#Local_News
Published - 15 August 2022

ယနေ့(ဩဂုတ်လ ၁၅ ကနေ ၂၁ ရက်နေ့အထိ) ရန်ကုန်စားအုန်းဆီ အခြေခံလက်ကားရည်ညွှန်းဈေးနှုန်းကို တစ်ပိဿာ ၄၁၄၀ ကျပ်ဖြစ်တယ်လို့ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက သတ်မှတ်‌ကြေညာထားပါတယ်။

#Yangon_Media_Group

#Local_News
Published_15 August 2022

ဒေါ်အောင်ဆန်းစုကြည် တရားစွဲဆိုခံထားရသော အမှုများအနက် အဂတိအမှု ၄ မှုနှင့် ပတ်သက်၍ ထောင်ဒဏ် စုစုပေါင်း ၆ နှစ်ကို ယနေ့ ချမှတ်လိုက်သည်။

ယင်းအမှုများမှည ဒေါ်ခင်ကြည်ဖောင်ဒေးရှင်းနှင့် ပတ်သက်သည့် အဂတိလိုက်စားမှုတိုက်ဖျက်ရေး ဥပဒေပုဒ်မ ၅၅ ဖြင့် စွဲဆိုခံထားရသော အမှု ၄ မှု ဖြစ်ပြီး ယနေ့ သြဂုတ်လ ၁၅ ရက်တွင် နေပြည်တော်အကျဉ်းထောင်အထူးတရားရုံးရုံးချိန်းတွင် ချမှတ်လိုက်ခြင်း ဖြစ်ကြောင်း တရားရုံးနှင့် နီးစပ်သည့် အသိုင်းအဝိုင်းက သိရသည်။

"အမှုနံပါတ် ၃၊၄၊၅ ၊၂၅ ကို တစ်မှုကို ၃ နှစ်စီ ချတယ်။ ဒါပေမဲ့ အမှုအမှတ် ၃၊ ၄၊ ၅ က နေပြည်တော်က ကိစ္စတွေဖြစ်တာကြောင့် တစ်ပေါင်းတည်းကျခံဖို့ ဆုံးဖြတ်တာ ဆိုတော့ အမှု ၃ ခုပေါင်း ၃ နှစ် ဖြစ်တယ်။ ဒါကြောင့် ဒေါ်အောင်ဆန်းစုကြည်က အမှု နံပါတ် ၂၅ (ရန်ကုန်အမှုအတွက်) ၃ နှစ် ၊ အမှုနံပါတ် ၃၊၄၊၅ အတွက် တစ်ပေါင်းတည်း ကျခံရမှာ ဖြစ်တာကြောင့် အားလုံး စုစုပေါင်း ၆ နှစ် ကျတယ်။ သူနဲ့ အမှုတွဲမှာ ပါတဲ့ ဒေါက်တာမျိုးအောင် က အမှု နှစ်ခု တွဲတယ်။ သူက တစ်မှုကို ၃ နှစ်စီဆိုပေမဲ့ တစ်ပေါင်းတည်း ဖြစ်လို ၃ နှစ် ကျတယ်။ ဦးရဲမင်းဦးက တစ်မှု ဖြစ်တယ်၊ ဒါကြောင့် ၃ နှစ် ၊၊ ဦးရဲမင်းဦး၊ နေပြည်တော်စည်ပင်အရာရှိဟောင်း ဦးမင်းသူက ၂ နှစ်ပေါ့"တရားရုံးနှင့် နီးစပ်သူက ပြောသည်။

အဆိုပါ အမှုများအတွက် တရားစတင်စွဲဆိုခဲ့သည့်အချိန်မှစ၍ အပြီးသတ် အမိန့်ချသည်သည် တရားရင်ဆိုင်ရသည့် ကာတ တစ်နှစ်ကျော် ကြာမြင့်ခဲ့ကြောင်းလည်း သိရသည်။

ymg/mt
#Yangon_Media_Group

#Local_News
Published - 15 August 2022

ထိုင်းဘတ်ငွေလဲလှယ်နှုန်းမြင့်တက်နေပြီး တစ်ဘတ်ကို မြန်မာကျပ်ငွေ ၈၀ ကျပ်နီးပါးထိ မြင့်တက်လာကြောင်းငွေကြေးဈေးကွက်မှ သိရသည်။

ထိုင်းဘတ်ငွေလဲလှယ်နှုန်းသည် ပြီးခဲ့သည့် တစ်ပတ်အတွင်း၌ ထိုင်းတစ်ဘတ်ကို မြန်မာ ငွေကျပ် ၆၉ ကျပ်ဝန်းကျင်ရှိခဲ့ပြီး ယခုရက်ပိုင်းတွင် ထိုင်းတစ်ဘတ်ကို မြန်မာကျပ်ငွေ ၈၀ ဝန်းကျင်အထိရှိလာကြောင်း သိရသည်။

လက်ရှိတွင် ထိုင်းဘတ်ငွေလဲလှယ်နှုန်းမြင့်တက်နေခြင်းကြောင့် နယ်စပ်ကုန်သွယ်ရေးလုပ်ငန်း လုပ်ကိုင်သူတွေအနေဖြင့် အခက်အခဲတွေ ရှိလာကြောင်း သိရသည်။

ထိုင်းဘတ်ငွေဈေး စံချိန်တင်မြင့်တက်လာခြင်းကြောင့် ကုန်သည်တွေအနေဖြင့် အခက်တွေ့နေပြီး ကုန်စည်ဈေးနှုန်းတွေသည်လည်း အချိန်နှင့်အမျှ ပြောင်းလဲနေကြောင်း သိရသည်။

