Published 28 July 2022

မြောက်ကိုးရီးယားနိုင်ငံသည် ယင်းရဲ့ နျူကလီးယားစစ်အဟန့်အတားတွေကို တိုက်ခိုက်ရန်ပြင်ဆင်ဖို့နှင့် အမေရိကန်ရဲ့ စစ်ရေး ထိပ်တိုက်ဖြစ်မှုကိုတန်ပြန်ဖို့ အဆင်သင့်ဖြစ်နေပြီလို့ ခေါင်းဆောင် ကင်မ်ဂျုန်အမ်က ပြောလိုက်ပါတယ်။

တောင်ကိုးရီးယားသမ္မတအသစ်ကိုလည်း ပထမဆုံးအဖြစ် ဝေဖန်ပြစ်တင်လိုက်ပြီး ဆိုးလ်ဟာ စစ်ပွဲရဲ့နှုတ်ခမ်းဝ ရောက်အောင် တွန်းပို့နေတယ်လို့ သူကပြောလိုက်ပါတယ်။

ဇူလိုင်၂၇ရက်နေ့ ကိုးရီးယားစစ်ပွဲ ရပ်စဲမှု ၆၉နှစ်ပြည့် အခမ်းအနားမှာ ကင်မ်က မိန့်ခွန်းပြောကြားရာမှာ ယခုလိုပြောခဲ့တာ ဖြစ်ပါတယ်။  ကိုးရီးယားစစ်ပွဲရပ်စဲခဲ့ပေမယ့် နည်းပညာသဘောအရ စစ်ကဆက်လက်ဖြစ်နေတာပါ။

၁၉၅၀-၅၃ စစ်ပွဲကတည်းက အမေရိကန်ပြည်ထောင်စုနှင့် ထိပ်တိုက်တွေ့ခဲ့ပြီး မြောက်ကိုးရီးယားအဖို့ အရေးတကြီး သမိုင်းပေးတာဝန်တစ်ခုပေါက်မြောက်ဖို့လိုအပ်လာတဲ့အတွက်  ကိုယ်ပိုင်ကာကွယ်ရေးကို တိုးမြှင့်လုပ်ဆောင်ခဲ့ရတယ်လို့ ကင်မ်ကပြောပါတယ်။

“ ကျွန်တော်တို့တပ်တွေဟာ ဘယ်လိုအကျပ်အတည်းမဆို တုန့်ပြန်ဖို့ ပြင်ဆင်ထားရှိပြီးဖြစ်တယ်။  ကျွန်တော်တို့နိုင်ငံရဲ့ နျူကလီးယားအဟန့်အတားအစီအမံတွေဟာ ယင်းရဲ့မစ်ရှင်ကိုအတိအကျချက်ခြင်းလုပ်ဆောင်နိုင်အောင်  စစ်ပြင်ဆင်ဖို့ အပြည့်အဝအဆင်သင့်ဖြစ်နေပြီ” လို့ သူကပြောပါတယ်။

ပထမဆုံးနျူကလီးယားစမ်းသပ်မှုပြုလုပ်ဖို့ ဆိုးလ်နှင့် ဝါရှင်တန်တို့ဟာ ပြင်ဆင်မှုတွေကို ၂၀၁၇ခုနှစ်ကတည်းက ပြီးစီးနေပြီး ဖြစ်တယ်လို့  တောင်ကိုးရီးယားနှင့် အမေရိကန်အရာရှိတွေက ပြောဆိုပြီးနောက် မြောက်ကိုးရီးယာခေါင်းဆောင်ကင်မ်က ယခုလိုပြောကြားလာတာဖြစ်ပါတယ်။

နျူကလီးယာစမ်းသပ်မှုကို စစ်ရပ်စဲရေးနှစ်ပတ်လည်နေ့ ဝန်းကျင်မှာပြုလုပ်နိုင်တယ်လို့ တောင်ကိုးရီးယား ပြန်လည်ပေါင်းစည်းရေးဝန်ကြီးက အင်္ဂါနေ့တုန်းကပြောထားပါတယ်။ ဒါပေမယ့် စစ်အရာရှိကြီးတွေကတော့ လတ်တလောမှာ အဲဒီအရိပ်လက္ခဏာမတွေ့ရသေးဘူးလို့ဆိုပါတယ်။

တကယ်လို့ မြောက်ကိုးရီးယားက နျူကလီးယားစမ်းသပ်မှုလုပ်လာရင် ဆိုက်ဘာတိုက်ခိုက်မှုအစီအမံတွေအပါအဝင် အခြားသော ပြင်းထန်တဲ့ ပိတ်ဆို့အရေးယူမှုတွေ နှင့်ရင်ဆိုင်ရဖွယ်ရှိတယ်လို့ တောင်ကိုရီးယား ဝန်ကြီးက ပြောထားပါတယ်။

အမေရိကန်နိုင်ငံဟာ စစ်ရေးလှုပ်ရှားမှုတွေအပေါ် စံနှုန်းနှစ်ခုထားနေတယ်လို့ မြောက်ကိုးရီးယားက နှစ်ရှည်လများ ဝေဖန်နေခဲ့ပါတယ်။

