#LocalNews
Published -21 May 2022

၂၀၂၂-၂၀၂၃ ဘဏ္ဍာနှစ်မှာ ပုဂ္ဂလိကပျားမွေးမြူသူဦးရေ (၈၂၀) နဲ့ ပုဂ္ဂလိကပျားအုံ(၂၀၁၁၄၃) အုံအထိ တိုးတက်မွေးမြူလျက်ရှိပြီး ပျားမွေးမြူရေးကနေ တစ်နှစ်ကို ပျှမ်းမျှနိုင်ငံခြားဝင်ငွေ အမေရိကန်ဒေါ်လာ ၃ ဒသမ ၇ သန်းရရှိတယ်လို့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနမှသိရပါတယ်၊၊

မေလ(၂၀)ရက်ကနေပြည်တော်မှာကျင်းပပြုလုပ်တဲ့ ကမ္ဘာ့ပျားနေ့ (World Bee Day) အထိမ်းအမှတ် အခမ်းအနားမှာစိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ဒုတိယဝန်ကြီးဒေါက်တာအောင်ကြီးက ထည့်သွင်းပြောကြားခဲ့တာဖြစ်ပါတယ်၊၊

ဒုတိယဝန်ကြီးဒေါက်တာအောင်ကြီးက ပြောကြားရာမှာ "၂၀၂၂-၂၀၂၃ ဘဏ္ဍာနှစ်မှာ ပုဂ္ဂလိက ပျားမွေးမြူသူဦးရေ ၈၂၀နဲ့ ပုဂ္ဂလိက ပျားအုံ(၂၀၁၁၄၃) အုံအထိ တိုးတက်မွေးမြူလျက်ရှိကြောင်း၊ ပျားအုံပေါင်း ၂၀၁၁၄၃ အုံမှ ပျားရည် ၆၅၀၀ မက်ထရစ်တန် ထုတ်လုပ်ပြီး တစ်နှစ်ပျှမ်းမျှ (၂၅၀၀) မက်ထရစ်တန် နိုင်ငံခြားသို့ တင်ပို့လျက်ရှိပြီး နိုင်ငံခြားဝင်ငွေ အမေရိကန်ဒေါ်လာ ၃ ဒသမ ၇ သန်းရရှိလျက်ရှိကြောင်း၊ မြန်မာနိုင်ငံ ပျားမွေးမြူရေးကဏ္ဍမှ နှစ်စဉ်စိုက်ပျိုးဧက သိန်း ၂၀ ခန့် ဝတ်မှုန်ကူး ဝန်ဆောင်မှုပေးလျက်ရှိပြီး ယခုဘဏ္ဍာနှစ်တွင်လည်း မြန်မာနိုင်ငံ နေကြာစိုက်ဧက၏ ၁၁ ရာခိုင်နှုန်းကို ဝတ်မှုန်ကူးမှု ဆောင်ရွက်ပေးနိုင်မည်ဖြစ်ကြောင်း၊ မြန်မာနိုင်ငံရှိ ဒေသပျားမျိုးစိတ်များ ထိန်းသိမ်းစောင့်ရှောက်နိုင်ခြင်းသည် တစ်ဖက်တစ်လမ်းမှ သဘာဝပတ်ဝန်းကျင်နှင့် ဂေဟစနစ်ကိုပါ စောင့်ရှောက်ခြင်း ဖြစ်သကဲ့သို့ ပတ်ဝန်းကျင်အတွက် အရေးပါလှသည့်ပျားများကို ကာကွယ်စောင့်ရှောက်ကြဖို့လိုတယ်လို့"တိုက်တွန်းမှာကြားခဲ့ပါတယ်၊၊

ကမ္ဘာ့ပျားနေ့ (World Bee Day) ပေါ်ပေါက်လာပုံနဲ့ ပတ်သက်လို့ ကမ္ဘာ့ခေတ်မီပျားမွေးမြူရေးသမိုင်းကို ပထမဦးစွာ စတင်ခဲ့သူ Slovenia နိုင်ငံသား Anton Jansa ဂုဏ်ပြုတဲ့အနေနဲ့ သူ့ရဲ့မွေးနေ့ဖြစ်တဲ့ မေလ(၂၀)ရက်တိုင်း ကမ္ဘာတစ်ဝန်းမှာကမ္ဘာ့ပျားနေ့ အခမ်းအနားတွေကို ကျင်းပကြပြီး ပျားရည်နှင့် ပျားထွက်ပစ္စည်းပြပွဲ၊ ပြိုင်ပွဲများကိုလည်း ထည့်သွင်းကျင်းပခဲ့ကြတယ်လို သိရပါတယ်၊၊

ymg/tthl
#Yangon_Media_Group

#Local_News
Published_ 21 May 2022

စဉ်ဆက်မပြတ် ဖွံ့ဖြိုးတိုးတက်မှုအစီအစဉ် ၂၀၃၀ ကို အကောင်အထည်ဖော်ဆောင်ရာတွင် စိန်ခေါ်မှုအသစ်များနှင့် ရင်ဆိုင်ကြုံတွေ့နေရကြောင်း၊ အဆိုပါစိန်ခေါ်မှုများကို ဖြေရှင်းရန် ဒေသတွင်းနှင့် နိုင်ငံတကာပူးပေါင်းဆောင်ရွက်မှုများ မြှင့်တင်ကြရန် နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးချမ်းအေးက ယမန်နေ့ကပြုလုပ်တဲ့ ကမ္ဘာလုံးဆိုင်ရာ ဖွံ့ဖြိုးတိုးတက်မှုအစီအစဉ်ဆိုင်ရာ အာဆီယံ-တရုတ် ပူးပေါင်းဆောင်ရွက်မှု မြှင့်တင်ရေး ဂျကာတာ ဆွေးနွေးပွဲတွင် တိုက်တွန်းပြောကြားခဲ့ပါတယ်။

