#World_Science
Published 7 August 2022
သုတ်ပိုးများ၊ မျိုးဥများနဲ့ သန္ဓေမျိုးအောင်ခြင်းအဆင့်တွေမပါဝင်တဲ့ ကမ္ဘာ့ပထမဆုံး လူလုပ်သန္ဓေသားကို သုတေသီများဖန်တီးနိုင်ခဲ့ကြပါပြီ။
ကြွက်တွေရဲ့ ပင်မစတမ်ဆဲလ်များကနေ အစာအိမ်အူလမ်းကြောင်း၊ ကနဦး ဦးနှောက်တည်ဆောက်ပုံနဲ့ နှလုံးပါဝင်တဲ့ အစောပိုင်းသန္ဓေသားလောင်းတည်ဆောက်ပုံများ ဖြစ်ပေါ်လာတာကို အစ္စရေးလ် ဝေ့ဇ်မန်းတက္ကသိုလ်မှသိပ္ပံပညာရှင်များက တွေ့ရှိခဲ့ကြပါတယ်။
ထိုလုပ်ငန်းစဉ်က တိရိစ္ဆာန်တွေနဲ့ထိတွေ့စမ်းသပ်ရတာမျိုး နည်းပါးပြီး လူသားတွေမှာ ဆဲလ်နဲ့တစ်ရှူးအစားထိုးခြင်းများအတွက် လမ်းစဖြစ်လာနိုင်ပါတယ်။
ဥပမာ သွေးကင်ဆာလူနာမှ အရေပြားဆဲလ်များကို ရိုးတွင်းခြင်ဆီပင်မစတမ်ဆဲလ်များအဖြစ် ပြောင်းလဲပေးပြီး ကုသပေးတာမျိုးဖြစ်ပါတယ်။
"သန္ဓေသားလောင်းပင်မစတမ်ဆဲလ်တွေကနေ သန္ဓေသားလောင်းကြီးဖြစ်ပေါ်လာပြီး အချင်းလည်း ဘေးမှာပါဝင်လာပါတယ်၊ ဒီလုပ်ငန်းစဉ်အကြောင်း စိတ်လှုပ်ရှားမိပါတယ်" လို့ ပရော်ဖက်ဆာ'ဂျေကော့ဟန်နာ'က ဆိုပါတယ်။
အချို့ဆဲလ်တွေကို ဓာတုပစ္စည်းများနဲ့ ထိတွေ့စေရပြီး အချင်းဖြစ်ပေါ်လာဖို့ မျိုးဗီဇစနစ်များအဖြစ်ပြောင်းလဲရပြီး အချို့ဆဲလ်တွေကတော့ အင်္ဂါတွေ တစ်ရှူးတွေကို အနှောင့်အယှက်မဖြစ်စေဘဲ ဖွံ့ဖြိုးလာကြပါတယ်။
လူလုပ်သန္ဓေသားတွေက သူတို့ရဲ့ဆဲလ်ရဲ့ မျိုးဗီဇပုံစံနဲ့ အတွင်းတည်ဆောက်ပုံများအတိုင်း ၉၅ ရာခိုင်နှုန်းတူညီပြီး သိပ္ပံပညာရှင်တွေရဲ့အဆိုအရ ထိုအင်္ဂါတွေဟာ ပုံမှန်အတိုင်းလုပ်ဆောင်နိုင်ခဲ့ပါတယ်။
လူလုပ်သန္ဓေသားတွေက တကယ့်သန္ဓေသားမဟုတ်တဲ့အတွက် သက်ရှိသတ္တဝါဖြစ်လာမှာ မဟုတ်ပါဘူး။
Renewal Bio ကုမ္ပဏီကတော့ လူလုပ်လူသားသန္ဓေသားတွေကနေ ဆေးဘက်ဆိုင်ရာ အခြေအနေအတွက် တစ်ရှူးနဲ့ဆဲလ်များရရှိစေနိုင်ဖို့ ရည်ရွယ်ထားပါတယ်။
