Published 31 July 2022

အမေရိကန်တွင် မျောက်ကျောက်ရောဂါကူးစက်ခံရသူ ကမ္ဘာတွင် အများဆုံးအဖြစ် ၁၂၈၉ဦးထိ မြင့်တက်လာ

အမေရိကန်ပြည်ထောင်စု နယူးယောက်စီတီးမှာ မျောက်ကျောက်ရောဂါကူးစက်ခံရသူတွေဟာ ဇူလိုင် ၂၉ရက်အထိ စုစုပေါင်း ၁၂၈၉ ဦးရှိသွားပြီဖြစ်ပြီး ရောဂါပျံ့နှံ့ကူးစက်နေမှုအပေါ် အမေရိကန်ရဲ့ ချည်းကပ်နေမှုအပေါ် စိတ်ပျက်မှုတွေ တိုးပွားလာနေပါတယ်။

ယခုအခါ အမေရိကန်ပြည်ထောင်စုဟာ တစ်ကမ္ဘာလုံးမှာ မျောက်ကျောက်ရောဂါကူးစက်မှု အများဆုံးနိုင်ငံဖြစ်လာပါတယ်။

ပြည်သူ့ကျန်းမာရေးအရေးပေါ်အခြေအနေအပေါ် နိုင်ငံက အိပ်မောကျရင်းလမ်းလျှောက်နေသလို လုပ်နေတာတွေကြောင့် ရွေးကောက်ခံအရာှရှိတွေကို အိပ်နေရာက နိုးထကြဖို့ နယူးယောက် ဆန္ဒပြသူတွေက တောင်းဆိုနေကြပါတယ်။

“ ကျွန်တော်တို့ တောင်းဆိုနေတာက ပိုပြီးကောင်းမွန်ပြီး အဓိပ္ပါယ်ရှိတဲ့ ကမ်းလင့်ထောက်ကူမှုတွေ၊ ထိရောက်တဲ့ အရေးပေါ် ကုသမှုတွေ၊စမ်းသပ်မှုတွေနှင့် ကာကွယ်ဆေးထိုးနှံမှုတွေပြုလုပ်ပေးဖို့ပဲဖြစ်တယ်။ အဲဒါတွေကို မနေ့ကတည်းက လုပ်သင့်ခဲ့ကြတာ” လို့ Act Up New York (အက်သ်အပ် နယူးယောက်) အဖွဲ့က လှုပ်ရှားတက်ကြွသူတစ်ဦးဖြစ်တဲ့ ဂျေဆန် ရိုဆန်ဘတ်က ပြောပါတယ်။

TPOXX (တီပေါ့)  လို မျောက်ကျောက်ရောဂါ ကုသမှုတွေကို ပိုမိုရရှိစေဖို့အတွက် အမတ်တွေကို ကြိုးနီစနစ်တွေ ဖြတ်တောက်ပစ်ကြဖို့  ဆန္ဒပြသူတွေက တောင်းဆိုနေကြပါတယ်။ ဖက်ဒရယ်အစိုးရကတော့ ကာကွယ်ဆေးပေါင်း သုံးသိန်း ဖြန့်ပြီးထားပါ။ဒါပေမယ့် ဒီထက်ပိုပြီးကာကွယ်ဆေးထိုးနှံပေးဖို့ တောင်းဆိုမှုတွေက ကြီးထွားလာနေတာဖြစ်ပါတယ်။

မျောက်ကျောက်ရောဂါဖြစ်ပွားမှုအပေါ် အစိုးရရဲ့တုန့်ပြန်ချက်အပေါ် စိတ်ပျက်မှုတွေရှိနေပေမယ့်  အကူအညီတွေပိုပေးဖို့ စီစဉ်ထားတယ်လို့ အရာရှိတွေက ပြောနေကြပါတယ်။ နောက်ထပ် မျောက်ကျောက် ကာကွယ်ဆေးပေါင်း ခုနှစ်သိန်း ခြောက်သောင်းကျော်ကို အမေရိကန်ကိုပို့ပေးခဲ့ပြီးပါပြီ။ အုပ်ချုပ်ရေးမှူး ကေသီဟိုချူးက နယူးယောက်အနေနှင့် မျှတတဲ့ခွဲတမ်းရဖို့ အသေအချာရဖို့လိုတယ်လို့ ပြောနေပါတယ်။

