#Local_News
Published_ 26 December 2022

ကရင်ပြည်နယ် ကော့ကရိတ်မြို့ ရွှေကြက်ယက်ဘုန်းတော်ကြီးကျောင်းအတွင်း ပေါက်ကွဲမှုတစ်ခုဖြစ်ပွားခဲ့ရာ သံဃာလေးပါးနှင့် ကလေးတစ်ဦး ပြင်းထန်ဒဏ်ရာရရှိခဲ့သည့်အနက် သံဃာတော်တစ်ပါး ပျံလွန်တော်မူခဲ့ကြောင်း ဒေသခံတစ်ဦးက YMG သို့ ပြောသည်။

ယင်းပေါက်ကွဲမှုမှာ ယနေ့ ဒီဇင်ဘာလ ၂၆ ရက် နံနက် ၁၁ နာရီ ခွဲခန့်အချိန်တွင် ပေါက်ကွဲခဲ့ခြင်းဖြစ်ပြီး၊ ဒေသခံများအဆိုအရ လက်နက်ကိုင်အဖွဲ့တစ်ဖွဲ့က Drone ဖြင့် ပစ်ချကာ ဖောက်ခွဲတိုက်ခိုက်ခံရခြင်းဖြစ်သည်ဟု ဒေသခံအချို့က ပြောသည်။

"ဗုံးသုံးလုံးကြဲသွားတယ်လို့ အဲဒီနားကဒေသခံတွေက ပြောတယ်။ သံဃာတစ်ပါးကတော့ပျံလွန်တော်မူသွားပြီလို့ကြားတယ်။ ကျန်တဲ့ ဘုန်းကြီးကျောင်းသားကလေးတစ်ဉီးနဲ့ သံဃာတစ်ပါးကိုတော့ ဘားအံပြည်သူ့ဆေးရုံကို ပို့မယ်လို့လည်းကြားပါတယ်။"ဟု ရှင်းပြသည်။

ပြီးခဲ့သော ဒီဇင်ဘာလ တတိယပတ်အတွင်းမှစတင်၍ ကော့ကရိတ်မြို့အနီး တိုက်ပွဲငယ်များဖြစ်ပွားလျက်ရှိပြီး၊ အရပ်သားပြည်သူအချို့ စစ်ဘေးရှောင်ရမှုများရှိသကဲ့သို့ ထိခိုက်သေဆုံးမှုအချို့လည်းရှိလာခဲ့သည်။

#ymg/myn
#Yangon_Media_Group

#Local_News
Published_ 26 December 2022

ကာကွယ်ရေးဦးစီးချုပ် (ရေ) ဗိုလ်ချုပ်ကြီးမိုးအောင်သည် မြန်မာနိုင်ငံသို့ ရောက်ရှိနေသော ရုရှားဒုတိယရေတပ်ဦးစီးချုပ် Vice Admiral Igor MUKHAMETSHIN ဦးဆောင်တဲ့ ကိုယ်စားလှယ်အဖွဲ့အား ဒီဇင်ဘာ ၂၅ ရက် နံနက်ပိုင်းတွင် ဧရာဝတီရေတပ်စခန်းဌာနချုပ် အရာရှိရိပ်သာ၌ လက်ခံတွေ့ဆုံစဉ် မြန်မာ-ရုရှား နှစ်နိုင်ငံရေတပ်အချင်းချင်း ပူးပေါင်း ဆောင်ရွက်ရေးကိစ္စရပ်များ ဆွေးနွေးခဲ့ကြောင်း သိရပါတယ်။

ထို့အပြင် နှစ်နိုင်ငံရေတပ်မှစစ်ရေယာဉ်များ အပြန်အလှန် ချစ်ကြည်ရေးခရီးစဉ်များ လေ့လာလည်ပတ်နိုင်မှုနှင့် နှစ်နိုင်ငံရေတပ်များအကြား ချစ်ကြည်ရင်းနှီးမှု ပိုမိုတိုးတက် ခိုင်မာရေးအတွက် အဆင့်လိုက်ချစ်ကြည်ရေးခရီးစဉ်များ အပြန်အလှန် လေ့လာလည်ပတ် နိုင်ရေး၊ မြန်မာ့တပ်မတော်မှ ရုရှားဖက်ဒရေးရှင်းနိုင်ငံသို့ သင်တန်းသားများ စေလွှတ် သင်ကြား လျက်ရှိတဲ့ အခြေအနေများကိုလည်း ဆွေးနွေးခဲ့ကြောင်း သိရပါတယ်။

