#LocalNews
Published_20 March 2022

ထိုင်းနိုင်ငံရောက်မြန်မာနိုင်ငံသားများအား ဘန်ကောက် မြန်မာသံရုံးတွင် နိုင်ငံကူးလက်မှတ်ကိစ္စ နေ့ချင်းပြီး လုပ်ပေးနေကြောင်း မြန်မာရွှေ့ပြောင်းလုပ်သားများအရေး ဆောင်ရွက်နေသူများထံမှ သိရသည်။

ဘတ်ကောက်မြို့ မြန်မာသံရုံးအနေဖြင့် မြန်မာနိုင်ငံသားများ၏ ကောင်စစ်ဆိုင်ရာ ဝန်ဆောင်မှုလုပ်ငန်းများကို တိုးမြှင့်ဆောင်ရွက်ပေးနိုင်ရန်အတွက် နိုင်ငံကူးလက်မှတ် ထုတ်ပေးသည့် စက်တစ်စုံထပ်မံတိုးချဲ့ တပ်ဆင်ခြင်း၊ ဝန်ထမ်းအင်အားတိုးမြှင့်ခန့်ထားခြင်း၊ ကောင်စစ်ခန်းမတိုးချဲ့ဆောက် လုပ်ခြင်းများ စီစဉ်လျက်ရှိကြောင်း၊ ယခုအခါ သာမန်နိုင်ငံကူးလက်မှတ်နှင့် MOU အလုပ်သမားတို့ ၏နိုင်ငံကူးလက်မှတ် သက်တမ်းတိုးခြင်းလုပ်ငန်းများကို မတ်လ ၁၄ ရက်ကစ၍နေ့ချင်းပြီး ဆောင်ရွက်ပေးနေခြင်း ဖြစ်ကြောင်း သိရသည်။

"မနက်ဖြန် မတ်လ ၂၁ ရက်နေ့က စပြီးတော့ ကြိုတင်ရက်ချိန်း ချိန်းဆိုတဲ့စနစ်နဲ့ တစ်နေ့ကိုလူ အယောက် ၄၀၀ ကျော် ကို နေ့ချင်းပြီးလုပ်ပေးမယ်လို့ သိရတယ်"ဟု မြန်မာရွှေ့ပြောင်းလုပ်သားများအရေး ဆောင်ရွက်နေသူတစ်ဦးကပြောသည်။

လျှောက်ထားလိုသူများအနေဖြင့် နိုင်ငံကူးလက်မှတ်နှင့်အတူ သံရုံးသို့ ကိုယ်တိုင်လာရောက်၍ တိုကင် (Token) ရယူပြီး ချိန်းဆိုရက်တွင် သံရုံးသို့ သွားရောက်ရမည် ဖြစ်ကြောင်း၊ မည်သူမည်ဝါဖြစ်ကြောင်း သက်သေခံလက်မှတ်နှင့် ထောက်ခံစာပြုလုပ်လို သည့် မြန်မာနိုင်ငံသားများအနေဖြင့် ကြိုတင်ရက်ချိန်းရယူရန် လုံးဝမလိုဘဲ တိုက်ရိုက်သွားရောက် လျှောက်ထားနိုင်ကြောင်းလည်း သိရသည်။

ymg/mt
Yangon_Media_Group 

#LocalNews
Published -20 Mar 2022
မတ်လ ၂၀ရက်နေ့ ယနေ့ နံနက်ပိုင်းက ရန်ကုန်တိုင်းဒေသကြီး သန်လျင်မြို့နယ် ဗိုလ်ချုပ်ကျေးရွာတွင် ရာအိမ်မှူးဟောင်းတစ်ဦးသေနတ်ဖြင့် ပစ်ခတ်ခံခဲ့ရတယ်လို့ ရန်ကုန်တိုင်းဒေသကြီးရဲတပ်ဖွဲ့ ကနေသိရပါတယ်။

ဖြစ်စဥ်မှာ ယနေ့ နံနက်၁၁နာရီအချိန်ခန့်က သန်လျင်မြို့.နယ်၊ ဗိုလ်ချုပ်ကျေးရွာ၊ ပါရမီလမ်းတွင် ပစ်ခတ်မှုဖြစ်ပွားခဲ့ပြီး အခင်းဖြစ်နေရာကို လုံခြုံရေးအဖွဲ့ က သွားရောက်စစ်ဆေးခဲ့ရာပစ်ခတ်ခံရသူမှာ ဗိုလ်ချုပ်ကျေးရွာနေသူ ရပ်ကွက်ရာအိမ်မှူးဟောင်းဦးထွေးသိန်းဆိုသူဖြစ်ကာစက်ဘီးစီးလာစဥ် အမျိုးသား ၂ ဦးမှ ဆိုင်ကယ်ဖြင့်ရောက်ရှိလာပြီး ပစ်ခတ်ခဲ့တာလို့ သိရပါတယ်။

'စစ်ဆေးချက်အရ ရာအိမ်မှူးဟောင်းတစ်ဦးဖြစ်ပါတယ်။ သေနတ်ဒဏ်ရာသုံးချက်ရရှိပြီးသေဆုံးသွားပါတယ် ပိတ်ဆို့ စစ်ဆေးတာတွေလုပ်နေပါတယ်"လို့ ရဲအရာရှိတစ်ဦးကပြောပါတယ်။

အဆိုပါပစ်ခတ်မှုကြောင့် ဦးထွေးသိန်း တွင် ယာတင်ပါး ဖောက်ထွင်းဒဏ်ရာ နှစ်ချက်နဲ့ခါးဖောက်ထွင်းဒဏ်ရာတစ်ချက်ရရှိခဲ့ကာ အခင်းဖြစ်နေရာတွင် သေဆုံးသွားခဲ့တာဖြစ်ပြီးပစ်ခတ်မှုကျူးလွန်သူတွေကို ဖမ်းဆီးရမိရေးပိတ်ဆို့ စစ်ဆေးနေတယ်လို့ သိရပါတယ်။

ymg/hm
#Yangon_Media_Group 

#LocalNews
Published - 20 Mar 2022

ရန်ကုန်တိုင်းဒေသကြီး၊ ရန်ကင်းမြို့ နယ်၊ ရွှေပြည်သာမြို့နယ်တို့ တွင် မူးယစ်ဆေးဝါးများနှင့် ကွင်းဆက်တရားခံအား ထပ်မံဖမ်းဆီးရမိခဲ့ တယ်လို့ မူးယစ်ဆေးဝါးနဲ့တားဆီးနှိမ်နှင်းရေးရဲတပ်ဖွဲ့ ကနေသိရပါတယ်။

