#WorldNews_Politics
Published - 19 March 2022

လူ(၄)ဦးစီးနင်းလိုက်ပါတဲ့ အမေရိကန်မရင်းတပ် စစ်လေယာဉ်တစ်စီးဟာ နော်ဝေနိုင်ငံမြောက်ပိုင်းမှာ နေတိုးရဲ့ စစ်ရေး လေ့ကျင့်ခန်းတစ်ခု လုပ်နေစဉ်အတွင်း ပျက်ကျခဲ့တယ်လို့ အရာရှိတစ်ဦးကပြောပါတယ်။အဲဒီနေရာဟာ ရုရှားနယ်စပ်နှင့် မိုင်ပေါင်းရာချီ ဝေးကွာတဲ့နေရာဖြစ်ပါတယ်။

The MV-22B Osprey စစ်လေယာဉ်ဟာ သောကြာနေ့ ဒေသံစံတော်ချိန် ညနေ ၆နာရီခွဲခန့်မှာ ပျောက်ဆုံးနေတယ်လို့ သတင်း ရရှိခဲ့ပါတယ်။ ကယ်ဆယ်ရေးရဟတ်ယာဉ်တစ်စီးနှင့် နော်ဝေ စစ်လေယာဉ်တစ်စီးတို့ ဟာ လေယာဉ်ပျက်အပိုင်းအစကို ရှာဖွေ တွေ့ရှိခဲ့တယ်လို့ နော်ဝေးအရာရှိတွေကပြောပါတယ်။

“ အသက်ရှင်ရက်ကျန်ရစ်တဲ့ အရိပ်အယောင်မတွေ့ရဘူး"လို့ နော်ဝေရဲချုပ် ဘင့်အီလတ်စင်က ပြောပါတယ်။ရာသီဥတုဆိုးရွားနေတဲ့အတွက် လေကြောင်းကယ်ဆယ်ရေးလုပ်ငန်းမလုပ်နိုင်ပဲဖြစ်နေပါတယ်။ မြေပြင်တုန့်ပြန်လှုပ်ရှား ဆောင်ရွက်မှုကတော့ စနေပြီလို့ အရာရှိတွေကပြောပါတယ်။

“ မှောင်မိုက်နေပြီး ရာသီဥတုကဆိုးနေတယ်။ ရေခဲထုပြိုကျမယ့် အန္တရာယ်လည်းရှိနေတယ်" လို့ အီလတ်စင်ကပြောပါတယ်။မာရင်းတပ်ဖွဲ့ က ဒီမတော်တဆဖြစ်မှုမှာ ပတ်သက်တဲ့ လေယာဉ်ဟာ MV-22B Osprey ဖြစ်တယ်လို့ သတင်းထုတ်ပြန် အတည်ပြုပါတယ်။

လေယာဉ်ပျံနှင့် ရဟတ်ယာဉ်စပ်ထားတဲ့ အဲဒီစစ်လေယာဉ်ဟာ အေးမြသောတုန့်ပြန်ခြင်း လို့ အမည်ပေးထားတဲ့ နေတိုးရဲ့ စစ်ရေးလေ့ကျင့်မှုမှာ ပါဝင်လေ့ကျင့်ရင်း အဆက်အသွယ်ပြတ် ပျောက်ဆုံးခဲ့တာဖြစ်ပါတယ်။
Source New York Post

#LocalNews
Published - 19 March 2022

     Food Panda Rider ပုံမှန်အော်ဒါကြေးမှာ ၅၅၀-၇၅၀ ကျပ်အတွင်းရရှိနေရာကနေ မတ်လ ၁၆ ရက်နေ့က ၂၀၀ ကျပ်သာ ရရှိခဲ့တဲ့အတွက် Food Panda Rider တွေက အလုပ်မဆင်းဘဲ ဆန္ဒပြမှုတွေ ဖြစ်ပေါ်ခဲ့ပါတယ်။

     ဒါနဲ့ပတ်သက်ပြီး Food Panda က မတ်လ ၁၆ ရက်နေ့မှာ မိနစ် ၃၀ အချိန်အတွင်း System ချို့ယွင်းပြီး ကျပ်ငွေ ၂၀၀ ကျပ် မှားယွင်း တွက်ချက်ခဲ့တာဖြစ်ပြီး အခုလိုမှားယွင်းတွက်ချက်မိတဲ့ အော်ဒါကြေးများကိုလည်း လျော့နည်းသွားတဲ့ပမာဏကို အမှန်တိုင်းပြန်လည်တွက်ချက်ပေးပြီး ပုံမှန်လစာဝင်မယ့်အချိန်မှာ တစ်ခါတည်းထည့်သွင်းပေးသွားမယ်လို့ ထုတ်ပြန်ချက်ထဲမှာ ဖော်ပြထားပါတယ်။

     ဒါ့အပြင် မြို့အားလုံးရှိ Panda Rider တွေအတွက် အော်ဒါကြေးကို ချက်ခြင်းတိုးမြှင့်ပေးသွားဖို့စီစဉ်နေပြီး ဆိုင်ကယ်နဲ့ပို့ဆောင်ရတဲ့ မြို့တွေအတွက် ဆီဈေးမြှင့်တက်နေတဲ့ကာလအတွင်း ဓာတ်ဆီအပိုသုံးစွဲခအဖြစ် အကွာအဝေးအလိုက် အော်ဒါကြေးတိုးပေးသွားမယ်လို့ ဒီကနေ့ ကြေညာလိုက်ပါတယ်။

     Panda Rider များ အော်ဒါပို့ဆောင်ရာမှာအဆင်ပြေစေဖို့ ဒီအစီစဉ်များအပြင် အခြားအစီစဉ်တွေကိုပါ သက်ဆိုင်ရာမြို့တွေရဲ့ မန်နေဂျာတွေကနေ တစ်ဆင့် ဒီကနေ့ လူကိုယ်တိုင် အသေးစိတ်ဆက်သွယ် ပြောဆိုသွားမယ်လို့ ကြေညာထားပါတယ်။

#ymg/ei
#Yangon_Media_Group

#LocalNews
Published - 19 March 2022

     ထိုင်းနိုင်ငံ၊ စမုစခွန်ခရိုင်၊ မဟာချိုင်မြို့ရှိ သာမန်မြန်မာနိုင်ငံကူးလက်မှတ်ထုတ်ပေးရေးဌာနစိတ်ရုံး (Temporary Data Collection Center – TDCC)အား ၂၀၂၂ ခုနှစ်၊ မတ်လ ၂၁ ရက် နေ့မှစတင်၍ ပြန်လည်ဖွင့်လှစ်သွားမှာဖြစ်တယ်လို့ အလုပ်သမားသံအရာရှိရုံးက ဒီကနေ့မှာ သတင်းထုတ်ပြန်လိုက်ပါတယ်။

