ရန်ကုန်ဈေးကွက်တွင် ကြက်သွန်နီတစ်ပိဿာကို ကျပ် ၁၂၀၀မှ ၂၅၀၀ ကျပ်၀န်းကျင်ရှိပြီး မိုးကြက်သွန်နီအသစ်တွေ စတင်ဝင်ရောက်တဲ့ ဒီဇင်ဘာလပိုင်းက စတင်ပြီး ဈေးတဖြည်းဖြည်းကျဆင်းခဲ့ရာ ပြည်ပ၀ယ်လိုအား အေးတဲ့အပြင် ပြည်တွင်းဝယ်လိုအားပါ မရှိတဲ့အတွက် ဈေးဆက်လက်ကျဆင်းလာတာ ဖြစ်တယ်လို့ ဆိုပါတယ်။
#Local_News
Published_ 16 January 2024
#ရန်ကုန်ဈေးကွက် #ကြက်သွန်နီစျေးကျဆင်း
#YMG/LW #Yangon_Times

'လွတ်လပ်ရေးနေ့မှာ မွေးလို့ငြိမ်းချမ်းဦးလို့နာမည်ပေးထားပါတယ်၊ ဆင်လေးက ငြိမ်းစောလေးရဲ့သားဦးလေးဖြစ်သလို ဝါးနက်အပန်း ဖြေဆင်စခန်းရဲ့သားဦးလည်းဖြစ်ပါတယ်။ ဆင်တွေကမွေးပြီးအထီးအမခွဲခြားရခက်ပေမယ့်သူကတော့ မွေးပြီးနာရီပိုင်းမှာပဲ အထီးမှန်းသိသိသာသာပေါ်လွင်ထင်ရှားလာတယ်၊ အရပ်အမောင်းကောင်းတယ်၊နိုမှီတယ်၊ ကြန်အင်လက္ခဏာကလည်းနှာမောင်းရှည်တယ်၊ သွယ်တယ်၊ လက်ဆံလက်ဆံတုတ်တယ်အမြှီးသွယ်တယ်၊ရှည်တယ်၊‌ နောက်အမြှီးတံခါးဖွင့်ပါ၊ ဉီး‌ခေါင်းဘက်နဲ့အမြှီးဘက်ကို ရှေ့‌နောက်အမြှီး ပေါက်ပါတယ်၊ ခြေသည်းအနေနဲ့ရှေ့လက်တစ်ဖက်ငါးချောင်းစီပါပါတယ်၊ နောက်ခြေနှစ်ဖက်မှာငါးချောင်းစီပါပါတယ်၊ ဒါလေးတွေကလှတဲ့လက္ခဏာလေးတွေပါ၊ ကျန်းမာရေးလည်းကောင်းမွန်ပါတယ်'
#Local_News
Published_ 16 January 2024
#ဝါးနက်ဆင်စခန်း #ထမဆုံးဆင်လေးငြိမ်းချမ်းဦးမွေးဖွား
#YMG/ NN #Yangon_Times

#Local_News
Published 16 January 2024

MG EV ကား မီးလောင်ကျွမ်းမှု ကူးစက်မီးကြောင့်ဖြစ်ကြောင်း MG Myanmar က ယနေ့ ထုတ်ပြန်လိုက်သည်။

ဖြစ်စဉ်မှာ၂၀၂၄ ခုနှစ် ဇန်နဝါရီလ ၁၂ ရက်နေ့ မနက်ပိုင်း ၉နာရီကျော်ဝန်းကျင်ခန့်တွင် ကူးစက်မီးလောင်မှု ဖြစ်စဉ်အတွင်း MG Myanmar မှ တရားဝင်တင်သွင်းရောင်းချပေးခဲ့သော MG EV ကားတစ်စီးသည် တဆင့်ကူးစက်မီး လောင်ကျွမ်းခံခဲ့ကြောင်း၊ အဆိုပါ မီးလောင်ကျွမ်းမူ ဖြစ်စဉ်အတွင်း MG EV ပိုင်ရှင်သည် MG Myanmar ၏ သက်ဆိုင်ရာဝန်ထမ်းထံသို့ အချိန်နှင့်တစ်ပြေးညီ ဆက်သွယ်အကြောင်းကြားခဲ့ရာ သတင်းရရှိသည်နှင့်တပြိုင်နက် မီးလောင်မှုဖြစ်ပွားရာနေရာသို့ သွားရောက်၍ မီးကူးစက်လောင်ကျွမ်းခံရသော MG EV ကား၏ ဘေးအန္တရာယ်ကင်းရှင်းမှုဆိုင်ရာ စစ်ဆေးမှုများကို ပြုလုပ်ပေးပြီး အခြားလိုအပ်သည်များကိုလည်း ပံ့ပိုးကူညီဆောင်ရွက်ပေးနိုင်ခဲ့ကြောင်းဆိုသည်။

