#Local_News
Published_ 28 July 2022

မြန်မာ့ပဲပုပ်လုပ်ငန်းဖွံ့ဖြိုးတိုးတက်ရေးအတွက် ဇူလိုင် ၂၇ ရက်နေ့တွင် တရုတ်နိုင်ငံ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနက ကြီးမှူးကျင်းပပြီး Yuan Long Ping High-Tech Agriculture Co., Ltd. မှ တာဝန်ယူကျင်းပတဲ့ ပဲပုပ်နည်းပညာဆိုင်ရာ သင်တန်းကို အွန်လိုင်းမှ ကျင်းပခဲ့ကြောင်းသိရပါတယ်။

သင်တန်းဖွင့်ပွဲအခမ်းအနားသို့ မြန်မာနိုင်ငံဆိုင်ရာတရုတ်သံရုံးမှ စီးပွားရေးသံမှူး Mr. Tan Shufu တက်ရောက်၍ အမှာစကားပြောကြားခဲ့ပြီး ဟူနန်ပြည်နယ် စီးပွားရေးနှင့်ကူးသန်းရောင်းဝယ်ရေးဌာနနှင့် Long Ping အဆင့်မြင့် သိပ္ပံနည်းပညာ နိုင်ငံတကာလေ့ကျင့်ရေးကောလိပ်မှ ကိုယ်စားလှယ်များနှင့် မြန်မာနိုင်ငံ စိုက်ပျိုးရေး ဌာနမှ သင်တန်းသား ၄၀ ဦး တက်ရောက်ခဲ့ကြပါတယ်။

Mr. Tan Shufu က စိုက်ပျိုးရေးလုပ်ငန်း ပူးပေါင်းဆောင်ရွက်မှုသည် တရုတ်-မြန်မာ ဘက်စုံ လက်တွေ့ ပူးပေါင်းဆောင်ရွက်မှု၏ အရေးပါအကြောင်းအရာဖြစ်ပြီး နှစ်ဦးနှစ်ဖက် စိုက်ပျိုးရေးလုပ်ငန်း ရင်းနှီးမြှုပ်နှံမှုနှင့် ကုန်သွယ်မှု၊ နည်းပညာပူးပေါင်းဆောင်ရွက်မှု၊ လူတော်လူချွန် ကူးလူးဖလှယ်မှု၊ ကျေးလက်ဆင်းရဲနွမ်းပါးမှု လျှော့ချရေး စတဲ့ နယ်ပယ်များ၌ ရလဒ်ကောင်းများစွာ ရရှိခဲ့တယ်လို့ ဆိုပါတယ်။

မြန်မာနိုင်ငံသည် အရှေ့တောင်အာရှတွင် မိရိုးဖလာ စိုက်ပျိုးရေးနိုင်ငံဖြစ်ပြီး စိုက်ပျိုးရေးအတွက် သဘာဝဂေဟအခြေအနေ သာလွန်ကောင်းမွန်ကာ ပဲစိုက်ပျိုးမှုလုပ်ငန်း အခြေခံကောင်းမွန်သဖြင့် ပဲပုပ်စိုက်ပျိုးမှု ဖွံ့ဖြိုးတိုးတက်စေရန် သင့်လျော်ကြောင်း၊ တရုတ်နိုင်ငံသည် ကမ္ဘာ့အကြီးဆုံး ပဲပုပ်တင်သွင်းတဲ့နိုင်ငံဖြစ်ရာ နှစ်ဦးနှစ်ဖက်ပူးပေါင်းဆောင်ရွက်မှု အလားအလာများကောင်းများ ရှိကြောင်း သိရပါတယ်။

သင်တန်းကာလမှာ ၂၁ ရက် ကြာမြင့်မည်ဖြစ်ပြီး သင်ခန်းစာအတွင်း ပဲပုပ်ပျိုး ထောင်မှုနည်းလမ်းများ၊ ပဲပုပ်၏ အာဟာရထူးခြားချက်များနှင့် ပဲပုပ်ပျိုးထောင်မှု အတွင်း မြေသြဇာကျွေးခြင်း၊ ဇီဝနည်းပညာအသုံးချခြင်းစတဲ့ ခေါင်းစဉ်အကြောင်းအရာများ ပါဝင်းကြောင်း သိရပါတယ်။

ygm_mnn
#Yangon_Media_Group

#Local_News
Published - 28 July 2022

ရန်ကုန်ရွှေလုပ်ငန်းရှင်များအသင်းမှ ထုတ်ပြန်ထားသည့်စျေးနှုန်းထက် ပြင်ပစျေးကွက်တွင် ၂၂ သိန်းအထက်တွင်ရှိနေကြောင်း အရောင်းအဝယ်ပြုလုပ်နေသည့် ရွှေစျေးကွက်အတွင်းမှ သိရသည်။

ယနေ့ဈေးကွက်ပေါက်ဈေးသည် အခေါက်ရွှေတစ်ကျပ်သား ကျပ်သိန်း ၂၀ ပတ်ချာလည်သာ ရှိသော်လည်း ပြင်ပဒေါ်လာပေါက်ဈေးကို အခြေခံတွက်ချက်ပြီး ဝယ်/ရောင်းလုပ်ကြသည့် ပြင်ပဈေးကွက်တွင် ကျပ် ၂၂ သိန်းအထက်ကို ရောက်ရှိနေခြင်းဖြစ်သည်။

ပြည်တွင်းရွှေစျေးကွက်တွင် ဖြစ်ပေါ်နေသည့် ၂၂ သိန်းကျော် ပေါက်စျေးသည် စျေးကစားကြသူများ၏ လုပ်ရပ်ကြောင့်သာဖြစ်ပြီး ထွက်ပေါ်နေသည့်သတင်းများမှာလည်း အမှန်မဟုတ်ပဲ ကောလဟာလများသာဖြစ်ကြောင်း ရန်ကုန်တိုင်း ရွှေလုပ်ငန်းရှင်များအသင်းမှ ဥက္ကဌ ဦးမျိုးမြင့်က YMG ကိုပြောသည်။

