#World_Politics
Published 3 August 2022

အမေရိကန်အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့သွားရောက်လည်ပတ်မှုအပေါ် တရုတ်တို့က မကျေနပ်ကြောင်းဆက်တိုက် ထုတ်ဖော်ကြေညာလျက်ရှိရာ ယခုလည်း ဒီလုပ်ရပ်ဟာ အန္တရာယ်များပြီး မိုက်မဲတဲ့ လုပ်ရပ်ဖြစ်ကြောင်း ဩဂုတ် ၃ ရက်နေ့မှာပြောကြားခဲ့ပါတယ်။

ထိုင်ဝမ်ကိုလည်း စီးပွားရေးဆိုင်ရာနဲ့ အခြားကိစ္စရပ်တွေမှာ ပိတ်ဆို့အရေးယူသွားဖို့ တရုတ်တို့က ကြေညာခဲ့ပါတယ်။

"အမေရိကန်အနေနဲ့ အဖြစ်မှန်တွေကို စိတ်ကူးယဉ်လှည့်ဖျားဖို့ မသင့်ပါဘူး၊ တရုတ်ကြောင့် အခြေအနေတွေတင်းမာရတယ်လို့ အမေရိကန်ဘက်ကဆိုထားပေမယ့် တကယ်တမ်းက ထိုင်ဝမ်းအရေးနဲ့ပတ်သက်ပြီး အမေရိကန်က တရုတ်ကိုအရင်ရန်စခဲ့ကာ တရုတ်တို့ရဲ့အချုပ်အခြာအာဏာနဲ့ နယ်မြေစိုးမိုးရေးတို့ကို ပေါ်ပေါ်ထင်ထင်ချိုးဖောက်နေပါတယ်" လို့ တရုတ်နိုင်ငံခြားရေးဝန်ကြီး'ဝမ်ယိ'က နိုင်ငံခြားရေးဝန်ကြီးများ အစည်းအဝေးပွဲပြုလုပ်ရာ ဖနွမ်ပင်းမြို့ကနေ ထုတ်ပြန်ကြေညာလိုက်ပါတယ်။

"ထိုင်ဝမ်အရေးနဲ့ပတ်သက်ပြီး အမေရိကန်ရဲ့လုပ်ရပ်ကြောင့် နိုင်ငံရေးတင်းမာမှုများနဲ့ ထိပ်တိုက်ရင်ဆိုင်မှုများ ကြုံတွေ့လာရနိုင်ပါတယ်၊ ဒါ့အပြင် ဒေသတွင်းဖွံ့ဖြိုးတိုးတက်ရေးနဲ့ ဆန့်ကျင်လျက်ရှိကာ အာရှပစိဖိတ်ဒေသရှိ ပြည်သူတွေရဲ့မျှော်လင့်ချက်ကို ဝေဝါးစေပါတယ်" လို့ ဆိုပါတယ်။

တရုတ်က ထိုင်ဝမ်ကို ခွဲထွက်ပြည်နယ်အဖြစ်ရှုမြင်ပြီး လိုအပ်ပါက အင်အားသုံး ပြန်လည်သိမ်းပိုက်သွားဖို့ ကြံရွယ်ထားပါတယ်။
အမေရိကန်နိုင်ငံဆိုင်ရာ တရုတ်သံအမတ်'ချင်ကန်'က ဒီဖြစ်ရပ်အတွက် သံတမန်ရေးအရကန့်ကွက်ကြောင်း နိုင်ငံတော်လုံခြုံရေးကောင်စီနဲ့ နိုင်ငံခြားရေးဌာနတိုထံ ကြေညာချက်ထုတ်ပြန်ခဲ့ပါတယ်။

