Published 30 Oct 2022

✅အောက်တိုဘာ ၃၀ရက် တနင်္ဂနွေနေ့က ဂူဂျာရတ်ပြည်နယ် မော်ဘီမှာရှိတဲ့ မြစ်ကူးကြိုးတံတားတစ်စီးပြတ်ကျရာ အနည်းဆုံးလူ ၃၀ သေဆုံး အများအပြားဒဏ်ရာရ

✅တံတားပြတ်ကျစဉ်မှာ တံတားပေါ်လူ ၅၀၀ခန့်ရှိနေပြီး လူ၁၀၀ခန့် ရေထဲတွင်ပိတ်မိနေခဲ့

✅အိန္ဒိယဝန်ကြီးချုပ်မိုဒီက ကယ်ဆယ်ရေးလုပ်ငန်းများ ချက်ခြင်းဆောင်ရွက်ဖို့ ပြည်နယ်ဝန်ကြီးချုပ်ကို အမိန့်ပေး

✅တံတားဟာ အလယ်ကနေ ထောက်ခနဲပြတ်သွားပုံရ၊အသေးစိတ်အချက်အလက်များစောင့်ဆိုင်းဆဲ

✅အဆိုပါ မော်ဘီကြိုးတံတားမှာ နှစ်ပေါင်း၁၀၀ကျော်သက်တမ်းရှိပြီဟုသိရ

✅ပုဂ္ဂလိက ကုမ္ပဏီ အိုရီဗာအုပ်စုက တင်ဒါအောင်ကာ တံတားကို ပြန်လည်ပြုပြင်မွမ်းမံပြီး မကြာသေးခင်ကမှပြန်လည်ဖွင့်လှစ်ခဲ့

Source: NDTV and Indian Media

#Gujarat_india

#Morbi_cable_Bridge_collapse

#Narendra_Modi

Published 30 Oct 2022

ကမ္ဘာ့အရှည်လျားဆုံး ခရီးသည်တင်ရထားတစ်စီးအဖြစ် ကမ္ဘာ့စံချိန်ချိုးလိုက်ပြီလို့ ရီယက်ရှန်ရထား (RhB) က ကြေညာပါတယ်။ ဆွစ်ရထားစနစ်ရဲ့ ၁၇၅ နှစ်မြောက်အထိမ်းအမှတ်ပွဲတစ်ခုမှာ ယင်းသို့ ကြေညာခဲ့ခြင်းဖြစ်ပါတယ်။ အဆိုပါ ရထားဟာ ရထားတွဲပေါင်း ၁၀၀အထိပါဝင်ပြီး စုစုပေါင်း ၁၉၁၀ မီတာ ရှည်လျားပါတယ်။

ယူနက်စကိုက ကမ္ဘာ့အမွေအနှစ်အဖြစ် သတ်မှတ်ထားတဲ့ ဂရော့ဘန်ဒန် ဒေသစိတ်အတွင်းမှာ ရထားဟာ ၂၅ ကီလိုမီတာ ခုတ်မောင်းပြသခဲ့ပါတယ်။

Source AFP

#World's_longest_passenger_train

#The_Rhaetian_Railway

#Swiss_railway_system

Published 30 October 2022

တရုတ်နိုင်ငံ ‌တောင်ပိုင်းကကျွန်းတစ်ကျွန်းဖြစ်တဲ့ ဟိုင်နန်းပြည်နယ်မှာ သောကြာနေ့က အကောက်အခွန်မဲ့ မြို့တစ်မြို့ကို ဖွင့်လှစ်လိုက်ကြောင်း ပြည်နယ် ကူးသန်းရောင်းဝယ်ရေးဌာနက ပြောပါတယ်။

