#Local_News
Published_ 23 October 2022

အားကောင်းသောမုန်တိုင်းငယ် (Deep Depression)၏ အရှိန်ကြောင့်မြန်မာနိုင်ငံ နေရာအချို့တွင်လေပြင်းတိုက်ခတ်ခြင်းနှင့်အတူ မိုးသည်းထန်စွာရွာသွန်းခြင်း၊ လျှပ်တစ်ပြက်ရေကြီးခြင်း၊ မြေပြိုခြင်းများ ဖြစ်ပေါ်နိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန က အောက်တိုဘာလ(၂၃)ရက် နေ့လယ်ပိုင်းတွင် သတိပေးချက်ထုတ်ပြန်လိုက်သည်၊၊

ယင်းကြောင့် ကုန်းမြင့်ဒေသအနီးတွင် နေထိုင်ကြသူများအနေဖြင့် မြေပြိုမှုအန္တရာယ် ၊ မြစ်ငယ်၊ ချောင်းငယ်များအနီးတွင်နေထိုင်ကြသူများအနေဖြင့် ရေကြီး၊ ရေလျှံမှု အန္တရာယ်များ ဖြစ်ပေါနိုင်သည့်အတွက် သတိပြုနေထိုင်ကြရန်နှင့် ပြည်တွင်းလေကြောင်းပျံသန်းရေး၊ မြန်မာ့ကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်များ၊ သင်္ဘောများအနေဖြင့်လည်း ကြိုတင်သတိပြုကြရန် အဆိုပါ ထုတ်ပြန်ချက်တွင် ထည့်သွင်းသတိပေးထားသည်။

အားကောင်းသောမုန်တိုင်းငယ်(Deep Depression)၏ အရှိန်ကြောင့်အောက်တိုဘာလ (၂၃) ရက်မွန်းလွဲမှအောက်တိုဘာခလ (၂၆)ရက်အတွင်း စစ်ကိုင်းတိုင်းဒေသကြီး ၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး ၊ ကချင်ပြည် နယ်၊ ချင်းပြည်နယ်နှင့် ရခိုင်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ပြီး အချို့ဒေသများတွင် ဒေသအလိုက်နှင့် နေရာကွက်၍ မိုးကြီးခြင်းများ ဖြစ်ပေါ်နိုင်ကြောင်းလည်း သိရသည်၊၊

ယင်းအပြင် မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့တွင် မကြာခဏ မိုးသက်လေပြင်းများကျရောက်ပြီး လှိုင်းကြီးရာမှ လှိုင်းအလွန်ကြီးမည်ဖြစ်ကာ မုတ္တမကွေ့၊ မွန်-တနင်္သာရီ ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်း များ ကျရောက်၍ လှိုင်းကြီးနိုင်ကြောင်းလည်း မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

အဆိုပါ အားကောင်းသောမုန်တိုင်းငယ်(Deep Depression)မှာ အနောက်မြောက်ဘက်သို့ ရွေ့လျားနိုင်ပြီး၊ နောက်(၁၂)နာရီအတွင်း ဘင်္ဂလားပင်လယ်အော်အလယ်ပိုင်း၌ ဆိုင်ကလုန်းမုန်တိုင်း (Cyclonic Storm)အဖြစ်သို့ အားကောင်းလာနိုင်ပြီး မြောက်-အရှေ့မြောက်ဘက်သို့ကွေ့ကာ အောက်တိုဘာလ (၂၅)ရက်တွင် ဘင်္ဂလားဒေ့ရှ် နိုင်ငံကမ်းခြေကို တင်ကိုနာကျွန်း(Tinkona Island)နှင့် ဆန်းဝစ်(ပ်)ကျွန်း(Sandwip Island)တို့အကြားမှ ဖြတ်ကျော်ဝင်ရောက်နိုင်မည်ဟုလည်း ခန့်မှန်းထားကြောင်းသိရသည်၊၊

ymg/tthl
#Yangon_Media_Group

#Myanmar_News
Published 23 Oct 2022

ရန်ကုန်တိုင်းဒေသကြီး ၄၅ မြို့နယ်ရဲ့ အခြေခံလူဦးရေ လစဉ်စိစစ်တိုက်ဆိုက်မှုနှင့် အဆိုပြုမဲရုံတွေ လျာထားသတ်မှတ် ခြင်းလုပ်ငန်း ဆောင်ရွက်ပြီးစီးသွားပြီးဖြစ်တယ်လို့ သက်ဆိုင်ရာရဲ့ သတင်းထုတ်ပြန်ချက်အရသိရပါတယ်။

အဆိုပါလုပ်ငန်းနှစ်ရပ်ကို အောက်တိုဘာ ၁၂ရက်က စတင်ဆောင်ရွက်ခဲ့ရာမှာ အောက်တိုဘာ ၂၀ရရက်မှာ ပြီးစီးခဲ့တာ ဖြစ်တယ်လို့ သတင်းထုတ်ပြန်ချက်မှာ ဖော်ပြထားပါတယ်။

ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးအောင်စောဝင်းနှင့် ဦးစောဘလှိုင်တို့ ဦးစီးသည့်အဖွဲ့က အခြေခံလူဦးရေစာရင်း တိုက်ဆိုင်စိစစ်ထားရှိမှုအခြေအနေများနှင့် အဆိုပြုမဲရုံလျာထားချက်များကို စိစစ်အတည်ပြု သတ်မှတ်ခြင်းများ ဆောင်ရွက်ခဲ့ကြတာဖြစ်ပါတယ်။

၂၀၂၂ ခုနှစ် ဩဂုတ်လနှင့် စက်တင်ဘာလ အခြေခံလူဦးရေစာရင်း တိုက်ဆိုင်စိစစ်တွေ့ရှိချက်များအရ ရန်ကုန်တိုင်း ဒေသကြီး ၄၅ မြို့နယ်၏ မြေပြင်တွင် နေထိုင်သူဦးရေစာရင်းတွင် ၁၅၃၆၂ ဦး၊ ဥပဒေနှင့်အညီ နေထိုင်သူစာရင်းတွင် ၈၅၆၅ ဦး၊ နိုင်ငံသားကတ်ရှိသူစာရင်းတွင် ၁၃၅၅၀ အသီးသီး အရေအတွက်တိုးလာတယ်လို့လည်း သတင်းထုတ်ပြန်ချက်က ဆိုပါတယ်။