မျောက်ကျောက်ရောဂါဟာ နီးကပ်စွာထိတွေ့ဆက်ဆံမှုက ကူးစက်ပြီး လူတိုင်းကို အကျိုးသက်ရောက်စေနိုင်ပါတယ်။  လိင်တူဆက်ဆံကြတဲ့ အမျိုးသားတွေမှာ ကူးစက်မှုတွေက ပိုများနေပါတယ်။

မျောက်ကျောက်ရောဂါကူးစက်မှုမြင့်တက်လာနေတဲ့အလျောက် LGBTQ+ တွေ အများစုလာကြတဲ့ ဘားတွေမှာ လူတွေအလာကျဲသွားပါတယ်။

နယူးယောက်စီတီးဟာ  မျောက်ကျောက်ရောဂါနှင့်ပတ်သက်တဲ့ သတင်းလွှာတွေကို ဒီလိုလုပ်ငန်းတွေကိုပေးထားပြီး ဖြန့်ချိပေးဖို့ပြောထားပါတယ်။ ဒါပေမယ့် တော်တော်များများကတော့ အစိုးရအနေနှင့် ဒီ့ထက်ပိုပြီး လေးနက်တဲ့ အရေးယူလုပ်ဆောင်မှုတွေ လုပ်ဆောင်ပေးဖို့ မျှော်လင့်စောင့်ဆိုင်းနေကြတာဖြစ်ပါတယ် ။

Source CCTV Plus

#US_Monkeypox

#Monkeypox_outbreak

#Health

Published 31 July 2022

အသက်၆နှစ်သား အစ်ကိုဖြစ်သူက ၅ နှစ်သမီး နှမကလေးကို သေနတ်ဖြင့် မတော်တဆပစ်မိပြီး နှမဖြစ်သူသေဆုံးခဲ့ရတဲ့ အဖြစ်အပျက်အတွက် မိဘနှစ်ပါးကို မသိကျိုးကျွန်ပြုမှုဖြင့် အမှုဖွင့်ထားရာ ထောင်ဒဏ် အနှစ်၄၀ အထိကျခံရဖွယ် ရှိနေပါတယ်။

ဇူလိုင် ၂၆ ရက်က အမေရိကန်ပြည်ထောင်စု၊ အင်ဒီယာနာပြည်နယ် ဒယ်လာဝဲ ခရိုင်က အိမ်တစ်အိမ်မှာ အသက်၅ နှစ်အရွယ် မိန်းကလေးငယ်တစ်ဦး သေနတ်ပစ်ခံရကြောင်း သတင်းပို့ချက်အရ ရဲတွေ အပြေးအလွှားသွားရောက်ခဲ့ရပါတယ်။

အမည်မဖော်ပြလိုတဲ့ အဲဒီနှမငယ်ကလေးကို ရရှိဒဏ်ရာတွေနှင့် ဆေးရုံကိုပို့ဆောင်တဲ့အခါ ဆရာဝန်တွေက သေဆုံးခဲ့ပြီလို့ အတည်ပြုခဲ့ပါတယ်။

ကလေးနှစ်ဦးရဲ့ မိဘတွေဟာ အသက်၂၈နှစ်အရွယ် ဖခင် ဂျက်ကော့ကာတစ် ဂရေဆန်နှင့် အသက် ၂၇နှစ်အရွယ်မိခင်ဖြစ်သူ ကင်ဘာလေ ဒန်နီယယ်ဂရေဆန်တို့ဖြစ်ကြပါတယ်။