“ ကျွန်တော်တို့တပ်တွေရဲ့ ပုံမှန်ဆောင်ရွက်မှုတွေကို ရန်လိုတာ ခြိမ်းခြောက်တာအဖြစ် အမေရိကန်က အထင်အမြင်မှား‌ေ အာင်လုပ်နေပြီး အဲဒီအချိန်မှာပဲ ကျွန်တော်တို့ရဲ့လုံခြုံရေးကို အကီဲးအကျယ်ခြိမ်းခြောက်တဲ့ ကြီးမားတဲ့ စစ်ရေးလေ့ကျင့်မှုတွေကို သူကလုပ်ပြနေတယ်။ ဒါဟာ တကယ့်ကို ဓားပြတိုက်မှုတစ်ခုပဲ” လို့ ကင်မ်က ပြောပါတယ်။

Source: Reuters

#North_Korea

#Nuclear_war_deterrent_ready

#North_South_Korea_US

#Ukraine_Crisis
Published 28 July 2022

ရုရှားတပ်ဖွဲ့များက ယူကရိန်းရဲ့ဒုတိယအကြီးဆုံး ဓာတ်အားပေးစက်ရုံကို သိမ်းပိုက်လိုက်ပြီး တောင်ပိုင်းဒေသ ၃ နေရာမှာ တပ်အများအပြားပြန်လည်နေရာချထားကြောင်း၊ ယူကရိန်းကလည်း တန်ပြန်တိုက်ခိုက်နိုင်ဖိုမျှော်မှန်းထားကြောင်း ယူကရိန်းသမ္မတအကြံပေးပုဂ္ဂိုလ်က ပြောကြားခဲ့ပါတယ်။

ရုရှားကျောထောက်နောက်ခံပြုတပ်ဖွဲ့တွေက ဆိုဗီယက်ခေတ်ကဆောက်လုပ်တဲ့ ကျောက်မီးသွေးသုံး'ဗူဟဲလ်ဟစ်ခ်'ဓာတ်အားပေးစက်ရုံကို အကောင်းပကတိအတိုင်း သိမ်းပိုက်နိုင်ခဲ့ပြီး ဒါဟာသုံးပတ်ကျော်ကာလအတွင်း ရုရှားတို့အတွက် ကြီးမားတဲ့အောင်မြင်မှုဖြစ်ခဲ့ကြောင်း ဗုဒ္ဓဟူးနေ့က ကြေညာလိုက်ပါတယ်။

ယူကရိန်းသမ္မတ အကြံပေးပုဂ္ဂိုလ်'အိုလက်ဆီအာရက်စ်တိုဗစ်ချ်'က ယူကရိန်းအရှေ့ပိုင်း ဒိုနက်စ်ဒေသရှိ ဓာတ်အားပေးစက်ရုံ သိမ်းပိုက်ခံလိုက်ရကြောင်း အတည်ပြုခဲ့ပြီး ဒါဟာရုရှားတို့ အနည်းငယ်အသာစီးရရုံမျှသာဖြစ်ကြောင်း မှတ်ချက်ပြုလိုက်ပါတယ်။

ဒါ့အပြင် ရုရှားတို့ဟာ ခုခံစစ်ဗျူဟာကနေ ထိုးစစ်အဖြစ်ပြောင်းလဲလာပုံရပြီး ယူကရိန်းတောင်ပိုင်းရှိ မယ်လီတိုပိုလ်၊ ဇာပိုရစ်ဇ်ဇီယာ၊ ခါဆန်ဒေသတို့မှာ ရုရှားတပ်ဖွဲ့များပြန်လည်နေရာချထားကြောင်း ဖြည့်စွက်ပြောကြားခဲ့ပါတယ်။

စစ်ပွဲအစောပိုင်းကာလအတွင်း ရုရှားတို့ထံပေးလိုက်ရတဲ့ တောင်ပိုင်းမြို့ခါဆန်ကို ယူကရိန်းတို့က ပြန်လည်သိမ်းပိုက်သွားဖို့ အသိပေးပြောကြားထားပါတယ်။

ရုရှားက ခါဆန်ဘက်ကိုဦးတည်ပြီး တပ်ဖွဲ့အင်အားအများဆုံးဖြစ်အောင် အာရုံစိုက်လုပ်ဆောင်နေပေမယ့် အတိအကျတော့မသိရသေးကြောင်း ယူကရိန်းနိုင်ငံတော်လုံခြုံရေးနဲ့ ကာကွယ်ရေးကောင်စီဝန်ကြီး'အိုလက်ဆီဒန်နီလော့ဗ်'က တွစ်တာမှာ ဖော်ပြခဲ့ပါတယ်။

တောင်ပိုင်းမှာရှိတဲ့ ယူကရိန်းတပ်တွေက ပြီးခဲ့တဲ့ ၂၄ နာရီအတွင်း ရန်သူရုရှားတပ်ဖွဲ့ဝင် ၆၆ ဦးကိုရှင်းလင်းနိုင်ခဲ့ပြီး တင့်ကား ၃ စီးနဲ့ လက်နက်တိုက် ၂ ခုတို့ကို ဖျက်ဆီးနိုင်ခဲ့ကြောင်း သတင်းထုတ်ပြန်ထားပါတယ်။

ရုရှားတပ်တွေကတော့ မိုင်ကိုလိတ်ဗ်မြို့ကို ဒုံးကျည်လောင်ချာများဖြင့်တိုက်ခိုက်ခဲ့ပါတယ်။