လက်ရှိအခြေအနေတွင် ဒေါ်လာငွေ၊ ထိုင်းဘတ်ငွေ၊ တရုတ်ယွမ်ငွေ စသည့် ငွေလဲလှယ်နှုန်းအားလုံး မြင့်တက်လျက်ရှိနေပြီး မြန်မာကျပ်ငွေတန်ဖိုး ကျဆင်းလာနေကြောင်း သိရသည်။

ymg/sth
#Yangon_Media_Group

#Local_News
Published_15 August 2022

လူမှုကွန်ရက်ပေါ်တွင် စက်သုံးဆီဝယ်ယူရန် စောင့်ဆိုင်းနေရခြင်းနှင့် စက်သုံးဆီများ ပြတ်လပ်နေခြင်းများ ဖြစ်ပေါ်နေကြောင်း သတင်းများထွက်ပေါ်မှုမှာ ကောလဟာလသာဖြစ်ပြီး လက်ရှိတွင် စက်သုံးဆီ ဂါလန် သိန်းနှင့်ချီရှိကာ မကြာမီရက်ပိုင်းအတွင်း ဆီသင်္ဘော ၁၂ စင်း ထပ်မံဝင်ရောက်ရန်လည်းရှိနေသေးကြောင်းပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက မီဒီယာများအား သြဂုတ်လ ၁၅ ရက်က ပြောသည်။

“မနေ့က(သြဂုတ်လ ၁၄ရက်)ဆိုရင် သင်္ဘောတစ်စီးပေါ့၊ စက်သုံးဆီ သီလဝါဆိပ်ကမ်းမှာ ချပါတယ်။ ဒီနေ့(သြဂုတ်လ ၁၅ ရက်) ဆိုရင် သင်္ဘော လေးစီး သီလဝါဆိပ်ကမ်းမှာ စက်သုံးဆီချလျက်ရှိတယ်။ 92၊ 95၊ Premium Desel၊ Diesel အားလုံးပေါင်း တန် ၆ဝဝဝဝ လောက် ရှိပါတယ်။ ဂါလံ တစ်ဆယ့်သုံးသိန်းလောက် ရှိတာပေါ့။ 92 ဆိုရင် ၂၇ဝဝဝ တန်လောက် ဒီနေ့ ((သြဂုတ်လ ၁၅ ရက်)ရောက်ရှိနေပြီ ဖြစ်တယ်။ 95 ဆိုရင် တန် ၃ဝဝဝ ကျော် ရှိပါတယ်။ Diesel တန် ၆ဝဝဝ ရှိတယ်။ Premium Diesel ၂၂၆ဝဝ တန်ကျော် ရှိပါတယ်။ အဲ့တာတွေ ဒီနေ့ (သြဂုတ်လ ၁၅ ရက်)ချလျက်ရှိပါတယ်။ နောက်တစ်ခုက သြဂုတ် ၁၈ ရက်နေ့ဆိုရင် နောက်ထပ် တန်ချိန် ၂ဝဝဝဝ သင်္ဘော ထပ်ဝင်ဖို ရှိတယ်။ သြဂုတ်၁၉ ရက်နေ့မှာလည်း တန်ချိန် ၂၃ဝဝဝ လောက် သင်္ဘောထပ်ဝင်ဖို့ရှိတယ်။ နောက်ထပ် သင်္ဘော ၁၂ စင်းလည်း ထပ်ဝင်ဖို့ ရှိပါတယ်။ ပြည်သူလူထုကို အသိပေးချင်တာက ဒီကောလဟာလတွေကို တမင်သက်သက်ကို ထုတ်လွှင့်နေတဲ့သူတွေ ရှိပါတယ်။ ဒီကောလဟာလတွေကို မယုံကြည်ကြဖို့ ပြောချင်တယ်။ ဒီဟာနဲ့ပတ်သက်ပြီး လှုံ့ဆော်မှုပေါ့၊ မငြိမ်သက်မှုဖြစ်အောင် လှုံ့ဆော်နေတာတွေရှိတယ်၊ ဒါတွေကို မယုံကြည်ကြဖို့ ပြောချင်ပါတယ်။ ကျွန်တော်တို့အနေနဲ့ကတော့ ကမ္ဘာမှာ စက်သုံးဆီဈေးနှုန်းတွေကတော့ သူ့ရဲ့ဈေးနှုန်းတွေအတိုင်းပဲ တက်နေတာတွေ ရှိတယ်။ နိုင်ငံတော် အစိုးရအနေနဲ့ကတော့ ပြည်သူလူထုကို ကျွန်တော်တို့ စက်သုံးဆီနဲ့ပတ်သက်ပြီး သက်သာစွာ ဝယ်ယူသုံးစွဲနိုင်အောင် စီစဉ်ပေးလျက်ရှိတယ်။

ကျွန်တော်တို့ တတ်နိုင်တဲ့အပိုင်းဖြစ်တဲ့ အခွန်လျော့ပေါ့တာတို့၊ စက်သုံးဆီ တင်သွင်းနိုင်ဖို့အတွက် နိုင်ငံခြားငွေ ရောင်းချပေးတာတွေ ကျွန်တော်တို့ ဒါအဆက်မပြတ် ဆောင်ရွက်ပေးလျက်ရှိတယ်”ဟု ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက ပြောသည်။

ယင်းအပြင် ဆီဆိုင်များ၌ မူလသိုလှောင်သည့် ပမာဏအပြင် အရန်ဆီများလည်း သိုလှောင်ထားရှိကြောင်း၊ စက်သုံးဆီ စုပြုံဝယ်ယူမှုကြောင့် မူလသိုလှောင်သည့် ပမာဏသို့အရန်စက်သုံးဆီမှ ပြန်ဖြည့်ချိန်တွင် စက်သုံးဆီ အချိန်ပိုင်း ပြတ်လပ်မှု ဖြစ်ပေါ်ခဲ့ကြောင်း ၎င်းကဆိုသည်။