သူတို့ရဲ့သားဖြစ်သူဟာ  မီးခံသေတ္တာထဲမှာ မောင်းတင်ထားပြီးသား သေနတ်ကိုတွေ့တဲ့အတွက် သူ့ရဲ့နှမကလေးဖြစ်သူကို မတော်တဆပစ်မိခဲ့တာ ဖြစ်တယ်လို့  Muncie Star Press သတင်းစာကရေးသားပါတယ်။

အဲဒီမီးခံသေတ္တာထဲမှာ မောင်းတင်ပြီးသား သေနတ်နှစ်လက်ကို သိမ်းထားတာဖြစ်တယ်လို့ ဂျက်ကော့ နှင့် ကင်ဘာလီတို့က ရဲတွေကို စစ်ဆေးမေးမြန်းစဉ် ပြောပါတယ်။

အမေအိပ်ပျော်နေတုန်း သေနတ်ကိုထုတ်ယူသွားတာဖြစ်ပြီး မီးခံသေတ္တာ သော့ပေါက်မှာသော့တန်းလန်းနှင့်လို့ ရဲတွေက ပြောပါတယ်။

သူတို့ရဲ့သားကို သေနတ်ပစ်ကွင်းခေါ်သွားဖူးပြီး ကလေးငယ်ဟာ သေနတ်ဘယ်လိုပစ်ရတယ်ဆိုတာ သိနေတယ်လို့ သူတို့ကပြောပါတယ်။

အိမ်နံရံမှာ မစင်တွေပေကျံနေတာကိုလည်း ရဲတွေက တွေ့ပါတယ်။

သူတို့နေထိုင်မှုအခြေအနေဟာ အင်မတန်မနှစ်မြို့ဖွယ်ဖြစ်တယ်လို့လည်း ရဲတွေကပြောပါတယ်။

အိမ်တစ်အိမ်လုံးမှာလည်း အမှိုက်ပုံးနှင့် ပရိဘောဂတွေ ဖွာလျံကြဲနေတာကိုလည်းရဲကတွေ့ပါတယ်။

အဲဒီအပြင် ကလေးတွေရဲ့ အိပ်ရာခင်းတွေဟာလည်း ညစ်ပတ်စွန်းထင်းနေတာလို့ ရဲတွေကပြောပါတယ်။

ဂျက်ကော့နှင့်ကင်ဘာလေတို့ကို မှီခိုသူတွေကိုသေစေတဲ့  မသိကျိုးကျွန်ပြုကျင့်မှုနှင့် တရားစွဲထားပါတယ်။

အဲဒီအပြင် လျစ်လျူရှုမှု(၃)မှုနှင့်လည်း ထပ်တရားစွဲထားပါသေးတယ်။

ကင်ဘာလေကို ဆက်လက်ချုပ်နှောင်ထားဆဲဖြစ်ပြီး ဂျက်ကော့ကိုတော့ ဒေါ်လာ ၆၅၀၀၀ အာမခံနှင့် ပြန်လွှတ်ပေးထားတယ်လို့ ဒယ်လာဝဲခရိုင်ရဲဌာနက ပြောပါတယ်။

#Source_NY Post

#Boy_accidentally_shot_sisiter

#Jacob_Kimberly

#US_Crime_story

Published: 31 July 2022

ယူကျု YouTube က နာမည်ကျော် မစ္စတာဘိစ် MrBeast ဟာ ဇူလိုင် ၂၈ ရက်က စာရင်းသွင်းကြည့်ရှုသူ (subscribers) ပေါင်း သန်း ၁၀၀ အထိရရှိတဲ့ ဒုတိယမြောက် တစ်သီးပုဂ္ဂလက  ဖန်တီးသူတစ်ဦးဖြစ်လာခဲ့ပါတယ်။

အမည်ရင်း ဂျင်မီ ဒေါ်နယ်ဆန်ဖြစ်တဲ့ ယူကျုအမည် မစ္စဘာ ဘိစ်ဟာ သူ့ကိုအားပေးတဲ့ပရိဿတ်ကို ကျေးဇူးတင်ကြောင်း ယူကျုမှာ streaming ထုတ်လွှင့်ပြသပြီး တုန့်ပြန်ခဲ့ပါတယ်။