ဒုတိယနိုင်ငံခြားရေးဝန်ကြီး'ရှီဖန်'က အမေရိကန်အနေနဲ့ ယင်းတို့လုပ်ရပ်ကို ချက်ချင်းဖြေရှင်းချက်ပေးရန်တောင်းဆိုလိုက်ပြီး ခရီးစဉ်ရဲ့ဆိုးကျိုးသက်ရောက်မှုတွေကို ပြန်လည်ချေဖျက်နိုင်ဖို့ လက်တွေ့ကျကျလုပ်ဆောင်သင့်ကြောင်း ပြောကြားခဲ့ပါတယ်။

"ဒီလုပ်ရပ်က အလွန်ဆိုးရွားပြီး အကျိုးဆက်တွေကလည်း ပြင်းထန်လာမှာပါ၊ တရုတ်က ထိုင်ကြည့်နေမှာ မဟုတ်ပါဘူး"

ဗုဒ္ဓဟူးနေ့မှာပဲ တရုတ်တို့က ထိုင်ဝမ်ကျွန်းထံမှ ရှောက်သီးနဲ့ ငါးအမျိုးအစားအချို့ တင်ပို့ခြင်းများကို တားမြစ်လိုက်ပြီး ထိုင်ဝမ်ကို စီးပွားရေးအရပိုမိုတင်းကျပ်လာအောင် ပြုလုပ်လိုက်ပါပြီ။

တနင်္လာနေ့ကအထိ ထိုင်ဝမ်တင်ပို့ကုန်ပစ္စည်း ၁၀၀ ကျော်ကိုလည်း တရုတ်တို့က ပိတ်ပင်ခဲ့ပါတယ်။

ထိုင်ဝမ်ကျွန်းတောင်ပိုင်းက သစ်သီးထွက်ရာဒေသဟာ ထိုင်ဝမ်ရဲ့အဓိက စီးပွားရေးဝင်ငွေဖြစ်နေခဲ့တာဖြစ်ပါတယ်။

ဒါ့အပြင် တရုတ်ကနေ ထိုင်ဝမ်သို့ သဘာဝသဲတင်ပို့ခြင်းကို ပိတ်ပင်လိုက်ပါတယ်။

ဗီယက်နမ်လို့ တခြားနိုင်ငံတွေကနေ တင်သွင်းရတဲ့စရိတ်စကကြီးမားတာကြောင့် ထိုင်ဝမ်က သဲနဲ့ကျောက်စရစ်တင်သွင်းခြင်းရဲ့ ၉၀ ရာခိုင်နှုန်းကျော်ကို တရုတ်ကနေ တင်သွင်းရပါတယ်။

ထိုင်ဝမ်ဟာ တရုတ်နဲ့ စီးပွားရေးအရ နက်နဲတဲ့ဆက်ဆံမှုရှိနေပြီး အကြီးမားဆုံး ကုန်သွယ်ရေးမိတ်ဖက်နိုင်ငံဖြစ်ပါတယ်။

အင်္ဂါနေ့ညက ထိုင်ဝမ်သို့ အမေရိကန်ကိုယ်စားလှယ်အဖွဲ့ရောက်ရှိလာပြီးနောက် ထိုင်ဝမ်ရေလက်ကြားမှာ ဒုံးကျည်ပစ်ခတ်မှုများနဲ့ တာဝေးပစ်ခတ်မှုများစတဲ့ စစ်ရေးလေ့ကျင့်မှုများ လုပ်ဆောင်သွားဖို့စီစဉ်ထားကြောင်း တရုတ်လွတ်မြောက်ရေးတပ်မတော် အရှေ့ပိုင်းတိုင်းထိန်းချုပ်ကွပ်ကဲရေးဌာနက ကြေညာထားပါတယ်။

ရှင်ဟွာသတင်းဌာနရဲ့ကြေညာချက်မှာလည်း တရုတ်က ထိုင်ဝမ်အနီးနားတဝိုက်က နေရာ ၆ နေရာမှာ ကြာသပတေးနေ့ကနေ တနင်္ဂနွေနေ့အထိ စစ်ရေးလေ့ကျင့်မှုများ ပြုလုပ်သွားမယ်လို့ တင်ပြခဲ့ပါတယ်။
ထိုင်ဝမ်ကလည်း ထိုအခြေအနေတွေအတွက် အထူးတပ်လှန့်ထားကာ အဆိုပါ စစ်ရေးလေ့ကျင့်မှုများကို အချိန်နဲ့တပြေးညီ တုံ့ပြန်သွားမှာဖြစ်ကြောင်း ကာကွယ်ရေးဝန်ကြီးဌာနက သတင်းထောက်တွေကိုပြောပြခဲ့ပါတယ်။