အဆိုပါ တွေ့ဆုံပွဲသို့ ကာကွယ်ရေးဦးစီးချုပ် (ရေ) နှင့်အတူ တပ်မတော် (ရေ) မှ အရာရှိကြီးများ တက်ရောက်ကြကြောင်း သိရပါတယ်။

ရုရှားဒုတိယရေတပ်ဦးစီးချုပ်ဦးဆောင်သော ကိုယ်စားလှယ်အဖွဲ့အား ရေတပ် လေ့ကျင့်ရေးဌာနချုပ်၌ တပ်မတော်(ရေ)မှ အရာရှိ၊ စစ်သည်များ၏ လေ့ကျင့်ရေးဆိုင်ရာ ဆောင်ရွက်ပေးနေမှုကို ရှင်းလင်းတင်ပြခဲ့ကြပြီး Ship Handling Simulator တွင် လေ့ကျင့်နေမှု၊ Engine Room Simulator တွင် လေ့ကျင့်နေမှုများကို ကြည့်ရှု လေ့လာ ကြကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published_26 December 2022

စားအုန်းဆီအခြေခံလက်ကားရည်ညွှန်းဈေးနှုန်းကို တစ်ပိဿာ ကျပ် ၄၃၆၀ ကျပ်သတ်မှတ်ပေးထားကြောင်း သိရသည်။

အဆိုပါ အခြေခံလက်ကားရည်ညွှန်းဈေးနှုန်းကို ဒီဇင်ဘာလ ၂၆ ရက်မှ ဇန်နဝါရီလအထိ သတ်မှတ်ထားပြီး ပြီးခဲ့သည့် တစ်ပတ်ထက် ၅၀ ကျပ် နီးပါးကျဆင်းလာကြောင်း သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ပြီး သယ်ယူပိုဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်အတွင်း ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

ပြည်တွင်း၌ စားအုန်းဆီသုံးစွဲမှုသည် တစ်နှစ်လျှင် တန်ချိန် ၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံကနေ အဓိထားတင်သွင်းနေရကြောင်း သိရသည်။

ယင်းအပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။

#ymg/sth
#Yangon_Media_Group

#Local_News
Published_ 26 December 2022

မိုင်းဖုန်းဆရာတော်ဘုရားကြီး၏ သက်တော် ၆၀ ပြည့် ဝိဇာတမွေးနေ့မဂ်လာပွဲကို တာချီလိတ်မြို့ မိုင်းဖုန်းသာသနာ့နယ်မြေ လွန်းလိန်းကျောင်းတိုက်တွင် ကျင်းပပြုလုပ်သွားမည်ဖြစ်ကြောင်း ပွဲဖြစ်မြောက်ရေးတာဝန်ခံတစ်ဉီးဖြစ်သူ ဉီးစိုင်းလာက YMG သို့ ပြောသည်။

အဆိုပါ ဝိဇာတမွေးနေ့မဂ်လာပွဲအား ၂၀၂၃ ခုနှစ် ဇန်နဝါရီ ၁ ရက်မှ ၅ရက်အထိ ကျင်းပပြုလုပ်သွားမည်ဖြစ်သည်။

ထို့အပြင် ဇန်နဝါရီ ၆ ရက်၌ ဗုဒ္ဓဂါယာရှိပုံစံတူ စေတီတည်ဆောက်နေမှုအတွက်ထီးတော်တင်ပွဲကို ဆက်လက်ကျင်းပပြုလုပ်သွားမည်ဖြစ်ကြောင်း ဆိုသည်။

"ဆရာတော့် ကျန်းမာရေးကောင်းပါတယ်။ လက်ရှိတော့ ကျောင်းမှာဘဲ သီတင်းသုံးနေပါတယ်။ မွေးနေ့ပွဲအတွင်း တရားပွဲကိုပါ ထည့်သွင်းကျင်းပသွားမှာပါ"ဟု ဆိုသည်။