ယင်းအပြင် ကျပ် ၂၂ သိန်းအထက် ရောက်ရှိနေသည့် ရွှေဈေးကို ပြန်လည်တည်ငြိမ်အောင် လုပ်ဆောင်နိုင်သည့် အခြေအနေတွင်ရှိကြောင်း ဗိုလ်ချုပ်ဇော်မင်းထွန်းက ၂၆ ရက်ကျင်းပပြုလုပ်သည့်သတင်းစာရှင်းလင်းပွဲတွင်လည်း ထည့်သွင်း ပြောကြားခဲ့သည်။

ဒေါ်လာစျေးနှုန်းမြင့်တက်လာခြင်းကြောင့် ပြည်တွင်းရွှေစျေးနှုန်းသည်လည်း ယင်းကဲ့သို့စျေးတတ်လာရခြင်းဖြစ်ကြောင်း၊ ယင်းအပြင်ရန်ကုန်ရွှေအသင်းအနေဖြင့် တရားမဝင်ရွှေရောင်းချသူများ မရှိစေရန်နှင့် စျေးကစားခြင်းမပြုစေရန် ရည်ရွယ်၍ မီးလင်းရွှေအတုံး အခဲအရောင်း အဝယ်ပြုလုပ်သူများကို လိုင်စင်ပြုလုပ်ထားကြရန် ပြီးခဲ့သည့် မေလ ၁၈ ရက်တွင် အသိပေးပြောကြားထားပြီး လိုင်စင်မရှိသည့် ရွှေဆိုင်များကိုလည်း ရွှေအရောင်း အဝယ်လိုင်စင်ပြုလုပ်ကြရန်ထုတ်ပြန်ကြေညာထားသည်။

ymg/sth
#Yangon_Media_Group

Published 28 July 2022

မြောက်ကိုးရီးယားနိုင်ငံသည် ယင်းရဲ့ နျူကလီးယားစစ်အဟန့်အတားတွေကို တိုက်ခိုက်ရန်ပြင်ဆင်ဖို့နှင့် အမေရိကန်ရဲ့ စစ်ရေး ထိပ်တိုက်ဖြစ်မှုကိုတန်ပြန်ဖို့ အဆင်သင့်ဖြစ်နေပြီလို့ ခေါင်းဆောင် ကင်မ်ဂျုန်အမ်က ပြောလိုက်ပါတယ်။

တောင်ကိုးရီးယားသမ္မတအသစ်ကိုလည်း ပထမဆုံးအဖြစ် ဝေဖန်ပြစ်တင်လိုက်ပြီး ဆိုးလ်ဟာ စစ်ပွဲရဲ့နှုတ်ခမ်းဝ ရောက်အောင် တွန်းပို့နေတယ်လို့ သူကပြောလိုက်ပါတယ်။

ဇူလိုင်၂၇ရက်နေ့ ကိုးရီးယားစစ်ပွဲ ရပ်စဲမှု ၆၉နှစ်ပြည့် အခမ်းအနားမှာ ကင်မ်က မိန့်ခွန်းပြောကြားရာမှာ ယခုလိုပြောခဲ့တာ ဖြစ်ပါတယ်။  ကိုးရီးယားစစ်ပွဲရပ်စဲခဲ့ပေမယ့် နည်းပညာသဘောအရ စစ်ကဆက်လက်ဖြစ်နေတာပါ။

၁၉၅၀-၅၃ စစ်ပွဲကတည်းက အမေရိကန်ပြည်ထောင်စုနှင့် ထိပ်တိုက်တွေ့ခဲ့ပြီး မြောက်ကိုးရီးယားအဖို့ အရေးတကြီး သမိုင်းပေးတာဝန်တစ်ခုပေါက်မြောက်ဖို့လိုအပ်လာတဲ့အတွက်  ကိုယ်ပိုင်ကာကွယ်ရေးကို တိုးမြှင့်လုပ်ဆောင်ခဲ့ရတယ်လို့ ကင်မ်ကပြောပါတယ်။

“ ကျွန်တော်တို့တပ်တွေဟာ ဘယ်လိုအကျပ်အတည်းမဆို တုန့်ပြန်ဖို့ ပြင်ဆင်ထားရှိပြီးဖြစ်တယ်။  ကျွန်တော်တို့နိုင်ငံရဲ့ နျူကလီးယားအဟန့်အတားအစီအမံတွေဟာ ယင်းရဲ့မစ်ရှင်ကိုအတိအကျချက်ခြင်းလုပ်ဆောင်နိုင်အောင်  စစ်ပြင်ဆင်ဖို့ အပြည့်အဝအဆင်သင့်ဖြစ်နေပြီ” လို့ သူကပြောပါတယ်။

ပထမဆုံးနျူကလီးယားစမ်းသပ်မှုပြုလုပ်ဖို့ ဆိုးလ်နှင့် ဝါရှင်တန်တို့ဟာ ပြင်ဆင်မှုတွေကို ၂၀၁၇ခုနှစ်ကတည်းက ပြီးစီးနေပြီး ဖြစ်တယ်လို့  တောင်ကိုးရီးယားနှင့် အမေရိကန်အရာရှိတွေက ပြောဆိုပြီးနောက် မြောက်ကိုးရီးယာခေါင်းဆောင်ကင်မ်က ယခုလိုပြောကြားလာတာဖြစ်ပါတယ်။

နျူကလီးယာစမ်းသပ်မှုကို စစ်ရပ်စဲရေးနှစ်ပတ်လည်နေ့ ဝန်းကျင်မှာပြုလုပ်နိုင်တယ်လို့ တောင်ကိုးရီးယား ပြန်လည်ပေါင်းစည်းရေးဝန်ကြီးက အင်္ဂါနေ့တုန်းကပြောထားပါတယ်။ ဒါပေမယ့် စစ်အရာရှိကြီးတွေကတော့ လတ်တလောမှာ အဲဒီအရိပ်လက္ခဏာမတွေ့ရသေးဘူးလို့ဆိုပါတယ်။

တကယ်လို့ မြောက်ကိုးရီးယားက နျူကလီးယားစမ်းသပ်မှုလုပ်လာရင် ဆိုက်ဘာတိုက်ခိုက်မှုအစီအမံတွေအပါအဝင် အခြားသော ပြင်းထန်တဲ့ ပိတ်ဆို့အရေးယူမှုတွေ နှင့်ရင်ဆိုင်ရဖွယ်ရှိတယ်လို့ တောင်ကိုရီးယား ဝန်ကြီးက ပြောထားပါတယ်။

