#LocalNews
Published - 17 May 2022

မုတ်သုန်အဝင်နဲ့ မိုးရာသီကာလတွေမှာ ကြုံတွေ့လာနိုင်တဲ့သဘာဝဘေးတွေအတွက်မုန်တိုင်းshutter တွေကြိုတင်ပြင်ဆင်ထားပြီး ကယ်ဆယ်ရေးပစ္စည်းတွေနဲ့ ရှာဖွေကယ်ဆယ်ရေးပစ္စည်းတွေ ထောက်ပံ့ပေးနိုင်ဖို့လည်း ကြိုတင်ပြင်ဆင်ထားတယ်လို့ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ ညွှန်ကြားရေးမှူးဒေါ်ဖြူလဲ့လဲ့ထွန်းက YMG ကို ပြောပါတယ်၊၊

#Yangon_Media_Group

#LocalNews
Published_17 May 2022

ရန်ကုန်တိုင်းဒေသကြီး သာကေတမြို့နယ်မှာရှိတဲ့ ပြည်ထောင်စုတိုင်းရင်းသားကျေးရွာမှာ သင်္ဘောဆိုက်ကပ်နိုင်မယ့် ဆိပ်ခံဗောတံတားအတွက် ဇွန်လထဲမှာ တင်ဒါခေါ်ယူဖို့ လုပ်နေပါတယ်။

#Yangon_Media_Group

#LocalNews
Published - 17 May 2022

ဧရာဝတီတိုင်းဒေသကြီး၊ မအူပင်မြို့နယ်တွင် လေပြင်းတိုက်ခတ်မှုကြောင့် ကျေးရွာအုပ်စု(၁၂)စုရှိ နေအိမ်များ အမိုးလန်ပြိုကျပျက်စီးမှုများ ဖြစ်ပေါ်ခဲ့တယ်လို့ သိရပါတယ်။

အဆိုပါ ဖြစ်စဥ်ဟာ မေလ ၁၆ ရက်နေ့ ညပိုင်းအချိန်က ဖြစ်ပွားခဲ့ခြင်းဖြစ်ပြီး အဆိုပါဖြစ်စဉ်ကြောင့် လူနေအိမ်(၁၃၀)လုံး အမိုးလန်၍ (၃၂)လုံး ပြိုကျပြီး စုစုပေါင်း လူနေအိမ်(၁၆၂)လုံး ပျက်စီးဆုံးရှုးခဲ့တယ်လို့ မီးသတ်တပ်ဖွဲ့က ထုတ်ပြန်ပါတယ်။

ယင်းဖြစ်စဥ် ဖြစ်ပွားရာသို့ မအူပင်မြို့နယ် မီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်းသွားရောက်၍ ကူညီကယ်ဆယ်ရေးလုပ်ငန်းများကို ဆောင်ရွက်ပေးခဲ့ရတယ်လို့လည်း သိရပါတယ်။

အဆိုပါ လေပြင်းတိုက်ခတ်မှုဖြစ်စဥ်ကြောင့် လူနှင့်တိရိစ္ဆာန် ထိခိုက်ဒဏ်ရာရရှိမှုတော့မရှိခဲ့ဘူးလို့ မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

Photo - MFSD

ymg/kg
#Yangon_Media_Group

#Local_News
Published_ 17 May 2022

ရွှေလီမြို့၊ ဝမ်တိန်နယ်စပ်ဂိတ် မံမန်လမ်းကြောင်း၌ ကုန်ပစ္စည်းများ ပြန်လည်ဖြတ်သန်းလာနိုင်တာကြောင့် နယ်စပ်ဂိတ် ပုံမှန်လည်ပတ်နိုင်ခဲ့ပြီး ကုန်သွယ်ရေး ပမာဏ ပြန်လည်တိုးတက်လာခဲ့ကြောင်း ရန်ကုန်မြို့ရှိ တရုတ်သံရုံးက ထုတ်ပြန်ထားပါတယ်။

