#Local_News
Published_ 30 June 2022

မြန်မာသံရုံး (တိုကျိုမြို့) မှ ၂၀၂၂ ခုနှစ်၊ ဇွန် (၁၆) ရက်မှ ဇွန် (၃၀) ရက်အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့တဲ့ အလုပ်ကမ်းလှမ်းစာ ၂၃၅ ခု နှင့် ပတ်သက်သည့် အချက်အလက်များအား အသိပေး ထုတ်ပြန်ထားပါတယ်။

မြန်မာသံရုံး (တိုကျိုမြို့) အနေဖြင့် အလုပ်သမားဝန်ကြီးဌာနက နိုင်ငံခြားရေး ဝန်ကြီးဌာနမှတစ်ဆင့် ပေးပိုလာတဲ့ အလုပ်ကမ်းလှမ်းစာများကို အချိန်နှင့်တစ်ပြေးညီစိစစ်ဆောင်ရွက်ပေးလျက်ရှိတယ်လို့ ထုတ်ပြန်ချက်မှာ ဖော်ပြထားပါတယ်။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေး ကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင် တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက်များ၊ သဘောထားမှတ်ချက်များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရပါတယ်။

မြန်မာသံရုံး (တိုကျိုမြို့) မှစိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့တဲ့ အလုပ်ကမ်းလှမ်းစာ ၂၃၅ ခုတွင် မြန်မာနိုင်ငံမှ အလုပ်သမားပေါင်း ၇၀၀ ကျော်ကို ခေါ်ယူသွားမှာ ဖြစ်ကြောင်း သိရပါတယ်။

ymg-mnn
#Yangon_Media_Group

#Local_News
Published_ 30 June 2022

၂၀၂၂ ခုနှစ် ဇူလိုင် ၃၁ ရက်တွင် သုံးနှစ်၊ သုံးလ၊ သုံးရက် အဓိဋ္ဌာန်ပြည့်၍ မိုင်းကျတ်အထက်ဂူမှ ထွက်တော်မူလာမည့် မိုင်းဖုန်းဆရာတော်အား လာရောက်ဖူးမြော်သူများ အဆင်ပြေစေရေး ပြင်ဆင်ဆောင်ရွက်လျက်ရှိကြောင်း သိရပါတယ်။

မိုင်းဖုန်းဆရာတော်သည် ရှမ်းပြည်နယ်(အရှေ့ပိုင်း)၊ မိုင်းဆတ်ခရိုင်၊ မိုင်းခုတ်မြို့၊ မိုင်းကျတ်ကျေးရွာအနီးရှိ မိုင်းကျတ်အထက်ဂူတွင် ၂၀၁၉ ခုနှစ် ဧပြီလ ၂၈ ရက်မှစတင်၍ အဓိဋ္ဌာန်ပြု တရားကျင့်ကြံအားထုတ်ခဲ့တာ ဖြစ်ပါတယ်။

ဆရာတော်အား အနယ်နယ်အရပ်ရပ်မှ လာရောက်ဖူးမြော်သူများအတွက် လမ်းပန်းဆက်သွယ်ရေး ကောင်းမွန်စေရေး၊ ကျန်းမာရေးဆိုင်ရာ စောင့်ရှောက်မှုပေးရေး၊ နေထိုင်တည်းခိုရေး၊ သောက်သုံးရေနှင့် လျှပ်စစ်မီးလိုအပ်ချက်များ အဆင်ပြေစေရေး ပြင်ဆင်ဆောင်ရွက်နေတာ ဖြစ်ပါတယ်။

မိုင်းကျတ်ဂူမှ ထွက်တော်မူလာတဲ့အခါ မိုင်းကျတ်အောက်ဂူတွင် အပူဇော်ခံ၍ တရားတော်များ ဟောကြားမည်ဖြစ်ပြီး မိုင်းဖုန်းဆရာတော် အဓိဌာန်ဝင်သည့် မိုင်းကျတ်ကျောက်ဂူသို့ မိုင်းဆတ်မြို့နှင့် မိုင်းပျဉ်းမြို့များမှတစ်ဆင့် သွားရောက်နိုင်ကာ အဆိုပါမြို့များနှင့် ၃၇ မိုင်ခန့်အကွာတွင် တည်ရှိကြောင်း သိရပါတယ်။

ymg-mnn
#Yangon_Media_Group

#LocalNews
Published - 29 June 2022

ထိုင်းနိုင်ငံနယ်စပ်ဒေသများတွင် ရောက်ရှိနေကြသော CDM ပြုလုပ်ထားကြသူများနှင့်လူငယ်များအနေဖြင့် ပြည်တွင်းသို့ အလွယ်တကူပြန်လည်ဝင်ရောက်လာနိုင်စေရန် ထိုင်းတပ်မတော်က ကူညီပေးသွားမည်ဖြစ်ကြောင်း(၃၄)ကြိမ်မြောက် မြန်မာ-ထိုင်း ဒေသဆိုင်ရာ နယ်ခြားကော်မတီအစည်းအဝေး မှတ်တမ်းများအရ သိရသည်။