အဆိုပါ MG EV ယာဉ်ပိုင်ရှင်၏အတည်ပြုချက်နှင့် မြေပြင်စစ်ဆေးမူအရ MG EV ကား လောင်ကျွမ်းခံရမှုသည် ကူးစက်မီးကြောင့်သာဖြစ်ပြီး MG EV ကား၏ အားသွင်းစနစ်နှင့် နည်းပညာချို့ယွင်းချက်တို့ကြောင့် လောင်ကျွမ်းခဲ့ခြင်းမဟုတ်ကြောင်း MG Myanmar မှ ဆိုသည်။

ဖြစ်စဉ်နှင့်ပတ်သက်၍ MG EV ကြောင့် မီးလောင်ကျွမ်းသည်ဟူ၍ လူမှုကွန်ယက် Social Media များတွင် မဟုတ်မမှန်သတင်းများရေးသားပြောဆိုနေကြသည်မှာ (လုံးဝ) မှန်ကန်မှုမရှိပါကြောင်း အသိပေးပြောကြားလိုသည်ဟု MG Myanmar မှ ထုတ်ပြန်ထားသည်။

#Local_News #MG_EVကား #မီးလောင်ကျွမ်းမှုဖြစ် #MG_Myanmarထုတ်ပြန် #YMG /NN #Yangon-Times

'ဇန်နဝါရီလအတွက် ဆန်အရည်အသွေးပေါ်မူတည်ပြီး အနည်းဆုံးဧည့်မထတစ်အိတ်ကို ကျပ်၇၀,၀၀၀ က‌နေ ကျပ်၇၈,၀၀၀အထိ ဧရာမင်း၊ ဧရာပဒေသာ၊ ရက်၉၀၊ ပခန်း၊ အညာသား၊ အထူးဧည့်မထအုပ်စု‌တွေကိုမူ ဆန်အရည်အသွေးပေါ်မူတည်ပြီး ဆန်တစ်အိတ်ကို အနည်းဆုံးကျပ်၈၀၀၀၀က ၁၀၀,၀၀၀ထိနဲ့ ရွှေဘိုပေါ်ဆန်းဆန်တစ်အိတ်ကို ကျပ် ၁၂၅,၀၀၀က ၁၃၅,၀၀၀ကျပ်အထိ သတ်မှတ်ထားပြီး ဧရာဝတီပေါ်ဆန်းအုပ်စုကတော့ အနည်းဆုံးကျပ်၉၀,၀၀၀က‌ နေအများဆုံးကျပ်၁၀၀,၀၀၀အထိသတ်မှတ်ထားပါတယ်။'
#Local_News
Published_ 16 January 2024
#ဆန်အရည်အသွေးပေါ်မူတည် #ဇန်နဝါရီအတွင်းရောင်းချရမည်
#YMG/ NN #Yangon_Times

"အစ်မတော်မြနန်းနွယ်ရှေ့ မွေးနေ့ကိတ်ခတ္တကပ်လှူနိုင်ပေမယ့် မွေးနေ့ကိတ်ခွဲခွင့်မပြုထားဘူး။ ဗိုလ်တထောင် စေတီတော်ရင်ပြင်တော်ပေါ်နဲ့အစ်မတော်မြနန်းနွယ်ရဲ့ကျောင်းဆောင်အတွင်း သီဆိုတီးမှုတ်ကခုန်တာတွေလုံးဝခွင့်မပြုထားဘူး"ဗိုလ်တထောင်စေတီတော်ဂေါပကအဖွဲ့
#Local_News
Published_ 16 January 2024
#အစ်မတော်မြနန်းနွယ် #ဗိုလ်တထောင်စေတီတော်
#tthl #Yangon_Times