ယခုနှစ် ဇန်နဝါရီလမှ ဧပြီလအထိ ကာလနှင့် ၂၀၁၉ ခုနှစ် ကိုဗစ်-၁၉ ကပ်ရောဂါ မဖြစ်ပွားမီကာလတူနှင့် နှိုင်းယှဉ်ပါက နေ့စဉ်ပျမ်းမျှ ပို့ကုန်သွင်းကုန် ကုန်ပို့ဆောင်မှု ပမာဏသည် ၄၂% အထိပြန်လည်ဖော်ဆောင်နိုင်ခဲ့ပြီး နေ့စဉ်ပျမ်းမျှ ကုန်သွယ်မှု ပမာဏမှာ၂၅၆% တိုးတက်လာတယ်လို့ ဖော်ပြထားပါတယ်။

မံမန်လမ်းကြောင်းတွင် Smart နယ်စပ်ဂိတ် စီမံအုပ်ချုပ်မှုစနစ်ဖော်ဆောင်ပြီး ကွန်တိန်နာများ နယ်စပ်ဂိတ်ဖြတ်သန်းရာတွင် ခွဲခြားသိရှိနိုင်သော စနစ်တပ်ဆင်ကာ နိုင်ငံတကာကုန်စည်စီးဆင်းမှု အချက်အလက်စနစ်စတင် အသုံးပြုခဲ့တယ်လို့ ထုတ်ပြန်ထားပါတယ်။

နယ်စပ်ဂိတ်များ တစ်ပြေးညီဖြစ်သည့် One Stop services နှင့် ကောင်တာတစ်ခုတွင်ငွေကောက်ခံမှု စီမံအုပ်ချုပ်ရေးစနစ် တည်ဆောက်ပြီး စရိတ်ကောက်ခံမှု စံနှုန်းနှင့် လုပ်ငန်းလုပ်ဆောင်သည့်အဆင့်များ လျှော့ချကာ နယ်စပ်ဂိတ် ဝန်ဆောင်မှု အရည်အသွေးအား မြှင့်တင်ထားတယ်လို့ ဖော်ပြထားပါတယ်။

ကပ်ရောဂါကာကွယ်ထိန်းချုပ်ရေး လုပ်ငန်းနှင့်ပေါင်းစပ်၍ အဆိုပါလမ်းကြောင်းကို ယခင်က ပို့ကုန် သွင်းကုန်ပစ္စည်းများ တန်ဖိုးနည်းနည်း ပမာဏများများမှ တန်ဖိုးမြင့်မြင့် ပမာဏနည်းနည်း အဖြစ်ပြောင်းလဲကာ ပို့ကုန် သွင်းကုန် ပမာဏလျှော့ချသည့် အခြေအနေတွင် ကုန်သွယ်ရေးပမာဏ တိုးတက်မှုကို ဖော်ဆောင်နိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group

#Local_News
Published_ 17 May 2022

ဧပြီလအတွင်းက မြန်မာနိုင်ငံအတွင်းသို့ ရောက်ရှိနေသည့် နိုင်ငံခြားသား ၁၁၀၀ ကျော်ကို ကယ်ဆယ်ရေးလေယာဉ်ဖြင့် လိုက်ပါနိုင်ရန် စိစစ်ထောက်ခံမှုများ ပြုလုပ်ပေးခဲ့ကြောင်း ရင်းနှီးမြှပ်နှံမှုနှင့် စီးပွားဆက်သွယ်ရေး ဝန်ကြီးဌာနရဲ့ ထုတ်ပြန်ချက်အရ သိရပါတယ်။

အဆိုပါ နိုင်ငံခြားသားများမှာ မြန်မာနိုင်ငံရင်းနှီးမြှုပ်နှံမှု ကော်မရှင်၏ ခွင့်ပြုမိန့်/ အတည်ပြုမိန့်တို့ဖြင့် လုပ်ငန်းဆောင်ရွက်လျက်ရှိသော ရင်းနှီးမြှုပ်နှံမှုလုပ်ငန်းများမှ နိုင်ငံခြားသားများနှင့် ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၌ မှတ်ပုံတင်ဆောင်ရွက်လျက်ရှိတဲ့ ကုမ္ပဏီများမှ နိုင်ငံခြားသားများ ဖြစ်ကြပါတယ်။

