#WorldHealth
Published 15 May 2022

ဖိုင်ဇာကုမ္ပဏီက ကိုဗစ်ကုသရေးသောက်ဆေးပက်ဇ်လိုဗစ်(Paxlovid)ဆေးဝါးပေါင်း ၂.၈ သန်းကျော်ကို အမေရိကန်တဝှမ်းရှိဆေးဆိုင်များမှာ ဖြန့်ဖြူးထားပြီဖြစ်ပြီး အစိုးရအဖွဲ့ကလည်း လူအများဆေးဝါးသုံးစွဲရရှိရေးအတွက် ကြိုးပမ်းလုပ်ကိုင်ပေးနေပါတယ်။

ပက်ဇ်လိုဗစ်ဆေးကို လူအများအပြားသုံးစွဲခဲ့ကြပြီး ရောဂါကုသပျောက်ကင်းသွားပြီးနောက် အချို့လူနာတွေမှာ ကိုဗစ်ရောဂါလက္ခဏာများ ပြန်လည်ပေါ်ပေါက်ခဲ့ကြောင်း အကြောင်းကြားလာကြပါတယ်။

ဖိုင်ဇာဆေးဝါးအသုံးပြုကုသခဲ့တဲ့ လူဒါဇင်လောက်က ရောဂါလက္ခဏာများပြန်လည်ပေါ်ပေါက်ခဲ့ကြောင်းကို လူမှုကွန်ရက်နဲ့ အမေရိကန် FDA တိုဆီမှာ တင်ပြခဲ့ကြပါတယ်။

ဒါပေမယ့် ဖိုင်ဇာကုမ္ပဏီဘက်ကတော့ ဒါဟာရှားပါးဖြစ်စဉ်တစ်ခုသာဖြစ်တယ်လို့ဆိုပါတယ်။ ၅ ရက်တာသောက်သုံးကုသရတဲ့ ပက်ဇ်လိုဗစ်ဆေးအသုံးပြုခဲ့သူ ၃ သိန်းကျော်ကို စောင့်ကြည့်လေ့လာခဲ့ရာမှာ အယောက် ၃,၀၀၀ မှာ ၁ ယောက်နှုန်းဖြစ်ပွားခဲ့ပြီး ၀.၀၃ ရာခိုင်နှုန်းက ဆေးဝါးသုံးစွဲပြီးနောက် ရောဂါပြန်ထလာကြောင်း သိရှိခဲ့ရပါတယ်။

ဒါပေမယ့် ဒီပမာဏဟာ ပက်ဇ်လိုဗစ်ဆေးဝါးစမ်းသပ်မှုပြုလုပ်စဉ်ကထက် ပိုမိုနည်းပါးပြီး စမ်းသပ်ချက်ပြုလုပ်တုန်းက ၂ ရာခိုင်နှုန်းသောလူနာတွေမှာ ဗိုင်းရပ်စ်ပြန်လည်တွေ့ရှိခဲ့တာဖြစ်ပါတယ်။

ရောဂါလက္ခဏာပြန်ထတာက ကိုဗစ်သဘာဝဖြစ်ပြီး စမ်းသပ်မှုများပြုလုပ်စဉ်ကလည်း အလားတူဗိုင်းရပ်စ်ပြန်လည်ပေါ်ပေါက်ခြင်းဖြစ်ပေါ်တတ်ကြောင်း ဖိုင်ဇာကဖော်ပြထားပါတယ်။

ဒီလိုပြန်လည်ဖြစ်ပေါ်ရတဲ့အဓိကအကြောင်းအရင်းကို သေချာမသိရှိရသေးပေမယ့် အချို့ဆရာဝန်တွေအကြံပြုတာကတော့ ဆေးကဗိုင်းရပ်စ်ကိုလျင်မြန်စွာတိုက်ခိုက်လိုက်တာကြောင့် အချို့လူနာတွေရဲ့ကိုယ်ခံအားစနစ်က အလုပ်မလုပ်ဘဲရှိနေပြီး ဗိုင်းရပ်စ်ကထပ်မံပျံ့ပွားတာဖြစ်ပါတယ်။

ဒီလိုဖြစ်ပေါ်ခြင်းဟာ ဗိုင်းရပ်စ်နဲ့သက်ဆိုင်ပြီး ပက်ဇ်လိုဗစ်နဲ့မသက်ဆိုင်ကြောင်း၊ အဆိုပါဆေးသောက်သုံးတဲ့လူတွေရော မသောက်သုံးတဲ့သူတွေမှာပါ ရောဂါပြန်ထခြင်းမျိုးတွေ့ရှိရကြောင်း ဖိုင်ဇာမှ ထုတ်လုပ်ရေးအရာရှိချုပ်'ဝီလီယံပေါင်'က ပြောကြားသွားပါတယ်။

ပက်ဇ်လိုဗစ်ဆေး ၅ ရက်တာကုသရခြင်းကို နောက်ထပ်တစ်ကြိမ်ကုသခြင်းမျိုး ဒါမှမဟုတ် ၁၀ ရက်တာကုသခြင်းမျိုးက အကျိုးသက်ရောက်မှုမရှိဘူးလို FDA က ပြောခဲ့ပေမယ့် ပက်ဇ်လိုဗစ်ကတော့ နောက်ထပ်တစ်ကြိမ် ၅ ရက်ကုသခြင်းက ဗိုင်းရပ်စ်ကိုဖယ်ရှားပေးနိုင်ကြောင်း အမှုဆောင်ချုပ်'အယ်လ်ဘတ်ဘိုလာ'က ဆိုပါတယ်။