မွေးနေ့ပွဲကာလအတွင်း အနယ်နယ်အရပ်ရပ်မှ စတုဒီတာလာရောက် ကျွေးမွေးခြင်း လှူဒါန်းခြင်းများရှိမည်ဖြစ်ပြီး၊ အဆိုပါ ရက်၌ လွန်းလိန်းနယ်မြေအတွင်း စာဂပေးကမ်းလှူဒါန်းခြင်းကိစ္စရပ်များကိုသာ ဆောင်ရွက်ခွင့်ပြုမည်ဖြစ်ကာအခကြေးငွေဖြင့် စျေးရောင်းချခြင်းများကို လုံးဝတားမြစ်ထားရှိကြောင်း ပွဲဖြစ်မြောက်ရေးကော်မတီက အသိပေးထားသည်။

ထို့အပြင် ဆရာတော်ကြီး၏ မွေးနေ့ပွဲတော်ကာလအတွင်း လွန်းလိန်းစေတီအဝင်မုဒ်ဦးမှစ၍ စျေးရောင်းချမည့် မည်သူမဆို တားမြစ်သွားမည်ဖြစ်ကာ လိုက်နာမှုမရှိပါက ရောင်းချမည့်ပစ္စည်းများအား ပွဲတော်ပြီးသည်အထိ သိမ်းဆည်းသွားမည် ဖြစ်ကြောင်းသိရသည်။

#ymg/myn
#Yangon_Media_Group

#Local_News
Published_ 26 December 2022

ကရင်နှစ်သစ်ကူးနှင့် ခရစ္စမတ်ပိတ်ရက်များဆက်နေသည့်အတွက် ကျိုက်ထီးရိုးစေတီတော်ကြီးသို့ ဘုရားဖူးလာရောက်မှုများပြားပြီး ခရစ္စမတ်ပိတ်ရက်ကာလတွင် ဘုရားဖူး(၄၆၀၀)ကျော် လာရောက်ကြောင်း ဂေါပကအဖွဲ့ထံမှ သိရသည်၊၊

ကျိုက်ထီးရိုးစေတီတော်ကြီးသို့ ဒီဇင်ဘာလလ(၂၅)ရက် ခရစ္စမတ်မတိုင်မီရက်များကတစ်ရက်ကိုဘုရားဖူး(၂၀၀၀)ကျော်နှင့် ခရစ္စမတ်မတိုင်မီတစ်ရက်အလိုတွင်တစ်ရက်ကို ဘုရားဖူး(၄၆၀၀)ကျော်နှင့် ဒီဇင်ဘာလလ(၂၅) ရက်ခရစ္စမတ်ပိတ်ရက်နေ့တွင် (၁၉၀၀)ကျော်လာရောက်သည်ဟု ကျိုက်ထီးရိုးဂေါပကအဖွဲ့၏ ပြောပြချက်အရ သိရသည်၊၊

ကျိုက်ထီးရိုးစေတီတော်ကြီးကို နှစ်စဉ်ပွင့်လင်းရာသီဖြစ်သည့် ဒီဇင်ဘာလနှင့် ဇန်နဝါရီလများတွင် ပြည်တွင်း၊ ပြည်ပဘုရားဖူးဧည့်သည်များ အများဆုံးလာရောက်လေ့ရှိသည်ဟု ဆိုသည်၊၊

ကိုဗစ်ဖြစ်ပွားမှုများကြောင့်လည်းကောင်း၊ မိုးရာသီကာလ ဧည့်အဝင်နည်းတာကြောင့်လည်းကောင်း၊ လုံခြုံရေးအခြေအနေများကြောင့်လည်းကောင်း ကျိုက်ထီးရိုးစေတီတော်ကြီးသို့လာရောက်သူနည်းပါးခဲ့ပြီး ယခုချိန်တွင် ပိတ်ရက်ဆက်သည့်အတွက် လာရောက်သူ ပုံမှန်ရှိခဲ့ကြောင်း ဂေါပကအဖွဲ့ထံမှ သိရသည်၊၊

#ymg/tthl
#Yangon_Media_Group

#World_Military
Published 26 December 2022

ယူကရိန်းထံသို့ ထောက်ပံ့ပေးပို့ရန်ကတိပြုထားတဲ့ အမေရိကန်တို့ရဲ့ Patriot ဒုံးကျည်‌တွေကို ရုရှားတပ်များက ဖျက်ဆီးပစ်နိုင်မယ်လို့ ၁၀၀ ရာခိုင်နှုန်းယုံကြည်ကြောင်း ရုရှညးသမ္မတ'ဗလာဒီမာပူတင်'က ဒီဇင်ဘာ ၂၅ ရက်နေ့မှာ ပြောကြားခဲ့ပါတယ်။