ကုမ္ပဏီပေါင်း ၄၆၄ ခုမှ နိုင်ငံခြားသား ၁၁၁၁ ဦးကို လာရောက်သည့် နိုင်ငံပေါင်း ၂၄ နိုင်ငံသို့ ကယ်ဆယ်ရေး လေယာဉ်ဖြင့် လိုက်ပါခွင့်ရနိုင်ရေးအတွက် ဆောင်ရွက်ပေးခဲ့ခြင်းဖြစ်ပါတယ်။
မတ်လကလည်း ကုမ္ပဏီပေါင်း ၅၁၆ ခုတွင် နိုင်ငံပေါင်း ၂၇ နိုင်ငံမှ လာရောက်ကြတဲ့ နိုင်ငံခြားသား ၁၅၁၀ ဦးကို ကယ်ဆယ်ရေးလေယာဉ်ဖြင့် လိုက်ပါခွင့်ရရှိရေးအတွက် စိစစ်ထောက်ခံပေးခဲ့ကြောင်း သိရပါတယ်။

ymg-mnn
#Yangon_Media_Group

#DailyNews
Published - 16 May 2022

၁။ တိုင်းရင်းသားကျေးရွာကို အပန်းဖြေသင်္ဘောများ ဆိုက်ကပ်နိုင်ရေး ဆိပ်ခံဗောတံတားတည်ဆောက်ရန် တင်ဒါခေါ်ယူမည်။

၂။ မုတ်သုန်အဝင်မိုးရာသီမှာ ဖြစ်ပွားနိုင်သည့်သဘာဝဘေးများအတွက် ကြိုတင်ပြင်ဆင်ထား။

၃။ နေ့စဉ်မိုးလေဝသသတင်း။

၄။ အမေရိကန်မှ ယူကရိန်းသို့ပေးပို့သည့်လက်နက်များ မှောင်ခိုဈေးကွက်သို့ ရောက်ရှိလာနိုင်ဟု စုံစမ်းရေးမှူးသတိပေး။... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Ukraine_Crisis
Published 17 May 2022

ယူကရိန်းနိုင်ငံမှ မာရီယူပိုလ်ဆိပ်ကမ်းမြို့ကို ရုရှားတပ်များဝိုင်းရံပြီး လနဲ့ချီအောင်ဗုံးကျဲတိုက်ခိုက်ခဲ့ကြပြီးနောက် ရုရှားလက်ထဲသို့ ပေးအပ်လိုက်ရပြီဖြစ်ကာ အဆိုပါမြို့ရှိ ယူကရိန်းနောက်ဆုံးခံတပ်မှ ကျန်ရှိနေတဲ့တပ်သားများကို ကယ်ထုတ်ခဲ့ကြကြောင်း ယူကရိန်းစစ်တပ်က အင်္ဂါနေ့မှာ ပြောကြားလိုက်ပါတယ်။

ရာနဲ့ချီတဲ့ တိုက်ခိုက်ရေးသမားတွေထဲမှာ ဒဏ်ရာရသူများလည်းပါဝင်နေပြီး သူတို့ကို ရုရှားထိန်းချုပ်ရာမြို့များသို့ ကယ်ဆယ်ပို့ဆောင်ခဲ့ကြရာ ယူကရိန်းစစ်ပွဲအတွင်း အကြာရှည်ဆုံးနဲ့ အသေကြေအများဆုံး တိုက်ပွဲဖြစ်ခဲ့ပြီး ယူကရိန်းအတွက်တော့ အတော်လေးအထိနာခဲ့ရပါတယ်။

အဆိုပါမြို့ကို ရုရှားတို့တိုက်ခိုက်ခဲ့ပြီးနောက် တစ်မြို့လုံးပျက်စီးကြေမွသွားပြီး မြို့ထဲရှိလူပေါင်းသောင်းနဲ့ချီသေဆုံးခဲ့တယ်လို့ ယူကရိန်းဘက်က ထုတ်ပြန်လိုက်ပါတယ်။

မာရီယူပိုလ်ရှိကျန်တဲ့နေရာတွေ ရုရှားထိန်းချုပ်မှုအောက်ရောက်ရှိသွားချိန်မှာ ယူကရိန်းတပ်ဖွဲ့ဝင်တွေနဲ့ အရပ်သားရာဂဏန်းလောက်ဟာ အာဇော့ဗ်စတယ်လ် သံမဏိစက်ရုံမြေအောက်မှာ ပုန်းအောင်နေခဲ့ရပါတယ်။

