#Local_News
Published - 5 July 2022

မော်လမြိုင်-ရန်ကုန် ရထားလမ်းပိုင်းတွင်ပြေးဆွဲနေသော အမှတ်(၉၀)အစုန် နှင့်အမှတ် (၈၉)အဆန် ရထားလက်မှတ်ခ နှုန်းထားများကို ပြောင်းလဲသတ်မှတ်ထားကြောင်း သိရသည်။

ရထားလက်မှတ်ခနှုန်းထား ပြောင်းလဲသတ်မှတ်ခြင်းကို ဇူလိုင်လ (၁)ရက်မှစတင်ခဲ့ခြင်းဖြစ်ပြီး ခရီးသွားပြည်သူများ သိရှိနိုင်ရန် ဘူတာရှိ ကြော်ငြာသင်ပုန်းတွင် အသိပေးကြေညာထားကြောင်း၊ ပြောင်းလဲသတ်မှတ်လိုက်သည့် မော်လမြိုင် - ရန်ကုန် ရထားလက်မှတ်ခနှုန်းထားမှာ ရိုးရိုးတန်း (၃၅၅၀) ကျပ်၊ ပထမတန်း (၄၄၅၀)ကျပ်နှင့်အထက်တန်း (၇၀၅၀)ကျပ် ဖြစ်ကြောင်း သိရသည်။

အများပြည်သူ သွားလာမှု အဆင်ပြေစေရန် မော်လမြိုင် - ရန်ကုန် အမှတ် (၉၀) အစုန်ရထားကို နေ့စဉ်ပြေးဆွဲပေးလျက် ရှိပြီးမော်လမြိုင်ဘူတာမှ နံနက် ၈ နာရီ စတင်ထွက်ခွာ၍ ရန်ကုန်ဘူတာသို ညနေပိုင်းတွင် ရောက်ရှိကြောင်း၊ ရထားလက်မှတ်ဝယ်ယူရာတွင် နိုင်ငံသားစိစစ်ရေးကတ်ပြား (မှတ်ပုံတင်မူရင်း) ယူဆောင်လာရန်လိုအပ်ကြောင်း မော်လမြိုင်ဘူတာရုံပိုင်၏ပြောပြချက်အရ သိရသည်။

ymg/sth
#Yangon_Media_Group

#Local_News
Published - 5 July 2022

ကချင်ပြည်နယ်၊ ကရင်ပြည်နယ်နှင့် မကွေးတိုင်းဒေသကြီးတို့တွင် လေထုအရည်အသွေး စစ်ဆေးရာ ကျန်းမာရေးထိခိုက်နိုင်သည့်အခြေအနေတွင်ရှိနေကြောင်း ပတ်ဝန်းကျင်ထိန်းသိမ်းရေးဦးစီးဌာနမှ ထုတ်ပြန်ထားသည်။

နိုင်ငံတဝန်းရှိ လေထုအရည်အသွေးအခြေအနေ လေ့လာဆန်းစစ်နိုင်ရန်အတွက် ပြည်နယ်နှင့် တိုင်းဒေသကြီး ၈ ခုတွင် ပြီးခဲ့သည့် ဇွန်လက တိုင်းတာစစ်ဆေးခဲ့ခြင်းဖြစ်ကြောင်း သိရသည်။

အဆိုပါစစ် ဆေးမှုတွင်အမှုန်အမွှားပါဝင်နှုန်း ၂ မျိုး၊ နိုက်ထရိုဂျင်ဒိုင်အောက်ဆိုက်၊ ဆာလဖာဒိုင်အောက်ဆိုက်နှင့် အိုဇုန်းတို့ကို အဓိကလေ့လာထားခြင်းဖြစ်ပြီး ကချင်ပြည်နယ် မြစ်ကြီးနားမြို့ရှိ သဘာဝပတ်ဝန်းကျင်ထိန်းသိမ်းရေး ဦးစီးဌာန ညွှန်ကြားရေးမှူးရုံးဝန်းကျင်တွင် ကျန်းမာရေးကို ထိခိုက်နိုင်သည့်အဆင့်ရှိ အမှုန်အမွှား PM25 တွေ့ရှိခဲ့ကြောင်း သိရသည်။

ကရင်ပြည်နယ် ဘားအံမြို့ ဇွဲကပင်တောင်ခြေအနီးဝန်းကျင်တွင်လည်း ခံနိုင်ရည်နည်းသူများအတွက် ကျန်းမာရေးထိခိုက်နိုင်သည့်အဆင့်ရှိ အမှုန်အမွှား PM25 ရှိနေပြီး မကွေးခရိုင် ရုံးဝန်းကျင်တွင် ခံနိုင်ရည်နည်းသူများအတွက် ကျန်းမာရေးကို ထိခိုက်နိုင်သည့် အိုဇုန်းပါဝင်နှုန်း ရှိနေကြောင်း သိရသည်။

ကရင်ပြည်နယ်တွင် နိုက်ထရိုဂျင်ဒိုင်အောက်ဆိုက်ပါဝင်နှုန်းမှာ ရှိသင့်သည့် ပမာဏထက် အနည်းငယ်ပိုခြင်းကြောင့် လေထုအရည်အသွေး ကောင်းမွန်သည့် အခြေအနေတွင်မရှိဘဲ သင့်တင့်သည့် အခြေအနေသာ ရှိနေပြီး ရန်ကုန်တိုင်းဒေသကြီး ဗိုလ်တထောင်မြို့နယ် ၅၅ လမ်းတွင် အမှုန်အမွှားပါဝင်နှုန်းမှာ စစ်ဆေးခဲ့သည့် နေရာများအနက်အနည်းဆုံးဖြစ်ပြီး ရခိုင်ပြည်နယ် စစ်တွေမြို့၌ ပြည်နယ်စိုက်ပျိုးရေးဦး စီးရုံးအနီးတွင်ဒုတိယ အနည်းဆုံးဖြစ်ကြောင်း သိရသည်။

