#Local_News
Published -19 August 2022

နစက၏ ပုဂ္ဂလိကပိုင်ပြုလုပ်ရေးကော်မရှင် လက်ထဲတွင်ရှိသည့် နိုင်ငံပိုင်အဆောက်အဦ၊ တိုက်ခန်းနှင့် မြေကွက် ၂၇ ခုကို အိတ်ဖွင့်တင်ဒါစနစ်ဖြင့် ရောင်းချမည်ဖြစ်ကြောင်း နိုင်ငံပိုင်သတင်းစာတွင် ကြော်ငြာထားသည်။

ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ ဧရာဝတီတိုင်းနှင့် ရှမ်းပြည်နယ်တိုတွင်ရှိသည့် နိုင်ငံပိုင် မြေကွက်များ၊ တိုက်ခန်းများ၊ အဆောက်အဦများကို ရောင်းချမည်ဖြစ်ပြီး အဆိုပါရောင်းချမည့်အဆောက်အဦတွေ၏ လိပ်စာတွေနှင့်တကွ ကြော်ငြာထားခြင်း ဖြစ်သည်။

ယင်းအပြင် ဝယ်ယူလိုသူတွေအနေဖြင့် အဆိုပြုလွှာတင်သွင်းပြီး ဝယ်ယူရမည်ဖြစ်ကာ တင်ဒါလျှောက်လွှာကို ဩဂုတ်လ ၁၉ ရက်မှ စက်တင်ဘာလ ၂ ရက်ထိ ရောင်းချပေးမည်ဖြစ်ကြောင်း ဖော်ပြထားသည်။

ဝယ်ယူသူများအနေဖြင့် လျှောက်လွှာတင်သွင်းသည့်အခါတွင်လည်း ဝယ်ဖိုအဆိုပြုထားသည့်နေရာကို သွားရောက်ကြည့်ရှုပြီးစီးပြီဖြစ်ကြောင်း ဝန်ခံချက်နှင့် ပူးတွဲတင် ပြရမည်ဟု ဖော်ပြထားသည်။

ymg/sth
#Yangon_Media_Group

#Local_News

Published 19 August 2022

ရှမ်းပြည်နယ်( အရှေ့ပိုင်း)တာချီလိတ်မြို့၊ဆန်ဆိုင်း(ခ)ရပ်ကွက်၌ ယမန်နေ့ည ၁၀ နာရီခွဲအချိန်တွင် လင်မယားချင်း စကားများရန်ဖြစ်ရာမှ ဦးခေါင်းထိခိုက်ဒဏ်ရာ ပွန်းပဲ့ဒဏ်ရာများဖြင့် ဇနီးဖြစ်သူအမျိုးသမီး သေဆုံးသွားသည့် ဖြစ်စဉ်တစ်ခုဖြစ်ပွားခဲ့ကြောင်း သိရှိရသည်။

သေဆုံးသူ အိမ်နီးနားချင်းများ၏ ပြောဆိုချက်များအရ အဆိုပါလင်မယားသည် ယမန်နေ့ နေ့လည် ၂ နာရီအချိန်ကပင် စကားများရန်ဖြစ်နေကြောင်း၊ မကြာခဏ စကားများရန်ဖြစ်လေ့ရှိကြောင်း သိရှိရပြီး၊ ညပိုင်းတွင် ကိုယ်ထိလက်ရောက်ရိုက်နှက်သဖြင့် ဇနီးဖြစ်သူအပြင်းအထန် ဒဏ်ရာရရှိကာ ဦးလှမိုး နာရေးကူညီမှု အသင်းမှ အရေးပေါ်ပြည်သူ့ဆေးရုံသို့ပို့ဆောင်စဉ် သေဆုံးသွားခဲ့ကြောင်းသိရှိရသည်။

ဇနီးဖြစ်သူအား ကိုယ်ထိလက်ရောက်ရိုက်နှက်သူ ခင်ပွန်းသည်ကို သက်ဆိုင်ရာ ရဲတပ်ဖွဲ့မှ ခေါ်ဆောင်သွားပြီး အမှုဖွင့်အရေးယူရန် ဆောင်ရွက်လျက်ရှိကြောင်း သိရှိရသည်။

ymg/ys-tcl
#Yangon_Media_Group

Published 19 August 2022

မြန်မာနှင့်အိန္ဒိယဆက်ဆံရေးကို ယနေ့ နိုင်ငံရေးကိုကြည့်ပြီး ဝေဖန်အကဲဖြတ်လို့မရဘူးလို့ အိန္ဒိယနိုင်ငံ ပြည်ပရေးရာဝန်ကြီး ဆူဘရာမန်ယမ် ဂျေရှန်ကာက ပြောလိုက်ပါတယ်။

ထိုင်းနိုင်ငံ ဘန်ကောက်မြို့က ချူလာလောင်ကွန်တက္ကသိုလ်မှာ ပရိဿတ်တွေကို ဩဂုတ် ၁၈ရက်က မိန့်ခွန်းပြောကြားစဉ်မှာ အိန္ဒိယပြည်ပ ရေးရာ ဝန်ကြီးကပြောကြားခဲ့တာဖြစ်တယ်လို့ စင်္ကာပူမီဒီယာတစ်ခုဖြစ်တဲ့ ချယ်နယ်နယူးအေရှား သတင်း ဌာနက ရေးသားခဲ့ ပါတယ်။