ကမ္ဘာ့ စီးပွားရေးပြန်လည်နာလန်ထူရေးတွင် ကိုဗစ်-၁၉ ကူးစက်မှု၊ ဈေးကွက်တွင် လုပ်သားအင်အား စိန်ခေါ်မှုများ ဆက်လက်ရှိနေမှု၊ ကုန်စည်စီးဆင်းမှုတွင် အခက်အခဲများ ဆက်လက်ရှိနေကြောင်းနှင့် ကုန်ဈေးနှုန်း ဆက်လက်ကြီးမြင့်နေမှု ကဲ့သိုသော စိန်ခေါ်မှုများကို ရင်ဆိုင်နေရပါတယ်။

ကမ္ဘာလုံးဆိုင်ရာ ဖွံ့ဖြိုးတိုးတက်မှု အစီအစဉ်အောက်တွင် အာဆီယံ အသိုက်အဝန်း မျှော်မှန်းချက် ၂၀၂၅ ကို အကောင်အထည်ဖော်ရန် အာဆီယံ၏ ကြိုးပမ်းမှုကို အရှိန် မြှင့်တင်နိုင်ရန် အာဆီယံဘက်စုံပြန်လည် ထူထောင်ရေးမူဘောင်ကို အခြေခံ၍ အာဆီယံ နှင့်တရုတ်နိုင်ငံတို့အကြား လက်တွေ့ကျသည့် ပူးပေါင်းဆောင်ရွက်မှုများအတွက် အလားအလာကောင်းများကို အကြံပြုနိုင်ရေး ဆွေးနွေးခဲ့ကြပါတယ်။

ဆွေးနွေးပွဲတွင် ဒေသတွင်းစီးပွားရေး စဉ်ဆက်မပြတ် ဖွံ့ဖြိုးတိုးတက်ရေးအတွက် အာဆီယံအဖွဲ့ဝင်နိုင်ငံများနှင့် တရုတ်နိုင်ငံတို့အကြား ပူးပေါင်းဆောင်ရွက်မှု အခွင့်အလမ်းများပေးမည့် ကမ္ဘာလုံးဆိုင်ရာ ဖွံ့ဖြိုးတိုးတက်မှု အစီအစဉ်သည် အာဆီယံဘက်စုံ ပြန်လည်ထူထောင်ရေးနှင့် အပြန်အလှန်အထောက်အကူပြုစေနိုင်ရေး ပူးပေါင်းဆောင်ရွက်နိုင်မယ့် အလားအလာကောင်းများကို ဆွေးနွေးခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published_ 21 May 2022

ရခိုင်ပြည်နယ်၊ စစ်တွေမြို့၊ ဦးဥတ္တမခန်းမ၌ အနဂ္ဃရတနာမြေ မြောက်ဦး ဓာတ်ပုံပြပွဲကို မေ ၂၀ ရက် နံနက်ပိုင်းက ပြုလုပ်ခဲ့ပြီး ဓာတ်ပုံပေါင်း ၁၃၀ ခန့် ပါဝင်ပြသထားကြောင်း သိရပါတယ်။

အဆိုပါဓာတ်ပုံပြပွဲကို မြောက်ဦးမြို့ ကမ္ဘာ့အမွေအနှစ်အဖြစ် ယူနက်စကို စာရင်းတွင်ဝင်နိုင်ရေး ပြုလုပ်တာဖြစ်ပြီး နှစ်ရက်ကြာခင်းကျင်းပြသသွားမှာဖြစ်တယ်လို့ သိရပါတယ်။

ဓာတ်ပုံပြပွဲမှာပြသထားတဲ့ ဓာတ်ပုံပေါင်း ၁၃၀ ခန့်ကို လာရောက်ကြည့်ရှုသူတွေ အနေနဲ့ ကြိုက်နှစ်သက်ပါက ဝယ်ယူနိုင်တယ်လို့ ဆိုပါတယ်။

မြောက်ဦးမြို့ကို ယူနက်စကို ကမ္ဘာ့ရှေးဟောင်းအမွေအနှစ်စာရင်းတွင် ဝင်နိုင်ရေး ၂၀၂၁ ခုနှစ်က အဆိုပြုလွှာ မူချောတင်သွင်းခဲ့ပြီး လာမယ့်နှစ်မှာ ယူနက်စကိုက ကွင်းဆင်းစစ်ဆေးမှာဖြစ်တယ်လို့ သိရပါတယ်။