ခါဆန်မြို့ ဒနီပရိုမြစ်ကိုဖြတ်သန်းတည်ဆောက်ထားတဲ့ တံတားကြီးကိုလည်း ယူကရိန်းတို့တိုက်ခိုက်ခဲ့ကာ သွားလာရေးခက်ခဲအောင်ပြုလုပ်ခဲ့ကြပါတယ်။

ရုရှားတပ်များမြစ်ကို ဖြတ်ကူးဖို့အတွက် ဆိပ်ခံတံတားများနဲ့ ကူးတို့ယာဉ်များကို အသုံးပြုနိုင်ကြောင်း ရုရှားအရာရှိများက အစောပိုင်းကပြောကြားခဲ့ပါတယ်။

ဒနီပရိုမြစ်ကိုဖြတ်ပြီး အခြားဒေသတွေကိုသွားလာနိုင်မယ့် အန်တိုနစ်စကီတံတားကို ပြန်လည်ဆောက်လုပ်သွားဖို့ သမ္မတ'ဇယ်လန်စကီ'က အသိပေးထားပါတယ်။

"ကျွန်တော်တို့ တိုင်းပြည်အတွင်း ကျူးကျော်လာတဲ့ တပ်တွေအနေနဲ့ ဘာအခွင့်အရေးမှ မရအောင် သေချာပြင်ဆင်ထားဖို့ လိုပါတယ်" လို့ ပြောကြားခဲ့ပါတယ်။

Source: Reuters
#Yangon_Media_Group

#World_Technology
Published 28 July 2022

အိုဟိုင်ယိုပြည်နယ်တက္ကသိုလ်မှ သုတေသီများက စမတ်ဆွဲကြိုးအသစ်တစ်မျိုးကို တီထွင်ထုတ်လုပ်လိုက်ကြပြီး ထိုဆွဲကြိုးဝတ်ဆင်ထားသူရဲ့ချွေးထဲမှာပါလာတဲ့ ဓာတုဓာတ်ပစ္စည်းတွေနဲ့ ပါဝင်မှုပမာဏတို့ကို တိုင်းတာပေးနိုင်မှာ ဖြစ်ပါတယ်။

ကမ္ဘာပေါ်က ဆီးချိုရောဂါသည်သန်း ၄၀၀ အနေနဲ့ ဆီးချိုစစ်ဖို့ လက်ထိပ်သွေးဖောက်နေစရာ မလိုအပ်တော့ပါဘူး။

ထိုဆွဲကြိုးမှာ ညှပ်ချိတ်နဲ့ ဆွဲသီးပါဝင်ပြီး လည်ပင်းမှာပတ်ထားတဲ့အခါ အနောက်ဘက်က ဇီဝအာရုံခံပစ္စည်းကနေ ဂလူးကိုစ်နဲ့ ဆီရိုတိုနင်ပမာဏတို့ကို တိုင်းတာပေးမှာ ဖြစ်ပါတယ်။

လူသားနဲ့စမ်းသပ်ရာမှာ စမတ်ဆွဲကြိုးဟာ ဝတ်ဆင်သူရဲ့ချွေးထဲက ဆိုဒီယမ်၊ ပိုတက်ဆီယမ်၊ ဟိုက်ဒရိုဂျင်ဓာတ်များကို ၉၈.၉ ရာခိုင်နှုန်းအထိ တိကျစွာ တိုင်းတာပေးနိုင်ကြောင်း တွေ့ရှိခဲ့ကြပါတယ်။

သုတေသီအဖွဲ့က ဇီဝအာရုံခံပစ္စည်းလေးကို နားကပ်၊ လက်စွပ်ထဲမှာအပြင် အရေပြားအောက်မှာပါ ထည့်သွင်းနိုင်ဖို့ ကြိုးပမ်းနေကြပါတယ်။

ချွေးထဲမှာ လူတွေရဲ့ကျန်းမာရေးအခြေအနေ အတိအကျကို ဖော်ပြပေးနိုင်တဲ့ biomarker ရာနဲ့ ချီပါဝင်တယ်လို့ စာတမ်းပြုစုသူ'ကျင်ဟွာလီ'က ရှင်းပြလိုက်ပါတယ်။

ခေတ်မီဇီဝအာရုံခံစနစ်တွေက ခန္ဓာကိုယ်ထဲဝင်ရောက်စရာမလိုဘဲ ဇီဝပြောင်းလဲဖြစ်စဉ်များကို သိရှိနိုင်ပြီး လူတစ်ယောက်ရဲ့ခန္ဓာကိုယ်ကထွက်တဲ့ အရည်ထဲက အချက်အလက်ဖြစ်စဉ်တွေကို တွေ့ရှိနိုင်မှာဖြစ်တယ်လို့ ဖော်ပြထားပါတယ်။

အာရုံခံပစ္စည်းက သေးငယ်ပေမယ့် အဖြေသိရှိဖို့အတွက်တော့ ချွေးအနည်းငယ်မျှသာ လိုအပ်ပါတယ်။

စမ်းသပ်မှုပြုလုပ်ရာမှာ စမ်းသပ်ခံသူကို လေ့ကျင့်ခန်းပြုလုပ်ခိုင်းပြီး ၁၅ မိနစ်အနားပေးတဲ့အချိန်မှာ အချိုရည်သောက်သုံးခိုင်းခဲ့ကာ ဆက်လက်လှုပ်ရှားစေပါတယ်။