မြန်မာနိုင်ငံအပေါ် အိန္ဒိယရဲ့ရပ်တည်မှုဟာ ဆယ်စုနှစ်များစွာ တစ်သတ်မတ်တည်းရှိပြီး ကိုလိုနီစနစ်ကို တွန်းလှန်ခဲ့ကြတဲ့ လွတ်လပ်ရေးကြိုးပမ်းခဲ့တဲ့ကာလတွေကိုပြန်သွားကြည့်လို့ရတယ် လို့ သူကပြောပါတယ်။

Telegramတွင်ယခုသတင်းဖတ်လိုပါက

အိန္ဒိယဟာ မြန်မာနိုင်ငရဲ့ တိုက်ရိုက်အိမ်နီးချင်းဖြစ်လို့ မြန်မာစစ်အစိုးရကို ဆက်ဆံရေးကို ရှောင်ကွင်းလို့မရဘူးလို့ သူကပြောပါတယ်။ ဘာဖြစ်လို့လဲဆိုတော့ ရာဇဝတ်ဂိုဏ်းတွေ၊ကိုရိုနာဗိုင်းရပ်စ်နှင့် မြန်မာနိုင်ငံထဲမှာ အိန္ဒိယသူပုန်တွေရှိနေ တာစတဲ့ နယ်စပ်ကိစ္စတွေရှိနေလို့ဖြစ်တယ်လို့ ဂျေရှန်ကာ ကပြောပါတယ်။

“ ကျွန်တော်တို့ဟာ အိမ်နီးချင်းနိုင်ငံတစ်ခုအနေနှင့် နယ်စပ်ဆက်ဆံရေးနှင့် ရှုပ်ထွေးမှုတွေကို စီမံခန့်ခွဲဆောင်ရွက်  နေကြတယ်” လို့ သူကပြောပါတယ်။

အိန္ဒိယဟာ မြန်မာရဲ့ အနီးကပ်ဆုံး အိမ်နီးချင်းဖြစ်လို့ မြန်မာ့ဒီမိုကရေစီနှင့်ပတ်သက်ပြီး လူတတ်ကြီးတွေလုပ်နေကြတဲ့ အများကြီးဝေးကွာနေတဲ့ နိုင်ငံတွေနှင့် မတူတဲ့  မျှဝေခံစားမှုနှင့် နားလည်မှုတွေရှိနေတာဖြစ်တယ်လို့ သူကပြောပါတယ်။

စစ်အစိုးရနှင့် ထိတွေ့ဆက်ဆံမှုတွေလုပ်နေပေမယ့် မြန်မာနိုင်ငံအတွက် အကောင်းဆုံးဟာ ဒီမိုကရေစီဖြစ်ပြီး ပြည်သူတွေရဲ့ သဘောထားနှင့် ဆန္ဒတွေကလည်း အဲဒါကို ထင်ဟပ်နေတယ်လို့ ဂျေရှန်ကာကပြောပါတယ်။

Reference: CNA

#Local_News
Published_ 19 Aug 2022

အာဆီယံနိုင်ငံများအကြား ငွေရေးကြေးရေးစနစ် တည်ငြိမ်ရေး၊ တီထွင်ဆန်းသစ်ခြင်းနှင့် ဆုံးရှုံးနိုင်ခြေများ ဆွေးနွေးခြင်းကို ဩဂုတ် ၁၈ ရက် နံနက်ပိုင်းတွင်ကျင်းပရာ အရှေ့တောင်အာရှနိုင်ငံများမှ ဗဟိုဘဏ်များ၏ ဒုတိယဥက္ကဋ္ဌများ၊ အရာထမ်းများ၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဒေါ်သန်းသန်းဆွေနှင့် ဗဟိုဘဏ်ဌာနအသီးသီး မှ အရာထမ်းများ တက်ရောက်ကြပါတယ်။

အစည်းအဝေးတွင် SEACEN အဖွဲ့ဝင်နိုင်ငံများမှ ငွေရေးကြေးရေးစနစ် တည်ငြိမ်ရေးနှင့် ကြီးကြပ်စစ်ဆေးခြင်း ဆောင်ရွက်နေတဲ့ ဗဟိုဘဏ်ဒုတိယဥက္ကဋ္ဌများ၏ နှစ်စဉ်ကျင်းပတဲ့ ဆွေးနွေးပွဲဖြစ်ပြီး ယင်းဆွေးနွေးပွဲသို ဗဟိုဘဏ် ဒုတိယဥက္ကဋ္ဌများ၊ ဗဟိုဘဏ် အရာထမ်းများ၊ ပုဂ္ဂလိကကဏ္ဍမှ အမှုဆောင်အရာရှိများ တက်ရောက်ခဲ့ကြပါတယ်။

