#Health_Science
Published 16 August 2022

တက်စ်တိုစတီရုန်းဟော်မုန်းဟာ ယောက်ျားတွေရဲ့ လိင်စိတ်ကို တွန်းအားပေးနှိုးဆွနိုင်တယ်လို့ သိထားကြပေမယ့် ယုယကြင်နာတဲ့စိတ်ကိုလည်း ဖြစ်စေကြောင်း လေ့လာတွေ့ရှိထားပါတယ်။

သုတေသီများက ကြွက်မျိုးကွဲအထီးများကို တက်စ်တိုစတီရုန်းများထိုးပေးပြီး သူတို့ရဲ့လက်တွဲဖော်တွေနဲ့ တုံ့ပြန်နေထိုင်ပုံတွေကို လေ့လာခဲ့ကြပါတယ်။

ထိုကဲ့သို့ထိုးပေးခြင်းဖြင့် ထွေးပွေ့ယုယစိတ်၊ ရင်းနှီးဖော်ရွေစိတ်များဖြစ်ပေါ်လာပြီး ပေါင်းသင်းဆက်ဆံရေးကောင်းမွန်လာကြောင်း တွေ့ရှိခဲ့ရပါတယ်။

တက်စ်တိုစတီရုန်းက အောက်ဆီတိုစင်လိုခေါ်တဲ့ အချစ်ဟော်မုန်းကို တိုးများစေပါတယ်။

"တက်စ်တိုစတီရုန်းက ပုံမှန်အားဖြင့် လိင်ပိုင်းဆိုင်ရာ စိတ်နှိုးဆွခြင်းကို ဖြစ်ပေါ်စေတယ်လို့သာ သိထားခဲ့ပေမယ့် အခုတော့ ပေါင်းသင်းဆက်ဆံရေးမှာပါ အကျိုးသက်ရောက်မှုတွေရှိနေတာကို တွေ့ခဲ့ရပါတယ်" လို့ အတ္တလန်တာ အီမော်ရီတက္ကသိုလ်မှ စိတ်ကျန်းမာရေးတွဲဖက်ပရော်ဖက်ဆာ 'အော်ဘရေကယ်လီ'က ပြောပြခဲ့ပါတယ်။

ကြွက်ထီးတွေနဲ့စမ်းသပ်ရာမှာ မိတ်လိုက်တဲ့အချိန် စိတ်အားထက်သန်မှုရှိပြီး ကိုယ်နေထိုင်ရာနေရာကို ကာကွယ်ရာမှာ ရန်လိုစိတ်တွေရှိနေပါတယ်။

ဒါပေမဲ့ ကြွက်မတွေ ကိုယ်ဝန်ဆောင်ချိန်မှာ ဂရုစိုက်ကြင်နာတတ်ပြီး သားပေါက်တွေကိုလည်း ကာကွယ်ပေးချင်တဲ့သဘော ရှိနေပါတယ်။

တက်စ်တိုစတီရုန်းထိုးပေးလိုက်ရင် ကြင်နာယုယစိတ်တွေ လျော့နည်းသွားမယ်လို့ ထင်ခဲ့ကြပေမယ့် ကြွက်ထီးလေးက သူ့ကြင်ဖက်အပေါ် ပိုပြီးယုယလာတာဟာ အံ့အားသင့်စရာဖြစ်ခဲ့ကြပါတယ်။

အဲဒီနောက် ကြွက်မကိုဖယ်ထုတ်လိုက်ပြီး ကြွက်ထီးတစ်ကောင်တည်း လှောင်အိမ်ထဲထားလိုက်ပါတယ်။

ထို့နောက် နောက်ထပ်ကြွက်ထီးတစ်ကောင်ကို လှောင်အိမ်ထဲထည့်ပေးလိုက်ပြီး ရန်လိုတဲ့သဘောတွေ့ရမလားလို့ စောင့်ကြည့်ခဲ့ကြပါတယ်။