     ဒါ့အပြင် Passport for Job (PJ)လျှောက်ထားလိုသည့် မြန်မာအလုပ်သမားများသည် အောက်ဖော်ပြပါ Google Form Link တွင် ဝင်ရောက်လျှောက်ထားနိုင်မည်ဖြစ်ပြီး TDCC ၏ရုံးလိပ်စာမှာ G7X3+5X3, Tha Chin, Mueang Samut Sakhon District, Samut Sakhon 74000 ဖြစ်တယ်လို့ အဆိုပါသံအရာရှိရုံးက အသိပေးကြေညာထားပါတယ်။

     ထို့အပြင် သာမန်မြန်မာနိုင်ငံကူးလက်မှတ်ထုတ်ပေးရေးဌာနစိတ်၊ ယာယီအချက်အလတ် စုဆောင်းရေးဌာန ( Temporary Data Collection Centre) တွင် DEO နံပါတ် 21_11510 ထိ အောက်ဖော်ပြပါ Link ရှိ DEO နံပါတ်များ စိစစ်အောင်မြင်ပြီးသော Passport စာအုပ်ထုတ်ယူလိုသူများအနေနဲ့ မိမိတို့၏ DEO နံပါတ်များပါရှိလာခြင်း ရှိ မရှိ Call Centre ဖုန်းနံပါတ် ၀၈၂၇၀၉၃၇၄၅ နှင့် ၀၈၂၇၀၉၂၀၇၅ တို့အား ရုံးချိန်အတွင်း ဆက်သွယ်စုံစမ်းမေးမြန်းနိုင်မှာဖြစ်တယ်လို့ ဆိုပါတယ်။

     ထို့အတူ လူကိုယ်တိုင်လာရောက်မေးမြန်းလိုပါက မိမိတို့ DEO စလစ်ပေါ်တွင် Passport စာအုပ်ထုတ်ယူခွင့်ပြုသည့် Pass တံဆိပ်တုံး ရိုက်နှိပ်လက်မှတ်ရေးထိုးပြီးမှသာလျှင် 7Eleven တွင် စာအုပ်ဖိုးငွေပေးသွင်းရန်လိုအပ်ကြောင်း၊ Pass တံဆိပ်တုံးမပါရှိဘဲ 7Eleven တွင် ငွေပေးသွင်းခြင်း လုံးဝ(လုံးဝ)မပြုရန် ထိုင်းနိုင်ငံရှိ အလုပ်သမားသံအရာရှိရုံးက အသိပေးကြေညာထားပါတယ်။

ဓါတ်ပုံ - အလုပ်သမားသံအရာရှိရုံး

ymg/kg
#Yangon_Media_Group

#LocalNews

Published - 18 March 2022

     ကိုဗစ်-၁၉ ရောဂါကြောင့် သင်္ကြန်ပွဲတော်ကို မကျင်းပခဲ့တဲ့ နှစ်နှစ်အကြာမှာ အခုနှစ်မှာတော့ ရန်ကုန်မြို့တော်သင်္ကြန်ရေသဘင်မဏ္ဍပ်ပြုလုပ်ပြီး ယိမ်းအကအဖွဲ့တွေပါ ပြိုင်ပွဲပြုလုပ်ဖို့ ရန်ကုန်မြို့တော်စည်ပင်သာယာရေးကော်မတီက စီစဉ်နေပါတယ်။

     "လက်ရှိ ကျွန်တော်တို့အနေနဲ့ သင်္ကြန်နဲ့ပတ်သက်ပြီး ယိမ်းပြိုင်ပွဲတွေကိုလုပ်ဖို့ တိကျတဲ့ သတင်းထုတ်ပြီးပြီ။အခြား ရေပိုက်ဆက်သွယ်တဲ့လုပ်ငန်းကိစ္စတွေ၊မဏ္ဍပ်တည်ဆောက်ရေးကိစ္စတွေ၊ဘယ်မြို့နယ်တွေမှာ ဘယ်လိုတည်ဆောက်ရမယ်ဆိုတာတွေကို ဒီရက်ပိုင်းမှာ ဆွေးနွေးမှာဖြစ်ပါတယ်"လို့ ရန်ကုန်မြို့တော် စည်ပင်သာယာရေးကော်မတီ စီမံဌာနတာဝန်ရှိသူတစ်ဦးက YMG ကို ပြောပါတယ်။

     ယခင်နှစ်များနည်းတူ ယိမ်းပြိုင်ပွဲတွေကို ၁၂ ဦးယိမ်း မူကြိုကျောင်းများ၊ ကျောင်းများ၊ ရုံး၊ အခြားဌာနများ၊ ၁၆ ဦး ယိမ်း ကျောင်းများ၊ ရုံး၊ အခြားဌာနများ၊ ၂၀ဦး ယိမ်း (အလွတ်တန်း)၊ ၁၂ ဦး ယိမ်း(ကျား) အလွတ်တန်း၊ တိုင်းရင်းသားရိုးရာယဉ်ကျေးမှုအကတွေ အပါအဝင် ကျင်းပသွားမယ်လို့ ဒီကနေ့ထုတ်ပြန်ထားပါတယ်။

     ပြိုင်ပွဲဝင်မယ့်အသင်းတွေအနေနဲ့ မတ်လ ၃၁ ရက်အထိ ရုံးချိန်အတွင်း ဗိုလ်တထောင်မြို့နယ် ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန(ရေစီးရေလာစီမံခန့်ခွဲမှု) မှာ လာရောက်စာရင်းပေးသွင်းနိုင်တယ်လို့ သိရပါတယ်။

     လူကိုယ်တိုင် လာရောက်လျှောက်ထားနိုင်သလို အကဲဖြတ်လုပ်ငန်းဆပ်ကော်မတီ (အတွင်းရေးမှူး) ၀၉-၅၁၀၃၂၈၇၊ အကဲဖြတ်လုပ်ငန်းဆပ်ကော်မတီ (တွဲဖက်အတွင်းရေးမှူး) ၀၉-၅၀၂၇၉၉၀၊ အကဲဖြတ်လုပ်ငန်းဆပ်ကော်မတီရုံးအဖွဲ ၁၀-၂၀၁၄၅၉ လိုင်းခွဲ ၂၈၂၊ ၂၈၆ သို့ ဆက်သွယ်စုံစမ်းနိုင်တယ်လို့ ဖော်ပြထားပါတယ်။

ymg/ei
#Yangon_Media_Group

#WorldPolitics
Published - 19 March 2022
အမေရိကန်သမ္မတ'ဂျိုးဘိုင်ဒန်'နဲ့ တရုတ်သမ္မတ'ရှီကျင့်ဖင်'တို့ သောကြာနေ့က အွန်လိုင်းဗီဒီယိုဖြင့်ဆွေးနွေးပွဲပြုလုပ်ခဲ့ရာ ယူကရိန်းကိုကျူးကျော်တိုက်ခိုက်နေတဲ့ ရုရှားအား တရုတ်တို့ကထောက်ပံ့ကူညီနေပါက နောက်ဆက်တွဲအကျိုးဆက်တွေ ခံစားရမှာဖြစ်ကြောင်း 'ဘိုင်ဒန်'ကသတိပေးလိုက်ပြီး 'ရှီ'ကလည်း စစ်ပွဲမဖြစ်စေချင်ဘူးလို့ အခိုင်အမာဆိုလိုက်ပါတယ်။