လတ်တလောရက်သတ္တပတ်များအတွင်း မြေအောက်ထဲမှာ ပုန်းအောင်းနေတဲ့အရပ်သားတွေကို ကယ်ထုတ်နိုင်ခဲ့သလို တပ်ဖွဲ့ဝင် ၂၆၀ ကျော်နဲ့ ဒဏ်ရာရသူအချို့ကို ရုရှားထိန်းချုပ်ရေးနယ်မြေများထံသို့ တနင်္လာနေ့က ပို့ဆောင်ခဲ့ပါတယ်။

ယူကရိန်းစစ်တပ်ရဲ့စစ်ဦးစီးချုပ်က မာရီယူပိုလ်ခံတပ်ဟာ ခုခံတိုက်ခိုက်ရေး တာဝန်ကို အပြည့် အဝဆောင်ရွက်နိုင်ခဲ့ကြောင်း၊ စစ်မှုထမ်းတွေကိုကယ်တင်ဖို့ အာဇော့ဗ်စတယ်လ်မှာ အခြေချထားတဲ့ တပ်မှူးများကို စစ်ရေးအထက်ပိုင်းက အမိန့်ပေးခဲ့ကြောင်း၊ မာရီယူပိုလ်မှ ခုခံသူတွေက အခုတိုက်ပွဲရဲ့ သူရဲကောင်းများဖြစ်ကြောင်း ထုတ်ပြန်ကြေညာလိုက်ပါတယ်။

သံမဏိစက်ရုံမှ ဒဏ်ရာရစစ်သည် ၅၃ ဦးကို အရှေ့ဘက် ၃၂ ကီလိုမီတာ ရုရှားထိန်းချုပ်ရေးနယ်မြေ နိုဗိုအာဇော့ဗ်စ်ရှိ ဆေးရုံသို့ခေါ်ဆောင်သွားခဲ့ကြောင်း ယူကရိန်းဒုတိယကာကွယ်ရေးဝန်ကြီးက ပြောကြားခဲ့ပါတယ်။

နောက်ထပ် ၂၁၁ ဦးကိုတော့ ရုရှားကျောထောက်နောက်ခံပြုခွဲထွက်ရေးသမားများ အုပ်ချုပ်ရာ အိုလေနစ်ဗ်ကာမြို့သို့ ခေါ်ဆောင်သွားခဲ့ပါတယ်။

ကယ်ထုတ်ခံရသူများဟာ ရုရှားနဲ့အကျဉ်းသားလဲလှယ်ရေးကိစ္စမှာ အကျုံးဝင်ပတ်သက်နေမှာဖြစ်ပါတယ်။

"ကျွန်တော်တို့လူတွေကို ကျွန်တော်တို့ကယ်ဆယ်နိုင်ဖို့ မျှော်လင့်ပါတယ်။ သူတို့ထဲမှာ ဒဏ်ရာအလွန်ပြင်းထန်တဲ့သူတွေလည်း ပါနေပါတယ်။ အခုတော့ ပြုစုစောင့်ရှောက်ခံနေရပါပြီ။ ယူကရိန်းရဲ့သူရဲကောင်းတွေကို အသက်ရှင်လျက်ပြန်လိုချင်ပါတယ်" လို့ ယူကရိန်းသမ္မတ'ဗိုလိုဒီမီယာဇယ်လန်စကီ'က နံနက်ခင်းမိန့်ခွန်းမှာ ပြောကြားသွားပါတယ်။

တနင်္လာနေ့နှောင်းပိုင်းမှာ ယူကရိန်းတပ်ဖွဲ့ဝင်တွေကို သယ်ဆောင်လာတဲ့ ဘတ်စ်ကား ၅ စီးဟာ အာဇော့ဗ်စတယ်လ်မှ ထွက်လာပြီး နိုဗိုအာဇော့ဗ်သို့ရောက်ရှိလာတာကို ရိုက်တာသတင်းဌာနက တွေ့ရှိလိုက်ရပါတယ်။

ရုရှားကျူးကျော်ရေးသင်္ကေတဖြစ်တဲ့ 'Z'အမှတ်တံဆိပ်ပါကားပေါ်မှာ တပ်သားတွေကို လူနာသယ်ထမ်းစင် ၃ ဆင့်ဖြင့်ထပ်ထားတာကိုတွေ့ရပါတယ်။