မန္တလေးတိုင်းဒေသကြီးတွင် အမှုန်အမွှားကလွဲ၍ နိုက်ထရိုဂျင်ဒိုင်အောက်ဆိုက်၊ ဆာလဖာဒိုင်အောက်ဆိုက်နှင့် အိုဇုန်းတို့ လုံးဝမရှိဘူးကြောင် ထုတ်ပြန်ချက်တွင်ဖော်ပြထားသည်။

ဇွန်လတွင် မိုးရွာခြင်းကြောင့် လေထုထဲ၌အမှုန်အမွှားများပါခြင်း လျော့နည်းသွားပြီး မေလမတိုင်ခင် နွေရာသီတွင် လေထုအရည်အသွေးမှာ သတ်မှတ် စံချိန်စံညွှန်းများထက် ကျော်လွန်နိုင်ကြောင်း၊ လေထုအပူချိန်၊ လေတိုက်နှုန်းနှင့် တိုက်ခတ်ရာ လမ်းကြောင်း၊ စိုထိုင်းမှု၊ မိုးရွာသည့်အခြေအနေ၊ ကား ဆိုင်ကယ်များသုံးသည့်အခြေအနေ၊ စက်ရုံများရှိ အခိုးအငွေ့ ထုတ်လွှတ်သည့်အခြေအနေတို့ကို မူတည်၍ လေထုအရည်အသွေးရလဒ်များ ပြောင်းလဲနိုင်ကြောင်းလည်း သိရသည်။

ymg/sth
#Yangon_Media_Group

#Local_News
Published_5 July 2022

ရှမ်းတိုင်းရင်းသားများ ဒီမိုကရေစီအဖွဲ့ချုပ်ကို (Shan Nationalities League for Democracy-SNLD)ကို ပြည်ထောင်စုရွေးကောက်ပွဲ ကော်မရှင် (UEC) က စစ်ဆေးဆောင်ရွက်ခဲ့ကြောင်း UEC က ထုတ်ပြန်ထားသည်။

ပြီးခဲ့သည့် ဇွန်လ ၃၀ ရက်မှ ဇူလိုင်လ ၃ ရက်အထိ ရှမ်းပြည်နယ်ရွေးကောက်ပွဲကော်မရှင် အဖွဲ့ခွဲရုံးတွင် ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းစိုးနှင့် ဦးမင်းမင်းဦးတို့က ဦးဆောင်၍ ပြည်နယ်စာရင်းစစ်ချုပ်ရုံး၊ ပြည်တွင်းအခွန်များ ဦးစီးဌာနနှင့် အထူးစုံစမ်းစစ်ဆေးရေးဦးစီးဌာနတို့မှ ဌာနဆိုင်ရာကိုယ်စား လှယ်များပါဝင်သည့် စစ်ဆေးရေးအဖွဲ့က စစ်ဆေးခဲ့ခြင်းဖြစ်ကြောင်း ယင်းတွင် ဖော်ပြထားသည်။

ပြည်ထောင်စုရွေးကောက်ပွဲကော်မရှင်ဥပဒေ ပုဒ်မ ၁၀ ( ဌ ) တွင် ပြဋ္ဌာန်းထား သော “နိုင်ငံရေးပါတီများ မှတ်ပုံတင်ခြင်းဥပဒေနှင့်အညီ နိုင်ငံရေးပါတီများကို မှတ်ပုံတင်ခြင်း၊ ကြီးကြပ်ခြင်းနှင့်ကြီးကြပ်စေခြင်း” တာဝန်နှင့်အညီ နိုင်ငံရေးပါတီ များ၏ ပါတီဝင်အင်အား၊ ပါတီပိုင်ရန်ပုံငွေနှင့် ပစ္စည်းများစုဆောင်းခြင်း၊ ထိန်းသိမ်းခြင်း၊ သုံးစွဲခြင်း၊ စစ်ဆေးခြင်းနှင့်စာရင်း ရှင်းလင်းဖျက်သိမ်းခြင်း၊ ပါတီဆိုင်ရာလုပ်ငန်းများကို စနစ်တကျ ဆောင်ရွက်ထားခြင်း ရှိ၊ မရှိတို့ကို စစ်ဆေးဆောင်ရွက်ခဲ့ခြင်းဖြစ်ကြောင်း UEC ၏ ထုတ်ပြန်ချက်အရ သိရသည်။

UEC အနေဖြင့် လက်ရှိတွင်စစ်ဆေးပြီး နိုင်ငံရေး ပါတီ ၈၅ ပါတီ ရှိပြီး စစ်ဆေးရန် ၇ ပါတီသာ ကျန်ရှိတော့ကြောင်းလည်း သိရသည်။

ymg/mt
#Yangon_Media_Group

#Local_News
Pyblished_5 July 2022

မြန်မာအမျိုးသမီးအား တရုတ်အမျိုးသားနှင့် အဓမ္မလက်ထပ်စေရန်စီစဉ်ရောင်းစားသူများကို ထောင် ၁၀ နှစ် ၊ ၁၅ နှစ် အသီးသီး ချမှတ်လိုက်ကြောင်း သိရသည်။

