#World_Health
Published 13 October 2024

▪️ ရေအေးဖြင့် ရေချိုးဖို့က အတော်အားခဲရပေမယ့် ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ကျန်းမာရေး အကျိုးကျေးဇူးများ ရရှိစေနိုင်တာကြောင့် အခုနောက်ပိုင်း စိတ်ဝင်စားလာကြပါတယ်။

▪️ ရေအေးဖြင့်ချိုးတဲ့အခါ ခန္ဓာကိုယ်မှာ ဘာဖြစ်သွားလဲဆိုတာနဲ့ ရနိုင်တဲ့ အကျိုးကျေးဇူးများကို လေ့လာဖော်ပြသွားပါမယ်။

- ဇီဝကမ္မဖြစ်စဉ် ရုတ်ချည်းပြောင်းလဲမှုများ
▪️ အရေပြားကို ရေအေးထိလိုက်တဲ့အချိန်မှာ ရုတ်တရက် ပြောင်းလဲမှုများဖြစ်ပေါ်ပါတယ်။

▪️ နှလုံးခုန်နှုန်း၊ သွေးဖိအား၊ အသက်ရှူခြင်းတို့ ရုတ်တရက် မြင့်တက်လာပြီး ဒါဟာ အေးတဲ့ပတ်ဝန်းကျင်မှာ အသက်ရှင်နိုင်အောင် ခန္ဓာကိုယ်မှ သဘာဝအတိုင်း ပြင်ဆင်ပေးထားတာ ဖြစ်ပါတယ်။

▪️ လူကို နိုးကြားစေကာ စွမ်းအင်မြှင့်တင်ပေးပါတယ်။

▪️ ရေအေးကြောင့် အရေပြားမျက်နှာပြင်ရှိ သွေးကြောများ ညှစ်လိုက်ကာ ရေချိုးပြီးနောက် နွေးသွားတဲ့အခါ သွေးကြောပြန်ကျယ်သွားပြီး သွေးစီးဆင်းမှု ကောင်းမွန်စေကာ နှလုံးသွေးကြော ကျန်းမာရေးကို အကျိုးရှိစေပါတယ်။

▪️ အအေးဓာတ်ကြောင့် အဆီညိုတစ်ရှုးကို လှုံ့ဆော်ပေးကာ အနွေးဓာတ်ထိန်းသိမ်းပေးပြီး ကယ်လိုရီလောင်ကျွမ်းစေပါတယ်။

- ကိုယ်ခံအားစနစ်မြှင့်တင်ပေးခြင်း

▪️ အရေးကြီးဆုံး အကျိုးကျေးဇူးတစ်ခုက ကိုယ်ခံအား မြှင့်တင်ပေးတာပါပဲ။
သွေးဖြူဥဆဲလ်များ ထုတ်လုပ်မှုကို အားပေးကာ ရောဂါကူးစက် ဝင်ရောက်ခြင်းများကို ကာကွယ်ပေးပါတယ်။

▪️ သာမန်အအေးမိ ဖျားနာမှုတွေကို လျှော့ချပေးနိုင်တယ်လို့ ဆန်းစစ်ထားပါတယ်။

- စိတ်ပိုင်းဆိုင်ရာနဲ့ စိတ်အခြေအနေ
▪️ အင်ဒေါ်ဖင်ဟော်မုန်း ထွက်စေသဖြင့် စိတ်အခြေအနေ မြှင့်တင်ပေးကာ ဖိစီးမှုများကို လျော့ကျစေပါတယ်။

▪️ အအေးဒဏ်ကို သည်းခံနိုင်တဲ့ အခြေအနေကြောင့် ဖိစီးမှုများကို ထိရောက်စွာ ထိန်းချုပ်နိုင်တဲ့ စွမ်းရည်တိုးမြင့်လာပါတယ်။