ပြီးခဲ့တဲ့လ ရုရှားတို့ယူကရိန်းကို ကျူးကျော်ပြီးနောက်ပိုင်း အဆိုပါနိုင်ငံ့ခေါင်းဆောင်နှစ်ဦးကြား ပထမဆုံးအကြိမ်ဆွေးနွေးပြောဆိုခဲ့တာဖြစ်ပါတယ်။

"ကျူးကျော်မှုကို အရေးယူတုန့်ပြန်ဖို့ဆောင်ရွက်ချက်များကို သမ္မတ'ဘိုင်ဒန်'က ရှင်းရှင်းလင်းလင်းပြောကြားသွားတဲ့အပြင် ရုရှားအားဒဏ်ခတ်ပိတ်ဆို့မှုပြုလုပ်နေခြင်းကိုလည်း ရှင်းပြသွားပါတယ်။ ယူကရိန်းမြို့များနဲ့ နိုင်ငံသားများကို ရက်ရက်စက်စက်တိုက်ခိုက်နေတဲ့ ရုရှားကို တရုတ်တို့ထောက်ပံ့ကူညီနေတယ်ဆိုရင် အကျိုးဆက်တွေခံစားရလိမ့်မယ်လို့ ပြောကြားသွားပါတယ်" လို့ အိမ်ဖြူတော်က ထုတ်ပြန်ခဲ့ပါတယ်။

 ဆွေးနွေးပွဲဟာ ဝါရှင်တန်စံတော်ချိန်နံနက် ၉ နာရီကျော်မှာစတင်ခဲ့ပြီး ၁၁ နာရီမတိုင်ခင် ပြီးဆုံးခဲ့ပါတယ်။ ယူကရိန်း-ရုရှားအရေးနဲ့ပတ်သက်ပြီး တရုတ်အာဏာပိုင်အချို့က သူတို့ရဲ့သဘောထားထောက်ခံမှုကို ထုတ်ဖော်ခဲ့ကြရာ ဒီစစ်ပွဲမှာ တရုတ်တို့ရဲ့ရပ်တည်ချက်နဲ့ နိုင်ငံရဲ့သဘောထားကို 'ဘိုင်ဒန်'အနေနဲ့ သိရှိခွင့်ရခဲ့ပါတယ်လို့သတင်းကဆိုပါတယ်။

ကမ္ဘာအရပ်ရပ်မှ အစိုးရအဖွဲ့တွေရော ပုဂ္ဂလိကအဖွဲ့အစည်းတွေကပါ ရုရှားကို ဘယ်လိုတုန့်ပြန်ကြသလဲဆိုတာကို 'ဘိုင်ဒန်'က ထောက်ပြသွားပါတယ်။ရုရှားကိုထောက်ခံအားပေးတဲ့မည်သူမဆို တန်ဖိုးကြီးကြီးမားမားပေးဆပ်ရလိမ့်မယ်လို့ 'ဘိုင်ဒန်'က 'ရှီ'ကိုပြတ်ပြတ်သားသား ပြောပြလိုက်ပါတယ်။

"ကုမ္ပဏီတွေက သူတို့သဘောနဲ့သူတို့ ရုတ်သိမ်းသွားကြတာပါ။ အခုရုရှားမှာဘာတွေဖြစ်နေပြီလဲ ကြည့်လိုက်ပါ။ ကုမ္ပဏီတွေထွက်ခွာသွားတဲ့အတွက် ရုရှားစီးပွားရေးအခြေအနေဘယ်လိုဖြစ်ပျက်သွားသလဲ။ ဒီပဋိပက္ခမှာ ဘယ်သူ့ဘက်ကရပ်တည်သင့်သလဲဆိုတာ ရုရှားဖြစ်ရပ်ကိုကြည့်ပြီး နမူနာယူရပါမယ်" လို့ ဆွေးနွေးပွဲအပြီးမှာ အိမ်ဖြူတော်စာနယ်ဇင်းရှင်းလင်းပွဲတာဝန်ခံ 'ယန်ဆာကီ'က ပြောပြခဲ့ပါတယ်။

တရုတ်တို့ရဲ့တုန့်ပြန်ဆောင်ရွက်မှုတွေကို အဓိကထားစောင့်ကြည့်သွားမှာဖြစ်ကြောင်း၊ ဒီပဋိပက္ခနဲ့ပတ်သက်ပြီး နိုင်ငံတွေအနေနဲ့ ဘယ်ဘက်ကရပ်တည်မလဲဆိုတာကို အားလုံးကစောင့်ကြည့်နေကြမှာဖြစ်ကြောင်း 'ဆာကီ'က ပြောကြားသွားပါတယ်။ တရုတ်တို့က ရုရှားအပေါ် အခုအချိန်ထိ ပြစ်တင်ရှုတ်ချတဲ့သဘော မထုတ်ပြန်သေးပါဘူး။
Source: Bloomberg

Published 19 March 2022

အမေရိကန်ပြည်ထောင်စုဟာ တရုတ်နှင့် စစ်အေးတိုက်ပွဲလုပ်ဖို့မရှိပါဘူးလို့  အမေရိကန်သမ္မတ ဂျိုးဘိုင်ဒင်က တရုတ်သမ္မတ ရှီကျင့်ဖျင်ကို ထပ်မံပြောကြားလိုက်ပါတယ်။ သောကြာနေ့က အမေရိကန်သမ္မတဘိုင်ဒင်ရဲ့ မေတ္တရပ်ခံချက်ကြောင့် နှစ်နိုင်ငံ ခေါင်းဆောင်တွေဟာ ဗွီဒီယိုနှင့် ပြောဆိုဆွေးနွေးကြရမှာ ဘိုင်ဒင်က ယခုလိုထပ်လောင်းပြောကြားခဲ့တာဖြစ်တယ်လို့ CMG က သတင်းထုတ်ပြန်ပါတယ်။

တရုတ်ဟာ အမေရိကန်ရဲ့စနစ်ကို ပြောင်းလဲလိုတဲ့ရည်ရွယ်ချက်မရှိဘူး၊ပြီးတော့ အမေရိကန်ရဲ့မဟာမိတ်တွေပြန်လည်သက် ဝင်လှုပ်ရှားလာတာဟာ တရုတ်ကို ပစ်မှတ်ထားတာမဟုတ်ဘူးလို့လည်း ဘိုင်ဒင်ကပြောပါတယ်။ အဲဒီအပြင် ထိုင်ဝမ်ရဲ့ လွတ်လပ်ရေးကို အမေရိကန်ဟာ မထောက်ခံဘူးလို့လည်းဆိုပါတယ်။ ပြီးတော့ တရုတ်နှင့်ပဋိပက္ခဖြစ်ဖို့လည်း ရည်ရွယ်ချက်မရှိဘူးလို့ သူကပြောပါတယ်။

အမေရိကန်-တရုတ်ဆက်ဆံရေးလမ်းကြောင်းချဖို့ သမ္မတရှီနှင့် အနီးကပ်ထိတွေ့ဆက်ဆံရန် သူအသင့်ရှိကြောင်းကိုလည်း သူကထုတ်ဖော်ပြောကြားပါတယ်။