"လူလုပ်လူသား သန္ဓေသားဖြစ်စဉ်ကို ချက်ချင်းဆောင်ရွက်နိုင်မှာ မဟုတ်သေးပါဘူး၊ ကြွက်သန္ဓေသားတွေလောက် မသိရှိရသေးတဲ့အပြင် လူလုပ်ကြွက်သန္ဓေသားတွေကို ထိထိရောက်ရောက်မလေ့လာနိုင်သေးတာကလည်း လူသားသန္ဓေသား ပြုလုပ်ဖို့အတွက် အလှမ်းဝေးနေပါတယ်၊ ဒါပေမဲ့အခုအချိန်က လူလုပ်လူသားသန္ဓေတု သုတေသနပြုလုပ်ခြင်းနဲ့ပတ်သက်ပြီး ဥပဒေကျင့်ဝတ်နဲ့အညီ ဆောင်ရွက်သွားဖို့ အချိန်ကောင်းဖြစ်ပါတယ်"လို့ လန်ဒန် ဖရန်ဆစ်ခရစ်တက္ကသိုလ်မှ ဒေါက်တာ'ဂျိမ်းစ်ဘရစ္စကိုး'က ပြောပြခဲ့ပါတယ်။
ပင်မစတမ်ဆဲလ်က ပြုလုပ်တဲ့ သန္ဓေသားတွေကို သိပ္ပံပညာရှင်များ ပိုမိုလေ့လာမယ်ဆိုရင် သန္ဓေသားအတုတွေနဲ့ သဘာဝသန္ဓေသားတွေ ပူးပေါင်းနိုင်တော့မှာ ဖြစ်ပါတယ်လို့ ပရော်ဖက်ဆာ'ပေါလ်တယ်ဆာ'က StatNews ကို ပြောကြားခဲ့ပါတယ်။
Source: The Guardian
#Yangon_Media_Group
#World_Art
Published 6 August 2022
အသက် ၇၀ အရွယ်ရှိ 'ချောင်ရှန်ကင်'ဟာ မာကျောက်ရုပ်တွေရဲ့ ပုံသဏ္ဍာန်နဲ့ တရုတ်စာလုံးတွေကို ထုထွင်းဖန်တီးသူဖြစ်ပြီး ဟောင်ကောင်က မာကျောက်ရုပ်ထုလုပ်သူတွေထဲမှာ နောက်ဆုံးလက်ကျန်သူတွေထဲက တစ်ဦးဖြစ်ပါတယ်။
#Yangon_Media_Group
Published: 6 August 2022
အမေရိကန်နိုင်ငံ အိမ်ဖြူတော်အနီးမှာ မိုးကြိုးပစ်ခံရလို့ လူနှစ်ဦးသေဆုံးပြီး ကျန်တဲ့ နှစ်ဦးက စိုးရိမ်ရတဲ့ အခြေအနေမှာရှိတယ်လို့ အမေရိကန် မြို့တော်ရဲတပ်ဖွဲ့ကပြောပါတယ်။ အိမ်ဖြူတော် လမ်းတစ်ဖက်က ပန်းခြံအသေးကလေးဖြစ်တဲ့ လာဖာယက်တီရင်ပြင်မှာ ကြာသပတေးနေ့ ည(၇)နာရီခန့်က မိုးတွေသည်းထန်စွာရွာပြီး မိုးကြိုပစ်ခဲ့ပါတယ်။
မိုးကြိုးပစ်ခံရလို့ အမျိုးသားနှစ်ဦးနှင့် အမျိုးသမီးနှစ်ဦးတို့ကို အသက်အန္တရာယ်စိုးရိမ်ရတဲ့ ဒဏ်ရာတွေနှင့် ချက်ခြင်းဆေးရုံပို့ဆောင်ခဲ့ရတယ်လို့ ဝါရှင်တန် မီးသတ်နှင့်အရေးပေါ်ဌာနက သတင်းထုတ်ပြန်ခဲ့ပါတယ်။
အဲဒီလူနာလေးဦးထဲက အသက် ၇၅နှစ်အရွယ် ဒွန်နာမူလာနှင့် ၇၆နှစ်အရွယ် ဂျိမ်းစ်မူလာတို့နှစ်ဦးဟာ နောက်တစ်နေ့မနက်မှာ သေဆုံးခဲ့ရတယ်လို့ မြို့ပြရဲဌာနက အတည်ပြုသတင်းထုတ်ပြန်ပါတယ်။ သူတို့နှစ်ဦးစလုံးဟာ ဝစ်ကွန်ဆင်ပြည်နယ် ဂျန်နက်ဗီလီက ဖြစ်ကြပါတယ်။ ကျန်နှစ်ဦးကတော့ စိုးရိမ်ရတဲ့ အနေအထားမှာရှိပါတယ်။