တိုင်းရင်းသား လက်နက်ကိုင်အဖွဲ့အစည်းများတည်ရှိရာ နယ်မြေဒေသများသို့ CDM ဝန်ထမ်းများ၊ ကျောင်းသား၊ကျောင်းသူများ၊ လူငယ်လူရွယ်များအနေဖြင့်ရောက်ရှိသွားခဲ့ကြပြီး လက်နက်ပစ်ခတ်ခြင်းနှင့် ဖောက်ခွဲဖျက်ဆီးရေးသင်တန်းများကိုစာရင်းသွင်း ပါဝင်တက်ရောက်ခဲ့ကြသည်ကိုတွေ့ရကြောင်း၊ ထိုကြောင့် မြန်မာနိုင်ငံရှိနေရပ်အသီးသီးသို့ ပြန်လည်ဝင်ရောက်လိုပါက ကြိုဆိုလက်ခံရေးစခန်းများ ဖွင့်လှစ်ကြိုဆိုမည်ဟု ထုတ်ပြန်ထားသည့်အပေါ် ထိုင်းတပ်မတော်က အစည်းအဝေးအတွင်း ပြောကြားခဲ့ခြင်း ဖြစ်သည်။

(၃၄)ကြိမ်မြောက် မြန်မာ-ထိုင်း ဒေသဆိုင်ရာ နယ်ခြားကော်မတီအစည်းအဝေးကို မြန်မာနိုင်ငံက အိမ်ရှင်အဖြစ် တောင်ကြီးမြို့ရှိ တောင်ကြီးဟိုတယ်၌ ဇွန်လ ၂၈ ရက်နှင့်၂၉ ရက်တို့တွင် ပြုလုပ်ခဲ့ကြရာ မြန်မာကိုယ်စားလှယ်အဖွဲ့ခေါင်းဆောင် ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး အောင်စိုး၊ ဒုတိယခေါင်းဆောင် ဒုတိယဗိုလ်ချုပ်ကြီး ခင်လှိုင်နှင့် တပ်မတော်အရာရှိကြီးများ၊ ဌာနဆိုင်ရာတာဝန်ရှိသူများ၊ ထိုင်းနိုင်ငံမှကိုယ်စားလှယ်အဖွဲ့ခေါင်းဆောင် Lt.Gen. Apichet Suesat နှင့် အဖွဲ့ဝင်များ တက်ရောက်ခဲ့ကြကြောင်း သိရသည်။

မြန်မာနိုင်ငံ၏ နိုင်ငံရေးဖြစ်စဉ်ပြောင်းလဲမှုအပေါ် အကြမ်းဖက်မှုများပပျောက်စေရေး လုံခြုံရေးတပ်ဖွဲ့ဝင်များက ဆောင်ရွက်နေကြောင်းနှင့် နှစ်နိုင်ငံတပ်မတော်အကြား ပူးပေါင်းဆောင်ရွက်ခြင်းဖြင့် နယ်စပ်ဒေသတည်ငြိမ်အေးချမ်းရေးကို လုပ်ဆောင်ကြမည် ဖြစ်ကြောင်းလည်း အဆိုပါအစည်းအဝေးမှတ်တမ်းသတင်းထုတ်ပြန်ချက်တွင် ဖော်ပြထားသည်။

ymg/mt
#Yangon_Media_Group

#Local_News
Published_30 June 2022

ထိုင်းနိုင်ငံတွင် အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်ရက်စေ့ မြန်မာရွှေ့‌‌ပြောင်းလုပ်သား ကျား(၁၁၄)ဦး၊ မ(၄၄)ဦး၊ စုစုပေါင်း (၁၅၈) ဦး၊ ကလေး ကျား(၃)ဦး၊ မ (၅) ဦး၊ စုစုပေါင်း (၈)ဦး၊ အားလုံးစုစုပေါင်း (၁၆၆) ဦးတို့အား ဇွန်လ ၂၉ ရက်က ဒေသတွင်းပြန်လည်ရောက်ရှိခဲ့ကြကြောင်း သိရသည်။