အမေရိကန်နိုင်ငံဟာ စစ်ရေးလှုပ်ရှားမှုတွေအပေါ် စံနှုန်းနှစ်ခုထားနေတယ်လို့ မြောက်ကိုးရီးယားက နှစ်ရှည်လများ ဝေဖန်နေခဲ့ပါတယ်။

“ ကျွန်တော်တို့တပ်တွေရဲ့ ပုံမှန်ဆောင်ရွက်မှုတွေကို ရန်လိုတာ ခြိမ်းခြောက်တာအဖြစ် အမေရိကန်က အထင်အမြင်မှား‌ေ အာင်လုပ်နေပြီး အဲဒီအချိန်မှာပဲ ကျွန်တော်တို့ရဲ့လုံခြုံရေးကို အကီဲးအကျယ်ခြိမ်းခြောက်တဲ့ ကြီးမားတဲ့ စစ်ရေးလေ့ကျင့်မှုတွေကို သူကလုပ်ပြနေတယ်။ ဒါဟာ တကယ့်ကို ဓားပြတိုက်မှုတစ်ခုပဲ” လို့ ကင်မ်က ပြောပါတယ်။

Source: Reuters

#North_Korea

#Nuclear_war_deterrent_ready

#North_South_Korea_US

#Ukraine_Crisis
Published 28 July 2022

ရုရှားတပ်ဖွဲ့များက ယူကရိန်းရဲ့ဒုတိယအကြီးဆုံး ဓာတ်အားပေးစက်ရုံကို သိမ်းပိုက်လိုက်ပြီး တောင်ပိုင်းဒေသ ၃ နေရာမှာ တပ်အများအပြားပြန်လည်နေရာချထားကြောင်း၊ ယူကရိန်းကလည်း တန်ပြန်တိုက်ခိုက်နိုင်ဖိုမျှော်မှန်းထားကြောင်း ယူကရိန်းသမ္မတအကြံပေးပုဂ္ဂိုလ်က ပြောကြားခဲ့ပါတယ်။

ရုရှားကျောထောက်နောက်ခံပြုတပ်ဖွဲ့တွေက ဆိုဗီယက်ခေတ်ကဆောက်လုပ်တဲ့ ကျောက်မီးသွေးသုံး'ဗူဟဲလ်ဟစ်ခ်'ဓာတ်အားပေးစက်ရုံကို အကောင်းပကတိအတိုင်း သိမ်းပိုက်နိုင်ခဲ့ပြီး ဒါဟာသုံးပတ်ကျော်ကာလအတွင်း ရုရှားတို့အတွက် ကြီးမားတဲ့အောင်မြင်မှုဖြစ်ခဲ့ကြောင်း ဗုဒ္ဓဟူးနေ့က ကြေညာလိုက်ပါတယ်။

ယူကရိန်းသမ္မတ အကြံပေးပုဂ္ဂိုလ်'အိုလက်ဆီအာရက်စ်တိုဗစ်ချ်'က ယူကရိန်းအရှေ့ပိုင်း ဒိုနက်စ်ဒေသရှိ ဓာတ်အားပေးစက်ရုံ သိမ်းပိုက်ခံလိုက်ရကြောင်း အတည်ပြုခဲ့ပြီး ဒါဟာရုရှားတို့ အနည်းငယ်အသာစီးရရုံမျှသာဖြစ်ကြောင်း မှတ်ချက်ပြုလိုက်ပါတယ်။

ဒါ့အပြင် ရုရှားတို့ဟာ ခုခံစစ်ဗျူဟာကနေ ထိုးစစ်အဖြစ်ပြောင်းလဲလာပုံရပြီး ယူကရိန်းတောင်ပိုင်းရှိ မယ်လီတိုပိုလ်၊ ဇာပိုရစ်ဇ်ဇီယာ၊ ခါဆန်ဒေသတို့မှာ ရုရှားတပ်ဖွဲ့များပြန်လည်နေရာချထားကြောင်း ဖြည့်စွက်ပြောကြားခဲ့ပါတယ်။

စစ်ပွဲအစောပိုင်းကာလအတွင်း ရုရှားတို့ထံပေးလိုက်ရတဲ့ တောင်ပိုင်းမြို့ခါဆန်ကို ယူကရိန်းတို့က ပြန်လည်သိမ်းပိုက်သွားဖို့ အသိပေးပြောကြားထားပါတယ်။

ရုရှားက ခါဆန်ဘက်ကိုဦးတည်ပြီး တပ်ဖွဲ့အင်အားအများဆုံးဖြစ်အောင် အာရုံစိုက်လုပ်ဆောင်နေပေမယ့် အတိအကျတော့မသိရသေးကြောင်း ယူကရိန်းနိုင်ငံတော်လုံခြုံရေးနဲ့ ကာကွယ်ရေးကောင်စီဝန်ကြီး'အိုလက်ဆီဒန်နီလော့ဗ်'က တွစ်တာမှာ ဖော်ပြခဲ့ပါတယ်။

တောင်ပိုင်းမှာရှိတဲ့ ယူကရိန်းတပ်တွေက ပြီးခဲ့တဲ့ ၂၄ နာရီအတွင်း ရန်သူရုရှားတပ်ဖွဲ့ဝင် ၆၆ ဦးကိုရှင်းလင်းနိုင်ခဲ့ပြီး တင့်ကား ၃ စီးနဲ့ လက်နက်တိုက် ၂ ခုတို့ကို ဖျက်ဆီးနိုင်ခဲ့ကြောင်း သတင်းထုတ်ပြန်ထားပါတယ်။

ရုရှားတပ်တွေကတော့ မိုင်ကိုလိတ်ဗ်မြို့ကို ဒုံးကျည်လောင်ချာများဖြင့်တိုက်ခိုက်ခဲ့ပါတယ်။