အမေရိကန်မှာ ပက်ဇ်လိုဗစ်ဆေးတွေကို ကိုဗစ်ရောဂါပြင်းထန်စွာခံစားရနိုင်တဲ့သူများ၊ အသက် ၆၅ နှစ်နဲ့အထက်လူကြီးများ၊ အခြားရောဂါအခံရှိသူတွေမှာ သုံးစွဲဖို ခွင့်ပြုထားပါတယ်။

Source: The Straits Times 15 Sunday
#Yangon_Media_Group

#Local_News
Published_ 15 May 2022

နိုင်ငံတော်၏ အချုပ်အခြာအာဏာပိုင်ဆိုင်မှု၊ တန်းတူရည်တူရှိမှုတို့ကို လေးစားလိုက်နာ ခြင်းမှ သွေဖည်နေသည့်အတွက် အာဆီယံ-အမေရိကန် အထူးထိပ်သီး အစည်းအဝေးသို့ မြန်မာနိုင်ငံက ပါဝင်တက်ရောက်ခြင်းမပြုခဲ့ကြောင်း နစက နိုင်ငံခြားရေးဝန်ကြီးဌာနရဲ့ မေ ၁၄ ရက်ထုတ် သတင်းထုတ်ပြန်ချက်မှာ ဖော်ပြထားပါတယ်။

အဆိုပါ အထူးထိပ်သီးအစည်းအဝေးနှင့် ဆက်စပ်အစည်းအဝေးများသို့ အမေရိကန် ပြည်ထောင်စုက မြန်မာနိုင်ငံမှ နိုင်ငံရေးအရကိုယ်စားမပြုသူကိုသာ တက်ရောက်ရန် ဖိတ်ကြားစာကို ပေးပိုခဲ့ပြီး အဆိုပါဖိတ်ကြားမှုသည် အာဆီယံပဋိညာဉ်စာတမ်း၊ အရှေ့တောင်အာရှ ချစ်ကြည်ရေးနှင့်ပူးပေါင်းဆောင်ရွက်ရေးစာချုပ်၊ ကုလသမဂ္ဂပဋိညာဉ် စာတမ်းပါ အခြေခံမူများဖြစ်သော နိုင်ငံတော်၏ အချုပ်အခြာအာဏာ ပိုင်ဆိုင်မှု၊ တန်းတူရည်တူရှိမှုတို့ကို လေးစားလိုက်နာခြင်းမှ သွေဖည်နေသည့်အတွက် မြန်မာနိုင်ငံက ပါဝင်တက်ရောက်ခြင်းမပြုခဲ့ပါဟု ဖော်ပြထားပါတယ်။

အာဆီယံ-အမေရိကန် အထူးထိပ်သီးအစည်းအဝေးအပြီးတွင် ပူးတွဲကြေညာချက် ထုတ်ပြန်ခဲ့သည်ကိုသိရှိရပြီး အဆိုပါပူးတွဲကြေညာချက်တွင် မြန်မာနိုင်ငံ၏ ဖြစ်ပေါ်တိုးတက်မှုများကို အထူးပြုထည့်သွင်းဖော်ပြထားသည့် စာပိုဒ်ပါရှိသည်ကို တွေ့ရှိရတယ်လို့ ဆိုပါတယ်။

မြန်မာနိုင်ငံအနေဖြင့် အဆိုပါစာပိုဒ်ကို ထည့်သွင်းခြင်းမပြုရန် တောင်းဆိုခဲ့သော်လည်း အာဆီယံ၏ တူညီဆန္ဒမပါရှိဘဲ ပူးတွဲကြေညာချက်ကို ထုတ်ပြန်ခဲ့သည်ကို တွေ့ရှိရသည်။ ထိုစာပိုဒ်တွင်ပါရှိသည့် အသုံးအနှုန်းများသည် အချုပ်အခြာအာဏာပိုင် နိုင်ငံတစ်နိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်း၊ သက်ဆိုင်ရာနိုင်ငံကို သမာသမတ် ကျသည့်နည်းဖြင့် ချဉ်းကပ်မှုမရှိခြင်းကို အထင်အရှား တွေ့ရှိရသည်။ ထို့အပြင် အချို့အကြောင်းအရာများသည် မြန်မာနိုင်ငံ၏ အချုပ်အခြာအာဏာအတွင်း ရှိခြင်း၊ ၂၀၂၁ ခုနှစ်၊ ဧပြီလတွင် ပြုလုပ်ခဲ့သည့် အာဆီယံခေါင်းဆောင်များ အစည်းအဝေးတွင် သဘောတူညီခဲ့သည့် အာဆီယံ၏ တူညီဆန္ဒ (၅) ချက်ပါ အချက်များထက် ကျော်လွန်နေသော တောင်းဆိုချက်များ ပါဝင်နေခြင်းကို တွေ့ရှိရတယ်လို့ ဆိုပါတယ်။