မြန်မာနိုင်ငံဆိုင်ရာ အလုပ်သမားသံအရာရှိ ဦးရဲလင်းထက်၊ ရနောင်းမြို့နယ်အုပ်ချုပ်ရေးမှူး Mr. Somkiat Srisanate၊ နယ်ခြားကော်မတီမှ တာဝန်ရှိသူများ၊ ရနောင်းခရိုင်လူဝင်မှု ကြီးကြပ်ရေးဌာနမှ တာဝန်ရှိသူများ၊ နယ်စပ်ဖြတ်ကျော်အထူးတပ်ဖွဲ့မှ တာဝန်ရှိသူများက ယင်းတို့အားရနောင်းမြို့မှ ကော့သောင်းမြို့သို့ ပဲ့ချိတ်လှေ (၁၀) စီးဖြင့် ပြန်လည်ပို့ဆောင်ပေးခဲ့ကြခြင်း ဖြစ်သည်။

အဆိုပါ မြန်မာအလုပ်သမားများအား ကော့သောင်းခရိုင်နှင့် မြို့နယ် စီမံအုပ်ချုပ်ရေးအဖွဲ့မှ တာဝန်ရှိသူများ၊ ကျန်းမာရေးဌာနနှင့် ဌာနဆိုင်ရာများ၊ NGO အဖွဲ့အစည်းများက ကိုဗစ်-၁၉ ရောဂါ ရှိ မရှိ၊ မြန်မာနိုင်ငံသား မဟုတ်သူများ ပါဝင်လာခြင်း ရှိ မရှိ၊ မူးယစ်ဆေးဝါး သယ်ဆောင်လာခြင်း ရှိ မရှိ စစ်ဆေးလက်ခံခဲ့ပြီး အစားအသောက်၊ ကျန်းမာရေးနှင့် လိုအပ်သည့်ထောက်ပံ့ကူညီမှုများ ဆောင်ရွက်ပေးခဲ့ကြကြောင်းလည်း သိရသည်။

ပြန်လည်ဝင်ရောက်လာသူများထဲမှ ကိုဗစ်-၁၉ရောဂါ ကာကွယ်ဆေး အကြိမ်ပြည့် ထိုးနှံပြီးသူများအား နေရပ်အသီးသီးသို့ချက်ခြင်း ပို့ဆောင်ပေးပြီး ကာကွယ်ဆေး လုံးဝမထိုးနှံရသေးသူနှင့် တစ်ကြိမ်သာ ထိုးနှံထားသူများအား ကော့သောင်းမြို့ရှိ Quarantine Center သုံးခုတွင် အမျိုးသား အမျိုးသမီး သီးခြားစီခွဲခြားထားရှိကာ သုံးရက် အသွားအလာ ကန့်သတ်ထားရှိ စောင့်ကြည့်စစ်ဆေး၍ ပိုးစစ်ဆေးတွေ့ရှိခြင်းမရှိမှသာ နေရပ်အသီးသီးသို့ ပြန်လည်ပို့ဆောင်ပေးသွားမည်ဖြစ်ကြောင်း သိရသည်။

ymg/mt
#Yangon_Media_Group

#DailyNews
Published - 30 June 2022

၁။ မြန်မာ့အိုးစည်၊ ဒိုးပတ်များကို ပြည်ပရောက်မြန်မာများ အော်ဒါမှာယူမှုများနေ

၂။ မြဝတီနယ်စပ်မှ ပြည်ပပို့ကုန်များအတွက် ကန်ဒေါ်လာဖြင့်သာ ဈေးနှုန်းသတ်မှတ်ခွင့်ပြုမည်

၃။ နေ့စဉ်မိုးလေဝသသတင်း။

၄။ ပီရူးနိုင်ငံချန်ချန်မြို့ရှိ စပိန်ခေတ်မတိုင်မီ ရဲတိုက်ခံတပ်တွင် ရှေးဟောင်းပန်းပုရုပ်ထုတွေ့ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 30 June 2022

ရာခိုင်နှုန်းယူပြီးဖြစ်စေ၊ ဘဏ်တွင်အပ်ထားသည့်ငွေများ ထုတ်ပေး၍ လဲလှယ်ပေးရာတွင်ဖြစ်စေ ပါဝင်ပတ်သက်သူများအား သတင်းပေးတိုင်ကြားရန် နစက ရွှေနှင့်ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးကော်မတီမှ ယနေ့ထုတ်ပြန်ကြေညာခဲ့သည်။

