#LocalNews
Pulished _ 4 June 2022

ယခုနှစ်အတွင်း ဝယ်လိုအား၊ ရောင်းလိုအားပြောင်းလဲမှုများနှင့် အစိုးရမူဝါဒပြောင်းလဲမှုများကြောင့် ဆန်စပါးစျေးကွက် တည်ငြိမ်နိုင်ဖို့ ခက်ခဲနေတယ်လို့ မြန်မာနိုင်ငံဆန်စပါးအသင်းချုပ်ဥက္ကဋ္ဌ ဦးရဲမင်းအောင်က ပြောသည်။

"ဈေးကွက်တည်ငြိမ်ဖို့ဆိုတာ တော်တော်ခက်ပါတယ်။ ဝယ်လိုအား၊ ရောင်းလိုအား ပြောင်းလဲမှုတွေ၊ အစိုးရမူဝါဒ ပြောင်းလဲမှုတွေက အလွန်လျှင်မြန်စွာ ဖြစ်ပေါ်နေတော့ ဈေးကွက်အပေါ် သက်ရောက်မှုက ကြီးမားကျယ်ပြန့်ပါတယ်။ လတ်တလော ဦးစားပေးသင့်တာကတော့ အခု ဇွန်၊ ဇူလိုင် မိုးစပါးရာသီမှာ တစ်ဧကအထွက်နှုန်း တိုးတက်အောင် ဘက်ပေါင်းစုံက ကြိုးပမ်းရပါမယ်။ တောင်သူတွေ လိုအပ်တဲ့ ဓါတ်မြေဩဇာ၊ ချေးငွေ၊ မျိုးနဲ့ အာမခံဈေးစတဲ့ ကိစ္စတွေကို ဌာနဆိုင်ရာတွေနဲ့ ပုဂ္ဂလိက ကုန်သည်တွေ၊ စက်ပိုင်တွေက ဝိုင်းဝန်းကူညီ ပူးပေါင်းဝန်းရံပေးဖို့ အရေးကြီးပါတယ်" ဟု ထိုအသင်း၏ဥက္ကဋ္ဌမှ ဆိုသည်။

အသင်းချုပ်အနေနဲ့ ဆန်စပါးလုပ်ငန်း ဖွံ့ဖြိုးရေးအတွက် ပုံမှန်လုပ်ငန်းဆောင်တာများ အပြင် လတ်တလောကာလမှာ ကြုံတွေ့နေရတဲ့ အခက်အခဲတွေကို မိတ်ဖက်အဖွဲ့တွေ၊ ဌာနဆိုင်ရာတွေနဲ့ ညှိနှိုင်း တိုင်ပင်ဖြေရှင်းနေလျှက်ရှိကြောင်း သိရသည်။

ဥရောပ၊ အာရှ ၊ အာဖရိကစတဲ့ ဝယ်သူနိုင်ငံတွေနဲ့လည်း ညှိနှိုင်း ပူးပေါင်းဆောင်ရွက်တာတွေ ပြုလုပ်နေတယ်လို့လည်း သိရသည်။

ပြည်ပတင်ပို့မှုအနေဖြင့် "အဓိကလိုအပ်ချက်တွေကတော့ ငွေလဲနှုန်းတည်ငြိမ်ဖို့၊ ပို့ကုန်ချေးငွေ (export financing) ရဖို့၊ လျှပ်စစ်မီး မှန်မှန်လာဖို့ စတာတွေ အရေးကြီးလာပါတယ်။ ဆန်က အခြားနိုင်ငံတွေနဲ့ယှဉ်ပြီး ရောင်းရတာဖြစ်လို အခြားနိုင်ငံတွေမှာ ဒီလိုလိုအပ်ချက်တွေက မရှိပါဘူး၊ ဒီမှာက ဒါတွေရှိနေတော့ ယှဉ်ပြိုင်ရောင်းနိုင်အောင် တော်တော် ကြိုးပမ်းရတာပါ။ Exporter တွေကို အားပေးမြှင့်တင်ပေးမှ ဆန်စက်လုပ်ငန်းနဲ့ စိုက်ပျိုးထုတ်လုပ်မှုတွေပါ လိုက်ပါပြီး တိုးတက်မှာ ဖြစ်ပါတယ်" ဟုမြန်မာနိုင်ငံ ဆန်စပါးအသင်းချုပ်၏ တာဝန်ရှိသူမှ ပြောသည်။

ဆက်လက်၍ ယခု ၂၀၂၂ ခုနှစ် ဧပြီလမှာ ဆန်၊ ဆန်ကွဲတန်ချိန် ၂ သိန်း ၄သောင်းလောက် ပြည်ပသို့တင်ပို့ထားပြီး အမေရိကန်ဒေါ်လာ သန်း ၈၀ လောက် ဝင်ငွေရရှိထားကြောင်း အဆိုပါအသင်းထံမှ သိရသည်။

ထို့နောက် ယခုနှစ် ၂၀၂၂-၂၃ ဘဏ္ဍာ နှစ်မှာလည်း ဆန်တန်ချိန်ပေါင်း (၂) သန်း လောက် တင်ပို့ရောင်းချဖို့ စီစဉ်မျှော်မှန်းထားကြောင်း ယင်းအသင်းချုပ်က တာဝန်ရှိသူထံမှ သိရသည်။

ymg/NN
#Yangon_Media_Group

#LocalNews
Published - 4 June 2022

ပြည်တွင်း၌ စက်သုံးဆီဝယ်ယူဖြည့်တင်းမှု ခက်ခဲနေပေမယ့်လည်း အဝေးပြေးခရီးသည်တင်ယာဉ်လိုင်းကြီးအချို့က အခက်အခဲမရှိသေးဘူးလို့ ခရီးသည်တင်ယာဉ်လိုင်းတွေကနေ သိရပါတယ်။

