#Local_News
Published_ 27 May 2024

ပုဂံဒေသတွင် မြေယာဝယ်ယူမည်ဆိုပါက မှားယွင်းမှုမရှိစေရေး ဝယ်ယူမှုမပြုခင် ရှေးဟောင်းအမွေအနှစ်များ ကာကွယ်ထိန်းသိမ်းစောင့်ရှောက်လျက်ရှိသည့် ရှေးဟောင်းသုတေသနနှင့်အမျိုးသားပြတိုက်ဦးစီးဌာန၊ ပုဂံဌာနခွဲသို့ ဆက်သွယ်မေးမြန်းစုံစမ်းနိုင်ကြောင်း ဌာန၏ထုတ်ပြန်ချက်အရသိရသည်။

ပုဂံကမ္ဘာ့အမွေအနှစ်ဒေသတွင် သတ်မှတ်ထားသော မြို့ပြလူနေထိုင်ရာဧရိယာပြင်ပရှိ ယာမြေကွက်၊ မြေလွတ်မြေလပ်ကွက်များသည် လယ်ယာမြေအခြားနည်းသုံးစွဲခွင့် ထုတ်ပေးမရသော နေရာများဖြစ်သဖြင့် မြေကွက်များ၊ ယာမြေကွက်များကို ဝယ်ယူ၍ အခြားနည်းအသုံးပြုလိုသူများ၊ လူနေအဆောက်အဦများ၊ သာသနိကအဆောက်အဦများ၊ ဈေးဆိုင်ခန်းများ ဆောက်လုပ်လိုသူများ သည် လုပ်ငန်းဆောင်ရွက် ခွင့်မရနိုင်သောကြောင့် ဝယ်ယူသူနှင့် လုပ်ငန်းဆောင်ရွက်သူကာယကံရှင် များ ငွေကြေးဆိုင်ရာ ဆုံးရှုံး နစ်နာမှုရှိနိုင်သည်ဟုဆိုသည်။

ပုဂံအမွေအနှစ် ထိန်းသိမ်းစောင့်ရှောက်နိုင်ရေးအတွက် ယဉ်ကျေးမှုအမွေအနှစ်ဒေသအတွင်း လယ်ယာ မြေအခြားနည်းသုံးစွဲခွင့်နှင့် ဂရန်ထုတ်ပေးခြင်းများနှင့်ပတ်သက်၍ ရှေးဟောင်းသုတေသန နှင့် အမျိုသားပြ တိုက်ဦးစီးဌာန၌ (၈.၁၀.၂၀၂၀) ရက်နေ့ပြုလုပ်သည့် ပုဂံဒေသအမျိုးသားအဆင့် ပူးပေါင်းဆောင်ရွက်ရေး ကော်မတီ (BAGANCOM) ပဉ္စမအကြိမ်အစည်းအဝေးတွင် “ပုဂံယဉ်ကျေးမှု ဒေသအတွင်း စက်မှုစီးပွားမြေငှားဂရန် ပြောင်းလဲထုတ်ပေးခြင်း၊ လယ်ယာမြေအခြားနည်း သုံးစွဲခွင့်နှင့် ထုတ်ပေးခြင်းများ ထိန်းချုပ်ကန့်သတ်ရန်နှင့် ဇုန်ပြင်ပတွင်သာ ခွင့်ပြုရန်” ဟု ဆုံးဖြတ်ခဲ့ကြကြောင်း သိရသည်။

ထို့အပြင် ပုဂံဒေသဘက်စုံလွှမ်းခြုံသော စီမံခန့်ခွဲရေးမူဘောင်(၅.၂)တွင် “ကမ္ဘာ့အမွေအနှစ်ဇုန် အတွင်းရှိ မြို့ပြဧရိယာများသည် အပြည့်အဝကာကွယ်ရန်လိုအပ်ပြီး ဖွံ့ဖြိုးရေးလုပ်ငန်းများကို အကန့်အသတ်ဖြင့် အသုံးပြုနိုင်သည်။

အဆောက်အအုံမဆောက်ရသေးသည့် နေရာများသည် ယခုအတိုင်းထားရှိပြီး မည်သည့်ဆောက်လုပ်ရေးလုပ်ငန်းကိုမျှ ဆောက်လုပ်ခွင့်မပြုပါ။ အမွေအနှစ် ဇုန် အတွင်းရှိ မြေယာရှုခင်းဆိုင်ရာ စည်းကမ်းချက်များကို လိုက်နာရပါမည်” ဟု ဖော်ပြပါရှိကြောင်း ဖော်ပြထားသည်။

ရှေးဟောင်းသုတေသနနှင့်အမျိုးသားပြ တိုက်ဦးစီးဌာန၊ ပုဂံဌာနခွဲ၏ထုတ်ပြန်ချက်တွင် ပုဂံကမ္ဘာ့အမွေ အနှစ်ဒေသအတွင်းတွင် ယဉ်ကျေးမှုအမွေအနှစ်ဒေသများ တည်ရှိရာဒေသ (property Area) (၁၂၃၄၂. ၂၉)ဧကနှင့် ကြားခံဒေသ(Buffer Area) (၄၄၃၄၆.၂၉)ဧက စုစုပေါင်း (၅၆၆၈၉.၂၁)ဧက အတွင်းတွင် ညောင်ဦးမြို့၊ ပုဂံမြို့စသည့် မြို့(၂)မြို့နှင့် ကျေးရွာပေါင်း (၄၁)ရွာ ပါဝင်ကြောင်း၊

ယဉ်ကျေးမှုအမွေအနှစ်များတည်ရှိရာဒေသအတွင်း ရှေးဟောင်းအဆောက် အအုံပေါင်း (၃၅၉၅)ဆူ၊ ကြားခံဒေသအတွင်း (၂၄၂)ဆူ စုစုပေါင်း (၃၈၃၇)ဆူ ပုဂံဌာနခွဲမှ ထိန်းသိမ်းထားကြောင်း၊

ထိုသို့ထိန်းသိမ်းခြင်းအားဖြင့် ယဉ်ကျေးမှုအမွေအနှစ်သည်နိုင်ငံတစ်နိုင်ငံရှိ လူမျိုးတစ်မျိုးစီ တိုင်း၏ အရည်အသွေး၊ တန်ဖိုး နှင့် ဂုဏ်သိက္ခာဖြစ်သဖြင့် ကာကွယ်ထိန်းသိမ်း စောင့်ရှောက်ရမည့် သမိုင်းတန်ဖိုးကိုသိပြီး အမွေအနှစ်များကို တန်ဖိုးထားသတ်မှတ်မှသာလျှင် နိုင်ငံနှင့်လူမျိုးကို ပိုမို တန်ဖိုးထားချစ်မြတ်နိုးနိုင်မည်ဖြစ်၍ ရိုးရာယဉ်ကျေးမှုတန်ဖိုး ပျက်စီးပျောက်ကွယ်မသွားစေရန်အတွက် ယဉ်ကျေးမှုအမွေအနှစ်ကို ကာကွယ်ထိန်းသိမ်းရခြင်းဖြစ်ကြောင်းနှင့်
ရှေးဟောင်းအမွေအနှစ် အဆောက်အအုံများပြားကာ ၎င်းအဆောက်အအုံများနှင့် တွဲလျက်ရှိသော မြေယာရှုခင်း များနှင့် မြေယာထွန်ယက်စိုက်ပျိုးခြင်းဓလေ့သည်လည်း ထိန်းသိမ်းစောင့်ရှောက်ရမည့် လှပသောအမွေအနှစ်ပင် ဖြစ်ကြောင်းလည်း ထုတ်ပြန်ချက်၌ဖော်ပြပါရှိသည်။