မတ်လ ၁၉ ရက်နေ့ နံနက်၁၁နာရီအချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ မှ တပ်ဖွဲ့ ၀င်များပါ၀င်သော ပူးပေါင်း အဖွဲ့ သည် သတင်းအရ သက်သေများနှင့်အတူ ရန်ကင်းမြို့ နယ်၊ (၂)ရပ်ကွက်၊ ဆရာစံလမ်းတွင် လမ်းလျှောက်လာသူ အောင်နိုင်သူ အားစစ်ဆေးရှာဖွေရာ ၎င်းထံမှ စိတ်ကြွရူးသွပ်ဆေးပြား ၃၀၀၀၀ ပြား (ဒေသကာလပေါက်စျေး တန်ဖိုးငွေကျပ်သိန်း ၃၀၀)နှင့် လက်ကိုင်ဖုန်း ၁ လုံးတိုအား တွေ့ရှိသိမ်းဆည်းရမိခဲ့ပြီး ပေါ်ပေါက်ချက်အရ မွန်းတည့်၁၂နာရီ၃၀မိနစ်အချိန် ၎င်းနေထိုင်သည့် မြောက်ဥက္ကလာပမြို့ နယ်၊ ရွှေပေါက္ကံမြို့ သစ်၊ (၁၄) ရပ်ကွက်ခွဲ၊ တကောင်း(၁)လမ်းရှိနေအိမ်အား ၀င်ရောက်ရှာဖွေရာ နေအိမ်အတွင်းမှ စိတ်ကြွရူးသွပ်ဆေးပြား ၄၂၀၀ ပြား(ဒေသကာလပေါက်စျေးတန်ဖိုးငွေကျပ် ၄၂ သိန်း)နှင့် အိုက်စ်(မက်သ်အဖက်တမင်း)အလေးချိန် ၃၅ ဂရမ်(ဒေသကာလပေါက်စျေးတန်ဖိုးငွေကျပ် ၁၂.၂၅ သိန်း) တို့ အား ထပ်မံတွေ့ရှိသိမ်းဆည်းရမိခဲ့တယ်လို့ သိရပါတယ်။

ဆက်လက်ပြီးအဆိုပါနေ့ ၁နာရီ မိနစ်၄၀အချိန် ရွှေပြည်သာမြို့ နယ်၊ (၂၀)ရပ်ကွက်(သံဒင်း)၊ ပေါ်တော်မူလမ်းနေ တင်ကိုကျော် ၏ နေအိမ်အား ၀င်ရောက်ရှာဖွေရာ ၎င်းနှင့်အတူ ‌ ဒေါ်ဝေဝေထွန်း အားတွေ့ရှိပြီး နေအိမ်အတွင်းမှ စိတ်ကြွရူးသွပ် ဆေးပြား ၁၀၇၇၀ ပြား(ဒေသကာလပေါက်စျေးတန်ဖိုးငွေကျပ် ၁၀၇.၇ သိန်း)နှင့် လက်ကိုင်ဖုန်း ၂ လုံးတို့ အားတွေ့ရှိ သိမ်းဆည်းရမိခဲ့ပြီး ကွင်းဆက်ဖော်ထုတ်ချက်အရ မွန်းလွဲ၃နာရီအချိန် အဆိုပါစိတ်ကြွရူးသွပ်ဆေးပြားများရောင်းချသူ ကျော်မြင့် အားရွှေပြည်သာမြိုနယ်၊ (၁၉)ရပ်ကွက်၊ ဗိုလ်ချုပ်လမ်းတွင် TOYOTA BELTA အမျိုးအစား မော်တော်ယာဉ် ၁ စီးနှင့် လက်ကိုင်ဖုန်း ၁ လုံးတို့ အား ထပ်မံဖမ်းဆီးရမိခဲ့တယ်လို့ သိရပါတယ်။

အဆိုပါ သိမ်းဆည်းရမိခဲ့သည့် မူးယစ်ဆေးဝါးများနှင့်စပ်လျဉ်း၍ အောင်နိုင်သူ(၃၈)နှစ်၊ တင်ကိုကျော် (၃၃) နှစ်၊ ဒေါ်ဝေဝေထွန်း(၆၀)နှစ်နှင့် ကျော်မြင့် (၃၇)နှစ်တို့ အား သက်ဆိုင်ရာရဲစခန်းများတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်များရေးဖွင့်အရေးယူထားရှိပြီး ကွင်းဆက်များ ဖော်ထုတ် လျက်ရှိတယ်လို့ သိရပါတယ်။
ymg/hm 

#LocalNews
Published_ 20 March 2022

ဆောက်လုပ်ရေးဝန်ကြီးဌာန၊ တံတားဦးစီးဌာနက တာဝန်ယူတည်ဆောက် နေသော အရှေ့အနောက် စီးပွားရေးစင်္ကြံလမ်းမကြီးပေါ်ရှိ JICA ODA ချေးငွေ ဖြင့် အတ္ထရံတံတား အသစ်တည်ဆောက်ရေးကို ဆောင်ရွက်လျက်ရှိကြောင်း သိရပါတယ်။

အတ္ထရံတံတားအသစ်တည်ဆောက်ရေး စီမံကိန်းသည် ပင်မတံတားအရှည် (၃၂၆) မီတာ၊ ချဉ်းကပ်တံတား (၁၅၄) မီတာ၊ တံတားအပေါ်ထည် ပင်မတံတား ၃ ခန်းတွဲ သံမဏိကြိုးဆိုင်းတံတား အမျိုးအစားဖြစ်ပါတယ်။

ချဥ်းကပ်တံတား T ပုံသဏ္ဌာန် ကြိုတင်အားဖြည့် ကွန်ကရစ်ယက်မဖြင့်တည် ဆောက်ထားသော နှစ်ခန်းဆက်ကြိုတင်အားဖြည့် သံကူကွန်ကရစ်တံတား ဖြစ်ပါတယ်။
တံတား အကျယ် ၂၀ ဒသမ ၇ မီတာ လေးလမ်းသွား ၊ တံတားခွင့်ပြုတန်ချိန် HL -93 Loading (AASHTO)၊ ယာဉ်တစ်စီးချင်း ခွင့်ပြုတန်ချိန် (၆၀) ဖြစ်ကြောင်း၊ စီမံကိန်း ကာလ ၃၉ လ သတ်မှတ်ထားရာ ယခုအခါ (၁ ဒသမ ၆၃) ရာခိုင်နှုန်း ပြီးစီးနေပြီဖြစ်ပါတယ်။

နစကကောင်စီအဖွဲ့ ဝင်များနှင့် တာဝန်ရှိသူများသည် အဆိုပါတံတားသစ် တည်ဆောက်ရေး စီမံကိန်းသို့ လာရောက်ကြည့်ရှုစစ်ဆေးကြပြီး သိရှိလိုသည့် အချက်များကို မေးမြန်း ဆွေးနွေးကြရာ စီမံကိန်းရှင်းလင်းဆောင်တွင် တံတားဦးစီးဌာန အင်ဂျင်နီယာချုပ် (မြို့ ပြ) ဦးကျော်စွာထွန်းက စီမံကိန်းဆိုင်ရာ ဆောင်ရွက်မှုများကို ရှင်းလင်းတင်ပြခဲ့ကြောင်း သိရပါတယ်။
#ymg_mnn
Yangon_Media_Group 

#LocalNews
Published_ 20 March 2022

ဆောက်လုပ်ရေးဝန်ကြီးဌာန၊ တံတားဦးစီးဌာနက တာဝန်ယူတည်ဆောက် နေသော အရှေ့အနောက် စီးပွားရေးစင်္ကြံလမ်းမကြီးပေါ်ရှိ JICA ODA ချေးငွေ ဖြင့် အတ္ထရံတံတား အသစ်တည်ဆောက်ရေးကို ဆောင်ရွက်လျက်ရှိကြောင်း သိရပါတယ်။