နိုင်ငံခြားငွေကြေးကိုင်ဆောင်၍ ဥပဒေမဲ့အရောင်းအဝယ်ပြုလုပ်ခြင်း၊ ဈေးကစားခြင်းပြုလုပ်သူများ၊ အိမ်ခြံမြေနှင့် မော်တော်ယာဉ်ကဲ့သို့ အခြားပစ္စည်းများကိုရောင်းဝယ်ပြီး ပိုင်ဆိုင်မှုလွှဲပြောင်းရာတွင် မြန်မာနိုင်ငံတော်ဗဟိုဘဏ်၏ ငွေပေးချေမှု ကန့်သတ်ချက်များအတိုင်း လိုက်နာမှုမရှိသူများ၊ ဘဏ်များတွင်အပ်နှံထားသည့် ငွေသားထုတ်ယူရာ၌ ရာခိုင်နှုန်းယူ၍ ငွေသားထုတ်ပေးခြင်း၊ ဘဏ်ပြင်ပတွင်ငွေသားလက်ဝယ်ထိန်းသိမ်းထားသူများက ဘဏ်အကောင့်တွင် အပ်နှံထားသည့်ကျန်ငွေများကို ရာခိုင်နှုန်းယူ၍ငွေသားဖြင့် လဲလှယ်ထုတ်ပေးခြင်း စသည့်တို့အတွက် ပါဝင်ပတ်သက်သူများအား တိုင်ကြားနိုင်ကြောင်း ထုတ်ပြန်လိုက်ခြင်း ဖြစ်သည်။

ယခုအခါ ပြည်တွင်း၊ ပြည်ပကုန်သွယ်မှုလုပ်ငန်းများ ဆောင်ရွက်ရာတွင် အရေးပါသည့်ရွှေနှင့် ငွေကြေးဈေးကွက်တည်ငြိမ်မှု ရရှိစေရန် ရွှေနှင့်ငွေကြေးဈေးကွက်စောင့်ကြည့်၊ ထိန်းသိမ်းကြပ်မတ်ရေးလုပ်ငန်းကော်မတီကို ဖွဲ့စည်း၍ ပြည်တွင်းငွေကြေးဈေးနှုန်းများ တည်ငြိမ်မှုရှိအောင် ထိန်းကျောင်းကြပ်မတ်ရာတွင် အထောက်အကူပြုစေရန် Exploringစာ စိစစ်ရေးအဖွဲ့ဖြင့် လုပ်ဆောင်နေကြောင်း သိရသည်။

ymg/sth
#Yangon_Media_Group

#Local_News
Published - 30 June 2022

လျှပ်စစ်ယာဉ်များအတွက် ပန်းခြံ၊ အားကစားကွင်းနှင့် အဆင့်မြင့်အိမ်ရာများတွင် ဘက်ထရီအားသွင်းရန် နေရာများ (Charging Station) တည်ဆောက်ရန်ပြင်ဆင်နေကြောင်း ရန်ကုန်မြို့တော်စည်ပင်သာယာရေးကော်မတီ (YCDC) က သိရသည်။

ရန်ကုန်မြို့တော်တွင် Charging Station များ၊ ယာဉ်ရပ်နားရန် နေရာများ၊ ယာဉ်လမ်းကြောင်းများကို မြို့တော်စည်ပင်မှ ပူးပေါင်းဆောင်ရွက်သွားမည်ဖြစ်ကြောင်း၊ ပြည်သူများ တွင်တွင်ကျယ်ကျယ် အသုံးပြုနိုင်ရေးအတွက် နိုင်ငံတော်အဆင့်နှင့် တိုင်းဒေသကြီးနှင့် ပြည်နယ်အဆင့်များတွင် Road Safety Council အဆင့်ဆင့် ဖွဲ့စည်းထားမည်ဖြစ်သည့်အတွက် ယာဉ်အန္တရာယ်ကင်းရှင်းရေးကိုလည်း တွင်တွင်ကျယ်ကျယ် ဆောင်ရွက်သွားနိုင်မည်ဖြစ်ကြောင်း သိရသည်။

“လျှပ်စစ်ယာဉ်များ ကျယ်ကျယ် ပြန့်ပြန့် အသုံးပြုလာခြင်းအားဖြင့် အချို့သောလုပ်ငန်းတွေကို သက်သာစေမှာဖြစ်ပါတယ်။ လျှပ်စစ်သုံးယာဉ်နဲ့ ဆက်စပ်ပစ္စည်းဆိုင်ရာလုပ်ငန်းတွေကိုလည်း ကမ္ဘာ့နိုင်ငံအသီးသီးမှာ အသုံးပြုနေတာကိုတွေ့ရပါတယ်။ ရန်ကုန်မြို့တော်အနေဖြင့် လျှပ်စစ်ယာဉ်ပြေးဆွဲနိုင်ခြင်းအားဖြင့် လုပ်ငန်းကော်မတီရဲ့ တာဝန်တစ်ရပ်ဖြစ်တဲ့ သက်သာချောင်ချိရေးကို ဆောင်ရွက်နိုင်မှာ ဖြစ်ပါတယ်။၊ လျှပ်စစ်ယာဉ်တွေအတွက် ပန်းခြံ၊ အားကစားကွင်းနဲ့ အဆင့်မြင့်အိမ်ရာတွေမှာCharging Station တွေကိုလည်း တပ်ဆင်ဖို့လိုအပ်ပါတယ်"ဟု ရန်ကုန်မြို့တော်ဝန် ဦးဗိုလ်ဌေးက အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးစီး ကော်မတီ၊ လျှပ်စစ်သုံးယာဉ်နှင့် ဆက်စပ်လုပ်ငန်းများဆိုင်ရာ အထူးသက်သာခွင့်များ ညှိနှိုင်းကြီးကြပ်ရေး လုပ်ငန်းကော်မတီ၏ ညှိနှိုင်းအစည်းအဝေးတွင် ပြောကြားခဲ့သည်။