#tthl #Yangon_Times

#Local_News
Published 27 May 2024

▪️ မုံရွာဒေသမှ ထွက်ရှိသည့် ဆီထွက်သီးနှံဈေးနှုန်းများ မြင့်တက်နေကြောင်း ပဲနှမ်းကုန်သည်များထံမှသိရသည်။

▪️ ထိုသို့မြင့်တက်ရာတွင်တစ်ပတ်တာအတွင်း နှမ်းညိုတစ်တင်းလျှင် ၉၀၀၀ကျပ်၊ နှမ်းနက်တစ်တင်းလျှင် ၇၀၀၀ကျပ်အထိမြင့်တက်နေကြောင်း သိရသည်။

▪️ "ဆီထွက်သီးနှံဈေးတွေတက်နေပါတယ်၊ မြေပဲဆံ၊ နှမ်းတွေပေါ့၊ အရောင်းအဝယ်လည်း‌သူ့ဟာနဲ့သူကောင်းတယ်၊" ဟု ပဲနှမ်းကုန်သည်တစ်ဦးက ပြောသည်။

▪️ လတ်တလောတွင် နှမ်းညို တစ်တင်း ၁၀၇၀၀၀ ကျပ်၊ နှမ်းဖြူ တစ်တင်း ၁၁၅၀၀၀ မှ ၁၂၅၀၀၀ ကျပ်၊ နှမ်းနက် တစ်တင်း ၁၁၀၀၀၀ မှ ၁၃၇၀၀၀ကျပ်ဖြစ်ကြောင်း သိရသည်။

▪️ ထို့အပြင်   မြေပဲလုံးဆံနီ တစ်ပိဿာ ၆၆၀၀မှ ၆၈၀၀ ကျပ်၊ မြေပဲလုံးဆံဖြူ တစ်ပိဿာ ၆၈၅၀ကျပ်၊ မြေပဲဆီဆံဖြူ တစ်ပိဿာ ၆၄၀၀ကျပ်ရှိနေကာ တစ်ပတ်တာအတွင်း မြေပဲလုံးဆံနီ တစ်ပိဿာ ၃၀၀ကျပ် အနည်းငယ်မြင့်တက်နေကြောင်းသိရသည်။

▪️ ပဲဆီတစ်ပိဿာ ၁၃၀၀၀ ကျပ်၊ နှမ်းဆီ တစ်ပိဿာ ၁၃၀၀၀ကျပ်ဖြစ်ပြီး ပဲဖတ် တစ်ပိဿာ ၃၁၅၀ ကျပ်၊ နှမ်းဖတ် တစ်ပိဿာ ၂၅၅၀ ကျပ်၊ နေကြာဖတ် တစ်ပိဿာ ၁၈၁၀ ကျပ်ဖြင့် ရောင်းဝယ်နေကြောင်း သိရသည်။

#YMG/NN #Yangon_Times

#Local_News
Published_ 27 May 2024

▪️ ရာသီဥတုဆိုးရွားချိန် ငါးဖမ်းရေယာဉ်များ လှိုင်းဒဏ်၊လေဒဏ်ခိုလှုံနိုင်မည့် နေရာ(၁၅)နေရာကို စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာနမှထုတ်ပြန်လိုက်ကြောင်း သိရသည်။

▪️ အဆိုပါ လှိုင်းဒဏ်လေဒဏ်ခိုလှုံနိုင်သည့်နေရာများကတော့ ရခိုင်ပြည်နယ်အတွင်း(၇)နေရာ၊ ဧရာဝတီတိုင်းအတွင်း(၃)နေရာ၊ မွန်ပြည်နယ်တွင်း(၁)နေရာနှင့်တနင်္သာရီတိုင်းအတွင်း(၄)နေရာ စုစုပေါင်း(၁၅)နေရာရှိသည်ဟုဆိုသည်။