ပုံမှန်အားဖြင့် ကြွက်ထီးတစ်ကောင်က သူ့နေရာကို တခြားကြွက်ထီးတစ်ကောင်ရောက်လာရင် လိုက်တိုက်ခိုက်တတ်သလို လုံးဝရှောင်ရှားတာမျိုး ပြုလုပ်တတ်ပါတယ်။

ဒါပေမဲ့ တက်စ်တိုစတီရုန်းထိုးပေးထားတဲ့ ကြွက်ထီးကတော့ နောက်ထပ်ဝင်လာတဲ့ကြွက်ထီးကို ရင်းနှီးတဲ့ပုံစံမျိုး ပြသနေပါတယ်။
ဒါပေမဲ့ ထိုကြွက်ကိုပဲ နောက်ထပ်တက်စ်တိုစတီရုန်းတွေ ထိုးပေးလိုက်ရာမှာတော့ ရန်လိုတဲ့သဘောဖြစ်လာခဲ့တာကို တွေ့ရှိခဲ့ပါတယ်။

လူသားတွေနဲ့စမ်းသပ်ဖို့က ကြွက်တွေထက် ပိုမိုရှုပ်ထွေးပေမယ့် အဆိုပါ လေ့လာချက်ကနေ အခြေခံသဘောတရားတွေ ရလာနိုင်ပါတယ်။

ဟော်မုန်းအပြင် ဦးနှောက်အစိတ်အပိုင်းအချို့ကပါ တူညီနေတာတွေ ရှိနေပါတယ်။

၂၀၂၁ လေ့လာချက်တစ်ခုအရ တက်စ်တိုစတီရုန်းပမာဏများ ပြားခြင်းက အမျိုးသားတွေမှာ တွန့်တိုတတ်တဲ့သဘောရှိပြီး တကိုယ်ကောင်းဆန်တဲ့အပြုအမူတွေ တွေ့ရကြောင်း သိရှိထားပါတယ်။

Source: Daily Mail
#Yangon_Media_Group

#Local_News
Published_16 August 2022

လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေပံ့ပိုးမှုဖြင့် 'အစားအစာ တီထွင်ဆန်းသစ်မှုဌာန' ဆောက်လုပ်ပြီးစီးသွားပြီဖြစ်ကြောင်း မြန်မာနိုင်ငံဆိုင်ရာ တရုတ်သံရုံးမှ ထုတ်ပြန်လိုက်သည်၊၊

လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေပံ့ပိုးမှုဖြင့် “လန်ချန်း-မဲခေါင်ဒေသတွင်း သစ်သီးဝလံထုတ်ကုန်များဖြင့် စီးပွားရေးဖွံ့ဖြိုးတိုးတက်မှုမြှင့်တင်ရေး သုတေသန” စီမံကိန်း“အစားအစာ တီထွင်ဆန်းသစ်မှုဌာန ဆောက်လုပ်ပြီးစီးခြင်းနှင့် သစ်သီးအခြောက်ခံမှုလေ့ကျင့်ရေး စတင်ခြင်းအခမ်းအနား” ကို သြဂုတ်လ ၁၅ ရက်နေ့တွင် ရန်ကုန်မြို့၌ ကျင်းပခဲ့ကြောင်း သိရသည်၊၊