ဧပြီလကလည်း အနဂ္ဃရတနာမြေ မြောက်ဦး ဓာတ်ပုံပြပွဲကို မြောက်ဦးမြို့မှာ ကျင်းပခဲ့ပြီး ဒီတစ်ကြိမ်ကျင်းပတာဟာ ဒုတိယအကြိမ်ဖြစ်ပါတယ်။

ymg-mnn
#Yangon_Media_Group

#Ukraine_Crisis
Published 21 May 2022

မာရီယူပိုလ်မြို့ရှိ အာဇော့ဗ်စတယ်လ်သံမဏိစက်ရုံမှာပုန်းခိုနေတဲ့ ယူကရိန်းနောက်ဆုံးခံတပ်အဖွဲ့ဟာ သောကြာနေ့ကအညံ့ခံလိုက်ပြီဖြစ်ကြောင်း ရုရှားကာကွယ်ရေးဝန်ကြီးဌာနက ကြေညာလိုက်ပါတယ်။

ဒါကြောင့် ဒွန်ဘတ်စ်ဒေသကို အပိုင်ထိန်းချုပ်ဖို့ကြိုးစားနေတဲ့ ရုရှားတို့အနေနဲ့ စစ်ပွဲကာလအတွင်း အပျက်အစီးအများဆုံးဖြစ်ခဲ့တဲ့ တိုက်ပွဲကို အဆုံးသတ်လိုက်ပြီဖြစ်ပါတယ်။

ရုရှားတို့ကြေညာချက်မထုတ်ခင် နာရီပိုင်းအလိုမှာပဲ ယူကရိန်းစစ်တပ်က သံမဏိစက်ရုံမှာရှိတဲ့ နောက်ဆုံးခုခံရေးသမားတွေကို လက်နက်ချပြီး အသက်ရှင်လျက်ထွက်လာဖို့ ညွှန်ကြားခဲ့ကြောင်း သမ္မတ’ဇယ်လန်စကီ’က ပြောကြားသွားပါတယ်။

နောက်ဆုံးခံတပ်အဖွဲ့က ၅၃၁ ယောက် အညံ့ခံခဲ့တယ်လို့ ရုရှားကကြေညာခဲ့ပြီး ပြီးခဲ့တဲ့ရက်ပိုင်းများအတွင်း ယူကရိန်းခံတပ်မှ လက်နက်ချအညံ့ခံသူ ၂,၄၃၉ ဦးရှိလာပြီလို့ ဆိုပါတယ်။

အာဇော့ဗ်စတယ်လ်သံမဏိစက်ရုံရှိတဲ့နယ်မြေဟာ နောက်ဆုံးတော့လွတ်မြောက်ငြိမ်းချမ်းသွားပြီလို့ ရုရှားကာကွယ်ရေးဝန်ကြီးဌာနက ကြေညာလိုက်ပါတယ်။

ဒီအရေအတွက်ကို ယူကရိန်းဘက်ကတော့ ချက်ချင်းအတည်မပြုသေးပါဘူး။

လူဟန့်စ်ပြည်နယ်မှ ယူကရိန်းထိန်းချုပ်ထားရာနောက်ဆုံးနယ်မြေတစ်ခုကိုလည်း ရုရှားတို့ကအဓိကထား တိုက်ခိုက်နေပါတယ်။

“ဆီဗီရိုဒိုနက်စ်မြို့ကို ရုရှားတို့ကအပြင်းအထန်တိုက်ခိုက်ဖျက်ဆီးနေပါတယ်၊ လူနေရပ်ကွက်တွေကိုဗုံးကျဲပြီး တစ်အိမ်ပြီးတစ်အိမ်ဖျက်ဆီးနေပါတယ်၊ လူတွေဘယ်လောက်သေပြီလဲဆိုတာ မသိရပါဘူး၊ အခန်းတိုင်းလိုက်ကြည့်နေလို့မှ မဖြစ်နိုင်တာ” လို့ လူဟန့်စ်အုပ်ချုပ်ရေးမှူး’ဆာဟီဂိုင်ဒိုင်’က တယ်လီဂရမ်မှာ ဖော်ပြထားပါတယ်။

ရုရှားတို့ဟာ မြို့တော်ကိဗ်ကိုမသိမ်းနိုင်ခဲ့တဲ့နောက် ဆီဗီရိုဒိုနက်စ်မြိုနဲ့ လစ္စချန့်စ်မြို့တို့ကို သိမ်းပိုက်ဖို့ကြိုးစားလာခဲ့ပါတယ်။

လတ်တလောသီတင်းပတ်တွေမှာ ရုရှားတို့က နယ်မြေဆုံးရှုံးမှုများရှိခဲ့ပေမယ့် လူဟန့်စ်အရှေ့ဘက်သို့ချီတက်လာရာ ရုရှားထောက်ခံရေးသမားများ ထိန်းချုပ်ထားတဲ့နယ်မြေတွေကို ရုရှားတို့အဓိက သိမ်းပိုက်လာနိုင်ကြောင်း ကျွမ်းကျင်သူများကသုံးသပ်နေကြပါတယ်။

“ဒီအခြေအနေက နောက်သီတင်းပတ်တွေအတွင်း ပဋိပက္ခအဆုံးအဖြတ်ဖြစ်လာနိုင်ပါတယ်၊ ဆီဗီရိုဒိုနက်စ်နဲ့ အခြားနယ်မြေတွေကို ဘယ်လိုသိမ်းပိုက်ထိန်းချုပ်မလဲဆိုတဲ့အပေါ် မူတည်နေပါတယ်’’ လို့ လန်ဒန်ချာသမ်အိမ်တော်မှ ကျွမ်းကျင်သူတစ်ဦးက မှတ်ချက်ပြုလိုက်ပါတယ်။

