#LocalNews
Published- 16 Mar 2022
မကွေးတိုင်းဒေသကြီး ပခုက္ကူ မြို့ “Hana Microfinance” အသေးစားချေးငွေရုံးမှ ဝန်ထမ်းအမျိုးသမီးအား သေနတ်ဖြင့် ခြိမ်းခြောက်ကာငွေတောင်းခံ ပစ်ခတ်မှုဖြစ်ပွားခဲ့တယ်လို့ သိရပါတယ်။

ဖြစ်စဥ်မှာမကွေးတိုင်းဒေသကြီး ပခုက္ကူ မြို့ အမှတ် (၆)ရပ်ကွက် အောင်မင်္ဂလာလမ်းသွယ်ရှိ “Hana Microfinance” အသေးစားချေးငွေရုံးခန်းသို့ မတ်လ ၁၅ ရက် မွန်းလွဲ ၁ နာရီခွဲခန့်တွင် အမည်မသိလူ၂ ဦး ဝင်ရောက်လာပြီး ငွေကိုင်ဝန်ထမ်း မသီရိထွန်း (၂၉)နှစ်အား သေနတ်ဖြင့် ပစ်ခတ်သွားတဲ့ဖြစ်စဥ်ဖြစ်ပွားခဲ့တာလို့ သိရပါတယ်။

သတင်းအရ လုံခြုံရေးတပ်ဖွဲ့ ဝင်တွေက သွားရောက်စစ်ဆေးရာ အဆိုပါ ဝန်ထမ်းအမျိုးသမီးသည် ရုံးအတွင်း တစ်ဦးတည်းရှိနေစဉ် Mask အနက်များ တပ်ဆင်ထားသူ ၂ ဦးက ရုံးအတွင်း ဝင်ရောက်လာကာ သေနတ်ဖြင့် ချိန်ရွယ်ပြီးငွေသေတ္တာအား ဖွင့်ပေးရန်ပြောဆိုသဖြင့် ဝန်ထမ်းအမျိုးသမီးမှာ ကြောက်လန့်၍ ရုံးအနောက်ဘက်အခန်းသို့ ထွက်ပြေးရာ သေနတ်ဖြင့် ၂ ချက်ပစ်ခတ်ခဲ့တာကြောင့်ဝန်ထမ်းအမျိုးသမီး၏ ဝဲတင်ပါးဖောက်ဝင်ဒဏ်ရာ ၁ ချက် ထိမှန်သွားခဲ့ပြီး အဆိုပါလူ၂ ဦးမှာ ဆိုင်ကယ်ဖြင့်ထွက်ပြေးသွားခဲ့တယ်လို့ သိရပါတယ်။

ဝန်ထမ်းအမျိုးသမီးအား လုံခြုံရေးတပ်ဖွဲ့ ဝင်များက ပခုက္ကူ ဆေးရုံသို့ ပို့ ဆောင်ဆေးကုသပေးစေခဲ့ပြီး သေနတ် သမား ၂ ဦးအား ဖမ်းဆီးရမိရေး လိုက်လံပိတ်ဆို့ ရှာဖွေစစ်ဆေးခြင်းများ ဆောင်ရွက်လျက်ရှိတယ်လို့ သိရပါတယ်။

ymg/hm
#Yangon_Media_Group 

#LocalNews
Published - 16 Mar 2022
ဂျာမနီနိုင်ငံအနေနဲ့ ပြည်တွင်းမှာလိုအပ်နေတဲ့ လူသားချင်းစာနာမှုဆိုင်ရာအကူအညီတွေကို WFPနဲ့လက်တွဲပြီး ဆက်လက်ကူညီသွားမယ်လို့ မြန်မာနိုင်ငံဆိုင်ရာဂျာမဏီသံရုံးကထုတ်ပြန်လိုက်ပါတယ်။

သံရုံးအကြီးအကဲ Mr. York Schuegraf ကအကြမ်းဖက်မှုနှင့် လက်နက်ကိုင်ပဋိပက္ခများကို တွေ့ကြုံခံစားနေရသည့် ဘာသာပေါင်းစုံမှ စစ်ဘေးရှောင်ပြည်သူများအတွက် စစ်ဘေးရှောင်စခန်းများသို့ WFP နှင့်အတူ သွားရောက်လေ့လာခဲ့ပြီးမြန်မာနိုင်ငံရှိ စစ်ဘေးရှောင်ပြည်သူများ တွေ့ကြုံနေရသည့် အခက်အခဲများအကြောင်းကို ဆွေးနွေးခဲ့တယ်လို့ သိရပါတယ်။