အဆိုပါ အခမ်းအနားတွင် သံမှူးကြီး Mr. Zheng Zhihong က "မြန်မာနိုင်ငံသည် ရာသီဥတုစိုစွတ်ပြီး မြေဆီလွှာ ပေါကြွယ်ဝသဖြင့် သစ်သီးအများအပြား တင်ပို့ခြင်းဖြင့် ဂုဏ်သတင်းကျော်ဇောကြောင်း၊ မြို့ပြဖြစ်တည်မှု အတိုင်းအတာမြှင့်တင်လာမှုနှင့် လူတို့ဝင်ငွေတိုးများလာသည်နှင့်အမျှ သစ်သီးနှင့် သစ်သီးအချောကိုင်ကုန်ပစ္စည်းများ စားသုံးမှုပမာဏ အဆက်မပြတ် တိုးများလာကြောင်း၊ သစ်သီးထုတ်ကုန်အချောကိုင်ခြင်းနည်းပညာနှင့် စက်ပစ္စည်းများ ဖော်ဆောင်တင်သွင်းရာတွင် နည်းပညာဆန်းသစ်တီထွင်မှုကို အပြည့်အဝအသုံးချနိုင်ကြောင်း၊ သစ်သီးအချောကိုင်ထုတ်ကုန်အရည်အသွေးနှင့် တန်ဖိုးများကို ထိရောက်စွာကူညီမြှင့်တင်နိုင်ကာ Industry chain ဖြန့်ကျက်၍ လုပ်ငန်းခွင်ဝင်မှုတိုးမြှင့်ပြီး ပြည်သူလူနေမှုဘဝဖွံဖြိုးတိုးတက်မှုအား အထောက်အကူပြုကြောင်း၊ အစားအစာတီထွင်ဆန်းသစ်မှုဌာန ဆောက်လုပ်ပြီးစီးခြင်းနှင့် သစ်သီးအခြောက်ခံမှုလေ့ကျင့်ရေးတွင် သစ်သီးအချောကိုင်လုပ်ငန်းကုမ္ပဏီများက ခေတ်မီသည့်နည်းပညာမျှဝေမှုကိုဖော်ဆောင်နိုင်ပြီး မဲခေါင်မြစ်နိုင်ငံ အစားအစာအချောကိုင်လုပ်ငန်း ဖွံ့ဖြိုးတိုးတက်မှုအား တွန်းအားပေး၍ ပိုမိုများပြားသည့် လယ်ယာထွက်ကုန်များတင်ပို့မှုကို မြှင့်တင်နိုင်မည်ဟုမျှော်လင့်ကြောင်း "ပြောကြားခဲ့သည်။

လက်ရှိအချိန်အထိ မြန်မာနိုင်ငံအတွက် လန်ချန်း-မဲခေါင်ပူးပေါင်းဆောင်ရွက်မှုအထူးရန်ပုံငွေ စီမံကိန်းပေါင်း ၉၀ ကျော်ဖော်ဆောင်ခဲ့ပြီးဖြစ်ကာ မြန်မာနိုင်ငံ လူမှုရေးနှင့်စီးပွားရေးဖွံ့ဖြိုးတိုးတက်မှုနှင့် လူနေမှုဘဝအကျိုးစီးပွားကောင်းမွန်ရေးအတွက် အရေးပါသည့်အခန်းကဏ္ဍမှပါဝင်ခဲ့ကြောင်း သိရသည်၊၊

ယင်းအခမ်းအနားကို မြန်မာနိုင်ငံဆိုင်ရာ တရုတ်သံရုံး သံမှူးကြီး Mr. Zheng Zhihong ၊ မြန်မာနိုင်ငံသိပ္ပံနှင့် နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်တိုတက်ရောက်အမှာစကားပြောကြားခဲ့ပြီးမြန်မာနိုင်ငံ လန်ချန်း-မဲခေါင် ပူးပေါင်းဆောင်ရွက်ရေးဆိုင်ရာ ပူးပေါင်းညှိနှိုင်းရေးအဖွဲ့ ဒုတိယဥက္ကဋ္ဌ ဦးဝင်းဇေယျာထွန်းက အွန်လိုင်းမှ အမှာစကားပြောကြားခဲ့ကာ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ မြန်မာနိုင်ငံအခြေစိုက် မဲခေါင်မြစ်ဒေသနိုင်ငံသံတမန်များ (သို့မဟုတ်) ကိုယ်စားလှယ်များနှင့် မြန်မာနိုင်ငံ သက်ဆိုင်ရာဌာန၊ တက္ကသိုလ်နှင့် အဖွဲ့အစည်းကိုယ်စားလှယ်ပေါင်း လူ ၅၀ ကျော် တက်ရောက်ခဲ့ကြောင်း ဖော်ပြထားသည်၊၊