▪️ ထုတ်ပြန်ချက်တွင် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာနသည် မြန်မာ့ပင်လယ်ငါးလုပ်ငန်းရေပြင်အတွင်း ငါးဖမ်းလုပ်ငန်းလုပ်ကိုင်ဆောင်ရွက်နေသော နိုင်ငံသားပိုင် ကမ်းဝေးငါးဖမ်းရေယာဉ်များနှင့် ကမ်းနီးငါးဖမ်းရေယာဉ်များအနေဖြင့် မုတ်သုံရာသီအတွင်း ရာသီဥတုဆိုးရွားချိန်များတွင် လှိုင်းဒဏ်၊ လေဒဏ်များ ခိုလှုံနိုင်ရန်အတွက် အောက်ဖော်ပြပါ တည်နေရာများ၌ ရာသီဥတုခိုလှုံနိုင်ပါကြောင်းကို (၂၆-၄-၂၀၂၄)ရက်စွဲပါ ညွှန်ကြားချက်အမှတ်၊ ၁/၂၀၂၄ ဖြင့် ထုတ်ပြန်ပေးထားပြီး ဖြစ်ကြောင်း
(က) ရခိုင်ပြည်နယ်၊ စစ်တွေမြို့နယ်၊ မင်းဂံချောင်းအတွင်း မြောက်လတ္တီတွဒ် ၂၀ ဒီဂရီ ၂၈ မိနစ်၊ အရှေ့လောင်ဂျီတွဒ် ၉၂ ဒီဂရီ ၅၈ မိနစ်၊
(ခ) ရခိုင်ပြည်နယ်၊ ပေါက်တောမြို့နယ်၊ ဖရုံဂါကျွန်း မြောက်လတ္တီတွဒ် ၂၀ ဒီဂရီ ၀၀ မိနစ်၊ အရှေ့လောင်ဂျီတွဒ် ၉၃ ဒီဂရီ ၀၀ မိနစ်၊
(ဂ) ရခိုင်ပြည်နယ်၊ ကျောက်ဖြူမြို့နယ်၊ ငလပွေ့ချောင်း မြောက်လတ္တီတွဒ် ၁၉ ဒီဂရီ ၂၄ မိနစ်၊ အရှေ့လောင်ဂျီတွဒ် ၉၃ ဒီဂရီ ၃၃ မိနစ်၊
(ဃ) ရခိုင်ပြည်နယ်၊ သံတွဲမြို့နယ်၊ ဆင်ခေါင်းဆိပ်ကမ်း မြောက်လတ္တီတွဒ် ၁၈ ဒီဂရီ ၃၁ မိနစ်၊ အရှေ့လောင်ဂျီတွဒ် ၉၄ ဒီဂရီ ၁၃ မိနစ်၊
(င) ရခိုင်ပြည်နယ်၊ သံတွဲမြို့နယ်၊ သဗြုချိုင် (ANDREW BAY) မြောက်လတ္တီတွဒ် ၁၈ ဒီဂရီ ၂၀ မိနစ်၊ အရှေ့လောင်ဂျီတွဒ် ၉၄ ဒီဂရီ ၂၀ မိနစ်၊
(စ) ရခိုင်ပြည်နယ်၊ တောင်ကုတ်မြို့နယ်၊ သင်္ဘောဆိပ် မြောက်လတ္တီတွဒ် ၁၈ ဒီဂရီ ၁၅ မိနစ်၊ အရှေ့လောင်ဂျီတွဒ် ၉၄ ဒီဂရီ ၁၃ မိနစ်၊
(ဆ) ရခိုင်ပြည်နယ်၊ ဂွမြို့နယ်၊ တင်းတောကျေးရွာအုပ်စု၊ အမော်ချိုင် မြောက်လတ္တီတွဒ် ၁၇ ဒီဂရီ ၃၇ မိနစ်၊ အရှေ့လောင်ဂျီတွဒ် ၉၄ ဒီဂရီ ၃၄ မိနစ်၊
(ဇ) ဧရာဝတီတိုင်းဒေသကြီး၊ ငပုတောမြို့နယ်၊ ဟိုင်းကြီးကျွန်း (HAINGYI ISLAND) မြောက်လတ္တီတွဒ် ၁၅ ဒီဂရီ ၅၈ မိနစ်၊ အရှေ့လောင်ဂျီတွဒ် ၉၄ ဒီဂရီ ၂၀ မိနစ်၊
(ဈ) ဧရာဝတီတိုင်းဒေသကြီး၊ ငပုတောမြို့နယ်၊ ပြင်ခရိုင်၊ ချောင်းဝကျေးရွာ မြောက်လတ္တီတွဒ် ၁၆ ဒီဂရီ ၀၀ မိနစ်၊ အရှေ့လောင်ဂျီတွဒ် ၉၄ ဒီဂရီ ၂၄.၄၀ မိနစ်၊
(ည) ဧရာဝတီတိုင်းဒေသကြီး၊ ဘိုကလေးမြို့နယ်၊ ကဒုံကနိ ကျေးရွာ မြောက်လတ္တီတွဒ် ၁၅ ဒီဂရီ ၄၈ မိနစ်၊ အရှေ့လောင်ဂျီတွဒ် ၉၅ ဒီဂရီ ၁၆ မိနစ်၊
(ဋ) မွန်ပြည်နယ်၊ ရေးမြို့နယ်၊ ဝါးကျွန်း မြောက်လတ္တီတွဒ် ၁၅ ဒီဂရီ ၁၁.၃၀ မိနစ်၊ အရှေ့လောင်ဂျီတွဒ် ၉၇ ဒီဂရီ ၄၄ မိနစ်၊
(ဌ) တနင်္သာရီတိုင်းဒေသကြီး၊ လောင်းလုံမြို့နယ်၊ မောင်းမ ကန်ဘုတ်ကျွန်း (MIDDLE MOSCOS) မြောက်လတ္တီတွဒ် ၁၄ ဒီဂရီ ၀၈ မိနစ်၊ အရှေ့လောင်ဂျီတွဒ် ၉၇ ဒီဂရီ ၄၈ မိနစ်၊
(ဍ) တနင်္သာရီတိုင်းဒေသကြီး၊ လောင်းလုံမြို့နယ်၊ လောင်းလုံဘုတ်ကျွန်း (SOUTH MOSCOS) မြောက်လတ္တီတွဒ် ၁၃ ဒီဂရီ ၄၈ မိနစ်၊ အရှေ့လောင်ဂျီတွဒ် ၉၇ ဒီဂရီ ၅၄ မိနစ်၊
(ဎ) တနင်္သာရီတိုင်းဒေသကြီး၊ မြိတ်မြို့နယ်၊ တနင်္သာရီကျွန်း (TANINTHARYI ISLAND) မြောက်လတ္တီတွဒ် ၁၂ ဒီဂရီ ၃၄ မိနစ်၊ အရှေ့လောင်ဂျီတွဒ် ၉၇ ဒီဂရီ ၅၂ မိနစ်၊
(ဏ) တနင်္သာရီတိုင်းဒေသကြီး၊ ကျွန်းစုမြို့နယ်၊ ပြင်စဘုကျွန်း (PYIN SA BU ISLAND) အရှေ့ဘက်ရေပြင် မြောက်လတ္တီတွဒ် ၁၁ ဒီဂရီ ၄၅ မိနစ်၊ အရှေ့လောင်ဂျီတွဒ် ၉၈ ဒီဂရီ ၀၅ မိနစ် တို့ဖြစ်ကြောင်းသိရသည်။

▪️ နိုင်ငံသားပိုင် ကမ်းဝေးငါးဖမ်းရေယာဉ်များနှင့် ကမ်းနီးငါးဖမ်းရေယာဉ်များအား ရာသီဥတု ခိုလှုံခွင့်ပြုရာနေရာ သတ်မှတ်ပေးထားခြင်းမှာ မုတ်သုံရာသီ ရာသီဥတုဆိုးရွားချိန်အတွင်း ငါးဖမ်းရေယာဉ်များနှင့် ရေလုပ်သားများ အန္တရာယ်ကင်းရှင်းလုံခြုံစွာ ကျွန်းခိုရပ်နားနိုင်ရန် အတွက် သတ်မှတ်ပေးထားခြင်းဖြစ်ပြီး ရာသီဥတုခိုလှုံသည်ကိုအကြောင်းပြ၍ ကမ်းနီးဒေသ အတွင်း ငါး/ပုစွန်ဖမ်းဆီးနေသည်ကို စစ်ဆေးတွေ့ရှိရပါက ထိရောက်စွာ အရေးယူခြင်းခံရမည် ဖြစ်ကြောင်း ဖော်ပြထားသည်။

#tthl #Yangon_Times

#Local_News
Published_ 27 May 2024

▪️ မိုးသည်းထန်ချိန် အင်းလျားကန်နှင့် ကန်တော်ကြီးတို့ကိုရေကြီးရေလျှံမဖြစ်အောင် ထိန်းညှိဆောင် ရွက်နေသလို ရန်ကုန်တိုင်းတွင် မိုးရာသီသစ်ပင်စိုက်ပျိုးရန်များကို ရန်ကုန်မြို့တော်စည်ပင်သာယာရေးကော်မတီမှ စီစဉ်ဆောင်ရွက်နေကြောင်းသိရသည်။