“ပြည်သူတွေ ကြုံတွေ့ခံစားနေရတာတွေကို ကျွန်တော်တို့ ခရီးစဉ်အတွင်း နားထောင်ခဲ့ပါတယ်။ သူတို့ရဲ့ အတွေ့အကြုံဖြစ်ရပ်တွေကို ကြားသိရတာဟာ ကျွန်တော်တို့ရဲ့ လူသားချင်းစာနာထောက်ထားမှုဆိုင်ရာ ဆောင်ရွက်ချက်တွေကို ပိုမိုကောင်းမွန်စွာ ညှိနှိုင်းဆောင်ရွက်ဖို့အတွက် အလွန်ပဲ အရေးကြီးပါတယ်။ ဒါနဲ့စပ်လျဉ်းပြီး တစ်နိုင်ငံလုံးက မြန်မာပြည်သူတွေအတွက် လိုအပ်တဲ့ထောက်ပံ့မှုတွေ ပေးနေတဲ့ WFP ရဲ့ လုပ်ဆောင်ချက်တွေကို ကျွန်တော်တို့ အလေးအနက် အသိအမှတ်ပြုပါတယ်။” လို့ Mr. Schuegraf က ပြောပါတယ်။

ဂျာမနီအနေနဲ့WFP မြန်မာအတွက် ယူရို ၅ သန်းကို ယမန်နှစ်က ထည့်ဝင် ပံ့ပိုးပေးခဲ့ပြီး ယုံကြည်စိတ်ချရတဲ့ မိတ်ဖက်အဖွဲ့ အတွက် အနာဂါတ်တွင်လည်း ဆက်လက်ပံ့ပိုးသွားမယ်လို့ ထုတ်ပြန်ထားပါတယ်။

ymg/hm
#Yangon_Media_Group

#LocalNews
Published - 16 March 2022
ရွှေတိဂုံစေတီတော်ကြီးတွင် ဗုဒ္ဓပူဇနိယတပေါင်းပွဲတော်ကို(၁၀)ရက်တိုင်တိုင် အောင်မြင်စွာကျင်းပ ပြုလုပ်ခဲ့တယ်လို့ ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ ထံမှ သိရပါတယ်။

ရွှေတိဂုံစေတီတော်ကြီး၏ ၂၆၁၀ နှစ်မြောက်၊ ဗုဒ္ဓပူဇနိယတပေါင်းပွဲတော် ၁၃၈၃ ခုနှစ်၊ တပေါင်းလဆန်း ၆ ရက်နေ့ (မတ်လ ၇ ရက် နေ့မှ ဒီက နေ့ မတ်လ ၁၆ ရက်) နေ့ အထိ (၁၀)ရက်တိုင်တိုင် ရွှေတိဂုံစေတီတော်ရင်ပြင်ရာဟုထောင့် ချမ်းသာကြီးတန်ဆောင်း၌ ကျင်းပ ပြုလုပ်ခဲ့ကြတာဖြစ်ပါတယ်။

ဗုဒ္ဓပူဇနိယတပေါင်းပွဲတော်ကာလအတွင်း ရတနတ္တယပူဇာမင်္ဂလာနှင့်လျော်ညီစွာ (၂၁၆)နာရီ အသံမစဲမဟာပဋ္ဌာန်းရွတ်ဖတ်ပူဇော်ခြင်း၊ လပြည့်နေ့အရုဏ်တက်ချိန်တွင် ဘဏ္ဍာတော်ထိန်းဂေါပကအဖွဲ့ဝင်များ၊ ဗုဒ္ဓဝေယျာဝစ္စအဖွဲ့အကျိုးဆောင်အဖွဲ့ များ၊ ရုံးဝန်ထမ်းများက အာရုံခံမုခ်တပေါင်းအောင်ပွဲရေစက်အသံမစဲမဟာပဋ္ဌာန်းရွတ်ဖတ်ပူဇော်ပွဲ၊ အနုမောဒနာအအသံမစဲမဟာ ပဋ္ဌာန်းရွတ်ဖတ်ပူဇော်ပွဲကြီးကို ခမ်းအနားကျင်းပခဲ့ကြတာပါ။

