#World_News
Published 24 April 2025

▪️ နှစ်တွေကြာမြင့်လာပြီဖြစ်တဲ့ ယူကရိန်းစစ်ပွဲကို အဆုံးသတ်နိုင်ဖို့ စေ့စပ်ညှိနှိုင်းသူတွေက အလားအလာများ ချင့်ချိန်စဉ်းစားနေကြတဲ့အချိန်မှာ အမေရိကန်သမ္မတ ဒေါ်နယ်ထရမ့်နဲ့ ယူကရိန်းသမ္မတ ဗိုလိုဒီမာဇယ်လန်စကီတို့ ဗုဒ္ဓဟူးနေ့က ထပ်မံအချေအတင် ပြောကြားခဲ့ကြပါတယ်။

▪️ ဒီတစ်ကြိမ်ကတော့ ခရိုင်းမီးယားကိစ္စဖြစ်ပြီး ထရမ့်က ဒီကျွန်းကို ရုရှားနယ်မြေပိုင်လို့ သတ်မှတ်သင့်ကြောင်း ယူဆပြောဆိုလိုက်ကာ ဇယ်လန်စကီကတော့ ဒါကိုလက်ခံဖို့ ငြင်းဆိုလိုက်ပြီး ယူကရိန်းက ယင်းတို့ရဲ့ အဓိကအခြေခံမူများအတိုင်း ရပ်တည်သွားမယ်လို့ ထပ်မံပြောဆိုလိုက်ပါတယ်။

▪️ လန်ဒန်မှာ ယခုနောက်ဆုံး ဆွေးနွေးညှိနှိုင်းကြရာမှာ အမေရိကန်က ရုရှားရပ်တည်ချက်အတိုင်းခံယူတဲ့ အဓိကအချက် ၂ ချက်ကို ချပြခဲ့ပြီး ပထမတစ်ချက်က ခရိုင်းမီးယားကို ရုရှားနယ်မြေအဖြစ် တရားဝင်အသိအမှတ်ပြုရန်နဲ့ နောက်တစ်ချက်က ယူကရိန်းအနေနဲ့ နေတိုး(NATO)အဖွဲ့ဝင် ဘယ်တော့မှ ဖြစ်မလာရေးတို့ ဖြစ်ပါတယ်။

▪️ ဒီနှစ်ချက်စလုံးကို ယူကရိန်းက ငြင်းပယ်လိုက်ရာ ဒေါ်နယ်ထရမ့် အမျက်ထွက်စေခဲ့ပါတယ်။

▪️ ဒီအတွက် ထရမ့်က ဇယ်လန်စကီ လက်မခံတဲ့အပေါ် ကြိမ်းမောင်းပြောဆိုလိုက်ကာ ခရိုင်းမီးယားက လွန်ခဲ့တဲ့နှစ်တွေတည်းက ဆုံးရှုံးထားပြီးဖြစ်သလို ဆွေးနွေးစရာအကြောင်းတောင် မရှိဘူးလို့ ဆိုပါတယ်။

▪️ ဇယ်လန်စကီကလည်း ခရိုင်းမီးယားကို ရုရှားတို့ တရားမဝင်သိမ်းပိုက်တာကို အသိအမှတ်ပြုမှာ မဟုတ်ဘူးလို့ အခိုင်အမာငြင်းဆိုလိုက်ပါတယ်။

▪️ ဒီလိုအပြန်အလှန် ပြောဆိုမှုတွေကြောင့် ထရမ့်က ဇယ်လန်စကီကို ကြိမ်းမောင်းလိုက်ပြီး အမေရိကန်က ယူကရိန်းမှာ သေကြေပျက်စီးနေတာတွေကို ရပ်တန့်ရန် ကြိုးစားနေတာဖြစ်ပြီး ငြိမ်းချမ်းရေးသဘောတူညီချက်ရရန် အလွန်နီးစပ်နေပြီလို့ ဆိုလိုက်ကာ ယူကရိန်းသမ္မတ ခေါင်းမာတယ်ဆိုပြီး အပြစ်တင်လိုက်ပါတယ်။

▪️ ၂၀၁၄ ခုနှစ်က ရုရှားဟာ ခရိုင်းမီးယားကျွန်းဆွယ်ကို သိမ်းပိုက်ခဲ့ပြီး ယူကရိန်းဘက်က ခုခံတိုက်ခိုက်ခဲ့ခြင်းတောင် မရှိခဲ့ပါဘူး။