ဆွေးနွေးပွဲတွင် ထွန်းသစ်စဈေးကွက်စီးပွားရေးတွင် Sovereign Debt နှင့် ငွေရေးကြေးရေးတည်ငြိမ်မှု၊ Central Bank Digital Currencies (CBDCs)၏ စိန်ခေါ်မှုများနှင့် Caribbean နိုင်ငံများ၏ Digital Currencies အကောင်အထည် ဖော်ဆောင်ရွက်ခြင်းမှ သင်ခန်းစာများ၊ အာဆီယံနိုင်ငံများ၏ ငွေရေးကြေးရေးစနစ် တည်ငြိမ်ရေးနှင့် ဖြစ်ပေါ်လာနိုင်သော ဆုံးရှုံးနိုင်ခြေများ၊ ငွေရေးကြေးရေးစနစ် တည်ငြိမ်ရေးဆောင်ရွက်ရာတွင် Cyber တိုက်ခိုက်မှုနှင့် Cyber ခြိမ်းခြောက်မှုများနှင့် စပ်လျဉ်းသော စိန်ခေါ်မှုများ၊ Big Techs၊ Fin Techs များဆိုင်ရာ အကျိုးကျေးဇူးများနှင့် ဆုံးရှုံးနိုင်ခြေများကို ဆွေးနွေးကြကြောင်း သိရပါတယ်။

Global Macro Trend အရကမ္ဘာ့ရေနံဈေး မြင့်တက်ခြင်း၊ ငွေကြေးဖောင်းပွမှုများ မြင့်တက်နေခြင်း၊ ရာသီဥတုပြောင်းလဲနေခြင်း၊ သဘာဝဘေးအန္တရာယ်များ၊ Cyber တိုက်ခိုက်မှုများ၊ Geopolitics အခြေအနေများကြောင့် ငွေရေးကြေးရေးစနစ်တည်ငြိမ်ရေး အတွက် မူဝါဒချမှတ်သူများသည် နိုင်ငံပိုင်ဘဏ်များအတွက် ထိရောက်သော စည်းမျဉ်း စည်းကမ်းများ၊ ကြီးကြပ်စစ်ဆေးခြင်းဆိုင်ရာများ တိုးမြှင့်ဆောင်ရွက်ရန်၊ Multiple Channels များကို ထည့်သွင်းစဉ်းစား၍ ဘဏ်များ အား Stress Testing Exercises များဆောင်ရွက်ရန်တို ဆွေးနွေးခဲ့ကြပါတယ်။

ဒုတိယနေ့အစီအစဉ်ကို ဒီကနေ့နံနက် ၇ နာရီခွဲတွင် ဆက်လက်ကျင်းပခဲ့ရာ Crypto Currency ကြောင့် ငွေရေးကြေးရေး ကဏ္ဍတည်ငြိမ်ရေးကို ထိခိုက်စေနိုင်သည့် အကြောင်းအရာများ၊ Crypto Currency ကြောင့် ဖြစ်ပေါ်လာနိုင်သည့် စိန်ခေါ်မှုများအား ရင်ဆိုင်ကျော်လွှားနိုင်ရန်အတွက် ငွေရေးကြေးရေးကဏ္ဍတွင် ကြပ်မတ်ဆောင်ရွက်သွား နိုင်သည့် အစီအစဉ်များနှင့် ရာသီဥတုပြောင်းလဲ/ဖောက်ပြန်ခြင်းကြောင့် ငွေရေးကြေးရေး ကဏ္ဍတွင် ဆုံးရှုံးနိုင်သည့်အခြေအနေများကို ကာကွယ်ရန်အစီအစဉ်များ ဆွေးနွေးခဲ့ ကြကြောင်း သတင်းရရှိပါတယ်။

ygm_mnn
#Yangon_Media_Group

#World_Health
Published 19 August 2022

အိမ်သာတက်တဲ့အခါ ၅ မိနစ်ထက်ကြာအောင် မထိုင်သင့်ဘူးလို့ ကျွမ်းကျင်သူများက အကြံပြုထားပါတယ်။

ဒါကြောင့် အိမ်သာတက်နေစဉ် စာဖတ်ခြင်း၊ ဖုန်းအသုံးပြုခြင်းတို့ကိုလည်း မပြုလုပ်သင့်ပါဘူး။

ဗြိတိန်လူမျိုးများကို လတ်တလောစစ်တမ်းကောက်ယူကြည့်ရာမှာ တစ်ပတ်အတွင်း အိမ်သာတက်ချိန် ပျမ်းမျှအားဖြင့် ၃ နာရီခွဲရှိတာကို တွေ့ရှိရပါတယ်။

လူတစ်ယောက်ဟာ တစ်နေ့ကို အိမ်သာထဲသို ၄ ကြိမ်မှ ၇ ကြိမ်ခန့် ဝင်ရောက်လေ့ရှိပြီး အိမ်သာတစ်ခါတက်ရင် အချိန် ၅ မိနစ်ခန့်ကြာမြင့်ပါတယ်။

ဘာကြောင့် ဒီလိုအချိန်ကုန်နေရလဲဆိုရင် အိမ်သာတက်နေရင်း ဖုန်းအသုံးပြုခြင်း၊ ဗီဒီယိုကြည့်ခြင်း၊ စာရိုက်ခြင်းတို့ ပြုလုပ်ကြတာကြောင့်လို့ သိရပါတယ်။

ဒီလိုမျိုး အိမ်သာအကြာကြီးတက်နေပြီး အောက်ပိုင်းမှာ ဖိအားများလာရင် လိပ်ခေါင်းဖြစ်တတ်ကြောင်း မိုင်ယိုဆေးခန်းက သတိပေးလိုက်ပါတယ်။