“ကုမ္ပဏီကြီးတွေရဲ့ ဆီဆိုင်တွေမှာလည်း သူ့ရဲ့ သိုလှောင်တဲ့ပမာဏရှိပါတယ်။ အရန်လည်း ရှိပြီးသားပါ။ အဲအချိန်မှာ စုပြုံပြီး ဝယ်ယူတဲ့အတွက်ကြောင့် မလို သိုလှောင်ထားတဲ့ ပမာဏက ပြန်ပြီးတော့ အရန်ထဲကနေ ပြန်ဖြည့်ရတာရှိတယ်။ အဲဒီ ဖြည့်တဲ့အချိန်မှာ အချိန်ပိုင်း စက်သုံးဆီ ပြတ်လပ်မှုဖြစ်ခဲ့တယ်။ ဒီအပေါ်မူတည်ပြီး ထပ်ဖွတော့ စက်သုံးဆီဆိုင် အငယ်တွေကပါ ချွေရောင်းတာတို၊ သူတို သတင်းမသိရတာအတွက် လုပ်တာတို့ ဖြစ်ပေါ်ခဲ့ပါတယ်”ဟု ဗိုလ်ချုပ်ဇော်မင်းထွန်းက ပြောသည်။

ymg/mt
#Yangon_Media_Group

Published 15 August 2022

အမေရိကန်ပြည်ထောင်စု ဝါရှင်တန်ရှိ ကက်ပီတဲလ်အဆောက်အအုံအနီး လမ်းပိတ်ထားတဲ့ အတားအဆီးတွေကို လူတစ်ယောက်က ကားနှင့်ဝင်တိုက်ပြီးနောက် သူဟာ သေနတ်နှင့် လေထဲကို ပစ်လိုက်ပါတယ်။ အဲဒီနောက် သူ့ကိုယ်သူထပ် ပစ်ပြီး သတ်သေသွားတယ်လို့ ရဲတွေကပြောပါတယ်။

အမေရိကန်ပြည်ထောင်စု ကက်ပီတဲလ်ရဲဌာနရဲ့ထုတ်ပြန်ချက်ထဲမှာ အဲဒီသူဘယ်သူဆိုတာနှင့် ဘာကြောင့်ဒီလိုလုပ်သလဲ ဆိုတောတွေကိုတော့ ထည့်သွင်းထုတ်ပြန်ထားခြင်းမရှိပါဘူး။

အမေရိကန်သမ္မတဟောင်း‌ ဒေါ်နယ်ထရမ့်ရဲ့ အပန်းဖြေအိမ်ကြီးကို အက်ဖ်ဘီအိုင်အဖွဲ့က အငိုက်ဖမ်းစီးနင်းပြီး အစိုးရရဲ့ လျှို့ဝက်အဆင့်သတ်မှတ်ထားတဲ့ စာရွက်စာတမ်းတွေပါတဲ့ ပုံးတော်တော်များများကို သယ်ယူသွားခဲ့ပြီးနောက် ဆိုရှယ်မီဒီယာတွေမှာ တင်းမာမှုတွေနှင့် အကြမ်းဖက်မှုတွေပြည့်နေတဲ့ ပြောဆိုရေးသားမှုတွေရှိနေစဉ်မှာ ယခုကိစ္စ ဖြစ်ပွားခဲ့တာပါ။

အဲဒီသူဟာ ကားကိုမောင်းလာပြီး အရှေ့ကပ်ပီတဲလ်လမ်းနှင့် ဒုတိယလမ်းထောင့်က  လမ်းပိတ်ထားတဲအတားအဆီးတွေကို ဩဂုတ် ၁၄ရက်မနက်လေးနာရီကျော်ကျော်မှာ ဝင်ပြီးတိုက်ခဲ့တာလို့ ရဲဌာနကပြောပါတယ်။

အဲဒီသူက ကားထဲကထွက်လာတဲ့အခါ မီးတောက်တွေက ဝိုင်းရံနေပါတယ်။ အဲဒီနောက်သူဟာ သေနတ်ကို အချက်ပေါင်း များစွာ လေထဲပစ်ဖောက်ခဲ့ပါတယ် လို့ ကပ်ပီတဲလ်ရဲကပြောပါတယ်။

အရာရှိတွေက သေနတ်သံကြားလို့ သူ့ထံချည်းကပ်လာတဲ့အခါ သူဟာ သူ့ကိုယ်သူသတ်သေသွားတယ်လို့ ရဲကပြောပါတယ်။

ဘယ်သူတစ်ဦးတစ်ယောက်မျှတော့ ထိခိုက်ခြင်းမရှိခဲ့ပါဘူး။

ကွန်ဂရက်လွှတ်တော်အစည်းအဝေးတွေက လောလောဆယ်ရပ်နားထားတာဖြစ်ပြီး အဲဒီသူဟာ ကွန်ဂယက်အမတ်တစ်ဦးဦး ကိုရည်ရွယ်ပုံတော့မရဘူးလို့လည်း ရဲကပြောပါတယ်။

ဒီစီမြို့ပြရဲဌာနက အဲဒီသူနှင့်ပတ်သက်တဲ့ နောက်ကြောင်းကို လိုက်လံစုံစမ်းနေပါတယ်။လွန်ခဲတဲ့ ၁၀နှစ်က သူ့မှာ ရာဇဝတ်မှုခင်းကျူးလွန်ခဲ့တာရှိမရှိလည်းမသိသေးဘူးလို့ သူတို့ကပြောပါတယ်။

၂၀၂၁ ဧပြီလတုန်းက လူတစ်ယောက်ဟာ ကက်ပီတဲလ်က လမ်းအတားအဆီးတစ်ခုကို ကားနှင့်ဝင်တိုက်ပြီးနောက် ဓားနှင့်ခုတ်ခဲ့လို့ ရဲအရာရှိ ဘီလီအီဗန်သေဆုံးခဲ့ရပါတယ်။ ရဲတွေက အဲဒီလူကိုပစ်သတ်ခဲ့ရပါတယ်။

Source AFP

#US_Capitol

#US_Capitol_Firing_Gun

#US_Politics

#Local_News
Published_15 August 2022

ထိုင်းနိုင်ငံအတွင်းအကျဉ်းကျခံနေရသည့် "ဝင်း"နှင့် "ဇော်" အပါအဝင်မြန်မာရွေ့ပြောင်းအလုပ်သမားများ အကျိုးခံစားခွင့် ရရှိနိုင်မည်ဟု မျှော်လင့်ရကြောင်း ထိုင်းနိုင်ငံ ပညာရေးနှင့် ဖွံ့ဖြိုးတိုးတက်ရေးဖောင်‌‌ဒေးရှင်း(FED) အမှုဆောင် ဒါရိုက်တာ ဦးထူးချစ်ထံမှ သိရသည်။