အာဆီယံ၏ ထုတ်ပြန်ကြေညာချက်များတွင် နိုင်ငံတစ်နိုင်ငံ၏ကိစ္စရပ်ကို နိုင်ငံအလိုက် အထူးပြုထည့်သွင်းဖော်ပြခြင်း မပြုသင့်ကြောင်းကို မြန်မာနိုင်ငံအနေဖြင့် အစဉ်တစိုက် ရပ်တည်ထားရှိပြီး အာဆီယံ-အမေရိကန် အထူးထိပ်သီးအစည်းအဝေး၏ ပူးတွဲကြေညာချက်ကို အာဆီယံတူညီဆန္ဒမပါရှိဘဲ ထုတ်ပြန်ခဲ့ခြင်းကြောင့် မြန်မာနိုင်ငံမှ စာပိုဒ်အမှတ် ၂၆ ကို ပြတ်သားစွာပယ်ချပြီး ပါဝင်ပတ်သက်မှုမရှိကြောင်း ဖော်ပြထားပါတယ်။

ထို့ပြင် အာဆီယံအဖွဲ့ဝင်နိုင်ငံအားလုံးနှင့် မိတ်ဖက်နိုင်ငံများမှ အစိုးရတာဝန်ရှိ သူများနှင့် လွှတ်တော် အမတ်များအနေဖြင့် အကြမ်းဖက်အဖွဲ့အစည်းများနှင့် ၎င်းတို့၏ ကိုယ်စားလှယ်များအား ထိတွေ့ဆက်ဆံခြင်းနှင့် အားပေးပံ့ပိုးခြင်းများ မပြုလုပ်ကြရန် ထပ်လောင်းတောင်းဆို ထားပါတယ်။

မေလ ၁၂ ရက်မှ ၁၃ ရက်အထိ အမေရိကန်ပြည်ထောင်စု ဝါရှင်တန်ဒီစီမြို့တွင် အာဆီယံ - အမေရိကန် အထူးထိပ်သီးအစည်းအဝေးကျင်းပခဲ့တာ ဖြစ်ပါတယ်။

ymg-mnn
#Yangon_Media_Group

Published 14 May 2022

နေပြည်တော်ရှိ မာရဝိဇယဗုဒ္ဓ ဥယျာဉ်တော်ဝတ္တုကံတော်အတွင်း တည်ထားပူဇော်မယ့် ဆဋ္ဌသင်္ဂါယနာမူ ပိဋကတ်ကျောက်စာတော်များ စတင်ရေးထိုးပူဇော်ခြင်း မဟာမင်္ဂလာအခမ်းအနားကို ကဆုန်လပြည့် ဗုဒ္ဓနေ့ဖြစ်တဲ့ (၁၄)ရက်နေ့ နံနက်က ကျင်းပခဲ့ကြောင်းသိရပါတယ်။

အခမ်းအနားမှာ ပိဋကတ်ကျောက်စာတော် ရေးထိုးပူဇော်မည့် မင်္ဂလာစက်ယန္တရားများ၏ မင်္ဂလာလိုက်ကာတွေကို ဗန်းမော်ဆရာတော်ကြီးနှင့် သီတဂူဆရာတော်ကြီးတို့က စက်ခလုတ်နှိပ်ပြီး ဖွင့်လှစ်ပေးတော်မူကြပါတယ်။

အဲဒီနောက် နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က စက်ယန္တရားတွေကို မင်္ဂလာစက်ခလုတ်နှိပ်၍ ပိဋကတ်   ကျောက်စာတော် စတင်ရေးထိုးပူဇော်ပြီး ပရိတ်နံ့သာရည်များပက်ဖျန်းပေးပါတယ်။ အဲဒီနောက် ဆရာတော်ကြီးတွေနှင့် အခမ်းအနားတက်ရောက်လာသူတွေဟာ ကျောက်စာတော်တွေကို ခေတ်မီစက်ကိရိယာတွေအသုံးပြုပြီး ရေးထိုးနေမှုတွေကို ကြည့်ရှုကြပြီး ပရိတ်နံ့သာရည်တွေ ပက်ဖျန်းပေးကြပါတယ်။

ဗန်းမော်ဆရာတော်ကြီးနှင့် သီတဂူ ဆရာတော်ကြီးတို့အား မာရဝိဇယ ဗုဒ္ဓရုပ်ပွားတော်မြတ်ကြီး၏ ဆင်းတုတော် အပိုင်း ၁၊ အပိုင်း ၂၊ အပိုင်း ၃ နှင့် အပိုင်း ၄ တို့ ထုဆစ်ပြီးစီးမှုနှင့် ဗုဒ္ဓဥယျာဉ် တည်ဆောက်ပြီးစီးမှု အခြေအနေတွေကို ဗိုလ်ချူပ်မှူးကြီးက  ရှင်းလင်းလျှောက်ထားပြီး ဆရာတော်ကြီးတွေရဲ့ ဩဝါဒကိုခံယူပါတယ်။