▪️ ရန်ကုန်တိုင်းဒေသကြီး စည်ပင်သာယာရေးဝန်ကြီး၊ ရန်ကုန်မြို့တော်စည်ပင်သာယာရေးကော်မတီ ဥက္ကဋ္ဌ(မြို့တော်ဝန်) ဦးဗိုလ်ဌေးနှင့်အဖွဲ့သည် မရမ်းကုန်းမြို့နယ် အင်းလျားကန်ရေပိုလွှဲနှင့်မင်္ဂလာတောင်ညွှန့်မြို့နယ် ကန်တော်ကြီး‌ရေပိုလွှဲ များတွင်ကန်ရေမျက်နှာပြင်တိုင်းတာထားရှိမှု၊ရေကန်များ၏ ရေတံခါးများနှင့် ရေထွက်‌ပေါက်များ၏အခြေ အနေ တို့ကို ကြည့်ရှုစစ်ဆေးပြီးမိုးသည်းထန်စွာရွာသွန်းချိန်ရေးကြီးရေလျှံမှုမဖြစ်စေရေးအတွက်ကန်ရေထိန်းသိမ်းရန်၊ရေဖောက်ထုတ်ရန်နှင့် ထိန်းညှိရန်လိုအပ်သည်များမှာကြား ဖြည့်ဆည်း ဆောင်ရွက်ပေးခဲ့သည်ဟုဆိုသည်။

▪️ မိုးသည်းထန်စွာရွာသွန်းချိန်ရေကြီးရေလျှံမှုမဖြစ်စေရေး အင်းလျားကန်နှင့် ကန်တော်ကြီးတို့၏ရေပမာဏထိန်းညှိဆောင်ရွက်နေမှုအပြင် မင်္ဂလာတောင်ညွှန့်မြို့နယ် ၊အထက်ပန်းဆိုးလမ်းရေမြောင်းရေစီးရေလာအခြေအနေနှင့်ဒဂုံမြို့နယ်၊ ပြည်လမ်းရှိပြည်သူ့ဥယျာဉ် အတွင်းပန်းဥယျာဉ် နှင့်အားကစားကွင်းများဌာနက Poulownia အပင်များပြုစုစိုက်ပျိုးထားရှိမှု တို့ကိုကြည့်ရှုစစ်ဆေးပြီး လိုအပ်သည်များဖြည့်ဆည်းဆောင်ရွက်ပေးခဲ့သည်။

▪️ မြို့တော်ဝန်နှင့်အဖွဲ့သည် မင်္ဂလာဒုံမြို့နယ်၊ပျဉ်းမပင်ကျေးရွာအုပ်စု၊ ပြည်လမ်းရှိ လှော်ကားရေဝေရေလဲဒေသသို့သွားရောက်၍ ပန်းဥယျာဉ်နှင့်အား ကစားကွင်းများဌာန မှယခုနှစ်မိုးရာသီတွင်သစ်ပင်များစိုက်ပျိုးရန် ပြင်ဆင်ဆောင်ရွက်နေမှု ကိုကြည့်ရှုစစ်ဆေးသည်။

▪️ မြို့တော်ဝန်က သစ်ပင်များစိုက်ပျိုးရာ တွင်စနစ်တကျဖြင့် ညီညီညာညာစိုက်ပျိုး နိုင်ရေးကြိုတင်ဆောင်ရွက်ထားရန်နှင့် လျှပ်စစ်တာဝါတိုင်များနှင့်လွတ်ကင်းမှုရှိအောင် စီစဉ်ရန်မှာကြားပြီး လိုအပ်သည်များဖြည့်ဆည်းဆောင်ရွက်ပေးကြောင်းနှင့်ရန်ကုန်တိုင်းဒေသကြီး၌ ယခုနှစ်မိုးရာသီတွင် ကျွန်း၊ပျဉ်ကတိုးနှင့်မဟောဂနီ စသည့်သစ်ပင်စုစုပေါင်း ၅၄၀၀၀ စိုက်ပျိုးရန်ဆောင်ရွက်ထားရှိကြောင်း သိရသည်။

#tthl #Yangon_Times

#World_News
Published 27 May 2024

▪️ တနင်္ဂနွေနေ့က အင်အားပြင်းထန်တဲ့ ဆိုင်ကလုန်းမုန်တိုင်းရမ်မဲလ် ကျရောက်ခဲ့သဖြင့် ဘင်္ဂလားဒေ့ရှ်နဲ့ အိန္ဒိယကမ်းရိုးတန်း ဒေသတွေမှာ လေပြင်းများတိုက်ခတ်ပြီး မိုးသည်းထန်ခဲ့ကာ ဓာတ်တိုင်များ သစ်ပင်များပြိုလဲပြီးနောက် လူသန်းပေါင်းများစွာ လျှပ်စစ်မီးမရရှိဘဲ ဖြစ်နေပါတယ်။

▪️ မုန်တိုင်းက ဘင်္ဂလားဒေ့ရှ် မွန်ဂလာဆိပ်ကမ်း၊ အိန္ဒိယအနောက်ဘင်္ဂလားပြည်နယ်ရှိ ဆာဂါကျွန်းတို့ရဲ့ ကမ်းရိုးတန်းဒေသတွေမှာ တစ်နာရီကို ၁၃၅ ကီလိုမီတာနှုန်းဖြင့် ဝင်ရောက်တိုက်ခတ်ခဲ့ကြောင်း အိန္ဒိယမိုးလေဝသဌာနက ဖော်ပြခဲ့ပါတယ်။

▪️ မုန်တိုင်းက တနင်္လာနေ့နံနက်ပိုင်းမှာ ဆိုင်ကလုန်းအဖြစ်သို့ အားနည်းသွားပြီး အရှေ့မြောက်ပိုင်းသို့ ရွေ့လျားသွားကာ တဖြည်းဖြည်း အားနည်းသွားတယ်လို့ နောက်ဆုံးတင်ပြထားပါတယ်။

▪️ တနင်္ဂနွေနေ့ည ၉ နာရီခန့်မှာ မုန်တိုင်းစတင်ဝင်ရောက်ခဲ့ပြီး ၅ နာရီခန့် ဆက်လက်တိုက်ခတ်ခဲ့တယ်လို့ ဆိုပါတယ်။

မုန်တိုင်းတိုက်နေစဥ် ကွန်ကရစ်တုံးပြုတ်ကျသဖြင့် ကလ္လက္ကတားမှာ လူတစ်ဦးသေဆုံးခဲ့တယ်လို့ ရဲတပ်ဖွဲ့က ဆိုပါတယ်။

▪️ ရာသီဥတု ဖောက်ပြန်မှုကြောင့် ပင်လယ်ရေမျက်နှာပြင်အပူချိန် မြင့်တက်ကာ ကမ်းရိုးတန်းအနိမ့်ပိုင်းမှာရှိနေတဲ့ ဘင်္ဂလားဒေ့ရှ်နဲ့ အိန္ဒိယတို့မှာ လတ်တလောနှစ်များအတွင်း မုန်တိုင်းဒဏ်များ ခံစားနေရပါတယ်။