ဟိုင်းနန်းပြည်နယ်ရဲ့ မြို့တော်ရဲ့ မြို့လယ်မှာတည်ရှိတဲ့  ဟိုင်ခိုနိုင်ငံတကာ အကောက်အခွန်မဲ့ Duty-Free  မြို့ဟာ အကျယ်အဝန်းအားဖြင့် စတုရန်းမီတာ ၉၃၀,၀၀၀ ရှိပါတယ်။  ဈေးဝယ်သူတွေအတွက် နိုင်ငံတကာနှင့် ပြည်တွင်း အမှတ်တံဆိပ် အကောက်အခွန်မဲ့ ကုန်စည်ပေါင်း ၈၀၀ ကျော်ကို ခင်းကျင်းရောင်းချမှာ ဖြစ်ပါတယ်။

ဖောက်သည်တွေကိုပိုပြီး ဆွဲဆောင်ဖို့အတွက် အကြိုက်တွေ့စရာ မူဝါဒတွေနှင့်အတူ လေဆိပ်တွေ၊ဆိပ်ကမ်းတွေနှင့် ကမ်းလွန်ကျွန်းတွေမှာရှိတဲ့ အကောက်အခွန်မဲ့ စီးပွားရေးလုပ်ငန်းတွေအပြင် ယခု မြို့တွင်း အကောက်အခွန်မဲ့ ဆိုင်တွေဟာ စိတ်ဝင်စားမှု သိသိသာသာရရှိနေပါတယ်။

ကြီးမားတဲ့ အကောက်အခွန်မဲ့ ဈေးဝယ်စင်တာကြီးတစ်ခုဟာ ဟိုင်းနန်း လွတ်လပ်သောကုန်သွယ်ရေးဆိပ်ကမ်း တည်ဆောက်မှုရဲ့ နောက်ထပ် အထိမ်းအမှတ်သင်္ကေတ တစ်ခုဖြစ်ပါတယ်။

လက်ရှိမှာ ဟိုင်နန်းကျွန်း ပြည်နယ်မှာ အကောက်အခွမဲ့ဆိုင်တွေ ၁၁ဆိုင်ရှိပါတယ်။ နိုင်ငံရပ်ခြားမှာ တန်ဖိုးကြီး ပစ္စည်းတွေ သွားရောက်ဝယ်ယူစီးဆင်းမှု နောက်ကြောင်းပြန်စီးဆင်းဖို့နှင့် စားသုံးမှုကို အဆင့်မြှင့်တင်ဖို့ ရည်ရွယ်ပြီး အကောက်အခွန်မဲ့ လုပ်ငန်းတွေတိုးချဲ့နေတာဖြစ်ပါတယ်။

Source: CCTV+

#Duty_Free_Town_China

#Hainan’s_duty_free_town

#China_Economy

Published 30 Oct 2022

အသက်၃၃နှစ်ရှိပြီဖြစ်တဲ့ မျောက်ဝံကြီးတစ်ကောင်ဟာ သူမရဲ့ ဘဝတလျောက်လုံးနီးပါးကို ထိုင်းနိုင်ငံ ဘန်ကောက်မြို့က ဈေးဝယ်စင်တာကြီးတစ်ခုကြီးရဲ့ ခုနှစ်ထပ်မှာ သတ္တုလှောင်အိမ်ထဲ တစ်ကောင်တည်းနေခဲ့ရတဲ့အတွက် သူမကို ကမ္ဘာ့ အထီးကျန်ဆုံးမျောက်ဝံကြီးအဖြစ် အမည်ပေးထားကြပါတယ်။

ဘွာနွိုင်းဆိုတဲ့ အဲဒီဂေါ်ရီလာမျောက်ဝံမကြီးဟာ အဲဒီ လှောင်အိမ်ထဲထည့်ထားခံရပြီးနောက် သူမရဲ့ အမြဲတမ်းနေအိမ် အဖြစ် ဆယ်စုနှစ်သုံးစုကျော်ကြာ အဲဒီအထဲမှာပဲ နေထိုင်ခဲ့ရပါတယ်။ သူမဟာ ကိုးရိုးကားယားနိုင်လှတဲ့ တိရိစ္ဆာန်ဥယျဉ်တစ်ခုရဲ့ အဓိကဆွဲဆောင်စရာတွေထဲက တစ်ခုဖြစ်နေပါတယ်။ဘန်ကောက်ရဲ့ ရှေးအကျဆုံး ဈေးဝယ်စင်တာတစ်ခုဖြစ်တဲ့  ပါတာပင်ကလို ကုန်တိုက်ကြီးအတွင်းမှာ အဲဒီတိရစ္ဆာန်ရုံထားရှိတာပါ။