- အရေပြားနဲ့ ဆံပင်အကျိုးကျေးဇူးများ
▪️ ရေအေးကြောင့် အရေပြား မွေးညင်းပေါက်များ တင်းကြပ်သွားသဖြင့် ဖုန်နဲ့ အညစ်အကြေးများ မဝင်ရောက်နိုင်ကာ အသားအရေ ပိုမိုတင်းရင်းနုပျိုစေပါတယ်။

▪️ ဆံကေသာကိုလည်း သန်စွမ်းတောက်ပြောင်စေကာ ပျက်စီးခြင်းမှ ကာကွယ်ပေးပါတယ်။

▪️ ဒီလိုအကျိုးကျေးဇူးတွေ ရှိပေမယ့် နှလုံးသွေးကြော ပြဿနာရှိသူတွေ၊ သွေးတိုးသူတွေကတော့ ပညာရှင်များနဲ့ အရင်တိုင်ပင်သင့်ပါတယ်။

▪️ အခုမှ ရေခဲဖြင့်စချိုးမယ်ဆိုရင် အရမ်းမအေးတဲ့ရေဖြင့် စတင်ချိုးကြည့်သင့်ပြီး ခန္ဓာကိုယ်က အပူချိန်ပြောင်းလဲမှုကို ကျင့်သားရစေပါတယ်။

#Source: DoctorNDTV

#World_Health
Published 13 October 2024
▪️ လူသားတွေရဲ့ အရေးကြီးဆုံး အင်္ဂါတွေထဲမှာ မျက်လုံးအပါအဝင် ဖြစ်ပါတယ်။ လူအများစုက သူတို့ရဲ့ဘဝမှာ မျက်လုံးပြဿနာ တစ်ခုခု ခံစားရတတ်ပါတယ်။
စောစီးစွာ ပြဿနာကို သိရှိရင် ရောဂါအများစုက ကာကွယ်နိုင်ပါတယ်။

▪️ ဘယ်လိုကြောင့်ဖြစ်တဲ့ မျက်လုံးပြဿနာပဲဖြစ်ဖြစ် နေ့စဉ်နေထိုင်မှုဘဝမှာ ထိခိုက်လာနိုင်ပါတယ်။

▪️ ဒါကြောင့် မျက်လုံးပြဿနာများ ဖြစ်ရတဲ့ အကြောင်းအရင်းတွေနဲ့ ဖြေရှင်းနည်းများကို သိရှိထားသင့်ပါတယ်။

(၁) မျက်လုံးခြောက်ခြင်း
▪️ မျက်လုံးတွေကနေ မျက်ရည် လုံလောက်စွာ မထုတ်လုပ်နိုင်ခြင်း၊ ခန်းခြောက်မြန်ခြင်းတို့ကြောင့် ဖြစ်တာဖြစ်ပြီး အထူးသဖြင့် သက်ကြီးရွယ်အိုတွေနဲ့ ကွန်ပျူတာ၊ ဖုန်းတွေကို ကြာရှည်စွာ ကြည့်ရှုသူတွေမှာ ဖြစ်တတ်ပါတယ်။

▪️ မျက်စဉ်းခတ်ခြင်း၊ ရေများများသောက်ခြင်း၊ ကွန်ပျူတာအသုံးပြုပါက ၂၀-၂၀-၂၀ စည်းမျဉ်းအတိုင်း လုပ်ဆောင်ခြင်းတို့ ပြုလုပ်သင့်ပါတယ်။

(၂) မျက်စိနာခြင်း
▪️ မျက်ခွံအတွင်းသားတစ်ရှူး ရောင်ရမ်းခြင်း ဖြစ်တဲ့လက္ခဏာဖြစ်ပြီး ဘက်တီးရီးယား၊ ဗိုင်းရပ်စ်၊ အလာဂျင်တို့ကြောင့် ဖြစ်တတ်ပါတယ်။

▪️ ပဋိဇီဝမျက်စဉ်းဆေး အသုံးပြုခြင်း၊ ဓာတ်မတည့်မှု သက်သာစေတဲ့ မျက်စဉ်းဆေး အသုံးပြုခြင်းဖြင့် သက်သာနိုင်ကာ တစ်ပတ်အတွင်း သူ့အလိုလို ပျောက်ကင်းသွားတတ်ပါတယ်။