▪️ ဘင်္ဂလားဒေ့ရှ်ဟာ ထိုနေရာတဝိုက်မှ လူပေါင်း ၈ သိန်းကို မုန်တိုင်းခိုလှုံရာနေရာများသို့ ရွှေ့ပြောင်းခဲ့ပြီး အိန္ဒိယမှာလည်း လူပေါင်း ၁၁၀၀၀၀ ကို ဘေးကင်းရာသို့ ရွှေ့ပြောင်းထားပါတယ်။

▪️ ဘင်္ဂလားဒေ့ရှ်က ဆိုင်ကလုန်းခိုလှုံရာနေရာပေါင်း ၈၀၀၀ နီးပါး ပြင်ဆင်ထားကာ လုပ်အားပေး ၇၈၀၀၀ ခန့် စေလွှတ်ထားသလို အိန္ဒိယရေတပ်ကလည်း သင်္ဘော၊ လေယာဥ်၊ ဆေးဝါးပစ္စည်းများ အဆင်သင့်ပြင်ထားတယ်လို့ ဆိုပါတယ်။

▪️ နှစ်နိုင်ငံစလုံးမှာ ကြိုတင်သတိပေးနိုင်ခဲ့တာကြောင့် ဆုံးရှုံးမှု ကြီးကြီးမားမား မရှိခဲ့ပေမယ့် လျှပ်စစ်ဓာတ်အားပေး အပိုင်းမှာတော့ ထိခိုက်ခဲ့ပါတယ်။

▪️ လျှပ်စစ်ဓာတ်တိုင် ၃၅၆ တိုင်နဲ့ ထရန်စ်ဖော်မာအချို့ ပျက်စီးထားကြောင်း အနောက်ဘင်္ဂလားရှိ လျှပ်စစ်စွမ်းအင်ဝန်ကြီးက ဆိုပါတယ်။

▪️ ဆိုင်ကလုန်းကြောင့် ဘင်္ဂလားဒေ့ရှ်မြို့တော် ဒါကာမှာ မိုးကြီးခဲ့ပြီး လမ်းမများ ရေကြီးကာ လမ်းပန်းဆက်သွယ်ရေး ဆိုးဆိုးရွားရွား ထိခိုက်ခဲ့ပါတယ်။ 

#Source: Reuters

#World_Science
Published 27 May 2024

▪️ သိပ္ပံပညာရှင်တွေဟာ ဆန်းသစ်လေ့လာမှုတစ်ခု ပြုလုပ်ရန်အတွက် အငြိမ်းစားရေတပ်အရာရှိ ဂျိုဆပ်ဒီတူရီကို ရေအောက်မှာ ၃ လကျော် နေထိုင်ခိုင်းခဲ့ပါတယ်။

▪️ ရေအောက်မှာ ဖိအားသိပ်အခန်းထဲ နေထိုင်ခြင်းက လူ့ခန္ဓာကိုယ်အပေါ် ဘယ်လိုသက်ရောက်မှု ရှိလဲဆိုတာကို လေ့လာချင်ကြတာ ဖြစ်ပါတယ်။

▪️ အတ္တလန္တိတ်သမုဒ္ဒရာအောက် ၃ လကျော်နေထိုင်ပြီးနောက် ဒီတူရီပြန်ထွက်လာရာမှာ ၁၀ နှစ်တာလောက် နုပျိုသွားတာကို သိပ္ပံပညာရှင်များ အံ့အားသင့်ခဲ့ကြပါတယ်။

▪️ ဆေးစစ်မှုများ ပြုလုပ်ပြီးနောက် အသက်ကြီးလာတာနဲ့အမျှ ကျုံ့သွားတတ်တဲ့ ခရိုမိုဆုန်း အဆုံးဖက်များရှိ ဒီအင်န်အေဟာ ယခင် ၃ လကထက် ၂၀ ရာခိုင်နှုန်း ပိုမိုရှည်လျားတာကို တွေ့ရှိခဲ့ကြပါတယ်။

▪️ ပင်မစတမ်းဆဲလ် အရေအတွက်လည်း မြင့်မားလာတဲ့အပြင် အလုံးစုံကျန်းမာရေး သိသိသာသာ ပြောင်းလဲသွားပါတယ်။

▪️ ကောင်းစွာအိပ်စက်နိုင်သလို ကိုလက်စ်ထရောလ်အမှတ်များ ၇၂ မှတ် ကျဆင်းသွားပြီး ရောင်ရမ်းခြင်းကို ဖော်ပြတဲ့ သတ်မှတ်ချက်များ တဝက်နည်းပါးသွားပါတယ်။

▪️ ဒီလိုမျိုး ရေအောက်ဖိအားကြောင့် ပြောင်းလဲမှုများက ခန္ဓာကိုယ်အတွက် အကျိုးရှိစေတယ်လို့ ဆရာဝန်များက ဆိုပါတယ်။

▪️ ဒီတူရီကိုယ်တိုင်ကလည်း ထိုကဲ့သို့ ရေအောက်မှာ နေကြည့်ဖို့ ပြောကြားခဲ့ပါတယ်။

▪️ သူ့ရဲ့ဇီဝကမ္မဖြစ်စဥ်မှာလည်း တိုးတက်မှုတွေ ရှိလာတယ်လို့ ဆိုပါတယ်။

#Source: WION

#World_Health
Published 27 May 2024

▪️ သင်္ဘောသီးမှာ ဒဏ်ရာဝေဒနာများ သက်သာစေတဲ့ အစွမ်းသတ္တိ ရှိတယ်လို့ သတ်မှတ်ထားကြပြီး အသီးနဲ့အရွက်တို့ကို ကမ္ဘာတဝှမ်းမှာ ရိုးရာဆေးဖက်ဆိုင်ရာများအတွက် အသုံးပြုနေကြပါတယ်။

▪️ သင်္ဘောရွက်ရဲ့ အကျိုးအာနိသင်တွေကို နောက်ထပ်လေ့လာမှုတွေ ပြုလုပ်ရဦးမှာဖြစ်ပေမယ့် သင်္ဘောသီးရဲ့ ကင်ဆာဆန့်ကျင်ခြင်းနဲ့ ဆီးချိုဆန့်ကျင်ခြင်း သတ္တိတွေကိုတော့ ခေတ်မီသိပ္ပံပညာမှာလည်း ထောက်ခံထားပါတယ်။

▪️ ဗိုက်တာမင်တွေနဲ့ သတ္တုဓာတ်တွေလည်း ကြွယ်ဝတာကြောင့် ကိုယ်ခံအားကို မြှင့်တင်ရာမှာလည်း ပါဝင်ပတ်သက်နေတယ်လို့ အထောက်အထား တွေ့ရှိထားပါတယ်။