အမေရိကန်သမ္မတ'ဂျိုးဘိုင်ဒင်'က ယူကရိန်းသမ္မတ'ဗိုလိုဒီမီယာဇယ်လန်စကီ'ကို ပြီးခဲ့တဲ့ရက်ပိုင်းကမှ အိမ်ဖြူတော်မှာ လက်ခံတွေ့ဆုံခဲ့တဲ့အပြင် အမေရိကန်ကွန်ဂရက်လွှတ်တော်မှာလည်း 'ဇယ်လန်စကီ'ပြောကြားခွင့်ရခဲ့ပါတယ်။

ရုရှားက ယူကရိန်းကိုကျူးကျော်ခါစ လတွေမှာ နယ်မြေတွေသိမ်းပိုက်နိုင်ခဲ့ပေမယ့် ယူကရိန်းဘက်မှ ပြင်းပြင်းထန်ထန် တန်ပြန်တိုက်ခိုက်လာတာ‌ကြောင့် ရုရှားတပ်များအနေနဲ့ နယ်မြေများစွာမှ ဆုတ်ခွာလာကြရပါတယ်။

ယူကရိန်းဟာ အနောက်နိုင်ငံများထံမှ ဒေါ်လာဘီလီယံချီတန်ကြေးရှိတဲ့ အကူအညီများ ရရှိထားကာ ရုရှားကိုခုခံရာမှာ ထိရောက်မှုရှိပြီး နောက်ထပ်အကူအညီတွေလည်း ရရှိဦးမှာဖြစ်ပါတယ်။

တနင်္ဂနွေနေ့က 'ပူတင်'ပြောကြားရာမှာ ယူကရိန်းအရေးနဲ့ ပတ်သက်ပြီး ဆွေးနွေးညှိနှိုင်းဖို့ ရုရှားဘက်က အဆင်သင့်ဖြစ်နေပေမယ့် ယူကရိန်းဘက်ကသာ ဆွေးနွေးဖို့ စိတ်မဝင်စားတာဖြစ်ကြောင်း အခိုင်အမာဆိုလိုက်ပါတယ်။

"လက်ခံနိုင်လောက်စရာ နည်းလမ်းများဖြင့် ပါဝင်ပတ်သက်သူတိုင်းနဲ့ ညှိနှိုင်းဆွေးနွေးဖို့ ကျုပ်တို့ကအသင့်ရှိနေပေမယ့် ယူကရိန်းအပေါ်သာ မူတည်ပါတယ်၊ ကျုပ်တို့က မညှိနှိုင်းချင်တာ မဟုတ်ပါဘူး၊ ယူကရိန်းကသာ ညှိမရဖြစ်နေတာပါ" လို့ အင်တာဗျူးတစ်ခုမှာ ပြောကြားခဲ့ပါတယ်။

ပဋိပက္ခအများစုက ညှိနှိုင်းရင်း အဆုံးသတ်သွားကြပေမယ့် CIA ရဲ့ အကဲဖြတ်ချက်အရ ရုရှားတို့က စစ်ပွဲအဆုံးသတ်ဖို့ အတည်တကျဆွေးနွေးချင်တဲ့ပုံ မပေါ်ဘူးလို့ CIA ညွှန်ကြားရေးမှူး'ဝီလျံဘန်းစ်'က ယခုလအတွင်း ပြောကြားခဲ့ပါတယ်။

အမေရိကန်က ရုရှားကို အမှုန့်ကြိတ်ပစ်ဖို့ ကြိုးစား‌နေတာကြောင့် ရုရှားက ဖြစ်သင့်တာကို လုပ်ဆောင်နေရတာဖြစ်တယ်လို့ 'ပူတင်'က ဆိုပါတယ်။

