#World_Health
Published 4 February 2023

အဆီဓာတ်များတဲ့ အစားအစာတွေကို ပုံမှန်စားသောက်ခြင်းဖြင့် ဦးနှောက်ကနေ ကယ်လိုရီထိန်းချုပ်နိုင်စွမ်းကို နိမ့်ပါးစေတယ်လို့ လေ့လာတွေ့ရှိထားပါတယ်။

ကြွက်တွေနဲ့ စမ်းသပ်မှုပြုလုပ်ခဲ့ရာမှာ အဆီဓာတ်များသော ဒါမှမဟုတ် ကယ်လိုရီများသော အစာကျွေးပြီးနောက် စားလိုက်တဲ့အစာကို ကယ်လိုရီမျှခြေဖြစ်အောင်ထိန်းညှိပေးတဲ့ ဦးနှောက်ရဲ့လုပ်ဆောင်ချက်ကို ကျဆင်းစေကြောင်း တွေ့ရှိခဲ့ပါတယ်။

ဦးနှောက်ရဲ့လုပ်ဆောင်ချက်တွေကို သိရှိနားလည်ခြင်းဖြင့် အဝလွန်ခြင်းကိုဖြစ်စေတဲ့ လွန်ကြူးစွာစားသောက်မိခြင်း အကြောင်းအရင်းတွေနဲ့ ဆေးကုသနည်းလမ်းများ တိုးတက်အောင် အကူအညီပေးနိုင်ဖွယ်ရှိပါတယ်။

အဝလွန်ခြင်းကနေ နှလုံးသွေးကြောရောဂါများ၊ ဆီးချိုရောဂါတို့ ဖြစ်ပွားနိုင်တာကြောင့် လူအများကျန်းမာရေးအတွက် သတိထားရမှာဖြစ်ပါတယ်။

အမေရိကန် ပန်စတိတ်ဆေးပညာကောလိပ်မှ ဒေါက်တာ'ကီယာစတင်းဘရောင်းနင်း'က ပြောကြားရာမှာ "ကယ်လိုရီဝင်ရောက်ခြင်းကို အက်စ်ထရိုဆိုက်တွေက ခဏတာထိန်းသိမ်းပေးပါတယ်၊ အက်စ်ထရိုဆိုက်တွေက အစာအိမ်ကိုထိန်းချုပ်ဖို့ရာ အချက်ပြလမ်းကြောင်းကို လှုံ့ဆော်ပေးပါတယ်၊ အဆီများတဲ့အစားအစာတွေကို ၄/၅ ရက်လောက် စားမိသွားရင် အက်စ်ထရိုဆိုက်တွေကို သက်ရောက်စေပါတယ်၊ ၁၀ ရက်ကနေ ၁၄ ရက်လောက်အထိ ဆက်တိုက်စားမိရင်တော့ အက်စ်ထရိုဆိုက်တွေက အလုပ်မလုပ်နိုင်တော့ဘဲ ကယ်လိုရီဝင်ရောက်မှု ထိန်းသိမ်းနိုင်စွမ်း ပျောက်ဆုံးသွားပါတယ်၊ ထိုအခါ အစာအိမ်သို့ အချက်ပြခြင်းကိုပါ အနှောင့်အယှက်ဖြစ်လာပြီး နှောင့်နှေးစေပါတယ်" လို့ ဆိုပါတယ်။

ပုံမှန်ဆိုရင် အစာခြေစနစ်ကနေ အစားအစာဖြတ်ဆင်းခြင်းကိုကြည့်ပြီး အစာအိမ်ပြည့်ပြီလား အစာမရှိဘူးလားဆိုတာကို တုန့်ပြန်စေပါတယ်။

အက်စ်ထရိုဆိုက်တွေ အလုပ်မလုပ်နိုင်တဲ့အခါ ထိုလုပ်ငန်းစဉ်ကြီး ထိခိုက်သွားပြီး အချက်ပြခြင်းနှောင့်နှေးသွားကာ အစာအိမ်ပြည့်လား မပြည့်လားဆိုတာကို မှန်ကန်အောင် သတင်းမပို့နိုင်တော့ပါဘူး။