အတ္ထရံတံတားအသစ်တည်ဆောက်ရေး စီမံကိန်းသည် ပင်မတံတားအရှည် (၃၂၆) မီတာ၊ ချဉ်းကပ်တံတား (၁၅၄) မီတာ၊ တံတားအပေါ်ထည် ပင်မတံတား ၃ ခန်းတွဲ သံမဏိကြိုးဆိုင်းတံတား အမျိုးအစားဖြစ်ပါတယ်။

ချဥ်းကပ်တံတား T ပုံသဏ္ဌာန် ကြိုတင်အားဖြည့် ကွန်ကရစ်ယက်မဖြင့်တည် ဆောက်ထားသော နှစ်ခန်းဆက်ကြိုတင်အားဖြည့် သံကူကွန်ကရစ်တံတား ဖြစ်ပါတယ်။
တံတား အကျယ် ၂၀ ဒသမ ၇ မီတာ လေးလမ်းသွား ၊ တံတားခွင့်ပြုတန်ချိန် HL -93 Loading (AASHTO)၊ ယာဉ်တစ်စီးချင်း ခွင့်ပြုတန်ချိန် (၆၀) ဖြစ်ကြောင်း၊ စီမံကိန်း ကာလ ၃၉ လ သတ်မှတ်ထားရာ ယခုအခါ (၁ ဒသမ ၆၃) ရာခိုင်နှုန်း ပြီးစီးနေပြီဖြစ်ပါတယ်။

နစကကောင်စီအဖွဲ့ ဝင်များနှင့် တာဝန်ရှိသူများသည် အဆိုပါတံတားသစ် တည်ဆောက်ရေး စီမံကိန်းသို့ လာရောက်ကြည့်ရှုစစ်ဆေးကြပြီး သိရှိလိုသည့် အချက်များကို မေးမြန်း ဆွေးနွေးကြရာ စီမံကိန်းရှင်းလင်းဆောင်တွင် တံတားဦးစီးဌာန အင်ဂျင်နီယာချုပ် (မြို့ ပြ) ဦးကျော်စွာထွန်းက စီမံကိန်းဆိုင်ရာ ဆောင်ရွက်မှုများကို ရှင်းလင်းတင်ပြခဲ့ကြောင်း သိရပါတယ်။
#ymg_mnn
Yangon_Media_Group 

#LocalNews
Published - 20 Mar 2022
၂၀၂၂-ခုနှစ်၊ မတ်လ (၃၁) ရက်နေ့ မှ ဧပြီလ (၉) ရက်နေ့အထိ ကျင်းပမယ့်တက္ကသိုလ်ဝင်စာမေးပွဲ ကို ဖြေဆိုခွင့် လျှောက်ထားကြသော ကျောင်းသား/ ကျောင်းသူများအနေနဲ့ ဖြေဆိုခွင့်ကတ်ပြားတွေကို မတ်လ ၂၄ရက်နေ့မှ စတင်ထုတ်ယူနိုင်ပြီလို့ မြန်မာနိုင်ငံစာစစ်ဦးစီးဌာနကထုတ်ပြန်လိုက်ပါတယ်။

တိုင်းဒေသကြီး/ပြည်နယ်များရှိ စာစစ်ဌာနအသီးသီးတွင် ဖြေဆိုကြမယ့် ကျောင်းသား/ ကျောင်းသူများသည် မိမိတို့ ၏ ဓာတ်ပုံကပ်ထားသည့် ခုံအမှတ်စဉ်ပါသော စာမေးပွဲ ဖြေဆိုခွင့်ကတ်ပြား (Identity Card) များကို ၂၀၂၂-ခုနှစ်၊ မတ်လ ( ၂၄ )ရက် ကြာသပတေး နေ့မှစတင်ထုတ်ယူနိုင်ပြီးအခြေခံပညာအထက်တန်းကျောင်း၊ (ကျောင်းခွဲ) နှင့် (တွဲဖက်) အခြေခံပညာ အထက်တန်း ကျောင်း၊ ကိုယ်ပိုင်အထက်တန်းကျောင်းမှ ကျောင်းသား/ကျောင်းသူများသည် မိမိတို့ ၏ စာမေးပွဲဖြေဆိုခွင့်ကတ်ပြား (Identity Card) များကို မိမိတို့ ကျောင်းအုပ်ကြီးများထံမှ ထုတ်ယူကြရမယ်လို့ သိရပါတယ်။

ပြင်ပမှ ဖြေဆိုသူများသည် စာမေးပွဲဖြေဆိုခွင့်ကတ်ပြား (Identity Card) များကို မိမိတို့ ဖြေဆိုရမည့် စာစစ်ဌာနကြီးကြပ်ရေးမှူးများထံမှ ထုတ်ယူကြရမှာဖြစ်သလိုကျောင်းသား/ကျောင်းသူများအနေဖြင့် စာမေးပွဲဖြေဆိုခွင့်ကတ်ပြား (Identity Card) များ ထုတ်ယူရာတွင် အခက်အခဲရှိပါက သက်ဆိုင်ရာ ကျောင်းအုပ်ကြီးများ၊ စာစစ်ဌာန ကြီးကြပ်ရေးမှူးများ၊ မြို့ပညာရေးမှူးများနှင့် မြန်မာနိုင်ငံစာစစ်ဦးစီးဌာနထံ တိုက်ရိုက်စုံစမ်းမေးမြန်းနိုင်တယ်လို့ သိရပါတယ်။

ymg/hm
#Yangon_Media_Group 

Published 20 March 2022

သီရိလင်္ကာနိုင်ငံမှာ သန်းပေါင်းများစွာသော ကျောင်းသူကျောင်းသားတွေအတွက် ပုံနှိပ်စက္ကူတွေ မလုံလောက်လို့  စာမေးပွဲတွေကို ရွှေ့ဆိုင်းလိုက်ရပါတယ်။ သီရိလင်္ကာအနေနှင့် စက္ကူတွေ တင်သွင်းဖို့ နိုင်ငံခြားငွေ မလုံမလောက်ဖြစ်နေတာကြောင့် ယခုလို စာမေးပွဲတွေ ရက်ရွှေ့လိုက်ရတာဖြစ်တယ်လို့ အရာရှိတွေကပြောပါတယ်။

၁၉၄၈ခုနှစ် လွတ်လပ်ရေးရပြီးကတည်းက အဆိုးရွားဆုံးဘဏ္ဍာရေးအကျပ်အတည်းဖြစ်လာနေတဲ့ သီရိလင်္ကာမှာ စက္ကူပြတ်တောက်မှုအကြီးအကျယ်ဖြစ်နေတဲ့အတွက် လာမယ့်တနင်္လာနေ့ကစပြီး တစ်ပတ်ကြာကျင်းပမယ့် အစမ်းစာမေးပွဲတွေကို သေချာပေါက် ရွှေ့ဆိုင်းလိုက်ရတာဖြစ်တယ်လို့ ပညာရေးအာဏာပိုင်တွေက ပြောပါတယ်။