ပြီးခဲ့သည့် ၂၀၁၉ ခုနှစ်အတွင်းက အဆိုပါ အမျိုးသမီးအားရန်ကုန်တိုင်းဒေသကြီး မှော်ဘီမြို့နယ် ရိုးကြီးကျေးရွာနေ ဦးထွန်းနိုင်နှင့် မဝါဝါနွယ် (ခ) မဝါတို့က တစ်ရွာတည်းနေ အသက် ၂၃ နှစ်အရွယ် အမျိုးသမီးအား တရုတ်နိုင်ငံရှိ စားသောက်ဆိုင်တွင် အလုပ်လုပ်ကိုင်ပါက တစ်လလျှင် စားစရိတ်ငြိမ်း ငွေကျပ်သုံးသိန်းရမည်ဟု ပြောဆိုစည်းရုံး၍ တရုတ်နိုင်ငံအတွင်းသို ခေါ်ဆောင်ကာ တရုတ်အမျိုးသားနှင့် အဓမ္မလက်ထပ်ရန် စီစဉ်ဆောင်ရွက်ခဲ့ခြင်း ဖြစ်သည်။

ယင်းအပေါ် မှော်ဘီမြို့မရဲစခန်း (ပ) ၂၈၆၂/ ၂၀၁၉၊ လူကုန်ကူးမှုတားဆီးကာကွယ်ရေး ဥပဒေပုဒ်မ ၂၄ ဖြင့် အမှုရေးဖွင့်၍ မြောက်ပိုင်းခရိုင် တရားရုံးသို့ တရားစွဲတင်ပို့ခဲ့ရာ ယခု ၂၀၂၂ ခုနှစ် ဇွန်လ ၃၀ ရက်က တရားခံဦးထွန်းနိုင်နှင့် မဝါဝါနွယ်(ခ) မဝါတို့ကို လူကုန်ကူးမှုတားဆီးကာကွယ်ရေး ဥပဒေပုဒ်မ ၂၄ အရ အလုပ်နှင့် ထောင်ဒဏ် ၁၀ နှစ်စီ ကျခံစေရန် အမိန့်ချမှတ်ခဲ့ခြင်း ဖြစ်သည်။

ယင်းအပြင် ၂၀၂၀ ပြည့်နှစ်က မကွးတိုင်းဒေသကြီး မြို့သစ်မြို့နေ မခင်ငြိမ်းချမ်း(ခ) ငြိမ်းငြိမ်းနှင့် ဒေါ်အေးစန်း ဆိုသူတို့က တစ်မြို့တည်းနေ အသက် ၄၀ အရွယ်အမျိုးသမီးအား တရုတ်နိုင်ငံတွင် ထမင်းချက်အလုပ်လုပ်ပါက တစ်လလျှင် ငွေကျပ် သုံးသိန်းရမည်ဟု ပြောဆိုစည်းရုံး၍ တရုတ်ယောက်ျားထံ ပို့ဆောင်ရောင်းစားကာ ငွေကြေး အကျိုးအမြတ်များ ရယူခဲ့သဖြင့် ဒန့်ဒလွန်ပင်နယ်မြေ ရဲစခန်း (ပ) ၁၇/၂၀၂၀၊ လူကုန်ကူးမှု တားဆီးကာကွယ်ရေး ဥပဒေပုဒ်မ ၂၄ ဖြင့် အမှုရေးဖွင့်ကာ မကွေးခရိုင် တရားရုံးသို့ တရားစွဲတင်ပို့ခဲ့ရာ ဇွန်လ ၃၀ ရက်တွင် တရားခံ မခင်ငြိမ်းချမ်း(ခ) ငြိမ်းငြိမ်းနှင့် ဒေါ်အေးစန်းတို့ကို လူကုန်ကူးမှုတားဆီး ကာကွယ်ရေး ဥပဒေပုဒ်မ ၂၄ အရ အလုပ်နှင့် ထောင်ဒဏ် ၁၅ နှစ်စီ ကျခံစေရန် အမိန့်ချမှတ်ခဲ့ကြောင်း သိရသည်။

အလားတူ ရန်ကုန်တိုင်းဒေသကြီး လှိုင်သာယာမြို့နယ်နေ မအိခိုင်စိုး(ခ) မှဲကြီး၊ မော်မော်ဦး(ခ) ဒေါ်ချော၊ မောင်ဇော်နှင့် ကျော်လေးတို့က ဧရာဝတီတိုင်းဒေသကြီး လပွတ္တာမြို့နယ်နေ အသက် ၂၉ နှစ်အရွယ် အမျိုးသမီးအား တစ်လလျှင် ငွေကျပ် နှစ်သိန်းခန့်ရမည့် အလုပ်ရှာပေးမည်ဟု ပြောဆိုစည်းရုံး၍ ပြည့်တန်ဆာအဖြစ် အဓမ္မခိုင်းစေပြီး ငွေကြေးအကျိုးအမြတ်များကို ခေါင်းပုံဖြတ်ရယူခဲ့သဖြင့် သောင်ကြီးနယ်မြေ ရဲစခန်း (ပ) ၂၂၇၀/၂၀၁၉၊ လူကုန်ကူးမှုတားဆီးကာကွယ် ရေးဥပဒေပုဒ်မ ၂၈ (က)ဖြင့် အမှုရေးဖွင့်ခဲ့ပြီး မြောက်ပိုင်းခရိုင်တရားရုံးသို့ တရားစွဲတင်ပို့ခဲ့ရာ ဇွန်လ ၃၀ ရက်တွင် တရားခံ မအိခိုင်စိုး(ခ)မှဲကြီးနှင့် မော်မော်ဦး(ခ) ဒေါ်ချောတို့ကို လူကုန်ကူးမှုတားဆီးကာကွယ်ရေးဥပဒေပုဒ်မ ၂၄ အရ အလုပ်နှင့် ထောင်ဒဏ် ၁၀ နှစ်စီချမှတ်ခဲ့ပြီး တိမ်းရှောင်နေသော မောင်ဇော်နှင့် ကျော်လေးတို့အား တရားခံပြေးအဖြစ်ကြေညာခဲ့ကြောင်းလည်း သိရသည်။