လျှပ်စစ်ဓာတ်အား ရရှိမှုအနေအထားအရ အဆင့်မြင့်အိမ်ရာများတွင် Charging Station များ ထည့်သွင်းဆောင်ရွက်ပါက ပြည်သူများအတွက် အဆင်ပြေမည် ဖြစ်ကြောင်း၊ အများပြည်သူ နေရာများတွင် ယာဉ်ရပ်နားခ သက်သာခွင့် ပြုခြင်းဖြင့် ကော်မတီ၏ လုပ်ငန်းတာဝန်ဖြစ်သော သက်သာခွင့်ကို ဆောင်ရွက်ပေးနိုင်မည်ဖြစ်ကြောင်း ၎င်းက ဆိုသည်။

ymg/sth
#Yangon_Media_Group

#WorldMilitary
Published 30 June 2022

ယူကရိန်းကျူးကျော်ခဲ့တဲ့ ရုရှားနိုင်ငံဟာ အနောက်နိုင်ငံရဲ့လုံခြုံရေးကိုပါ အကြီးမားဆုံးခြိမ်းခြောက်လာကြောင်း နေတိုး(NATO)အဖွဲ့က ဗုဒ္ဓဟူးနေ့က သတ်မှတ်လိုက်ပါတယ်။

ရုရှားတပ်တွေဝိုင်းရံခံထားရတဲ့ ယူကရိန်းတပ်များကို ခေတ်မီလက်နက်များတပ်ဆင်ပေးဖို့ အစီအစဉ်များကို သဘောတူညီလိုက်ကာ တိုင်းပြည်ကိုရွပ်ရွပ်ချွံချွံခုခံနေတဲ့ ယူကရိန်းတွေဘက်က မားမားမတ်မတ်ရပ်တည်ကြောင်း ကြေညာလိုက်ပါတယ်။

ကျူးကျော်မှုဖြစ်ပွားခြင်းနဲ့ စစ်ပွဲပြဿနာများနဲ့ပတ်သက်ပြီး ပြုလုပ်ခဲ့တဲ့ထိပ်သီးအစည်းအဝေးပွဲမှာ နေတိုးက ဆွီဒင်နဲ့ဖင်လန်နိုင်ငံတို့ကိုပါ ဖိတ်ခေါ်ခဲ့ပြီး ဥရောပအရှေ့ခြမ်းမှာ ကြုံတွေ့ရနိုင်တဲ့ ရုရှားရန်ကိုကာကွယ်နိုင်ရန်အတွက် ၂၀၂၃ ခုနှစ်ကစပြီး စစ်ရေးအင်အား ၇ ဆမြှင့်တင်ဖို့ ကတိပြုခဲ့ပါတယ်။

ဆွီဒင်နဲ့ဖင်လန်တို့ အမေရိကန်ဦးဆောင်တဲ့မဟာမိတ်အဖွဲ့ထဲဝင်ပြီး နိုင်ငံအတွင်း နေတိုးအခြေခံအဆောက်အအုံများကို ဆောက်လုပ်မယ်ဆိုရင်တောင် အဆိုပါနိုင်ငံများနဲ့ရင်းနှီးစွာ ဆက်လက်ဆက်ဆံသွားမှာဖြစ်ကြောင်း ရုရှားသမ္မတ’ဗလာဒီမီယာပူတင်’က တုန့်ပြန်လိုက်ပါတယ်။

ဆွီဒင်နဲ့ဖင်လန်တို့ နေတိုးအဖွဲ့ထဲဝင်မယ်ဆိုရင် ရုရှားနဲ့ဆက်ဆံရေးတင်းမာမှု မမြင့်လာအောင် ထိန်းသိမ်းသွားမယ်လို့ ‘ပူတင်’ရဲ့ပြောကြားချက်ကို ရုရှားသတင်းဌာနကဖော်ပြခဲ့ပါတယ်။

ဥရောပအနောက်ဘက် စပိန်ကစလို့ ယူကရိန်းနဲ့ထိစပ်နေတဲ့ ရိုမေးနီးယားနဲ့ပိုလန်တို့အထိ ဥရောပတလျှောက်မှာ ကုန်းကြောင်း၊ ရေကြောင်း၊ လေကြောင်းတပ်ဖြန့်ထားခြင်းများပြုလုပ်ဖို့ အမေရိကန်သမ္မတ’ဂျိုးဘိုင်ဒန်’က ကြေညာခဲ့ပါတယ်။