အဆိုပါ ကျောက်စာရုံစေတီများတည်ထားရာတွင် သမိုင်းမော်ကွန်းကျောက်စာထားရှိမည့် အလယ်ဗဟို ကျောက်စာရုံ စေတီသည် အလျား ၂၁ ပေ၊ အနံ ၂၁ ပေ၊ အမြင့် ၂၇ ပေရှိမည်ဖြစ်ပြီး အခြား ကျောက်စာရုံစေတီများအနေဖြင့် အလျား ၁၂ ပေ၊ အနံ ၁၂ ပေ၊ အမြင့် ၁၈ ပေ ရှိမည်ဖြစ်ကာ ကျောက်စာချပ်အနေဖြင့် အလျား ၄၅ လက်မ၊ အမြင့် ၆ ပေ ၃ လက်မ၊ ထု ၇ ဒသမ ၂ လက်မရှိမည်ဖြစ်ပါတယ်။ ကျောက်စာချပ်တွေဟာ ဗုဒ္ဓမြတ်စွာ၏ မုခပါဌ်တော်များကို ရေးထိုးပူဇော်ထားခြင်းဖြစ်တဲ့အတွက် မာရဝိဇယ ဗုဒ္ဓရုပ်ပွားတော်မြတ်ကြီး၏ မျက်နှာတော်မူရာ ရှေ့မျက်နှာစာ၌ စိုက်ထူပူဇော်ထားရှိမည်ဖြစ်ရာ ဘုရားဖူးလာ မိဘပြည်သူများအနေဖြင့် ဗုဒ္ဓရုပ်ပွားတော်မြတ်ကြီးအား လာရောက်ဖူးမြော်ရာတွင် ကျောက်စာရုံစေတီများအတွင်းရှိ ဘုရားဟောဒေသနာတော်များကို ပြည့်စုံစွာကြည်ညိုလေ့လာနိုင်ရေး စီစဉ်ဆောင်ရွက်သွားမယ်လို့လည်းသိရပါတယ်။

ယင်းသို့ ရေးထိုးပူဇော်နိုင်ရေးဆောင်ရွက်ရာတွင် ကျမ်းစာတော်များကို စကျင်ကျောက်တော်များ၌ ခေတ်မီစက်ကိရိယာများ အသုံးပြု၍ ပါဠိအက္ခရာ၊ Romanize Language တို့ဖြင့် ရေးထိုးပူဇော်သွားမည်ဖြစ်ကြောင်းလည်းသတင်းရရှိပါတယ်။

အဆိုပါမင်္ဂလာအခမ်းအနားကို နိုင်ငံတော်သံဃမဟာနာယကအဖွဲ့ဥက္ကဋ္ဌ၊ မန္တလေးမြို့၊ ဗန်းမော်ကျောင်းတိုက်ဆရာတော်၊ အဘိဓဇမဟာရဋ္ဌဂုရု၊ အဘိဓဇအဂ္ဂမဟာသဒ္ဓမ္မ ဇောတိက ဒေါက်တာဘဒ္ဒန္တကုမာရာဘိဝံသ၊ သီတဂူကမ္ဘာ့ဗုဒ္ဓတက္ကသိုလ်များ၏ အဓိပတိရွှေကျင်နိကာယ ဥပဥက္ကဋ္ဌ အဘိဓဇမဟာရဋ္ဌဂုရု အဘိဓဇအဂ္ဂမဟာသဒ္ဓမ္မ ဇောတိကမဟာဓမ္မကထိက ဗဟုဇနဟိတဓရ ဒေါက်တာ ဘဒ္ဒန္တဉာဏိဿရ၊ နေပြည်တော်၊ လယ်ဝေးမြို့၊ ပေါက်မြိုင်ကျောင်းတိုက် ပဓာနနာယကအဘိဓဇမဟာ ရဋ္ဌဂုရုဘဒ္ဒန္တဇနိန္ဒ၊ တပ်ကုန်းမြို့၊ မဟာသီဟနာဒကျောင်းတိုက် ဆရာတော် အဘိဓဇမဟာရဋ္ဌဂုရုဘဒ္ဒန္တအာစိဏ္ဏတို့ အမှူးပြုသည့် သံဃာတော်များ ကြွရောက်ချီးမြှင့်တော်မူကြပြီး နစကဥက္ကဋ္ဌ၊ ဒုတိယဥက္ကဋ္ဌနှင့်ကောင်စီဝင်တွေ၊နစကအစိုးရအဖွဲ့ဝင်တွေနှင့်ဧည်ပရိဿတ်တွေ တက်ရောက်ခဲ့ကြပါတယ်။

နစက ဥက္ကဋ္ဌနှင့်အဖွဲ့ဟာ နေပြည်တော်ရှိ ဥပ္ပါတသန္တိစေတီတော်မြတ်ကြီးနှင့် လောကချမ်းသာ ဆုတောင်းပြည့်အသင်း  ဘုရားကြီး ဝင်းအတွင်းရှိ မဟာဗောဓိညောင်ပင်တော်တွေကို ညောင်ပင်သွန်းလောင်း ပူဇော်ခဲ့ကြတယ်လို့ သတင်း ထုတ်ပြန် ချက်အရသိရပါတယ်။