ကြွက်တွေမှာ စမ်းသပ်ခဲ့တဲ့ရလဒ်တွေက လူတွေမှာလည်း အလားတူဖြစ်ပွားသလားဆိုတာကိုသိရဖို့ လူသားတွေနဲ့စမ်းသပ်ရဦးမှာဖြစ်ပါတယ်။

"အက်စ်ထရိုဆိုက်တွေ အလုပ်မလုပ်ဘဲ အချက်ပြခြင်းအားနည်းခြင်းကြောင့် အစားပိုစားမိတာလား ဒါမှမဟုတ် အစားပိုစားမိလို့ ဒီလိုဖြစ်ရတာလားဆိုတာကို သိရှိအောင် လေ့လာရဦးမှာပါ၊ ကယ်လိုရီထိန်းချုပ်နိုင်စွမ်း ပျောက်ဆုံးတာကို ပြန်လည်လှုံ့ဆော်ပေးဖို့ နည်းလမ်းရှိလားဆိုတာကိုလည်း သိချင်နေကြပါပြီ" လို့ ဒေါက်တာ'ကီယာစတင်းဘရောင်းနင်း'က ပြောကြားသွားပါတယ်။

Source: WION
#Yangon_Media_Group

#World_Industry
Published 3 February 2023

အမေရိကန်သမ္မတတွေအကြိုက်တွေ့ခဲ့တဲ့ ဘိုးအင်း747 လေယာဉ်အမျိုးစားတွေဲက နောက်ဆုံးလေယာဉ်ကြီးကို အင်္ဂါနေ့က အခမ်းအနားဖြင့် ပေးပို့ခဲ့ပါတယ်တယ်။

#Yangon_Media_Group

#DailyNews
Published_ 3 February 2023

၁။ ကျော်တက်မောင်းနှင်သည့် YBS ယာဉ်များအား စတင်အရေးယူဆောင်ရွက်နေဟုဆို

၂။ ကြက်သွန်ဈေးကွက် အရောင်းအဝယ်အေးနေ

၃။ မြန်မာ-ထိုင်းနယ်စပ်ကုန်သွယ်ရေးတွင် ထီးခီးနယ်စပ်ဂိတ်မှ အများဆုံးကုန်သွယ်ထား

၄။ အမေရိကန်သမ္မတများ စီးတော်ယာဉ်ဖြစ်ခဲ့သည့် ဘိုးအင်း 747 အမျိုးအစား လေယာဉ်များထဲမှ နောက်ဆုံးအစီးကိုပေးပို့ပွဲပြုလုပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Politics
Published 3 February 2023

သံသယဖြစ်ဖွယ် တရုတ်သူလျှိုပူဖောင်းတစ်လုံးဟာ အမေရိကန်ပြည်ထောင်စုကောင်းကင်ထက်မှာ ရက်အနည်းငယ်ကြာ ပျံသန်းနေကြောင်း အမေရိကန်အရာရှိများက ကြာသပတေးနေ့မှာ ပြောကြားလိုက်ပါတယ်။

အမေရိကန်နိုင်ငံခြားရေးဝန်ကြီး'အန်တိုနီဘလင်ကန်' ပေကျင်းသို့ လာရောက်မယ့်ခရီးစဉ်မတိုင်ခင် ရက်ပိုင်းအလိုမှာပဲဖြစ်ခဲ့တာကြောင့် ဒါဟာမျက်နှာပြောင်တိုက်တဲ့လုပ်ရပ်လို့ မှတ်ချက်ပြုလိုက်ပါတယ်။

အင်အားကြီးနှစ်နိုင်ငံဖြစ်တဲ့ တရုတ်နဲ့အမေရိကန်တို့ကြား တင်းမာမှုမြင့်တက်နေချိန်မှာ တစ်နိုင်ငံနဲ့တစ်နိုင်ငံ ထောက်လှမ်းစူးစမ်းဖို့ ဆန္ဒရှိနေကြတာဖြစ်ပါတယ်။

ပူဖောင်းတွေ့ရှိပြီးနောက် အမိန့်ရရင် ပစ်ချနိုင်ရန် တိုက်လေယာဉ်တွေစေလွှတ်ခဲ့ပေမယ့် ကောင်းကင်ပေါ်ကအပိုင်းအစတွေကြောင့် ဘေးအန္တရာယ်ဖြစ်မှာစိုးတဲ့အတွက် မပစ်ချဖို့ စစ်ရေးခေါင်းဆောင်တွေက သမ္မတ'ဂျိုးဘိုင်ဒင်'ကို အကြံပေးခဲ့ရာ သမ္မတကလည်း လက်ခံခဲ့ကြောင်းသိရပါတယ်။