အဲဒီနောက် အချိုဓာတ်သွင်းပြီး မိနစ် ၃၀ နဲ့ ၄၀ အတွင်း ချွေးထဲကဂလူးကိုစ်ဓာတ်က အမြင့်ဆုံးပမာဏကို ရောက်ရှိခဲ့ပါတယ်။

အာရုံခံပစ္စည်းကို ပြုလုပ်ရာမှာ အလွန်ပါးလွှာတဲ့ ပစ္စည်းများဖြင့်ထုတ်လုပ်ထားပြီး အခြေအနေအမျိုးမျိုးမှာ ထားနိုင်တဲ့အပြင် လူ့အရေပြားနဲ့ ထိတွေ့တဲ့အခါ စက်ပစ္စည်းရဲ့လုပ်ဆောင်ချက်များ မထိခိုက်အောင် ကာကွယ်ပေးထားပါတယ်။

ပစ္စည်းထုတ်လုပ်ရာမှာ ဒီထက်ပိုသေးအောင် ပြုလုပ်ပြီး အရေပြားအောက်ထည့်သွင်းနိုင်သည်အထိ ပြုလုပ်ဖို့စီစဉ်နေကြပါတယ်။

နေ့စဉ်လှုပ်ရှားရာမှာ အလွယ်တကူအံဝင်စေမယ့် ဆားကစ်တွေထဲထည့်သွင်းတီထွင်နိုင်ဖို့ မျှော်မှန်းထားကြောင်း 'လီ'က ဖော်ပြခဲ့ပါတယ်။

Source: DailyMail
#Yangon_Media_Group

#World_Health
Published 28 July 2022

ဗိုက်တာမင်ဒီ ဖြည့်စွက်စားသုံးခြင်းက ကျန်းမာတဲ့လူတွေအတွက်လိုအပ်သလို ကိုဗစ်-၁၉ ရောဂါလူနာတွေမှာလည်း ရောဂါခုခံအားကို ကောင်းမွန်စေကြောင်း အစ္စရေးလ်နဲ့ရုရှားသုတေသီများက တွေ့ရှိဖော်ထုတ်ခဲ့ကြပါတယ်။

ဗိုက်တာမင်ဒီဆိုတာက ကယ်လ်စီယမ်နဲ့ ဖော့စ်ဖရပ်စ်တို့ကို စုပ်ယူစေကာ သွားနဲ့အရိုးတွေကိုသန်မာစေတဲ့အပြင် ကြွက်သား၊ အာရုံကြော၊ ရောဂါခုခံအားအတွက်ပါ ကောင်းကျိုးဖြစ်စေပါတယ်။

ဗိုက်တာမင်ဒီကို နေရောင်ခြည်မှတဆင့် အရေပြားကနေရရှိပေမယ့် အသက်အရွယ်ကြီးလာတာနဲ့အမျှ စုပ်ယူနိုင်စွမ်းလျော့နည်းလာပါတယ်။

နေ့စဉ်လိုအပ်တဲ့ ဗိုက်တာမင်ဒီကို နေရောင်ခြည်ထိတွေ့ခြင်းနဲ့ အစားအစာတို့ကနေပဲ လုံလောက်စွာရရှိဖို့ရာ ခက်ခဲတာကြောင့် ဖြည့်စွက်စားသုံးပေးဖို့ လိုအပ်လာပါတယ်။

ဗိုက်တာမင်ဒီက အခြားဗိုက်တာမင် အေ၊ အီး၊ ကေတို့လို အဆီမှာပျော်ဝင်တာကြောင့် ခန္ဓာကိုယ်ထဲမှာ တာရှည်ထိန်းသိမ်းနိုင်ပါတယ်။

ဗိုက်တာမင်ဒီကို ကြက်ဥအနှစ်၊ ဆော်လ်မွန်ငါး၊ ငါးသေတ္တာငါး၊ စည်သွတ်တူနာ၊ အမဲသားအသည်း၊ နို့၊ ကွေကာ၊ ဒိန်ချဉ်၊ လိမ္မော်ရည်တို့ကနေ ရရှိနိုင်ပါတယ်။

ဗိုက်တာမင်ဒီက ကင်ဆာရောဂါအချို့ကို ကာကွယ်နိုင်တယ်လို့သိရှိထားတဲ့အပြင် စိတ်ခွန်အားဖြစ်စေခြင်း၊ ကိုယ်အလေးချိန်လျော့ကျစေခြင်း၊ သွေးပေါင်ချိန်လျော့ကျစေခြင်း၊ ဆီးချို၊ နှလုံးရောဂါ၊ လေးဘက်နာရောဂါများ ဖြစ်နိုင်ချေတို့ကို လျှော့ချပေးနိုင်ပါတယ်။

ဗိုက်တာမင်ဒီ လွန်ကဲစွာစားသုံးမိရင်တော့ အားနည်းခြင်း၊ ခံတွင်းခြောက်ခြင်း၊ မူးဝေခြင်း၊ အော့အန်ခြင်းတို့ဖြစ်တတ်ပါတယ်။