▪️ ဒေါ်နယ်ထရမ့် သမ္မတတာဝန် စတင်ထမ်းဆောင်တည်းက ရုရှား-ယူကရိန်းစစ်ပွဲကို ရက်ပိုင်းအတွင်း အဆုံးသတ်ပေးမယ်လို့ ကတိပြုထားကာ အပစ်အခတ်ရပ်စဲဖို့ ယူကရိန်းကို ဖိအားပေးလာပါတယ်။

#Source: NDTV

#World_Health
Published 24 April 2025

သားအိမ်မပါဘဲမွေးလာတဲ့ ဗြိတိန်အမျိုးသမီးဟာ ကျန်းမာသန်စွမ်းတဲ့ ကလေးကို မွေးဖွားနိုင်ခဲ့ပြီး ဗြိတိန်မှာ သားအိမ်အစားထိုးသူထံကနေ ပထမဆုံး‌ကလေးမွေးဖွားနိုင်ခဲ့တာ ဖြစ်ပါတယ်။

အသက် ၃၆ နှစ်ရှိ ဂရေ့စ်ဒေးဗစ်ဆန်ဟာ ဆယ်ကျော်သက်အရွယ်တုန်းက MRKHလို့ခေါ်တဲ့ သားအိမ်မဖွံ့ဖြိုးတဲ့ ရှားပါးရောဂါ တွေ့ရှိခဲ့ပါတယ်။

ကလေးမိခင်ဖြစ်ဖို့ စိတ်ပိုင်းဖြတ်ခဲ့ပြီးနောက် သူ့ရဲ့အစ်မ အေမီပါဒီထံကနေ သားအိမ်အင်္ဂါရယူကာ ၂၀၂၃ မှာ သားအိမ်အစားထိုးခွဲစိတ်မှု ခံယူခဲ့ပါတယ်။

၂၀၂၃ ဖေဖော်ဝါရီက အောက်စ်ဖို့ဒ်မှာ ၁၈ နာရီကြာအောင် ခွဲစိတ်ခဲ့ပြီး ဒေးဗစ်ဆန်ဟာ ယူကေမှာ သားအိမ်အစားထိုးမှု အောင်မြင်စွာပြုလုပ်နိုင်ခဲ့တဲ့ ပထမဆုံးအမျိုးသမီး ဖြစ်လာပါတယ်။

ဒေးဗစ်ဆန်တို့ ဇနီးမောင်နှံ ရရှိထားတဲ့ သန္ဓေသားလောင်း ၇ ခုထဲက တစ်ခုကို ဖန်ပြွန်သန္ဓေနည်းအသုံးပြုပြီး အစားထိုးခွဲစိတ်မှု မလုပ်ခင်မှာ အေးခဲထားခဲ့ပါတယ်။

၂၀၂၅ ဖေဖော်ဝါရီမှာ လန်ဒန် ကွင်းချာလော့နှင့် ချယ်လ်ဆီးဆေးရုံမှာ ဗိုက်ခွဲပြီးတော့ အေမီအစ္စဘယ်လ်ဆိုတဲ့ သမီးမိန်းကလေးကို မွေးဖွားခဲ့ပါတယ်။

တကယ်မွေးနိုင်ခဲ့တာကို မယုံနိုင်ဖြစ်နေပြီး အကြီးမြတ်ဆုံးလက်ဆောင်ဖြစ်တယ်လို့ ဒေးဗစ်ဆန်က ပြောပါတယ်။

ဒီမွေးဖွားမှုမှာ ကနဦးငွေကြေးပါဝင်ထောက်ပံ့တဲ့ သားဖွားဆရာဝန်ကြီး ပရော်ဖက်ဆာ ရစ်ချတ်စမစ်အတွက်လည်း အောင်မြင်မှုကြီးတစ်ခု ဖြစ်လာပါတယ်။

ကမ္ဘာပေါ်မှာ အမျိုးသမီးအယောက် ၅ ထောင်လျှင် ၁ ဦးနှုန်းက သားအိမ်မပါဘဲ မွေးဖွားလာတတ်ပါတယ်။

ကမ္ဘာတဝှမ်းမှာ သားအိမ်အစားထိုးပြီးနောက် ကလေးအယောက် ၅၀ ခန့်မွေးဖွားထားပြီးဖြစ်ကာ ၂၀၁၄က ဆွီဒင်မှာ ပထမဆုံးအောင်မြင်စွာ မွေးဖွားခဲ့တာ ဖြစ်ပါတယ်။