“ ဒီဗွီဒီယိုတွေကို ကြည့်ရှုကြသူ ခင်ဗျားတို့ တစ်ဦးချင်းစီကို ကျွန်တော် ကျေးဇူးတင်ပါတယ်။ ဒါဟာ ကျွန်တာ့်ဘဝမှာ  ကျွန်တော် လုပ်ခဲ့သမျှ အားလုံးပါပဲ” လို့ သူကပြောပါတယ်။ “ ကျွန်တော်လုပ်သမျှအားလုံးက မနက်အိပ်ရာထတယ်။ ပြီးတော့ အကောင်းဆုံးဗွီဒီယိုကို ဘယ်လိုလုပ်မလဲဆိုတာကို စွဲစွဲလန်းလန်းလုပ်တယ်။ ဒါဟာ ကျွန်တော် ဂရုတစ်စိုက်လုပ်တာ အားလုံးပဲ။ဒါဟာ ကျွန်တော့်ကို ပျော်ရွှင်အောင်လုပ်ပေးတဲ့ တစ်ခုတည်းသော အရာဖြစ်တယ်” လို့ သူက ဖြည့်စွက် ပြောပါတယ်။

ဒေါ်နယ်ဆန်ရဲ့ ချယ်နယ်လ်ဟာ ကမ္ဘာပေါ်မှာ စတုတ္ထမြောက် subscribe အလုပ်ဆုံး ချယ်နယ်လ်ဖြစ်ပါတယ်၊ ယူကျု ပလက်ဖောင်းပေါ်မှာ သူဟ လူကြည့်အများဆုံးနှင့် ဝင်ငွေအများဆုံး ဖန်တီးသူလည်းဖြစ်နေပါတယ်။  သူ့အရင် သန်း၁၀၀ subscribers ရရှိခဲ့တဲ့ တစ်သီးပုဂ္ဂလကကတော့ ဂိမ်း influencer ပီဒိုင်းဒိုင်း PewDiePie ဖြစ်ပါတယ်။ သူ့နာမည်ရင်းက ဖဲလစ် ကေဂျဲလ်ဘတ်ဖြစ်ပြီး ယခုအထိ သူဟာ ဖော်လိုဝါ ၁၁၁သန်းရရှိထားပါတယ်။

သူ့ချယ်နယ်မှာ တင်ချင်တဲ့ စိတ်ကူးအကြောင်းအရာတွေ အများကြီးရှိနေသေးတယ်လို့ ဒေါ်နယ်ဆန်က ပြောပါတယ်။  သူဟာ ယူကျုပေါ်မှာပဲ သူ့ရဲ့ အသက်မွေးဝမ်းကျောင်းကို နှစ်ပေါင်း ၂၀ကနေ ၃၀ အထိတည်ဆောက်သွားမယ်လို့လည်း သူက ဆိုပါတယ်။

“ ဒါဟာ အစပိုင်းမျှပဲရှိသေးတယ်လို့ ကျွန်တော်ခံစားရပါတယ်။ ဒီလိုပြောလိုက်လို့ ကျွန်တော် စိတ်ကြီးဝင်နေတာမဟုတ်ပါဘူး၊ တကယ့်ကို အစလောက်ပဲရှိသေးတယ်လို့ ခံစားရတာပါ။ ကျွန်တော့်အနေနှင့် တီထွင်ဖန်တီးမှုတွေ အများကြီးပေးဖို့ ရှိသေးတယ်” လို့ သူက stream ထဲမှာပြောပါတယ်။