ymg/tthl
#Yangon_Media_Group

#Local_News
Published _ 16 August 2022

ကိုဗစ်(၁၉)ရောဂါကုသခြင်းအတွက် နောက်ဆုံးပေါ်ကုသဆေး (သောက်ဆေး)အား မြန်မာနိုင်ငံသားပိုင် Pacific Medical Industries Ltd ဆေးဝါးစက်ရုံမှ မှ branded generic PACLOVID အမည်ဖြင့် အောင်မြင်စွာ ထုတ်လုပ်နိုင်ခဲ့ပြီးနောက် သြဂုတ်လ ၁၁ ရက်က FDA Myanmar ၏ ခွင့်ပြုချက်ရရှိခဲ့ကြောင်း သိရသည်။

မြန်မာနိုင်ငံအစားအသောက်နှင့် ဆေးဝါးကွပ်ကဲမှုဌာန FDA Myanmar မှထောက်ခံစာအမှတ် (2308ND012)ဖြင့် ခွင့်ပြုခဲ့ခြင်းဖြစ်ကြောင်း သိရသည်။

ကမ္ဘာ့ကျန်းမာရေးအဖွဲ့အစည်း (WHO) အပါအဝင် US FDA , UK MHRA , Korea FDA , Singapore FDA အပါအဝင် ကမ္ဘာ့ဖွံ့ဖြိုးပြီးနိုင်ငံများ၏ ကျန်းမာရေးအဖွဲ့အစည်းများမှလည်း အဆိုပါ PAXLOVID (Nirmatrelvir 150mg; Ritonavir 100mg) ဆေးအား ထောက်ခံထားသည်ဟု သိရသည်။

PAXLOVID(Nirmatrelvir 150mg; Ritonavir 100mg (2)မျိုးပါ)ဗိုင်းရပ်ကုသ ဆေးအား Pacific Medical Industries Ltd ဆေးဝါးစက်ရုံမှ ပြည် တွင်းပညာရှင်များ၊ နိုင်ငံခြားသားပညာရှင်များ ပူးပေါင်း၍ အဆင့်ဆင့် research & development ပေါင်းများစွာ ပြုလုပ်ပြီး branded generic PACLOVID (Nirmatrelvir 150mg; Ritonavir 100mg)အမည်ဖြင့် ထုတ်လုပ်အောင်မြင်ခဲ့ခြင်းဖြစ်သည်။

Pacific Medical Industries Ltd (PMI) ဆေးဝါးစက်ရုံသည် ယခင် Delta နှင့် Omicron Covid ပိုးများကူးစက်စဉ်ကာလများ၌ FAVIPAC 200 , 400 ၊ MOLNUPAC 200 , 400 တို့အား အရည်အသွေးပြည့်မီစွာထုတ်လုပ်၍ မြန်မာတစ်နိုင်ငံလုံးသို့ ဖြန့်ဖြူးပေးခဲ့သည်။

PACLOVID( Nirmatrelvir 150mg; Ritonavir 100mg)ဆေးသည် ကိုဗစ်(၁၉)ရောဂါကြောင့် ဆေးရုံတက်ရသည့်နှုန်းလျော့နည်းစေခြင်း၊ရောဂါဆိုးရွားစွာကူးစက်ခံနေရသူများ စောလျင်စွာကုသနိုင်ပါက သေဆုံးမှုနှုန်းအား ၉၀ ရာခိုင်နှုန်းအထိလျော့ချနိုင်ခြင်း၊ delta နှင့် omicron မျိုး စိတ်များအား(ဓါတ်ခွဲစမ်းသပ်ချက်အရ)အောင် မြင်စွာကုသနိုင်ခြင်း၊ အသက် ၁၂ နှစ် အထက် ကိုယ်အလေးချိန် 40 kg အထက်ကလေးများအား ကုသမှုပေးနိုင်ခြင်း ကောင်းကျိုးများရှိသည့် သောက်ဆေးဖြစ်ကြောင်း သိရသည်။