ပိုလန်နိုင်ငံမှာ တပ်ရင်းတစ်ရင်းနဲ့ အခြေစိုက်စစ်ဌာနချုပ်ထားရှိသွားမှာဖြစ်ပြီး နေတိုးအရှေ့ဘက်ပိုင်းမှာ အမေရိကန်က ပထမဆုံးအနေနဲ့ အမြဲတမ်းတပ်ဖွဲ့နေရာချခြင်းဖြစ်လာပါလိမ့်မယ်။

ယူကရိန်းကို ရုရှားကျူးကျော်လိုက်ခြင်းက ဥရောပငြိမ်းချမ်းရေးကို ပျက်စီးစေပြီး ဒုတိယကမ္ဘာစစ်နောက်ပိုင်း ဥရောပလုံခြုံရေးကိုအကြီးမားဆုံးခြိမ်းခြောက်လာတာဖြစ်ကြောင်း၊ နေတိုးက စည်းစည်းလုံးလုံးအင်ပြည့် အားပြည့်တုန့်ပြန်ထားကြောင်း နေတိုးအထွေထွေအတွင်းရေးမှူးချုပ်’ယန်းစ်စတိုလ်တန်ဘာ့ဂ်’က သတင်းထောက်တွေကို ပြောကြားခဲ့ပါတယ်။

လေကြောင်းကာကွယ်ရေးလက်နက်များ၊ လေကြောင်းယာဉ်များ၊ အီလက်ထရောနစ်စစ်ရေး ကိရိယာများအပါအဝင် ၁ ဘီလီယံပေါင်တန်ဖိုးရှိတဲ့ စစ်ရေးထောက်ပံ့မှုများကို ယူကရိန်းအတွက်ကူညီသွားမယ်လို့ ဗြိတိန်ကကြေညာထားပါတယ်။

Source: Reuters
#Yangon_Media_Group

Published 30 June 2022

မြန်မာနိုင်ငံသို့ အလုပ်သဘောခရီးရောက်ရှိနေတဲ့ အာဆီယံအလှည့်ကျဥက္ကဋ္ဌ၏ မြန်မာနိုင်ငံဆိုင်ရာအထူးကိုယ်စားလှယ်၊ ကမ္ဘောဒီးယားနိုင်ငံ ဒုတိယဝန်ကြီးချုပ်၊ နိုင်ငံခြားရေးနှင့် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး မစ္စတာ PRAK Sokhonn ဟာ ဇွန်၃၀ ရက် ဒီကနေ့ မနက်ပိုင်းမှာ ရန်ကုန်မြို့ရှိ တရုတ်ပြည်သူ့သမ္မတနိုင်ငံ သံရုံးမှာကျင်းပပြုလုပ်တဲ့ မြန်မာနိုင်ငံ ကိုဗစ်-၁၉ ရောဂါကာကွယ် တိုက်ဖျက်ရေးအတွက် ကိုဗစ်ကာကွယ်ဆေးတွေကို အာဆီယံမှ တစ်ဆင့် လှူဒါန်းတဲ့ အခမ်းအနားကို တက်ရောက်ခဲ့ပါတယ်။

အဆိုပါအခမ်းအနားမှာ မြန်မာနိုင်ငံဆိုင်ရာ အထူးကိုယ်စားလှယ် ၊ ကမ္ဘောဒီးယားနိုင်ငံ ဒုတိယဝန်ကြီးချုပ်၊ နိုင်ငံခြားရေးနှင့် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး မစ္စတာ PRAK Sokhonn ထံ မြန်မာနိုင်ငံဆိုင်ရာတရုတ်သံအမတ်ကြီး မစ္စတာ  Chen Haiက တရုတ်နိုင်ငံအစိုးရက ပေးပို့လှူဒါန်းတဲ့ ကိုဗစ်-၁၉ ရောဂါကာကွယ်ဆေးတွေကို ပေးအပ်လှူဒါန်းခဲ့ကြောင်းသတင်းရရှိပါတယ်။

#Local_News
Published - 29 June 2022

နိုင်ငံအတွင်းသို့ ပြည်ပမှ ကော်ဖီမှုန့် နှစ်စဉ် အမေရိကန်ဒေါ်လာသန်း ၅၀ ခန့် တင်သွင်းနေရကြောင်း ကော်ဖီစိုက်ပျိုးထုတ်လုပ်သူများထံမှ သိရသည်။