Source: The Straits Times
#Yangon_Media_Group

#Covid_Vaccines
Published 3 August 2022

ရောဂါပြင်းထန်စွာဖြစ်ပွားနိုင်ချေရှိပြီး အားမြှင့်ကာကွယ်ဆေး (booster)ဒုတိယအကြိမ်ထိုးနှံမယ့်သူတွေအနေနဲ့ အဆင့်မြှင့်ထုတ်လုပ်နေတဲ့ ကိုဗစ်ကာကွယ်ဆေးတွေကို မစောင့်ဆိုင်းသင့်တော့ကြောင်း ကာကွယ်ဆေးကျွမ်းကျင်ပညာရှင်များက ရိုက်တာကိုပြောပြခဲ့ပါတယ်။

အိုမီခရွန်မျိုးဗီဇကွဲကို အထူးတလည်ပစ်မှတ်ထားထုတ်လုပ်တဲ့ ကာကွယ်ဆေးတွေကို ဆောင်းဦးကာလမှာ ထိုးနှံနိုင်ဖို့ မျှော်မှန်းထားကြပါတယ်။

အမေရိကန်အပါအဝင် နိုင်ငံအများအပြားမှာ အိုမီခရွန် BA.5 မျိုးဗီဇကွဲပျံ့ပွားလျက်ရှိပြီး လက်ရှိကာကွယ်ဆေးတွေက ရောဂါဆိုးရွားခြင်းနဲ့အသက်သေဆုံးခြင်းတို့ကိုတော့ ကာကွယ်ပေးနိုင်ဆဲဖြစ်ပါတယ်။

ဗိုင်းရပ်စ်က ဗီဇပြောင်းလဲနေတာကြောင့် ဆောင်းဦးကာလမှာ မည်သည့်မျိုးဗီဇကွဲပျံ့ပွားမလဲဆိုတာ မသိရှိနိုင်ပါဘူး။

ဒါကြောင့် အားမြှင့်ကာကွယ်ဆေးထိုးဖို့လိုအပ်ရင် အခုထိုးထားသင့်ကြောင်း ဝေးလ်ကော်နယ်လ်ဆေးပညာကောလိပ်မှ အဏုဇီဝဗေဒပရော်ဖက်ဆာ ဒေါက်တာ'ဂျွန်မိုး'က အသိပေးလိုက်ပါတယ်။

အမေရိကန်မှာတော့ မူလဗိုင်းရပ်စ်အပြင် BA.4 နဲ့ BA.5 အိုမီခရွန်မျိုးနွယ်ကွဲတွေကိုပါ ပစ်မှတ်ထားကာကွယ်နိုင်မယ့် အားမြှင့်ကာကွယ်ဆေးတွေကိုထုတ်လုပ်ဖို့ တာဝန်ရှိသူများက ဖိုင်ဇာ/ဘိုင်အိုတက်ခ်နဲ့ မိုဒါနာကုမ္ပဏီတို့ကို မှာကြားထားပါတယ်။

အစိုးရက မိုဒါနာကာကွယ်ဆေး ၆၆ သန်းမှာယူထားပြီး ရှိပြီးသား ဖိုင်ဇာဘိုင်အိုတက်ခ် ၁၀၅ သန်းနဲ့ပေါင်းလိုက်ရင် ကာကွယ်ဆေးပေါင်း ၁၇၁ သန်းရှိကာ ဆောင်းဦးကာလအစောပိုင်းမှာ ထိုးနှံပေးနိုင်ဖို့မျှော်လင့်ထားပါတယ်။