ဒါ့အပြင် ယနေ့ တပေါင်းလပြည့်နေ့အထိ မုခ်ဦး(၄)ခုရှိ ရုပ်ပွားတော် (၄)ဆူ၊ ဧည့်ခံတန်ဆောင်းအတွင်းရှိ ရုပ်ပွားတော်များနှင့် အထက်ပစ္စယံပတ္တမြားမျက်ရှင်ရုပ်ပွားတော်တို့အား ဆွမ်းတော်ကြီးဆက်ကပ်လှူဒါန်းခြင်း၊ ဩဝါဒါစရိယဆရာတော်ကြီးများ၊ ပင့်သံဃာတော်များ၊ မဟာပဋ္ဌာန်း ရွတ်ဖတ်ပူဇော်သည့် ဘာဏကသံဃာတော်များအား ဆွမ်းဆက်ကပ်လှူဒါန်းခြင်း၊ နဝကမ္မနှင့်လှူဖွယ်ပစ္စည်းများ ဆက်ကပ်လှူဒါန်းခြင်း
တို့ဖြင့် အောင်မြင်စွာ ကျင်းပပြုလုပ်နိုင်ခဲ့တယ်လို့ သိရပါတယ်။

ဆက်လက်၍ အသံမစဲမဟာပဋ္ဌာန်းရွတ်ဖတ်ပူဇော်ပွဲ အောင်ပွဲရေစက်ချအနုမောဒနာအခမ်းအနားကိုလည်း ဒီကနေ့ ၁၃၈၃ ခုနှစ်၊ တပေါင်းလပြည့်နေ့ (မတ်လ ၁၆ ရက်) နံနက် ၉ နာရီ အချိန်တွင် ရွှေတိဂုံစေတီတော် ရင်ပြင်ရာဟုထောင့် ချမ်းသာကြီးတန်ဆောင်း၌ ကိုဗစ်-၁၉ ကာကွယ်ထိန်းချုပ်ရေးညွှန်ကြားချက်များနှင့်အညီ ကျင်းပပြုလုပ်ခဲ့ကြပါတယ်။

ယနေ့ အခမ်းအနားသို့ ဩဝါဒါစရိယဆရာတော်ကြီးများ၊ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်းနှင့် အစိုးရအဖွဲ့ဝင် ဝန်ကြီးများ၊ ဘဏ္ဍာတော်ထိန်းဂေါပကအဖွဲ့ဝင်များနှင့် ဖိတ်ကြားထားသောဧည့်သည်တော်များတက်ရောက်ခဲ့ကြတယ်လို့ ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ ကသတင်းထုတ်ပြန်ခဲ့ပါတယ်။

ဓါတ်ပုံ - ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ ။

ymg/kg
#Yangon_Media_Group

Published 16 March 2022

ရေနံစိမ်းထုတ်လုပ်မှု ပြန်တောက်မယ့်အပေါ် စိုးရိမ်ပူပန်မှုတွေ လျော့ကျလာတဲ့အလျောက် ကမ္ဘာ့ရေနံဈေးနှုန်းတွေဟာ အင်္ဂါနေ့က  ကျဆင်းလာနေပါတယ်။

ဧပြီလပေးပို့မယ့် WTI ရဲ့ရေနံစိမ်းဈေးနှုန်းဟာ တစ်စည်ကို ၆.၅၇ဒေါ်လာလျော့ကျသွားပြိး ၉၆.၄၄ ဒေါ်လာဖြစ်သွားပါတယ်။ ဈေးနှုန်း ၆.၃၈ ရာခိုင်နှုန်းကျဆင်းသွားတယ်လို့ နယူးယောက် ကုန်သွယ်အိတ်ချိန်းရဲ့ သတင်းအချက်အလက်အရသိရပါတယ်။ မေလပေးပို့မယ့်ဘရန့်ရေနံစိမ်းဈေးနှုန်းဟာ ၆.၅၄ ရာခိုင်နှုန်းကျဆင်းသွားပါတယ်။ ငွေအားဖြင့်  ၆.၉၉ ဒေါ်လာကျသွားတာ ဖြစ်ပါတယ်။ရေနံစိမ်းတစ်စည်ဟာ ၉၉.၉၁ ဒေါ်လာဖြစ်သွားတယ်လို့ လန်ဒန်ရဲ့ ICE Futures အိတ်ချိန်းကသိရပါတယ်။

တနင်္လာနေ့မှာ WTI နှင့် ဘရန့် တို့ရဲ့ ရေနံစိမ်းဈေးနှုန်းဟာ ၅.၈ရာခိုင်နှုန်းနှင့် ၅.၁ရာခိုင်နှုန်းစီ အသီးသီးကျဆင်းခဲ့တာပါ။