သူဟာ  စေတနာထက်သန်လှတဲ့ သူ့ဗွီဒီယိုတွေကြောင့် သူ့ပရိသတ်တွေကြား ကောင်းသတင်းမွှေးပျံနေပါတယ်။ သူဟာ မကြာခဏဆိုသလို သူရတဲ့ပိုက်ဆံ ပမာဏာတော်တော်များများကို ကြည့်ရှုသူတွေထံ ပြန်ပေးလေ့ရှိပါတယ်၊ သူဟာ Twitch မှာ ဗွီဒီယို  stream တင်သူအသေးကလေးတွေနှင့် ယူကျုသမားတွေကို  ဒေါ်လာထောင်ပေါင်းများစွာ ပြန်လှူခဲ့တဲ့အတွက် ၂၀၁၈ မှာသူ နာမည်ရလာပါတယ်။ သိပ်မကြာသေးခင်ကပဲ သူဟာ ပရိဿတ်တွေကို ပြိုင်ပွဲကလေးတစ်ခုလုပ်ခဲ့ပါတယ်။  အဲဒီပွဲမှာ ပရိဿတ်တွေဟာ ကိုယ်ပိုင်ဗွီဒီယိုကလေးတွေနှင့် ဆုကြီးတွေရဖို့ ဝင်ပြိုင်ခဲ့ကြပါတယ်။

၂၀၂၁ခုနှစ်မှာ သူဟာ နက်ဖလစ်ရဲ့ စကွစ်ဂိမ်းပြိုင်ပွဲတစ်ခုပြုလုပ်ခဲ့ပြီး အားပေးသူ ၄၅၆ ဦး ပါဝင်ယှဉ်ပြိုင်ခဲ့ကြပါတယ်။ အဲဒီအပြင် ဝီလီဝန်ကာရဲ့ ချောကလက်စက်ရုံ ခံစားပြီး ပြုလုပ်တဲ့ ပြိုင်ပွဲတစ်ခုမှာ ပရိသတ်တစ်ဦးကို ဒေါ်လာ ငါးသိန်း ချီးမြှင့်ခဲ့ပါတယ်။

 သူဟာ Beast Philanthropy လို့ခေါ်တဲ့ လူသားချင်းအကူအညီပေးရေးကုမ္ပဏီတစ်ခုကို ၂၀၂၀မှာ တည်ထောင်ထားပါတယ်။ အဲဒီကုမ္ပဏီ က ဆင်းရဲမွဲတေနေသူတွေကို အကူအညီတွေပေးပါတယ်။ ပြီးတော့ ဘာဂါဆိုင်တွဲတွေနှင့် ချောကလက်ထုတ်ကုန် တွေကိုလည်း ပိုင်ဆိုင်ထားပါတယ်။

Source: Insider

#YouTube_Star-_MrBeast

#MrBeast

#Jimmy Donalds

#World_Health
Published 31 July 2022

ထုတ်လုပ်ထိန်းသိမ်းထားတဲ့ အသားတွေမှာပါဝင်တဲ့ တာရှည်ခံပစ္စည်းတွေနဲ့ အူမကြီးကင်ဆာရောဂါဖြစ်ပွားခြင်းတို့ကြား ဆက်စပ်မှုရှိနေကြောင်း ပြင်သစ်ကျန်းမာရေးအာဏာပိုင်များက တွေ့ရှိခဲ့ကြပါတယ်။

ပြင်သစ်အစားအစာ ပတ်ဝန်းကျင် လုပ်ငန်းခွင်ကျန်းမာရေးနဲ့ဘေးကင်းလုံခြုံရေးအေဂျင်စီ (ANSES)က ဝက်အူချောင်းကဲ့သို့ ထုတ်လုပ်ထိန်းသိမ်းထားတဲ့အသားတွေနဲ့ ဝက်သားမှာပါဝင်တဲ့ နိုက်ထရိတ်စ်နဲ့ နိုက်ထရိုက်စ်တို့ဟာ အူမကြီးကင်ဆာဖြစ်နိုင်ချေပိုများစေကြောင်း အတည်ပြုခဲ့ကြပါတယ်။

အစ္စရေးလ်တစ်နိုင်ငံတည်းမှာပင် အူမကြီးကင်ဆာကြောင့် နှစ်စဉ်သေဆုံးသူ ၁,၅၀၀ ခန့်ရှိပါတယ်။