ထိုင်းနိုင်ငံတောင်ပိုင်း၊ လိပ်ကျွန်းလူသတ်မှုတွင် ပါဝင်ကျူးလွန်းခဲ့သည်ဟု စွတ်စွဲချက်ဖြင့် လွန်ခဲ့သော ၂၀၁၄ ခုနှစ် ကတည်းက အကျဉ်းကျခံနေသည့် မောင်ဝင်းဇော်ထွန်းနှင့် မောင်ဇော်လင်းတို့အနေဖြင့် အဆိုပါလွတ်ငြိမ်းချမ်းသားခွင့် အကျိုးခံစားခွင့် ရမရကို ရှင်းရှင်းလင်းမသိရသေးသော်လည်း၊ တစ်စုံတစ်ရာ လျှော့ရက်များအကျိုးခံစားရလိမ့်မည်ဟု မျှော်လင့်ထားကြောင်း ၎င်းက ဆိုသည်။

ပြီးခဲ့သည့် ဇူလိုင်လ (၂၈) ရက်တွင်ကျရောက်ခဲ့သည့် ထိုင်းနိုင်ငံဘုရင်မင်းမြတ်၏ နှစ်(၇၀)ပြည့် အထိမ်းအမှတ်နှင့် သြဂုတ်လ (၁၂)ရက်တွင်ကျရောက်ခဲ့သည့်ဘုရင်ကြီး၏ မယ်တော်မွေးနေ့အထိမ်းအမှတ်အဖြစ် ထိုင်းနိုင်ငံအတွင်း အကျဉ်းထောင်များတွင် အကျဉ်းကျခံနေရသည့် အကျဉ်းသားတစ်သိန်းကျော်ကို ထိုင်းနိုင်ငံ၏ ဘုရင့်အမိန့်တော်အရ စောလျင်စွာလွှတ်ပေးခြင်းနှင့် ပြစ်ဒဏ်များ လျှော့ပေါ့ပေးခြင်းများကို ပြုလုပ်မည်ဟု ဘန်ကောက်ပို့စ်သတင်းစာတွင် ရေးသားထားခြင်းအပေါ် ယင်းက ကိုးကားပြောဆိုခြင်း ဖြစ်သည်။

အဆိုပါလွတ်မြောက်မည့်အကျဉ်းသားများထဲတွင် ထိုင်းအကျဉ်းထောင်များက ချမှတ်ထားသည့် စည်းမျဉ်းစည်းကမ်းများကို လိုက်နာခဲ့သည့် မြန်မာရွေ့ပြောင်းအလုပ်သမားအကျဉ်းသားများလည်း ပါဝင်မည်ဟု မျော်လင့်ရကြောင်း သိရသည်။

ymg/mt
#Yangon_Media_group

#Local_News
Published - 15 August 2022

တရုတ် ယွမ်လဲလှယ်နှုန်းသည် စံချိန်တင်မြင့်တက်နေပြီး ယွမ် ၁၀၀ ကို ကျပ် ၄၀,၀၀၀ ကျော်အထိ မြင့်တက်လျက်ရှိကြောင်း တရုတ်-မြန်မာနယ်စပ် မူဆယ်ကုန်သည်ဈေးကွက်မှ သိရသည်။

အဆိုပါ ယွမ်ဈေးနှုန်းသည့် ပြီးခဲ့သည့် ရက်ပိုင်းကစပြီး ဆက်တိုက်မြင့်တက်နေ ခြင်းဖြစ်ကာ ငွေလဲနှုန်းမြင့်တက်နေခြင်းကြောင့် ကုန်ပစ္စည်းများလည်း ဈေးနှုန်းမြင့်တက်လျက်ရှိကြောင်း မူဆယ်ကုန်သည်တစ်ဦး၏ ပြောပြချက်အရ သိရသည်။

ပုံမှန်အားဖြင့် တရုတ်ယွမ်ငွေ ၁၀၀ ကို ကျပ် ၂၀,၀၀၀ ဝန်းကျင်သာရှိသော်လည်း ယခုအခါ ကျပ် ၄၀,၀၀၀ ကျော်အထိမြင့်တက်လာခြင်းသည် ယခုနှစ်အတွင်း စံချိန်တင်မြင့်တက်ခဲ့ခြင်းဖြစ်ကြောင်း ငွေကြေးစျေးကွက်မှ သိရသည်။

လက်ရှိတွင် ယွမ်ကျပ် တိုက်ရိုက်လဲလှယ်ပြီး တရုတ်ယွမ်ငွေလဲနှုန်းသည့် ယခု (ဩဂုတ်) လဆန်းပိုင်းက စတင်ပြီး တရိပ်ရိပ် မြင့်တက်လာကာ ယွမ် ၁၀၀ ကိုကျပ် ၃၀,၀၀၀ ကျော်အထိ စတင်ရှိလာခြင်းဖြစ်ကြောင်း သိရသည်။

နယ်စပ်ကုန်သွယ်ရေးလုပ်ကိုင်နေသည့် ကုန်သည်များသည် မြန်မာငွေမကိုင်ဘဲ တရုတ်ငွေများနှင့် လဲလှယ်နေခြင်းကြောင့် ပြည်တွင်းစျေးကွက်တွင်ယွမ်ငွေလဲလှယ်နှုန်း မြင့်တက်သွားခြင်းဖြစ်ကြောင်း သိရသည်။

ymg/sth
##Yangon_Media_Group

#Local_News
Published - 15 August 2022

စက်သုံးဆီရှိလျက်နှင့် မရောင်းသည့်ဆိုင်များ၊ အကန့်အသတ်ဖြင့် ရောင်းချသည့်ဆိုင်များကို အရေးယူရန် ရန်ကုန်တိုင်းဒေသကြီးအစိုးရမှ ညွှန်ကြားစာတစ်ရပ် ထုတ်ပြန်လိုက်သည်။