Source CMG

#LocalNews
Published_16 March 2022

မြန်မာအလုပ်သမားတွေအနေနဲ့ ထိုင်းနိုင်ငံကို MOU စနစ်နဲ့ အခု မတ်လကုန်မှာ သွားရောက်ခွင့်ရကြတော့မှာပါ။အလုပ်သမားဝန်ကြီးဌာနအနေနဲ့ အလုပ်သမားတွေကို အမြန်ဆုံး စေလွှတ်နိုင်ဖို့အတွက် ထိုင်းနိုင်ငံဘက်ကိုရောက်သွားတဲ့အခါ ကွာရန်တင်းဝင်ရမယ့် အစီအစဉ်တွေက အစ စီစဉ်ပေးနေတယ်လို့ သိရပါတယ်။

#Yangon_Media_Group

#LocalNews
Published - 16 March 2022
သီတဂူဆရာတော်ကြီး၏ သက်တော်(၈၅)နှစ်ပြည့် ဝိဇာတမွေးနေ့တွင် ရတနာစေတီဆင်များရှင် ဘုရားကြီးကို ဗုဒ္ဓဘိသေကအနေကဇာတင်လှူပူဇော်ပွဲ မင်္ဂလာအခမ်းအနားကို ယ နေ့ မတ်လ ၁၆ ရက်၊ နံနက် ၅ နာရီ အချိန်တွင် ကျင်းပပြုလုပ်ခဲ့ကြတယ်လို့ သိရပါတယ်။

အဆိုပါ ရတနာစေတီဆင်များရှင် ဘုရားကြီးကို ဗုဒ္ဓဘိသေကအနေကဇာတင်လှူပူဇော်ပွဲ မင်္ဂလာအခမ်းအနားကို အဘိဓဇမဟာရဋ္ဌဂုရု သီတဂူအဓိပတိဆရာတော်ဘုရားကြီးကိုယ်တော်တိုင်ဦးဆောင်၍ စစ်ကိုင်းမြို့ပေါ်မှ သံဃာတော်များနှင့် သီတဂူကမ္ဘာ့ဗုဒ္ဓတက္ကသိုလ်မှ သံဃာတော်များ စုပေါင်းကာ ပြုလုပ်ခဲ့ခြင်း ဖြစ်ပါတယ်။

ဗုဒ္ဓဘိသေကအနေကဇာတင်လှူပူဇော်ပွဲအပြီးတွင်ရတနာစေတီဆင်များရှင်ဘုရားကြီး၏ စိန်ဖူးတော်နှင့် ငှက်မြတ်နားတော် ရေစက်ချ အခမ်းအနားကိုလည်း ဒီက နေ့ နံနက်(၈)နာရီအချိန်တွင် ရတနာစေတီဆင်များရှင်ဘုရားကြီး၏ ဓမ္မာရုံပေါ်တွင် ဆက်လက်ကျင်းပခဲ့တယ်လို့ သိရပါတယ်။

"ဆရာတော်၏ ကြီးမားသော မေတ္တာအရိပ်မှာ ၂၂ နှစ်တာ ကာလတိုင်အောင် နေခွင့်ရခဲ့၍ အခွင့်ရေးများစွာ ရရှိခဲ့ပါပြီ။ အလွန့်အလွန် ကျေးဇူးကြီးမားသော ဆရာတော်ကြီးသည် သက်တော် ၈၅ နှစ်ပြည့်ပြီဖြစ်၍ နောက်ထပ် နောက်ထပ် နှစ်များစွာ ခန္ဓာ့ဝန် လောကဝန် သာသနာ့ဝန် တို့ကို စိတ်ရှိတိုင်း ကိုယ်ပါ၍ ချမ်းသာစွာ ဆောင်ရွက်နိုင်ပါစေ။"လို့ ဒေါက်တာ ကောဝိဒသိရီ သီတဂူစတားဆရာတော် က သီတဂူဆရာတော်ကြီး အတွက် မွေးနေ့ ဆုမွန် ကောင်း တောင်းပေးခဲ့သည် ကို ယခုလို ကြည်ညိုဖွယ်ရာ တွေ့ မြင်ရပါတယ်။

