#World_Archaeology
Published 8 August 2022
နှစ်ပေါင်း ၅၀၀ သက်တမ်းရှိ စပိန်ခေတ်မတိုင်ခင်က ဆောက်လုပ်ခဲ့တဲ့ ဘုရားကျောင်းကြီးရဲ့ အပေါ်ဆုံးနေရာမှာ စပိန်ကိုလိုနီခေတ်ကလို ယူဆရတဲ့ အုတ်ဂူထဲမြှုပ်နှံထားတဲ့အလောင်း ၃ ခုကို ပီရူးရှေးဟောင်းသုတေသနအဖွဲ့က တွေ့ရှိခဲ့ကြောင်း ကြာသပတေးနေ့က တင်ပြခဲ့ပါတယ်။
#Yangon_Media_Group
Published 8 August 2022
ကျူဘားနိုင်ငံ မြောက်ပိုင်းကမ်းခြေမှာရှိတဲ့ လောင်စာသိုလှောင်ရုံတစ်ခုမှာ မီးလောင်ကျွမ်းနေတာကို တနင်္ဂနွေနေ့က သုံးရက်မြောက်အဖြစ် ဆက်လက်ကြိုးစား ငြှိမ်းသတ်နေပါတယ်။ အဲဒီလောင်စာသိုလှောင်စခန်းမီးလောင်မှုကြောင့် လူတစ်ဦး အနည်းဆုံးသေဆုံးပြီး ၁၂၂ ဦးထိခိုက်ဒဏ်ရာတွေရရှိခဲ့ကြပါတယ်။ လျှပ်စစ်ဓာတ်အားမလုံလောက်မှုတွေနှင့် ရင်ဆိုင်နေရဲ့ ကျူးဘားအတွက် အခက်ထပ်ကြုံရတာဖြစ်ပါတယ်။
မက်တန်ဇာဆိပ်ကမ်းရဲ့ လောင်စာသိုလှောင်စခန်းက သိုလှောင်ကန်တစ်ကန်ကို သောကြာနေ့ ညက မိုးကြိုးပစ်ခံရပြီး မီးစတင်လောင်ကျွမ်းခဲ့ပါတယ်။ အဲဒီကနေ စနေမနက်မှာ နောက်ထပ်ကန်တစ်ကန်ကိုမီးကူးစက်သွားပြီးနောက် ပေါက်ကွဲမှုတွေ ဆက်တိုက်ဖြစ်ပွားခဲ့ပါတယ်။
တနင်္ဂနွေနေ့ နှောင်းပိုင်းမှာတော့ ပထမကန်မီးငြိမ်းသွားပါတယ်။ ဒါပေမယ့် မီးခိုဖြူတွေကထွက်နေဆဲဖြစ်ပြီး ဒုတိယကန်က မီးကတော့ ဆက်လက်ကူးစက်လောင်ကျွမ်းနေခဲ့ပါတယ်။
ကျူဘားရဲ့ မီးသတ်သမားတွေဟာ မက္ကဆီကိုနှင့် ဗင်နီဇွဲလားက မီးသတ်ကျွမ်းကျင်သူတွေနှင့်အတူ တနင်္ဂနွေနေ့က မီးတောက်ကြီးကို အနားက အခြားကန်တွေကို မကူးစက်အောင် ထိန်းခဲ့ကြပါတယ်။
“ မီးအပြင်းဆုံးလောင်နေတဲ့ကန်နှင့်ကပ်လျက် တတိယကန် မပျက်စီးအောင်ကျွန်တော်တို့ထိန်းထားကြတယ်။ မွန်းလွဲပိုင်းမှာ လေပြင်းတိုက်လိုက်တာနှင့် မီးက ပိုကြီးသွားပြီး အနားက ရေနံလှောင်ကန်တွေနှင့်ပိုနီးလာတယ်” လို့ မက်တန်ဇာ ပြည်နယ် အုပ်ချုပ်ရေးမှူး မာရီယိုဆာဘိုင်းလိုရင်ဇိုက ပြောပါတယ်။