လာမယ့် ၂၀၂၃ ခုနှစ်အတွင်း အထွေထွေရွေးကောက်ပွဲတစ်ရပ်ကျင်းပနိုင်ရေး ပြည်ထောင်စုရွေးကောက်ပွဲကော်မရှင်က ဦးတည်ဆောင်ရွက်နေတာဖြစ်ပြီး အဲဒီအတွက် လိုအပ်တဲ့ ပြင်ဆင်မှုတွေရဲ့ တစ်စိတ်တစ်ပိုင်းအဖြစ် အဆိုပါလုပ်ငန်းတွေ ကို ဒေသအလိုက်ဆောင်ရွက်နေတာဖြစ်ပါတယ်။

Ymg/knl
#Myanmar
#Myanmar_General_Election
#UEC
#Yangon_Media_Group

Published 23 October 2022

နာမည်ကျော် ခွန်အားဖြည့် အချိုရည် Red Bull ရက်ဒ်ဘူး ကုမ္ပဏီ တည်ထောင်သူနှင့်ပိုင်ရှင်ဩစတြီးယား ဘီလျံနာ ဒီထရစ်မက်တက်ရှစ်ဟာ ကင်ဆာရောဂါဝေဒနာ အသည်းအသန်ခံစားခဲ့ရပြီးနောက် စနေနေ့ အောက်တိုဘာ ၂၂ရက် နေ့မှာ အသက် ကွယ်လွန်သွားပြီဖြစ်ပြီး ကွယ်လွန်ချိန်မှာ သူဟာ အသက် (၇၈)နှစ်ရှိပြီဖြ်ပါတယ်။

သူသေဆုံးမှုကို ရက်ဒ်ဘူးဖော်မျူလာဝမ်းအဖွဲ့က အတည်ပြုပါတယ်။

သူဟာ ဆီးရီးယားတွင်မွေးဖွားခဲ့ပြီး ရက်ဒ်ဘူး ခွန်အားဖြည့်အချိုရည်ကို တစ်ကမ္ဘာလုံးမှာ စိုးမိုးသွားနိုင်တဲ့အထိ လုပ်ဆောင်နိုင်ခဲ့ပြီး သူဟာ ဩစတြီးယားရဲ့ အချမ်းသာဆုံးပုဂ္ဂိုလ်လို့သတ်မှတ်ခံထားရသူဖြစ်ပါတယ်။

မက်တက်ရှစ်ရဲ့ ကြွယ်ဝချမ်းသာမှုဟာ ယူရို ယူရို ၂၅ ဘီလျံ( အမေရိကန်ဒေါ်လာ ၂၅.၆၄ ဘီလျံ) ရှိပြီး သူဟာ ဖော့ဘ်မဂ္ဂဇင်းရဲ့ ကမ္ဘာ့အချမ်းသာဆုံးပုဂ္ဂိုလ်များစာရင်းမှာ အမှတ်စဉ် ၅၁ ချိတ်ထားသူလည်းဖြစ်ပါတယ်။

ကိုယ်တိုင်ကြိုးစားပြီး ဘီလျံနာဖြစ်လာတဲ့သူဟာ ဈေးကွက်ဂုရုကြီးအဖြစ် သတ်မှတ်ခံထားရသူဖြစ်ပါတယ်။ ဗီယင်နာက ကမ္ဘာ့ကုန်သွယ်ရေးတက္ကသိုလ်ဘွဲ့ရပြီးနောက် သူဟာ ၁၉၇၀ဝန်းကျင်မှာ ကုမ္ပဏီတော်တော်များများမှာ ဈေးကွက် ကျွမ်းကျင်သူတစ်ဦးအဖြစ် အလုပ်လုပ်ခဲ့ပါတယ်။

သူဟာ အာရှကို လုပ်ငန်းကိစ္စ ခရီးတွေလာခဲ့ပြီးနောက် သူဟာ ခွန်အားဖြည့် အချိုရည်ရဲ့ ဈေးကွက်ကို ကောင်းကောင်းသိသွားခဲ့ပါတယ်။ အဲဒီတုန်းက အဲဒီအချိုရည်မျိုးကို ဥရောပနှင့် အမေရိကန်နိုင်ငံတွေမှာ သိပ်ပြီး လူသိပ်မသိကြသေးပါဘူး။ ၁၉၈၃ ခုနှစ်မှာ သူဟာ အာရှမှာ ဒီလိုမျိုးအချိုရည်အတွက် လိုင်စင်တစ်ခုရယူခဲ့ပါတယ်။ တစ်နှစ်အကြာမှာ သူဟာ ထိုင်းက မိသားစု စီးပွားရေးလုပ်ငန်းရှင် တစ်ဦးဖြစ်တဲ့ ယိုးဗီဒရာနှင့်အတူ Red Bull GmbH ကို တည်ထောင်လိုက်ပါတော့တယ်။ သူဟာ အဲဒီကုမ္ပဏီမှာ ရှယ်ယာ ၄၉ ရာခိုင်နှုန်းရယူထားခဲ့ပါတယ်။

ထိုင်းရဲ့ ခွန်အားဖြည့်အချိုရည် စပ်နည်းဖော်မျူလာကို သူဟာ ပြုပြင်မွမ်းမံပြီးနောက် ဈေးကွက် သဘောတရာတးစ်ခုကို ဖန်တီးခဲ့ပါတယ်။ Red Bull ကို ၁၉၈၇ ခုနှစ်မှာ သူဟာ ဈေးကွက်မှာ စတင်ရောင်းချခဲ့ပါတယ်။ ကာဘွန်ဒိုင်အောက်ဆိုဒ် ထည့်ထားလို့ အမြှပ်ထနေပြီး ချိုတဲ့အရသာရှိတဲ့ အဲဒီအချိုရည်ဟာ ဈေးကွက်ထဲ ခက်ခက်ခဲခဲဝင်ရောက်ခဲ့ရပြီးနောက်  နောက်ဆုံးမှာ ကမ္ဘာလုံးဆိုင်ရာဈေးကွက် ဦးဆောင်သူဖြစ်လာပါတော့တယ်။