(၃) အတွင်းတိမ်
▪️ မျက်လုံးရဲ့ သဘာဝမှန်ဘီလူးမှာ တိမ်ဖြစ်ပြီး အမြင်ဝါးခြင်း ခံစားရနိုင်ပါတယ်။
များသောအားဖြင့် အသက်အရွယ်ကြောင့် ဖြစ်နိုင်သလို မျိုးဗီဇ အချက်အလက်များ၊ ဆီးချို၊ နေရောင်ထိတွေ့မှုတို့ကြောင့်လည်း ဖြစ်တတ်ပါတယ်။

▪️ နေကာမျက်မှန်တပ်ခြင်း၊ ဓာတ်တိုးဆန့်ကျင်ပစ္စည်း ကြွယ်ဝတဲ့ အစားအစာ စားခြင်းတို့ဖြင့် ကာကွယ်နိုင်သလို ခွဲစိတ်မှုလည်း ပြုလုပ်နိုင်ပါတယ်။

(၄) ရေတိမ်
▪️ မျက်လုံးမှာ ဖိအားများလာပြီး အမြင်အာရုံကြော ထိခိုက်ကာ အမြင်ကွယ်ခြင်း ဖြစ်တတ်ပါတယ်။

▪️ ဆေးညွှန်းထားတဲ့ မျက်စဉ်းဖြင့် အမြင်အာရုံကြော ထိခိုက်မှုကာကွယ်နိုင်သလို လေဆာကုသနည်း၊ ခွဲစိတ်ခြင်းတို့ဖြင့် မျက်လုံးတွင်း အရည်စီးဆင်းခြင်းကို တိုးတက်စေပြီး ဖိအားလျော့စေပါတယ်။

(၅) အဝေးမှုန်ခြင်း
▪️ အလင်းယိုင်ပြဿနာဖြစ်ပြီး အနီးကပ်အရာတွေကို ပြတ်သားစွာမြင်ပေမယ့် အဝေးကအရာတွေကို ကြည့်တဲ့အခါ ဝါးသွားတဲ့ အခြေအနေ ဖြစ်ပါတယ်။

▪️ ဒါက ကမ္ဘာပေါ်မှ လူသန်းပေါင်းများစွာ ခံစားနေရတဲ့ ပြဿနာလည်း ဖြစ်ပါတယ်။

▪️ ညွှန်ကြားထားတဲ့ မျက်မှန်တပ်ခြင်း၊ မှန်ဘီလူးကို ပုံမှန်ပြန်ဖြစ်စေတဲ့ မျက်ကပ်မှန်တပ်ခြင်းတို့ဖြင့် လက္ခဏာသက်သာစေပါတယ်။

(၆) အနီးမှုန်ခြင်း
▪️ အနီးရှိ အရာဝတ္ထုတွေကို မြင်နိုင်စွမ်း လျော့နည်းသွားတဲ့ အခြေအနေ ဖြစ်ပါတယ်။

▪️ အသက် ၄၀၊ ၅၀ ဝန်းကျင်လောက်မှာ စတင်ခံစားရနိုင်ပါတယ်။

▪️ စမ်းသပ်ညွှန်ကြားထားတဲ့ မျက်မှန်တပ်ခြင်းဖြင့် အမြင်အာရုံ ချိန်ညှိနိုင်သလို အလင်းယိုင်ခြင်းအပိုင်းကို ခွဲစိတ်ခြင်းဖြင့်လည်း ကုသနိုင်ပါတယ်။

(၇) မျက်ကြည်လွှာအတွင်းသား ချို့ယွင်းလာခြင်း
▪️ တိကျပြတ်သားတဲ့ အမြင်အာရုံ ပေးစွမ်းနိုင်တဲ့ မျက်ကြည်လွှာ အစိတ်အပိုင်းဖြစ်တဲ့ မက်ကူလာက အသက်ကြီးလာတဲ့အခါ ချို့ယွင်းလာပြီး မျက်နှာများကို မှတ်မိမြင်နိုင်ရန် ခက်ခဲလာပါတယ်။