လူတစ်ဦးဆိုရင် ဘီးတပ်ကုလားထိုင်ဖြင့်နေနေရပြီး ခေါင်းကိုပတ်တီးထူထူဖြင့် တင်းတင်းကြပ်ကြပ်ပတ်ထားတာကို တွေ့မြင်ခဲ့ရပါတယ်။

Source: Reuters.
#Yangon_Media_Group

#LocalNews
Published - 17 May 2022

(၃၁) ကြိမ်မြောက်၊ အရှေ့တောင်အာရှအားကစားပြိုင်ပွဲ၊ ဘိလိယက်နှင့် စနူကာအားကစားနည်းပြိုင်ပွဲရဲ့ ဘိလိယက်အားကစားပြိုင်ပွဲ ပွဲစဉ်မှာ စင်္ကာပူပြိုင်ဘက်ကိုအနိုင်ရရှိပြီး မြန်မာဘိလိယက်အားကစားသမားဦးပေါက်စ ရွှေတံဆိပ်ဆုရရှိခဲ့တယ်လို့ သိရပါတယ်၊၊

မြန်မာနိုင်ငံဘိလိယက် အားကစားနည်းအတွက် အရှေ့တောင်အာရှ အားကစားပြိုင်ပွဲတစ်လျှောက် အင်္ဂလိပ်ဘိလိယက် အားကစားနည်းမှ ရွှေတံဆိပ်ဆုကို ပထမဦးဆုံးအကြိမ် ဦးပေါက်စက အရယူပေးနိုင်ခဲ့တာ ဖြစ်ပါတယ်၊၊

အဆိုပါ ပြိုင်ပွဲရဲ့ အင်္ဂလိပ်ဘိလိယက်အားကစားပြိုင်ပွဲ၊ တစ်ဦးချင်းပြိုင်ပွဲမှာ မြန်မာဘိလိယက်အားကစားသမား ဦးပေါက်စဟာ ဗိုလ်လုပွဲစဉ်မှာ စင်္ကာပူရဲ့နာမည်ကြီး ဘိလိယက်ကစားသမား Peter Gilchrist ကိုအနိုင်ရရှိခဲ့ပြီး မြန်မာနိုင်ငံအတွက် ပဉ္စမမြောက်ရွှေတံဆိပ်ဆုကို မေလ (၁၇)ရက်မှာ ရယူပေးနိုင်ခဲ့တာဖြစ်ပါတယ်၊၊

(၃၁) ကြိမ်မြောက်၊ အရှေ့တောင်အာရှအားကစားပြိုင်ပွဲ၊ ဘိလိယက်နှင့် စနူကာအားကစားနည်းပြိုင်ပွဲရဲ့ ပွဲစဉ်များကို မေလ (၁၄) ရက်ကနေ (၂၂) ရက်နေ့ထိ ကျင်းပလျက်ရှိနေတယ်လို့သိရပါတယ်၊၊

ymg/tthl
#Yangon_Media_Group

#LocalNews
Published - 17 May 2022

ဧရာဝတီတိုင်းဒေသကြီးရှိ ပျူဂဝံမြို့ဟောင်းကို ခရီးသွားနေရာဒေသအသစ်အဖြစ် ဖော် ဆောင်သွားနိုင်ဖို့ စီစဥ်ဆောင်ရွက်နေတယ်လို့ ပျူဂဝံမြို့ဟောင်း ဆရာတော် ဦးပညာသီရိက မိန့်ကြားပါတယ်။

အဆိုပါ ပျူဂဝံမြို့ဟောင်းဟာ ဧရာဝတီတိုင်းဒေသကြီး၊ အင်္ဂပူမြို့နယ်၊ ကွင်းကောက်မြို့အနီးမှာ တည်ရှိပြီး ရှေးပျူခေတ်လက်ရာတွေ အများအပြားရှိနေတဲ့ ရှေးဟောင်းမြို့တော်တစ်ခုလည်းဖြစ်ပါတယ်။