ထိုင်အစိုးရနှင့် တိရိစ္ဆာန်အခွင့်အရေး လှုပ်ရှားတက်ကြွသူတွေက သူမကို ဒီ့ထက်သင့်တော်မယ့်နေရာကို ရွှေ့ပြောင်းပေးပါလို့မေတ္တာရပ်ခံခဲ့ကြပေမယ့် ပိုင်ရှင်က ငြင်းဆန်ခဲ့ပါတယ်။

သူမရဲ့ ကျန်ရှိတဲ့ ဘဝအချိန်တွေကို အခြားသော သူမရဲ့မျိုးတူသတ္တဝါများနှင့်အတူ ဘေးမဲ့တောတစ်ခုမှာ ထားပေးဖို့ ဘွာနွိုင်းရဲ့ပိုင်ရှင်က ယနေ့ထက်တိုင်ငြင်းဆန်နေဆဲလည်းဖြစ်ပါတယ်။

“ဒီစုတ်ပြတ်ညံ့ဖျင်းလှတဲ့ နေရာအနေအထားကို နိုင်ငံတကာက  ကမ္ဘာ့အဆိုးရွားဆုံးတိရိစ္ဆာန်ရုံဆိုပြီး ရှုတ်ချကြတယ်”လို့  တိရိစ္ဆာန်အခွင့်အရေးကာကွယ်ရေးတစ်ဖွဲ့ဖြစ်တဲ့ PETA  ရဲ့ အကြီးတန်းဒုတိယဥက္ကဋ္ဌ ဂျေဆင်ဘေကာက ပြောပါတယ်။

“ပါတာ တိရိစ္ဆာန်ရုံကို လူတိုင်းက ဖိအားတွေပေးကြဖို့ ကျွန်တော်တိုက်တွန်းပါတယ်။ ပြီးတော့ PETA အနေနှင့် ဒီတိရိစ္ဆာန်တွေအားလုံးကို  သူတို့ရဲ့ ကိုယ်နှင့်စိတ် လိုအပ်ချက်တွေကို ဖြည့်ဆည်းပေးနိုင်မယ့်နာမည်ကောင်းရထားတဲ့ ဘေးမဲ့တော နေရာတွေမှာ အငြိမ်းစားပေးလိုက်ဖို့ ဆောင်ရွက်ခွင့်ကိုပါတောင်းဆိုပေးပါ” လို့ သူကပြောပါတယ်။

ထိုင်းနိုင်ငံရဲ့ ပတ်ဝန်းကျင်ထိန်းသိမ်းရေးဝန်ကြီးကလည်း သူ့အနေနှင့်  ကြာပန်းလေးလို့ အဓိပ္ပါယ်ရတဲ့ ဘွာနွိုင်းကို အခြာသော ဂေါ်ရီလာတို့နှင့်အတူ နေထိုင်ပျော်ရွှင်ခွင့်ရဖို့ တောရိုင်းဘေးမဲ့တော်ထဲ လွှဲပြောင်းပေးတာကို မြင်ချင် နေပါတယ်။ ဒါပေမယ့် ဝန်ကြီးရဲ့ အတွင်းရေးမှူးတစ်ဦးက ဒီမျောက်ဝံကြီးဟာ ပုဂ္ဂလိကပိုင်ဆိုင်မှုတစ်ခုဖြစ်လို့ နေရာ ရွှေ့ပြောင်းချင်ရင် ပိုင်ရှင်ခွင့်ပြုချက်လိုအပ်တယ်လို့ သူ့ကိုရှင်းရှင်းလင်းလင်းပြောထားပါတယ်။