အမေရိကန်အာဏာပိုင်တွေက မူလဗိုင်းရပ်စ်နဲ့ အိုမီခရွန်မျိုးဗီဇကွဲကို ပစ်မှတ်ထားကာကွယ်နိုင်မယ့် ကာကွယ်ဆေးအသစ်ကို မျှော်လင့်နေကြပြီး နောင်ထွက်ပေါ်လာနိုင်တဲ့မျိုးဗီဇကွဲတွေကိုပါ ကာကွယ်နိုင်ဖို့ မျှော်မှန်းနေကြပါတယ်။

လက်ရှိပျံ့ပွားမှုနဲ့ ကိုယ်ခံအားတာရှည်ခံခြင်းအရ အခုလက်ရှိကာကွယ်ဆေးတွေက ရောဂါဆိုးရွားနိုင်မယ့်သူတွေအတွက် အကောင်းဆုံးဖြစ်ပါတယ်။

"အိုမီခရွန်ပစ်မှတ်ထားတဲ့ ကာကွယ်ဆေးတွေက နတ်ဆေးလိုမျိုးမဟုတ်ပါဘူး၊ ကပ်ရောဂါကြီးကို ဖယ်ရှားနိုင်မယ်လို့ မယူဆသင့်ပါဘူး၊ လက်ရှိကာကွယ်ဆေးတွေထက်တော့ အနည်းငယ်ပိုသာတဲ့ သဘောရှိပါတယ်" လို့ ဒေါက်တာ'မိုး'က ဆိုပါတယ်။

အိုမီခရွန်ပစ်မှတ်ထားတဲ့ ကာကွယ်ဆေးတွေသာ တကယ်ထိရောက်ကြောင်း အထောက်အထားပြနိုင်ရင် ထိုးဖို့လူတွေအများကြီးစောင့်ဆိုင်းနေကြမှာဖြစ်ကြောင်း ကယ်လီဖိုးနီးယားမှ မျိုးဗီဇကျွမ်းကျင်ပညာရှင် ဒေါက်တာ'အဲရစ်တိုပိုလ်'က ပြောပြသွားပါတယ်။

Source: Reuters
#Yangon_Media_Group

#World_Health
Published 3 August 2022

စမတ်ဖုန်းတွေက လူတွေရဲ့ဘဝမှာ အရေးပါတဲ့အခန်းကဏ္ဍကပါဝင်လာပြီး အများစုဟာ ဖုန်းထဲကအချက်ပေးချက် အသံတွေကြောင့် အနှောင့်အယှက်ဖြစ်သလို ခံစားကြရပါတယ်။

ဒါကြောင့်ပဲ စိတ်အာရုံမနောက်အောင် ဖုန်းကိုအသံပိတ်ထားကြလေ့ရှိပါတယ်။

ဒါပေမဲ့ အသံပိတ်ထားခြင်းက တကယ်ပဲအာရုံနောက်သက်သာစေတာလား ဒါမှမဟုတ် ဖုန်းအသံပိတ်ထားစဉ် သူတို့မကြားလိုက် မသိလိုက်ရတာတွေအတွက် ပိုပြီးတွေးပူနေရမလားဆိုတဲ့ အကြောင်းကို Computers in Human Behavior ဂျာနယ်မှာ သုတေသီများဖော်ပြခဲ့ကြပါတယ်။

အဆိုပါလေ့လာချက်အတွက် သုတေသီများက iPhone အသုံးပြုသူ ၁၃၈ ဦးထံမှ အချက်အလက်များကောက်ယူခဲ့ကြပါတယ်။

သူတို့ထဲက ၄၂ ရာခိုင်နှုန်းက ဖုန်းတုန်ခါတဲ့စနစ်ထားကြပြီး ၈ ရာခိုင်နှုန်းက အသံပိတ်ထားကာ ကျန်တဲ့လူတွေကတော့ အသံဖွင့်ထားပါတယ်။