#Yangon_Media_Group

#Health_Technology
Published 6 June 2022

အသက် ၂၀ အရွယ်အမျိုးသမီးတစ်ဦးမှာ သေးငယ်ပြီးပုံစံမမှန်တဲ့ညာဘက်နားရွက်ပါရှိနေပြီး သူ့ရဲ့ကိုယ်ပိုင်ဆဲလ်များဖြင့် 3D ပရင့်တာဖြင့် နားရွက်အစားထိုးခွဲစိတ်မှု ခံယူခဲ့ကြောင်း အဆိုပါနည်းပညာထုတ်လုပ်သူများက ကြာသပတေးနေ့က ပြောကြားလိုက်ပါတယ်။

ဒီခွဲစိတ်မှုဟာ အဆိုပါဆေးကုသမှုဆိုင်ရာနည်းပညာကို ပထမဆုံးအကြိမ်အောင်မြင်စွာစမ်းသပ်မှုကြီးရဲ့ တစ်စိတ်တစ်ပိုင်းဖြစ်ခဲ့ပြီး တစ်ရှူးခွဲစိတ်ခြင်းနည်းပညာအဆင့်မြင့်မားလာပုံကို ဖော်ပြနေကြောင်း ကျွမ်းကျင်သူများက သုံးသပ်ခဲ့ပါတယ်။

အမျိုးသမီးရဲ့ဘယ်ဘက်နားရွက်ပုံစံအတိအကျအတိုင်း ပရင့်ထုတ်ပြီး နားရွက်အသစ်ပုံစံပြုလုပ်ခဲ့ကြောင်း ကွင်းစ်အခြေစိုက် 3D Bio Therapeutics ဆဲလ်အသစ်ပွားခြင်းဆိုင်ရာဆေးပညာကုမ္ပဏီက ဆိုပါတယ်။

မတ်လကပြုလုပ်ခဲ့တဲ့ နားရွက်ခွဲစိတ်မှုဟာ အရိုးနုတစ်ရှူးတွေထွက်လာမှာဖြစ်ပြီး တကယ့်နားရွက်အတိုင်းခံစားမြင်တွေ့ရမှာဖြစ်ကြောင်း ကုမ္ပဏီကဆိုပါတယ်။

တာဝန်ရှိသူများက စမ်းသပ်မှုအတိုင်းအတာများကို ပြန်လည်သုံးသပ်ပြီး တင်းကြပ်တဲ့စံချိန်စံညွှန်းတွေ သတ်မှတ်သွားမှာဖြစ်ကာ လေ့လာလိုအပြီးမှ ဆေးဘက်ဆိုင်ရာဂျာနယ်မှာ အချက်အလက်တွေ ဖော်ပြသွားမှာဖြစ်ကြောင်း ကုမ္ပဏီဘက်က ပြောကြားခဲ့ပါတယ်။

လူနာ ၁၁ ယောက်မှာ လက်တွေ့စမ်းသပ်မှုများ ပြုလုပ်နေပြီး အစားထိုးခွဲစိတ်မှုက မအောင်မြင်တာမျိုးနဲ့ မမျှော်လင့်နိုင်တဲ့ ကျန်းမာရေးပြဿနာများတွေ့ရနိုင်ပါတယ်။

ဒါပေမဲ့ လူနာရှင်ကိုယ်တိုင်ရဲ့ဆဲလ်တွေကိုပဲ ယူသုံးတာကြောင့် ခန္ဓာကိုယ်ကလက်မခံနိုင်စရာတော့မရှိဘူးလို့ ဆရာဝန်များက ဆိုပါတယ်။

ဒါဟာ ကိုယ်တွင်းအင်္ဂါနဲ့တစ်ရှူးအစားထိုးခွဲစိတ်ခြင်း ၇ နှစ်အတွင်း 3D Bio ရဲ့ အောင်မြင်မှုတွေထဲက တစ်ခုဖြစ်ပါတယ်။

ဇန်နဝါရီလတုန်းက မယ်ရီလန်းမှခွဲစိတ်ဆရာဝန်တွေက နှလုံးရောဂါရှိနေတဲ့ အသက် ၅၇ နှစ်အရွယ် လူတစ်ယောက်ကို မျိုးရိုးဗီဇပြုပြင်ထားတဲ့ ဝက်နှလုံးဖြင့် အစားထိုးခွဲစိတ်ခဲ့ရာ အသက်ရှင် နေထိုင်ချိန်သက်တမ်း ၂ လဆွဲဆန့်ပေးနိုင်ခဲ့ပါတယ်။

အလှူရှင်တွေ လှူဒါန်းတဲ့အင်္ဂါများ အလေအလွင့်မဖြစ်ရဘဲ တာရှည်ခံနိုင်စေရန် သိပ္ပံပညာရှင်များက နည်းပညာများ တီထွင်နေကြပါတယ်။

3D ပုံစံနဲ့ ခြေလက်အစားထိုးခွဲစိတ်မှုများ ပြုလုပ်ဖူးပေမယ့် ပုံစံမမှန်တဲ့နားရွက်ကနေဆဲလ်ယူပြီးခွဲစိတ်တာမျိုးကတော့ ပထမဆုံးအကြိမ်ဖြစ်ပါတယ်။

ကျောရိုးဆစ်ကြားခံပစ္စည်း၊ နှာခေါင်း၊ ဒူးခေါင်းဆုံကြားခံပစ္စည်း၊ ပခုံးဆုံကြား ကြွက်သားအရွတ်တို့လို ခန္ဓာကိုယ်အခြားအစိတ်အပိုင်းတွေမှာလည်း ဒီနည်းပညာကိုအသုံးပြုနိုင်ပြီး အသည်း၊ ကျောက်ကပ်၊ ပန်ကရိယတို့လို ပိုမိုရှုပ်ထွေးခက်ခဲတဲ့ ကိုယ်တွင်းအင်္ဂါတွေမှာပါ အသုံးပြုနိုင်ပါတယ်။