အမေရိကန်လေပိုင်နက်ထဲ စပိုင်ပူဖောင်းဝင်လာချိန်မှာ စစ်တပ်လေယာဉ်ဖြင့် စောင့်ကြည့်နေခဲ့ကြောင်း အရာရှိတစ်ဦးက သတင်းထောက်တွေကို ပြောပြပါတယ်။

"အမေရိကန်ပြည်ထောင်စုတခွင်လုံးရဲ့ အပေါ်ကနေ အမြင့်ပေမြင့်မားတဲ့နေရာမှာ ပူဖောင်းတစ်လုံးကိုတွေ့ရှိထားပြီး ခြေရာခံစောင့်ကြည့်နေပါတယ်" လို့ ပင်တဂွန်ပြောရေးဆိုခွင့်ရှိသူ တပ်ချုပ်ဗိုလ်မှူး'ပက်ထရစ်ရိုင်ဒါ'က ဆိုပါတယ်။

"အဆိုပါပူဖောင်းက သတ်မှတ်ထားတဲ့ လေကြောင်းလုပ်ငန်းအမြင့်ကိုကျော်လွန်ပြီး သွားနေတာဖြစ်ကာ မြေပြင်ပေါ်ကလူတွေအတွက် အန္တရာယ်မရှိပါဘူး" လို့ ဆိုပါတယ်။

လာမယ့်ရက်သတ္တပတ်အတွင်း ဘလင်ကန်က တရုတ်ကိုလာရောက်ဖို့ အစီအစဉ်ရှိပြီး ယခုလိုစပိုင်ပူဖောင်းတွေ့ရှိခြင်းက ဘယ်လိုသက်ရောက်မှုရှိလာမလဲဆိုတာ မသေချာသေးပါဘူး။

"တရုတ်က ကျွန်တော်တို့ကိုဦးတည်ပြီး ထောက်လှမ်းလာတာဟာ ပြီးခဲ့တဲ့ ၅ နှစ်အတွင်း အရှိန်ပိုမြင့်လာပြီး မျက်နှာပြောင်တိုက်လာပါတယ်" လို့ အထက်လွှတ်တော်ထောက်လှမ်းရေးကော်မတီမှ ထိပ်သီးရီပတ်ဘလစ်ကန်'မာကိုရူဘီယို'က တွစ်တာမှာ ပြောကြားခဲ့ပါတယ်။

ယခုနောက်ပိုင်းနှစ်တွေမှာ တရုတ်နဲ့အမေရိကန်တို့ ဆက်ဆံရေးတင်းမာမှု မြင့်တက်လာကာ အထူးသဖြင့် အမေရိကန်အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်သို့လာရောက်ခဲ့ပြီးနောက် ထိုင်ဝမ်ကျွန်းအနီး တရုတ်တို့ စစ်ရေးပြမှုများ ပြုလုပ်ခဲ့ပါတယ်။

စပိုင်ပူဖောင်းကို အမေရိကန်သို့မဝင်ခင် အယ်လူရှန်ကျွန်းများနဲ့ ကနေဒါတို့မှာ ခြေရာခံမိခဲ့တယ်လို့ နောက်ထပ်အရာရှိတစ်ဦးကလည်း ဆိုပါတယ်။

အမေရိကန်အရာရှိတွေက ပေကျင်းနဲ့ ဝါရှင်တန်တို့ရှိ သံတမန်လမ်းကြောင်းတွေကနေတဆင့် အဆိုပါကိစ္စကို တရုတ်အရာရှိများထံ တင်ပြထားပါတယ်။

Source: Reuters
#Yangon_Media_Group

#World_Health
Published 3 February 2023

သင်ဟာ မျက်နှာသစ်တဲ့အခါ နည်းလမ်းမှားယွင်းနေတာမျိုး ဖြစ်နိုင်ကြောင်း အရေပြားကျွမ်းကျင်ပညာရှင်များက ဆိုပါတယ်။