ယင်းအပြင် PACLOVID(Nirmatrelvir 150mg; Ritonavir 100mg)ဆေးသည် ဆရာဝန်ညွှန်ကြား ချက်နှင့်သောက်သုံးရသည့် (Prescription Only Medicine - POM)ဆေးအမျိုးအစားဖြစ်ကြောင်း သိရသည်။

ymg/NN
#Yangon_Media_Group

#Local_News
Published - 16 August 2022

စက်သုံးဆီအရောင်းဆိုင်များမှ ရောင်းချမှုရပ်တန့်ထားခြင်း၊ အကန့်အသတ်ဖြင့် ရောင်းချသည့်ဆိုင်များတွေ့ရှိပါက တိုင်ကြားနိုင်ကြောင်း ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီ၊ ရေနံထွက်ပစ္စည်းကြီးကြပ်စစ်ဆေးရေးဌာနက ကြေညာထားသည်။

ကော်မတီအနေဖြင့် စက်သုံးဆီများကို ၂၀၂၂ ခုနှစ် သြဂုတ်လ လကုန်ပိုင်းအထိ ပြည့်စုံလုံလောက်စွာ တင်သွင်းဖြန့်ဖြူးထားပြီးဖြစ်ကြောင်း၊ သို့သော် အချို့သော စက်သုံးဆီအရောင်းဆိုင်များသည် စက်သုံးဆီပြတ်လပ်သည် (သို့မဟုတ်) စက်သုံးဆီလက်ကျန်နည်းနေသည်ဟုပြောဆိုကာ ရောင်းချမှုရပ်တန့်ခြင်း၊ အကန့်အသတ်ဖြင့်ရောင်းချနေကြကြောင်း သိရသည်။

ယင်းကြောင့် ပြည်သူများအနေဖြင့် စက်သုံးဆီအရောင်းဆိုင်များမှ ရောင်းချမှုရပ်တန့်ထားခြင်း၊ အကန့်အသတ်ဖြင့် ရောင်းချသည့်ဆိုင်များတွေ့ရှိပါက သက်ဆိုင်ရာနယ်မြေဒေသအလိုက် တိုင်ကြားနိုင်သည့် ဖုန်းနံပါတ်များကို ထုတ်ပြန်ထားသည်။

ပြည်တွင်း၌ စက်သုံးဆီဈေးမှာ အဆမတန်မြင့်တက်လျက်ရှိပြီး နိုင်ငံအနှံတွင်လည်း စက်သုံးဆီပြတ်လပ်၍ ဝယ်မရသူအများအပြားရှိနေကြောင်း သိရသည်။

လက်ရှိစက်သုံးဆီစျေးနှုန်းမှာ 92 တစ်လီတာ ၂၃၆၅ ကျပ်၊ 95 တစ်လီတာ ၂၄၄၅ ကျပ်၊ 97 တစ်လီတာ ၂၇၀၀ ကျပ်၊ဒီဇယ်နှင့် ပရီမီယံဒီဇယ်တစ်လီတာ ၂၇၈၀ ကျပ်ဖြစ်ပြီး ယခင်နေ့ထက် စျေးတက်လာကြောင်း စက်သုံးဆီအရောင်းဆိုင်များ၏ စျေးနှုန်းများအရ သိရသည်။

ymg/sth
#Yangon_Media_Group

#World_Health
Published 16 August 2022

လွန်ခဲ့တဲ့နှစ် ၇ သန်းခန့်အတွင်း လူသားတွေရဲ့ဦးနှောက်အရွယ်အစား ၃ ဆလောက် ပိုကြီးလာရတဲ့အကြောင်းအရင်းကို သိပ္ပံပညာရှင်များ တိတိကျကျ မဖော်ထုတ်နိုင်သေးပါဘူး။