၂၀၂၁ခုနှစ်မှာ ကုမ္ပဏီအုပ်စုဟာ ငွေကြေးအနုတ်အသိမ်း ဒေါ်လာ ၇,၈ ဘီလျံအထိအောင်မြင်မှုရရှိလာခဲ့ပြီး တစ်ကမ္ဘာလုံးကို ၉.၈ ဘီလျံ အချိုရည်ဘူးတွေ ရောင်းချနိုင်ခဲ့ပါတယ်။သူ့ရဲ့ အရေးကြီးတဲ့ အောင်မြင်မှုမှတ်တိုင်က ၁၉၉၀ ပြည့်လွန်နှစ်တွေမှာ အမေရိကန်ဈေးကွက်ထဲ ထိုးဖောက်ခဲ့ရတာဖြစ်ပါတယ်။ ဒီကနေ့ အမေရိကန်ပြည်ထောင်စုမှာ အချိုရည်သုံးဘူးရောင်းရတိုင်း တစ်ဘူးမှာ Red Bull ဖြစ်သည်အထိ အောင်မြင်နေပါတယ်။

သူရဲ့ ကိုယ်ပိုင်ဘဝကို သိသူနည်းလှပါတယ်။ သူဟာ လူရှေ့သူရှေ့သိပ်မထွက်ဘဲ အင်တာဗျူးလည်း ပေးခဲလှပါတယ်။ သူဟာ သူ့ရဲ့ နှစ်ရှည်တွဲတဲ့ ချစ်သူအမျိုးသမီးနှင့်အတူ ဆားဘတ်မြို့မှာ နေထိုင်ခဲ့ပါတယ်။ လွန်ခဲ့တဲ့နှစ်များစွာက သူဟာ တစ်ရက်ကို အနည်းဆုံး Red Bull ၁၀ဘူးကနေ ၁၂ ဘူးအထိသောက်ခဲ့တယ်လို့ ကြားဖူးပါတယ်။

သူသေဆုံးသွားပြီးနောက် the Red Bull အင်ပါယာအပေါ် ဘယ်လိုအကျိုးသက်မယ်ဆိုတာ သိပ်မရှင်းလင်းပါဘူး။ သူရဲ့ တစ်ဦးတည်းသောသား အသက် ၃၀ အရွယ် မာ့ခ်ဟာ သူ့ဖခင်ရဲ့ ရင်းနှီးမြှပ်နှံမှုကုမ္ပဏီတွေထဲက တစ်ခုမှာ မန်းနေဂျင်း ဒါရိုက်တလုပ်နေပါတယ်။ သားဖြစ်သူ မာ့ခ်ဟာ သူ့အရိုက်အရာကို ဆက်ခံနိုင်ဖွယ်ရှိနေတယ်လို့ရိုက်တက သတင်းရေးသားပါတယ်။

Source Reuters

#Dietrich_Mateschitz

#Red_Bull

#Richest_man_in_Austria

#LocalNews
Published_23 October 2022

ပုဂံဒေသတွင် မိုးပျံပူဖောင်း ပျံသန်းမှုကို ပြီးခဲ့သည့် ရက်ပိုင်းက စတင်ခဲ့ကြောင်း Balloons Over Bagan က တရားဝင် ရေးသားဖော်ပြထားသည်။

ယင်းတွင် Balloons Over Bagan အနေဖြင့် ယခုနှစ်ပွင့်လင်းရာသီ၏ ပျံသန်းမှုကို မကြာသေးခင်ရက်များက စတင်ခဲ့ပြီဖြစ်ကြောင်း၊ပုဂံဒေသ၏ ရှုမျှော်ခင်း၊ မြင်ကွင်းများမှာလည်း ယခင်အတိုင်း အရင်လို ဆွဲဆောင်မှုတွေ အပြည့်ရှိနေဆဲဖြစ်ကြောင်း၊ယင်းကြောင့် မြန်မာတို့၏ နှစ်ပေါင်းထောင်ချီ သမိုင်းကြောင်းရှိသည့် ရာဇဝင်အမွေအနှစ်ရှိရာ ပုဂံဒေသကောင်းကင်ယံ၌ Balloons Over Bagan နှင့် စီးနင်းလွင့်မျောရင်း ပုဂံ ၏ အလှ၊ ပုဂံ၏ဘဝကို ကိုယ်တိုင်ဝင်ရောက်ခံစားနိုင်ရန် ဖိတ်ခေါ်ကြောင်း ရေးသားထားသည်။

မိုးပျံပူဖောင်း ပျံသန်းမှုများတွင် လိုက်ပါစီးနင်းသည့် ဧည့်သည်များမှာ နိုင်ငံခြားခရီးသွား အများစု ဖြစ်ကြောင်း၊ပြီးခဲ့သည့် ၂၀၂၀ ပြည့်နှစ် ကိုဗစ်ကပ်ရောဂါ ဖြစ်ပွားမှု နောက်ပိုင်း နှင့် ၂၀၂၁ ခုနှစ်၏ နိုင်ငံရေးအပြောင်းအလဲများကြောင့် ပြည်တွင်းသို့လာရောက်လည်ပတ်သည့် ပြည်ပခရီးသွားများ လျော့ကျသွားကြောင်း ဟိုတယ်နှင့် ခရီးသွားလာရေးဝန်ကြီးဌာနက သတင်းထုတ်ပြန်ထားသည်။

မြန်မာနိုင်ငံတွင် ၂၀၂၁ ခုနှစ်၊ အောက်တိုဘာလမှစ၍ ကိုဗစ်-၁၉ ကပ်ရောဂါ ပြန့်ပွားမှု အခြေအနေ လျော့နည်းလာခဲ့သောကြောင့် ပြည်တွင်းခရီးသွားလာမှုများ စတင်တိုးတက်လာခဲ့ပြီး ၂၀၂၂ ခုနှစ်၊ ဧပြီလ ၁၇ ရက်နေ့မှ စတင်ကာ နိုင်ငံတကာလေကြောင်းလိုင်းများ ပြန်လည်ခွင့်ပြုပေးခဲ့ရာ ကမ္ဘာလှည့် e-Visa ကို ၂၀၂၂ ခုနှစ်၊ မေ ၂၀ ရက်က စတင်ခွင့်ပြုခဲ့ပြီးဖြစ်ကြောင်းလည်း သိရသည်။

ymg/mt
#Travel_Bagan
#Balloons_Over_Bagan
#Yangon_Media_Group

#Myanmar_News
Published 23 October 2022

မြန်မာနိုင်ငံ အထင်ကရလေဆိပ်များ နှင့် လုမ္ဗိနီအကြား လေကြောင်းတိုက်ရိုက်ပျံသန်းရေး မြန်မာနှင့် နီပေါနိုင်ငံတို့ ဆွေးနွေးမှုတွေ ပြုလုပ်ခဲ့ကြတယ်လို့သိရပါတယ်။