အသားကြိတ်ပြီးထုတ်လုပ်ရာမှာ တာရှည်ခံဖို့နဲ့ ပန်းရောင်သန်းနေစေရန်အတွက် နိုက်ထရိတ်စ်နဲ့ နိုက်ထရိုက်စ်တို့ကို အသုံးပြုလေ့ရှိပါတယ်။

အဲဒီနိုက်ထရိတ်စ်၊ နိုက်ထရိုက်စ်တွေကို ပိုပြီးစားမိလေ အူမကြီးကင်ဆာဖြစ်နိုင်ချေ ပိုများလေဖြစ်ကြောင်း ပြင်သစ်အာဏာပိုင်များကဆိုပါတယ်။

နိုက်ထရိတ်စ်စားသုံးမိခြင်းရဲ့ တဝက်ကျော်လောက်က အသားကြိတ်ထုတ်လုပ်ရာမှာအသုံးပြုရတဲ့ နိုက်ထရိုက်တာရှည်ခံပစ္စည်းများကြောင့်ဖြစ်ပြီး အဆိုပါတာရှည်ခံပစ္စည်းများပါဝင်တဲ့ အစားအစာများကိုလျှော့ချစားသုံးခြင်းဖြင့် ထိုဓာတုပစ္စည်းများနဲ့ကင်းဝေးစေမှာဖြစ်ပါတယ်။

အစားအသာက်တွေကနေ နိုက်ထရိုက်နဲ့ နိုက်ထရိတ်များစားသုံးမိတဲ့အခါ နိုက်ထရိုဆိုလိုခေါ်တဲ့ဒြပ်ပေါင်းဖြစ်သွားပါတယ်။

အချို့သောနိုက်ထရိုဆိုတွေက မျိုးဗီဇပြောင်းလဲခြင်းများဖြစ်ပေါ်ကာ ကင်ဆာဖြစ်ပွားတဲ့အထိ ဖြစ်နိုင်ပါတယ်။

ဥရောပအစားအစာဘေးကင်းရေးအာဏာပိုင်နဲ့ နိုင်ငံတကာကင်ဆာသုတေသနအေဂျင်စီတို့မှ လေ့လာထားတဲ့ သိပ္ပံနည်းကျကင်ဆာအချက်အလက်များကို ANSES က ဆန်းစစ်သုံးသပ်ခဲ့ပါတယ်။

အဲဒီနောက် နိုက်ထရိတ် နိုက်ထရိုက်စားသုံးမိခြင်းနဲ့ အူမကြီးကင်ဆာဖြစ်နိုင်ချေတို့ကြား ဆက်စပ်မှုကို အတည်ပြုခဲ့ကြပါတယ်။

ထိုဒြပ်ပေါင်းကို ကြာရှည်စားသုံးထိတွေ့မိတာနဲ့အမျှ အူမကြီးကင်ဆာဖြစ်လာနိုင်ချေ ပိုများနေပါတယ်။
အခြားကင်ဆာတွေလည်း ဖြစ်နိုင်ချေရှိနေကြောင်း၊ ထိုဆက်စပ်မှုက အတည်ပြုနိုင်မလား ငြင်းဆိုရမလားဆိုတာကို ဆက်လက်လေ့လာဖိုလိုအပ်ကြောင်း သုံးသပ်သွားပါတယ်။

Source: The Jerusalem Post.
#Yangon_Media_Group

#World_Health
Published 31 July 2022

သွေးကင်ဆာရောဂါကုသဖို့ ပင်မစတမ်ဆဲလ် အစားထိုးကုသတဲ့ အသက်အကြီးဆုံးလူနာမှာ HIV ရောဂါပါ ပျောက်ကင်းသွားခဲ့ကြောင်း သုတေသီများက ဗုဒ္ဓဟူးနေ့မှာ ဖော်ပြခဲ့ပါတယ်။