ရုရှားပြိုလဲဖို့ စီစဉ်နေတယ်ဆိုတဲ့ စွပ်စွဲချက်ကို အမေရိကန်က ငြင်းဆန်ခဲ့ပါတယ်။

Source: WION
#Yangon_Media_Group

#World_Science
Published 26 December 2022

လူသန်းပေါင်းများစွာခံစားနေရတဲ့ အယ်လ်ဇိုင်းမားရောဂါရှာဖွေရေးနည်းလမ်း တိုးတက်ရေးအတွက် Sysmex Corporation ကုမ္ပဏီကထုတ်လုပ်တဲ့ သွေးစစ်ဆေးကိရိယာပစ္စည်းကို ဂျပန်က အတည်ပြုလိုက်ပြီလို့ ကြာသပတေးနေ့က ဆိုပါတယ်။

လက်ရှိရှာဖွေရေးနည်းလမ်းတွေက ဈေးကြီးပြီး ခန္ဓာကိုယ်ထဲရှာဖွေနေရတာကြောင့် ကုမ္ပဏီကနေ လူအများတတ်နိုင်တဲ့ ဈေးနှုန်းဖြင့် ပရိုတိန်းစုပြုံလာခြင်းကို ရှာဖွေနိုင်မယ့် ပစ္စည်းကိရိယာကိုတည်ထွင်လိုက်ကာ ဈေးကွက်ထဲအမြန်ဆုံးဖြန့်ဖြူးနိုင်ဖို့ ကြိုးစားနေပါတယ်။

"အယ်လ်ဇိုင်းမားရောဂါရှာဖွေရာမှာ ဦးနှောက်ထဲက အမိုင်လွိုက်ပရိုတိန်းစုပြုံလာခြင်းကို ပိုမိုလျင်မြန်လွယ်ကူစွာရှာဖွေနိုင်စေတဲ့ နည်းပညာကို Sysmex က ထုတ်လုပ်နေပါတယ်" လို့ ကုမ္ပဏီက ပြောကြားလိုက်ပါတယ်။

သမားရိုးကျစမ်းသပ်နည်းတွေနဲ့ မတူတာက အခုပစ္စည်းဟာ သွေးဖြင့်စမ်းသပ်တာဖြစ်ပြီး လူနာကို သိပ်ပြီးဝန်ထုပ်ဝန်ပိုးဖြစ်စေမှာ မဟုတ်ပါဘူး။

အယ်လ်ဇိုင်းမားရောဂါဆိုတာက လူတစ်ယောက်ရဲ့ မှတ်ဉာဏ်တွေကိုဖျက်ဆီးပစ်တဲ့ ရောဂါဆိုးပါ။

အဓိကပရိုတိန်း ၂ မျိုးက စုပြုံလာကာ ဦးနှောက်ဆဲလ်တွေ သေစေပြီးတော့ ဦးနှောက်ကျုံ့သွားစေပါတယ်။

ဒီနည်းပညာသာ အောင်မြင်မယ်ဆိုရင် အယ်လ်ဇိုင်းမားနဲ့ မှတ်ဉာဏ်ချို့ယွင်းခြင်းဆိုင်ရာ အခြားရောဂါတွေကို ရှာဖွေရာမှာ အပြောင်းအလဲဖြစ်လာမှာဖြစ်ကြောင်း အမေရိကန်အခြေစိုက် အယ်လ်ဇိုင်းမားအဖွဲ့အစည်းက ပြောလိုက်ပါတယ်။

လက်ရှိအရေးတကြီးလိုအပ်နေတာက ဒီရောဂါကိုရှာဖွေဖို့အတွက် ဈေးနှုန်းချိုသာပြီး ရိုးရှင်းလွယ်ကူတဲ့ ရှာဖွေရေးကိရိယာတွေ ဖြစ်ပါတယ်။

ဒီရောဂါကို ထိရောက်စွာရှာဖွေနိုင်မယ့် နည်းလမ်းကို ဆေးဘက်ဆိုင်ရာကျွမ်းကျင်သူများနဲ့ သုတေသီများ ကြိုးစားတီထွင်နေကြပါတယ်။