ymg/mt
#Yangon_Media_Group

#DailyNews
Published - 5 July 2022

၁။ ချင်းရွှေဟော်နယ်စပ်တွင် ဘဏ် ၅ ခု၏ ရုံးခွဲများ ဖွင့်လှစ်တော့မည်

၂။ ဘင်္ဂလားဒေ့ရှ်မှ ပြန်လာသူသုံးဦးတွင် ကိုဗစ်ပိုးတွေ့

၃။ နေ့စဉ်မိုးလေဝသသတင်း။

၄။ (၄၆)နှစ်ကြာအောင် ပျောက်ဆုံးနေခဲ့သည့်ဂစ်တာကို ကနေဒါနာမည်ကျော်ရော့ကာ ပြန်လည်ရှာတွေ့ခဲ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_5 July 2022

မှော်ဘီမြောင်းတကာဓာတ်မြေဩဇာစက်ရုံနှင့် ကန်ကြီးထောင့်ဓာတ်မြေသြဇာစက်ရုံများမှ တစ်နေ့လျှင် ဓာတ်မြေသြဇာ တန် ၃၀၀ ထုတ်လုပ်မည်ဖြစ်ကြောင်း စွမ်းအင်ဝန်ကြီးဌာန မြန်မာ့ရေနံဓာတုဗေဒလုပ်ငန်းက သိရသည်။

အဆိုပါ အမှတ်(၄) ဓာတ်မြေသြဇာစက်ရုံ(မြောင်းတကာ)နှင့် အမှတ်(၅)ဓာတ်မြေ သြဇာစက်ရုံ(ကန်ကြီးထောင့်)တို့မှာ မြန်မာ့ရေနံဓာတုဗေဒလုပ်ငန်း ကြီးကြပ်မှုအောက်တွင်ရှိပြီး ယခုဇူလိုင်လ ၁၃ ရက်မှ စတင်လည်ပတ်ပြီးနေ့စဉ်တန် ၃၀၀ ထုတ်လုပ်မည့် ဓာတ်မြေသြဇာအမျိုးအစားများမှာ ယူရီးယားဓာတ်မြေသြဇာဖြစ်ပြီး စိုက်ပျိုးရာသီအမီ တောင်သူလယ်သမားများအတွက် ထုတ်လုပ်ဖြန့်ဖြူးပေးမည်ဖြစ်ကြောင်း သိရသည်။

မြန်မာနိုင်ငံအနေဖြင့် စိုက်ပျိုးရေးကိုအခြေခံသော နိုင်ငံတစ်နိုင်ငံဖြစ်သောကြောင့် ယခုကဲ့သို့ စိုက်ပျိုးရာသီတွင် ဓာတ်မြေသြဇာများ ဖြည့်ဆည်းနိုင်ရေး၊အရည်အသွေးပြည့်ဝသည့် ဓာတ်မြေသြဇာများ ထုတ်လုပ်ဖြန့်ဖြူးပေးနိုင်ရန်အတွက်လုပ်ငန်းသုံးစက်ပစ္စည်းများနှင့်ထုတ်ကုန်များ အရည်အသွေးပြည့်မီရန်နှင့် စီးပွားရေးအရ တွက်ခြေကိုက်ပြီးအောင်မြင်သည့် စက်ရုံတစ်ရုံဖြစ်စေရေးအတွက် လည်ပတ်ထုတ်လုပ်နိုင်ရေး လုပ်ဆောင်သွားမည် ဖြစ်ကြောင်းလည်း မြန်မာ့ရေနံဓာတုဗေဒလုပ်ငန်းက ထုတ်ပြန်ထားသည်။

ymg/mt
#Yangon_Media_Group

#Local_News
Published_5 July 2022

ဧရာဝတီတိုင်းဒေသကြီး၊ ပုသိမ်မြို့ရှိပုသိမ်လေယာဉ်ကွင်းကို အဆင့်မြှင့်တင်မည်ဖြစ်ကြောင်း နစက ဥက္ကဌက ဇူလိုင်လ ၄ ရက်တွင် ဧရာဝတီတိုင်းဒေသကြီး ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာဝန်ထမ်းများနှင့် တွေ့ဆုံစဉ် ပြောကြားခဲ့သည်။

ဥက္ကဌက ရန်ကုန်-ပုသိမ်လမ်းမကြီး အဆင့်မြှင့်တင်ဆောင်ရွက်ရာတွင်လည်း အာဆီယံသတ်မှတ်ချက်များနှင့်အညီ စနစ်တကျ တည်ဆောက်သွားရန်လိုသည့်အပြင် ပုသိမ်လေယာဉ်ကွင်း အဆင့်မြှင့်တင်ရေးအတွက်လည်း ဆောင်ရွက်သွားမည်ဖြစ်ကြောင်း ထည့်သွင်းပြောကြားခဲ့ခြင်း ဖြစ်သည်။