ငြိမ်းချမ်းရေးနှင့်ဖွံ့ဖြိုးတိုးတက်ရေးလမ်းကြောင်းဖော်ဆောင်ရေးမှာ ကမ္ဘာကြီးဟာ ပြင်းထန်တဲ့စိန်ခေါ်မှုတွေနှင့် ရင်ဆိုင်နေရတယ်လို့ တရုတ်သမ္မတရှီကျင့်ဖျင်က ပြန်လည်ဆွေးနွေးခဲ့ပါတယ်။ ကမ္ဘာကြီးဟာ ငြိမ်သက်ခြင်းလည်းမရှိ တည်ငြိမ်ခြင်းလည်းမရှိဘူးလို့ ရှီကပြောပါတယ်။

ကုလသမဂ္ဂလုံခြုံရေးကောင်စီရဲ့ အမြဲတမ်းအဖွဲ့ဝင်(၂)နိုင်ငံဖြစ်တဲ့ ကမ္ဘာ့ဦီးဆောင်စီးပွားရေးနိုင်ငံတွေဖြစ်တဲ့ တရုတ်နှင့်အမေရိကန်တို့ဟာ မှန်ကန်တဲ့လမ်းကြောင်းတစ်လျောက် သူတို့ရဲ့ ဆက်ဆံရေးကို ထိန်းကျောင်းရဖို့ တင်မကဘဲ နိုင်ငံတကာတာဝန်တွေကို မျှယူကြဖို့နှင့် ကမ္ဘာ့ငြိမ်းချမ်းရေးနှင့်တည်ငြိမ်ရေးအတွက် မျှဝေလုပ်ဆောင်ကြရမယ်လို့ ရှီက ပြောပါတယ်။

အမေရိကန်က တရုတ်နှင့်စစ်အေးတိုက်ပွဲမဖြစ်လိုဘူး၊တရုတ်ရဲ့စနစ်ကိုမပြောင်းလဲလိုဘူး၊တရုတ်ကိုဆန့်ကျင်ဖို့ မဟာမိတ်တွေ သက်ဝင်လှုပ်ရှားတာမဟုတ်ဘူး၊ထိုင်ဝမ်လွတ်လပ်ရေးကို မထောက်ခံဘူး၊ တရုတ်နှင့်ပဋိပက္ခမဖြစ်လိုဘူး လို့ သမ္မတဘိုင်ဒင်ပြောခဲ့တဲ့ မှတ်ချက်တွေကို “ ကျွန်တော့်အနေနှင့် အဲဒါတွေကို အလေးအနက်ကို မှတ်သားထားပါတယ်” လို့ ရှီကပြန်ပြောခဲ့ပါတယ်။

ထိုင်ဝမ်နှင့်ပတ်သက်လို့ လွဲမှားစွာကိုင်တွယ်နေတာတွေဟာ နှစ်နိုင်ငံဆက်ဆံရေးကို ပြတ်တောက်စေလိမ့်မယ်လို့ ရှီက ပြောလိုက်ပြီး အမေရိကန်အနေနှင့် ဒီပြဿနာကို အာရုံစိုက်လုပ်ဆာင်လိမ့်မယ်လို့ တရုတ်ကယုံကြည်တယ်လို့လည်း ပြောခဲ့ပါတယ်။

နှစ်နိုင်ငံခေါင်းဆောင်တွေဟာ  ယူကရိန်းကိစ္စကိုလည်း အမြင်ချင်းဖလှယ်ခဲ့ကြတယ်လို့ပဲ တရုတ်အစိုးရရဲ့ မီဒီယာတွေက ရေးသားပေမယ့်တရုတ်အနေနှင့်ရုရှားကို ရုပ်ဝတ္ထုပိုင်း ကူညီပံ့ပိုးခဲ့ရင် ရှုပ်ထွေးဂယက်ရိုက်မှုတွေနှင့်အကျိုးဆက်တွေ ရရှိလာလိမ့်မယ်လို့ ဘိုင်ဒင်က ရှီကိုပြောခဲ့တယ်လို့ အနောက်မီဒီယာတွေကရေးသားပါတယ်။

ယူကရိန်းကိစ္စနှင့်ပတ်သက်လို အမေရိကန်ရဲ့ရပ်တည်ချက်ကို  ဘိုင်ဒင်က အသေးစိတ်ရှင်းပြပြီး အခြေအနေပိုဆိုးရွားသွား မှာကို ဟန့်တားနိုင် အောင် အမေရိကန်ဟာ တရုတ်နှင့် ဆက်ဆံပြောဆိုဖို့ အဆင်သင့်ရှိတယ်လို့ ဘိုင်ဒင်ကပြောပါတယ်။

“ တရုတ်အနေနှင့် ယူကရိန်းအခြေအနေ ဒီလိုဖြစ်လာတာကို မမြင်တွေ့လိုပါဘူး။ တရုတ်ဟာ ငြိမ်းချမ်းရေးဘက်ကရပ် တည်ပြီး စစ်ပွဲကို ဆန့်ကျင်တယ်။ ဒါဟာတရုတ်ရဲ့ သမိုင်းနှင့်ယဉ်ကျေးမှုထဲမှာ စွဲခိုင်နေတဲ့အရာတွေဖြစ်တယ်” လို့ ရှီက ပြန်ပြောတယ်လို့ သတင်းကရေးသားပါတယ်။

အရေးကိစ္စတစ်ခုချင်းစီရဲ့ အဆိုး အကောင်းအပေါ် အခြေခံပြီး တရုတ်ဟာ လွတ်လပ်စွာ ကောက်ချက်ချတာတွေလုပ်တယ်၊ နိုင်ငံတကာဥပဒေတွေနှင့် အားလုံးလက်ခံထားတဲ့ နိုင်ငံတကာဆက်ဆံရေးကို စီမံနေတဲ့ နိုင်ငံတကာစံညွှန်းတွေကို ကိုင်စွဲတယ်။ ကုလသမဂ္ဂပဋိညာဉ်ကို လိုက်နာစောင့်ထိန်းတယ်။ ဘုံသဘောလက္ခဏာဆောင်ပြီး ပြည့်စုံကျယ်ပြန့်တဲ့ ပူးပေါင်းဆောင်ရွက်ပြိး ရေရှည်တည်တံ့တဲ့ လုံခြုံရေးအမြင်ကို အားပေးတယ်။ အဲဒါတွေဟာ ယူကရိန်းအကျပ်အတည်းကို တရုတ်ကချည်းကပ်ရာမှာ ကျောထောက်နောက်ခံပြုထားတဲ့ အဓိကကျတဲ့ အခြေခံသဘောတရားတွေပဲဖြစ်တယ်လို့ ရှီကပြောပါတယ်။