ရှီဘာဆေးဘက်ဆိုင်ရာ စင်တာမှ ပရော်ဖက်ဆာ'ယဟူဒါရွှန်ဖဲလ်'နဲ့ မော်စကိုတက္ကသိုလ်မှ ပရော်ဖက်ဆာ'ဗာနီယာဘော်ဘာ'တို့က ဗိုက်တာမင်ဒီနဲ့ ကိုဗစ်ရောဂါလူနာတို့အကြားဆက်စပ်မှုကို အစ္စရေးလ်ဆေးဘက်ဆိုင်ရာ အဖွဲ့အစည်းဂျာနယ်(IMA)မှာ ဖော်ပြခဲ့ကြပါတယ်။

"ဗိုက်တာမင်ဒီ ပမာဏအတိုင်းအတာက ကိုဗစ်ရောဂါပြင်းထန်မှု၊ အသက်သေဆုံးမှုနှုန်း၊ ခန္ဓာကိုယ်ခုခံအားတုံ့ပြန်နိုင်မှု၊ ကာကွယ်ဆေးထိုးပြီးနောက်ပိုင်း ပဋိပစ္စည်းထွက်ရှိမှုတို့အပေါ် ပြောင်းပြန်အချိုးကျနေပါတယ်" လို့ ဖော်ပြထားပါတယ်။

နာမည်ကြီး သုံးသပ်လေ့လာချက်များအရ ဗိုက်တာမင်ဒီနည်းတဲ့ ကိုဗစ်လူနာတွေဟာ ကိုဗစ်ရောဂါကူးစက်နိုင်ချေပိုများပြီး အသက်သေဆုံးနိုင်ချေပိုများတယ်လို့ ထုတ်ဖော်ထားပါတယ်။

ဗိုက်တာမင်ဒီ အလွန်အမင်းချို့တဲ့တဲ့ ကိုဗစ်လူနာတွေမှာ သေဆုံးနိုင်ချေ ၅၀ ရာခိုင်နှုန်းပိုများပြီး ဗိုက်တာမင်ဒီကောင်းစွာရရှိတဲ့ သူတွေမှာတော့ သေဆုံးနိုင်ချေ ၅ ရာခိုင်နှုန်းသာရှိပါတယ်။

"တွေ့ရှိထားတဲ့ အထောက်အထားများအရ ဗိုက်တာမင်ဒီဖြည့်စွက်စားသုံးခြင်းဖြင့် ကိုဗစ်ရောဂါကိုတိုက်ဖျက်နိုင်ပြီး ရောဂါပြင်းထန်ခြင်းနဲ့ အသက်ဆုံးပါးနိုင်ချေတို့ကို လျှော့ချပေးနိုင်ပါတယ်"လို့ ရေးသားဖော်ပြခဲ့ပါတယ်။

Source: The Jerusalem Post
#Yangon_Media_Group

Published:28 July 2022

ရီပတ်ဘလီကင်နှင့်ဒီမိုကရက်ပါတီ အရာရှိဟောင်းတွေက အမေရိကန်နိုင်ငံရဲ့ နိုင်ငံအဆင့် တတိယမြောက် နိုင်ငံရေးပါတီ တစ်ခုကို ဗုဒ္ဓဟူးနေ့က တည်ထောင်လိုက်ကြကြောင်း ကြေညာလိုက်ပါတယ်။ အမေရိကန်နိင်ငံမှာ လုပ်ဆောင်မှု  ချိုယွင်းနေတဲ့ နှစ်ပါတီစနစ်လို့ သူတို့ကမြင်ထားကြတဲ့ လက်ရှိနိုင်ငံရေးစနစ်အပေါ် တုန်လှုပ် ချောက်ခြားနေကြတဲ့ သန်းပေါင်းများစွာသော မဲဆန္ဒရှင်တွေရဲ့ စိတ်ကို ဆွဲဆောင်နိုင်စေဖို့ဖြစ်ပါတယ်လို့ဆိုပါတယ်။

ပါတီအသစ်ကို  Forward ဖော်ဝတ်ဒ်(ရှေ့သို့)လို့ အမည်ပေးလိုက်ပြီး  ဒီမိုကရက်ပါတီသမ္မတလောင်းဟောင်း အင်ဒရူးယန်းနှင့် ရီပတ်ဘလီကင်ပါတီ နယူးဂျာစီအုပ်ချုပ်ရေးမှူးဟောင်း ခရစ်စတင်း တော့ဒ်ဝှိုက်မင်းတို့က ပူးတွဲ ဥက္ကဋ္ဌအဖြစ် ဦးဆောင်ကြမှာ ဖြစ်ပါတယ်။ သူတို့ရဲ့ပါတီအသစ်ဟာ အမေရိကန်နိုင်ငံရေးမှာ မင်းမူကြီးစိုးနေကြတဲ့ ရီပတ်ဘလီကင်နှင့် ဒီမိုကရက်တစ်ပါတီတွေအစား အခြား ကျေနပ်စရာရွေးချယ်မှုတစ်ခုဖြစ်လာလိမ့်မယ်လို့ ယုံကြည်ထားတယ်လို့ တည်ထောင်သူတွေက ရိုက်တာသတင်းဌာနကို ပြောပါတယ်။