ယခုအချိန်ထိ အဲဒီနေရာက ဒေသခံ ၅၀၀၀ခန့်ကို နေရာရွှေ့ပြောင်းထားပြီးဖြစ်ပါတယ်။ တနင်္ဂနွေမနက်မှာတော့ အနီးအနား ကန်တွေထဲက ရေနံတွေကို နိုင်ငံပိုင်ရေနံကုမ္ပဏီက ရွှေ့ပြောင်းသယ်ယူနေခဲ့ကြပါတယ်။
ကာရစ်ဘီယံကျွန်းနိုင်ငံဖြစ်တဲ့ ကျူးဘားမှာ လောင်စာမလုံလောက်လို့ လျှပ်စစ်မီးပြတ်တောက်မှုတွေကြုံနေရတဲ့အချိန်မှာ ယခု ရေနံလှောင်ကန်ပေါက်ကွဲမှုကြောင့် ပိုပြီးအခြအနေဆိုးရွားသွားစေပါလိမ့်မယ်။
“ပြည်သူတွေအတွက် လျှပ်စစ်မီး အနည်းဆုံးလိုအပ်ချက်ရရှိအောင် ဆီဝယ်ဖို့ ငွေအနည်းအပါး ရင်းနီးဖို့လိုတယ်။ ဒီပြဿနာဟာ ကျွန်တော်တို့ယနေ့ရင်ဆိုင်နေရတဲ့ပြဿနာပါ။ ကျွန်တော်တို့သမ္မတကြီးကတော့ ဒါဟာ ရေတိုပြဿနာမဟုတ်ဘူးလို့ပြောထားပါတယ်” လို့သူကဆက်ပြောပါတယ်။
Source: AFP
#Fuel_depot_Fire
#Cuba_Fuel_Depot_Fire
#Cuba_Power_Shortage
#DailyNews
Published - 8 August 2022
၁။ ပို့ကုန်ရငွေ၏ ၆၅ ရာခိုင်နှုန်းကို မြန်မာကျပ်ငွေဖြင့် လဲလှယ်ခွင့်ပြုချက်အား ယနေ့မှစတင်၍ ကျင့်သုံးနေဟုဆို
၂။ ပြည်တွင်းစားသုံးဆီဈေးနှုန်းများ ဈေးကောင်းနေ
၃။ မုန်တိုင်းငယ်အရှိန်ကြောင့် ဒေသ(၇)ခုတွင် မိုးသက်လေပြင်းတိုက်ခတ်ပြီး သဘာဝဘေးကြုံမည်
၄။ စပိန်ခေတ်မတိုင်မီ ပီရူးဘုရားကျောင်းတွင် ကိုလိုနီခေတ်ကဟုယူဆရသည့် အလောင်းမြှုပ်နှံရာ အုတ်ဂူ (၃) ခု တွေ့ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
Published: 8 August 2022
ထိုင်ဝမ်ဟာ အမေရိကန်ရဲ့ အစိတ်အပိုင်းတစ်ခုမဟုတ်ဘဲ တရုတ်ရဲ့ ပိုင်နက်သာဖြစ်တယ် လို့ တရုတ်နိုင်ငံခြားရေးဝန်ကြီး ဝမ်ယီက တနင်္ဂနွေနေ့ကပြောကြားလိုက်ပါတယ်။
ဒါဟာ အမေရိကန်အောက်လွှတ်တော် ဥက္ကဋ္ဌ နန်စီပလိုစီ ထိုင်ဝမ်သွားရောက်ပြီးကတည်းက အမေရိကန်မူဝါဒကို ဆန့်ကျင်တဲ့ တရုတ်ရဲ့နောက်ဆုံး သံတမန်ရေးရာ ပြင်းထန်စွာပြောဆိုမှုဖြစ်ပါတယ်။