ရုရှာတို့ဟာ ဖေဖော်ဝါရီ ၂၄ ရက်နေ့ စတင်ကျူးကျော်ခဲ့ပြီးနောက် မာရီယူပိုလ်မြို့ကိုထိန်းချုပ်နိုင်ခဲ့တာဟာ အလွန်အရေးပါပေ‌မယ့်လည်း ပျက်စီးဆုံးရှုံးမှု အတော်လေးများပြားခဲ့ပါတယ်။

မာရီယူပိုလ်တည်ရှိရာ ဒိုနက်စ်နဲ့လူဟန့်စ်တို့ပါဝင်တဲ့ ဒွန်ဘတ်စ်ဒေသဟာ လုံးဝဥသုံဖျက်ဆီးခံခဲ့ရပြီး ငရဲခန်းအသွင်ပျက်စီးသွားခဲ့ကြောင်း ‘ဇယ်လန်စကီ’က မိန့်ကြားသွားခဲ့ပါတယ်။

Source: Reuters
#Yangon_Media_Group

#WorldHealth
Published 21 May 2022

သက်လတ်ပိုင်းအရွယ်တွေမှာ ဆီးချိုရောဂါဖြစ်ပွားသူတွေဟာ အသက်ကြီးလာတဲ့အခါ မှတ်ဉာဏ်ချို့ယွင်းခြင်းဝေဒနာခံစားရနိုင်ချေ ၄ ဆပိုများကြောင်း လေ့လာတွေ့ရှိထားပါတယ်။

ဆီးချိုရောဂါက မှတ်ဉာဏ်ချို့ယွင်းခြင်းနဲ့ ဆက်စပ်နေပြီး ဦးနှောက်မှာ ဆိုးကျိုးဖြစ်စေတဲ့ ပရိုတိန်းများ စုဝေးလာနိုင်တယ်လို့ ကျွမ်းကျင်ပညာရှင်များက သံသယရှိနေပါတယ်။

သုတေသီတွေက လူပေါင်း ၅ ထောင်ကို ဆယ်စုနှစ်တစ်ခုကြာအောင်စောင့်ကြည့်ခဲ့ပြီး မှတ်ဉာဏ်ချို့ယွင်းခြင်းဖြစ်ပေါ်လာသလားဆိုတာကို လေ့လာခဲ့ကြပါတယ်။

ဆီးချိုရောဂါရှိတဲ့ အသက် ၅၅ နှစ်ဝန်းကျင်ရှိ လူတွေဟာ အသက် ၆၅ နှစ်ကျော်တဲ့အခါ မှတ်ဉာဏ် ချို့ယွင်းခြင်းဝေဒနာ ဖြစ်ပေါ်နိုင်ချေ ၄ ဆပိုများတာကို တွေ့ခဲ့ကြပါတယ်။

လူအများစုက ကျန်းမာရေးမညီညွတ်တဲ့ အစားအသောက်များနဲ့ ကိုယ်အလေးချိန်များခြင်းတို့ကြောင့် ဆီးချိုရောဂါဖြစ်လာနိုင်ချေရှိနေပါတယ်။

အသက် ၅၅ နှစ်အရွယ်မှာ ဆီးချိုရောဂါနဲ့ သွေးပေါင်ချိန်များခြင်းတို့က မှတ်ဉာဏ်ချို့ယွင်းခြင်းဖြစ်လာနိုင်တဲ့ လက္ခဏာတွေဖြစ်ပါတယ်။

နှလုံးသွေးကြောဆိုင်ရာ ရောဂါရှိတဲ့ အသက် ၆၅ နှစ်အရွယ် လူတွေမှာလည်း မှတ်ဉာဏ်ချို့ယွင်းခြင်းမျိုး ဆက်စပ်ဖြစ်ပေါ်နိုင်ပါတယ်။

လေဖြတ်ခြင်း ဒါမှမဟုတ် ဆီးချိုရောဂါရှိတဲ့ အသက် ၇၀ ကျော်တွေကတော့ မှတ်ဉာဏ်ချို့ယွင်းခြင်းဖြစ်နိုင်ချေ အများဆုံးဖြစ်ပါတယ်။

အိုင်ယာလန်ဂယ်လ်ဝေး အမျိုးသားတက္ကသိုလ်မှ ပရော်ဖက်ဆာ’အမ်မာမက်ဂရက်’က “သက်လတ်ပိုင်းတွေမှာ ဆီးချိုရောဂါရှိသူတွေက မှတ်ဉာဏ်ချို့ယွင်းခြင်းပိုမိုဖြစ်ပွားနိုင်ပါတယ်၊ ဘာကြောင့်လဲဆိုတော့ အသက်မကြီးသေးခင်မှာ ခန္ဓာကိုယ်နဲ့ဦးနှောက်ကို ပိုမိုထိခိုက်စေနိုင်တာကြောင့်ဖြစ်ပါတယ်” လို့ ပြောပြသွားပါတယ်။