#Local_News
Published 16 January 2024

၂၀၂၄ ခုနှစ် နိုင်ငံတကာ အိမ်မွေးတိရစ္ဆာန် အလှအပရေးရာအသိအမှတ်ပြု လက်မှတ်ပေးအပ်ပွဲနှင့် အိမ်မွေးတိရစ္ဆာန်ပွဲတော် (International Grooming Certification & Pet Fair Myanmar 2024) ကို ရန်ကုန်တိုင်းဒေသကြီး၊ သုဝဏ္ဏ မြို့နယ်၊ Zawana Stadium ၌ ဖေဖေါ်ဝါရီ ၃ ရက်နှင့် ၄ ရက်တွင် နံနက် ၁၀ နာရီမှ ညနေ ၆ နာရီအထိ ကျင်းပသွား မည်ဖြစ်ကြောင်း ပွဲတော်ကျင်းပရေး ကော်မတီအဖွဲ့ထံက သိရသည်။

အဆိုပါ အိမ်မွေးတိရစ္ဆာန် အလှအပရေးရာအသိအမှတ်ပြုလက်မှတ်ပေးအပ်ပွဲနှင့်အိမ်မွေး တိရစ္ဆာန်ပွဲတော်ကို မြန်မာနိုင်ငံတွင် ပထမဆုံးပြုလုပ်ခြင်းဖြစ်ကြောင်း သိရသည်။

ပွဲတော်အတွင်းခွေးနှင့်ကြောင်များသာ ခေါ်ယူလာခွင့်ရှိပြီး ကိုက်တတ်သော၊ ရန်မူတတ်သော ခွေး၊ ကြောင်လေး များကို ခေါ်ယူလာခြင်းမပြုရန် မေတ္တာရပ်ခံထားကာ အရေးပေါ်အခြေအနေဖြစ်ပေါ်လာပါက emergency vet corner ထားရှိ၍ အရေးပေါ်ကုသနိုင်ရန်စီစဉ်ပေးထားမည်ဖြစ်ကြောင်း သိရသည်။

International Grooming Certification ဝင်ရောက်ဖြေဆိုသူ Groomer များအနေဖြင့် စာမေးပွဲဖြေဆိုမည့် ခေါင်းစဉ် များကို International Groo-ming Certification & Pet Fair Myanmar Facebook Page တွင် ဝင်ရောက်လေ့လာနိုင်သည်။

အဆိုပါပွဲတော်ကို မြန်မာနိုင်ငံ၌ ပထမဆုံးအကြိမ် SuperGroom International Grooming Certification ပေးအပ်မည့်ပွဲဖြစ်ပြီး Malaysia နိုင်ငံအခြေစိုက် SuperGroom အဖွဲ့အစည်းအနေဖြင့် နိုင်ငံတကာ၌ ၁၂ ကြိမ်မြောက် ကျင်းပခြင်းဖြစ်သည်။

Main Orga-nizer ဖြစ်သည့် Mandalay Pet Shop, Hotel, Spa & Clinic နှင့် Co-organizer အဖြစ် ဘိုမ, Bo Ma Pet Grooming and Spa တို့မှ ပူးပေါင်းစီစဉ်မှု၊ SuperGroom အဖွဲ့အစည်း ကူညီပံ့ပိုးမှုဖြင့် ကျင်းပသွားမည်ဖြစ်ကြောင်း သိရသည်။

#Local_News #နိုင်ငံတကာအိမ်မွေးတိရစ္ဆာန်ပွဲတော်ကျင်းပ #YMG/LW #Yangon_Times

#Local_News
Published 16 January 2024

ဂျပန်နိုင်ငံရှိစက်ရုံနှင့် အလုပ်ရုံများတွင် အလုပ်လုပ်ကိုင်ရန်အတွက် မြန်မာလုပ်သား ၅၉၀ကျော်ကို ထပ်မံခေါ်ယူထားကြောင်း တိုကျိုမြို့ရှိဂျပန်နိုင်ငံဆိုင်ရာ မြန်မာသံရုံးက အသိပေး ထုတ်ပြန်ထားသည်။

မြန်မာသံရုံး၊ တိုကျိုမြို့မှ ဇန်နဝါရီလ (၁)ရက်မှ ဇန်နဝါရီလ (၁၅)ရက်အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့သည့် အလုပ်ကမ်းလှမ်းစာ (၁၉၀) ခုနှင့် ပတ်သက်သည့် အချက်အလက်များအား အသိပေး ထုတ်ပြန်ထားခြင်းဖြစ်သည်။

