးငယ်ဟာ အအေးမိတဲ့အခါတိုင်း အဆုတ်ရောင်နေပြီး အဆုတ်တွေက ထိခိုက်လွယ်နေပါတယ်။

#World_Health #ကျောက်ကပ်(၄) #ဘရာဇီးလ်မှကလေးငယ် #အသက်ရှင်သန်လျက်ရှိ #Source: New York Post

#World_Health
Published 22 January 2024

ဂွမ်းနားကြပ်တံ အသုံးပြုတာနဲ့ ပတ်သက်ပြီး အငြင်းပွားမှုများ ရှိနေကာ မှန်ကန်တဲ့ နည်းလမ်းကို သိချင်နေကြပါတယ်။

ဒါကြောင့် ဗြိတိန်မှ ဆရာဝန်တစ်ဦးက မှန်ကန်တဲ့ နားသန့်ရှင်းရေးနည်းလမ်းကို ဖော်ပြဖို့ ဆုံးဖြတ်လိုက်ပါတယ်။

နားတွေကို ဘယ်လိုသန့်ရှင်းရမလဲဆိုတော့ သန့်ရှင်းပေးဖို့ မလိုဘူးလို့ ဒေါက်တာဆူဂျာက သူ့ရဲ့တစ်တော့မှာ အကြံပြုသွားကာ ၁၂ စက္ကန့်ကြာ ဗီဒီယိုက ကြည့်ရှုသူ သောင်းနဲ့ချီသွားပါတယ်။

မိမိရဲ့တံတောင်ဆစ်ထက်သေးတဲ့ ဘယ်အရာဝတ္ထုမဆို နားထဲမထည့်သင့်ကြောင်း၊ အဝတ်စဖြင့် နားအပြင်ဘက်ကို သုတ်သင်သင့်ကြောင်း အကြံပြုလိုက်ပါတယ်။

၁၉၉၀ မှ ၂၀၁၀ အတွင်း နားကြပ်တံအသုံးပြုခြင်းကြောင့် နားဒဏ်ရာရရှိကာ အရေးပေါ်ကုသမှုခံယူရတဲ့ ကလေးငယ်ပေါင်း အမေရိကန်မှာ ၂၆၄၀၀၀ ဦး ရှိခဲ့ပါတယ်။

နားကြပ်တံကြောင့် နားရောဂါကူးစက်မှုတွေနဲ့ ဘေးအန္တရာယ်တွေလည်း ရှိလာနိုင်တယ်လို့ ဒေါက်တာ ခရစ်ဂျာတာနာက ဆိုပါတယ်။

နားလမ်းကြောင်းတွေကို အိမ်မှာပင် သန့်ရှင်းရေးလုပ်နိုင်ပြီး ဒီအတွက် ဂွမ်းနားကြပ်တံတွေက သင့်လျော်တယ်ဆိုတဲ့ အယူအဆတွေကို ပယ်ချလိုက်ပါတယ်။

နားတွင်းက သူ့အလိုလို သန့်ရှင်းရေးလုပ်နိုင်ကြောင်း၊ ဂွမ်းနားကြပ်တံက နားဖာချေးတွေကို နားစည်သို့ ပိုမိုရောက်ရှိစေတဲ့အပြင် နားဒဏ်ရာရနိုင်ခြေလည်း များတယ်လို့ ဂျာတာနာက ရှင်းပြပါတယ်။

နားကြပ်တံ အသုံးပြုခြင်းကြောင့် အကြားအာရုံချို့ယွင်းခြင်း၊ နားအူခြင်း၊ မူးဝေခြင်း စတာတွေဖြစ်နိုင်ပြီး နားဖာချေးတွေ ဖယ်ရှားဖို့အတွက် ဇွန်းရှည်၊ ညှပ်တံ၊ စုပ်စက်တို့ဖြင့်  အသုံးပြုနိုင်တယ်လို့ ဒေါက်တာဆူဂျာက အကြံပေးလိုက်ပါတယ်။

#World_Health #နားသန့်ရှင်းရေး #အကောင်းဆုံးနည်းလမ်း #Source: The Jerusalem Post

၂၁ ဇန်နဝါရီ ၂၀၂၄

အမေရိကန်လုပ် ကိုဗက် စစ်သင်္ဘော HTMS Sukhothai ပြန်လည်ဆယ်ယူရာတွင် တရုတ်ကုမ္ပဏီတစ်ခုပါဝင် ပတ်သက်နေသည်ဟူသည့် သတင်းများနှင့်ပတ်သက်၍ ထိုင်းတော်ဝင်ရေတပ်ကို အမေရိကန်ပြည်ထောင်စုက သတိပေးစာ ပေးပို့ထားသည်။

 အဆိုပါသတိပေးစာကို  ၂၀၂၄ဘတ်ဂျက်သုံးသပ်ရေး အောက်လွှတ်တော်ကော်မတီအဖွဲ့ဝင်တစ်ဦးဖြစ်သူ ရှေ့သို့ချီပါတီ၏ ဘန်ကောက်လွှတ်တော်အမတ် ချာရာဖွန်ဆာတွန်ဒီက ဖော်ထုတ်ခဲ့ခြင်းဖြစ်သည်။