“ လိုအပ်တဲ့ စက္ကူတွေနှင့် မင်တွေကို တင်သွင်းဖို့ နိုင်ငံခြားငွေ မရရှိတဲ့အတွက် ကျောင်းအုပ်တွေဟာ စာမေးပွဲတွေ စစ်ဆေးမပေးနိုင်ပါဘူး” လို့ အနောက်ပိုင်းပြည်နယ် ပညာရေးဌာနက ပြောပါတယ်။

အဲဒါကြောင့် တစ်နိုင်ငံလုံးမှာရှိတဲ့ ကျောင်းသားကျောင်းသူ ၄.၅သန်း ရဲ့ သုံးပုံနှစ်ပုံခန့် စာမေးပွဲမဖြေရပဲရှိနိုင်တယ်လို့လည်း အရာရှိတွေကပြောပါတယ်။

အစမ်းစာမေးပွဲတွေဟာ စာသင်နှစ်ကုန်တဲ့အချိန်မှာ ကျောင်းသူကျောင်းသားတွေ နောက်နှစ် အတန်းတက်နိုင်ဖို့ ဆုံးဖြတ်နိုင်အောင် စဉ်ဆက်မပြတ်အကဲဖြတ်တဲ့ စာမေးပွဲတွေရဲ့ အစိတ်အပိုင်းတစ်ခုဖြစ်ပါတယ်။

စီးပွားရေးအကျပ်အတည်းကြောင့် အရန်နိုင်ငံခြားငွေမလုံလောက်မှုဖြစ်ကာ  မရှိမဖြစ်လိုအပ်တဲ့ သွင်းကုန်တွေအတွက် အခက်တွေ့နေတာပါ။ သီရိလင်္ကာမှာ အစားအစာ၊လောင်စာဆီနှင့် ဆေးဝါးတွေ နည်းပါးမှုနှင့်လည်းကြုံနေရပါတယ်။

လူဦးရေ၂၂သန်းရှိတဲ့ တောင်အာရှနိုင်ငံဖြစ်တဲ့ သီရိလင်္ကာက ယင်းရဲ့ နိုင်ငံခြားကြွေးမြီအကျပ်အတည်းကိုဖြေရှင်းပေးဖို့နှင့် ပြည်ပအရန်ငွေကြေးဖြည့်တင်းပေးဖို့ နိုင်ငံတကာငွေကြေးရန်ပုံငွေအဖွဲ့ IMF ဆီက အကူအညီရယူမယ်လို့ဒီတစ်ပတ်ထဲမှာ ကြေညာထားပါတယ်။

သမ္မတ ဂိုတာဘာရာ ရာဂျာပါဆာရဲ့ မထင်မှတ်ထားတဲ့ အကူအညီတောင်းခံမှုကို စဉ်းစားနေတယ်လို့  IMF က သောကြာနေ့က အတည်ပြုပြောဆိုပါတယ်။

ဒီနှစ်အတွင်းမှာ သီရိလင်္ကာဟာ နိုင်ငံခြားကြွေးမြီ အမေရိကန်ဒေါ်လာ ၆.၉ ဘီလျံပေးဆပ်ဖို့ရှိနေပြီး အရန်နိုင်ငံခြားငွေက လည်း ဖေဖော်ဝါရီလကုန်အထိ ဒေါ်လာ ၂.၃ ဘီလျံပဲကျန်ရှိနေပါတယ်။

နိုင်ငံအနှံ့မှာ ကုန်စုံနှင့် စားသုံးဆီတွေကို တန်းအရှည်ကြီးစီပြီးဝယ်ယူနေကြရပါတယ်။ လျှပ်စစ်မီးပြတ်တောက်မှုတွေနှင့် နို့မှုန့်၊သကြား၊ပဲနီကလေးနှင့်ဆန်တွေကို ခွဲတမ်းနှင့် ဝယ်ယူနေကြရပါတယ်။

သီရိလင်္ကာဟာ ယင်းရဲ့ အဓိက မြီရှင်နိုင်ငံတွေထဲက တစ်နိုင်ငံဖြစ်တဲ့ တရုတ်နိုင်ငံကို အကြွေးတွေဆိုင်းထားဖို့ အကူအညီ တောင်းထားပါတယ်။ ဒါပေမယ့် ယခုထက်ထိတော့ တရုတ်ဘက်က တရားဝင်အကြောင်းပြန်ကြားခြင်းမရှိသေးပါဘူး။

Source AFP

#LocalNews
Published - 20 Mar 2022

ရွှေကျင်နိကာယ ဥက္ကဋ္ဌ၊ မဟာနာယက ဓမ္မသေနာပတိ၊ ပန္နရသမ ရွှေကျင်သာသနာပိုင်၊ မရမ်းကုန်းမြိုနယ်၊ ဝိဇ္ဇောတာရုံ ပရိယတ္တိစာသင်တိုက်ကြီး၏ အာရာမိဿ မူလအာဒိကမ္မိက ကျောင်းတိုက်တည်ဆရာတော်ကြီး၊အဘိဓဇမဟာရဋ္ဌဂုရု၊နိုင်ငံတော်ဩဝါဒါစရိယ ဆရာတော်ကြီးသက်တော် {၉၃} နှစ်၊သိက္ခာဝါတော်{၇၃}ဝါ သည် ယနေ့ ၁၃၈၃ - ခုနှစ်တပေါင်းလပြည့်ကျော် ၄ရက်၊ ၂၀၂၂ခုနှစ် မတ်လ ၂၀ရက်တနင်္ဂနွေနေ့၊ နံနက် ၂နာရီ ၁၂မိနစ်အချိန်တွင် တစ်ဘဝခန္ဓာ ချုပ်ငြိမ်းကာပျံ လွန်တော်မူသွားပြီဖြစ်ကြောင်းတပည့် သံဃာတော်တွေဆီကနေသိရပါတယ်။

ပန္နရသမ( ၁၅ )ပါးမြောက်၊ရွှေကျင်သာသနာပိုင်ဆရာတော်ကြီးနိုင်ငံတော်သြဝါဒါစရိယဘဒ္ဒန္တ ဝိဇ္ဇောတမဟာထေရ်သည် မွန်ပြည်နယ်၊ မုဒုံမြို့ ၊ စာစင်ရပ်၊ ခမည်းတော် ဦးနု၊ မယ်တော် ဒေါ်ထား တို့ မှ ၁၂၉၁ ခုနှစ်၊ တပေါင်းလဆန်း ( ၇ ) ရက် ဗုဒ္ဓဟူးနေ့ တွင် ဖွားမြင်တော်မူကာ၁၃၁၄ ခုနှစ်၊ ကဆုန်လပြည့်နေ့ တွင် မုဒုံမြို၊ စာစင်ရပ်၊ ကျောင်းဝိုင်းကျောင်းတိုက်၊ ဆရာတော် ဥုးဇဝန ကို ဥပဇ္ဈာယ် ပြု၍ မိဘနှစ်ပါး၏ ပစ္စယာနုဂ္ဂဟ ဖြင့် ရှင်သာမဏေအဖြစ်သိုရောက်ရှိခဲ့တယ်လို့ သိရပါတယ်။