အမေရိကန်ဟာ ထိုင်ဝမ်ပြဿနာပေါ် တစ်ပတ်ရိုက် ဆက်ဆံဆောင်ရွက်မှုတွေလုပ်နေပြီး ထိုင်ဝမ်နှင့်ပတ်သက်လို့ တရုတ်ရဲ့ ဆောင်ရွက်မှုဟာ သင့်လျော်ပြီး ဥပဒေနှင့်ညီတယ်လို့ သူကပြောပါတယ်။ အဲဒီအပြင် နိုင်ငံရဲ့ အလေးအမြတ်ထားတဲ့ အချုပ်အခြာအာဏာနှင့် နယ်မြေတည်တံ့ခိုင်မြဲမှုကို စောင့်ကြပ်ဖို့ ရည်ရွယ်တာဖြစ်တယ်လို့လည်း ဝမ်က ဘင်္ဂလားဒေ့ရှ်နိုင်ငံကို သွားရောက်နေတဲ့ ခရီးစဉ်အတွင်း ပြောကြားခဲ့ပါတယ်။
Source: Reuters
#China_US
#China_Taiwan
#China_FM_Wang_Yi
#World_Technology
Published 8 August 2022
ခန္ဓာကိုယ်မှာ တက်တူးထိုးထားရုံဖြင့် ကျန်းမာရေးပြဿနာများကို အလိုအလျောက်သတိပေးနိုင်မယ့် စက်ပစ္စည်းကို တောင်ကိုရီးယားက မကြာခင်ထုတ်လုပ်နိုင်ဖွယ်ရှိနေပါတယ်။
ဒယ်ဂျွန်းမြို့ ကိုရီးယားအဆင့်မြင့်သိပ္ပံနှင့်နည်းပညာတက္ကသိုလ် (KAIST)မှ သုတေသီများက အီလက်ထရွန်နစ်တက်တူးမင်ကို တီထွင်လိုက်ကာ ထိုတက်တူးမင်ကို သတ္တုအရည်နဲ့ ဇီဝလျှပ်ကူးအဖြစ်လုပ်ဆောင်ပေးမယ့် ကာဗွန်နာနိုကျူ့တို့ကို အသုံးပြုပြီး ပြုလုပ်ထားတာဖြစ်ပါတယ်။
ECG လိုစက်ပစ္စည်း ဒါမှမဟုတ် အာရုံခံပစ္စည်းတစ်ခုခုနဲ့ချိတ်ဆက်လိုက်တဲ့အခါ လူရဲ့နှလုံးခုန်နှုန်းနဲ့ ဂလူးကိုစ်ဓာတ်၊ လက်တိတ်ဓာတ်စတဲ့ အခြားအရေးပါတဲ့အချက်အလက်တွေကို ဖန်သားပြင်မှာ ဖော်ပြပေးမှာဖြစ်ပါတယ်။
သုတေသီများက ဇီဝအာရုံခံပစ္စည်းများနဲ့ ဖြန့်ဝေချိတ်ဆက်နိုင်ဖို့ ရည်ရွယ်နေကြပါတယ်။
"အနာဂတ်မှာ တက်တူးမင်နဲ့ ပေါင်းစပ်ထားတဲ့ ကြိုးမဲ့ဆားကစ်ပြားလေးကို ချိတ်ဆက်ပြီး ခန္ဓာကိုယ်နဲ့ ပြင်ပမှာပြသမယ့်စက်တို့ကြား အပြန်အလှန်ဆက်သွယ်နိုင်ဖို့ မျှော်မှန်းထားပါတယ်" လို့ ဦးဆောင်သုတေသနပြုသူ'စတိဗ်ပါ့ခ်'က ပြောကြားလိုက်ပါတယ်။
လေ့လာချက်အရ ဖန်သားပြင်စက်ကို ကြိုက်တဲ့နေရာမှာ ထားရှိနိုင်ပါတယ်။