နားရွက်အသစ်အစားထိုးခွဲစိတ်ခဲ့တဲ့လူနာက ပထမဆုံးအောင်မြင်စွာ ခွဲစိတ်ခဲ့သူတွေထဲကတစ်ဦးဖြစ်ပြီး ဒေါက်တာ'ဘွန်နေလာ'က ဦးဆောင်စမ်းသပ်မှု ပြုလုပ်ခဲ့တာဖြစ်ပါတယ်။

လူနာရှင်မိန်းကလေးက အရင်ကသူ့ရဲ့ညာဘက်နားရွက်ကို ဆံပင်ရှည်နဲ့ဖုံးအုပ်ထားရလေ့ရှိပြီး လူတွေသတိမထားမိအောင် နေထိုင်ခဲ့ရပေမယ့် အခုဆိုရင်တော့ ဆံပင်ကိုအနောက်ထိစည်းပြီးနေနိုင်ပြီလို့ ပြောပြသွားပါတယ်။

Source: New York Times
#Yangon_Media_Group

#LocalNews
Published_4 June 2022

ရခိုင်ပြည်နယ်၊ ရမ်းဗြဲမြို့နယ်၊ ရမ်းပေါက်ကုန်ပေါင်ကျေးရွာတွင် အမျိုးအဆွေရွာလည်ပွဲကို ယနေ့ဇွန်လ ၄ ရက် တွင် စတင်ကျင်းပနေပြီ ဖြစ်ကြောင်း သိရသည်။

မနက်ဖြန် ဇွန်လ ၅ ရက်ထိ ကျင်းပမည့် အဆိုပါပွဲတော်ကို မွန်းတည့် ၁၂ နာရီမှ ညနေ ၆ နာရီထိ အချိန်သတ်မှတ်ထားကာ အမျိုးအဆွေရွာလည်ပွဲ စတင်ကျင်းပသည့်နေ့တွင် ရွာတောင်ပိုင်းမှရွာသူ၊ ရွာသားများက ရွာမြောက်ပိုင်းသို့ သွားရောက်လည်ပတ်ကြမည်ဖြစ်ပြီး မနက်ဖြန်တွင် ရွာမြောက်ပိုင်းမှ ရွာသူ၊ ရွာသားများက ရွာတောင်ပိုင်းသို့ သွားရောက်လည်ပတ်ကြမည်ဖြစ်ကြောင်း၊ ယနေ့စတင်လည်ပတ်ကြသည့် ရွာတောင်ပိုင်းသားများအား မြောက်ပိုင်းသားများက ယာဂု ၊ မုန့်လုံးရေပေါ်၊ ထမင်းများဖြင့် ဧည့်ခံကျွေးမွေးကြကြောင်းလည်း သိရသည်။

သွားရောက်လည်ပတ်ကြရာ၌ ဝတ်စုံများကို ဟာသပုံစံဖြစ်စေရန် ဒီဇိုင်းထုတ်ချုပ်လုပ်ကြကြောင်း၊ ယခုနှစ်တွင် ကိုရီးယားဝတ်စုံပုံစံကိုလည်း တွေ့ရကြောင်း ဒေသခံများက ပြောသည်။

အဆိုပါ အမျိုးအဆွေရွာလည်ပွဲမှာ ဘိုးဘွားအစဉ်အလာအရ အစဉ်အဆက်မပျက်ကျင်းပခဲ့သော ရိုးရာပွဲတော်တစ်ခုဖြစ်ပြီး မိုးရာသီလုပ်ငန်းခွင်ဝင်ရာ၌ အဆင်ပြေစေရန်၊ သီးနှံအထွက်တိုးရန်နှင့် ကျေးရွာသူ ကျေးရွာသားများလည်း စည်းလုံးညီညွတ်မှုနှင့် စိတ်ဝမ်းကွဲပြားမူမရှိစေရန်အတွက် ကျင်းပရခြင်းဖြစ်ကြောင်းလည်း သိရသည်။

ymg/mt
Photos - Ko Ko Naing
#Yangon_Media_Group

#LocalNews
Published - 4 June 2022

ပို့ကုန်လုပ်ငန်းဆောင်ရွက်သည့် ကုမ္ပဏီ ၁၃၀ ကျော်နှင့် ဒါရိုက်တာအဖွဲ့ဝင်များကို Blacklist စာရင်း ထပ်မံထည့်သွင်းကြောင်း ဗဟိုဘဏ်မှ ဇွန်လ ၃ရက်နေ့တွင် ထုတ်ပြန်ထားသည်။

မြန်မာနိုင်ငံအတွင်းသို့ နိုင်ငံခြားသုံးငွေများ ဝင်ရောက်လာသည့် အဓိကလမ်းကြောင်းဖြစ်သော ပို့ကုန်တင်ပို့မှုမှရငွေများ ရနိုင်ရန်အတွက် ပို့ကုန်တင်ပို့သူသည် ကုန်စည်များကို သင်္ဘောတင်သည့်နေ့မှ သုံးလအတွင်း ယင်း၏ ဘဏ်ငွေစာရင်းသို့ နိုင်ငံခြားသုံးငွေဖြင့် ဝင်ရောက်ရန်သတ်မှတ်ထားကြောင်း သိရသည်။

သို့သော် ၂၀၁၉ ခုနှစ်အတွင်း ပို့ကုန်တင်ပို့ခဲ့ပြီး ပို့ကုန်ရ ငွေပြန်လည်ဝင်ရောက်ရန် ကျန်ရှိသည့်ကုမ္ပဏီများအား ပို့ကုန်သွင်းကုန်လုပ်ငန်းရှင် မှတ်ပုံတင်လက်မှတ်ပိတ်သိမ်းခြင်း၊ အစည်းအဝေးများ ပြုလုပ်ပြီး ဆွေးနွေးခြင်းတို့ကို အကြိမ်ကြိမ်ပြုလုပ်ခဲ့ပြီး ပို့ကုန်ရငွေပြန်လည် ဝင်ရောက်ရန် ကျန်နေသည့် ကုမ္ပဏီ (၁၃၇)ခု ရှိ ကြောင်း အဆိုပါထုတ်ပြန်ချက်တွင် ဖော်ပြထားသည်။