လက်ရှိမှာ ပျူဂဝံမြို့ဟောင်းဒေသကို ခရီးသွားနေရာဒေသအသစ်အဖြစ် ဖော်ဆောင်နေသလို အဆိုပါ မြို့ဟောင်းနှင့် ပတ်သက်တဲ့ အထောက်အထားတွေကို စာရင်းပြုစုပြီး မြို့ဟောင်းအ ကြောင်း စာတမ်းတင်သွင်းနိုင်ဖို့ အဂ်လန် တက္ကသိုလ်ကျောင်းသားအဖွဲ့က သုတေသနစာတမ်း ပြုလုပ်နေတာဖြစ်တယ်လို့ ပျူဂဝံမြို့ဟောင်း ဆရာတော်က အခုလို မိန့်ကြားခဲ့ပါတယ်။

"ပျူဂဝံမြို့ဟောင်းကို ခရီးသွားနေရာဒေသအသစ်အဖြစ် ဖော်ဆောင်ဖို့ ခရီးသွားကုမ္ပဏီတွေနဲ့ ဆွေးနွေးထားတာ တွေရှိပါတယ်။ အခု အထက်ဘက်မှာဆိုလဲ မြို့ဟောင်းရဲ့ နေရာတွေ ဘုရား ခြေတော်ရာတွေ ကျောက်ခေတ်လက်ရာတွေ ကျောက်ခေတ်ပစ္စည်းတွေ တော်တော်များများ တွေ့ရတယ်။ ဒါတွေကိုလည်း အခုမှတ်တမ်းပြုစုနေတယ်ပေါ့။ အထက်ဘက်မှာတော့ လမ်း တွေက သိပ်မကောင်းဘူး။ ဒါတွေကိုလည်း အခုမိုးတွင်းမှာအပြီး ပြင်သွားဖို့ ဘုန်းဘုန်းတို့ စီစဥ် နေပါတယ်။ ခရီးသွားတွေကလဲ သူ့ဟာနဲ့သူတော့ လာကြပါတယ်။ လေ့လာကြပါတယ်၊ ပြောရရင် ခရီးသွားတွေကတော့ မပြတ်ရှိ နေပါတယ်။"လို့ ဆရာတော် ဦးပညာသီရိက မိန့်ကြားပါတယ်။

ရှေးဟောင်းသုတေသနဋ္ဌာနမှ ဆရာဘုန်းတင့်ကျော်ကတော့ ဒီနေရာကို ပျူမြို့ဟောင်းဟု ပြောဆိုထားပြီး ပျူဂဝံမြို့ဟောင်းနှင့် ပတ်သက်သည့် အကြောင်းအရာအပြည့်အစုံကိုလည်း ကမ္ဘာတက္ကသိုလ်ပေါင်းထောင်ကျော်ရှိသည့် အကယ်ဒမီ Website တွင် ရေးသားလွှင့်တင်ထားတယ်လို့ ဆိုပါတယ်။

အဆိုပါ မြို့ဟောင်းဟာ ဘီစီ ၃ ရာစုနှင့် ၆ ရာစု အတွင်း တကောင်းခေတ်ဟုခေါ်တွင်သော ပျူခေတ်တွင် ပျူမြို့ ၃၂ မြို့၊ တပ်မြို့ ၉ မြို့ ၊ မြို့ငယ်ပေါင်း ၂၀၀ ကျော်ရှိသည့်အနက် ပင်လယ်ပျူမြို့ဟူသော မြို့သည်ဧရာဝတီတိုင်း အတွင်းတည်ရှိခဲ့တာ ဖြစ်တယ်လို့ သိရပါတယ်။

ဒါ့အပြင် ယခုမြို့ဟောင်းသည် အင်းဝခေတ်ထက်နှစ်တစ်ထောင်ပိုစောသော ပျူခေတ်လက်ရာဟုလည်း ပညာရှင်တွေက ကောက်ချက်ချထားပါတယ်။