▪️ အစိမ်းရောင်အရွက်များ၊ ငါး၊ အခွံမာသီးတို့ စားသုံးခြင်းဖြင့် ရောဂါဆိုးရွားမှု လျှော့ချနိုင်သလို ပုံမှန်စစ်ဆေးခြင်းဖြင့် စောစီးစွာ တွေ့ရှိနိုင်ပါတယ်။

#Source: DoctorNDTV

စက်ရုပ်စားဖိုမှူးများကို တရုတ်အာဏာပိုင်များက အသင့်စားအစားအသောက် ဝန်ဆောင်မှုလိုင်စင်ပေးအပ်ခဲ့ရာ ပေကျင်းမြို့မှာ မကြာခင် စက်ရုပ်စားဖိုမှူးများက လာရောက်စားသုံးသူများအတွက် အစားအစာများချက်ပြုတ်ပေးတော့မှာ ဖြစ်ပါတယ်။
#Asia_Development
Published 12 October 2024
#စက်ရုပ်စားဖိုမှူး #အစားအစာများပြင်ဆင်
#YMG #Yangon_Times #Yangon_Media_Group

#Daily_News
Published 12 October 2024

၁။ သီတင်းကျွတ်ပိတ်ရက်အတွက် အထူးရထားများ ပြေးဆွဲမည်

၂။ ‌တစ်လအတွင်း‌ ဒေါ်လာသန်း၁၀၀ကျော်တန်ဖိုးရှိ ဆန်နှင့်ဆန်ကွဲတန်ချိန် နှစ်သိန်းကျော်တင်ပို့၊ ယခုဘဏ္ဍာနှစ်အတွင်းပို့ကုန်ဝင်ငွေအများဆုံးရရှိထား

၃။ ရန်ကုန်မြို့၊ ပြည်သူ့ရင်ပြင်တွင် သီတင်းကျွတ်ပွဲတော်(၃)ရက်တိုင်တိုင် ကျင်းပမည်

၄။ မကြာမီပေကျင်းတွင် စက်ရုပ်စားဖိုမှူးများဖြင့် အစားအစာများ ပြင်ဆင်ပို့ဆောင်သွားမည်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 12 October 2024

▪️ ဖလော်ရီဒါမှာ နှစ်ပတ်အတွင်း ဒုတိယအကြိမ်မြောက် ဟာရီကိန်းမုန်တိုင်းကြီး ဝင်ရောက်ပြီးနောက်မှာတော့ ဒေသခံသန်းပေါင်းများစွာ သောကြာနေ့မှာ ပြန်လည်ထူထောင်ရေး လုပ်ငန်းများကို ခက်ခက်ခဲခဲ စတင်လုပ်ဆောင်နေပြီ ဖြစ်ပါတယ်။

▪️ မီလ်တန်နဲ့ ဟယ်လင်းမုန်တိုင်းတို့ကြောင့် ပျက်စီးကျန်ခဲ့တဲ့ အစအနတွေရှင်းလင်းကြပြီး ဓာတ်အားပြန်လည်ရရှိအောင် လုပ်ဆောင်နေကြသလို ရေဝင်ခဲ့တဲ့ အိမ်တွေမှ ရွှံ့များဖယ်ထုတ်နေကြပါတယ်။

▪️ မီလ်တန်မုန်တိုင်းကြောင့် ဖလော်ရီဒါ အရှေ့ဘက် ကမ်းခြေမှာ လေဆင်နှာမောင်းများ ဖြစ်ပေါ်ပြီး နေရာအနှံ့ ရေလျှံမှုများ ဖြစ်ပွားခဲ့ပြီး အနည်းဆုံး ၁၆ ဦးသေဆုံးကာ သန်းပေါင်းများစွာ လျှပ်စစ်ဓာတ်အား ပြတ်တောက်နေရပါတယ်။