ယင်းကြောင့် အဆိုပါကုမ္ပဏီ (၁၃၇)ခုကို နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၄၂ ကအရ အ ရေးယူဆောင်ရွက်လျက်ရှိပြီး ကုမ္ပဏီများနှင့် ကုမ္ပဏီများ၏ ဒါရိုက်တာအဖွဲ့ဝင်များအား Blacklist စာရင်းထည့်သွင်းကြောင်း ဗဟိုဘဏ်မှ ထုတ်ပြန်ခဲ့သည်။

အဆိုပါကိစ္စနှင့် စပ်လျဥ်း၍ ယခင်ကကုမ္ပဏီ (၁၇၇) ခုနှင့် ကုမ္ပဏီများ၏ ဒါရိုက်တာအဖွဲ့ဝင်များကို blacklistစာရင်း ထည့်သွင်းထားခဲ့ကြောင်း၊ ယင်းကြောင့် ပို့ကုန်ရငွေ ဝင်ရောက်ရန် ကျန်ရှိ နေသေးသည့် ကုမ္ပဏီများကိုလည်း ဆက်လက်အရေးယူနိုင်ရန် စိစစ်နေကြောင်းလည်း သိရသည်။

ပို့ကုန်၊ သွင်းကုန်လုပ်ငန်းရှင်မှတ်ပုံတင်လက်မှတ်ပိတ်သိမ်းခံရသော ကုမ္ပဏီများထဲမှ စာရင်းရှင်းလင်းပြီးသော ကုမ္ပဏီများအနေဖြင့် သတ်မှတ်ထားသော အခကြေးငွေ ပေးဆောင်ပြီး ပို့ကုန်သွင်းကုန်လုပ်ငန်းရှင် မှတ်ပုံတင်လက်မှတ်အသစ် ပြန်လည်လျှောက်ထားရန် ကုန်သွယ်ရေးဦးစီးဌာနမှအသိ ပေးထုတ်ပြန်ထားသည်။

ymg/sth
#Yangon_Media_Group

#LocalNews
Published -3 june 2022

အရေးပေါ်လူနာတွေနဲ့ လူနာတွေကို အခမဲ့ပို့ဆောင်ပေးနေတဲ့ ပုလဲအရန်မီးသတ်တပ်ဖွဲ့ဟာ နောက် (၁၅)ရက်စာအတွက်ပဲ စက်သုံးဆီရှိတော့လို့ လူနာပို့ဆောင်မှုတွေကို ယာယီရပ်နားရတော့မယ်လို့ ပုလဲအရန်မီးသတ်တပ်ဖွဲ့က ကိုထင်လင်းအောင်က YMG ကို ပြောပါတယ်၊၊

တစ်ရက်ကို လူနာတင်ယာဥ်တွေအတွက် စက်သုံးဆီ (၂)သိန်းဖိုးထည့်နေရပြီး အခမဲ့ဆေးခန်းအတွက်လည်း ဆီဖိုးတွေသိန်းချီကုန်ကျနေတယ်လို့ ဆိုပါတယ်၊၊

"ဒီဇယ်ရော၊ ဓာတ်ဆီရောဈေးတက်နေတာပေါ့နော်၊၊ သွားလို့ရသလောက်တော့ သွားနေပါတယ်၊၊ ကျွန်တော်တို့ (၁၅)ရက်စာလောက်တော့ကျန်ပါသေးတယ်၊၊ ကိုဗစ်ကာလကတည်းက အလှူရှင်နည်းပါးခဲ့တာပါ၊၊ အခုဆိုရင် ဆီဈေးတွေတက်လာတဲ့အတွက် လူနာတင်ယာဥ်ပို့ဆောင်တာတွေ ယာယီရပ်နားရတော့မလို ဖြစ်နေပါတယ်၊၊ တစ်ရက်ကို လူနာတင်ယာဥ်တွေအတွက် စက်သုံးဆီ (၂)သိန်းဖိုးထည့်နေရပြီး အခမဲ့ဆေးခန်းအတွက်လည်း ဆီဖိုးတွေလည်း ကုန်ကျပါတယ်"လို့ ကိုထင်လင်းအောင်က YMG ကို ပြောပါတယ်၊၊

ပုလဲအရန်မီးသတ်တပ်ဖွဲ့ဟာအခမဲ့ အရေးပေါ် လူနာတင်ယာဉ်ကူညီမှုအပြင်အခမဲ့ ဆေးခန်းနဲ့ ပြည်သူတွေရဲ့ အကူအညီတောင်းခံမှုတွေကို အခမဲ့ကူညီခဲ့ပြီး အလှူရှင်တွေရဲ့အလှူတွေနဲ့ရပ်တည်နေတာဖြစ်ပါတယ်၊၊

အခုချိန်မှာ ဆီဈေးတွေတက်လာတာကြောင့်လည်းကောင်း၊ အလှူရှင်နည်းပါးတာကြောင့်လည်းကောင်း လူနာတွေကိုပို့ဆောင်ပေးဖို့ခက်ခဲနေပြီး ဒီအခက်အခဲတွေကို ဖြေရှင်းနိုင်ဖို့ ကားရေဆေးတဲ့အလုပ်ကိုလည်း ဖွင့်သွားဖို့ရှိတယ်လို့ ပုလဲအရန်မီးသတ်တပ်ဖွဲ့က ကိုထင်လင်းအောင်ထံမှ သိရပါတယ်၊၊

ymg/tthl
#Yangon_Media_Group

#Local_News

#Published 4 June 2022

ရှမ်းပြည်နယ်( အရှေ့ပိုင်း) တာချီလိတ်မြို့တွင် ထိုင်းနိုင်ငံမှလွဲပြောင်းပေးလာသည့် ရွှေ့ပြောင်းမြန်မာအလုပ်သမားများနှင့် ပြစ်ဒဏ်မှလွတ်မြောက်လာသူ စုစုပေါင်း(၂၀၃)ဦးကို တာဝန်ရှိသူများက ယနေ့နံနက် ၁၁ နာရီအချိန်က မြန်မာ-ထိုင်းချစ်ကြည်ရေးတံတား ၂ တွင် လက်ခံခဲ့ကြပါတယ်။