ဩဂုတ်လ ၁၃ ရက်နေ့ ရက်စွဲဖြင့်ထုတ်ပြန်လိုက်သည့် အဆိုပါညွှန်ကြားချက်သည် ရန်ကုန်တိုင်းဒေသကြီးအစိုးရက တိုင်းဒေသကြီး ရေနံနှင့်ရေနံထွက်ပစ္စည်းဆိုင်ရာ လုပ်ငန်းများကြီးကြပ်ရေးထိန်းသိမ်းရေးကော်မတီဆီ ပေးပို့သည့်စာဖြစ်ကြောင်း သိရသည်။

အဆိုပါ ညွှန်ကြားစာတွင်စက်သုံးဆီဈေးကျရန်နှင့် ပြတ်လပ်မှုမရှိအောင် ဖြည့်တင်းဆောင်ရွက် ကြိုးပမ်းလျက်ရှိကြောင်း၊ သို့သော်စက်သုံးဆီဆိုင်အချို့သည် ဈေးနှုန်းပြောင်းလဲမှုရှိမည်ဟု တွက်ချက်ပြီး စက်သုံးဆီပြတ်လပ်ခြင်း (သို့မဟုတ်) လက်ကျန်နည်းခြင်းကို အကြောင်းပြပြီး အရောင်းရပ်ထားခြင်း၊ အကန့်အသတ်နှင့်ရောင်းချ ခြင်းများကို ပြုလုပ်နေကြောင်း ဖော်ပြထားသည်။

စက်သုံးဆီအရောင်းဆိုင်များအနေဖြင့် အရောင်းရပ်ထားခြင်း၊ အကန့်အသတ်နှင့် ရောင်းချသည့်ဆိုင်များကို စိစစ်အရေးယူရန် အဆိုပါညွှန်ကြားစာတွင် ဖော်ပြထားခြင်းဖြစ်သည်။

ပြည်တွင်း၌ စက်သုံးဆီဈေးမှာ အဆမတန်မြင့်တက်လျက်ရှိပြီး နိုင်ငံတစ်ဝန်းစက်သုံးဆီပြတ်လပ်၍ ဝယ်မရသူအများအပြားရှိနေချိန် ယခုကဲ့သို့ ညွှန်ကြားချက်ထွက်လာခြင်းဖြစ်သည်။ လက်ရှိစက်သုံးဆီဈေးနှုန်းမှာ အတက်ဈေးဖြင့် ငြိမ်နေကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

ymg/sth
#Yangon_Media_Group

#Local_News
Published _ 15 August 2022

မြန်မာနှင့် ရုရှားနိုင်ငံအကြား ကုန်သွယ်မှုပမာဏ အမေရိကန်ဒေါ်လာ တစ်ဘီလီယံအထိ တိုးမြှင့်တင်ပို့နိုင်ရေး၊ နှစ်နိုင်ငံလုံးက ရည်မှန်းချက်ထား ဆောင်ရွက်နေကြောင်း သိရသည်။

မြန်မာနိုင်ငံနှင့် ရုရှားနိုင်ငံ နှစ်နိုင်ငံအကြား ကုန်သွယ်မှုပမာဏသည် ၂၀၁၉-၂၀၂၀ ဘဏ္ဍာနှစ်တွင် အမေရိကန်ဒေါ်လာ သန်း ၆၀ ကျော် အထိသာ ပြုလုပ်နိုင်သည်။

ထိုသို့ဆောင်ရွက်တွင် သတင်းနှင့် နည်းပညာ၊ ဘဏ်နှင့်ငွေကြေး၊ ကျန်းမာရေးဝန်ဆောင်မှုနှင့် ဆေးဝါးထုတ်လုပ်မှု၊ အခြေခံအဆောက်အဦ၊ ဘူမိဗေဒ၊ စွမ်းအင်နှင့် စက်မှုကဏ္ဍများ အတွက် ကုန်သွယ်မှုပြုလုပ်သွားမည် ဖြစ်သည်။

မြန်မာနိုင်ငံက ဆန်၊ ဆန်ကွဲ၊ ပြောင်း၊ ပဲတီစိမ်း အစရှိသော လယ်ယာ ထွက်ကုန်ပစ္စည်းများကို ရုရှားနိုင်ငံသို့ တင်ပို့ရန်အလားအလာရှိသော ကုန်စည်များအဖြစ် ဈေးကွက်သစ်ချဲ့ထွင် တင်ပို့သွားရန်အတွက် ကုန်သွယ်ရေး ဦးစီးဌာန၊ စားသုံးသူရေးရာဦးစီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့် စိုက်ပျိုးရေးဦးစီးဌာနတို့မှ တာဝန်ရှိသူ များ၊ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံအထည်ချုပ်လုပ်ငန်းရှင်များအသင်း၊ မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်း၊ မြန်မာနိုင်ငံသစ်လုပ်ငန်းရှင်များ အသင်း၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း၊ မြန်မာနိုင်ငံ ကော်ဖီအသင်းနှင့် မြန်မာနိုင်ငံ ဆေးနှင့်ဆေးပစ္စည်းကုန်သည်များနှင့် လုပ်ငန်းရှင်များအသင်းနှင့် မြန်မာနိုင်ငံမှ ရုရှားနိုင်ငံသို့ ပို့ကုန်များတင်ပို့နေသည့် ကုမ္ပဏီများမှ တာဝန်ရှိပုဂ္ဂိုလ်များက မြန်မာနိုင်ငံ တင်ပို့ကုန်စည်များနှင့် ပတ်သက်၍ လက်ရှိနှစ်နိုင်ငံ ကုန်သွယ်မှုဆောင်ရွက်နေသည့်အခြေအနေများနှင့် အခက်အခဲများ၊ ကုန်သွယ်မှုတိုးမြှင့်ဆောင်ရွက်နိုင်မည့် အလားအလာများနှင့် နည်းလမ်းများကို ညှိနှိုင်းဆွေးနွေး ဆောင်ရွက်နေကြပြီ ဖြစ်ကြောင်း သိရသည်။

ymg/NN
#Yangon_Media_Group

#World_Politics
Published 15 August 2022

အမေရိကန်လွှတ်တော်အမတ်များကိုယ်စားလှယ်အဖွဲ့ဟာ ထိုင်ဝမ်ကို တနင်္ဂနွေနေ့က ရောက်ရှိခဲ့ပြီး ထိုင်ဝမ်သမ္မတ'ဆိုင်အင်ဝမ်'နဲ့ တွေ့ဆုံသွားမှာ ဖြစ်ပါတယ်။