ခါဆန်မြို့ ဒနီပရိုမြစ်ကိုဖြတ်သန်းတည်ဆောက်ထားတဲ့ တံတားကြီးကိုလည်း ယူကရိန်းတို့တိုက်ခိုက်ခဲ့ကာ သွားလာရေးခက်ခဲအောင်ပြုလုပ်ခဲ့ကြပါတယ်။

ရုရှားတပ်များမြစ်ကို ဖြတ်ကူးဖို့အတွက် ဆိပ်ခံတံတားများနဲ့ ကူးတို့ယာဉ်များကို အသုံးပြုနိုင်ကြောင်း ရုရှားအရာရှိများက အစောပိုင်းကပြောကြားခဲ့ပါတယ်။

ဒနီပရိုမြစ်ကိုဖြတ်ပြီး အခြားဒေသတွေကိုသွားလာနိုင်မယ့် အန်တိုနစ်စကီတံတားကို ပြန်လည်ဆောက်လုပ်သွားဖို့ သမ္မတ'ဇယ်လန်စကီ'က အသိပေးထားပါတယ်။

"ကျွန်တော်တို့ တိုင်းပြည်အတွင်း ကျူးကျော်လာတဲ့ တပ်တွေအနေနဲ့ ဘာအခွင့်အရေးမှ မရအောင် သေချာပြင်ဆင်ထားဖို့ လိုပါတယ်" လို့ ပြောကြားခဲ့ပါတယ်။

Source: Reuters
#Yangon_Media_Group

#Local_News
Published_ 28 July 2022

မလေးရှားနိုင်ငံရှိ ထိန်းသိမ်းရေးစခန်းများမှ မြန်မာနိုင်ငံသား ၄၇ ဦး နေရပ်ပြန်နိုင်ရေး ကူညီဆောင်ရွက်ပေးခဲ့ကြောင်း ဇူလိုင် ၂၇ ရက်နေ့တွင် မြန်မာသံရုံး၊ ကွာလာလမ်ပူမြို့မှ သတင်းထုတ်ပြန်ထားပါတယ်။

မြန်မာ့အပြည်ပြည်ဆိုင်ရာ လေကြောင်းလိုင်း ကယ်ဆယ်ရေးလေယာဉ်ဖြင့် မလေးရှားတွင် ပြစ်ဒဏ်ကျခံပြီး၍ လင်ကင်းကန့်နှင့် Bidor ထိန်းသိမ်းရေးစခန်းများတွင် ရောက်ရှိနေသူများအနက်မှ မြန်မာနိုင်ငံသားဖြစ်ကြောင်း စိစစ်မှန်ကန်သူ ၄၇ ဦးတို့အား နေရပ်ပြန်နိုင်ရေး ကူညီဆောင်ရွက်ပေးခဲ့ခြင်းဖြစ်တယ်လို့ ဆိုပါတယ်။

ထို့ပြင် ဇူလိုင် ၂၆ ရက်နေ့တွင်လည်း မြန်မာသံရုံး ကွာလာလမ်ပူမြို့မှ သံအရာရှိနှင့် တာဝန်ရှိသူများက မလေးရှားနိုင်ငံ Juru ထိန်းသိမ်းရေးစခန်းနှင့် Bidor ထိန်းသိမ်းရေး စခန်းမှ မြန်မာနိုင်ငံသား ၄၄ ဦးအား သွားရောက်တွေ့ဆုံ စစ်ဆေးခြင်းနှင့် အားပေးစကားများ ပြောကြားခဲ့ပြီး အထောက်အထားပြည့်စုံသူ မြန်မာနိုင်ငံသားများအား မြန်မာနိုင်ငံသို့ အမြန်ဆုံးပြန်ပို့နိုင်ရန်အတွက် သက်ဆိုင်ရာဌာနများနှင့် ညှိနှိုင်းဆောင်ရွက်ပေးခဲ့တယ်လို့ မြန်မာသံရုံးက သတင်းထုတ်ပြန်ထားပါတယ်။

ygm_mnn
#Yangon_Media_Group

#Local_News
Published_28 July 2022

ရန်ကုန်မြို့ရှိ အမေရိကန် နိုင်ငံသားများ သတိထား၍ သွားလာနေထိုင်ကြရန် မြန်မာနိုင်ငံဆိုင်ရာ အမေရိကန်သံရုံးက ဇူလိုင်လ ၂၇ ရက် နေ့စွဲဖြင့် ထုတ်ပြန်ထားသည်။

ရန်ကုန်တွင် နစက လုံခြုံရေးအဖွဲ့များအပေါ် တိုက်ခိုက်မှုများ အချိန်မရွေး နေရာမရွေး ဖြစ်ပွားနိုင်သည်ဟု လူမှုကွန်ရက်ပေါ်တွင် သတိပေးထားသည်များ ရှိလာသည်ကို သတိပြုမိသောကြောင့် သတိဖြင့် နေထိုင်ရန် ယင်းထုတ်ပြန်ချက်တွင် ဖော်ပြထားသည်။

ယင်းအပြင် ဆက်သွယ်ရေးပြတ်တောက်မှု ဖြစ်နိုင်ခြေကို အားလုံးက ကြိုတင်ခန့်မှန်းထားသင့်ကြောင်းနှင့် lockdown ကြေငြာခြင်း သို့မဟုတ် မြို့အနှံ သွားလာလှုပ်ရှားမှုများ အလွန်အန္တရာယ်များလာပါက တစ်ပတ်စာ အစားအသောက်၊ ရေနှင့် ဆေးဝါးများ ရရှိရန်၊ ပတ်ဝန်းကျင်လုံခြုံရေးနှင့် ဆက်သွယ်ပြောဆိုနိုင်မှုကိစ္စများကိုလည်း အာရုံစိုက်ရန် ဖော်ပြထားသည်။

နိုင်ငံခြားသားများအား ခြိမ်းခြောက်မှု အတိအကျမရှိသော်လည်း မှားယွင်းမှုများ ဖြစ်ပေါ်လာစေနိုင်သောကြောင့် စိုးရိမ်ရသည့်အတွက် ဂရုစိုက်နေထိုင်ကြရန် တိုက်တွန်းထားခြင်း ဖြစ်ကြောင်း သိရသည်။

ymg/mt
#Yangon_Media_Group

#Local_News
Published_28 July 2022

အမျိုးသမီးနှစ်ဦးအား ယွမ်တစ်သိန်းခွဲနှင့် သုံးသောင်းတို့ဖြင့် ရောင်းစားခဲ့သူများ အလုပ်နှင့်ထောင် ဒဏ် ၁၀ နှစ်စီ ချမှတ်လိုက်ကြောင်း နစက သတင်းထုတ်ပြန်ရေးအဖွဲ့က သိရသည်။