ဒါကြောင့်ပဲ လူသားတွေဟာ အခြားသတ္တဝါတွေထက် များစွာသာလွန်အဆင့်မြင့်နေထိုင်နိုင်တာ ဖြစ်ပါတယ်။

သတ္တဝါတိုင်း စိတ်ဖိစီးမှု၊ စိုးရိမ်ပူပန်မှုတွေ ကြုံနိုင်ကြပေမယ့် လူသားတွေမှာတော့ အသက်အန္တရာယ်ဖြစ်စေသည်အထိ ကြုံတွေ့ရတတ်ပါတယ်။

ဒီလိုမျိုးဖိစီးမှုဖြစ်စေတဲ့ အကြောင်းအရာများစွာထဲမှာ မျက်စိနဲ့မမြင်ရတဲ့ အသံလည်းပဲ အပါအဝင်ဖြစ်ပါတယ်။

လေ့လာတွေ့ရှိချက်များအရ ၈၅ ဒက်ဆီဘယ်ထက်ကျော်တဲ့ ဆူညံသံတွေ နားထဲဝင်နေတယ်ဆိုရင် ကျန်းမာရေးနောက်ဆက်တွဲဆိုးကျိုးများ ဖြစ်လာနိုင်ပါတယ်။

အကြားအာရုံထိခိုက်ခြင်းအပြင် အခြားကျန်းမာရေးပြဿနာတွေပါ ကြုံတွေ့လာနိုင်တဲ့သဘောပါ။

လူတစ်ဦးချင်းစီရဲ့ သဘောသဘာဝ၊ ဆူညံသံအမျိုးအစားနဲ့ ကြားနေရတဲ့ကြာချိန်အပေါ် မူတည်ပြီး သွေးပေါင်ချိန်တက်ခြင်း၊ နှလုံးရောဂါ၊ အိပ်မပျော်ခြင်းနဲ့ စိတ်ဖိစီးမှုတို့ ဖြစ်ပေါ်စေနိုင်ပါတယ်။

လက်ရှိကြုံတွေ့နေတဲ့ ပတ်ဝန်းကျင်အပေါ်မူတည်ပြီး အသံပြင်းအားဘယ်လောက်ရှိလဲဆိုတာကတော့ ...

- ၂၀ ဒက်ဆီဘယ် ( တီးတိုးပြောသံ )

- ၄၀ ဒက်ဆီဘယ် ( တိတ်ဆိတ်ငြိမ်သက်တဲ့စာကြည့်တိုက် )

- ၆၀ ဒက်ဆီဘယ် ( စကားပြောဆိုသံ )

- ၈၀ ဒက်ဆီဘယ် ( ကျယ်လောင်တဲ့သီချင်းသံ )

- ၁၀၀ ဒက်ဆီဘယ် ( မော်တော်ဆိုင်ကယ် )

- ၁၂၀ ဒက်ဆီဘယ် ( နားရဲ့အသံခံနိုင်ရည်ကန့်သတ်ချက် )

စာကြည့်တိုက်ထဲမှာ ဘယ်သူမှစကားမပြောဘဲနေရင်တောင် ဆူညံသံနှုန်းက ၅၅ ဒက်ဆီဘယ်လောက်ရှိပါတယ်။

လေအေးပေးစက်အသံ၊ လမ်းလျှောက်သံ၊ တံခါးဖွင့်ပိတ်သံ၊ လမ်းပေါ်ကအသံ စတဲ့ အသံတွေရှိနေပါတယ်။

ဆူညံသံများမရှိအောင် ပါတီပွဲတွေ၊ ကော်ဖီဆိုင်တွေ၊ ဖျော်ဖြေပွဲတွေနဲ့ အပျော်အပါးပွဲတွေကို တားမြစ်လိုက်လိုလည်း မဖြစ်ပါဘူး။