ဂျပန်ကုမ္ပဏီများက ဂျပန်နိုင်ငံဆိုင်ရာ မြန်မာသံရုံးမှတဆင့်ကမ်းလှမ်းလာသည့် အလုပ်ကမ်းလှမ်းစာ(၁၉၀) ခုအတွက် အလုပ်သမား (၅၉၂) ဦး ခေါ်ယူထားခြင်းဖြစ်ကြောင်း သိရသည်။

မြန်မာသံရုံး အနေဖြင့် နိုင်ငံခြားရေး ဝန်ကြီးဌာနမှတဆင့်ပေးပို့လာသည့် အလုပ်ကမ်းလှမ်းစာ ( Demand Letter ) များကို စိစစ်ဆောင်ရွက်ပေးလျက်ရှိကြောင်း သိရသည်။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေး ကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင် တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများစိစစ်ပြီး စိစစ်တွေ့ရှိချက်များ၊ သဘောထားမှတ်ချက်များကို နိုင်ငံခြားရေးဝန်ကြီးဌာနမှတဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရသည်။

#Local_News မြန်မာလုပ်သား ၅၉၀ကျော်ထပ်မံခေါ်ယူ #YMG/LW #Yangon_Times

#Local_News
Published_ 16 January 2024

အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင်သည် ဇန်နဝါရီ ၁၅ ရက်တွင် ဘရူနိုင်းသံရုံး၌ ကျင်းပခဲ့သည့် (၁၂၂) ကြိမ်မြောက် အာဆီယံ-နယူးဒေလီ ကော်မတီ (ASEAN New Delhi Committee - ANDC) အစည်းအဝေးသို့ တက်ရောက်ခဲ့ပြီး မြန်မာ-အိန္ဒိယနှစ်နိုင်ငံ နိုင်ငံရေး၊ စီးပွားရေး၊ လုံခြုံရေး ပူးပေါင်းဆောင်ရွက်မှုများကို ဆွေးနွေးခဲ့ကြောင်း သိရပါတယ်။

အစည်းအဝေး၌ ANDC အလှည့်ကျဥက္ကဋ္ဌ ဘရူနိုင်းသံအမတ်ကြီး H.E. Mr. Dato Alaihuddin Mohd Taha က တာဝန်ယူခဲ့သည့်ကာလအတွင်း ANDC ၏ ဆောင်ရွက်ချက်များကို ရှင်းလင်းပြောကြားခဲ့ပါတယ်။

ထို့နောက်အာဆီယံသံအမတ်ကြီးများမှ အာဆီယံ-နယူးဒေလီ ကော်မတီအနေဖြင့် အိန္ဒိယအစိုးရနှင့် ပူးပေါင်းဆောင်ရွက်မှု တိုးမြှင့်နိုင်ရေး၊ အာဆီယံနိုင်ငံများနှင့် အိန္ဒိယနိုင်ငံ အကြား စီးပွားဆက်သွယ်မှု လွယ်ကူချောမွေစေရေးတို့ကို ညှိနှိုင်းဆွေးနွေး ခဲ့ကြပါတယ်။

အစည်းအဝေးသို့ တက်ရောက်လာကြတဲ့ အာဆီယံသံအမတ်ကြီးများမှ ၂၀၂၃ ခုနှစ်၊ ဒုတိယ နှစ်ဝက်ကာလအတွက် ANDC ဥက္ကဋ္ဌ တာဝန်ထမ်းဆောင်ခဲ့သည့် ဘရူနိုင်း သံအမတ်ကြီးအား ကျေးဇူးတင် ဂုဏ်ပြုစကားပြောကြားခဲ့ပြီး ၂၀၂၄ ခုနှစ်၊ ပထမနှစ်ဝက် ကာလအတွက် ANDC အလှည့်ကျ ဥက္ကဋ္ဌ တာဝန်ယူဆောင်ရွက်မည့် ကမ္ဘောဒီးယား သံအမတ်ကြီး H.E. Mr. Koy Kuong မှ တာဝန်ကို လွှဲပြောင်းလက်ခံခဲ့ပါတယ်။

မြန်မာသံအမတ်ကြီးက မြန်မာ-အိန္ဒိယ နှစ်နိုင်ငံ နိုင်ငံခြားရေးဝန်ကြီးဌာနတို့ အကြား မူဝါဒရေးရာ ညှိနှိုင်းဆွေးနွေးပွဲ ကျင်းပခဲ့ခြင်း၊ မြန်မာ-အိန္ဒိယ နှစ်နိုင်ငံအကြား အပြန် အလှန် သွားရောက်ခဲ့သည့် ခရီးစဉ်များနှင့် နှစ်နိုင်ငံ နိုင်ငံရေး၊ စီးပွားရေး၊ လုံခြုံရေး ပူးပေါင်းဆောင်ရွက်မှု အခြေအနေများအား ဆွေးနွေးခဲ့ပါတယ်။