ပါတီခေါင်းဆောင်တွေဟာ ဒီနှစ်ဆောင်းဦးရာသီမှာ မြို့ပေါင်း နှစ်ဒါဇင်ကို သွားရောက်ပြီး ပါတီဖွင့်လှစ်တဲ့ အခမ်းအနားတွေ ဆက်တိုက်ပြုလုပ်သွားပြီး ထောက်ခံသူတွေကို ဆွဲဆောင်သွားမယ်လို့ သိရပါတယ်။ စက်တင်ဘာ ၂၄ရက်နေ့မှာ သူတို့ဟာ ဟောက်စတန်မှာ ပါတီကို တရားဝင်တည်ထောင်ခြင်းအခမ်းအနားပြုလုပ်သွားမှာဖြစ်ပြီး  လာမယ့်နွေရာသီမှာတော့ အမေရိကန်ရဲ့ မြို့ကြီးတစ်မြို့မှာ ပါတီရဲ့ အမျိုးသား ကွန်ဗင်းရှင်းကြီးကို ကျင်းပသွားပါလိမ့်မယ်။

အမေရိကန်နိုင်ငံရေးစနစ်မှာ နှစ်ခြမ်းကွဲပြီး ဝိရောဓိဖြစ်မှုတွေ တိုးပွားလာနေတဲ့အပေါ် တုန့်ပြန်မှုတွေ ပြီးခဲ့တဲ့ နှစ်တွေမှာ ပေါ်ပေါက်လာခဲ့တဲ့ နိုင်ငံရေးအုပ်စု(၃)စုနှင့် ပါတီအသစ်ကို ဖွဲ့စည်းတည်ထောင်ထားတာဖြစ်ပါတယ်။ ပြီးခဲ့တဲ့နှစ်က Gallup စစ်တမ်းအရ အမေရိကန်နိုင်ငံမှာ တတိယနိုင်ငံရေးပါတီတစ်ခု လိုအပ်တယ်လို့ အမေရိကန်ပြည်သူတွေရဲ့ သုံးပုံနှစ်ပုံက ယုံကြည်နေတယ်လို့ ပြဆိုခဲ့ပါတယ်။

အမေရိကန် သမ္မတဟောင်းတွေဖြစ်တဲ့ ရော်နယ်ရီဂင်၊ဂျော့အိတ်ချ်ဒဗလျူဘုရှ်၊ ဂျော့ ဒဗလျူဘုရှ်နှင့်ဒေါ်နယ်ထရမ့်တို့ အစိုးရ လက်ထက်က အရာရှိဟောင်းတွေစုစည်းထားပြီး ၂၀၂၁ မှာ ဖွဲ့စည်းခဲ့တဲ့ Renew America Movement အမေရိကန်ပြန်လည် ဆန်းသစ်ခြင်းလှုပ်ရှားမှု ၊ ၂၀၂၁ခုနှစ်မှာ ဒီမိုကရက်တစ်ပါတီကထွက်ခဲ့ပြီး တစ်သီးပုဂ္ဂလကဖြစ်ခဲ့တဲ့ အင်ဒရူး ယန်းတည်ထောင်တဲ့ ဖော်ဝတ်ဒ်ပါတီနှင့် ဒီမိုကရက်၊ရီပတ်ဘလီကင်နှင့် တသီးပုဂ္ဂလတွေပူးပေါင်းထားပြီး ရီပတ်ဘလီကင်ကွန်ဂရက်အမတ်ဟောင်း ဒေးဗစ်ဂျိုလီအမှုဆောင်ဒါရိုက်တာလုပ်တဲ့ Serve America Movement တို့က ယခုပါတီသစ်ပေါင်းစပ်ဖွဲ့စည်းမှုနှင့် ဆက်နွယ်ပတ်သက်နေပါတယ်။

ပါတီအသစ်ကို  ထောက်တိုင်နှစ်ခုနှင့်ဖွဲ့စည်းထားပြီး အဲဒီနှစ်ခုက မျှတပြီးကြီးပွားတိုးတက်တဲ့စီးပွားရေးတစ်ရပ်ကို ပြန်လည် သန်စွမ်းစေရန်နှင့် အမေရိကန်ပြည်သူတွေကို ရွေးကောက်ပွဲမှာ ရွေးချယ်မှုပိုမိုပေးပြီး အလုပ်ဖြစ်သော အစိုးရတစ်ရပ်တွင် ပိုမိုယုံကြည်မှုရှိကာ အနာဂတ်တွင်ပိုမိုပြောဆိုနိုင်ရန် တို့ဖြစ်ပါတယ်။

မျှတတဲ့ နိုင်ငံရေးအမြင် centrist ရှိတဲ့ပါတီအဖြစ် တည်ထောင်လိုက်တဲ့ ယခုပါတီအသစ်မှာ တိကျတဲ့မူဝါဒတွေကိုတော့ မထုတ်ပြန်သေးပါဘူး။ “ အမေရိကန်ရင်ဆိုင်နေရတဲ့ ပြဿနာကြီးတွေကို ဘယ်လိုဖြေရှင်းကြမလဲ၊ ဘယ်ဘက်မဟုတ်၊ညာဘက်မဟုတ်၊ ရှေ့သို့နှင့် သာဖြစ်တယ်” လို့ သူတို့ကပြောကြပါတယ်။