#Source: New York Post

#World_Health
Published 24 April 2025

▪️ မှိုရောဂါတွေက ပြည်သူ့ကျန်းမာရေးအတွက် ပိုပြီးစိုးရိမ်စရာ ဖြစ်လာတယ်လို့ WHOက ပြောပါတယ်။

▪️ ဆေးယဉ်ပါးရောဂါဖြစ်တဲ့ မှက်ခရုမှိုလိုမျိုး အပါအဝင် မှိုရောဂါတွေဟာ ကိုယ်ခံအားပြဿနာရှိတဲ့ လူနာတွေမှာ အဖြစ်များလာတယ်လို့ WHOက ဖော်ပြထားပါတယ်။

▪️ နွမ်းပါးတဲ့နိုင်ငံတွေမှာဆိုရင် ထိရောက်တဲ့ကုသမှု မရှိတာတွေ၊ ရောဂါရှာဖွေနိုင်စွမ်း အကန့်အသတ်တွေကြောင့် လူသန်းပေါင်းစွာမှာ ကူးစက်နိုင်ခြေရှိလာတယ်လို့ သတိပေးထားပါတယ်။

▪️ မှိုရောဂါကူးစက်မှု တိုက်ဖျက်ဖို့အတွက် ပိုမိုသာလွန်တဲ့ ဆေးဝါးတွေနဲ့ ရောဂါရှာဖွေရေးပစ္စည်းတွေ အရေးတကြီးလိုအပ်ကြောင်း အလေးပေးဖော်ပြလာပါတယ်။

▪️ ရောဂါကူးစက်နိုင်ခြေများသူတွေမှာ မှိုရောဂါကူးစက်မှုတွေက အသက်အန္တရာယ် ခြိမ်းခြောက်နေပေမယ့် ကုသနည်းလမ်းတွေ မရှိကြဘူးလို့ WHO လက်ထောက်ညွှန်ကြားရေးမှူးချုပ် ဒေါက်တာ ယူကီကိုနာကာတာနီက ပြောပါတယ်။

▪️ ပြီးခဲ့တဲ့ ဆယ်စုနှစ်အတွင်း မှိုရောဂါကုဆေးအသစ် ၄ ခုသာ အသိအမှတ်ပြုနိုင်ခဲ့ပါတယ်။

▪️ လက်ရှိမှိုရောဂါကုသနည်းတွေဆိုရင် ဆုတ်ယုတ်မှုများရှိလာပြီး ဘေးထွက်ဆိုးကျိုးများ၊ ဆေးဓာတ်ပြုမှုများ ပြင်းထန်သလို ကြာမြင့်စွာ ဆေးရုံတက်ကုသမှုတို့ လိုအပ်နိုင်ပါတယ်။

▪️ ဒါ့အပြင် ကလေးတွေအတွက်လည်း ကုသနည်းများနဲ့ စမ်းသပ်မှုများ မရှိကြောင်းကိုလည်း ဖော်ပြထားပါတယ်။

▪️ လက်ရှိ မှိုရောဂါစမ်းသပ်စစ်ဆေးနည်းတွေက နှောင့်နှေးပြီး ကုန်ကျစရိတ်များကာ အဆင့်မြင့်ဓာတ်ခွဲခန်းများ လိုအပ်သလို ရင်းမြစ်နည်းပါးတဲ့နေရာတွေမှာ မရနိုင်ပါဘူး။

▪️ ဒီအတွက် ကမ္ဘာလုံးဆိုင်ရာ ရောဂါစောင့်ကြည့်ရေး၊ ဆေးထုတ်လုပ်မှုအတွက် မြှုပ်နှံမှုများ၊ သုတေသနများအတွက် ပိုပြီးရင်းနှီးကြဖို့ WHOက တောင်းဆိုနေပါတယ်။

▪️ မှိုရောဂါကူးစက်မှုတွေက ပိုမိုပျံ့နှံ့လာပြီး လက်ရှိဆေးတွေကို ယဉ်ပါးလာတာကြောင့် ကုသရေးနဲ့ ရောဂါရှာဖွေမှု တိုးတက်လာဖို့ အရေးတကြီးလုပ်ဆောင်သင့်ကြောင်း အလေးပေးဖော်ပြသွားပါတယ်။