အဆိုပါ စစ်ကိုင်းမြို့၊ ပန်းဘဲတန်းရပ်ရှိ ရတနာစေတီဆင်များရှင်စေတီတော်ကြီး၏ စိန်ဖူးတော်နှင့် ငှက်မြတ်နားတော်ကို တင်လှူပူဇော်သော မင်္ဂလာအခမ်းအနားကိုလည်း တပေါင်းလဆန်း(၁၃)ရက် နံနက်တွင် သီတဂူဆရာတော်ဘုရားကြီးကိုယ်တိုင်ဦးဆောင်၍ ပြုလုပ်ခဲ့တယ်လို့ လည်း သီတဂူစတားအဖွဲ့ က သတင်းထုတ်ပြန်ခဲ့ပါတယ်။

ဓါတ်ပုံ - သီတဂူစတား။

ymg/kg
#Yangon_Media_Group

#LocalNews
Published - 16 March 2022
မြန်မာနိုင်ငံဆိုင်ရာတရုတ်သံရုံးက မြန်မာနိုင်ငံဗုဒ္ဓဘာသာလောကနှင့် သက်ကြီးရွယ်အိုများအား လှူဒါန်းပေးအပ်သော ကပ်ရောဂါကာကွယ်ရေးပစ္စည်းများအား လွှဲပြောင်းပေးအပ်သည့် အခမ်းအနားကို မတ်လ ၁၅ ရက်နေ့က ရန်ကုန်မြို့ ရှိ တရုတ်သံရုံး၌ ကျင်းပ ပြုလုပ်ခဲ့တယ်လို့ သိရပါတယ်။

"ကိုဗစ်-၁၉ ကပ်ရောဂါဖြစ်ပွားလာကတည်းက တရုတ်-မြန်မာနှစ်နိုင်ငံက တစ်လှေတည်းစီးတစ်ခရီးတည်းသွားကာ အပြန်အလှန်ထောက်ခံအားပေး၍ ထိရောက်သည့် ပူးပေါင်းဆောင်ရွက်မှုဖော်ဆောင်ခဲ့ပါတယ်။ မြန်မာနိုင်ငံရဲ့ ကပ်ရောဂါတိုက်ဖျက်ရေးလိုအပ်ချက်အရ တရုတ်နိုင်ငံအစိုးရနဲ့ လူနေမှုအဖွဲ့အစည်း နယ်ပယ်အသီးသီးက မြန်မာနိုင်ငံသို့ Vaccine ၊ အောက်ဆီဂျင်စက်နှင့် နှာခေါင်းစည်းအပါအဝင် ကပ်ရောဂါတိုက်ဖျက်ရေးပစ္စည်းများစွာ ထောက်ပံ့ပေးပြီးဖြစ်ပါတယ်။ မြန်မာနိုင်ငံနယ်ပယ်အသီးသီးအတွက် ဂရုပြုမှုနှင့် နွေးထွေးမှုများပေးအပ်ခဲ့ပါတယ်။"လို့ သံအမတ်ကြီး Mr. Chen Hai က ပြောကြားခဲ့ပါတယ်။

မြန်မာနိုင်ငံဆိုင်ရာတရုတ်သံရုံးအ နေနဲ့ ယခုအကြိမ်တွင် မြန်မာ-တရုတ် ဗုဒ္ဓဘာသာကူးလူးဖလှယ်ရေးအသင်းမှတစ်ဆင့် မြန်မာနိုင်ငံတစ်နိုင်ငံလုံး ဒေသအသီးသီးဘုန်းကြီးကျောင်း၊ ဘိုးဘွားရိပ်သာနှင့် ကိုဗစ်-၁၉ ကုသရေးစင်တာများသို့ ကပ်ရောဂါကာကွယ်ရေးသုံး နှာခေါင်းစည်း အခုရေ ၃၆၀,၀၀၀ အား လှူဒါန်းပေးအပ်ခဲ့တာလည်း ဖြစ်ပါတယ်။

ဆက်လက်၍ သံအမတ်ကြီး Mr. Chen Hai က "တရုတ်-မြန်မာနှစ်နိုင်ငံပြည်သူများသည် အချင်းချင်းရင်းနှီး၍ ဗုဒ္ဓရေစက်ချင်းတူညီကြောင်း၊ မိမိသည် နိုင်ငံတော်သံဃမဟာနာယကအဖွဲ ဥက္ကဋ္ဌဆရာတော်၊ ဗန်းမော်ဆရာတော်ကြီးနှင့် အကြိမ်များစွာတွေ့ဆုံခဲ့ပြီး တရုတ်-မြန်မာ ဗုဒ္ဓဘာသာလောက ကူးလူးဖလှယ် ပူးပေါင်းဆောင်ရွက်ရေးတိုးမြှင့်မှုကို ဆွေးနွေးခဲ့ကြောင်း၊ ဗန်းမော်ဆရာတော်ကြီးက မြန်မာ-တရုတ်ချစ်ကြည်ရင်းနှီးစွာပူးပေါင်းဆောင်ရွက်မှုကို အလွန်ချီးကျူးခဲ့ပြီး နှစ်နိုင်ငံ ဗုဒ္ဓဘာသာဝင်များ အတူတကွကြိုးပမ်းမှုဖြင့် ကမ္ဘာကြီးပိုမိုငြိမ်းချမ်း ချစ်ကြည်လာစေမည်ဟု မျှော်လင့်ကြောင်း" ကိုလည်း အဆိုပါ အခမ်းအနားမှာ ပြောကြားခဲ့ပါတယ်။