▪️ သင်္ဘောသီးစားခြင်းဟာ ကျန်းမာရေးနဲ့ ညီညွတ်ပြီး ရွေးချယ်သင့်တဲ့ စားစရာဖြစ်တယ်လို့ အာဟာရပညာရှင် ဂျန်နာဝါနာက ပြောပြပါတယ်။

▪️ ဓာတ်တိုးဆန့်ကျင် အာနိသင်ကလည်း ရောင်ရမ်းခြင်းကို လျှော့ချပေးကာ ကင်ဆာဖြစ်ပွားခြင်းမှပင် ကာကွယ်ပေးနိုင်ပါတယ်။

▪️ ရေဓာတ်ပါဝင်မှုကြောင့်လည်း အရေပြားကျန်းမာရေး ကောင်းမွန်စေပြီး အသားအရေ ဝင်းလက်နုပျိုစေပါတယ်။

▪️ ဓာတ်တိုးဆန့်ကျင်ပစ္စည်းများဖြစ်တဲ့ ဗိုက်တာမင်-စီ၊ အီး၊ ဘီတာကယ်ရိုတင်း၊ လိုင်ကိုပင်းတို့က ဆဲလ်များထိခိုက်ခြင်းမှ ကာကွယ်ပေးပါတယ်။

▪️ အစာအိမ်အူလမ်းကြောင်းအတွက် ကောင်းကျိုးပြုပိုးမွှားများ ထောက်ပံ့ကာ အစာခြေစနစ်ကိုလည်း အကျိုးပြုပါတယ်။

▪️ ပိုတက်ဆီယမ်လည်း ကြွယ်ဝတာကြောင့် သွေးပေါင်ချိန်များတဲ့သူတွေအတွက် သင့်လျော်ပါတယ်။  

#Source: USA Today

#Local_News
Published 26 May 2024

▪️ နိုင်ငံခြားသုံးငွေလုပ်ငန်းလုပ်ကိုင်ခွင့်လိုင်စင်မရှိဘဲ နိုင်ငံခြားငွေရောင်းဝယ်၊လဲလှယ်သည့်လုပ်ငန်းလုပ်ကိုင်‌နေသည့်လုပ်ငန်းများ၊Facebook Pageများနှင့် အင်တာနက်စာမျက်နှာ(၁၆)ခုကို မြန်မာနိုင်ငံတော်ဗဟိုဘဏ်အ‌နေဖြင့် အရေးယူ ဆောင်ရွက်ထားကြောင်း သိရသည်။

▪️ အရေးယူခံရသည့် လုပ်ငန်း၊ Facebook Pageများနှင့် အင်တာနက်စာမျက်နှာများကတော့ ငွေဈေးနှုန်းနှင့်ငွေလွှဲဆိုင် ၊ Moe Latt၊ Si Thu & bro များ ၊ ရန်ကုန်ငွေဈေး ၊ ဒေါ်လာဝယ်ရောင်းတိုက်ရိုက် USD Exchange ၊ ဒေါ်လာရောင်းဝယ်၊ December Snow ၊ June Lin Htet Naing၊ Htet Yan Money Exchange ၊ Global Value Services-GVS Money Exchange and Transfer ၊  Boss Online Money Exchange Services (Family Money Exchange) ၊ Lucky Sky Gold Smith (Facebook Page) ၊  Nay Myo Htet (Facebook Page) ၊ Gold Market Myanmar (Facebook Page) ၊ Ye Mon၊ Naing Lu စသည်တို့ဖြစ်သည်။

▪️ ဗဟိုဘဏ်အနေဖြင့် အဆိုပါအဖွဲ့အစည်းများနှင့် ပါဝင်ရောင်းဝယ်သူများအား အရေးယူဆောင်ရွက်ပြီး ဖြစ်သည့်အပြင် ပြည်ပမှအဝယ်၊အရောင်း ဆောင်ရွက်နေသည့် Page များ၊ ဖုန်းနံပါတ်များကို သက်ဆိုင်ရာဗဟိုဘဏ်များသို့ အကြောင်းကြား၍ အရေးယူဆောင်ရွက်ရန်ညှိနှိုင်းဆောင်ရွက်လျက်ရှိသည်ဟုဆိုသည်။

▪️ မြန်မာနိုင်ငံတော်ဗဟိုဘဏ်အ‌နေဖြင့် ယခုကဲ့သို့ အဖွဲ့အစည်းများအား တရားဥပဒေစိုးမိုးရေး အဖွဲ့အစည်းများဖြင့် ပူးပေါင်း၍ ဖမ်းဆီးဖော်ထုတ် အရေးယူသွားမည်ဖြစ်ကြောင်း၊

▪️ ပြည်သူများအနေဖြင့် တရားဝင်လိုင်စင်ထုတ်ပေး ထားပြီးဖြစ်သည့် နိုင်ငံခြားငွေလဲလှယ် ရောင်းချခွင့်ရှိသည့် ငွေရေးကြေးရေးအဖွဲ့အစည်းများဖြင့်သာ လဲလှယ်ရောင်းဝယ်ရန်အသိပေးကြောင်း၊

▪️ Facebook Pageများ၊အင်တာနက်စာမျက်နှာများ တွင် တရားမဝင်နိုင်ငံခြားငွေလဲလှယ်ရောင်းဝယ် ဈေးကစားနေသူများအား နိုင်ငံခြားသုံးငွေစီမံခန့်ခွဲမှုဥပဒေပုဒ်မ၃၈နှင့်၄၂အပြင် ပြည်သူအကျိုးထိခိုက်၍ရာဇသတ်ကြီးဥပဒေပုဒ်မဖြင့်ပါ အရေးယူသွားမည်ဖြစ်ကြောင်း မြန်မာနိုင်ငံတော်ဗဟိုဘဏ်၏ ထုတ်ပြန်ချက်တွင်ဖော်ပြထားသည်။

#tthl #Yangon_Times

၂၆ မေ ၂၀၂၄

ဒိုဟာမှ ဒပ်ဗလင်မြို့သို့ ပျံသန်းသော ကာတာလေကြောင်းလိုင်းပိုင် လေယာဉ်သည် ယနေ့ မေလ ၂၆ရက်နေ့ တွင် ပျံသန်းနေစဉ် လေပွေကြမ်းမိသဖြင့် လေယာဉ်အမှုထမ်း(၆)ဦးအပါအဝင် လူ ၁၂ ဦးဒဏ်ရာရရှိသွား ပါတယ်။ လန်ဒန်မှစင်္ကာပူပျံသန်းသည့် စင်္ကာပူလေကြောင်းလိုင်းလေယာဉ် လေပွေကြမ်းမိပြီး ခရီးသည် တစ်ဦးသေဆုံးကာ ဒါဇင်များစွာ ဒဏ်ရာရခဲ့သည့် ဖြစ်စဉ်အပြီး (၅)ရက်အကြာတွင်ကာတာလေကြောင်း လေယာဉ်လည်း အလားတူကြုံခဲ့ရခြင်းဖြစ်ပါတယ်။