နေရပ်ပြန်ရွှေ့ပြောင်းမြန်မာအလုပ်သမားအမျိုးသား(၁၈) ဦး၊ အမျိုးသမီး(၃၈)ဦး၊ စုစုပေါင်း(၅၆) ဦးနှင့် ပြစ်ဒဏ်မှလွတ်မြောက်လာသူ အမျိုးသား(၁၀၁)ဦး၊ အမျိုးသမီး(၄၆)ဦး၊ စုစုပေါင်း (၁၄၇)ဦး တို့ကို ဒေသတာဝန်ရှိသူတွေက လက်ခံခဲ့ကြတာဖြစ်ပါတယ်။

နေရပ်ပြန်များကို ကျန်းမာရေးဝန်ထမ်းများက ကိုဗစ် ၁၉ ရောဂါနှင့် ဗီဇပြောင်းအိုမီခရွန်ရောဂါ ရှိ/မရှိ စစ်ဆေးမှုများပြုလုပ်ပြီး ဝမ်လုံး Quarantine Centre တွင်(၅) ရက်ထားရှိကာ ဆေးစစ်မှု နှစ်ကြိမ်ထပ်မံပြုလုပ်ပြီး ရောဂါပိုးကင်းရှင်းပါက မိမိနေရပ်သို့ ပြန်လည်ပို့ဆောင်ပေးမည်ဖြစ် ကြောင်းသိရပါတယ်။

ymg/ys-TCL
#Yangon_Media_Group

#DailyNews
Published - 4 June 2022

၁။ အဝေးပြေးခရီးသည်တင်ယာဉ်လိုင်းကြီးအချို့ ကိုယ်ပိုင်ဆီဆိုင်ရှိခြင်းကြောင့် အခက်အခဲမရှိသေးဟုဆို

၂။ ရန်ကုန်တိုင်းအပါအဝင် အခြားမြို့နယ် ၁၀ မြို့နယ်က စပါးစိုက်တောင်သူများအတွက် မျိုးစေ့နှင့် ဓာတ်မြေဩဇာများကို သက်သာသောနှုန်းဖြင့် ရောင်းချပေးမည်

၃။ နေ့စဉ်မိုးလေဝသသတင်း။

၄။ ဂန်နမ်စတိုင်လ်သီချင်းထွက်ရှိပြီး(၁၀)နှစ်အကြာ ဘဝမှာကျေနပ်စရာအကောင်းဆုံးအချိန်ကိုပိုင်ဆိုင်နေရပြီဟုဆိုလာသည့် တောင်ကိုရီးယားအဆိုတော် PSY ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Breaking_News
Published 4 June 2022

ကယ်လီဖိုးနီးယားတောင်ပိုင်းဆေးရုံ အရေးပေါ်ဌာနမှ ဆရာဝန်တစ်ဦးနဲ့ သူနာပြုနှစ်ဦးကို သောကြာနေ့မှာ လူတစ်ဦးက ဓားနဲ့ထိုးသတ်မှုဖြစ်ပွားခဲ့ပါတယ်။

အဲဒီနောက်တရားခံက အခန်းတစ်ခန်းမှာ ၄ နာရီကြာအောင်ရှိနေခဲ့ပြီး မကြာခင်မှာရဲတွေကဝင်ရောက်ဖမ်းဆီးခဲ့ကြောင်း တာဝန်ရှိသူများကပြောကြားခဲ့ပါတယ်။

ထိုလူက ဆန်ဖာနန်ဒိုတောင်ကြားရှိ အင်ဆီနိုဆေးရုံစင်တာထဲကို ညနေ ၄ နာရီမတိုင်ခင်မှာဝင်ရောက်သွားခဲ့ကြောင်း လော့စ်အိန်ဂျလိစ်ရဲအရာရှိ'ဒရိတ်ခ်မက်ဒီဆန်'က ဆိုပါတယ်။

ထိုလူဟာ လမ်းလယ်မှာသူ့ကားကိုရပ်ခဲ့ပြီး အရေးပေါ်အခန်းထဲသို့ဝင်လာကာ ဆရာဝန်နဲ့ သူနာပြုတွေကို ဓားနဲ့မထိုးခင်အချိန်မှာ သူ့ရဲ့စိတ်မတည်မငြိမ်ဖြစ်ခြင်းကို ကြည့်ရှုကုသပေးဖို့တောင်းဆိုခဲ့ပါတယ်။

ဓားနဲ့အထိုးခံရသူ ၃ ဦးကို အရေးပေါ်ခွဲစိတ်ဌာနသို့ ပို့ဆောင်ခဲ့ပြီး တစ်ဦးက စိုးရိမ်ရကာ ခွဲစိတ်မှုခံယူခဲ့ရပါတယ်။

အဲဒီနောက် ၃ ဦးစလုံးက Dignity Health Northridge ဆေးရုံစင်တာမှာ ကုသပေးရင်း ဘေးကင်းစိတ်ချရတဲ့ အခြေအနေရောက်ရှိခဲ့ပါပြီ။

အင်ဆီနိုဆေးရုံပထမထပ်နဲ့ အနီးနားက ရုံးခန်းတွေကို ဘေးကင်းရာရွှေ့ပြောင်းထားရပါတယ်။

"လူနာတွေကို ဘေးအန္တရာယ်နဲ့ဝေးရာသို့ ရွှေ့ပြောင်းပြီးပါပြီ" လို့ LAPD လက်ထောက်အကြီးအကဲ'အလန်ဟာမီလ်တန်'က သတင်းစာရှင်းလင်းပွဲမှာ ပြောကြားခဲ့ပါတယ်။