ယင်းကြောင့် ပြည်တွင်း၌ ကော်ဖီတိုးချဲ့စိုက်ရန် လုပ်ဆောင်နေလျက်ရှိကြောင်း ၊ မြန်မာနိုင်ငံတွင် ကုန်းမြင့်ကော်ဖီနှင့် မြေပြန့်ကော်ဖီဟူ၍ ၂မျိုးရှိပြီး ယင်း၂မျိုးကို လာမည့် ၅နှစ်တာကာလအတွင်း စိုက်ဧက ၃ သိန်းအထိ စိုက်ပျိုးနိုင်ရန် လျာထားလျက်ရှိကြောင်း သိရသည်။

"မြန်မာနိုင်ငံထဲမှာ ကော်ဖီအမျိုးအစားက ၂မျိုးရှိပါတယ်။ ကုန်းမြင့်ကော်ဖီကို အာရေဗီးယားလိုခေါ်ပြီး ပင်လယ်ရေမျက်နှာပြင်အထက် ပေ ၃၀၀၀ ကျော်ကနေ ပေ ၆၀၀၀ ကျော်အတွင်း စိုက်ပျိုးမှဖြစ်ထွန်းမယ့်အမျိုးအစားဖြစ်ပါတယ်။ နောက်တမျိုးကတော့ မြေပြန့်ကော်ဖီဖြစ်ပြီး ရိုဘက်စတာလိုခေါ်ပါတယ်။ သူ့ကိုတော့မြေပြန့်ဒေသတွေဖြစ်တဲ့ ကရင်ပြည်နယ်၊ တနသာ်ရီတိုင်းဒေသကြီးနဲ့ ပဲခူးတိုင်း၊ ဧရာဝတီတိုင်းဒေသကြီးတွေမှာ စိုက်ပျိုးနေပါတယ်။ အခုလာမယ့် ၅နှစ်အတွင်း ကော်ဖီဧက ၃ သိန်းအထိ စိုက်ပျိုးသွားဖို့ လျာထားကာ ဇုန် ၄ခုခွဲပြီး စိုက်ပျိုးသွားမှာဖြစ်ပါတယ်" ဟု ကော်ဖီစိုက်ပျိုးထုတ်လုပ်သူတစ်ဦးက YMG ကိုပြောသည်။

လက်ရှိတွင် မြန်မာနိုင်ငံတွင် ကော်ဖီစိုက်ဧက ၄သောင်းကျော်ရှိသည့်အနက် အသီးခူးဧကမှာ ၃သောင်းကျော်ရှိကြောင်း၊ တစ်နှစ်အတွင်းကော်ဖီထွက်ရှိမှု တန်ချိန် ၉၀၀၀ ကျော်ထွက်ရှိသောကြောင့် နှစ်စဉ် အမေရိကန်ဒေါ်လာ ၃၆ သန်းခန့်ရရှိနေကြောင်း သိရသည်။

ymg/NN
#Yangon_Media_Group

#Local_News
Published - 30 June 2022

ဇွန်လ (၃၀) ရက်မနက်ပိုင်းတွင် စစ်ကိုင်းတိုင်း၊ ကလေးမြို့နှင့်ရှမ်းပြည်နယ်၊ မိုင်းဖြတ်မြို့အနီးတွင် မြေငလျင်များ လှုပ်ခတ်သွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၊ မြေငလျင်ဌာနခွဲမှ သိရသည်၊၊

ဇွန်လ (၃၀) ရက်နေ့၊ မြန်မာစံတော်ချိန် (၀၀)နာရီ၊ (၃၁)မိနစ်၊ (၅၆)စက္ကန့် အချိန်တွင်ကလေးမြို၏ အရှေ့မြောက်ဘက် (၁၂)မိုင်ခန့်အကွာ အင်အားရစ်(ခ်)တာစကေး (၄.၇)အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း တိုင်းထွာရရှိကြောင်း ထုတ်ပြန်ထားသည်၊၊

ဇွန်လ (၃၀)ရက်မနက်ပိုင်း(၁)နာရီကျော်ကလည်း မိုင်းဖြတ်မြို့၏ မြောက်ဘက်မိုင်(၂၀)ခန့်အကွာတွင် အင်အားရစ်(ခ်)တာစကေး (၅.၄)အဆင့်ရှိ အင်အားအသင့်အတင့်ရှိသော မြေငလျင်တစ်ခုလှုပ်ရှားသွား ကြောင်းသိရသည်၊၊