#Source: India Today

စနေနေ့က အီရတ်နိုင်ငံမြို့တော်ဘဂ္ဂဒက်မှာ စတင်ဖွင့်လှစ်ခဲ့တဲ့ ၁၃ ကြိမ်မြောက် လုံခြုံရေးကာကွယ်ရေး စစ်ဘက်ဆိုင်ရာစက်မှုလုပ်ငန်းများနဲ့ ဆိုက်ဘာလုံခြုံရေးပြပွဲမှာ တရုတ်ကာကွယ်ရေးလက်နက် ကုမ္ပဏီများမှ နောက်ဆုံးပေါ် နည်းပညာများ ပြသထားပါတယ်။
#World_Technology
Published 23 Apirl 2025
#ကာကွယ်ရေးပြပွဲ #ဆိုက်ဘာလုံခြုံရေးပြပွဲ
#YMG #Yangon_Times #Yangon_Media_Group

#Daily_News

Published 23 Apirl 2025

၁။ စက်သုံးဆီဖူလုံမှုရှိပြီး ရောင်းဈေးများလည်းကျဆင်း‌နေဟုဆို

၂။ ငလျင်ကြောင့် ပျက်စီးခဲ့သည့် အဆောက်အဦများကို မီတာခကောက်ခံခြင်းမရှိ

၃။ YBS စံပြယာဉ်မောင်းများအား ထိုင်းသို့ပို့ဆောင်

၄။ ဘဂ္ဂဒက်မြို့တွင်ကျင်းပသည့် ကာကွယ်ရေးပြပွဲ၌ တရုတ်ကုမ္ပဏီများမှနောက်ဆုံးပေါ်စစ်လက်နက် နည်းပညာများပြသ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 23 April 2025

▪️ ဒိန်းမတ်နဲ့ ဂျာမနီကြား ဘောလ်တစ်ပင်လယ်အောက်မှာ စံချိန်တင်မယ့် လိုဏ်ခေါင်းတစ်ခုတည်ဆောက်နေပြီး စကန်ဒီနေးဗီးယားနဲ့ ဥရောပကြား ဆက်သွယ်မှုတွေ တိုးတက်စေမှာဖြစ်ကာ သွားလာချိန် သက်သာစေမှာဖြစ်ပါတယ်။

▪️ ဖယ်မန်ဘဲ့လ်လိုဏ်ခေါင်းဟာ ၁၈ ကီလိုမီတာ (၁၁မိုင်)ရှိပြီး ကမ္ဘာ့အရှည်ဆုံး ကြိုတင်ပြင်ဆင်လမ်းမကြီးနဲ့ ရထားလိုဏ်ခေါင်း ဖြစ်လာမှာပါ။

▪️ ထူးခြားတဲ့ အင်ဂျင်နီယာပညာ အသုံးပြုထားပြီး ပင်လယ်ကြမ်းပြင်ပေါ်မှာ လိုဏ်ခေါင်းအပိုင်းလိုက်တွေကို ချိတ်ဆက်ထားမှာ ဖြစ်ပါတယ်။

▪️ ဒီစီမံကိန်းရဲ့ အဓိကဆောက်လုပ်ရေးနေရာဟာ ဒိန်းမတ်အရှေ့တောင်ဘက် လိုလန်ကျွန်းကမ်းရိုးတန်းမှ မြောက်ဘက်လိုဏ်ခေါင်းအဝင်ဝနေရာမှာ တည်ရှိပါတယ်။

▪️ ဒီဆောက်လုပ်ရေးလုပ်ငန်းကြီးက ဟက်တာ ၅၀၀ ကျော်ကျယ်ဝန်းပြီး ဆိပ်ကမ်းတစ်ခုနဲ့ လိုဏ်ခေါင်းအပိုင်းများ ထုတ်လုပ်နေတဲ့ စက်ရုံတစ်ခုပါဝင်ပါတယ်။

▪️ သံမဏိကို ကွန်ကရစ်လောင်းပြီးတော့ အပိုင်းတစ်ခုစီဟာ ၂၁၇ မီတာရှည်လျားပြီး ၄၂ မီတာအကျယ်ရှိပါတယ်။

▪️ ဒီလိုနဲ့ အပိုင်းပေါင်း ၉၀ ကို တစ်ခုပြီးတစ်ခုချိတ်ဆက်ထားမှာ ဖြစ်ပါတယ်။

▪️ ဒီစီမံကိန်းဟာ စံချိန်တွေချိုးသွားမှာဖြစ်တယ်လို့ ဒိန်းမတ်ကုမ္ပဏီ ဖယ်မန်းမှ အမှုဆောင်ချုပ် ဟင်းနရစ်ဗင်ဆန့်ဆင်က ပြောပြပါတယ်။