အလွန်အမင်းပွတ်တိုက်ခြင်း၊ ရေပူအသုံးပြုခြင်း၊ မျက်နှာမိတ်ကပ်ဖျက်ဆေး အများအပြားသုံးစွဲခြင်းတို့က တကယ်ကိုအမှားကြီးတွေ ဖြစ်နေနိုင်ပါတယ်။

ထိုနည်းလမ်းတွေက သင့်အရေပြားရဲ့ သဘာဝအကာအရံကို ဖျက်ဆီးနိုင်ပြီး အသားအရည်ခြောက်သွေ့ကာ ချွေးပေါက်ပိတ်စေပါတယ်။

MailOnline က အရေပြားကျွမ်းကျင်ပညာရှင်များနဲ့ ပြောကြားကာ မျက်နှာအသားအရည်သန့်ရှင်းနေစေဖို့ ရှောင်ကြဉ်သင့်တဲ့ နည်းလမ်းတွေအကြောင်း ဆွေးနွေးခဲ့ပါတယ်။

(၁) သုံးစွဲသောအလှကုန်ပစ္စည်းများလွန်းခြင်း

ဆိုရှယ်မီဒီယာတွေမှာ ကြော်ငြာသမျှ ပစ္စည်းတွေ လိုက်လံသုံးစွဲတာကတော့ မဖြစ်သင့်ပါဘူး။

ဓာတုပစ္စည်းအများအပြားကို မျက်နှာပေါ်တင်တဲ့အခါ အရေပြားမှ သဘာဝအဆီဓာတ်တွေ ပျက်စီးပြီး ခြောက်သွေ့စေပါတယ်။

ဘာမင်ဂမ်ဆေးခန်းတစ်ခုမှ ဒေါက်တာ'ဆာလွန်မီဒါရာရှီ'က နံနက်ခင်းမှာ မျက်နှာသစ်၊ စိုစွတ်မှုပေးသောအရည်၊ SPF တို့ကိုသာ လိမ်းဖို့ဆိုပါတယ်။

ဒါ့အပြင် ဆပ်ပြာတုံးဖြင့် မျက်နှာသစ်ခြင်းက အရေပြားကို ကြမ်းတမ်းခြောက်သွေ့စေပါတယ်။

(၂) မျက်နှာကိုပွတ်တိုက်ခြင်း

မျက်နှာသစ်တဲ့အခါ ပွတ်တိုက်ခြင်းက ဆဲလ်သေတွေ၊ အဆီတွေ၊ အညစ်အကြေးတွေကို ဖယ်ရှားနိုင်တာမှန်ပေမယ့် ကျန်းမာတဲ့ဆဲလ်တွေကိုပါ ပါသွားစေနိုင်ပါတယ်။

အရေပြားရှိ ဆဲလ်သေတွေဖယ်ရှားဖို့ ကြမ်းကြမ်းတမ်းတမ်းမဟုတ်ဘဲနဲ့ နူးညံ့စွာဖြင့်သာ ပွတ်တိုက်သင့်ပါတယ်။

(၃) မကြာခဏမျက်နှာသစ်ခြင်း

တစ်နေ့ကို နှစ်ကြိမ်မျက်နှာသစ်ခြင်းက အသင့်တော်ဆုံးလို့ ပညာရှင်များဆိုကြပါတယ်။

နှစ်ကြိမ်ထက်ပိုရင်တော့ အရေပြားခြောက်သွေ့ခြင်း၊ အထိမခံခြင်း၊ အစက်အပြောက်ပေါ်ခြင်းတို့ ဖြစ်တတ်ပါတယ်။

(၄) ရေပူအသုံးပြုခြင်း

ရေပူကိုအသုံးပြုချင်တယ်ဆိုရင် အပူချိန်လျော့ကျအောင် ပြုလုပ်သင့်ပါတယ်။

ရေပူလွန်းခြင်း၊ အေးလွန်းခြင်းဟာ အဆီထွက်ခြင်းကိုပိုဆိုးစေပါတယ်။
ဒီအတွက် ရေနွေးနွေးဖြင့်သစ်ပေးခြင်းက မျက်နှာအတွက် အကောင်းဆုံးဖြစ်ပါတယ်။