ပင်စင်ယူပြီးတဲ့အချိန်မှာ အပူအပင်မရှိ အနားယူချင်ကြတာကြောင့် ဘယ်သူကမှ အဆိုပါဝေဒနာမျိုးမဖြစ်ချင်ကြောင်း ဆိုပါတယ်။

သုတေသီတွေရဲ့လေ့လာချက်တွေထဲမှာ အသက် ၅၅ နှစ်မှာဆီးချိုရှိသူတွေက မှတ်ဉာဏ်ချို့ယွင်းခြင်းဖြစ်နိုင်ချေ ၄.၃ ဆပိုများပြီး အသက် ၆၅ နှစ်မှ ဆီးချိုရှိသူတွေက ၂ ဆသာပိုများပါတယ်။

ဒါကြောင့် အသက်ပိုငယ်တဲ့လူတွေမှာ ဦးနှောက်ပိုမိုထိခိုက်စေတတ်တယ်လို့ ယူဆနိုင်ပါတယ်။
အသက် ၅၅ နှစ်အရွယ်မှာ သွေးပေါင်ချိန် ၁၀ တက်လာတိုင်း မှတ်ဉာဏ်ချို့ယွင်းခြင်းဖြစ်နိုင်ချေ ၁၂ ရာခိုင်နှုန်း ပိုများလာပါတယ်။

ယူကေမှ အယ်လ်ဇိုင်းမားရောဂါ သုတေသနဌာနရဲ့ ဦးစီးမှူးဒေါက်တာ’ရိုဆာဆန်ချို’ပြောကြားရာမှာ ဒီသုတေသနက ဆီးချိုနဲ့ သွေးတိုးရှိခြင်းဟာ နောက်ပိုင်းမှာမှတ်ဉာဏ်ချို့ယွင်းမှု ဖြစ်လာနိုင်စေတယ်လို့ ဖော်ပြခဲ့ပါတယ်။

Source: DailyMail.
#Yangon_Media_Group

#WorldNews
Published 21 May 2022

ဂျပန်အစိုးရက ကိုဗစ်ကပ်ရောဂါထောက်ပံ့ရေးစရိတ် ယန်း ၄၆.၃ မီလီယံ (၃၆၂,၀၀၀ ဒေါ်လာ)ကို လူတစ်ဦးဆီသို့ မှားယွင်းစွာပိုမိခဲ့တဲ့ဖြစ်စဉ် ဖြစ်ပွားခဲ့ပါတယ်။

ထိုလူက ရရှိလာတဲ့ငွေတွေအားလုံးကို လောင်းကစားလုပ်ပစ်လိုက်တာကြောင့် အစိုးရအနေနဲ့ ပြဿနာရင်ဆိုင်နေရပါတယ်။

ဂျပန်နိုင်ငံအနောက်ဘက် ယာမာဂူချီစီရင်စုနယ်ရှိ အဘူမြို့ပေါ်က အသက် ၂၄ နှစ်အရွယ်အမျိုးသားဟာ အလုပ်လက်မဲ့တစ်ဦးဖြစ်ပြီး နိုင်ငံရပ်ခြားလောင်းကစားဝိုင်းတွေမှာ ပိုက်ဆံတွေအကုန်သုံးပစ်လိုက်ပြီလို့ ထွက်ဆိုခဲ့ကြောင်း NHK သတင်းဌာနက ဖော်ပြထားပါတယ်။

ဗုဒ္ဓဟူးနေ့က ထိုလူကို ကွန်ပျူတာအချက်အလက်လိမ်လည်သုံးစွဲမှုသံသယဖြင့် ဖမ်းဆီးခဲ့ပါတယ်။

ဧပြီလက ကိုဗစ်ထောက်ပံ့ရေးစရိတ် ယန်း ၁ သိန်းကို အဆိုပါမြို့ရှိ ဝင်ငွေချိုတဲ့တဲ့အိမ်ထောင်စု ၄၆၃ စုဆီ ဖြန့်ဝေပေးဖို့စီစဉ်ရင်း အမှားအယွင်းဖြစ်ပွားခဲ့တာဖြစ်ပါတယ်။

ငွေတွေအားလုံးဟာ ဖြန့်ဝေပေးမယ့်စာရင်းထဲက ပထမဆုံးနေရာကလူဆီသို့ ရောက်ရှိသွားခဲ့တာဖြစ်ပါတယ်။

ထိုလူက ငွေတွေပြန်မပေးနိုင်တော့ပေမယ့် သူလုပ်ခဲ့တဲ့လုပ်ရပ်အတွက် ပြန်ပေးဆပ်ဖို့ဆန္ဒရှိကြောင်း ဖော်ပြခဲ့ပါတယ်။

ဂျပန်နိုင်ငံမှာ ကပ်ရောဂါထောက်ပံ့ရေးနဲ့ပတ်သက်ပြီး အငြင်းပွားဖွယ်ဖြစ်ရတာဟာ ဒါပထမဆုံးအကြိမ်တော့ မဟုတ်ပါဘူး။

ပြီးခဲ့တဲ့နှစ်က ဂျပန်ဝန်ကြီးချုပ်’ဖူမီယိုကီရှီဒါ’နဲ့ အစိုးရအဖွဲ့ဟာ အိမ်ထောင်စုတွေအတွက် ကိုဗစ်ကူပွန်များထောက်ပံ့ပေးဖို့စီစဉ်ခဲ့ရာ ဒေါ်လာ ၁ ဘီလီယံနီးပါးကုန်ကျခဲ့တာကြောင့် ဝေဖန်မှုတွေနဲ့ ရင်ဆိုင်ခဲ့ရပါသေးတယ်။