▪️ စီမံကိန်းတန်ဖိုးက ယူရို ၇.၄ ဘီလီယံခန့်ရှိကာ အများစုကို ဒိန်းမတ်ဘက်မှ အကုန်အကျခံထားပြီး ဥရောပကော်မရှင်မှ ယူရို ၁.၃ ဘီလီယံ ထောက်ပံ့ထားပါတယ်။

▪️ လှေသင်္ဘောဖြင့် ၄၅ မိနစ်ခန့်သွားရတဲ့ခရီးဟာ လိုဏ်ခေါင်းပြီးစီးပါက ဒိန်းမတ်တောင်ပိုင်း ရော့ဒ်ဘီဟေဗန်နဲ့ ဂျာမနီမြောက်ပိုင်း ပွတ်ဂါတင်တို့ကြား ကားဖြင့်သွားရင် ၁၀ မိနစ်ခန့်၊ ရထားဖြင့်သွားရင် ၇ မိနစ်ခန့်သာ ကြာမြင့်တော့မှာ ဖြစ်ပါတယ်။

▪️ ဒိန်းမတ်နဲ့ ဂျာမနီကို ချိတ်ဆက်ရုံမက စကန်ဒီနေးဗီးယားနဲ့ ဥရောပအလယ်ပိုင်းကိုလည်း ချိတ်ဆက်ထားတာကြောင့် အားလုံးအတွက် အကျိုးရှိစေသလို ကီလိုမီတာ ၁၆၀ လောက် လျော့နည်းသွားတာကြောင့် ကာဗွန်ထုတ်လွှတ်မှုနဲ့ ပို့ဆောင်ရေးသက်ရောက်မှုတို့ လျော့နည်းစေမှာဖြစ်ကြောင်း မစ္စတာ ဗင်ဆန့်ဆင်က ဆိုပါတယ်။

▪️ လိုဏ်ခေါင်းထဲမှာ ရထားလမ်း ၂ လမ်း၊ ကားလမ်း အသွားအပြန် ၂ လမ်း၊ ထိန်းသိမ်းပြုပြင်ရေးနဲ့ အရေးပေါ်စင်္ကြံတို့ ပါဝင်ပါတယ်။

▪️ ဆောက်လုပ်ရေးက အလွန်ရှုပ်ထွေးကာ အပိုင်းအပိုင်းတွေကို ရေအောက် ၄၀ မီတာအထိ ပင်လယ်ကြမ်းပြင်ပေါ် ချရမှာဖြစ်ပြီး ရေအောက်ကင်မရာ၊ ဂျီပီအက်စ်လမ်းညွှန်ကိရိယာများ အသုံးပြုထားကာ ၁၅ မီလီမီတာအထိ တိကျမှုရှိပါတယ်။

▪️ ဒီလိုဏ်ခေါင်းတည်ဆောက်ဖို့ ဒိန်းမတ်နဲ့ ဂျာမနီတို့ ၂၀၀၈ တည်းက သဘောတူညီချက်ရထားပေမယ့် ဖယ်ရီလုပ်ငန်းများနဲ့ ဂျာမန် ကွန်ဆာဗေးရှင်းအဖွဲ့တို့က ဂေဟစနစ်ထိခိုက်မှာကို စိုးရိမ်တာကြောင့် နှောင့်နှေးခဲ့ရပါတယ်။

▪️ ၂၀၂၀ မှာတော့ ဂျာမနီ ဖက်ဒရယ်တရားရုံးတစ်ခုကနေ ယင်းတို့ရဲ့ စွပ်စွဲမှုတွေကို ငြင်းပယ်ခဲ့တာကြောင့် ဆောက်လုပ်ဖို့ မီးစိမ်းပြသွားပါတယ်။

▪️ လိုဏ်ခေါင်းကို ၂၀၂၉ မှာ ဖွင့်လှစ်မှာဖြစ်ပြီး နေ့စဉ် ရထား ၁၀၀ ကျော်နဲ့ ကားပေါင်း ၁၂,၀၀၀ ခန့်ဖြတ်သန်းမယ်လို့ ခန့်မှန်းထားပါတယ်။

#Source: BBC