မစ္စတာ ချာရာဖွန်၏ အဆိုအရ  အဆိုပါစာကို ထိုင်းနိုင်ငံရှိ အမေရိကန်ပြည်ထောင်စုစစ်ရေးအကြံပေးပူးတွဲအုပ်စုက ရေးသား ပေးပို့ခဲ့ခြင်းဖြစ်သည်ဟုသိရသည်။ ၂၀၂၂ခုနှစ် ဒီဇင်ဘာ ၁၈ရက်က ထိုင်းပင်လယ်ကွေ့တွင် အဆိုပါ ထိုင်းရေတပ်ပိုင်သင်္ဘော နစ်မြုပ်ပြီးကတည်းက အမေရိကန်၏ စိုးရိမ်ပူပန်မှုအပေါ် ထိုင်းရေတပ်က တုန့်ပြန်မှုမပြုခဲ့သေးဟု ရေးသားဖော်ပြထားသည်။  သင်္ဘောနစ်မြုပ်မှုကြောင့် သင်္ဘောသား ၁၀၆ဦးအနက် (၂၄)ဦး သေဆုံးခဲ့ကာ ငါးဦးပျောက်ဆုံးနေပြီး ထိုပျောက်ဆုံးသူများ သေဆုံးသွားပြီဟု ယူဆရသည်။

ထိူင်းနိုင်ငံရှိ အမေရိကန်၏ စစ်ရေးကိစ္စများကို ကြီးကြပ်ရသည့်အဖွဲ့သည် သင်္ဘောနစ်မြုပ်ပြီး တစ်လအကြာတွင် ထိုင်းရေတပ်ကို ဆက်သွယ်ခဲ့ပြီး ၁၉၈၇ခုနှစ်ကတည်းက အမှုထမ်းခဲ့သည့် အဆိုပါသင်္ဘောပျက်ကို မည်ကဲ့သိုဆယ်ယူမည် ဆိုသည့် အစီအစဉ်နှင့်ပတ်သက်၍ မေးမြန်းခဲ့သည်။ ပြန်စာမရရှိသေးသည့်အတွက် ပြီးခဲ့သည့် ဒီဇင်ဘာ (၁)ရက်က နောက်ထပ် စာတစ်စောင်ထပ်ပို့ခဲ့ခြင်းဖြစ်သည်ဟု မစ္စတာ ချာရာဖွန်ကပြောသည်။

တရုတ်မိတ်ဖက်ကုမ္ပဏီနှင့်အတူတွဲလုပ်မည့် ထိုင်းကန်ထရိုက်တာကုမ္ပဏီတစ်ခုကို သင်္ဘောဆယ်ယူရန် ရွေးချယ်ထားသည် ဟူသောသတင်းများထွက်ပေါ်ပြီးနောက်  ထိုင်းရေတပ်ကို အမေရိကန်နှင့်သဘောတူညီချက်လိုက်နာရန် ထိုဒုတိယစာတွင် တိုက်တွန်းထားသည်။

သဘောတူညီချက်မှာ အမေရိကန်ထုတ်သင်္ဘောများကို ဆယ်ယူဖို့ရှိလာပါက ထိုင်းရေတပ်သည်  အမေရိကန်အစိုးရထံ ဆယ်ယူမည့်ကန်ထရိုက်တာကို အတည်ပြုချက်ရယူရမည်ဟုဖော်ပြပါရှိသည်ဟု မစ္စတာ ချာရာဖွန်ကပြောသည်။

အကယ်၍ ထိုင်းရေတပ်သည် အဆိုပါပဋိညာဉ်ကို ချိုးဖောက်ပါက  ထိုင်းနိုင်ငံနှင့်အမေရိကန်အကြား နိုင်ငံခြား စစ်ပစ္စည်း‌ ရောင်းချမှုအပေါ် အကျိုးသက်ရောက်မှာဖြစ်ကြောင်း သူကဆက်ပြောပြသည်။

မည်သို့ဆက်လုပ်ရမည်ကို စဉ်းစာနေသည်ဟု ရေတပ်ဦးစီးချုပ် ဗိုလ်ချုပ်ကြီး အက်ဒမ်ဖန်အမ်ကပြောသည်။

တကယ်လို့ အမေရိကန်က ဆယ်ယူရေးမှာပါဝင်မယ်ဆိုရင် ဆယ်ယူဖို့မူလသတ်မှတ်ထားတဲ့ ဧပြီလထက် နောက်ကျသွားနိုင် တယ်ဟု အမည်မဖော်လိုသူ သတင်းအရင်းအမြစ်ကပြောသည်။

ထိုင်းရေတပ်သည် စစ်သင်္ဘော ဆယ်ယူရေးတွင် ဘတ်ငွေ ၁၉၉သန်းဖြင့် ဆောင်ရွက်ပေးမည့် ကန်ထရိုက်တာကိုတွေ့ရှိပြီး ဖြစ်သော်လည်း အတည်ပြရန် ဆိုင်းငံ့ထားဆဲဖြစ်သည်။

-ymg/knl

#Thailand_navy

#HTMS_Sukhothai

#yangonmediagroup