ပြီးခဲ့သည့် ၂၀၂၀ ပြည့်နှစ်အတွင်းက ရန်ကုန်တိုင်းဒေသကြီး လှိုင်သာယာမြို့နယ်နေ အသက် ၂၉ နှစ်အရွယ် အမျိုးသမီးအားသူ၏ ရည်းစားဖြစ်သူ ထန်းတပင်မြို့နယ်နေ စိုးထွန်းအောင်က မန္တလေးမြို့သို့သွားရောက် အလုပ်လုပ်ကိုင်ကာ လက်ထပ်ပေါင်းသင်းမည်ဟု ပြောဆိုစည်းရုံး၍ စိုးထွန်းအောင်နှင့် ၎င်း၏သူငယ်ချင်းဖြစ်သူ အောင်အောင်တို့က မူဆယ်မြိုမှတစ်ဆင့် ရွှေလီမြို့သို့ ခေါ်ဆောင်သွားပြီး တရုတ်အမျိုးသားထံ ယွမ် ၃၀၀၀၀ ဖြင့် ရောင်းစားခဲ့ခြင်း ဖြစ်သည်။

ကာယကံရှင်များက လှိုင်သာယာမြိုမ ရဲစခန်း(ပ) ၃၈၃၅/၂၀၂၀၊ လူကုန်ကူးမှု တားဆီးကာကွယ်ရေး ဥပဒေပုဒ်မ ၂၄ ဖြင့် အမှုရေးဖွင့်၍ မြောက်ပိုင်းခရိုင် တရားရုံးသို့ တရားစွဲတင်ပို့ခဲ့ကာ ပြီးခဲ့သည့် ဇူလိုင်လ ၂၂ရက် တွင် တရားခံ စိုးထွန်းအောင်အား လူကုန်ကူးမှု တားဆီးကာကွယ်ရေး ဥပဒေပုဒ်မ ၂၄ အရ အလုပ်နှင့်ထောင်ဒဏ် ၁၀ နှစ် ကျခံစေရန် အမိန့်ချမှတ်ခဲ့ကြောင်း သိရသည်။

ယင်းအပြင် ရှမ်းပြည်နယ်(မြောက်ပိုင်း) သီပေါမြို့နယ်နေ အသက် ၁၉ နှစ်အရွယ် အမျိုးသမီးငယ်အား တစ်မြို့တည်းနေ ဒေါ်စိန်ဌေး၊ မစပ်စုမ(ခ)သဲနု(ခ)မီမီဝင်းဌေး၊ ရှမ်းလေး (ခ)ရဲထွဋ်၊ ကျော်ထွန်းဦး (ခ)ဦးထွေးနှင့် ဆောင်းနှင်းဝေတို ငါးဦးက အငှားကိုယ်ဝန်ဆောင်သည့် အလုပ်လုပ်ပါက တစ်နှစ်လျှင် ကျပ်သိန်း ၅၀ ရမည်ဟု ပြောဆိုစည်းရုံးကာ မူဆယ်မြို့မှတစ်ဆင့် တရုတ်နိုင်ငံကွမ်တုံမြို့ရှိ တရုတ်အမျိုးသားထံ ယွမ် ၁၅၀၀၀၀ ဖြင့် ပို့ဆောင်ရောင်းစားခဲ့ကြခြင်း ဖြစ်သည်။

အမှုကို သီပေါမြို့မရဲစခန်းက (ပ)၉၈/၂၀၂၀၊ လူကုန်ကူးမှု တားဆီးကာကွယ်ရေး ဥပဒေပုဒ်မ ၂၈(က) ဖြင့် ရေးဖွင့်ကာ ကျောက်မဲခရိုင်တရားရုံးသို့ တရားစွဲတင်ပိုခဲ့ခြင်းဖြစ်ပြီး တရားခံ ဒေါ်စိန်ဌေး၊ မစပ်စုမ(ခ) သဲနု(ခ)မီမီဝင်းဌေးနှင့် ရှမ်းလေး(ခ)ရဲထွဋ်တို သုံးဦးကို လူကုန်ကူးမှု တားဆီးကာကွယ်ရေး ဥပဒေပုဒ်မ ၂၄ အရ အလုပ်နှင့်ထောင်ဒဏ် ၁၀ နှစ်စီ ကျခံစေရန် ဇူလိုင်လ ၂၂ ရက်က အမိန့်ချမှတ်ခဲ့ကြောင်း သိရသည်။

ymg/mt
#Yangon_Media_Group

#Local_News
Published _ 28 July 2022

ထိုင်းနိုင်ငံမှာ အလုပ်သမားလိုအပ်ချက်မြင့်တက်နေပြီး ဖြည့်ဆည်းရန်နှင့် တရားမဝင်လုပ်သားဝင်ရောက်မှုများကို ဖြေရှင်း၍ လုပ်ငန်းများ၏ အလုပ်သမားလိုအပ်ချက်အလိုက် တရားဝင်အလုပ်သမားများ တင်သွင်းမည်ဟု ထိုင်းအစိုးရမှ ပြောကြားထားသည်။