ကာတာလေကြောင်းလိုင်းလေယာဉ်သည် တူရကီနိုင်ငံအပေါ် ဖြတ်ကျော်ပျံသန်းနေစဉ် လေပွေကြမ်းမိခဲ့ သဖြင့် ခရီးသည်(၆)ဦးနှင့် လေယာဉ်အမှုထမ်း(၆)ဦးတို့ ဒဏ်ရာရရှိခဲ့ကြတာလို့ ဒပ်ဗလင်လေဆိပ်က “ အိတ်စ်” ဆိုရှယ်မီဒီယာမှာ ပို့စ်ရေးတင်ခဲ့ပါတယ်။

“ ဒိုဟာမှပျံသန်းလာသော ကာတာလေကြောင်းလိုင်း ခရီးစဉ်အမှတ် QR017သည် တနင်္ဂနွေနေ့ မွန်းလွဲ (၁)နာရီမတိုင်မီတွင် သတ်မှတ်ထားသည့် အချိန်အတိုင်း ဒပ်ဗလင်လေဆိပ်သို့  ဘေးအန္တရာယ်ကင်းရှင်းစွာ ဆင်းသက်နိုင်ခဲ့ပါတယ်။ဆင်းသက်သည့်အခါ လေဆိပ်ရဲနှင့် ကျွန်ုပ်တို့၏ မီးသတ်နျင့်ကယ်ဆယ်ရေးဌာန အပါအဝင်အရေးပေါ်လုပ်ငန်းဌာနများက သွားရောက်ကူညီဆောင်ရွက်ပေးခဲ့ပါတယ်။ တူရကီအပေါ်မှ ပျံသန်းနေစဉ် လေပွေကြမ်းမိသဖြင့် ခရီးသည်(၆)ဦးနှင့် လေယာဉ်ဝန်ထမ်း(၆)ဦးတို့ ထိခိုက်ဒဏ်ရာရရှိခဲ့ပါတယ်” ဟုသတင်းထုတ်ပြန်ချက်မှာဖော်ပြထားပါတယ်။

ဒပ်ဗလင်လေဆိပ်အဖွဲ့ကလည်း မြေပြင်တွင် ခရီးသည်နှင့်လေယာဉ်အမှုထမ်းများကို လိုအပ်သည်များ ကူညီစောင့်ရှောက်မှုပေးခဲ့တယ်လို့လည်း သတင်းထုတ်ပြန်ထားပါတယ်။

Source NDTV&X(Twitter)

#Local_News
Published 26 May 2024

▪️၂၀၂၆ ခုနှစ်ကမ္ဘာ့ဖလားခြေစစ်ပွဲများကန်မည့် မြန်မာ့လက်ရွေးစင်ဘောလုံးအသင်းအတွက်ပဏာမ မြန်မာ့လက်ရွေးစင်ကစားသမား စာရင်းအား နည်းပြချုပ် မိုက်ကယ် ဖိုင်တန်ဘိုင်နာက ယနေ့ မေလ(၂၆)ရက်တွင် ထုတ်ပြန်ကြေညာလိုက်ကြောင်းသိရသည်။ 

▪️ ပဏာမ မြန်မာ့လက်ရွေးစင် အသင်းသည် နိုဗိုတယ် ရန်ကုန် မက်စ် ဟိုတယ်တွင် မေလ ၂၈ ရက်မှ စတင်ကာ စခန်းဝင် လေ့ကျင့်မှုများ ပြုလုပ်သွားမည် ဖြစ်သည်။ 

▪️ မြန်မာ့လက်ရွေးစင်အသင်းအနေဖြင့် လာမည့် ဇွန်လ ၆ ရက်နေ့ ညနေ ၆:၄၀ နာရီ၊ သု၀ဏ္ဏ အားကစားကွင်းတွင် ဂျပန်လက်ရွေးစင်အသင်းနှင့်လည်းကောင်း၊ ဇွန်လ ၁၁ ရက်၊ လာအိုနိုင်ငံတွင် မြောက်ကိုရီးယား လက်ရွေးစင် အသင်းနှင့် လည်းကောင်း ၂၀၂၆ ကမ္ဘာ့ဖလား ခြေစစ်ပွဲ၊ ဒုတိယအဆင့် ပွဲစဉ်များ ယှဉ်ပြိုင်ကစားရမည် ဖြစ်ကြောင်း သိရသည်။

▪️ မြန်မာ့လက်ရွေးစင်အသင်းသည် ၂၀၂၆ ကမ္ဘာ့ဖလား ခြေစစ်ပွဲ၊ ပထမအဆင့် ပွဲစဉ်များ ယှဉ်ပြိုင်ကစားခဲ့ပြီးပြီဖြစ်ပြီး  ဒုတိယအဆင့်ပွဲစဉ်များအဖြစ် ဂျပန်အသင်းနှင့် အိမ်ကွင်းမှ စတင်ယှဉ်ပြိုင်ကြရမည် ဖြစ်ကြောင်း သိရသည်။

#tthl #Yangon_Times

#Local_News
Published 26 May 2024

▪️ မွန်ပြည်နယ်၊ ဘီးလင်းမြို့နယ်၊ တောင်ကလေးကျေးရွာအနီးရှိ မစောတံဝာားကို ယာယီပြုပြင်မှုများဆောင်ရွက်နေပြီး အိမ်စီးယာဉ်ငယ်များ စတင်ဖြတ်သန်းခွင့်ပြုနေပြီဖြစ်ကြောင်း သိရသည်။

▪️ အဆိုပါ ဖောက်ခွဲဖျက်စီးခြင်းခံရသည့် မစောတံတားမှ ကျိုးကျပျက်စီးခြင်းမရှိဘဲ ကျန်ရှိနေသည့် (၈)ပေခန့် အကျယ် တံတားဘက်ခြမ်းအား  ပျဉ်ချပ်များခင်း၍ ပြုပြင်ခြင်းလုပ်ငန်းကို ဆောင်ရွက်ခဲ့ခြင်းဖြစ်သည်။

▪️ "ဘီးလင်း မစောတံတား ရဲ့ မပျက်ဆီးခဲ့တဲ့အပိုင်း ကနေ အိမ်စီးကားငယ်တွေ သွားလာလို့ရပါပြီ။မစောတံတားဘေးမှာလည်း ယာယီမြေသားရှောင်ကွင်းလမ်းလုပ်နေပါပြီ။မေလ (၂၆) ရက်နေ့မှာ သွားလာလို့ရနိုင်ပါပြီ"ဟု  မွန်ပြည်နယ်ရှိလူမှုကူညီရေးအဖွဲ့ဝင်တစ်ဦးမှ ရေးသားဖော်ပြထားသည်။