“ အန္တရာ ယ်ပြုနိုင်တဲ့တိရစ္ဆာန်တွေနှင့် တောရိုင်းတိရိစ္ဆာန်တွေ ရောင်းဝယ်ဖောက်ကားခြင်းကို တားမြစ်တဲ့ ဥပဒေ မပြဋ္ဌာန်းခင်မှာ  ပိုင်ရှင်က ဘွာနွိုင်းကို ဝယ်ခဲ့တာဖြစ်ပါတယ်။ ဘွာနွိုင်းကိုအားပေးကြသူတွေဆီက ကျွန်တော်တို့ အလှူခံခဲ့ကြပါတယ်။ ဒါပေမယ့် ခက်တာက ပိုင်ရှင်က ဘွာနွိုင်းကို မရောင်းနိုင်ဘူးတဲ့။  သူက ရောင်းမယ်လို့ ဆိုတဲ့ အခါမှာလည်း ဈေးကသိပ်ကြီးလွန်းနေတယ်” လို့ ဝန်ကြီး သန်နက်ပို သန်နာဘိုညာဝက် ကပြောပါတယ်။

ထိုင်းသတင်းအရင်းအမြစ်တွေရဲ့အဆိုအရ ဘွာနွိုင်းရဲ့ပိုင်ရှင်က သူ့ကိုလွှတ်ပေးဖို့ ဒေါ်လာ ရှစ်သိန်းတောင်းတယ်လို့ သိရပါတယ်။ ဒါပေမယ့် ဒီတိရိစ္ဆာန်ရုံကိုပိုင်တဲ့ ကုမ္ပဏီက သူ့ကိုရောင်းဖို့ ဈေးအညှိမခံဘူးလို့လည်းဆိုပါတယ်။ မျောက်ဝံကြီးကို ကောင်းစွာစောင့်ရှောက်ထားပြီး သူမဟာ ကိုယ်ရောစိတ်ပါ ဘာဖိအားမှ မခံစားရဘူးလို့ ကုမ္ပဏီရဲ့ကိုယ်စားလှယ်တွေကပြောပါတယ်။

“ အင်တာနက်ထဲမှာ ဘွာနွိုင်းပုံတွေမြင်ရတဲ့သူတွေက သူမဟာ ဝမ်းနည်းကြေကွဲနေတယ်လို့ပြောကြတယ်။ တကယ်တမ်းတော့ သူတို့ဟာလည်း လူတွေလိုပါပဲ။ အချို့တွေမှာ ဝမ်းနည်းတဲ့မျက်နှာပိုင်ဆိုင်ကြပြီး အချို့ကပျော်ရွှင်တဲ့ မျက်နှာပိုင်ဆိုင်ကြတာဖြစ်တယ်” လို့ တိရိစ္ဆာန်ရုံ ညွှန်ကြားရေးမှူး ကန်နစ်ဆမ်ဆီရီမွန်ဂိုကပြောပါတယ်။

“ ဝေဖန်တာတွေကိုစိတ်ပူစရာမရှိပါဘူး။ သူမအကြောင်း ကျွန်တော်တို့က အသိဆုံးပါ” လို့ သူကပြောပါတယ်။

နိုင်ငံတကာက ဘာပဲပြောနေနေ၊ တိရိစ္ဆာန်ရုံပိုင်ရှင်ကိုယ်တိုင်က လွှတ်မပေးဘဲနှင့်တော့ ဘာတစ်ခုမှတော့ လုပ်ပေးနိုင်ကြမှာမဟုတ်ပါဘူး။  မျောက်ဝံတွေဟာ တောထဲမှာ အသက် ၃၅နှစ်မှ ၄၀နှစ်အထိနေနိုင်ကြပြီး ကျွေးမွေးပြုစုမှုအောက်မှာ နှစ် ၅၀လောက်နေနိုင်ကြပါတယ်။ အဲဒါကြောင့် ဘွာနွိုင်းဟာ သူမရဲ့ ရွှေရောင်ရက်တွေကိုတော့ ကျော်လွန်ခဲ့ပါပြီ။