ကျန်းမာရေးကျွမ်းကျင်ပညာရှင်'စတက်ဖာနီတေလာ'က "အိမ်သာထဲထိုင်နေစဉ် သတင်းစာဖတ်တာတို့၊ ဖုန်းပွတ်နေတာတို့ ပြုလုပ်တတ်တယ်ဆိုရင် အူမကြီးနဲ့စအိုကို ထိခိုက်စေနိုင်ပါတယ်" လို့ ပြောပြပါတယ်။

"အိမ်သာမှာထိုင်နေစဉ် စအိုက အောက်ပိုင်းအခြားနေရာတွေနဲ့ အနိမ့်အမြင့်မတူညီဘဲ အူမကြီးအောက်ပိုင်းက သွေးကြောတွေမှာ ဖိအားများလာကာ တဖြည်းဖြည်းနဲ့ လိပ်ခေါင်းဖြစ်လာတတ်ပါတယ်၊ လိပ်ခေါင်းဖြစ်ပြီဆိုရင် မနေနိုင်မထိုင်နိုင်ဖြစ်ပြီး စအိုကနေ သွေးထွက်တတ်ပါတယ်" လို့ ပြောပြလိုက်ပါတယ်။

များသောအားဖြင့် လိပ်ခေါင်းအစုအပုံက အလိုလိုရှင်းသွားတတ်ပေမယ့် ရောဂါပိုးကူးစက်တာတို့ လိပ်ခေါင်းအလွန်စုပုံလာတာတို့ဆိုရင်တော့ ဆရာဝန်နဲ့ပြသသင့်ပါပြီ။

စအိုအတွင်းပိုင်းက သွေးကြောတွေ ဖောင်းကားလာပြီး အဖုတွေဖြစ်လာတဲ့အခါ လိပ်ခေါင်းဖြစ်လာပါတယ်။

လေ့ကျင့်ခန်းမလုပ်သူတွေ၊ လေးလံလွန်းတဲ့ပစ္စည်းတွေကို သယ်မသူတွေ၊ ကိုယ်ဝန်သည်တွေနဲ့ ဝမ်းချုပ်တတ်သူတွေမှာ လိပ်ခေါင်းဖြစ်နိုင်ဖွယ်ရှိပါတယ်။

ဝမ်းညှစ်တဲ့အခါ အားသုံးပြီးညှစ်ရတဲ့သူတွေမှာလည်း လိပ်ခေါင်းဖြစ်တတ်ပါတယ်။

အားသုံးပြီးညှစ်တဲ့အခါ စအိုနားက နေရာမှာပြဲထွက်ပြီး ယားယံနာကျင်ကာ သွေးထွက်လာတတ်ပါတယ်။

ပိုဆိုးလာရင်တော့ အူမကြီးအောက်ပိုင်းက စအိုကိုကျွံထွက်လာတတ်ပါတယ်။

လိပ်ခေါင်းဖြစ်နိုင်တဲ့လက္ခဏာတွေက...

- အိမ်သာတက်တဲ့အခါ တင်ပါးတဝိုက် အဖုများထွက်လာခြင်း

- အလေးစွန့်တဲ့နေရာမှ နာကျင်ခြင်း

- အချွဲထွက်ခြင်း

- အလေးစွန့်ပြီးတာတောင် မကုန်သေးဘူးလို့ခံစားရခြင်း

- စအိုမှသွေးထွက်ခြင်း

- အောက်ပိုင်းယားယံခြင်း တို့ဖြစ်ပါတယ်။

လိပ်ခေါင်းမဖြစ်အောင် အမျှင်ဓာတ်ပါတဲ့အစားအစာစားပြီး ရေများများသောက်ပေးခြင်းဖြင့် ဝမ်းပျော့စေကာ ညှစ်တဲ့နေရာမှာ အားမသုံးရတော့ပါဘူး။

ဆေးဆိုင်မှ ဆေးတွေနဲ့မသက်သာဘူးဆိုရင် ဆရာဝန်နဲ့ပြသင့်ပါတယ်။

ဒီလိုမှမသက်သာဘူးဆိုရင်တော့ ဆေးရုံတက်ကုသဖို့ လိုလာပါပြီ။

"အိမ်သာတက်ရင် အကြာကြီးထိုင်မနေသင့်ပါဘူး၊ ဝမ်းသွားချင်စိတ်ရှိသလောက်ပဲ ထိုင်သင့်ပြီး မသွားတော့ဘူးဆိုတာနဲ့ ထသင့်ပါပြီ" လို့ 'စတက်ဖာနီ'က ပြောပြသွားပါတယ်။

Source: The Sun
#Yangon_Media_Group

#World_Society
Published 19 August 2022

သီးသန့်ပါတီပွဲတွေမှာ ဖင်လန်နိုင်ငံဝန်ကြီးချုပ်'ဆန်နာမာရင်' ကခုန်နေခဲ့တဲ့ဗီဒီယိုတွေ အွန်လိုင်းပေါ်မှာပျံ့နှံသွားတာကြောင့် မကျေမနပ်ဖြစ်နေရတယ်လို့ ကြာသပတေးနေ့မှာ ဝန်ကြီးချုပ်ကပြောကြားခဲ့ပါတယ်။