Source: WION
#Yangon_Media_Group

#Local_News
Published_ 26 December 2022

မန္တလေးတိုင်းဒေသကြီး၊ အမရပူရမြို့နယ်၊ ဝက်ကုန်းရပ်ရှိ နေအိမ်တစ်အိမ်အတွင်း အသက် (၆၀) အရွယ် အမျိုးသမီးတစ်ဦးအား သနပ်ခါးတုံးဖြင့်ထုသတ်၍ ရွှေဆွဲကြိုးလုယက်ခံရသည့် ဖြစ်စဉ်မှ ပြစ်မှုကျူးလွန်သူနှစ်ဦးကို ရဲတပ်ဖွဲ့က ဖမ်းဆီရမိထားပြီဖြစ်ကြောင်း ဒေသခံများထံမှ သိရသည်။

ယင်း ဖြစ်စဉ်သည် ဒီဇင်ဘာ ၂၂ ရက် ညပိုင်းတွင် ဖြစ်ပွားခဲ့ခြင်းဖြစ်ပြီး၊ ပြစ်မှုကျူးလွန်သူနှစ်ဉီးကို ဒီဇင်ဘာ ၂၄ ရက် ညပိုင်းတွင် ဖမ်းဆီးရမိခဲ့ခြင်းလည်းဖြစ်သည်။

ပြစ်မှုကျူးလွန်သူများ ယူဆောင်သွားသည့် သက်သေခံရွှေထည်ပစ္စည်းနင့် ဆက်စပ်ပစ္စည်းများကို ယမန်နေ့ ဒီဇင်ဘာ ၂၅ ရက်တွင် ရဲတပ်ဖွဲ့က ရှာဖွေသိမ်းဆည်းခဲ့ပြီးဖြစ်ကြောင်း သိရသည်။

ပြစ်မှုကျူးလွန်သူများ၏ ထွက်ဆိုချက်အရ အခင်းဖြစ်နေအိမ်အား ငွေကြေးကိစ္စဖြင့် မကြာခဏရောက်ကြောင်း၊ အိမ်ရှင်(သေဆုံးသူ)၏ ဝတ်ဆင်ထားသော ရွှေဆွဲကြိုးကို လုယူရန်ကြံစည်ခဲ့ကြောင်း၊ အခင်းဖြစ်နေ့က သေဆုံးသူတစ်ဦးတည်းရှိနေစဉ် ဆွဲကြိုးကိုဆွဲဖြတ်ရာ လူမှတ်မိသွား၍ အသက်သေသည်အထိ ကျူးလွန်ခဲ့ခြင်းဖြစ်ကြောင်းသိရသည်။

အမှုအတွက် အမရပူရမြို့နယ်ရဲစခန်းက အမှုဖွင့်လှစ်အရေးယူဆောင်ရွက်နေကြောင်း သိရသည်။

#ymg/myn
#Yangon_Media_Group

#World_Health
Published 26 December 2022

အိန္ဒိယမှအမျိုးသမီးတစ်ဦးဟာ လပေါင်းများစွာ ခါးနာခြင်းဝေဒနာခံစားခဲ့ရပြီးနောက် အိန္ဒိယမှဆရာဝန်များမှ သူမရဲ့သည်းခြေအိတ်ကနေ ကျောက် ၃၈၂ လုံး အံ့အားသင့်ဖွယ် ထုတ်ယူရရှိခဲ့ပါတယ်။

ဟာရဲယာရွာမှ 'ယာရှိုဒါဘိုင်'လို့ခေါ်တဲ့ လူနာဟာ နောက်ကျောကနေ နာကျင်မှုပြင်းထန်စွာ ခံစားရပြီးနောက် တစ်ခုခုဖြစ်နေပြီဆိုတာကို သိရှိခဲ့ပါတယ်။

ရင်ဘတ်အောင့်ခြင်းလည်း ခံစားခဲ့ရပေမယ့် ဘာကြောင့်ဖြစ်လဲဆိုတာကို မသိခဲ့ရပါဘူး။

နောက်မှသာ သည်းခြေအိတ်မှာ ကျောက်တည်နေတာကို သိလာရပါတယ်။

နာကျင်မှုသက်သာဖို့ ဆေးခန်းသွားပြပေမယ့် ဝေဒနာအရင်းအမြစ်ကိုသိရအောင် မိသားစုက ဆေးရုံကိုခေါ်သွားခဲ့ပါတယ်။

ဓာတ်မှန်ရိုက်ကြည့်ရာမှာ သူ့ရဲ့သည်းခြေအိတ်မှာ ကျောက် ၃၈၂ လုံးရှိနေကာ အချို့ဆိုရင် ၁ စင်တီမီတာလောက်ရှိပါတယ်။