Source: The Guardian

#Bua_Noi

#World’s_loneliest _gorilla

#Thailand_ Pata_Zoo

Published 29 Oct 2022

မြောက်ကိုးရီးယားက နျူကလီးယားတိုက်ခိုက်လာခဲ့ရင် အနည်းဆုံးရက်သတ္တပတ်နှစ်ပတ် ဓာတ်ရောင်ခြည် အဆိပ်သင့်ခြင်းမှရှောင်ရှားနိုင်ရန် ရည်ရွယ်ပြီး တောင်ကိုးရီးယား ဗိသုကာပါမောက္ခတစ်ဦးက မြေအောက်ဗုံးခိုကျင်း(ဘန်ကာ) တစ်ခုကို တည်ဆောက်ခဲ့ပါတယ်။

ပါမောက္ခ လီတေးဂိုဟာ ထူထဲတဲ့ ကွန်ကရစ်နံရံ၊ သံမဏိအားဖြည့် တံခါးတွေနှင့် လေသန့်စင်ရေးစနစ်တပ်ဆင်ထားတဲ့ မြေအောက်ဘန်ကာတစ်ခုကို မြေအောက်တစ်မီတာမှာ တည်ဆောက်ထားပါတယ်။ အဲဒီဘန်ကာဟာ သူ့ကို နျူကလီးယား ဘေးဆိုးကနေ ကာကွယ်ပေးနိုင်မှာဖြစ်ပြီး သမားရိုးကျ ဒုံးကျည်တစ်ခု တိုက်ရိုက်ထိမှန်တာကိုလည်း ခံနိုင်ရည်ရှိမှာဖြစ်ပါတယ်။

မြို့တော်ဆိုးလ်ကနေ အရှေ့တောင်ဘက် ၁၂၀ ကီလိုမီတာအကွာမှာရှိတဲ့ ဂျီချီယွန်မြို့က သူပိုင်မြေပေါ်မှာ အစိုးရက ရန်ပုံငွေဖြင့်တည်ဆောက်ထားတဲ့ အဆိုပါဘန်ကာဟာ နျူကလီးယားရေဒီယိုဓာတ်သတ္တိကြွတွေရဲ့အန္တရာယ်ကို တောင်ကိုးရီးယားနိုင်ငံသားတွေ လေးလေးနက်နက်ကြိုတင်ပြင်ဆင်ကာကွယ်နိုင်ရေး ပါမောက္ခလီရဲ့ စည်းရုံးလှုံဆော်မှု အစိတ်အပိုင်းတစ်ခုလည်းဖြစ်ပါတယ်။

“ ဒီကနေ ကီလိုမီတာ ၁၀၀လောက်ပဲဝေးတဲ့နေရာမှာ မြောက်ကိုးရီးယားရှိနေတယ်။ အဲဒီကနေ ဇီဝ ဒါမှမဟုတ် နျူကလီးယား ဒုံးကျည်တွေပျံသန်းလာနိုင်တယ်”လို့ ပါမောက္ခလီကပြောပါတယ်။

သူ့အနေနှင့် တောင်ကိုးရီးယားရဲ့ အိုမင်းနေပြီဖြစ်တဲ့ နျူကလီးယား ဓာတ်ပေါင်းဖိုတွေထဲက တစ်ခုမှာ ဖူကူရှီမာပုံစံ မတော်တဆပျော်ကျတာမျိုးကိုလည်း အတော့်ကိုပူပန်နေပါတယ်။

“ တောင်ကိုးရီးယားနိုင်ငံသားတွေဟာ ကိုယ်ရေးကိုယ်တာသုံး ဗုံးခိုကျင်းတွေ တည်ဆောက်ဖို့ မလိုအပ်ခဲ့တာ နှစ်တွေအကြာကြီးရှိခဲ့ပါပြီ။  အခု အများသုံး ကျင်းတွေ မရှိဖြစ်နေတယ်” လို့ သူကဖြည့်စွက်ပြောပါတယ်။