တရားခံက သူထိုးသတ်ခဲ့တဲ့သူတွေအကြောင်း သိရှိခဲ့ဟန်မပေါ်ဘူးလို့ 'ဟာမီလ်တန်'ကဆိုပါတယ်။

နောက်ဆုံးအဖမ်းမခံရခင်မှာ SWAT တပ်ဖွဲ့က ထိုလူနဲ့ညှိနှိုင်းခဲ့ရာ မအောင်မြင်ခဲ့ဘဲ ဆေးရုံထဲကအခန်းတစ်ခန်းထဲမှာ ၄ နာရီလောက်ကြာအောင် ရှိနေခဲ့ကြောင်း ရဲတပ်ဖွဲ့ကရှင်းပြပါတယ်။

တရားခံအမည်ကို ချက်ချင်းထုတ်ဖော်ခြင်းမရှိပေမယ့် သူ့မှာ ရာဇဝတ်မှုမှတ်တမ်းတွေရှိခဲ့ပြီး ပြီးခဲ့တဲ့နှစ်ကလည်း ရဲအရာရှိကို ကိုယ်ထိလက်ရောက်ကျူးလွန်ခြင်းနဲ့ ဖမ်းဆီးခြင်းအားခုခံခြင်းတို့ကြောင့် နှစ်ကြိမ်ဖမ်းဆီးခံရဖူးတယ်လို့ ဆက်လက်ပြောကြားပါတယ်။

အာထရာဆောင်းပညာရှင်'ဘင်ဂျမင်ရိုမန်'က KNBC-TV ကိုပြောပြရာမှာ ဓားထိုးမှုမဖြစ်ခင်က ထိုလူမှာခွေးတစ်ကောင်ပါလာပြီး သူ့ပုံစံက စိတ်မတည်မငြိမ်နဲ့ ချွေးတွေရွှဲနေတာကြောင့် ဆေးချထားပုံပေါ်တယ်လို့ ပြောပြခဲ့ပါတယ်။

ဆေးရုံကနေ အရေးပေါ်ကုဒ်အခြေအနေသတိပေးသံထွက်ပေါ်ပြီးနောက် ဆရာဝန်တစ်ဦးနဲ့ သူနာပြုတစ်ဦး ဓားထိုးခံထားရတာကို 'ရိုမန်'မြင်တွေ့ခဲ့ရပြီး "ဆရာဝန်မ အလွန်နာကျင်နေတဲ့ပုံပါ၊ ဝမ်းဗိုက်ကိုထိုးမိပြီး သွေးတွေအများကြီးထွက်နေပါတယ်" လို့ ဆိုပါတယ်။

အိုကလာဟိုမာကဆေးရုံတစ်ရုံမှာလည်း သေနတ်သမားတစ်ယောက်က လူ ၄ ဦးကိုပစ်သတ်ပြီးနောက် ကိုယ့်ကိုယ်ကိုပစ်သတ်မှုဖြစ်ပွားပြီး ၂ ရက်အကြာမှာပဲ ယခုအကြမ်းဖက်မှု ထပ်မံဖြစ်ပွားခဲ့တာပါ။

သေနတ်သမားတရားခံက AR-style ရိုင်ဖယ်ဝယ်ယူပြီး ခဏအကြာမှာပဲ စိန့်ဖရန်စစ္စဆေးရုံထဲဝင်ပြီး သူ့ကိုခွဲစိတ်ပေးတဲ့ခွဲစိတ်ဆရာဝန်နဲ့ ရုံးခန်းထဲမှလူ ၃ ယောက်ကို ပစ်သတ်ခဲ့တာဖြစ်ပါတယ်။

ထိုကိစ္စမှာ ကျောခွဲစိတ်မှုပြုလုပ်ပြီးနောက် အဆက်မပြတ်နာကျင်မှု ခံစားနေရတာကြောင့် တရားခံက ဆရာဝန်ကိုအပြစ်တင်ခဲ့ပါတယ်။

Source: AP News
#Yangon_Media_Group

#LocalNews
Published - 4 June 2022

ပြည်ပမှတင်သွင်းလာသည့် စက်သုံးဆီများ လာမည့်ရက်အနည်းငယ်အတွင်း ဆိပ်ကမ်းသို့ရောက်ရှိလာမည်ဖြစ်ကြောင်း ရေနံထွက်ပစ္စည်းကြီးကြပ်စစ်ဆေးရေးဦးစီးဌာနမှ တာဝန်ရှိသူတစ်ဦးက ပြောသည်။

"Ron 92 နဲ့ Ron 95 အောက်တိန်းဆီတွေ ဒီတစ်ရက်နှစ်ရက်အတွင်းရောက်မယ့် သင်္ဘောမှာ ပါလာပါလိမ့်မယ်။ ဒီနေ့တော့မဟုတ်ဘူး။ နောက်ဆိုက်လာမယ့်သင်္ဘောတွေမှာ ပါပါလိမ့်မယ်။ ကျွန်တော်တို့လည်း စိစစ်ပြီးခွင့်ပြုပေးနေပါတယ်။ ကျွန်တော်တို့ဆီမှာတော့ တင်သွင်းလာတဲ့ကုမ္ပဏီတွေက သူတို့ရောက်တာနဲ့အမြန်ဆုံးဖြန့်ပေးပါလိမ့်မယ်။ နောက်ပိုင်းဆိုရင်တော့ ပုံမှန်ပြန်ဖြစ်ပါလိမ့်မယ်" ဟု ယင်းကဆိုသည်။

ပြည်တွင်းဈေးကွက်တွင် စက်သုံးဆီပြတ်လပ်မှုမရှိဘဲ ဇွန်လ ၁၆ ရက်အထိ အလုံအလောက်ရှိနေကြောင်း နိုင်ငံတော်စီမံအုပ်ချုပ်ရေးကောင်စီသတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းက ပြီးခဲ့သည့်သတင်းစာရှင်းလင်းပွဲတွင် ပြောသည်။ သို့သော်လည်း လက်ရှိတွင် ရန်ကုန်မြို့တွင်းရှိ ဆီဆိုင်အချို့မှာ ဆီဝယ်ယူ၍မရတော့ကြောင်း ကိုယ်ပိုင်ယာဉ်မောင်းနှင့် အငှားယာဉ်မောင်းအချို့က ပြောသည်။