သည်းခြေကျောက်လို့ခေါ်ပြီး အစာအိမ်အူလမ်းကြောင်းမှ ပိုလျှံလာတာတွေက သည်းခြေအိတ်ထဲမှာ စုပြုံမာကျောလာတာဖြစ်ကြောင်း မိုင်ယိုဆေးခန်းက ဆိုပါတယ်။

သည်းခြေကိုလက်စ်ထရောပမာဏ အလွန်များပြားပြီး ကိုလက်စ်ထရောအပိုအလျှံတွေက မာကျောလာတဲ့အခါ ကျောက်တည်လာတာဖြစ်ပြီး ဆန်စေ့ကနေ ဂေါက်သီးအရွယ်အစားထိ ရှိနိုင်ပါတယ်။

အချို့လူတွေမှာ ကျောက်တစ်ခုနှစ်ခုသာ ရှိတတ်ပေမယ့် အချို့မှာတော့ တပြိုင်တည်းမှာ ကျောက်အများကြီးဖြစ်တတ်ပါတယ်။

ဆရာဝန်တွေက နှစ်နာရီကြာအောင် ခွဲစိတ်မှုလုပ်ခဲ့ရာမှာ ကံကောင်းစွာဖြင့် သည်းခြေကျောက်တွေကို တစ်ခုပြီးတစ်ခုဖယ်ရှားနိုင်ခဲ့ပါတယ်။
ခွဲစိတ်မှုပြုလုပ်ပြီးနောက် လူနာမှာ ပြန်လည်သက်သာလာပြီဖြစ်ပါတယ်။

ယခုဖြစ်စဉ်ဟာ ၂၀၁၈ ခုနှစ်က နောက်ထပ်အိန္ဒိယအမျိုးသမီးမှာပဲ ကျောက် ၂ ထောင်ကျော်တွေ့ရှိခဲ့တာထက်စာရင်တော့ မများပါဘူး။

Source: NY Post
#Yangon_Media_Group

Published 25 December 2022

ကြောက်စရာကောင်းလှတဲ့ ဆောင်းမုန်တိုင်းဟာ အမေရိကန်ပြည်ထောင်စုရဲ့ နေရာအစိတ်အပိုင်းတွေကို ဆက်လက် ထုထောင်းနေပါတယ်။

အင်အားပြင်းလှတဲ့ အာတိတ်လေတွေကြောင့် စနေညနေခင်းမှာ လူသန်းပေါင်းများစွာ လျှပ်စစ်မီးမရရှိဘဲနေထိုင်နေကြရပါတယ်။

ဆောင်းမုန်တိုင်းနှင့်အတူ နယူးယောက်ပြည်နယ် ဘတ်ဖလိုမြို့တစ်လျောက်မှာ ထူထပ်တဲ့ နှင်းတွေ ကျဆင်းနေပါတယ်။အရေးပေါ်လုပ်ငန်းတွေကို မြူနီစပါယ်ဒေသ(၈)ခုမှာ လုပ်ဆောင်လို့မရဘဲဖြစ်နေပြီး ဒေသခံတွေ အိမ်ထဲမှာပဲနေကြဖို့ ဘတ်ဖလိုအများကောင်စီက တွစ်တာမှာကြေညာထားပါတယ်။

Source AFP

#US_Winter_Storm

#Climate_Change

Published 25 December 2022

၁၂၄ကြိမ်မြောက်မဲခေါင်မြစ် ပူးတွဲကင်းလှည့်မှုကို တရုတ်၊လာအို၊မြန်မာနှင့် ထိုင်းနိုင်ငံတို့က ပူးပေါင်းဆောင်ရွက်ခဲ့ကြပြီးနောက်  သောကြာနေ့က ပြီးဆုံးခဲ့ပါတယ်။ အဲဒီပူးတွဲကင်းလှည့်ရာမှာ ပါဝင်ခဲ့တဲ့ တရုတ်ရေယာဉ် လေးစီးဟာ အနောက်တောင်ယူနန်ပြည်နယ်က ကွမ်လေးဆိပ်ကမ်းကို ပြန်လည်ဆိုက်ကပ်ရောက်ရှိခဲ့ပါတယ်။