ဒါဟာ ထိုင်ဝမ်နဲ့ တရုတ်တို့ကြား စစ်ရေးတင်းမာမှုများရှိနေတဲ့အချိန်မှာ အမေရိကန်ဘက်မှ နောက်ထပ်ထိပ်တန်းပုဂ္ဂိုလ်များက လာရောက်လည်ပတ်တာလည်းဖြစ်ပါတယ်။

တရုတ်တို့က ဒီမိုကရက်တစ်အစိုးရအုပ်ချုပ်နေတဲ့ ထိုင်ဝမ်ကို ယင်းတို့ပိုင်ဆိုင်ကြောင်းဆိုနေပြီး ယခုလအစောပိုင်းက အမေရိကန်အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့လာရောက်ခဲ့ပြီးနောက် ထိုင်ဝမ်ကျွန်းအနီးမှာ စစ်ရေးလေ့ကျင့်မှုများ ပြုလုပ်ပြသခဲ့ပါတယ်။

တရုတ်က ထိုင်ဝမ်ကျွန်းကို သူတို့ရဲ့အချုပ်အခြာအာဏာပိုင်နယ်မြေအဖြစ် ကြေညာထားပေမယ့် ထိုင်ဝမ်အစိုးရက တရုတ်ရဲ့အဆိုကိုငြင်းဆန်ကာ ထိုင်ဝမ်ပြည်သူများကသာ အနာဂတ်ကို ကိုယ်တိုင်ဆုံးဖြတ်သင့်ကြောင်း တုံ့ပြန်ပြောကြားထားပါတယ်။

ယခုခရီးစဉ်က အင်ဒိုပစိဖိတ်ဒေသခရီးရဲ့ အစိတ်အပိုင်းတစ်ခုဖြစ်ကာ အထက်လွှတ်တော်အမတ်'အက်ဒ်မာကီ'က ကိုယ်စားလှယ်အဖွဲ့ကိုဦးဆောင်ပြီး အောက်လွှတ်တော်အမတ် ၄ ဦးလည်း ပါဝင်လာကြောင်း ထိုင်ဝမ်ရှိ အမေရိကန်သံရုံးက ကြေညာခဲ့ပါတယ်။

ကိုယ်စားလှယ်အဖွဲ့နဲ့ သမ္မတ'ဆိုင်အင်ဝမ်'တို့ တနင်္လာနေ့နံနက်ပိုင်းမှာ တွေ့ဆုံဆွေးနွေးသွားမှာဖြစ်ကြောင်း ထိုင်ဝမ်သမ္မတရုံးတော်က အသိပေးလိုက်ပါတယ်။

"ထိုင်ဝမ်ရေလက်ကြားမှာ တရုတ်က စစ်ရေးပြနေပြီး တင်းမာမှုမြင့်တက်နေတဲ့အချိန်မှာ 'မာကီ'ဦးဆောင်တဲ့ကိုယ်စားလှယ်အဖွဲ့ ထိုင်ဝမ်သို့လည်ပတ်ခြင်းက အမေရိကန်ကွန်ဂရက်ရဲ့ ထောက်ခံမှု ဘယ်လောက်ခိုင်မာသလဲဆိုတာကို ဖော်ပြရာရောက်ပါတယ်" လို့ ထုတ်ပြန်ထားပါတယ်။

'အက်ဒ်မာကီ'က အရှေ့အာရှ၊ ပစိဖိတ်ဆိုင်ရာ အထက်လွှတ်တော်နိုင်ငံခြားဆက်ဆံရေးနဲ့ နိုင်ငံတကာဆိုက်ဘာလုံခြုံရေးကော်မတီတို့မှာ ဥက္ကဌအဖြစ်ဆောင်ရွက်နေသူ ဖြစ်ပါတယ်။

ခရီးစဉ်မှာပါဝင်တဲ့ အခြားသူတွေက နျူကလီးယားလက်နက်ထိန်းချုပ်ရေးလုပ်ငန်းအဖွဲ့ ကိုယ်စားလှယ်'ဂျွန်ဂါရာမန်ဒီ'နဲ့ ကိုယ်စားလှယ်'ဒွန်ဘေယာ'တို့ ဖြစ်ပါတယ်။

အမေရိကန်ရှိ တရုတ်သံရုံးက တနင်္ဂနွေနေ့မှာ ထုတ်ပြန်ကြေညာခဲ့ရာမှာ အမေရိကန်ကွန်ဂရက်အဖွဲ့ဝင်တွေအနေနဲ့ တရုတ်မူဝါဒဆိုင်ရာ အမေရိကန်အစိုးရရဲ့ ရပ်တည်ချက်များနဲ့အညီ လုပ်ဆောင်သင့်ကြောင်း ပြောကြားလိုက်ပါတယ်။

ဒါ့အပြင် အခုနောက်ဆုံး ထိုင်ဝမ်ကိုလာရောက်တဲ့ ခရီးစဉ်အရ အမေရိကန်အနေနဲ့ ထိုင်ဝမ်ရေလက်ကြားမှာ အေးချမ်းတည်ငြိမ်ရေးမရှိစေလိုတဲ့သဘောကို ဖော်ပြရာရောက်ပြီး တရုတ်ရဲ့ ပြည်တွင်းရေးကို ဝင်ရောက်နှောင့်ယှက်ကာ နှစ်ဖက်စလုံးကို ထိပ်တိုက်ရင်ဆိုင်ရအောင် ကြိုးပမ်းနေတာဖြစ်ကြောင်း စွပ်စွဲလိုက်ပါတယ်။