၁၃၁၁ ခုနှစ် နယုန်လဆန်း ( ၈ ) ရက်နေ့တွင် ရန်ကုန်မြို့ ၊ ဗဟန်းမြို့ နယ် ကံသာကျောင်းသစ်ကျောင်း သီလဝိသောဓနီ သိမ်တော်၌ ကျောက်ဝိုင်းကျောင်းတိုက် ဆရာတော် ဥူးဇဝန ကိုပင် ဥပဇ္ဈာယ် ပြု၍ ရန်ကုန်မြို့ ၊ မောင်ခိုင်လမ်း၊ ဘုံဘေဘားမား ပရိဘောဂတိုက် ပိုင်ရှင် ဦးဖေသိန်း+ဒေါ်ကြင်ရန် တို့ ၏ ပစ္စယာနုဂ္ဂဖြင့် မြင့်မြတ်သောရဟန်း အဖြစ်သို့ ရောက်ခဲ့ကာမုဒုံမြို့ ၊ ကျောက်ဝိုင်းကျောင်းတိုက် ဆရာတော် ဥူးဇဝန၊ မော်လမြိုင်မြို့ ၊ မဟာမြိုင်ရွှေကျင်ကျောင်းတိုက် ဆရာတော် ဥူးရေဝတ၊ မြောင်းမြမြို့ ၊ ပဇ္ဇောတာရုံ ပါဠိတက္ကသိုလ်ကျောင်းတိုက်၊ ဒသမရွှေကျင်သာသနာပိုင် မြောင်းမြဆရာတော်၊ တိုက်အုပ်ဆရာတော် ဥူးဉာနိက စသော ဆရာတော်တို့ ထံ၌ ပညာသင်ကြားခဲ့ပါတယ်။

၁၃၁၈ ခုနှစ်တွင် သာသနာ့ဓဇသိရီပဝရ ဓမ္မာစရိယ သိရောမဏိဘွဲ့ ၊ ကမ္ဘာအေး ဗုဒ္ဓတက္ကသိုလ်မှ Dip.BD ဘွဲ့ ၊ ၁၃၅၃ ခုနှစ်တွင် အဂ္ဂမဟာဂန္ထဝါစကပဏ္ဍိတ ဘွဲ့ ၁၃၅၄ ခုနှစ် တွင် အဂ္ဂမဟာပဏ္ဍိတ ဘွဲ့ ၊ ၁၃၆၀ ခုနှစ်တွင် ပရိယတ္တိသာသနာဟိတဓရ ဘွဲ့ တို့ ရရှိခဲ့ပါသည်။ မြောင်းမြမြို့ ပဇ္ဇောတာရုံ ပါဠိတက္ကသိုလ်ကျောင်းတိုက်၌ ပါဠိတက္ကသိုလ်ကထိက၊ ရန်ကုန်မြို့ ၊ ဝိဇ္ဇောတာရုံ စာသင်တိုက် ကိုတည်ထောင်၍ ပဓာနနာယကဆရာတော်အဖြစ် သက်တော် ( ၈၇ ) အထိ စာပေကျမ်းဂန်များကို ပို့ ချခဲ့ပါတယ်။

ဆရာတော်သည် ပါဠိတက္ကသိုလ်ကထိက၊ ဂိုဏ်းပေါင်းစုံသံဃအစည်းအဝေး ပထမအကြိမ် ရန်ကုန်တိုင်း မရမ်းကုန်းမြို့ ဝိနည်းဓိုရ် ( ရွှေကျင်)၊ ဒုတိယအကြိမ်၊ တတိယအကြိမ် မရမ်းကုန်းမြို့ နယ် သံယနာယကအဖွဲ့ ( ရွှေကျင်) ဥက္ကဋ္ဌ၊ ကမ္ဘာအေးစေတီတော် သြဝါဒစရိယ၊ ရွှေကျင်နိကာယဂိုဏ်းလုံးဝန်ဆောင်၊ ရန်ကုန်တိုင်း ဝိနည်းပြန်ဌာန ဒုတိယဂိုဏ်းချုပ်ဆရာတော်အဖြစ် သာသနာ့တာဝန်များကို ထမ်းဆောင်ခဲ့သလိုဧကူနဝီသတိမ( ၁၉ - ကြိမ်မြောက်) ရွှေကျင်နိကာယသံယာ့ အစည်းအဝေးကြီး၌မူ " ရွှေကျင်နိကာယ ဥပဥက္ကဋ္ဌ မဟာနာယက ” ဟူသော ဘွဲအမည်ဖြင့် ရွှေကျင်ဂိုဏ်းကြီး၏ အဆင့်အမြင့် ဆုံး အာဏာပိုင်အဖွဲ့ တွင် ပါဝင်ခွင့် ရခဲ့ပြန်ပါတယ်။

၁၃၇၈ ခုနှစ် တပို့ တွဲလဆုတ် ( ၇ ) ရက်နေ့တွင် ရွှေကျင်ဂိုဏ်းကြီး၏ အကြီးအကဲ " ရွှေကျင်နိကာယ ဓိပတိဥက္ကဋ္ဌ မဟာနာယက ” ပန္နရသမ ( ၁၅ ) ပါး မြောက် ရွှေကျင်သာသနာပိုင် အဖြစ်တင်မြှောက်ခြင်းခံရကာသာသနာ့အကျိုး သည်ပိုးဆောင်ရွက်တော်မူသဖြင့် နိုင်ငံတော်အစိုးရက ၂၀၁၈ ခုနှစ်တွင် အဘိဓဇမဟာရဋ္ဌဂုရု ဘွဲ့ တံဆိပ်တော်ကို ဆက်ကပ်လှူဒါန်းခဲ့ပါတယ်။

ymg/hm
#Yangon_Media_Group 

#LocalNews
Published -20 Mar 2022
ရန်ကုန်တိုင်းဒေသကြီး၊မြောက်ဒဂုံမြို့နယ်အမှတ် ၃၂ ရပ်ကွက် အုပ်ချုပ်ရေးမှူးရုံးကိုယနေ့ နံနက်အစောပိုင်းကအမည်မသိသေနတ်သမားများက လာရောက်ပစ်ခတ် ခဲ့မှု ဖြစ်ပွားခဲ့တယ်လို့ ရန်ကုန်တိုင်းဒေသကြီးရဲတပ်ဖွဲ့ ရဲ့သတင်းတွေအရသိရပါတယ်။

ဖြစ်စဥ်မှာမတ်လ ၂၀ရက် နံနက် ၄နာရီကျော်ခန့် အချိန်က ဒဂုံမြို့သစ်(မြောက်ပိုင်း)မြို့ နယ်၊ (၃၂)ရပ်ကွက်၊ ဘုရင့်နောင် လမ်းနှင့် ရွှေပြည်သာ(၂) လမ်းထောင့်ရှိ ရပ်ကွက်အုပ်ချုပ်ရေးမှူးရုံးအား သေနတ်ဖြင့် ပစ်ခတ်သွားကြောင်း သတင်းအရ လုံခြုံရေးတပ်ဖွဲ့တွေကသွားရောက်စိစစ်ရာ ဘုရင့်နောင်လမ်းပေါ်မှ နေ၍ Hijet ယာဉ်(စိစစ်ဆဲ)က ရပ်ကွက်အုပ်ချုပ်ရေးမှူးရုံးအား သေနတ်ဖြင့် ပစ်ခတ်ခဲ့ တယ်လို့ သိရပါတယ်။