နေပြည်တော်၊ရန်ကုန်နှင့် မန္တလေးအပြည်ပြည်ဆိုင်ရာ လေဆိပ်များနှင့် လုမ္ဗိနီ အပြည်အပြည်ဆိုင်ရာ လေဆိပ်အကြား တိုက်ရိုက်လေကြောင်းပျံသန်းဖို့နှင့် ခရီးသွားလုပ်ငန်းတိုးတက်လာမှုအပေါ်မူတည်ပြီး နောင်မှာ လုမ္ဗိနီ-ဂါယာ- ရန်ကုန်/ မန္တလေး/နေပြည်တော် လေကြောင်းခရီးစဉ်တွေ တိုးချဲ့ပျံသန်းရေးအတွက် ဆွေးနွေးမှုတွေပြုလုပ်နေတာဖြစ်ပါတယ်။

မြန်မာနိုင်ငံ ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချူပ်ကြီး တင်အောင်စန်းဟာ မကြာသေးမီက အသစ်ခန့်အပ်ခံရတဲ့ မြန်မာနိုင်ငံဆိုင်ရာ နီပေါနိုင်ငံသံအမတ်ကြီး Mr. Harishchandra Ghimire တို့ဟာ အောက်တိုဘာ ၂၂ရက်က နေပြည်တော် ဝန်ကြီးရုံးမှာ အဆိုပါကိစ္စတွေ တွေ့ဆုံဆွေးနွေးခဲ့ကြတာဖြစ်တယ်လို့ နစကရဲ့ သတင်းထုတ်ပြန်ချက်အရသိရပါတယ်။

အဲဒီအပြင် ပို့/ဆက်ဝန်ကြီးဟာ သံအမတ်ကြီးနှင့်တွေ့ဆုံစဉ် လေကြောင်းသဘောတူစာချုပ်အသစ်တစ်ရပ်ချုပ်ဆိုရေး၊ ဒေသထွက်ကုန်များ အပြန်အလှန်တင်ပို့နိုင်ရေးနှင့် နီပေါနိုင်ငံတွင်းရှိ ပြည်တွင်းရေကြောင်းပို့ဆောင်ရေးလုပ်ငန်းများ ပူးပေါင်းဆောင်ရွက်ရေးတွေကိုပါ ဆွေးနွေးမှုတွေပြုလုပ်ခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

မြန်မာနိုင်ငံနှင့် နီပေါနိုင်ငံတို့ဟာ ဗုဒ္ဓဘာသာဝင်အများစုနေထိုင်ကြတဲ့ နိုင်ငံများဖြစ်ပြီး ဗုဒ္ဓဘာသာနှင့် ယဉ်ကျေးမှုအမွေအနှစ်များက ဆက်စပ်တည်ရှိနေကြတဲ့အတွက် ဂေါတမမြတ်စွာဘုရားအရှင် ဖွားမြင်တော်မူရာဒေသဖြစ်တဲ့ လုမ္ဗိနီတို့အကြား၊ ယင်းနှင့်ဆက်စပ်လျက် အိန္ဒိယနိုင်ငံ ဗုဒ္ဓအမွေအနှစ် ဂါယာတို့ကိုပါ ချိတ်ဆက် လေကြောင်းပျံသန်းမှုတွေကို ခရီးသွာလုပ်ငန်းဖွံ့ဖြိုးတိုးတက်ရေးအတွက် စဉ်စားလာကြတာဖြစ်ပါတယ်၊

-ymg.knl
#Myanmar_Tourism
#Myanmar_Nepal_Flight
#Yangon_Media_Group

#LocalNews
Published_23 October 2022

အာရှလမ်းပေါ်တွင် ပိတ်မိနေသော ထိုင်းနိုင်ငံကို သွားရောက်မည့်အလုပ်သမားများပါ မော်တော်ယာဉ်များ၊ကုန်တင်ယာဉ်များ ပြန်လည်သွားလာခွင့်ရပြီဖြစ်ကြောင်း အလုပ်သမား ပို့ဆောင်ရေးအေဂျင်စီများက သိရသည်။

"မနေ့က ညနေ ၄ နာရီလောက်ကပဲ စပြီးတော့ လမ်းပွင့်သွားတာပါ။ မြဝတီ ကော့ကရိတ် ဘားအံ တွေမှာ ပိတ်မိနေတဲ့ မော်တော်ယာဉ်တွေ ဖြစ်ပါတယ်။ပြီးခဲ့တဲ့ အောက်တိုဘာလ ၁၈ ရက်နေ့ကပဲ တိုက်ပွဲဖြစ်နေလို့ လမ်းတွေ ပိတ်မိနေတာပါ။အခုတော့ ပွင့်သွားပြီ"ဟု အဆိုပါ အေဂျင်စီတာဝန်ရှိသူက ပြောသည်။

ပိတ်မိနေသည့် အထဲတွင် ထိုင်းနိုင်ငံသို့ MoU ဖြင့် သွားရောက်ကြမည့် မြန်မာအလုပ်သမား ၁၅၀၀ ကျော်ခန့်ပါဝင်ခဲ့သောကြောင့် နောင်တွင် အလုပ်သမားပို့ဆောင်မည်ဆိုပါက မြေပြင်သတင်းအချက်များကို ရယူလေ့လာပြီးမှသာပို့ဆောင်ကြရန် မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ် (MEAF) က တိုက်တွန်းထားသေးသည်။

ထိုင်းနိုင်ငံကို သွားကြမည့် မြန်မာ MoU အလုပ်သမားများအနေဖြင့် မြဝတီ-မဲဆောက် ချစ်ကြည်ရေး အမှတ် (၂) တံတား နှင့် ကော့သောင်း-ရနောင်း ရေလမ်းကြောင်းများက တစ်ဆင့် သွားရောက်ကြခြင်း ဖြစ်ကြောင်းလည်း သိရသည်။

ymg/mt
#Yangon_Media_Group

#LocalNews
Published _23 October 2022

ဘင်္ဂလားဒေ့ရှ်နိုင်ငံဘက်သို့ တင်ပို့ရောင်းချမည့် ရွှေများ တင်ဆောင်ထားသော လောင်းလှေတစ်စီးကို ရခိုင်ပြည်နယ် မောင်တောမြို့ မောင်နီရပ်ကွက်အနောက်တောင်ဘက် ချောင်းပေါက်ဝ ဒီရေတောအတွင်း ဖမ်းဆီးရမိခဲ့ကြောင်း ရခိုင်ပြည်နည် အစိုးရအဖွဲ့က သိရသည်။