ခရီးသွားလုပ်ငန်းအတွက် မြန်မာအမျိုးသားလေကြောင်းလိုင်းနှင့် Asia World Group of Companies ၏လက်အောက်ခံ International Travel Asia ကုမ္ပဏီတို ပူးပေါင်း၍ လွန်ခဲ့သော ၃ နှစ်ကျော်ကာလက ရန်ကုန်-ပုသိမ်လေကြောင်းခရီးစဉ်ကို တစ်ပတ်လျှင် ၄ ရက်၊ တနင်္လာ၊ အင်္ဂါ၊ ကြာသပတေး၊ စနေနေ့ ညနေပိုင်း ၃ နာရီမှ ၄ နာရီခွဲ အကြား တစ်ရက်လျှင် အသွားအပြန် တစ်ခေါက်စီ ပျံသန်းပြေးဆွဲခဲ့သေးသည်။

ရန်ကုန်မှ ပုသိမ်ခရီးစဉ်အတွက် နိုင်ငံခြားသားခရီးသည်တစ်ဦးလျှင် အမေရိကန် ၅၅ ဒေါ်လာနှင့် နိုင်ငံသားများ အတွက်တစ်ဦးလျှင် ၅၅၀၀၀ ကျပ် ၊ ပုသိမ်မှ ရန်ကုန်ခရီးစဉ်အတွက် နိုင်ငံခြားသားတစ်ဦးလျှင် အမေရိကန် ၅၃ ဒေါ်လာ နှင့် နိုင်ငံသားတစ်ဦးလျှင် ၅၃၀၀၀ ကျပ်သတ်မှတ် ပြေးဆွဲခဲ့ခြင်းလည်း ဖြစ်သည်။

ယခင်က ပုသိမ်- ရန်ကုန်ခရီးအတွက် ရေကြောင်းလမ်းနှင့် လေကြောင်းလမ်း ရှိခဲ့သော်လည်း ၁၉၆၂-၆၃ ခုနှစ် ခန့်ကာလတွင် လေကြောင်းခရီးစဉ် ရပ်ဆိုင်းခဲ့ကြောင်း၊ ၁၉၈၈ ခုနှစ်နောက်ပိုင်းတွင် ပုသိမ်-ရန်ကုန် ကားလမ်းပေါ်ပေါက်လာပြီးနောက် ၂၀၁၃ ခုနှစ်တွင် ပုသိမ်-ရန်ကုန်ရေကြောင်းခရီးသင်္ဘောလိုင်းများ ရပ်ဆိုင်းခဲ့ကြောင်း ဧရာဝတီတိုင်းဒေသကြီး အစိုးရအဖွဲ့ရုံးက သိရသည်။

ymg/mt
#Yangon_Media_group

#WorldGeopolitics
Published 5 July 2022

ပင်လယ်နက်ရှိ ဗျူဟာမြောက်စခန်းအခြေချရာ မြွေကျွန်းမှ ရုရှားတပ်များပြီးခဲ့တဲ့ရက်သတ္တပတ်ကဆုတ်ခွာပြီးနောက် အဆိုပါမြွေကျွန်းသို့ ယူကရိန်းအလံကို ရဟတ်ယာဉ်ဖြင့် သယ်ဆောင်လာခဲ့ပြီး ယူကရိန်းတပ်များရောက်ရှိလာတာနဲ့ အလံထူသွားမယ်လို့ ယူကရိန်းစစ်တပ်က တနင်္လာနေ့မှာ ပြောကြားလိုက်ပါတယ်။

ပင်လယ်နက်ထဲက ကုန်းမြေပြင်မျက်နှာပြင်နေရာမှာ အလံရောက်ရှိနေပြီးပြီလို့ ယူကရိန်းတောင်ပိုင်းစစ်ဌာနချုပ်မှ ပြောရေးဆိုခွင့်ရှိသူ 'နာတာလီယာဟွန်မန်နီယက်'က အစပိုင်းမှာ ပြောကြားခဲ့ပါတယ်။

"ယူကရိန်းအလံကို မြွေကျွန်းထံသို့ ရဟတ်ယာဉ်ဖြင့် ပို့ဆောင်ပြီးပါပြီ၊ တပ်ဖွဲ့တွေရောက်လာတာကိုစောင့်ပြီး အလံလွှင့်ထူသွားမှာပါ" လို့ 'ဟွန်မန်နီယက်'ရဲ့ပြောကြားချက်ကို ယူကရိန်းမီဒီယာတစ်ခုက ဖော်ပြသွားပါတယ်။

သတင်းထောက်တွေကို အစပိုင်းမှာပြောခဲ့တဲ့စကားတွေကို မြင်ယောင်ပုံဖော်တဲ့သဘောနဲ့သာကြည့်ရှုဖို့ 'ဟွန်မန်နီယက်'က ရှင်းပြခဲ့ပါတယ်။

ကျွန်းပေါ်မှာ ဘယ်တပ်သားမှမရောက်သေးသလို မီဒီယာတွေဓာတ်ပုံရိုက်ကူးဖို့အတွက်လည်း ဘယ်သူကမှစွန့်စားချင်မှာ မဟုတ်ပါဘူးလို့ ဆိုခဲ့ပါတယ်။

ယူကရိန်းအနောက်တောင်ဘက် ကမ်းရိုးတန်းရှိမြွေကျွန်းကနေ ရုရှားတပ်များဆုတ်ခွာသွားခြင်းက ယူကရိန်းဆိပ်ကမ်းများအပေါ် ပိတ်ဆို့မှုများ ပြေလျော့သွားမယ်လို့ လေ့လာသူများက သုံးသပ်ခဲ့ကြပါတယ်။