ထို နောက် ရွှေသံလွင်ကုမ္ပဏီဥက္ကဋ္ဌ ဦးကျော်ဝင်းက "တရုတ်နိုင်ငံကလှူဒါန်းပေးအပ်မှုကိုကျေးဇူးတင်ရှိကြောင်း၊ မြန်မာ-တရုတ် ဗုဒ္ဓဘာသာကူးလူးဖလှယ်ရေးအသင်းတွင် ဗန်းမော်ဆရာတော်ကြီးက နာယကအဖြစ်ထမ်းဆောင်ပြီး တရုတ်နိုင်ငံ၏ယခုအကြိမ်လှူဒါန်းပေးအပ်မှုကို အလွန်တန်ဖိုးထားကြောင်း၊ တရုတ်နိုင်ငံက မြန်မာနိုင်ငံဗုဒ္ဓဘာသာလောကနှင့် သက်ကြီးရွယ်အိုများအတွက်ဂရုပြုမှုကို အလိုအပ်ဆုံးလူများ၏ လက်ထဲရောက်အောင် ပိုဆောင်ပေးပြီး မြန်မာ-တရုတ်ကူးလူးဖလှယ်မှုကို ဆက်လက်တိုးမြှင့်ဖော်ဆောင်သွားမည်ဖြစ်ကြောင်း" ပြောကြားခဲ့တယ်လို့ သိရပါတယ်။

ယင်းအခမ်းအနားသို့ မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai နှင့် တာဝန်ရှိသူများ၊ မြန်မာ-တရုတ်ဗုဒ္ဓဘာသာကူးလူးဖလှယ်ရေးအသင်းဥက္ကဋ္ဌ၊ ရွှေသံလွင်ကုမ္ပဏီဥက္ကဋ္ဌ ဦးကျော်ဝင်း နှင့် တာဝန်ရှိသူများ တက် ရောက်ခဲ့ကြတယ်လို့လည်း မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး။

ymg/kg
#Yangon_Media_Group

#DailyNews
Published - 16 March 2022

(၁) မြန်မာနိုင်ငံသားများ ထိုင်းနိုင်ငံသို့ MOU စနစ်ဖြင့် ယခုလကုန်တွင် သွားရောက်နိုင်မည်

(၂) ပန်းဥယျာဉ်လူမှုကူညီရေးအသင်းက ရန်ပုံငွေ အခက်အခဲကြောင့် နယ်လှည့်ဆေးကုသပေးမှု တွေကို ခေတ္တရပ်နား

(၃) နေ့စဉ်မိုးလေဝသ သတင်း

(၄) ရုရှား-ယူကရိန်းစစ်ရေးပဋိပက္ခကြောင့် ထိုင်းနိုင်ငံ၏ခရီးသွားလုပ်ငန်း နစ်နာထိခိုက်မှုများရှိလာ..... အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ် ။

#Yangon_Media_Group

#LocalNews
Published_16 March 2022

မြန်မာနိုင်ငံတွင် ၂၀၁၇ မှစတင်၍ ဖွင့်လှစ်ထားခဲ့သော Crystal Jade Kitchen Myanmar ၏ဆိုင်ခန်းများအားလုံးကို အပြီးတိုင်ပိတ်သိမ်း၍ Crystal Jade Kitchen Brand အနေဖြင့် မြန်မာနိုင်ငံမှ ပြန်လည်ထွက်ခွာတော့မည် ဖြစ်ကြောင်း အသိပေးထားခြင်း ဖြစ်သည်။