ဒီကိစ္စက လူမှုကွန်ရက်တွေမှာလည်း ပွက်လောရိုက်သွားပါတယ်။

“ကြည့်ရတာ ဆုံးရှုံးသွားတဲ့ငွေတွေကို ဒီအတိုင်းထားလိုက်တော့မယ့်ပုံပါပဲ၊ ပြည်သူနဲ့အစိုးရကြား နားလည်မှု လွဲသွားတဲ့ပုံမျိုး ထုတ်ပြပါလိမ့်မယ်” လို့ လူတစ်ယောက်က တွစ်တာမှာသုံးသပ်သွားပါတယ်။

Source: Bloomberg.
#Yangon_Media_Group

Published 20 May 2022

အမေရိကန်သမ္မတ ဂျိုးဘိုင်ဒင်ဟာ မေ၂၀ရက်သောကြာနေ့မှာ တောင်ကိုးရီးယားကို ရောက်ရှိလာပါတယ်။ သူ့ရဲ့တောင်ကိုးရီးယားခရီးစဉ်ဟာ သူ့အတွက် အမေရိကန်ခေါင်းဆောင်တစ်ဦးအနေနှင့် အာရှရဲ့ပထမဆုံးခရီးဖြစ်ပြီး  မြောက်ကိုးရီးယား နျူကလီးယားစမ်းသပ်မှု ကြီးထွားလာနေတဲ့အပေါ် ဒေသဆိုင်ရာ လုံခြုံရေးမဟာမိတ်တွေရဲ့ စိုးရိမ်ပူပန်မှုတွေနှင့်အတူ နှစ်နိုင်ငံ ဆက်ဆံရေးချည်နှောင်ဖို့ဖြစ်ပါတယ်။

သူဟာ တောင်ကိုးရီးယားသမ္မတ ယွန်ဆောက်ယိုနှင့် ဆိုးလ်မြို့အပြင်ဘက် ဆမ်ဆောင်းအဆောက်အအုံမှာ တွေ့ဆုံပါတယ်။

ဘိုင်ဒင်ဟာသူ့ခရီးစဉ်မှာ တစ်နှစ်ရှည်ကြာပြီဖြစ်တဲ့ အမေရိကန်ရဲ့ အာရှမဏ္ဍိုင်ပြုမှုကို ထပ်မံအရှိန်မြှင့်လိုနေပါတယ်။အာရှဒေသမှာ  တရုတ်ရဲ့စီးပွားရေးရဲ့စစ်ရေးပါဝါတွေမြင့်တက်မှုတွေက  ဝါရှင်တန်ရဲ့ကြီးစိုးမှုတွေကို‌ လျှော့ချနေတာဖြစ်ပါတယ်။

သူ့ကို ပြီးခဲ့တဲ့အပတ်ကမှ သမ္မတတာဝန်ယူလာတဲ့ အမေရိကန်လိုလားတဲ့ သမ္မတသစ်ယွန်ဆောက်ယိုက နွေးထွေးစွာကြိုဆိုခဲ့ပါတယ်။ မြောက်ကိုးရီးယားရဲ့ ခန့်မှန်းရခက်တဲ့ ခေါင်းဆောင်ဟာ ဘိုင်ဒင်ရဲ့အာရှခရီးစဉ်အတွင်း နျူကလီးယားစမ်းသပ်မှုတွေလုပ်မှာကိုလည်း စိုးရိမ်ပူပန်မှုတွေရှိနေပါတယ်။
ကျွန်တော်တို့ဒေသထဲမှာရှိတုန်း ရန်လိုတဲ့ပုံစံတစ်ခုခုလုပ်မယ့် အန္တရာယ်က တစ်ကယ်ရှိနေတာပါ လို့ အမေရိကန်လုံခြုံရေး အကြံပေး ဂျိတ်ဆူလီဗန်ကပြောထားပါတယ်။

ဘိုင်ဒင်က တောင်ကိုးရီးယားကနေ ဂျပန်ကိုဆက်သွားမှာဖြစ်ပြီး ဂျပန်နိုင်ငံမှာ ဩစတြေလျ၊အိန္ဒိယ၊ဂျပန်နှင့်အမေရိကန်တို့ပါဝင်တဲ့ Quad လေးပြည်ထောင်အဖွဲ့ထိပ်သီးအစည်းအဝေးတက်ရောက်မှာ ဖြစ်ပါတယ်။

Source AFP

#WorldCampaign
Published 20 May 2022

လူသားတွေ လစဉ်လတိုင်းစွန့်ပစ်လိုက်တဲ့ အမှိက်သရိုက်တွေဘယ်လောက်များလဲဆိုတာပြသဖိုအတွက် အမေရိကန်မှ’ရော့ဘ်ဂရင်းဖီးလ်’ဆိုသူဟာ အမှိုက်တွေကိုချိတ်ဆွဲပြီး တစ်လလုံးလျှောက်သွားနေခဲ့ပါတယ်။