အသက် ၃၆ နှစ်ရှိ ဝန်ကြီးချုပ်'မာရင်'နဲ့အတူ ပြည်တွင်းမှ နာမည်ကျော်ပုဂ္ဂိုလ်များနဲ့ အနုပညာရှင်များ သီဆိုကခုန်နေတာကို ရိုက်ကူးထားတဲ့ ၂ မိနစ်စာဗီဒီယိုဟာ ဆိုရှယ်မီဒီယာတွေနဲ့ ဖင်လန်မီဒီယာတွေကြား ဗုဒ္ဓဟူးနေ့က ပျံ့နှံသွားခဲ့ပါတယ်။

ထိုဗီဒီယိုတွေက အစကတော့ အင်စတာဂရမ်သီးသန့်အကောင့်မှာ တင်ထားတာဖြစ်ပါတယ်။

၂၀၁၉ ခုနှစ် ဒီဇင်ဘာလက ကမ္ဘာ့အသက်အငယ်ရွယ်ဆုံးအစိုးရအဖွဲ့ခေါင်းဆောင်ဖြစ်လာတဲ့ 'မာရင်'ဟာ ဗီဒီယိုရိုက်နေတယ်ဆိုတာကို သိထားပေမယ့် လူအများကြားပျံ့နှံသွားမယ်လို့ မထင်ခဲ့မိကြောင်း ဆိုပါတယ်။

"ဒီဗီဒီယိုတွေကို သီးသန့်တစ်နေရာမှာ ရိုက်ကူးခဲ့တာပါ၊ ဒါကို အများပြည်သူကြားသိရှိသွားတဲ့ ဒေါသဖြစ်မိပါတယ်၊ ဘယ်သူဖြန့်လိုက်လဲဆိုတာကို မသိရသေးပါဘူး" လို့ သတင်းထောက်တွေကို ပြောကြားခဲ့ပါတယ်။

'မာရင်'ဟာ အရည်အချင်းရှိပြီး သိုသိုသိပ်သိပ်နေတတ်တာကြောင့် ဖင်လန်ပြည်သူအများအပြားက ထောက်ခံအားပေးကြပါတယ်။

ဒါပေမဲ့ ဒီကိစ္စနဲ့ပတ်သက်ပြီး သူ့ရဲ့အုပ်ချုပ်ရေးစနစ်ဟာ မေးခွန်းထုတ်ချင်စရာဖြစ်လာကြောင်း ဟယ်လ်ဆင်ဂင်ဆာနိုမက်သတင်းစာက ဖော်ပြလိုက်ပါတယ်။

"မာရင်က ယုံကြည်တတ်သူဖြစ်ပေမယ့် ဒီလောက်လွယ်လွယ်နဲ့ မယုံသင့်ပါဘူး၊ ဖင်လန်နိုင်ငံကို ပျက်ပြားစေချင်တဲ့ သူတွေလက်ထဲ ဝန်ကြီးချုပ်က သေနတ်ထည့်ပေးလိုက်သလိုပါပဲ" လို သတင်းစာမှာဖော်ပြထားပါတယ်။

ဒီဗီဒီယိုတွေဟာ လွန်ခဲ့တဲ့သီတင်းပတ်အနည်းငယ်လောက်က ပွဲနှစ်ခုမှာ ရိုက်ကူးခဲ့တဲ့ဗီဒီယိုတွေဖြစ်ကာ ထိုပွဲတွေမှာ လူတွေက အရက်သေစာသောက်စားကြပေမယ့် သူသိသလောက်တော့ ဆေးချတဲ့သူမရှိဘူးလို့ 'မာရင်'က ဆိုပါတယ်။

"ကျွန်မတို့ ပါတီလုပ်ပြီး ပျော်ပါးခဲ့ကြတာပဲရှိတာပါ၊ သီချင်းဆိုတယ်၊ ကတယ်၊ နောက်ထပ်ရွေးကောက်ပွဲမတိုင်ခင် တစ်နှစ်တောင်မလိုတဲ့အချိန်ကျမှ စတန့်ထွင်ပြီးဗီဒီယိုတွေကို လွှင့်လိုက်တာမဟုတ်ပါဘူး" လို့ ပြောပြခဲ့ပါတယ်။

'မာရင်'နဲ့ ငယ်ရွယ်တဲ့အခြားအမျိုးသမီးဝန်ကြီးချုပ်တွေဟာလည်း မိန်းမသားဖြစ်နေရတဲ့အတွက် ရုံးအတွင်း စကားများဖြင့် ပစ်မှတ်ထားထိုးနှက်ခြင်းခံနေရကြောင်း ဇန်နဝါရီလက ရိုက်တာသတင်းဌာနကို ပြောကြားခဲ့ပါတယ်။

Source: Reuters
#Yangon_Media_Group

#Local_News
Published _ 19 August 2022

စက်သုံးဆီဈေးနှုန်းများ ယနေ့သြဂုတ်လ ၁၉ ရက်တွင်၂၃၀၀ ကျပ်ကျော်သို့ ပြန်လည်ရောက်ရှိခဲ့သဖြင့် နေသဖြင့် ရန်ကုန်တိုင်းအတွင်း 92 Ron တစ် လီတာလျင် ၂၃၅၅ ကျပ်ပြန်ဖြစ်လာခဲ့သည်ကို စက်သုံးဆီတင်သွင်း သိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီမှ ထုတ်ပြန်သည့် ရည်ညွှန်းလက်လီဈေးနှုန်းများအရ သိရသည်။