ဒါပေမဲ့ ယူကရိန်းရဲ့သီးနှံစပါးတွေ လုံခြုံစိတ်ချစွာဖြတ်သန်းဖို့ကတော့ မဖြစ်နိုင်သေးဘူးလို ကိဗ်အခြေစိုက်နိုင်ငံခြားရေးသံတမန်တစ်ဦးက ရိုက်တာသတင်းဌာနကို ပြောကြားခဲ့ပါတယ်။

"မိုင်းတူးဖော်ရှာဖွေရမှာတွေ ရှိနေပါသေးတယ်၊ ကုန်တင်ပို့ရေးလမ်းကြောင်းတွေမှာ ရုရှားတို့က စစ်သင်္ဘောများ၊ ကာကွယ်ရေးလက်နက်စနစ်များနဲ့ လေကြောင်းစနစ်များဖြင့် ဟန့်တားနိုင်သေးတဲ့အနေအထားရှိပါတယ်" လို့ ရှင်းပြသွားပါတယ်။

ဆိပ်ကမ်းတွေ ပြန်လည်ဖွင့်လှစ်ပြီး စပါးတွေပြန်လည်တင်ပို့နိုင်ရန်အတွက် ယူကရိန်းအနေနဲ့ မဟာမိတ်တွေရဲ့ထောက်ပံ့ကူညီမှုလိုအပ်ပြီး တူရကီကအဓိကကျကြောင်း ဖြည့်စွက်ပြောကြားခဲ့ပါတယ်။

လူသားချင်း စာနာထောက်ထားမှုအရ ယူကရိန်းနိုင်ငံမှ ဆန်စပါးတင်ပို့နိုင်ရေးကိုကြိုးပမ်းနေတဲ့ ကုလသမဂ္ဂရဲ့အားထုတ်မှုကို အနှောင့်အယှက်မဖြစ်စေကြောင်းပြသတဲ့အနေနဲ့ ကြာသပတေးနေ့က မြွေကျွန်းကနေ ဆုတ်ခွာခဲ့တာဖြစ်ကြောင်း ရုရှားတို့က ကြေညာခဲ့ပါတယ်။

ယူကရိန်းဘက်ကတော့ ဒုံးကျည်တွေအမြှောက်တွေနဲ့ပစ်ခတ်ပြီး ရုရှားတပ်များကိုနှင်ထုတ်နိုင်ခဲ့တာဖြစ်ကြောင်း ပြောကြားထားပါတယ်။

Source: Reuters
#Yangon_Media_Group

#Local_News
Published - 5 July 2022

ပုဂ္ဂလိကရင်းနှီးမြှုပ်နှံမှုဖြင့် ရေအားလျှပ်စစ်စီမံကိန်းအသစ် (၆) ခုကို ဆောင်ရွက်သွားရန် လျှပ်စစ်စွမ်းအားဝန်ကြီးဌာန၊ ရေအားလျှပ်စစ် အကောင်အထည်ဖော်ရေးဦးစီးဌာနမှ အိတ်ဖွင့်တင်ဒါခေါ်ယူထားသည်။

အဆိုပါ စီမံကိန်းဖော်ဆောင်လိုသည့် ကုမ္ပဏီများအနေဖြင့် ဖြစ်မြောက်နိုင်စွမ်း အစီရင်ခံစာပြုစုခြင်း ပြုလုပ်ရမည် ဖြစ် ကြောင်းထည့်သွင်းဖော်ပြထားသည်။

ပုဂ္ဂလိကရင်းနှီးမြှုပ်နှံမှု ဖြင့်ဆောင်ရွက်မည့် စီမံကိန်းတွင် ဖုန်အင်ခ၊ ကဆန်ရေ၊ နမ့်မယ်ဆိုင်၊ နမ့်ကန်၊ နမ့်တဘက်(ကယား)နှင့် အထက်ဆည်တော်ကြီး ရေအားလျှပ်စစ်စီမံကိန်းတို့ ပါဝင်ပြီး စိတ်ဝင်စားသည့် လုပ်ငန်းရှင်ကုမ္ပဏီများကို အပ်နှံလိုကြောင်း ထုတ်ပြန်ချက်တွင် ပါရှိသည်။

အဆိုပါတင်ဒါပုံစံကို ဩဂုတ်လ ၈ ရက်ထိ ရောင်းချပေးမည်ဖြစ်ပြီး နိုဝင်ဘာလ ၁၈ ရက် နောက်ဆုံးထား၍ အဆိုပြုလွှာတင်သွင်းရမည်ဖြစ်ကြောင်း၊ တင်ဒါကြေညာပုံစံအသေးစိတ်ကို moee.gov.mm မှာ ဝင်ရောက်ကြည့်ရှုနိုင်ကြောင်း ကြေညာထားသည်။

ymg/sth
#Yangon_Media_Group

#Local_News
Published - 5 July 2022

ရခိုင်ပြည်နယ်၊ စစ်တွေမြို့တွင် ကယ်ဆယ်ရေးပစ္စည်းအိမ်ထောင်စု (၄၅၀၀)စာ ထားရှိနိုင်မည့် ကြက်ခြေနီ သိုလှောင်ရုံသစ်ဖွင့်လှစ်လိုက်ပြီဖြစ်ကြောင်း မြန်မာနိုင်ငံ ကြက်ခြေနီအသင်းမှ သိရသည်၊၊