#Local_News #အာဆီယံ-နယူးဒေလီ #မြန်မာသံအမတ်ကြီးတက်ရောက် #Ymg_mnn #Yangon_Media_Group

#World_News
Published 16 January 2024

မြောက်ကိုရီးယား ခေါင်းဆောင် ကင်မ်ဂျုံအန်းက တောင်ကိုရီးယားကို အဓိကရန်သူအဖြစ် အသေအချာသတ်မှတ်နိုင်ဖို့ ဖွဲ့စည်းပုံအခြေခံဥပဒေ ပြင်ဆင်ချက်တစ်ရပ်ကို တနင်္လာနေ့က တောင်းဆိုလိုက်ပြီး မြောက်ကိုရီးယားက စစ်ပွဲဖြစ်လာအောင် ဖန်တီးနေတာမဟုတ်ပေမယ့် အဲဒီလိုပြောလိုက်လို့ စစ်ပွဲကို ရှောင်ရှားဖို့လည်း မရွယ်ရည်ဘူးလို့ သတိပေးလိုက်ကြောင်း KCNA သတင်းဌာနက အင်္ဂါနေ့မှာ ဖော်ပြလိုက်ပါတယ်။

မြောက်ကိုရီးယား ပါလီမန်အစည်းအဝေးမှာ မိန့်ခွန်းပြောကြားရာ တောင်ကိုရီးယားနဲ့ ပေါင်းစည်းရေးက မဖြစ်နိုင်တော့ကြောင်း၊ တောင်ကိုရီးယားက အစိုးရအုပ်ချုပ်ရေး ပြိုလဲစေရန်နဲ့ လက်ဝါးကြီးအုပ် ပေါင်းစည်းရန် ကြိုးပမ်းနေတယ်လို့ စွပ်စွဲလိုက်ပါတယ်။

နှစ်နိုင်ငံ ပေါင်းစည်းရေးနဲ့ ခရီးသွားကဏ္ဍတို့နဲ့ ပတ်သက်နေတဲ့ အဖွဲ့အစည်း ၃ ခုကို ရုပ်သိမ်းသွားမယ်လို့ နိုင်ငံပိုင်မီဒီယာက ဖော်ပြပါတယ်။

မြောက်ကိုရီးယားမှ ဒုံးကျည်စမ်းသပ်မှု အမြောက်အများ ပြုလုပ်နေပြီး တောင်ကိုရီးယားနဲ့ ပတ်သက်လို့ ဆက်ဆံရေးအခြေအနေ ပြောင်းလဲရန်နဲ့ ဆယ်စုနှစ်တွေတိုင်အောင် တည်ရှိနေခဲ့တဲ့ မူဝါဒပိုင်းတွေကို မြောက်ကိုရီးယားက ချိုးဖျက်ဖို့ ကြိုးပမ်းနေတာတွေကြောင့် ကိုရီးယားကျွန်းဆွယ်မှာ တင်းမာမှုများ မြင့်တက်နေချိန်မှာ ကင်မ်ဂျုံအန်းက ယခုလို ပြောကြားလိုက်တာ ဖြစ်ပါတယ်။

တောင်ကိုရီးယားနဲ့ ဆက်ဆံရေးမှာ နိုင်ငံခြားရေးဝန်ကြီးဌာနက ဆက်လက်တာဝန်ယူသွားဖွယ်ရှိပြီး အနာဂတ်မှာ ဖြစ်လာနိုင်တဲ့ စစ်ပွဲမှာ တောင်ကိုရီးယားအပေါ် နျူကလီးယားလက်နက်များ အသုံးပြုခြင်းကို အကျိုးသင့်ညှိနှိုင်းပေးသွားနိုင်တယ်လို့ ဆန်းစစ်လေ့လာသူများက ဆိုလိုက်ပါတယ်။