ထိုင်းနိုင်ငံ၏ ငါးဖမ်းလုပ်ငန်း၊ စိုက်ပျိုးရေးကုန်ပစ္စည်းထုတ်လုပ်ငန်း၊ ထုတ်ကုန်အမျိုးမျိုးလုပ်ငန်း၊ ဆောက်လုပ်ရေးလုပ်ငန်းနှင့် ခရီးသွားလုပ်ငန်းဝန်ဆောင်မှုပေးသည့်နေရာများတွင် မြန်မာ၊ လာအို၊ ကမ္ဘောဒီးယား၊ ဗီယက်နမ်မှ ရွှေ့ပြောင်းလုပ်သားများ ပြတ်လတ်မှုကြောင့် တိုက်ရိုက်ထိခိုက်မှုရှိနေခြင်းကို ဖြေရှင်းပေးနိုင်ရန် ထိုင်းကုန်သည်ကြီးများအဖွဲ့ချုပ်၊ ထိုင်းတော်ဝင်ဆိုင်ရာ ဆောက်လုပ်ရေးလုပ်ငန်းအဖွဲ့ချုပ်၊ စက်မှုလုပ်ငန်းအဖွဲ့ချုပ်နှင့် ငါးဖမ်းလုပ်ငန်းအဖွဲ့ချုပ်မှ ထိုင်းအစိုးရထံ တောင်းဆိုခဲ့ကြောင်း သိရသည်။

ထိုင်းအစိုးရအနေဖြင့် ထိုရွှေ့ပြောင်းလုပ်သားလိုအပ်ချက်ကို ဖြည့်ဖို့ ရွှေ့ပြောင်းလုပ်သားများ တင်သွင်းတာ၊ လက်ရှိထိုင်းနိုင်ငံမှာ ရောက်ရှိနေသည့် တရားမဝင်ရွှေ့ပြောင်းလုပ်သားများကို တရားဝင်နေထိုင်ခွင့်ပြုခြင်းနှင့် တရားဝင်နေထိုင်ခွင့်ရပြီးသူများအား နေထိုင်ခွင့်သက်တမ်းတိုးပေးခြင်းများ စတင်လုပ်ဆောင်နေသည်။

လက်ရှိ ထိုင်းနိုင်ငံမှာ တရားဝင် နေထိုင်အလုပ်လုပ်နေသည့် ရွှေ့ပြောင်းလုပ်သား ၂ ဒသမ ၅ သန်းရှိနေပြီး နောက်ထပ်ရွှေ့ပြောင်းလုပ်သား ၅ သိန်း လိုအပ်နေကြောင်း သိရသည်။

ရွှေ့ပြောင်းအလုပ်သမားလိုအပ်ချက်ဖြည့်ရန် အတွက် ဇူလိုင်လ ၅ ရက် အစိုးရဖွဲအစည်းအဝေးမှာ နိုင်ငံ ၄ နိုင်ငံမှ ရွှေ့ပြောင်းလုပ်သား တရားဝင် ခေါ်ယူရန် သဘောတူညီမှု ရရှိထားပြီးဖြစ်ကြောင်းသိရသည်။

ထိုသဘောတူညီချက်အရ ထိုင်းနိုင်ငံမှာ လက်ရှိတရားမဝင်လုပ်ကိုင်နေသည့် ရွှေ့ပြောင်းလုပ်သားစာရင်းကို အလုပ်ရှင်များက အလုပ်ခေါ်လိုမှု အလုပ်သမားနာမည်စာရင်း (Name List) အနေနှင့် အလုပ်အကိုင်ရှာဖွေရေးဦးစီးဌာနထံ တင်ပြရမှာဖြစ်ကြောင်း သိရသည်။

သတ်မှတ်လုပ်ငန်းစဉ်များပြီးလျင် တရားမဝင်လုပ်သားတွေကို ၂၀၂၃ ခုနှစ် ဖေဖော်ဝါရီလ ၁၃ ရက်အထိ တရားဝင်နေထိုင်အလုပ်လုပ်ခွင့်ပေးမှာဖြစ်ပြီး ဩဂုတ်လ ၁ ရက်မှာ တရားမဝင် ရွှေ့ပြောင်းလုပ်သားတွေအား ပန်းရောင်ဘတ်ကတ်ပြား စတင်ပြုလုပ်ပေးတော့မည်ဟု သိရသည်။

နေထိုင်ခွင့်သက်တမ်းကို တစ်နှစ်တစ်ကြိမ်နှုန်းဖြင့် တိုးပေးပြီး၂၀၂၅ ခုနှစ် ဖေဖော်ဝါရီလ ၁၃ ရက်အထိ ထပ်မံနေထိုင်ခွင့်ပြုမှာဖြစ်ပြီး လက်ရှိထိုင်းနိုင်ငံမှာ တရားဝင်နေထိုင်ခွင့်ကို ၂၀၂၂ ခုနှစ် ဩဂုတ်လ ၁ ရက်အထိ ရထားသည့်ရွှေ့ပြောင်းလုပ်သားများဟာ ၂၀၂၅ ခုနှစ် ဖေဖော်ဝါရီလ ၁၃ ရက်အထိ ဆက်နေရန် ယခင် ပါမစ်သက်တမ်း မကုန်ခင်မှာ လုပ်ထုံးလုပ်နည်းအတိုင်း အလုပ်ပါမစ်လျှောက်လွှာသွား တင်ရမှာဖြစ်သည်။

၂၀၂၂ ခုနှစ် ဩဂုတ်လ ၁ ရက်နောက်ပိုင်းမှာ နေထိုင်ခွင့် ဗီဇာတံဆိပ်တုံးထုခံမည့် ရွှေ့ပြောင်းလုပ်သားများအနေဖြင့် ၂၀၂၅ ခုနှစ် ဖေဖော်ဝါရီလ ၁၃ ရက်အထိ ဆက်လက်လုပ်ကိုင်လိုလျင် ပါမစ်လျှောက်လွှာ တင်ပြီးသည့်အခါ တစ်နှစ် တစ်ကြိမ်နှုန်းနှသ့် စုစုပေါင်း နှစ်ကြိမ် ၂၀၂၅ ခုနှစ် ဖေဖော်ဝါရီလ ၁၃ ရက်အထိ အလုပ်ပါမစ်သက်တမ်းတိုးပေးမှာ ဖြစ်ကြောင်းသိရသည်။

ymg/NN
#Yangon_Media_Group

#Local_News
Published - 28 July 2022

တောင်ကိုရီးယားနိုင်ငံတွင် အလုပ်လုပ်မည့် မြန်မာလုပ်သား ၁၇၉ ဦးကို ယနေ့တွင် ထပ်မံစေလွှတ်ခဲ့ကြောင်း ဆိုးလ်မြို့တွင်ရှိသည့် မြန်မာသံရုံးမှ သတင်းထုတ်ပြန်ထားသည်။