"ရွှေမှောင်ခိုလုပ်ငန်းလုပ်ကိုင်သူတွေက မောင်တောကနေ ဘင်္ဂလားဒေ့ရှ်နိုင်ငံကိုတရားမဝင်ပို့ဖို့ ရှိတာကို အောက်တိုဘာလ ၂၁ ရက်က သတင်းရလို့ စစ်ဆေးခဲ့တာဖြစ်ပါတယ်။အဲဒီမှာ ဖမ်းမိတာပါပဲ"ဟု အစိုးရအဖွဲ့ တာဝန်ရှိသူကပြောသည်။

သတင်းရသောကြောင့် နယ်စပ်ဝင်၊ထွက်စခန်းမှ တာဝန်ရှိသူများ ပူးပေါင်း၍ နတ်မြစ်ကမ်းခြေတစ်လျှောက် ဒီရေတောများအတွင်းရှိ ချောင်းပေါက်ငယ်များတွင် ရှာဖွေစစ်ဆေးခြင်းများဆောင်ရွက်ခဲ့ရာ ဒီရေတောများအတွင်း ဖုံးကွယ်ကမ်းထိုး ထားသည့် လောင်းလှေတစ်စီးကို တွေ့ရှိခဲ့ခြင်းဖြစ်ပြီး လောင်းလှေ၏ပဲ့ပိုင်း ဝမ်းအတွင်းရှိ အင်ဂျင်ဝိုင်ဘူးအတွင်းမှ ရွှေထည်ပစ္စည်းမျိုးစုံ ၁၅၈ မျိုး၊ အလေးချိန် ၁ ပိဿာ ၇ ကျပ်သားခန့်၊ ကာလတန်ဖိုးကျပ် ၂၅၆၈ သိန်းကို ပိုင်ရှင်မဲ့ သိမ်းဆည်းရမိခဲ့ကြောင်း သိရသည်။

အဆိုပါ သိမ်းဆည်းရမိ လောင်းလှေနှင့် ရွှေထည်ပစ္စည်းများကို ဥပဒေနှင့်အညီ ပြည်သူပိုင်ဘဏ္ဍာအဖြစ် သိမ်းဆည်းသွားမည်ဖြစ်ကြောင်းလည်း သတင်းရရှိသည်။

ymg/mt
#Yangon_Media_Group

#Local_News

Published_ 23 October 2022

၂၀၂၂ ခုနှစ်၊ နှစ်လယ် မြန်မာ့ကျောက်မျက်ရတနာပြပွဲ စတုတ္ထနေ့ကို နေပြည်တော် ရှိ မဏိရတနာ ကျောက်စိမ်းခန်းမ၌ ဆက်လက်ကျင်းပရာ ကျောက်မျက်အတွဲပေါင်း ၅၅ တွဲ ရောင်းချရကြောင်း သိရပါတယ်။

ဒီကနေ့တွင် ကျောက်မျက်အတွဲအမှတ် ၁ မှ အတွဲအမှတ် ၁၂၀ အထိ တင်သွင်းထားသော ဈေးနှုန်းတင်သွင်းလွှာများကို တာဝန်ရှိသူများက တင်ဒါအမှတ် ၁ နှင့် တင်ဒါ အမှတ် ၂ ထဲသို ထည့်သွင်းပြီး နံနက် ၉ နာရီတွင် ဖွင့်ဖောက်စစ်ဆေးကာ ကျောက်မျက် အတွဲပေါင်း (၅၅) တွဲ ရောင်းချရကြောင်း ကြေညာခဲ့ပါတယ်။

ပြပွဲပဉ္စမနေ့တွင် ကျောက်စိမ်းအတွဲအမှတ် ၁ မှ အတွဲအမှတ် ၇၅၀ ကို အိတ်ဖွင့် တင်ဒါစနစ်ဖြင့် ပြည်တွင်း၊ ပြည်ပရတနာကုန်သည်များအား ဆက်လက်ရောင်းချပေးသွားမည်ဖြစ်ကြောင်း သိရပါတယ်။
ယခုကျင်းပပြုလုပ်တဲ့ နှစ်လယ်မြန်မာ့ကျောက်မျက်ရတနာပြပွဲကို အောက်တိုဘာ ၁၉ ရက်မှ စတင်၍ ၂၅ ရက်အထိ ကျင်းပနေခြင်းဖြစ်ပြီး ပြပွဲတွင် ပုလဲအတွဲပေါင်း ၄၀၀ အနက်မှ စုစုပေါင်း ပုလဲအတွဲပေါင်း ၃၆၂ တွဲနှင့် ကျောက်မျက်အတွဲ ၁၂၀ အနက်မှ အတွဲပေါင်း ၅၅ တွဲ ရောင်းချခဲ့ရပြီး ကျောက်စိမ်းအတွဲ ၂၁၅၀ တို့ကို ၂၃ ရက်မှ ၂၅ ရက်နေ့များတွင် အိတ်ဖွင့်တင်ဒါစနစ်ဖြင့် ဆက်လက် ရောင်းချပေးသွားမှာ ဖြစ်ပါတယ်။

ကျောက်မျက်အတွဲများနှင့် ကျောက်စိမ်းအတွဲများကို ကြမ်းခင်းဈေးယူရိုငွေဖြင့် သက်မှတ်ထားပြီး ရတနာကုန်သည်များအနေဖြင့် ငွေပေးချေရာတွင် အမေရိကန် ဒေါ်လာ၊ ယူရို၊ ယွမ်၊ ဘတ် နှင့် ကျပ်ငွေများဖြင့် ပေးချေနိုင်ကြောင်း သိရပါတယ်။

ygm_mnn
#Yangon_Media_Group

#World_Health
Published 23 October 2022

ရှားပါးလွန်းလှတဲ့ သွေးအမျိုးအစားတစ်မျိုးဟာ တစ်ကမ္ဘာလုံးမှာမှ ၄၃ ယောက်ပဲရှိပြီး ၉ ယောက်ကသာ သွေးလှူဒါန်းနိုင်ပါတယ်။

အဆိုပါသွေးအမျိုးအစားကို Rhnull လို့ခေါ်ပြီး ရှားပါးတန်ဖိုးမြင့်လွန်းတဲ့အတွက် ရွှေသွေးလို့တောင် တင်စားကြပါတယ်။