အခြေခံဥပဒေထဲမှာ တောင်ကိုရီးယားကို နံပါတ် ၁ ရန်သူလို့ သတ်မှတ်ရန် တောင်းဆိုထားကာ စစ်ပွဲဖြစ်ပွားပါက တောင်ကိုရီးယားဘက်က အကျအဆုံးများနိုင်ပြီး အမေရိကန်အတွက် ဆုံးရှုံးမှုအလွန်များစေလိမ့်မယ်လို့ KCNA မှာ ဖော်ပြထားပါတယ်။

ကိုရီးယားကျွန်းဆွယ်မှာ စစ်ပွဲဖြစ်ပွားပါက ဖွဲ့စည်းပုံအခြေခံဥပဒေဟာ တောင်ကိုရီးယားကို ပြန်လည်သိမ်းပိုက်ခြင်း၊ မြောက်ကိုရီးယားဘက်သို့ ပေါင်းစည်းခြင်းလို့သာ သတ်မှတ်သင့်တယ်လို့ ကင်မ်ဂျုံအန်းက ဆိုပါတယ်။

အမေရိကန်အခြေစိုက် ၃၈ မြောက်စီမံကိန်းအတွက် အစီရင်ခံစာမှာ ကိုရီးယားကျွန်းဆွယ်ရဲ့ လက်ရှိအခြေအနေက ၁၉၅၀ ဇွန်လက အခြေအနေတွေထက် ပိုပြီးအန္တရာယ်များနေတယ်လို့ အမေရိကန် နိုင်ငံခြားရေးဝန်ကြီးဌာနမှ အရာရှိဟောင်း ရောဘတ်ကာလင်နဲ့ နျူကလီးယား သိပ္ပံပညာရှင် ဆစ်ဖရိုင်းဟက်ကာတို့က ပြောကြားလိုက်ပါတယ်။

ကင်မ်ဂျုံအန်းက ၁၉၅၀ က သူ့အဘိုးလိုပဲ စစ်ပွဲဖြစ်လာနိုင်တဲ့ ဗျူဟာမြောက်ဆုံးဖြတ်ချက်တွေ ချမှတ်လိုက်ကြောင်း၊ ဘယ်အချိန်မှာ ထဖြစ်မလဲဆိုတာ မသိရကြောင်း၊ အမေရိကန် တောင်ကိုရီးယား ဂျပန်တို့မှာ မြောက်ကိုရီးယားရန်စတာနဲ့ ပတ်သက်ပြီး သာမန်သတိပေးချက်တွေထက် စစ်ဖြစ်လာနိုင်တဲ့ အန္တရာယ်က ကျော်လွန်နေပြီဖြစ်ကြောင်း ဖော်ပြထားကြပါတယ်။

အချို့လေ့လာသူတွေကတော့ အဆိုပါ ပြောင်းလဲမှုတွေဟာ လက်တွေ့အမှန်တရားကိုသာ ဖော်ပြနေပြီး ကိုရီးယားနှစ်နိုင်ငံ ဆက်ဆံရေးပြန်လည်သင့်မြတ်ရန် အထောက်အကူ ဖြစ်နိုင်တယ်လို့ ဆိုနေကြပါတယ်။

#World_News #တောင်ကိုရီးယားကိုနိုင်ငံ၏အဓိကရန်သူ #ဖွဲ့စည်းပုံအခြေခံဥပဒေ #Source: Reuters

#Local_News
Published_ 16 January 2024

မလေးရှားနိုင်ငံ တရားသူကြီးချုပ်၏ ဖိတ်ကြားချက်အရ ကွာလာလမ်ပူမြို့ မြန်မာသံရုံး၊ သံအမတ်ကြီး ဦးအောင်စိုးဝင်းသည် မလေးရှားနိုင်ငံ၊ ပူထရာဂျာယာရှိ Putrajaya International Convention Center ၌ ဇန်နဝါရီ ၁၅ရက်တွင် ကျင်းပပြုလုပ်တဲ့ မလေးရှားတရားစီရင်ရေးနှစ် ၂၀၂၄ ဖွင့်လှစ်ပွဲအခမ်းအနား သို့ အာဆီယံသံအမတ်ကြီးများ နှင့်အတူ တက်ရောက်ခဲ့ပါတယ်။

အခမ်းအနားတွင် မလေးရှားနိုင်ငံ ရှေ့နေများကောင်စီဥက္ကဋ္ဌ Datuk Ahmad Terrirudin Mohd Salleh ၊ မလေးရှားနိုင်ငံရှေ့နေချုပ် Ms. Karen Cheah Yee Lyn နှင့် မလေးရှားနိုင်ငံ တရားသူကြီးချုပ် Tengku Maimun Tuan Mat တို့မှ အမှာစကား အသီးသီး ပြောကြားခဲ့ကြပါတယ်။