▪️ ဟယ်လင်းဟာရီကိန်းက ပင်လယ်ကွေ့ကမ်းခြေသို့ ပြီးခဲ့တဲ့လကုန်က ဝင်ရောက်ခဲ့ပြီးနောက် အမေရိကန် အရှေ့တောင်ပိုင်းသို့ ဝင်ရောက်တိုက်ခတ်ခဲ့သဖြင့် ထိုနေရာအများအပြားမှာ အပျက်အစီးများ ရှင်းလင်းနေဆဲဖြစ်ပြီး ပြုပြင်နေကြပါတယ်။

▪️ ယခုသီတင်းပတ် ၇၂ နာရီအတွင်းမှာပဲ ဖလော်ရီဒါ ပို့ဆောင်ရေးဌာနက တမ်ပါပင်လယ်အော်အဝနား ပီနယ်လက်စ်ကောင်တီ ကျွန်းများရှိ ၄ သောင်းကုဗကိုက်ကျော် နေရာအကျယ်အဝန်းကနေ အပျက်အစီးတွေကို ဖယ်ရှားခဲ့ကြောင်း အုပ်ချုပ်ရေးမှူး ရွန်ဒီဆန်းတစ်က ပြောသွားပါတယ်။

▪️ အလုပ်သမားများက ပျက်ကျနေတဲ့ ဓာတ်ကြိုးတွေနဲ့ ဖုန်းတာဝါတိုင်တွေကို ပြုပြင်နေကြပြီး အစိုးရဌာန အဖွဲ့ဝင်များနဲ့ ဒေသခံများက လွှစက်များဖြင့် လဲကျနေတဲ့ သစ်ပင်များကို ဖြတ်တောက်နေကာ မြို့တလျှောက် လျှံဝင်နေတဲ့ ရေတွေကို သုတ်သင်နေကြပါတယ်။

▪️ ဖလော်ရီဒါမှာ ဓာတ်အားပြတ်တောက်တဲ့ အိမ်နဲ့ လုပ်ငန်းအရေအတွက် လျော့ကျလာပြီး အချို့ကတော့ ဓာတ်အားပြန်ရရန် စောင့်ဆိုင်းနေဆဲ ဖြစ်ပါတယ်။

▪️ ဖလော်ရီဒါကောင်တီ ၂၃ ခုမှာ နိုင်ငံတော် ကာကွယ်ရေးအဖွဲ့ဝင်ပေါင်း ၆၅၀၀ ကျော် လှုပ်ရှားနေပါတယ်။

▪️ သမ္မတဂျိုးဘိုင်ဒင်က အပျက်အစီးလေ့လာဖို့အတွက် တနင်္ဂနွေနေ့မှာ ဖလော်ရီဒါသို့ လာရောက်မှာ ဖြစ်တယ်လို့ အိမ်ဖြူတော်က ပြောပါတယ်။

▪️ ထိခိုက်တဲ့ နေရာတွေမှာ ထူထောင်ရေးလုပ်ငန်းများ ကြာရှည်စွာ ပြုလုပ်ရဦးမှာဖြစ်ပြီး အိမ်အတော်များများမှာ ရေဆိုးစနစ်တွေ ရေသန့်စနစ်တွေ ပျက်စီးထားတာကြောင့် လူနေလို့ရမှာ မဟုတ်ဘူးလို့ မြို့တော်ဝန် အက်ဒရီယန်ပက်ထရီလာက ABC News ကို ပြောကြားသွားပါတယ်။

▪️ ဗုဒ္ဓဟူးနေ့ညနေပိုင်း မီလ်တန်စဝင်လာပြီးနောက် လူပေါင်း ၁၂၀၀ နီးပါးကို ကယ်ဆယ်ထားနိုင်တယ်လို့ ဒီဆန်းတစ်ရုံးမှ ပြောပါတယ်။