ထို့အပြင် ပျူဂဝံမြို့ဟောင်းဒေသကို ပြည်တွင်း၊ ပြည်ပခရီးသွားဧည့်သည်တွေ လာရောက်လည်ပတ်နိုင်ကြဖို့နဲ့ ခရီးသွား နေရာဒေသ အသစ်အဖြစ်ဖော်ဆောင်ဖို့ ပြည်တွင်း ခရီးသွားကုမ္ပဏီ (၄၀)ဝန်းကျင်ခန့်နဲ့ ဆွေးနွေးမှုတွေကိုလည်း ပြုလုပ်ထားတယ်လို့လည်း သိရှိရပါတယ်။

ymg/kg
#Yangon_Media_Group

#LocalNews
Published - 17 May 2022

အမေရိကန်နိုင်ငံသို့ ပညာတော်သင်သွားရောက်ဖို့ စိတ်ဝင်စားသူတွေအတွက် ဟမ်ဖရီနဲ့ ဖူးဘရိုက်ပညာတော်သင်အစီအစဥ်တွေအကြောင်းကို အမေရိကန်သံရုံးက အွန်လိုင်းကနေတစ်ဆင့်ထုတ်လွှင့်သွားမှာ ဖြစ်ပါတယ်၊၊

အဲဒီ့အစီအစဥ်ကို မြန်မာဘာသာနဲ့ ထုတ်လွှင့်သွားမှာဖြစ်ပြီး အရင်ပညာတော်သင်အဟောင်းတွေက သူတို့ရဲ့ အတွေ့အကြုံတွေကို မျှဝေပေးကြမယ်လိုဆိုပါတယ်၊၊

ဟမ်ဖရီနဲ့ ဖူးဘရိုက်ပညာတော်သင်အစီအစဥ်တွေအကြောင်းလေ့လာလိုသူတွေအနေနဲ့
မေလ(၂၀)ရက် ညနေ(၄:၃၀)မှာအမေရိကန်သံရုံးက ပေးထားတဲ့ Zoom Link - https://tinyurl.com/ FH2023zoom/Meeting ID - 161 683 4400
Passcode - 821021မှာ တက်ရောက်နိုင်မှာဖြစ်ပါတယ်၊၊

ဖူးဘရိုက်နဲ့ ဟမ်ဖရီပညာတော်သင်အစီအစဥ်တွေအကြောင်း ကြေညာချက်နဲ့အသေးစိတ်အချက်အလက်တွေကို https://go.usa.gov/xus7f နဲ့ မိမိတို၏ သံရုံးဝက်ဘ်ဆိုက် https://mm.usembassy.gov မှာလည်း ဖတ်ရှုနိုင်ပြီး ဇူလိုင်(၁)ရက်လျှောက်လွှာပိတ်ရက်မတိုင်ခင် အခုကစပြီးလျှောက်ထားလိုရတယ်လိုသိရပါတယ်၊၊

ymg/tthl
#Yangon_Media_Group

#LocalNews
Published_17 May 2022

သရုပ်ဆောင်ရဲတိုက်ရင်ဆိုင်နေရသော မူးယစ်အမှုကို လာမယ့် မေလ ၁၉ ရက် ကြာသပတေးနေ့တွင် အမိန့်ချမည်ဖြစ်ကြောင်း သူ၏အမှုကို လိုက်ပါဆောင်ရွက်ပေးနေသူတစ်ဦးက YMG ကို ပြောသည်။

ရဲတိုက်ကို မူးယစ်ဆေးဝါးလက်ဝယ်တွေ့ရှိမှုဖြင့် မူးယစ်ဆေးဝါးဆိုင်ရာဥပဒေပုဒ်မ ၁၆(ဂ)/၂၃ ဖြင့် စွဲဆိုထားခြင်းဖြစ်သောကြောင့် လက်ရှိတွင် အဆိုပါအမှုကို ရင်ဆိုင်နေရခြင်းလည်း ဖြစ်သည်။

၎င်းကို မေလ ၁၂ ရက်က ရန်ကုန်အနောက်ပိုင်းခရိုင်တရားရုံး၌ အပြီးသတ်လျှောက်လဲချက်ပေးခဲ့ခြင်းဖြစ်ကြောင်း၊ ပြစ်မှုထင်ရှားပါက ထောင်ဒဏ် ၅ နှစ်မှ ၁၀ နှစ်ထိ ချမှတ်နိုင်ကြောင်းလည်း သိရသည်။