ဘက်တွေအားလုံးဟာ ရလာဒ်တွေထွက်ပြီး ငြိမ်းချမ်းရေးဦးတည်စေမယ့် တွေ့ဆုံဆွေးနွေးစေ့စပ်ညှိနှိုင်မှု တွေဖြစ်ဖို့ ရုရှားနှင့်ယူကရိန်းတို့ကို ပူးတွဲထောက်ခံအားပေးဖို့လိုအပ်တယ်လို့ ရှီကပြောပါတယ်။ အဲဒီအပြင် ယူကရိန်းအကျပ်အတည်းရဲ့ အခရာဖြစ်နေတာကို ဖြေရှင်းဖို့နှင့် ရုရှားနှင့် ယူကရိန်းတို့ရဲ့ လုံခြုံရေးဆိုင်ရာ ပူပန်မှုတွေကို လျော့ပါးစေဖို့  အမေရိကန်နှင့် နေတိုးဟာ ရုရှားနှင့်ဆွေးနွေးသင့်တယ်လို့ သူက ဖြည့်စွက်ပြောပါတယ်။

ရှီက တရုတ်ဆိုရိုးစကားနှစ်ခုနှင့်လည်း ဥပမာပေးပြောကြားခဲ့ပါတယ်။ “လက်ခုတ်တီးဖို့ လက်နှစ်ဖက်လိုတယ်” ဆိုတာနှင့် “ကျားကိုခြူဆွဲပေးသူပဲ သူ့ဆီကခြူပြန်နှုတ်ပေးရလိမ့်မယ်” ဆိုတာဖြစ်တယ်လို့ ရှီကပြောပါတယ်။

Source CMG/Bloomberg

#WorldHealth
Published - 19 March 2022

တစ်ကမ္ဘာလုံးမှာ ကိုဗစ်ရောဂါကူးစက်မှုများ ပြန်လည်များပြားနေပြီဖြစ်တယ်လို့အကြောင်းကြားလာကြကြောင်း ကမ္ဘာ့ကျန်းမာရေးအဖွဲ့ အစည်း WHO က မတ်လ ၁၆ ရက်နေ့က သတိပေးခဲ့ပါတယ်။

ဒါပေမဲ့ ရောဂါပိုးစစ်ဆေးမှုနှုန်းကတော့ သိသိသာသာကျဆင်းနေပြီလည်းဖြစ်ပါတယ်။
အရင်ရက်သတ္တပတ်တွေတုန်းက ကူးစက်မှုနှုန်းကျဆင်းနေခဲ့ရာမှ အခုနောက်ဆုံးအပတ်အတွင်း တစ်ကမ္ဘာလုံးအတိုင်းအတာအရ ကိုဗစ်ရောဂါကူးစက်မှု ၈ ရာခိုင်နှုန်းမြင့်တက်လာခဲ့ကြောင်း သတင်းပို့ လာကြပါတယ်။

ရောဂါကူးစက်မှုပေါင်း ၁၁ သန်းကျော်နဲ့ နောက်ထပ်သေဆုံးသူပေါင်း ၄၃,၀၀၀ ရှိခဲ့တယ်လို့ WHO က အတည်ပြုခဲ့ပါတယ်။ အနောက်ပစိဖိတ်ဒေသတွေမှာ ပြီးခဲ့တဲ့အပတ်က ရောဂါကူးစက်သူ ၂၉ ရာခိုင်နှုန်း ပိုများလာခဲ့ပါတယ်။

အဆိုပါဒေသတွေမှာ ဒီဇင်ဘာလကုန်ကတည်းက ကူးစက်မှုနှုန်းမြင့်တက်နေခဲ့ပြီး နောက်ထပ်ရောဂါပိုးတွေ့ရှိသူ ၅.၀၂ သန်းရှိခဲ့တာကြောင့် ကူးစက်မှု ၄.၉၉ သန်းရှိခဲ့တဲ့ဥရောပထက် ပိုများနေခဲ့တာဖြစ်ပါတယ်။

WHO မှ ကိုဗစ်ဆိုင်ရာပညာရှင် ဒေါက်တာ'မာရီယာဗန်ကာခိုဗ်'က ရောဂါပိုးစစ်ဆေးမှုနှုန်းသိသိသာသာကျဆင်းလာပေမယ့် ရောဂါကူးစက်မှုကတော့ မြင့်တက်လာခဲ့တယ်လို့ ထောက်ပြလိုက်ပါတယ်။

WHO ညွှန်ကြားရေးမှူးချုပ် 'တက်ဒရိုစ်အက်ဒါနွန်ဂေဘရီယေးဆက်စ်'က "ကူးစက်မှုတွေများလာရင် သေဆုံးသူတွေလည်း များလာမှာပါပဲ။ ကာကွယ်ဆေးထိုးနှံမှုနှုန်းနည်းပါးတဲ့နိုင်ငံတွေမှာ အသက်သေဆုံးမှုနှုန်းများလာမှာဖြစ်ပါတယ်။ နိုင်ငံအားလုံးနိုးနိုးကြားကြားရှိနေဖို့ လိုပါတယ်။ ကပ်ရောဂါကြီးက မပြီးဆုံးသေးပါဘူး" လို့ သတိပေးသွားပါတယ်။

ကမ္ဘာတဝန်းမှာ အိုမီခရွန်မျိုးဗီဇကွဲက ကူးစက်နှုန်းမြင့်မားနေဆဲဖြစ်ပြီး အထူးသဖြင့် BA.2 မျိုးနွယ်ခွဲက ပိုမိုကူးစက်မြန်ကြောင်း ဒေါက်တာ'ဗန်ကာခိုဗ်'က ဆိုပါတယ်။
အိုမီခရွန်က ရောဂါပျော့တယ်ဆိုတဲ့သတင်းမှားတွေ၊ ကပ်ရောဂါက ပြီးဆုံးသွားပြီဆိုတဲ့သတင်းမှားတွေ၊ ဒီမျိုးဗီဇကွဲက နောက်ဆုံးကြုံတွေ့ရမယ့်မျိုးဗီဇကွဲတွေဆိုတဲ့သတင်းမှားတွေ အများကြီးရှိနေပါတယ်။

ဒါပေမဲ့ရောဂါကူးစက်မှုကိုလျှော့ချလို့တဲ့ နည်းလမ်းတွေအများကြီးရှိပါတယ်။
နှာခေါင်းစည်းတပ်ဆင်ခြင်း၊ ခပ်ခွာခွာနေထိုင်ခြင်း၊ ကိုဗစ်ကာကွယ်ဆေးထိုးနှံခြင်းတို့ ဖြင့် ရှေ့ဆက်ဆောင်ရွက်သွားရမှာဖြစ်ကြောင်း ဒေါက်တာ'ဗန်ကာခိုဗ်'က ပြောကြားသွားပါတယ်။
Source: The Straits Times. 