ဒီသွေးက ဘာလို့အလွန်ရှားပါးသလဲဆိုတာကို နားလည်နိုင်ရန် သွေးအမျိုးအစားများအကြောင်း အနည်းငယ်သိထားဖို့ လိုပါတယ်။

သွေးအမျိုးအစား ၄ မျိုးထဲမှာ အေ-သွေးက သက်တမ်းအစောဆုံးဖြစ်ပြီး ပထမဦးဆုံးလူသားရယ်လို့ ဖြစ်လာကတည်းက တည်ရှိခဲ့ပါတယ်။

ဘီ-သွေးက လွန်ခဲ့တဲ့နှစ် ၃.၅ သန်းခန့်က သွေးနီဥမျက်နှာပြင်ပေါ်က အချိုဓာတ်တစ်မျိုးကနေ မျိုးရိုးဗီဇပြောင်းလဲဖြစ်ပေါ်လာခဲ့ပါတယ်။

အို-သွေးကတော့ လွန်ခဲ့တဲ့နှစ် ၂.၅ သန်းခန့်က မျိုးဗီဇပြောင်းလဲဖြစ်ပေါ်လာကာ အေ-သွေးနဲ့ ဘီ-သွေးလိုမျိုး အချိုဓာတ်မတွေ့ရပါဘူး။

လွန်ခဲ့တဲ့နှစ်များက အချိုဓာတ် ၂ မျိုးစလုံးပါဝင်တဲ့ အေဘီ-သွေးအမျိုးအစား ပေါ်ပေါက်ခဲ့ပါတယ်။

သွေးအမျိုးအစားတွေကို ဆဲလ်မျက်နှာပြင်ပေါ်က အန်တီဂျင်များနဲ့ခွဲခြားကာ သူတို့နဲ့သဟဇာတမဖြစ်တဲ့ အရာနဲ့တွေ့ရင် တုံ့ပြန်တတ်တဲ့သဘောရှိပါတယ်။

အေ-သွေးမှာ အန်တီဂျင်-အေ၊ ဘီ-သွေးမှာ အန်တီဂျင်-ဘီ၊ အေဘီ-သွေးမှာ အန်တီဂျင်-အေနဲ့ဘီ အသီးသီးပါဝင်ကာ အို-သွေးမှာ နှစ်မျိုးစလုံးမပါဝင်ပါဘူး။

ဒါ့အပြင် ရီးဆပ်စ်လို့ခေါ်တဲ့ ပရိုတိန်း ရှိခြင်း/မရှိခြင်းအပေါ်မူတည်ပြီး သွေးနီဥတွေကို ခွဲခြားနိုင်ပါတယ်။

ရှိခဲ့ရင် သွေးအမျိုးအစားဘေးမှာ (+) သင်္ကေတထည့်ထားပြီး မရှိရင် (-) သင်္ကေတထည့်ထားပါတယ်။

ပထမဆုံး ရွှေသွေးကို ၁၉၆၁ ခုနှစ်က ဩစတြေးလျမှာမွေးဖွားခဲ့တဲ့ အမျိုးသမီးတစ်ဦးမှာ တွေ့ရှိခဲ့ပါတယ်။

အဲဒီနောက်ပိုင်း လူအချို့မှာလည်းတွေ့ခဲ့ရကာ ကမ္ဘာတဝှမ်းရှိလူပေါင်း ၆ သန်းမှာ တစ်ဦးနှုန်းရှိနိုင်တယ်လို့ ခန့်မှန်းလိုက်ပါတယ်။

သေချာမသိရှိကြပေမယ့် ၄၃ ဦးရှိမယ်လို့ ဖော်ပြခဲ့ကြပါတယ်။

ထိုသွေးမှာ ခုခံအားကနေ တုံ့ပြန်မယ့် အန်တီဂျင်တွေမပါဝင်တာကြောင့် မည်သူ့ကိုမဆို သွေးလှူနိုင်မှာဖြစ်ပြီး သွေးသွင်းကုသတဲ့နေရာမှာ အလွန်အလားအလာရှိနေပါတယ်။

ရီးယပ်စ်ရောဂါအတွက် အသုံးပြုတဲ့ ဆေးတွေဟာ ကိုယ်ဝန်ဆောင်တွေမှာ သန္ဓေသားရဲ့သွေးဆဲလ်တွေကို တိုက်ခိုက်တဲ့နေရာမျိုးမှာလည်း ထိုသွေးအမျိုးအစားကို အသုံးပြုနိုင်ပါတယ်။

Source: The Jerusalem Post
#Yangon_Media_Group

#World_Science
Published 23 October 2022

ခြင်တွေဟာ အချို့သောလူတွေနောက်သာ လိုက်ကိုက်လေ့ရှိခြင်းက လူတွေရဲ့ ခန္ဓာကိုယ်အနံ့နဲ့ ဆက်စပ်နေနိုင်တယ်လို့ Cell ဂျာနယ်မှာ ဖော်ပြထားကြပါတယ်။

သုတေသီများရဲ့ဖော်ပြချက်အရ လူတစ်ဦးချင်းစီဟာ ခန္ဓာကိုယ်အနံ့များရှိပြီး ပါဝင်တဲ့ ဓာတုဒြပ်ပေါင်းများကြောင့် ခြင်ကိုက်လေ့ရှိ/မရှိ ကွာခြားသွားတာဖြစ်ပါတယ်။ တွေ့ရှိချက်အရ အရေပြားကနေ ကာဘောက်ဆလစ်အက်ဆစ်များပြားစွာ ထွက်ရှိသူတွေကို ခြင်ပိုကိုက်လေ့ရှိပါတယ်။

ခန္ဓာကိုယ်အနံ့ဖြစ်စဉ်ကို သိပ္ပံပညာရှင်များက သုတေသနပြုပြီးဖြစ်ပေမယ့် ခြင်တွေကြိုက်နှစ်သက်တဲ့ အနံ့မျိုးကိုတော့ အတည်မပြုနိုင်သေးပါဘူး။

စာတမ်းပြုစုသူများက ဒီဖြစ်စဉ်ကို စမ်းသပ်မှုပြုလုပ်ဖို့ ပြင်ဆင်ခဲ့ကြကြောင်း Kingdom Supercultures ဇီဝနည်းပညာကုမ္ပဏီမှ သိပ္ပံပညာရှင်'မာရီယာအယ်လီနာဒီအိုဘယ်ဒီယာ'က ပြောပြခဲ့ပါတယ်။