(၅) တစ်ခါသုံးအဝတ်စဖြင့်မျက်နှာသုတ်ခြင်း

တစ်ခါသုံးမျက်နှာသုတ်အဝတ်စတွေက မျက်နှာကို တခဏအတွင်း သန့်စင်သွားစေပေမယ့် ပညာရှင်တွေကတော့ ဒါတွေဟာ ရေရှည်အတွက်မသင့်တော်ဘူးလို့ ဆိုကြပါတယ်။

ထိုအဝတ်စတွေက အညစ်အကြေးအားလုံးကို မဖယ်ရှားနိုင်တာကြောင့် အမှုန်အမွှားတွေကျန်ခဲ့ပြီး ချွေးပေါက်ပိတ်စေပါတယ်။

Source: Daily Mail
#Yangon_Media_Group

#World_Health
Published 3 February 2023

ယာဉ်ကြောပိတ်ဆို့မှုအတွင်း အချိန် ၂ နာရီမျှ လောင်စာဆီအိတ်ဇောငွေ့တွေကို ရှူရှိုက်မိပါက ဦးနှောက်လုပ်ဆောင်ချက်နဲ့ သိမြင်နိုင်စွမ်းတို့ကို ထိခိုက်စေကြောင်း လေ့လာတွေ့ရှိထားပါတယ်။

ယာဉ်ကြောပိတ်ခြင်းကနေထွက်ရှိတဲ့ လေထုညစ်ညမ်းမှုဟာ မှတ်ဉာဏ်ပြဿနာတွေနဲ့ ဆက်စပ်နေပြီး တာရှည်ထိတွေ့ခြင်းဖြင့် အန္တရာယ်ကြီးကြီးမားမား သက်ရောက်စေနိုင်ပါတယ်။

အချိန် ၂ နာရီအတွင်းမှာပင် ထိခိုက်မှုက ထင်ရှားကြောင်း ကနေဒါမှ သုတေသီများ တွေ့ရှိခဲ့ကြပါတယ်။

လေထုညစ်ညမ်းခြင်းက အာရုံကြောဆိုင်ရာကျန်းမာရေးကို ထိခိုက်စေရုံမက အကြောင်းအရာအမျိုးမျိုးကြောင့် အသက်ဆုံးပါးနိုင်ချေလည်း များစေပါတယ်။

ဗြိတိသျှကိုလံဘီယာတက္ကသိုလ်နဲ့ ဗစ်တိုးရီးယားတက္ကသိုလ်မှ သုတေသီများက အသက် ၁၉ နှစ်မှ ၄၉ နှစ်ကြား လူ ၂၅ ဦးကို သန့်စင်စစ်ထုတ်ထားတဲ့လေနဲ့ ဒီဇယ်အိတ်ဇောပါတဲ့လေတို့ကို မိနစ် ၁၂၀ ကြာအောင် သပ်သပ်စီရှူရှိုက်ခိုင်းခဲ့ပါတယ်။

အငွေ့မရှူခင်နဲ့ ရှူပြီးချိန်တို့မှာ MRI စကင်ရိုက်ကူးကာ ဦးနှောက်လှုပ်ရှားမှုများကို စစ်ဆေးခဲ့ကြပါတယ်။

အိတ်ဇောငွေ့တွေကို ရှူရှိုက်ခြင်းကြောင့် ဦးနှောက်ကနေ အခြားအစိတ်အပိုင်းနဲ့ ဆက်သွယ်ဆောင်ရွက်ချက်များ လျော့ကျသွားတာကို ‌တွေ့ရှိခဲ့ကြပါတယ်။

စိတ်ကျန်းမာရေးပညာရှင် ဒေါက်တာ'ယိုဒီဂေါ်ရီလုခ်'က ညစ်ညမ်းလေထုထိတွေ့ခြင်းဖြင့် သိမြင်နိုင်စွမ်းကျဆင်းကာ စိတ်ကျဝေဒနာခံစားရနိုင်ပါတယ်လို့ ဆိုပါတယ်။

ဒီတွေ့ရှိချက်တွေကို နောက်ထပ်လေ့လာဖို့လိုသေးပေမယ့် လူတွေရဲ့ တွေးခေါ်နိုင်စွမ်း၊ လုပ်ကိုင်နိုင်စွမ်းတို့ကို ထိခိုက်စေနိုင်တာတော့ အမှန်ဖြစ်နိုင်ပါတယ်။

Source: Daily Mail
#Yangon_Media_Group