ထောင်ဒဏ်သုံးနှစ်ချမှတ်ခံထားရသော ၅၀၅ (က) အမှုကိစ္စအတွက် ပြီးခဲ့သည့် မတ်လ ၂ ရက်တွင် နစက၏ ၅၀၅ (က) လွတ်ငြိမ်းစာရင်း၌ သရုပ်ဆောင် ရဲတိုက်ပါဝင်ခဲ့သောကြောင့် လက်ရှိတွင် မူးယစ်ဆေးဝါးအမှုတစ်ခုသာ ကျန်ရှိတော့ကြောင့် သိရသည်။

ymg/mt
#Yangon_Media_Group

#LocalNews
Published - 17 May 2022

ကချင်ပြည်နယ်၊ ပူတာအိုဒေသတွင် ကုန်စျေးနှုန်းများ အဆမတန်မြင့်တက်နေမှုကြောင့် ဒေသခံများ အနေနဲ့အခက်တွေ့နေရတယ်လို့ သိရပါတယ်။

ယင်းကဲ့သို့ ကုန်စျေးနှုန်းများမြင့်တက်ရတာဟာ လမ်းပန်းဆက်သွယ်ရေး အခက်အခဲနှင့် ကုန်ပစ္စည်းများ ပြတ်လပ်မှုတို့ကြောင့်ဖြစ်တယ်လို့ ပူတာအိုဒေသခံတွေက ပြောပါတယ်။

"တောင်ပေါ်ဘက်မှာဆိုတော့ လမ်းပန်းဆက်သွယ်ရေး အရေးကြီးတယ်။ တချို့နေရာမှာ စားဝတ်နေရေး ခက်ခဲတာတွေရှိတယ်။ လမ်းပန်းဆက်သွယ်ရေးက တောင်ပေါ်ဘက်မှာ နှင်းမုန်တိုင်းတွေကျပြီးတော့ လမ်းတွေပျက်တာပေါ့၊ လမ်းတွေပျက်တယ် အဲ့လိုရှိတာပေါ့။ အခု မိုးတွင်းဆိုရင် ပိုဆိုးတယ်။ လမ်းတွေပြင်ထားတယ်ဆိုပေမယ့် သစ်ပင်တွေလဲ နေတဲ့အတွက် ရှင်း နေရတယ်။

အဲ့လိုတွေကြောင့် ကုန်စည်စီးဆင်းမှုအပိုင်းမှာလဲ အခက်အခဲရှိတယ်။ ဝေးလံခေါင်ဖျားတဲ့ ဒေသတွေ ကျေးရွာတွေဆို ပိုဆိုးတာပေါ့နော်။"လို့ ပူတာအိုမြို့ဒေသခံတစ်ဦးက ပြောပြခဲ့ပါတယ်။

လက်ရှိ ပူတာအိုဒေသတွင် ဆန်တစ်အိတ်လျှင် ကျပ် ၄၀၀၀၀ မှ ကျပ် ၇၀၀၀၀ အထိ ပေါက် စျေးရှိနေပြီး စားဆီတစ်ပိဿာလျှင် ကျပ် ၁၀၀၀၀ နှင့် စက်သုံးဆီ ဓါတ်ဆီတစ်ဂါလံလျှင် ကျပ် ၁၀၀၀၀ ကျော်အထိ ပေါက်စျေးရှိနေတာဖြစ်တယ်လို့ သိရပါတယ်။

"အခုပြောရရင် ကုန်စျေးနှုန်းတွေက ပိုတက်တယ်။ အများကြီးတက်တယ်။ ဟိုးတောင်ပေါ်တွေဆို ပိုဆိုးတယ်။ ဒီကိုဆက်သွယ်တာကလဲ ကုန်လမ်းကြောင်းတစ်ကြောင်းပဲရှိတာလေ၊ ဒီက ဒေသခံတွေက တောင်သူတွေများတယ်၊ ကုန်စျေးနှုန်းတက်တဲ့အခါကျတော့ လူမှုဘဝတွေ ရပ်တည်ဖို့က ခက်ခဲတာပေါ့ ။"လို့ ၄င်းက ဆက်လက်ပြောပြခဲ့ပါတယ်။

အဆိုပါ ပူတာအို ဒေသဟာ လမ်းပန်းဆက်သွယ်ရေးခက်ခဲတဲ့ ဒေသတစ်ခုလည်း ဖြစ်ပါတယ်။

Photo - CJ

ymg/kg
#Yangon_Media_Group