"၆ နှစ်တာခရီးလမ်းတစ်လျှောက်စဉ်ဆက်မပြတ် အားပေးမှုများအတွက် Crystal Jade Kitchen Myanmar မှ အထူးကျေးဇူးတင်ရှိပါတယ်"ဟု ယင်းတို့၏ လူမှုကွန်ရက်တွင် ထုတ်ပြန်ချက်ဖော်ပြထားသည်။

အဆိုပါ ဆိုင်မှ အားပေးသုံးဆောင်ခဲ့ကြရသော အစားအသောက်များကို အမြဲ အမှတ်ရနေမည့် အကြောင်းများကိုလည်း စားသုံးသူများက ယင်းတို့ ၏ ထုတ်ပြန်မှုအောက်တွင် မှတ်ချက် ပြုထားကြသည်ကို တွေ့ရသည်။

Crystal Jade မြန်မာ၏ ပထမဆုံးဆိုင်ခွဲကို ရန်ကုန်အပြည်ပြည်ဆိုင်ရာ လေဆိပ် Terminal 2 နှင့် Sedona Hotel တွင်ဖွင့်လှစ်ခဲ့ပြီး ယင်းနောက် Junction City နှင့် Union Business Centre တို့တွင် ထပ်မံ၍ ဆိုင်ခွဲများဖွင့်လှစ်ခဲ့ခြင်းဖြစ်ကြောင်းသိရသည်။

ymg/mt
Yangon_Media_Group

#WorldPolitics
Published 16 March 2022

ရုရှားနိုင်ငံက အမေရိကန်မှ အစိုးရအုပ်ချုပ်ရေးထိပ်သီးအရာရှိတွေကို ဒဏ်ခတ်ပိတ်ဆို့မှုများချမှတ်ကြောင်း အင်္ဂါနေ့ကကြေညာခဲ့ပါတယ်။ ထိုပုဂ္ဂိုလ်တွေထဲမှာ အမေရိကန်သမ္မတ'ဂျိုးဘိုင်ဒန်'၊ နိုင်ငံခြားရေးဝန်ကြီး'တိုနီဘလင်ကန်'၊ ကာကွယ်ရေးဝန်ကြီး'လွိက်အော်စတင်'၊ နောက်ထပ်အုပ်ချုပ်ရေးအရာရှိတွေနဲ့ နိုင်ငံရေးပုဂ္ဂိုလ် ၁၀ ဦးတို့ ပါဝင်ကြပါတယ်။

ဒီလိုအရေးယူပိတ်ဆို့ခြင်းများပြုလုပ်ခြင်းဟာ အမေရိကန်ကို တန်ပြန်ဒဏ်ခတ်ပိတ်ဆို့တဲ့သဘောဖြစ်ကြောင်း ရုရှားတို့ကအသိပေးလိုက်ပါတယ်။ ရုရှား-ယူကရိန်းပဋိပက္ခနဲ့ပတ်သက်ပြီး အမေရိကန်နဲ့အနောက်တိုင်းနိုင်ငံများက ရုရှားသမ္မတ'ဗလာဒီမီယာပူတင်'အပါအဝင် ရုရှားထိပ်သီးခေါင်းဆောင်များကို အမည်ပျက်စာရင်းထည့်သွင်းကာ ဒဏ်ခတ်ပိတ်ဆို့ခဲ့ကြပါတယ်။

ရုရှားတို့ အခုနောက်ဆုံးဒဏ်ခတ်ပိတ်ဆို့လိုက်တဲ့ ပုဂ္ဂိုလ်စာရင်းကို ခရမ္မလင်နန်းတော်က အင်္ဂါနေ့မှာကြေညာလိုက်ကာ ဒီဒဏ်ခတ်ပိတ်ဆို့ခြင်းဟာ အမေရိကန်လက်ရှိအစိုးရအဖွဲ့ရဲ့ ရုရှားမုန်းတီးရေးလမ်းစဉ်ကို တန်ပြန်အရေးယူလိုက်တဲ့သဘောဖြစ်ကြောင်း ဖော်ပြသွားပါတယ်။