#WorldAuction
Published 14 May 2022

လေလံတင်ရောင်းချဖူးသမျှစိန်ဖြူထဲမှာ အကြီးဆုံးစိန်ဖြစ်တဲ့ The Rock အမည်ရှိ စိန်ဖြူတုံးကိုဒေါ်လာ ၁၈.၈ သန်းဖြင့် ဗုဒ္ဓဟူးနေ့က လေလံတင်ရောင်းချခဲ့ရပါတယ်။

#Yangon_Media_Group

#HealthMatters
Published - 14 May 2022

၁။ ရွှေ့ပြောင်းအလုပ်သမားတွေဟာ ကမ္ဘာလုံးဆိုင်ရာစီးပွာရေးမှာ အဓိကကျတဲ့အခန်းကဏ္ဍက ဘယ်လိုပါဝင်နေတယ်ဆိုတာကို ကိုဗစ်ကပ်ဘေးက မီးမောင်းထိုးပြခဲ့ပါတယ်လို့ ကုလကပြောတဲ့အပေါ် ဘယ်လိုမြင်ပါသလဲ??

၂။ သူတို့ကလဲ ရွှေ့ပြောင်းတဲ့သဘောရှိတယ် ကိုဗစ်ကလည်း ရွှေ့ပြောင်းတဲ့သဘောရှိတော့ သူတို့ကို လက်ခံဖို့အတွက်ကရော အန္တရာယ်ကြီးတစ်ခုဖြစ်မနေဘူးလား??

၃။ ရှဉ့်လည်းလျှောက်သာ ပျားလည်းစွဲသာအောင် ကိုဗစ်နှင့်အတူ ရွှေ့ပြောင်းအလုပ်သမားတွေရွှေ့ပြောင်းရှင်သန်ခွင့် ဘယ်လိုပေးမလဲ??

#Yangon_Media_Group

Published 14 May 2022

ကဆုန်လပြည့် ဗုဒ္ဓနေ့ အထိမ်းအမှတ် သံဃာတော် ၁၀၂၆၄ ပါးကို ဆွမ်း၊လှုဖွယ်ပစ္စည်းများနှင့် နဝကမ္မဝတ္ထုငွေများ လောင်းလှူပူဇော်ပွဲကို ယနေ့ မေလ၁၄ ရက် ကဆုန်လပြည့်နေ့တွင် မန္တလေးမြို့ နန်းမြို့ရိုးလေးပြင်လေးရပ်၌ တစ်ပြိုင် နက်ကျင်းပခဲ့ပါတယ်။

ယနေ့ မနက်၆နာရီမှစတင်ကာ မန္တလေးမြို့ နန်းမြို့ရိုးလေးပြင်လေးရပ်တွင် တစ်ဖက်လျှင် သံဃာတော် ၂၅၆၆ပါးစီကို ဆွမ်းနှင့်လှူဖော်ပစ္စည်းတွေ၊နဝကမ္မဝတ္ထုငွေတွေကို လောင်းလှုခဲ့ကြပါတယ်။

အဆိုပါအခမ်းအနားကို နစက၊မန္တလေးတိုင်းဒေသကြီး အစိုးရအဖွဲ့က ကြီးမှူးကျင်းပခဲ့တာဖြစ်ပါတယ်။

အဆိုပါအခမ်းအနားကျင်းပပုံတွေကို AFPသတင်းဌာနက ယခုလို သတင်းရုပ်သံရိုက်ကူးတင်ဆက်ထားတာဖြစ်ပါတယ်။

Source AFP

#LocalNews
Published - 14 May 2022

စက်သုံးဆီ စျေးနှုန်းမြင့်တက်လာမှုနှင့် အလှူရှင်နည်းပါးလာမှုတို့ကြောင့် ရန်ကုန်အခြေစိုက် ပရဟိတအဖွဲ့များအနေနဲ့စရိတ်မျှပေးစနစ်ဖြင့်သာ လူနာလမ်းကြောင်းများကို ကူညီပို့ဆောင်ပေး နေရတယ်လို့ သိရပါတယ်။

#Yangon_Media_Group

#LocalNews
Published - 14 May 2022

မိုးရာသီအဝင်နဲ့ မိုးရာသီကာလတွေမှာ သွေးလွန်တုပ်ကွေး၊ဝမ်းပျက်ဝမ်းလျှော၊အစာအဆိပ်သင့်နှင့် အသက်ရူလမ်းကြောင်းဆိုင်ရာ ရောဂါအမျိုးမျိုးဖြစ်ပွားနိုင်တဲ့အတွက် အထူးသတိပြုဖို့လိုအပ်တယ်လို့ ပြည်သူ့ကျန်းမာရေးဖောင်ဒေးရှင်းဥက္ကဌ ဒေါက်တာသန်းစိန်ကပြောပါတယ်၊၊

#Yangon_Media_Group

Published 14 May 2022

တရုတ်နိုင်ငံရဲ့ကြီးထွားလာမှုကိုရင်ဆိုင်နေရချိန် အမေရိကန်သမ္မတ ဂျိုးဘိုင်ဒင်က အာဆီယံခေါင်းဆောင်တွေနှင့် ဝါရှင်တန်မှာကျင်းပတဲ့  ပထမဆုံးထိပ်သီးအစည်းအဝေးမှာ အရှေ့တောင်အာရှနိုင်ငံတွေအတွက် ရေရှည်ကတိကဝတ်ပြုလိုက်ပါတယ်။