#Local_News
Published_ 19 March 2022

     စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံစက်သုံးဆီ တင်သွင်းရောင်းချဖြန့်ဖြူးရေးအသင်းတို့ ပူးပေါင်းစီစဉ်မှုဖြင့် ပြည်သူများသက်သာသော ဈေးနှုန်းဖြင့်ဝယ်ယူ ရရှိနိုင်ရန်ရည်ရွယ်၍ မတ်လ ၁၉ ရက်မှစတင်ကာ ကုမ္ပဏီ ၁၂ ခုက တိုင်းဒေသကြီး/ပြည်နယ်များရှိ စက်သုံးဆီအရောင်းဆိုင် ၁၁၃ ဆိုင်တွင် အထူးဈေးနှုန်းဖြင့် ဒီဇယ်ဆီများ ဖြန့်ဖြူးရောင်းချပေးသွားမည်ဖြစ်ကြောင်း သိရပါတယ်။

     ဗဟိုဘဏ်မှ ရည်ညွှန်းငွေလဲနှုန်းဖြင့် တိုက်ရိုက်ရောင်းချပေးသည့် နိုင်ငံခြားငွေ အမေရိကန်ဒေါ်လာ ၃၉ သန်းဖြင့် စက်သုံးဆီမှာယူတင်သွင်းခဲ့သည့် ကုမ္ပဏီ ၂၆ ခုက ဒီဇယ်ဆီ ဂါလံ ၁၂ ဒသမ ၅၄ သန်းခန့်ကို အထူးဈေးနှုန်းဖြင့် ဖြန့်ဖြူးရောင်းချပေးလျက်ရှိနေပါတယ်။

     ပြည်သူများအနေဖြင့် အထူးဈေးနှုန်းဖြင့်ရောင်းချပေးမည့် စက်သုံးဆီအရောင်းဆိုင်များတွင် ဒီဇယ်ဆီများကို ရေနံထွက်ပစ္စည်း ကြီးကြပ်စစ်ဆေးရေးဦးစီးဌာနမှ ထုတ်ပြန်ထားသော ရည်ညွှန်းဈေးနှုန်းအတိုင်း ဝယ်ယူရရှိနိုင်မည်ဖြစ်ပြီး၊ နေ့စဉ်ဒီဇယ်ဆီဈေးနှုန်းများအား မြန်မာနိုင်ငံ စက်သုံးဆီတင်သွင်းရောင်းချဖြန့်ဖြူးရေးအသင်း၏ www.mpta.org.mm တွင်နေ့စဉ် ထုတ်ပြန်ပေးလျက်ရှိပါတယ်။

     ပြည်သူများအနေဖြင့် ဒီဇယ်ဆီများကို တိုင်းဒေသကြီး/ပြည်နယ်အလိုက် သတ်မှတ်စက်သုံးဆီအရောင်းဆိုင်များတွင် သတ်မှတ်ဈေးနှုန်းများအတိုင်း ဝယ်ယူရရှိခြင်းမရှိပါက ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေး လုပ်ငန်းကော်မတီ ဖုန်း ၀၉-၆၆၄၀၇၅၆၈၃၊ ၀၉-၆၆၄၅၉၆၃၂၇၊ ၀၉-၆၈၇၆၃၅၉၄၃၊ ၀၉-၆၇၆၃၂၀၈၂၆ စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဖုန်း ၀၁-၂၅၀၂၇၀၊ မြန်မာနိုင်ငံစက်သုံးဆီ တင်သွင်းရောင်းချဖြန့်ဖြူးရေးအသင်း ဖုန်း ၀၉၄၂၁၀၀၆၇၉၄ တို့သို့ ဆက်သွယ်တိုင်ကြားနိုင်ကြောင်း သတင်းရရှိပါတယ်။

     ဒီကနေ့ မတ်လ ၁၈ ရက် ရန်ကုန်ဈေးကွက်၌ စက်သုံးဆီဈေးနှုန်းများမှာ အောက်တိန်း ၉၂ တစ်လီတာလျှင် ၁,၉၁၅ ကျပ်၊ ၉၅ တစ်လီတာလျှင်၁,၉၉၀ ကျပ်၊ ၉၇ တစ်လီတာလျှင် ၂,၂၁၅ ကျပ်၊ ဒီဇယ်တစ်လီတာလျှင် ၁,၉၇၀ ကျပ်နှင့် ပရီမီယံဒီဇယ် တစ်လီတာလျှင် ၁,၉၈၅ ကျပ်ရှိနေကြောင်း သိရပါတယ်။

#ymg_mnn
#Yangon_Media_Group.

#WorldHealth
Published- 19 March 2022

ကိုရိုနာဗိုင်းရပ်စ်ကာကွယ်ဆေး စတုတ္ထအကြိမ်ထိုးနှံခြင်းက ရောဂါကူးစက်မှုကိုကာကွယ်ရာမှာ အရင်ကထက်အနည်းငယ်သာ ပိုပြီးကာကွယ်ပေးနိုင်ကြောင်း အစ္စရေးလ်နိုင်ငံ ရှီဘာဆေးရုံက လေ့လာဖော်ထုတ်လိုက်ပါတယ်။

ဖိုင်ဇာနဲ့ မိုဒါနာကိုဗစ်ကာကွယ်ဆေးတို့ရဲ့ စတုတ္ထအကြိမ်ကာကွယ်ဆေးထိရောက်မှုကို လေ့လာသုံးသပ်ခဲ့ကြပြီး နယူးအင်္ဂလန်ဆေးပညာဂျာနယ်မှာ ဖော်ပြခဲ့ကြပါတယ်။
ထွက်ပေါ်လာတဲ့ရလာဒ်များအရ စတုတ္ထအကြိမ်ကာကွယ်ဆေးထိုးနှံခြင်းရဲ့ ရောဂါပိုးကိုကာကွယ်နိုင်စွမ်းက ငယ်ရွယ်ကျန်းမာတဲ့လူတွေမှာ တတိယအကြိမ်ကာကွယ်ဆေးထိုးနှံခြင်းကြောင့်ရတဲ့ ကာကွယ်နိုင်စွမ်းထက် အနည်းငယ်မျှသာပိုများခဲ့တာဖြစ်ပါတယ်။

ငယ်ရွယ်ကျန်းမာတဲ့သူတွေမှာ စတုတ္ထအကြိမ်ကာကွယ်ဆေးထိုးနှံခြင်းကတော့ တတိယအကြိမ်ထိုးနှံသူတွေထက်စာရင် ရောဂါကူးစက်မှုကာကွယ်နိုင်စွမ်းက အတိုင်းအတာတစ်ခုအထိ မြင့်တက်လာခဲ့ပါတယ်။

"လူပေါင်း ၆၀၀ ကိုစမ်းသပ်စစ်ဆေးခဲ့ရာမှာ ဖိုင်ဇာ သို့မဟုတ် မိုဒါနာကာကွယ်ဆေးစတုတ္ထအကြိမ်ထိုးနှံခဲ့တဲ့ အယောက် ၂၇၀ က တတိယအကြိမ်ကာကွယ်ဆေးထိုးပြီး တစ်လကြာတဲ့အချိန်မှာ ရောဂါကာကွယ်နိုင်စွမ်းရရှိထားတဲ့သူတွေနဲ့ ပဋိပစ္စည်း(antibody)ပမာဏ အတူတူနီးပါးဖြစ်နေခဲ့ပါတယ်" လို့ ရှီဘာဆေးရုံ ရောဂါကူးစက်ထိန်းချုပ်ကာကွယ်ရေးဌာနမှ ညွှန်ကြားရေးမှူး ပရော်ဖက်ဆာ'ဂီလီရီဂက်ဗ်ယိုရှေး'က ပြောပြခဲ့ပါတယ်။