ကြေကွဲစရာ အသက်ဆုံးရှုံးမှုတွေအတွက် ဘိုင်ဒင်အစိုးရက စိတ်ထိခိုက်ရပါတယ်လို့ အိမ်ဖြူတော် ပြောရေးဆိုခွင့်ရ အမျိုးသမီး ကာရင်းဂျိန်းပီယဲလ်က ပြောပါတယ်။ အသက်လုနေရတဲ့ နှစ်ဦးအတွက်လည်း ဆုတောင်းပေးနေပါတယ်လို့ သူမက ဆက်ပြောပါတယ်။
မျက်မြင်သက်သေတစ်ဦးဖြစ်တဲ့ ဒေးဗစ်ရု(သ်)က ကြောက်စရာကောင်းတဲ့ ဝုန်းခနဲအသံကြီးကြားလိုက်ရတယ်” လို့ အင်န်ဘီစီ သတင်းဌာနကိုပြောပါတယ်။
မိုးကြိုးပစ်အပြီးမှာပဲ အမေရိကန်လျှို့ဝှက်ထောက်လှမ်းရေးတွေနှင့် ပန်းခြံရဲတွေဟာ အခင်းဖြစ်ပွားတဲ့နေရာ ရောက်လာကြတယ်လို့ မီးသတ်နှင့်အရေးပေါ်ဌာန ပြောရေးဆိုခွင့်ရသူ ဗစ်တို မက်ဂီအိုလိုကပြောပါတယ်။
“လျှပ်စီးတွေလက်နေရင် အိမ်တွင်းထဲ ဝင်သင့်တယ် ဒါမှမဟုတ် ဘေးကင်းတဲ့နေရာသွားသင့်တယ် သစ်ပင်တွေဟာ စိတ်ချလုံခြုံတဲ့နေရာမဟုတ်ဘူး။ လူတွေက သစ်ပင်အောက်မှာ ခိုနားဖို့လုပ်ရင် သိပ်ပြီး အန္တရာယ်ရှိတယ်” လို့ မက်ဂီအိုလိုက ဆက်ပြောပါတယ်။
သမ္မတဟောင်း အင်ဒရူးဂျက်ဆင်ရဲ့ရုပ်တုကနေ ပေ၁၀၀လောက်ကွာတဲ့နေရာမှာ လူလေးဦးလဲကျနေတာကိုတွေ့ရတယ်လို့ ဝါရှင်တန်ပို့စ်က သတင်းရေးသားပါတယ်။
ကြာသပတေးနေ့ညနေပိုင်းက ဝါရှင်တန်မှာ မိုးကြိုးမုန်တိုင်းတွေပြင်းပြင်းထန်ထန်ကျရောက်ခဲ့ပြီး မိုးကြိုးပစ်တာဟာ မိုးကြိုး မုန်တိုင်းအတွင်းဖြစ်ပွားခဲ့တာပါ။
Source:AFP
#DailyNews
Published - 6 August 2022
၁။ ကုန်စည်ရှားပါးလာမှု၊ ပို့ဆောင်ခစရိတ်တွေ မြင့်လာမှုကြောင့် အဝေးပြေးကုန်စည်ပို့ဆောင်ရေးလုပ်ငန်းအချို့ခက်ခဲနေ
၂။ တရုတ်နှင့်ထိုင်ဝမ်အရေးကိစ္စ မြန်မာသင်္ဘောသားများအား သက်ရောက်မှုအချို့ ရှိလာနိုင်
၃။ အလုပ်အကိုင်ရှားပါးခြင်းနှင့် လူခေါ်ပွဲစားတွေကြောင့် ထိုင်းသို့ တရားမဝင် ဝင်ရောက်သူများပြားနေ
၄။ မာကျောက်ရုပ်များ ထုဆစ်ဖန်တီး၍ အသက်မွေးဝမ်းကြောင်းပြုနေသည့် ဟောင်ကောင်အဘိုးအို... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
Published 6 August 2022
ထိုင်ဝမ် ကာကွယ်ရေးဝန်ကြီးဌာန၊ သုတေသနနှင့်ဖွံ့ဖြိုတိုးတက်ရေးဌာနရဲ့ ဒုတိယအကြီးအကဲ ဟာ ဟိုတယ်အခန်းတစ်ခု အတွင်းမှာ သေဆုံးနေတာကိုတွေ့ကြရတယ်လို့ ထိုင်ဝမ်ရဲ့ တရားဝင် ဗဟိုသတင်းအေဂျင်စီက ပြောပါတယ်။