အခမ်းအနားသို့ မလေးရှားနိုင်ငံရှိ ပြည်ထောင်စုတရားရုံး၊ အယူခံတရားရုံးများနှင့် High Court အသီးသီးတို့မှ တရားသူကြီးများ၊ မှတ်ပုံတင်အရာရှိများနှင့် မလေးရှား အောက်လွှတ်တော်၊ လွှတ်တော်အမတ်များ တက်ရောက်ခဲ့ကြောင်း သတင်းရရှိပါတယ်။

#Local_News #မလေးရှားနိုင်ငံဆိုင်ရာမြန်မာသံအမတ်ကြီး #အခမ်းအနားတက်ရောက် #Ymg_mnn #Yangon_Media_Group

#Local_News
Published_ 16 January 2024

မန္တလေး၊ မိုးကုတ်နှင့် ပြင်ဦးလွင်မြို့များတွင် အခြေချနေထိုင်သည့် ကိုးကန့်တိုင်းရင်းသား မိသားစုများကဘုရားစေတီပုထိုးနှင့် ဘာသာရေးဆိုင်ရာ အဆောက်အအုံများကို ဖျက်ဆီးသည့်လုပ်ရပ်များအပေါ်ကန့်ကွက်ရှုတ်ချကြောင်း ဇန်နဝါရီ ၁၅ ရက်တွင် မန္တလေးမြို့ရှိ ဗုဒ္ဓဘာသာကိုးကန့်ဓမ္မာရုံမှ ထုတ်ပြန်သည်။

အဆိုပါ ထုတ်ပြန်ချက်တွင် ရှမ်းပြည်နယ်(မြောက်ပိုင်း) ကိုးကန့်ဒေသရှိ အများပြည်သူ ကြည်ညိုကိုးကွယ်နေသည့် ဗုဒ္ဓဘာသာဝင်များ အထွတ် အမြတ်ထားရာ ဘုရားစေတီအား MNDAA အဖွဲ့ ဝင်တစ်ဦးက သံတူဖြင့်ထု၍ ဖျက်ဆီးနေသည့် ဓာတ်ပုံနှင့် ဗွီဒီယိုဖိုင်များ စိတ်မချမ်းမြေ့ဖွယ်ရာတွေ့ရှိရသဖြင့် ဘုရားစေတီပုထိုးနှင့် ဘာသာရေးဆိုင်ရာအဆောက်အအုံများကို ဖျက်ဆီးသည့် လုပ်ရပ်များသည် အမျိုးဘာသာသာသနာညှိုးနွမ်းထိခိုက်စေရန် ဆောင်ရွက်ခြင်းဖြစ်၍ မန္တလေး၊ မိုးကုတ်၊ ပြင်ဦးလွင်မြို့များတွင် အခြေချနေထိုင်လျက်ရှိသော ဗုဒ္ဓဘာသာ ကိုးကန့်တိုင်းရင်းသား မိသားစုအားလုံးက ပြင်းထန်စွာကန့်ကွက်ရှုတ်ချကြောင်း ဖော်ပြထားသည်။

လောက်ကိုင်တွင် စေတီတစ်ဆူကို MNDAA အဖွဲ့ဝင်တစ်ဦးက ဖျက်ဆီးနေသော ဗီဒီယိုဖိုင်အွန်လိုင်းတွင် ပျံ့နှံ့နေမှုနှင့်ပတ်သက်၍ MNDAA အဖွဲ့က လွန်စွာတောင်းပန်ကြောင်း ဇန်နဝါရီ ၉ ရက်တွင် ထုတ်ပြန်ထားကြောင်းလည်း သိရသည်။

ရှမ်းပြည်နယ်(မြောက်ပိုင်း) လောက်ကိုင်မြို့ရှိ ဆင်ဦးကင်းတောင်ကုန်း (ပွိုင့် ၂၂၀၂)တွင် တည်ထားကိုးကွယ်သည့် စေတီတစ်ဆူအား MNDAA အဖွဲ့ဝင်တစ်ဦးက သံတူဖြင့် ရိုက်နှက်ဖြိုဖျက်နေသည့် ရုပ်သံဖိုင်လူမှုကွန်ရက်တွင် ဇန်နဝါရီ ၈ ရက်က ပျံ့နှံ့ထွက်ပေါ်လာပြီးနောက် မြန်မာနိုင်ငံအနှံ့ မြို့ကြီးများတွင် ကန့်ကွက်ဆန္ဒပြပွဲများရှိခဲ့ကြောင်း သိရသည်။