အဲဒီမှာအချို့လူတွေက မသိလိုက်မှာစိုးရိမ်တဲ့ ဝေဒနာခံစားနေရပြီး ဖုန်းအသုံးပြုတဲ့အချိန်ကို တိုင်းတာခဲ့ကြပါတယ်။

မသိလိုက်မှာစိုးရိမ်တဲ့ ဝေဒနာခံစားရသူတွေကို ဖော်ထုတ်ရာမှာ ထိုလူတွေက အကြောင်းအရာအများအပြားကို တပြိုင်တည်းပြုလုပ်ကြသူတွေဖြစ်ပြီး မအောင်မြင်ကြပါဘူး။

ဒါ့အပြင် ဆုံးဖြတ်ချက်တွေ ကတိပြုမှုတွေကို အတတ်နိုင်ဆုံးရှောင်ရှားကြတဲ့သူတွေလည်းရှိပြီး သူတို့သာ မရွေးချယ်ဘူးဆိုရင် ဒီထက်ပိုကောင်းတာမျိုး ကြုံရမှာကို မျှော်လင့်သူတွေဖြစ်ပါတယ်။

ဖုန်းကိုအသံပိတ်ထားတဲ့ လူတွေက ဖုန်းထဲကိုမက်ဆေ့စာစောင်တွေ ရောက်ရှိခြင်းရှိ/မရှိ သိချင်ကြတာကြောင့် ဖုန်းအသံဖွင့်ထားတဲ့လူတွေထက် ဖုန်းကိုမကြာခဏ ကောက်ကိုင်လေ့ရှိကြပါတယ်။

ဒါ့အပြင် ဖုန်းအသံပိတ်ထားတဲ့လူတွေဟာ အသံဖွင့်ထားတဲ့သူတွေထက်စာရင် ဆိုရှယ်မီဒီယာမှာအချိန်အကုန်ဆုံးလူတွေလည်း ဖြစ်နေပါတယ်။
ဖုန်းအသံပိတ်ထားခြင်းက အထူးသဖြင့် မသိလိုက်မှာ စိုးရိမ်တဲ့သူတွေမှာ စိတ်ဆင်းရဲမှုခံစားရတတ်ကြောင်း သုတေသီများက ထုတ်ဖော်လိုက်ကြပါတယ်။

ဒါကြောင့် အကုန်လုံးကိုအသံပိတ်ထားမယ့်အစား မိသားစုဝင်တွေနဲ့ အနီးစပ်ဆုံး မိတ်ဆွေတွေထံမှ အရေးကြီးတဲ့မက်ဆေ့အချက်ပေးသံတွေကိုတော့ လွတ်မသွားအောင် အသံဖွင့်ထားပါတယ်။

Source: The Jerusalem Post
#Yangon_Media_Group

Published 2 August 2022

တရုတ်နိုင်ငံ ကာကွယ်ရေးဝန်ကြီးဌာနသည် တပ်လှန့်ထားပြီး တန်ပြန်အရေးယူဆောင်ရွက်မှုအဖြစ် ပစ်မှတ်ထားသည့် စစ်ဆင်ရေး တသီတတန်း စတင်တော့မယ်လို့  ကာကွယ်ရေးဝန်ကြီးဌာန ပြောရေးဆိုခွင့်ရ ဝူရှန်က ပြောကြားလိုက်ပါတယ်။ တရုတ်နိုင်ငံဟာ နိုင်ငံရဲ့ အမျိုးသားအချုပ်အခြာအာဏာနှင့် နယ်မြေတည်တံ့ခိုင်မြဲရေးကို မဆုတ်မနစ်ကာကွယ်သွားမှာ ဖြစ်တယ်လို့လည်းသူကပြောပါတယ်။

အမေရိကန် အောက်လွှတ်တော်ဥက္ကဋ္ဌ နန်စီပီလိုစီ ထိုင်ဝမ်ဒေသရောက်ရှိပြီးနောက် တရုတ်ကာကွယ်ရေးဝန်ကြီးဌာနက ယခုလိုထုတ်ဖော်ပြောကြားခဲ့တာဖြစ်ပါတယ်။