#Source: Reuters

#World_Health
Published 13 October 2024

▪️ အမေရိကန် FDA မှ မကြာသေးမီက အသိအမှတ်ပြုလိုက်တဲ့ ဆေးပေါင်းစပ်မှုအသစ်ဟာ ယခင်ဆေးတွေထက် အဆုတ်ကင်ဆာအတွက် ၄၀ ရာခိုင်နှုန်းကျော် ပိုမိုထိရောက်မှုရှိကြောင်း ယန်ဆန်ဆေးကုမ္ပဏီကြီးမှ ထောက်ပံ့တဲ့ စမ်းသပ်မှုကြီးမှာ တွေ့ရှိခဲ့ကြပါတယ်။

▪️ အဆုတ်ကင်ဆာကြောင့် တစ်နှစ်ကို လူပေါင်း ၁.၈ သန်းခန့် သေဆုံးနေရပါတယ်။

▪️ အသက်ရှင်နှုန်း အလွန်နည်းပါးပြီး အထူးသဖြင့် ရောဂါနောက်ပိုင်းအဆင့်ရောက်တဲ့ လူနာတွေမှာ ပိုဆိုးပါတယ်။

▪️ ထိုအခြေအနေရောက်နေတဲ့ လူနာတွေကို အေမီဗန်တာမက်နဲ့ လေဇာတီနစ်တို့ကို ပေါင်းစပ်ပေးခဲ့ရာ ၂၃.၇ လကြာတဲ့တိုင်အောင် အသက်ဆက်ရှင်ခဲ့ပြီး ရောဂါဆက်လက် မဆိုးရွားလာခဲ့ပါဘူး။

▪️ သာမန်ကုသမှုဖြစ်တဲ့ အိုဆီမာတီနစ်နဲ့ ကုသတဲ့လူနာတွေကတော့ ပျမ်းမျှ ၁၆.၆ လသာ အသက်ရှင်ခဲ့ပါတယ်။

▪️ ယနေ့လို ကင်ဆာသုတေသန အလွန်ထွန်းကားတဲ့ခေတ်မှာ ပိုမိုကောင်းမွန်တဲ့ ကုသနည်းတွေ ထွက်ပေါ်လာတာလည်း ဖြစ်ပါတယ်။

▪️ ယခု ဆေးပေါင်းစပ်နည်းအသစ်က အိုဆီမာတီနစ်ထက် ကင်ဆာကို ပိုမိုကြာရှည်စွာ ထိန်းသိမ်းနိုင်တာ တွေ့ရတာ သိပ်ကောင်းပါတယ်လို့ ယူကေကောလိပ်ဆေးရုံတက္ကသိုလ်မှ စမ်းသပ်ရေးအကြီးအကဲ မာတင်ဖော်စတာက ပြောသွားပါတယ်။

▪️ အဆုတ်ကင်ဆာဖြစ်စေတဲ့ ဇီဝဖြစ်စဉ်အကြောင်း နားလည်လာခြင်းက ကုသနည်းတွေ ပေါ်ထွက်လာစေတယ်လို့ ရှင်းပြပါတယ်။

▪️ အဆုတ်ကင်ဆာလူနာတွေမှာ အခြားကင်ဆာတွေထက် အသက်ရှင်မှုနှုန်း အလွန်နည်းနေပြီး ဒီလိုစမ်းသပ်မှုရလဒ်မျိုး တွေ့ရတာဟာ တိုးတက်မှုတစ်ခုဖြစ်တယ်လို့ ကင်ဆာအတိုင်ပင်ခံ ရာဖေးလ်ကာလီဖာနိုက ပြောပါတယ်။

▪️ ကင်ဆာသုတေသန ထွန်းကားတဲ့ခေတ်မှာ ကင်ဆာအကြောင်း ပိုမိုသိရှိလာခြင်းဖြင့် လူနာတွေ အသက်ရှည်ရှည်ဖြင့် ကင်ဆာကင်းဝေးစွာ နေထိုင်ရမှာဖြစ်တယ်လို့ ယူကေကင်ဆာသုတေသနမှ အန်နာကင်ဆယ်လာက ပြောသွားပါတယ်။

#Source: New York Post