ထို့နောက် စမ်းသပ်ခံသူ ၆၄ ဦးရဲ့လက်တွေမှာ အနည်းဆုံး ၆ နာရီကြာအောင် နိုင်လွန်လက်အိတ်များ ဝတ်ဆင်ခိုင်းကာ တစ်ယောက်ချင်းစီရဲ့အနံ့ကို စုပ်ယူခဲ့ပါတယ်။

နိုင်လွန်အစများကို ပိုင်းဖြတ်ကာ လူနှစ်ယောက်ရဲ့ နမူနာနှစ်ခုကို အေးဒီးစ်ခြင်မများရှိနေတဲ့ပုံးရဲ့ ပိုက်အဝတစ်ဖက်တစ်ချက်မှာ ထားလိုက်ပါတယ်။

အချို့လူတွေက ခြင်တွေပိုကြိုက်တဲ့အနံ့ရှိခဲ့ပြီး ထိုထဲမှ ၃၃ ဦးဟာ အခြားသူတွေထက် ခြင်တွေကို အဆ ၁၀၀ လောက် ပိုမိုဆွဲဆောင်စေပါတယ်။

ဒီလိုကွာခြားချက်ကို လေ့လာသုံးသပ်ခဲ့ရာမှာ ခြင်တွေပိုမိုကြိုက်နှစ်သက်တဲ့ လူတွေမှာ ကာဘောက်ဆလစ်အက်ဆစ်ဓာတ် ပမာဏများပြားစွာ ရှိနေတာကို တွေ့လိုက်ရပါတယ်။

အဆိုပါမော်လီကျူးများက အသားအရည်ကို စိုစွတ်စေပြီး အကာ အကွယ်ပေးပေမယ့် လူတွေက မတူညီတဲ့ပမာဏဖြင့် ထွက်ရှိနေကြပါတယ်။

နေထိုင်စားသောက်မှုပုံစံ၊ တစ်ကိုယ်ရည်သန့်ရှင်းမှု စတာတွေနဲ့ မသက်ဆိုင်ဘဲ ခြင်ကိုက်ခံရလေ့ရှိတဲ့ အခြေအနေဟာ လူတစ်ယောက်ရဲ့ခန္ဓာကိုယ်အနံ့နဲ့ တသက်လုံးသက်ဆိုင်နေမှာဖြစ်ပါတယ်။

Source: WION
#Yangon_Media_Group

Published 22 Oct 2022

FATF ဥက္ကဋ္ဌက  မြန်မာနိုင်ငံနှင့်ပတ်သက်သော အချက်အလက်များထုတ်ပြန်ခဲ့ရာတွင် အဆိုပါထုတ်ပြန်မှုအပေါ် မြန်မာနိုင်ငံတော်ဗဟိုဘဏ်က သတင်းထုတ်ပြန်ချက်တစ်ရပ်ထုတ်ပြန်ခဲ့ရာ အပြည့်အစုံမှာ အောက်ပါအတိုင်းဖြစ်ပါတယ်။

FATF ဥက္ကဋ္ဌ၏ မြန်မာနိုင်ငံနှင့်ပတ်သက်သော အချက်အလက်များ ထုတ်ပြန်မှုအပေါ် မြန်မာနိုင်ငံတော်ဗဟိုဘဏ်၏ သတင်းထုတ်ပြန်ချက်

၁။ ငွေကြေးဆိုင်ရာအရေးယူဆောင်ရွက်ရေးအဖွဲ့ (Financial Action Task Force-FATF) ၏ မျက်နှာစုံညီအစည်းအဝေးကို  ၂၀၂၂ခုနှစ်၊ အောက်တိုဘာလ ၂၀ ရက်နှင့် ၂၁ ရက်တို့တွင် FATF  ရုံးစိုက်ရာပြင်သစ်နိုင်ငံ၊ပဲရစ်မြို့၌ ကျင်းပခဲ့ပါသည်။ အဆိုပါအစည်းအဝေးများသို့ မြန်မာကိုယ်စားလှယ် အဖွဲ့ပါဝင်တက်ရောက်ခဲ့ပြီး နိုင်ငံတကာငွေကြေးရန်ပုံငွေအဖွဲ့၊ ကမ္ဘာလုံးဆိုင်ရာကွန်ရက်အဖွဲ့ဝင် ၁၀၆ ဦးနှင့် လေ့လာသူအဖွဲ့အစည်းများကို ကိုယ်စားပြုသော ကိုယ်စားလှယ်များ၊ ကုလသမဂ္ဂ၊ ကမ္ဘာ့ဘဏ်၊ INTERPOL နှင့် Egmont Group of Financial Intelligence Units တို့မှ ကိုယ်စားလှယ်များ တက်ရောက်ကြပါသည်။ မြန်မာနိုင်ငံနှင့်ပတ်သက်သော အချက်အလက်များကို FATF ဥက္ကဋ္ဌ T. Raja Kumar က ထုတ်ပြန်ခဲ့သည်။

၂။ မြန်မာနိုင်ငံအား တိုးမြှင့်စောင့်ကြည့်ခွင့်ရှိသည့် နိုင်ငံနှင့် ဒေသများစာရင်း (Jurisdictions under increased monitoring) မှ   စိစစ်ဆောင်ရွက်မှုများပြုလုပ်ရန် တောင်းဆိုခြင်းခံရသည့် အန္တရာယ် မြင့်မားမှုရှိသောနိုင်ငံနှင့် ဒေသများစာရင်း(High-Risk Jurisdictions subject to a Call for Action)သို့ ပြောင်းရွှေ့ထည့်သွင်းခြင်းခံရသော်လည်း လက်ရှိ Black List တွင် ရှိပြီးဖြစ်သည့် မြောက်ကိုရီးယားနိုင်ငံနှင့် အီရန်နိုင်ငံတို့ကဲ့သို့  FATF မှ အဖွဲ့ဝင်နိုင်ငံများနှင့် အခြားနိုင်ငံများမှ တိုးမြှင့်အရေးယူဆောင်ရွက်မှုများပြုလုပ်ရန် တောင်းဆိုခြင်းခံရသည့် နိုင်ငံနှင့်ဒေသများစာရင်း (Jurisdictions subject to a FATF call on its members and other jurisdictions to apply countermeasures) သို့ထည့်သွင်း၍ တန်းတူအရေးယူဆောင်ရွက်ခြင်းခံရမည့်အဆင့်မျိုး မဟုတ်ပါ ကြောင်းအသိပေးအပ်ပါသည်။