ပြင်သစ်လိုမြို့မှာဆိုရင် အသံရေဒါလိုမျိုး အထူးစက်ပစ္စည်းတွေကို လမ်းတွေမှာတပ်ဆင်ထားပါတယ်။

ဒီပစ္စည်းတွေက အသံဆူညံစွာထွက်လာတဲ့ မော်တော်ယာဉ်ကို နံပါတ်ပြားမှတ်သားကာ အာဏာပိုင်တွေကို သတင်းပေးပို့ပါတယ်။

ဆူညံသံလျှော့ချနိုင်တဲ့ နောက်ထပ်နည်းလမ်းက အများပြည်သူသုံးပို့ဆောင်ရေးယာဉ်တွေကို အသံဆိတ်ငြိမ်အောင် လျှပ်စစ်ဘတ်စ်ကားတွေ၊ မျိုးစပ်ဘတ်စ်ကားတွေနဲ့ အစားထိုးရမှာပါ။

ဟန်ဂေရီလေ့လာချက်တစ်ခုအရ လျှပ်စစ်ဘတ်စ်ကားတွေက ဒီဇယ်သုံးဘတ်စ်ကားတွေထက် ၁၅ ဒက်ဆီဘယ် လျော့နည်းပါတယ်။ ‌

နောက်တစ်ချက်က အဆောက်အဦအတွင်းနဲ့အပြင်တွေမှာ ဆူညံသံကိုစုပ်ယူနိုင်မယ့် ပစ္စည်းမျိုးထုတ်လုပ်ဖို့ဖြစ်ပြီး ကုမ္ပဏီအချို့ကလည်း ထုတ်လုပ်နေပြီဖြစ်ပါတယ်။

နောက်ဆုံးတစ်ချက်ကတော့ ဆူညံသံကြောင့်ဖြစ်နိုင်တဲ့ ပြဿနာတွေအကြောင်း ပညာပေးသင်ကြားပေးဖို့ပါပဲ။

လူ့အသိုင်းအဝိုင်းမှာလည်း ကိုယ်တိုင်စောင့်ထိန်းကျင့်ကြံနိုင်တဲ့ နည်းလမ်းတွေရှိနေပါတယ်၊ ဥပမာ နားကြပ်ဖြင့်သီချင်းနားထောင်ခြင်း။

ဒါကြောင့် လူ့လောကအသိုင်းအဝိုင်း ကျန်းမာပျော်ရွှင်နေဖို့ လူသားတွေကိုယ်တိုင် ဂရုစိုက်စောင့်ထိန်းသင့်ပါတယ်။

Source: The Jerusalem Post
#Yangon_Media_Group

#Local_News
Published_14 August 2022

မိုးရာသီကာလမှာ ရေဘေးနဲ့သဘာဝဘေးကြုံတွေ့နေရသူတွေကို ရှာဖွေကယ်ဆယ်ပေးဖို့ မြန်မာနိုင်ငံမီးသတ်တပ်ဖွဲ့ထံ ဆက်သွယ်အကူအညီတောင်းခံနိုင်တယ်လို့ မြန်မာနိုင်ငံမီးသတ်အဖွဲ့ချုပ်၊ ညွှန်ကြားရေးမှူး ဦးသိန်းထွန်းဦးက ပြောပါတယ်၊၊

#Yangon_Media_Group

#World_Climate
Published 15 August 2022

မော်ရိုကိုနိုင်ငံရှိ ကျေးရွာများအနေနဲ့ မိုးခေါင်ရေရှားမှုဒဏ်ကို အဆက်မပြတ်ခံလာရတာကြောင့် လယ်သမားအချို့မှာ လယ်ယာစိုက်ပျိုးခြင်းအလုပ်ကို စွန့်လွှတ်လိုက်ကြပါတယ်။