တက်တူးမင်က ခန္ဓာကိုယ်တွင်းထဲ ဝင်ရောက်စရာမလိုဘဲ ငွေရောင်သတ္တုပျော့ဂယ်လီယံကရတဲ့ အမှုန်တွေနဲ့ ပြုလုပ်ထားပါတယ်။
ပလတ်တီနမ်အုပ်ထားတဲ့ ကာဗွန်နာနိုကျူ့တွေက လျှပ်ကူးပေးနိုင်ပြီး အကြမ်းခံနိုင်ပါတယ်။
သတ္တုအရည်ကြောင့် အရေပြားမှာထိုးတဲ့အခါ ပွတ်တိုက်မိရင်တောင် တက်တူးကပျက်မသွားဘူးလို့ 'ပါ့ခ်'က ဆိုပါတယ်။
Source: Reuters
#Yangon_Media_Group
#World_News
Published 8 August 2022
ယခုနှစ်နွေရာသီ ဥရောပတခွင်မှာ အပူလှိုင်းများဖြတ်သန်းလျက်ရှိပြီး အပူချိန်စံချိန်တင် မြင့်မားနေတဲ့အချိန်မှာ အီတလီမှ 'ပို'မြစ်ဟာလည်း မိုးခေါင်ရေရှားမှုဒဏ်ကြောင့် ရေခန်းခြောက်လာခဲ့ကာ မြစ်ရေမျက်နှာပြင် အလွန်နိမ့်ဆင်းသွားခဲ့ပြီး ဒုတိယကမ္ဘာစစ်အတွင်း ရေအောက်နစ်မြုပ်နေခဲ့တဲ့ဗုံးတစ်လုံးကို တွေ့ရှိခဲ့ကြပါတယ်။
မန်တူအာမြို့အနီး ဘော်ဂိုဗာဂျီလီယိုမြောက်ပိုင်းရွာနားမှာ ပေါင်ချိန်၁၀၀၀ ရှိတဲ့ဗုံးကို ဇူလိုင် ၂၅ ရက်နေ့ကတွေ့ရှိခဲ့တာဖြစ်ပါတယ်။
စစ်တပ်မှ ကျွမ်းကျင်သူများက ဗုံးမပေါက်ကွဲနိုင်အောင် ဗုံးဖြုတ်ခဲ့ကြပြီးနောက် တနင်္ဂနွေနေ့က ဘေးကင်းစိတ်ချရတဲ့နေရာမှာ ထိန်းချုပ်ဖောက်ခွဲပစ်လိုက်ပါပြီ။
"မိုးခေါင်မှုကြောင့် မြစ်ရေမျက်နှာပြင်ကျဆင်းလာတဲ့အချိန် ပိုမြစ်ကမ်းနံဘေးမှာ တံငါသည်တွေက အဆိုပါဗုံးကိုတွေ့ရှိခဲ့တာဖြစ်ပါတယ်" လို့ ဗိုလ်မှူးကြီး'မာကိုနာဆီ'က ပြောပြပါတယ်။
ဗုံးကိုဖယ်ရှားရတာကလည်း လွယ်ကူတဲ့အလုပ်မဟုတ်ပါဘူး။
ဗုံးဖယ်ရှားရေး မလုပ်ဆောင်ခင် အနီးနားပတ်ဝန်းကျင်က နေထိုင်သူ ၃ ထောင်ခန့်ကို ပြောင်းရွှေ့ခဲ့ရပါတယ်။
ထိုတဝိုက်က လေကြောင်းသွားလာမှုစနစ်ကို ပိတ်ပစ်ခဲ့ရတဲ့အပြင် ရေကြောင်းလမ်းတလျှောက် သွားလာခြင်းနဲ့ အနီးနားရှိ မီးရထားလမ်း၊ ကုန်းလမ်းသွားလာခြင်းများကိုပါ ရပ်ဆိုင်းပစ်ခဲ့ရပါတယ်။