အသက် ၆၆ နှစ်အရွယ်လူနာကို သွေးကင်ဆာကုသဖို့စီစဉ်ရာမှာ AIDS ဖြစ်စေတဲ့ရောဂါကို သဘာဝအတိုင်းခံနိုင်ရည်ရှိတဲ့ အလှူရှင်ကိုပါရှာဖွေခဲ့ကြပါတယ်။

၁၉၈၈ ခုနှစ်က စတင်ကူးစက်ခဲ့ပြီး HIV သက်တမ်းအကြာဆုံး လူနာဖြစ်လာကာ သူ့မိတ်ဆွေတွေလည်း HIV နဲ့သေဆုံးသွားခဲ့ကြပါပြီ။

နှစ်ပေါင်း ၃၀ ကျော်ကြာအောင် HIV ကုထုံး ART ဖြင့် ရောဂါကိုထိန်းချုပ်ခဲ့ပါတယ်။

နိုင်ငံတကာအေအိုင်ဒီအက်စ်အဖွဲ့အစည်း(IAS) အစည်းအဝေးပွဲမှာ ဆရာဝန်တွေက HIV နဲ့ သွေးကင်ဆာလူနာတွေမှာ သွေးသားမတော်စပ်တဲ့ ပင်မဆဲလ်အလှူရှင်နဲ့ ကုသလိုရနိုင်ချေများနဲ့ပတ်သက်ပြီး တင်ပြခဲ့ကြပါတယ်။

ဆောင်ရွက်ရမယ့်လုပ်ငန်းစဉ် အန္တရာယ်များကြောင့် HIV လူနာအများစုမရွေးချယ်ကြချင်ပေမယ့် ဆေးသိပ္ပံပညာနယ်ပယ်မှာတော့ မျှော်လင့်ချက်ဖြစ်လာနိုင်ချေရှိကြောင်း IAS ဥက္ကဌ'ရှရွန်လီဝင်'က ပြောကြားခဲ့ပါတယ်။

အလှူရှင်ရဲ့ပင်မစတမ်ဆဲလ်တွေမှာ ရှားပါးမျိုးဗီဇမျိုးပါဝင်ပြီး HIV ကူးစက်စေနိုင်တဲ့ ဆဲလ်လက်ခံရာနေရာများ မပါရှိတာကြောင့် ရောဂါမကူးစက်စေတာဖြစ်ပါတယ်။

အစားထိုးခွဲစိတ်ခဲ့ပြီး ၃ နှစ်ခွဲအကြာ ၂၀၂၁ မှာ ART ကုထုံးကိုရပ်တန့်ခဲ့ပြီး အခုတော့ HIV ရော သွေးကင်ဆာရောပျောက်ကင်းတာ တစ်နှစ်ကျော်လာခဲ့ပါပြီ။

အသက် ၅၉ နှစ်အရွယ် ရှားပါးမျိုးဗီဇပါတဲ့ အမျိုးသမီးတစ်ဦးဟာလည်း ခွဲစိတ်ကုသပြီးနောက် ART ကုထုံးရပ်တန့်ခဲ့ကာ ဗိုင်းရပ်စ်ပိုးမတွေ့ရှိတော့တာကြောင့် ကုသမယ့်နည်းလမ်းတွေ့လာနိုင်ဖွယ်ရှိကြောင်း စပိန်သုတေသီများ တင်ပြခဲ့ကြပါတယ်။

IAS အစည်းအဝေးပွဲ မတိုင်ခင် ကုလသမဂ္ဂ HIV/AIDS အစီအစဉ်တင်ပြရာမှာ ကိုဗစ်ကပ်ရောဂါကြောင့် HIV တိုက်ဖျက်ခြင်းလမ်းလွဲခဲ့ရကြောင်း၊ ကူးစက်မှုအများဆုံး အာရှနဲ့ ပစိဖိတ်ဒေသတွေမှာ ရောဂါအခြေအနေကိုဆန့်ကျင်ဖို့ကြိုးစားရမှာဖြစ်ကြောင်း ဖော်ပြခဲ့ကြပါတယ်။