▪️ မစောတံတားအား မေလ ၂၃ ရက်နေ့တွင် မိုင်းခွဲဖျက်ဆီးခံရသည့်အတွက် မော်တော်ယာဥ်များ ဖြတ်သန်းသွားလာနိုင်ခြင်းမရှိဘဲ လမ်းပန်းဆက်သွယ်မှု ပြတ်တောက်ခြင်းများ ဖြစ်ပေါ်ခဲ့ခြင်း ဖြစ်သည်။

▪️ အဆိုပါ ဖောက်ခွဲဖျက်စီးခြင်းခံရသည့်တံတားမှ ကျိုးကျပျက်စီးခြင်းမရှိဘဲ ကျန်ရှိနေသည့် (၈)ပေခန့် အကျယ် တံတားဘက်ခြမ်းအား ရွှေသံလွင်ဟိုင်းဝေးကုမ္ပဏီမှ ပျဉ်ချပ်များခင်း၍ ပြုပြင်ခြင်းလုပ်ငန်းကို ဆောင်ရွက်ခဲ့ရာ မေ ၂၅ ရက်၊ နေ့လယ် ၁၂ နာရီချိန်တွင် ပြီးစီးခဲ့သည့်အတွက် ၁၂ နာရီ ၃၀ မိနစ်အချိန်မှစ၍ ဘီးလင်းဘက်မှ သထုံမြို့ဘက်သို့(၁) တန်အောက် အိမ်စီးယာဉ်ငယ်များ စတင်ဖြတ်သန်းလျက်ရှိကြောင်း သိရသည်။

#tthl #Yangon_Times

#Local_News
Published_ 26 May 2024

▪️ အမေရိကန်နိုင်ငံ၊ ဝါရှင်တန်မြို့ရှိ အမေရိကန်နိုင်ငံခြားရေးဝန်ကြီးဌာနတွင် မေ ၂၄ ရက်တွင် ကျင်းပခဲ့တဲ့ (၃၆)ကြိမ်မြောက် အာဆီယံ-အမေရိကန်အဆင့်မြင့် အရာရှိကြီးများ အစည်းအဝေးသို့ မြန်မာသံရုံးယာယီတာဝန်ခံ/သံအမတ် ဦးသက်ဝင်း တက်ရောက် ဆွေးနွေးခဲ့ကြောင်း သိရပါတယ်။

▪️ အစည်းအဝေးကို အမေရိကန်နိုင်ငံခြားရေးဝန်ကြီးဌာန၊ အရှေ့အာရှနှင့် ပစိဖိတ် ဒေသဆိုင်ရာ လက်ထောက်နိုင်ငံခြားရေးဝန်ကြီး Mr. Daniel Kritenbrink နှင့် အင်ဒိုနီးရှား နိုင်ငံခြားရေးဝန်ကြီးဌာန၊ ဒုတိယဝန်ကြီး/အဆင့်မြင့်အရာရှိကြီး Mr. Sidharto R. Suryodipuro တို့က ပူးတွဲသဘာပတိအဖြစ် ဆောင်ရွက်ခဲ့ကြပြီး၊ အာဆီယံအဖွဲ့ဝင် နိုင်ငံများမှ အဆင့်မြင့်အရာရှိကြီးများ၊ အာဆီယံနိုင်ငံရေးနှင့် လုံခြုံရေးအသိုက်အဝန်း ဆိုင်ရာ ဒုတိယအတွင်းရေးမှူးချုပ်နှင့် အာဆီယံဆိုင်ရာ အမေရိကန် အမြဲတမ်း ကိုယ်စားလှယ်/သံအမတ်ကြီး တို့ တက်ရောက်ခဲ့ကြပါတယ်။

▪️ အစည်းအဝေးတွင် “အာဆီယံ-အမေရိကန် မဟာဗျူဟာမြောက် မိတ်ဖက် ဆက်ဆံရေးအကောင်အထည်ဖော်ရေး လုပ်ငန်းအစီအစဉ် (၂၀၂၁-၂၀၂၅) နှင့် “အာဆီယံ-အမေရိကန် ဘက်စုံမဟာဗျူဟာမြောက် မိတ်ဖက်ဆက်ဆံရေး အကောင်အထည်ဖော်ရေး လုပ်ငန်းအစီအစဉ် နောက်ဆက်တွဲဆောင်ရွက်ချက်များ” နှင့်စပ်လျဉ်း၍ ဖြစ်ပေါ် တိုးတက်မှု အခြေအနေများအပါအဝင် အာဆီယံနှင့် အမေရိကန်နိုင်ငံတို့အကြား ပူးပေါင်း ဆောင်ရွက်မှု အခြေအနေများကို သုံးသပ်ဆွေးနွေးခဲ့ကြပါတယ်။

▪️ ထို့ပြင် ပင်လယ်ရေကြောင်း လုံခြုံရေး၊ ပညာရေး၊ စီးပွားရေးနှင့် ကုန်သွယ်ရေး ပူးပေါင်းဆောင်ရွက်ရေး၊ အစိမ်းရောင် စီးပွားရေးနှင့် သမားရိုးကျ မဟုတ်တဲ့ စိန်ခေါ်မှု များအားအဖြေရှာဆောင်ရွက်ရေး၊ နည်းပညာပိုင်း ဆိုင်ရာ မိတ်ဖက်ဆောင်ရွက်ရေး၊ စဉ်ဆက်မပြတ်ဖွံ့ဖြိုးတိုးတက်ရေး၊ ဒစ်ဂျစ်တယ်စီးပွားရေး၊ အခြေခံအဆောက်အဦနှင့် ရာသီဥတုပြောင်းလဲမှု စသည့်ကဏ္ဍများအပါအဝင် အာဆီယံ-အမေရိကန် ဘက်စုံ မဟာဗျူဟာမြောက် မိတ်ဖက်ဆက်ဆံရေးကို ပိုမိုတိုးတက် ခိုင်မြဲစေရန်အတွက် အနာဂတ်တွင် ပူးပေါင်းဆောင်ရွက်မှု ပိုမိုတိုးမြှင့်နိုင်မည့် နယ်ပယ်များနှင့် ဒေသတွင်းနှင့် နိုင်ငံတကာ ဖြစ်ပေါ် တိုးတက်မှုအခြေအနေများကို ဆွေးနွေးခဲ့ ကြပါတယ်။

▪️ မြန်မာသံရုံးယာယီတာဝန်ခံက မြန်မာနိုင်ငံ၏ ပြည်တွင်းဖြစ်ပေါ်တိုးတက်မှု အခြေအနေများနှင့် အာဆီယံတူညီဆန္ဒ(၅)ချက် အကောင်အထည်ဖော်ရာတွင် မြန်မာနိုင်ငံအနေဖြင့် လူသားချင်း စာနာမှုအကူအညီများကိစ္စအပါအဝင် အာဆီယံနှင့် ပူးပေါင်းဆောင်ရွက်လျက်ရှိသည့် အခြေအနေများကို ထည့်သွင်းဆွေးနွေးခဲ့ကြောင်း သတင်းရရှိပါတယ်။

#Ymg_mnn #Yangon_Media_Group