"ဆီကဝယ်လိုမရဘူး။ ရပြန်တော့လည်း အကန့်အသတ်နဲ့ပဲရတာ။ အခုဆိုရင် ဆီထည့်ဖို့အတွက် တစ်မြို့လုံးပတ်ရှာပြီးဝယ်ထည့်ရတယ်။ တန်းစီစောင့်ရတယ်။ ကိုယ့်အလှည့်ရောက်ရင်ကုန်သွားတာမျိုးရှိတယ်။ အဆင်မပြေတာတွေတော့ တော်တော်များတယ်" ဟု ကိုယ်ပိုင်ယာဉ်မောင်းတစ်ဦးဖြစ်သူ ဦးနေလင်းက ပြောသည်။

ဇွန်လ ၄ ရက်တွင်ထုတ်ပြန်ကြေညာထားသည့် စက်သုံးဆီဈေးနှုန်းမှာ ၉၅ တစ်လီတာ ၂,၂၈၀ ကျပ်၊ ၉၂ တစ်လီတာ ၂,၁၉၅ ကျပ်၊ ပရီမီယံဒီဇယ်တစ်လီတာ ၂,၅၂၅ ကျပ်နှင့် ရိုးရိုးဒီဇယ်တစ်လီတာ ကျပ် ၂,၅၀၀ ဖြစ်ကြောင်း သိရသည်။

ymg/sth
#Yangon_Media_Group

#LocalNews
Published -3 june 2022

မိုးရာသီကာလ သဘာဝဘေးကြောင့် ကမ္ဘာ့အမွေအနှစ်တင်မည့်မြောက်ဦးအမွေအနှစ်များထိခိုက်ပျက်စီးမှု မရှိအောင်ထိန်းသိမ်းပေးရန်လိုကြောင်း Myauk Oo Heritage Trust အဖွဲ့က ဒေါ်ခင်သန်းက YMG ကို ပြောသည်၊၊

ချောင်းများမြောင်းများပိတ်နေသည့်အတွက် ရေကြီးနိုင်သည့်အန္တရာယ်ရှိပြီး ရေလွှမ်းမိုးမှုကြောင့် အမွေအနှစ်များ ထိခိုက်နိုင်သည်ဟုဆိုသည်၊၊

"သဘာဝဘေးနဲ့ပတ်သက်ပြီးတော့ ကြိုတင်ပြင်ဆင်ထားတာက မိုးသာများမယ်ဆိုရင်သွားနိုင်(ထိခိုက်) နိုင်တယ်၊၊ ချောင်းတွေမြောင်းတွေတော်တော်များ များပိတ်နေတယ်လေ၊၊ကျူးကျော်တာတွေ အမှိုက်တွေနဲ့ဖြစ်ပြီးတော့ဒါတွေကို ရှင်းလင်းဖယ်ရှားခြင်း မရှိသေးသည့်အတွက်ကြောင့်မို ရေကြီးနိုင်တဲ့အန္တရာယ်တော့ရှိတယ်၊၊ မိုးများလာတယ်၊၊ စည်ပင်သာယာနဲ့ဆိုင်တယ်၊၊ လမ်းတံတားတွေနဲ့လည်းဆိုင်တယ်၊၊ ရေလွှမ်းတွေအတိုင်းအတာပေါ် မူတည်ပြီး အမွေအနှစ်တွေ ဘယ်ဟာတွေမြုပ်လဲ ထိခိုက်မှုရှိမရှိပြောနိုင်မယ်၊၊ တစ်မြို့လုံးကယဥ်ကျေးမှုအမွေအနှစ်ဒေသကြီးဖြစ်နေတော့လေ၊၊ ၂၀၁၅ခုနှစ်တုန်းကတော့ တော်တော်များများ ရေမြုပ်သွားလို့ အချို့နေရာတွေမှာ ထိခိုက်ပျက်စီးမှုတွေ မြေပြိုမှုတွေ၊ တိုက်စားမှုတွေ ရေကြောင်းပြောင်းလဲမှုတွေ အဲဒါတွေကတော်တော်များများဖြစ်သွားတယ်"ဟု Myauk Oo Heritage Trust အဖွဲ့က ဒေါ်ခင်သန်းက YMG ကို ပြောသည်၊၊

မြောက်ဦးဒေသတွင် လေးမြို့မြစ်နှင့် ကုလားတန်မြစ်များက ပို့ချမှုများပြီးမြောက်ဦးဒေသအရှေ့ပိုင်းများကတော့ ရေကြီးရေလျှံမှုများဖြစ်ပေါ်နိုင်ကြောင်း သိရသည်၊၊

ရှေးဟောင်းသုတေသနဌာနအနေဖြင့် ပုံမှန်ထိန်းသိမ်းရေးလုပ်ငန်းများအပြင် မြောက်ဦးရှေးဟောင်းဘုရားများတွင် ပေါက်ရောက်နေသည့် ရေညှိများ၊ မှိုများ၊ အပင်များကို ဓာတုဆေးရည်ဖြင့်သတ်ခြင်းများ၊ သန့်ရှင်းရေးများ ဆောင်ရွက်ကြကြောင်းဌာန၏ ထုတ်ပြန်ချက်များအရသိရသည်၊၊

ymg/tthl
#Yangon_Media_Group

#Health_Tips
Published 4 June 2022

အသင်းအဖွဲ့နဲ့ပြိုင်ဆိုင်ရတဲ့အားကစားနည်းတွေက တစ်ဦးချင်းအားကစားထက် ကလေးတွေရဲ့စိတ်ကျန်းမာရေးအခြေအနေကို တိုးတက်ကောင်းမွန်စေကြောင်း လေ့လာတွေ့ရှိထားပါတယ်။
ဘောလုံးအားကစားနဲ့ ဘတ်စကတ်ဘောအားကစားတို့လို အဖွဲ့လိုက်အားကစားတွေပြုလုပ်တဲ့ အသက် ၉ နှစ်မှ ၁၃ နှစ်ကြားကလေး ၁၁,၀၀၀ ယောက်ကို လေ့လာကြရာမှာ အားကစားမလုပ်တဲ့ကလေးတွေထက် စိတ်ဓာတ်ကျဝေဒနာခံစားရနိုင်ချေ ၅ ဆနည်းပါးကြောင်း တွေ့ရှိခဲ့ပါတယ်။