တောင်ကိုးရီးယားစစ်တပ်က တိုက်ခိုက်မှုအပေါ် အဆုံးစွန်ပြင်ဆင်ထားတယ်လို့ ပြောနေပေမယ့်  အရပ်သားအများစုဟာ စစ်ဆိုတာကိုမေ့လျော့နေကြပြီး ဘာမှမပြင်ဆင်ထားကြဘူးလို့ ပါမောက္ခလီက ပြောပါတယ်။

တောင်ကိုးရီးယားမှာ တစ်နိုင်ငံလုံးအနေနှင့် ခိုလှုံရာ ဗုံးခိုကျင်းတွေ ၁၇,၀၀၀ ကျော်ကွန်ယက်တစ်ခု ရှိနေပါတယ်လို့ ပြည်ထဲရေးဝန်ကြီးဌာနရဲ့ ကိန်းဂဏန်းများက ဆိုပါတယ်။ အဲဒီအထဲက ၃,၀၀၀ ကျော်ဟာ ဆိုးလ်မြို့တော်မှာရှိနေပါတယ်။

မြို့ရဲ့ မြေအောက်ရထားဘူတာရုံတွေဟာ လေကြောင်းတိုက်ခိုက်မှုအကာအကွယ်ယူဖို့နေရာတွေဖြစ်ပေမယ့် နျူကလီးယားဘေးကနေ မလုံခြုံဘူးလို့ဆိုပါတယ်။

၁၉၇၀ပြည့်လွန်နှစ်တွေတုန်းကတော့ အဓိကမြို့ကြီးတွေမှာ အဆောက်အဦတည်ဆောက်ရင်  စစ်အတွင်းဘန်ကာအဖြစ် သုံးနိုင်အောင် မြေအောက်အထပ်တွေထည့်သွင်းတည်ဆောက်ရမယ်ဆိုတဲ့ ဥပဒေရှိခဲ့ပါတယ်။

ဒါပေမယ့် ဆိုးလ်မှာ အိမ်ခြံမြေဈေးတွေက မြင့်တက်နေတော့ ပုဂ္ဂလိက အဆောက်အဦအများစုဟာ အဲဒီ မြေအောက်အထပ်တွေကို ကားရပ်နားဖို့နေရာတွေ ဒါမှမဟုတ် အော်စကာဆုရတဲ့ Parasite ဇာတ်ကားထဲမှာ တွေ့ရတဲ့ အေးစက်တဲ့ မြေအောက်အိမ်ခန်းတွေအဖြစ် အသွင်ပြောင်းလိုက်ကြပါတယ်။အဲဒါတွေကို ဆမ်ယွန်းတက္ကသိုလ်ဘွဲ့ရ ပါမောက္ခလီက စိတ်ပူနေပါတယ်။

တောင်ကိုးရီးယားနိုင်ငံမှာ စစ်တပ်အတွက် ပထမတန်းစား ကျင်းတွေရှိပါတယ်။ ဒါပေမယ့် အရပ်သားတွေအတွက်က အတော့်ကိုအားနည်းနေတယ်လို့ သူကပြောပါတယ်။

လီတည်ဆောက်ထားတဲ့ ဘန်ကာဟာ ဝမ်ငွေ သန်း ၇၀ (စင်္ကာပူဒေါ်လာ ၆၉,၄၀၀)ကုန်ကျပါတယ်။ အဲဒီအထဲမှာ အလုပ်သမားခမပါသေးပါဘူး။ သူက ဒီဘန်ကာကို ပညာရေးဝန်ကြီးဌာနဆီ သုတေသနအဖြစ်တင်ပြခဲ့ရာမှာ အဲဒီက ရန်ပုံငွေထောက်ပံ့ပေးခဲ့တာဖြစ်ပါတယ်။