စနေနေ့မနက်ပိုင်းက ထိုင်ဝမ်တောင်ပိုင်းက ဟိုတယ်တစ်ခုရဲ့ အခန်းတစ်ခန်းထဲမှာ ထိုင်ဝမ်စစ်တပ်ပိုင် အမျိုးသား ချွန်ရှန် သိပ္ပံနှင့်နည်းပညာအင်စတီကျူရဲ့ ဒုတိယအကြီးအကဲဖြစ်သူ အောင်းရန်လီရှင်းဟာ သေဆုံးနေတာတွေ့ကြရတယ်လို့ စီအင်အေရဲ့ သတင်းကို ကိုးကားပြီး ရိုက်တာက ရေးသားပါတယ်။ အာဏာပိုင်တွေဟာ သေဆုံးရတဲ့အကြောင်ရင်းကို စုံစမ်း ဖော်ထုတ်နေကြပါတယ်။
အောင်းရန်ဟာ အဲဒီတောင်ပိုင်းခရိုင်ပင်တန်းကို အလုပ်ကိစ္စနှင့်ရောက်ရှိနေတာဖြစ်တယ်လို့ စီအင်န်အေက ပြောပါတယ်။ သူဟာ ဒုံးကျည်မျိုးစုံထုတ်လုပ်ရေး စီမံကိန်းတွေကို ကြီးကြပ်ဖို့ ယခုနှစ်အစောပိုင်းမှာ ဒီရာထူးတာဝန်ပေးအပ်ခြင်းခံရတာ ဖြစ်ပါတယ်လို့ စီအင်အေက သတင်းထုတ်ပြန်ပါတယ်။
ထိုင်ဝမ်စစ်တပ်က ဒုံးကျည်ထုတ်လုပ်မှုကို နှစ်ဆတိုးထုတ်ဖို့ ရည်မှန်းခဲ့ပြီး ယခုနှစ်မှာ ဒုံးကျည် အစင်း ၅၀၀ နီးပါး ထုတ်လုပ်ပြီး ဖြစ်ပါတယ်။ ဒီလိုထုတ်လုပ်မှုတိုးမြှင့်တာဟာ တရုတ်ရဲ့ စစ်ရေးအရခြိမ်းခြောက်မှုတွေ ကြီးထွားလာနေတဲ့ အချိန်မှာ ဆောင်ရွက်နေတာဖြစ်ပါတယ်။
Source: Reuters
#Ou-Yang_Li-hsing
#Taiwan_deputy_head_missile_dept_found_dead
#Taiwan_China
#World_News
Published 6 August 2022
လော့စ်အိန်ဂျလိစ်လမ်းဆုံတစ်ခုကို အရှိန်မြှင့်တင်ပြီးဖြတ်သန်းမောင်းနှင်ခဲ့ကာ ကားတိုက်မှုဖြစ်စေခဲ့တဲ့ တရားခံယာဉ်မောင်းကို ကယ်လီဖိုးနီးယားအဝေးပြေးကင်းလှည့်တပ်ဖွဲ့က ဖမ်းဆီးခဲ့ကြောင်း သတင်းရရှိထားပါတယ်။
လမ်းဆုံမှာ အရှိန်ပြင်းပြင်းနဲ့ ဖြတ်သန်းခဲ့တာကြောင့် ကားတိုက်မှုများဖြစ်ပွားခဲ့ပြီး မီးလောင်ကျွမ်းခဲ့တဲ့အပြင် ကလေးငယ်တစ်ဦး၊ ကိုယ်ဝန်သည်တစ်ဦးနဲ့ ဗိုက်ထဲကသန္ဓေသားအပါအဝင် လူ ၆ ဦးသေဆုံးခဲ့ပါတယ်။
ကြာသပတေးနေ့မွန်းလွဲပိုင်းမှာ ယာဉ်တိုက်မှုဖြစ်ခဲ့တဲ့ကားက မာစီဒီးစ်ဘန့်ဇ်အမျိုးအစားဖြစ်ပြီး မောင်းနှင်လာသူက အသက် ၄၀ အရွယ် သူနာပြုအမျိုးသမီးတစ်ဦးဖြစ်ပါတယ်။