အိမ်ဖြူတော်လုံခြုံရေးကောင်စီမှ ပြောရေးဆိုခွင့်ရှိသူတစ်ဦးက လွှတ်တော်အဖွဲ့ဝင်များအနေဖြင့် ထိုင်ဝမ်ကိုသွားရောက်လည်ပတ်လာတာ ဆယ်စုနှစ်တွေအထိရှိနေခဲ့ပြီး နောက်လည်း လည်ပတ်သွားရောက်ခြင်းတွေ ရှိလာဦးမှာဖြစ်ကြောင်း၊ ယခုလိုခရီးစဉ်ကလည်း အမေရိကန်ရဲ့ တရုတ်တစ်တိုင်းပြည်တည်းမူဝါဒနဲ့အညီ ဆောင်ရွက်ခဲ့တာဖြစ်ကြောင်း ထုတ်ပြန်လိုက်ပါတယ်။

Source: Reuters
#Yangon_Media_Group

#Health_Technology
Published 15 August 2022

ဟိုင်ဖာတက်ခ်နီယန်အစ္စရေးလ်နည်းပညာတက္ကသိုလ်က ထုတ်လုပ်လိုက်တဲ့ eNose နည်းပညာဖြင့် အသက်ရှူထုတ်စမ်းသပ်ခြင်းနည်းလမ်းဟာ သွေးကြောအဆီပိတ်ရောဂါကို ရှာဖွေတဲ့နေရာမှာ ထိရောက်မှုရှိကြောင်း တွေ့ရှိခဲ့ပါတယ်။

eNose နည်းပညာမှာ နာနိုအရွယ်အစားမျှရှိတဲ့ အာရုံခံကိရိယာတွေပါဝင်ပြီး လူနာသွေးထဲက မော်လီကျူးပြောင်းလဲမှုများကို ရှာဖွေနိုင်ပါတယ်။

ဒီပစ္စည်းတွေက ရောဂါဖြစ်စေနိုင်တဲ့ biomarker တွေကို ရှာဖွေနိုင်အောင် ဖော်ထုတ်ထားပြီး ဒီလိုရောဂါဖြစ်လာနိုင်တဲ့လူနာတွေကို စစ်ဆေးပေးနိုင်ပါတယ်။

ကင်ဆာအပါအဝင် အခြားအမျိုးမျိုးသောရောဂါတွေကို ရှာဖွေရာမှာလည်း အောင်မြင်မှုရထားပါပြီ။
ဒီနည်းလမ်းဟာ သွေးကြောအဆီပိတ်ခြင်း၊ ကင်ဆာနဲ့ အခြားရောဂါများကို ရှာဖွေရာမှာ ထိရောက်မှုရှိကြောင်း အထောက်အထားရရှိထားပါတယ်။

ဒီနည်းလမ်းကိုတီထွင်ခဲ့တဲ့ ပရော်ဖက်ဆာ'ဟော့ဆမ်ဟိုက်ခ်'က လွန်ခဲ့တဲ့ နှစ် ၂၀ လောက်မှာ သူ့သူငယ်ချင်းတစ်ယောက်က သွေးဖြူဥနည်းပါးတဲ့ရောဂါဖြစ်နေကြောင်း သိရှိခဲ့ပါတယ်။

ဒေါက်တာ'အင်ဘာနာဒီ'က 'ဟိုက်ခ်'နဲ့ပူးပေါင်းကာ eNose ကိုအသုံးပြုပြီး နှလုံးသွေးကြောကျဉ်းရောဂါတွေ ဖြစ်နိုင်ချေကို ခန့်မှန်းနိုင်မယ့်အလားအလာအကြောင်း ရှာဖွေခဲ့ကြပါတယ်။

သွေးကြောအဆီပိတ်ခြင်းဆိုတာက အောက်ဆီဂျင်နဲ့ အဟာရဓာတ်များကို နှလုံးကနေ ခန္ဓာကိုယ်အနှံ့သို့ ပို့ဆောင်ပေးတဲ့ နှလုံးသွေးကြောတွေဟာ ထူပိတ်လာပြီးတော့ ကိုယ်တွင်းအင်္ဂါများနဲ့ တစ်ရှူးများဆီ သွေးရောက်ရှိမှုနည်းပါးသွားတာဖြစ်ပါတယ်။

ကျန်းမာကောင်းမွန်တဲ့ သွေးကြောတွေက ကျုံနိုင်ဆန့်နိုင်တဲ့ဂုဏ်သတ္တိရှိပါတယ်။ နှလုံးရောဂါအခံမရှိတဲ့ အသက် ၃၀ မှ ၈၀ အတွင်းရှိတဲ့ လူနာအယောက် ၆၀ ကို eNose ဖြင့် စမ်းသပ်ပြီး ရရှိလာတဲ့အဖြေတွေကို နှလုံးပိုက်တပ်စစ်ဆေးခြင်းဖြင့်ရရှိလာတဲ့ တကယ့်သွေးကြောအဆီပိတ်ခြင်း အခြေအနေများအတိုင်း ခွဲခြားခဲ့ပါတယ်။

အဲဒီနောက် သွေးကြောအဆီပိတ်ခြင်း အဆင့် ၃ ဆင့်ကို ခွဲခြားဖို့အတွက်လည်း နောက်ထပ် ၂၅ ဦးဖြင့်စမ်းသပ်ခဲ့ပါတယ်။

သွေးကြောအဆီပိတ်ခြင်းဖြစ်နေတဲ့ လူနာတွေမှာ အသက်ရှူထုတ်စမ်းသပ်ခြင်းနည်းလမ်းဖြင့် စမ်းသပ်ရာမှာ ၆၉ ရာခိုင်နှုန်းမှန်ကန်မှုရှိပြီး အဆင့်ခွဲခြားရာမှာတော့ ၆၇ ရာခိုင်နှုန်း မှန်ကန်ခဲ့ပါတယ်။