နယူးဇီလန်နိုင်ငံအစိုးရနှင့် မြန်မာနိုင်ငံကြက်ခြေနီ အသင်းတို့ ပူးပေါင်းဆောင်ရွက်မှု အစီအစဉ်အဖြစ် ရခိုင်ပြည်နယ်ကြက်ခြေနီ သိုလှောင်ရုံနှင့် ဘက်စုံသုံးအဆောက်အဦးကို ကျပ်ငွေသန်းပေါင်း(၁,၂၇၈) သန်း‌ကျော် အကုန်အကျခံ၍တည်ဆောက်ခဲ့ခြင်းဖြစ်သည်။

အဆောက်အဦး မြေညီထပ်တွင် အိမ်ထောင်စု(၁၅၀၀)မှ အိမ်ထောင်စု (၃၀၀၀)အထိ အသင်းမှ စံသတ်မှတ်ထားသော ကယ်ဆယ်ရေး အသုံးအဆောင် ပစ္စည်းများကို သိုလှောင်ခြင်း၊ ထိန်းသိမ်းခြင်း၊ ဖြန့်ဖြူးခြင်းများ ပြုလုပ်နိုင်မည့် အဆောက်အဦး ဖြစ်ပြီး ပထမထပ်တွင် ဆေးဝါးပစ္စည်းများ သိုလှောင်ခန်း၊ ရုံးခန်း၊ သင်တန်းခန်းမ၊ နားနေခန်း၊ အမျိုးသား တည်းခိုဆောင်နှင့် အမျိုးသမီးတည်း‌ခိုဆောင်များကိုလည်း ပါဝင်တည်ဆောက်ထားခြင်းဖြစ်သည်၊၊

အဆိုပါ ရခိုင်ပြည်နယ်ကြက်ခြေနီ သိုလှောင်ရုံနှင့် ဘက်စုံသုံးအဆောက်အဦးသည် မြန်မာနိုင်ငံကြက်ခြေနီအသင်းရှိ သိုလှောင်ရုံ(၃၀)လုံး အနက် ကယ်ဆယ်တုံပြန်ရေးလုပ်ငန်းများအတွက် သိုလှောင်လက်ခံနိုင်စွမ်းရည်၊ ကြက်ခြေနီစေတနာလုပ်အားရှင်များကို စွမ်းဆောင်ရည် တိုးတက်‌စေရန် သင်တန်းများပေးနိုင်မည်ဖြစ်ကြောင်းသိရသည်၊၊

ymg/tthl
#Yangon_Media_Group

#Local_News
Published_5 July 2022

ရန်ကုန်တိုင်းဒေသကြီး အမျိုးသမီးကော်မတီကကြီးမှူး ကျင်းပသော မြန်မာအမျိုး သမီးများနေ့ အထိမ်းအမှတ်ဖြင့် ကဏ္ဍမျိုးစုံတွင် ထူးချွန်စွာကြိုးပမ်းခဲ့ကြသည့်၊ အမျိုးသမီးများအား ယနေ့ ဇူလိုင်လ ၅ ရက်နံနက်ပိုင်းက အလုံမြို့နယ်၊ အမှတ် ၄ အခြေခံပညာအထက်တန်းကျောင်း၊ သီရိရတနာခန်းမတွင် ဂုဏ်ပြုဆုများချီးမြှင့်ခဲ့သည်။

ဆုပေးပွဲတွင် အရှေ့တောင်အာရှအားကစားပြိုင်ပွဲ ဂျူဒိုပြိုင်ပွဲနှင့် ဝူရှူးပြိုင်ပွဲတွင် ဒုတိယ ငွေတံဆိပ်ရရှိသူ၊ ကနူးကယက်လှေလှော်ပြိုင်ပွဲတွင် တတိယကြေး တံဆိပ်ဆု သုံးဆုရရှိသူတစ်ဦးနှင့် တတိယကြေးတံဆိပ်ရရှိသူတစ်ဦး၊ ASEAN +3 Mixed Country Odesst ပညာရေးပြိုင်ပွဲတွင် ဒုတိယငွေတံဆိပ်ဆုရရှိသူနှစ်ဦး ၊ တတိယ ကြေးတံဆိပ်ဆုရရှိသူတစ်ဦးနှင့် ၂၀၂၂ ခုနှစ်တက္ကသိုလ်ဝင်တန်းစာမေးပွဲတွင်၊ ရန်ကုန်တိုင်းဒေသကြီးက သိပွံဘာသာတွဲ၌အမှတ် အများဆုံးဖြင့် ပထမဆုရရှိသူ တစ်ဦးတို့ကို ဂုဏ်ပြုမှတ်တမ်းလွှာများနှင့် ဂုဏ်ပြုချီးမြှင့်ငွေများအသီးသီး ချီးမြှင့်ခဲ့ကြခြင်း ဖြစ်ကြောင်း သိရသည်။