အလားတူ နေပြည်တော်၊ ပဲခူး၊ ပုသိမ်၊ ဘားအံတို့တွင်လည်း 92 Ron တစ်လီတာလျင် ၂၃၀၀ ကျပ်ကျော်ရှိကြောင်း သိရသည်။

မန္တလေး၊ မကွေး၊ ထားဝယ်၊ မုံရွာ၊ မြစ်ကြီးနား၊ စစ်တွေ၊ မော်လမြိုင်၊လားရှိုး၊ တောင်ကြီး၊ လွိုင်ကော်တို့၌ 92 Ron တစ်လီတာလျင် ၂၄၀၀ ကျပ်ကျော်ဖြစ်ပေါ်လျက်ရှိသည်။

ယင်းအပြင် ဟားခါးတွင် ၂၆၀၀ ကျပ်ကျော်နှင့် ကျိုင်းတုံတွင် ၂၉၀၀ ကျပ်ကျော်ရှိကြောင်း သိရသည်။

စက်သုံးဆီတင်သွင်းသိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ ထုတ်ပြန်ခဲ့သည့် စက်သုံးဆီရည်ညွှန်းဈေးနှုန်းများအရ ရန်ကုန်တိုင်းအတွင်း၌ လက်လီဈေးအဖြစ် 92 Ron တစ်လီတာလျင် ၂၃၅၅ ကျပ်၊ 95 Ron တစ်လီတာလျင် ၂၄၄၀ ကျပ်၊ HSD (500 ppm) တစ်လီတာလျင် ၂၇၆၅ ကျပ် သတ်မှတ်ခဲ့သည်။

အလားတူ HSD (50 ppm)နှင့် HSD (10 ppm)တိုမှာ တစ်လီတာလျင် ၂၈၄၀ ကျပ်အဖြစ် စက်သုံးဆီရည်ညွှန်းလက်လီဈေးနှုန်းများအဖြစ် သတ် မှတ်ခဲ့သည်။

ထို့ပြင် စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီ၏ စက်သုံးဆီရည်ညွန်းလက်ကားဈေးနှုန်းမှာလည်း ရန်ကုန်တိုင်း၌ 92 Ron တစ်လီတာလျင် ၂၂၄၄ ကျပ်၊ 95 Ron တစ်လီတာလျင် ၂၃၂၈ ကျပ်၊ HSD(500 ppm) တစ်လီတာလျင် ၂၆၄၅ ကျပ်၊ HSD (50 ppm)နှင့် HSD(10 ppm)တို့မှာ တစ်လီတာလျင် ၂၇၁၈ ကျပ်တိုဖြစ်သည်။

အဆိုပါ ဈေးနှုန်းများအား စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ MOPS ဈေးနှုန်းအပေါ်တွင် အခြေခံတွက်ချက်ထားခြင်းဖြစ်ကာ စက်သုံးဆီဝယ်ယူသူများအနေဖြင့် ကျေနပ်မှုမရှိပါက ကော်မတီသို့ဆက်သွယ်တိုင်ကြားနိုင်ကြောင်း သိရသည်။

ymg/NN
#Yangon_Media_Group

#World_Health
Published 19 August 2022

အစိမ်းရောင်ဟင်းသီးဟင်းရွက်တွေက အဟာရဓာတ်အကြွယ်ဝဆုံးအစားအစာတွေထဲက တစ်ခုဖြစ်ပြီး ဗိုက်တာမင်-ကေ ကြွယ်ဝစွာပါဝင်တာကြောင့် နှလုံးရောဂါနဲ့ သွေးခဲခြင်းတို့ကို ကာကွယ်ပေးနိုင်ပါတယ်။

လေ့လာချက်အသစ်တစ်ခုမှာ ဗိုက်တာမင်-ကေပါဝင်တဲ့ အစားအစာများကို စားသုံးခြင်းက ဆဲလ်သေဆုံးခြင်းကို ကာကွယ်ပေးပြီး အယ်လ်ဇိုင်းမားရောဂါလို ခန္ဓာကိုယ်ဆုတ်ယုတ်ခြင်းကြောင့် ဖြစ်လာတဲ့ရောဂါများကို တားဆီးပေးနိုင်ကြောင်း နိုင်ငံတကာသုတေသီအဖွဲ့က တွေ့ရှိခဲ့ပြီး Nature ဂျာနယ်မှာ ဖော်ပြခဲ့ကြပါတယ်။

ဟားဗတ်ကျန်းမာရေးတက္ကသိုလ်ရဲ့ ဖော်ပြချက်အရ ဗိုက်တာမင်-ကေဟာ နှစ်မျိုးနှစ်စားရှိပါတယ်။

အဓိကတစ်မျိုးက ကိုက်လံနဲ့ ဟင်းနုနွယ်တို့လို အစိမ်းရောင်အရွက်တွေမှာပါဝင်တဲ့ ဖိုင်လိုကွီနုန်းဖြစ်ပြီး နောက်တစ်မျိုးကတော့ ကိုယ်တွင်းကလီစာအသားတွေနဲ့ အချဉ်ဖောက်ထားတဲ့ အစားအစာတွေမှာပါဝင်တဲ့ မီနာကွီနုန်းတို့ဖြစ်ပါတယ်။