ဘိုင်ဒင်က ကနဦးဦးစီးဦးရွက်ပြုမှုအဖြစ် ဒေါ်လာသန်း၁၅၀အစီအစဉ်နှင့် အာဆီယံအတွက် ပထမဆုံး အချိန်ပြည့် အမေရိကန် သံအမတ်ကြီးကိုခန့်အပ်မှာကို ကြေညာခဲ့ပါတယ်။

ဒါဟာ အမေရိကန်-အာဆီယံဆက်ဆံရေးရဲ့ ခေတ်သစ်တစ်ခုလို့သူကကြိုဆိုလိုက်ပြီး အမေရိကန်အစိုးရရဲ့ မဟာဗျူဟာအချက်အခြာထဲမှာ အာဆီယံရဲ့ဗဟိုပြုမှုပါဝင်တယ်လို့ပြောဆိုလိုက်ပါတယ်။

လွတ်လပ်ပွင့်လင်း၊တည်ငြိမ်ကြွယ်ဝပြီးဒူပေနာပေခံနိုင်မှုနှင့် လုံခြုံမှုရှိတဲ့ ဒေသတစ်ခုကို ကျွန်တော်တို့ရှာဖွေနေတာဖြစ်တယ် လို့ ဘိုင်ဒင်က အာဆီယံခေါင်းဆောင်တွေကိုပြောကြားလိုက်ပါတယ်။

Source AFP

#LocalNews
Published - 14 May 2022

ရွှေတိဂုံစေတီတော်ဘဏ္ဍာတော်ထိန်း ဂေါပကအဖွဲ့မှ ကြီးမှူးကျင်းပသော (၃၉)ကြိမ်မြောက်၊ ကဆုန်ညောင်ရေသွန်းလောင်းပူဇော်ပွဲ အခမ်းအနားကို ဒီကနေ့ မေလ ၁၄ ရက်၊ နံနက် အစောပိုင်းအချိန်တွင် စေတီတော်ရင်ပြင်တော်ရှိ ဗောဓိညောင်ပင်၌ ပြုလုပ်ခဲ့ကြတယ်လို့ သိရပါတယ်။

ရှေးဦးစွာ ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ်နှင့် အစိုးရအဖွဲ့ဝင်များ၊ ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ဝင်များ၊ ဗုဒ္ဓဝေယျာဝစ္စအသင်းများ၊ရုံးဝန်ထမ်းများဖြင့် ရွှေတိဂုံစေတီတော်ရင်ပြင် ဧည့်ခံတန်ဆောင်းတွင် လေးဆူဓာတ်ပုံရွှေတိဂုံစေတီတော်မြတ်ကြီးအား ဆွမ်း၊ပန်း၊ရေချမ်း၊သစ်သီး၊ဆီမီး၊အမွှေးနံ့သာများဖြင့် ဆွမ်းတော်ကြီး ဆက်ကပ်လှူဒါန်းခြင်း အခမ်းအနားကို ကျင်းပခဲ့ကြတာပါ။

ဆက်လက်၍ နံနက် ၆ နာရီခွဲ အချိန်တွင် ရွှေတိဂုံစေတီတော်ရှေးဟောင်းဗုဒ္ဓရုပ်ပွားတော်များတန်ဆောင်း၌ သြဝါဒါစရိယဆရာတော်ကြီးများကို အရုဏ်ဆွမ်းဆက်ကပ်လှူဒါန်းခြင်း၊ နံနက် ၇ နာရီအချိန်တွင် ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ်နှင့် အစိုးရအဖွဲ့ဝင်များ၊ဂေါပကအဖွဲ့ဝင်များ၊ဝန်ထမ်းများနှင့် ဗုဒ္ဓဝေယျာဝစ္စအသင်းများမှ ညောင်ရေသွန်းလောင်းရန် ညောင်ရေအိုးများ ကိုယ်စီကိုင်ဆောင်ကာ ရှေးဟောင်းဗုဒ္ဓရုပ်ပွား တော်များတန်ဆောင်းမှစတင်၍ စေတီတော်မြတ်ကြီးအား လက်ယာရစ်တစ်ပတ်လှည့်လည်ပူဇော်ခဲ့ကြပါတယ်။

ထိုနောက် နံနက် ၇ နာရီခွဲအချိန်တွင် အခမ်းအနားကျင်းပမည့် အင်္ဂါထောင့်ဗောဓိညောင်ပင်တွင် ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့၏ သြဝါဒါစရိယဆရာတော်ကြီးများနှင့် အခမ်းအနားတက်ရောက်လာကြသူများမှ "နမောတဿ" သုံးကြိမ်ရွတ်ဆို ဘုရားကန်တော့၍ အခမ်းအနား ဖွင့်လှစ်ကြပြီးပရိဘောဂစေတီ(မဟာဗောဓိညောင်ပင်)အား ဆရာတော်ကြီးများက ဗုဒ္ဓါဘိသေကအနေကဇာတင်တော်မူပြီးနောက် ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့သြဝါဒါစရိယ၊ ဆရာတော် ဘဒ္ဒန္တ သိရိန္ဒာဘိဝံသ(ယောဆရာတော်ဘုရားကြီး)ထံမှ ကိုးပါးသီလခံယူဆောက်တည်ခြင်း၊ သံဃာတော်အရှင်သူမြတ်တို့အား လှူဖွယ်ဝတ္ထုများ ဆက်ကပ်လှူဒါန်းကြပြီး ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့သြဝါဒါစရိယ၊ ဆရာတော်ဘဒ္ဒန္တ နာဂိတထံမှ လှူဒါန်းမှုအစုစုအတွက် အနုမောဒနာတရားနာကြား၍ ရေစက်ချအမျှပေးဝေခဲ့ကြပါတယ်။