Source: Reuters
#Yangon_Media_Group

Published 31 July 2022

ကြီးမားလှတဲ့ တရုတ် ဒုံးပျံက အရှိန်မြှင့် ဒုံးစက်ရဲ့ ကြွင်းကျန်တဲ့ အပိုင်းအစတွေဟာ စနေနေ့ က ကမ္ဘာမြေရဲ့ အိန္ဒိယ သမုဒ္ဒရာ အပေါ် ပျက်ကျခဲ့တယ်လို့ အမေရိကန်နှင့် တရုတ် အာကာသအရာရှိတွေက ပြောကြပါတယ်၊

ဒုံးပျံ Long March 5B  ရဲ့ ၂၅.၄ တန်ချိန်ရှိတဲ့ အပျက်အစီးတွေဟာ ဖိလစ်ပိုင်နိုင်ငံ အနောက်တောင်ပိုင်းက ပင်လယ်ပေါ် ထိုးကျခဲ့ တယ်လို့ တရုတ်နိုင်ငံ အာကာကသခရီးစဉ်အေဂျင်စီက ပြောပါတယ်။ လေထုထဲပြန်လည်ဝင်ရောက်လာတဲ့အခါ အပျက်အစီးတွေအများစုဟာ လောင်ကျွမ်းသွားကြတယ်လို့လည်း  အေဂျင်စီရဲ့ သတင်းထုတ်ပြန်ချက်အကျဉ်းမှာ ဖော်ပြထား ပါတယ်။

“ တရုတ်ပြည်သူ့သမ္မတနိုင်ငံဟာ သူတို့ရဲ့ Long March 5B  ဒုံးပျံ ပျက်ကျရာလမ်းကြေင်းနှင့် ပတ်သက်တဲ့ သတင်း အချက်အလက်ကို  မျှဝေပေးခြင်းမရှိခဲ့ဘူး” လို့ အမေရိကန်နာဆာအုပ်ချုပ်ရေးမှူး ဘီလ်နယ်ဆင်က သတင်းထုတ်ပြန်ပါတယ်။

အာကာသလုပ်ငန်းလုပ်နေတဲ့ နိင်ငံတွေဟာ အကောင်းဆုံးအလေ့အထတွေကို လိုက်နာပြီး အထူးသဖြင့် လူ့အသက်အိုးအိမ် အန္တရာယ်မြင့်မားတဲ့ Long March 5 လို ယာဉ်တွေရဲ့ အပျက်အစီးအစိတ်အပိုင်းတွေနှင့် ပတ်သက်တဲ့ သတင်းအချက်အလက် တွေကြိုတင်မျှဝေပေးသင့်တယ် လို့လည်း သူကပြောပါတယ်။

တရုတ်ကတော့ ဒီလိုအပျက်အစီးအစိတ်အပိုင်းတွေကိစ္စ အနောက်ရဲ့ စိုးရိမ်ပူပန်မှုကို ပယ်ချလိုက်ပါတယ်။ ဒါဟာ နာမည် ဖျက်ချင်တာသက်သက်လို့လည်းတုန့်ပြန်လိုက်ပါတယ်။

The Long March 5B ဒုံးပျံကို  တရုတ်ရဲ့ တည်ဆောက်ဆဲTiangong အာကာသယာဉ်အတွက် လေးလံလှတဲ့ မော်ဒျူးတစ်ခုကို သယ်ဆောင်ပြီး ဇူလိုင် ၂၄ရက်က လွှတ်တင်ခဲ့တာဖြစ်ပါတယ်။ နိုင်ငံတကာ အာကာသစခန်းမှာ တရုတ်ရဲ့ ပါဝင်မှုကို အမေရိကန်က တားဆီးပိတ်ပင်ပြီးနောက်ပိုင်း တရုတ်နိုင်ငံဟာ ကိုယ်ပိုင် အာကာသစခန်းကို တည်ဆောက်ခဲ့ပါတယ်။

#Source_Bloomberg

#Long_March_5B  

#China_Rocket_Debris

#Space_race