#Local_News
Published 19 September 2026

■ ပဲခူးတိုင်းဒေသကြီး၊ ပြည်မြို့နယ်၊ မှော်ဇာကျေးရွာအုပ်စု၊ လင်းရွာကျေးရွာမှ ဦးထိန်လင်းဦးက အလေးချိန် ၁.၀၃၈ ဂရမ်ရှိ ပျူခေတ်ရွှေခြင်းလုံးငယ်တစ်လုံးကို နိုင်ငံတော်ပိုင်အဖြစ် လာရောက်အပ်နှံခဲ့သည့်အတွက် ငွေကျပ် ၅၄၉,၅၂၅ နှင့် ဂုဏ်ပြုမှတ်တမ်းလွှာပေးအပ်ခဲ့ကြောင်း သိရသည်။

■ အဆိုပါ ဂုဏ်ပြုချီးမြှင့်ငွေနှင့် မှတ်တမ်းလွှာပေးအပ်ခြင်း အခမ်းအနားကို စက်တင်ဘာ ၁၈ ရက် မွန်းလွဲ ၂ နာရီက ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ကမ္ဘာ့အမွေအနှစ်ဒေသများဌာနခွဲ၊ သရေခေတ္တရာဌာနစု၌ ကျင်းပခဲ့ပြီး ဌာနတာဝန်ရှိသူများနှင့် ဒေသခံပြည်သူများ တက်ရောက်ခဲ့ကြသည်။

■ အခမ်းအနားတွင် သရေခေတ္တရာဌာနစုတာဝန်ခံ ဒုတိယညွှန်ကြားရေးမှူးက ရှေးဟောင်းပစ္စည်းများသည် နိုင်ငံတော်၏ သမိုင်းကြောင်းနှင့် ယဉ်ကျေးမှုကို ဖော်ထုတ်ရာတွင် အရေးပါသည့် အထောက်အထားများဖြစ်သဖြင့် မပျောက်ပျက်အောင် ထိန်းသိမ်းစောင့်ရှောက်ရန်လိုအပ်ကြောင်း ပြောကြားသည်။

■ ထို့ပြင် ရှေးဟောင်းဝတ္ထုပစ္စည်းများကို ဖျက်ဆီးခြင်း၊ တရားမဝင်ရောင်းချခြင်းများ ပြုလုပ်ပါက ရှေးဟောင်းဝတ္ထုပစ္စည်းများ ကာကွယ်ထိန်းသိမ်းရေးဥပဒေ၊ နည်းဥပဒေများနှင့်အညီ အရေးယူခံရမည်ဖြစ်ကြောင်း၊ ရှေးဟောင်းပစ္စည်းများကို နိုင်ငံတော်ပိုင်ပစ္စည်းအဖြစ် တာဝန်သိစိတ်ဖြင့် အပ်နှံသူများအား သတ်မှတ်ချက်များနှင့်အညီ ကာလတန်ဖိုးအပြင် ထပ်ဆောင်းတန်ဖိုးငွေများပါ တွက်ချက်၍ ချီးမြှင့်ပေးလျက်ရှိကြောင်း ရှင်းလင်းပြောကြားခဲ့သည်။

■ ယင်းနောက် ပျူခေတ်ရွှေခြင်းလုံးငယ်ကို လာရောက်အပ်နှံခဲ့သည့် ဦးထိန်လင်းဦးအား ငွေကျပ် ၅၄၉,၅၂၅ နှင့် ဂုဏ်ပြုမှတ်တမ်းလွှာပေးအပ်ကာ အခမ်းအနားကို ရုပ်သိမ်းခဲ့ကြောင်း သိရသည်။

#YMG/SW #Yangon_Times
.