#Yangon_Media_Group

Published 20 May 2022

မိုးလေဝသပညာရှင်တွေက ရေလွှမ်းမိုးမှုတွေဖြစ်မယ်လို့သတိပေးထားတဲ့အတိုင်း အိန္ဒိယနိုင်ငံ နေရာအတော်များများမှာ ဗုဒ္ဓဟူးနေ့က ပုံမှန်မဟုတ်တဲ့ မိုးသည်းထန်စွာ ရွာသွန်းမှုတွေကြောင့်  ရေကြီးပြီးမြေပြိုမှုတွေဖြစ်ခဲ့လို့ အသက်(၄)နှစ်အရွယ်ကလေးငယ်တစ်ဦးအပါအဝင် အနည်းဆုံးလူ(၁၀)ဦး သေဆုံးခဲ့ရပါတယ်။

ကမ္ဘာ တစ်လွှားမှာ ရာသီဥတုပြောင်းလဲမှုကြောင့် ဖြစ်ပွားနေတဲ့ ဆိုးရွားတဲ့ရာသီဥတုတွေဟာ ရေကာတာတည်ဆောက်ခြင်း၊ သစ်တောပြုန်းတီးခြင်းနှင့် အလွန်အကျွံဖြစ်နေတဲ့ ဖွံ့ဖြိုးမှု စီမံကိန်းတွေကြောင့် တောင်အာရှမှာပိုဆိုးမယ်လို့ ပညာရှင်တွေက သတိပေးထားတာပါ။

အာသံနှင့် အခြား အရှေ့မြောက်ပြည်နယ်တွေ၊တောင်ပိုင်းက တမီနာဒူး၊ကာနက်တာကာနှင့် ကာရာလာပြည်နယ်တွေမှာ  မိုးသည်ထန်လိမ့်မယ်လို့ မိုးဇလဌာနက ဆက်တိုက် သတိပေးထားပါတယ်။

မုတ်သုန်ရာသီမရောက်ခင်မှာ ရာသီအလိုက်ဖြစ်ပေါ်တဲ့ ရေလွှမ်းမိုးမှုတွေကြောင့် ဗုဒ္ဓဟူးနေ့က အရှေ့မြောက်ပိုင်းက အာသံပြည်နယ်မှာ အနည်းဆုံးလူရှစ်ဦးသေဆုံးခဲ့ရပြီး လူပေါင်း ရှစ်သန်းကျော်ကို နေရာရွှေ့ပြောင်းပေးခဲ့ရပါတယ်။

ဒီမာဟာဆောင်ခရိုင်က အစွန်အဖျားရွာကလေးတစ်ရွာမှာ မြေပြိုမှုဖြစ်တဲ့အတွက် အိမ်တစ်အိမ်ဟာမြေကြီးအောက်‌ ရောက်သွားပြီး လူလေးဦးသေဆုံးခဲ့ရပါတယ်။ မြေပြိုမှုကြောင့် ရထားလမ်းကိုလည်းပိတ်ဆို့မှုဖြစ်ပြီး အဲဒီဒေသကို ကယ်ဆယ်ရေးပစ္စည်းတွေပိုဆောင်ပေးဖို့ ခက်ခဲနေပါတယ်။

ပတ်ဝန်းကျင်တောင်တန်းတွေက ကျလာတဲ့ ရွံ့နွံတွေကြောင့် ရထားတစ်စီး လမ်းချော်ခဲ့ရပါတယ်။

ရွာသား ၃၀၀ခန့်ကို ကယ်ထုတ်ခဲ့ရတယ်လို့လည်း အိန္ဒိယစစ်တပ်က သတင်းထုတ်ပြန်ပါတယ်။

တောင်ပိုင်း ကာနာတာကာပြည်နယ်မှာ အင်္ဂါ်နေ့က အနည်းဆုံးလူနှစ်ဦးသေဆုံးခဲ့ရတယ်လို့ မီဒီယာတွေကပြောပါတယ်။

မိုးစရွာနေချိန်မှာ ဘင်ဂါလာရုမှာရှိတဲ့ ပိုက်လိုင်းတည်ဆောက်ရေးလုပ်ငန်းခွင်တစ်ခုထဲ ဝင်ရောက်လာတဲ့ အလုပ်သမားတွေဟာ ရေတွေမြင့်တက်လာတာကို လွတ်အောင် မရှောင်နိုင်ခဲ့ကြဘူး လို့ အိန္ဒိယ အိတ်စ်ပရက်စ်က ရေးသားခဲ့တာဖြစ်ပါတယ်။

Source AFP

#LocalNews
Published -20 May 2022

မန္တလေးတိုင်းဒေသကြီး၊စဉ့်ကူးမြို့နယ်၊ ရွှေပြည်ကျေးရွာရှိရွှေပြည်ရဲကင်းစခန်းကို မေလ(၂၀)ရက်နံနက်(၁)နာရီခွဲခန့်ကပစ်ခတ်တိုက်ခိုက်ခံရတယ်လို့ သိရပါတယ်၊၊