ဗိုက်တာမင်-ကေက ခန္ဓာကိုယ်ထဲမှာ ပုံစံမျိုးစုံနဲ့စုပ်ယူပြီး အမျိုးမျိုးသောလုပ်ငန်းဆောင်တာများ လုပ်ဆောင်ပါတယ်။

ဗိုက်တာမင်-ကေက ဆဲလ်သေခြင်းကိုတားဆီးပေးတဲ့ အန်တီအောက်ဆီဒင့်အဖြစ် လုပ်ဆောင်ပေးကြောင်း မြူးနစ်၊ ဂျပန်၊ ကနေဒါတက္ကသိုလ်တို့မှ သုတေသီများက တွေ့ရှိခဲ့ပါတယ်။

ဖယ်ရော့ပ်တိုဆစ်ဆိုတဲ့ဖြစ်စဉ်ဟာ သဘာဝအတိုင်းဆဲလ်သေဆုံးခြင်းဖြစ်ပြီး အယ်လ်ဇိုင်းမားနဲ့ အခြားရောဂါတွေမှာ တွေ့ရတဲ့ ဖြစ်စဉ်ဖြစ်ပါတယ်။

အသက်အရွယ်ကြောင့် ဖြစ်လာတဲ့ရောဂါတွေကို ကုသရာမှာ ဖယ်ရော့ပ်တိုဆစ်ဖြစ်စဉ်ကို တားဆီးဖို့က အရေးပါတဲ့အချက်ဖြစ်လာပါတယ်။

ဂျပန်တိုဟိုကူတက္ကသိုလ်မှ ဒေါက်တာ'အီကန်မီရှီမာ'က ဖိုင်လိုကွီနုန်း(ဗိုက်တာမင်-ကေ၁)နဲ့ မီနာကွီနုန်း(ဗိုက်တာမင်-ကေ၂)တိုဟာ ဆဲလ်တွေကိုကယ်ဆယ်နိုင်ပြီး ဖယ်ရော့ပ်တိုဆစ်ဖြစ်စဉ်ဖြစ်လာတဲ့ တစ်ရှူးတွေကို ကာကွယ်ပေးနိုင်ကြောင်း သုတေသီများတွေ့ရှိခဲ့တယ်လို့ ဖော်ပြခဲ့ပါတယ်။

အဟာရဓာတ်ကြွယ်ဝစွာစားသုံးရင် အယ်လ်ဇိုင်းမားကဲ့သို့ရောဂါတွေကို တားဆီးနိုင်ကြောင်း လေ့လာချက်တွေမှာ ဖော်ပြထားပါတယ်။

ဖလေဗိုနွိုက်ဓာတ်တွေပါဝင်တဲ့ အစားအစာတွေဟာ အယ်လ်ဇိုင်းမားရောဂါကို နှောင့်နှေးတားဆီးနိုင်ကြောင်း ၂၀၂၀ မှာ တွေ့ရှိထားပါတယ်။

အသီးအနှံ၊ ဟင်းသီးဟင်းရွက်၊ ရေနွေးကြမ်းတို့က မှတ်ဉာဏ်ချို့တဲ့ခြင်းရောဂါတွေကို လွယ်ကူရိုးရှင်းစွာ ကာကွယ်ပေးနိုင်ဖွယ်ရှိတယ်လို့ ဖော်ပြထားပါတယ်။

ဖလေဗိုနွိုက်ဓာတ်အဓိကပါဝင်တဲ့ အစားအစာတွေက သစ်တော်သီး၊ သံလွင်ဆီ၊ ကိုက်လံ၊ ပဲ၊ လက်ဖက်ခြောက်၊ ဟင်းနုနွယ်၊ ပန်းဂေါ်ဖီ၊ ဝိုင်၊ ခရမ်းချဉ်သီး၊ ပန်းသီးတို့ဖြစ်ပါတယ်။

Source: The Jerusalem Post
#Yangon_Media_Group

#Local_News
Published -18 August 2022

ကိုဗစ်- ၁၉ လေးကြိမ်မြောက် Booster ကာကွယ်ဆေးကို ယခုသီတင်းပတ်ကစပြီး အခမဲ့ထိုးနှံပေးသွားမယ်လို ကျန်းမာရေးဝန်ကြီးဌာနကနေ သိရပါတယ်။

#Yangon_Media_Group

Published 18 August 2022

နယူးဇီလန်က လေလံပွဲတစ်ခုကနေ ဝယ်ယူခဲ့တဲ့ ခရီးဆောင်လက်ဆွဲသေတ္တာ နှစ်လုံးထဲက ကလေးငယ်(၂)ဦးရဲ့ ရုပ်အလောင်းတွေကို တွေ့ရှိခဲ့ရတယ်လို့ ကြာသပတေးနေ့က ရဲတွေက ပြောပါတယ်။ အဲဒီအတွက်ရဲက တရားခံကို ရှာဖွေဖို့ ကြိုးစားနေကြပါတယ်။

အဲဒီအလောင်းတွေဟာ နှစ်ပေါင်းများစွာ ဒီအထဲ သိမ်းဆည်းထားခဲ့ပုံရတယ်လို့ စုံထောက်တစ်ဦးဖြစ်တဲ့ တိုဖီလော ဖမ်မန်နူအား ဗက်လူရာက ပြောပါတယ်။ ရုပ်ကြွင်းတွေထဲက ကလေးနှစ်ဦးဟာ သူတို့သေဆုံးစဉ်က အသက်ငါးနှစ်နှင့် ဆယ်နှစ်ကြား ဖြစ်ပုံရတယ်လို့ သူကပြောပါတယ်။