ယင်းအပြင် သိပွံဘာသာတွဲ၌ အမှတ်အများဆုံးဖြင့်၊ ဒုတိယဆုရရှိသူနှင့် တတိယ ဆုရရှိသူ၊ ဝိပ္ပံဘာသာတွဲ၌ အမှတ်အများဆုံးဖြင့် ပထမဆုရရှိသူနှင့် ဒုတိယဆုရရှိသူ၊ ဝိပ္ပံဘာသာတွဲ တတိယဆုရရှိသူနှင့် ဝိဇ္ဇာဘာသာတွဲ၌ အမှတ်အများဆုံးဖြင့်၊ ပထမဆုရရှိသူ၊ ဝိဇ္ဇာဘာသာတွဲ ဒုတိယဆုနှင့်တတိယဆုရရှိသူ၊ အမျိုးသမီးများနေ့ အထက်တန်းဆင့် စာစီစာကုံး ပြိုင်ပွဲတွင် ပထမဆုနှင့် ဒုတိယဆု ရရှိသူ၊ အထက်တန်းဆင့် စာစီစာကုံးပြိုင်ပွဲ တတိယဆုနှင့်အလယ်တန်းဆင့် စာစီစာကုံးပြိုင်ပွဲ ပထမဆုရရှိသူ၊ အလယ်တန်းအဆင့် စာစီစာကုံးပြိုင်ပွဲ ဒုတိယဆုနှင့်တတိယဆုရရှိသူတို့အားလည်း ဂုဏ်ပြုမှတ်တမ်းလွှာများနှင့် ဂုဏ်ပြုချီးမြှင့်ငွေများကို အသီးသီးပေးအပ်ခဲ့ကြကြောင်း သိရသည်။

၎င်းအပြင် လူမှုဝန်ထမ်းဦးစီးဌာန အိမ်တွင်းမှုသက်မွေးသင်တန်းကျောင်း ဝန်ထမ်းများ ၏၊ ရိုးရာပွဲတက်ဝတ်စုံချုပ်ပြိုင်ပွဲတွင်၊ နှစ်သိမ့်ဆုရရှိသူများနှင့် သရုပ်ပြတင်ဆက်ကြသည့်အဖွဲ့များကိုလည်း ဂုဏ်ပြုချီးမြှင့်ခဲ့ကြကြောင်း သိရသည်။

အမျိုးသမီးများ၏ စွမ်းဆောင်ရည်မြင့်မားရေးနှင့် အမျိုးသမီးများဘဝဖွံ့ဖြိုးတိုး တက်စေရေးအတွက်၊ မြန်မာနိုင်ငံလုံးဆိုင်ရာအမျိုးသမီးရေးရာကော်မတီကို၊ ၁၉၉၆ ခုနှစ်၊ ဇူလိုင်လ ၃ ရက်တွင် ဖွဲ့စည်းပြီး၊ အဆိုပါ ဇူလိုင် ၃ ရက်ကို မြန်မာ အမျိုးသမီးများနေ့အဖြစ် သတ်မှတ်ပြဌာန်းကာ မြန်မာအမျိုး သမီးများနေ့ အထိမ်းအမှတ် အခမ်းအနားများကိုနှစ်စဉ် ကျင်းပခဲ့ခြင်း ဖြစ်ကြောင်း သိရသည်။

ymg/nn
#Yangon_Media_Group

#Local_News
Published _ 5 July 2022

မန္တလေးတိုင်းဒေသကြီး၊ အောင်မြေသာစံမြို့နယ်၊ မန္တလေးတောင်တော် ဆုတောင်းပြည့်စေတီတော်မြတ်ကြီးနှင့် အရံစေတီတော်လေးဆူတို့အား လုံးတော်ပြည့်ရွှေသင်္ကန်းဆက်ကပ်လှူဒါန်းခြင်း၊ ရတနာစိန်ဖူးတော်၊ ငှက်မြက်နားတော် အထွဋ်တင်လှူပူဇော်ခြင်း နှင့် ဗုဒ္ဓဘိသေက ဘုရားအနေကဇာတင်ခြင်း အခမ်းအနားကို ယနေ့ ဇူလိုင်လ ၅ ရက်တွင် ကျင်းပခဲ့သည်။

အခမ်းအနားတွင် ပထမပိုင်း(ပရိကမ္မမင်္ဂ လာ) အရ ဒါန၊ သီလ၊ ဘာဝနာ ကုသိုလ်မှုဆည်းပူးခြင်း၊ ဒုတိယပိုင်း(ဆတ္တာရောဟဏ မင်္ဂလာ) ရတနာစိန်ဖူးတော်၊ ငှက်မြက်နားတော် အထွဋ်တင်လှူပူဇော်ခြင်းနှင့် တတိယပိုင်း(ဗုဒ္ဓဘိသေက မင်္ဂလာ) ဗုဒ္ဓဘိသေက အနေကဇာတင် ပူဇော်ခြင်းတို့ဖြင့် ကျင်းပခဲ့ကြောင်းသိရသည်။

မန္တလေးတောင်တော် ဆုတောင်းပြည့်ဘုရားစေတီတော်မြတ်ကြီးအား ၂၀၂၂ ခုနှစ်၊ ဇူလိုင်လ ၁၁ရက်က ရွှေသင်္ကန်းကပ်လှူပြီးစီးခဲ့ပြီးဖြစ်ကာ ယခုဇူလိုင်လ ၅ ရက်တွင် စေတီတော်ကြီးနှင့် အရံစေတီတော် လေးဆူတို့အား စိန်ဖူးတော်နှင့် ငှက်မြက်နားတော်များ ကပ်လှူပူဇော်ခဲ့ကြတာဖြစ်ပြီး စိန်ဖူးတော်ထိပ်တွင် စိန်အစစ်ချွန်းတစ်ပွင့်၊ တွင်းထွက် " မြ " ရတနာ(၄၉)ပွင့်၊ စိန်ဖူးတော်၊ ငှက်မြက်နားတော်တို့တွင် စိန်၊ ရွှေ၊ ပတ္တမြား၊ နီလာရတနာများ တပ်ဆင်ပူဇော်ခဲ့ကြကြောင်းသိရသည်။

ymg /NN
#Yangon_Media_Group