ဒီနည်းပညာက အကြိုစမ်းသပ်မှုသဘောဖြစ်ပြီး eNose နည်းပညာ ဆက်လက်ထုတ်ဖော်ဖို့အတွက် တိကျမှန်ကန်အောင် အထောက်အပံ့ဖြစ်စေမှာဖြစ်ကြောင်း 'နာဒီ'က သုံးသပ်ခဲ့ပါတယ်။

Source: The Jerusalem Post.
#Yangon_Media_Group

#Health_Technology
Published 15 August 2022

အစ္စရေးလ်မှ AvoMed ကုမ္ပဏီဟာ ထောပတ်သီးအစေ့ကနေ PFA (ပိုလီဟိုက်ဒရောဆီလိတ်တက် ဖက်တီးအယ်လ်ကိုဟော) လို့ခေါ်တဲ့ အထူးဒြပ်ပေါင်းကို စစ်ထုတ်ယူတဲ့နည်းပညာအား ထုတ်လုပ်နိုင်ခဲ့ပါတယ်။

ဒီဒြပ်ပေါင်းဟာ အရေပြားထိခိုက်မှုနဲ့ ရောင်ရမ်းခြင်းတို့ကို ကုသပေးနိုင်တဲ့ အလှကုန်ပစ္စည်းများမှာ အသုံးပြုတဲ့ပါဝင် ပစ္စည်းဖြစ်ပါတယ်။

မူပိုင်ခွင့်နဲ့ ထုတ်လုပ်ရောင်းချကြော်ငြာခြင်း လုပ်ငန်းစဉ်များအတွက် AvoMed က ကြိုးပမ်းလျက်ရှိပါတယ်။

PFA က အသားရေကာကွယ်ခြင်းနဲ့ အရေပြားပြဿနာများကို ကုသရာမှာ ထိရောက်တဲ့ဓာတ်ပစ္စည်းဖြစ်တယ်လို့ AvoMed က ယုံကြည်ထားပါတယ်။

သူတို့ရဲ့ယူဆချက်ကို အတည်ပြုနိုင်ဖို့ နောက်ထပ်သုတေသနများ ပြုလုပ်ထားပါတယ်။

"လွန်ခဲ့တဲ့ ၁၀ နှစ်ကျော်လောက်ကတည်းက အစ္စရေးလ်နည်းပညာတက္ကသိုလ် တက်ခ်နီယန်က PFA ကို စပြီးသုတေသနပြုလုပ်ခဲ့ပါတယ်၊ အဲဒီနောက် PFA က အရေပြားဆဲလ်တွေအတွက် တကယ်ကောင်းကျိုးဖြစ်စေတာကို တွေ့ရှိခဲ့ကြပါတယ်" လို့ AvoMed စီအီးအို'ရှိင်းဘန်ဆတ်ဒ်'က ပြောပြပါတယ်။

ထောပတ်သီးက ထုတ်ယူရရှိတဲ့ PFA မှာ ကောင်းကျိုးတွေရှိတယ်လို့ သိရှိခဲ့ကြပေမယ့် အော်ဂဲနစ်ပျော်ရည်တွေ အသုံးမပြုဘဲ ဘယ်လိုစစ်ထုတ်ယူရမလဲဆိုတာကိုတော့ ဘယ်သူမှ မသိခဲ့ကြပါဘူး။

PFA ထုတ်ယူတဲ့နေရာမှာ အော်ဂဲနစ်ပျော်ရည်တွေကို အသုံးပြုလိုက်ရင် ရလာတဲ့ပစ္စည်းက အလှကုန်ပစ္စည်းတွေ ဆေးပစ္စည်းတွေမှာ အသုံးပြုလို့ မရတော့ကြောင်း 'ဘန်ဆတ်ဒ်'က ဆိုပါတယ်။

AvoMed ကို တည်ထောင်တဲ့အချိန်မှာတော့ PFA ကို သန့်စင်စွာနဲ့ စစ်ထုတ်နိုင်မယ့်နည်းလမ်းကို တွေ့ရှိခဲ့ပါတယ်။

ဒါကြောင့် PFA ကို အလှကုန်နဲ့ ဆေးဘက်ဆိုင်ရာ ထုတ်ကုန်တွေမှာ ပထမဆုံးအသုံးပြု ထုတ်လုပ်နိုင်တဲ့ ကုမ္ပဏီဖြစ်လာဖွယ်ရှိနေပါတယ်။

အကုန်အကျများပြီး ပိုမိုခက်ခဲတဲ့ ဆေးဘက်ဆိုင်ရာထုတ်ကုန်များ မထုတ်လုပ်ခင် လောလောဆယ်မှာတော့ အရေပြားပြဿနာများကို ကုသနိုင်တဲ့ အလှကုန်များထုတ်လုပ်နိုင်ဖို့ အာရုံစိုက်နေပါတယ်။

လက်ရှိမှာတော့ နေရောင်ခြည်ထိခိုက်မှုကိုကုသတဲ့ ထုတ်ကုန်နဲ့ အရေပြားဓာတ်မတည့်ခြင်းကိုကုသတဲ့ ထုတ်ကုန် ၂ မျိုးကို ထုတ်လုပ်ထားပါတယ်။

ဆေးဆိုင်တွေနဲ့ အလှကုန်ဆိုင်တွေမှာ ထောပတ်သီးအဆီနဲ့ ထုတ်လုပ်တဲ့ ပစ္စည်းတွေ မပြတ်ရှိနေတာကြောင့် PFA ကိုအသုံးချနိုင်တဲ့ ကုမ္ပဏီအနေနဲ့ ဈေးကွက်မှာ သူများတွေထက် အသာရလာနိုင်ပါတယ်။

Source: The Jerusalem Post
#Yangon_Media_Group