Source CGTN

Published 2 August 2022

အမေရိကန်အောက်လွှတ်တော်ဥက္ကဋ္ဌ နန်စီပီလိုစီ ထိုင်ဝမ်သို့ သွားရောက်ခဲ့ခြင်းနှင့်ပတ်သက်၍  တရုတ်နိုင်ငံက အခိုင်အမာ ဆန့်ကျင်ပြီး ပြင်းထန်စွာ ရှုတ်ချတယ်လို့ တရုတ်နိုင်ငံ နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။ အဲသလိုလုပ်ဆောင်ခြင်းအတွက် အမေရိကန်ပြည်ထောင်စုကို  ပြင်းထန်စွာ ကန့်ကွက်တယ်လို့လည်း တရုတ်ကပြောပါတယ်။

တရုတ်နိုင်ငံအနေနှင့် နိုင်ငံရဲ့ အချုပ်အခြာအာဏာနှင့် ပိုင်နက်တည်တံ့ခိုင်မြဲရေးကို မဆုတ်မနစ်စောင့်ကြပ်ကကာကွယ်ပေးရန် အတွက် လွှတ်တော်ဥက္ကဋ္ဌရဲ့ ခရီးနှင့်ပတ်သက်ပြီး လိုအပ်တဲ့ အရေးယူဆောင်ရွက်မှုတွေကို အသေအချာပြုလုပ်မှာဖြစ်တယ်လို့ တရုတ်နိုင်ငံခြားရေး ဝန်ကြီးဌာနကပြောပါတယ်။

ယခုကိစ္စကနေဖြစ်ပေါ်လာမယ့် အကျိုးဆက်တွေအားလုံးကို အမေရိကန်ဘက်နှင့် ထိုင်ဝမ်ခွဲထွက်ရေအင်အားစုတွေသာ  တာဝန်ရှိစေရမှာဖြစ်တယ်လို့လည်း ဆိုပါတယ်။

အမေရိကန်အနေနှင့် ထိုင်ဝမ်ကတ်ကိုသုံးပြီး ကစားနေတာတွေနှင့် ထိုင်ဝမ်ကိုအသုံးချပြီး တရုတ်ကို ထိန်းချုပ်နိုင်အောင်ကြိုးစာနေတာတွေကို ရပ်တန့်ဖို့ တရုတ်က ပြင်းထန်စွာတောင်းဆိုတယ်လို့လည်း တရုတ်က ပြောပါတယ်။

ထိုင်ဝမ်ကို နန်စီပီလိုစီရောက်ရှိပြီး မိနစ်ပိုင်းအတွင်းမှာ အဆိုပါကြေညာချက်ကို တရုတ်က ထုတ်ပြန်ခဲ့တာဖြစ်ပါတယ်။

အမေရိကန်ပြည်ထောင်စု အောက်လွှတ်တော်ဥက္ကဋ္ဌ နန်စီပီလိုစီဟာ တရုတ်ပြည်သူ့သမ္မတနိုင်ငံရဲ့ အပြင်းအထန်ကန့်ကွက်မှုတွေကြားထဲက ဩဂုတ် ၂ရက်ညပိုင်းက ထိုင်ဝမ်ကို ရောက်ရှိလာခဲ့တာ ဖြစ်ပါတယ်။

Source Xinhua

#World_Development
Published 2 August 2022

ပြင်သစ်နိုင်ငံမာဆေးလ်မြို့မှ အသင်းအဖွဲ့အနည်းငယ်ဟာ မြို့ထဲရှိဆင်းရဲနွမ်းပါးတဲ့ ကလေးတွေကို သူတို့ရဲ့ဘဝတွေစိုပြေပြီး ကာယပိုင်းနဲ့ဉာဏပိုင်း ရင့်သန်လာစေရန် အကူအညီပေးလျက်ရှိပါတယ်။

#Yangon_Media_Group