အဆိုပါပစ်ခတ်မှုကိုရပ်ကွက်ရုံးအတွင်း လုံခြုံရေးဆောင်ရွက်နေ လူ (၁၀)ဦးခန့် ရှိသော်လည်း ပစ်ခတ်မှုကြောင့် လူ ထိခိုက်မှု မရှိဘဲ ရပ်ကွက်ရုံးရှိ သွပ်ပြား နှင့် ရေသွယ်တန်းထားသည့် PVC ပိုက် တို့ အား ထိမှန်ခဲ့ကြောင်း၊ ရပ်ကွက်ရုံးရှိ လုံခြုံရေးအဖွဲ့ များမှ လိုက်လံ အော်ဟစ်ခဲ့သဖြင့် ၎င်း Hijet ယာဉ်မှာ ဘုရင့်နောင်လမ်းအတိုင်း မောင်းနှင်ပြီး ဗိုလ်ကြာညွန့်လမ်းသွယ်အတွင်းသို့ ချိုးကွေ့စဉ် 40 MM ဟု ယူဆရသော အရာဖြင့် ထပ်မံ ပစ်ခတ်ခဲ့တယ်လို့ သိရပါတယ်။

"လာပစ်တာကို ရပ်ကွက်အုပ်ချုပ်ရေးမှူးရုံး လုံခြုံရေးအဖွဲ့တွေက နောက်ကလိုက်တော့ ၄၀ မမ ဗုံးသီးနဲ့ ပစ်ပြီးထွက်ပြေးသွားပါတယ် ။ပစ်ခတ်မှုကြောင့် လူနေအိမ်တစ်လုံးထိခိုက်သွားပါတယ်"လို့ ရဲအရာရှိတစ်ဦးကပြောပါတယ်။

အဆိုပါ 40 MMဖြင့်ပစ်ခတ်ခဲ့မှုကြောင့်ဗိုလ်ကြာညွန့်လမ်းသွယ်၊ အမှတ်(၁၃၃/အေ) (၃)ထပ်နေအိမ် အပေါ်ဆုံးထပ် ခေါင်းရင်းဘက် အုတ်နံရံအား ထိမှန်ခဲ့ ကာထိမှန်မှုကြောင့် အုတ်နံရံ အနည်းငယ် ပျက်ဆီး၊ ပြတင်းပေါက်မှန်(၁)ချပ်နဲ့ လေကာမှန်တို့ ပျက်ဆီးခဲ့တယ်လို့ သိရပါတယ်။

ပစ်ခတ်မှု ဖြစ်ပွားတဲ့ရပ်ကွက်အုပ်ချုပ်ရေးမှူးရုံးအနီးမှ 9 MM THAI ARMS ကျည်ခွံ (၁၂)ခုနဲ့ ကျည်ထိပ်ဖူး (၂)ခု၊ 40MM ထိမှန်ခဲ့သည့်နေအိမ် အနီးမှ သတ္တူ အပိုင်းအစ (၁)ခု တွေ့ရှိခဲ့ရတယ်လို့ သိရပါတယ်။

ymg/hm
#Yangon_Media_Group 

#LocalNews
Published_ 20 March 2022

လျှပ်စစ်မီးတွေပြတ်တောက်ပြီး အလှည့်ကျမီးပေးနေရတဲ့ ယခုအချိန်မှာ လျှပ်စစ်ဓာတ်အားပိုမိုရရှိစေဖို့ အတွက် ရွှေဓာတ်ငွေ့ကို အသုံးပြု၍ လျှပ်စစ်ဓာတ်အား ၁၉၅ မဂ္ဂါဝပ်နှင့် ကုန်းတွင်းဓာတ်ငွေ့ အသုံးပြု၍ ဓာတ်အား ၃၀ မဂ္ဂါဝပ်ဖြင့် စုစုပေါင်း လျှပ်စစ်ဓာတ်အား ၂၂၅ မဂ္ဂါဝပ်အထိ ပိုမိုရရှိဖိုဆောင်ရွက်နေတယ်လို့ သတင်းထုတ်ပြန်ချက်အရ သိရပါတယ်။

နစကရဲ့ လျှပ်စစ်နှင့်စွမ်းအင်ဝန်ကြီးဌာနဝန်ကြီး ဦးအောင်သန်းဦးသည် ရခိုင်ပြည်နယ် ကျောက်ဖြူမြို့နယ်၌လက်ရှိဓာတ်အားထုတ်လုပ် မောင်းနှင်လျက်ရှိသော ဓာတ်အားပေး စက်ရုံများနှင့် စီမံကိန်းတို့ ကို သွားရောက်ကြည့်ရှုစစ်ဆေးခဲ့ရာမှာ သူက ပြောဆိုခဲ့တာဖြစ်ပါတယ်။

ကျောက်ဖြူဒေသမှရရှိသော ရွှေဓာတ်ငွေ့ ခွဲတမ်းကို တစ်ရက်လျှင် ကုဗပေသန်း ၂၀ အသုံးပြု၍ ယခင်က ၄၅ မဂ္ဂါဝပ် ဓာတ်ငွေ့ အင်ဂျင်သုံးဓာတ်အား ပေးစက်ရုံ (၂) ရုံဖြင့် ၉၀ မဂ္ဂါဝပ် ဓာတ်အားထုတ်လုပ်ခဲ့သော်လည်း အဆိုပါစက်ရုံများသည် ၂၀၂၁ ခုနှစ်တွင် သက်တမ်းကုန်ဆုံးခဲ့ပါတယ်။

၂၀၂၂ ခုနှစ်၌ တိုးတက်သုံးစွဲလာမည့် လျှပ်စစ်ဓာတ်အား ပမာဏကို ဖြည့်ဆည်းပေးနိုင်ရန် ရည်ရွယ်၍ ၄၅ မဂ္ဂါဝပ် စက်ရုံ (၁) ရုံကို သက်တမ်းတိုးပြီး ဆက်လက် ဓာတ်အားထုတ်လုပ်မောင်းနှင်ခဲ့တယ်လို့ ဆိုပါတယ်။

ထိုပြင် ကျောက်ဖြူဒေသ၌ ၁၅၀ မဂ္ဂါဝပ် LNG to Power ဓာတ်ငွေ့အင်ဂျင်သုံး ဓာတ်အားပေးစက်ရုံ (၁) ရုံ ကို ဆက်လက်အကောင်ထည် ဖော်ဆောင်ရွက်ခဲ့သော်လည်း LNG ဈေးနှုန်းများ အဆမတန်ကြီးမြင့်နေသည့်အတွက် ရရှိထားတဲ့ ရွှေဓာတ်ငွေ့ကို တစ်ရက်လျှင် ကုဗပေသန်း ၃၀ ပိုမိုရရှိနိုင်ရေး ညှိနှိင်းဆောင်ရွက်ခဲ့ပြီး ဓာတ်အား ထုတ်လုပ်နိုင်ရန် စီစဉ်ဆောင်ရွက်ခဲ့သဖြင့် (၁၅၀) မဂ္ဂါဝပ် တိုးမြှင့်ထုတ်လုပ်နိုင်ခဲ့တယ်လို့ သတင်းမှာဖော်ပြထားပါတယ်။