ဆက်လက်၍ ရွှေတိဂုံစေတီတော်သြဝါဒါစရိယဆရာတော်ကြီးများက မဟာဗောဓိညောင်ပင်အား ညောင်ရေသွန်းလောင်းပြီးနောက် ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ်နှင့် အစိုးရအဖွဲ့ဝင်များ၊ ဘဏ္ဍာတော်ထိန်းဂေါပကအဖွဲ့ဝင်များမှ မဟာဗောဓိညောင်ပင်အား ညောင်ရေသွန်းလောင်းပူဇော်ခဲ့ကြပြီး ထို့နောက် ဗြဟ္မာ၊ သိကြား၊ နတ်၊ နဂါး၊ ဂဠုန်များ၊ ဝန်ထမ်းများနှင့် ဗုဒ္ဓဝေယျာဝစ္စအသင်းများက သတ်မှတ်ထားသော ကဗျာ၊လင်္ကာ၊သံပေါက်များ ရွတ်ဆိုဆုတောင်း၍ ဗောဓိညောင်ပင်အား ညောင်ရေသွန်းလောင်းပြီးနောက် အခမ်းအနားကို "ဗုဒ္ဓသာသနံစိရံတိဋ္ဌတု" သုံးကြိမ်ရွတ်ဆိုဆုတောင်း၍ အခမ်းအနားကို ရုပ်သိမ်းခဲ့တယ်လို့ သိရပါတယ်။

ဓါတ်ပုံ - ရွှေတိဂုံစေတီတော် (Page)

ymg/kg
#Yangon_Media_Group

#LocalNews
Published - 14 May 2022

မေလအတွင်း အားအနည်းငယ်ရှိသောလာနီညာဖြစ်စဥ်အခြေအနေကို ရောက်ရှိနေလို့ သတိပြုနေထိုင်ကြဖို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်လိုက်ပါတယ်၊၊

နိုင်ငံတကာမိုးလေဝသဌာနတွေရဲ့ သင်္ချာပုံစံပြုမော်ဒယ်များခန့်မှန်းချက်အရ မို/ဇလဌာနကသတိပေးချက်ထုတ်ပြန်လိုက်တာဖြစ်ပါတယ်၊၊

လာနီညာဖြစ်စဉ်ဟာ ပစိဖိတ်သမုဒ္ဒရာမှာ ဖြစ်ပေါ်တဲ့ဖြစ်စဉ်ဖြစ်ပေမယ့် အဲဒီ့လာနီညာဖြစ်စဉ်ကြောင့် ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုန်တိုင်းများပိုမိုဖြစ်ပေါ်လာနိုင်ခြင်း၊ အရှေ့ဘက်မှ လေပွေလှိုင်းများတိုက်ခတ်ခြင်း၊ အချိန်အခါမဟုတ် မိုးရွာသွန်းမှုဖြစ်စဉ်တွေ ပိုမိုဖြစ်ပေါ်လာခြင်းစတဲ့ ရာသီဥတုဖြစ်စဉ်တွေ ဖြစ်ပေါ်လေ့ရှိတယ်လို့ မိုး/ဇလကမေလ(၁၄)ရက်မှာသတိပေးချက်ထုတ်ပြန်ထားပါတယ်၊၊

ymg/tthl
#Yangon_Media_Group

#WorldBusiness
Published 14 May 2022

Tesla အမှုဆောင်အရာရှိချုပ်ဘီလျံနာ'အီလွန်မက်စ်'က တွစ်တာကိုဝယ်ယူမယ့်အစီအစဉ်အား ခေတ္တဆိုင်းငံ့ထားကြောင်း ပြောကြားလိုက်ပါတယ်။

ဒေါ်လာ ၄၄ ဘီလီယံတန်ကြေးရှိတဲ့ ဝယ်ယူမှုကြီးကို ရှေ့ဆက်လုပ်ဆောင်ပါ့မလားလို့ သံသယဝင်စရာဖြစ်လာပါတယ်။

တွစ်တာလူမှုကွန်ရက်ပေါ်က မလိုလားအပ်တဲ့အကောင့်တွေနဲ့ အကောင့်တုတွေ များပြားနေခြင်းကို 'မက်စ်'ကထောက်ပြချင်နေကြောင်း သောကြာနေ့အစောပိုင်းက တွစ်တာမှာဖော်ပြသွားပါတယ်။