အဆိုပါ လုပ်သားများမှာ ကုန်ထုတ်လုပ်သား ၁၇၇ ဦး၊ CBT လုပ်သား ၂ ဦးဖြစ်ပြီး အင်ချွန်းအပြည်ပြည်ဆိုင်ရာလေဆိပ်သို့ ရောက်ရှိလာပြီဖြစ်ကြောင်း ဖော်ပြထားသည်။

တောင်ကိုရီးယားအစိုးရမှ မြန်မာလုပ်သားများကို တရားဝင်ပြန်လက်ခံနေပြီး ယခုဇူလိုင်လနောက်ဆုံးပတ်တွင် မြန်မာလုပ်သား ၃၂၁ ဦးကို တရားဝင် ဝင်ခွင့်ပြုခဲ့ကြောင်း သိရသည်။

ယင်းအပြင်ပြည်ပနိုင်ငံတွေများသို့ တရားဝင်သွားရောက်အလုပ်လုပ်လိုသူတွေအနေဖြင့် ပြည်တွင်း၌ ဖွင့်ထားသည့် ရွှေ့ပြောင်းလုပ်သားများ ထောက်ပံ့ကူညီရေးဗဟိုဌာန(MRC)များတွင် နည်းလမ်းနှင့် အကြံဉာဏ်များ အခမဲ့ ရယူနိုင်ကြောင်းလည်း အလုပ်သမားသံအရာရှိရုံးမှ ထုတ်ပြန်ထားသည်။

ymg/sth
#Yangon_Media_Group

#World_Technology
Published 28 July 2022

အိုဟိုင်ယိုပြည်နယ်တက္ကသိုလ်မှ သုတေသီများက စမတ်ဆွဲကြိုးအသစ်တစ်မျိုးကို တီထွင်ထုတ်လုပ်လိုက်ကြပြီး ထိုဆွဲကြိုးဝတ်ဆင်ထားသူရဲ့ချွေးထဲမှာပါလာတဲ့ ဓာတုဓာတ်ပစ္စည်းတွေနဲ့ ပါဝင်မှုပမာဏတို့ကို တိုင်းတာပေးနိုင်မှာ ဖြစ်ပါတယ်။

ကမ္ဘာပေါ်က ဆီးချိုရောဂါသည်သန်း ၄၀၀ အနေနဲ့ ဆီးချိုစစ်ဖို့ လက်ထိပ်သွေးဖောက်နေစရာ မလိုအပ်တော့ပါဘူး။

ထိုဆွဲကြိုးမှာ ညှပ်ချိတ်နဲ့ ဆွဲသီးပါဝင်ပြီး လည်ပင်းမှာပတ်ထားတဲ့အခါ အနောက်ဘက်က ဇီဝအာရုံခံပစ္စည်းကနေ ဂလူးကိုစ်နဲ့ ဆီရိုတိုနင်ပမာဏတို့ကို တိုင်းတာပေးမှာ ဖြစ်ပါတယ်။

လူသားနဲ့စမ်းသပ်ရာမှာ စမတ်ဆွဲကြိုးဟာ ဝတ်ဆင်သူရဲ့ချွေးထဲက ဆိုဒီယမ်၊ ပိုတက်ဆီယမ်၊ ဟိုက်ဒရိုဂျင်ဓာတ်များကို ၉၈.၉ ရာခိုင်နှုန်းအထိ တိကျစွာ တိုင်းတာပေးနိုင်ကြောင်း တွေ့ရှိခဲ့ကြပါတယ်။

သုတေသီအဖွဲ့က ဇီဝအာရုံခံပစ္စည်းလေးကို နားကပ်၊ လက်စွပ်ထဲမှာအပြင် အရေပြားအောက်မှာပါ ထည့်သွင်းနိုင်ဖို့ ကြိုးပမ်းနေကြပါတယ်။

ချွေးထဲမှာ လူတွေရဲ့ကျန်းမာရေးအခြေအနေ အတိအကျကို ဖော်ပြပေးနိုင်တဲ့ biomarker ရာနဲ့ ချီပါဝင်တယ်လို့ စာတမ်းပြုစုသူ'ကျင်ဟွာလီ'က ရှင်းပြလိုက်ပါတယ်။

ခေတ်မီဇီဝအာရုံခံစနစ်တွေက ခန္ဓာကိုယ်ထဲဝင်ရောက်စရာမလိုဘဲ ဇီဝပြောင်းလဲဖြစ်စဉ်များကို သိရှိနိုင်ပြီး လူတစ်ယောက်ရဲ့ခန္ဓာကိုယ်ကထွက်တဲ့ အရည်ထဲက အချက်အလက်ဖြစ်စဉ်တွေကို တွေ့ရှိနိုင်မှာဖြစ်တယ်လို့ ဖော်ပြထားပါတယ်။

အာရုံခံပစ္စည်းက သေးငယ်ပေမယ့် အဖြေသိရှိဖို့အတွက်တော့ ချွေးအနည်းငယ်မျှသာ လိုအပ်ပါတယ်။

စမ်းသပ်မှုပြုလုပ်ရာမှာ စမ်းသပ်ခံသူကို လေ့ကျင့်ခန်းပြုလုပ်ခိုင်းပြီး ၁၅ မိနစ်အနားပေးတဲ့အချိန်မှာ အချိုရည်သောက်သုံးခိုင်းခဲ့ကာ ဆက်လက်လှုပ်ရှားစေပါတယ်။

အဲဒီနောက် အချိုဓာတ်သွင်းပြီး မိနစ် ၃၀ နဲ့ ၄၀ အတွင်း ချွေးထဲကဂလူးကိုစ်ဓာတ်က အမြင့်ဆုံးပမာဏကို ရောက်ရှိခဲ့ပါတယ်။

အာရုံခံပစ္စည်းကို ပြုလုပ်ရာမှာ အလွန်ပါးလွှာတဲ့ ပစ္စည်းများဖြင့်ထုတ်လုပ်ထားပြီး အခြေအနေအမျိုးမျိုးမှာ ထားနိုင်တဲ့အပြင် လူ့အရေပြားနဲ့ ထိတွေ့တဲ့အခါ စက်ပစ္စည်းရဲ့လုပ်ဆောင်ချက်များ မထိခိုက်အောင် ကာကွယ်ပေးထားပါတယ်။