ယခုအခါ ထိုအမျိုးသမီးယာဉ်မောင်းကို မော်တော်ယာဉ်ဖြင့်လူသတ်မှု၊ ပေါ့ဆမှုတို့နဲ့ တရားစွဲဆိုထားကြောင်း Fox LA က ဖော်ပြခဲ့ပါတယ်။
အခင်းဖြစ်ပွားရာ လော့စ်အိန်ဂျလိစ် အနောက်ပိုင်း ဝင်ဆာဟေးလ်စ်ဒေသမှ မျက်မြင်သက်သေတွေက Fox News ကိုပြောကြားရာမှာ ကားတိုက်တဲ့အသံက ဗုံးပေါက်ကွဲသံလို အကျယ်ကြီးဖြစ်ကြောင်း၊ ကားထဲက ကလေးတစ်ယောက်လွင့်ထွက်လာပြီး ဓာတ်ဆီဆိုင်ထဲပြုတ်ကျသွားကြောင်း သိရပါတယ်။
"အမျိုးသမီးတစ်ဦးက လွင့်ထွက်လာတဲ့ကလေးကို ကောက်ယူပြီး ဆိုင်ထဲကို ပြေးဝင်သွားပါတယ်၊ ဒါပေမဲ့ ကလေးကအသက်မရှိတော့ဘူးလို့ ပြောနိုင်ပါတယ်" လို့ 'အယ်လ်ဖွန်ဆိုဝေါ့ဒ်'က ပြောပြခဲ့ပါတယ်။
"အဆိုးဆုံးကတော့ အော်သံကြီးကြားလိုက်ရတာပါပဲ၊ မီးလောင်တဲ့ကားထဲက အသံလား ဘယ်ကလဲဆိုတာ မသိလိုက်ပါဘူး"
ကားတိုက်တဲ့နေရာအနောက်ဘက် ၂ စီး ၃ စီးအကွာမှာရှိနေခဲ့တဲ့ မျက်မြင်သက်သေတစ်ဦးကလည်း အသက်ရှင်နေတာပဲ ကံကောင်းခဲ့ကြောင်း၊ မီးလောင်နေတဲ့ကားထဲကလူတွေ အော်ဟစ်ပြီး ရုန်းကန်ထွက်ခဲ့ကြကြောင်း Fox News ကိုပြောပြခဲ့ပါတယ်။
အဆိုပါယာဉ်တိုက်မှုဖြစ်စဉ်အတွင်း စုစုပေါင်း ၆ ဦးသေဆုံးပြီး ၈ ဦးဆေးရုံတင်လိုက်ရပါတယ်။
ကား ၇ စီး တိုက်မိခဲ့ပြီး ၃ စီး မီးလောင်ကျွမ်းခဲ့ပါတယ်။
ကယ်လီဖိုးနီးယားအဝေးပြေးကင်းလှည့်အဖွဲ့မှ အရာရှိက ထိုနေရာမှာ စစ်ပွဲဖြစ်ပွားနေသလိုပဲလို့ ပြောပြခဲ့ပါတယ်။
မာစီဒီးစ်ယာဉ်မောင်းလည်း ယာဉ်တိုက်မှုအတွင်း အပြင်းအထန်ဒဏ်ရာရရှိခဲ့ပါတယ်။
Source: Fox News
#Yangon_Media_Group
#World_Health
Published 6 August 2022
ပူပြင်းလာတဲ့ရာသီဥတုနဲ့ စိုစွတ်မှုတို့ကြောင့် ခြင်တွေသောင်းကျန်းပြီး လူသားတွေလည်း စိတ်ညစ်ကြရပါတယ်။
တစ်ခါတလေမှာ ခြင်က ကိုယ့်ကိုပဲရွေးကိုက်နေသလားလို့တောင် ထင်ရတတ်ပါတယ်။
ခြင်ထီးတွေက ပန်းဝတ်ရည်တွေကိုသာ သောက်သုံးကြပေမယ့် ခြင်မတွေကတော့ မျိုးဥပွားဖို့အတွက် သွေးစုပ်ယူရန် လိုအပ်ပါတယ်။
ခြင်တွေက စိတ်ပျက်စရာကောင်းရုံမက ခြင်ကိုက်ခံရခြင်းမှ ကူးစက်တဲ့ရောဂါတွေကြောင့် နှစ်စဉ်လူဦးရေ ၃ သန်းလောက် သေဆုံးနေကြရပါတယ်။