သမိုင်းအရ နှစ်ပါတီစနစ် အမေရိကန်ပြည်ထောင်စုမှာ တတိယပါတီတစ်ခုဟာ ရှင်သန်လေ့မရှိကြပါဘူး။ သူတို့ဟာ သမ္မတ ရွေးကောက်ပွဲကိုတော့ ထိခိုက်မှုဖြစ်စတေတ်ပါတယ်။၂၀၀၀ပြည့်နှစ်ရွေးကောက်ပွဲမှာ  ရပ်ဗ်နေဒါရဲ့ ဂရင်းပါတီက ဒီမိုကရက်တစ်သမ္မတလောင်း အယ်ဂိုးရဲ့ မဲတွေကို ခွဲထုတ်ယူပြီး  ရီပတ်ဘလီကင် သမ္မတလောင်း ဂျော့ဒဗလျူဘုရှ် အနိုင်ရသွားစေခဲ့တာမျိုးရှိခဲ့တယ်လို့ သုံးသပ်သူတွေကပြောပါတယ်။

ပါတီအသစ်ဖြစ်တဲ့ ဖော်ဝတ်ဒ်ပါတီဟာ ဘက်တွေကွဲပြားနေကြတဲ့ အမေရိကန်နိုင်ငံမှာ ရွေးကောက်ပွဲအပေါ် ဘယ်လို အကျိုးသက်ရောက်မှုရှိမလဲဆိုတာ သိပ်ရှင်းရှင်းလင်းလင်းမသိနိုင်သေးပေမယ့် အောင်မြင်မှုရဖို့အတွက်တော့ နိုင်ငံရေးသုံးသပ်သူတွေက သံသယရှိနေကြပါတယ်။

အင်တာဗျူတစ်ခုမှာ ပါတီဟာ ဘတ်ဂျက် ဒေါ်လာာ ငါးသန်းနှင့် စတင်မယ်လို့ ယန်းက ပြောထားပါတယ်။  အလှုရှင်တွေ တန်းစီနေပြီး အုပ်စုသုံးစုရဲ့ အောက်ခြေအဖွဲ့ဝင်တွေပေါင်းရင် ထောင်သောင်းမက ရှိနေတယ်လို့လည်း သူကပြောပါတယ်။

“ ကျွန်တော်တို့ ငွေကြေးဘဏ္ဍာတောင့်တင်းစွာနှင့်စတင်မှာပါ။ ငွေကြေးအထောက်အပံ့က ပြဿနာမရှိဘူး” လို့ ယန်းက ပြောပါတယ်။

“ စိတ်ကူးကတော့ မဲဆန္ဒရှင်တွေကို သန်စွမ်းပြီး ယုံကြည်စိတ်ချရတဲ့ နိုင်ငံအဆင့် တတိယမြောက်ပါတီတစ်ခု ပေးအပ်ဖို့ပဲ ဖြစ်တယ်” လို့ ဖော်ဝတ်ဒ်ဖန်တီးရာမှာပါဝင်ခဲ့တဲ့ ထရမ့်အစိုးရလက်ထက်က အမိမြေလုံခြုံရေးအရာရှိဟောင်းတစ်ဦးဖြစ်တဲ့ မိုင်းလ်စ်တေလာ ကပြောပါတယ်။

တတိယပါတီတွေဟာ အတိတ်တုန်းက ကျရှုံးခဲ့တာတွေရှိခဲ့ပေမယ့် အခြေခံတွေက ပြောင်းလဲသွားပြီလို့ တေလာကပြောပါတယ်။ အတိတ်တုန်းက တတိယပါတီလှုပ်ရှားမှုတွေဟာ ပြည်သူတွေ အပြောင်းအလဲမတောင်းဆိုတဲ့ စနစ်တစ်ခုအတွင်းပေါ်ပေါက်ခဲ့တာဖြစ်ပြီး ယခုအချိန်မှာတော့ အမေရိကန်တွေက တတိယပါတီလိုချင်တယ်လို့ ပြောနေကြတာဖြစ်တယ်လို့လည်း သူကပြောပါတယ်။

ပါတီစွဲမရှိတဲ့ ဝါရင့် နိုင်ငံရေးသုံးသပ်သူ စတု ရိုသန်ဘတ်ကတော့ တတိယပါတီတည်ထောင်တယ်ဆိုတာာ အပြောလွယ်သလောက် လက်တွေ့ခက်တယ်လို့ ဝေဖန်ပါတယ်။

ပါတီကြီးနှစ်ခုမှာ ကြီးမားတဲ့ အားသာချက်တွေရှိနေကြတယ်။ ဆယ်စုနှစ်များစွာမှာ ပြည်နယ်၅၀မှာပါတီတွေ တည်ဆောက်နိုင်ခဲ့တာတွေအပါအဝင်ပေါ့ လို့ သူကပြောပါတယ်။

၁၉၈၀တုန်းက ဂျွန်အင်ဒါဆန်၊ ၁၉၉၂ နှင့် ၁၉၉၆ တုန်းက ရောပစ်ပါရော့တို့လို တတိယပါတီရဲ့ သမ္မတလောင်းတွေဟာ မှေးမှိန်သွားရတာပဲ၊ အမျိုးသားနိုင်ငံရေးမှာ အဆင့်ပြကိန်းတစ်ခုဖြစ်လာမယ့် တတိယပါတီတွေတည်ထောင်တာ ကျရှုံး ခဲ့ကြတယ် လို့ သူကပြောပါတယ်။