ပစ္စည်းထုတ်လုပ်ရာမှာ ဒီထက်ပိုသေးအောင် ပြုလုပ်ပြီး အရေပြားအောက်ထည့်သွင်းနိုင်သည်အထိ ပြုလုပ်ဖို့စီစဉ်နေကြပါတယ်။

နေ့စဉ်လှုပ်ရှားရာမှာ အလွယ်တကူအံဝင်စေမယ့် ဆားကစ်တွေထဲထည့်သွင်းတီထွင်နိုင်ဖို့ မျှော်မှန်းထားကြောင်း 'လီ'က ဖော်ပြခဲ့ပါတယ်။

Source: DailyMail
#Yangon_Media_Group

#Local_News
Published_28 July 2022

ရန်ကုန် - မန္တလေး အမြန်လမ်းပေါ် အမြန်နှုန်းတိုင်းတာစက် ထပ်တိုးသွားမည်ဖြစ်ကြောင်း အမြန်လမ်း ရဲတပ်ဖွဲ့က သိရသည်။

ရန်ကုန်-မန္တလေး အမြန်လမ်းမကြီး တစ်လျောက်တွင် အမြန်နှုန်းတိုင်းတာသည့် စက် ၁၁ ခု ရှိပြီး ယင်းတွင် အမြန်နှုန်း တိုင်းတာသည့် စက်များတပ်ဆင်၍ လုပ်ဆောင်နေသော်လည်း လိုအပ်ချက်အရ စက် ၇ လုံး ထပ်မံတပ်ဆင်မည် ဖြစ်ကြောင်း သိရသည်။

"ယာဉ်တိုက်မှု ဖြစ်စဉ်ကို လျှော့ချနိုင်စေဖို့နဲ့ မလိုလားအပ်တဲ့ အန္တရာယ်တွေမဖြစ်ဖို စီစဉ်တာပါ။ သတ်မှတ် ကီလိုအတိုင်းပဲ မောင်းနှင်တာကတော့ ဘေးကင်းမှု အရှိဆုံးပါ"ဟု တာဝန်ရှိ ရဲအရာထမ်းက ဆိုသည်။

လက်ရှိတွင် ရန်ကုန်-မန္တလေးအမြန်လမ်းမကြီးတစ်လျောက် သုညမိုင်မှ ၃၅၂ မိုင် ၆ ဖာလုံအတွင်း ရဲစခန်း ၁၆ ခု ရှိကြောင်း၊ သတ်မှတ်ကီလိုထက် ကျော်လွန်မောင်းနှင့်သည့် ယာဉ်များကို စောင့်ကြည့်ဖမ်းဆီးမှုများပြုလုပ်နေကြောင်း၊ အိမ်စီးယာဉ်များကို တစ်နာရီလျှင် ကီလို ၁၀၀ ၊ ခရီးသည်တင် အဝေးပြေးယာဉ်များကို တစ်နာရီလျှင် ကီလိုမီတာ ၉၀ နှင့် လုပ်ငန်းသုံး ကုန်တင်ယာဉ်များကို တစ်နာရီလျှင် ကီလိုမီတာ ၆၀နှုန်း သတ်မှတ်ထားကြောင်း သိရသည်။

ရန်ကုန်-မန္တလေးအမြန်လမ်းမကြီးတစ်လျှောက်တွင် ၂၀၂၂ ခုနှစ် ဇန်နဝါရီလ တစ်ရက်မှ ဇူလိုင်လ ဒုတိယပတ်ထိ သတ်မှတ်ကီလိုကျော်လွန်မောင်းနှင်းခဲ့သည့် ယာဉ်စီးရေ ၅၀၆၄ စီးကို ဖမ်းဆီးအရေးယူနိုင်ခဲ့ကြောင်း အမြန်လမ်း ရဲတပ်ဖွဲ့မှူးရုံး၏ စာရင်းများအရ သိရသည်။

ymg/mt
#Yangon_Media_Group

#Local_News
Published 28 July 2022

မန္တလေးတိုင်း၊ မဟာအောင်မြေမြို့နယ်၊ ချမ်းမြသာစည်မြောက်ရပ်ကွက်၊ ၇၉ လမ်းနှင့် ၄၂ လမ်းကြား ဂုံးကျော်တံတားအောက်ရှိ ရထားလမ်းတွင် ယမန်နေ့ မွန်းတည့် ၁၂ နာရီ ၁၅ မိနစ်ခန့်ကဖြစ်ပွားခဲ့ခြင်းဖြစ်ကြောင်း သိရသည်။

ဖြစ်စဉ်တွင် ချမ်းမြသာစည်မြောက်ရပ်ကွက်နေ ဦးသန့်ဇင်(၆၁)နှစ်သည် ဆိုင်ကယ်ဖြင့် မောင်းနှင်လာကာ ရထားလမ်းအား အရှေ့မှအနောက်သို ဖြတ်ကူးစဉ် ရန်ကုန်ဘက်မှ မန္တလေးဘူတာသို့ဝင်လာသည့် အမှတ်(၃)ရန်ကုန်-မန္တလေး ခရီးသည်တင် အဆန်ရထားဖြင့်တိုက်မိခဲ့ခြင်းဖြစ်သည်။

ယင်းကဲ့သို့ တိုက်မိခဲ့သဖြင့် ဦးသန့်ဇင်တွင် ယာပါးပေါက်ပြဲဒဏ်ရာ၊ ဝဲပါးဖူးရောင်ဒဏ်ရာ နှာခေါင်းသွေးထွက်ဒဏ်ရာ(စိုးရိမ်ရ)ရရှိခဲ့သဖြင့် မဏိစလ လူမူ့ကူညီရေးအသင်းကားဖြင့် မန္တလေးမြို့ပြည်သူ့ဆေးရုံကြီးသို့ ဆေးကုသမှုခံယူရန် ပို့ဆောင်ပေးခဲ့ကြောင်း သိရသည်။

ymg/NN
#Yangon_Media_Group