ဖိုင်ဇာနဲ့ မိုဒါနာကာကွယ်ဆေးတို့ရဲ့ စတုတ္ထအကြိမ်ကာကွယ်ဆေးထိရောက်နိုင်စွမ်းကလည်း ရောဂါကူးစက်မှုနှုန်းကို အနည်းငယ်သာလျော့ကျစေကြောင်း မှတ်ချက်ပြုလိုက်ပါတယ်။
"ကိုဗစ်ရောဂါမကူးစက်ဖူးတဲ့သူတွေမှာ တတိယအကြိမ်ကိုဗစ်ကာကွယ်ဆေးထိုးဖို့ က အလွန်မတန်အရေးကြီးပြီး ရောဂါအခံရှိပြီး ပြင်းထန်စွာဖြစ်ပွားနိုင်ချေရှိတဲ့သူတွေကတော့ စတုတ္ထအကြိမ်ကာကွယ်ဆေးထိုးဖို့ အလွန်အရေးကြီးပါတယ်" လို့ ဆိုပါတယ်။

အဆိုပါတွေ့ရှိချက်ကို တစ်ကမ္ဘာလုံးပျံ့ပွားနေတဲ့ ကပ်ရောဂါထိန်းချုပ်နိုင်ရန်ရည်ရွယ်ထားတဲ့ သိပ္ပံပညာရပ်ဆိုင်ရာသုတေသနတွေ့ရှိချက်တွေထဲသို့ ထည့်သွင်းလိုက်ပြီဖြစ်ကြောင်း 'ရီဂက်ဗ်ယိုရှေး'က ပြောကြားခဲ့ပါတယ်။

"ရှီဘာသုတေသနအဖွဲ့ ရဲ့ကြိုးစားအားထုတ်မှုကြောင့် ကပ်ရောဂါတွေစဖြစ်ကတည်းက အချက်အလက်တွေစုဆောင်းထားနိုင်ပါတယ်။ ဗိုင်းရပ်ရဲ့သဘောသဘာဝ၊ ကာကွယ်ဆေးတွေရဲ့ ထိရောက်နိုင်စွမ်းတို့ ကို လေ့လာရာမှာ ကျွန်မတို့ ကဦးဆောင်နေပြီး အစ္စရေးလ်နဲ့ ကမ္ဘာအရပ်ရပ်ရှိ ကျန်းမာရေးစောင့်ရှောက်မှုဆုံးဖြတ်ချက်တွေမှာ အကူအညီပေးနိုင်ဖို့ ရည်ရွယ်ပါတယ်" လို့ ပြောကြားခဲ့ပါတယ်။

Source: The Jerusalem Post 

#LocalNews
Published_ 19 March 2022

     မြန်မာနိုင်ငံသို့ ပြည်ပနိုင်ငံများမှ ကယ်ဆယ်ရေးလေယာဉ် (Relief Flight) များဖြင့် ပြန်လည်ဝင်ရောက်လာသူများ ၊ မြန်မာနိုင်ငံ အတွင်း အစုလိုက်ကူးစက်ဖြစ်ပွားမှုများနှင့် ပြည်တွင်းကူးစက်မှုများမှ ဓာတ်ခွဲနမူနာရယူ၍ ဓာတ်ခွဲစစ်ဆေးလျက်ရှိနေရာတွင် ယခုထပ်မံ၍ SARS CoV-2 Variant Omicron (အိုမီခရွန်)ရောဂါပိုး BA.2 ကို ဓာတ်ခွဲနမူနာ (၃၁) ခုတွင်တွေ့ရှိရကြောင်း ကျန်းမာရေးဝန်ကြီးဌာနက ယနေ့ညတွင်ကြေညာထားပါတယ်။

     ထုတ်ပြန်မှုတွင် ကိုဗစ်-၁၉ ရောဂါပိုးတွေ့ရှိသူများ၏ ဓာတ်ခွဲနမူနာများအနက် ကိုဗစ်-၁၉ မျိုးရိုးဗီဇပြောင်းရောဂါပိုးတွေ့ရှိနိုင်သည့် သံသယဖြစ်ဖွယ် ဓာတ်ခွဲနမူနာ (၃၁) ခုအား ကိုဗစ်-၁၉ ရောဂါ မျိုးရိုးဗီဇစစ်ဆေးခြင်းကို တပ်မတော်ဆေးသုတေသနတပ်တွင် (၁၅-၃-၂၀၂၂) ရက်နေ့က ဆောင်ရွက်ခဲ့ရာ SARS CoV-2 Variant Omicron (အိုမီခရွန်) ရောဂါပိုး BA.2 ကို ဓာတ်ခွဲ နမူနာ (၃၁) ခုတွင် တွေ့ရှိရကြောင်း၊Omicron (အိုမီခရွန်) ရောဂါပိုး BA.2 တွေ့ရှိသူများအား ကိုဗစ်-၁၉ ရောဂါပိုး ဓာတ်ခွဲအတည်ပြုခဲ့စဉ်ကပင် သီးခြားထားရှိကုသမှုပေးလျက်ရှိပြီး ၎င်းတို့၏ ကျန်းမာရေးအခြေအနေမှာ ကောင်းမွန်လျက်ရှိကြောင်းဖော်ပြထားပါတယ်။

     နိုင်ငံတကာလေ့လာတွေ့ရှိချက်များအရ Omicron (အိုမီခရွန်) မျိုးရိုးဗီဇပြောင်း ရောဂါပိုး BA.2 သည် Omicron (အိုမီခရွန်) မျိုးရိုးဗီဇပြောင်းရောဂါပိုး BA.1 ထက် ကူးစက်မှု ပိုမိုမြန်ဆန်သော်လည်း ကိုဗစ်-၁၉ ရောဂါကာကွယ်ဆေး အကြိမ်ပြည့်ထိုးနှံပြီးစီးသူများတွင် ရောဂါလက္ခဏာ ပြင်းထန်မှုနှင့် သေဆုံးမှုတို့လျော့နည်းကြောင်း တွေ့ရှိရသည်ဟုဖော်ပြထားပါတယ်။

     လက်ရှိတွင် ကျန်းမာရေးဝန်ကြီးဌာနအနေဖြင့် ကိုဗစ်-၁၉ ရောဂါ မျိုးရိုးဗီဇပြောင်း ရောဂါပိုးစောင့်ကြပ်ကြည့်ရှုခြင်းလုပ်ငန်းစဉ်များနှင့် ကိုဗစ်-၁၉ ရောဂါ ကာကွယ်၊ ထိန်းချုပ်၊ ကုသခြင်းလုပ်ငန်းများအား ပိုမိုအရှိန်မြှင့်ဆောင်ရွက်လျက်ရှိပါကြောင်း ကျန်းမာရေးဝန်ကြီးဌာနက ဆိုပါတယ်။