အဆိုပါ (၄)ရက်ကြာ ပူးတွဲကင်းလှည့်လည်ရာမှာ နိုင်ငံပေါင်းလေးနိုင်ငံမှ ရေယာဉ်(၆)စီးဖြင့် ကွမ်လေဆိပ်ကမ်းမှ ရွှေတြိဂံအနီးရေပြင်အထိ ၅၂၀ကီလိုမီတာကို ခုတ်မောင်းခဲ့ကြတာဖြစ်ပါတယ်။ အဲဒီနေရာတစ်ဝိုက်ဟာ မူးယစ်ဆေးဝါးထုတ်လုပ်ကုန်ကူးမှု နာမည်ဆိုးဖြင့်ကျော်ကြားနေတဲ့နေရာတွေပါ။

ကင်းလှည့်ခရီးအတွင်း အဆိုပါနိုင်ငံလေးနိုင်ငံမှ အဖွဲ့တွေဟာ "Watch-2022" လေ့ကျင့်ခန်းတွေကိုပါပူးတွဲဆောင်ရွက် ခဲ့ပါတယ်။ လေ့ကျင့်ခန်းတွေမှာ ပူးတွဲစစ်ဆင်ရေးကို ကျယ်ပြန့်စွာ စစ်ဆေးခြင်း၊တိုးမြှင့်ဆောင်ရွက်ခြင်း၊ အရေးပေါ် တုန့်ပြန်ခြင်းနှင့် တိုက်ပွဲအသင့် စွမ်းရည်တွေပူးပေါင်းဆောင်ရွက်ခြင်းတို့ပါဝင်ခဲ့ပါတယ်။

မဲခေါင်မြစ်ဟာ တရုတ်တို့က လန်ချန်းလို့ခေါ်တဲ့မြစ်ဖြစ်ပြီး နယ်စပ်ဖြတ်ကျော် ရေကြောင်းသွားလားမှုအတွက် အရေးပါတဲ့ ရေပြင်တစ်ခုဖြစ်ပါတယ်။

၂၀၁၁ခုနှစ် ဒီဇင်ဘာလကတည်းက အဆိုပါနိုင်ငံလေးနိုင်ငံဟာ ပူးတွဲကင်းလှည့်မှုတွေကို ဆောင်ရွက်ခဲ့ကြပါတယ်။

ပြီးခဲ့တဲ့ ဆယ်စုနှစ်ကျော်ကျော်  မဲခေါင် လေးနိုင်ငံ ဥပဒေစိုးမိုးရေးဌာနတွေရဲ့ ပူးတွဲကင်းလှည့်မှုတွေကြောင့် အမှားကင်းစင်ပြီး ထိခိုက်မှု၊ပြီးတော့ မြစ်ကြောင်းထဲအပိုင်စီးမှုတွေ တစ်ခုမှမဖြစ်ခဲ့တဲ့အတွက် နိုင်ငံတကာ ဥပဒေစိုးမိုးရေး ပူးပေါင်းဆောင်ရွက်မှုမှာ အောင်မြင်တဲ့ ပုံစံတစ်ခုဖြစ်လာခဲ့ရပါတယ်။

Source: CCTV+

#The_124th_joint_Mekong_River_patrol

#Joint_patrol_Myanmar_Mekong

#Myanmar_Politics

#TV Yangon Times Matters အစီအစဉ်
Published - 25 Dec 2022

အစီအစဉ်တင်ဆင်သူ ဆရာဟိန်းလတ်က ဦးကြည်ဝင်း( လောကအမွန်)
နှင့်အတူ

-"၂၀၁၁ ခုနှစ်မှာ" လောကအမွန်"စာကြည့်တိုက်ကို စတင်ဖွင့်လှစ်ခဲ့ကြောင်း

-ကိုယ်ပိုင်စာအုပ်တစ်သောင်းကျော်ကို အခြေပြုစတင်ခဲ့ရာက ယခုဆိုရင်စာအုပ်ပေါင်းနှစ်သောင်းကျော် စုဆောင်းထားရှိပြီးဖြစ်ကြောင်း

-"လောကအမွန်"ဆိုတဲ့နာမည်ကို စွဲလမ်းနေမိခဲ့တာကြောင့် လောကအမွန် စာကြည့်တိုက်လို့ နာမည်ပေးခဲ့တာဖြစ်ကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group