"အစကတော့ နေထိုင်သူအချို့က မပြောင်းဘူးလို့ ငြင်းဆန်နေကြပေမယ့် နောက်ရက်အနည်းငယ်ကြာတော့ အားလုံးကိုနားဝင်အောင် ပြောပြနိုင်ခဲ့ပါတယ်" လို့ ဘော်ဂိုဗာဂျီလီယိုမြိုတော်ဝန်'ဖရန်ဆက်စ်ကိုအေပေါ်တီ'က ဆိုလိုက်ပြီး လူတွေသာမရွှေ့ပြောင်းဘူးဆိုရင် ဗုံးဖယ်ရှားရေးလုပ်ငန်းကို ရပ်ဆိုင်းလိုက်ရနိုင်ပါတယ်။
အမေရိကန်ထုတ်ဗုံးလက်နက်ကြီးကို ဗုံးရှင်းလင်းရေးအင်ဂျင်နီယာများက ဖယ်ရှားလိုက်ကြကာ စစ်တပ်ရဲ့ပြောကြားချက်အရ ထိုဗုံးထဲမှာ ပေါက်ကွဲရေးပစ္စည်း ၂၄၀ ကီလိုဂရမ်ခန့်ပါဝင်ပါတယ်။
အဲဒီနောက် ရဲတွေရဲ့လိုက်ပါစောင့်ကြပ်မှုနဲ့အတူ ဗုံးရှင်းလင်းရေးအဖွဲ့က ၄၅ ကီလိုမီတာခန့်ဝေးကွာတဲ့ မီဒိုလေဒေသရှိ ကျောက်တူးမိုင်းထံသို ဗုံးကိုသယ်ဆောင်သွားခဲ့ပြီး ဖောက်ခွဲဖျက်ဆီးလိုက်ပါတယ်။
အီတလီနိုင်ငံရဲ့ အရှည်ဆုံး ပိုမြစ်နားတဝိုက်မှာ ပြီးခဲ့တဲ့လက အရေးပေါ်အခြေအနေထုတ်ပြန်ထားပါတယ်။
ပိုမြစ်အနီးနားဒေသတွေဟာ နိုင်ငံရဲ့ စိုက်ပျိုးရေးထုတ်လုပ်မှု ၃ ပုံ ၁ ပုံခန့်အထိရှိပြီး နှစ်ပေါင်း ၇၀ အတွင်း အဆိုးရွားမိုးခေါင်ရေရှားမှုကို ကြုံတွေ့နေရတာဖြစ်ပါတယ်။
Source: Reuters
#Yangon_Media_Group
#World_Health
Published 8 August 2022
သွေးပေါင်ချိန်တိုင်းတာတဲ့အခါ လက်မောင်းတစ်ဖက်တည်းကို တိုင်းတာတာထက် နှစ်ဖက်စလုံးကိုတိုင်းတာသင့်ကြောင်း သိပ္ပံပညာရှင်များက အကြံပြုလိုက်ပါတယ်။
လက်ရှိလူအများစုတိုင်းတာနေတဲ့အတိုင်း လက်တစ်ဖက်တည်းကိုသာ တိုင်းတာပါက သွေးတိုးရောဂါရှိမှန်းမသိလိုက်ရတဲ့ လူတွေအများကြီးရှိနေနိုင်တယ်လို့ ဆိုပါတယ်။
သွေးတိုးရောဂါရှိတဲ့အခါ နှလုံးဖောက်ခြင်းနဲ့ လေဖြတ်ခြင်းတို့ဖြစ်နိုင်ပြီး ဒါဟာ ကမ္ဘာပေါ်မှာ သေဆုံးရတဲ့အကြောင်းအရင်းတွေထဲက အများဆုံး ၂ မျိုးဖြစ်ပါတယ်။