နျူကလီးယားဒဏ်ခံ ဘန်ကာတွေတည်ဆောက်သူတွေက ဒါကို လျို့ဝှက်ထားချင်ကြတယ်။ ဘာဖြစ်လို့လဲဆိုတော့ အရေးပေါ်ဖြစ်လာရင် မိတ်ဆွေတွေ၊မိသားစုတွေနှင့် အိမ်နီးချင်းတွေဆီက အကူအညီတောင်းတာတွေ အလျှံပယ် ဖြစ်လာမှာကို ကြောက်ကြပါတယ်။

“ ကျွန်တော်ကိုယ်တိုင် ဒီဘန်ကာကိုဆောက်တုန်းက အဲဒီသူတွေက နိုင်ငံသာ အတိုက်အခိုက်ခံရရင် ဒီဘန်ကာဆီ လာကြမယ်လို့ ကျွန်တော့်ကိုပြောကြတယ်ဗျာ။ ကျွန်တော်က သူတို့ကိုပြန်ပြောရတယ်။ ဒီ ဘန်ကာက လူ၁၂ ယောက်ပဲဆန့်တယ်လို့ “ လို့ ပါမောက္ခလီကပြောလိုက်ပါတယ်။

Source AFP

#Professor_Lee Tae-goo

#South_Korea

#Nuclear_proof_bunkers

Published 30 Oct 2022

✅စနေနေ့ညက ဆိုးလ်တွင်ဖြစ်ပွားခဲ့သည့် ဟော်လိုဝင်ပွဲတော် လူအုပ်ပြိုလဲမှုကြောင့် သေဆုံးသူ ၁၅၁ ဦးအထိရှိလာ

✅တောင်ကိုရီးယားသမ္မတ ယွန်းဆပ်ယိုက နိုင်ငံတော်အဆင့် ဝမ်းနည်းပူဆွေးသည့် ကာလတစ်ခုအဖြစ် သတ်မှတ်ကြောင်း တနင်္ဂနွေနေ့ကကြေညာ

✅သေဆုံးသူ ၁၅၁ ဦးရှိပြီး ၁၉ ဦးမှာ နိုင်ငံခြားသားများဖြစ်၊ ဖြစ်ပွားရာနေရာတွင် ဒဏ်ရာရသူ ၈၂ ဦးရှိပြီး ယင်းတို့အထဲမှ ၁၉ ဦးမှာ ဒဏ်ရာများပြင်းထန်ကောင်း ယွန်ဆန်မီးသတ်ဌာနအကြီးအကဲ ချွိုင်ဆ်ဘွန်က ပြော

✅ယခုဟော်လိုဝင်ပွဲတော်မှာ ကိုဗစ်-၁၉ကြောင့် မကျင်းပဖြစ်ခဲ့သည်မှာ (၃)နှစ်ရှိပြီးမှ ယခုနှစ်တွင်ပထမဆုံးအဖြစ် ပြနလည်ကျင်းပခြင်းဖြစ်

✅သေဆုံးသူအများစုမှာ အသက်၂၀ ဝန်းကျင် အမျိုးသမီးငယ်များဖြစ်ပြီး သေဆုံးသည့် နိုင်ငံခြားသားများထဲတွင်  တရုတ်၊အီရန်၊ ဥဇဘက်ကစ္စတန်နှင့်နော်ဝေးတို့မှနိုင်ငံခြားသားများပါဝင် ဟုသူကပြော

✅ယခင်ဟော်လိုဝင်ပွဲများထက် ပရိဿတ်က ၁၀ဆခန့်များပြားခဲ့ဟု မျက်မြင်သက်သေများကပြော

✅သေဆုံးသူအများစုမှာ လူကြိတ်ကြိတ်တိုးသည့်အထဲ သေဆုံးရခြင်းဖြစ်

✅အမေရိကန်သမ္မတ ဂျိုးဘိုင်ဒင်နှင့်သမ္မတကတော်၊ ဗြိတိန်ဝန်ကြီးချုပ်ရီရှီဆူနက်တို့က ဝမ်းနည်းကြောင်းသဝဏ်လွှာများပေးပို့

Source: Reutees

#Seoul_ Halloween_Tragedy

#Yoon_Suk-yeol_national_mourning

#South_Korea_Haloween_night