တွစ်တာရဲ့ပြဿနာတစ်ခုမှာ လူအစစ်တွေအသုံးပြုသကဲ့သို့ ထင်မှတ်စေတဲ့ကွန်ပျူတာဉာဏ်ရည်တုအကောင့်တွေကို ရှင်းလင်းဖို့ 'မက်စ်'ကဆန္ဒရှိနေတာပါ။

တွစ်တာအနေနဲ့ဒီပြဿနာတွေကို အပြည့်အဝအကြောင်းကြားဆောင်ရွက်ခြင်းရှိ/မရှိ 'မက်စ်'ကမေးခွန်းထုတ်နေခဲ့ပါတယ်။

ဒါပေမဲ့ ကုမ္ပဏီကလည်း တရားဝင်စည်းမျဉ်းထုတ်ပြန်ချက်ကို ဖွင့်ဟခဲ့ရာမှာ အနည်းဆုံး ၂ နှစ်အထိ ဉာဏ်ရည်တုအကောင့်တွေနည်းပါးနိုင်ကြောင်း ဖော်ပြခဲ့ပါတယ်။

သုံးသပ်သူအချို့ကတော့ 'မက်စ်'ဟာ ဒီကိစ္စကိုအကြောင်းပြချက်အဖြစ်တည်ပြီး ဝယ်ယူဖို့သဘောတူညီချက်ကို နောက်ဆုတ်သွားနိုင်တယ်လို့ ယူဆနေကြပါတယ်။

အကောင့်တုတွေက တကယ်အသုံးပြုသူတွေရဲ့ ၅ ရာခိုင်နှုန်းအောက်သာရှိတယ်လို့ ဖော်ပြခဲ့ပေမယ့် အဲဒီလောက်အထိနည်းပါးတယ်ဆိုတာကို 'မက်စ်'က မယုံသင်္ကာဖြစ်နေပြီး တွစ်တာဝယ်ယူမှုကို ဆိုင်းငံ့ထားလိုက်ကြောင်း သောကြာနေ့နံနက်က တွစ်တာမှာဖော်ပြခဲ့ပါတယ်။
တဆက်တည်းမှာပဲ ဝယ်ယူဖို့ကိစ္စကိုတော့ ဆန္ဒရှိနေဆဲဖြစ်ကြောင်း ဆက်လက်ဖော်ပြသွားပါတယ်။

'မက်စ်'ဟာ တွစ်တာကိုဝယ်ယူဖို့ အချိန်ကြာမြင့်စွာကြိုးပမ်းခဲ့ပြီး ဧပြီလမှာအဆုံးစွန်အထိ အားထုတ်ခဲ့တာဖြစ်ပါတယ်။

တွစ်တာပေါ်က မလိုလားအပ်တဲ့အကောင့်တုပြဿနာက ဖုံးကွယ်ထားတာတော့မဟုတ်ပါဘူး။

သုံးလတစ်ကြိမ်အစီရင်ခံစာကို အမေရိကန်လုံခြုံရေးနဲ့တရားမျှတရေးကော်မရှင်ထံ တင်ပြခဲ့ရာမှာ အကောင့်တုအရေအတွက်ခန့်မှန်းချက်က တကယ်ရှိနေတာနဲ့ ကွဲလွဲနေနိုင်တယ်လို့ ထုတ်ဖော်ဝန်ခံထားပါတယ်။

ကွင်နီပီယက်တက္ကသိုလ်မှ စီးပွားရေးဂျာနယ်လစ်ဇင်ပရော်ဖက်ဆာ'ဆာရာဆေးလ်ဗား'က "မက်စ်ဟာ ကွန်ပျူတာဉာဏ်ရည်တုအကောင့်တွေပြဿနာကို အကြောင်းပြပြီး ဝယ်ယူမှုသဘောတူညီချက်ကို ဖျက်သိမ်းချင်နေတဲ့သဘောတွေ့ရပါတယ်" လို့ ပြောကြားလိုက်ပါတယ်။

သောကြာနေ့က တွစ်တာနဲ့ Tesla တို့ရဲ့ ရှယ်ယာအတက်အကျ ဆန့်ကျင်ဘက်အနေအထားဖြစ်သွားပါတယ်။

တွစ်တာရှယ်ယာတွေက ၉.၇ ရာခိုင်နှုန်းကျဆင်းခဲ့ပြီး Tesla ရှယ်ယာတွေကတော့ ၅.၇ ရာခိုင်နှုန်းတက်လာခဲ့ပါတယ်။

ဝယ်ယူခြင်းအထမမြောက်ခဲ့ဘူးဆိုရင်တော့ 'အီလွန်မက်စ်'ဘက်က သဘောတူညီချက်ဖျက်သိမ်းကြေး ဒေါ်လာ ၁ ဘီလီယံလျော်ကြေးပေးရမှာဖြစ်ပါတယ်။

ဒီလိုအရေးကြီးတဲ့ကြေညာချက်ကို တွစ်တာပေါ်ကနေထုတ်ပြန်လိုက်ခြင်းက 'မက်စ်'အတွက်တော့ ကုမ္ပဏီနှစ်ခုစလုံးရှယ်ယာတန်ဖိုးထိခိုက်စေပါတယ်။

Source: AP News
#Yangon_Media_Group