ဒါကြောင့် ထိုခြင်မတွေက ကမ္ဘာပေါ်မှာ အန္တရာယ်အရှိဆုံး မျိုးစိတ်တွေထဲက တစ်မျိုးလို့ ခေါ်ဆိုနိုင်ပါတယ်။
၂၀၁၅ ခုနှစ် အမေရိကန်သုတေသီများရဲ့တွေ့ရှိချက်အရ ခြင်တွေကကိုက်တော့မယ်ဆိုရင် အနံ့၊ အမြင်၊ အပူငွေ့တို့ကို အာရုံခံပြီး ရွေးချယ်ကိုက်တတ်ကြပါတယ်။
အချို့အချက်တွေကို ပြုပြင်ပြောင်းလဲလို့ရပေမယ့် အချို့အချက်တွေကတော့ မျိုးရိုးဗီဇနဲ့ သက်ဆိုင်နေပါတယ်။
*ပူနွေးနေတတ်သူ*
ချွေးထွက်တဲ့အခါ လက်တစ်အက်ဆစ်၊ ယူရစ်အက်ဆစ်၊ အမိုးနီးယားနဲ့ အခြားဒြပ်ပေါင်းများ ထွက်လာပါတယ်။
အဲဒီကအနံ့တွေက ခြင်တွေကို ဆွဲဆောင်နိုင်ပါတယ်။
လှုပ်ရှားမှုလုပ်တဲ့အခါ ချွေးထွက်လာပြီး လက်တစ်အက်ဆစ်တွေ စုပြုံလာပြီးတော့ ခြင်တွေစုဝေးလာစေပါတယ်။
ခြင်မကိုက်အောင် အခန်းကိုခပ်အေးအေးလေးဖြစ်အောင် ထားသင့်ပါတယ်။
*အရက်သေစာသောက်သုံးသူ*
ခြင်မတွေက အယ်လ်ကိုဟောကို နှစ်သက်ကြပါတယ်။
၂၀၀၂ ခုနှစ်က ဂျပန်သုတေသီတွေစမ်းသပ်ကြရာမှာ ခြင်မတွေက ဘီယာသောက်ထားတဲ့ သူတွေကို ပိုပြီးပစ်မှတ်ထားလေ့ရှိပါတယ်။
အယ်လ်ကိုဟောကြောင့် ကိုယ်အပူချိန်တက်လာခြင်းဖြင့် ခြင်တွေရွေးကိုက်ရတာဖြစ်ပါတယ်။
*သွေးအမျိုးအစား*
သွေးအုပ်စု’အို’သမားတွေက သွေးအုပ်စု’အေ’သမားတွေထက် နှစ်ဆလောက်ပိုပြီး အကိုက်ခံရတတ်ပါတယ်။
သွေးအုပ်စု’ဘီ’ကတော့ အလယ်အလတ်လောက်မှာရှိပြီး ‘အေဘီ’သမားတွေအတွက်တော့ မသိရှိရသေးပါဘူး။
*အဝတ်အစားအရောင်*
လူတွေလိုပဲ ခြင်တွေဟာလည်း အမြင်ပေါ်မူတည်ပြီး ပစ်မှတ်ရွေးချယ်လေ့ရှိပါတယ်။
ခြင်တွေ မျက်စိမကျစေချင်ရင် အရောင်တောက်တဲ့ဟာတွေ ဝတ်ဆင်သင့်ပါတယ်။
အမည်း အမှောင် အနီတွေဝတ်ထားရင် ခြင်တွေပိုပြီး မျက်စိကျနေမှာဖြစ်ပါတယ်။
*အရေပြား*
အရေပြားပေါ်မှာရှိနေတဲ့ ဘက်တီးရီးယားတွေက ခြင်တွေကို ဆွဲဆောင်စေပါတယ်။
မျက်နှာမှာ ဘက်တီးရီးယားရှိတတ်သူတွေထက် ခန္ဓာကိုယ်မှာ ဘက်တီးရီးယားရှိသူတွေကို ခြင်ပိုကိုက်တတ်ပါတယ်။
Source: The Jerusalem Pos.
#Yangon_Media_Group
Page 590 of 776