မြန်မာနိုင်ငံတွင် ဇွန်လဆန်းပိုင်းကနေစတင်ပြီး မြေငလျင်များ ဆက်တိုက်လှုပ်ခတ်လျက်ရှိပြီး မြေငလျင်ကြီးများလှုပ်ခတ်နိုင်ခြေရှိသဖြင့် အထူးဂရုပြုရန်လိုအပ်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၊မြေငလျင်ဌာနခွဲ၊လက်ထောက်ညွှန်ကြားရေးမှူးဒေါက်တာယဥ်မျိုးမင်းထွေးကလည်း သတိပေးထားသည်၊၊

ymg/tthl
#Yangon_Media_Group

#Local_News
Published - 30 June 2022

မသမာသူများမှ KBZ Pay အမည်ဖြင့် ငွေကြေးလိမ်လည်ထုတ်ယူမှုများရှိနေကြောင်း သိရသည်။

"ပထမတုန်းက MPT ရုံးချုပ်ကဆိုပြီး ဖုန်းဝင်လာတယ်။ MPT Bonus ရလို့ K Pay ထဲငွေထည့်ပေးချင်လို့ဆိုပြီး ပြောပါတယ်။ K Pay ထဲငွေဝင် မဝင်စစ်ခိုင်းပါတယ်။ မဝင်ဘူး ပြောတော့ ကျွန်တော်ပြောသလို တစ်ခုချင်းစီဆက်တိုက်လုပ်ပေးပါဆိုပြီး ပြောတယ်။ သူပြောတာတွေလိုက်လုပ်ရင်း ဖုန်းချပြီး ဖုန်းပြန်စစ်တော့ K Pay ထဲကငွေ အကုန်ပါသွားတယ်။ ကျွန်တော်သိသလောက်ကတော့ ကျွန်တော့်အသိတွေထဲမှာ သုံးလေးယောက်လောက် ပါသွားပြီးကြပြီ"ဟု ကိုယ်တိုင်ကြုံတွေ့ရသူတစ်ဦးက ပြောသည်။

အဆိုပါ လိမ်လည်မှုများကို အသက်အရွယ်ကြီးသူများအား ဦးတည်လုပ်ဆောင်နေကြကြောင်း လွန်ခဲ့သည့်နှစ်ရက်ခန့်က ကိုယ်တိုင်ကြုံတွေ့ခဲ့ရသူတစ်ဦးက ဆိုသည်။

"ည သန်းခေါင်လောက်မှာ မက်ဆေ့ချ်ပို့တယ်၊ Viber ကနေ ဝင်လာတာ၊ KBZ Pay အတုလေ မက်ဆေ့မဖတ်တော့ ဖုန်းပါခေါ်တာ၊ ည ၁၂ နာရီကြီး။ ကြည့်လိုက်တော့ အတုမှန်းသိလို့ Block လိုက်တယ်။ Viber အပြင် အခြားမက်ဆင်ဂျာတွေကနေ လိမ်နေကြတာလို့ မိတ်ဆွေတွေက အချင်းချင်းပြောကြတယ်။ အထူးသဖြင့် အသက်ကြီးသူတွေပေါ့။ သူတို့က သိပ်မသိကြဘူးလေ၊ pin နံပါတ်တောင်းတာနဲ့တင်ကြောက်လန့် ပြီးပေးလိုက်တော့ အကုန်ထုတ်သွားရောတဲ့"ဟု Kpay နှင့်ပတ်သက်၍ ကြုံတွေ့ရသူတစ်ဦးက ပြောသည်။

အဆိုပါ ဖြစ်စဉ်နှင့် ပတ်သက်၍ KBZPay အသုံးပြုသူများအနေဖြင့် မိမိထံမှ SMS ကုဒ်များ (OTP) နှင့် PIN (လျှို့ဝှက်နံပါတ်) များကို ဖုန်း သို့မဟုတ် အွန်လိုင်းမှတစ်ဆင့် မေးမြန်းတောင်းခံခြင်း ပြုလုပ်ပါက မပေးရန်နှင့် မည်သူနှင့်မှ မျှဝေသုံးစွဲခြင်းမပြုရန် လိုအပ်ကြောင်း၊ KBZ Pay ၏မှန်ကန်သည့်သတင်းအချက်အလက်များ၊ ပရိုမိုးရှင်းနှင့်ပတ်သက်သည့် သတင်းများအပါအဝင် အခြားဝန်ဆောင်မှုသတင်းများအားလုံးကို KBZ Pay ၏တရားဝင် Channel များဖြစ်သည့် အပြာရောင်အမှတ်အသားပါ KBZ Pay Facebook page၊ KBZ Pay Viber Community Channel၊ KBZPay Official Website နှင့် KBZ Pay App ရှိ KBZPay Official Account တို့တွင် အချိန်နှင့်တပြေးညီ တင်ပြပေးကြောင်း KBZ က ထုတ်ပြန်ထားသည်။

ယင်းအပြင် KBZ Pay အနေဖြင့် သုံးစွဲသူများ၏ PIN နံပါတ်၊ OTP နှင့်ကိုယ်ရေးအချက်အလက်များကို မည်သည့်အခါမျှ တောင်းခံမည်မဟုတ်ကြောင်း KBZ က သိပေးကြေညာထားသည်။

ymg/mt
#Yangon_Media_Group