လက်ရှိ ကျောက်ဖြူဒေသတွင် ဓာတ်ငွေ့ဖြန့်ဖြူးပေးနေသည့် ပိုက်လိုင်းအခြေခံ အဆောက်အဦများ၏ အနေအထားအရ ရွှေဓာတ်ငွေ့ ကုဗပေ သန်း ၂၀ သာ ထုတ်ယူ သုံးစွဲနိုင်သောကြောင့် တစ်ရက်လျှင် ရွှေဓာတ်ငွေ့သန်း ၅၀ အထိ တိုးတက်ရယူသုံးစွဲနိုင်ရန် ပိုက်လိုင်း အခြေခံအဆောက်အဦများကို တိုးချဲ့ပြင်ဆင်ခြင်း လုပ်ငန်းများအား ဆောင်ရွက် လျက်ရှိကြောင်း သိရပါတယ်။

ထိုသို့ ဆောင်ရွက်နေစဉ်အတွင်း သက်တမ်းကုန်ဆုံးသွားသည့် ၄၅ မဂ္ဂါဝပ် ဓာတ်ငွေ့ အင်ဂျင်သုံးဓာတ်အားပေးစက်ရုံမှ အသုံးပြုခဲ့သော ရွှေဓာတ်ငွေ့တစ်ရက် ကုဗပေ ၁၀ သန်း ကို ၁၅၀ မဂ္ဂါဝပ် LNG to Power ဓာတ်ငွေ့အင်ဂျင်သုံး ဓာတ်အားပေးစက်အစား သဘာဝဓာတ်ငွေ့သုံးစက်ရုံသို ပြောင်းလဲထောက်ပံ့၍ ဖေဖော်ဝါရီ ၁၀ ရက်မှစတင်ကာ ၅၀ မဂ္ဂါဝပ်ကို တိုးမြှင့်ဓာတ်အား ထုတ်လုပ်ဖြန့်ဖြူး ပေးနိုင်ခဲ့ကြောင်း သက်ဆိုင်ရာကဝန်ကြီးဌာနက ပြောပါတယ်။

ထိုဓာတ်ငွေ့ဖြန့်ဖြူးပေးနေသည့် ပိုက်လိုင်းအခြေခံ အဆောက်အဦ တိုးချဲ့ပြင်ဆင် ခြင်း လုပ်ငန်းများသည်လည်း မေလတွင် ဆောင်ရွက်ပြီးစီးမည်ဖြစ်ကာ ဆောင်ရွက်ပြီးစီး ချိန်မှစတင်၍ ၁၅၀ မဂ္ဂါဝပ်အထိ တစ်ရက်လျှင် ရွှေဓာတ်ငွေ့ ကုဗပေ သန်း ၃၀ ကို အသုံးပြုပြီး ဓာတ်အားတိုးမြှင့် ထုတ်လုပ်ဖြန့်ဖြူးပေးနိုင်မှာ ဖြစ်ပါတယ်။

ထို့ ကြောင့် လျှပ်စစ်နှင့်စွမ်းအင်ဝန်ကြီးဌာနအနေဖြင့် ၂၀၂၂ ခုနှစ် နွေရာသီအမီ ရွှေဓာတ်ငွေ့ကို အသုံးပြုပြီး စုစုပေါင်း ၁၉၅ မဂ္ဂါဝပ်အထိ တိုးတက်ထုတ်လုပ် ပေးနိုင်ရေး စီစဉ်ဆောင်ရွက်လျက်ရှိကြောင်း သိရပါတယ်။

အဲဒီအပြင် အမှတ် ၄ ဓာတ်မြေသြဇာစက်ရုံ(မြောင်းတကာ)နှင့် အမှတ် ၅ ဓာတ်မြေသြဇာစက်ရုံ(ကန်ကြီးထောင့်)တိုတွင် နှစ်စဉ်ပုံမှန်ဆောင်ရွက်နေကျ ထိန်းသိမ်း ပြုပြင်ခြင်း လုပ်ငန်းများကို ယခင်ကဧပြီလတွင် ပုံမှန်ပြုလုပ်ခဲ့သော်လည်း ယခုသတ်မှတ် ချိန်ထက်စော၍ဆောင်ရွက်စေကာ အဆိုပါစက်ရုံများသို ထောက်ပံ့ပေးထားသော ကုန်းတွင်း သဘာဝဓာတ်ငွေ့ကို ရွာမဓာတ်အားပေးစက်ရုံရှိ ဓာတ်အားပေး စက်များသို ပြောင်းလဲထောက်ပံ့ကာ လျှပ်စစ်ဓာတ်အား ၃၀ မဂ္ဂါဝပ်ကို ထုတ်လုပ်လျက်ရှိတယ်လို့ သတင်းထုတ်ပြန်ချက်ကဆိုပါတယ်။

#ymg_mnn
Yangon_Media_Group 

#WorldHealth

Published - 20 March 2022
အိုမီခရွန်ကူးစက်မှုကာလများအတွင်း တရုတ်နိုင်ငံထုတ် ဆိုင်နိုဗက်(Sinovac)ကိုဗစ်ကာကွယ်ဆေးဟာ အသက် ၃ နှစ်မှ ၅ နှစ်ကြားကလေးတွေမှာ ကိုဗစ်ရောဂါကို ၃၈.၂ ရာခိုင်နှုန်းကာကွယ်ပေးနိုင်ကြောင်း ချီလီနိုင်ငံမှလေ့လာစမ်းသပ်ချက်မှာ ဖော်ပြခဲ့ပါတယ်။
ဒီလေ့လာချက်ကို အင်္ဂါနေ့ကထုတ်ပြန်ခဲ့တာဖြစ်ပြီး ကျွမ်းကျင်ပညာရှင်များအချင်းချင်း သုံးသပ်မှုမလုပ်ရသေးပါဘူး။

အစောပိုင်းသုံးသပ်ချက်များအရ ကိုရိုနာဗက်ကာကွယ်ဆေးဟာ ဒယ်လ်တာမျိုးဗီဇကွဲလွှမ်းမိုးချိန်ကာလအတွင်း အသက် ၆ နှစ်မှ ၁၆ နှစ်ကြားကလေးတွေမှာ ကိုဗစ်ရောဂါကို ၇၄.၅ ရာခိုင်နှုန်း ကာကွယ်ပေးနိုင်ကြောင်း စမ်းသပ်ရရှိခဲ့ပါတယ်။

အိုမီခရွန်မျိုးဗီဇကွဲက ကာကွယ်ဆေးမှရရှိတဲ့ခုခံအားကို ကျော်ဖြတ်သွားနိုင်တယ်လို့ WHO က အသိပေးခဲ့ပေမယ့် နိုင်ငံအနှံ့အပြားမှာ ကိုဗစ်အားမြှင့်ကာကွယ်ဆေး(booster)ထိုးနှံဖို့ ညွှန်ကြားလျက်ရှိပါတယ်။