"သွေးတိုးရောဂါက တစ်ကမ္ဘာလုံးမှာကြုံနေရတဲ့ပြဿနာဖြစ်ပြီး သေချာမထိန်းသိမ်းနိုင်ပါက အသက်အန္တရာယ်ရှိပါတယ်" လို့ အိတ်စ်တာတက္ကသိုလ်မှ ဦးဆောင်သုတေသီဒေါက်တာ'ခရစ္စတိုဖာ ကလာ့ခ်'က ဖော်ပြခဲ့ပါတယ်။
"မည်သည့်လက်မောင်းက အတိကျဆုံးလဲဆိုတာကို မသိနိုင်တာကြောင့် နှစ်ဖက်စလုံးကို တိုင်းတာတာက အကောင်းဆုံးပါ၊ သွေးတိုးလက္ခဏာရှိတယ်လို့ မှန်မှန်ကန်ကန်သိတဲ့အခါ သင့်တော်တဲ့ကုသမှုတွေ ဆောင်ရွက်နိုင်မှာဖြစ်ပါတယ်" လို့ ပြောပြခဲ့ပါတယ်။
လူပေါင်း ၅၃,၁၇၂ ရဲ့အချက်အလက်တွေကို လေ့လာခဲ့ကြပြီး Hypertension ဂျာနယ်မှာ ဖော်ပြခဲ့ကြပါတယ်။
သွေးပေါင်ချိန်ဖိအားဆိုတာက သွေးလွှတ်ကြောတွေကို သွေးတွေက ဘယ်လောက်အထိဖိအားပေးလဲဆိုတာကို တိုင်းတာတာဖြစ်ပြီး မီလီမီတာမာကျူရီနဲ့ ဖော်ပြပါတယ်။
အပေါ်သွေးက နှလုံးကနေ တစ်ကိုယ်လုံးဆီသို သွေးညှစ်ထုတ်လိုက်တဲ့ နှလုံးရဲ့တွန်းအားကိုဖော်ပြပြီး အောက်သွေးကတော့ နှလုံးခုန်နှုန်း တစ်ချက်နဲ့တစ်ချက်ကြား နှလုံးရပ်နားသွားတဲ့အချိန်မှာ သက်ရောက်နေတဲ့ ဖိအားကို ဆိုလိုပါတယ်။
သွေးပေါင်ချိန်တစ်မျိုးမျိုးက မြင့်တက်လာတယ်ဆိုရင် သွေးကြောတွေနဲ့ အဓိကအင်္ဂါတွေ တင်းကျပ်လာစေပါတယ်။
ဆရာဝန်တွေကတော့ အပေါ်သွေးများခြင်းကို အဓိကထားဂရုစိုက်လေ့ရှိပါတယ်။
လက်မောင်းတစ်ဖက်နဲ့တစ်ဖက်ကြား အပေါ်သွေးကွာခြားချက် ပျမ်းမျှအားဖြင့် ၆.၆ မီလီမီတာမာကျူရီရှိကြောင်း ဒေါက်တာ'ကလာ့ခ်'နဲ့အဖွဲ့က တွေ့ရှိခဲ့ကြပါတယ်။
လက်မောင်းနှစ်ဖက်စလုံးက သွေးပေါင်ချိန်ကိုတိုင်းတာပြီးတဲ့အခါ အပေါ်သွေး ၁၄၀ မီလီမီတာမာကျူရီထက် ပိုများတဲ့သူ ၆,၅၀၀ နီးပါးကို သွေးတိုးရှိကြောင်း ဖော်ထုတ်ခဲ့ကြပါတယ်။
နိုင်ငံတကာမှ လမ်းညွှန်ချက်တွေမှာလည်း လက်မောင်းနှစ်ဖက်စလုံးကို တိုင်းတာသင့်ကြောင်း အကြံပြုထားပေမယ့် ဆေးရုံဆေးခန်းတွေမှာ လူနာများပြီး အချိန်သိပ်မရတာကြောင့် တစ်ဖက်တည်းကိုသာ တိုင်းတာလေ့ရှိပါတယ်။
Source: DailyMail
#Yangon_Media_Group
Page 588 of 776