#Yangon_Media_Group

#Local_News
Published _ 15 August 2022

မြန်မာနိုင်ငံ လူမှုဝန်ထမ်း ဦးစီးဌာနအနေနဲ့ သင်တန်းကာလသုံးလကြာမြင့်မယ့် အသက်မွေးဝမ်းကျောင်းပညာရပ် ၅မျိုးကို မသန်စွမ်းသူတွေအတွက် နေစားစရိတ်ငြိမ်း အခမဲ့စနစ်နဲ့ ရန်ကုန်မြို့မှာရှိတဲ့ မသန်စွမ်းသက်ကြီး သင်တန်းကျောင်းမှာ သင်ကြားပေးသွားတော့မှာပဲဖြစ်ပါတယ်။

#Yangon_Media_Group

#Local_News
Published - 15 August 2022

ဗဟိုဘဏ်က ပြောင်းလဲသတ်မှတ်ပေးလိုက်တဲ့ ငွေလဲလှယ်နှုန်းဈေးကြောင့် ပြည်တွင်းပဲဈေး မြင့်တက်လာခဲ့သော်လည်း အရောင်းအဝယ် အေးနေတယ်လို့ ပဲကုန်သည်တွေဆီကနေ သိရပါတယ်။

#Yangon_Media_Group

#Local_News
Published_15 August 2022

ရန်ကုန်တိုင်းမှာတွေ့ရတဲ့ ပြည်တွင်းပြည်ပက ကိုဗစ်လူနာတွေကို ပြည်သူ့ဆေးရုံကြီး(၂)ရုံနဲ့ ရိုးမကိုဗစ်စင်တာကို နေ့စဉ်ပို့ဆောင်ပေးနေတယ်လို့ ရှင်သန်ရေးကူညီမှုအသင်း၊ ဥက္ကဌဦးထွန်းထွန်းဦးက ပြောပါတယ်၊၊

#Yangon_Media_Group

#DailyNews
Published - 15 August 2022

၁။ ရန်ကုန်တိုင်းက ကိုဗစ်လူနာများကို ပြည်သူ့ဆေးရုံ(၂) ရုံနှင့် ရိုးမကိုဗစ်စင်တာကို နေ့စဉ်ပို့ဆောင်ပေးနေ

၂။ ပြောင်းလဲသတ်မှတ်လိုက်သည့် ငွေဈေးနှုန်းကြောင့် ပဲဈေးနှုန်းတက်လာ

၃။ မသန်စွမ်းသူများအတွက် အခမဲ့ အသက်မွေးဝမ်းကျောင်းပညာအတတ်သင် သင်တန်းကို လာမည့်စက်တင်ဘာလတွင် ဖွင့်လှစ်သွားမည်

၄။ မိုးခေါင်ရေရှားမှုကြောင့် မော်ရိုကိုစိုက်ပျိုးရေးကဏ္ဍကြပ်တည်းလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published_15 August 2022

လူမှုကွန်ရက်ပေါ်တွင် စက်သုံးဆီဝယ်ယူရန် စောင့်ဆိုင်းနေရခြင်းနှင့် စက်သုံးဆီများ ပြတ်လပ်နေခြင်းများ ဖြစ်ပေါ်နေကြောင်း သတင်းများထွက်ပေါ်မှုမှာ ကောလဟာလသာဖြစ်ပြီး လက်ရှိတွင် စက်သုံးဆီ ဂါလန် သိန်းနှင့်ချီရှိကာ မကြာမီရက်ပိုင်းအတွင်း ဆီသင်္ဘော ၁၂ စင်း ထပ်မံဝင်ရောက်ရန်လည်းရှိနေသေးကြောင်းပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက မီဒီယာများအား သြဂုတ်လ ၁၅ ရက်က ပြောပါတယ်။ ရှင်းလင်းချက်အပြည့်အစုံကိုဖော်ပြပေးအပ်ပါတယ်။

ymg/mt

Yangon_Media_Group

#Myanmar_Fuel_Issue

#Maj_Gen_Zaw _Min_Tun

#Myanmar_Politics