ဒါ့အပြင် ကာကွယ်ဆေးအများစုက ရောဂါပြင်းထန်စွာဖြစ်ပွားခြင်းကို ထိရောက်စွာကာကွယ်ပေးနိုင်ဆဲဖြစ်ပါတယ်။ ဆိုင်နိုဗက်ကာကွယ်ဆေးက ဆေးရုံတက်ကုသခံယူရမှုနှုန်းကို ၆၄.၅ ရာခိုင်နှုန်းကာကွယ်ပေးနိုင်ပြီး အရေးပေါ်ကြပ်မတ်ကုသခံယူရမှုနှုန်းကို ၆၉ ရာခိုင်နှုန်းကာကွယ်ပေးထားနိုင်ကြောင်း ချီလီကလေ့လာသုံးသပ်ထားပါတယ်။

နယူးယော့ခ်မှသုတေသီများသုံးသပ်ထားတဲ့ လေ့လာချက်တစ်ခုမှာ ဖိုင်ဇာကိုဗစ်ကာကွယ်ဆေးက အိုမီခရွန်ကူးစက်မှုကာလအတွင်း အသက် ၅ နှစ်မှ ၁၁ နှစ်ကြားကလေးငယ်တွေမှာ ကာကွယ်နိုင်စွမ်း အလျင်အမြန်ကျဆင်းသွားကြောင်း ဖေဖော်ဝါရီလက ဖော်ပြထားပါတယ်။
Source: Reuters 

#WorldHealth
Published - 20 March 2022
ကိုဗစ်ရောဂါကို အလွန်ထိရောက်စွာကုသပေးနိုင်ပြီး ဖိုင်ဇာကုမ္ပဏီမှထုတ်လုပ်တဲ့ ပက်ဇ်လိုဗစ်(Paxlovid) ကိုဗစ်ကုသရေးသောက်ဆေးကို ကမ္ဘာအနှံ့အပြားရှိ ဆေးဝါးထုတ်လုပ်ရေးကုမ္ပဏီ ၃၅ ခုက ဈေးသက်သာစွာဖြင့် ထုတ်လုပ်ရောင်းချသွားမှာဖြစ်ပါတယ်။

အဲဒီနောက် ဆင်းရဲနွမ်းပါးတဲ့နိုင်ငံ ၉၅ နိုင်ငံမှာ အဆိုပါဆေးဝါးများကို ပေးပိုထောက်ပံ့သွားမှာဖြစ်ကြောင်း တစ်ကမ္ဘာလုံးဆေးဝါးကုသမှုရရှိရေးအဖွဲအစည်း(MPP)က ကြာသပတေးနေ့က အတည်ပြုလိုက်ပါတယ်။

ပြီးခဲ့တဲ့နှစ်က ဆေးဝါးထုတ်လုပ်ရေးကုမ္ပဏီတွေကနေ ဆင်းရဲနွမ်းပါးတဲ့နိုင်ငံ ၉၅ နိုင်ငံအတွက် ဆေးဝါးများထုတ်လုပ်ပေးဖို့ ဖိုင်ဇာက သဘောတူညီခဲ့ပါတယ်။ အဲဒီနောက်ပိုင်း ဖိုင်ဇာမှထုတ်လုပ်ခွင့်ပေးမယ့် ဆေးဝါးကုမ္ပဏီများကို ရွေးချယ်နေခဲ့ကြပါတယ်။

လက်တွေ့စမ်းသပ်ချက်များအရ ပက်ဇ်လိုဗစ်ဆေးဟာ ဆေးရုံတက်ကုသခံယူရမှုနှုန်းကို ၉၀ ရာခိုင်နှုန်းခန့်လျှော့ချပေးနိုင်တာကြောင့် ကိုဗစ်ရောဂါကိုတိုက်ဖျက်ရာမှာ အရေးကြီးတဲ့အစိတ်အပိုင်းအဖြစ် မျှော်လင့်နေကြပါတယ်။ စမ်းသပ်ချက်များအရ Merck ကုမ္ပဏီကထုတ်လုပ်တဲ့ မော်နျူပီရာဗီယာ(Molunupiravir)ဆေးထက် ပက်ဇ်လိုဗစ်က များစွာထိရောက်မှုရှိခဲ့ပါတယ်။

ဖိုင်ဇာနဲ့ Merck တို့ဟာ သူတို့ရဲ့ဆေးတွေကို အခြားဆေးဝါးကုမ္ပဏီတွေကနေ ထုတ်လုပ်ခွင့်ပေးဖို့ MPP နဲ့ သဘောတူညီထားကြပါတယ်။ Merck ကုမ္ပဏီရဲ့ဆေးထုတ်လုပ်ပုံကို MPP ခွင့်ပြုချက်ဖြင့် ဆေးဝါးကုမ္ပဏီပေါင်း ၁ ဒါဇင်လောက်က ဈေးနှုန်းသက်သာစွာနဲ့ နိုင်ငံအချို့မှာ ထုတ်လုပ်ပေးနေပြီဖြစ်ပါတယ်။

ဒါပေမဲ့ ယခုနှစ်ကုန်မတိုင်ခင်အထိတော့ ဆေးဝါးကုမ္ပဏီတွေအနေနဲ့ ပက်ဇ်လိုဗစ်ဆေးအမြောက်အများ ထုတ်လုပ်ဖို့တော့ မဖြစ်နိုင်သေးပါဘူး။ ပက်ဇ်လိုဗစ်ဆေးဝါးထုတ်လုပ်နည်းအတိုင်း ထုတ်လုပ်သွားမယ့်ကုမ္ပဏီတွေထဲမှာ နိုင်ငံ ၁၂ နိုင်ငံမှ ကုမ္ပဏီ ၃၅ ခုပါဝင်ပါတယ်။

အစ္စရေးလ်မှ Teva ဆေးဝါးထုတ်လုပ်ရေး၊ အိန္ဒိယမှ Sun ဆေးဝါးထုတ်လုပ်ရေး၊ အမေရိကန်မှ Viatris ဆေးဝါးကုမ္ပဏီတို့လို ကမ္ဘာ့အကြီးဆုံးဆေးဝါးထုတ်လုပ်ရေးကုမ္ပဏီတွေ ပါဝင်ပါတယ်။

ကိုဗစ်ရောဂါကို တစ်ကမ္ဘာလုံးမှပြည်သူ့ကျန်းမာရေးပြဿနာလို့ WHO ကသတ်မှတ်ထားတဲ့အတွက် အခြားဆေးဝါးထုတ်လုပ်ရေးများမှ ရောင်းချရတဲ့အမြတ်ငွေကို ဖိုင်ဇာကရရှိမှာမဟုတ်ပါဘူး။

၂၀၂၂ အတွင်း တစ်ကမ္ဘာလုံးအတိုင်းအတာနဲ့ ကိုဗစ်ကုသဆေးပေါင်း သန်း ၂၅၀ ထုတ်လုပ်ဖို့ ခန့်မှန်းခဲ့ကြပေမယ့် အခုနှစ်အတွင်း အနည်းဆုံး သန်း ၁၂၀ ထုတ်လုပ်ဖို့သာ စီစဉ်ထားကြောင်း ဖိုင်ဇာကပြောကြားလိုက်ပါတယ်။

ပက်ဇ်လိုဗစ်ဆေး ၁၀ သန်းခန့်ကို ဆင်းရဲတဲ့နိုင်ငံတွေမှာ ထောက်ပံ့ပေးနိုင်ဖို့ ဖိုင်ဇာကမျှော်လင့်ထားပါတယ်။
Source: The Jerusalem Post