#ymg_mnn
#Yangon_Media_Group

#LocalNews
Published_19 March 2022

     ရန်ကုန်လျှပ်စစ်ဓာတ်အားပေးရေးကော်ပိုရေးရှင်းအနေဖြင့် ယခုမတ်လအတွင်း အများပြည်သူကို (၄)နာရီပေး(၄)နာရီနားစနစ်ဖြင့် လျှပ်စစ်ပေးဝေမည်ဖြစ်ကြောင်း အဆိုပါကော်ပိုရေးရှင်း၏ တာဝန်ရှိသူက YMG ကို ပြောသည်။

     ဓာတ်အားဖြန့်ဖြူးမည့်အစီအစဉ်ကို မတ်လ ၁၈ ရက်က ထုတ်ပြန်ရာတွင် စက်မှုဇုံများကို နံနက် ၉ နာရီမှ ညနေ ၅ နာရီထိ ပေးမည် ဖြစ်ပြီး အများပြည်သူအတွက် A အုပ်စု နှင့် B အုပ်စုဟူ၍ အချိန်ခွဲခြားကာ လျှပ်စစ်မီးပေးဝေမည်ဖြစ်ကြောင်း သိရသည်။

     "အများပြည်သူအတွက် လေးနာရီပေး လေးနာရီနားပေါ့ ၊ အကြမ်းပိုင်းကတော့ ညလယ်ပိုင်းဆိုရင် ည ၉ နာရီကနေ မနက် ၅ နာရီထိ အုပ်စုတစ်ခုရှိတယ်။မြို့ပြင်တွေမှာပေါ့၊အဲဒီမှာ ရတဲ့အုပ်စုရမယ်၊မရတဲ့ အုပ်စုမရဘူးပေါ့။ဥပမာပြောရရင် ဒီနေ့ ညပိုင်းရတဲ့ အုပ်စုကနောက်နေ့မရဘူး၊အဲဒီလိုပေါ့။အရှေ့၊အနောက်၊တောင်၊မြောက်ခရိုင်တွေက မြို့နယ်တွေမှာပြောတာ။ အရှေ့နဲ့ အနောက်မှာဆိုရင် မြို့တွင်း ၆ မြို့နယ်ရှိတဲ့အတွက် အဲဒီမြို့တွင်းတွေမှာတော့ ညပိုင်းမှာ အပြည့်ပေးနိုင်အောင်လုပ်ထားတယ်"ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်း၏ တာဝန်ရှိသူက ပြောသည်။

     လက်ရှိတွင် ဘီလူးချောင်းရေအားလျှပ်စစ် ဓာတ်အားပေးစက်ရုံများကထွက်သော လျှပ်စစ်ဓာတ်အားပို့လွှတ်နေသည့် ဓာတ်အားလိုင်းတာဝါတိုင်များ ဖျက်ဆီးခံရသောကြောင့် လျှပ်စစ်ဓာတ်အား (၂၂၀)မဂ္ဂါဝပ်ခန့်နိုင်ငံတော်ဓာတ်အားစနစ်ထဲသို့ ပို့လွှတ်နိုင်မှုမရှိပေ။

     ထို့အပြင် LNG ဈေးနှုန်း အဆမတန်မြင့်တက်ကာ နိုင်ငံတကာရေနံဈေးကွက် တည်ငြိမ်မှုမရှိသောကြောင့်လည်း LNG ဓာတ်ငွေ့ရည် ဝယ်ယူရန်ခက်နေသောကာလအတွင်း LNG ဓာတ်အားပေးစက်ရုံများက ဓာတ်အားထုတ်လုပ်မှု ၇၅၀ မဂ္ဂါဝပ်ခန့်ကို ရပ်တန့်ထားရကြောင်းလည်း သိရသည်။

#ymg/mt
#Yangon_Media_Group

Published_ 18 March 2022

ငွေကြေးဈေးကွက်တည်ငြိမ်မှုအား ထိခိုက်စေသော ဆောင်ရွက်မှုများကို တိုင်ကြားနိုင်ကြောင်း ရွှေနှင့်ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးလုပ်ငန်း ကော်မတီက ကြေညာထားပါတယ်။

တည်ငြိမ်မှုကို ထိခိုက်စေသော ဆောင်ရွက်မှုများမှာ နိုင်ငံခြားငွေကြေးများအား တရားမဝင်ကိုင်ဆောင်ခြင်း၊ ဥပဒေမဲ့အရောင်းအဝယ်ပြုလုပ်ခြင်း၊ ဈေးကစားခြင်း ပြုလုပ်သူများ၊ အိမ်ခြံမြေနှင့် မော်တော်ယာဉ်ကဲ့သို့ အခြေခံပစ္စည်းများအား ရောင်းဝယ်ပြီး ပိုင်ဆိုင်မှုလွှဲပြောင်းရာတွင် မြန်မာနိုင်ငံတော်ဗဟိုဘဏ်၏ ငွေပေးချေမှု ကန့်သတ်ချက် များအတိုင်း လိုက်နာမှုမရှိသူများ၊ ဘဏ်များတွင်အပ်နှံထားသည့် ငွေသားထုတ်ယူရာ၌ ရာခိုင်နှုန်းယူ၍ ငွေသားထုတ်ပေးခြင်း၊ ဘဏ်ပြင်ပတွင် ငွေသားလက်ဝယ် ထိန်းသိမ်း ထားသူများက ဘဏ်အကောင့်တွင် အပ်နှံထားသည့်ကျပ်ငွေများကို ရာခိုင်နှုန်းယူ၍ ငွေသားဖြင့်လဲလှယ်ထုတ်ပေးခြင်းတို့ ဖြစ်ကြပါတယ်။

ရွှေနှင့်ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးလုပ်ငန်းကော်မတီ သည် ပြည်တွင်းငွေကြေးဈေးနှုန်းများ တည်ငြိမ်မှုရှိအောင် ထိန်းကျောင်းကြပ်မတ်ရာတွင် အထောက်အကူဖြစ်စေရန် တိုင်ကြားစာစိစစ်ရေးအဖွဲ့ကို ဖွဲ့စည်းဆောင်ရွက်လျက်ရှိ တယ်လို့ ကြေညာချက်မှာဖော်ပြထားပါတယ်။

ငွေကြေးဈေးကွက်တည်ငြိမ်မှုကို ထိခိုက်စေနိုင်သော ဆောင်ရွက်မှုများတွင် ပါဝင် ပတ်သက်သူများကို သိရှိပါက ရွှေနှင့်ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ် ရေး လုပ်ငန်းကော်မတီရဲ့ တိုင်ကြားစာ စိစစ်ရေးအဖွဲ့ တယ်လီဖုန်းနံပတ် ၀၆၇-၃၄၀၉၄၆၃၊ လက်ကိုင်ဖုန်းနံပတ် ၀၉-၄၃၀၀၆၈၃၃ နှင့် Email လိပ်စာ This email address is being protected from spambots. You need JavaScript enabled to view it. သို့ လုံခြုံစိတ်ချစွာ တိုင်ကြားနိုင်ကြောင်း အသိပေး ကြေညာထားတာဖြစ်ပါတယ်။