အရွယ်တူ ခရီးဆောင်သေတ္တာနှစ်လုံးထဲမှာ ကလေးတစ်ဦးစီ ထည့်သွင်းထားတာဖြစ်ပါတယ်။

“သေဆုံးတဲ့အချိန်နှင့် တွေ့ရှိတဲ့အချိန်နှစ်ခုအကြား အချိန်ခြားနားမှုက စုံစမ်းစစ်ဆေးမှုတွေကိုပြုလုပ်ရာမှာ ရှာဖွေတွေ့ရပုံရဲ့ သဘာဝအရကို  အနည်းငယ် ရှုပ်ထွေးမှုတွေဖြစ်စေပါတယ်” လို့ ဗက်လူရာကပြောပါတယ်။

တောင်အောက်ကလန်မှာရှိတဲ့ ဂိုဒေါင်တစ်ခုမှာ ပစ္စည်းတွေ အစုလိုက်အပြုံလိုက်ကို လေလံပစ်တာကို သံသယမရှိဘဲ ဝယ်ယူမိတဲ့ မိသားစုတစ်စုက အဲဒီရုပ်အလောင်းတွေကို တွေ့ခဲ့တာပါ။

မိသားစုဘယ်သူဆိုတာဖွင့်မပြောတာဟာ လူသတ်မှုနှင့်ဆက်နွယ်တာကြောင့်မဟုတ်ဘဲ အလောင်းတွေတွေ့ရလို့ သူတို့ စိတ်ထိခိုက်ခံစားနေရတာတွေကို စာနာနားလည်လို့ဖြစ်တယ်လို့ ဗက်လူရာကဆက်ပြောပါတယ်။

သေဆုံးသူတွေဘယ်သူဆိုတာသိနိုင်ဖို့ ရဲတွေက အဲဒီခရီးဆောင်သေတ္တာနှင့်အတူပါလာတဲ့အခြား အိမ်သုံးပစ္စည်းတွေကနေ စုံစမ်းဖော်ထုတ်နေကြပါတယ်။

အချိန်ကြာသွားတဲ့အတွက် အဲဒီကလေးတွေကို ဘယ်သူဘယ်ဝါတွေဆိုတာ သိအောင်လုပ်ဖို့ အတော်ရှုပ်ထွေးခက်ခဲနေယ်လို့ ရဲတွေကပြောပါတယ်။

ဒါပေမယ့် အဲဒီခရီးဆောင်သေတ္တာထားခဲ့တဲ့ ဂိုဒေါင်နှင့် အိမ်တွေကိုတော့ မှုခင်းပညာရှင်တွေက စစ်ဆေးနေကြပါတယ်။

အဲဒီအပြင် နယူးဇီလန်ရဲတွေက နိုင်ငံတကာရာဇဝတ်မှုခင်းရဲတပ်ဖွဲ့တွေနှင့်ပါ ချိတ်ဆက်ပြီး အမှုကိုဖော်ထုတ်နိုင်အောင် ကြိုးစာနေကြတယ်လို့ ဗက်လူရာကပြောပါတယ်။

သူတို့မိသားစုတွေက ဒီကလေးတွေ သေသွားခဲ့တာတောင် သိချင်မှသိကြလိမ့်မယ်လို့လည်း သူကပြောပါတယ်။

မျိုးရိုးဗီဇတွေကို စုံစမ်းထောက်လှမ်းမှုကတော့ အတော်တိုးတက်နေပါတယ်လို့တော့ ပြောချင်ပါတယ်လို့ သူကဖြည့်စွက်ပြောပါတယ်။

အလောင်းတွေရှာတွေတဲ့ မိသားစုရဲ့ အိမ်နီးချင်းက အဲဒီမိသားစုရဲ့ အိမ်ကိုစောင့်ရှောက်ပေးနေရတယ်လို့ဆိုပါတယ်။ ဘာဖြစ်လို့လဲဆိုတော့ အဲဒီမိသားစုက မီဒီယာတွေရဲ့ အာရုံစိုက်လာတာကို ရှောင်ရှားချင်လို့ အိမ်ကနေ ထွက်သွားခဲ့ကြတာ ဖြစ်ပါတယ်။

Source: AFP

#New_Zealand

#Bodeis_in_Suitcases_New_Zealand

#Crime_story

#World_Sports
Published 17 August 2022

ပြီးခဲ့တဲ့နှစ်များအတွင်း အီဂျစ်မြို့တော်ကိုင်ရိုမှာ လူငယ်တွေကြား ပက်ဒယ်တင်းနစ်အားကစားဟာ နာမည်ကျော်လူကြိုက်များလာပါတယ်။

#Yangon_Media_Group

#Local_News
Published -18 August 2022

မြန်မာနိုင်ငံမှာ ကိုဗစ်ကြောင့် သေဆုံးသူ သုံးဦးဟာ ပြည်ပက ပြန်လာသူတွေမဟုတ်ဘဲ ပြည်တွင်းကူးစက်မှုကြောင့် သေဆုံးခြင်ဖြစ်တယ်လို့ ကျန်းမာရေးဝန်ကြီးဌာနကနေ သိရပါတယ်။

#Yangon_Media_Group