၃။ မြန်မာနိုင်ငံအပါအဝင် ကမ္ဘာပေါ်ရှိနိုင်ငံနှင့်ဒေသအားလုံးသည် FATF မှ ထုတ်ပြန်သည့် အကြံပြုချက် ၄၀(40 Recommendations) ကို လိုက်နာဆောင်ရွက်ကြရပါသည်။ ယင်းအကြံပြုချက် (၄၀)တွင်ငွေကြေးခဝါချမှုတိုက်ဖျက်ရေး(Anti Money Laundering-AML)၊ အကြမ်းဖက်မှုကိုငွေကြေး ထောက်ပံ့မှုတိုက်ဖျက်ရေး (Countering the Financing of Terrorism-CFT) နှင့် လူအများအပြား သေကျေစေနိုင်သော လက်နက်များပြန့်ပွားစေရန် ငွေကြေးထောက်ပံ့မှုအပေါ် ဘဏ္ဍာရေးအရပစ်မှတ် ထားအရေးယူဆောင်ရွက်ရေး (Targeted Financial Sanction of Proliferation) စသည် တို့နှင့် သက်ဆိုင်သည့် လိုက်နာဆောင်ရွက်ရန်အချက်များဖြစ်ပါသည်။ မြန်မာနိုင်ငံသည် FATF တွင် အဖွဲ့ဝင် နိုင်ငံမဟုတ်သော်လည်း FATF ပုံစံဖွဲ့စည်းထားသည့် ဒေသဆိုင်ရာအဖွဲ့တစ်ခု ဖြစ်သည့် အာရှပစိဖိတ် ဒေသငွေကြေးခဝါချမှုတိုက်ဖျက်ရေးအဖွဲ့ (Asia Pacific Group on Money Laundering-APG) တွင် အဖွဲ့ဝင်နိုင်ငံအဖြစ် ပါဝင်လျက်ရှိပါသည်။  

၄။ မြန်မာနိုင်ငံအနေဖြင့် FATF ၏ အကြံပြုချက်များကို လိုက်နာဆောင်ရွက်လျက်ရှိရာ မူလ အကဲဖြတ်စဉ်က အကြံပြုချက် (၄၀) တွင် စံနှုန်းသတ်မှတ်ချက် အချက် (၂၀) ကျော်အားသတ်မှတ် ကာလအတွင်း ပြည့်မီမှုမရှိခဲ့သော်လည်း လက်ရှိအချိန်တွင် စံနှုန်းသတ်မှတ်ချက် (၂၄) ချက်ပြည့်မီ မှုရှိပြီးဖြစ်ပါသည်။

၅။ မြန်မာနိုင်ငံသည် ယခင်ကလည်း အလားတူစာရင်းတွင် ၂၀၁၁ ခုနှစ်၊ ဇွန်လမှ ၂၀၁၆ ခုနှစ်၊ ဖေဖော်ဝါရီလအထိရောက်ရှိခဲ့ပြီးပြန်လည်လွတ်မြောက်အောင်ဆောင်ရွက်ခဲ့သည့်ယခင်အတွေ့အကြုံ များအရ ယင်းစာရင်းမှ အလျင်အမြန်ပြန်လည်လွတ်မြောက်စေရန် စီမံဆောင်ရွက်လျက်ရှိရာ လာမည့် တစ်နှစ်အတွင်း ဆောင်ရွက်မည့် Action Plan များ ချမှတ်ရေးဆွဲ ပြီးဖြစ်ပါသည်။

၆။ မြန်မာနိုင်ငံအနေဖြင့် ပြည်ပနှင့် ငွေကြေးလွှဲပြောင်းမှု ပြုလုပ်ရာတွင် ပြည်ပအဆက်အသွယ် ဘဏ်များကအလေးထားစိစစ်ခြင်းကို တိုးမြှင့်လုပ်ဆောင်ခြင်း (Enhance Due Diligence-EDD) ကိုသာ ကြုံတွေ့ကြရမည်ဖြစ်ရာ သက်ဆိုင်ရာဘဏ်များအနေဖြင့် လက်ရှိဆောင်ရွက်နေကျမေးခွန်းများ မေးမြန်းခြင်းနှင့် ငွေကြေးလွှဲပြောင်းမှုဆိုင်ရာ အထောက်အထားအချက်အလက်များ တောင်းခံခြင်း စသည်ဖြင့် ယခင်အတိုင်း ဆက်လက်ဆောင်ရွက်နိုင်မည်ဖြစ်ပါသည်။ မြန်မာနိုင်ငံအား စိစစ်ဆောင် ရွက်မှုများပြုလုပ်ရန်တောင်းဆိုခြင်းခံရသည့် အန္တရာယ်မြင့်မားမှုရှိသော နိုင်ငံနှင့်ဒေသများစာရင်းတွင်ထည့် သွင်းခံရခြင်းသည် မြန်မာနိုင်ငံအတွက် စိုးရိမ်ဖွယ်ရာအခြေအနေမဟုတ်သည့်အတွက် ပြည်သူများ စိုးရိမ်မှုလွန်ကဲခြင်းများထားရှိရန်မလိုအပ်ဘဲ ယင်းသို့ထည့်သွင်းခံရမှုကိုအကြောင်းပြု၍ ငွေကြေးဈေး ကွက်အတွင်း မသမာမှုများ မပြုလုပ်ကြပါရန်နှင့် မြန်မာနိုင်ငံတော်ဗဟိုဘဏ်၏ စည်းမျဉ်းစည်းကမ်း များနှင့် မကိုက်ညီသည့် ဆောင်ရွက်မှုများတွေ့ရှိရပါက လိုအပ်သလို အရေးယူဆောင် ရွက်သွားမည် ဖြစ်ပါကြောင်း အသိပေးထုတ်ပြန်အပ်ပါသည်။

မြန်မာနိုင်ငံတော်ဗဟိုဘဏ်

#Local_News
Published_ 22 October 2022

ပုဂံဒေသမှာ ပြည်တွင်းခရီးသွားတွေကိုမှီပြီးတော့ လုပ်ကိုင်ကြတဲ့လုပ်ငန်းအချို့ ပြန်လည်လည်ပတ်လာပြီဖြစ်သော်လည်း ဒေသခံဧည့်လမ်းညွှန်လုပ်ငန်းတွေ၊ နိုင်ငံခြားသားခရီးသွားဝန်ဆောင်မှုလုပ်ငန်းတွေတော့ပြန်မစနိုင်သေးဘူးလို့ သိရပါတယ်၊၊

#Yangon_Media_Group