ဒဏ်ခတ်ပိတ်ဆို့ခံလိုက်ရတဲ့ပုဂ္ဂိုလ် ၁၃ ဦးမှာ သမ္မတ'ဘိုင်ဒန်'က ထိပ်ဆုံးကပါဝင်လာပြီး သူ့နောက်မှာတော့ 'ဘလင်ကန်'၊ 'အော်စတင်'၊ စစ်ဦးစီးချုပ်ဥက္ကဌ ဗိုလ်ချုပ်'မာ့ခ်မီလေ'၊ နိုင်ငံတော်လုံခြုံရေးအကြံပေးအရာရှိ'ဂျိတ်ခ်ဆာလီဗန်'၊ စီအိုင်အေညွှန်ကြားရေးမှူး'ဝီလီယံဘန်းစ်'၊ အိမ်ဖြူတော်မီဒီယာရှင်းလင်းပွဲတာဝန်ခံ'ယန်ဆာကီ' တို့ပါဝင်ပါတယ်။
အဲဒီစာရင်းအောက်မှာ နိုင်ငံခြားရေးဝန်ကြီးဟောင်း'ဟီလာရီကလင်တန်'၊ ယူကရိန်းစွမ်းအင်ကုမ္ပဏီတစ်ခုနဲ့ ပူးပေါင်းဆောင်ရွက်နေတဲ့ 'ဘိုင်ဒန်'ရဲ့သားဖြစ်သူ'ဟန်တာ'တို့လည်း ပါဝင်ပါတယ်။

အမည်ပျက်စာရင်းထဲမှာထည့်သွင်းထားတဲ့ပုဂ္ဂိုလ်တွေကို ရုရှားဖက်ဒရေးရှင်းနိုင်ငံသို့ ဝင်ရောက်ခွင့်ပိတ်ပင်ထားပါတယ်။ ဒါပေမဲ့လည်း အမေရိကန်အရာရှိပုဂ္ဂိုလ်တွေအနေနဲ့ ရုရှားအကျိုးစီးပွားအတိုင်းဆောင်ရွက်မယ်ဆိုပါက အဆက်အသွယ်ဖြတ်သွားမှာမဟုတ်ဘူးလို့ ဖော်ပြထားပါသေးတယ်။

ဒဏ်ခတ်ပိတ်ဆိုမယ့်စာရင်းထဲကို နောက်ထပ်ပုဂ္ဂိုလ်တွေ ထပ်မံထည့်သွင်းသွားဦးမှာဖြစ်ပြီး ရုရှားမကောင်းကြောင်းထုတ်ဖော်လှုဆော်နေတဲ့ ရုရှားမုန်းတီးရေးသမားတွေ၊ အမေရိကန်ထိပ်သီးအရာရှိတွေ၊ စစ်ရေးအရာရှိတွေ၊ ဥပဒေရေးရာအရာရှိတွေ၊ စီးပွားရေးလုပ်ငန်းရှင်တွေ၊ ကျွမ်းကျင်ပညာရှင်တွေ၊ မီဒီယာသတင်းထောက်တွေကို အမည်ပျက်စာရင်းထဲထည့်သွင်းသတ်မှတ်သွားမှာဖြစ်ကြောင်း သတိပေးလိုက်ပါတယ်။

အမေရိကန်တို့က အစောပိုင်းတုန်းက ရုရှားစီးပွားရေးလုပ်ငန်းရှင်တွေနဲ့ မီဒီယာလုပ်ငန်းရှင်တွေကို ဒဏ်ခတ်ပိတ်ဆို့ခဲ့ရာ အခုရုရှားတို့အရေးယူပိတ်ဆို့ခြင်းတွေဟာ ကလဲ့စားချေတုန့်ပြန်တဲ့သဘောသက်ရောက်နေပါတယ်။

ယူကရိန်းကို ရုရှားတို့စစ်ရေးကျူးကျော်မှုပြုလုပ်ပြီး ၃ ပတ်နီးပါးကာလအတွင်း ရုရှားနိုင်ငံဟာ ကမ္ဘာပေါ်မှာဒဏ်ခတ်ပိတ်ဆိုခြင်းအများဆုံးခံနေရတဲ့ နိုင်ငံဖြစ်နေပါပြီ။
အမေရိကန်၊ ယူကေ၊ ဥရောပသမဂ္ဂတို့ က အရေးယူဒဏ်ခတ်ခြင်းများချမှတ်ခဲ့တဲ့အပြင် နာမည်ကြီးပုဂ္ဂလိကကုမ္ပဏီတွေဖြစ်တဲ့ မက်ဒေါ်နယ်၊ ကိုကာကိုလာ၊ ငွေကြေးဝန်ဆောင်မှုလုပ်ငန်းများဖြစ်တဲ့ ဗီဇာကတ်၊ မာစတာကတ်တို့ ကပါ ရုရှားနိုင်ငံမှာ လုပ်ငန်းဆောင်ရွက်ခြင်း ရပ်ဆိုင်းထားခဲ့ပါတယ်။
Source: RT