#Local_News #ဘုရားစေတီပုထိုးဖျက်ဆီး #ရှုတ်ချကြောင်းထုတ်ပြန် #Yangon_Times #Yangon_Media_Group

Published 16 January 2024

နွားတွေ ကိုယ်ဝန်မွေးဖွားတော့မလားဆိုတာကို မွေးမြူသူများ သိရှိစေနိုင်မယ့် လူလုပ်အသိဉာဏ်တု AI နည်းပညာသုံးထားတဲ့ စနစ်တစ်ခုကို Nikon ကော်ပိုရေးရှင်းက ထုတ်လုပ်လိုက်ပါတယ်။

မွေးမြူရေးခြံတွေမှာ ကင်မရာများ တပ်ဆင်ပြီး နွားတွေရဲ့ လှုပ်ရှားမှုကို စောင့်ကြည့်သုံးသပ်နေတဲ့ စနစ်ဖြစ်ပါတယ်။

ဒီနည်းပညာကို ဂျပန်မှာ ယခုလအတွင်း ရောင်းချသွားမှာဖြစ်ပြီး မွေးဖွားခါနီး နွားမတွေကို ပုံမှန်စစ်ဆေးရေး လုပ်ဖို့လိုအပ်တဲ့ မွေးမြူသူများအတွက် အလုပ်တာဝန် လျှော့ချသွားနိုင်မှာဖြစ်ကာ ပိုမိုထိရောက်မှု ရှိစေမှာ ဖြစ်ပါတယ်။

နွားအကောင်ရေ ၁၀၀ ရှိတဲ့ခြံအတွက် တစ်နှစ်ကို ဒေါ်လာ ၆၂၀၀ ခန့် ကျသင့်မှာဖြစ်ပါတယ်။

နွားပေါက်လေး မွေးခါနီးပြီဆိုရင် သက်ဆိုင်ရာ စမတ်ဖုန်းအက်ပ်လီကေးရှင်းကနေ မွေးမြူသူကို အချက်ပေးသွားမှာ ဖြစ်ပါတယ်။

ကိုယ်ဝန်ဆောင်ထားတဲ့ နွားမတစ်ကောင်ဟာ မမွေးခင် ၅ နာရီလောက်အလိုမှာ သိသိသာသာ လက္ခဏာတွေ ပြလာပါတယ်။

AI အတွက် အချက်အလက်များ စုဆောင်းရေးကို ၂၀၂၁ ကတည်းက လုပ်ဆောင်နေခဲ့ကာ ၂၀၂၃ ဖေဖော်ဝါရီကစပြီး ကူမာမိုတိုစီရင်စုပြည်နယ်ရှိ ခြံ ၄ ခြံမှာ စမ်းသပ်မှုများ ပြုလုပ်ခဲ့ပါတယ်။

နွားမတစ်ကောင် အခြားအပြုအမူမျိုး ပြုလုပ်နေတာကိုလည်း သိရှိနိုင်စေမယ့် နည်းပညာကို အနာဂတ်မှာ ပြုလုပ်သွားဖွယ်ရှိတယ်လို့ Nikon အရာရှိ ကာဇူဟီရိုဟီရာနိုက စာနယ်ဇင်းရှင်းလင်းပွဲမှာ ပြောကြားလိုက်ပါတယ်။

မွေးမြူရေးသမားတစ်ဦးဖြစ်တဲ့ ကီတာဟီဂူချီက ဒီနည်းပညာရဲ့ အသုံးဝင်မှုကို သဘောကျနေပါတယ်။

တစ်နှစ်အတွင်း နွားအကောင်ရေ ၆၀ လောက် မွေးနေရကြောင်း၊ မမွေးခင် တစ်လအလိုလောက်ကတည်းက မကြာမကြာ စစ်ဆေးနေရကြောင်း၊ ဒီနည်းပညာက အလွန်အသုံးဝင်ကြောင်း ပြောပြသွားပါတယ်။
Source: Kyodo News.
#World_Technology
#Published_ 16 January 2024
#YMG #Yangon_Times #Yangon_Media_Group #YMG_News