Source_Reuters

#Third_Political_party-in_America

#Forward_party

#Andrew_Yang

Published 27 July 2022

ဖိလစ်ပိုင်နိုင်ငံ မြောက်ပိုင်း မနီလာမြို့တော်နှင့် ၁၈၅ မိုင်ကွာမှာ ဗုဒ္ဓဟူးနေ့ မနက်က ပြင်းအား ၇အဆင့်ရှိတဲ့ ငလျင်ကြီးလှုပ်ရှားခဲ့ရာ အနည်းဆုံးလူလေးဦး သေဆုံးပြီး အဆောက်အအုံတွေပြိုလဲပျက်စီးကာ အထပ်မြင့်အဆောက်အဦတွေ လှုပ်ခါခဲ့ရပါတယ်။

ဇူလိုင် ၂၇ရက် မနက် ၈နာရီ ၄၃ မိနစ်မှာ လူဦးရေသိပ်မထူထပ်တဲ့ အာဘရာပြည်နယ်က ပင်မကျွန်းတစ်ခုဖြစ်တဲ့ လူဇွန်ကျွန်း မှာ ငလျင်က လှုပ်ရှားခဲ့တာပါ။

မြေကြီးအနက် ခပ်တိမ်တိမ်မှာ လှုပ်ရှားခဲ့တာမို့ အပျက်အစီးတွေရှိပါတယ်။ တောင်ထူထပ်တဲ့ အဲဒီနေရာတစ်ဝိုက်မှာ ရာဂဏန်းမျှရှိတဲ့လူတွေ ထိခိုက်ဒဏ်ရာရှိခဲ့ကြပါတယ်။မြေပြိုမှုတွေကလည်း ဒါဇင်ချီရှိခဲ့ပါတယ်။ အဆောက်အအုံတွေပျက်စီးခဲ့ပြီး လျှပ်စစ်မီးတွေပြတ်တောက်ခဲ့ရပါတယ်။

ယူနက်စကို ကမ္ဘာ့အမွေအနှစ်ဒေသဖြစ်တဲ့ ဗီဂန်မြို့က ရာစုနှစ်သက်တမ်းရှိတဲ့ ရှေးဟောင်း အဆောက်အအုံတစ်ခုဟာ ငလျင်ကြောင့် ထိခိုက်ပျက်စီးမှုတွေရှိခဲ့ပါတယ်။ အဲဒီအဆောက်အဦဟာ စပိန်ကိုလိုနီခေတ် အဆောက်အဦတစ်ခုဖြစ် ပါတယ်။

အာဘရာပြည်နယ်က ဒိုလိုရက်စ်မြူနီစပါယ်ဒေသမှာ အိမ်တွေလှုပ်ခါပြီး နံရံတွေကွဲအက်လာလို့ လူတွေဟာ အပြင်ကို ပြေးလွှားထွက်လာကြရတယ်လို့ ရဲအရာရှိ အက်ဒွင် ဆာဂျီယိုက အေအက်ဖ်ပီကို ပြောပါတယ်။

ငလျင်ဟာသိပ်ပြင်းထန်တယ်လို့လည်း သူကပြောပါတယ်။ အရပ်ဈေးတစ်ခုက ပြတင်တွေကွဲထွက်ကုန်တယ်လို့လည်း သူက ဖြည့်စွက်ပြောပါတယ်။

ဈေးထဲက ဈေးဆိုင်ခင်းထာတဲ့ စားပွဲတွေအားလုံးလဲကျပြီး ဟင်းသီးဟင်းရွက်တွေ သစ်သီးဝလံတွေ ပြန့်ကျဲကုန်တယ်လို့လည်း သူကပြောပါတယ်။

အာဘရာပြည်နယ်ရဲ့ မြို့တော် ဘန်ယူမှာ နံရံပြိုလဲကျလို့ အသက် ၂၃နှစ်အရွယ် အမျိုးသမီးတစ်ဦးသေဆုံးခဲ့ရပါတယ်။ အဲဒီဒေသမှာ အနည်းဆုံး လူ၆၂ ဦး ထိခိုက်ဒဏ်ရာရခဲ့ကြပါတယ်။

ကာလင်ဂါပြည်နယ်က တောင်တွေပေါ်တည်ဆောက်ထားတဲ့ အဆောက်အအုံတစ်ခုကနေ ပြုတ်ကျသေဆုံးရတာဖြစ်ပါတယ်။

မြောက်ပိုင်းဟာ သူ့မိသားစုရဲ့ အမာခံဒေသဖြစ်တဲ့ သမ္မတ မားကို့စ်ဂျူနီယာက ပြတ်တောက်မှုတွေကို ရှောင်ရှားချင်တဲ့ အတွက် အဲဒီနေရာကို သူချက်ခြင်းသွားရောက်ဦးမှာမဟုတ်ဘူးလို့ပြောပါတယ်။

သူတို့အိမ်တွေကို ပျက်စီးမှု စစ်ဆေးမပြီးမချင်း အရေးပေါ် စခန်းတွေမှာပဲ နေကြဖို့ သူက ပြည်သူတွေကို ပြောထားပါတယ်။

Source_ AFP

#Philippine_earthquakes

#Abra_earthquakes

#World_earthquakes