ဒါပေမဲ့ ကျွမ်းဘား၊ တင်းနစ်၊ နပမ်းအားကစားတို့လို တစ်ဦးချင်းအားကစားယှဉ်ပြိုင်တဲ့ကလေးတွေကတော့ အားကစားမလုပ်တဲ့ကလေးတွေထက် စိတ်အလိုမကျဝေဒနာမျိုး ၁၅ ရာခိုင်နှုန်းပိုဖြစ်နိုင်ချေရှိနေပါတယ်။

လေ့လာမှုပြုလုပ်ခဲ့တဲ့ ကယ်လီဖိုးနီးယားတက္ကသိုလ်မှသုတေသီများက အဖွဲ့လိုက်အားကစားပြုလုပ်ခြင်းက ကလေးတွေနဲ့ဆယ်ကျော်သက်တွေရဲ့ စိတ်ကျန်းမာရေးကိုအထောက်အကူဖြစ်စေပါတယ်လို့ ပြောကြားလိုက်ပါတယ်။

အသင်းအဖွဲ့နဲ့ကစားတာဟာ စည်းလုံးညီညွတ်ချင်စိတ်နဲ့ ပြိုင်ဆိုင်လိုစိတ်တို့ကိုတိုးပွားစေပြီး တစ်ဦးချင်းအားကစားကတော့ စိုးရိမ်ပူပန်စိတ်တွေပိုဖြစ်စေတယ်လို့ ဆိုပါတယ်။

သုတေသီတွေက အမေရိကန်မှကလေးတွေရဲ့ အားကစားပြုလုပ်တဲ့အလေ့အကျင့်ကို သုံးသပ်လေ့လာခဲ့ကြပါတယ်။

လူငယ် ၃,၃၄၈ ဦးက အဖွဲ့လိုက်အားကစား၊ ၂,၃၆၆ ဦးက တစ်ဦးချင်းအားကစားပြုလုပ်ကြပြီး ၁,၇၅၀ ကတော့ နှစ်မျိုးစလုံးကစားကြပါတယ်။

သူတို့ရဲ့စိတ်အခြေအနေကို အားကစားမလုပ်တဲ့ကလေးတွေနဲ့ နှိုင်းယှဉ်ကြည့်ခဲ့ကြပါတယ်။
ကလေးတစ်ယောက်ရဲ့စိတ်အခြေအနေအပေါ် လွှမ်းမိုးနိုင်တဲ့အခြားအချက်အလက်တွေကိုပါ ထည့်သွင်းချိန်ညှိပြီးတဲ့အခါ အဖွဲ့လိုက်အားကစားပြုလုပ်သူတွေက အားကစားမလုပ်တဲ့သူတွေထက် စိတ်ဓာတ်ကျဝေဒနာဖြစ်နိုင်ချေ ၁၀ ရာခိုင်နှုန်းပိုနည်းနေခဲ့ပါတယ်။

ဒါ့အပြင် အပေါင်းအသင်းမလိုချင်စိတ်ပေါ်ပေါက်နိုင်ချေကလည်း ၁၉ ရာခိုင်နှုန်းလျော့နည်းလာပါတယ်။ တစ်ဦးချင်းအားကစားပြုလုပ်သူတွေကတော့ အားကစားမလုပ်တဲ့သူတွေထက် စိတ်ဓာတ်ကျအခြေအနေဖြစ်နိုင်ချေ ၁၆ ရာခိုင်နှုန်းနဲ့ အပေါင်းအဖော်မလိုချင်စိတ်ဖြစ်ပေါ်နိုင်ချေ ၁၄ ရာခိုင်နှုန်းပိုများနေပါတယ်။

တစ်ဦးချင်းအားကစားပြုလုပ်သူတွေမှာ လူမှုရေးပြဿနာများ ၁၂ ရာခိုင်နှုန်းပိုဖြစ်နိုင်ကာ အာရုံစူးစိုက်မှုပြဿနာ ၁၄ ရာခိုင်နှုန်းပိုမိုခံစားရနိုင်ပါတယ်။ ဒီတွေ့ရှိချက်တွေကို PLOS ONE ဂျာနယ်မှာ ဖော်ပြခဲ့ပါတယ်။

အသင်းအဖွဲ့နဲ့အားကစားပြုလုပ်ခြင်းက စိတ်ပိုင်းဆိုင်ရာနဲ့ အပြုအမူဆိုင်ရာကောင်းကျိုးများရလာနိုင်ပြီး လူမှုပေါင်းသင်းရေးမှာလည်း အကျိုးပြုစေမှာဖြစ်ပါတယ်။

အဖွဲ့သားတွေနဲ့ ရင်းနှီးပူးပေါင်းမှုက လူငယ်တွေရဲ့လူမှုပေါင်းသင်းဆက်ဆံရေးနဲ့ စိတ်ဖိစီးမှုဖြေရှင်းနိုင်စွမ်းတွေ တိုးတက်စေလာပါတယ်။

တစ်ဦးချင်းအားကစားပြုလုပ်တဲ့လူငယ်တွေကတော့ လူအများရှေ့မှာယှဉ်ပြိုင်ရတဲ့အခါ စိတ်ဖိစီးမှုတွေနဲ့ ရင်ဆိုင်ရပြီး စိတ်ကျန်းမာရေးကိုထိခိုက်စေတာဖြစ်ပါတယ်။

Source: DailyMail
#Yangon_Media_Group