ရွှေပြည်ရဲကင်းစခန်းကို လူ(၁၀)ဦးခန့် စခန်းရဲ့ အနောက်တောင်ဘက် မီတာ(၂၀၀)အကွာရှိ ကားလမ်းမှလက်ပစ်ဗုံးတစ်လုံး၊ လက်နက်ငယ်တွေနဲ့လာရောက်ပစ်ခတ်တိုက်ခိုက်တဲ့အတွက် လုံခြုံရေးရဲတပ်ဖွဲ့ဝင်တွေနဲ့ အပြန်အလှန် ပစ်ခတ်မှုဖြစ်ပွားခဲ့ကြောင်းနဲ့ ထိခိုက်ဒဏ်ရာရရှိမှုမရှိကြောင်း နစကရဲ့ သတင်းအမှန်ထုတ်ပြန်ရေးအဖွဲ့ကနေ သိရပါတယ်၊၊

ymg/tthl
#Yangon_Media_Group

#LocalNews
Published -20 May 2022

မြန်မာနိုင်ငံမှ တရုတ်နိုင်ငံသို့ ကုန်ပစ္စည်းတင်ပို့တဲ့ကုန်တင်ယာဉ်တွေဟာ တရုတ်ကုန်တင်ယာဉ်တွေပေါ်သို့ ပြန်လည်တင်ဆောင်ဖို့မလိုအပ်ဘဲ မူဆယ် ကျင်စန်းကျော့နယ်စပ်ဂိတ်မှတစ်ဆင့် တရုတ်နိုင်ငံသို့ တိုက်ရိုက်ဝင်ရောက်နိုင်ပြီ ဖြစ်တယ်လို့မြန်မာနိုင်ငံဆိုင်ရာတရုတ်သံရုံးကထုတ်ပြန်လိုက်ပါတယ်၊၊

မြန်မာ-တရုတ်နှစ်နိုင်ငံ သက်ဆိုင်ရာဌာနတို ညှိနှိုင်းဆွေးနွေးပြီးနောက် ပြီးခဲ့တဲ့သီတင်းပတ်မှစတင်ပြီး ပြန်လည်ဆောင်ရွက်နိုင်တာဖြစ်ပါတယ်၊၊

ဒီလိုပို့ဆောင်နိုင်တဲ့အတွက် ကုန်ပစ္စည်းတွေဆုံးရှုံးမှုကို လျော့နည်းစေပြီး သယ်ယူပို့ဆောင်ရေးစရိတ်တွေများစွာ လျှော့ချနိုင်ကာ ကုန်စည်ထောက်ပံ့ပိုဆောင်ရေး မြန်ဆန်နှုန်းကိုလည်း မြင့်မားလာစေတယ်လို့ ဆိုပါတယ်၊၊

ကျင်စန်းကျော့နယ်စပ်ဂိတ်ဟာ ယခင်က ကိုဗစ်-၁၉ ကပ်ရောဂါကြောင့် ပိတ်ထားခဲ့ရပြီး ၂၀၂၁ ခုနှစ် နိုဝင်ဘာလ ၂၆ ရက်နေ့တွင် ပြန်လည်ဖွင့်လှစ်ခဲ့ပါတယ်၊၊

တရုတ်-မြန်မာ နှစ်နိုင်ငံဟာ နယ်စပ်ကပ်ရောဂါပူးတွဲကာကွယ်ထိန်းချုပ်ရေးနဲ့ဂနယ်စပ်ကုန်သွယ်မှု ပြန်လည်ဆောင်ရွက်နိုင်ရေးတို့အတွက် လုပ်ငန်းများစွာ ဆောင်ရွက်ခဲ့ပါတယ်၊၊
ဥပမာအားဖြင့် ကပ်ရောဂါကာကွယ်ရေးဂိတ်တွေ ရှေ့တိုးခြင်း၊ မြန်မာနိုင်ငံမြောက်ပိုင်းဒေသများသို့ Vaccine များ လှူဒါန်းခြင်း၊ မူဆယ်မှာကိုဗစ်-၁၉ ကုသရေးစင်တာ ကူညီတည်ဆောက်ပေးခြင်း၊ နယ်စပ်ဂိတ်ရှိ ဂိတ်ဖြတ်သန်းရေးစက်ပစ္စည်းများ အဆင့်မြှင့်တင် ပြုပြင်တည်ဆောက်ခြင်း စသည်တို့ကို ဆောင်ရွက်ခဲ့ကြောင်း၊နှစ်နိုင်ငံ သက်ဆိုင်ရာဌာနတွေရဲ့အတူတကွကြိုးပမ်းမှုနဲ့ ကျင်စန်းကျော့နယ်စပ်ဂိတ် ကုန်ပစ္စည်းပို့ဆောင်ရေးဟာတည်ငြိမ်စွာ ပြန်လည်ကောင်းမွန်လာခဲ့ကြောင်းထုတ်ပြန်ချက်မှာ ဖော်ပြပါရှိပါတယ်၊၊

ymg/tthl
#Yangon_Media_Group

#LocalNews
Published - 20 May 2022

ရန်ကုန်-ပဲခူး ယာဥ်လိုင်းသစ်တွင် ယာဥ်အစီးရေတိုးချဲ့ ပြေးဆွဲပေးသွားမည်ဖြစ်ပြီး ပဲခူး (ကလိ)အထိ ရောက်ရှိမှာဖြစ်တယ်လို့ အဆိုပါ ယာဥ်လိုင်းကုမ္ပဏီထံမှ သိရပါတယ်။

#Yangon_Media_Group